Tibetan
པར། སྡིག་པ་ཅི་ཡང་མི་བྱ་ཞིང༌། ། དགེ་བ་ཕུན་སུམ་ཚོགས་པར་སྤྱད། ། རང་གི་སེམས་ནི་ཡོངས་སུ་འདུལ། ། འདི་ནི་སངས་རྒྱས་བསྟན་པ་ཡིན། ། ཞེས་འབྱུང་བ་ཡིན་ནོ། ། ཆ༤ རྩ་བའི་བཞི་པ་འཆལ་ཚུལ་གཉིས་ཀྱི་སྐྱོན་དང་ཡོན་ཏན་མདོར་སྨོས་པ་ནི། ཁྲིམས་འཆལ་ཉེས་པ་ལྕི་ཞིང་ཁྲིམས་ལྡན་ནི། ། ཡོན་ཏན་ཀུན་གཞི་ཆོས་དཀར་མཐའ་དག་སྐྱེད། ། བསླབ་པ་(༤༨ན)བླངས་ནས་ཚུལ་ཁྲིམས་འཆལ་བ་ནི་ཉེས་པ་ཤིན་ཏུ་ལྕི་ཞིང་རྒྱུད་ལ་ཡོན་ཏན་མི་སྐྱེ་སྟེ། ཆོས་བསྒྲགས་ཀྱི་མདོར། ཚུལ་ཁྲིམས་ཉམས་ཤིང་ཞིག་པ་ནི་སྐྱེ་བ་འབུམ་ཕྲག་བརྒྱ་ཡི་བར་དུ་རིགས་དང་བྲལ་ཞིང་བདེ་བ་སྤངས་ཏེ་རྣམ་པར་ལྟུང་བ་ཆེན་པོ་ཉམས་སུ་མྱོང་བར་འགྱུར་རོ། །ཞེས་དང༌། འདུལ་བ་ལུང་དུ་ཚུལ་ཁྲིམས་མ་བསྲུངས་པའི་ཉེས་དམིགས་བཅུ་གསུངས་པའི་ནང་ཚན་དུ། དམ་ཆོས་ཐོས་པར་མི་འགྱུར་ལ། ། ཐོས་པ་མྱུར་དུ་བརྗེད་པར་འགྱུར། ། ས་ལམ་རྟོགས་པའང་ཡོངས་མི་སྐྱེ། ། ཞེས་སོགས་གསུངས་ཤིང༌། ལྟུང་བ་ཆུང་ངུས་ཀྱང་ཉེས་ལྟུང་ཆེན་པོ་བསྐྱེད་པས་ཕྲ་ཞིང་ཕྲ་བ་ནས་བསྲུང་དགོས་ཏེ། ལུང་ལས། གང་ཞིག་སྟོན་པ་ཐུགས་རྗེའི་བསྟན་པ་ལ། ། ཡང་བར་སེམས་ཤིང་ཅུང་ཟད་འདའ་བྱེད་པ། ། དེ་ནི་དེ་ལས་སྡུག་བསྔལ་གཞན་དབང་ཐོབ། ། སྨྱིག་ཚལ་བྲེགས་པས་ཨ་མྲའི་ཚལ་ཉམས་བཞིན། ། འདི་ན་ལ་ལ་རྒྱལ་པོའི་ཚིག་ཆེན་པོ། ། ལན་འགའ་འདས་ནའང་ཆད་པ་ཐོབ་མི་འགྱུར། ། ཐུབ་པའི་བཀའ་ལུང་ཚུལ་མིན་འདས་བྱས་ན། ། དུད་འགྲོར་སྐྱེ་འགྱུར་ཨེ་ལའི་འདབ་ཀླུ་བཞིན། ། ཞེས་གསུངས་ཤིང༌། མདོར་ན། ཕམ་ལྷག་སྦོམ་པོ་ལྟུང་བྱེད་སོར་བཤགས་ཉེས་བྱས་རྣམས་ལས་འདས་ན་རིམ་པར་ཚ་བའི་དམྱལ་བ་ནས་ཡང་སོས་ཀྱི་བར་དུ་སྐྱེ་བར་མདོ་ལས་བཤད་དོ། ། ཚུལ་ཁྲིམས་དང་ལྡན་པ་ནི། ཐེག་པ་མཐའ་དག་གི་ལུང་རྟོགས་ཡོན་ཏན་ཀུན