Tibetan
ཀྱིས་གདན་ཞུས་ལྟར། རྩང་སྒར་དུ་ཕྱག་ཕེབས་ནས་རི་ཁྲོད་པ་རྣམས་ལ་ངོ་སྤྲོད་དང་གེགས་སེལ་བོགས་འདོན་སོགས་སོ་སོའི་རྒྱུད་དང་འཚམས་པར་མཛད། དུས་ཤིག་མ་དང་མཁའ་འགྲོའི་ལུང་བསྟན་བྱུང་བ་ཟུར་དུ་གསལ། ཟླ་བ་དྲུག་པར་དགེ་རྩེ་གྲྭ་ལག་དགོན་པའི་ཚེ་བཅུ་ཆེན་མོ་མཇལ་བར་ཕེབས། དེར་ཕྱག་སྤྲུལ་རིན་པོ་ཆེ་དང་མཇལ་འཕྲད་ཐོག་ཕན་ཚུན་ཐུགས་ཕེབས་པའི་གསུང་གླེང་མང་པོ་གནང་ནས་སླར་རྩང་སྒར་དུ་ཕེབས་ནས། སྐལ་ལྡན་འདུས་པའི་ཚོགས་ལ་རང་ལུགས་ས་གཏེར་སྔོན་འགྲོ། དངོས་གཞི་ཁྲེགས་ཆོད་སྣང་སྦྱང་ས་གཏེར་ཐོད་རྒལ་ བཅས་པའི་སྒོམ་ཁྲིད་ཕོག་སྟེ་དཔོན་སློབ་རྣམས་འཆར་ཅན་ཞག་བརྒྱའི་མཚམས་སྒྲུབ་ལ་བཞུགས་ཤིང་སྐུ་མཚམས་གྲོལ་བའི་རྗེས་ཀྱི་གཏང་རག་ཚོགས་འཁོར་སོགས་མཐའ་རྒྱས་མཛད། ཀཀཿ ཐོག་ཕྱག་སྤྲུལ་རིན་པོ་ཆེས། ཉིད་གཏེར་ཕུར་སྒྲུབ་བདུད་ལས་རྣམ་རྒྱལ་དང་། མཚོ་རྒྱལ་ཐུགས་སྒྲུབ་སོགས་ཀྱི་སྨིན་གྲོལ་རྒྱབ་རྟེན་དང་བཅས་པ་གསན་ནས་རྗེ་ཌཱ་ཀི་ཉིད་ནས་ཆོས་ཀྱི་བདག་པོར་ངོས་འཛིན་ཀྱང་གནང་། ཉག་རོང་ནས་བླ་མ་ཚུལ་ཁྲིམས་ནོར་བུ་རྗེ་འདི་པའི་མཚན་སྙན་ཐོས་ཙམ་ནས་སྔོན་སྨོན་དུས་སུ་སྨིན་པ་ལས་མི་འཕྲོག་པའི་དད་པ་འཁྲུངས་ཏེ་ཤུལ་རིང་གི་ལམ་ནས་ཆེད་གཉེར་ཌཱ་ཀི་ཆེན་མོ་མཇལ་བར་བྱོན་ཏེ་སྐུ་མདུན་ནས་ཉིད་གཏེར་ཟབ་ཆོས་ཡོངས་རྫོགས་ཀྱི་སྨིན་གྲོལ་ལུང་བཅས་གསན་བཞེས་དང་འབྲེལ། གཏེར་ཆོས་རྒྱབ་ཆོས་གསུང་རྣམས་བཅས་པོད་དྲུག་ལོངས་པ་བཞུགས་པ་ཚང་མ་ཞལ་བཤུས་ཏེ་དག་པར་ཞུས་ཤིང་ཟབ་གཏེར་འཛིན་སྐྱོང་སྤེལ་བའི་སྐྱེ་བུར་ལུང་ནས་ཟིན་པའི་བདེན་པ་མངོན་སུམ་དུ་གྱུར། དེ་ནས་དགུང་གྲངས་ཞེ་བདུན་པ་ས་སྟག་ལོར་གཏེར་སྲས་དྲི་མེད་འོད་ཟེར་གྱི་ཡང་སྲིད་དབུས་ཕྱོགས་ཀྱི་འདུས་པ་མང་པོ་ལ་བདུད་འཇོམས་རྡོ་རྗེ་དང་སྲས་དྲི་མེད། མཁའ་འགྲོ་རང་ཉིད་དང་བཅས་པའི་གཏེར་ཁ་གསུམ་གྱི་ཆོས་སྐོར་ ༄༅། །ཡོངས་རྫོགས་ཀྱི་སྨིན་གྲོལ་རྒྱབ་རྟེན་དང་བཅས་པ་རིག་འཛིན་བརྒྱུད་པའི་ཕྱག་བཞེས་བཞིན་སྨིན་རྒྱས་སུ་བསྩལ། དེ་སྐབས་མགའ་ར་བླ་མ་དགེ་ལེགས་རྒྱ་མཚོའི་ཡང་སྲིད་ཁྲི་ཁར་མངའ་གསོལ་མཛད་སྐབས་མཁའ་འགྲོའི་ལུང་བསྟན་བྱུང་བ་ཟུར་དུ་གསལ། དེ་ནས་རྫ་ཁོག་ཏུ་ཆུ་ཚན་ལ་ཞུགས་པར་ཆིབས་བསྐྱོད་གནང་བའི་ཞོར་ལ། གཡུང་དྲུང་བོན་གྱི་རིང་ལུགས་འཛིན་པ་སྟེང་ཆེན་དགོན་སོགས་གནས་གཟིགས་དང་། གྱེར་ཟ་རི་ཁྲོད་དུ་ཤར་རྫ་པ་བཀྲ་ཤི་རྒྱ་མཚན་ཞེས་བོན་གྱི་སྟོན་པ་ཆེན་པོ་དེ་ཉིད་ཕུང་པོ་བཟླས་ལུང་། བླ་སྤྲུལ་གྲྭ་བཙུན་མང་པོར་དངོས་གཞིའི་ངོ་སྤྲོད་དང་ཞལ་གདམས་ལུང་བསྟན་བསླབ་བྱ་སོགས་རྒྱུད་སྨིན་པར་བསྩལ་ནས་ཐམས་ཅད་ཡིད་དགའ་མགུ་རང་པར་མཛད་དེ་ཟླ་བ་དགུ་པར་ཉག་བླ་ཤེས་རབ་འོད་ཟེར་དང་སྟབས་སུ་གདན་ས་ནས་བསྐྱོད་དེ་རིམ་ཕེབས་ཀྱི་ལམ་ཞོར་གླིང་ཚང་རྒྱལ་པོའི་ཕོ་བྲང་རྫོང་འགོར་གདན་ཞུས་ལྟར་དེར་ཕེབས་ཏེ་ཆོས་རྒྱལ་ཡབ་སྲས་དང་། བཙུན་མོ་རྣམས་ཀྱིས་དད་གུས་བཀུར་སྟི་དཔེ་མེད་མཛད་ཅིང་ཌཱ་ཀི་ཉིདགཏེར་ལས་དབང་བཀའ་ཁ་ཤས་ཀྱང་ཞུསཤིང་རྫོགས་པར་རྗེས་ནས་ཞུ་རྒྱུའི་རྟེན་འབྲེལ་འཕྲོ་ཅན་དུ་བཞག་སྟེ། མཆོད་ཡོན་ཐུགས་མཐུན་དམ་ཟབ་ངང་སྐྱེལ་ཐུང་ མཛད། རྨར་རོང་རྡོ་རྗེ་ཕག་མོའི་གནས་ཀྱི་ཆུ་ཚན་ཁར་ཚོགས་འཁོར་བསྐོར་ཞིང་འཇམ་མགོན་ཀོང་སྤྲུལ་གཏེར་གནས་གྲུ་གུ་རྟིང་དཀར་བྲག་ནས་ཟབ་གཏེར་ཞིག་ཀྱང་བཞེས། དེ་ནས་རིམ་བྱོན་གྱིས་ཟླ་བ་བཅུ་གཅིག་པའི་ནང་སྟག་ལུང་མ་ཐང་རི་བོ་ཆེའི་གདན་སར་ཞབས་སོར་འཁོད་སྐབས་ཕེབས་བསུ་སྣེ་ལེན་གཟབ་བརྒྱས་བཅས་སྐྱབས་མགོན་ཞབས་དྲུང་བླ་བྲང་དུ་བཞུགས་སྟན་འཇགས། ཟླ་བ་བཅུ་གཉིས་པར་དབུ་ཚུགས་ཏེ་ཞབས་དྲུང་མཛོད་པ་དང་བླ་སྤྲུལ་ཁག་དབུས་ཆོས་ཞུ་འདུས་པ་བརྒྱ་ཕྲག་བརྒལ་བ་ལ་གཏེར་ཁ་གསུམ་གྱི་སྨིན་གྲོལ་རྒྱབ་རྟེན་དང་བཅས་པ་ལེགས་པར་བསྩལ། དེ་སྐབས་དབང་གི་སྟ་གོན་མཛད་དུས་དབང་ཁང་དུ་ཡོལ་བས་མཚམས་བཅད་ཡོད་པའི་ཕྱི་ལ་ཉེ་གནས་བླ་མ་ཚུལ་ཁྲིམས་རྡོ་རྗེ་དང་། ཤེས་རབ་འོད་ཟེར་རྣམ་གཉིས་བཞུགས་པ་ལ་ནང་ནས་རྗེ་བཙུན་ཌཱཀྐི་ཉིད་ཀྱི་བཀའ་ལས། རང་རེའི་ཚེ་འདི་དང་ཕྱི་མའི་བར་ལ་འུ་ཅག་གི་བར་གྱི་ཡོལ་བ་འདི་ཙམ་ལས་མེད་གསུངས་པ་དེ་སྐབས་ཐུགས་སྣང་གང་ཡང་བྱུང་མི་འདུག་ཀྱང་རྗེས་ནས་བསམ་ན་མྱུར་དུ་ཞིང་ཁམས་བརྗེ་རྒྱུའི་ཕྱི་མཐའ་གསལ་བར་གཟིགས་པའི་གསུང་དུ་གནང་། ཟླ་བ་དེའི་ཚེས་བཅུ་བདུན་ཉིན་རྩང་སྒར་བུ་སློབ་རྣམས་ལ་ཕྱི་མཐའི་བསླབ་སྟོན་གདམས་ངག་འབྱུང་འགྱུར་ལུང་ ༄༅། །བསྟན་དང་བཅས་པ་སྤྲིངས་ཡིག་ཚུལ་དུ་བསྩལ། དེ་ནས་དགུང་གྲངས་ཞེ་དགུའི་རང་སྐག་ཐོག་ཕེབས་པ་ས་འབྲུག་ལོའི་ཆོ་འཕྲུལ་ཟླ་བ་ལ་དཔོན་སློབ་ཉུང་ཤས་ཤིག་གསང་སྟབས་ཀྱིས་མདོ་ཁམས་གནས་ཆེན་ཉེར་ལྔའི་ཡ་གྱལ་སྤོ་ནེ་བྲག་དཀར་ཨོ་རྒྱན་རྫོང་དུ་ཕེབས་ཏེ་ཞག་འགའ་ལ་ཐུགས་དམ་མཛད། ཉིན་གཅིག་གནས་ཀྱི་ལྟེ་བ་མཱ་ར་ཏི་ཀ་ཞེས་པའི་སྒྲུབ་ཕུག་གི་སྒོ་གདོང་གཡོན་ངོས་བྲག་གཡང་ཤིན་ཏུ་གཟར་བ་མི་གཏན་ནས་མི་ཐར་བ་ལ་མ་འགགས་རྫུ་འཕྲུལ་གྱི་རོལ་པས་ཐོགས་མེད་དུ་བྱོན་ཏེ་གཏེར་ཁ་ཞིག་བཞེས་པར་མཛད་པའི་བྲག་གཡང་ངོས་སུ་འདམ་ལ་བཏབ་པ་ལྟ་བུའི་ཞབས་རྗེས་མང་པོ་བྱུང་བ་ད་ལྟའང་ཀུན་གྱི་མཐུན་སྣང་དུ་མཇལ་རྒྱུ་ཡོད། །དེ་ནས་བླ་མ་ཤེས་རབ་འོད་ཟེར་དང་ཉག་སྤྲུལ་ཡབ་སྲས། ཉེ་གནས་ཚུལ་རྡོར་བཅས་དཔོན་སློབ་ལྷན་རྒྱས། གནས་དེའི་གཤམ་སྒྲུབ་ཕུགགཏིང་རིང་པོར་སྒྲོན་མེའི་སྣང་བ་ལ་བརྟེན་ནས་ཕེབས་ཏེ་བྲག་རིའི་ཁོངས་གསེང་དུ་གུ་རུ་རིན་པོ་ཆེ་དང་རྗེ་འབངས་རྣམས་ཀྱི་སྒྲུབ་དཀྱིལ་དང་ཕྱག་ཞབས་ཀྱི་རྗེས་སོགས་རང་བྱོན་ངོ་མཚར་ཅན་མང་པོ་བཞུགས་པ་སྐྱེ་བོ་ཀུན་ལ་མཚོན་པར་མཛད་ཅིང་ཟབ་གཏེར་ཁ་ཤས་ཀྱང་སྤྱན་དྲངས་ནས་གཏེར་ཤུལ་བསྡམས་པར་མཛད། གནས་དེ་ཉིད་ དུ་འཇམ་དཔལ་སྒྲུབ་ཐབས་ཤེས་རབ་བློ་འཕེལ་ཆ་ལག་དང་བཅས་པ། གུ་རུའི་ཐུགས་སྒྲུབ་བྱིན་རླབས་གཏེར་མཛོད། ཚེ་སྒྲུབ་ཡང་གསང་སྙིང་པོ་བཅས་གཏན་ལ་འབེབས་པར་མཛད་ནས། ལས་ཅན་སློབ་བུ་རྣམས་ལ་རིམ་གྱིས་སྤེལ་བར་མཛད། དེ་ནས་ཟླ་བ་གཉིས་པར་ས་མདོ་བཀྲ་ཤིས་འཁྱིལ་དུ་ཕེབས་ནས། ཉག་སྤྲུལ་ཡབ་སྲས་དབུས་འདུས་པའི་ཚོགས་རབ་ཏུ་མང་པོ་ལ་སླར་ཡང་གཏེར་ཁ་གསུམ་གྱི་དབང་ལུང་ཁྲིད་གསུམ་རང་ལུགས་བརྒྱུད་པའི་ཕྱག་བཞེས་བཞིན་སྨིན་རྒྱས་སུ་བཀའ་དྲིན་བསྩལ། འདི་ནི་རང་གཏེར་ལས། ལྷོ་ཕྱོགས་མངྒའི་མིང་འཛིན་གནས་ཀྱི་ཆར༔ ཁྱོད་ཀྱི་གདུལ་བྱའི་ལྷག་མ་དེ་རུ་བབ༔ ཅེས་གསུངས་པ་ལྟར་སྐུ་ཚེ་འདིའི་གདུལ་བྱའི་ཕྱི་མ་ནི་དེར་འདུས་ཀྱི་སྐལ་ལྡན་རྣམས་ཡིན་པར་མངོན་ནོ།། །།ད་ནི་གཉིས་པ་ཐ་༡མའི་མཛད་ཚུལ་བསྟན་པ་ལ་གཉིས། དངོས་དང་འཕྲོས་དོན་བརྗོད་པས་མཇུག་བསྡུ་བའོ། །དང་པོ་ནི། དེ་སྐབས་ཉེ་གནས་ཚུལ་རྡོར་ལ་བཀའ་ལས་ཁོ་མོའི་སྨིན་མཚམས་ནས་མཆེད་པའི་འོད་མདངས་ཀྱི་ཀློང་དུ་ཞི་ཁྲོ་ལོངས་སྤྱོད་རྫོགས་པའི་སྐུ་ཡོངས་སུ་རྫོགས་པ་ཤར་གྱི་འདུག་ཅེས་གསུངས། ཡང་ད་ནི་ཁོ་མོ་ཡུན་དུ་འཚོ་བའི་ངེས་པ་མེད། ད་ལྟ་ཤི་ནའང་བློ་ལྷག་ལུས་པ་ནི་ཅང་ ༄༅། །མེད། གང་ཞེ་ན་།གཏེར་སྟོན་ཡབ་སྲས་ཀྱི་བསྟན་པ་རིན་པོ་ཆེ་འདི་ཉིད་འཛིན་སྐྱོང་སྤེལ་གསུམ་གྱི་བྱ་བ་རྒྱ་མི་ཆུང་བ་འགྲུབ་ཡོད་པས་ཞེ་བློ་བདེ་བ་ཡིན་ཞེས་གསུངས། དེ་སྐབས་ཞམ་རིང་པ་སུས་ཀྱང་ཞབས་པད་ཡུན་དུ་བརྟན་དགོས་པའི་ཞུ་བ་དང་གལ་སྲི་སྐུ་མི་བཞུགས་པ་ཡིན་ན་རྗེས་སུ་ཇི་ལྟར་བགྱིད་ཀྱི་ཞལ་ཆེམས་བསྩལ་བར་གསོལ་བ་འདེབས་པ་བཅས་གང་ཡང་བྱུང་མི་འདུག་སྟབས་རྗེས་ནས་བློ་འགྱོད་ཤིན་ཏུ་ཆེ་ཞེས་རྡོ་རྗེ་མཆེད་ལྕམ་འགའི་ངག་ལས་ཐོས། དེ་ནས་ས་ག་ཟླ་བར་སྐུ་བསྙུན་ཚུལ་བསྟན་ཏེ། འཁོར་བུ་སློབ་རྣམས་ནས་གསོལ་སྨན་དང་ཞབས་བརྟན་རིམ་གྲོ་རྒྱ་ཆེར་བསྒྲུབས་ཀྱང་བསྙུན་གཞི་དྭངས་བསྐྱེད་མ་བྱུང་བར་ཉིན་གཅིག་བཀའ་ལས་ད་ནི་ཁོ་མོ་འདིར་སྡོད་པས་མི་ཡོང་། མྱུར་དུ་རི་བོ་ཆེའི་གདན་སར་འཁྱོལ་བ་བྱེད་དགོས་ཞེས་ཕེབས་ཕྱམ་ལ་གདན་དྲངས་ཏེ་ལམ་བར་ཆེན་མོ་མདར་ཞག་ས་མཛད་ཅིང་རི་ཁྲོད་གསར་པ་ཆགས་བཏབ་ཡུལ་ས་དཔྱད་གཟིགས་ནས་རི་ཁྲོད་ཀྱི་མིང་རྩ་གསུམ་ཆོས་འཁོར་གླིང་ཞེས་བསྩལ། དེའི་སང་ཉིན་དཔལ་རི་བོ་ཆེའི་ཞབས་དྲུང་བླ་བྲང་ཡང་རྩེར་ཞབས་སོར་འཁོད་ནས་ཉིན་ཤས་ཅང་མི་གསུང་བར་སྐུ་དྲང་པོར་བཞུགས་མཛད་དེ་སྐུ་དངོས་ཀྱི་གདུལ་བྱ་རྫོགས་ནས། དགུང་གྲངས་ཞེ་ དགུརཕེབས་པ་རབ་བྱུང་བཅུ་དྲུག་པ་ལྕགས་ཕོ་འབྲུག་གི་ལོ་སྤྱི་ལོ༡༩༤༠ སྣྲོན་ཟླའི་དམར་ཕྱོགས་ཀྱི་རྫོགས་པ་དང་པོའི་ཉི་མཕྱེ་ཡོལ་ལ་སྤྱན་ལྟ་སྟངས་གཡོ་བ་དང་བཅས་ཧིཀ་སྒྲ་དྲག་པོ་ཞིག་མཛད་པ་དང་ཆབས་ཅིག་གཟུགས་སྐུའི་བཀོད་པ་བདེ་ཆེན་པདྨ་འོད་ཀྱི་ཕོ་བྲང་དུ་ཨ་མ་མཐིང་འོདའབར་མའི་ཐུགས་ཀར་བསྡུས་སོ། །ཀྱེ་མ་ཀྱི་ཧུད་འགྲོ་བའི་སྒྲོན་མེ་ནུབ། །ལས་ངན་བདག་སོགས་མ་རིག་སྨག་ཏུ་ཚུད། །ཐར་ལམ་གསལ་བའི་སྣང་བྱེད་སུ་ལ་རེ། །ཐུགས་ཀྱིས་འདོར་རམ་བླ་མ་མཁའ་འགྲོའི་རྗེ། །གཏེར་གཉིས་བསྟན་པའི་བ་དན་ཆེར་གཡོ་བ། །དེ་རིང་གདུགས་ལ་ས་འདིར་འགྱེལ་གྱིས་མེད། །བདུད་འགོང་དམ་སྲི་ཀླ་ཀློའི་ཚོགས་དར་ནས། །ཕྲིན་ལས་ནུས་མཐུའི་རུ་མཚོན་སུ་ཡིས་བསྒྲེང་། །ཤིན་ཏུ་སྙིགས་མའི་མཐར་ལྷུང་སྐྱེ་འགྲོ་ལ། །ཉིད་ཀྱིས་སྐྱོང་བར་ཞལ་བཞེས་མཛད་ལགས་ན། །ད་ལྟ་ཞི་བར་གཞོལ་བའི་ཚུལ་འདི་ཅི། །སྔོན་གྱི་གོ་ཆ་ཡལ་བར་འདོར་ཕོད་དམ། །སྨིན་གྲོལ་བྱིན་རླབས་ནུ་ཞོས་ལེགས་བསྐྱངས་པའི། །བྱམས་ལྡན་མ་ཁྱེད་བུ་ལ་བརྩེར་དགོངས་ཏེ། །དགྱེས་པའི་ཞལ་སྟོན་གསུང་གིས་དབུགས་དབྱུང་ནས། །མྱུར་དུ་ཡུམ་ཆེན་དགོངས་པར་འུབ་ཆུབ་མཛོད། །ཅེས་སྨྲས་སོ། །དེ་ ༄༅། །དག་གི་སྐབས་སུ་སྐུ་གསུང་ཐུགས་ཐོབ་པའི་རྟགས་སུ་ནམ་མཁའ་གཡའ་དག་པ་དང་། སྒྲ་འུར་བ། ས་གཡོ་བ། འཇའ་ཚོན་གྱི་གུར་ཕུབ་པ་སོགས་ངོ་མཚར་བའི་རྟགས་ཀུན་གྱི་མཐུན་སྣང་དུ་བྱུང་བས་སྐྱེ་རྒུ་རྣམས་རབ་ཏུ་དད་པའི་གནས་ལ་བཀོད། དེ་ནས་སྐུ་གདུང་རིན་པོ་ཆེ་དྲི་བཟང་པོའི་ཆུས་བཀྲུས་ཤིང་ལོངས་སྐུའི་ཆས་གསོལ་བ་ལ། མཆོད་པ་རྒྱ་ཆེན་པོ་བཤམས་ཏེ། སྐྱབས་མགོན་ཞབས་དྲུང་རིན་པོ་ཆེ་དང་། སྲས་སྤྲུལ་རྣམ་གཉིས་གཙོ་བོར་བཞུགས་པའི་འདུས་པ་རྣམས་ཀྱིས་ཀློང་སྙིང་བླ་མ་མཆོད་པའི་ཆོ་ག་དང་འབྲེལ་བར་བདག་འཇུག་དབང་བླངས་དང་། ཚོགས་ཀྱི་མཆོད་པ་སོགས་ཉིན་བསྟར་མཛད། ཟླ་འདིའི་ཚེ་ཉེར་ལྔ་ལ་དགོན་པའི་རྒྱབ་རིའི་ངོས་སུ་སྤུར་ཁང་བཞེངས་ཏེ་དེར་གདན་དྲངས་ཚེ། སྐུ་གདུང་འོད་དུ་དེངས་པའི་ལྷག་མ་བྱིས་པ་ལོ་བརྒྱད་ཀྱི་ཚོད་ཙམ་ལས་མ་ལུས། གདུང་བཞུ་དུས་སྤྱན་ཡ་གཅིག་ཀུན་གྱིས་མཐོང་བར་སྒྲ་དང་བཅས་ལྷོ་ཕྱོགས་ཀྱི་ནམ་མཁར་འཕུར་སོང་འདུག །དེ་རྗེས་གདུང་རུས་བསལ་སྐབས་འབྱུང་བས་མི་ཤིགས་པའི་གདུང་ཤཱ་རི་རཾ་སྲན་སྦོས་ཙམ་སྣུམ་ལ་བཀྲག་མདངས་འོད་དང་ལྡན་པ་ཞིག་བྱོན་པ་བུ་སློབ་ཞིག་གིས་རྙེད་འདུག་པ། དུས་ཕྱིས་ལྷ་སྲས་དཔལ་རྣམ་ མགུལ་གྱི་གའུར་བཅངས་པ་ཁོ་བོས་ཀྱང་མངོན་སུམ་མཇལ་བའི་སྐལ་བཟང་ཐོབ། དེ་ནི་རྟ་མཆོག་རོལ་པ་གསང་བ་མན་ངག་གི་རྒྱུད་འཁོར་འདས་རང་གྲོལ་ལས། མེ་ཏོག་ཆར་དང་འཇའ་འོད་སྐུ༔ ནམ་མཁའ་དྭངས་པ་ཆོས་སྐུ་སྟེ༔ ཞི་ཁྲོའི་སྐུ་དང་ཡི་གེ་དང་༔ གདུང་གཅིག་རྐྱང་པ་འོང་བ་ཡང་ཡོད༔ ཅེས་དང་། སྔར་ཞལ་བཞུགས་སྐབས་མཁའ་འགྲོས་ལུང་བསྟན་ལས། ཁྱོདཀྱང་མི་གནས་འདས་པའི་ཚེ༔ སྐུ་གདུང་མཁའ་འགྲོས་དྲང་ཡང་སྲིད། །ཡང་ན་གདུང་དང་རིང་བསྲེལ་དང་༔ ཡིག་འབྲུ་ཕྱག་མཚན་ལ་སོགས་འབྱུང་༔ ཞེས་གསུངས་པ་དང་ཤིན་ཏུ་འགྲིགས་པར་སྣང་། དེ་ནས་རིགས་ཀྱི་སྲས་མོ་ཆོས་དབྱིངས་སྒྲོན་མ་དང་། སྐྱེས་མཆོག་ཚུལ་ཁྲིམས་རྡོ་རྗེ་རྣམ་གཉིས་ཀྱིས་དངུལ་གྱི་གདུང་རྟེན་ལ་གསེར་གྱི་པ་ཏྲ་དང་རིན་ཆེན་སྣ་ཚོགས་ཀྱི་ཕྲ་རྒྱན་བཏབ་པ་མདའ་ཚད་ཙམ་བཞེངས་པའི་གཟུངས་གཞུག་རིང་བསྲེལ་རྣམ་བཞི་སྤྱི་དང་། ཁྱད་པར་དུ་ཌཱ་ཀི་ཉིད་ཀྱི་གདུང་རུས་དབུ་ལྗོན་བསྙེན་ཕྲེང་ཐུགས་དམ་པོ་ཏི་ཉིད་ཀྱི་གཏེར་བྱོན་ཐུབ་སྐུ་ངོ་མཚར་ཅན་དང་། རྡོ་ཡི་སྒྲོམ་བུ་ཤོག་གསེར་སོགས་བྱིན་རླབས་ཅན་རྣམས་བཅུག་ནས་རབ་ཏུ་གནས་པ་དང་བཅས་པ་ལེགས་པར་གྲུབ་པ་ཉིད་གདན་དྲངས་ཏེ་མདོ་སྨད་གཏེར་སྒར་ཡང་དབེན་དུ་ ༄༅། །བཞུགས་སུ་གསོལ་བ་རྗེས་འཇུག་གདུལ་བྱ་རྣམས་ཀྱི་བསོད་ནམས་ཀྱི་ཞིང་དམ་པར་ད་ལྟའི་བར་མཇལ་དུ་ཡོད་དོ།། །།ད་ནི་ཞར་ལ་འཕྲོས་དོན་བརྗོད་པས་མཇུག་བསྡུ་བ་ལ། རྗེ་བཙུན་མཁའ་འགྲོའི་དབང་ཕྱུག་མ་དེ་ཉིད་ཀྱི་ཞལ་སློབ་རགས་རིམ་ཙམ་སྨྲོས་ན། ཨ་འཛོམ་འབྲུག་པ་རིན་པོ་ཆེ་འགྲོ་འདུལ་དཔའ་བོ་རྡོ་རྗེ་དང་གདུང་སྲས་འགྱུར་མེད་རྡོ་རྗེ་སྟེ་ཡབ་སྲས་གཉིས། བདུད་འཇོམས་གཏེར་སྲས་པདྨ་ལས་འབྲེལ་དང་གཅུང་རྡོ་རྗེ་དགྲ་འདུལ་ཏེ་མཆེད་ཞལ་གཉིས། ཀཿཐོག་ཕྱག་ཚ་རིན་པོ་ཆེ་པདྨ་ཕྲིན་ལས་རྒྱ་མཚོ། དཔལ་ཡུལ་སྒོ་ཆེན་སྤྲུལ་སྐུ་འཇིགས་བྲལ་ཆོས་ཀྱི་བློ་གྲོས། རི་བོ་ཆེའི་སྐྱབས་མགོན་ཞབས་དྲུང་སྤྲུལ་སྐུ། ཨ་བོ་བསོད་དགེ་སྤྲུལ་སྐུ་སྣ་ཚོགས་རང་གྲོལ། རྫ་བསྟན་འཕེལ་ཡར་དགོན་སྤྲུལ་སྐུ་ངག་འབྱུང་དང་། མར་དགོན་སྤྲུལ་སྐུ་འཆི་མེད་རྣམ་རྒྱལ་པད་གུར་སྤྲུལ་སྐུ། པད་དཀར་སྤྲུལ་སྐུ། ཇོ་ནང་བ་གཙང་པའི་སེ་སྤྲུལ་སྐུ། སེ་ར་འཇིགས་དགའི་སྤྲུལ་སྐུ། མགར་ར་བླ་མའི་ཡང་ཟ༣ སྲིད། མཆོག་སྤྲུལ་དོན་གྲུབ་རྡོ་རྗེ། ཏྲེ་ཧོར་གདོང་ཐོག་སྤྲུལ་སྐུ། རྫོགས་ཆེན་མཁན་པོ་ནོར་བུ་དབང་རྒྱལ། ཁྲ་སྐྱ་བླ་མ་ཤེས་རབ་འོད་ཟེར། ཨ་སྐྱབས་ཀརྨ་དོན་ཡོད། རྩ་ཤུལ་ དོན་ལི། མགོ་ལོག་རང་བྱུང་། ལྔོང་ཤུལ་ཆོས་འཕེལ། གླིང་ཚོགས་རྒྱམ། འགྱ་བ་རྣམ་དག། །ཧ་ཤུལ་ཆོས་གྲགས། སྤྲུལ་སྐུ་ཀུན་བཟང་རིག་པའི་རྡོ་རྗེ། ཉག་སྤྲུལ་གུ་རུ་འོད་ཟེར་ཡབ་སྲས། ཨ་འཛོམ་སྲས་མོ་འཆི་མེད་དབང་མོ། ཁྲོམ་དགེ་མཁའ་འགྲོ་ཟླ་བ་སྒྲོན་མ། རིགས་སྲས་ཆོས་དབྱིངས་སྒྲོན་མ། གླིང་ཚང་ཆོས་རྒྱལ་དང་བཙུན་མོ་ལ་སོགས། དུས་དེར་ཡོངས་སུ་གྲགས་པའི་ཆེ་བ་གདུགས་ཐོགས་པའི་བླ་ཆེན་དཔོན་ཆེན་དང་མཁས་བཙུན་དགེ་བའི་བཤེས་གཉེན་ནས་ཆུང་བ་སྦས་ཚུལ་བྱང་བཏང་རྣལ་འབྱོར་སྒྲུབ་བཙུན་ཕོ་མོ་ཡན་ཆད་སྟོད་སྨད་བར་གསུམ་ཀུན་ཏུ་བགྲང་གིས་མི་ལོངས་ཤིང་། དེ་དག་ཀྱང་ཕལ་ཆེ་བ་ཚེ་བློས་བཏང་གི་ཆོས་པ་ཉམས་རྟོགས་ཡོན་ཏན་དང་ལྡན་པ་ཤ་སྟག་བྱུང་། ཐ་ན་སློབ་འབངས་ཀུན་གྱི་ཐ་ཤལ་དུ་གྱུར་པ་བདག་གིས་ཀྱང་རབབྱུང་བཅུ་དྲུག་པའི་མེ་ཡོས་ལོ་སྤྱི་ལོ་༡༩༢༧ ཟླ་བ་དྲུག་པའི་ཉེར་ལྔའི་དུས་བཟང་ལ་ཐོག་མར་ཞལ་མཇལ་བ་ནས་བཟུང་སྟེ་ཚེ་རབས་ལས་ཀྱི་བླ་མ་ཡིན་པའི་བག་ཆགས་བཟང་པོ་ཏུར་གྱིས་སད་དེ་ཡེ་ཤེས་མཚོ་རྒྱལ་དངོས་ཡིན་སྙམ་པ་ལས་ཐ་མལ་མིར་འཛིན་གྱི་རྟོག་ངན་ནམ་ཡང་སྐྱེ་མ་མྱོང་། ལོ་དེ་དང་ས་འབྲུག་ལོ་གཉིས་ཀྱི་དུས་སྐབས་ཅི་རིགས་པར་རང་གི་ཞང་པོ་ ༄༅། །མཁན་ནོར་བུ་དབང་རྒྱལ་གྱིས་ཞུས་པའི་ཟླ་ལ་དེ་གོང་གཏན་འབེབ་གྲུབ་པའི་ཆོས་ཉིད་མཁའ་འགྲོའིགསང་མཛོད་སྐོར་སྨིན་གྲོལ་ཆོས་སྒོ་ཐོག་མཕྱེ་བའི་བྱིན་རླབས་ཀྱི་དྲོད་མ་ཡལ་བ་ནོད་པའི་སྐལ་བ་བཟངཔོ་ཐོབ། དེ་ནས་མཁའ་འགྲོས་ལུང་བསྟན་པ་བཞིན་ཁོ་བོ་མཁན་ཆེན་རྡོ་རྗེ་འཆང་ངག་གི་དབང་པོའི་ཞབས་ལ་གཏུགས་ནས་རྗེ་ཌཱ་ཀི་ཉིད་སྐུ་མྱ་ངན་ལས་འདས་པའི་བར་སྨིན་གྲོལ་གདམས་པའི་འཕྲོ་བསྐྱང་རྒྱུ་མ་བྱུང་ཡང་། རྗེས་ནས་སྔ་མ་ཐོབ་པ་དེས་ཀྱང་མ་ཚིམ་པར་འབད་པ་ཆེན་པོས་གང་གི་ཐུགས་སྲས་ཐམས་ཅད་ཀྱི་ནང་འགྲན་པའི་ཟླ་དང་བྲལ་བ་ཆོས་ཀྱི་བདག་པོ་ཡོངས་གྲུབ་རིག་པའི་རྡོ་རྗེའམ་ཤཱི་ལ་བཛྲ་ལ་གཏེརགསར་འདིའི་གཞུང་རྩ་བ་དང་རྒྱབ་ཆོས་བཀའ་འབུམ་བཅས་ཡི་གེ་ན་གཅིག་ཀྱང་མ་ལུས་པའི་སྨིན་གྲོལ་རྒྱབ་རྟེན་བུམ་པ་གང་བྱོར་ཞུས་ཤིང་། དེ་དང་འབྲེལ་བར་འདོན་རྟ་དབྱངས་ཕྱག་རྒྱ་གཏོར་བཟོ་ཡན་ཆད་རང་ལུགས་གཙང་མ་ཁོད་དུ་ཆུདཔར་བྱས། དེ་ཡང་ཐོབ་ལོ་ཙམ་མ་ཡིན་པར་ངལ་བ་དང་དུ་བླང་ནས་བཀའ་གཏེར་གླེག་བམ་ཡོངས་རྫོགས་དང་དབང་ཙཀ་དཔེའུ་རིས་བཅས་གསར་དུ་བཞེངས་ནས་རྩབ་གསུམ་ལ་བསྙེན་སྒྲུབ་ལས་རུང་ཙམ་བཏང་བའི་ཁུལ་བགྱིས་ནས་གཞན་ལ་སྤེལ་བ་ཡིན། དེ་ཡང་ ཟབ་ཆོས་འདིའི་ཆོས་སྒོ་ཐོག་མར་འབྱེད་པའི་བདག་རྐྱེན་ཀྱང་རིས་མེད་བསྟན་པ་རྒྱ་མཚོའི་མངའ་བདག་མཚུངས་མེད་མཁྱེན་སྤྲུལ་རྡོ་རྗེ་འཆང་འཇམ་དབྱངས་ཆོས་ཀྱི་བློ་གྲོས་རིན་པོ་ཆེ་དང་། སྤྲུལ་པའི་གཏེར་སྟོན་བདུད་འཇོམས་འཇིགས་བྲལ་ཡེ་ཤེས་རྡོ་རྗེ་སྟེ་དཔལ་ལྡན་བླ་མ་དམ་པ་དེ་གཉིས་ཀྱི་བཀའ་བསྩལ་རིན་པོ་ཆེ་གསེར་གྱི་ཅོད་པན་སྤྱི་བོར་ཕེབས་པ་ལྡོག་པར་ཕངས་ནས་ཆོས་བཀའ་འདིའི་སྨིན་གྲོལ་ཚང་མ་དགྱེས་པའི་ཞབས་ཏོག་ཏུ་དམིགས་ནས་འདྲེན་སྟོན་སོ་སོར་ཆིག་བརྒྱུད་དུ་ཕུལ་བ་དང་། གནས་དུས་གཞན་དུ་ཡང་དབང་ལུང་ཚང་མ་ཚར་གསུམ་སྟེ་མདོར་ན་མཁའ་འགྲོའི་ཞལ་རླངས་ཐུ་ལེ་བའི་ཆོས་ཟབ་མོ་འདི་ཉིད་སྔ་རྗེས་ལན་ལྔ་ཙམ་འཆད་སྤེལ་བགྱིས་པ་ལགས་པས་གུ་རུ་ཡབ་ཡུམ་གྱི་བསྟན་པ་རིན་པོ་ཆེ་ལ་སྒོ་ཀུན་ནས་བྱ་བ་ཕྲན་བུ་འགྲུབ་པ་འདི་ཡང་སྔོན་གོམས་ལེགས་བྱས་ཀྱི་འབྲས་བུ་དུས་སུ་སྨིན་པར་འཁུམས། དེ་ལྟར་གོང་དུ་སྨོས་པ་དེ་དག་ནི་ཐུན་མོང་དུ་སྣང་བ་ཕྱིའི་རྣམ་ཐར་ཁོ་ན་ཐོ་རེ་ལོང་བརྗོད་པ་སྟེ། ཐུན་མོང་མ་ཡིན་པ་ནང་དང་གསང་བའི་རྣམ་ཐར་ནི་འཕགས་ཆེན་དམ་པ་རྣམས་ཀྱི་ཡེ་ཤེས་ཀྱི་མཁྱེན་པའི་སྤྱོད་ཡུལ་ལས་བདག་འདྲ་སོ་སོའི་སྐྱེ་བོས་བརྗོད་པའི་ཡུལ་དུ་མ་གྱུར་ཏེ། རྣམ་ཐར་ཞལ་གསུངས་མ་ལས། ༄༅། །བདག་ལོ་སུམ་ཅུ་ནས་བཟུང་རྩ་དྲུག་བར། །ལོ་བཞིན་ལྷག་ལྷ་གང་རུང་གཞུང་བསྲངས་ནས། །ངོ་མཚར་བཀོད་པ་ཅུང་ཞིག་ཡོད་མོད་ཀྱང་། །གསང་བཅུའི་དམ་ཚིག་ཕྲ་ཞིང་བསྲུང་དཀའ་བས། །ཟུར་ཙམ་བརྗོད་པ་བདག་གིས་ཅི་ཕྱིར་ཕོད། །ཅེས་གསུངས་པ་བཞིན་ཌཱ་ཀིའི་རྗེ་མོ་འདི་ཉིད་ནི་རྟག་ཏུ་དམན་ས་བཟུང་སྟེ་མ་ནུས་རྒན་མོ་ཞེས་རང་ཉིད་ལ་སྨད་པར་མཛད་པ་མ་གཏོགས་ང་རྒྱལ་ཁེངས་དྲེགས་དང་། འཇིག་རྟེན་ཆོས་བརྒྱད་ལ་ནམ་ཡང་བརྟེན་པར་མི་མཛད། ནང་དུ་གསང་བའི་དམ་ཚིག་བསྲུང་བ་ལ་ཐུགས་ཤིན་ཏུ་སྒྲིམ་པས་དག་སྣང་དུ་ཞལ་གཟིགས་ལུང་བསྟན་བྱུང་བ་རྣམས་དགོས་དོན་མེད་པར་རླུང་ཕྱོགས་ཙམ་ཡང་སྒྲོགས་པར་མི་མཛད་པ་ནི་དྲུང་ན་གནས་པའི་གྲྭ་བུ་སློབ་རྣམས་དཔང་པོར་བཞུགས་པ་ལགས་ལ། ལོ་རྒྱུས་ཅུང་ཟད་སྨྲས་པ་འདི་ཡང་རྒྱུ་མཚན་མེད་པ་མ་ཡིན་ཏེ། ཞལ་གསུངས་རྣམ་ཐར་ཆེན་མོའི་མཇུག་ཏུ་འདི་ལྟར།