Tibetan
པས་ཏིང་འཛིན་གསོས་སུ་གྱུར །དེ་ཕྱིར་དུས་ཀུན་དྲན་ཤེས་བག་ཡོད་མཛོད། །དེ་ལྟར་དུག་ལྔ་མེ་འབར་མདོ་ཤོར་མས །སྙིང་ནས་སེམས་དཀར་ཉེ་འཁོར་མིང་སྲིང་ལ། །བརྗེད་ཐོའི་ཚུལ་དུ་སེར་དགོན་དབེན་ཁྲོད་དུ། །སྙོམས་ལས་ངང་ནས་སྤེལ་བ་དགེ་གྱུར་ཅིག །འདི་བཞིན་སེམས་ལ་བཟུང་ནས་ཉམས་སུ་ལོངས །ཡ་ཡ་གོ་གོ་གློ་བ་བཙོས་པ་འདྲ། །དེ་ལ་དོན་འབྲས་མེད་པ་མཐོང་ཆོས་གསལ། །དེ་ཕྱིར་གོ་དོན་རྒྱུད་ལ་ལེན་ངོས་རེ། །མ་འཆུག་ཨ་མའི་སེམས་རྟེན་མིང་སྲིང་ཚོགས། །འདི་ཕྱི་བར་གསུམ་འབྲལ་མེད་དཔལ་སྤྱོད་ནས། །ཕ་གཅིག་ལས་འབྲེལ་རྩལ་དང་དབྱེར་མེད་ཤོག །ཅེས་སུ་ཁ་བཛྲ་གྱིས་ མིང་སྲིང་རྣམས་ལ་འཁྲུལ་གཏམ་བྲིས་པའོ།། དགེའོ།། །། རྒྱལ་ཀུན་འདུས་ཞལ་གཏེར་ཆེན་ཆོས་ཀྱི་རྗེ །འཁོར་ལོའི་མགོན་པོ་པདྨ་ལས་འབྲེལ་རྩལ །འབྲལ་མེད་བདེ་ཆེན འཁོར་ལོའི་རྒྱན་དུ་བཞུགས །བདག་རྒྱུད་སྨིན་གྲོལ་བྱིན་གྱིས་བརླབ་ཏུ་གསོལ། །ཨེ་མ་གསོན་དང་རྡོ་རྗེའི་སྤུན་གྲོགས་ལགས །ཀ་དག་རིག་པ་བསམ་བརྗོད་ཡུལ་ལས་འདས། །ཁ་དོག་མ་ངེས་ལྷུན་གྲུབ་རང་ངོར་རྫོགས །ག་ལེར་ཁྲེགས་ཐོད་འོད་གསལ་ཉམས་བླང་ན །ང་བདག་ཁམས་གསུམ་སྐུ་གསུམ་དབྱིངས་སུ་གྲོལ། །ཅ་ཅོའི་ཚིག་གི་སྦུན་པ་དང་བྲལ་བའི། ། ཆ་ལུགས་སྐུ་དང་ཡེ་ཤེས་རོལ་པར་ཤར །ཇ་སོགས་འདོད་ཡོན་ཟག་མེད་བཅུད་རོལ་ན། །ཉ་རྒྱས་ཟླ་བའི་མདངས་བཞིན་རྒྱན་དུ་ཆེ། །ཏ་ཐ་ག་ཏའི་སྙིང་པོ་འོད་གསལ་ལམ །ཐ་མལ་མ་བཅོས་བཞི་ལྡན་ངང་དུ་ཞོག །ད་ནི་རང་རིག་འགྱུར་མེད་བཙན་ས་ཟུངས། །ན་མོ་དད་བརྒྱའི་རང་སྣང་སྟོན་པའི་ཞལ །པ་སངས་ལྟར་དཀར་ཇི་བཞིན་གཉིས་མེད་མཇལ། །ཕ་རོལ་ཕྱིན་བཅུའི་ཡོན་ཏན་ངང་རྫོགས་ནས །བ་གམ་ལྟ་བུའི་ཆོས་སྐུའི་རྒྱལ་ས་རུ །མ་བཅོས་ལྕང་ལོའི་ཟར་བུ་འཁྲོལ་བཞིན་དུ། །ཙ་རི་ཏྲ་སོགས་གནས་ཞིང་ཌཱ་ཀྐི་ཡིས །ཚ་བུ་བུ་སྡུག་བཞིན་དུ ༄༅། །མདུན་བསུས་ནས། །ཛ་བའི་གྲོགས་བཅས་དཔལ་རི་པདྨའི་དྲུང་། །ཝ་ལེར་ཌཱ་ཀྐིའི་དར་ལམ་ལ་ཞུགས་ནས། །ཞྭ་གོས་ལ་སོགས་འཁྲུལ་སྣང་རང་དག སྟེ། །ཟ་འོག་པཉྩ་ལི་ཀའི་འཕྲུལ་ལྡན་ཅིང་། །འ་འུར་རོལ་མོའི་སྒྲ་དང་བཤུགས་པའི་གླུ། །ཡ་རབས་དཔའ་བོ་རྣལ་འབྱོར་རྒྱན་ཆས་སྤྲས། །ར་མེ་ཤྭ་རིའི་གནས་སོགས་ཞིང་ལྔར་སྤྱོད། །ལ་མོར་གདུལ་བྱའི་མོས་ངོར་གར་བསྒྱུར་ནས །ཤ་ཟ་མི་བསྲུན་འདུལ་བའི་ཐུགས་བསྐྱེད་མཛོད །ས་ཐོབ་སེམས་དཔའི་མཛད་སྤྱོད་ཨེ་མ་ཧོ། ཧ་ཧ་སྤྲང་མོ་སྨྱོན་མའི་རྫུན་ཚིག འདི། །ཨ་མཚར་བརྡ་སྤྲོད་ཡི་གེའི་ལམ་ནས་བྲིས། །ངེས་མེད་ངེས་པའི་གཏམ་འདི་གསང་རྒྱ་མཛོད། །དེ་སྐད་མཆེད་གྲོགས་དམ་པ་གང་དེ་ཡིས །བསྐུལ་བ་ཟབ་ཕྱིར་བཟློག་ཏུ་མ་ནུས་པར། །དུས་ཀུན་ཞལ་རྫུན་མཁན་པོ་སྙོམས་ལས་པ། །སུ་ཁ་བཛྲ་རྩལ་གྱིས་བྲིས་པའོ།། དགེའོ།། །། རྒྱལ་ཀུན་ཡོངས་འདུས་འཁོར་ལོའི་མགོན་པོ་མཆོག །གཏན་གྱི་སྐྱབས་གནས་པདྨ་ལས་འབྲེལ་རྩལ །བྱང་ཆུབ་བར་དུ་རིགས་ཀྱི་བདག་པོར་བཞུགས། །བདག་རྒྱུད་ཆོས་དང་འདྲེས་པར་བྱིན་གྱིས་རློབས། །གསོན་དང་མཁྱེན་ཡངས་བློ་གྲོས་ཅན། །ཆོས་ ཐེག་པའི་འཇུག་ཚུལ་གཞུང་ལུགས་སོགས། །འདོད་ལུགས་གྲུབ་མཐའ་བསམ་མི་ཁྱབ། བློ་རྨོངས་མིག་ལོང་བདག་འདྲ་ཡིས །ལེགས་བཤད་བརྗོད་དོན་ཅིའི་ཕྱིར་ཤེས །འོན་ཀྱང་སྔོན་སྨོན་བསོད་ནམས་ཀྱིས། །བརྒྱུད་ལྡན་རིག་འཛིན་བླ་མར་མཇལ །ཐུགས་རྗེའི་བྱིན་རླབས་འོད་ཟེར་གྱིས། །བདག་བློའི་མུན་པ་ཀུན་བསལ་ནས །ཤིན་ཏུ་ཟབ་གསང་ངེས་དོན་ལམ། །ཚེ་གཅིག་སངས་རྒྱས་མངོན་བྱེད་ཐབས། །ཅུང་ཞིག་བདག་གིས་ཐོས་པ་ལས། །ཡེ་གྲོལ་དགོངས་པའི་གནད་གསང་གི །བོགས་འདོན་གསལ་འདེབས་ཅུང་ཞིག་ཞུ། །གཞི་དབྱིངས་འོད་གསལ་འགྱུར་བ་མེད། །རང་བྱུང་རིག་པ་ཆོས་ཀྱི་སྐུ། །གཉིས་འཛིན་རྟོག་པའི་བློ་ལས་འདས། །སེམས་དང་སེམས་བྱུང་ཀུན་རྟོག་ཀུན། །ཡེ་གྲོལ་མཉམ་ཉིད་གཞི་རུ་སངས། །སྐུ་དང་ཡེ་ཤེས་བུམ་སྐུར་རྫོགས །བླ་མ་སངས་རྒྱས་དངོས་མཐོང་གིས། །མོས་གུས་ཟབ་མོ་ལ་བརྟེན་ནས །གསལ་སྟོང་རིག་པའི་རང་ངོ་འཕྲོད། །ཚིག་དང་དཔེ་ལ་མ ལྟོས་པར། །རང་གནས་ཡེ་ཤེས་མངོན་དུ་གྱུར། །ཕར་ཕྱིན་ཐེག་པའི་གནས་སྐབས་ལྟར། །བསོད་ནམས་ཡེ་ཤེས་ཚོགས་གཉིས་ཀྱིས །འཇུག་པ་ཐ་དད་མ་གྲུབ་པར། །གཞིར་གནས ༄༅། །རིག་པ་སྐུ་གསུམ་ངང་།གདོད་ནས་རྣམ་དག་ཆོས་ཀྱི་སྐུ། །མངོན་གྱུར་ཀུན་བཟང་རྒྱལ་ས་རུ། །སྐད་ཅིག་ཕྱིན་པ་འབྲས་བུའི་གནད། །སེམས་ལུང་རྒྱུ་ལས