་གྱི་གཞི་དང་གོང་དུ་འཕེལ་བའི་རྐྱེན། ཆོས་དཀར་མཐའ་དག་སྐྱེད་པར་བྱེད་པ་ཡིན་ཏེ། བཤེས་སྤྲིང་ལས། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། ། ཡོན་ཏན་ཀུན་གྱི་གཞི་རྟེན་ལེགས་པར་གསུངས། ། ཞེས་དང༌། ཆོས་བསྒྲགས་ཀྱི་མདོར། ཚུལ་ཁྲིམས་ལྡན་པ་འཇིག་རྟེན་ཀུན་གྱིས་བསྟོད། ། སོགས་ཀྱིས་རྒྱས་པར་བསྟན་ལ། ས་གའི་ལྷས། རབ་བསྔགས་ནོར་ནི་ཕུན་ཚོགས་ཤིང༌། ། ལྷ་ཡི་ཁང་བཟང་དམ་པར་སྐྱེ། ། ཏིང་ངེ་འཛིན་དང་ངེས་འབྱུང་ཐོབ། ། ཚུལ་ཁྲིམས་འདི་ནི་འབྲས་བུ་ཆེ། ། ཞེས་དང༌། (༤༨བ) དགེ་སློང་ལ་རབ་ཏུ་གཅེས་པའི་མདོ་ལས། ཚུལ་ཁྲིམས་བསླབ་པར་རང་ཡིད་ཆེས། ། མི་དེ་ཉི་མ་གཅིག་ལ་ཡང༌། ། བསོད་ནམས་ཕུང་པོ་དཔག་ཏུ་མེད། ། གསོག་ཅིང་སངས་རྒྱས་འབྲས་བུ་འགྲུབ། ། ཅེས་སོགས་གསུངས་སོ། ། མདོར་ན། སྔོན་བསྟན་པ་དར་བའི་དུས་སུ་ལོ་དཔག་ཏུ་མེད་པར་བསླབ་གཞི་ཡོངས་སུ་རྫོགས་པའི་ཚུལ་ཁྲིམས་རྣམ་པར་དག་པ་བསྲུངས་པ་ལས། ད་ལྟ་བསྟན་པ་ནུབ་པ་ལ་ཉེ་བ་འདི་ལྟ་བུའི་དུས་སུ་ཉིན་ཞག་གཅིག་གི་བར་དུ་བསླབ་གཞི་གཅིག་ཙམ་ཞིག་བསྲུངས་པ་ཕན་ཡོན་ཆེ་བར་གསུངས་ཏེ། ཏིང་འཛིན་རྒྱལ་པོ་ལས། བསྐལ་པ་བྱེ་བ་གངྒཱའི་བྱེ་སྙེད་དུ། ། དང་བའི་སེམས་ཀྱིས་ཟས་དང་སྐོམ་རྣམས་དང༌། ། གདུགས་དང་བ་དན་མར་མེའི་ཕྲེང་བ་ཡིས། ། སངས་རྒྱས་བྱེ་བ་ཁྲག་ཁྲིག་རིམ་གྲོ་བྱས། ། གང་ཞིག་དམ་ཆོས་རབ་ཏུ་འཇིག་པ་དང༌། ། བདེ་གཤེགས་བསྟན་པ་འགག་པར་འགྱུར་བའི་ཚེ། ། ཉིན་མཚན་དུ་ནི་བསླབ་པ་གཅིག་སྤྱོད་པ། ། བསོད་ནམས་འདི་ནི་དེ་བས་ཁྱད་པར་འཕགས། ། ཞེས་གསུངས་པས་ཐར་འདོད་རྣམས་ཀྱིས་བསླབ་པ་ལ་ནན་ཏན་དུ་བརྩོན་པར་བྱའོ། ། འདིར་འཕྲོས་དོན་དུ་ཐེག་དམན་སོ་སོ་ཐར་པའི་ལམ་གྱི་རིམ་པ་ཅུང་ཟད་སྨོས་ན། སྤྱིར་ཆོས་འདུལ་གྱི་བརྗོད