Tibetan
གནས་ནས་དབྱུང༌། སྐད་ཅིག་ཀྱང་མ་བཅབས་པའི་འཆབ་མེད་ལ་ཆད་ལས་ཀྱི་བསླབ་པ་སྦྱིན་ཏེ་ཇི་སྲིད་འཚོ་བའི་བར་དུ་དམན་པའི་སྤྱོད་པ་ལྔ་དང་དུ་ལེན་ཞིང་། ཁྱད་པར་གྱི་སྤྱོད་པ་ལྔ་སྤོང་བའི་སྒོ་ནས་ཕྱིར་བཅོས། ཡང་ཕམ་པ་འཆབ་མེད་ཅན་གྱིས་བསྙེན་རྫོགས་ཀྱི་སྡོམ་པ་ཕུལ་ཏེ་སླར་བླངས་ནའང་སྐྱེ་བར་གསུངས་སོ། ། ལྷག་མ་འཆབ་མེད་ནི་དགེ་སློང་གི་མདུན་དུ་བཤགས་ལ། དངོས་གཞི་དག་བྱེད་དུ་མགུ་བ་སྤྱོད་ལ་དབྱུང་ཆོག་ཅིང༌། ཞག་ཏུ་ལོངས་པར་བཅབས་ན་བཅབས་ཉེས་འདག་པའི་ཕྱིར་ཇི་སྲིད་བཅབས་པ་དེ་སྲིད་དུ་སྤོ་བ་སྤྱོད་པ་དང༌། དེ་ནས་ལྷག་མའི་དངོས་གཞི་འདག་པའི་ཆེད་དུ་དགེ་སློང་ཕ་མའི་བྱེ་བྲག་གིས་ཞག་དྲུག་དང་ཟླ་ཕྱེད་དུ་མགུ་བ་སྤྱད། དེ་ནས་རང་བཞིན་གྱི་གནས་སུ་གཟེངས་བསྟོད་པའི་ཆེད་དུ་གསོལ་བཞིའི་ལས་ཀྱིས་དབྱུང་ངོ༌། ། དེ་ལ་སྤོ་བ་ནི་གནས་ཁྱད་པར་ཅན་ནས་དམན་པ་ལ་སྤོ་བ་དང༌། མགུ་བ་ནི་དགེ་འདུན་ཐུགས་མགུ་བར་བྱེད་པ་སྟེ། དགེ་སློང་རྣམས་ཀྱི་གྲལ་གཞུག་ཏུ་འདུག་པ་དང་ཕྱག་དར་སོགས་དམན་པའི་སྤྱོད་པ་བྱེད་དགོས་པ་ཡིན་ནོ། ། ཀཽ་ཤཱམྦྷི། སྟེ་ལས་བྱེད་པའི་གཞི་དང༌། དམར་སེར་ཅན་ཏེ། ཕྱིར་བཅོས་ཀྱི་གཞིའང་འདི་ལས་འཕྲོས་ཏེ་གླེང་གཞིའི་ཐོག་མ་དེ་དག་ནས་བྱུང་བས་སོ། ། སྤང་ལྟུང་ལ་ནི་ཞག་གི་ཆད་ལས་དང་འབྲེལ་བའི་སྤང་བ་སྔོན་དུ་བཏང་ནས་རིགས་མཐུན་གྱི་ལྟུང་བ་མེད་པའི་དགེ་སློང་གི་མདུན་དུ་བཤགས་དགོས་ཤིང༌། ལྟུང་བྱེད་འབའ་ཞིག་པ་དང་སོར་(༤༤ན)བཤགས་དང་བཤགས་བྱའི་ཉེས་བྱས་རྣམས་ནི་བཤགས་པ་ཙམ་གྱིས་འདག་ལ། བསྡམ་བྱའི་ཉེས་བྱས་རྣམས་ནི་ཡིད་ཀྱིས་བསྡོམས་པས་སོར་ཆུད་དོ། ། དགེ་ཚུལ་ལ་བཤགས་བྱའི་ཉེས་བྱས་གང་ཟག་གི་མདུན་དུ་རང་མིང་བརྗོད་པས་བཤགས་ཤིང༌། བསྡམ་བྱའི་ཉེས་བྱས་ཡིད་ཀྱིས་བསྡོམས་ཏེ་ལྟུང་བ་རྣམས་ཕྱིར་བཅོས་སོ། ། བ༢ གཉིས་པ་ནན་ཏུར་ནི། མི་སྤྲོ་ནན་ཏུར་བྱ། ། ཞེས་པ་སྟེ། རང་བཞིན་ངན་པ་སོགས་ཀྱིས་ལྟུང་བ་བཅོས་མི་འདོད་ན་ནན་ཏུར་གྱི་ལས་བྱ་སྟེ། དེ་ནི་འོག་ཏུ་གཞུག་ཅིང་སྨད་པའི་དོན་ཡིན་ལ། དབྱེ་ན། བསྡིགས་དམད་བསྐྲད་པ་ཕྱིར་འགྱེད་བཞི། གནས་དབྱུང་བདུན། གསོ་དགག་བཞག་པ་གཉིས་ཏེ་བཅུ་གསུམ་མམ། གནས་དབྱུང་བདུན་པོ་གཅིག་ཏུ་བྱས་ན་ནན་ཏུར་བདུན་ནོ། ། དེ་ལ་བསྡིགས་པ་ནན་ཏུར་ནི། འཐབ་ཀྲོལ་བྱེད་པ་ལ་བྱ་བ་འདི་ཐོང་ཞིག་མི་གཏོང་ན་གནས་ནས་དབྱུང་ངོ་ཞེས་བསྡིགས་པའོ། ། སྨད་པ་ནན་ཏུར་ནི། ལྷག་མ་ཕྱིར་མི་བཅོས་པར་རྒྱུན་དུ་བྱེད་པ་ལ་གང་ཟག་རང་དབང་ཅན་ཡིན་ཀྱང་གཞན་ལ་གནས་ཆོས་ཤིག་ཅེས་སྨོད་པའོ། ། བསྐྲད་པ་ནན་ཏུར་ནི། ཁྱིམ་སུན་འབྱིན་པ་གནས་དེ་ནས་བསྐྲོད་པའོ། ། ཕྱིར་འགྱེད་ནན་ཏུར་ནི། ཁྱིམ་པ་སོགས་ལ་བརྙས་ཐབས་བྱེད་པ་ལ་མཛའ་གཅུགས་ཀྱི་དངོས་པོ་སྤངས་ནས་ཕྱིར་འགྱེད་པའོ། ། གནས་དབྱུང་བདུན་ནི། ལྟུང་བ་མ་མཐོང་ཟེར་བ། ལྟུང་བ་ཕྱིར་མི་འཆོས་པ། སྡིག་ལྟ་ཅན། འཐབ་ཀྲོལ་བྱེད་པ། འཐབ་ཀྲོལ་གྱི་རྒྱུ་ཉེར་བར་སྒྲུབ་པ། དགེ་སློང་མ་དང་འདྲིས་ཤིང་གནས་པ། ཆོས་རྣམ་པར་གཏན་ལ་ཕབ་པས་ཀྱང་རྩོད་པ་ཞི་བར་མ་གྱུར་པ་རྣམས་ནི་གནས་ནས་དབྱུང་བའོ། ། གདམས་ངག་བཞག་པས་མ་ཐུལ་བ་ལ་དགེ་འདུན་དང་ལྷན་ཅིག་གསོ་སྦྱོང་དང་དགག་དབྱེ་བྱེད་དུ་མི་འཇུག་པ་ནི་དེ་དང་དེ་བཞག་པའོ། ། ལྷུང་བཟེད་ཁ་སྦུབ་ནི་སྤྱིར་ནན་ཏུར་ཡིན་ཀྱང་ཡུལ་ཁྱིམ་པ་ལ་བྱ་བ་ཡིན་པས་འདིར་མི་བགྲང་ངོ༌། ། དེ་ལྟར་ནན་ཏུར་བྱས་པ་ལ་བརྟེན་ནས་བཟོད་པ་འབུལ་ན་དེ་(༤༤བ)རང་བཞིན་དུ་གནས་པ་ཐོབ་པའི་ཕྱིར་དགེ་འདུན་མཚན་ཉིད་དང་ལྡན་པས་བཟོད་པ་བླང་བའི་ཆོ་ག་བྱ། དབེན་པ་སྐྱབས་ཡོད་ན་འདུག་པ་ལྟ་བུ་མ་ངེས་པ་ལ་དེའི་ངོ་བོ་ཉིད་འཚོལ་དུ་གཞུག་གོ། ། འཆབ་ཉེས་འབྱུང་བའི་ཡུལ་དང༌། གཞི་བསམ་སྦྱོར་བ་མཐར་ཐུག་ཚང་བའི་འཆབ་ཉེས་ཀྱི་ཚད་སོགས་ཀྱིས་ལྟུང་བ་ལས་ལྡང་བའི་དུས་དང་དུས་མིན་པར་བསྡུས་པ་འབྱུང་བ་གང་ཟག་གི་གཞི་དང༌། བསླབ་སྦྱིན་དང་སྤོ་མགུ་སྤྱོད་པ་སོགས་ས་གཞན་ན་གནས་པ་ཉེར་དྲུག་གི་སྤྱོད་པ་བཤད་པས་གཞན་ན་གནས་པའི་གཞི་དང༌། མཐོང་ཐོས་དོགས་གསུམ་གྱི་ལྟུང་བ་གླེང་བའི་ཐབས་གསོ་སྦྱོང་གཞག་པའམ་ཡོངས་སུ་སྦྱོང་བའི་གཞི་རྣམས་ཀྱང་འདི་དག་ལས་འཕྲོས་པའོ། ། ཕ༣ གསུམ་པ་རྩོད་པ་ཕྱིར་བཅོས་ནི། རྩོད་པ་བཞི་པོ་ཞི་བྱེད་བདུན་གྱི་ས་གཞིལ། ། འཁོན་འཛིན་གྱི་ཤེས་པས་རྩོད་པ་སྤེལ་བའི་ཚུལ་བཞི་ཡོད་དེ། འདུས་བྱས་རྟག་མི་རྟག་ལ་རྒོལ་ཕྱིར་རྒོལ་རྩོད་པ་ལྟ་བུ་འགྱེད་ཕྱིར་གྱི་རྩོད་པ་དང༌། གདམས་ངག་གསོ་དགག་གཞག་པ་ལ་འཇོག་པ་པོ་དང་བཞག་བྱ་རྩོད་པ་ལྟ་བུ་མི་གདམས་པའི་ཕྱིར་གྱི་རྩོད་པ་དང༌། ལྟུང་བ་གླེང་བས་ཁས་མི་ལེན་པ་གླེང་བྱ་གླེང་བྱེད་རྩོད་པ་ལྟུང་ཕྱིར་རྩོད་པ་དང༌། རྩོད་པ་དེ་གསུམ་གྱི་དབང་གིས་གསོ་སྦྱོང་སོགས་ཀྱི་ལས་ལ་མཐུན་པ་མི་སྦྱིན་པས་རྩོད་པར་གྱུར་པ་བྱ་ཕྱིར་གྱི་རྩོད་པ་དང་བཞིའོ། ། དེ་དག་ཞི་བྱེད་ལ། རང་གི་ངང་གིས་ཞི་བ་ནི་རྩོད་བྱེད་རྣམས་ཤི་བའམ་རྒྱུད་འགྱུར་བ་ལྟ་བུའོ། ། སོ་སོར་ཞི་བྱེད་ཀྱི་ཆོས་ནི་བདུན་དུ་གསུངས་ཏེ། དང་པོ་ལ་མངོན་སུམ་བརྒྱད་དང༌། གཉིས་པ་ལ་ལྟུང་བ་གླེང་རྒྱུ་ཡོད་པ་ལ་མངོན་སུམ་བརྒྱད་དང༌། མེད་པ་དགེ་འདུན་གྱིས་གསོལ་བཞིའི་ལས་ཀྱིས་དྲན་པས་འདུལ་བ་སྦྱིན་པ་དང༌། སྨྱོས་པ་ལ་མ་སྨྱོས་པའི་འདུལ་བ་སྦྱིན་པ་གསུམ། གསུམ་པ་ལ་ཉེས་པ་རང་གིས་ངོ་མ་ཤེས་པ་ལ་ངོ་བོ་ཉིད་འཚོལ་དུ་གཞུག་པ་དང༌། ཤེས་པ་ལ་ལྟུང་བ་ཁས་བླངས་པ་དང༌། དགེ་འདུན་བློ་རྩེ་མཐུན་པས་རྩྭ་(༤༥ན)བཀྲམ་པ་ལྟ་བུའི་ཞི་བྱེད་གསུམ། བཞི་པ་ལ་ཞི་བྱེད་བདུན་པོ་དེ་ཐམས་ཅད་འཇུག་ཅིང་ལས་ལ་མཐུན་པ་སྦྱིན་པས་དངོས་སུ་ཞི་བར་བྱེད་དོ། ། པ༥ ལྔ་པ་མཐའ་གཉིས་སྤངས་པ་གནས་མལ་གྱི་གཞི་བཤད་པ་ནི། གནས་མལ་གཞི་ཡང་ལུགས་འདིར་མཐུན་ན་མཆོག ། ད་ལྟའི་ཕྱག་ལེན་ལ་བཤད་ཚོད་དང་མཐུན་པ་གང་ཡང་བྱེད་པ་དཀོན་ཀྱང་གནས་མལ་གྱི་གཞིའང་འདུལ་བ་ནས་ཇི་སྐད་གསུངས་པའི་ལུགས་འདི་དང་མཐུན་ན་སངས་རྒྱས་ཀྱིས་བསྟན་པ་ཡིན་པས་ཕན་ཡོན་མཆོག་ཏུ་ཆེ་ཞིང་ཉེས་པ་མེད་པར་འགྱུར་བས། དེ་ལ་གང་དུ་བྱ་བའི་གནས་རྩོད་པ་ཅན་དང་སྲོག་ཆགས་གདུག་པ་ཅན་དང་ཉམ་ང་བའི་ཡུལ་ཚ་སྒོ་ཅན་དང་ཚེར་མ་ཅན་སོགས་མ་ཡིན་པར་གཙུག་ལག་ཁང་ལྔ་བརྩེགས་ལ་སོགས་པའི་དྲི་གཙང་ཁང་དུ་བསྟན་པའི་གཙོ་བོ། ལོགས་སུ་ཐུབ་པའི་སྔོན་གྱི་སྐྱེས་རབས། སྤྱོད་པ་སྟེ་ལས་བརྒྱ་རྩ་བྱ་བའི་གནས་སུ་གནས་བརྟན་ཆེན་པོ་རྣམས། སྒོར་གནོད་སྦྱིན་ལག་ན་རྡོ་རྗེ། སྒོ་ཁང་དུ་འཁོར་བའི་འཁོར་ལོ་ཆ་ལྔ་པ། དེ་སྟོན་བྱེད་ཚིགས་བཅད་དང་བཅས་པ་ལ་སོགས་པ་བྲི། ཆོས་སྨྲ་བའི་སེང་གེའི་ཁྲི་དང་ཕྱི་རོལ་ཏུ་ལྕགས་རི། གཞན་ཡང་མཛོད་དང་ཟས་ཀྱི་ཁང་པ་ལ་སོགས་པ་རྣམ་གྲངས་བཅུར་བཤད་པ་རྣམས་དང༌། གང་ཟག་སོ་སོའི་ཁང་པ་སྤྱོད་ལམ་བཞི་ཤོང་གི་ཚད་ཅན། མཆོད་རྟེན་དང་རྒྱལ་མཚན་རྣམ་པ་བཞི་ཀུན་དགའ་ར་བ་ལ་གཟུག་ཅིང༌། དེ་དག་གི་ལས་ཚན་བསྐོ་བ་ལ་སོགས་པ་རྣམས་ཀྱང་གཞུང་མཐུན་དུ་བྱའོ།། ཇ༦ དྲུག་པ་ཞར་བྱུང་འཕྲོས་དོན་དུ་བཤད་པ་ལ་གསུམ། ཉ༡ མཐའ་གཉིས་སྤང་བར་གདམས་པ། ཉ༢ སྤང་བླང་མདོར་བསྡུས། ཉ༣ ཚིགས་གསུམ་ཇི་ལྟར་ལྡན་པའི་ཚུལ་ལོ། ། ཉ༡ དང་པོ་ནི། ཆགས་དང་ངལ་དུབ་མཐའ་གཉིས་རྣམ་པར་བསལ། ། ཆོས་འདི་ལ་ཞུགས་པ་རྣམས་ཀྱིས་འདོད་པའི་ཡོན་ཏན་ལ་ཧ་ཅང་ཞེན་ཅིང་ཆགས་པ་འདོད་པ་བསོད་ཉམས་ཀྱི་མཐའ་དང༌། དཀའ་ཐུབ་(༤༥བ)ཀྱིས་ཧ་ཅང་ངལ་ཞིང་དུབ་པས་ཐོས་སྒོམ་མི་ནུས་པའི་མཐའ་གཉིས་ཀ་རྣམ་པར་བསལ་ལ་བདེ་བར་གནས་དགོས་ཏེ། དེའང་འབད་མེད་དུ་རྙེད་ན་ཀརྵ་པ་ཎ་འབུམ་ཕྲག་བརྒྱ་རི་བའི་གོས་དང༌། ཁ་ཟས་རོ་བརྒྱ་དང་ལྡན་པ། ཁང་པ་བརྩེགས་པ་ལྔ་བརྒྱ་པ་སོགས་ཀྱང་ཞེན་པ་མེད་པར་ལོངས་སྤྱོད་དུ་རུང་ལ། འབད་རྩོལ་གྱིས་སྒྲུབ་དགོས་ན་སྤོང་ཀློག་གི་གེགས་སུ་འགྱུར་བས། གོས་ཕྱགས་དར་ཁྲོད་པ། ཟས་བསོད་སྙོམས། གནས་ཤིང་དྲུང་ལ་སོགས་པ་བསྟེན་པས་ཆོག་ཤེས་པར་བྱ་ཞིང༌། དེ་ལའང་བརྟུལ་ཞུགས་རབ་ཀྱིས་སྦྱངས་པའི་ཡོན་ཏན་བཅུ་གཉིས་ལ་གནས་པར་བྱ་སྟེ། ཇི་སྐད་དུ། བསོད་སྙོམས་པ་དང་སྟན་གཅིག་ཕྱིས་མི་ལེན། ། ཆོས་གོས་གསུམ་དང་ཕྱིང་བ་ཕྱགས་དར་ཁྲོད། ། དགོན་པ་པ་དང་ཤིང་དྲུང་བླ་གབ་མེད། ། དུར་ཁྲོད་པ་དང་ཙོག་པུ་གཞི་ཇི་བཞིན། ། ཞེས་པ་ལྟར་དང༌། ཟས་གོས་བཟང་ངན་ཐམས་ཅད་ལའང་ལོག་པའི་འཚོ་བ་ལྔ་དང་བྲལ་བར་བྱའོ། ། ཉ༢ གཉིས་པ་[སྤང་བླང་མདོར་བསྡུས་]ནི། རུང་དང་ཉེ་བླང་མི་རུང་དང་ཉེ་སྤང༌། ། དངོས་སུ་མ་སྨོས་པའི་གནང་བཀག་རྣམས་ཀྱང་རིགས་པས་བརྟགས་ནས་བླང་དོར་བྱ་དགོས་ཏེ། གང་ཞིག་བྱར་རུང་བར་གསུངས་པ་དང་ཉེ་ཞིང་མི་རུང་བ་ལས་བཟློག་ན་དེ་དག་ཐེ་ཚོམ་མེད་པར་སྤྱོད་པར་བྱ་སྟེ། དཔེར་ན་དགེ་ཚུལ་ལ་དགག་དབྱེ་གསུངས་པར་མཚོན་ནས་གསོ་སྦྱོང་བྱ་དགོས་པ་བཞིན་ནོ། ། གང་སྤྱད་དུ་མི་རུང་བར་གསུངས་པ་དང་ཉེ་ཞིང་རུང་བ་ལས་བཟློག་ན་དེ་དག་ཀུན་ཏུ་སྤང་དགོས་ཏེ། དཔེར་ན་སྲིན་བལ་ལ་སྟན་བྱེད་པ་བཀག་པས་དེ་དང་མཉམ་པའམ་ལྷག་པ་ལ་སྟན་བྱ་མི་རུང་བར་མཐུན་པ་བཞིན་ནོ། ། དེ་ལྟར་འདུལ་བ་བསྡུས་པ་འདི་ནི་སངས་རྒྱས་མྱ་ངན་ལས་འདའ་ཀར་བཅས་པར་ལུང་ཕྲན་ཚེགས་ལས་གསུངས་སོ། ། ཉ༣ གསུམ་པ་[ཚིགས་གསུམ་ཇི་ལྟར་ལྡན་པའི་ཚུལ་]ནི། གཟུགས་ཅན་འདོད་རྣམས་ཚིགས་གསུམ་ཐ་དད་ལྡན། ། ཤེས་པར་འདོད་པས་གནས་འགྱུར་ལྡན་པར་བཞེད། ། དེ་ལྟར་བཤད་(༤༦ན)པའི་ཚིགས་གསུམ་པོ་བླངས་ནས་གནས་པའི་ཚེ་དེ་གསུམ་པོ་ངོ་བོ་ཐ་དད་དུ་ལྡན་ནམ། ངོ་བོ་གཅིག་ཏུ་ལྡན་ནམ། སྔ་མ་ཕྱི་མར་གནས་གྱུར་པའི་ཚུལ་དུ་ལྡན་ཞེ་ན། འདི་ལ་གཟུགས་ཅན་དུ་འདོད་པའི་ལུགས་བྱེ་སྨྲ་ལྟར་ན་ཚིགས་གསུམ་རིམ་གྱིས་ནོད་པའི་དགེ་སློང་གི་རྒྱུད་ལ་གསུམ་པོ་དེ་འཐོབ་བྱེད་ཀྱིས་ཐོབ་ཅིང་གཏོང་བྱེད་ཀྱིས་མ་གཏོང་བས་གཟུགས་ཅན་གྱི་ངོ་བོ་ཐ་དད་ཡིན་པའི་ཕྱིར་ཞེས་འདོད། ཤེས་པར་འདོད་པའི་ལུགས་དབུ་མ་པ་ལྟར་ན། ཚིགས་གསུམ་རིམ་གྱིས་ནོད་པའི་དགེ་སློང་གི་རྒྱུད་ལ་ངོ་བོ་ཐ་དད་ཅིག་ཅར་དུ་ལྡན་པ་མིན་ཏེ། དེ་ཡིན་ན་གཙོ་སེམས་གཅིག་གི་འཁོར་དུ་སྤོང་སེམས་རྫས་གཞན་པ་གསུམ་ཅིག་ཅར་ལྡན་པར་ཐལ་བའི་ཕྱིར། ངོ་བོ་གཅིག་ཏུ་ལྡན་པའང་མིན་ཏེ་ཤེས་རྒྱུད་གཅིག་ལ་དེ་གསུམ་གྱི་གཞི་མཐུན་མི་སྲིད་པའི་ཕྱིར། དེས་ན་དེ་ལྟ་བུའི་རྒྱུད་ལ་སྔ་མ་སྔ་མ་ཕྱི་མ་ཕྱི་མར་རྫས་སོགས་གོང་འཕེལ་དུ་གནས་གྱུར་པའི་ཚུལ་གྱིས་ལྡན་ཏེ། དགེ་བསྙེན་གྱིས་དགེ་ཚུལ་དང༌། དེས་དགེ་སློང་གི་སྡོམ་པ་བླངས་ཚེ་སྡོམ་པ་སྔ་མ་ཕྱི་མའི་ངོ་བོར་འགྱུར་བའི་ཕྱིར། དཔེར་ན་ཚོགས་ལམ་ནས་སྦྱོར་ལམ། དེ་ནས་མཐོང་ལམ་དུ་གནས་འགྱུར་བ་བཞིན་ནོ། ། དེས་ན་དགེ་སློང་གི་རྒྱུད་ལ་དགེ་ཚུལ་གྱི་སྡོམ་པ་ཐོབ་ལ་མ་