Tibetan
ནས། །རྒྱལ་ཁམས་བསྐོར་བ་བྱེད་འགྲོ། ། ཞེས་སྨྲས་ཡོད་ཚེ། རྒྱལ་སྲས་ཀྱིས་ཁྱོད་ཅི་ཟེར་གི་ཡོད་ཁོང་ལ་གསོལ་ཇ་བསྐོལ་ཤོག་གསུངས། བདག་ཡང་ཁྱིམ་དུ་སོང་བས་ཁོང་གི་ཐུགས་ཁྲོ་ཞི་ནས་བདག་ལ་ཁྱོད་གླུ་ཅི་འདྲ་གསུངས། བདག་གིས་གླུ་འདི་ལྟར་བླང་ཞུས། བན་ཡག་དགའ་ཚལ་གནས་ན། །ཅང་ཤེས་འཛིན་པའི་སྐྱེས་བུ། །སོད་གསུམ་ནམ་ཟླའི་མདངས་བཞིན། །དཀར་ནག་རྒྱུན་ཆད་མི་འདུག །ལྷོ་ཕྱོགས་ཡུལ་ནས་འོང་བའི། །གཡུ་འབྲུག་སྒྱུ་རྩལ་རྒོད་ཀྱང་། །སྐབས་རེར་བྱ་ཐབས་བྲལ་བྱུང་། །ལས་རླུང་འཕན་པ་ཟད་དུས། །ཅི་བྱེད་ལས་ཀྱིས་བསྒྱུར་འོང་། །ཞེས་བླངས་པ་ཡིན་ཞུས། དེ་སྐབས་ཡུལ་མི་རྣམས་ཀྱིས་ཀྱང་ང་རང་ལ་ཤིན་ཏུ་སྡང་ཞིང་འདྲེ་མོ་རེད་ཟེར་འདུག །བདག་གིས་ཀྱང་དམནས་བཟུང་སྟེ་ཟབ་གཏེར་བྲི་ཕབ་བྱེད་པ་སོགས་གསང་རྒྱ་དམ་པོ་བྱས་ཡོད་སྐབས། ཉིན་གཅིག་རྒྱལ་སྲས་སང་ཁོང་གི་སྐུ་ནུས་འབྲིང་བ་འཇིག་མེད་དཀོན་མཆོག་ཅེས་པ་དེ་དཔལ་ཡུལ་དགོན་དུ་གྲྭ་པར་བཞུགས་ཡོད་པས་དེའི་སར་བྱོན་སོང་། ང་རང་གཅིག་པུར་མ་ གཏོགས་སུ་གཅིག་ཀྱང་མེད་པས། རང་གཏེར་སྙན་བརྒྱུད་ཀྱི་ཆོས་སྐོར་མཚོ་རྒྱལ་ཞལ་ཆེམས་གཏེར་འབྱུང་རྣམ་ཐར་དང་བཅས་པ་ཚག་མེད་དུ་ཡོད་པ་ཞིག་སྔར་ནས་གཏན་ལ་ཕབ་སྟེ་མཇུག་མ་རྫོགས་པ་ཞིག་ཡོད། དེ་གཏན་ལ་ཕབ་ཅིང་བསྡད་ཡོད་པའི་ཚིག་མཚམས། ཁོ་མོ་བདག་ནི་འགྲོ་བའི་དོན་ལས་མེད། །ནོར་བུ་རིན་ཆེན་འདམ་གྱིས་གོས་མི་སྲིད། །ཆོས་རྣམས་རྟེན་ཅིང་འབྲེལ་འབྱུང་ཁོ་ནར་རག །ཅེས་བྲི་ཞིང་ཡོད་སྐབས་གློ་བུར་དུ་སྐྱག་ཀུན་བཟང་ཞེས་པའི་བན་རྒན་ཞིག་ཡོད་པ་དེ་ཐོནབྱུང་ནས། ཁོང་གིས་བདག་ལ་ཐོག་ཕུད་ཡིན་ཟེར་ནས་ཐོས་བ་སྡེར་མ་གང་ཁྱེར་འོང་འདུག །ཁོ་རང་གིས་བདག་གི་ཡི་གེ་བྲི་བ་མཐོང་སོང་བས་ཡི་གེ་དེ་ཅི་རེད་ཟེར། བདག་གིས་གཏེར་ཆོས་ཞིག་རེད་སྨྲས།ཁོང་ན་རེ། མགར་ར་བླ་མའི་གཏེར་ཆོས་ཁྱོད་ཀྱིས་བདག་པོ་བྱས་པ་དེ་མཚར་གི་དང་། བླ་མ་རྒྱལ་སྲས་ཁྱོད་ཀྱིས་རྫད་བཏང་བ་དེ་མ་ཉན་ཟེར། བདག་གིས་ཁྱོད་སང་གི་རྒྱལ་སྲས་ཀྱིས་ང་ལྟ་བུའི་ནག་མོ་ཞིག་ལོན་ན་བོང་ལིའི་མགོ་ལ་གསེར་སྲབ་བཞག་པའི་དཔེ་དང་མཚུངས། བདག་གིས་ཁྱོད་སང་གི་རྒྱལ་སྲས་ལ་གནོད་བསྐྱལ་མེད། དཀྱིལ་འཁོར་བཤམས་ཡག་གི་སྟེང་ན་བུམ་པ་བཅུད་ལྡན་ཟེར་བ་བཞིན་ནང་དོན་གྱི་ཡེ་ཤེས་ལ་ཕན་པ་ བྃ༔ མ་གཏོགས་གནོད་བྱས་མེད། གལ་ཏེ་ཁྱོད་ཀྱིས་བདག་གིས་རྒྱལ་སྲས་ལ་གནོད་ཡོད་སྙམ་ན། ང་མིན་རུང་སྔར་ནས་ཁྱོད་ཀྱི་རྒྱལ་སྲས་རྫད་ཚར་ངེས་རེད་སྨྲས་པས། ཁོ་ཡང་ཚིག་པ་ཟ་ནས་ང་རང་ལ་ཚིག་ངན་སྣ་ཚོགས་ཀྱིས་གང་གནོད་བྱེད་འདུག །དེ་ལ་རྐྱེན་ནས་བདག་གིས་སྙན་བརྒྱུད་མཚོ་རྒྱལ་ཞལ་ལུང་མེ་ལ་བསྲེགས་ནས་ཟབ་གཏེར་བྲི་ཕབ་མི་བྱེད་སྙམ་པའི་དམ་བཅའ་བྱས། དེ་ནས་ཉིན་གཅིག་བདག་གི་བསམ་པ་ལ། རྒྱལ་སྲས་ནི་དགོངས་པ་མཐོ་བའི་སྟོབས་ཀྱིས་རྩོལ་བཅས་ཐབས་གྲོལ་གྱི་གདམས་པ་ཉམས་ལེན་མཛད་རོགས་དཀའ་འདུག །བདག་རང་ནི་སྔོན་སྦྱང་ལས་འཕྲོ་དམན་པའི་དབང་གིས་ཐབས་གྲོལ་ལ་མ་བརྟེན་པར་ཉོན་མོངས་པ་རང་ཁར་སྤྱོད་པ་ལ་སྤོབས་པ་ཆུང་བ་དང་། སྐྱེ་ལུས་དམན་པས་འགྲོ་དོན་འོང་དཀའ་བར་འདུག་པས། ད་ནི་སེམས་ལ་ཕན་ངེས་ཀྱི་བརྒྱུད་འཛིན་ཞིག་ཡོད་ན་དེའི་དགའ་གི་སྙམ་པ་བྱུང་ཚེ། བླ་མ་ན་རོ་པ་དང་། སོག་པོ་བླ་མ་སོགས་ཀྱི་གསུང་འཕྲིན་ལ། ད་ལོ་ཁྱོད་ལ་མགར་ར་བླ་མའི་ཡང་སྤྲུལ་ཞིག་ཡོད་ངེས་འདྲ་བས་ཟས་གོས་སོགས་ཀྱི་གྲིབ་ལ་ཤིན་ཏུ་འཛེམ་པ་གལ་ཆེ་གསུངས། བདག་གིས་ཀྱང་ཁོང་རྣམས་ཀྱི་བཀའ་བཞིན་ཅི་ལྕོག་བྱས་ཚེ། ནུབ་གཅིག་རྨི་ལམ་ ལ་བྱིའུ་ཁ་དོག་སྐད་སྙན་པ་ཞིག་གིས་འདི་སྐད་ཟེར། ཏིང་ཏིང་རྣལ་འབྱོར་མ་ཡེངས་ཉོན་དང་། །ཏིང་ཏིང་ང་ནི་དཔལ་རིའི་ཁྲོད་ནས། །ཌཱཀྐིས་མངགས་པའི་ཕོ་ཉ་ཡིན་ཏེ། །ཁྱོད་ལ་ངག་གསལ་འདི་ལྟར་བསྐུར་ཡོད། །རྡོ་རྗེའི་གྲོང་གི་ནིརྨ་ཀ་ལ། །ཡུལ་འདིར་བསྡད་ན་འཚེ་བ་ཆེ་ཞིང་། །སྨོན་ལོག་སབྟའི་རྐྱེན་གྱིས་འཕྲོག་ནས།། མི་འདོད་སྣ་ཁ་གསལ་སྒོར་མངོན་ངེས། སྦས་རྫོང་རྡོ་རྗེའི་གྲོང་དུ་ཕྱིན་ན། །རྐྱེན་སྣང་མི་མཐུན་ངང་གིས་བྱང་འགྲོ། །བསྒྲོད་བྱེད་ནུས་པ་བྲག་གི་སྤྲེའུས། །སྒྱུ་རྩལ་འགྲན་ན་བདེ་བའི་སྐབས་འབྱེད། །དེ་ལྟར་རྟེན་དང་འབྲེལ་འབྱུང་འཛོལ་ན། །ཁྱོད་ཀྱང་མཁའ་འགྲོའི་གླིང་དུ་བྱོན་རན། །ཏིང་ཏིང་ཚིག་འདི་སྙིང་ལ་སྦས་རྒྱ། །ཞེས་ཟེར་ནས་འོད་དམར་ཞིག་ཏུ་གྱུར་ཏེ་རང་གི་སྙིང་གར་ཐིམ་མོ། །ནང་པར་རྒྱལ་སྲས་སང་ལ་གསོལ་ཇ་དྲང་སྐབས་བདག་གིས་འདི་སྐད་ཞུས། ངའི་ལུས་ཀྱི་བྱིས་པ་འདི་བླ་མ་རིན་པོ་ཆེའི་སྤྲུལ་པའི་ཆ་ཙམ་ཡིན་པར་འདུག་པས། ཡུལ་འདི་ཀར་བསྡད་ན་བར་ཆད་ཆེ་ཞིང་ཨེ་མཚམས་མི་ཤེས་ཀྱི། །མཛོ་མོའི་གནས་ནང་ལ་འགྲོ་གར་ཐོན་ན་བར་ཆད་མེད་ངེས་རེད་ཞུས་ཚེ། རྒྱལ་སྲས་སང་གི་ཞལ་ནས་ལུས་གདོས་ཅན་གྱི་བུད་མེད་དུ་མ་ཡོད་འདུག་པས། དེ་དག་བཙས་འབྲོས་ བྃ༔ ལ་འགྲོ་མི་དགོས་ཤིང་རང་ཡུལ་ལ་བསྡད་ནས་མི་བརྒྱུད་ཐམས་ཅད་འབྱུང་འདུག་པས། འུ་ཅག་གཉིས་ཀྱི་སྤྲང་ཕྲུག་ལ་སྐྱོན་མེད་ངེས་ཡིན་གསུངས། དེ་ནས་བདག་གིས་ཀྱང་བཏང་སྙོམས་ལ་མི་བཞག་ཁག་མེད་བྱུང་ངོ་། །ལོ་ཁྱིམས་དེ་ཀའི་སྟོན་ཟླ་དང་པོའི་ནང་དུ་བྱིས་པའི་ངོ་མཐོང་བའི་དུས། སྔར་མགར་ར་གཏེར་ཆེན་གྱིས་བདུད་ལུང་དུ་ཟིན་པ་ཁོང་གི་ཉེ་གནས་ཆོས་ལྷུན་ཞེས་པ་དེ་ཞིང་ལ་གཟན་སོང་བ་ལ་རྐྱེན་བྱས་ཏེ། སྐད་དྲག་པོས་འབོད་ཅིང་དམོད་མོ་བྱེད་པ་སོགས་ལ་རྐྱེན་བྱས་ཏེ། བྱིས་པ་སྲུང་ལོག་ནས་བུ་མོར་སོང་འདུག །དེ་དུས་རྒྱལ་སྲས་ཐུགས་འགྱོད་ཆེ་ཞིང་བུ་མོ་འདི་འཆི་སོང་ན་དགའ་གསུངས་ཏེབྱིས་པ་ལ་ཐུགས་གནག་འདུག་པས།བདག་གི་སེམས་ལ་མ་བབས་ཀྱང་ཅི་ཡང་མ་ཞུས་པས། དེ་སྐབས་རང་ལ་སེམས་དཀར་བ་བཙུན་མ་དགེ་མཚོ་ཞེས་པས་བདག་གི་ནད་གཡོག་བྱེད་ཡོད་པས། དེས་རྒྱལ་སྲས་ལ་བསམ་ཚོད་ཞུས་ཤིང་བྱིས་པ་འདི་ལ་གཅེས་སྤྲས་དགོས་ཟེར། དེ་ནས་ཞག་ཆ་ཤས་སོང་རྗེས་བྱིས་པས་ཉི་ཐིག་ལ་མིག་མི་ཟུམ་པར་བལྟ་ཞིང་ཨ་དང་ཕཊ་བརྗོད་པ་དགེ་མཚོ་དང་། ཆོས་ཕྲེང་རྣམས་ཀྱིས་མཐོང་བས་ཁོང་རྣམས་འགྱོད་ཅིང་ངུ་གིན་འདུག་པས། བདག་གིས་ཁོང་རྣམས་ལ་ འདི་སྐད་སྨྲས། མི་རྟག་སྒྱུ་མའི་སྣང་བ། །འཁྲུལ་ཚུལ་འདི་ལ་ལྟོས་དང་། །མ་དང་སུམ་སྐྱེས་པའི་བྱིས་པ། །ད་ལྟ་བུ་མོར་གྱུར་འདུག །འུ་ཅག་ཡར་སྣ་ཕྱིར་འདུས། །ད་ལྟ་ཁ་སེམས་གཅིག་ཀྱང་། །འདུས་བྱས་མི་རྟག་ཆོས་ལ། །ཅི་ཆ་ཡོད་པར་དཀའ་བས། །ཁྱེད་ཅག་ཡང་དག་ལམ་ལ། །བློ་སྣ་རྩེ་གཅིག་གཏོད་ལ། །བདག་འདྲའི་སྤྱོད་ངན་སྤངས་མཛད། །ཟིན་མེད་འཁོར་བའི་ཆོས་ལ། །སྙིང་པོ་མེད་པ་ཨེ་མཐོང་། །ཚེ་རོགས་ཞལ་ངོའི་དཀར་ནག །འཚོ་ཐབས་ཤིན་ཏུ་དཀའ་འདུག །ལུས་གདོས་ཟླ་དགུའི་སེམས་ནད། །རང་ཅག་གཅིག་པུའི་སྡུག་རེད། །དེ་ལ་ཐུགས་བསམ་ཐོངས་ལ། །ཚེ་གཅིག་དབེན་ཁྲོད་འགྲིམ་ནས། །ཡང་དག་ལྟ་བ་བསྒོམ་དང་། །འདུས་མ་བྱས་པའི་ཡེ་ཤེས། །མི་རིང་རང་ཞལ་མཇལ་ངེས། །ཧེ་ཧེ། ཞེས་སྨྲས་ཚེ། དགེ་མཚོ་ན་རེ། ཁྱོད་ཀྱིས་ངུ་རྒྱུའི་ཁ་ལ་གླུ་ལེན་བྱེད་འདུག །རྒྱལ་སྲས་ཀྱི་སྡུག་སྤྱོད་ཁོལ་འདུག་ཀྱང་། ད་ཅི་ཡིན་ཡང་བྱིས་པ་འདི་སྲུང་ལོག་པས་ངེད་ཅག་འགྱོད་ཀྱང་། ཁྱོད་རང་ལ་རང་རྒྱུད་ཡིན་པས་ཁྱད་ཅི་ཡོད་གཅེས་པར་སྐྱོངས། ཨ་ཁུ་ངག་བདེ་ལ་མིང་ཞིག་ཐོགས་ཞུས་ཟེར། བདག་གིས་ཀྱང་མོ་རང་གི་ངག་ལམ་ལྟར་བླ་མ་རིན་པོ་ཆེའི་དངོས་སློབ་ བྃ༔ ལུང་ཟིན་དམ་པ་བྱ་བྲལ་བ་བླ་མ་ངག་དབང་བདེ་མཆོག་ཞེས་པ་རི་ཁྲོད་དེ་ཀར་བཞུགས་ཡོད་པ་དེའི་མདུན་ལ་སོང་ནས་བུ་མོ་ལ་མིང་ཐོགས་ཞུས་ཚེ། ཁོང་གིས་བུ་མོ་འདི་བསོད་ནམས་ཆེ་བ་ཞིག་ཡིན་པས། མིང་ལ་དབྱངས་ཅན་སྒྲོལ་མ་ཐོགས་གསུངས། དེ་ནས་རིམ་གྱིས་ནར་སོན་ཚེ་ཕྱི་ནང་གསང་བའི་རྟགས་མཚན་མི་འདྲ་བ་དུ་མ་ཡོད་ཀྱང་བཏང་སྙོམས་ལ་བཞག་གོ། །དེའི་སྐབས་སུ་ཁང་སར་སང་གི་བླ་སེར་ཆ་ཤས་ལ་རང་གཏེར་ལབ་སྒྲོན་གྱི་སྒྲུབ་པ་གསར་ཕབ་བྱས་ཏེ་གསང་ཐབས་སུ་སྤེལ།ཁོང་རྣམས་ཡིད་རང་ནས་རང་གནས་ལ་སོང་རྗེས། རྒྱལ་སྲས་སང་གིས་སྙན་ནས་བཀའ་བཀྱོན་གནང་བ་ལ་རྐྱེན་བྱས་ཏེ། རང་གི་ཡིད་ཤིན་ཏུ་སྐྱོ་དྲག་ནས་གནས་གསུམ་དཔའ་བོ་མཁའ་འགྲོ་ལ་གསོལ་བ་འདི་ལྟར་གདབ་བོ། །གནས་མི་མངོན་ཟངས་མདོག་དཔལ་རི་ན། །མ་ཀུན་མཁྱེན་ཡེ་ཤེས་མཚོ་རྒྱལ་དང་། །དཔའ་བོ་དང་དཔའ་མོ་དགོངས་སུ་གསོལ། །མ་མཁའ་འགྲོས་མངགས་པའི་ཕོ་ཉ་ང་། །ལུས་མ་དག་ཟ་མ་མོ་ལུས་སྐྱེས། །ལས་མ་དག་འཁོར་བའི་ཁ་འཛིན་བྱེད། །ཡུལ་མ་དག་མགོ་ལོག་སྲིན་པོའི་གླིང་། །བྱ་མ་དག་ཚོགས་ངན་རྒྱུན་དུ་བྱེད། །ལས་འདི་འདྲའི་རྒྱུ་རྐྱེན་ཅི་ལས་བྱུང་། །ང་ཉོན་མོངས་ དུག་ལྔའི་རྒྱུད་བསླངས་ཏེ། །ཆགས་སྲེད་ཀྱིས་ཁྱིམ་ཐབས་འཛིན་པ་མིན། །ལྷ་བླ་མའི་ཞལ་ལུང་ཇི་བཞིན་བྱས། །བསྟན་འགྲོ་བའི་དོན་ཞིག་ལོས་འགྲུབ་སྙམ། །ད་གཞན་དོན་འབྱུང་བ་ལྟ་ཅི་སྨོས། །རང་རྒྱུད་ཀྱང་ཆུད་ཟོས་འགྲོ་ཉེ་བས། །མ་དབྱིངས་སྤྱོད་ཌཱཀྐིས་མཐུ་དཔུང་བསྐྱེད། །རྐྱེན་ངན་པའི་བར་ཆད་བཟློག་ཏུ་གསོལ། །གནས་མ་དག་འཁོར་བའི་རྒྱ་མཚོ་འདི། དཔལ་པདྨ་འོད་དུ་བྱིན་གྱིས་རློབས། །ལུས་མ་དག་གདོས་བཅས་ཕུང་པོ་འདི། །དབྱིངས་ཟག་མེད་འཇའ་སྐུར་བྱིན་གྱིས་རློབས། །སེམས་སེམས་བྱུང་འཁྲུལ་པའི་འཁོར་ལོ་འདི། །ངང་ཡེ་ཤེས་ཆེན་པོར་གྲོལ་བྱིན་རློབས། །འཁྲུལ་མ་རིག་གཉིས་འཛིན་རུ་ཏྲ་འདི། །དབྱིངས་ཡུལ་མེད་ཟང་ཐལ་ཆེན་པོར་སྒྲོལ། །ང་སྤྲོས་མེད་དོན་གྱི་སྤྲང་མོ་ལ། །མདོ་འདི་འདྲ་མ་ཡི་ཉམས་ཞིག་ཤར། །ཚེ་རོགས་སྡང་དང་མ་སྡང་མེད། །འཁོར་བར་ལྷུང་དང་མ་ལྷུང་མེད། །སྒྱུ་ལུས་གྲོལ་དང་མ་གྲོལ་མེད། །སེམས་ཅན་འཁྲུལ་དང་མ་འཁྲུལ་མེད། །ཞིང་ཁམས་མཐོང་དང་མ་མཐོང་མེད། །སངས་རྒྱས་ཐོབ་དང་མ་ཐོབ་མེད། །ལྟ་བ་ཤེས་དང་མ་ཤེས་མེད། །སྒོ་ཉམས་རྟོགས་དང་མ་རྟོགས་མེད། །འཁྲུལ་པ་བྲལ་བའི་སེམས་ཉིད་ལ། །འཁྲུལ་གཟུགས་བློ་ བྃ༔ ཡིས་བཅོས་མི་གཞུག །མཁའ་ལྟར་རྣམ་དག་ཕྱོགས་ལྷུང་བྲལ། །སྤྲོས་མེད་ཐིག་ལེ་ཉག་གཅིག་གོ །མདོ་འདྲ་མ་ཡི་གླུ་ལེན་ཡིན། །ཞེས་སྨྲས་ཚེ། ནམ་མཁའ་ནས་གཟུགས་མེད་ལ་སྒྲ་འདི་བཞིན་ཐོས། ཨེ་མ་ཨེ་མ་རྣལ་འབྱོར། །རང་བྱུང་ཡེ་ཤེས་ཆེན་པོ། །རྩོལ་སྒྲུབ་བྲལ་བ་ཨེ་ནམ། །མ་སྐྱེས་རང་བྱུང་ལྷུན་གྲུབ། །འཁོར་འདས་གཞི་རུ་ཨེ་ནམ། །བཟང་ངན་བདེ་སྡུག་སྣང་བ། །ཆོས་ཉིད་རོལ་པར་ཨེ་ནམ། །ཆོས་བརྒྱད་ཧ་ལའི་ཀུ་མུད། །མི་འགྱང་སྤང་བ་ཨེ་ནམ། །རང་ནོར་ཌཱཀྐིའི་ཐུགས་བཅུད། །དུས་སུ་ལོན་པ་ཨེ་ནམ། །བསྟན་དང་འགྲོ་བའི་དོན་གཉིས། །ལྷོ་ནས་འབྱུང་བ་ཨེ་ནམ། །འདི་སྣང་སྒྱུ་མའི་འཕྲུལ་ལ། །ཐུགས་སུན་སྐྱོངངལ་མི་དགོས། །པདྨའི་ཞལ་ཆེམས་མི་འགྱུར། །དུས་སུ་སྨོན་ལམ་འཇོམས་ངེས། །ཞེས་ཟེར། འབྱུང་འགྱུར་གྱི་ལུང་བསྟན་གསུངས་པ་གཏེར་གཞུང་དུ་གསལ། དེ་ནས་རང་ལོ་ཉེར་གསུམ་ལོར་སྨར་གྱི་གནས་ལྕགས་རིའི་འོད་འབར་ལ་གནས་འདུས་ཡོད་པས། དེ་ཀར་སོང་ནས་ཞག་ཆ་ཤས་སྐོར་བ་བྱེད་ཀྱིན་ཡོད་སྐབས། གནས་བདག་བྱ་ཕོ་རོག་ལ་སྤྲུལ་ནས་འོང་སྟེ། སྒྲོལ་དཀར་ཡིད་བཞིན་ཚེ་འཕེལ་གྱི་ཟབ་ཤོག་ཤེལ་སྒྲོམ་ཟུར་ དྲུག་པ་ཞིག་དངོས་སུ་བདག་ལ་གཏད་པ་དེར་འདུས་ཀྱི་མཐོང་ཆོས་སུ་གྱུར་པས། ཀུན་གྱིས་ང་རང་ལ་ཁྱེད་གཏེར་སྟོན་རེད་ཅེས་གྲགས་སོ། །གཞན་ཡང་གནས་དེ་ཀ་ན་གུ་རུའི་ཟབ་སྒྲུབ་ཀྱི་ཆོས་སྐོར་བླ་མ་དགོངས་པ་འདུས་པའི་ཟབ་ཤོག་གཡུ་གཟི་མཆོང་གསུམ་གྱི་སྒྲོམ་བུ་གསུམ་འདུགཀྱང་། ཐབས་གྲོགས་དང་ཆོས་བདག་མ་འཛོམས་པའི་དུས་དབང་གིས་ཆོས་སྨན་དང་གུར་གུམ་ཙམ་ལས་རྟེན་འབྲེལ་བཏང་སྙོམས་ལ་སོང་། དེ་ནས་ལོ་ཁྱིམས་དེ་ཀའི་ཟླ་བ་བདུན་པའི་ནང་དུ་རྒྱལ་སྲས་ཁོང་དཔོན་གཡོག་ཆ་ཤས་ཨ་ཞང་སང་ཡོད་སར་བྱོན་སོང་། བདག་མ་བུ་གཉིས་དང་། སློབ་བུ་ཐུབ་བསྟན་བཟང་པོ། དགེ་མ་དགེ་མཚོ་དང་། ཆོས་ཕྲེང་བཅས་རི་ཁྲོད་ལ་བསྡད་ཡོད་སྐབས། ཆོས་ཕྲེང་གིས་འདི་སྐད་ཟེར། འུ་ཅག་རྣམས་ཐུན་བཅད་དུས་རང་རང་སོ་སོའི་ཁྱིམ་ལ་འདུག །ཇ་གསོལ་རན་དུས་ལྷན་དུ་འཚོགས་ནས། ཁྱོད་ཀྱིས་ངེད་ཅག་རྣམས་ལ་ཆོས་ཀྱི་བསླབ་བྱ་རེ་དགོས་ཟེར། བདག་གིས་ཇི་ལྟར་བྱས་ན་ཆོག་གི་དང་། འུ་ཅག་ལྷན་དུ་འཚོགས་པ་རྒྱལ་སྲས་ཀྱིས་སྙན་སོང་ཚེ། ང་རང་ལ་བཀའ་བཀྱོན་ཕྱག་འབེབས་རེ་ཨེ་གནང་སྙམ་གི་སྨྲས་ཚེ། མོ་ན་རེ། དེས་ན་གཅོད་ཐུན་རྗེས་སུ་ཁྱོད་ཀྱི་མདུན་ལ་ངེད་ཅག་རྣམས་འོང་དགོས་ཟེར། བྃ༔ བདག་གིས་ཀྱང་ཆོག་སྨྲས་པས། ཁོང་རྣམས་བདག་གི་སར་ཐོན་བྱུང་བས། རང་གཏེར་གྱི་སྒོ་ནས་སྐུ་གསུམ་རང་གྲོལ་གྱི་ལམ་ཁྲིད་དང་། རྨི་ལམ་འོད་གསལ་གྱི་ཁྲིད་སྦྱང་རྣམས་བཤད་པས། སློབ་བུ་ཐུབ་བསྟན་བཟང་པོ་ལ་རྨེ་ཁྲིད་ཀྱི་སྒོ་ནས་ཉམས་ལེན་བོགས་ཐོན་པའི་རྟགས་མཚན་ངེས་པར་བྱུང་། གཞན་རྣམ་གཉིས་ཀྱང་ཉམས་ལེན་ལ་ཤིན་ཏུ་བློ་ཐུབ་ཅིང་འདུག་ཚུག་པ་རེ་བྱུང་འདུག །དེ་སྐབས་ནུབ་གཅིག་བདག་གིས་ཁོང་རྣམས་ལ་སྤྲོས་མེད་དོན་གྱི་དབང་བསྐུར་བ་ཡིན་སྨྲས་ནས། ཐུབ་བསྟན་བཟང་པོ་ལ་བདག་གི་ཞྭ་ལག་ཏུ་བཞག །དགེ་མཚོ་ལ་བདག་གི་ལྷམ་གཅིག་དེ་གཏད། ཆོས་ཕྲེང་ལ་བདག་གི་ལྷམ་སྒྲོག་གཉིས་གཏད། དེ་ནས་བདག་གིས་འཇིག་རྟེན་གྱི་གླུ་ལ་དྲངས་ཏེ་འདི་སྐད་སྨྲས། གཟུགས་མེད་གཟུགས་བྲལ་མཚོན་བྱེད་དཔེ། །མཚོན་བྱ་འདི་ཞེས་བརྗོད་ལས་འདས། །འདི་ནི་རང་བཞིན་དག་པའི་དོན། །ཤེས་པར་གྱིས་ཤིག་སྐལ་ལྡན་རྣམས། །ཞེས་སྨྲས་ནས། ངེད་ཅག་རྣམས་གད་མོ་བྱེད་ཀྱིན་ཡོད་པས། གཟུགས་མི་མངོན་པར་སྐད་སྙན་པོ་ཞིག་ཚོར་བྱུང་བས། ཁོང་རྣམས་ཀྱིས་ས་གནས་ཞིག་ཡིན་པར་འདུག་ཟེར། བདག་གིས་དེའི་སྐད་ཀྱི་གདངས་ལས་འདི་སྐད་ཐོས། ཨེ་ ཨེ། པདྨའི་མཚོ་ལ་འཁོར་བའི། །གསེར་གྱི་མདངས་འཛིན་ལྷ་བྱ། །ལོངས་སྤྱོད་ལང་མཚོ་བོར་ན། །འདམ་གྱི་སྐྱོན་ལ་ཉེ་འོང་། །ལྷོ་མོན་གཡུ་བྱ་སྔོན་མོ། །ཙནྡན་བསིལ་གྲིབ་མེད་ཚེ། །སྦྲང་ཆར་སིལ་མས་མི་སྐྱོབ། །སྔོན་སྨོན་ལས་འཕྲོ་ལྡན་ཡང་། །ལེ་ལོའི་གཡེང་དང་མ་བྲལ། །གསེར་དང་ར་གན་མདངས་ལ། །གསལ་བྱེད་ནུས་པ་ཞན་པས། །ཀུན་གསལ་ནམ་མཁའི་བུ་མོ། །ཆུ་འཛིན་གཡའ་ཡིས་གོས་སྲིད། །བྲག་གི་སྤེའུའི་ཡོས་བུ་ལོ་པ། མཆན། འཛུམ་མདངས། །ཅང་ཤེས་རྒྱལ་པོས་བསུས་འོང་། །ཤེས་རབ་མདའ་མོ་མ་ཞན། རང་དོན་སབྟས་བསྒྲིབ་སྲིད། །ཨ་ཡི་མིང་འཛིན་སེམས་དཔའི། །ཡན་ལག་ལས་སྐྱེས་ནིརྨ། །ཡལ་ཀའི་རི་དྭགས་འཛིན་དེའི། །སེམས་སྤྲིན་བཅུད་ལ་རོལ་ན། །གཅིག་ལ་གཅིག་བརྟེན་འབྲེལ་འབྱུང་། །མི་རིང་དབང་སྒོར་གསལ་ངེས། །མཁའ་འགྲོའི་འདུ་རྫོང་གནས་ན། །བྲག་དཀར་སེངྒེ་འགྱིང་འདྲའི། །གཡས་ཟུར་ཆོས་འབྱུང་རིས་སུ། །དུས་ནི་གཡང་དཀར་འཛུམ་ཞེས། །རྟེན་དང་འབྲེལ་འབྱུང་ལྡན་ན། །ཟབ་པའི་གནད་བྱང་གབ་སྒྲོམ། །མི་འགྱུར་གཏེར་དུ་སྦས་ཡོད། །དེ་བཏོན་འགྲོ་དོན་མཐའ་རྒྱས། །རྒྱ་སྟག་ལོ་ཡིས་བསུ་ བྃ༔ ངེས། །དུས་དང་དུས་སུ་འབྱུང་འགྱུར། །ཟུར་བབ་མེ་ལོང་ངོས་ལ། །སྒྱུ་འཕྲུལ་བརྡ་རུ་ཤར་ངེས། །ཟབ་གཏེར་བྲི་སྤེལ་ཁྲོལ་སྡོམ། །གནས་དུས་ཡུལ་ལ་དཔྱོད་དགོས། །རྟེན་འབྲེལ་དུས་བབ་མེད་ན། །མི་འདོད་རང་ལ་འཁོར་ངེས། །ངེས་ངེས་བརྡ་ཚིག་རི་མོ། །ཙིཏྟའི་ཀློང་དུ་ཨ་ཐམ། །ཞེས་ཟེར་བ་ཐོས་ཀྱང་སྦས་གསང་བྱས་ཏེ་བཏང་སྙོམས་ལ་བཞག་གོ། །དེ་ནས་ཉིན་གཅིག་ཆོས་ཕྲེང་དང་ལྷན་དུ་འབུད་ཤིང་ཐུ་བ་ལ་སོང་བའི་ལམ་ཁ་ན་སྦྲུལ་གཉིས་ཀྱིས་ཨབ་བྲ་ཞིག་བསད་ནས། དེའི་རོ་ཡར་འཐེན་མར་འཐེན་བྱེད་ཀྱིན་འདུག་པས། བདག་གིས་འདི་ཅི་ཡིན་སྙམ་ནས་བལྟས་འདུག །ཆོས་ཕྲེང་ཤིང་ཡོད་སར་སྔོན་ལ་བུད་སོང་། ང་རང་རྗེས་སུ་ལྷག་པས་སྦྲུལ་གཉིས་གཅིག་ཏུ་གྱུར་ནས་ཨབ་རོ་ལ་ཐིམ་སོང་། ཨབ་རོ་རི་བོང་ཞིག་ཏུ་གྱུར་སོང་བས། བདག་གིས་སྣང་བ་མཚར་ཆེ་ནས་གླུ་འདི་འདྲ་ཞིག་བླང་ངོ་། །ཕ་ཀུན་མཁྱེན་མཚོ་སྐྱེས་རྡོ་རྗེ་དེ་མཁྱེན་ནོ། །དུས་འདི་ཕྱི་བར་གསུམ་ཐུགས་རྗེས་རང་གཟིགས་མཛད། །ཆོས་མི་རྟག་འདུས་བྱས་འཁོར་བ་ཡི་མཚན་ཉིད། །དེ་བསམ་ཞིང་མཐོང་ན་སྒྱུ་མ་ཡི་ཆོ་འཕྲུལ། །དོན་སྙིང་པོ་མེད་པ་འགྱུར་བ་ཡི་སྡུག་བསྔལ། །སྔོན་མཐོང་བའི་སྦྲུལ་ གཉིས་ཨབ་རོ་ལས་མི་སྣང་། །ད་ཨབ་རོ་མི་རྟག་རི་བོང་ལ་འགྱུར་སོང་། །ལས་འདི་འདྲ་མཐོང་ཚེ་འཁོར་བ་ལ་ཡིད་ཞུམ། །ཆོས་འདུས་མ་བྱས་དབྱིངས་གདེངས་ཐོབ་ཞིག་མེད་ན། ཡུལ་འདི་སྣང་མི་རྟག་སྒྱུ་མ་ཡི་གྲོང་ཁྱེར། །ལས་ཅི་བྱས་ཟིན་མེད་སྤོས་རྒྱ་ཡི་རིས་བཞིན། །དོན་སྙིང་པོ་མེད་པའི་ཁོ་ཐག་དེ་ཆོད་བྱུང་། །ད་ལ་འུར་གནས་ངན་འཁོར་བ་དེ་སྤང་ནས། གནས་མི་མེད་དབེན་རིར་གཅིག་པུ་ལ་འདུག་སྤྲོ། །ལས་མི་རྟག་དྲི་ཟའི་ཡུལ་ཁྱིམ་དེ་དོར་ནས། །ཆོས་མི་གནས་གཏན་སྲིད་ཟིན་པ་ཞིག་བྱེད་དོ། །འཁྲུལ་སྣང་བ་སྒྱུ་མའི་ཆོ་འཁྲུལ་དེ་དོར་ནས། །གང་ཤར་གྲོལ་གཉིས་མེད་ཡེ་ཤེས་ཀྱི་ཀློང་དུ། །གདངས་ལྷུན་གྲུབ་ཆེན་པོའི་རོལ་པ་རུ་དག་མཉམ། །གཞི་ཀུན་བཟང་རྒྱལ་ས་ཟིན་པ་རང་བྱེད་དོ། །ཅེས་སྨྲས་ནས་ང་རང་ཡར་ཆོས་ཕྲེང་སར་འགྲོ་གྲུབ་བྱེད་ཀྱིན་ཡོད་པས། རི་བོང་དེ་རླུང་འཚུབས་ཞིག་ཏུ་གྱུར་ནས་གཟུགས་མི་མངོན་པར་སྒྲ་སྐད་འདི་ཐོས། ཁྱོད་མི་མིན་གནས་ཀྱི་ཌཱཀྐི་མ། །ཆོས་སྟོང་ཉིད་རྟོགས་པའི་གདེངས་རེ་ཆེ། །ང་ཡུལ་ཀུན་ཉུལ་བའི་རྒྱལ་པོ་ཡིན།།ཁྱོད་གླག་ཚོལ་ཨེ་རྙེད་བལྟ་རུ་འོང་། །འཕྲུལ་ཡ་མ་ཟུང་གི་ལྟས་ངན་བསྟན། །ཁྱེད་སྒྱུ་མའི་སྣང་བ་སླུ་མ་ནུས། །གང་སྣང་དང་གང་ བྃ༔ ཤར་གདམས་པར་མཐོང་། །དེ་ངོ་མཚར་ཆེའོ་བཟོད་པར་གསོལ། །ཞེས་ཐོས་པས། བདག་གི་བསམ་པ་ལ། དེ་ཐེའུའི་རྒྱལ་པོའི་ཆོ་འཕྲུལ་ཞིག་ཨེ་ཡིན་སྙམ་ཡང་། དམ་ལ་འདོགས་ལོང་མ་བྱུང་ནས་ཁོ་རང་གནས་ལ་བུད་ཐལ། རང་ཡང་ཤིང་ཐུ་རུ་སོང་བས། ཆོས་ཕྲེང་ན་རེ། ཁྱོད་ཀྱི་སྐལ་བའི་ཤིང་ང་རང་གིས་ཐུས་ཡོད་ཟེར། ཡང་བདག་གིས་ཤིང་ཐུ་མ་དགོས་ན་འུ་ཅག་གཉིས་བསྲེ་ལུང་བྲག་དཀར་ཡོད་པ་དེ་ཀར་ཨེ་འགྲོ་སྨྲས་ཚེ། མོ་ན་རེ། འགྲོ་དང་ཆོག་གི །གནས་དེ་ཀ་སྔར་མགར་ར་བླ་མས་ཀྱང་ཁོང་གི་གཏེར་གནས་ཞིག་ཡིན་གསུངས་པ་ཐོས་མྱོང་ཟེར། དེཀར་ངེད་གཉིས་སོང་བའི་ལམ་ཁ་ན་སྐྱ་སྐོརགྱི་མི་ཞིག་དགོན་ནང་ལ་སོང་སྟེ་ཡར་འོང་བ་དང་འཕྲད་པས། མི་དེའི་ཡ་ཁ་ཤི་འདུག །མིང་ལ་དོན་རྣམ་ཟེར་བ་ཞིག་