་བྱ་ཐམས་ཅད་འཕགས་པ་ཐོགས་མེད་ཞབས་ཀྱིས། དགེ་འདུན་བསྡུ་བ་དང༌། ལེགས་པར་བསྡུ་བ་དང༌། བསྡུས་པ་རྣམས་ཅི་བདེར་བྱ་བ་དང༌། མ་འོངས་པ་གཞན་དག་བདེ་བར་འཇུག་པར་འགྱུར་བ་དང་བཞིར་འདུས་པར་གསུངས་པའི། དང་པོ་ནི། འཁོར་རྣམ་བཞི་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ་སྔོན་དང་ད་ལྟར་གྱི་ཆོ་གས་བསྙེན་པར་རྫོགས། གཉིས་པ་ནི། བསླབ་པ་ཇི་ལྟར་འཆའ་བ། འཆའ་བའི་རྒྱུ་ལ་སོགས་པ་གཞི་དང་བཅས། ངེས་པར་འབྱུང་(༤༩ན)བ་དང་བཅས། སྟོན་པ་དང་བཅས། བརྟུལ་བ་དང༌། ཆོ་འཕྲུལ་དང་བཅས་པས་ཆོས་སྟོན། གསུམ་པ་ལ་ལྔའི། དང་པོ་ཡོ་བྱད་རྐྱེན་དུ་འབབ་པ་བསྟེན་པ་ནི། ལོག་འཚོ་སྤངས་ཤིང་ཆོས་དང་མཐུན་པའི་རྙེད་པའི་རྒྱུ་ལས་བྱུང་བའི་དུས་རུང་ཐུན་ཚོད་དུ་རུང་བ་ཞག་བདུན་པ་འཚོ་བཅངས་ཀྱི་སྨན་བཞི་གཙོ་བོར་གྱུར་པའི་ཟས། འཚོ་མཁོ་ལྷག་པའི་ཡོ་བྱད་ཕྲན་ཚེགས་བཅས་པའི་གོས་བཞི། འཚོ་བ་དང་མཁོ་བའི་སྣོད་སྤྱད། དགེ་འདུན་གྱི་གཙུག་ལག་ཁང་དང་གང་ཟག་གི་ཁང་པ་ཤིང་དྲུང་ཁྲི་དང་མལ་ཆ་ལ་སོགས་པ་གནས་དང་གནས་མལ་ལ་ལྟུང་བས་མ་གོས་པར་མཐའ་གཉིས་སྤངས་པའི་ཚུལ་གྱིས་ལོངས་སྤྱད། གཉིས་པ་ཆོས་དང་མི་མཐུན་པའི་གང་ཟག་ཚར་བཅད་པ་ནི། ཕམ་པ་གསོར་མི་རུང་བ་གཞན་དུ་བསྐྲད། དེ་ལས་གཞན་པ་ནན་ཏུར་གྱི་ལས་ཀྱིས་བྱ་བ་ངན་པ་འཕྲོ་གཅོད་པ་དང༌། གླེང་དྲན་གྱིས་ཕྱིར་བཅོས་སུ་གཞུག་ཅིང་རྩོད་པ་ལ་ཞི་བྱེད་ཀྱིས་གཞིལ། གསུམ་པ་འགྱོད་པ་སྐྱེས་པ་སེལ་བ་ནི། འགྱོད་པའི་ཚུལ་ལྔ། བག་ཡོད་པའི་སྐབས་ལྔ། འགྱོད་པ་སེལ་བའི་ཆོས་ལྔ་སྟེ་བཅོ་ལྔ་དང་ལྡན་པས་ལྡང༌། བཞི་པ་ཉོན་མོངས་པའི་ཀུན་ནས་དཀྲིས་པ་གནོན་པ་ནི། བསླབ་པ་སྲུང་བའི་ཐབས་ཡན་ལག་ལྔ་དང་ལྡན་པ་སྟེ། དེའི་དང་པོ་ཟས་གོས་སྣོད་སྤྱད་གནས་མལ་བཞི་ཆོས་ལྡན་ལ་རྟེན་པ་