Tibetan
བར་འཇུག་པའོ། ། གག་ཚིལ་བྱེད་པའི་ལྟུང་བྱེད་ནི། སྐྱི་གཡའ་བར་འདོད་པའི་བསམ་པས་དགེ་སློང་ལ་གཡའ་སྒོག་པའོ། ། ཆུ་ལ་རྩེ་བའི་ལྟུང་བྱེད་ནི། རྒོད་བག་གི་བསམ་པས་ཆུ་ལ་རྩེ་བར་བྱེད་པའོ། ། བུད་མེད་དང་ལྷན་ཅིག་ཏུ་ཉལ་བའི་ལྟུང་བྱེད་ནི། མཚམས་ནང་གཅིག་ཏུ་བུད་མེད་དང་ནུབ་གཅིག་ལྷན་དུ་གནས་པའོ། ། དངངས་པར་བྱེད་པའི་ལྟུང་བྱེད་ནི། དགེ་སློང་ལ་ཐོ་མཚམས་པའི་བསམ་པས་འཇིགས་པ་སྣ་ཚོགས་སྟོན་པའོ།། སྦེད་པའི་ལྟུང་བྱེད་ནི། ཐོ་མཚམས་པའི་བསམ་པས་དགེ་སློང་གི་གོས་ལྷུང་བཟེད་སོགས་ཡོ་བྱད་སྦེད་པའོ།། མ་བྱིན་པས་ཉེ་བར་འཚོ་བའི་ལྟུང་བྱེད་ནི། རང་གིས་བྱིན་པའམ་རང་དང་རྫས་མི་གཅིག་པའི་དགེ་སློང་གི་གོས་མ་བྱིན་པར་ལོངས་སྤྱོད་པའོ། ། སྐུར་པ་འདེབས་པའི་ལྟུང་བྱེད་ནི། མཐོང་ཐོས་དོགས་གསུམ་མེད་བཞིན་དུ་དགེ་སློང་ལ་བསམ་བཞིན་དུ་ལྷག་མའི་སྐུར་པ་འདེབས་པའོ། ། བུད་མེད་དང་ལྷན་ཅིག་ཏུ་ལམ་དུ་འགྲོ་བའི་ལྟུང་བྱེད་ནི། བུད་མེད་དང་ལྷན་ཅིག་ཏུ་རྒྱང་གྲགས་ལས་འདས་པར་ལམ་དུ་འགྲོ་བའོ། །ཉལ་བ་དང་འདི་རིགས་ལ་ཁྲིམས་གྲོགས་ཡོད་ན་ལྟུང་བ་མེད་དོ། ། ཙ༨ བཅུ་ཚན་བརྒྱད་པ་ནི། རྐུ་དང་བསྙེན་རྫོགས་ས་བརྐོ་གཉེར་ལས་རིང༌། ། འཇོག་ཉན་མི་སྨྲ་མ་གུས་ཆང་དུས་མིན། ། རྐུན་པོ་དང་ལྷན་ཅིག་ལམ་དུ་འགྲོ་བའི་ལྟུང་བྱེད་ནི། རྐུན་པོའམ་ཤོ་གམ་མ་བྱིན་པའི་མགྲོན་པོ་དང་ལྷན་ཅིག་ཏུ་རྒྱང་གྲགས་ལས་འདས་པར་འགྲོ་བའོ། ། ཉི་ཤུ་(༣༥བ)མ་ལོན་པར་བསྙེན་པར་རྫོགས་པའི་ལྟུང་བྱེད་ནི། བསྒྲུབ་བྱ་མངལ་ཤོལ་དང་བཅས་པའི་ལོ་ཉི་ཤུ་མ་ལོན་པར་ཤེས་བཞིན་དུ་བསྙེན་པར་རྫོགས་པའོ། ། རྐོ་བའི་ལྟུང་བྱེད་ནི། དགོས་པ་ཁྱད་པར་ཅན་མེད་པར་སྲ་ཞིང་འཐས་པ་ནས་ས་སྤར་བ་གང་ལོངས་པ་ཡན་ཆད་དུ་བརྐོས་པའོ། ། མགྲོན་དུ་གཉེར་བ་ལས་རིང་དུ་འདུག་པའི་ལྟུང་བྱེད་ནི། སྦྱིན་བདག་གིས་ཞག་གི་གྲངས་ཀྱིས་བསྙེན་བཀུར་བྱེད་པ་ན། དུས་ལས་འདས་པའི་བསྙེན་བཀུར་ལོངས་སྤྱོད་པ་དང༌། ཞག་གྲངས་མེད་ན་ཟླ་བ་བཞི་ལས་ལྷག