ཉམས་པ་ཡིན་གྱི། དགེ་ཚུལ་གྱི་སྡོམ་པ་ཡོད་པར་ཁས་ལེན་པ་མི་རིགས་ཏེ། དགེ་སློང་གི་རྒྱུད་ལ་སྡོམ་པ་གསུམ་པོ་དེ་གཟུགས་ཅན་ངོ་བོ་ཐ་དད་དང་ཤེས་པའི་ངོ་བོར་གྱུར་པའི་རྫས་ཐ་དད་གང་དུའང་མེད་པའི་ཕྱིར་ཏེ། དེ་གཉིས་ངོ་བོ་གཅིག་པའི་ཚུལ་གྱིས་ཅིག་ཅར་དུ་ལྡན་པ་མེད་པའི་ཕྱིར། ཞེས་འདོད་དོ། ། ཆ༢ རྩ་བའི་གཉིས་པ་ཐེག་ཆེན་སོ་ཐར་ཁྱད་པར་དུ་དབྱེ་བ་ལ་བདུན། ཇ༡ སེམས་བསྐྱེད་ཀྱི། ཇ༢ ཆོ་གའི། ཇ༣ བླང་ཡུལ། ཇ༤ རྟེན་གྱི། ཇ༥ གནང་བཀག་གི། ཇ༦ གསོ་ཚུལ་གྱི། ཇ༧ གཏོང་མི་གཏོང་གི་ཁྱད་པར་རོ། ། ཇ༡ དང་པོ་ནི། ཐེག་ཆེན་སོ་ཐར་ཐེག་དམན་ཇི་བཞིན་ལ། ། བླང་དུས་གཞན་དོན་བྱང་ཆུབ་ལ་དམིགས་(༤༦བ)སམ། ། སླད་ནས་སེམས་སྐྱེས་པས་ཀྱང་འགྱུར་བར་གསུངས། ། ཐེག་ཆེན་སོ་ཐར་ཐུན་མོང་མ་ཡིན་པའི་ཆོ་ག་རྒྱས་པ་ནི་བོད་དུ་མ་བྱུང་ལ། སུམ་བརྒྱ་པ་ལས། རྫོགས་པའི་བྱང་ཆུབ་དཔལ་ནོད་དབང་བསྐུར་ཡིན། ། ཅེས་དང༌། འོད་ལྡན་དུ། རྫོགས་པའི་བྱང་ཆུབ་ཉིད་དཔལ་ཡིན་ཏེ། ཆོས་ཀྱི་རྒྱལ་པོའི་མཛད་པའི་རྒྱུ་ཡིན་པའི་ཕྱིར་རོ། །དེ་འཐོབ་པར་བྱེད་པའི་ཕྱིར་དབང་བསྐུར་བ་ཡིན་ཏེ། ཞེས་འབྱུང་བ་ལྟར། གཞི་ཉན་ཐོས་ཀྱི་སོ་ཐར་ལ་བསམ་པས་ཁྱད་པར་དུ་ཕྱེ་བ་ནི་ཐེག་ཆེན་སོ་ཐར་གྱི་མཚན་གཞི་ཡིན་ལ། དེའང་ཐོག་མར་སྡོམ་པ་བླང་བའི་དུས་ཉིད་ནས་གཞན་དོན་དུ་རྫོགས་པའི་བྱང་ཆུབ་ཐོབ་པའི་དོན་ལ་དམིགས་པའམ། སྐབས་དེར་སེམས་བསྐྱེད་དེ་ལྟ་བུ་མ་ཤེས་ཀྱང་སླད་ནས་དེ་ལྟ་བུའི་སེམས་བསྐྱེད་པས་ཀྱང་ཐེག་ཆེན་སོ་ཐར་དུ་འགྱུར་བར་གསུངས་སོ། ། ཇ༢ གཉིས་པ་[ཆོ་གའི་ཁྱད་པར་]ནི། ཆོ་ག་ཐུན་མོང་ཉན་ཐོས་ལུགས་ལྟར་ལ། ། ཐུན་མིན་གསོ་སྦྱོང་སྡོམ་སོགས་གོང་མ་དང༌། ། ཐུན་མོང་སྨོན་སེམས་སྟ་གོན་དག་ལས་ཐོབ། ། སྡོམ་པ་འབོགས་པའི་ཆོ་ག་ལ་གསུམ། ཉན་ཐོས་དང་ཐུན་མོང་བའི་ཐེག་ཆེན་སོ་ཐར་ནི། བསམ་པ་ཐེག་ཆེན་སེམས་བསྐྱེད་ཀྱིས་ཟིན་ཅིང་ཆོ་ག་ཉན་ཐོས་ལྟར་བྱས་པའི་རིས་བརྒྱད་དོ། ། ཆོ་ག་ཐུན་མོང་མིན་པའི་ཐེག་ཆེན་སོ་ཐར་ནི། སྔོན་ཆོག་བྱམས་པ་འཇམ་དབྱངས་སོགས་ཀྱིས་འགྲོ་བ་མང་པོ་བསྙེན་རྫོགས་མཛད་པར་བཤད་པ་ལྟ་བུ་དང༌། ད་ལྟར་གྱི་ཆོ་ག་དོན་ཞགས་ལས་བཤད་པའི་གསོ་སྦྱོང་གི་སྡོམ་པ་ལ་སོགས་པའོ། ། ཆོ་ག་གོང་མ་དང་ཐུན་མོང་བའི་ཐེག་ཆེན་སོ་ཐར་ནི། སྨོན་སེམས་ཀྱི་སྐབས་སུ་ཐོབ་པའི་སོ་ཐར་དང༌། དབང་གི་སྟ་གོན་དག་ལས་ཐོབ་པའི་སོ་ཐར་ལྟ་བུའོ། ། ཇ༣ གསུམ་པ་[བླང་ཡུལ་གྱི་་ཁྱད་པར་]ནི། བླང་ཡུལ་རབ་བྱུང་ཁྱིམ་པ་སྡོམ་ལྡན་ཏེ། ། ཐུན་མོང་བའི་སྡོམ་པ་བླང་བའི་ཡུལ་ནི་རབ་བྱུང་གི་དགེ་འདུན་མཚན་ཉིད་ལྡན་པ་དང༌། ཐུན་མིན་གསོ་སྦྱོང་ལ་སོགས་པ་ཆོ་འཕྲུལ་བསྟན་པའི་མདོ་ལས་བཤད་པ་བཞིན་དུ་ཁྱིམ་པའི་ཆ་ལུགས་ཅན་གྱི་སྡོམ་ལྡན་ལས་(༤༧ན)ཀྱང་བླང་དུ་རུང་ངོ༌། ། ཇ༤ བཞི་པ་[རྟེན་གྱི་ཁྱད་པར་]ནི། རྟེན་ཀྱང་ཐུན་མོང་དེ་བཞིན་ཐུན་མིན་ནི། ། སེམས་བསྐྱེད་གང་རུང་དག་ལ་སྡོམ་འདི་སྐྱེ། ། སྡོམ་པ་དེ་བླང་བའི་རྟེན་ཀྱང་ཉན་ཐོས་དང་ཐུན་མོང་བ་ནི་དེ་ནས་བཤད་པ་བཞིན་དུ་དགོས་ཤིང༌། ཐུན་མོང་མིན་པ་རྣམས་ནི་ཐེག་ཆེན་སེམས་བསྐྱེད་གང་ལ་འབོགས་རུང་བ་དེ་ལ་སྡོམ་པ་འདིའང་སྐྱེ་བ་ཡིན་ནོ། ། ཇ༥ ལྔ་པ་[གནང་བཀག་གི་ཁྱད་པར་]ནི། དགོས་པ་ཁྱད་པར་ཅན་ལ་སྤང་བདུན་གནང༌། ། བསླབ་བྱ་ཆོ་ག་ཐུན་མོང་བས་ནི་རང་གིས་གང་བླངས་པའི་སོ་སོ་ཐར་པ་དེ་དགག་དགོས་ཁྱད་པར་ཅན་མེད་ཚེ་ཉན་ཐོས་ཀྱི་ཇི་ལྟ་བ་བཞིན་བསྲུང་དགོས་ཏེ། སྡོམ་པ་གཉིས་ཀྱི་བཅས་པ་ལས་དགོས་མེད་འདའ་བ་རྡོ་རྗེ་ཐེག་པའི་སྐབས་སུ་ལྟུང་བར་གསུངས་པའི་ཕྱིར། སེམས་ཅན་གྱི་དོན་དུ་འགྱུར་བ་སོགས་དགོས་པ་ཁྱད་པར་ཅན་ཡོད་ན་ལུས་ངག་གི་སྤོང་བདུན་ཁ་ན་མ་ཐོ་བ་ཐམས་ཅད་གནང་སྟེ། སྤྱོད་འཇུག་ལས། ཐུགས་རྗེ་མངའ་བས་རིང་གཟིགས་པས། ། བཀག་པ་རྣམས་ཀྱང་དེ་ལ་གནང༌། ། ཞེས་པ་ལྟར་རོ། ། ཆོ་ག་ཐུན་མོང་མིན་པ་ལས་གསོ་སྦྱོང་རང་གིས་ལེན་པ་ནི་བསྙེན་གནས་དང་བསྲུང་བྱ་ཁྱད་པར་མེད་དོ། ། ཇ༦ དྲུག་པ་[གསོ་ཚུལ་གྱི་ཁྱད་པར་]ནི། ལྟུང་བ་འཆབ་བཅས་བཤགས་བསྡོམས་བླང་དུ་རུང༌། ། ཡན་ལག་ལྟུང་བ་སྟོབས་བཞིས་བཤགས་པས་འདག ། བསམ་པས་ལྟུང་བ་ལས་ལྡང་ཆད་པས་མིན། ། ཉན་ཐོས་དང་ཐུན་མོང་བ་ནི་ཕམ་པ་འཆབ་བཅས་ལ་སྡོམ་པ་སླར་བླང་དུ་མེད་པར་འདུལ་འཛིན་ཕལ་ཆེར་གྱིས་བཤད་པ་ནི་ལག་ལེན་དོགས་པའི་ཕྱོགས་ཡིན་པས་ཤིན་ཏུ་ལེགས་ལ། རྗེ་ཕྲིན་ལས་པ་སོགས་ཀྱིས་རྩ་བའི་ལྟུང་བ་འཆབ་བཅས་འཆབ་མེད་གང་བྱུང་ཡང་འགྱོད་པ་དང་བཅས་པས་བཤགས་ཤིང་སྡོམ་པ་སླར་བླང་བའི་སྒོ་ནས་གསོར་རུང་སྟེ། འདི་དག་ཐེག་ཆེན་སེམས་བསྐྱེད་ཀྱིས་ཟིན་པའི་སྡོམ་པ་ཡིན་པའི་ཕྱིར། ཡན་ལག་གི་ལྟུང་བ་རྣམས་ནི་སྟོབས་བཞིའི་བཤགས་པ་ཚུལ་བཞིན་བྱས་པའི་སྒོ་ནས་ཕྱིར་བཅོས་པས་འདག་པར་གསུངས་སོ། །(༤༧བ) ཕྱིར་བཅོས་སྔ་ཕྱིར་བཤད་པ་ཐམས་ཅད་ཀྱང་འགྱོད་པ་དྲག་པོ་དང་ངོ་ཚ་ཁྲེལ་ཡོད་ཀྱི་བསམ་པ་དང་ལྡན་པས་ལྟུང་བ་ལས་ལྡང་ནུས་ཀྱི། དེ་དག་ཇི་བཞིན་མེད་ན་ཆད་ལས་ཙམ་ཉམས་སུ་མྱོང་ཡང་ལྟུང་བ་ལས་ལྡང་ནུས་པ་མ་ཡིན་པས། དེ་ལ་དགོངས་ནས་ངོ་ཚ་ཆེན་པོ་དང་ལྡན་པ་དང་སྡེ་སྣོད་འཛིན་པས་ནི་ལྟུང་བ་ཐམས་ཅད་བཤགས་པ་ཁོ་ནས་འདག་པར་བཤད་པ་ཡིན་ནོ། ། ཇ༧ བདུན་པ་[གཏོང་མི་གཏོང་གི་ཁྱད་པར་]ནི། ལོག་ལྟ་ཕམ་དང་བསླབ་པ་འབུལ་བ་རྣམས། ། མ་གཏོགས་གཏོང་རྒྱུ་གཞན་གྱིས་གཏོང་མི་འགྱུར། ། ལོག་ལྟ་སྐྱེས་པས་དགེ་རྩ་ཆད་པ། ཕམ་པ་བྱུང་བ། བསླབ་པ་ཕུལ་བ་རྣམས་ཀྱིས་ནི་སྡོམ་པ་འཇིག་པར་འགྱུར་ཞིང༌། དེ་དག་མ་གཏོགས་ཤི་བ་དང་མཚན་འགྱུར་བ་སོགས་གཏོང་རྒྱུ་གཞན་གྱིས་ནི་གཏོང་བར་མི་འགྱུར་ཏེ། ལྟུང་བ་དང་སྡོམ་པ་གཉིས་ཀ་ཤེས་པར་འདོད་པའི་ཕྱིར་རོ། །ཞེས་བཤད་དོ། ། ཆ༣ གསུམ་པ་སོ་ཐར་གྱི་སྡོམ་པའི་སྙིང་པོ་མདོར་བསྡུ་བ་ནི། མདོར་ན་སྡིག་པ་སྤང་ཞིང་དགེ་བ་སྒྲུབ། ། རང་སེམས་འདུལ་ལ་འདུལ་བའི་སྡེ་སྣོད་འདུས། ། གོང་དུ་སྨོས་པའི་བསླབ་བྱ་ཐམས་ཅད་མདོར་བསྡུ་ན། བཅས་པ་དང་རང་བཞིན་གྱི་ཁ་ན་མ་ཐོ་བའི་སྡིག་པ་ཐམས་ཅད་སྤང་ཞིང༌། སྒོ་གསུམ་དང་འབྲེལ་བའི་ཆོས་དཀར་དགེ་བ་མཐའ་དག་སྒྲུབ་པ་དང༌། དགེ་སྡིག་ཐམས་ཅད་ཀྱི་རྩ་བ་རང་སེམས་རྣམ་པར་རྟོག་པའི་གཞན་དབང་དུ་གྱུར་པ་འདི་ཉིད་དྲན་པ་དང་ཤེས་བཞིན་གྱི་གཉེན་པོས་འདུལ་བར་བརྩོན་པ་ལ་འདུལ་བའི་སྡེ་སྣོད་ཀྱི་དོན་ཐམས་ཅད་འདུ་སྟེ། གསོ་སྦྱོང་གི་ཚིགས་སུ་བཅད་