Tibetan
གཏོགས། ཐུགས་སྣང་ཐམས་ཅད་རོ་གཅིག་ཏུ་གྱུར་ནས་སྣང་སྟོང་བདེ་བ་ཆེན་པོའི་དཀྱིལ་འཁོར་ལ་བཟླ་བ་དང་། འབྱུང་བ་ལ་རང་དབང་བསྒྱུར་ནས་རྟོགས་པའི་རྩ་ལ་རྒྱས་པའི་ཕྱིར་དུ་སྒྱུ་འཕྲུལ་ངོམས་པ་སོགས་རྗེ་དེ་ཉིད་ཀྱི་གཏེར་གཞུང་དུ་གསལ། དེའི་སྐབས་སུ་བི་མ་མི་ཏྲས་ཞལ་གཟིགས་ནས་དེ་ཉིད་ཀྱི་སྒྲུབ་ཐབས་གནང་བ་དང་། གནས་གསུམ་གྱི་མཁའ་འགྲོ་མ་རྣམས་ཀྱིས་ཐབས་ཤེས་གདན་ཐོག་གཅིག་ཏུ་འཁོད་པ་ཚིམས་དྲུག་འདུ་བའི་བཀུར་སྟི་བྱེད་ཅིང་རྡོ་རྗེ་གླུ་ཡི་མཆོད་པ་གསུངས་པ་ནི་རང་གཏེར་ན་གསལ། ཁྱད་པར་ཕན་ཚུན་ཟབ་གཏེར་གྱི་བརྡ་ཁྲོལ་ཤིན་ཏུ་མྱུར་ཞིང་། རང་ནས་ཀྱང་དེ་སྐབས་ས བྃ༔ རྟེན་འབྲེལ་ཕུན་སུམ་ཚོགས་པའི་མཐུས་ཆོས་ཉིད་མཁའ་འགྲོའི་གསང་མཛོད་ཀྱི་ཆོས་སྡེ། ཟབ་ཏིག་རྡོ་རྗེ་ཕག་མོའི་སྒོའི་མྱུར་ལམ་ཨ་ནུ་ཡོ་གའི་མན་ངག། །སྟེང་སྒོ་བདེ་བ་ཆེན་པོའི་དོན་དང་། འོག་སྒོ་ཁམས་གསུམ་རོལ་པའི་ཟབ་ཁྲིད་རྣམས་གསལ་ཁྱབ་ཏུ་སྤེལ་བ་སོགས་བྱས་པའོ། །དེ་ནས་རང་ལོ་སོ་གཅིག་དུས་རྗེའི་སྐུ་ཚེའི་བར་ཆད་སེལ་བའི་ཕྱིར་དུ་མཚམས་ཞིག་ལ་བསྡད་ཡོད་སྐབས། རང་གནས་ཀྱི་ཡུལ་དེ་ཁེབ་པའི་བྱ་ཞིག་ཐོན་སྣང་འཆར་བས། བདག་གིས་ཅི་ཡིན་སྙམ་ཚེ། བྱ་དེ་ཀ་ཆུང་ངུ་བྱིའུ་ཙམ་དུ་གྱུར་ནས་འདི་སྐད་ཟེར། སེང་སེང་རྣལ་འབྱོར་བདེ་ཆེན་བཙུན་མོ། །སྒྲ་འཛིན་མ་ཡེངས་ང་ལ་ཉོན་དང་། །རྫུ་འཕྲུལ་ལྡན་པའི་ཡིད་མཐུན་ང་རང་། །དཔལ་རིའི་ཁྲོད་ནས་ཁྱོད་དྲུང་འོང་དོན། །ལེགས་ཉེས་གསལ་བའི་བརྡ་དོན་ངས་ཤེས། །ཁྱོད་ནི་ལས་འཕྲོ་ལྡན་ཡང་མིར་སྐྱེས། །ཨོ་རྒྱན་ལ་སོགས་གནས་ཀྱི་སྐད་བརྗོད། །བྱུང་དང་འབྱུང་འགྱུར་དོན་རྣམས་མ་གོ། །ད་བར་སབྟའི་བར་ཆད་དབང་སོང་། །དེ་རིང་ང་ཡིས་ཁྱོད་མཐུན་སྐད་ཀྱིས། །བྱུང་དང་འབྱུང་འགྱུར་ཅུང་ཞིག་སྨྲས་ན། །པདྨའི་དྲུང་ནས་སྨོན་ལམ་འབྲེལ་བའི། །རང་སྐལ་ཆོས་གཏེར་རྣམ་གསུམ་སྐོར་དང་།།།དེ་ཡི་ ལྡེ་མིག་མཆོག་གཅིག་ཡ་ལྔ། །བཅུ་གསུམ་ཉེར་ལྔ་རབ་འབྲིང་མཐའ་རུ། །ཤེས་རབ་ཟབ་མོས་དཔྱད་པ་གནད་ཡིན། །ཡ་ལྔ་མན་ཆད་སྐབས་ཀྱིགྲོགས་ལས། །ཡུན་རིང་བརྟེན་ན་བར་ཆད་ལྡང་འོང་། །རྟེན་འབྲེལ་མཁའ་གསང་འཕྲད་པ་ཙམ་ལས། །ནང་དོན་བདེ་ཆེན་བསྐུལ་མ་མ་བྱེད། །ཟབ་ཆོས་འཛིན་སྐྱོང་སྤེལ་བའི་རིགས་ལྡན། །རབ་བཞི་འབྲིང་བརྒྱད་རྩ་ལྔ་ནས་བཟུང་། །བརྒྱད་ཅུ་རྩ་བཞི་ཆོས་ཀྱི་བདག་པོ། །རྗེ་འབངས་གྲུབ་བརྙེས་རྣམས་ཀྱི་སྒྱུ་འཕྲུལ། །འདུལ་འཛིན་སྔགས་རིགས་ལ་སོགས་ཚུལ་དུ། །སྔོན་གྱི་སྨོན་ལམ་མཐུ་ཡིས་བསྐུལ་ནས། །རབ་བཞི་རྟེན་འབྲེལ་སྒོ་བཞིར་དབང་བའི། །མཆོག་གི་གྲོགས་དང་སྙན་གྲགས་དར་ཞིང་། །འཁོར་སློབ་གདུལ་བྱ་མངའ་ཐང་རྒྱས་ཏེ། །བསྟན་ལྷག་སྐྱོང་ཕྱིར་སྐབས་སྐབས་འཕྲད་འོང་། །ཡ་བརྒྱད་ཉེར་ལྔ་ལ་སོགས་རིགས་རྣམས། །སྨོན་ལམ་དུས་སུ་ཆོས་དང་ལྡན་ངེས། །སྐུ་གནས་གསུམ་དང་ཐུགས་ཀྱི་གནས་གསུམ། །བྲག་དཀར་རྣམ་གསུམ་ལ་སོགས་གཏེར་གནས། །བརྡ་བྱང་གསལ་བ་ཇི་བཞིན་མཛོད་དང་། །གཏེར་གཉིས་བསྟན་པ་མཐའ་ནས་དར་ངེས། །མི་རིང་རང་གནས་ཉེ་བའི་ཕྱོགས་ནས། །མི་འདོད་ལས་ཀྱི་སྣ་འདྲེན་བྱེད་འོང་། བྃ༔ ཐབས་ཤེས་སྟབས་ཀ་གཟབ་པ་གལ་ཆེ། །མི་ཡི་བློ་སེམས་བདུད་ཀྱིས་བསླུས་ཏེ། །བསྟན་པའི་ཉི་ཞལ་སྤྲིན་གྱིས་བསྒྲིབ་ངེས། །གསང་ཚིག་གདམས་པའི་དྲོད་རྟགས་བྱུང་ཚེ། །སྣོད་མིན་སྐྱེས་བུ་རྣམས་ལ་མ་བསྟན། །ཁྱོད་ཀྱི་འདོད་དོན་ཇི་བཞིན་འགྲུབ་པའི། །ད་ལན་དཔའ་བོ་མཁའ་འགྲོའི་གླིང་དུ། །ཁྱོདགྲོགས་དཔའ་བོ་བྱོན་པ་མི་སྣང་། །ས་ག་ཟླ་བའི་འབོད་པ་ཐོན་དུས། །ཕྱོགས་མིན་ཕྱོགས་གཞན་བསྒྲོད་ན་དགེ་འོང་། །འབྱུང་འགྱུར་བརྡ་དོན་དུས་སུ་སྨྲ་འོང་། །ང་འགྲོགནས་མེད་ཆོས་དབྱིངས་ཞིང་ལ། །ཤེས་རབ་བྱ་རྒྱལ་རྣམ་པར་བརྫུས་ནས། །རང་སྣང་བདེ་བདེ་བདེ་ཆེན་གླིང་དུ། །གཤོག་རྩལ་ངལ་དུབ་མེད་པར་ཆས་འགྲོ། །ཡིད་མཐུན་རིགས་བཟང་མི་མོ་ཁྱོད་ཀྱིས། །ང་ཡི་ཚིག་རྣམས་ཙིཏྟར་སྦས་མཛོད། །ཅེས་ཟེར་ནས་ཡང་སྔར་ལྟར་ལྷོ་ནུབ་ཀྱི་ཕྱོགས་སུ་བུད་ཐལ། དེ་ནས་རྗེའི་གུང་གྲངས་ཞེ་གཉིས་ལོའི་སྐུ་གེགས་སེལ་ནས། འཁོར་སློབ་སྐར་འཚོགས་ལྟ་བུའི་འདུ་སྒོ་རྒྱས་ཏེ། ཡབ་རྗེ་བླ་མ་རིན་པོ་ཆེ་དང་། རྗེ་རང་གི་ཟབ་གཏེར་གཉིས་ཀྱི་བསྟན་པ་གསལ་ཁྱབ་ཏུ་བྲི་སྤེལ་མཛད་དོ། །དེའི་སྐབས་ང་རང་གི་བསམ་པ་ལ་ངེད་མ་བུ་འདི་ཀར་བསྡད་ན་མགར་ར་སང་གིས་ དགོས་མེད་བྱས་པ་ཡིན་ཀྱང་། རྗེའི་ཉེ་འཁོར་རྡོར་དགྲ་ཡབ་ཡུམ་སོགས་ཀྱི་ཐུགས་བབ་ཨེ་ཡོད་མི་ཤེས་སྙམ་ནས། ཉིན་གཅིག་རྗེའི་སྐུ་མདུན་ལ་སོང་ནས་འདི་སྐད་ཞུས། ང་རང་བསྲེ་ཐོག་གནས་ལ་མཚམས་སྒྲུབ་ཞིག་གི་དོན་དུ་འགྲོ་དགོས་པ་འདྲ་ན། ཁྱོད་ནས་རོགས་སྟབས་རེ་མཛད་རོགས་མ་འཆུག་ཞུས་ཚེ། རྗེའི་ཞལ་ནས། ཡ་གཅེས་ཕྲུག་ཁྱོད་གནས་ནང་ལ་དོན་ཆེན་པོ་ཡོད་ན། འུ་ཅག་གཉིས་ལྷན་དུ་འགྲོ། སྐུ་མཚམས་རྐྱང་པའི་དོན་ཡིན་ན། འོད་འབར་དང་གཉིས་ཁྱོད་ཀྱི་གྲྭ་པ་ལ་གྲོ་ཁལ་དང་བཅས་སྟབས་བསྒྲིགས་བྱས་ནས་བཏང་། དེ་མིན་ཁྱོད་དཔོན་གཡོག་གཅིག་པུར་མི་མངགས། ཁྱོད་རང་གི་བསྙུན་གཞི་ངན་པ་དང་། སྲས་སྲས་མོ་གཉིས་ཆུང་ཞིང་ཐུབ་བཟང་གཅིག་པུ་ཡིན་པས། གཅིག་ཐད་ནས་ང་རང་གིས་སེམས་ཀྱིས་མི་ཐོངས། གཉིས་ཐད་ནས་སྔར་ཁྱོད་འདི་ཀར་བྱོན་དུས། འཇིགས་མེད་དཀོན་མཆོག་གིས། རྒྱལ་སྲས་སང་དང་ཁྱོད་ཀྱི་ལོ་རྒྱུས་ཐམས་ཅད་ཞིབ་པར་བཤད་ཅིང་། ཁྱད་པར་ཁྱོད་ཕྱོགས་གཞན་ཞིག་ཏུ་མི་འགྲོ་ཐབས་མ་འཆུག་ཟེར། འོན་ཀྱང་ཁྱོད་སྣ་རིང་མ་ནས་བྱོན་སྐབས། མགར་ར་སང་གི་ཟུར་ལ་ཆགས་མི་ཆགས་བྱེད་འདུག་ཟེར་བ་ང་རང་གིས་ཚོར་ཀྱང་། ཁྱོད་ནས་དེ་ལྟར་ཡིན་ཚུལ་ཟུར་ བྃ༔ ཙམ་ཡང་མི་གསུངས་པས། ཅི་ཡང་ཞུ་མ་ཕོད་པ་ཡིན། ད་ལན་ནི་མི་ཞུ་ཁག་མེད་རེད་འདུག་པས། ཁྱོད་ཀྱི་ཐུགས་ལ་སྡུག་མི་ཉན། འུ་ཅག་གཉིས་དམ་ཚིག་ནང་འདྲེས་ཡིན་པ་དང་། ཁྱོད་བླ་མ་ཡིན་པས་ཐུགས་ལ་མ་བབ་པ་སྤུ་རྩེ་ཙམ་ཡང་མི་བྱེད་གསུངས། བདག་གིས་ང་རང་གི་སེམས་ལ་ཅི་གནོད། ད་བར་ལ་མགར་སྤྲུལ་སང་གིས་ང་རང་ལ་བྱ་བ་བཟང་ངན་ཅི་མཛད་ཀྱང་གསང་ཅི་ཐུབ་བྱས་ཏེ་ཁྱོད་ལ་མི་ཞུ་བའི་དོན་ནི། མགར་ར་སང་གིས་ང་རང་ལ་ཐོབ་ཡོད་ཐོབ་མེད་གཉིས་ཀྱི་ལས་ཐང་ཆེ་བ་དང་། སྔར་ཁྱོད་ལ་ང་རང་འབུལ་ནས་བདག་པོ་ཁྱོད་ཡིན་ཞུས་པ་དང་། འུ་ཅག་དཔོན་གཡོག་ཐུགས་འདུན་ཆེ་བ་སོགས་ཀྱི། ང་རང་གི་དོན་གྱིས་རྒྱལ་སྲས་སང་ཁྱོད་རྣམ་པ་གཉིས་ཐུགས་སྣང་མི་མཐུན་པའི་རྒྱུ་བྱེད་འོང་སྙམ་པ་ཡིན་མ་གཏོགས། གལ་ཆེན་ཞིག་ཡིན་ན་སྲོག་ལ་བབ་ཀྱང་། སྙིང་གི་ནོར་བུ་ཁྱོད་ལ་ཅིའི་ཕྱིར་གསང་ཞུས། དེ་སྐབས་ལུགས་གཉིས་གང་ཐད་ནས་ང་རང་ཀུན་གྱིས་གཅེས་སྤྲས་བྱས་པ། མགར་ར་སང་གི་སེམས་ལ་མ་སོང་ནས། དབུས་མོའི་ཁོང་ཚང་ལ་སྣ་མ་བཞག་པ་ཡིན་པས། བུ་དང་བུ་མོ་གཉིས་ཀ་འཕྲོག །མོ་རང་གི་སྣ་བཅད་ནས་གནོད་མི་བྱེད་ན་ཟེར་བ་སོགས་བཤད་གཏམ་མང་ པོའི་སྐོར་ཡོད་ཀྱང་ཡི་གེར་འཇིགས་ནས་མ་བྲིས་སོ། །དེ་ལ་རྐྱེན་བྱས་ཏེ་ང་རང་འདི་སྣང་ལ་མི་འདུག་སྙམ་ཡོད་ཚེ། རྗེའི་དངོས་སློབ་རྡོ་རྗེའི་མཆེད་པོ་བསོད་སྤྲུལ་སང་དང་། བདེ་གསལ་རྒྱ་མཚོ་སོགས་ཀྱིས། རྗེའི་ཟབ་གཏེར་ཡོངས་རྫོགས་ཀྱི་དབང་ལུང་གསུངས་རོག་ཡང་ཡང་ཟེར་འདུག་པས། བདག་གིས་རང་གཞན་ཀུན་གྱི་དོན་དུ། རྗེ་ལ་དེ་ལྟར་བཀའ་དྲིན་མ་ཆུང་། ད་ལན་རྟེན་འབྲེལ་ཕུན་སུམ་ཚོགས་པའི་དུས་འཛོམས་ཡོད་པས། ཟབ་གཏེར་ཡོངས་རྫོགས་ཀྱི་དབང་ལུང་གསུང་དགོས་ཡང་ཡང་ཞུས་ཀྱང་ཞལ་གྱིས་མ་བཞེས་ནས། བདག་གིས་ཡང་འདི་སྐད་ཞུས། སྙིང་གི་ནོར་བུ་ཁྱོད་ཀྱི་ཟབ་གཏེར་སྤེལ་བའི་སྣོད་དུ་བདག་མ་གྱུར་པ་འདྲ་ན། རང་ཐད་ནས་ལུས་ངག་ཡིད་གསུམ་གྱི་བཤགས་སྦྱང་ཇི་ལྟར་བྱེད་དགོས་ཀྱང་། ཉིད་ནས་གསུངས་པ་ལྟར་བྱེད་ངེས་ཡིན་པས། དེ་ལྟར་གསུང་དུ་གསོལ་ཞུས་ནས་ཕྱག་ཕུལ་བས། རྗེ་དེ་ཉིད་ཀྱི་ཐུགས་འགྱོད་པ་ཆེན་པོས་དེ་ལྟར་མིན་པའི་ལོ་རྒྱུས་ཞིབ་པར་གསུངས་ཤིང་། ཟབ་གཏེར་ཡོངས་རྫོགས་ཀྱི་དབང་ལུང་གསུངས་པར་ཞལ་གྱིས་བཞེས། དེ་ནས་ལོ་ཁྱིམ་དེ་ཀའི་ཟླ་བ་གསུམ་པའི་ཡར་ཚེས་ལ། འདུས་སྡེ་སུམ་བརྒྱ་ཡ་བརྒལ་ལ་དབང་ལུང་གསུངས། དེ་སྐབས་ང་རང་གིས་འབྱུང་ བྃ༔ ལྔའི་བསྲེ་འཕོའི་གདམས་སྐོར་དང་། རྗེ་དེ་ཉིད་ལ་ཁ་ཆེམས་ཀྱི་ཚུལ་དུ་བྱུང་དང་འབྱུང་འགྱུར་གྱི་མཛད་པ་བསྐྱང་ཚུལ་རྣམས་ཡིག་རིས་སུ་བཀོད་ནས། ང་རང་གི་མགོ་སྔས་ན་རྟེན་སྒམ་ཡོད་པ་དེ་ཀར་སྦས་ནས་ཁོང་ལ་གསང་ཡོད་ཚེ། ཉིན་གཅིག་རྗེས་ལུང་གསུང་རྒྱུ་ཕུད་ནས། མུན་རུབ་ཙམ་ལ་བདག་གི་སར་བྱོན་འོང་པས། ང་རང་གིས་ཁྱོད་གསོལ་ཇ་མ་བཞེས་པར་འདི་ཀར་བྱོན་དོན་ཅི་ལགས་ཞུས་པས། རྗེའི་ཞལ་ནས་འདི་སྐད་གསུངས། ང་རང་རྣམ་རྟོག་ཞིག་གིས་བསླང་ནས་འོང་བ་ཡིན། ཁྱོད་ཀྱི་རྟེན་སྒམ་འདིའི་ནང་དུ་ཅི་ཡོད་སྙམ་གི་གསུང་མ་ཐག །ཧར་གྱིས་བཞེངས་ནས་སྒམ་ཆུང་ཕྱག་ཏུ་ཤོར་སོང་། བདག་གི་ཡིད་མ་བདེ་བར་སོང་ཡང་མ་མངོན་པའི་ཚུལ་དུ་བསྡད་འདུག །སྒམ་ཁ་ཕྱེས་ནས་གཟིགས་ཚེ་ཡི་གེ་རྣམས་ཡོད་པས་འདི་རྣམས་ཅི་རེད་གསུངས། བདག་གིས་འདི་རྣམས་གལ་ཆེན་ཞིག་མིན། སྔར་ང་རང་བསྲེ་ཐོག་གནས་ལ་འགྲོ་ཀར་ལྡན་ན། དེ་ལྟར་དགོས་པ་འདྲ་སྙམ་ནས་བྲིས་པ་ཡིན་ཞུས། ཡང་རྗེའི་ཞལ་ནས་ང་རང་ལ་ཞལ་གདམས་གསུངས་ཡོད་པའི་འདི་དེའི་གནས་སྐབས་ལ་དགོངས་པ་ཡིན་ན། འཆི་སྲིད་འབྱུང་ལྔའི་བསྲེ་འཕོ་གསུངས་དོན་ཅི་ལགས། ཁྱོད་ཀྱི་མཛད་སྤྱོད་དང་། སྐུ་ལུས་སོགས་གང་ལ་བརྟག་དཔྱད་བྱས་ཀྱང་ཡིད་མི་ཆེས་པ་ཞིག་འདུག་པས། སྲས་མིང་སྲིང་གཉིས་དང་། ཁྱད་པར་ང་རང་རྣམས་ཐུགས་ཀྱིས་དོར་ནས་འདི་སྣང་ལ་མི་བཞུགས་དོན་ཅི་ལགས། ངེད་རྣམས་ཀྱི་བློ་གཏད་ས་དང་། སེམས་ཁྲིད་ས་སུས་བྱེད། ཁྱད་པར་ང་རང་གི་སྐྱབས་གནས་རེ་ས་གྲོགས་དང་བླ་མ་གཉིས་ཀྱི་རྟེན་དུ་ཁྱོད་ལས་མེད་པ་མཁྱེན་བཞིན། བདག་ཐུགས་ནས་དོར་བ་ཀྱི་ཧུད་གསུངས་ཏེ། ཐུགས་ངལ་ཆེན་པོ་མཛད་འདུག་པས། བདག་གི་སེམས་ཀྱིས་མ་བཟོད་ནས་དེ་སྔའི་བསམ་བྱའི་རྐྱེན་རྣམས་སྦ་གསང་མེད་པར་ཞུས་ནས། ད་ཕན་ཆད་དེ་ལྟར་མི་བྱ་བའི་དམ་བཅའ་ཕུལ། ད་ལན་ཚེ་ཡི་འཕེན་པ་མ་ཟད་ཀྱང་། བསམ་པའི་འཕེན་པ་རྫོགས་ཉེ་བས། ཁྱོད་ནས་ཐུགས་གཟབ་རེ་མཛད་དང་། འུ་ཅག་གཉིས་སྐྱེ་བ་དུ་མར་སྨོན་ལམ་འབྲེལ་ཟབ་ཆེ་བས་ཕན་པ་འབྱུང་ངེས་པ་ཡིན་ཞུས། དེ་ནས་ཟླ་བ་དེ་ཀའི་ཉི་ཤུ་བདུན་གྱི་དགུང་མོ་དབང་གི་དུས་སུ་རང་ལ་མཁའ་འགྲོས་བསུ་མ་བྱུང་ནས། ཌཱཀྐི་རྣམས་ཀྱིས་འདི་སྐད་གསུངས། ཨེ་མ་དགའ་ཆེན་བདེ་བའི་རྣལ་འབྱོར་མ། །གནས་གསུམ་མཁའ་འགྲོའི་ཕོ་ཉ་མཆོག །ཁྱོད་འགྲོ་བའི་དོན་དུ་བྱོན་ན་ཡང་། །མཆེད་དང་ལྕམ་དྲལ་འཁོན་པ་དང་། །འཁོར་ བྃ༔ གྱི་ལོག་སྒྲིབ་སྡང་བ་དང་། །དུས་ཀྱི་རྒུད་པས་སྐྱོ་སུན་སོགས། །འབྱུང་ཚེ་བདེ་ཆེན་ཕོ་བྲང་དུ། །ཀ་དག་རང་གདངས་ཡེ་ཤེས་ཀྱི། །ངང་མདངས་ཕྱིར་གསལ་འོད་ལྔ་ཡི། །མཁའ་དབྱིངས་རྣམ་དག་ལམ་བཟང་པོར། །མིག་འཕྲུལ་བཞིན་དུ་མངོན་སུམ་པ། །བསྒྲོད་པའི་ཐབས་ལ་འདིར་དགོངས་འཚལ། །རྡོ་རྗེ་རིགས་ཀྱི་ཌཱཀྐི་མའི། །ཕོ་ཉ་བཞིན་མཛེས་དཀར་མོ་ཡིན། །མེ་ལོང་ཡེ་ཤེས་དར་ལམ་དཀར། །ཁྱོད་ཤར་གྱི་ལམ་དུ་སྐུ་བསྐྱོད་ལ། །རྡོ་རྗེ་མཁའ་འགྲོའི་བསུ་མ་ཡིན། །རིན་ཆེན་རིགས་ཀྱི་མཁའ་འགྲོ་མའི། །ཕོ་ཉ་སེར་མོ་དོན་གྲུབ་ཡིན། །མཉམ་ཉིད་ཡེ་ཤེས་དར་ལམ་