བདེ་བར་གནས་པའི་རྐྱེན་ལ་བརྟེན་ནས་བསྲུང་བ། གཉིས་པ་གནས་ཀྱི་བླ་མའམ། དེ་མ་ཡིན་པའི་གནས་བརྟན་སྡེ་སྣོད་འཛིན་པ་དག་གི་བཀའ་བཞིན་སྒྲུབ་པ་གང་ཟག་གཞན་ལ་བརྟེན་ནས་བསྲུང་བ། གསུམ་པ་ལྟུང་བ་སྡེ་ལྔའི་ངོ་བོ་ལྕི་ཡང་འབྱུང་བའི་རྒྱུ་ལྡང་བའི་ཐབས་རྣམས་ཤེས་པ་སྤང་བྱ་མི་མཐུན་ཕྱོགས་ངོ་ཤེས་པའི་སྒོ་ནས་བསྲུང་བ། བཞི་པ་གསོ་སྦྱོང་དབྱར་གནས་དགག་དབྱེ་ལ་བརྩོན་པ་བསླབ་པ་ཡོངས་སུ་སྦྱོང་བའི་སྒོ་ནས་བསྲུང་བ། ལྔ་པ་རང་གི་བསམ་སྦྱོར་ཕུན་སུམ་ཚོགས་པའི་སྒོ་ནས་(༤༩ན)བསྲུང་བ་སྟེ། འདི་ལ་བསམ་པ་ཕུན་སུམ་ཚོགས་པ་དད་པ་སྙིང་རྗེ་ཤེས་རབ་དྲན་པ་ཤེས་བཞིན་ངོ་ཚ་ཁྲེལ་ཡོད་པ་སྟེ་བརྒྱད་པོ་སྔོན་དུ་འགྲོ་བས་སྦྱོར་བ་ཕུན་སུམ་ཚོགས་པ་ཐོག་མར་མེད་དུ་མི་རུང་བའི་འདུལ་བ་ལ་བསླབ། ལྟུང་བ་མི་འབྱུང་བའི་རྒྱུ་བཞི་ལ་བརྩོན། བསླབ་པ་དང་མི་མཐུན་པའི་ཆོས་ལྔ་སྤང༌། མཐུན་པའི་ཆོས་ལྔ་བརྟེན། ཡོངས་སུ་ཤེས་པའི་ཆོས་ལྔ་དང༌། ཉེ་བར་ཞི་བའི་ཆོས་ལྔ་ཤེས་ནས་བླང་དོར་བྱ་བ་སྟེ་བསླབ་པའི་གནས་དྲུག་ལ་བསླབ་ཅིང༌། བསླབ་པ་ལ་བརྩོན་པའི་ཆོས་ལྔ་དང་སྟོབས་ལྡན་རྣམས་དང་ལྡན་པར་བྱའོ། ། བསམ་སྦྱོར་གཉིས་ཀ་ཕུན་སུམ་ཚོགས་པ་དང་ལྡན་པའི་ཚུལ་ཁྲིམས་སྒོམ་པ་ནི། དགེ་སློང་གནས་བརྟན་དང༌། བར་མ་དང༌། གསར་བུ་ཐམས་ཅད་ཀྱིས་ཀྱང་རབ་ཏུ་བྱུང་བའོ་སྙམ་དུ་སེམས་མངོན་དུ་བཞག་པར་བྱ། སངས་རྒྱས་བཅོམ་ལྡན་འདས་མགོན་མཛད་པ་ལ་མགོན་པོའོ་སྙམ་དུ་འདུ་ཤེས་མངོན་དུ་བཞག་པར་བྱ། མྱ་ངན་ལས་འདས་པ་ལ་གཞོལ་བར་བྱ། བསླབ་པའི་གཞི་ཇི་ལྟ་བུར་བཅས་པ་ལ་མཚུངས་པར་སྤྱད་པར་བྱ། བླ་མའི་ཁྱད་པར་ཆུད་པའི་ཕྱིར་ནན་ཏན་དུ་བྱ། ཞེས་གསུངས་པ་ལྟར་རོ། ། ལྔ་པ་ཉོན་མོངས་པའི་བག་ལ་ཉལ་སྤོང་བ་ནི། ཞི་གནས་ཀྱི་གསོ་སྦྱོང་སྟེ་རྣལ་འབྱོར་སྒོམ་པ་ཡིན་ལ། བླ་མ་རྣལ་འབྱོར་ཤེས་པ་ལ་གསོལ་བ་བཏབ་ནས་བར་ཆད་བཞི་དྲི། གནས་བཞི་བརྟགས་ནས། ཏིང་ངེ་འཛིན་གྱི་ཚོགས་སྲུང་ཞིང་བསགས་པ་དང༌། རབ་ཏུ་དབེན་པ་དང༌། སེམས་རྩེ་གཅིག་པ་དང༌། སྒྲིབ་པ་རྣམ་པར་སྦྱོང་བ་དང༌། ཡིད་ལ་བྱེད་པ་སྒོམ་པ་སྟེ་གནས་ལྔ་ལ་སྦྱར་ཞིང༌། ཞི་རགས་སུ་འདུ་ཤེས་པ་འཇིག་རྟེན་པའི་ལམ་གྱི་ཆགས་བྲལ་དང༌། ལུས་དང་དུས་གསུམ་གྱི་འདུ་བྱེད་ལ་སོ་སོར་རྟོག་པའི་ཞི་གནས་ལ་བརྩོན་པ་སྟེ་འདུ་ཤེས་སྒོམ་པ་དང༌། དྲན་པ་ཉེར་བཞག་བཞི་ལ་སོགས་པ་བྱང་ཆུབ་ཀྱི་ཕྱོགས་བསྒོམ་པ་གཉིས་ཀྱིས་དཀར་པོ་རྣམ་པར་མཐོང་བ་སོགས་ས་བརྒྱད་དང༌། ཚོགས་སྦྱོར་མཐོང་སྒོམ་གྱི་ལམ་རྣམས་བགྲོད་པ་སྟེ། (༥༠ན)དེའང་སེམས་གནས་པའི་ཐབས་དགུས་ཞི་གནས་ཡིད་ལ་བྱེད་པ་དང༌། ཆོས་རྣམས་རབ་ཏུ་འབྱེད་པ་ལ་སོགས་པ་བཞིས་ལྷག་མཐོང་ཡིད་ལ་བྱེད་པ་སྟེ། སེམས་རྩེ་གཅིག་པ་གཉིས་ལ་བརྟེན་ནས། ཀུན་ཏུ་གདུང་བར་འགྱུར་བ་སོགས་ཡིད་ལ་བྱེད་པ་བཞི་ཐོབ་ནས། འཕགས་པའི་བདེན་པ་བཞི་ལས་བརྩམས། རྣམ་པ་མི་རྟག་པ་སོགས་བཅུ་དྲུག་ཏུ་སོ་སོར་རྟོག་པ་མཚན་ཉིད་རབ་ཏུ་རིག་པ་ཡིད་ལ་བྱེད་པས་ཐོས་བསམ་དང་འདྲེས་པ་ཚོགས་ལམ་བགྲོད། དེ་ལས་འདས་ནས་གཅིག་ཏུ་སྒོམ་པའི་རྣམ་པས་མོས་པར་བྱེད་པ་མོས་པ་ལས་བྱུང་བའི་ཡིད་བྱེད་ཀྱིས་སྦྱོར་ལམ་དྲོད་རྩེ་བཟོད་མཆོག་བགྲོད། དེ་ནས་སྔར་བརྩོན་པའི་བདེན་པ་ལ་རྩོལ་མ་ཐག་ཏུ་རྣམ་པར་མི་རྟོག་པ་ཤིན་ཏུ་ངེས་པའི་ཡེ་ཤེས་དང་མངོན་སུམ་གྱི་ཡེ་ཤེས་སྐྱེས་ནས་མཐོང་སྤང་སྤངས་ཏེ་རབ་ཏུ་དབེན་པ་ཡིད་ལ་བྱེད་པ་མཐོང་ལམ་ཐོབ། སྦྱོར་བ་ཡིད་བྱེད་དང་དགའ་བ་སྡུག་པ་ཡིད་ལ་བྱེད་པས་སྒོམ་སྤང་སྤངས་ཤིང་སྒོམ་ལམ་རྣམས་བགྲོད་དེ་སྦྱོར་མཐའ་ཡིད་བྱེད་རྡོ་རྗེ་ལྟ་བུའི་ཏིང་ངེ་འཛིན་སྐྱེས་ནས་སེམས་ཤིན་ཏུ་