་པར་ལོངས་སྤྱོད་པའོ། ། བསླབ་པ་ཉེ་བར་འཇོག་པ་སྤོང་བའི་ལྟུང་བྱེད་ནི། བསླབ་བྱ་ལ་སློབ་པའི་ཐབས་གཞན་གྱིས་བརྗོད་པ་ལ་ཁྱད་གསོད་བྱེད་པའོ། ། ཉན་རྣ་བྱེད་པའི་ལྟུང་བྱེད་ནི། ཕན་ཚུན་མི་མཐུན་པའི་བསམ་པས་གཞན་དག་གླེང་མོ་བྱེད་པ་ལ་ལྐོག་ཏུ་ཉན་པའོ། ། མི་སྨྲ་བར་འགྲོ་བའི་ལྟུང་བྱེད་ནི། གསོ་སྦྱོང་སོགས་ཀྱི་ལས་གྲལ་དུ་འཁོད་ནས་འདུན་པ་མ་ཕུལ་བར་གཞན་དུ་འགྲོ་བའོ། ། མ་གུས་པའི་ལྟུང་བྱེད་ནི། དགེ་འདུན་གྱིས་བསྐོས་པའི་ཆོས་ལྡན་གྱི་བྱ་བ་ལ་ཤད་སྦྱངས་མེད་པར་མ་གུས་པའི་ཚུལ་གྱིས་འདའ་བའོ། ། ཆང་འཐུང་བའི་ལྟུང་བྱེད་ནི། མྱོས་འགྱུར་གྱི་རིགས་འཐུང་བ་སྟེ། མྱོས་འགྱུར་ལ་བརྟེན་པའི་བག་མེད་པས་གཞན་མ་དད་པར་བྱེད་ནུས་ན་ལྟུང་བ་འདི་འབྱུང་ངོ༌། ། དུས་མིན་ཕྱི་དྲོ་གྲོང་དུ་འཇུག་པའི་ལྟུང་བྱེད་ནི། ཉེ་དུ་མ་ཡིན་པའི་ཁྱིམ་དུ་གུང་ཡོལ་ནས་སང་གི་སྐྱ་རེངས་མ་ཤར་གྱི་བར་དུ་གནས་པའོ། ། ཙ༩ བཅུ་ཚན་དགུ་པ་ནི། གྲོང་གཞན་རྒྱུ་དང་ནུབ་འགྲོ་ཁྱད་དུ་གསོད། ། ཁབ་རལ་ཁྲི་རྐང་ཤིང་བལ་གདིང་གཡན་དགབ། ། རས་ཆེན་ཆོས་གོས་ཚད་ལྷག་ལྟུང་བྱེད་སྡེ། ། གྲོང་དུ་རྒྱུ་བའི་ལྟུང་བྱེད་ནི། རང་གྲོང་གཞན་དུ་རྒྱུ་བ་ལ་བརྟེན་ནས། དགེ་འདུན་སྤྱིའི་གདུགས་ཚོད་དུས་ལས་ཡོལ་བའོ། ། རྒྱལ་པོའི་ཕོ་བྲང་དུ་ནུབ་མོ་འགྲོ་བའི་ལྟུང་བྱེད་ནི། མཚན་མོ་རྒྱལ་པོའི་བཙུན་མོ་དང་(༣༦ན)བཅས་པའི་ཕོ་བྲང་དུ་འདུག་པའོ། ། ཁྱད་དུ་གསོད་པའི་ལྟུང་བྱེད་ནི། གསོ་སྦྱོང་གི་མདོ་ཐོས་པའི་དུས་སུ་བསླབ་བྱའི་ཚིག་ལ་ཤེས་བཞིན་དུ་ཁྱད་དུ་གསོད་པའོ། ། ཁབ་རལ་བྱེད་པའི་ལྟུང་བྱེད་ནི། ཁྱིམ་པ་ཉེ་དུ་མ་ཡིན་པ་ལ་སྤུས་ནོམ་ཡོད་པའི་ཁབ་རལ་འཆོས་སུ་བཅུག་ནས་ལེན་པའོ། ། ཁྲི་རྐང་འཆོས་པའི་ལྟུང་བྱེད་ནི། ཁྲི་རྐང་ཁྲུ་གང་ལས་མཐོ་བ་འཆོས་པའོ། ། ཤིང་བལ་གྱིས་གོས་པར་བྱེད་པའི་ལྟུང་བྱེད་ནི། དགེ་འདུན་གྱི་ཁྲི་ལ་བསམ་བཞིན་དུ་ཤིང་བལ་གྱིས་གོས་པར་བྱེད་པའོ། ། གདིང་བ་ཚད་ལྷག་བྱེད་པའི་ལྟུང་བྱེད་ནི། གདིང་བ་སྲིད་དང་ཞེང་གི་ཚད་ལས་ལྷག་པ་འཆང་བའོ། ། གཡན་པ་དགབ་པ་ཚད་ལས་ལྷག་པའི་ལྟུང་བྱེད་དང༌། དབྱར་གྱི་གོས་རས་ཆེན་ཚད་ལས་ལྷག་པའི་ལྟུང་བྱེད་དང༌། ཆོས་གོས་ཚད་ལས་ལྷག་པའི་ལྟུང་བྱེད་གསུམ་སྟེ་དེ་དག་རྣམས་སོ། ། དེ་རྣམས་ནི་སྤྱད་ན་ངན་འགྲོར་ལྟུང་བར་བྱེད་ཅིང་སྤང་འབྲལ་སྔོན་དུ་གཏང་མི་དགོས་པར་བཤགས་པ་ཙམ་གྱིས་འདག་པས་འབའ་ཞིག་པའི་སྡེ་ཞེས་བྱའོ། ། བ༤ བཞི་པ་སོར་བཤགས་ཀྱི་སྡེ་ནི། མ་ཡི་ཟས་ལེན་མ་ཕེབ་བྲིམ་པ་ཟ། ། ཁྲིམས་དྲལ་གྲོང་འགྲོ་ནགས་མ་མྱུལ་བར་ཟ། ། སོར་བཤགས་སྡེ་ཡིན། ཅེས་པ་སྟེ། དགེ་སློང་མ་ཡི་ཟས་ལེན་པའི་སོར་བཤགས་ནི། གྲོང་དུ་དགེ་སློང་མ་ཉེ་དུ་མ་ཡིན་པས་རང་ཉིད་ཀྱི་བསོད་སྙོམས་སུ་བསླངས་པའི་ཟས་དགེ་སློང་གིས་སློང་བའོ། ། གྲལ་རིམ་དུ་མ་ཕེབ་པར་བྲིམ་དུ་འཇུག་པ་མ་བཟློག་པར་ཟ་བའི་སོར་བཤགས་ནི། དགེ་སློང་གསུམ་ཡན་ཆད་ཁྱིམ་པས་མགྲོན་དུ་བོས་ཏེ་བསྐོ་བཤམ་དགེ་སློང་མས་བྱས་པ་ན། དེས་ངོས་མགྲོན་གྱིས་གོང་མ་ནས་རིམ་བཞིན་བྲིམ་མི་འཇུག་པར་འོག་ཏུ་རང་ལ་བྲིམ་བྱུང་ན། གོང་མར་བྲིམས་ཤིག་ཟེར་བ་ལྟ་བུའི་ཚིག་གིས་མ་བཟློག་པར་བླངས་ཏེ་ཟོས་པའོ། ། བསླབ་པ་དྲལ་ཏེ་ཁྱིམ་དུ་འཇུག་པ་ནི། སྦྱིན་བདག་ཟས་ནོར་གྱིས་ཕོངས་པར་གྱུར་པ་ལ་ཁྱིམ་གྱི་བསླབ་པའི་སྡོམ་པ་སྦྱིན་པར་བྱ་སྟེ། དེའང་གསོལ་བའི་(༣༦བ)ལས་ཀྱིས་སྦྱིན་ནོ། །དེ་སླར་བག་ཡངས་དགོས་ནའང་ལས་ཀྱིས་བྱའོ། ། ཁྱིམ་གྱི་བསླབ་སྡོམ་དེ་བྱིན་ཟིན་ནས་དགེ་སློང་རྣམས་ཀྱིས་དེ་ལས་ཉུང་མ་སོགས་ལས་གཞན་པའི་བསོད་སྙོམས་མི་སློང་སྟེ་སློང་ན་ལྟུང་བ་འདིར་འགྱུར་རོ། ། ནགས་མ་མྱུལ་བར་ཟ་བའི་སོར་བཤགས་ནི། དགོན་པ་འཇིགས་པ་དང་བཅས་པའི་སར་ནགས་མྱུལ་བར་བསྐོས་པའི་དགེ་སློང་གིས་འཇིགས་པ་ཡོད་མེད་མ་ཉུལ་བར་ཀུན་དགའ་ར་བའི་ཕྱི་རོལ་ཏུ་རང་ཉིད་ཟས་ཟོས་པའོ། ། བཞི་པོ་དེ་ལྟུང་བ་དག་པར་བྱེད་པའི་ཚེ་སྨྲེ་སྔགས་འདོན་པའི་རྣམ་པར་བརྗོད་པས་སོ་སོར་བཤགས་དགོས་པས་དེ་སྐད་དུ་གྲགས་པ་ཡིན་ནོ། ། བ༥ ལྔ་པ་ཉེས་བྱས་ཀྱི་སྡེ་བརྒྱ་དང་བཅུ་གཉིས་ནི། གོས་བགོ་བ་ཡི་བཅུ། ། སྤྱོད་ཡུལ་ཉི་ཤུ་སྟན་ལ་འདུག་པའི་དགུ། ། ཟས་བརྒྱད་ཟ་ཚུལ་ཉེར་གཅིག་ལྷུང་བཟེད་ཀྱི། ། བཅུ་བཞི་ཆོས་བཤད་ཉེར་དྲུག་སྒྲུབ་ཚུལ་གསུམ། ། རྒྱུ་བ་གཅིག་སྟེ་ཉེས་བྱས་སྡེ་ཚན་རྣམས། ། བསྡོམས་པས་ཉིས་བརྒྱ་ལྔ་བཅུ་རྩ་གསུམ་མོ། ། འདིའི་ངོས་འཛིན་བརྗོད་བདེ་བའི་ཕྱིར་གོ་སླའི་ཚིགས་བཅད་དུ་བསྡེབ་པར་བྱ་སྟེ། དང་པོ་གོས་བགོ་བའི་སྡེ་བཅུ་ནི། ཤམ་ཐབས་མཐོ་དམན་མཉམ་པའི་ཟླུམ་པོར་བགོ། ། ཧ་ཅང་ཐུང་ནས་བརྩེངས་དང་རིང་ནས་འཇོལ། ། མས་སྣ་གླང་ཆེན་སྣ་ལྟར་ཕྱོགས་སུ་དཔྱངས། ། གོང་ནས་ཏཱ་ལའི་ལོ་མ་བཞིན་དུ་བལྟེབ། ། སྐ་རགས་བར་ནས་འཕུར་མ་བཞིན་དུ་འབུར། ། སྐ་རགས་གོང་དུ་སྦྲུལ་མགོའི་གདེངས་ཀ་ལྟར། ། མཐོ་དམན་ཅན་རྣམས་ནམ་ཡང་མི་བྱ་ཞིང༌། ། སྣམ་སྦྱར་བླ་གོས་དག་ཀྱང་ཟླུམ་པོར་བགོ། ། ཧ་ཅང་རིང་དང་ཐུང་བ་མིན་པ་འོ། ། གཉིས་པ་སྤྱོད་ཡུལ་འགྲོ་བ་ཉི་ཤུ་ནི། དྲན་དང་ཤེས་བཞིན་ལུས་ངག་ཡོངས་སུ་བསྡམ། ། གོས་ཚགས་ལེགས་པར་བགོ་ཞིང་ཅ་ཅོ་བསྐྱུང་། ། མིག་མི་གཡེང་ཞིང་གཉའ་ཤིང་གང་ཙམ་བལྟ། ། མགོ་བོ་མི་གཏུམས་ཤམ་ཐབས་བརྫེ་མི་བྱེད། ། བླ་གོས་ཕྲག་པ་གཉིས་ཀར་གཟར་བ་མིན། ། ལག་གཉིས་མདུན་ནས་གཉའ་(༣༧ན)བར་བསྣོལ་བ་དང༌། ། རྒྱབ་ནས་ལྟག་པར་བསྣོལ་ཏེ་འགྲོ་མི་བྱ། ། མཆོངས་དང་གོམ་རྒྱངས་རྐང་པའི་རྟིང་པ་དང༌། ། བྲང་བ་ཁོ་ན་བཙུགས་ནས་མི་འགྲོ་ཞིང༌། ། ལག་པ་དཀུར་བརྟེན་གྲུ་རྒྱངས་བཅས་མི་འགྲོ། ། ལུས་ཉིད་ཀྱོག་པོར་མི་བསྒྱུར་ལག་མི་གཡོབ། ། མགོ་བོ་མི་བསྒྱུར་གཞན་དང་ཕྲག་མི་སྤྲད། ། ཕན་ཚུན་ལག་པ་སྦྲེལ་ནས་མི་འགྲོ་འོ། ། གསུམ་པ་སྟན་ལ་འདུག་པའི་ཚུལ་དགུ་ནི། ཁྱིམ་བདག་སོགས་ཀྱིས་བསྡད་པར་མ་བགོས་དང༌། ། སྟན་ལ་སྲོག་ཆགས་ཡོད་མེད་མ་བརྟགས་དང༌། ། ལུས་ཀྱི་ལྗིད་བསྐྱུར་རྐང་པ་བསྣོལ་ཏེ་བརྐྱང༌། ། བརླ་གཉིས་དང་ནི་ལོང་བུ་བརྩེགས་པ་དང༌། ། ཁྲི་འོག་རྐང་བཀུག་རྐང་གཉིས་གདངས་ཏེ་བགྲད། ། འདོམས་པར་བསྟན་པའི་སྐྱོན་དགུ་སྤངས་ལ་འདུག ། ཞར་བྱུང་བསླབ་བྱ་ལག་པས་འགྲམ་མི་བརྟེན། ། རྒྱབ་ཏུ་འདུག་སྟན་ཁུར་ནས་མི་འགྲོ་འོ། ། བཞི་པ་ཟས་ལེན་ཚུལ་ལ་བརྒྱད་ཚན་གཅིག་ནི། ཟས་རྣམས་ལྷུང་བཟེད་ཁ་ལས་མཐོར་མི་ལེན། ། འབྲས་ཆན་ཚོད་མ་མང་ཉུང་མཉམ་པར་ལེན། ། གྲལ་རིམ་མཐར་ཆགས་སྔ་ཕྱི་མེད་པར་ལེན། ། བླང་ཚེ་མི་གཡེང་ལྷུང་བཟེད་མིག་གིས་ལྟ། ། ཟས་མ་བྱུང་བར་ལྷུང་བཟེད་མི་བཟེད་ཅིང༌། ། ཚོད་མ་འདོད་ནས་འབྲས་ཆན་འགེབས་པ་དང༌། ། འབྲས་ཆན་འདོད་ནས་ཚོད་མ་འགེབས་མི་བྱ། ། བཟའ་བཅའི་སྟེང་དུ་སྣོད་གཞན་མི་བཟེད་དོ། ། ལྔ་པ་ཁ་ཟས་སྤྱོད་ཚུལ་ཉེར་གཅིག་ནི། སྤྱོད་ལམ་མི་ལེགས་པ་ཡིས་བཟའ་མི་བྱ། ། ཁམ་ཚད་ཧ་ཅང་ཆེ་དང་ཆུང་བ་མིན། ། འཇིག་རྟེན་དང་མཐུན་རན་པར་བཟའ་བར་བྱ། ། ཁ་སྒོར་ཟས་མ་སླེབ་པར་ཁ་མི་གདངས། ། ཁ་ནང་ཟས་ཀྱིས་བཀང་ནས་གཏམ་མི་སྨྲ། ། མི་ཞིམ་ཙུག་ཙུག་ཞིམ་ལ་ཅག་ཅག་དང༌། ། གྲང་ལ་ཧུ་ཧུ་ཚན་མོར་ཕུ་ཕུ་དང༌། ། ཁ་ཡི་ཕྱི་རོལ་ལྕེ་ཕྱུང་བཟའ་མི་བྱ། ། ཆན་སོགས་འབྲུ་མ་རེ་རེར་འཐུ་བ་དང༌། ། ཟས་ལ་འཕྱ་སྨོད་མཁུར་བ་གཡས་གཡོན་སྤོ། ། རྐན་སྒྲ་ཏོག་ཅིང་(༣༧བ)ཁམ་འཕྲོ་སོ་ཡིས་གཅོད། ། ལག་པ་སྣོད་དུ་འགོས་པ་ལྕེ་ཡིས་ལྡག ། ལག་པར་ཟས་ཀྱིས་འགོས་པ་སྤྲུགས་པ་དང༌། ། ལྷུང་བཟེད་ཟས་དང་བཅས་པ་སྐྱོམ་སྐྱོམ་བྱེད། ། ཟས་ལ་མཆོད་རྟེན་དབྱིབས་བཅོས་ཟ་རྣམས་སྤངས། ། དྲུག་པ་ལྷུང་བཟེད་སྤྱོད་ཚུལ་བཅུ་བཞི་ནི། དགེ་སློང་གཞན་གྱི་ལྷུང་བཟེད་འཕྱས་མི་གདགས། ། ལག་པ་ཟས་སྦགས་ཆུ་སྣོད་ལ་མི་རེག ། གཞན་ལ་ཟས་དང་བཅས་པའི་ཆུ་མི་འཐོར། ། ཟས་བཅས་འཁྲུད་ཆུ་ཁྱིམ་གཞན་འཕོ་མི་བྱ། ། ཟས་ཀྱི་ལྷག་མ་ལྷུང་བཟེད་ནང་མི་བླུག ། ལྷུང་བཟེད་འོག་སྟེགས་མེད་པར་ས་རྗེན་དང༌། ། གཡང་ས་གད་ཁ་དཀན་གཉེར་གཟར་བཞི་ལ། ། མི་བཞག་གད་གཡང་དཀན་གཉེར་གསུམ་པོ་དང༌། ། འགྲེང་བཞིན་ལྷུང་བཟེད་མི་བཀྲུ་འབབས་ཆུ་ཡི། ། རྒྱུན་ལས་ལྡོག་སྟེ་དེ་ཡིས་མི་བཅུ་འོ། ། བདུན་པ་ཆོས་སྟོན་ཚུལ་ལ་ཉེར་དྲུག་སྟེ། ཉན་པོ་མི་ན་བཞིན་དུ་འདུག་པ་ལ། ། རང