Tibetan
རོ། ། ཆ༣ གསུམ་པ་[ས་མཚམས་ཀྱི་སྒོ་ནས་དབྱེ་བ་]ནི། ས་མཚམས་མོས་བསམ་རྣམ་སྨིན་སྒྲིབ་ཀུན་སྤངས། ། བགྲོད་པའི་ས་མཚམས་ཀྱི་སྒོ་ནས་དབྱེ་ན། མདོ་སྡེ་རྒྱན་ལས། སེམས་བསྐྱེད་དེ་ནི་ས་རྣམས་ལ། ། མོས་དང་ལྷག་བསམ་དག་པ་དང༌། ། རྣམ་པར་སྨིན་པ་གཞན་དུ་འདོད། ། དེ་བཞིན་སྒྲིབ་པ་སྤངས་པའོ། ། ཞེས་པ་ལྟར། ཚོགས་སྦྱོར་ལ་མོས་པས་ཐོབ་པ། མ་དག་ས་བདུན་ལ་ལྷག་བསམ་དག་པ། དག་པ་ས་གསུམ་ལ་རྣམ་པར་སྨིན་པ། སངས་རྒྱས་ཀྱི་སར་སྒྲིབ་པ་སྤངས་པའི་སེམས་བསྐྱེད་དེ་བཞིའོ། ། ཆ༤ བཞི་པ་[རྟེན་གྱི་སྒོ་ནས་དབྱེ་བ་]ནི། ས་གསེར་ཟླ་སོགས་རྟེན་གྱིས་ཉི་ཤུ་གཉིས། ། ས་གསེར་ཟླ་བ་ལ་སོགས་དཔེ་གྲོགས་ཆོས་གསུམ་སྦྱར་ཏེ་རྟེན་ནམ་ས་མཚམས་ཀྱིས་དབྱེ་ན་ཉི་ཤུ་རྩ་གཉིས་སུ་གྱུར་ཏེ། མངོན་རྟོགས་རྒྱན་ལས། དེ་ཡང་ས་གསེར་ཟླ་བ་མེ། ། གཏེར་དང་རིན་ཆེན་འབྱུང་གནས་མཚོ། ། རྡོ་རྗེ་རི་སྨན་བཤེས་གཉེན་དང༌། ། ཡིད་བཞིན་ནོར་བུ་ཉི་མ་ཀླུ། ། རྒྱལ་པོ་མཛོད་དང་ལམ་པོ་ཆེ། ། གཞོན་པ་བཀོད་མའི་ཆུ་དང་ནི། ། སྒྲ་བརྙན་ཆུ་བོ་སྤྲིན་རྣམས་ཀྱིས། ། རྣམ་པ་ཉི་ཤུ་རྩ་གཉིས་སོ། ། ཞེས་དཔེ་ཉེར་གཉིས་ཀྱིས་མཚོན་པའི་དོན་ནི་རིམ་པ་ཇི་ལྟ་བར། འདུན་(༥༢བ)པ་དང༌། བསམ་པ་དང༌། ལྷག་པའི་བསམ་པ་དང༌། སྦྱོར་བ་དང༌། སྦྱིན་པ་ནས་ཡེ་ཤེས་ཀྱི་བར་ཕར་ཕྱིན་བཅུ་དང་། མངོན་ཤེས་དང༌། ཚོགས་གཉིས་དང༌། བྱང་ཕྱོགས་དང་མཐུན་པའི་ཆོས་དང༌། ཞི་ལྷག་དང༌། གཟུངས་སྤོབས་དང༌། ཆོས་ཀྱི་དགའ་སྟོན་དང་བགྲོད་པ་གཅིག་པའི་ལམ་དང༌། ཆོས་ཀྱི་སྐུ་དང་ལྡན་པ་རྣམས་ཏེ། འདུན་པ་ས་ལྟ་བུ་ནས་ཆོས་སྐུ་དང་མཚུངས་པར་ལྡན་པ་སྤྲིན་ལྟ་བུའི་བར་དུ་སྦྱར་རོ། ། དེ་ལ་ས་མཚམས་ནི། འདུན་པ་སོགས་གསུམ་ཚོགས་ལམ་གསུམ་ནའོ། ། སྦྱོར་བ་ནི། སྦྱོར་ལམ་ནའོ། ། སྦྱིན་པ་ནས་ཡེ་ཤེས་ཀྱི་བར་ཕར་ཕྱིན་བཅུ་ནི། མཐོང་སྒོམ་གྱིས་བསྡུས་པའི་ས་བཅུ་ནའོ། ། མངོན་ཤེས་ནས་གཟུངས་སྤོབས་ཀྱི་བར་ལྔ་ནི། ཁྱད་པར་གྱི་ལམ་དག་པ་ས་གསུམ་ཀ་ལ་ཁྱབ་པར་ཡོད་དོ། ། ཆོས་ཀྱི་དགའ་སྟོན་སོགས་གསུམ་ནི། སངས་རྒྱས་ཀྱི་ས་ཞེས་ཐེག་ཆེན་དགྲ་བཅོམ་ཞུགས་པའི་ས་སྟེ། ས་བཅུ་པའི་སྦྱོར་དངོས་རྗེས་གསུམ་ན་ཡོད་དོ། ། དེའང་། ས་སོགས་དཔེ་དང༌། འདུན་པ་སོགས་གྲོགས་དང༌། འདུན་པ་དེ་ཆོས་དཀར་པོ་ཐམས་ཅད་ཀྱི་གཞིར་གྱུར་པས་ས་དང་ཆོས་མཚུངས་པ་སྟེ། སྦྱོར་ངག་དགོད་ན། གྲོགས་བྱང་ཆུབ་དོན་གཉེར་གྱི་འདུན་པ་དང་མཚུངས་པར་ལྡན་པའི་སེམས་བསྐྱེད་ཆོས་ཅན། དཔེ་ས་ལྟ་བུ་ཡིན་ཏེ། ཆོས་དཀར་པོ་ཐམས་ཅད་བསྐྱེད་པའི་གཞིའི་དངོས་པོར་བྱེད་པས་མཐུན་པའི་ཕྱིར། ཞེས་ཐམས་ཅད་ལ་འགྲེ་ཤེས་པར་བྱའོ། ། ཆ༥ ལྔ་པ་[ཡུལ་གྱི་སྒོ་ནས་དབྱེ་བ་]ནི། ཡུལ་གྱི་སྒོ་ནས་ཀུན་རྫོབ་དོན་དམ་ཚུལ། ། ཡུལ་དུ་བྱེད་པའི་སྒོ་ནས་དབྱེ་ན། ཀུན་རྫོབ་དང་། དོན་དམ་པའི་ཚུལ་ཅན་གཉིས་ཏེ། སྔ་མ་སྨོན་འཇུག་གི་སེམས་དང༌། ཕྱི་མ་དངོས་ནི་འཕགས་རྒྱུད་ཀྱི་རྣམ་པར་མི་རྟོག་པའི་ཡེ་ཤེས་ལ་བྱ་ཞིང༌། རྗེས་མཐུན་པ་ནི་ལས་དང་པོ་བའི་གནས་སྐབས་སུའང་ཡོད་དོ། ། ཆ༦ དྲུག་པ་[ཆོ་གའི་སྒོ་ནས་དབྱེ་བ་]ནི། ཆོ་ག་གསུམ་ལས། ཞེས་པ་སྟེ། ཆོ་གའི་སྒོ་ནས་དབྱེ་ན། སོ་ཐར་དང་ཆོ་ག་ཐུན་མོང་བའི་བྱང་སྡོམ། ཆོ་ག་ཐུན་མོང་མིན་པའི་བྱང་(༥༣ན)སྡོམ། དབང་བསྐུར་དང་ཆོ་ག་ཐུན་མོང་བའི་བྱང་སྡོམ་དང་གསུམ། དང་པོ་ནི། ཉན་ཐོས་ཀྱི་སྡོམ་པའི་སྐབས་བཤད་པའི་ཐེག་ཆེན་སོ་ཐར་རྣམས་སོ། ། གཉིས་པ་ནི། དབུ་སེམས་གང་རུང་གི་ཆོ་གས་ཐོབ་པའི་སྨོན་འཇུག་གི་སྡོམ་པ་ལྟ་བུའོ། ། གསུམ་པ་ནི། དབང་གི་སྟ་གོན་སྐབས་ཐོབ་པའི་བྱང་སྡོམ་དང༌། དངོས་གཞིའི་སྐབས་ཐོབ་པའི་སྔགས་སྡོམ་ལྟ་བུའོ། ། ཅ༤ རྩ་བའི་བཞི་པ་ཤིང་རྟ་སོ་སོའི་སྲོལ་བཤད་པ་ལ་གཉིས། ཆ༡ སྤྱིར་བསྟན། ཆ༢ བྱེ་བྲག་ཏུ་དབྱེ་བའོ། ། ཆ༡ དང་པོ་ནི། ཐུན་མོང་མིན་པ་ལ། ། ཤིང་རྟའི་སྲོལ་གཉིས་རྗེས་འབྲང་དེ་བཞིན་ནོ། ། ཆོ་ག་ཐུན་མོང་མིན་པ་དེ་ལའང་ཤིང་རྟའི་སྲོལ་གཉིས་སུ་གྲགས་ཤིང༌། རྒྱ་བོད་དུ་རྗེས་འབྲང་ཡང་དེ་བཞིན་སོ་སོར་བྱུང་སྟེ། དང་པོ་ནི། རྗེ་བཙུན་འཇམ་དབྱངས་ནས་འཕགས་པ་ཀླུ་སྒྲུབ་ཡབ་སྲས་ལ་བརྒྱུད་དེ་རྒྱལ་སྲས་ཞི་བ་ལྷའི་ཕྱག་སྲོལ་ཇོ་བོ་པུཎྱེ་ཤྲཱི་ལས་བྱུང་བ་རྗེ་བཙུན་ས་སྐྱ་པ་རྣམས་ཀྱི་ཕྱག་ལེན་དུ་མཛད་པ་འདི་ཉིད་ཡིན་ལ། དེའང་ཀླུ་སྒྲུབ་ཀྱི་སེམས་བསྐྱེད་ཀྱི་ཆོ་ག་དང༌། ཛེ་ཏཱ་རིའི་ཡི་དམ་བླངས་པའི་ཆོ་ག་དང༌། ཞི་བ་ལྷའི་སྤྱོད་འཇུག་བསླབ་བཏུས་སོགས་ལས་འབྱུང་བ་ལྟར་རོ། ། གཉིས་པ་ནི། འཕགས་པ་བྱམས་པ་ནས་ཐོགས་མེད་སྐུ་མཆེད་ལ་བརྒྱུད་དེ་སློབ་དཔོན་ཙནྡྲ་གོ་མཱིའི་ཕྱག་སྲོལ་ཇོ་བོ་རྗེ་ལས་བྱུང་བ་བཀའ་གདམས་པ་དང་མཉམ་མེད་དྭགས་པོ་བཀའ་བརྒྱུད་པ་རྣམས་ཀྱི་ཕྱག་ལེན་དུ་མཛད་པ་འདི་ཉིད་ཡིན་ལ། དེའང་བྱང་ས་དང་སྡོམ་པ་ཉི་ཤུ་པ་སོགས་ལས་འབྱུང་བ་ལྟར་རོ། ། བོད་འདིར་ཀླུ་ཐོགས་རྣམ་གཉིས་དབུ་སེམས་ལྟ་བུའི་རྐང་གཙུགས་མཁན་དུ་བཞེད་པ་མང་བས། སེམས་བསྐྱེད་ལུགས་གཉིས་ཀྱང་། དབུ་སེམས་ཀྱི་ལུགས་གཉིས་ཞེས་ཤིན་ཏུ་ཐ་དད་ཅིང་མཆོག་དམན་ཆེ་བར་མཛད་ལ། རྗེ་ཟླ་འོད་བཞོན་ནུས་དབུ་སེམས་ཀྱི་མིང་མ་བཏགས། སློབ་དཔོན་ཨ་བྷ་ཡས་དེ་གཉིས་ཁྱད་པར་མེད་པར་བཞེད་ལ། ཀུན་མཁྱེན་པད་དཀར་ཞབས་སོགས་ཀྱིས་དེ་མཚུངས་སུ་(༥༣བ)སྒྲུབ་ཅིང་། སྔ་མ་ལ་ལུང་རིགས་ཀྱིས་འགོག་པར་མཛད། དཔལ་ལྡན་གཙུག་ལག་ཕྲེང་བ་སོགས་ཀྱང་རྗེ་སྒམ་པོ་པའི་རྗེས་སུ་འབྲང་ངོ༌། ། ཡང་གྲུབ་ཆེན་བི་རཱུ་པ་དང་ནཱ་རོ་པའི་གདམས་ངག་རྗེ་བཙུན་ས་སྐྱ་པ་ཆེན་པོ་ལ་བཀའ་བབས་པ་དབང་གི་སྔོན་འགྲོའི་སེམས་བསྐྱེད་ཀྱི་ཆོ་ག་དབུ་མ་དང་ཆ་མཐུན་པ་ཟུར་དུ་བཞུགས་ཀྱང་ཤིང་རྟའི་རིང་སྲོལ་ལོགས་སུ་མི་བགྲང་ངོ༌། ། ཆ༢ གཉིས་པ་བྱེ་བྲག་ཏུ་དབྱེ་བ་ལ་གཉིས། ཇ༡ ཟབ་མོ་ལྟ་བརྒྱུད་པའི་ལུགས། ཇ༢ རྒྱ་ཆེན་སྤྱོད་བརྒྱུད་པའི་ལུགས་སོ། ། ཇ༡ དང་པོ་ལ་ལྔ། ཉ༡ མ་ཐོབ་པ་འཐོབ་བྱེད། ཉ༢ ཐོབ་པ་མི་ཉམས་པར་སྲུང་ཚུལ། ཉ༣ སྡོམ་པ་གཏོང་བའི་ཚུལ། ཉ༤ ཉམས་ན་ཕྱིར་བཅོས། ཉ༥ འཇུག་པ་འཕྲོས་སུ་སྨོས་པའོ། ། ཉ༡ དང་པོ་ནི། ཟབ་མོ་ལྟ་བརྒྱུད་ལུགས་ལ་བརྡ་འཕྲོད་པའི། ། འགྲོ་བ་གང་རུང་རྟེན་ནམ་བླ་མ་ལས། ། བསགས་སྦྱོང་སྔོན་འགྲོས་སྨོན་འཇུག་ཆབ་གཅིག་ལེན། ། ཟབ་མོ་ལྟ་བརྒྱུད་པའི་ལུགས་ལ། གང་གིས་ལེན་པའི་རྟེན་ནི། བརྡ་འཕྲོད་ཅིང་དོན་གོ་ལ་ལེན་འདོད་ཡོད་པའི་འགྲོ་བ་མཐའ་དག་ལ་བྱང་སྡོམ་སྐྱེ་བར་བཞེད་དེ། སྡོང་པོ་བཀོད་པའི་མདོར་འཇམ་དཔལ་གྱིས་རྒྱ་མཚོའི་ཀླུ་སྟོང་ཕྲག་གསུམ་སེམས་བསྐྱེད་ལ་བཀོད་པར་གསུངས་པ་དང༌། བསྐལ་བཟང་ལས། རྒྱལ་བ་ཕན་བཞེད་གྲོང་དཔོན་གྱུར་པའི་ཚེ། ། དེ་བཞིན་གཤེགས་པས་བསོད་ནམས་འོད་དེ་ལ། ། ཉིན་གཅིག་སྲོག་གཅོད་སྡོམ་པ་བླངས་ནས་ཀྱང༌། ། དང་པོར་བྱང་ཆུབ་མཆོག་ཏུ་སེམས་བསྐྱེད་དོ། ། ཞེས་དང༌། གཙུག་ན་རིན་ཆེན་གྱིས་ཞུས་པའི་མདོར། ལྷ་དང་མིའི་སྲོག་ཆགས་ཉི་ཁྲིས་བྱང་ཆུབ་ཏུ་སེམས་བསྐྱེད་པར་གསུངས་པ་སོགས་པ་ལས་ཤེས་སོ། ། མཉམ་མེད་དྭགས་པོའི་བཞེད་པས། ཐེག་པ་ཆེན་པོའི་རིགས་ཡོད་ཅིང་སད་པ་དང༌། དཀོན་མཆོག་ལ་སྐྱབས་སུ་སོང་བ་ནི་སྨོན་སེམས་སྐྱེ་བའི་རྟེན་དང༌། དེའི་སྟེང་དུ་བསྙེན་གནས་ཙམ་མ་གཏོགས་པའི་སོ་ཐར་རིས་བདུན་གང་རུང་དང་ལྡན་(༥༤ན)ཅིང་སྨོན་པའི་སེམས་སྐྱེད་པ་ནི་འཇུག་སྡོམ་གྱི་རྟེན་དུ་དགོས་སོ། ། བླང་བའི་ཡུལ་ནི། རྟེན་བླ་མ་ལས་བླངས་ཏེ། བླ་མའི་མཚན་ཉིད་གོང་སྨོས་བསླབ་སྤྱོད་ལས་བཤད་པ་ལྟར་དང༌། མ་རྙེད་ན་རྟེན་ཁྱད་པར་ཅན་གྱི་དྲུང་ངམ། དེའང་མ་འབྱོར་ན་མདུན་གྱི་ནམ་མཁར་སངས་རྒྱས་བྱང་སེམས་བསྒོམས་པའི་དྲུང་དུ་རང་ཉིད་ཀྱིས་ལེན་པར་བཤད། ལེན་པའི་ཆོ་ག་ནི། བླ་མ་ཡོད་ན་མཎྜལ་དང་གསོལ་བ་བཏབ། སྦྱོར་བ་ཡན་ལག་བདུན་པས་རྒྱུད་སྦྱོང་ཞིང་ཁྱད་པར་གསུམ་ལ་སྐྱབས་སུ་འགྲོ། དངོས་གཞི་སྨོན་འཇུག་གི་སེམས་བསྐྱེད་སྡོམ་པ་ཆབ་གཅིག་ཏུ་ལེན། རྗེས་རང་གཞན་དགའ་བ་སྒོམ་ཞིང་གཟེངས་བསྟོད། བསླབ་པ་བརྗོད་ཅིང་གཏང་རག་འབུལ། རང་གིས་ལེན་ན་འགོ་འཇུག་མ་གཏོགས་པ་ཚང་བར་བྱ་བའོ། །རང་གིས་བླངས་པས་སེམས་བསྐྱེད་ཀྱི་ངོ་བོ་ཙམ་ནི་སྐྱེ་མོད། སྡོམ་པས་ཟིན་པ་ལ་གྲོགས་སྟོབས་རྒྱུ་སྟོབས་ལ་སོགས་པ་ཚོགས་དགོས་པ་མཁས་པ་རྣམས་བཞེད་དོ། ། ཉ༢ གཉིས་པ་བསླབ་བྱ་སྲུང་ཚུལ་ལ་གཉིས། ཏ༡ རྩ་བ་དང༌། ཏ༢ ཡན་ལག་གོ། ། ཏ༡ དང་པོ་ལ་གསུམ། ཐ༡ དབང་རྣོན་ལ་བཅུ་བཞི། ཐ༢ དབང་འབྲིང་ལ་བཞི། ཐ༣ དབང་རྟུལ་ལ་གཅིག་ཏུ་བསྟན་པའོ། ། ཐ༡ དང་པོ་ནི། བསྲུང་བྱ་རྩ་ལྟུང་དབང་རབ་བཅུ་བཞི་སྟེ། ། དཀོན་མཆོག་དཀོར་འཕྲོག་ཆོས་སྤོང་ཚུལ་འཆལ་གཞོམ། ། མཚམས་མེད་ལོག་ལྟ་རྒྱལ་པོར་འབྱུང་ཉེ་ལྔ། ། བསྲུང་བའི་བསླབ་བྱ་རྩ་བའི་ལྟུང་བ་བཅུ་བཞི་ནམ་སྙིང་གི་མདོའི་དགོངས་དོན་བསླབ་བཏུས་སུ་བཤད་པ་སྟེ། དེའང་སྐུ་གསུང་ཐུགས་རྟེན་དང་དགེ་འདུན་ལ་ཕུལ་བའི་དཀོར་འཕྲོག་པ་དང༌། ཐེག་ཆེན་ཐེག་དམན་གྱི་ཆོས་སྤོང་བ་དང༌། ཚུལ་ཁྲིམས་ལྡན་པ་ལྟ་ཅི་སྨོས་ཚུལ་འཆལ་ཡིན་ཀྱང་རུང་རབ་བྱུང་གི་རྟགས་ཡོད་པ་ཙམ་ཚུན་གྱི་གང་ཟག་ལ་གནོད་པར་བྱེད་པ་དང༌། ཕ་མ་དང་དགྲ་བཅོམ་བསད་པ་དང་དགེ་འདུན་གྱི་སྡེ་གཉིས་སུ་དབྱེ་བའི་དབྱེན་དང་(༥༤བ)སངས་རྒྱས་ལ་ངན་སེམས་ཀྱིས་ཁྲག་འབྱིན་པ་སྟེ་མཚམས་མེད་ལྔ་པོ་དེ་ལས་གང་རུང་བྱས་པ་དང༌། ལས་ཀྱི་འབྲས་བུ་དང་ཚེ་ཕྱི་མ་མེད་པར་སྨྲ་ཞིང་མི་དགེ་བ་ལ་སྤྱད་པར་བྱེད་པའི་ཆད་ལྟ་འཛིན་པ་སྟེ་དེ་ལྔ་ནི་བྱང་སེམས་རྒྱལ་པོ་ལ་གཙོ་བོར་འབྱུང་ཉེ་བ་ལྔའོ། ། དང་པོ་བཞི་དང་གྲོང་ཁྱེར་སོགས་གཞོམ་ལྔ། ། བློན་པོར་འབྱུང་ཉེ། ཞེས་པ་ནི། རྒྱལ་པོའི་རྩ་ལྟུང་དང་པོ་བཞི་དང༌། གྲོང་ཁྱེར་ལ་སོགས་པ་གཞོམ་པ་གཅིག་ཏུ་བྱས་པ་སྟེ་གྲོང་སོགས་ནི་མི་རིགས་བཞི་ཡོད་པ་ནི་གྲོང་དང༌། བཟོ་རིགས་བཅོ་བརྒྱད་ཡོད་པ་གྲོང་ཁྱེར་དང༌། གྲོང་ཁྱེར་དུ་མ་ཡོད་པ་གྲོང་བརྡལ་དང༌། གྲོང་བརྡལ་དུ་མ་ཡོད་པ་ཡུལ་ལྗོངས་དང༌། ཡུལ་ལྗོངས་དུ་མ་ཡོད་པ་ཡུལ་འཁོར་ཏེ་དེ་ལྔ་འཇོམས་པ་ནི་བྱང་སེམས་བློན་པོ་ལ་གཙོ་བོར་འབྱུང་བའི་རྩ་ལྟུང་ལྔའོ། ། མ་སྦྱངས་སྟོང་ཉིད་སྟོན། ། བྱང་ཆུབ་ལས་ལྡོག་དམན་སྤོང་མི་ལྡོག་འཛིན། ། བདག་བསྟོད་གཞན་སྨོད་ཟབ་མོ་བཟོད་པར་རློམ། ། ཆད་པ་གཅོད་གཞུག་དཀོར་བརྐུས་དང་དུ་ལེན། ། རྣལ་འབྱོར་འདོར་འཇུག་སྤོང་སྤྱོད་ཀློག་ལ་སྦྱིན། ། ལས་དང་པོ་ཡི་བརྒྱད་ཡིན། ཅེས་པ་ནི། བློ་ཆུང་བློ་མ་སྦྱངས་པ་ལ་སྟོང་པ་ཉིད་ཀྱི་དོན་ཟབ་མོ་བསྟན་པས་དེ་མ་དད་ཅིང་སྐྲག་པར་འགྱུར་ན་དང༌། ཐེག་པ་ཆེན་པོར་ཞུགས་ཟིན་པ་ལ་ཁྱོད་ཀྱིས་ཕར་ཕྱིན་དྲུག་སོགས་ལ་སྦྱང་མི་ནུས་པར་བསྒྲགས་ཏེ་