མ་བྱུང་བའི། །གནད་གསུམ་འདུས་པ་གཞིའི་ཁྱད་ཆོས། །ཡེ་གཞི་འགྱུར་མེད་ནམ་མཁའ་ལྟར། །ཟང་ཐལ་སྤྲོས་བྲལ་སང་ངེ་བ། །ཉི་འོད་ཇི་བཞིན་མ་རིག་བྲལ། །སྒྲིབ་མེད་འོད གསལ་ས་ལེ་བ། །མེ་ལོང་ལྟ་བུར་ཅིར་ཡང་འཆར། །དེར་འཛིན་བྲལ་བའི་ཝ་ལེ་བ། །དངུལ་ཆུ་ཇི་བཞིན་དྲི་མ་བྲལ། །ཡེ་ཤེས་རྗེན་པ་ཧྲིག་གེ་བ། །རང་བྱུང་མ་བཅོས་བཞི་ལྡན འདི། །ངང་གནས་རིག་པའི་ཁྱད་ཆོས་ལགས །དེ་ལྟར་ཀ་དག་གདོད་མའི་གཞིའི །ངོ་བོའི་ཆ་ལ་ལྡོག་པའི་ཚུལ །ཐ་དདཕྱེ་བའི་ཁྱད་པར་ལས། །དོན་ལ་རང་མཚན་ཡོད་མ་ཡིན། །རང་རིག་གཞི་མེད་རྩ་བྲལ་དེ། །མ་བཅོས་མ་བསྒྱུར་ཚིག་དང་བྲལ། །རྩོལ་སྒྲུབ་མི་དགོས་བློ་ལས་འདས །སྤྲོས་བྲལ་རྣམ་ཐར་གསུམ་དང་ལྡན། །ཆོས་ཉིད་བཟོ་མེད་ཡེ་སྟོང་ངང་། །འཁོར་འདས་མཉམ་ཉིད་ཆོས་སྐུར་རྫོགས །རང་ལ་རང་ཤར་ངོ་མཚར་ཆེ །འཛིན་མེད་རང་གྲོལ་ནམ་མཁའི་ངང་། །སྤང་བླང་བྱ་རྩོལ་ཀུན་ལས་འདས། །བསམ་དུ་མེད་པའི་ཚོགས ཆོས་ཉིད་ལ། །བསྒོམ་དུ་མེད་པའི་ཡེ་ཤེས་ཤར། །བརྗོད་དུ་མེད་པའི་དོན་མཐོང་ནས། །ཐོབ་ཏུ་མེད་པའི་འབྲས་བུ་རྙེད། །རྒྱ་མཚོ་ཆེ་ལས་ཆུ་བྲན་བཞིན། །ཀློང་ཆེན་གཞི་ལས་ཆོས ཀུན་སྤྲོས །གང་ཤར་ཤར་ཆུག་ཆོས་སྐུའི་རྩལ །གང་སྣང་སྣང་ཆུག་ཡེ་ཤེས་ངང་། །གང་ཡིན་ཡིན་ཆུག་རིག་པའི་བབས། །གང་བསམ་བསམ་ཆུག་འདུས་མ་བྱས། །ཐམས་ཅད་ཐམས་ཅད་ཡེ་ཤེས་ཆེ། །ཆོས་དབྱིངས་ངང་ལས་གཡོ་བ་མེད། །ཀུན་བཟང་དགོངས་པ་ཨེ་མ་ཧོ། །དེ་ལྟར་ཆོས་ཀྱི་སྙིང་པོ་མཆོག །རང་གིས་སེམས་ཀྱི་གསང་བ་འདི། །ཤེས་རབ་ཟབ་མོ་ཕུ་ཐག་ཆོད། །ཆོས་ཕུང་བརྒྱད་ཁྲི་བཞི་སྟོང་གི །བརྗོད་དོན་སྨྲ་མཁས་ལྡན་བྱས་ཀྱང་།རྟོགས་པར་བྱ་བ་མཐར་ཐུག་ནི། །རང་སེམས་ཐིག་ལེ་ཉག་གཅིག་གོ། །ཀུན་ཏུ་བཟང་དང་དབྱེར་མེད་པའི། །འབྲས་བུ་བླ་ན་མེད་པའོ། །དེ་ལྟར་གཞི་གནས་རིག་པའི་གནས་ཚུལ་རྣམས། །བརྗོད་དོན་སྨྲ་མཁས་ལེགས་བཤད་མེད་མོད་ཀྱང་། །བརྒྱུད་ལྡན་རིག་འཛིན་བླ་མའི་བཀའ་ལུང་བཞིན །མ་པང་བུ་འཇུག་ལྟ་བུའི་གནད་ཟབ་འདི། །ཆོས་རྒྱལ་ནམ་སྙིང་ཟུང་སྤྲུལ་རིགས་ལྡན་ལ །སྙིང་བཅུད་སྙིང་གཏམ་གསལ་འདེབས་ཚུལ་དུ་ནི། །ཇོ་མིན་ནག་མིན་ ༄༅། །ཆོས་མེད་སྤྲང་འཁྱམ་པ། །བདེ་ཆེན་བདེ་བའི་རྡོ་རྗེ་ཞལ་རྫུན་མཁན། །འཁྲུལ་ཞིག་གཏེར་མིང་འཛིན་པས་གང་ཤར་གྱི། །ངག་ཚབ་ཡི་གེའི་རིས་སུ་ལེགས་ཤར་བ། །སེར་དགོན་དགའ་བའི་ཚལ་ནས་བྲིས་པ་དགེ །འདིའི་མཐུས་གང་དེའི་ཐུགས་དམ་གོང་འཕེལ་ཞིང་། །ཚེ་ལུས་འདི་རུ་རྣམ་གྲོལ་དཔལ་ཐོབ་ནས། །དོན་གཉིས་མཛད་པ་ལྷུན་གྱིས་གྲུབ་པར་ཤོག །ཅེས་ཟླ༦ཚེས་༡ཉིན་སེར་དགོན་དབེན་ཁྲོད་ནས་སུ་ཁ་བཛྲ་གྱིས་དར་བཅས་གུས་ཕུལ།། རང་རིག་དོན་སྟོན་གཏན་གྱི་སྐྱབས་མགོན་རྗེ །རང་བྱུང་ཀུན་བཟང་པདྨ་ལས་འབྲེལ་ལ། །རང་སེམས་མ་བཅོས་དད་པས་གུས་ཕྱག་འཚལ། །རང་བྱུང་ཡེ་ཤེས་རྟོགས་པར་བྱིན་གྱིས་རློབས། །ཨེ་མ་གསོན་དང་རྡོ་རྗེའི་སྤུན་གྲོགས་ལགས། །ཕྱི་ཚུལ་བཙུན་ལུགས་འདུལ་བའི་གཞུང་བཞིན་མཛོད། །འགྲོ་བའི་དང་བ་འདྲེན་ཅིང་བསྟན་པའི་རྒྱན། །ནང་ཚུལ་ཆོས་སྤྱོད་མདོ་སྡེ་ཉིད་ལྟར་མཛོད། །མདོ་སྔགས་ཆོས་ཀྱི་གཞི་ཚུགས་གཞུང་ལུགས་མཁྱེན། གསང་ཚུལ་བསྐྱེད་དང་རྫོགས་པའི་རིམ་པར་བརྩོན །གྲུབ་པ་མངོན་གྱུར་གང་འདོད་དངོས་གྲུབ་ཐོབ །བསླབ་སྦྱང་སྒྲོ་འདོགས་མངོན་པའི་གཞུང་ལྟར་མཛོད། །ས་ལམ་ཐེ་ཚོམ་མེད་པར་ བགྲོད་པ་ཡིས། །དོན་གཉིས་མཛད་པ་ངང་གིས་འགྲུབ་པ་འབྱུང་། །གནས་མཆོག་གང་བདེ་དབེན་པའི་རི་ངོགས་བདེ །ཉེ་འབྲེལ་འཁོར་བའི་ལྕགས་སྒྲོག་རྒྱང་ནས་སྤོངས །གཅིག པུར་དགེ་སྦྱོར་འགྲུབ་པའི་དགོས་པ་ཡོད། །གོས་ཀྱི་མཆོག་གྱུར་གཏུམ་མོའི་འོད་གསལ་སློབ །ཆགས་ཞེན་རྩ་བ་འཁྲུལ་པའི་གོས་སྤོང་དང་། །རླུང་སེམས་རང་དབང་འབྱོར་བའི་དགོས་པ་གདའ། །ཟས་ནི་སྔོ་སོགས་སློང་མོའི་ཁ་ཟས་བརྟེན། །དཀོར་ནག་ལོག་འཚོའི་ཟས་ངན་ཐབས་ཀྱིས་སྤོངས། །ཉམས་རྟོགས་འཕེལ་ཞིང་ཤེས་རབ་བློ་གྲོས་རྒྱས །གྲོགས་ཀྱི་མཆོག་གྱུར་རང་བྱུང་ཡེ་ཤེས་འགྲོགས། །ཡུལ་དགོན་སྡིག་གྲོགས་འཁོར་བའི་སྣ་འདྲེན་སྤོངས། །བག་ཡངས་ངང་དུ་དོན་དམ་འོད་གསལ་མཇལ །ལྟ་བ་གཅིག་མཆོག་ཡེ་སྟོང་གནད་ལ་སློབ། །ལྟ་དང་བལྟ་བྱའི་གཉིས་འཛིན་ངང་གིས་གྲོལ། །བློ་འདས་འོད་གསལ་གཉུག་མའི་རང་ས་རྙེད །སྒོམ་པ་གཅིག་ཆོག་བསམ་བརྗོད་བྲལ་བར་ཞོག །གསལ་སྟོང་གཉིས་མེད་ཡེ་ཤེས་ཆེན་པོའི་ངང་། །འཁོར་འདས་ཐམས་ཅད་མཉམ་ཉིད་ཆོས་སྐུར་གྲོལ །སྤྱོད་པ་གཅིག་ཆོག་སྤང་བླང་མེད་པར་ཞོག །གང་སྣང་གང་ཤར་ཡེ་ཤེས་རོལ་པ་སྟེ། །གྲོལ་ལུགས་བཞི་ཡི་དགོངས་པའི་ ༄༅། །བཙན་ས་ཟིན། །འབྲས་བུ་གཅིག་ཆོག་རིག་དབྱིངས་སྤང་ཐོབ་བྲལ། །རང་བྱུང་ཡེ་ཤེས་སྐུ་གསུམ་དག་མཉམ་ཆེ། །བློ་འདས་ཡེ་གྲོལ་དགོངས་པ་འཕོ་འགྱུར མེད། །རྣམ་ཐར་གསུམ་ལྡན་རང་རིག་ཆོས་ཀྱི་སྐུ །རྩོལ་བྲལ་དོན་གྱི་འབྲས་བུ་བླ་ན་མེད། །འཁོར་འདས་གཉིས་མེད་འོད་གསལ་ཀློང་དུ་ཆུབ། །སངས་རྒྱས་ཀུན་ཏུ་བཟང་པོ་ཨེ་མ་ཧོ། །དེ་ལྟར་ཚེ་འདིར་སངས་རྒྱས་ཐོབ་པའི་ཕྱིར། །མཚན་ལྡན་བླ་མ་འབྲལ་མེད་ཚུལ་བཞིན་བསྟེན །ཅི་གསུངས་བཀའ་སྒྲུབ་དམ་ཚིག་སྲོག་ལྟར་བསྲུང་། །ཆོས་མ་ཡིན་པའི་བསམ་སྤྱོད་ཐབས་ཀྱིས་སྤོངས། །བློ་སྣ་རྩེ་གཅིག་བླ་མ་ཉིད་ལ་གཏོད། །བསླབ་བྱ་དྲང་པོར་བསླབ་མཁན་བླ་མ་ཡིན །ཉམས་ལེན་རྩེ་གཅིག་དབེན་པའི་རི་ལ་མཛོད །ཚེ་སྒྲུབ་མཐར་ཕྱིན་དོན གཉིས་ལྷུན་གྲུབ་འབྱུང་། །དེ་སྐད་མཆེད་གྲོགས་པྲ་ཝ་བཛྲ་གྱིས། །ཞལ་གདམས་དགོས་ཞེས་བསྐུལ་ལྕག་བྲབ་པ་ན། །བཟློག་ཏུ་མ་ནུས་དུས་ཀུན་འཁྲུལ་འབྱམས་པ །ཀུན་བཟང་བདེ་སྐྱོང་ཆོས་ཉིད་དབང་མོ་ཡིས། །བླ་མའིགདན་ས་སེར་དགོན་དབེན་ཁྲོད་ནས །གང་ཤར་ཡིག་རིས་བྲིས་པ་དགེ་ལེགས་འཕེལ།། དགེའོ།། །། ཀྱེ་མ་ཀྱེ་ཧུད་རྒྱལ་ཀུན་ངོ་བོ་ ཉིད། །འཁོར་ལོའི་མགོན་པོ་པདྨ་ལས་འབྲེལ་རྩལ། །ཐུགས་རྗེ་མི་མངོན་དབྱིངས་ནས་བདག་ལ་གཟིགས །བྱང་ཆུབ་བར་དུ་འབྲལ་མེད་ཐུགས་རྗེས་ཟུངས། །སྔོན་སྨོན་གཏད་རྒྱ་བཟང་པོའི་མཐུ་བཙན་པས། །སྐྱེ་ཕྲེང་དུ་མར་ཐབས་ཤེས་འདུ་འབྲལ་མེད། །ཅེས་གསུང་རྡོ་རྗེའི་ལུང་གིས་ཡང་ཡང་བསྔགས། །འོན་ཀྱང་ད་ལན་ལས་རླུང་སྟོབས་ཤུགས་ཀྱིས། །རྗེ་ཁྱེད་མཐོང་ཐོས་མེད་པར་དབྱིངས་སུ་ཡིབས །འདུ་འབྲལ་ཞེས་པ་དེ་ལས་ལྷག་པ་མེད། །བདག་ནི་ཁྱེད་ལས་རེ་ས་གཞན་ན་མེད། །དཀར་ནག་ཁྱུད་འཁོར་བར་དུ་གསོལ་བ་འདེབས། །དེ་ཚེ་སྙིང་རྗེའི་ཡུལ་གྱུར་དམན་པ་བདག །བརྩེ་ཆེན་ཤུགས་ཀྱིས་ཡལ་བར་མ་དོར་བར། །དུས་ཀུན་འབྲལ་མེད་དགྱེས་པའི་དངོས་ཞལ་སྟོན །སྐྱེ་བ་འདི་ནས་ཚེ་རབས་ཐམས་ཅད་དུ། དཔལ་མགོན་བླ་མ་ཁྱོད་དང་མི་འབྲལ་ཞིང་། །བར་ཆད་བདུད་བགེགས་རྐྱེན་གྱིས་མི་བརྫི་བར། །ཐབས་ཤེས་སྤྱོད་པ་རྒྱ་མཚོ་མཐའ་རུ་ཕྱིན། །ཕྲིན་ལས་རྒྱ་ཆེའི་ཟབ་ཆོས་སྒོ་འཕར་འབྱེད། །ཁམས་གསུམ་འཁོར་བའི་གནས་ངན་རབ་སྟོངས་ནས །ཟུང་འཇུག་རིག་སྐུ་མངོན་གྱུར་གདོད་མའི་དབྱིངས །གཞོན་ནུ་བུམ་སྐུར་མངོན་པར་སངས་རྒྱས་ཤོག །བདེ་བའི་རྡོ་ ༄༅། །རྗེས་སྨྱོ་གཏམ་སྨྲེ་སྔགས་འདི། །ཤཱི་ལ་བཛྲའི་ཐོས་བྱེད་དབང་སྒོར་ཕུལ།། དགེའོ།། །། ཕ་དུས་གསུམ་སངས་རྒྱས་ལས་འབྲེལ་རྩལ །སྤྲང་ལས་ངན་བདག་ལ་ཐུགས་རྗེས་གཟིགས །སྙིང་རྗེ་བའི་བདེ་བའི་རྡོ་རྗེ་ང་།མགོན་ཁྱེད་དང་འབྲལ་ནས་གཅིག་པུར་ལུས །དམ་ལྡན་པ་འགའ་རེ་མ་གཏོགས་པ། །མི་ཀུན་གྱིས་དགྲ་བཞིན་མིག་ལ་གཟན། །བདག་ཡུལ་ཕུད་རྗེས་གཅོད་ས་མཐར་སྤྱུགས །སྡུག་མ་བཟོད་རང་སྲོག་བཅད་ལ་ཉེ། །འོན་ཀྱང་ནི་དམ་ལྡན་བུ་སློབ་དང་། །སྙིང་བརྩེ་བ་ཤཱི་ལ་བཛྲ་ལ །ཡིད་འཕྲེང་ནས་འདིར་སྣང་འདུག་ཐབས་བསམ། །ཁོང་ཕ་མིང་བཙན་པོའི་སྟོབས་ཤུགས་ཀྱིས། །ད་དབྱེ་བྲལ་དགོས་པ་ངེས་པའི་ཚིག །སླར་བསམ་ཞིང་བསམ་ན་སྐྱོ་བ་སྐྱེས །མགོན་དུས་གསུམ་སངས་རྒྱས་ཞིང་དུ་བྱོན །བདག་བསོད་ནམས་དམན་པའི་ལས་དབང་བསམ། །བུ་གཅིག་པུ་ཕྱི་མའི་ཡུལ་དུ་སོང་། །དེ་མི་རྟག་འཆི་བའི་ཡོ་ལང་བསམ། །ད་མ་ཤི་གསོན་བྲལ་བྱེད་དགོས་ཏེ། །ལས་ཇི་ལྟར་བྱས་པའི་རྣམ་སྨིན་བསམ། །སྐྱབས་མཆོག་གསུམ་བདེན་པའི་བྱིན་རླབས་དང་། །ཕ་བཀའ་དྲིན་ཅན་གྱི་ཐུགས་རྗེ་ཡིས །བདག་སྡུག་བསྔལ་ཀུན་ལས བསྐྱབ་ཏུ་སོལ། །ལས་ངན་པའི་ལུས་འདི་མྱུར་བོར་ནས །མགོན་དུས་གསུམ་སངས་རྒྱས་འགྲོ་བའི་མགོན །ཕ་པདྨ་ལས་འབྲེལ་ཞབས་དྲུང་དུ། །འཁོར་ཀུན་གྱི་ཐོག་མར་བདག་སྐྱེས ནས། །མ་འགྲོ་བའི་དོན་ཆེན་འགྲུབ་པར་ཤོག །ཅེས་པའང་གཞན་རྐྱེན་ཞིག་ལ་རྒྱུ་བྱས་ནས་ཡིད་ཤིན་ཏུ་སྐྱོ་བ་ལ་ཐབས་བྲལ་བའི་སྐབས་བླ་མ་ལ་འོ་དོད་འབོད་པས་ད་ནི་ཅི་ལ་བསམ་ཡང་འདུག་ཐབས་དང་བྲལ་སྙམ་ནས་སྙིང་མེད་སྤྲང་མོའི་སྨྱོ་གཏམ་མོ། དགེའོ།། །། ཧེ་ཧེ། བླ་མ་ནི་དུས་གསུམ་སངས་རྒྱས། །བྱིན་རླབས་ལ་རྒྱུན་ཆད་མེད་དོ། །གདམས་ངག་ནི་འོད་གསལ་ལྷུན་གྲུབ །རིག་པ་ལ་སྐྱེ་འགགས་མེད་དོ། །གྲོགས་པོ་ནི་མ་དང་མཁའ་འགྲོ། །བརྩེ་གདུང་ལ་རྒྱུན་ཆད་མེད་དོ། །བུ་ཆུང་ནི་རིག་པའི་ཡེ་ཤེས། །འདུ་འབྲལ་ནི་ཡོད་པ་མ་ཡིན། །གང་ཤར་ནི་སེམས་ཀྱི་རྩལ་སྣང་།རྩིས་གདབ་དང་ཉེར་ལེན་མ་བྱེད། །བསམ་བརྗོད་དངབྲལ་བར་ཞོག་དང་།གང་སྣང་དེ་རང་སར་གྲོལ་འགྲོ། །མ་བཅོས་ན་རྣལ་འབྱོར་བདེའོ། །ཅེས་འདི་སྐབས་ཤེས་རབ་དབང་མོས་བདེ་བའི་རྡོ་རྗེ་ལ་གདམས་པའོ། དགེའོ།། །། ཀྱེ་མ་དུས་གསུམ་རྒྱལ་བའི་སྤྱི་གཟུགས་པད་འབྱུང་དང་མཚོ་རྒྱལ །མི་ ༄༅། །མངོན་དག་པའི་ཞིང་ནས་ཐུགས་རྗེས་ཀྱང་གཟིགས་མཛོད། །མགོན་མེད་ཉམ་ཐག་བདག་གི་གནས་ཚུལ་ལ་བསམ་ནས། །གཅེས་པའི་ལུས་སྲོག་དོར་ཀྱང་འགྱོད པ་ནི་མི་འདུག །དུས་གསུམ་སངས་རྒྱས་ལས་ལྷག་དྲིན་ཅན་གྱི་བླ་མ། །མི་སྣང་དཔལ་རི་པདྨ་འོད་དུ་ནི་ཡིབས་སོང་། །མ་མས་གཅེས་པར་བསྐྱང་བའི་སེམས་རྟེན་གྱི་བུ་ཕྲུག །སྙིང་རྗེ་མེད་པ་ངམ་ནག་གཤིན་རྗེ་ཡིས་ཁྲིད་སོང་། །འདུས་པའི་བུ་སློབ་འཁོར་འབངས་སྐར་ཚོགས་ལྟར་མང་ཡང་། །རང་ཉིད་གཅིག་པུར་གྲོགས་མེད་ས་མཐའ་ལ་སྤྱགས་བྱུང་།ལུས་ནད་སེམས་ཀྱི་སྡུག་བསྔལ་བཟོད་བླག་ནི་མེད་པས། །ཕ་གཅིག་པདྨ་ལས་འབྲེལ་མི་མངོན་ནས་གཟིགས་མཛོད། །སྔ་སོར་ཐུགས་བརྩེས་བསྐྱང་བའི་རིགས་ལྡན་གྱི་མི་མོ། །ད་ནི་ཁྱོད་ཀྱིས་དོར་ནས་ཡུལ་མེད་དུ་འཁྱར་འདུག །ཕ་གཅིག་བླ་མའི་ཟབ་གཏེར་འཛིན་སྐྱོང་ནི་ཕར་ཞོག །ལས་ངན་བདག་གི་ལུས་ངན་སྡུག་བསྔལ་གྱི་བསྣོན་མ །ཚེ་གང་འགྲོགས་བསམ་གཏན་གྲོགས་ཡིད་བཞིན་གྱི་ནོར་བུ། །བྱམས་བརྩེའི་ཐུགས་ཀྱིས་བསྐྱངས་ནས་གཅེས་པ་རུ་བཟུང་སྟེ། །ཟབ་དོན་གདམས་པའི་མན་ངག་གབ་སྦས་ནི་མི་མཛད །དེ་སོགས་ཕྱི་ནང་གསང་བའི་ཡོན་ཏན་རྣམས དྲན་ཚེ། །སེམས་སྣང་སྡུག་གི་བསྣོན་པ་སྲོག་གཅོད་ཀྱི་གཤེད་མ། །སྟོང་གསུམ་འདི་ན་ང་ལས་སྡུག་པ་ནི་སུ་ཡོད། །རྗེ་བཙུན་ཡིད་བཞིན་ནོར་བུའི་ཐུགས་རྗེས་རང་གཟིགས་མཛོད། ། སྒོམ་སྒྲུབ་བླ་མར་གསོལ་འདེབས་བྱེད་པ་ནི་ཕར་ཞོག །སེམས་སྡུག་ལུས་ཀྱི་ན་ཚ་འཚོ་སྐྱོང་རང་བྱེད་འདུག །ཟབ་གཏེར་འཛིན་སྐྱོང་འཁོར་སློབ་འདུ་བ་ནི་ཕར་ཞོག །ཀུན་གྱིས་མོ་ཁར་དོགས ནས་དུག་བཞིན་དུ་སྤངས་སོང་། །བླ་མའི་གདན་སར་སྒྲུབ་ཚུགས་ཟིན་པ་ནི་ཕར་ཞོག །ཀུན་གྱི་མིག་གི་ཚེར་མ་ལྟ་བུ་རུ་མཐོང་ནས། །ཉེས་ཅན་མི་བཞིན་བདག་མེད་ཡུལ་མེད་དུ་སྤྱགས་བྱུང་། །འཁོར་སློབ་འབངས་ཀྱི་སྐྱོགྲོགས་བྱེད་རོག་ནི་ཕར་ཞོག །རང་མགོའི་ཁང་བསལ་རང་ལམ་བདེ་མོ་རང་བྱེད་འདུག །གྲོགས་མེད་མགོན་སྐྱབས་མེད་པའི་ཉམ་ཐག་གི་བུ་མོ། སྡུག་བསྔལ་ཁུར་གྱིས་ནོན་ནས་སྒྱིད་ལུགས་སུ་ཉལ་ཡོད། །ང་ཡི་གནས་ཚུལ་མང་ན་སྡུག་བསྔལ་གྱི་གསོས་འདེབས། །མདོ་ཙམ་སེམས་གཏིང་སྙིང་རླུང་གཡོ་བ་ཡི་སྟོབས་ཀྱིས། །མ་མས་སེར་དགོན་དབེན་རིའི་གཡས་ཟུར་གྱི་ཤོད་ནས །བརྩེ་བའི་སྙིང་གི་བུ་ལ་གླུ་ཆུང་འདི་ཤོར་ཐལ །དེ་མིན་ཟེར་ཚོད་མེད་ཀི་ཨ་བ་རི །བུ་གཅིག་ཤཱི་ལ་བཛྲ་ལ །མ་གཅིག་སུ་ཁ་བཛྲ་ ༄༅། །གྱིས། །གནས་ཚུལ་སྦ་གསང་མེད་པ་འདི། །ཡི་ཆད་བྱུང་ནས་ཕུལ་བའོ།། རང་རིག་ཀ་ནས་དག་པ་ཆོས་ཀྱི་སྐུ། །རང་བྱུང་ལྷུན་གྲུབ་ཡེ་གདངས་ལོངས སྤྱོད་རྫོགས། །རང་གྲོལ་མ་བཅོས་གང་སྣང་སྤྲུལ་པའི་སྐུ། །རང་སྣང་སྟོན་པ་ངོ་བོ་ཉིད་ཀྱི་སྐུ། །པདྨ་ལས་འབྲེལ་ཡང་ཡང་དད་ཅིང་དྲན། །དུས་ཀུན་རིགས་ཀྱི་བདག་པོར་རྟག་བཞུགས གསོལ། །ཀྱེ་མ་ཀྱི་ཧུད་འདུས་བྱས་འཁོར་བའི་ཆོས། །བསམ་ཞིང་བསམ་ན་སྐྱོ་བ་གཏིང་ནས་སྐྱེས། །སྙིང་གི་དྭངས་མ་པདྨ་འོད་དུ་ཡིབས། །སྙིང་གི་བུ་གཅིག་འཇིག་རྟེན་ཕ་རོལ་སོང་། །སྙིང་རྗེའི་ཡུལ་གྱུར་བདག་ཉིད་ཤུལ་དུ་བོར། །སྙིང་ནས་ངེས་མེད་རྒྱལ་ཁམས་འགྲིམ་བསམ་ཡང་། །རང་སེམས་དམ་བཅའ་ཟབ་ཆོས་འཛིན་སྐྱོང་དང་།རང་གཞན་དོན་གཉིས ལོ་ཤས་འདུག་ན་སྙམ། །རང་ཅག་རྣམས་ཀྱི་ལྷག་བསམ་རྣམ་དག་ཀྱང་།རང་ཡུལ་ཕྱོགས་ནས་ཁྱོད་ལ་བདག་པོ་ཡོང་། །ད་ནི་གང་ལ་བསམ་ཡང་ངལ་བའི་རྒྱུ །ད་རེས་སྔོན་ལས་དམན་པའི་སྟོབས་ཤུགས་ཀྱིས། །ད་ལན་འགྲོ་དོན་མི་ཡོང་ཁོ་ཐག་ཆོད། །ད་ནི་ཤཱི་ལ་བཛྲ་ཁྱོད་ཉིད་དང་། །ད་རེས་ངེས་པར་གསོན་བྲལ་བྱེད་དགོས་ཚེ །སེམས་སྡུག་མི་བཟོད་དོན་སྙིང ཕྱུངས་དང་མཚུངས། །སེམས་ལ་གང་དྲན་ཡིག་རིས་སུ་ཡིས་བྲི །སེམས་ཀྱི་འཁྲི་ཤིང་བུ་ཚབ་སུ་ཡི་བྱེད། །སེམས་སྣང་དག་པའི་ཞལ་གཟིགས་སུ་ལ་བཤད །ཅི་ལ་བསམ་ཡང་སྐྱོ་བ སྐྱེ་བའི་རྒྱུ། །ཅི་ལྟར་བྱས་ཀྱང་སྡུག་བསྔལ་རང་བཞིན་ཏེ། །ཅི་བསམ་ལམ་དུ་མི་འགྲོ་ངལ་བའི་རྒྱུ། །ཅི་བདེར་བསམ་པ་ཁོ་ཐག་བཅད་ནས་ནི། །དཔལ་རི་པདྨ་འོད་དུ་འགྲོ་སྙིང་འདོད། །པདྨའི་རྒྱལ་ཚབ་བདག་གི་མགོན་གཅིག་པུ །པདྨ་འགྲོ་འདུལ་གསང་སྔགས་གླིང་པ་དང་། །པདྨའི་སྨོན་ལམ་བཟང་པོ་མཐུ་ཆེ་བས།