་ཉིད་འགྲེངས་ཏེ་འཆད་དང་དེ་བཞིན་དུ། ། ཉལ་དང་ཁྲི་སྟན་ཆེ་མཐོར་འདུག་པ་དང༌། ། མདུན་འགྲོར་རྒྱབ་དང་དབུས་འགྲོར་མདུན་ནས་བཤད། ། མགོ་དཀྲིས་གོས་བརྫེས་བླ་གོས་ཕྲག་གཉིས་གཟར། ། ལག་པ་གཉའ་གོང་བསྣོལ་དང་ལྟག་པར་བསྣོལ། ། ཐོར་ཚུགས་བཅིངས་དང་ཞྭ་གྱོན་ཅོད་པན་བཏགས། ། མེ་ཏོག་ཕྲེང་དང་དར་སོགས་ཐོད་ཀྱིས་དཀྲིས། ། གླང་ཆེན་རྟ་ཞོན་ཁྱོགས་དང་བཞོན་པར་འདུག ། མཆིལ་ལྷམ་གྱོན་ཞིང་ལག་ན་མཁར་བ་གདུགས། ། མཚོན་ཆ་རལ་གྲི་མདའ་གཞུ་ཐོགས་པ་དང༌། ། གོ་ཆ་གྱོན་ལ་བཤད་རྣམས་མི་བྱ་འོ། ། བརྒྱད་པ་སྒྲུབ་པའི་ཚུལ་གསུམ་ནད་མེད་པས། ། འགྲེང་བཞིན་པ་དང་ཆུ་དང་རྩ་སྔོན་ནང༌། ། བཤང་གཅི་མི་འདོར་ཆུ་ལ་མཆིལ་སྣབས་དང༌། ། སྐྱུག་པ་སོགས་ཀྱང་འདོར་བར་མི་བྱ་འོ། ། དགུ་པ་རྒྱུ་བ་གཅིག་ནི་གནོད་མེད་པར། ། ཤིང་ལ་མི་གང་ལྷག་པར་མི་འཛེག་གོ། ། དེ་ལྟར་ཉེས་བྱས་བརྒྱ་དང་བཅུ་གསུམ་པོ་དེ་དག་ནི་སྤྱད་ན་ཉེས་བྱས་ཙམ་དུ་འགྱུར་ལ། (༣༨ན)དེ་ལས་བཟློག་སྟེ་བསླབ་པར་བྱ་དགོས་པས་དེ་སྐད་ཅེས་བྱའོ། ། དེ་བས་ན། གོས་ཚགས་མཐོང་ན་ཡིད་དུ་འོང་ཞིང་སྤྱོད་ལམ་ཞི་དུལ་དང་ལྡན་པས་བསོད་སྙོམས་ཀྱི་ཁྱིམ་དུ་འཇུག་ཅིང་མཉམ་པར་བཞག་པའི་འདུག་སྟངས་ཀྱིས་འཁོད་ལ་བག་ཡོད་པས་བཟའ་བཏུང་ལ་ལོངས་སྤྱོད་ཅིང༌། དྲན་པ་མངོན་དུ་བཞག་ནས་ཆོས་ཀྱི་གཏམ་སྐབས་དང་འཚམས་པས་མགུ་བ་བསྐྱེད་པར་བྱ་བ་ཡིན་ནོ། ། ལྟུང་བ་སྡེ་ལྔ་པོ་བསྡོམས་པས་དགེ་སློང་གི་ཁྲིམས་ཉིས་བརྒྱ་ལྔ་བཅུ་རྩ་གསུམ་སྟེ། ཐམས་ཅད་ཀྱང་བསྡུ་ན་བཅས་པའི་ཁ་ན་མ་ཐོ་བ་དང་རང་བཞིན་གྱི་ཁ་ན་མ་ཐོ་བ་གཉིས་སུ་འདུ། དེ་ལས་རང་བཞིན་གྱིས་ཁ་ན་མ་ཐོ་བ་ཞེས་པ་ནི་ཁྱིམ་པ་སོགས་འཇིག་རྟེན་པ་ཐམས་ཅད་ལ་སྡིག་པ་ཡོད་པར་གྲགས་པའི་སྲོག་བཅད་པ་ལྟ་བུའོ།། བཅས་པའི་ཁ་ན་མ་ཐོ་བ་ནི་རབ་བྱུང་རྣམས་ཀྱིས་སྤྱད་མི་རུང་ཞིང་ཁྱིམ་པ་རྣམས་ལ་སྡིག་པ་མེད་པར་གྲགས་པ་ཕྱི་དྲོའི་ཁ་ཟས་ལྟ་བུའོ། ། དེ་ཐམས་ཅད་ལའང་འདིའི་སྐབས་སུ་ལྟུང་བ་ཞེས་སུ་གྲགས་པ་ནི་དེ་སྤྱད་ན་ངན་འགྲོ་ལ་ལྟུང་བས་དེ་སྐད་དུ་གྲགས་སོ། ། པ༢ གཉིས་པ་དགེ་སློང་མའི་བསླབ་བྱ་ནི། དགེ་སློང་མ་ལ་སུམ་བརྒྱ་དྲུག་ཅུ་བཞི། ། དགེ་སློང་མ་ལ་རྩ་བའི་ལྟུང་བ་ཕམ་པ་བརྒྱད། ལྷག་མ་ཉི་ཤུ། སྤང་ལྟུང་སོ་གསུམ། ལྟུང་བྱེད་བརྒྱ་དང་བརྒྱད་ཅུ། སོར་བཤགས་བཅུ་གཅིག །ཉེས་བྱས་བརྒྱ་དང་བཅུ་གཉིས་ཏེ་བསྡོམས་པས་སུམ་བརྒྱ་དང་དྲུག་ཅུ་རྩ་བཞི་ཡོད་ཀྱང་ཡུལ་དུས་འདིར་ལག་ལེན་བྱེད་པ་མེད་པས་མ་སྤྲོས་པ་རྟོགས་པར་འདོད་ན་གཞན་དུ་ཤེས་པར་བྱའོ། ། དགག་པའི་བསླབ་བྱ་ཚུལ་ཁྲིམས་མི་མཐུན་ཕྱོགས། ། དེ་དག་རྣམས་ནི་སྤང་བར་བྱ་བ་དགག་པའི་བསླབ་བྱ་ཚུལ་ཁྲིམས་ཀྱི་མི་མཐུན་ཕྱོགས་རྣམས་ཡིན་པས་ངོ་ཤེས་པའི་སྒོ་ནས་བསྲུང་བར་བྱའོ། ། ན༢ གཉིས་པ་སྒྲུབ་པའི་བསླབ་བྱ་ནི། ལུང་ལས། རབ་བྱུང་གསོ་སྦྱོང་གཞི་དང་ནི། ། དགག་དབྱེ་དབྱར་དང་ཀོ་ལྤགས་གཞི། ། སྨན་དང་གོས་དང་སྲ་བརྐྱང་(༣༨བ)དང༌། ། ཀཽ་ཤཱམྦཱི་དང་ལས་ཀྱི་གཞི། ། དམར་སེར་ཅན་དང་གང་ཟག་དང༌། ། སྤོ་དང་གསོ་སྦྱོང་གཞག་པ་དང༌། ། གནས་མལ་དང་ནི་རྩོད་པ་དང༌། ། དགེ་འདུན་དབྱེན་རྣམས་བསྡུས་པ་ཡིན། ། ཅེས་གཞི་བཅུ་བདུན་དུ་གསུངས་ཏེ། གཞི་ཞེས་བྱ་བ་ནི། བསྟུའི་སྒྲ་ལས་བསླབ་པ་གསུམ་གྱི་རྟེན་བྱེད་པའི་དོན་ཏོ། ། དེ་ལས་དང་པོ་ནི་གོང་དུ་སོང༌། གཞན་བཅུ་དྲུག་པོའང་བསྡུ་ན་ལྔ་སྟེ། པ༡ བསླབ་པ་ཡོངས་སུ་སྦྱོང་བའི་གཞི། པ༢ བདེ་བར་གནས་པའི་རྐྱེན་གྱི་གཞི། པ༣ ཆོ་ག་ཁྱད་འབྲེལ་ལས་ཀྱི་གཞི། པ༤ ཉེས་པ་དག་བྱེད་ཕྱིར་བཅོས་གཞི། པ༥ མཐའ་གཉིས་སྤངས་པ་གནས་མལ་གྱི་གཞི་རྣམས་སོ། ། པ༡ དེའི་དང་པོ་ལ་གཉིས། ཕ༡ མདོར་བསྟན། ཕ༢ རྒྱས་བཤད་དོ། ། ཕ༡ དང་པོ་ནི། བསྒྲུབ་པའི་གཞི་ལ་བསླབ་པ་ཡོངས་སྦྱོང་གསུམ། ། བསྒྲུབ་པའི་བསླབ་བྱ་གཞི་བཅུ་བདུན་དུ་གྲགས་པའི་ཐོག་མ་བསླབ་པ་ཡོངས་སུ་སྦྱོང་བར་བྱེད་པའི་གཞི་ནི་གསུམ་མོ། ། ཕ༢ གཉིས་པ་[རྒྱས་བཤད་]ལ་གསུམ། བ༡ གསོ་སྦྱོང༌། བ༢ དབྱར་གནས། བ༣ དགག་དབྱེའོ། ། བ༡ དང་པོ་ནི། ཞི་གནས་གསོ་སྦྱོང་སེམས་དང་ཤེས་རབ་སྦྱོང༌། ། མཐུན་པ་ཟླ་བ་ཕྱེད་ཕྱེད་བཀྲ་ཤིས་དང༌། ། གནོད་ཞི་རྩོད་པ་ཟློག་རྣམས་དུས་དེར་བྱ། ། བསླབ་པ་གསུམ་གྱི་ཡོན་ཏན་གསོ་ཞིང་ཉེས་ལྟུང་སྦྱོང་བའི་གསོ་སྦྱོང་དེ་ལ་གཉིས་ཏེ། ཞི་གནས་ཀྱི་གསོ་སྦྱོང་ནི། ཚུལ་ཁྲིམས་དང་ལྡན་ཞིང་མ་ཆགས་འཕགས་རིགས་ཞེས་འདོད་ཆུང་ཆོག་ཤེས་དང་ལྡན་པ་དེས་ཐོག་མར་ལམ་གྱི་རྒྱུ་སྡེ་སྣོད་ཐོས་པ་དང་དེའི་དོན་བསམ། དེ་ནས་སྤོང་ཁང་བརྩིགས་ཤིང་ཞལ་ཏ་པ་བསྐོས་ལ་སེམས་གནས་པའི་ཐབས་དགུས་ཞི་གནས་བསྒྲུབ་ཅིང༌། དྲན་པ་ཉེ་བར་གཞག་པ་བཞི་སོགས་ཀྱིས་ལྷག་མཐོང་གི་ཤེས་རབ་བསྐྱེད་ལ། ལམ་ལྔ་བྱང་ཕྱོགས་སོ་བདུན་གྱིས་བགྲོད་ནས་འབྲས་བུ་བཞི་འཐོབ་པར་བྱེད་པའོ། ། མཐུན་པའི་གསོ་སྦྱོང་ནི། ཀརྨ་ཤ་ཏཾ་ལས། མཐུན་པའི་གསོ་སྦྱོང་ནི་རྣམ་པ་ལྔ་སྟེ། བཅུ་བཞི་པ་དང༌། བཅོ་ལྔ་པ་དང༌། བ(༣༩ན)ཀྲ་ཤིས་པའི་གསོ་སྦྱོང་དང༌། གནོད་པ་དབྱུང་བའི་གསོ་སྦྱོང་དང༌། བསྡུམ་པའི་གསོ་སྦྱོང་དང་ལྔའོ་ཞེས་པ་ལྟར་ལྔ་ལས། དང་པོ་ནི། ལོ་ཆེན་དྷརྨ་ཤྲཱིས། ཧོར་ཟླ་དང་སྦྱར་ཟླ་བ་ནི། ། བཅུ་གཅིག་དང་པོ་གསུམ་པ་ལྔ། ། བདུན་པ་དགུ་པའི་མར་ངོ་ལ། ། ཉིན་ཞག་བཅུ་བཞིའོ། ཞེས་དང༌། གཉིས་པ་ནི། དེ་ལྷག་གི། ། ངོ་གཉིས་རེ་རེར་ཉིན་ཞག་ནི། ། བཅོ་ལྔ་བཅོ་ལྔར་ཤེས་པར་བྱ། ། འདི་ལས་གཞན་དུ་སྨྲ་བ་འཁྲུལ། ། ཞེས་གསུངས་ཏེ། དེའང་མཚོ་སྣ་པ་དང་བྱ་འདུལ་སོགས་ཀྱིས་ཧོར་ཟླ་བཅུ་པའི་མར་ངོའི་ཚེས་གཅིག་ནས་དགུན་ར་མགོ་ཟླར་བྱས་ཏེ་དུས་ཀྱི་འགོ་བཟུང་བས། དེ་ནས་ཟླ་བ་ཕྱེད་དང་གཉིས་འདས་པ་ཧོར་ཟླ་བཅུ་གཅིག་པའི་མར་ངོ་ལ་རྒྱལ་ཟླའི་བཅུ་བཞི་པ་འབྱུང་བའི་དབང་དུ་མཛད་པ་ཡིན། བུ་སྟོན་སོགས་ཀྱིས་དགུ་པའི་བཅུ་དྲུག །མཆིམས་སོགས་སྔ་རབས་པ་རྣམས་བརྒྱད་པའི་བཅུ་དྲུག་ནས་བཟུང་བ་ཡོད་ལ། ཞྭ་དམར་དྲུག་པ་ནི་བུ་སྟོན་དང་མཐུན་ནོ། ། གང་ལྟར་ཉིན་ཞག་བཅུ་བཞི་པ་དྲུག །བཅོ་ལྔ་པ་བཅོ་བརྒྱད་དེ། དེ་དག་ལ་དུས་ངེས་པའི་གསོ་སྦྱོང་བྱའོ།། དེའི་གནས་ནི་གྲུབ་པ་བྲག་ཕུག་ལྟ་བུ། བགྱིས་པ་ཁང་པ་ལྟ་བུ། ལགས་པའམ་