སེར། །ལྷོ་ཡི་ཕྱོགས་སུ་དགོངས་པ་སྤྱོད། །ང་རིན་ཆེན་མཁའ་འགྲོའི་བསུ་མ་ཡིན། །པདྨ་རིགས་ཀྱི་མཁའ་འགྲོ་མའི། །ཕོ་ཉ་དམར་མོ་བཞིན་མཛེས་མའི། །སོར་རྟོག་ཡེ་ཤེས་དར་ལམ་དམར། །ནུབ་ཀྱི་ཕྱོགས་སུ་དགོངས་པ་བསྐྱོད། །ང་པདྨ་མཁའ་འགྲོའི་བསུ་མ་ཡིན། །ཀརྨ་རིགས་ཀྱི་མཁའ་འགྲོ་མའི། །ཕོ་ཉ་བཞིན་མཛེས་ལྗང་མོ་ཡིན། །བྱ་གྲུབ་ཡེ་ཤེས་དར་ལམ་ལྗང་། །བྱང་གི་ཕྱོགས་སུ་དགོངས་པ་བསྐྱོད། །ང་ལས་ཀྱི་མཁའ་འགྲོའི་བསུ་མ་ཡིན། །སངས་རྒྱས་རིགས་ཀྱི་མཁའ་འགྲོ་ མའི། །ཕོ་ཉ་བཞིན་མཛེས་མཐིང་གསལ་གྱིས། །ཆོས་དབྱིངས་ཡེ་ཤེས་དར་ལམ་མཐིང་། །ཁྱོད་དགོངས་པ་རང་སྣང་ཞིང་དུ་བསྐྱོད། །སངས་རྒྱས་མཁའ་འགྲོའི་བསུ་མ་ཡིན། །དར་ནས་རིག་འཛིན་བསྒྲོད་པའི་ལམ། །དེར་བཞུགས་མཁའ་འགྲོའི་གླིང་དུ་བྱོན། །དེ་ན་བདེ་སྐྱིད་བསམ་མི་ཁྱབ། །དཔའ་མོ་དགྱེས་པའི་ལོངས་སྤྱོད་མང་། །ལྷན་སྐྱེས་སེམས་དཔའི་བདེ་སྟོང་ངོམས། །དོན་གཉིས་མཛད་པ་ཞིང་དུ་ལྷགས། །དེ་ཕྱིར་རྩ་གནས་མཁའ་འགྲོའི་གྲོང་། །འོད་ཀྱི་རྣམ་པར་བསྡུས་ནས་ཀྱང་། །ཟག་ཁམས་རིག་སྟོང་དབྱིངས་སུ་བསྒྱུར། །ཐིག་ལེ་དམིགས་མེད་ཆོས་དབྱིངས་མཁར། །རླུང་གི་འགྱུ་བ་ཡེ་ཤེས་སུ། །དག་ནས་སྲོག་འཛིན་དབྱེར་མེད་བསྲེས། །འོད་གསལ་གསང་བའི་ཕོ་བྲང་དུ། །དབྱོན་དབྱིངས་ཀྱི་ཌཱཀྐི་མ། །སྐུ་ཡིས་གར་སྟབས་ཤིགས་སེ་བྱོན། །ལྷུན་འགྲུབ་རིན་ཆེན་རྒྱན་ཆས་གསོལ། །དར་དཔྱངས་རླུང་བསྐྱོད་པུ་རུ་རུ། །དབུ་སྐྲ་ཐོར་ཅོག་ལྡེམས་སེ་ལྡེམ། །ལྷག་མའི་ཟར་བུ་ཏ་ལ་ལ། ། དཔའ་བོ་དཔའ་མོ་སྤྲིན་ལྟར་འཁྲིགས། །སྙན་པའི་རོལ་མོ་གླུ་དབྱངས་ལྡིར། །ངོ་མཚར་འཇའ་དང་འོད་ཀྱིས་གང་། །མིག་འཕྲུལ་ལྟ་བུའི་བཀོད་པ་འདི། །རང་བྱུང་ལྷུན་འགྲུབ་ཨེ་མ་ བྃ༔ ཧོ། །ཞེས་ཟེར་བ་དང་མཉམ་དུ། སྣང་བ་ཐམས་ཅད་འཇའ་དང་འོད་ཀྱིས་ཁྱབ་པའི་ཀློང་དུ། གཟུགས་རྡོ་རྗེ་མ་དཀར་མོ་ཤེལ་གྱི་མེ་ལོང་འཛིན་པ། སྒྲ་རྡོ་རྗེ་མ་དམར་མོ་གསེར་གྱི་སྒྲ་སྙན་འཛིན་པ། དྲི་རྡོ་རྗེ་མ་ལྗང་མོ་བཟང་དྲུག་གི་སྤོས་ཕོར་འཛིན་པ། རོ་རྡོ་རྗེ་མ་དམར་གསལ་བརྗིད་ལྡན་ཞལ་ཟས་འཛིན་པ། རེག་རྡོ་རྗེ་མ་མཐིང་ག་ལྷ་གོས་པཙཉྩ་ལི་འཛིན་པ། ཆོས་རྡོ་རྗེ་མ་དཀར་མོ་ཆོས་འབྱུང་འཛིན་པ། མེ་ཏོག་མ་དཀར་མོ་ཨུཏྤལ་དམར་པོའི་ཕྲེང་བ་འཛིན་པ། བདུག་སྤོས་མ་སེར་མོ་སྤོས་ཁང་འཛིན་པ། སྣང་གསལ་མ་དམར་གསལ་སྒྲོན་མེ་འཛིན་པ། དྲི་ཆབ་མ་ལྗང་མོ་དུང་ཆོས་འཛིན་པ། ཞལ་ཟས་མ་མཐིང་གསལ་རོ་མཆོག་འཛིན་པ། རོལ་མོ་མ་ལྗང་མོ་སིལ་སྙན་འཛིན་པ། རྡོ་རྗེ་རྔ་ཟླུམ་མ་དམར་མོ་འཕྲུལ་གྱི་རྔེའུ་ཆུང་འཛིན་པ། རྡོ་རྗེ་པི་ཝ་མ་མཐིང་གསལ་དབྱངས་སྙན་པི་ཝཾ་འཛིན་པ། རྡོ་རྗེ་གླིང་བུ་མ་སེར་མོ་དྲུག་འགྱུར་གླིང་བུ་འཛིན་པ། རྡོ་རྫ་རྔ་མ་ལྗང་མོ་སྒྲ་ཆེན་རྫ་རྔ་འཛིན་པ། དེ་དག་གི་བར་མཚམས་རྣམས་སུ་རྡོ་རྗེ་སྒེག་མོའི་ཚོགས་དང་། རྡོ་རྗེགར་མའི་ཚོགས་དང་། དཔའ་བོ་གིང་ཆེན་བཅོ་བརྒྱད་དང་། དུར་ཁྲོད་བདག་པོ་མཆེད་བཞི། གཞན་ཡང་ལྷའི་བུ་དང་བུ་མོ་ལ་ སོགས། རིན་པོ་ཆེ་སྣ་ཚོགས་ལས་གྲུབ་པའི་གདུགས་རྒྱལ་མཚན། བ་དན། རྔ་ཡབ་ནོར་བུའི་ཡུ་བ་ཅན། ལྡ་ལྡི་རི། འཕན་དར། འཕྲུལ་གྱི་དཔྱངས་པ་ལ་སོགས་པ། མཆོད་རྫས་དུ་མ་ཐོགས་པ་མང་པོས། སྐུ་ཡིས་གར་སྟབས་ཤིགས་ཤིག་དང་། གསུང་སྙན་ཚངས་པའི་དབྱངས་ཀྱིས་གུ་རུ་སིདྡྷི་དང་ཧ་རི་ནི་ས་སོགས་ཀྱི་གླུ་དབྱངས་ལེན་ཞིང་། ཐུགས་ཀྱི་འདུན་པ་དང་སྐུ་ཡི་རྣལ་འབྱོར་གྱིས་བདག་གི་མདུན་བསུ་བར་མཛད་པར་སྣང་ཚེ། རང་གི་འབྱུང་བཞི་མཐའ་ནས་སྡུད་ཅིང་ལུས་བེམ་སྟོང་ལྟར་སོང་། སེམས་ཕྱི་དབྱིངས་དང་མཉམ། འབྱེད་བྱེད་ཀྱི་ཤེས་རབ་གནས་སུ་དག་པས། འཁོར་འདས་གསལ་སྒྲིབ་མེད་པར་མཐོང་ཡང་། སྣང་བའི་སྐབས་འབྱེད་དཀའ་བ་སོགས་འབྱུང་ཚེ། རྗེ་དེ་ཉིད་དང་། བསོད་སྤྲུལ་སང་གིས་དབུས་མཛད་པའི་ཉེ་འཁོར་ཐམས་ཅད་ཀྱིས་སྨྲེ་ངག་འདོན་ཅིང་ཆོ་ངེ་དི་རི་རི་བྱེད་པ་དང་། གཞན་ཡང་ཆོས་སྒར་འདུས་སྡེ་རྣམས་མི་བདེ་ལོང་ངེ་བྱེད་ཅིང་། དཔེར་ན་བྱ་ཚང་ཁྲ་ཡིས་གཏོར་བ་ལྟ་བུར་འུར་ལོང་ལོང་བྱེད་པ་དང་། ཁྱད་པར་རྗེ་དེ་ཉིད་ཀྱིས་ཐུགས་ཆུང་མཛད་བཞིན། ང་རང་གི་མགོ་ཁོང་གི་ཕྱག་གིས་སྐུ་པང་དུ་བླངས་ནས་འདི་སྐད་གསུངས། གཅེས་ཕྲུག་ཁྱོད་ཀྱིས་བདག་ཐུགས་ནས་དོར་ བྃ༔ ཏེ་ཞིང་དུ་གཤེགས་པར་གྱུར་ན། ང་ཡང་ཡུན་རིང་མི་འགོར་བར་ཁྱོད་དང་མཉམ་དུ་འདུན་པ་གཏད་ངེས་པ་དང་། གཏེར་ཆོས་ལ་སོགས་པ་ཐམས་ཅད་ཀྱང་འཛིན་སྤེལ་བྱེད་པ་ལྟ་ཞོག །རྗེས་ཤུལ་ཙམ་ཡང་མི་མངོན་པར་བྱེད་པ་ཡིན། བདག་གི་འདི་ཕྱིའི་རེ་ལྟོས་བཅའ་ས། མྱུར་ལམ་བསྒྲོད་པའི་ཤིང་རྟ་ཆེན་མོ། ཐབས་གྲོགས་སྙིང་གི་ནོར་བུ་ཁྱོད་དང་སྐྱེ་བ་ཚེ་རབས་ཐམས་ཅད་ལ་འབྲལ་བ་མེད་པར་ཤོག་ཅིག་གསུངས་ཏེ། ཐུགས་ཆུང་བར་མཛད་ཚེ་སྤྱན་ཆབ་རྡོག་པོ་གཅིག་ང་རང་རྣ་བའི་ནང་དུ་ལྷུང་ནས་སྙིང་ལ་རྒྱབ་པ་ལྟ་བུར་བྱས་ཚེ། ང་རང་ཕྱི་དབུགས་ཆད་མ་རག་པར་ཡོད་ཀྱང་ཅུང་ཟད་ཞིག་དྲན་པ་རྙེད་པ་ལྟར་བྱུང་བས། ཡང་རྗེ་དེ་ཉིད་ཀྱིས་བདག་གི་རྣ་བ་ལ་ཞལ་གཏུག་ནས། གཅེས་ཕྲུག་ཁྱོད་ཀྱིས་ང་མ་བརྗེད། ཁྱོད་ཀྱིས་འདུན་པ་སྙིང་གའི་ཨཿནྲྀཿཧཱུྃ་གསུམ་ལ་གཏོད་དང་དྲན་པ་གསལ་འོང་སོགས་ཡང་ཡང་གསུངས་མཐར། ཡིད་བཞིན་ནོར་བུའི་གསུང་ཐོས་པ་ལ་ཡིད་ཕྲོག་ནས་འདུན་པ་ཁོང་ལ་གཏད་ཚེ། སྔར་གྱི་འོད་སྣང་ཐམས་ཅད་ཐག་ཇེ་རིང་ལ་སོང་བ་ལྟར་བྱས་ནས་མི་སྣང་བར་གྱུར། འདི་སྣང་གི་དངོས་པོ་རགས་པ་ཐམས་ཅད་སྣང་ཡུལ་དུ་རེས་གསལ་རེས་མི་གསལ་བ་ལྟ་བུར་གྱུར་ནས། སྒྱུ་ལུས་ཀྱང་རྡོ་ འཁྱག་ལྟར་སོང་འདུག །ང་རང་གཉིད་ཧར་གྱིས་སད་པའི་སྐྱེས་བུ་བཞིན། སྔར་གྱི་སྣང་བ་ཐམས་ཅད་བརྗེད་པའི་ཡུལ་དུ་གྱུར་ནས། ཅི་ཡིན་ཆ་མ་ཆོད་ནས་མིག་གིས་གཟུགས་སྣང་ཅུང་ཟད་མཐོང་འདུག་པས་བལྟས་ཚེ། ཁྱིམ་ཐམས་ཅད་མར་མེ་མང་པོས་གང་འདུག །བསོད་སྤྲུལ་སང་དང་། ཐུབ་བཟང་རྣམས་ཀྱིས་བདག་གི་རྐང་པ་མེ་ལ་དྲོ་ཐབས་བྱེད་འདུག །རྗེས་ད་དུང་བདག་གི་མགོ་སྐུ་པང་ལ་བཞག་ནས། ལུས་ཀྱི་སྐྱེ་མཆེད་རྟེན་བཞུགས་དང་ཚེ་འགུགས་རེ་མཛད་འདུག་ཀྱང་། ང་རང་གི་ངག་ལྐུག་སོང་བ་ལྟར་ཅི་ཡང་སྨྲ་མ་ནུས། གཞན་སྨན་པ་རིམ་འགྲོ་བ་སོགས་ཐམས་ཅད་ཀྱིས་ང་རང་ཤི་ཆགས་བྱས་ཡོད་སྐབས། ཐོ་རངས་དང་པོའི་དུས་སུ་གསང་གྲོགས་ཡིད་བཞིན་ནོར་བུ་མཐུ་ནུས་བྱིན་རླབས་ཆེ་བ་དང་། ང་རང་ལས་ངན་གྱི་འབྲས་བུ་མ་ཟད་ནས་ཕྱི་དབུགས་རླུང་ཆེན་ཆད་མཚམས་ནས་རིམ་གྱིས་སོས་པར་གྱུར་ནས། དེར་འདུས་སློབ་འབངས་ཐམས་ཅད་དང་། ཁྱད་པར་རྗེ་དེ་ཉིད་དང་། བསོད་སྤྲུལ་སང་བཅས་པ་ཐམས་ཅད་ཐུགས་ཤིན་ཏུ་དགྱེས་ཏེ། ཤི་གསོན་འཕྲད་པ་ལྟར་དགའ་སྤྲོ་ཆེན་པོ་མཛད་དོ། །དེ་ནས་ཆོས་ཁྲིད་ཐམས་ཅད་མཐར་ཕྱིན་པར་མཛད་ནས།