Tibetan
ཀྱིས་གསལ། རྒྱལ་སྲས་ལ་བསྐུར་རྒྱུའི་ཡི་གེ་ང་རང་གིས་མ་མཐོང་ཅི་གསུངས་ཡོད་མ་གོ་སྨྲས། དེ་ནས་ངེད་དཔོན་གཡོག་འབྲོང་སྐོར་ལ་སོང་ནས་རིམ་གྱིས་ཡིད་བཞིན་ནོར་བུའི་སྐུ་མདུན་ལ་སོང་ནས་མཇལ་འཕྲད་མཛད་ཅིང་ཞག་ཆ་ཤས་བཞུགས་ཏེ། སྤྲུལ་སྐུ་རྣམས་ཀྱིས་དབང་ལུངགསན་རེས་མཛད། ཁྱད་པར་ང་རང་རྗེ་དེ་ཉིད་ཀྱིས་སྨིན་གྲོལ་ལ་བཀོད་ནས་མིང་གི་ཅོད་པན་སྩལ། དེ་ནས་རང་གཏེར་ཆོས་ཉིད་མཁའ་འགྲོའི་གསང་མཛོད་ཀྱི་ཁ་བྱང་རྗེའི་བཀའ་མ་བཟོད་ནས་ཕྱག་ཏུ་ཕུལ་བས་ངོ་མཚར་རྟེན་འབྲེལ་དུ་མའི་གསོས་སུ་མཛོད། ང་རང་ལ་མཁའ་འགྲོའི་བརྡ་འཕྲུལ་དོན་འབྱེད་དཀའ་བ་ཞིག་ཡོད་པ་དེ་ཀའི་དོན་རྗེ་དེ་ཉིད་ཀྱིས་དགོངས་ཏེ། དོགས་ལན་མཛད་པ་གཏེར་གཞུང་དུ་གསལ། དེ་སྐབས་བདག་གིས་སྒོ་སྤྲུལ་སང་གིས་ད་ལོ་ངེད་མ་བུ་ཁྱོད་ཀྱིས་བསྐྱབས་ན་དེས་དགའ། དེ་མིན་སུས་ཕན་པར་དཀའ་འདུག་གསུངས་པས་དེ་ལུགས་ཐུགས་ནས་མ་འདོར་བར་ཞུ་ཞུས་ཚེ། རྗེ་དེ་ཉིད་ནས་ཀྱང་བྱིས་པ་ལ་ཡ་བསྲུང་དང་། ང་རང་ལ་ཚེ་དབང་ཚེ་འགུགས་སོགས་མཛད་ཅིང་གཅིག་ལ་གཅིག་བརྟེན་ནས་ད་རེའི་ཕན་གྱི་སྐུ་ཚེའི་བར་ཆད་ཞི་བར་བྱུང་ངོ་། །དེ་ནས་རྗེ་དེ་ཉིད་ཀྱིས་དངོས་རྫས་རིན་ཐང་ཆེ་བ་དང་། བཀྲ་ཤིས་པའི་རྫས་ཀྱི་རི་མོ་བཀྲ་བའི་བཞུགས་གདན་ལྷ་རེག་བཟང་པོས་སྐྱེས་བཅས་རྒྱལ་སྲས་སང་ལ་ཕུལ་བས། ཁོང་ཐུགས་ཤིན་ཏུ་དགྱེས་པར་མཛད་ཅིང་ཕན་ཚུན་ཐུགས་མཐུན་གཞུང་བཟང་གི་གསོས་སུ་སྨིན་པ་དང་། རང་ཡང་རྩ་བའི་གཟུངས་མ་ལྟ་བུར་ཐུགས་བརྩེ་བ་ཆེན་པོས་རྗེས་སུ་བཟུང་ཞིང་། ཁྱད་པར་ཡུལ་དུས་ཀྱི་རྐྱེན་གྱིས་ཐུགས་སུན་མི་མངའ་ཞིང་སྐུ་ཚེ་ཞབས་པད་བརྟན་ཐབས་སོགས་ཞལ་གྱིས་བཞེས། རང་ནས་ཀྱང་ཐབས་གང་དྲག་གི་ངེས་མེད་ཀྱི་གནས་སུ་མི་འགྲོ་ཞུས་ཏེ། ཐུགས་ཡིད་གཅིག་འདྲེས་ལྟ་བུའི་སྒོ་ནས་ཐབས་ཤེས་འདུ་འབྲལ་མེད་པའི་ཐུགས་བསྐྱེད་སྨོན་ལམ་མཛད་ནས། ངེད་ཅག་རང་གནས་ལ་བཞུད་དོ། །དེ་དག་གི་སྐབས་སུ་སྒོ་སྤྲུལ་རིན་པོ་ཆེས་ཞལ་གཟིགས་ལུང་བསྟན་གྱི་སྐོར་རྣམས་ བྃ༔ གཏེར་གཞུང་དུ་གསལ། དེ་ནས་ལོ་དེའི་ཟླ་བ་བརྒྱད་པའི་ཚེས་བཅུའི་ཉིན་རྒྱལ་སྲས་སང་གདུལ་བྱར་སོང་། ངེད་མ་བུ་གཉིས་དང་། ཐུབ་བཟང་དང་། ཆོས་ཕྲེང་སོགས་ཀྱིས་དུས་མཆོད་འདོན་ནས་རྗེས་ཆོག་དང་བཅས་པ་ཚར་རྗེས། ང་རང་གི་ལུས་པོ་སྔར་ལྟར་མ་ཡིན་པར་མི་བདེ་བའི་རྣམ་པ་ཅུང་ཟད་བྱུང་འདུག་པས། བདག་གིས་ཅི་ཡིན་སྙམ་ནས་བསྡད་ཡོད་སྐབས་གློ་བུར་དུ་བུད་མེད་མཛེས་མ་ཡིད་དུ་འོང་བ་དར་དཀར་གྱི་ན་བཟའ་གསོལ་ཞིང་རིན་པོ་ཆེ་དུ་མས་བརྒྱན་པ་གཉིས་ང་རང་གི་མདུན་ཐད་དེ་ཀར་འོང་ནས་འདི་སྐད་ཟེར། ཨེ་མ་ཨེ་མ་ངོ་མཚར་ཅན། །སྐྱོན་གྱིས་མགོས་གཟུགས་ཀྱི་སྐུ། །སངས་རྒྱས་སྤྲུལ་པ་འདི་རུ་བྱོན། །ལྷར་བཅས་འགྲོ་བའི་གཉེན་གཅིག་པུ། །སེམས་དཔའ་དེ་ལ་བདག་ཅག་བརྩེ། །ཞེས་ཟེར་ནས་མི་སྣང་བར་གྱུར་མ་ཐག །དགུང་མོ་དབང་གི་དུས་སུ་མ་ལ་གནོད་པ་མེད་པར་མགོ་མཇུག་མ་ལོག་པར་སྐྱེས་བྱུང་བས། ཡང་བདག་གི་བསམ་པ་ལ་སྔར་ལྟར་བུ་ཤི་ཡོད་པར་འདྲ་སྙམ་ནས་བལྟས་ཚེ་ཁོ་རང་སྐྱིལ་ཀྲུང་བཅས་ནས་ཀཱི་ལི་ཀཱི་ལ་ཡ་ཧཱུྃ་ཕཊ༔ ཞེས་ལན་གསུམ་བརྗོད་པ་དང་། གནས་ཁང་ཐམས་ཅད་འོད་ཀྱི་ལེར་སོང་བས། ཆོས་ཕྲེང་སོགས་ཀྱིས་ཅི་རེད་ཟེར་བ་ལ། བདག་གིས་ཉི་མ་ཤར་བ་རེད་སྨྲས་པས། དེ་ལྟར་མིན་པར་གོ་ནས་ཐམས་ཅད་ཀྱིས་དགའ་སྤྲོ་ཆེན་པོ་བྱེད་འདུག །དེ་ནས་མགྲོན་པོ་ཞིག་ལ་རྐྱེན་བྱས་ཏེ་བྱིས་པ་ལ་ནད་ཕོག་པས་གསང་མ་ནུས་པར་ཆོས་སྒར་བ་རྣམས་ལ་རིམ་གྲོ་བཅོལ། ཁྱད་པར་ཡུལ་ཕྱོགས་དེ་ཀའི་གཏེར་སྟོན་ཆོས་ཉིད་གླིང་པར་ལུང་བསྟན་ཞུས་ཚེ། ཁོང་གི་ཞལ་ནས་དམ་སེལ་གྱི་རྐྱེན་རེད། ཆོས་སྒར་བས་ཡིག། བརྒྱ་ཚོགས་བསྐང་ལ་སོགས་པ་ཅི་ལྕོགས་གལ་ཆེ་བར་འདུག་པས། དེ་ལྟར་བསྒྲུབས་ནས་ཟླ་བ་དྲུག་གི་བར་དུ་ཕྱིའི་མི་དང་ཐུག་འཕྲད་མི་ཉན། དེ་ལྟར་ལྡན་ན་སྐྱོན་མེད་ངེས་པ་འདྲ་གསུངས། བདག་གིས་ངའི་སྤྲང་ཕྲུག་ལ་ཆོས་སྒར་བས་དམ་སེལ་འགྲོ་དོན་ཅི་ལ་ཡོད་ཟེར་མི་ཕོད། ཁོ་རང་ཤི་སོང་ཡང་ཅི་ཐབས་སྨྲས་ཚེ། སྒོ་སྤྲུལ་རིན་པོ་ཆེའི་དངོས་སློབ་ཁྲ་བླ་སྙན་གྲགས་དང་། དཔལ་ལྡན་རྒྱ་མཚོ་རྣམས་ཀྱིས་དེ་ལྟར་ཟེར་མ་ཕོད་ཀྱང་། འུ་ཅག་གིས་འདོན་བྱ་ཞུ་རྟེན་ཞིག་བཞག་ནས་བླ་སེར་ཆད་འབུག་མི་ཉན་ཞུས་ན་ཆོག་ཟེར་བས། དེ་ལྟར་བྱས་ཚེ་ནད་ལས་ཅུང་ཟད་གྲོལ། དེ་སྐབས་རྒྱལ་སྲས་སང་བྱོན་ནས་རིམ་གྲོ་སོགས་ལ་རྒྱུ་རྫས་དུ་མའི་མཐུན་རྐྱེན་མཛད་རོགས་དང་། ཕྱིའི་མགྲོན་པོ་ནང་དུ་འོང་མི་ཉན་གསུངས་པ་ཐུགས་ཁུར་མཛད་ནས་དེ་ལྟར་དགོས་གསུངས་ཏེ། བྃ༔ མཐུན་རྐྱེན་ཕུན་སུམ་ཚོགས་པ་མཛད་ཅིང་བྱིས་པ་སྲི་ཀེག་ལས་ཐར་ཏེ། གཞི་ལ་བདེ་སྐྱིད་འགྲན་ཟླ་དང་བྲལ་བ་བྱུང་ངོ་། །དེ་ནས་རང་ལོ་ཉེར་དགུའི་ལོར་སྦས་གནས་རྣམས་ཀྱི་ནོར་གཏེར་འདོན་པའི་དུས་ལ་བབ་སྟེ། ཐོག་མར་སྨར་གྱི་རྫ་ཁྲ་ཞེས་པ་རིན་ཆེན་མཁའ་འགྲོའི་འདུ་གནས་ཞིག་ཡོད་པ་འདྲ་། དེའི་གཏེར་སྤྱན་དྲངས་རྒྱུའི་རྟེན་འབྲེལ་འགྲིགས་ན་ནོར་གཏེར་ཐམས་ཅད་ལོན་པར་སྣང་ཚེ། གཏེར་སྒོ་གར་ཡོད་གསལ་པོ་ཞིག་མ་བྱུང་ནས་བཏང་སྙོམས་ལ་ཡོད་སྐབས། ནུབ་གཅིག་རྨི་ལམ་ལ་སེང་ལྕམ་འབྲུག་མོ་ཡིན་སྐད་པའི་མི་མོ་མཛེས་མ་རིན་ཆེན་རྒྱན་ལྡན་ཞིག་གིས་འདི་སྐད་ཟེར། ཨོཾ་ཏ་རེ་ཏུཏྟ་རེ་ཏུ་རེ་སྭཱ་ཧཱ། ས་འདི་འདྲའི་ས་ངོ་མ་ཤེས་ན། གནས་འོད་གསལ་མ་བུའི་འདུ་ཁང་རེད། །སྨན་ང་འདྲའི་ང་ངོ་མ་ཤེས་ན། །ང་གཉུག་སེམས་ཡིད་བཞིན་ནོར་བུ་ཡིན། །ང་ལྷ་ལུས་ཐོབ་པའི་མི་མོ་ཡིན། །གསལ་སྒྲིབ་མེད་པའི་མི་མོ་ཡིན། །ཕྱི་ལྟར་ན་སེང་ལྕམ་འབྲུག་མོ་ཡིན། །ནང་གསང་ཡུམ་གྲུབ་པའི་རྒྱལ་མོ་ཡིན། །གསང་བ་ལྟར་ཨཱཪྻ་ཏ་རེ་དཀར། །ང་གཞན་མའི་མོ་དང་འདྲ་ལོ་མིན། །ཁྱོད་གཏེར་ལ་དབང་བའི་རིགས་བཟང་ལ། །གཏེར་སྒོ་ང་ཡིས་བཤད་ཀྱིས་ཉོན། །གཡས་ཀྱི་རི་དང་ གཡོན་གྱི་རི། །གསེར་ཉ་མདུན་འགྲོས་བྱེད་འདྲའི་དབུས། །རྒྱལ་པོ་གདན་ལ་བཞུགས་འདྲའི་གནས། །རྩེ་མོ་སྲ་བ་རྡོ་རྗེ་བྲག །སྐེད་པ་རྔམས་པ་རྫ་ཡིས་བཟུང་། །རྩ་བ་བཅུད་ས་སྤང་ལྗོངས་དང་། །འདབས་འཁོར་ན་བ་ལྗོན་ཤིང་རྒྱས། །གཡས་གཡོན་གསེར་མཁར་གཡུ་མཁར་ནི། །མཎྜལ་དབྱིབས་འདྲ་གཉིས་ཀྱིས་དབུས། །དུང་སྐྱོང་དཀར་པོའི་བཞུགས་གནས་ནི། དར་ཆུ་འགོ་མཆན། དཀར་གནམ་ལ་འཕྱར་འདྲ་ཡོད། ནོར་མི་དགོས་རང་གི་ཕྱོགས་ནས་གསལ། །ལྷོ་གསེར་གྱི་ཉི་མ་འོད་པོ་ཆེ། །གཉིས་སྐྱེས་ཀྱི་མདངས་དང་འཕྲད་པའི་དུས། མཁྱེན་བརྩེའི་ལྷའི་སྤྲུལ་པ་དབང་ལྡན་ཅན། །མིང་པྲ་ཝ་མ་ཏི་ལས་ཀྱིས་བསྐུལ། །ཆོས་མཁའ་འགྲོའི་ཐུགས་ཏིག་དང་འཕྲད་ན། །ཁོང་རང་ནོར་འཛིན་པའི་སྐྱེས་བུ་འབྱུང་། །ཆོས་བརྒྱད་ཀྱི་ཡུལ་ལ་མགོ་འཁོར་ན། །རྟེན་འདི་རུ་གཅེས་ནོར་བདུད་དབང་འཆོར། །ནུབ་རྫ་སྟོད་རོང་གི་ཉེ་ཆ་ན། །སྔོན་ལས་ཀྱིས་འབྲེལ་བའི་དཔའ་བོ་ནི། །མིང་ཞེས་པ་འབྱུང་། །གྲོགས་ཤ་ཟའི་རིགས་ཀྱིས་མ་བསྒྱུར་ན། །ལས་ལྷག་མ་ཁྱོད་དང་སྨོན་ལམ་འཛོམས། །ཉག་རོང་ཤོད་ནས་ཨ་ཙར་སྤྲུལ་པ་ནི། །སྔགས་རིགས་ཀྱི་སྐྱེས་བུ་མིང་། ། བྃ༔ དཔལ་དེ་ལ་ཡི་དམ་སྒྲུབ་སྐོར་གཏོད། །སྒྲུབ་ཚུགས་ཀྱི་རང་ས་བཟུང་གྱུར་ན། །དོན་གཉིས་ཀྱི་མཛད་པ་ངང་གིས་འགྲུབ། །གནས་མི་རིང་རང་གནས་ཉེ་བའི་སར། །ཟབ་གཏེར་གྱི་ཡིག་རིས་འདུ་བྱེད་པ། །ལས་ལྡན་པ་པདྨའི་མིང་ཅན་འབྱུང་། །འདམ་ཁྲོད་ཀྱི་སེངྒེས་མ་བསྒྱུར་ན། །རྟེན་འདི་རུ་དཔལ་རིར་འཁོད་པར་ངེས། །ཤཱི་ལའི་མིང་དུས་སུ་འཕྲད་པར་ངེས། །བཛྲ་མིང་ལྷོའི་གཏེར་འཁོར་ཡིན། །སུརྻའི་མིང་ཤར་གྱི་གཏེར་འཁོར་དང་། །རཏྣའི་མིང་ནུབ་ཀྱི་གཏེར་འཁོར་དང་། །མཐུ་སྟོབས་མིང་བྱང་གི་གཏེར་འཁོར་ཚུལ། །དུས་དུས་སུ་སྨོན་ལམ་དབང་གིས་འཛོམས། །རེ་འགའ་ནི་གཏེར་ལ་ཕན་པའི་གྲོགས། །རེ་འགའ་ནི་ཆོས་འཛིན་ཚུལ་དུ་འབྱུང་། །གནས་བྲག་དཀར་གསུམ་གྱི་ཟབ་གཏེར་དེ། །དུས་ངུར་མོ་ནས་ཁྱུ་མཆོག་ཚུན་ཆད་དུ། །རང་ནོར་རྣམས་བདུད་ཀྱི་དབང་མ་གཏོང་། །ལས་བྱ་བ་འགྲོ་དོན་ཁོ་ནར་འབད། །སྐལ་མེད་ཀྱི་སྐྱེས་བུའི་བདེ་བ་སྤོང་། །གྲོགས་ངན་པའི་ངག་གིས་བློ་མ་བསྒྱུར། །བློ་རྩེ་གཅིག་པད་འབྱུང་རྗེ་ལ་གཏོད། །རང་ཉམས་རྟོགས་ཡུལ་ལ་མ་འདོམས་པར། །གྱི་ནའི་ཚུལ་དམན་ས་བཟུང་གྱུར་ན། །ཚེ་ཆོས་ཀྱི་བར་ཆད་སྐབས་ སྐབས་སེལ། །འཁོར་སློབ་ཀྱི་གདུལ་བྱ་རྒྱས་པའི་དུས། །རིགས་ཅན་གྱི་གྲོགས་དང་མི་འབྲལ་གལ། །ཆོས་འཛིན་གྱི་སྐྱེས་བུ་དུས་སུ་འཕྲད། །ནོར་མི་དགོས་རང་སྐལ་ཆོས་ལ་སྤྱོད། །གནས་དུས་ཀྱི་རྐྱེན་དང་འཕྲད་པའི་ཚེ། །བརྟུལ་ཞུགས་ཀྱི་གོ་ཆ་མ་ཞན་དགོས། །ཁྱོད་ཡིད་ལ་བཅག་པའི་སེམས་དཔའ་དེ། །སྔོན་སྐྱེ་བ་མང་པོར་ཁྱོད་དང་འགྲོགས། །ལས་རྟེན་འབྲེལ་གཅིག་གིས་བསྡུས་གྱུར་ཀྱང་། །དུས་རེ་ཞིག་ལྷན་འཛོམས་སྐལ་བ་དབེན། །སླར་སྨོན་ལམ་དབང་གིས་ལས་ཀྱིས་བསྒྱུར། །གནས་རྡོ་རྗེའི་རྫོང་དུ་གཅིག་ཏུ་འཁོད། །གཏེར་གཉིས་ཀྱིས་གདུལ་བྱ་ཐབས་ཀྱིས་འདྲེན། །ལས་མཐའ་མ་བདུད་ཀྱིས་མ་བསྒྱུར་ན། །བདུན་ཅུ་ནས་མཁའ་སྤྱོད་ཞིང་དུ་ཡིབ། །གནས་ཤམ་བྷ་ལ་ནས་ང་དང་འཕྲད། །བརྡ་གོ་འམ་ན་ཆུང་ལྷ་མོ་ལོ། །ཞེས་ཟེར་ནས་མི་སྣང་བར་གྱུར་ཏོ། །དེའི་ཉིན་སྔ་མོ་ང་རང་ནོར་གྱི་རྫི་བུ་ལ་སོང་ནས་གླུ་འདི་བླང་ངོ་། །ཀྱེ་མ་ཀྱི་ཧུད་འཁོར་བའི་གནས་ཚུལ་ལ་བསམ་ན། །ཉིན་མཚན་མེད་པར་སེམས་གཏིང་སྡུག་བསྔལ་ལས་མི་འདུག །ལྷོ་ཕྱོགས་ཆར་སྤྲིན་ནག་པོའི་ཁ་དོག་ལ་བསམ་དུས། །ཚེ་རོགས་ངན་པའི་ཞལ་གྱི་དཀྱིལ་འཁོར་དེ་དྲན་བྱུང་། །དབྱར་རྔའི་སྒྲ་སྐད་ལྷང་ལྷང་རྒྱུན་ བྃ༔ མེད་དུ་སྒྲོགས་དུས། །ཚིག་རྩུབ་འཐབ་འཁོན་འཁོར་ལོ་བསྐོར་བ་དང་འདྲ་མཚུངས། །སེར་བ་དྲག་པོས་སྐྱིད་ཚལ་མེ་ཏོག་ཀུན་བཅོམ་དུས། །རང་གཞན་དགེ་སེམས་ཁོང་ཁྲོས་འཇོམས་པ་དེ་དྲན་བྱུང་། །ལུགས་གཉིས་དྲིན་གྱིས་སྐྱོང་མཛད་མཚུངས་མེད་ཀྱི་འདྲེན་མཆོག །འཇིགས་བྲལ་ཆོས་ཀྱི་བློ་གྲོས་དཔལ་རི་ལ་ཡིབ་སོང་། །ཁོ་མོའི་སྙིང་གི་ནོར་བུ་ཐབས་གྲོགས་ཀྱི་མཆོག་གྱུར། །རྣལ་འབྱོར་བི་མ་རསྨི་ས་ཐག་གིས་ཕྱེས་སོང་། །ང་རང་གཏེར་ལ་དབང་ཡང་གཞན་འབངས་སུ་གྱུར་ཏེ། །དམ་མེད་མི་ཡི་ངོ་བསྲུང་བྲན་འཁོར་ལ་ལུས་སོང་། །ཐབས་གྲོགས་མཆོག་དེས་བཀའ་བཙན་ཟབ་མོ་དེ་མེད་ན། །དྭ་ཕྲུག་མིང་སྲིང་གཉིས་བཅས་ངེས་མེད་ལ་འགྲོ་སྙམ། །ཨ་ལ་ཀུ་རེ་ཡིན་ནོ་མདོ་མེད་ཀྱི་བུ་མོ། །འགྲོ་སྣང་སེམས་ལ་འཆར་ཀྱང་འགྲོ་ཉིན་ནི་མེད་པས། །དགོས་མེད་བློ་སྣ་མང་པོའི་བྱ་བ་དེ་སྐྱུར་ཐོང་། །སྔོན་བསགས་ལས་འཕྲོ་ཡོད་ན་བསླུ་མེད་དུ་ལོས་སྨིན། །དེ་བས་སེར་བ་འབབ་གི་རང་ཁྱིམ་ལ་བུད་སོང་། །ཞེས་རང་གིས་རང་ལ་རྨོངས་གླུ་རེ་བླང་ནས་སེམས་གསོས་བྱེད་སྐབས། དམ་ཅན་སྐྱེས་བུ་རྡོ་རྗེ་ལེགས་པ་འོང་སྟེ། ང་རང་གི་གནས་ཚུལ་ཞིབ་པར་དྲིས་ནས་ཁོང་གི་འདོད་དོན་དུ་ གནས་ཚུལ་ཟུར་ཙམ་བྲིས་པ་གཏེར་གཞུང་དུ་གསལ། དེ་ནས་ཉིན་གཅིག་ཐུབ་བཟང་རྫ་ཁྲའི་ནང་དུ་ནོར་ཚོལ་བར་སོང་བའི་ནོར་མ་ལོན་པར་ཡུན་རིང་བ་ཞིག་འགོར་ནས་ཐོན་བྱུང་། བདག་གིས་ཁྱོད་ནོར་མེད་ན་མྱུར་བར་མི་འོང་ཅི་བྱེད་འདུག་སྨྲས་ཚེ། ཐུབ་བཟང་ན་རེ། ང་རང་གིས་ཡིད་དུ་འོང་བ་མི་འདྲ་བའི་རིགས་དཀོན་ཞིག་འདུག །དེ་ལ་བརྟག་དཔྱད་ཞིབ་པར་བྱས་ན།ཁྱོད་ཀྱི་གཏེར་གནས་འདྲ་ཨེ་ཡིན་སྙམ་ནས་རི་སྐེད་མན་ཆད་བར་དུ་སོང་ནས་བལྟས་ཚེ། རི་རྩེ་བྲག །རི་སྐེད་རྫ། རི་རྩ་སྤང་།དེའི་གཡས་གཡོན་ཐམས་ཅད་དུ་ན་བ་དང་རྩི་ཤིང་མེ་ཏོག་ལ་སོགས་པས་གང་འདུག །བྲག་གི་རྩེ་ལ་རྒོད་ཚང་ཡོདཔས་བྱ་རྒོད་ཀྱིས་རྒྱུན་དུ་བསྐོར་བ་བྱེད་འདུག་ཟེར། བདག་གིས་མཁའ་འགྲོའི་ལུང་བསྟན་དང་འདྲ་མཚུངས་གི་སྙམ་ནས་འདི་སྐད་དྲིས། རི་དེ་ཀའི་ངོས་ལ་ཆུ་འགོ་ཞིག་ཨེ་འདུག་སྨྲས། ཁོང་ན་རེ། རིའི་ངོས་སར་ཆུ་འགོ་ཡོད་པ་མ་མཐོང་། གཡས་ཕྱོགས་སར་རི་འབུར་ཆུང་ཆུང་གཉིས་ཀྱི་བར་དུ་ཆུ་འགོ་ཞིག་ཡོད་པར་སྣང་ཡང་ཟུར་ལ་མ་སོང་ཟེར། ནང་སྔ་མོ་ཁྱོད་ཀྱིས་རྟ་གཉིས་ཐོག་དང་། འུ་ཅག་གཉིས་གཞན་གྱིས་མི་མཐོང་བར་བྱས་ཏེ། རི་དེ་ལ་བལྟ་རུ་འགྲོ་དགོས་བདག་གིས་སྨྲས་ཚེ། ཁོ་རང་གིས་དེ་ལྟར་ བྃ༔ བྱེད་ཟེར། དེ་ནས་ནང་སྔ་མོ་རྒྱལ་སྲས་སང་ལ་གསོལ་ཇ་དྲངས་ནས། ཆོས་དབྱིངས་འཇིགས་མེད་དཀོན་མཆོག་ལ་བཅོལ། བུ་ཆུང་ཐུབ་བཟང་གིས་འཛིན་ཆགས་བྱས་ཏེ། འགྲོ་མ་རག་པར་ཡོད་སྐབས། གློ་བུར་དུ་མགར་སྐོར་གྱི་ཕུ་ནུ་རྣམས་རྒྱལ་སྲས་སང་གི་རུ་བསུ་ཡིན་ཞེས་ཐོནབྱུང་བས། བདག་གིས་ཁོང་རྣམས་འོང་རྒྱུ་གོ་ཕྲིག་ཟུར་ཙམ་ཡང་མེད་པ་ལ་རྐྱེན་ནས། རུ་བསུ་ཡིན་དོན་མེད། རུ་རྒྱབ་ཡིན་ངེས་པ་རེད་སྙམ་ནས་ཁོང་ཁྲོས་རྒྱུད་བསྐུལ་ཏེ། རྟེན་འབྲེལ་བཏང་སྙོམས་ལ་སོང་། ཆོས་སྒར་བ་རྣམས་ཀྱིས་ལ་ལས་བར་འདུག་བྱས་ཏེ། ཕན་ཚུན་འགལ་མེད་ཀྱི་གཏམ་བཤད་ན་ད་ལན་གྱི་འོང་དོན་ཅི་ཡོད་དྲིས། སྒོ་སྤྲུལ་རིན་པོ་ཆེའི་གདན་ཚབ་གསང་ལུང་སྤྲུལ་སྐུ་སོགས་རང་ལ་སེམས་དཀར་རྣམས་ཀྱིས་ད་ལན་སྟབས་གཟབ་དགོས་པའི་བསླབ་བྱ་སོགས་མཛད། དེ་ནས་ཐམས་ཅད་ཀྱི་འབྱུང་ཁུངས་རྒྱལ་སྲས་ལ་ཐུག་སོང་བས། གྱོད་འགྲིགས་ཆད་གང་དུ་མ་ངེས་ནས་བཏང་སྙོམས་ལ་བཞག་གོ། །དེ་ལ་རྐྱེན་ནས་བྱིས་པ་ལ་ནད་ཞིག་ཕོག་ནས་སོས་དཀའ་བར་བྱུང་ཡང་། རྒྱལ་སྲས་སང་ནས་རིམ་གྲོ་སོགས་ལ་ཐུགས་བབ་མ་བྱུང་ནས་བཏང་སྙོམས་ལ་ལུས་སྐབས། ཆོས་སྒར་བ་རྣམས་ཀྱིས་ཁོང་གི་བླ་ མའི་ཡང་སྤྲུལ་ངེས་པ་ཡིན་པ་དང་། ཁྱོད་ཀྱི་སྐུ་སྲས་ཁྱད་པར་དུ་གྱུར་པ་ཡིན་པ་སོགས། གང་ཐད་ནས་ཀྱང་ངེད་ཆོས་སྒར་བའི་བླ་སེར་ཇོ་མོ་ཚུན་ཆད་ཀྱི་རིམ་གྲོ་ཅི་ལྕོགས་སྒྲུབ་རྒྱུ་བྱས་ཏེ། གསང་ལུང་སྤྲུལ་སྐུའི་མདུན་ལ་མོ་རྩིས་བྱེད་དུ་འགྲོ་རྒྱུ་བྱས་ཡོད་པས། ཁྱོད་ནས་ཀྱང་ཐུགས་ལྷོད་མི་ཉན་ཅི་དགོས་ཀྱི་བྱ་བ་བསྒྲུབ་ཟེར། ཡང་བདག་གིས་ཁྱོད་རྣམས་ཀྱིས་དེ་ལྟར་འོ་བརྒྱལ་མི་དགོས། རིམ་གྲོ་ཇི་ལྟར་བྱས་ཀྱང་ཕན་པ་དཀའ་བར་སྣང་། སྔར་སྒོ་སྤྲུལ་རིན་པོ་ཆེའི་ཞལ་གསུངས་ཁྱོད་རྣམས་ཀྱི་ཐུགས་ལ་མངའ་བཞིན། བུ་འདིའི་སྐྱབས་གནས་སྤྲུལ་སྐུ་དྲི་མེད་སང་མིན་པ་གཞན་རིམ་གྲོས་སྐྱོབས་དཀའ་གསུངས་པ་དང་། མིན་ཀྱང་ད་ལན་རྒྱལ་སྲས་སང་གི་ཐུགས་ལ་མི་བབས་པའི་རྒྱུ་མཚན་གང་ལ་བསམ་མནོ་བཏང་ཡང་། བདག་གི་བུ་འདི་ཕན་བཏགས་ཞིག་མིན་པ་འདྲ་སྨྲས་ཚེ། འཇིགས་མེད་དཀོན་མཆོག་དང་། ཁྲ་བླ་སྙན་གྲགས་སོགས་ཀྱིས་རྒྱལ་སྲས་ལ་ཞུས། ཁོང་རང་རྣམས་ཀྱིས་གྲོས་བྱས་ཏེ། ངེད་མ་བུ་ཡིད་བཞིན་ནོར་བུའི་སྐུ་མདུན་ལ་བསྲུང་སྐྱོབ་ཞུ་རུ་འགྲོ་དགོས་ཟེར། བདག་གིས་ང་མི་འགྲོ་ཁར་སང་ཉིན་པར་གསལ་སྒྲོན་གྱིས། མཁའ་འགྲོ་གཏེར་སྟོན་སྤྲུལ་སྐུའི་གཟུངས་མར་འགྲོ་གྲབ་བྱེད་པ་ཀུན་གྱིས་སྨྲས་འདུག བྃ༔ རྒྱལ་སྲས་སང་ལ་ཞུས་པའི་རྐྱེན་གྱིས་ད་དུང་ཡང་གཟའ་སྡུག་འདི་འདྲ་མྱོང་འདུག་པས། དེའི་ཁར་ངེད་མ་བུ་དངོས་སུ་སྐུ་མདུན་ལ་སོང་ཚེ་ཕྱིར་འོང་མི་བཅུག་པ་སོགས་བྱ་བ་མི་འདོད་པ་སྣ་ཚོགས་འབྱུང་ཉེ་བས་ན་མི་འགྲོ་ངེས་པ་ཡིན་སྨྲས་ཏེ་བཏང་སྙོམས་ལ་བཞག་ཚེ། བུ་ཆུང་ནད་བབ་ཤིན་ཏུ་ལྕི་བས། ཁོང་རྣམས་ཀྱིས་སེམས་ཀྱིས་མ་བཟོད་ནས་རྟ་གྲོ་སོགས་ཀྱིས་བླ་བྲང་ལ་མི་གནོད་པར་བྱས་ཏེ། ཁོང་རྣམས་ཀྱིས་མཐུན་རྐྱེན་བསྒྲུབས་ནས། ངེད་མ་བུ་གསུམ་དང་། སློབ་བུ་ཐུབ་བཟང་བཅས་བྱ་ཁོག་སྣ་རིང་མར་རྗེ་དེ་ཉིད་ཀྱིས་ཆོས་སྒར་བཏབ་ཡོད་པས་དེར་སོང་། དེའི་སྐབས་བདག་གིས་སྔར་གྱི་རྨི་ལམ་དྲན་ནས་ཐུབ་བཟང་ལ་འདི་སྐད་སྨྲས། འུ་ཅག་སྐུ་མདུན་ལ་སོང་ཡང་ཁོང་བཞུགས་ཨེ་ཡོད་ཅི་ཤེས་སྨྲས། ཐུབ་བཟང་ན་རེ། ཁོང་མི་བཞུགས་པར་གང་དུ་བྱོན། གདུལ་བྱ་ལ་ནི་མི་བྱོན་ཟེར། ཡང་བདག་གིས་གདུལ་བྱར་བྱོན་ན་འུ་ཅག་གིས་མཇལ་ཐབས་ལོས་འོང་དང་། འོ་སྐོལ་སང་གི་ཐད་གཟའ་སྡུག་དེ་ལ་རྐྱེན་ནས་གངས་རི་ཐོད་དཀར་སོགས་ཐག་རིང་ཞིག་ལ་བྱོན་སོང་ཨེ་ཡོད་སྙམ་གི་སྨྲས། ཐུབ་བཟང་གིས་དེ་ལྟར་གྱི་ལུང་བསྟན་ཨེ་འོང་ཟེར། ལ་བསྟན་ལུང་བསྟན་སོགས་བདག་གིས་མི་ཤེས་ཀྱང་། རྨི་ ལམ་འཁྲུལ་སྣང་རེ་ལ་ཁོང་དང་མཇལ་འཕྲད་འོང་བ་རྨིས་པའི་སྔར་ལྟར་མ་ཡིན་པའི་བདག་གི་སེམས་ལ་སྡུག་བསྔལ་ཆེན་པོ་ཞིག་གིས་རྐྱེན་བསྐུལ་ཏེ། ཁོང་དང་འབྲལ་མི་ཐུབ་ཅིང་ཁོག་པའི་སྙིང་བྲལ་བ་ལྟ་བུའི་སྡུག་བསྔལ་ཆེན་པོ་བྱུང་བས། བདག་གི་བསམ་པ་ལ་རྗེ་དེ་ཉིད་ཞིང་ཁམས་ལ་བྱོན་འགྲོ་བ་ཨེ་ཡིན་སྙམ་ཚེ། མཁའ་འགྲོ་ཞིག་བྱོན་ནས་གྲོགས་མོ་ཁྱོད་ཀྱིས་དེ་ལྟར་བསམ་མི་དགོས་དང་། ཁྱོད་ཀྱི་དཔའ་བོ་ཞིང་ཁམས་ལ་མི་བྱོན་ཀྱང་། གྲོགས་ངན་གྱི་རྐྱེན་གྱིས་བསླངས་ནས་གངས་རི་ཐོད་དཀར་ལ་བྱོན་འདུན་ཡོད་འདུགཀྱང་། ཁྱོད་རང་མ་འཕྲད་བར་དུ་མི་བྱོན་པ་འདྲ་ཟེར་བ་དུས་རིང་མོ་ཞིག་ནས་རྨིས་པ་ཡིན་པས་དེ་ཀ་ཨེ་བདེན་སྙམ་སྨྲས་ཚེ། ཐུབ་བཟང་གིས་ཁྱོད་མ་བྱོན་བར་དུ་བཞུགས་ཡོད་ཟེར་བ་དེ་རྟགས་ཆེ་གི། །ད་ལན་བཞུགས་ཡོད་ངེས་པ་རེད། ད་ཕན་ཅི་འགྱུར་མི་ཤེས་ཀྱང་ཁྱོད་ཀྱིས་གསུང་མཛད་གནད་མོ་རེ་ཞུས་ན། ཁྱོད་རྣམ་པ་གཉིས་ཐུགས་སྣང་མཐུན་པ་དང་། མིན་ཀྱང་བྱ་བ་གང་ཐད་ནས་ཐུགས་རྒྱ་ཆེ་བས་ཁྱོད་ཀྱི་གསུང་མི་བཅག་ཟེར དེ་ནས་ངེད་རྣམས་སྣ་རིང་མར་ཐོན་སོང་བས། རྗེ་དེ་ཉིད་ཀྱི་མདུན་འདུག་ཚུལ་ཁྲིམས་རྡོ་རྗེ་དང་། འོད་འབར་རྣམས་ཀྱིས་བསུ་བ་བྱས་ཏེ། རིམ་གྱིས་མཇལ་འཕྲད་མཛད་ནས་ཡིད་ བྃ༔ བཞིན་ནོར་བུའི་སྐུ་མདུན་ལ་སོང་བས་ཐུགས་བརྩེ་བ་ཆེན་པོས་རྗེས་སུ་བཟུང་ནས། བུ་ཆུང་ལ་བསྲུང་སྐྱོབས་སོགས་ཞིབ་ཏུ་མཛད་ཚེ་བུ་ཆུང་ནད་ལས་གྲོལ་སོང་། དེ་སྐབས་ང་རང་གིས་སྔར་གྱི་རྨི་ལམ་ལ་གཞི་བྱས་ཏེ་སེམས་ལ་སྡུག་བསྔལ་བྱུང་ཚུལ་སོགས་ཞིབ་རྒྱས་སུ་ཞུས་པས། ཁོང་གིས་ཀྱང་ཐུགས་མདུན་གྱི་མཛད་པ་སྦས་གསང་མེད་པར་གསུངས། བདག་གིས་ཀྱང་ལུགས་གཉིས་ཀྱི་ཞུ་བྱ་དང་། ཁྱད་པར་ཡབ་ཡུམ་བར་གྱི་དམ་ཚིག་དང་འདུན་པ་དཔང་པོར་བཞག་ནས་ཞིང་ཁམས་ལ་བྱོན་རྒྱུ་ཕར་ཞོག །ས་ཐག་རིང་པོ་ཙམ་ལ་ཡང་བྱོན་མི་ཉན་ཡང་ཡང་ཞུས་ཚེ། རྗེའི་ཐུགས་ཀྱིས་མ་བཟོད་དེ་བདག་གིས་ཞུས་པའི་དོན་འབྲས་ཐམས་ཅད་ཇི་བཞིན་པར་མཛད་པ་ཞལ་གྱིས་བཞེས། དེ་ནས་རང་གཏེར་ཕག་ལོའི་ཟབ་དབང་གཅིག་བརྒྱུད་དུ་རྗེ་དེ་ཉིད་ལ་ཕུལ་བས་ཐུགས་དགྱེས་ཀྱི་གསོས་སུ་གྱུར། རྗེའི་ཟབ་གཏེར་མཚོ་རྒྱལ་ཟབ་དབང་ངེད་ཅག་མ་བུ་རྣམས་ལ་བསྩལ་བས། བུ་