Tibetan
བཟང་པོ་ཡིས། །ལོག་ལམ་ཆོས་མིན་བྱ་བ་ཀུན་སྤངས་ནས། །གཞན་ཕན་བྱང་ཆུབ་སེམས་ཀྱིས་གཞི་བཟུང་སྟེ། འགྲོ་ལ་ཕན་ཕྱིར་ལུས་དང་ལོངས་སྤྱོད་ཀུན། །འཕང་བ་མེད་པར་ཕུལ་བ་ལ་བརྟེན་ནས། །གང་དེའི་བསོད་ནམས་ཐུགས་བསྐྱེད་རྫོགས་པའི་ཕྱིར། །བདག་ལོ་སུམ་ཅུ་ནས་བཟུང་རྩ་དྲུག་ བར། །ལོ་བཞིན་ལྷག་ལྷ་གང་རུང་གཞུང་བསྲང་ནས། །ངོ་མཚར་བཀོད་པ་ཅུང་ཞིག་ཡོད་མོད་ཀྱང་། །གསང་བཅུའི་དམ་ཚིག་ཕྲ་ཞིང་བསྲུང་དཀའ་བས། །ཟུར་ཙམ་བརྗོད་པ་བདག་གིས་ཅིའི་ཕྱིར་ཕོད། །དེར་མ་གཏོགས་པའི་ཡིད་མཚོར་དྭངས་བའི་ངོར། །ཆུང་ནས་ད་ལྟའི་བར་གྱི་གནས་ཚུལ་རྣམས། །སྒྲིབ་མེད་ཤར་བ་སྦས་གསང་མེད་པ་རུ། །ཕྲིན་ལས་ཡི་གེའི་རིས་སུ་བཀོད་པ་འདི། །དཔལ་མགོན་བླ་མའི་ཐུགས་བཞེད་སྐོང་བ་དང་། །ཆོས་བདག་སྐྱེས་བུའི་མོས་འདུན་རྫོགས་པ་དང་། །དེར་འཛིན་དམ་པའི་སྐུ་ཚེ་རབ་བརྟན་ནས། །ཆོས་བཞིན་སྤྱོད་པས་དོན་གཉིས་འགྲུབ་གྱུར་ཅིག །ཕྲིན་ལས་སྣ་ཚོགས་ཐེ་ཚོམ་མེད་པ་དང་། །མཛད་སྤྱོད་ཐམས་ཅད་སངས་རྒྱས་མཛད་པར་མཐོང་། །ལོག་རྟོག་མི་མངའ་རྗེས་སུ་འཇུག་པ་རྣམས། །གནས་གསུམ་མཁའ་འགྲོའི་ཚོགས་ཀྱིས་བྱིན་གྱིས་རློབས། །འདིའི་མཐུས་གསང་སྔགས་བསྟན་པ་དར་རྒྱས་ཤིང་། །བསྟན་འཛིན་སྐྱེས་བུའི་ཞབས་པད་བརྟན་པ་དང་། །འགྲོ་ཁམས་བདེ་སྐྱིད་བསོད་ནམས་དཔལ་འབར་ནས། །ཆོས་བཞིན་སྤྱོད་པའི་མཐུན་འགྱུར་ལྡན་པར་ཤོག །སྣང་བ་བདེ་ཆེན་རོལ་པ་རཱ་ཧུ་ལ། །སྟོང་ཉིད་ཤེས་རབ་རང་གཟུགས་སྔགས་སྲུང་མ། །ཟུང་འཇུག་ བྃ༔ རྣམ་རོལ་བཛྲ་ཐིག་ལེ་རྩལ། །ཟབ་གཏེར་བཀའ་ཡི་སྲུང་མ་ཁྱོད་རྣམས་ལ། །གཏད་དོ་བཅོལ་ལོ་གཉེར་ཟུངས་དམ་དུ་བསྲུངས། །ལས་ཅན་སྨོན་ལམ་ལྡན་ལ་ཆོས་འདི སྤྲོད། །དུས་རྣམས་ཀུན་ཏུ་ཅི་བཅོལ་ཕྲིན་ལས་མཛད། །དམ་མེད་ལོག་ལྟ་ཅན་ལ་འདི་མ་སྤེལ། །གལ་ཏེ་འཕྲད་ན་རྟགས་མཚན་མྱུར་དུ་སྟོན། །པདྨ་ལས་འབྲེལ་ཀློང་ཆེན་རབ་འབྱམས་སོགས། །བརྒྱུད་གསུམ་བླ་མ་རྣམས་ཀྱི་བཀའ་དམ་བཞིན། །ཅི་བཅོལ་ལས་ཀུན་ཐོགས་མེད་འགྲུབ་པར་མཛོད། །ས་མ་ཡ་སྟེ་དམ་ཚིག་གསང་བའི་རྒྱ། །_UNK་ཐབས་ཤེས་རིག་སྟོང་ཕྱག རྒྱས་གདབ། །སྐལ་ལྡན་ལས་འཕྲོ་ཅན་དང་འཕྲད་པར་སྨོན། །ས་གསུམ་ཀུན་ཏུ་དགེ་བའི་བཀྲ་ཤིས་ཤོག། ཅེས་རྣམ་པར་ཐར་པ་ངེས་འབྱུང་འདྲེན་པའི་ཤིང་རྟ་སྐལ་ལྡན་དད་པའི་མཆོད་སྡོང་ཞེས་བྱ་བ་འདི་ཡང་སྐྱབས་རྗེ་ཐམས་ཅད་མཁྱེན་པ་མཚན་བརྗོད་པར་དཀའ་ནའང་དོན་གྱི་སླད་དུ་སྨོས་ན་གྲུབ་དབང་རིག་འཛིན་པདྨ་འོད་གསལ་འགྲོ་འདུལ་གསང་སྔགས་གླིང་པས་རིན་ཆེན་གཉིས་པའི་མེ་ལོང་དང་། ཤེལ་བུམ་དྲི་མ་མེད་པ་བཅུད་ཀྱིས་བཀང་བ། དཀར་དམར་མཐིང་གའི་མདངས་འཛིན་རིན་པོ་ཆེའི་རིགས་ལ་སོགས་པ་དང་། པཉྩ་དབང་མདོག་སྐྱེས་བཅས་བཀས་བསྐུལ་སྤྱི་བོར་ཕེབས་པ་བཟློག་ཏུ་མ་ནུས་ཀྱང་། གནས་དུས་ཀྱི་རྐྱེན་མང་གིས་བསྒྱུར་བ་དང་། ཁྱད་པར་ཐ་མལ་སོ་སྐྱེས་བདག་ལྟ་བུ་ལ་ལེགས་བྱས་ཡོན་ཏན་ཟུར་ཙམ་ཡང་མེད་པ་ལ་གཞི་བྱས་ནས་བཏང་སྙོམས་སུ་བཞག་ཡོད་སྐབས། ལུང་ཟིན་ཆོས་ཀྱི་བདག་པོ་གུ་རུ་བི་མ་ལས་རྗེས་སུ་བཟུང་བ། ཆོས་རྒྱལ་ནམ་སྙིང་ཟུང་སྤྲུལ་འདུལ་བ་འཛིན་པ་མཁས་པའི་དབང་པོ་བློ་གྲོས་རབ་ཏུ་གསལ་བ་ནོར་བུ་དབང་རྒྱལ་ནས་རིན་ཆེན་གཉིས་པ་དང་། ལྷ་རེག་ཀ་ཤིའི་མདངས་འཛིན་དང་། ཁྱད་པར་སྒོ་གསུམ་བླ་མའི་ཕྱོགས་སུ་ཕུལ་ནས་ཆོས་མིན་གྱི་བྱ་བ་སྤངས་ཏེ། བཤད་དང་སྒྲུབ་པའི་བསྟན་པའི་སྲོལ་འཛིན་པ་དང་། རང་ཡང་སྒྲུབ་པ་ཉམས་ལེན་ལ་བརྩོན་འགྲུས་མཛད་ནས་སྙིང་པོའི་སྒྲུབ་པའི་མཆོད་པས་བསྐུལ་བ་ཡང་ཡང་ནན་ཏན་ཆེན་པོ་མཛད་པ་དང་། ཨ་སྐྱབས་བླ་མ་ཀརྨ་དོན་འགྲུབ་ཀྱིས་ཀྱང་། རིན་ཆེན་དང་པོའི་འཕགས་མ་རྣམ་པར་རྒྱལ་མའི་སྐུ་ཚད་ལྡན་དང་། རིན་ཆེན་གཉིས་པའི་ནང་མཆོད་སྤུས་ལྡན་སོགས་ཀྱིས་བཀའ་བསྐུལ་ཕེབས་པ་དང་། ཉེ་འཆར་རང་གི་ལུང་འཛིན་ཡི་གེའི་རིས་བྱེད་དགེ་བཙུན་སྐྱེས་བུ་དམ་པ་ཚུལ་ཁྲིམས་རྡོ་རྗེ་དང་། རང་གི་རིགས་ཀྱི་མྱུ་གུ་བུ་མོ་ཆོས་དབྱིངས་སྒྲོན་མ། སློབ་བུ་ཐུབ་བསྟན་བཟང་པོ་སོགས་ཀྱིས་མོས་རྟེན་དྲག་པོས་བསྐུལ་བ་དང་། ཁྱད་པར་མཁན་པོ་ནོར་བུ་དབང་རྒྱལ་དང་། ཚུལ་རྡོར་གཉིས་ཀྱིས་མི་བྲི་རང་དབང་མ་སྟེར་ནས་ཡང་ནས་ཡང་དུ་བཀའ་བསྐུལ་ཟབ་པར་བགྱིས་པའི་བཟློག་ཏུ་མ་ནུས་པར་རང་གི་སྐྱོན་ཡོན་འདྲེས་མའི་གཏམ་འདི་ཡང་གཏེར་ཆེན་བླ་མའི་འཁོར་འབངས་ཡོངས་ཀྱི་ཐ་ཤལ་བ་གཟུངས་མའི་ཆ་ཙམ་འཛིན་པ་སྙིགས་ བྃ༔ དུས་གཏེར་མིང་བདེ་ཆེན་བདེ་བའི་རྡོ་རྗེ་འམ། མདོ་མེད་འཆོལ་མོ་འཁྲུལ་ཞིག་ཀུན་བཟང་བདེ་སྐྱོང་ཆོས་ཉིད་དབང་མོས་རང་ལོ་སོ་ལྔའི་ལོར་བཀྲ་ཤིས་ཟླ་བར་དབུ་བཞག་ནས། རང་ལོ་སོ་དྲུག་ལོའི་དུས་འཛིན་མེ་མོ་ཡོས་ཀྱི་ལོའི་ཟླ་བ་བཅུ་གཅིག་པའི་ཡར་ཚེས་གཅིག་གི་ཉིན་རང་བཞིན་མཁའ་འགྲོ་འདུ་བའི་གནས་མཆོག་སེར་དགོན་དབེན་རིའི་ཁྲོད་ནས་རྫོགས་པར་བགྱིས་པ། ཡི་གེའི་རིས་བྱེད་དམ་ལྡན་སློབ་བུ་ཚུལ་ཁྲིམས་རྡོ་རྗེས་བགྱིས་པའོ། །ཆོས་འདི་དར་བའི་ས་ཕྱོགས་ཀུན་ཏུ་ཚེ་རིང་ནད་མེད་ཆོས་འཕེལ་བ་སོགས་ཕུན་སུམ་ཚོགས་པ་རང་བྱུང་དུ་འབྱུང་ནས་བཀྲ་ཤིས་པར་གྱུར་ཅིག །དེ་ལྟར་མི་ཆོས་བླ་མའི་རྫུན་ཚིག་འདི། །གོང་དུ་སྨོས་བཞིན་ཆོས་བདག་སྐྱེས་བུའི་ངོར། །ལོ་གྲངས་སུམ་ཅུ་རྩ་དྲུག་བར་དག་ཏུ། །རང་གི་གནས་ཚུལ་མ་ལུས་ཞིབ་པར་བྲིས། །འབྱུང་འགྱུར་གནས་ཚུལ་རྗེས་འབྲེལ་རྗེས་སུ་བཞག །རང་གཞན་ལེ་ལོའི་རྒྱུ་འདི་སྤངས་འདོད་ཀྱང་། །གཏེར་བདག་མཁའ་འགྲོས་དགོས་ཆེད་བརྡས་བསྐུལ་དང་། །སྔོན་སྨོན་ལས་ཀྱིས་འབྲེལ་བའི་ཆོས་ཀྱི་བདག །དྲན་པ་ནམ་མཁའི་སྤྲུལ་པ་ཨ་ཡུའི་མིང་། །འོ་བྲན་སྤྲུལ་པ་བིདྱཱའི་མིང་མཐའ་ཅན། །མཚོ་རྒྱལ་བྱིན་ཐོབ་ཨཀྵ་ནི་ལ་དང་། །ཨ་ཏིའི་སྤྲུལ་པ་བསམ་གྱི་མིང་འཛིན་སོགས། །ཁམས་ཀྱི་རི་ཆེའི་ཡུལ་ནས་བྱོན་པ་ཡི། །སྐྱེས་བུ་དེ་དག་རྣམས་ཀྱི་ཡུན་རིང་ནས། །མཐིང་མདོག་ནམ་མཁའི་མདངས་འཛིན་རེག་བྱ་དང་། །དད་དང་མོས་གུས་དྲག་པོས་ཞུ་ནན་བཅས། །ཡང་ ནས་ཡང་དུ་བསྐུལ་བ་ཟབ་ཕྱིར་དུ། །སྙིང་ནས་མ་བཟོད་དུས་ཀུན་ཞལ་རྫུན་མཁན། །སྙིགས་དུས་འགྲོ་འདྲེན་སྙིགས་མའི་གཏེར་མིང་འཛིན། །སྙིང་རྗེའི་ཡུལ་གྱུར་ཁྱིམ་པའི་བརྟུལ་ཞུགས་འཆང་། །ཁྱིམ་མེད་དབེན་ཁྲོད་སྙེགས་པའི་གྱི་ན་བ། །ཀུན་གྱི་ཐ་ཤལ་བདེ་བའི་རྡོ་རྗེ་ཡིས། །སུམ་བཅུ་རྩ་དྲུག་ནས་བཟུང་ཞེས་གསུམ་བར། །ལས་དང་བྱ་བའི་གནས་ཚུལ་ཟུར་ཙམ་བྲིས། །འདིས་མཐུས་ཆོས་བདག་སྐྱེས་བུའི་བར་ཆད་སེལ། །བསྟན་འཛིན་ཚེ་བསྲིང་སྦྱིན་བདག་མངའ་ཐང་རྒྱས། །སེམས་ཅན་བདེ་སྐྱིད་རྟག་ཏུ་ཆོས་ལ་སྤྱོད། །དོན་གཉིས་འབྲས་བུ་དཔག་བསམ་ཤིང་ལྟར་སྨིན། །མཛད་པ་ཕྲིན་ལས་མཐའ་རྒྱས་བཀྲ་ཤིས་ཤོག །ཅེས་པའང་ཁོ་མོ་རང་ཉིད་ཀྱིས་བྲིས་པའོ།། །།དགེའོ།། དགེའོ།། དགེའོ།། ལེགས་སོ།། སརྦ་མངྒ་ལམ།། །།ཕྱི་ལྟར་སྦས་པའི་ཚུལ་སྟོན་མཁའ་འགྲོ་མ། །ནང་ལྟར་གུ་རུའི་རྗེས་བཟུང་ཤེལ་དཀར་མཚོ། གསང་བ་ཡུམ་ཆེན་ཀུན་ཏུ་བཟང་མོ་སྟེ། །བདེ་བའི་རྡོ་རྗེས་བདག་ཡིད་བྱིན་གྱིས་རློབས། ། 099 ༄༅། །དབུས་བཟའ་མཁའ་འགྲོ་བདེ་བའི་རྡོ་རྗེའི་རྣམ་ཐར་ཆེན་མོའི་མཇུག་གི་ཁ་སྐོང་ཉུང་ངུ་གཡུ་ཡི་ཕྲ་ཚོམ་ཞེས་བྱ་བ་བཞུགས་སོ། ཡཤུ་སྤྱི་༄༅། །མཚུངས་མེད་རྗེ་བཙུན་བླ་མ་དམ་པ་ཀུན་བཟང་བདེ་སྐྱོང་དབང་མོའི་ཞབས་ལ་གུས་པ་ཆེན་པོས་ཕྱག་འཚལ་ཞིང་སྐྱབས་ཀྱི་མཆོག་ཏུ་བསྟེན་།ཐུགས་བརྩེ་བས་རྗེས་སུ་ཟུངས་ལ་རྟག་ཏུ་བྱིན་གྱིས་བརླབ་པར་མཛད་དུ་གསོལ། །གསང་ཆེན་བཀའ་ཡི་སྡུད་པོ་མཁར་ཆེན་བཟའ། །ཡང་དག་གྲུབ་པའི་དགྱེས་སྡེ་ཤེལ་དཀར་མཚོ། །ཟུང་འཇུག་སྤྲུལ་པའི་ཟློས་གར་སྨིན་ལེགས་གཟུགས། །བདེ་ཆེན་བདེ་བའི་རྡོ་རྗེ་གཙུག་ན་མཛེས། །གང་གི་རྟོག་བརྗོད་རྒྱས་པའི་མཆོད་སྡོང་ཆེར། །མ་ཚང་ཞལ་སྐོང་ཕྲ་རྒྱན་འདིར་སྤྲས་ཀྱི། །གནས་གསུམ་ཌཱ་ཀིས་རྗེས་སུ་གནང་བ་དང་། །སྐལ་ལྡན་དད་པའི་56 日ང་&ད་༄༅། །གསོས་སུ་དགའ་བས་ལོངས། །དེ་ཡང་དུས་གསུམ་རྒྱལ་བ་ཐམས་ཅད་བསྐྱེད་པའི་ཡུམ་ཆོས་དབྱིངས་ཀུན་ཏུ་བཟང་མོ་དང་གཉིས་སུ་མེད་པ། རྡོ་རྗེ་ཐེག་པ་རྒྱ་མཚོའི་འབྱུང་གནས་རྡོ་རྗེ་བཙུན་མོ་བཛྲ་ཝཱ་རཱ་ཧི་དེ་ཉིད་ཞིང་འདིར་བསམ་བཞིན་མི་མོའི་གཟུགས་སུ་བྱོན་པ། གསང་བ་གསུམ་གྱི་ཆེ་བའི་ཡོན་ཏན་རྒྱ་མཚོ་ལྟ་བུ་མངའ་བ། ལས་འཕྲོ་གཏེར་དང་། ཟབ་མོ་དག་སྣང་། སྙན་རྒྱུད་མན་ངག་སྟེ་ཟབ་རྒྱས་ཀྱི་ཆོས་ཚུལ་འཛད་མེད་ནམ་མཁའི་མཛོད་ལ་རང་དབང་འབྱོར་བ་ལས། ཕྱོགས་དུས་ཀྱི་གདུལ་བྱ་བགྲང་བ་ལས་འདས་པ་སྨིན་གྲོལ་ལ་བཀྲི་བའི་ཕྲིན་ལས་འགྲན་པའི་ཟླ་དང་བྲལ་བ་ཞིང་ སྔགས་ལྷན་སྐྱེས་ཀྱི་རྡོ་རྗེའི་ཕོ་ཉ་མོ་བདག་ཅག་གི་རྣམ་འདྲེན་དམ་པ་ཀུན་བཟང་ཆོས་ཉིད་དབང་མོའམ། བདེ་ཆེན་བདེ་བའི་རྡོ་རྗེཞེས་བོད་ཁ་བ་ཅན་གྱི་ཞིང་ཀུན་ཏུ་མཚན་སྙན་གྲགས་ཀྱིས་ཁྱབ་པའི། མཚན་ལྡན་ཡེ་ཤེས་ཀྱི་མཁའ་འགྲོ་མ་དེ་ཉིད་ཀྱི་མཛད་ཚུལ་རྣམ་ཐར་རྒྱས་པའི་མཇུག་མཐུད་ཅུང་ཟད་འཆད་པ་ལ་གཉིས། སྐུ་ཚེའི་སྨད་ཀྱི་རྣམ་ཐར་མདོ་ཙམ་བསྟན་པ་དང་། ཐ་མའི་མཛད་པ་བསྟན་ཚུལ་བཤད་པའོ། །དང་པོ་ནི། འདི་སྐད་ཅེས་བརྗོད་པར་བྱ་སྟེ། སྔོན་གྱི་བསྐལ་པ་འཇིག་རྟེན་གྱི་ཁམས་སྣ་ཚོགས་པའི་འོད་ཅེས་བྱ་བར་སངས་རྒྱས་རྔ་སྒྲའི་བསྟན་པ་ལ་མཆོག་ཏུ་གུས་པའི་རྒྱལ་པོའི་བུ་མོ་ཡེ་ཤེས་ཟླ་བ་ཞེས་བྱ་བ་ཞིག་ཡོད་དེ། དེས་ཤིན་ཏུ་དད་པའི་སྟོབས་ཀྱིས་སྟོན་འཁོར་རྣམས་ལ་མཆོད་པ་བྱས་ནས་བྱང་ཆུབ་མཆོག་ཏུ་སེམས་བསྐྱེད་པའི་ཚེ། འདི་སྐད་དུ། འདི་ན་སྐྱེས་པ་མེད་ཅིང་བུད་མེད་མེད། །བདག་མེད་གང་ཟག་མེད་ཅིང་རྣམ་རིག་མེད། །ཕོ་མོར་བཏགས་པ་འདི་ནི་ཡ་མ་བརླ། །འཇིག་རྟེན་བློ་ངན་རྣམ་པར་འཁྲུལ་བར་འགྱུར། །ཅེས་བྱ་བ་ལ་སོགས་པ་ཆེད་དུ་བརྗོད་དེ། སྐྱེས་པའི་རྟེན་ལ་བྱང་ཆུབ་འདོད་པ་ནི་མང་ལ། བུད་མེད་ཀྱི་ལུས་ཀྱིས་འགྲོ་བའི་དོན་བྱེད་པ་ནི་འགའ་ཡང་མེད་དོ། །དེ་བས་ན་འཁོར་བ་མ་སྟོངས་ཀྱི་བར་དུ་ ༄༅། །བུད་མེད་ཀྱི་གཟུགས་ཀྱིས་འགྲོ་བའི་དོན་བྱའོ། །ཞེས་དམ་བཅས་ནས་འཕགས་མ་སྒྲོལ་མར་གྱུར་པ་དང་མཚུངས་པར་དྲི་མེད་ཀུན་དགའི་གཏེར་བྱོན་མཚོ་རྒྱལ་རྣམ་ཐར་ལེའུ་བདུན་མ་ལས། གུ་རུས་བཀའ་བསྩལ་པ། མཁའ་འགྲོ་ཡེ་ཤེས་མཚོ་རྒྱལ་ཁྱེད་རང་སྣང་ཙམ་དུ་ཚེ་གཅིག་ལ་དཔལ་ཀུན་ཏུ་བཟང་མོ་དངགོ་འཕང་མཉམ་ནས༔ གཞན་སྣང་དུ་གང་ལ་གང་འདུལ་དུ་སྤྲུལ་པ་ཇི་སྙེད་ཅིག་བཀོད་ནས་ཁྱེད་ཀྱི་སྤྲུལ་པ་བསམ་གྱིས་མི་ཁྱབ་པ་གཅིག་འབྱུང་༔ འཛམ་གླིང་བྱེ་བ་ཕྲག་བརྒྱ་ན༔ སེམས་ཅན་རེ་རེའི་མདུན་དུ་ཡང་སྤྲུལ་པ་རེ་རེ་སྤྲུལ་ནས་གང་ལ་གང་འདུལ་དུ་སྟོན་ཅིང༔ འབྲེལ་ཚད་ཆོས་ཉིད་ཟད་པའི་ས་ལ་བཀོད་པར་འགྱུར༔ མདོར་ན་འཁོར་བ་དོང་ནས་སྤྲུགས་པའི་མཐར་ཐུག་གི་བར་ལ་ཁྱེད་ཀྱི་སྤྲུལ་པ་ལ་འཛད་པ་མེད༔ ཁྱད་པར་ཐུབ་པའི་བསྟན་ཞབས་སྙིགས་མ་ལྔ་བདོ་བའི་དུས་སུ༔ ཁྱེད་ཀྱི་སྐུའི་སྤྲུལ་པ་རིགས་ལྔ་རྟགས་ཀྱིས་མངའ་གསོལ་བས༔ འབྲེལ་ཚད་དོན་དང་ལྡན་པ་ཞིག༔ གངས་ཅན་བོད་ཀྱི་དབུས་སུ་འབྱུང་༔ ཞེས་དང་། མཚོ་རྒྱལ་ཁྱེད་ཀྱིས་ཞུས་པའི་གདམས་ངག་ཟབ་ཆོས་རྣམས་དཀར་ཆག་ལ་བཏབ་ནས་གཏེར་དུ་སྦས་ཏེ་སྨོན་ལམ་བཏབ་ན༔ ཁྱེད་ཀྱི་སྤྲུལ་པ་ རྣམས་དང་དུས་མཚུངས་པར་སེམས་ཅན་གྱི་དོན་བྱེད་པར་འགྱུར༔ ཞེས་དང་། སྟག་ཤམ་མཚོ་རྒྱལ་རྣམ་ཐར་ལས། ཡོན་ཏན་སྐུ་སྤྲུལ་དབུས་ནས་མཁའ་འགྲོ་འབྱུང་༔ ཞེས་སོགས་ཁུངས་ལྡན་གྱི་གཏེར་ལུང་མང་པོ་དཔང་པོར་གྱུར་ཅིང་། རང་གཏེར་ལས་ཀྱང་། མ་འོངས་ཉི་ཤུ་སྙིགས་མ་ལྔ་ཡི་ཚེ༔ ང་སྤྲུལ་ང་དང་གཉིས་མེད་ཁྱིམ་པའི་ཚུལ༔ ཆུ་འབྲུག་ལོ་མ་སྤྱི་མགྲིན་སྙིང་ག་རུ༔ བྃ་དང་ཧ་རི་ནི་སའི་རི་མོ་བཀྲ༔ སུ་ཁའི་མིང་ཅན་ཟབ་མོ་གཏེར་ལ་སྤྱོད༔ པད་འབྱུང་སྤྲུལ་པའི་གྲོགས་དང་འཕྲད་ནས་ཀྱང་༔ གཏེར་གཉིས་བསྟན་པའི་སྒྲོན་མེ་འཛིན་པ་འབྱུང་༔ དེ་དུས་ཆོས་འདིའི་སྒོ་འཕར་རབ་འབྱེད་ནས༔ ཆོས་བདག་མཆོག་བཞི་ཡ་བརྒྱད་ཉེར་ལྔ་སོགས༔ སྨོན་ལམ་དུས་སུ་འཛོམས་ནས་ཆོས་འདིར་འཕྲད༔ བཟང་འབྲེལ་ཚེ་འདིར་མི་གནས་གཏན་སྲིད་ཐོབ༔ ངན་འབྲེལ་སྐྱེ་བ་བདུན་ནས་དཔལ་རིར་འདྲེན༔ ཐེ་ཚོམ་མེད་དོ་རྡོ་རྗེའི་བཀས་མི་བསླུ༔ ཞེས་རྡོ་རྗེའི་ལུང་གིས་ཡང་ཡང་བསྔགས་པའི་གཏེར་སྟོན་གྲུབ་པའི་དབང་མོ་དེ་ཉིད་དབུས་འགྱུར་ར་ས་འཕྲུལ་སྣང་གི་གཙུག་ལ་ཁང་དང་ཉེ་བར་ཡབ་ཡུམ་རིགས་རུས་ཆོ་འབྲང་བཟང་པོའི་སྲས་སུ་རབ་བྱུང་བཅོ་ལྔ་པའི་ཆུ་ཕོ་འབྲུག་ལོ་སྤྱི་ལོ་༡༨༩༢ ངོ་ ༄༅། །མཚར་བའི་ལྟས་དུ་མ་དང་བཅས་སྐུ་བལྟམས་པ་ནས་བཟུང་། དགུང་གྲངས་བཞི་བཅུ་རྩ་གསུམ་ལ་ཕེབས་པ་ཤིང་ཁྱི་ལ་ཐུག་པ་ཡན་གྱི་ཕྱི་ནང་གསང་བའི་རྣམ་ཐར་ཞལ་གསུང་ཤིན་ཏུ་རྒྱས་པ་སྐལ་ལྡན་དད་པའི་མཆོད་སྡོང་ཞེས་བྱ་བ་ཤོག་གྲངས་ལྔ་བརྒྱར་ལོངས་པ་དང་། གཞན་ཡང་མ་དང་མཁའ་འགྲོའི་གསང་ཚིག་གཏེར་འབྱུང་ལོ་རྒྱུས་ཐོར་བུ་ལེ་ཚན་རྣམས་སུ་དད་པའི་སྤུ་ལོང་དབང་མེད་དུ་གཡོ་བའི་ངོ་མཚར་རྨད་དུ་བྱུང་བའི་འཕགས་ཆེན་དམ་པའི་མཛད་པ་རབ་ཏུ་གསལ་བས་མོས་ཤིང་དོན་དུ་གཉེར་བ་མཆིས་ན་དེ་དག་ལས་རྟོགས་པར་བྱ། འདིར་དེ་རྣམས་སུ་མི་གསལ་བ་གདུལ་བྱ་ཐུན་མོང་གི་སྣང་ངོ་དང་བསྟུན་པའི་མཛད་ཚུལལོ་ཟླའི་དུས་ཚིགས་ངེས་པ་འགའ་ཞིག་རྣམ་ཐར་ཆེན་མོའི་མཇུག་མཐུད་ཀྱི་ཚུལ་དུ་སྨྲོས་པ་ལ། དེ་ཡང་མཚན་ལྡན་ཡེ་ཤེས་ཀྱི་མཁའ་འགྲོ་མ་དེ་ཉིད་དགུང་གྲངས་ཞེ་ལྔར་ཕེབས་པ་ཤིང་ཕག་ལོ་ལ་བོད་ཆེན་པོའི་སའི་ཐིག་ལེ་ཨ་བོ་སེ་ར་དགོན་གྱི་ཡང་དབེན་དུ་མཉམ་རྗེས་རིས་མེད་འོད་གསལ་འཁོར་ཡུག་གི་དགོངས་པ་ལས་གཡོ་བ་མེད་བཞིན་དུ་བསྡུ་དངོས་བཞིའི་སྒོ་ནས་སྨིན་གྲོལ་བདུད་རྩིའི་ཆོས་ཆར་འབེབས་པས་གཞན་དོན་རྒྱ་ཆེན་པོ་མཛད་བཞིན་པའི་ངང་ནས་བཞུགས་པ་ན། བཀའ་བཞིན་སྒྲུབ་ པའི་མཆོད་པས་མཉེས་པའི་སློབ་མའི་གཙོ་བོ་བསོད་སྤྲུལ་སྣ་ཚོགས་རང་གྲོལ་ཞི་བར་གཤེགས་པའི་རྗེས་ཀྱི་བྱ་བ་རྣམས་ཌཱ་ཀི་ཆེན་མོ་ཉིད་ནས་ཐུགས་དགོངས་ཆོས་དབྱིངས་སུ་རྫོགས་ཐབས་མཐར་ཕྱིན་པར་གནང་བའི་སྐབས་འདས་རྗེས་ངོ་མཚར་ཅན་བབ་པ་ཟུར་དུ་གསལ། སྐབས་འགར་རྗེ་མོ་རང་ཉིད་ལ་ཡང་ཞིང་ཁམས་འཕོ་བའི་ལྟས་སུ་འདི་སྣང་དབྱིངས་སུ་ནུབ་སྟེ་དག་པའི་ཞིང་ཁམས་མུ་མཐའ་དང་བྲལ་བ་འབའ་ཞིག་གཟིགས་པ་སོགས་བྱུང་སྐབས། ཀཿཐོག་ངེས་དོན་དབང་པོའི་སྐུ་ཕྲེང་བཞི་པ་ཕྱག་སྤྲུལ་རིན་པོ་ཆེ་པདྨ་ཕྲིན་ལས་རྒྱ་མཚོས་དངོས་འབུལ་སྤམ་མཐོ་བ་དང་དམ་ཚིག་གི་རྫས་ཐབས་ཤེས་རྡོར་དྲིལ་དང་བཅས་ཕུལ་ནས་བརྟན་བཞུགས་ཟབ་ནན་འབུལ་གནང་མཛད་པའི་རྟེན་འབྱུང་གིས་འདི་ལོའི་སྐུ་ཚེའི་འཕྲང་སེལ། དེ་ནས་ལི་སྟོད་སྐལ་བཟང་དགོན་དུ་ཕྱག་ཕེབས་ཏེ། གཏེར་ཆེན་བདུད་འཇོམས་གླིང་པའི་དངོས་སློབ་བླ་མ་དམ་པ་ཚེ་མཆོག་ལས། ལས་རབ་གླིང་པའི་རྟེན་འབྲེལ་ཉེས་སེལ་དབང་ལུང་གསན་ཞིང་། སྔོན་ཆད་རྟེན་འབྲེལ་འཕྱུགས་པའི་ཉེས་སྐྱོན་མཐའ་དག་ད་རེས་འདིས་སོར་ཆུད་པ་ཡིན་ཞེས་གསུངས། གཏེར་སྲས་རྡོར་དགྲའམ་གསང་བདག་མི་འགྱུར་རྡོ་རྗེས་གདན་དྲངས་ཏེ་གསང་བའི་ལས་རྒྱར་བསྟེན་པས་ཌཱ་ཀི་ཉིད་ ༄༅། །ཀྱིས་སྔོན་ཆད་བརྡ་མ་ཁྲོལ་བ་ཡོན་ཏན་རྒྱ་མཚོ་ནས་སྤྱན་དྲངས་པའི་མཚོ་རྒྱལ་ཐུགས་སྒྲུབ་སྐོར་གྱི་བརྡ་རང་གྲོལ་དུ་གྱུར་པའི་བདག་པོའི་རྐྱེན་དང་དེ་སྐབས་སུ་སྐུ་ལྟེམ་ནས་ཡུན་རིང་སོང་བ་ཡང་འདི་ནས་གཞི་མེད་དུ་དངས། ཐབས་ཀྱི་དཔའ་བོས་བསྐུལ་མ་དང་བཅས་བདེ་ཆེན་ཕོ་ཉའི་མྱུར་ལམ་གྱི་ཟབ་གནད་ཐུན་མོང་མ་ཡིན་པ་མགུར་མའི་ཚུལ་དུ་གཏན་འབེབས་གནང་བས་ཐུགས་དགྱེས་པའི་རྩེར་སོན། གཏེར་སྲས་མདུན་ནས་ཚུར་ལ་ཡབ་རྗེའི་གཏེར་གསར་སྐོར་གྱི་སྒྲུབ་ཆེན་ཕྱག་བཞེས་དངགརཐིག་དབྱངས་གསུམ་སོགས་རང་ལུགསགཙང་མ་མི་ཉམས་ཆེད་འབད་པས་གསན་ནས་ཐུགས་སུ་ཆུབ་པར་མཛད། དེ་ནས་རང་གནས་སུ་ཕྱག་འཁོར་ནས་ཐུགས་དམ་ལ་གནས་པའི་ཚེ། མཁའ་འགྲོ་ཀུན་གསལ་དབང་མོས་འབྱུང་འགྱུར་གསང་བའི་ལུང་བསྟན་བསྩལ་བ་ཟུར་དུ་གསལ། དགུང་གྲངས་ཞེ་ལྔ་མེ་བྱི་ལོར། ལུང་ཟིན་ཆོས་ཀྱི་བདག་པོ་ཉག་རོང་ཁྲ་སྐྱ་བླ་མ་བྱ་བྲལ་བ་ཤེས་རབ་འོད་ཟེར་གྱིས་སྤྱན་འདྲེན་པའི་བང་ཕྱིན་འབྱོར་བས་རྫ་ཁོག་བེེ་ཕུག་མཁའ་འགྲོ་ཡང་རྫོང་དུ་ཕེབས་ནས་གནས་དེའི་སྒྲུབ་བཙུན་ཕོ་མོ་རྣམས་དང་བྱིན་རླབས་ནང་ཇོ་དགོན་བཅས་ཀྱི་སྐལ་ལྡན་རྣམས་ལ་གཏེར་གསར་ཁྲོས་མ་དང་རིག་འདུས་ སོགས་ཀྱི་བསྙེན་སྒྲུབ་ལས་གསུམ་གྱི་ཕྱག་ལེན་དང་བསྐྱེད་རྫོགས་ཟབ་མོའི་གདམས་ཁྲིད་འདོན་རྟ་དབྱངས་བཅས་ལྗགས་ཁྲིད་བཀའ་དྲིན་བསྐྱངས་ཤིང་། སྲུབ་དབར་རྣམས་སུ་ཡུལ་ཕྱོགས་དེའི་དད་འདུས་སེར་སྐྱ་ཕོ་མོ་ཤིན་ཏུ་མང་པོ་ལ་ཕྱག་དབང་བྱིན་རླབས་ཆོས་འབྲེལ་སོགས་སོ་སོའི་འདོད་པ་ལྟར་གནང་ནས་འབྲེལ་ཚད་ཐར་ལམ་ལ་བཀྲི་བར་མཛད། ལོ་འདིར་རྒྱ་དམར་ཀླ་ཀློའི་གཡོ་འཁྲུགས་ཀྱི་འཚུབ་མ་མདོ་སྨད་ལྷོ་བྱང་ཀུན་ཏུ་ལྡང་བའི་ཟིང་རྐྱེན་གྱིས་ཆོས་སྒར་ཡུལ་གཅིག་ནས་གཅིག་ཏུ་འཕོ་སྐྱས་ཀྱིས་རྫ་ཁོག །ཟླ་ཡུལ། སྙི་སྟོད་རྣམས་སུ་ཕེབས་དགོས་ཤར་ཡང་རྗེ་མོའི་ཐུགས་རྗེ་ནུས་མཐུ་ཁོ་ལ་བརྟེན་ནས་མི་ཕྱུགས་གང་ལའང་གནོད་སྐྱོན་ཕྲ་མོ་ཙམ་ཡང་མ་བྱུང་། སྙིའི་ཆུ་ཚན་ཁར་སྐུའི་འཕྲོད་བསྟེན་གནང་སྐབས། དེའི་ཉེ་འདབས་སུ་ཕ་དམ་པའི་སྒྲུབ་ཕུག་དང་རང་བྱོན་ངོ་མཚར་ཅན་མང་པོ་བཞུགས་པ་སྐྱེ་བོ་ཀུན་ལ་གནས་ཀྱི་ངོ་སྤྲོད་གནང་ཞིང་ཨ་དོ་ཞེས་པའི་བྲག་ནས་ཟབ་གཏེར་ཁ་ཤས་ཀྱང་བཞེས། དེ་ནས་རྒྱའི་དམག་དཔུང་རྣམས་རེ་ཞིག་ཡུལ་དུ་ལོག་ནས་དུས་བདེ་འཇགས་བྱུང་བསྟུན་དགེ་རྩེ་ཟླ་སྟོད་ཀྱི་འབྲོག་ཆེན་ཁོ་འབུད་ཅེས་པའི་ལུང་པར་བཞུགས་སྒར་སྤོས་ཏེ་ཐོགས་ཤིག་སྟན་འཇགས། སྟོན་མཇུག་ཕྱོགས་ནས་འདུས་པའི་བུ་སློབ་ ༄༅། །གསར་རྙིང་རྣམས་ལ་གཏེར་གསར་སྔོན་འགྲོ་དངོས་གཞི་ཐོད་རྒལ་དང་བཅས་པའི་ཟབ་ཁྲིད་རྒྱུད་ཐོག་ཏུ་སྨིན་པར་བཏབ་མཛད་དེ། དཔོན་སློབ་ཐམས་ཅད་ལོ་བསྟར་འཆར་ཅན་ཞག་བརྒྱའི་བར་སྐུ་མཚམས་བཅད་རྒྱ་ལ་བཞུགས་ནས་སྟོན་འཁོར་ལྷན་ཅིག་ཏུ་ཐུགས་དམ་ཉམས་ལེན་ཁོ་ན་ལ་གཞོལ་ཞིང་མཐར་སྐུ་མཚམས་གྲོལ་རྗེས། ཉིད་ལ་གནས་དེར་ལྷ་འདྲེའི་ཆོ་འཕྲུལ་མི་བཟད་པ་སྣ་ཚོགས་བྱུང་ཞེས་གསུངས། དེ་ནས་དགུང་གྲངས་ཞེ་དྲུག་པ་མེ་གླང་ལོར། བདུད་འཇོམས་ཡབ་སྲས་ཀྱི་དངོས་སློབ་མགར་བླ་མ་དགེ་ལེགས་རྒྱ་མཚོའི་ཞལ་སློབ་གྲྭ་བཙུན་རྣམས་