རྫོགས་པའི་བྱང་ཆུབ་ལས་ལྡོག་ཅིང་ཉན་ཐོས་སམ་རང་སངས་རྒྱས་ཀྱི་ཐེག་པར་གཞུག་པ་དང༌། ཉན་ཐོས་ཀྱི་རིགས་ཅན་དགོས་པ་མེད་པར་དམན་པའི་ཐེག་པ་སྤང་བར་གདམས་ནས་ཐེག་ཆེན་ལ་གཞུག་པ་དང༌། ཉན་ཐོས་ཐེག་པ་ཉོན་མོངས་པ་མི་ལྡོག་པར་འཛིན་ཅིང་དགོས་པ་མེད་པར་གཞན་ལའང་འཛིན་དུ་གཞུག་པ་དང༌། རྙེད་བཀུར་ཕྱིར་དུ་བདག་ལ་བསྟོད་མི་འོས་ཀྱང་བསྟོད་ཅིང་གཞན་ལ་སྨད་མི་འོས་ཀྱང་སྨད་པ་དང༌། རྙེད་བཀུར་ཕྱིར་དུ་བདག་གིས་ཆོས་ཟབ་མོ་འདི་ལྟ་བུ་རྟོགས་པས་ཁྱོད་ཀྱིས་ཀྱང་སྒོམས་ཤིག་ཟེར་བ་ལྟ་བུ་ཆོས་ཟབ་མོ་ལ་(༥༥ན)བཟོད་པ་ཐོབ་པར་རློམ་པ་སྟེ་ལྟུང་བ་དྲུག་དང༌། རྩ་ལྟུང་བདུན་པ་ནི། རྒྱལ་རིགས་ལྟ་བུ་དབང་པོ་ཆེ་དང༌། ཆོས་འདི་པའི་དགེ་སྦྱོང་ཕྲ་མོས་ཕྱེ་ནས་དབང་པོ་ཆེའི་ཕྱོགས་ལ་བརྟེན་ཏེ་དགེ་སྦྱོང་ལ་ནོར་གྱི་ཆད་པས་གཅོད་དུ་འཇུག་པ་དང༌། དེའི་རྐྱེན་གྱིས་དགེ་སྦྱོང་གིས་དཀོན་མཆོག་གི་དཀོར་བརྐུས་ནས་ཕྲ་མ་བྱེད་པ་ལ་ལྐོག་བརྔན་དུ་བྱིན་པ། དེ་དག་ཕྲ་མ་བྱེད་པ་རང་གིས་ལེན་ནམ། དབང་པོ་ལ་བྱིན་པས་ནོར་བདག་གིར་བྱས་ན་དེ་གཉིས་ཀ་ལ་ལྟུང་བར་འགྱུར་རོ། ། ལྟུང་བ་བརྒྱད་པ་ནི། ཆོས་ལྡན་གྱི་དགེ་སྦྱོང་ལ་གནོད་པའི་ཁྲིམས་ངན་བཅས་ཏེ་ཞི་གནས་ཀྱིས་མཚོན་པའི་རྣལ་འབྱོར་འདོར་དུ་གཞུག་པ་དང༌། དགེ་སློང་སྤོང་བ་བསམ་གཏན་པའི་ལོངས་སྤྱོད་ཕྲོགས་ནས་ཀློག་པ་ཁ་ཏོན་པ་ལ་སྟེར་བའམ་སྟེར་དུ་འཇུག་པ་སྟེ། ལེན་པ་པོའང་འཕྲོག་པ་པོའི་ཕྱོགས་སུ་གཏོགས་ན་གཉིས་ཀ་ལ་རྩ་ལྟུང་འབྱུང་ངོ༌། ། དེ་དག་ནི་ལས་དང་པོ་བ་ཡི་རྩ་ལྟུང་བརྒྱད་ཡིན་ལ། རྒྱལ་པོ་ལ་ལྔ། བློན་པོའི་ཐུན་མོང་མ་ཡིན་པ་གཅིག །ལས་དང་པོ་བའི་བརྒྱད་བཅས་བསྡོམས་པས་བཅུ་བཞིའོ། ། ཐ༢ གཉིས་པ་[དབང་འབྲིང་ལ་བཞི་]ནི། དབང་འབྲིང་ལ། ། སེམས་འདོར་མི་སྦྱིན་ཁྲོ་དང་ལྟར་སྣང་སྟོན། ། དབང་པོ་འབྲིང་ལ་བཞིར་བསྟན་པ་ནི་ཐབས་ལ་མཁས་པའི་མདོ་དོན་བསླབ་བཏུས་སུ་བཤད་པ་ལྟར་ཏེ། བྱང་ཆུབ་སེམས་ནི་ཡོངས་འདོར་དང༌། ། ཆགས་དང་སེར་སྣ་མི་བཟད་པས། ། སློང་ལ་སྦྱིན་པར་མི་བྱེད་དང༌། ། བསྒྲིམས་ཏེ་དགའ་བར་བྱེད་པ་ན། ། སེམས་ཅན་ལ་ནི་མི་བཟོད་པར། ། ཁྲོས་པས་སེམས་ཅན་བརྡེག་པ་དང༌། ། ཉོན་མོངས་པ་དང་གཞན་མཐུན་པས། ། ཆོས་ལྟར་བཅོས་པ་སྟོན་པའོ། ། ཞེས་གསུངས་པ་ལྟར་རོ། ། ཐ༣ གསུམ་པ་[དབང་རྟུལ་ལ་གཅིག་ཏུ་བསྟན་པ་]ནི། དབང་རྟུལ་སྨོན་སེམས་གཅིག་པུ་བསྲུང་བའོ། ། ཐེག་ཆེན་གྱི་སྒོར་ཞུགས་པའི་དབང་རྟུལ་ལ་སྨོན་སེམས་གཅིག་པུ་བསྲུང་བ་ལ་བསླབ་བྱ་ཐམས་ཅད་འདུས་པ་རྒྱལ་པོ་ལ་གདམས་པའི་མདོ་ལས་གསུངས། འདི་སྤོང་བ་ནི། བྱང་ཆུབ་(༥༥བ)སེམས་དཔའ་དབང་པོ་རྣོ་འབྲིང་རྟུལ་གསུམ་ལ་རྩ་ལྟུང་ཤིན་ཏུ་ལྕི་སྟེ། སྡུད་པ་ལས། གལ་ཏེ་བསྐལ་པ་བྱེ་བར་དགེ་བའི་ལས་ལམ་བཅུ། ། སྤྱོད་ཀྱང་རང་རྒྱལ་དགྲ་བཅོམ་ཉིད་དུ་སེམས་བསྐྱེད་ན། ། དེ་ནི་ཚུལ་ཁྲིམས་སྐྱོན་བྱུང་ཚུལ་ཁྲིམས་ཉམས་པ་སྟེ། ། སེམས་བསྐྱེད་དེ་ནི་ཕས་ཕམ་པས་ཀྱང་ཤིན་ཏུ་ལྕི། ། ཞེས་སོ། ། ཏ༢ གཉིས་པ་ཡན་ལག་གི་ཉེས་བྱས་ནི། ཡན་ལག་བདེ་སྡུག་ཡལ་འདོར་ཉི་ཤུ་བཞི། ། སྒྲུབ་པ་ཡལ་འདོར་བཅུ་དྲུག་རེ་རེ་ལ། ། འཕྲལ་དང་གཏན་གྱི་དབྱེ་བས་བརྒྱད་ཅུའོ། ། བསླབ་བཏུས་ལས་ཡན་ལག་ཉེས་བྱས་བརྒྱད་ཅུར་བཤད་དེ། བདེ་སྡུག་ཡལ་བར་འདོར་བ་ཉེར་བཞི་ནི། གཞན་གྱི་སྡུག་བསྔལ་དང་ཡིད་མི་བདེ་བ་ཞི་བར་ནུས་བཞིན་དུ་ཞི་བར་མི་བྱེད་པ་དང༌། བདེ་བ་དང་ཡིད་བདེ་བ་བསྐྱེད་ནུས་བཞིན་དུ་སྐྱེད་པར་མི་བྱེད་པ་གཉིས་ནི་དབྱེ་གཞི། དེ་གཉིས་ལ་ལུས་དང་སེམས་ཀྱི་རྟེན་སོ་སོས་ཕྱེ་བས་བཞི། དེ་ལ་ད་ལྟ་དང་མ་འོངས་པའི་དུས་ཀྱིས་ཕྱེ་བས་བརྒྱད། དེའི་ཆེད་དུ་སྒོ་གསུམ་མི་བརྩོན་པ་དང༌། ཕན་པའི་རྒྱུ་རྐྱེན་མི་ཚོལ་བ་དང༌། གཉེན་པོའི་ཕྱོགས་ལ་མི་འབད་པ་སྟེ། དེ་ལྟར་རྗེས་སྒྲུབ་ཀྱི་སྒོ་གསུམ་པོ་དེས་ཕྱེ་བས་ཉི་ཤུ་རྩ་བཞིའོ། ། སྒྲུབ་པ་ཡལ་བར་དོར་བ་བཅུ་དྲུག་ནི། སྡུག་བསྔལ་དང་ཡིད་མི་བདེ་བ་ཆེན་པོའི་གཉེན་པོར་ཆུང་ངུ་མི་བསྐྱེད་པ་གཞིར་བཞག་ནས། དེ་གཉིས་ལ་འདི་དང་ཕྱི་མའི་སྐྱེ་བས་ཕྱེ་བ་བཞི། རང་དང་གཞན་གྱི་རྒྱུད་གཉིས་ཀྱིས་ཕྱེ་བས་བཞི། ཡང་བདེ་བ་དང་ཡིད་མི་བདེ་བ་ཆེན་པོའི་ཕྱིར་ཆུང་ངུ་ཉམས་པར་མི་བྱེད་པ་གཞིར་བཞག་ནས། སྔར་ལྟར་སྐྱེ་བ་དང་རྒྱུད་ཀྱིས་ཕྱེ་བས་བརྒྱད་དེ་བཅུ་དྲུག་གོ། ། དེ་ལྟར་བཞི་བཅུ་པོ་རེ་རེ་ལའང་རེ་ཞིག་ཡལ་བར་འདོར་བ་དང༌། གཏན་དུ་ཡལ་བར་འདོར་བ་གཉིས་གཉིས་སུ་ཕྱེ་བས་བརྒྱད་ཅུའོ། ། ཉ༣ གསུམ་པ་གཏོང་ཚུལ་ནི། གཏོང་རྒྱུ་སྐྱབས་འགྲོ་བཏང་སོགས་དྲུག་ཏུ་བཤད། ། རྩ་ལྟུང་བྱུང་ཡང་འཇུག་པའི་ཕྱོགས་འགའ་ལས། ། སྨོན་སེམས་ཡོད་ཚེ་ལྟུང་བས་དེ་(༥༦ན)མི་ཉམས། ། སྡོམ་པ་གཏོང་བའི་རྒྱུ་དམིགས་བསལ་སྐྱབས་འགྲོ་གཏོང་བ་ལ་སོགས་པ་དྲུག་ཏུ་བཤད་དེ། སྐྱབས་འགྲོ་གཏོང་དང་སྨོན་སེམས་ལོག ། བསླབ་པ་ཕུལ་དང་ལོག་ལྟ་སྐྱེས། ། ཉན་རང་ཡིད་བྱེད་སྐྱེས་པ་དང༌། ། སེམས་ཅན་བློ་ཡིས་སྤངས་པ་རྣམས། ། བྱང་སྡོམ་རྩད་ནས་གཏོང་བའི་རྒྱུ། ། རྩ་བའི་ལྟུང་བས་ཉམས་ཤིང་འཇིག ། ཉེས་བྱས་སོགས་ཀྱིས་ན་སྨད་དོ། ། ཞེས་དཔལ་གཙུག་ལག་ཕྲེང་བས་གསུངས་ལ། རྗེ་ཕྲིན་ལས་པས་ནམ་སྙིང་གི་མདོར་གསུངས་པའི་རྩ་ལྟུང་བྱུང་ནའང་འཇུག་པའི་ཕྱོགས་འགའ་ཞིག་ཉམས་པ་ལས། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ་སྙམ་པའི་བསམ་པ་མ་དོར་ན་སྨོན་པ་བྱང་ཆུབ་ཀྱི་སེམས་མི་འདོར་ལ། དེ་ཡོད་ཚེ་ལྟུང་བས་སྡོམ་པ་དེ་རྩད་ནས་མི་ཉམས་པར་བཤད་དོ། ། ཉ༤ བཞི་པ་ཉམས་ན་ཕྱིར་བཅོས་བྱ་བའི་ཚུལ་ནི། ཕྱིར་བཅོས་ནམ་སྙིང་གསོལ་གདབ་ལྟུང་བཤགས་བྱ། ། བཤགས་ཚད་འདས་ན་སྟོབས་བཞིའི་སྒོ་ནས་ལྡངས། ། སྨོན་སེམས་དོར་བའི་དབང་གིས་བྱང་སྡོམ་ལས་ཉམས་ན་ཆོ་གའི་སྒོ་ནས་སླར་གསོ། ནམ་སྙིང་གི་མདོ་ནས་བཤད་པ་ལྟར་གྱི་རྩ་ལྟུང་གང་ཡང་རུང་བ་བྱུང་ན་ཕྱིར་བཅོས་ནི་བྱང་ཆུབ་སེམས་དཔའ་ནམ་མཁའི་སྙིང་པོ་ལ་གསོལ་བ་བཏབ་པས་དེའི་རྨི་ལམ་དུ་ནམ་མཁའི་སྙིང་པོ་བྱོན་པའི་མདུན་དུ་བཤགས་པ་བྱེད་པར་བཤད་དེ། བསླབ་བཏུས་ལས། རྨི་ལམ་འཕགས་པ་ནམ་སྙིང་གི། ། མདུན་དུ་འདུག་སྟེ་བཤགས་པར་བྱ། ། ཞེས་པ་ལྟར་རོ། ། བྱང་སེམས་ཀྱི་བསླབ་བྱ་དང་འགལ་བའི་ལྟུང་བའི་ལྷག་མ་ཕྲ་མོ་རྣམས་ནི་ཉིན་མཚན་དུས་དྲུག་ཏུ་ལྟུང་བ་བཤགས་པ་སྟེ། ཕུང་པོ་གསུམ་པའི་མདོ་འདོན་ཞིང་