Tibetan
འདུག་པས། ཡང་ཁོང་གི་ཞལ་ནས་འདི་སྐད་གསུངས། ཁྱེད་ཡེ་ཤེས་མཁའ་འགྲོ་དངོས་ཡིན་ཡང་མི་རུས་ངན་པ་དཔོན་ལ་གཏོགས་སོང་བའི་རྐྱེན་གྱིས་ཁྱེད་ཀྱིས་བཟང་ངན་ཅི་བསམ་ཡོད་གོ་དཀའ་བར་འདུག་པས། དེ་ལྟར་མ་བྱེད་པར་སྙིགས་དུས་ཀྱི་འགྲོ་བློ་དང་བསྟུན་ཏེ། རང་གཞན་གྱི་དོན་རེ་འབྱུང་ཐབས་རེམ་དགོས། ཁྱད་པར་ད་ལན་གནས་བསྐོར་ནས་ཚུར་བྱོན་དུས་ང་རང་ལཕ་འབབ་ཏུ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རིགས་གང་ཡིན་པ་གཅིག་གཏེར་ནས་བཏོན་ཏེ་ཁྱེར་འོང་ཐབས་མ་འཆུག་རེམ་རེམ་གསུངས་ནས། རིན་ཆེན་གཉིས་པ་དང་། ལྷ་རྫས་དབང་གི་མདངས་འཛིན་བཅས་གནང་སྟེ་ཐུགས་བསྐྱེད་སྨོན་ལམ་མཛད་འདུག །བདག་གིས་ང་བུ་དང་བུ་མོའི་གཏེར་ལོན་མི་ཞིག་ཡིན་མ་གཏོགས། རྒྱ་ཆེ་བ་ས་ཡི་གཏེར་ལོན་ཐབས་མི་འོང་འང་ཞུས་ཚེ། ཡང་ཁོང་གིས་ཁྱོད་གཏེར་སྟོན་བྱེད་འདོད་མེད་ཀྱང་གཏེར་གྱི་ལས་ལ་དབང་བ་ཡིན་པས་སྦས་གསང་མི་ཐུབ་ཅིང་རྟེན་འབྲེལ་གཞན་རྐྱེན་དུ་ཤོར་ངེས། དེ་བས་མ་གསང་བརང་ལ་དྲང་པོར་སྨྲོས་དང་། འུ་ཅག་སྐྱེ་སྔོན་སྨོན་ལམ་ལས་ཀྱིས་འབྲེལ་བ་ཡོད་པས་ན་གཅིག་ལ་གཅིག་བརྟེན་ནས་འགྲོ་དོན་ བྃ༔ རེ་འབྱུང་འོང་སྙམ་པས་དེ་ལུགས་དགོས། དེ་མིན་ང་རང་ཡང་གཏེར་ལ་དབང་བའི་རིགས་ཡིན་ཡང་། རྩ་བའི་བླ་མའི་བཀས་བཅད་ནས་གནང་བ་མ་ཐོབ་པས། ཁ་བྱང་དང་ཡང་བྱང་རྣམས་དགོན་ཁང་གི་གྱང་ལོགས་ན་སྦས་ཡོད་པས། ཁྱེད་རང་གི་ལག་ཏུ་རྗེས་སོར་འཕྲོད་དུ་འོང་། བདག་གིས་བླ་མའི་བཀའ་བཅག་མ་ནུས་ནས་མི་ཚེ་ཐ་མལ་དུ་ཟད་དོ། ད་ལོ་ཕོ་ལོ་བཞི་བཅུ་ཞེ་གཉིས་ལ་ཐོན་སོང་བ་ཡིན་པས། པད་འབྱུང་གི་ཐུགས་བཞེད་ལུས་བརྟེན་འདིར་འགྲུབ་ཐབས་མ་བྱུང་ཡང་། ཕྱིས་ནས་འགྲུབ་པའི་ཐབས་སྨོན་ལམ་རྣམ་པར་དག་པ་ལ་གཞི་བཟུང་ནས་ཡོདཔས། ཁྱོད་ཀྱིས་ཀྱང་དེ་ལྟར་ཐུགས་ལ་བཟུང་དགོས་གསུངས། ཡང་བདག་གིས་ང་རང་གཏེར་སྟོན་མིན་ངེས་པ་ཡིན་ཀྱང་། ཁྱོད་ཀྱིས་རེད་དགོངས་པ་ཡིན་འདུག་པས། ད་ཕན་ཆད་བདག་གིས་འཁྲུལ་སྣང་ཡི་གེའི་རིས་སུ་བགྱིས་པ་ཐམས་ཅད་ཐབས་གང་དྲག་གིས་མེད་དུ་མི་བྱེད་ལགས། རྟེན་འབྲེལ་ཡང་དེ་བཞིན་གནས་དུས་ཀྱི་རྐྱེན་དུ་མ་སོང་ཚེ། རང་གིས་སྤོབས་པའི་རོགས་ཙམ་བྱེད་ཞུས་ཚེ། ཁོང་ཐུགས་ཤིན་ཏུ་དགྱེས་ཏེ་ཐུགས་བསྐྱེད་དང་སྨོན་ལམ་མཛད་དོ། །དེ་ནས་ཟླ་བ་དེའི་ཚེས་བཅུ་དགུའི་ཉིན་ལམ་དུ་ཞུགས་ནས་སྨྲར་མཐའ་མའི་སྟོད་རྟ་ སྒའི་སུམ་མདོ་ཞེས་པའི་སར་ཐོན་སོང་བས། ང་རང་གི་ཞོན་རྟ་རྐྱང་རྒོད་ཟེར་བ་དེ་ལ་གློ་བུར་དུ་ནད་ཞིག་ཕོག་པས་བདག་གིས་ཅི་ཡིན་སྙམ་ཚེ། ཡུལ་དེ་ཀའི་བདག་པོ་བྲག་སྨན་ཞིག་ཡོད་པ་དེའི་ཆོ་འཕྲུལ་དུ་འདུག་པས། བདག་གིས་རང་ས་དེའི་ལམ་ན་དེ་ཀར་སྐེ་རག་བཀྲོལ་ནས་ཉལ་བསྡད་ཚེ། རྒྱལ་སྲས་སང་གིས་མཁའ་འགྲོ་ཁྱོད་ཀྱི་རྟ་འཆི་འགྲོ་བར་འདུག་ན་ཉལ་བསྡད་པས། ཅི་ཕན་ལམ་དུ་བཞུད་དང་། འུ་ཅག་གང་ཐོན་ཞིག་ཏུ་འགྲོ་གསུངས། བདག་གིས་ཅུང་ཟད་ཞིག་གཉིད་དགོས་ཞུས་ཚེ། ཁོང་ཐུགས་བརྒྱལ་བཞེས་ནས་བྱོན་སོང་། གྲོགས་གཞན་རྣམས་དང་། ཐུབ་བཟང་གིས་ཀྱང་ད་འུ་ཅག་འགྲོ་ཟེར་ཀྱང་ཁ་མ་ཉན། ལྷ་དཔལ་གྱིས་འོ་ན་རྟ་འདི་ཆད་སོང་བ་འདྲ། ང་རང་གིས་རྗེས་སོར་ནས་དལ་མོར་བྱས་ཏེ་བསྐྱངས་འོང་། ཁྱེད་ཅག་སྔོན་དུ་སོང་ལ་རྩྭ་ཆུ་འཛོམས་ས་ཞིག་ཏུ་འདུག་ཟེར། བདག་གིས་ཁྱེད་ཅག་སྔོན་དུ་སོང་ལ་དེ་ལྟར་གྱིས། ངེད་མི་རྟགཉིས་པོ་རྗེས་སུ་འདུག་སྟེ། ཁོ་རང་ཤི་སོང་ནའང་ང་རང་གིས་ཅི་ཤེས་ཀྱི་ཆོས་འདོན། མ་ཤི་གསོན་པོར་སོང་ན་ལྷན་དུ་ཐོན་འོང་སྨྲས་ཏེ་ཉལ་བསྡད་པས་བར་སྐབས་ཞིག་སོང་ཚེ་བུད་མེད་ཀྱི་སྐད་འདྲ་བ་ཞིག་གིས་ང་རང་ལ་འབོད་འདུག་པས། བདག་གིས་འདི་མི་ཞིག་ནི་ བྃ༔ ཡིན་དོན་མེད། ས་སྟོང་ལུང་པ་དམར་པོ་རེད་སྙམ་སྟེ་བཏང་སྙོམས་ལ་བསྡད་ཚེ། མོ་རང་དངོས་སུ་ཐོནབྱུང་ནས་བདག་གི་ཉེ་བར་གཅར་མི་ཕོད་པ་ལྟ་བུར་བྱེད་འདུག ། བདག་གིས་ཁྲོས་མའི་ང་རྒྱལ་གྱིས་དཔའ་ཟིལ་བཅོམ་ནས་དམ་ལ་བཏགས་པས་གནས་སྐབས་ཀྱི་རྐྱེན་ལས་གྲོལ་ཏེ་རྟ་ཕོ་ཡང་ནད་ལས་གྲོལ་སོང་། དེའི་སྐབས་སུ་རྒྱལ་སྲས་ཀྱི་སྐུ་ནུས་འཇིགས་མེད་དཀོན་མཆོག་དང་། དགེ་བཙུན་དཔལ་ལྡན་རྒྱ་མཚོ་གཉིས་ཐོནབྱུང་བས། ཁོང་གཉིས་ན་རེ། ཁྱོད་ད་དུང་དེ་ཀར་འདུག་པ་ཅི་ཡིན། ངེད་གཉིས་འགོར་སོང་བ་ཨེ་ཡིན་ཟེར། བདག་གིས་ཁྱོད་གཉིས་འགོར་ཆེ་བ་མིན། འུ་ཅག་གི་རོགས་པ་ཐམས་ཅད་སྔོན་ལ་བུད་སོང་བས། ད་ལྟ་ཁྱོད་གཉིས་ཀྱི་ལམ་གང་དུ་སོང་མི་གོ་སྙམ་པ་དང་། མིན་ཀྱང་ངེད་མི་རྟ་གཉིས་ངལ་དུབ་ཆེ་བས་ཅུང་ཟད་གཉིད་བསྡད་པ་ཡིན་སྨྲས་པས། དཔལ་རྒྱམ་ན་རེ། ཨ་ལེ་འདིས་ཅི་གསུངས་གི །ད་ལན་ངེད་གཉིས་རྗེས་ནས་འོང་རྒྱུ་ཡིན་པས་སྐྱོན་མེད་པ་འདྲ་ན། དཕན་ཆད་ས་སྟོང་ལ་བཞུགས་མི་ཉན་མ་གཏོགས་དགྲ་ཁྲམ་དང་འཕྲད་འགྲོ། མིན་ཀྱང་དྲེད་མོ་ཡང་ཡོད་ཟེར། བདག་གིས་མདོ་འདྲ་མའི་གླུ་འདི་བླང་བ། ཉོན་དང་དམ་ལྡན་གྲོགས་པོ་གཉིས། །སྤྲང་ མོ་སྐལ་བཟང་སྒྲོན་མ་ང་། །ཕྱི་ནང་གསང་བའི་དགྲ་ཁྲམ་གྱིས། །འཕྲོག་བཅོམ་བྱེད་རྒྱུ་མ་རྙེད་ནས། །དུས་ཀུན་རི་རྒྱབ་གཏིང་རྒྱབ་ན། །བདག་མདོ་འདྲ་མ་ཡི་ཉམས་ཤར་ནས། །ཕ་ཡུལ་རྒྱལ་སྲིད་ལོངས་སྤྱོད་སྤངས། །མི་ཡུལ་མཐའ་འཁོབ་སྲིན་གླིང་འདིར། །ཟས་ནོར་ཆེད་དུ་སྒྲུབ་མ་མྱོང་། །རང་ལ་དབང་བའི་རྒྱུ་རྫས་ལ། །ཁབ་སྐུད་ཙམ་ཞིག་འཛིན་ཞེན་མེད། ཕྱིའི་དགྲ་ཁྲམ་མེད་དོན་དེ་ལས་བྱུང་། །ནང་ཉོན་མོངས་སྤངས་བའི་བྱ་བྲལ་མ། །སྒོ་ལྔའི་ཡུལ་ལ་སྤང་བླང་མེད། །ཉོན་མོངས་ཡེ་ཤེས་ལྔ་ཡི་དབྱིངས། །འཛིན་ཞེན་འཁྲུལ་པའི་འབྱུང་ཁུང་ཟད། །ནང་དགྲ་ཁྲམ་མེད་པ་དེ་ཡིས་ལན། །གསང་བ་དོན་གྱི་རྣལ་འབྱོར་མ། །འཁོར་འདས་གཉིས་མེད་རིག་པར་རྟོགས། །གང་ཤར་རང་གྲོལ་ཡེ་ཤེས་ངང་། །མ་རིག་གཟུང་འཛིན་འཕྱང་བ་གྲོལ། །ཐམས་ཅད་སྐུ་གསུམ་མཉམ་པ་ཉིད། །གསང་བའི་དགྲ་ཁྲམ་སྤྲོས་པ་ཞི། །དུས་ཀུན་ཆོས་མེད་སྤྲང་མོ་ང་། །ཁྱབ་བརྡལ་ནམ་མཁའི་ས་སྟོང་ལ། །འོདགསལ་རྒྱུན་ཆད་མེད་པར་ཉལ།།སྐུ་གསུམ་ཡེ་ཤེས་གྲོགས་དང་འགྲོགས། །རིག་པའི་ཁྱེའུ་ཆུང་པང་དུ་བླང་། །སྙན་རྒྱུད་ཟབ་མོའི་ནུ་ཞོ་བླུད། །ལྟ་སྒོམ་སྤྱོད་པའི་ལུས་རྩལ་རྫོགས། །ཀུན་བཟང་ཆོས་ བྃ༔ སྐུའི་རྒྱལ་སྲིད་དབང་། །གཞོན་ནུ་བུམ་སྐུའི་གཏན་སྲིད་ཟིན། །སྲིད་ཞི་གཉིས་ལ་ང་མི་གནས། །མདོ་མེད་སྤྲང་མོའི་སྤྱོད་པ་ལ། །ཁྱོད་ཀྱིས་ཚད་བཟུང་བྱེད་ཐབས་བྲལ། །ཞེས་སྨྲས་པས། ཁོང་གཉིས་ན་རེ། ཁྱོད་ཀྱིས་དེ་ལྟར་ཡི་གེའི་རིས་སུ་བྲི་དགོས་ཡང་ཡང་ཟེར་འདུག །བདག་གིས་ད་འུ་ཅག་འགྲོ་རན་པས་ད་ལྟ་རྒྱལ་སྲས་ནས་བཀའ་བསྐྱོན་གནང་འོང་། །མིན་ཀྱང་བདག་གི་རྫུན་གཏམ་གླུ་རུ་བླང་བ་ལ་ཟད་མཐའ་མེད་པས་བྲི་ཚོད་མེད་སྨྲས་ནས། ངེད་ཅག་ལྷན་དུ་སོང་བས་སྒ་གཞི་བར་སྐབས་ཞིག་ཏུ་བསྡད་འདུག་པས། དེ་ཀར་སོང་ནས་རྟ་རྒན་རྟ་ཡི་གྲལ་དུ་མངགས་ནས་སྒ་ཁུར་སྲབ་འཛིན་བྱེད་ཅིང་སོང་བས། ལྷ་དཔལ་ན་རེ། ཁྱོད་ཀྱི་རྟ་ཤི་ཨེ་སོང་ཟེར། བདག་གིས་རྟ་ཕ་གི་རེད་ཤི་མེད་སྨྲས་པས། རྒྱལ་སྲས་33 སང་གིས་ཁྱོད་ཀྱི་རྟ་ན་བ་མ་ཡིན་པ་འདྲ། རྗེས་ནས་འོང་རྒྱུའི་མགྲོན་པོ་གཉིས་ལ་སེམས་ཆགས་ནས་མ་འོང་བ་རེད་གསུངས། བདག་གིས་དེ་ལྟར་མིན་པས་ལོ་རྒྱུས་ཞིབ་པར་ཞུས་ཀྱང་ཐུགས་མ་དག་ནས་བྱ་ཐབས་བྲལ། དེ་ནས་རིམ་གྱིས་སོང་སྟེ་ཁོ་མདའ་ཞེས་པའི་སར་སྡོད་ནུབ་རྨི་ལམ་ལ་བུད་མེད་མཛེས་ཤིང་ཡིད་དུ་འོང་བ་ཞིག་གིས་འདི་སྐད་ཟེར། ཧེ་ཧེ། མཁའ་འགྲོའི་གླིང་ནས་ འོང་བའི། །བཞིན་མཛེས་ཌཱཀྐི་ང་རང་། །ཁྱོད་ཀྱིས་ཤེས་སམ་ཨེ་ཨེ། །ག་ག་ཧྲཱི་དའི་ཟློས་གར། །བྲག་གི་སྤྲེའུའི་ལོ་ཁུར། །ཤར་སྟོད་ཕྱོགས་ནས་བསྒྲོད་དེ། །རྟེན་འབྲེལ་ལྷན་དུ་འཛོམས་ན། །སྤྲེའུ་རྫོང་གི་ཟབ་གཏེར། །ཚུལ་བཞིན་ལོན་པ་ཨེ་ནམ། །སྨོན་ལོག་སབྟས་བསྒྱུར་ཅིང་། །རྟེན་འབྲེལ་གནད་ཟབ་ཡོལ་ཚེ། །ཁྱེད་ཀྱང་ལྷོ་ནས་ལྷོ་རུ། །སྨོན་ལམ་དབང་གིས་བསྒྲོད་དེ། །པདྨའི་ཐུགས་བསྐྱེད་ནུས་པས། །རང་སྐལ་གྲོགས་དང་འཕྲད་ནས། །འགྲོ་དོན་འབྱུང་བ་ཨེ་ནམ། །ཨ་ཙར་སྨོན་ལམ་མྱུ་གུ། །གཡང་དཀར་ལོ་ཡིས་བསུས་ཏེ། ཁྱོད་ཀྱིས་ཡན་ལག་སེམས་དཔའི། །ཚུལ་དུ་ངོམས་པ་ཨེ་ནམ། །བུ་ཆེན་ཉེར་ལྔའི་ཐོག་མ། །གངས་མིན་ཆགས་པའི་གནས་ཀྱི། །མི་རིང་རང་གནས་ཕྱོགས་ཆར། །ལང་འགྲོ་བི་མའི་རྣམ་རོལ། །མདོ་འཛིན་སྔགས་ཀྱི་རྣལ་འབྱོར། །བཞི་ཡི་ཐོག་མའི་མིང་འཛིན། །བཞིན་གཡོན་སྨེ་བའི་ཚོམ་བུ། །ནོར་བུའི་དབྱིབས་སུ་རྟགས་གསལ། །དེ་ལ་རང་སྐལ་ཟབ་གཏེར །ཁྱུ་མཆོག་ལོ་ལ་འཕྲོད་ན། །ཚེ་ཕྲེང་སེལ་བ་ཨེ་ནམ། །ཤར་གྱི་ཐང་དཀར་རྒོད་པོ། །ནུབ་ཀྱི་རྨ་བྱའི་མདངས་ཀྱིས། །གཟི་མདངས་རྒྱས་པ་ཨེ་ནམ། །གསེར་གྱི་དབྱར་ལྔའི་ བྃ༔ སྒྲ་ལ། །བཛྲ་མིང་དང་འཕྲད་ངེས། །དེ་ལ་རིག་པས་དཔྱོད་ལ། །སྟབས་ཀ་གཟབ་པ་གལ་ཆེ། །གསལ་གསལ་མཁའ་འགྲོའི་བརྡ་ཚིག །ཙིཏྟའི་སྒྲོམ་དུ་སྦས་རྒྱ། །ཞེས་ཟེར་ཞིང་མི་སྣང་བར་གྱུར་ཏོ། །ནང་སྔ་མོ་སྐྱོ་ཚ་འཐུང་སྐབས་བརྡ་དོན་རྣམས་ཅི་ཡིན་སྙམ་ཡོད་ཚེ། གཟུགས་མེད་རླུང་གི་སྒྲ་ལས་འདི་སྐད་ཐོས། ཁྱོད་ཀྱིས་བརྡ་དོན་ནི་སྤྲེལ་རྫོང་གི་གཏེར་གྱི་ཐབས་གྲོགས་དང་ཆོས་བདག་སོགས་ཀྱི་ལུང་བྱང་རེད། ད་ལྟ་ཁྱོད་དང་ལྷན་དུ་ཡོད་པ་རྐང་འདྲེན་ཕོ་མོ་གཉིས་དེ་སྨོན་ལམ་ལོག་པའི་སྐྱེས་བུ་ཡིན་པས་སྟབས་གཟབ་ཤིན་ཏུ་གལ་ཆེ་ཟེར་བ་ཐོས། དེ་ནས་རིམ་གྱིས་སོང་བས་བར་སྐབས་གཙང་སྐོར་ནང་དུ་ཐོན་དུས་གཞན་རྐྱེན་ཞིག་ལ་ལྟོས་ནས་རང་གི་རྐང་པ་ནད་དྲག་པོས་གདུང་ཞིང་ཅི་དགོས་སྙམ་པབྱུང་ཚེ། རྒྱལ་སྲས་སང་དང་། ལྷ་དཔལ། རིན་ཆེན་སྒྲོན་མ་རྣམས་གྲོས་མཐུན་པས་བཏང་སྙོམས་ལ་བཞུགས། གཞན་རང་སློབ་ཐུབ་བཟང་དང་། དཔལ་ལྡན་རྒྱ་མཚོ་རྒྱལ་སྲས་སྐུ་ནུས་འཇིགས་མེད་དཀོན་མཆོག བཙུན་མ་ཆོས་ཕྲེང་ལ་སོགས་པའི་ཆོས་གྲོགས་རྣམས་ཀྱིས། བདག་གི་སྐུ་རིམ་ལ་རང་རང་འཚམས་པའི་གང་ཤེས་ཀྱི་ཡིག་འདོན་སོགས་བྱས་ཚེ་རིམ་གྱིས་ནད་ལས་གྲོལ་ཏེ། རྨ་ཆེན་གྱིས་བསུ་ མར་འོང་བ་སོགས་དང་། ལུང་བསྟན་རྣམས་གཏེར་གཞུང་དུ་གསལ། དེ་ནས་རྟ་མཆོག་ལ་ཁའི་ཐད་དུ་སྒར་བསྡད་སྐབས། རྨ་རྒྱལ་སྒོ་སྲུང་དབང་ཕྱུག་མ་བདུན་གྱི་བརྡ་བྱང་བསྐལ་བ་ལ་བརྟེན་ནས། དགུང་མོ་དབང་གི་དུས་སུ་བཙུན་མ་ཆོས་ཕྲེང་དང་། མཁའ་སྤྱོད་སྒྲོན། བདེ་ཆེན་སྒྲོན་མ། རང་གི་བུ་མོ་ཆོས་དབྱིངས་སྒྲོན་མ་དང་། དམ་ཚིག་གི་རྟེན་དུ་མགར་གཏེར་རིན་པོ་ཆེའི་སྐུ་སྲས་འདུལ་བ་འཛིན་པ་འཇིགས་མེད་དཀོན་མཆོག་བཅས་གངས་རིའི་ཉེ་ཆར་དབང་ཕྱུག་མ་བདུན་གྱི་གནས་སུ་སོང་ཚེ། བར་སྣང་ཐམས་ཅད་འཇའ་ཡི་སྤྲིན་ཕུང་གྱེན་འགྲེང་དང་། རྩིབ་གུག །ཟླ་གམ། པདྨའི་དབྱིབས་ཅན་ལ་སོགས་པས་གང་འདུག་པས། ཁོང་རྣམས་ན་རེ། འདི་ནི་ཡ་མཚན་ཤིན་ཏུ་ཆེ་བ་ཞིག་གདའ་བས་འུ་ཅག་རྣམས་ཀྱིས་དངོས་གྲུབ་ཞིག་ལོན་པ་འདྲ་ཟེར། བདག་གིས་ཅི་ཡང་མ་སྨྲས།དེ་ནས་གཏེར་སྒོ་ཡོད་སར་ཐོན་སོང་བས་སྔར་གྱི་འཇའ་སྤྲིན་རྣམས་ཀྱི་སྟེང་དུ་མཆོད་པའི་ལྷ་མོའི་སྐུ་གཟུགས་ལྟ་བུའི་ཕྱག་ན་མཆོད་རྫས་ཐོགས་པ་འདྲ་བ་མང་པོ་གཏེར་གནས་ལས་ཅུང་ཟད་དམའ་བའི་གཡས་གཡོན་དུ་འགྲེང་ངེར་གནས་འདུག་པས། ཁོང་རྣམས་ངོ་མཚར་ནས་དེ་དག་གི་ཕྱོགས་སུ་ཕྱག་འཚལ་ཞིང་སྨོན་ལམ་བཏབ་པ་སོགས་ བྃ༔ བྱེད་འདུག །དེ་སྐབས་ལམ་ཐག་རིང་བའི་སྟོབས་ཀྱི་ཉི་མ་མེད་པ་ཡིན་པས་སྤྲིན་གསེབ་རྣམས་ནས་ཉི་མའི་འོད་ལྟ་བུའི་ངེད་ཅག་གི་ཉེ་འཁོར་དང་། ཁྱད་པར་གཏེར་སྒོ་མཐོང་སྣང་གསལ་བས། བདག་གིས་ཁོང་རྣམས་ལ་འདི་སྐད་སྨྲས། ཁྱེད་རྣམས་སོང་ལ་བྲག་འདི་ལ་བསྐོར་བ་གྱིས་དང་། བུ་མོ་ནར་ཆུང་བ་དང་། ང་རང་རྐང་པ་ངན་པས་སྐོར་མི་ཐུབ་པ་འདྲ་ན་གནས་འདི་ཀ་ནས་ཁྱེད་ཅག་སྒུག་འདུག་སྨྲས་ཚེ། ཁོང་རྣམས་བསྐོར་བ་ལ་བུད་སོང་བའི་རྗེས་སུ། བདག་གི་གཏེར་སྒོ་གསང་གྲོགས་བི་མ་ལ་རསྨིའི་དབུ་ལྗོན་གྱིས་དཀྲིས་པའི་རྡོ་རྗེའི་བརྡ་བྱས་པའི་ཚེ། དེ་མ་ཐག་པར་གཏེར་སྒོ་ཟླ་གམ་ལྟ་བུ་ཞིག་ཕྱེད་སོང་བའི་ནང་ནས་རྡོ་རྗེ་ཕག་མོའི་ཟབ་སྒྲུབ་རྡོ་རྗེའི་རྒྱ་ཅན་གྱི་གཏེར་སྒྲོམ་རིན་ཆེན་བསྭེ་ཡི་སྒྲོམ་བུ་གཅིག་དང་། དབྱངས་ཅན་མའི་སྐུ་རྡོ་ཀ་མ་རུ་པ་ལས་གྲུབ་པའི་མཁའ་འགྲོའི་མཛུབགང་གི་ཚད་ཙམ་དང་། གསང་ཁྲིད་ཡ་བཞིའི་གཏེར་ཤོག་རུ་ཏྲའི་སྙིང་ཤུན་མཐོ་གང་བ་གཅིག་དང་། གཡུ་སྒྲོམ། མཆོང་སྒྲོམ། ལྭ་སྒྲོམ་གསུམ་དང་། གཞན་ཡང་ཆོས་སྨན། གུར་གུམ། མྱོང་གྲོལ་གྱི་རིལ་བུ་རྣམས་སྤྱན་དྲངས་ནས་གཏེར་ཚབ་ཕུལ། ཐུགས་རྟེན་དང་ཕྲིན་ལས་ཀྱི་སྒྲོམ་རྣམས་ཐབས་གྲོགས་ཆོས་ བདག་དངོས་མ་ལྡན་ནས་རྟེན་འབྲེལ་ལ་རྗེས་མཐུད་དུ་ལུས། དེའི་སྐབས་ལུང་པར་དྲི་བཟང་གི་ངད་ལྡང་ཞིང་གཏེར་གནས་ནས་གྲུབ་ཆུ་བརྡོལ་བ་དང་། ས་གཡོ་ཞིང་སྒྲ་ལྡིར་བ་སོགས་བྱུང་བའི་ཚེ། ཁོང་རྣམས་ཀྱང་ཅི་ཡིན་སྙམ་ནས་མྱུར་བར་ཐོན་བྱུང་བས་འདི་སྐད་ཟེར། ཁྱོད་ཀྱིས་གཏེར་ཞིག་བླངས་ཡོད་ངེས་པ་རེད། ངེད་ཅག་ལ་མཇལ་ཁ་སྟོན་རོགས་དགོས། བདག་གིས་ང་རང་གི་བུ་མོ་ཞིག་གཏེར་ནས་ལོན་ཡོད་འདི་རེད། ད་བུ་ཞིག་ཨེ་ལོན་སྙམ་གི་སྨྲས་ཚེ། ཆོས་ཕྲེང་ན་རེ། ཁྱོད་ཀྱི་སྲས་མོའི་གཏེར་མཇལ་ཚར། ད་ལན་དྲི་བཟང་གིས་ཁྱབ་པའི་གཏེར་དེ་མཇལ་དགོས་ཡང་ཡང་ཟེར། བདག་གིས་མཁའ་འགྲོའི་དམ་ཚིག་ལ་བསམ་ཞིང་རྫུན་ངེས་པ་བཤད་མ་ཕོད་ནས། ད་ཁྱོད་ཅག་གིས་སྤྲིན་གསེབ་ཀྱི་ལྷ་མོ་རྣམས་ལ་ནི་ཕྱག་ཕུལ་ཚར་བས། ད་ང་རང་དང་གནས་འདི་ལ་ཕྱགཕུལ་དང་། བདག་གིས་གྲུབ་ཆུ་ཞིག་གཏེར་གྱི་ཚུལ་དུ་བཏོན་ཡོད་པས། དེ་ལ་ཐམས་ཅད་ཀྱིས་ཁ་རེག་གྱིས་དང་། གནས་ཀྱི་དངོས་གྲུབ་རེད་སྨྲས་ཚེ། ཁོང་རྣམས་ན་རེ། བྲག་སྐམ་འདི་ལྟ་བུ་ནས་ཆུ་མིག་རང་བྱུང་གློ་བུར་དུ་རྡོལ་བ་དེ་ཀ་ངོ་མཚར་ཆེ་ཟེར། ཐམས་ཅད་ཀྱིས་བདུད་རྩི་ཁ་རེག་བྱས་ཚེ་རོ་ནུས་ཀྱང་མི་འདྲ་བ་དང་། དྲི་བཟང་གི་ངད་པ་ལྡང་ བྃ༔ འདུག་ཟེར། དེའི་ཅུང་ཞིག་གི་གྲུབ་ཆུ་ཇེ་ཉུང་ངུ་སོང་བ་དང་མཉམ་དུ། སྔར་གྱི་འཇའ་སྤྲིན་ཐམས་ཅད་ནམ་མཁའ་ལ་ཐིམ་ནས་རི་ཀླུང་ཐམས་ཅད་ནག་ངམ་ངམ་སོང་ཚེ། ཁོང་རྣམས་ན་རེ། ད་འུ་ཅག་གི་ཕྱི་ལམ་ཆོད་དཀའ་བས་ཅི་དགོས་ཟེར། བདག་གིས་བླ་མ་དཀོན་མཆོག་ལ་གསོལ་བ་བཏབ་ན་ཕྱི་མའི་ཡུལ་གྱི་བར་དོ་ཡིན་ཡང་ཆོད་འགྲོ་ན། དའུ་ཅག་དོ་ནུབ་ཀྱི་ལམ་ཆོད་འགྲོ་ངེས་པ་ཡིན། འོན་ཀྱང་སྤྲུལ་སྐུ་རྒྱལ་སྲས་ཀྱིས་ཅི་གསུང་འོང་སྙམ་གི་སྨྲས་ཚེ། ཆོས་ཕྲེང་ན་རེ། རྒྱལ་སྲས་ལ་གསུང་དབང་ཐོབ་པ་ཡིན་པས་གསུང་དུ་ཆུག །འུ་ཅག་རྣམས་ཉན་སྐལ་བབ་པ་འདྲ་བས་ཉན་མ་བསྡད་ཅི་ཐབས། མདོར་རྩ་ངེད་ཅག་གིས་ད་ལན་གྱི་དོན་ཆོད་པ་དེ་ཀ་བཟང་། ད་ལྟ་ང་རང་སྔོན་ལ་ཁྱིམ་དུ་འགྲོ་དང་། བཀའ་བཀྱོན་དང་ཕྱག་འབེབས་གནང་ཡང་ང་ནི་མི་སྐྲག་ཟེར། དེ་ནས་ངེད་ཅག་རྣམས་ཕྱིར་ལོག་ནས་ས་ལམ་ཨེ་ཆོད་བལྟས་ཚེ། རྫ་གངས་ཕ་ཝཾ་རྣམས་ཀྱིས་ལམ་བཅད་ནས་བསྒྲོད་དཀའ་བར་འདུག་པས། བདག་གིས་བླ་མ་དཀོན་མཆོག་ལ་གསོལ་བ་བཏབ་པའི་རེ་འབྲས་ལ་མེ་འོད་མཐེ་བོང་ཙམ་ཞིག་ངེད་ཅག་རྣམས་ཀྱི་སྔོན་དུ་ལམ་གར་ཡོད་དུ་འགྲོ་འདུག་པས། དེའི་རྗེས་སུ་ངེད་རྣམས་སོང་བའི་ལམ་ལ་ དཀའ་ཚེགས་མེད་པར་བསྒྲོད་ནུས་པ་བྱུང་ཚེ། ཁོང་རྣམས་ངོ་མཚར་ཆེ་ཟེར་ཞིང་ཡིད་ཚིམས་པར་བྱེད་དོ། །དེ་ནས་སྒར་གཞི་ཡོད་སར་ཐོན་ཚེ། ཆོས་ཕྲེང་མོ་རང་སྔོན་དུ་བུད་སོང་བས་དེ་མ་ཐག་པར་ཕྱིར་ཐོན་བྱུང་། བདག་གིས་ཁྱོད་ཅིའི་ཕྱིར་འོང་བ་ཡིན་སྨྲས་ཚེ། མོ་ན་རེ། རྒྱལ་སྲས་དཔོན་གཡོག་ཐམས་ཅད་གཟིམ་ཚར་འདུག །ཐུབ་བཟང་གཅིག་པུས་འུ་ཅག་བསྒུག་བསྡད་འདུག་པས། ཁྱེད་ཅག་གིས་འུར་དིར་མི་བྱེད་པར་ག་ལེར་ཤོག་ཟེར། དེ་ལྟར་བྱས་ཏེ་ཁྱིམ་དུ་སོང་ནས་ཐམས་ཅད་ཇ་འཐུང་དུ་ཡོད་སྐབས། ལྷ་དཔལ་གྱིས་ངེད་རྣམས་ཐོན་པ་གོ་ནས་འཇིགས་མེད་དཀོན་མཆོག་ལ་ཚིག་ངན་རེ་བྱེད་པ་མ་གཏོགས། ང་རང་ལ་བཟང་ངན་གཉིས་ཀ་མི་ཟེར་ཀྱང་སེམས་བབ་མེད་པའི་རྣམ་འགྱུར་མངོན་ཚེ་བདག་གིས་ལམ་ཐག་རིང་བ་དང་ལམ་འཕྲང་རྩུབ་ལུགས་ཐམས་ཅད་སྨྲས་ཚེ། ཁོ་ན་རེ། ལམ་ང་རང་ལ་ཆ་ཞིབ་ཡོད་ཟེར། དེ་ནས་ནང་སྔ་མོ་དཔལ་རྒྱམ། ཐུབ་བཟང་། རིན་སྒྲོན། རྒྱལ་སྲས་སང་བཅས། ངེད་ཅག་འགྲོ་སའི་གནས་ངོས་ལ་བྱོན། དེ་མིན་ཐམས་ཅད་ལམ་དུ་བཞུད་ནས་སྔར་སྒོ་སྤྲུལ་གྱིས་གསུངས་བཞིན་མོ་བ་གཏོ་བ་ཡོད་སར་གནས་བཅས་ཏེ། སང་སྔ་མོ་རྒྱལ་སྲས་སྐུ་མཆེད་གཉིས་དང་། ལྷ་ བྃ༔ དཔལ དཔལ་ལྡན་རྒྱ་མཚོ་ཐུབ་བཟང་རྣམས་འཇམ་དཔལ་གྱི་སྒྲུབ་ཕུག་བཙལ་དུ་སོང་བས། སྒོ་སྤྲུལ་གྱིས་གསུངས་ལྟར་ཕུག་པ་རྙེད་ནས་ཐམས་ཅད་ཕྱིར་ཐོན་བྱུང་། བདག་གིས་ཕུག་པ་ཁྱེད་རྣམས་ཀྱིས་ལོན་པ་ངོ་མཚར་ཆེ། ད་རྒྱལ་སྲས་སང་སྐུ་མཚམས་ལ་བཞུགས་དགོས་སྨྲས་ཚེ། ལྷ་དཔལ་ན་རེ། སྒོ་སྤྲུལ་གྱིས་ཅི་མི་གསུང་། ཕུག་པའི་ནང་དུ་བྱ་རྒོད་པོ་མ་གཏོགས་བཟུང་ས་མི་འདུག་པས། རྒྱལ་སྲས་ཀྱི་སྲོག་གི་ཕར་འཕོང་དགོས་དོན་ཅི་ཡང་མེད། མཚམས་ལ་འདུག་རྒྱུ་ཕར་ཞོག་ཉིན་གཅིག་ཡང་འདུག་མི་བཅུག །གལ་ཏེ་ཁྱོད་རང་ཚོས་དེ་ལྟར་འདུག་དགོས་ཟེར་ཀྱང་། ང་རང་ནི་བློ་གྲོས་ཀྱི་གྲབ་ན་མེད་ཟེར་བས། རྒྱལ་སྲས་ནས་ཀྱང་ཨ་ཁུའི་སྨྲས་པ་བདེན་གསུངས་ཤིང་རྟེན་འབྲེལ་བཏང་སྙོམས་ལ་སོང་། དེ་ནས་དགྲ་འདུལ་དབང་ཕྱུག་གི་གནས་སུ་ཐོན་ཚེ། ཐམས་ཅད་ཀྱིས་བསངས་མཆོད་རླུང་རྟ་བཏང་བ་སོགས་བྱེད་སྐབས། བཙུན་མོ་གྲགས་རྒྱལ་མ་ཡིན་སྐད་པའི་བུད་མེད་མཛེས་ཤིང་ཡིད་དུ་འོང་བ། ཟ་འོག་སྔོ་ཁྲའི་ལྭ་བ་གཡང་ལུགས་སུ་གསོལ་ཞིང་རིན་པོ་ཆེ་དུ་མས་བརྒྱན་པ་ཞིག་རྨ་བྱ་ལ་ཞོན་ནས་བདག་གི་སར་ཐོན་བྱུང་བས། བདག་གིས། བཞིན་མཛེས་ཡིད་འོང་མཐུ་རྩལ་ ཅན། །ས་འཛིན་སེམས་དཔའི་ལྕམ་གཅིག་མ། །བསྟན་སྐྱོང་ཆེན་མོ་གྲགས་རྒྱལ་མ། །བཅུད་གཡང་དངོས་གྲུབ་སྟེར་བའི་མ། །གནམ་སྨན་རྒྱལ་མོ་ཡོངས་ཀྱི་མ། །མ་ཆེན་ཁྱོད་ལ་བདག་གིས་བསྟེན། །ལས་ཀུན་རབ་འབྱམས་མྱུར་འགྲུབ་མཛོད། །ཅེས་སྨྲས་ཚེ། མོ་ན་རེ། དཔའ་བོ་རྣམས་ཀྱི་སྲིང་གཅིག་མ། །རིག་འཛིན་རྣམས་ཀྱི་གསང་གྲོགས་མ། །བདག་ཅག་སྐྱེ་རྒུའི་མགོན་དུ་བརྟེན། །གནས་མགྲོན་དམ་ཚིག་གཅིག་ཏུ་བསྲེ། །ཞེས་ཟེར་ནས་ཤེལ་གྱི་བུམ་པ་ཚོན་གང་བ་ཙམ་གྱི་ནང་དུ་རིལ་བུ་མཐིང་ནག་ཡུངས་འབྲུའི་ཚད་ཙམ་ཡོད་པ་གང་བླུགས་ནས་བདག་