Tibetan
བ་ཞིག་གིས་ཁྱིམ་བཟུང་འཆི་སོང་བས། དེའི་ཚོགས་ཀྱི་དབུ་བཞུགས་མཛད་འདུག་པས། རྒྱལ་སྲས་སང་ཁོང་གི་སྐུ་མདུན་ལ་བྱོན་སོང་། བདག་ནི་སྐྱེ་ལུས་དམན་པའི་དབང་གིས་གཞན་གྱི་མཐོང་ཐོས་དོགས་གསུམ་གྱི་རྐྱེན་ལ་སྐྲག་ནས་སྐུ་མདུན་ལ་འགྲོ་མ་ཕོད་ནས་རྡོ་འབུམ་དང་འཁོར་ཁང་རྣམས་ལ་བསྐོར་བ་བྱེད་དུ་སོང་བས། ཡང་འཇིགས་ཆོས་ཐོན་བྱུང་། བདག་གིས་ཁྱོད་གར་བྱོན་པ་ཡིན་སྨྲས་པས། ཁོང་ན་རེ། ང་ཁྱེད་འབོད་དུ་སྤྲུལ་སྐུ་སང་གིས་བཏང་བ་ཡིནཔས། ད་ནས་འུ་ཅག་མྱུར་དུ་འགྲོ་དགོས་ཟེར་ནས་ངེད་གཉིས་ལྷན་དུ་སོང་། དེ་ནས་བདག་གིས་མཇལ་རྟེན་དུ་གཡུ་སྤུས་ལྡན་ཞིག་ཡོད་པ་དེ་ཁ་དོག་ལྔ་ལྡན་གྱི་དར་སྐུད་ཀྱིས་ལུང་བྱས་ཏེ། ལྷ་རེག་དྲི་བྲལ་བཅས་ཕུལ་ནས་ཕྱག་བཅས་སྐུ་ཁམས་བཟང་ལགས་ཞུས་ཚེ་སྤྲུལ་པའི་སྐུ་དེ་ཉིད་ཚོགས་ཀྱི་དབུས་ནས་ཡར་བཞེངས་ཏེ། བདག་ལ་རིན་ཆེན་གཉིས་པ་དང་། ལྷ་རེག་ཉིན་མོ་བདེ་ལེགས་ཞིག་གནང་བར་མཛད་པས་དེར་འདུས་ཀྱི་བླ་སེར་མི་སྐྱ་ཕོ་མོ་ཐམས་ཅད་ཀྱིས་ཅི་ཡིན་ཆ་མ་ཆོད་ནས། གཅིག་གིས་གཅིག་གི་ངོ་ལ་བལྟ་ཞིང་ བྃ༔ ཅི་ཡང་མི་སྨྲ་བར་འདུག་པས། ཡང་སྤྲུལ་སྐུ་སང་གི་ཞལ་ནས་ཁྱེད་ཅག་རྣམས་ཡིད་ཚོམ་མི་དགོས། མཁའ་འགྲོ་དེ་ཡེ་ཤེས་མཚོ་རྒྱལ་གྱི་གསུང་གི་སྤྲུལ་པ་ངེས་པ་ཅན་ཡིན་སྙམ་གི །ཁྱེད་ཅག་གི་ལོག་ལྟ་སྤངས་ལ་དདཔ་ཞོག་དང་། འདིས་མི་བསླུ་ངོ་མ་ཡིན་གསུང་འདུག །བདག་གི་བསམ་པ་ལ་དེ་སྔ་ངེད་དཔོན་གཡོག་ཞལ་མཇལ་གསུང་ཐོས་མ་མྱོང་བ་ལང་མཚོ་རྒྱལ་ཨེ་ཡིན་ཅིག །མིན་ཀྱང་ང་རང་ལྟ་བུའི་ལུས་དམན་ཕྱི་ཐོས་བྱ་ཆུང་བ། ནང་བསྐྱེད་རྫོགས་ལ་བློ་རྨོངས་པ། ལས་གང་བརྩམ་འཁོར་བའི་བྱ་བ་ལས་མི་འདའ་བ་དེ་ལྟ་བུའི་མཁའ་འགྲོ་ཞིག་ཡོད་ཅི་ལ་སྲིད་སྙམ་ཚེ། ཁོང་གི་ཞལ་ནས། ཁྱོད་ཀྱིས་བསླབ་སྦྱང་ལ་འབད་རྩོལ་མ་དགོས་པར་བསྐྱེད་རྫོགས་ཀྱི་ལམ་ཐམས་ཅད་ཁོང་དུ་ཆུབ་པ་དང་།ཐ་ན་ཡི་གེ་འབྲི་འདོན་སོགས་སྦྱང་མ་དགོས་པ་དེ་ཀ་སྔོན་སྦྱངས་ལས་འཕྲོ་སདཔ་རེད། འོན་ཀྱང་རང་གཏེར་བཏང་སྙོམས་ལ་མ་བཞག་པར་བྲི་སྤེལ་རེ་མཛད་དགོས་མ་གཏོགས། ཁྱེད་རང་ལ་མཁའ་འགྲོའི་བཀའ་ཆད་འབྱུང་ཉེ་གསུངས། བདག་གིས་ང་རང་གཏེར་སྟོན་མིན་ལགས། ཆོས་སྣ་གཅིག་ཀྱང་ཐོབ་མ་མྱོང་བས་བསྐྱེད་རྫོགས་མི་ཤེས་ལགས་ཞུས་པས། ཁོང་གི་ཞལ་ནས། ངས་ཕོ་ལོ་བཞི་ བཅུ་ལ་ཐོན་འགྲོ་གི་ཏ། ད་དུང་སེམས་ཀྱི་མཐའ་ཆོད་མེད་གསུངས། བདག་གིས་སྔར་ཞུས་བརྗེད་པའི་ཡུལ་དུ་སོང་ནས་འདི་སྐད་ཞུས། ཆོས་དབྱིངས་སྤྲོས་པ་དང་བྲལ་བ་རང་བྱུང་གི་ཡེ ཤེས་ཆེན་པོ་ལོ་གྲངས་སོང་བས་མཐའ་མ་ཆོད་ཨ་ལགས། འཁོར་འདས་རིག་པར་རྟོགས་པ་ལ་རྣལ་འབྱོར་རྟོགས་ལྡན་ཞེས་མིང་གི་ཐ་སྙད་ཙམ་བརྗོད་པ་ལས། སེམས་ཀྱི་མཐའ་ཆོད་ནས་རིག་པའི་ཡེ་ཤེས་གསར་དུ་ཐོབ་པ་ཞིག་ཨེ་ཡོད་ཏ་ལགས་ཞུས། ཁོང་གི་ཞལ་ནས། ཁྱེད་ཀྱིས་གཟོད་བསྐྱེད་རྫོགས་ཤེས་པ་ལྟ་ཞོག །ཆོས་ཚིག་གཅིག་མི་ཤེས་ཟེར་བ་དེ་ངོ་མཚར། ཆོས་དབྱིངས་གཅིག་ལ་ལྡོག་པ་ཐ་དད་ཀྱི་ཚུལ་དུ་བསྐྱེད་རྫོགས་ལམ་གྱི་མཇུག་སྒོ་ཐམས་ཅད་ཡེ་ཤེས་གཅིག་གི་རོལ་པ་སྤྲོས་མེད་ཐིག་ལེ་ཉག་གཅིག་ལ་འདུས་ཟེར་བའི་དོན་ཡིན་པ་འདྲ། ཆོས་ཐམས་ཅད་ཀྱི་སྙིང་པོ་རང་བྱུང་གི་ཡེ་ཤེས་མངོན་དུ་གྱུར་པ་ཕན་ཆད་ཅི་ཡོད། ཁྱོད་ཀྱིས་ཆོས་ཅི་ཡང་མི་ཤེས་ཟེར་བ་དེ་བདེན་མི་བདེན་ཤེས་གསུངས་ཏེ། ཐུགས་དགྱེས་པའི་ཚུལ་གྱིས་ཆོས་ཀྱི་བསྒོ་གླེང་དུ་མ་མཛད་པས། བདག་གིས་ཀྱང་གང་ཤེས་གསང་ཐབས་མ་བྱུང་ནས་ཁོང་ལ་ཞུས་པས་ཕན་ཚུན་ཉམས་ལེན་གྱི་གསོས་སུ་གྱུར་ཏོ། །དེ་ནས་ངེད་དཔོན་གཡོག་ཕྱིར་སུ་རུའི་ནང་འོང་ནས་སྐྱབས་ བྃ༔ རྗེ་ཐམས་ཅད་མཁྱེན་པ་སྤྲུལ་སྐུ་ཡིད་བཞིན་ནོར་བུའི་སྐུ་མདུན་ལ་ཐོན་ནས་དེ་ཀར་ཉིན་ཆ་ཤས་སུ་བཞུགས། ཁོང་རྣམ་གཉིས་ཀྱིས་ལུགས་གཉིས་སྒོ་ནས་ཐུགས་མཐུན་གྱི་གསུང་མཛད་སྐབས། ཡིད་བཞིན་ནོར་བུའི་ཞལ་ནས་རྒྱལ་སྲས་སང་ལ་ཁྱོད་ཀྱི་མཁའ་འགྲོ་འདི་ན་བཟའ་དང་རྒྱན་ཆས་རེའཛོམས་ཐབས་མཛོད། དུད་ཚང་ཞིག་གི་གཡོག་མོ་ལྟ་བུ་རྒྱན་གོས་ཅི་ཡང་མེད་པ་ཐབས་སྡུག་དེ་འདྲ་མ་མཛད། མིན་ཀྱང་ཁྱོད་ཀྱི་ཐབས་གྲོགས་ཡིན་པས་གཞན་གྱིས་ཀྱང་མིག་ལམ་ལ་ལེགས་པོ་མ་རེད་གསུངས། རྒྱལ་སྲས་སང་གིས་ལགས་སོ་རྒྱན་གོས་རེ་ལོས་འཛོམ་དང་། བུད་མེད་འདི་གཅེས་སྤྲས་ཆེ་མི་ཉནསྣང་བ་མཐོ་འོང་སྙམ་ནས་ཁོ་རང་ལ་དབང་ཤོར་མེད།བདག་གིས་ཅི་དགོས་བྱས་ཀྱང་ལགས་སོ་ཟེར་བ་ལས་ཚིག་གཅིག་མིན་པ་མི་ཟེར་ཞིང་མོ་རང་གི་རྒྱན་གོས་སོགས་ལ་གལ་ཆུང་དུ་ལུས་སོང་བ་རེད། མིན་ཀྱང་སྔར་བདག་གི་ཕ་ཡབ་ཀྱི་སྨོན་ལམ་དབང་གིས་ང་དང་འབྲེལ་སོང་བ་མ་གཏོགས། ང་རང་གི་ལུང་ཟིན་ནི་མ་རེད། ཁྱོད་ཀྱིས་ལུང་ཟིན་གྱི་ཐབས་གྲོགས་རེ་ཡིན་ཐང་གི །མོ་རང་དུས་རྟག་པར་ཁྱོད་ཡབ་སྲས་ལ་གསོལ་འདེབས་བྱེད་ཅིང་བློ་རྩེ་གཅིག་ཏུ་གཏད་འདུག །ཁྱད་པར་ཁྱོད་ཀྱི་མཚན་ཐོས་ཚེ་མོ་རང་ དབང་མེད་པར་མིག་མཆི་མ་འཁྲུགས་ལུས་བ་སྤུགཡོ་བཞིན་སྐད་ཆེན་པོའི་གསོལ་འདེབས་བྱེད་པ་དང་གདུང་དབྱངས་ཀྱི་མགུར་མ་ལྟ་བུ་མང་ཟེར་འདུག །མིན་ཀྱང་སྐུ་མཚམས་རེ་བཞུགས་ན་མདུན་གཡོག་དང་སྐུ་ཚེའི་བར་ཆད་སེལ་ཐང་གི །བདག་གི་མཁའ་འགྲོ་འདི་ཁྱོད་ལ་ཕུལ་བ་ཡིན་པས་མོ་རང་ལ་བདག་པོ་ཁྱོད་ལས་མེད། མོ་རང་གཞི་རྒྱུ་བ་འཇམ། བློ་ཤེས་རབ་གསལ། གཞན་གྱི་སྐྱེས་བུ་དང་མི་འགྲོགས་སོགས་གསུངས་མཛད་དུ་མ་ཡོད་ཀྱང་ཡི་གེར་དོགས་ནས་མ་བྲིས། ཡང་རྗེའི་ཞལ་ནས་ཁྱོད་ཀྱི་མཁའ་འགྲོ་འདི་གཞན་དང་མི་འདྲ་བ་ཞིག་ཡིན། ཁོང་དགུང་ལོ་བཅོ་ལྔ་ཡིན་དུས་འདི་ཕྱོགས་ལ་བྱོན་སྐབས་ངེད་ཅག་ལྷན་དུ་འོང་བ་རེད། དེའི་སྐབས་སུ་འཁྱག་ལྟོག་སྐོམ་གསུམ་གྱི་སྡུག་བསྔལ་ལ་བཟོད་བསྲན་ཆེ་ཞིང་དམ་པའི་ཆོས་ཁོ་ན་ལ་བློ་རྩེ་གཅིག་ཏུ་ཕྱོགས་པ་ཞིག་རེད། མིན་ཀྱང་ང་རང་གི་ཁ་བྱང་རྣམས་སུ་ཁོང་ལུང་གིས་གསལ་པོར་ཟིན་འདུག་ཀྱང་། གཅིག་ཐད་ནས་ང་རང་མཚམས་སྒྲུབ་ཞིག་ཨེ་འོང་སྙམ་པ་དང་། མིན་ཀྱང་གཟུངས་མ་སོགས་ཀྱི་སེམས་བབ་ཡོད་མེད་སྙམ་ནས་བཏང་སྙོམས་ལ་བཞག །ཁྱད་པར་ཁྱོད་ཀྱི་སྐུ་རྩབ་ལ་བཞུགས་ཡོད་པས། འུ་ཅག་ཕན་ཚུན་འགལ་བ་འགྲོ་སྙམ་ནས་ཅི་ཡང་མ་ཞུས་པ་ཡིན། ད་ བྃ༔ དུང་ཡང་ད་ནི་ང་རང་གིས་ལོ་ཆ་ཤས་ལ་མཚམས་དམ་པོ་ཞིག་བྱས་ནས་སྒྲུབ་ཚུགས་རེ་ཨེ་ཟིན་སྙམ་གི་སོགས་གསུངས་ཚེ། ཡང་། རྒྱལ་སྲས་སང་ནས་སྔར་བས་ལྷག་པའི་གསུང་མཛད་དུ་མ་མཛད་ནས། ང་རང་རྗེ་དེ་ཉིད་ལས་བདག་པོ་མེད་པར་ཐག་བཅད་པ་སོགས་མཛད་ནས་ངེད་ཅག་རྣམས་རང་ཡུལ་ཕྱོགས་ལ་མར་ཕེབས་པས། ཧོར་སང་གི་སྤྱི་བསྲུང་འཚོགས་རན་འདུག་པས། རྒྱལ་སྲས་དཔོན་གཡོག་གཉིས་དེ་ཀར་བཞུགས་ནས་སྤྱི་བསྲུང་གི་དབུ་བཞུགས་མཛད། ངེད་མ་བུ་གཉིས་དང་ཉེ་གནས་ཐུབ་བསྟན་བཟང་པོ་བཅས་རང་ཁྱིམ་ལ་ལོག་ནས་འོང་སྐབས། བདག་གིས་ཐུབ་བཟང་ལ་ང་རང་རྒྱལ་སྲས་ནས་སྤྲུལ་སྐུ་རིན་པོ་ཆེ་ལ་སྦྱིན་པའི་ལོ་རྒྱུས་ཐམས་ཅད་སྨྲས་ཚེ། ཁོང་ན་རེ། འོ་སྐོལ་སང་གི་ཁ་རྗེ་དབང་ཐང་ལ་ཁྱོད་ལྟ་བུ་དབང་བའི་སྐལ་བ་ཞན་པའི་རྐྱེན་གྱིས། ཐབས་གང་དྲག་ནས་ཁྱོད་ཕུད་གྲུབ་ལྟ་བུར་བྱེད་འདུག་པ་ངེད་ཅག་གིས་ཤེས་ཀྱང་། ད་དུང་ཁྱོད་ཀྱི་ཐུགས་རྒྱ་བསྐྱེད་ནས་མགར་ར་སང་གི་ཟུར་ལ་བཞུགས་ཐབས་མ་འཆུག་ཟེར། བདག་གིས་ཀྱང་ཁོང་གི་ཟེར་བ་ལྟར་མགར་ར་གཏེར་ཆེན་རིན་པོ་ཆེའི་བསྟན་པ་ལ་ཕན་ཐོགས་ཅུང་ཟད་རེ་ཨེ་ཡོང་སྙམ་ནས། རང་ལ་སྐྱིད་སྡུག་ཇི་ལྟར་བྱུང་ཡང་། དེ་དཀར་འདུག་ཐག་བཅད་དོ། །དེ་ནས་ལོ་ཁྱིམས་དེ་ཀའི་ཟླ་བ་བཅུ་པའི་ཡར་ཚེས་ལ་ཀཿཐོག་སི་ཏུ་རིན་པོ་ཆེས་དཔལ་ཡུལ་དགོན་དུ་བླ་མ་དགོངས་པ་འདུས་པའི་དབང་ལུང་ཆེན་མོ་ཡོངས་རྫོགས་གསུངས་སྐབས། རྒྱལ་སྲས་སང་དང་སློབ་བུ་ཐུབ་བསྟན་བཟང་པོ་བདག་མ་བུ་གཉིས་བཅས་འགྲོ་ཆགས་བྱས་ཡོད་སྐབས། ངེད་མ་བུ་ལུས་དམན་ཅིང་ལས་འཕྲོ་ཞན་པས་འགྲོ་སྟབས་མ་བྱུང་ནས། བདག་ཡིད་ཤིན་ཏུ་ཕམ་ནས་གདུང་དབྱངས་ཀྱིགླུ་འདི་སྨྲས་སོ། གནས་མི་མངོན་དཔལ་རིའི་ཕོ་བྲང་ན། །རྗེ་དུས་གསུམ་སངས་རྒྱས་འགྲོ་བའི་མགོན། །དཔལ་ཨོ་རྒྱན་མཚོ་སྐྱེས་རྡོ་རྗེ་མཁྱེན། །བདག་གསོལ་བ་འདེབས་སོ་སྤྱན་གྱིས་གཟིགས། །སྔོན་ནམ་སྙིང་བཛྲ་སྨོན་ལམ་མཐུས། །ལས་རྣམ་དག་ཟབ་མོ་གཏེར་ལ་དབང་། །མ་མཁའ་འགྲོའི་ཚོགས་ཀྱིས་བུ་བཞིན་བསྐྱངས། །ཆོས་ཟབ་མོ་སྙན་བརྒྱུད་གདམས་པ་རྣམས། །གཅེས་ནོར་གྱི་ཚུལ་དུ་བདག་ལ་གནང་། །དོན་གཉིས་ཀྱི་མཛད་ཕྲིན་རྒྱས་པ་དང་། །མཚོ་སྐྱེས་རྗེའི་ཐུགས་བཞེད་འགྲུབ་ཕྱིར་དུ། །འཕྲུལ་མ་ངེས་བརྡ་དབང་བདག་ལ་བསྐུར། །དོན་གཉིས་ཀྱི་མཛད་པ་ལོས་འོང་སྙམ། །མ་ཌཱཀྐིའི་བཀའ་བཞིན་ཤར་ཕྱོགས་སུ། །ཡུལ་སྲིན་པོའི་གནས་སུ་གཅིག་པུ་ བྃ༔ རུ། །འབྱུང་འདུས་ལ་ངལ་དུབ་ཆེ་ཡང་འོང་། །དུས་ངན་གྱི་སབྟའི་རྐྱེན་བསྐུལ་ནས། །ལས་རྟེན་འབྲེལ་སྣ་ཁ་དེ་ཙམ་ལགས། །ད་དོན་གཉིས་འབྱུང་བ་ཕར་ཞོག་དང་། །རང་ལུས་དམན་ཁས་ཞན་དབང་གིས་ནི། །ཆོས་ཟབ་མོ་ཐོབ་པའི་སྐལ་བ་ཞན། །ཁོང་ལས་ལྡན་ཀུན་ཡར་འགྲོ་ཆོས་ལམ་དེངས། །ང་བདེ་བའི་རྡོ་རྗེ་འཁོར་བར་འཁྱམས། །ད་དེ་དོན་བསམ་ནས་སྐྱོ་བ་སྐྱེས། །གནས་བཟང་མདོག་དཔལ་རི་ཡང་ཡང་དྲན། །རྟེན་སྒྱུ་མའི་ལུས་འདི་དོར་ལ་སྤྲོ། །རྩ་ཤེལ་གྱི་ཀ་བའི་ནང་བརྒྱུད་ནས། །འགྱུར་མེད་ཀྱི་རིག་པ་དབྱིངས་སུ་བསྲེ། །མ་མཚོ་རྒྱལ་ཐུགས་དང་དབྱེར་མེད་པར། །དོན་རང་སྣང་འོག་མིན་ཞིང་དུ་འགྲོ། །ཞེས་སྨྲས་ནས། འོད་གསལ་གཏུམ་མོ་ལ་ཉམས་ལེན་བྱས་ཏེ་ཅུང་ཞིག་གནས་ཡོད་སྐབས། སྐད་ཅིག་གིས་སྣང་བ་གནས་འགྱུར་ནས་འོག་མིན་ཟངས་མདོག་དཔལ་རིའི་གླིང་མཁའ་འགྲོའི་འདུ་ཁང་རེད་ཟེར་བ། ཡུལ་གྲུ་ཡངས་ལ་རྒྱ་ཆེ་བ་རིན་པོ་ཆེའི་ས་གཞི་ལ་འདོད་འཇོའི་རི་དང་འབྲས་བུ་སྣ་ཚོགས་སྨིན་པའི་ཤིང་ཁ་དོག་ལྡན་པའི་མེ་ཏོག་དང་ལྗོན་པ་ལ་སོགས་པའི་ས་གཞི་མཛེས་པའི་རྒྱན་སྣ་ཚོགས་དང་། ནམ་མཁའ་བར་སྣང་ཐམས་ཅད་འཇའ་དང་འོད་ཀྱི་དྲྭ་བ་དང་མིག་མང་རིས་ སུ་ཡོད་པ། འཇའ་འོད་ཀྱི་ཟེར་ལས་གྲུབ་པའི་མཆོད་པའི་ལྷ་མོ་རྣམས་ཀྱིས་ཕྱོགས་རྣམས་ཀུན་ཏུ་མཆོད་པ་བཀུར་སྟི་སོགས་བགྱིས་པ་དང་། གཞན་ཡང་ལྷའི་བུ་དང་བུ་མོ་མང་པོས་གླུ་དང་གར་གྱི་རྣམ་འགྱུར་དུ་མ་མཛད་ཅིང་ཡོད་པ་དང་། མཐའ་སྐོར་དུ་རིན་པོ་ཆེའི་འོབ་དང་། དཔག་བསམ་ཤིང་གི་ནགས་ཚལ་ལ་སོགས་པའི་ལྕགས་རི་དང་། མཚམས་རྣམས་སུ་ཡེ་ཤེས་ལྔའི་ཁ་དོག་དང་ལྡན་པའི་ཆུ་མིག་དང་། ཡན་ལག་བརྒྱད་དང་ལྡན་པའི་ཁྲུས་ཀྱི་རྫིང་བུ། བྱ་དང་རི་དྭགས་ལ་སོགས་པ་སྤུ་སྡུག་ཡིད་དུ་འོང་བ་མང་པོས་ཧ་རི་ནི་ས་བཾ་ཞེས་པ་དང་གསང་སྔགས་ཀྱི་ཆོས་སྒྲ་འུར་ཏི་རི་རི་སྒྲོགས་ཤིང་གཡས་སྐོར་གྱི་ཚུལ་དུ་ཞིང་ཁམས་ལ་བསྐོར་བ་ཀྱི་ལེར་བྱེད་འདུག །དེ་དག་གི་དབུས་སུ་ཡེ་ཤེས་འཇའ་ཡི་གུར་ཁང་འོད་དང་འོད་ཟེར་སྤྲིན་འཕྲོ་བ། མིག་གིས་བལྟར་མི་བཟོད་པ་ལྟ་བུའི་ཀློང་ན་ཟ་འོག་སུམ་བརྩེགས་ཀྱི་སྟེང་དུ་རྣལ་འབྱོར་པ་དཀར་ལ་དམར་བའི་མདངས་ཆགས་པ་ཧེ་རུ་ཀའི་ཆས་རྫོགས་པ་ཞབས་རོལ་སྟབས་སུ་བཞུགས་ཤིང་། འཁོར་དུ་དཔའ་བོ་དང་དཔའ་མོའི་ཚོགས་ཀྱིས་བསྐོར་ནས་བཞུགས་པ་མཐོང་ཚེ། བདག་གི་བསམ་པ་ལ་ཕ་གི་རྣམས་ཡེ་ཤེས་སྒྱུ་མའི་སྐུ་ཅན་ཤ་སྟག་ཏུ་འདུག་པས། བདག་ནི་འཇིག་རྟེན་མི་ཡུལ་དུ་ པཱྃ༔ དབང་ལུང་ཙམ་གྱི་གྲལ་དུ་འགྲོ་སྐལ་མེད་པ་འདྲ་ན། དཔའ་བོ་དཔའ་མོའི་ཚོགས་གྲལ་དུ་ཅིའི་ཕྱིར་འགྲོ་ཆོགསྙམ་ནས། གསོལ་འདེབས་སྨོན་ལམ་རེ་བྱས་ཏེ་ཡོད་སྐབས། མཁའ་འགྲོ་བདེ་བའི་གོ་ཆ་དང་། སིདྡྷི་ཡིན་སྐད་པ་གཉིས་བྱོན་ནས་འདི་སྐད་གསུངས། བདེ་ཆེན་ཡེ་ཤེས་རོལ་པའི་གར། །གསང་བའི་ཡུམ་གྱུར་ཌཱཀྐི་མ། །རྡོ་རྗེའི་སྤུན་ཁྱོད་གནས་འདི་རུ། །བྱོན་པ་སྐལ་ལྡན་ལས་འཕྲོ་ཅན། །ཞེས་གསུངས་ནས་བདག་གི་གོས་ཐམས་ཅད་ཕུད་ཅིང་། ཁོང་གཉིས་ནས་མཁའ་འགྲོའི་ཆས་གོས་ལེགས་པོ་ཞིག་བདག་ལ་གཏད་པ་དང་། ཁྲུས་གསོལ་རྒྱན་འདོགས་པ་སོགས་བྱས་ཏེ། ཁོང་གཉིས་ཀྱིས་བདག་གི་ལག་པ་གཡས་གཡོན་ནས་བཟུང་བའི་ཚུལ་མཛད་ནས་གུར་ཁང་ནང་དུ་སོང་བས་གཙོ་འཁོར་ཐམས་ཅད་ཡེ་ཤེས་སྒྱུ་མའི་སྐུ་ལྟ་བུ་ཤ་སྟག་ཏུ་འདུག་པས། བདག་གི་ཡིད་ཤིན་ཏུ་དགའ་དད་ཆེན་པོས་འདི་སྐད་གསོལ། ཨེ་མ་ཨེ་མ་ངོ་མཚར་ཅན། །རང་སྣང་དག་པའི་ཞིང་ཁམས་སུ། །རང་བྱུང་ལྷུན་གྲུབ་དཀྱིལ་འཁོར་ལྷ། །བདག་ཅག་འགྲོ་བའི་དཔལ་མགོན་དུ། །ཡེ་ཤེས་འཇའ་སྐུའི་རྣམ་པ་རུ། །ལུས་དམན་བདག་གིས་མཇལ་བ་འདི། །སྐྱེ་སྔོན་བསོད་ནམས་མཐུ་ལས་འཁྲུངས། །བདག་གི་ མ་དག་སྒོ་གསུམ་འདི། །དག་པ་གསུམ་དུ་བྱིན་གྱིས་རློབས། །གནས་ངན་འཁོར་བའི་རྒྱ་མཚོ་འདི། །དག་པ་སྐུ་གསུམ་ཞིང་དུ་རློབས། །མ་རིག་གསུམ་གྱི་མུན་པ་འདི། །འོད་གསལ་ཆོས་སྐུའི་དགོངས་པར་རློབས། །མདོར་ན་དུས་དང་རྣམ་པ་ཀུན། །བདག་གིས་མཐོང་ཐོས་དྲན་རེག་འགྲོ། །འདི་ནས་ལུས་བརྗེ་གྱུར་མ་ཐག །ཞིང་མཆོག་དམ་པ་འདི་ཉིད་དུ། །སྐྱེས་ནས་སྟོན་འཁོར་ཞལ་མཐོང་ནས། །དབྱེར་མེད་ཆེན་པོར་སངས་རྒྱས་ཤོག །ཅེས་ཕྱག་འཚལ་ནས་གསོལ་པས། གཅོ་བོའི་ཞལ་ནས་སྐུའི་གར་བསྒྱུར་བ་དང་མཉམ་དུ་ཅང་ཏེའུ་སྒྲ་ལ་དྲངས་ནས་འདི་སྐད་གསུངས། ཨེ་མ་སྐལ་ལྡན་ལས་འཕྲོ་ཅན།།སྔོན་སྨོན་ལས་ཀྱི་འབྲས་བུ་ཡིས། །དེང་གི་གནས་མཆོག་དམ་པ་འདིར། །དཔའ་བོ་དཔའ་མོའི་ཚོགས་གྲལ་དུ། །ཁྱོད་ཉིད་འབྱོན་པ་ངོ་མཚར་རྨད། །སྤྲོ་བ་བསྐྱེད་ལ་མོས་གུས་མཛོད། །རང་སྐལ་མཁའ་འགྲོའི་ཐུགས་རྗེའི་བཅུད། །ཁྱོད་ལ་གཏད་རྒྱ་དུས་ལ་བབ། །མ་ཡེངས་འདི་དོན་ཙིཏྟར་སྦོས། །ཞེས་གསུང་མ་ཐག །ཡང་ཌཱཀྐི་གཉིས་ཀྱིས་དར་སྣ་ལྔས་བརྒྱན་པའི་མདའ་ཞིག་བདག་ལ་གཏད་ནས་འདི་སྐད་གསུངས། ཧེ་ཧེ། དབྱིངས་མི་འགྱུར་ཆོས་སྐུའི་མཁའ་ཀློང་ནས། །མདངས་སྣ་ བྃ༔ ཚོགས་མ་ངེས་རོལ་པ་འགྱེད། །རྩལ་འཕྲུལ་ལྡན་བརྡ་ཡི་རི་མོ་ངོམས། །སྔོན་རང་སྐལ་ཐོབ་པའི་ནོར་གྱི་བཅུད། །མ་མཁའ་འགྲོའི་ཐུགས་བཅུད་ཡང་གསང་གི ཆོས་གཏེར་རྣམས་དུས་དང་དུས་སུ་ཐོན། །བྲག་སྲིན་མོ་འགྱིང་འདྲའི་གཡས་ཟུར་དུ། །རྩ་ལ་ལྡན་པའི་འགྲོས་ཀྱི་སྟབས་བསྒྱུར་ལ། །རྒྱང་གྲགས་ནས་འཇའ་ཡི་འོད་ཟེར་འབྲེལ། །གསང་བ་ཡི་རི་མོ་ངོམས་པའི་དཔེར། །དུས་རྟགས་ནི་སྦྲུལ་ལོ་མཛེས་ལྡན་སྐབས། །གྲོགས་ནམ་མཁའི་སྒྱུ་འཕྲུལ་བཛྲ་མིང་། །དུས་སྨོན་ལམ་ལས་འབྲེལ་གནད་འཛོམས་ན། །མ་མཁའ་འགྲོའི་ཐུགས་ཐིག་གསང་བའི་ཆོས། །ཆག་མེད་ཀྱི་མཐར་ཆག་ཚུལ་དུ་ཡོད། །གྲངས་ཚད་ནི་རྡོ་རྗེའི་གྲུ་ཚད་གཉིས། །དེ་ལས་ནི་ལྷག་ནས་ཆད་བྱུང་ན། །ནོར་འཁྲུལ་དེ་གབ་འཁྲུགས་བསལ་བ་གཅེས། །དེའི་སྟབས་དང་ལྡན་པར་མ་གྱུར་ན། །དུས་རྟེན་འབྲེལ་གནས་དང་ཡུལ་གྱིས་བསྒྱུར། །ཆོས་འཛིན་དང་གདུལ་བྱའི་དཀར་ཆག་རྣམས། །དབྱིངས་རྗེ་མོའི་དུས་སུ་སྤྲད་པར་ངེས། །ད་ཁྱོད་ཀྱི་སྒོ་གསུམ་གཅིག་ཏུ་དྲིལ། །གསང་བ་ཡི་མཎྜལ་གུས་ཕུལ་ལ། །དཀྱིལ་འཁོར་དུ་འཇུག་ལ་ཚུལ་བཞིན་སྤྱོད། །ཅེས་པའི་ཚེ་བདག་གི་སྣང་བ་ལ་ང་ཕྱིར་མི་ཡུལ་ དུ་འགྲོ་དོན་འོང་བ་ཤིན་ཏུ་དཀའ་བས་འགྲོ་ཐབས་གཏན་ནས་མེད་པ་འདྲ་ན། བདག་རང་གི་ཉམས་མྱོང་གནས་ཚུལ་གྱི་ལོ་རྒྱུས་ཤིག་ཞུ་དགོས་སྙམ་ནས་འདི་སྐདགསོལ། ཨེ་མ་ཡེ་ཤེས་སྤྱན་ལྡན་བདག་ཅག་འགྲོ་བའི་མགོན། །ཐུགས་རྗེ་བརྩེ་བ་ཆེན་པོས་དགོངས་མཛོད་ལ། །སྐྱེ་དམན་བདག་གི་གནས་ཚུལ་འདི་ལྟར་ལགས། །ཆུང་ནས་ད་བར་འགྲོ་བའི་དོན་ལ་སྨོན། །ཐབས་མཁས་དུ་མས་འགྲོ་བློ་ཆོས་ལམ་ལ། །འགོད་པའི་རྐྱེན་དུ་འབད་རྩོལ་ཆེར་བརྩམས་ཀྱང་། །རང་ཉིད་ནུས་མེད་སྟོབས་ཞན་རྐྱེན་དབང་གིས། །གཞན་དོན་ཕར་ཞོག་རང་གཏེར་ཟབ་པའི་ཆོས། །དམ་སེལ་ཉམས་པའི་ལོག་སྒྲིབ་རྐྱེན་གྱིས་བསྒྱུར། །གྲོགས་དང་ཆོས་འཛིན་གནང་བཀག་ལམ་དུ་གོལ། །རང་ཡང་སྐྱེ་ལུས་དམན་པས་སྤོབས་པ་ཆུང་། །རྟེན་དང་འབྲེལ་འབྱུང་སབྟའི་དབང་གིས་བསྒྱུར། །སྙིགས་མའི་འགྲོ་བློས་ཤེས་རྒྱུད་བདུད་ཀྱིས་བསླུས། །ཡང་དག་ལམ་འཇུག་སྐྱེས་བུ་ཉིན་སྐར་ཙམ། །མི་བདེ་ལོག་ལམ་སྤྱོད་པ་ཁོ་ནར་འབད། །རང་གཞན་གཉིས་ཕུང་སྡིག་ལ་ཤིན་ཏུ་སྤྲོ། །ཆོས་བཞིན་སྤྱོད་པའི་སྐྱེས་བུའི་དབུ་འཕང་ཉམས། །ཟོབ་རྫུན་གཡོ་འཕྲུལ་མཁན་རྣམས་གཙུག་ཏུ་བཀུར། །དམ་ཚིག་སྡོམ་པ་ཞིག་རལ་གྱུར་པ་གང་། བྃ༔ འགྱོད་སེམས་ཕར་ཞོག་ད་དུང་འཆོལ་ཉོག་སྤྱོད། །སྔགས་པས་བསྐྱེད་རྫོགས་གདེངས་བྲལ་དཀོར་ལ་རྔམས། །དགེ་བཙུན་ཚུལ་འཆལ་ནག་ཆང་ལྐོག་ཏུ་སྤྱོད། ། བཙུན་མས་ལོག་ལམ་རང་རྒྱུད་གསོད་པར་རྩོམ། །ཁྱིམ་པ་ཕོ་མོ་མི་དགེའི་ལས་སྣ་ཚོགས། །མནར་མེད་གནས་སུ་འགྲོ་ངེས་རྒྱུ་བསགས་ཤིང་། །འཁོར་བའི་གནས་ལས་ཐར་བའི་དུས་མ་མཆིས། །འདི་ཕྱིའི་སྐྱབས་གནས་དཀོན་མཆོག་རྒྱབ་ཏུ་བོར། །དྲི་ཟའི་ཚོགས་ལ་སྐྱབས་བཅའ་བློ་ཕུག་གཏད། །སྤང་བླང་གནས་རྨོངས་རང་བཞིན་སྡིག་ལ་སྤྱོད། །དེ་ལ་སོགས་པའི་དུས་ངན་སྙིགས་མའི་མི། །ཡེ་ཤེས་སྤྱན་ལྡན་ཁྱོད་འདྲ་མ་གཏོགས་པས། །སྐྱེ་དམན་བདག་གིས་ཅིའི་ཕྱིར་འདུལ་བར་ནུས། །དེ་ཕྱིར་བདག་ནི་འཇིག་རྟེན་གདོང་དམར་གྱི། །ཡུལ་དུ་འགྲོ་བར་མི་འཚལ་གནས་འདི་རུ། །དཔའ་བོ་མཁའ་འགྲོའི་གྲལ་དུ་འཇུག་པར་སྤྲོ། །ཞེས་ཞུས་ཚེ། ཡང་ཌཱཀྐིའི་ཞལ་ནས། ཨེ་མ་རིགས་ལྡན་མཛའ་ན་མོ། །དུས་ངན་མི་ཡི་སྤྱོད་པ་ལ། །ཐུགས་སུན་སྐྱོ་བ་ཅི་ལ་དགོས། །རང་སྐལ་གསང་མཛོད་དྲི་མེད་འདི། །དུས་སུ་འགྲོ་བའི་དཔལ་དུ་ཤར། །སྨོན་ལམ་ལས་ཀྱིས་བསྡུས་པ་ཡི། །གྲོགས་དང་ཆོས་འཛིན་རིམ་ གྱིས་འཕྲད། །མཁའ་འགྲོས་མངགས་པའི་ཕོ་ཉ་ལ། །འགྲོ་དོན་རྟེན་འབྲེལ་ཁོ་ནར་བབས། །ལོག་ལམ་སབྟས་མ་བསྒྱུར་ན། །གཏེར་སྲུང་རྣམས་ཀྱིས་གྲོགས་ལྡན་བྱེད། །གསེར་ལ་གཡུ་ཡི་ཚོམ་བུ་བཞིན། །གྲོགས་དང་ཆོས་རྒྱུད་འཛིན་པ་འབྱུང་། །ནམ་མཁའི་བུ་མོའི་བཞིན་རས་བཞིན། །འགྲོ་དོན་གདུལ་བྱ་རིམ་གྱིས་རྒྱས། །ལྕགས་ཁམས་གསེར་འགྱུར་ཇི་བཞིན་དུ། །ལས་སྐལ་ལྡན་རྣམས་སྨིན་ཅིང་གྲོལ། །ཐ་ན་ལོག་པར་བརྗོད་པ་དང་། །ངན་སྨྲས་གནོད་པར་བྱེད་པ་ཡན། །ཁྱོད་ཀྱི་གདུལ་བྱར་གྱུར་པ་ན། །འཁོར་བ་མཐའ་ཅན་ལམ་ལ་འགོད། །དེ་ཕྱིར་ད་དུང་འཇིག་རྟེན་དུ། །འགྲོ་དོན་མ་རྫོགས་བར་དག་ཏུ། །སྐྱོ་ངལ་ཐུགས་སུན་མ་མཛད་པར། །རྒྱ་ཆེན་སེམས་ཀྱི་གོ་ཆ་བགོས། །དུས་བབ་ཞིང་འདིར་ལྷགས་