རྣམ་པར་གྲོལ་བའི་དགྲ་བཅོམ་པ་ཐོབ་པ་ནི་སྦྱོར་བའི་མཐའི་འབྲས་བུ་ཡིད་ལ་བྱེད་པ་སྟེ་དེའི་ཚེ་ཟག་པ་ཐམས་ཅད་ཟད་པ་ཡིན་ལ། རྒྱུན་ཞུགས་སོགས་འབྲས་བུ་གསུམ་པོའང་སྒོམ་སྤང་སྤོང་ཚུལ་ཆེ་ཆུང་གིས་ཐོབ་པའོ། ། བཞི་པ་ནི། དེ་ལྟར་ཚུལ་ཁྲིམས་རྣམ་པར་དག་པ་ལས། བདག་ཉིད་ཕན་ཡོན་བཅུ་དང་ལྡན་པའི་ཚུལ་གྱིས་ཐོབ་པ་རྣམས་བདེ་བར་གནས་པ་དང༌། ལྷ་མི་རྣམས་ལ་ཕན་བདེ་ཕུན་སུམ་ཚོགས་པ་དང་བསྟན་པ་ཡུན་རིང་གནས་པའི་རྒྱུར་འགྱུར་བས་མ་ཐོབ་པ་རྣམས་བདེ་བར་འཇུག་པར་འགྱུར་བའོ། ། སོ་ཐར་གྱི་སྡོམ་པ་རབ་ཏུ་དབྱེ་བའི་སྐབས་སོ། ། སོ་ཐར་གྱི་སྡོམ་པ་རབ་ཏུ་དབྱེ་བ་སྐབས་གཉིས་པའི་འགྲེལ་པའོ།། །། གསུམ་པ། བྱང་སེམས་ཀྱི་བསླབ་པ་བརྗོད་པའི་སྐབས། ང༣ སྐབས་གསུམ་པ་བྱང་སེམས་ཀྱི་བསླབ་པ་བརྗོད་པ་ལ་བདུན། ཅ༡ སྐྱེ་བའི་རྒྱུ། ཅ༢ སྡོམ་པའི་ངོ་བོ། ཅ༣ དབྱེ་བའི་རྣམ་གྲངས། ཅ༤ ཤིང་རྟ་(༥༠བ)སོ་སོའི་སྲོལ། ཅ༥ ཐུན་མོང་གི་བསླབ་བྱ། ཅ༦ དོན་དམ་སེམས་བསྐྱེད། ཅ༧ འཆལ་ལྡན་གྱི་སྐྱོན་ཡོན་བཤད་པའོ། ། ཅ༡ དང་པོ་ལ་གསུམ། ཆ༡ རྒྱུད་སྤྱིར་བཤད། ཆ༢ ལྷན་ཅིག་བྱེད་པའི་རྐྱེན་བྱེ་བྲག་ཏུ་དབྱེ། ཆ༣ གདམས་ངག་ལུགས་ཁྱད་པར་དུ་སྨོས་པའོ། ། ཆ༡ དང་པོ་ནི། ཐེག་ཆེན་བྱང་ཆུབ་སེམས་སྡོམ་སྐྱེ་བའི་རྒྱུ། ། རིགས་སད་དད་བརྩེ་སྙིང་སྟོབས་ལྡན་པའམ། ། ཐེག་པ་ཆེན་པོ་སངས་རྒྱས་ཀྱི་ཐེག་པ་ལ་ཞུགས་པར་འདོད་པས་ཐོག་མར་བྱང་ཆུབ་ཏུ་སེམས་བསྐྱེད་ཅིང་དེའི་སྡོམ་པ་བླང་དགོས་པས་བྱང་ཆུབ་སེམས་སྐྱེ་བའི་རྒྱུ་ནི། ཐེག་ཆེན་གྱི་རིགས་སད་པའི་རྟགས་དང་ལྡན་པ། གནས་ཕྱིན་ཅི་མ་ལོག་པ་ལ་དད་པ། སེམས་ཅན་ལ་བརྩེ་བ། དཀའ་བ་རྒྱ་ཆེན་སྤྱོད་ནུས་ཀྱི་སྙིང་སྟོབས་དང་ལྡན་པ་དགོས་ཏེ། བྱང་ས་ལས། དེ་ལ་རྒྱུ་བཞི་གང་ཞེ་ན། རིགས་ཕུན་སུམ་ཚོགས་པ་ནི་བྱང་ཆུབ་སེམས་དཔའི་སེམས་སྐྱེ་བའི་རྒྱུ་དང་པོའོ། ། སངས་རྒྱས་དང་བྱང་ཆུབ་སེམས་དཔའ་དང༌། དགེ་བའི་བཤེས་གཉེན་གྱི་ཡོངས་སུ་ཟིན་པ་ནི་བྱང་ཆུབ་སེམས་དཔའི་སེམས་སྐྱེ་བའི་རྒྱུ་གཉིས་པའོ། ། སེམས་ཅན་ལ་སྙིང་རྗེ་ནི་བྱང་ཆུབ་སེམས་དཔའི་སེམས་སྐྱེ་བའི་རྒྱུ་གསུམ་པའོ། ། འཁོར་བའི་སྡུག་བསྔལ་དང་དཀའ་བ་སྤྱད་པའི་སྡུག་བསྔལ་ཡུན་རིང་བ་རྣམ་པ་སྣ་ཚོགས་པ། དྲག་པ། བར་ཆད་མེད་པས་ཀྱང་མི་འཇིག་པ་ནི་བྱང་ཆུབ་སེམས་དཔའི་སེམས་སྐྱེ་བའི་རྒྱུ་བཞི་པའོ་ཞེས་གསུངས་སོ།། འམ་ཞེས་པ་ནི་ཚིག་ཕྱི་མ་འབྱེད་པའི་དོན་ཏོ། ། ཆ༢ གཉིས་པ་[ལྷན་ཅིག་བྱེད་པའི་རྐྱེན་བྱེ་བྲག་ཏུ་དབྱེ་བ་]ནི། གྲོགས་དང་རྒྱུ་འབྲས་ལམ་དང་གོམས་པས་ཏེ། ། ཁྱད་པར་ཀུན་རྫོབ་སེམས་གཉིས་སྐྱེ་བའི་ལྷན་ཅིག་བྱེད་པའི་རྐྱེན་ནི། མདོ་སྡེ་རྒྱན་ལས། གྲོགས་སྟོབས་རྒྱུ་སྟོབས་རྩ་བའི་སྟོབས། ། ཐོས་སྟོབས་དགེ་བ་གོམས་པ་ལས། ། མི་བརྟན་པ་དང་བརྟན་འབྱུང་བ། ། གཞན་གྱིས་བསྟན་པའི་སེམས་བསྐྱེད་བཤད། ། ཅེས་གསུངས་པ་ལྟར། གྲོགས་དགེ་བའི་བཤེས་གཉེན་གྱི་སྟོབས་དང༌། རྒྱུ་རིགས་སད་པའི་སྟོབས་དང༌། (༥༡ན)འབྲས་བུ་དགེ་རྩ་རྒྱས་པའི་སྟོབས་དང༌། ལམ་ཐེག་ཆེན་གྱི་སྡེ་སྣོད་ཐོས་པའི་སྟོབས་དང༌། ཐོས་པ་དེ་ཉིད་མང་དུ་གོམས་པས་བསྐྱེད་པ་དང་ལྔ་ལས། དང་པོ་གྲོགས་ལ་རགས་ལས་པས་མི་བརྟན་པའི་སེམས་བསྐྱེད་དང༌། ཕྱི་མ་བཞི་མི་མཐུན་ཕྱོགས་ཀྱིས་ཉམས་དཀའ་བས་བརྟན་པའི་སེམས་བསྐྱེད་ཀྱི་བརྡ་སྦྱར་ཞིང༌། ཀུན་རྫོབ་སེམས་བསྐྱེད་ནི་གཙོ་བོར་གཞན་གྱིས་བསྟན་པའི་རྒྱུ་ལས་བྱུང་བའོ། ། ཆ༣ གསུམ་པ་[གདམས་ངག་ལུགས་ཁྱད་པར་དུ་སྨོས་པ་]ནི། བྱམས་ལས་སྙིང་རྗེ་དེ་ལས་བྱང་སེམས་སྐྱེ། ། བྱམས་པའི་ངོ་བོ་ནི། གཞན་ལ་ཕན་བདེ་འདོད་པའི་བློའོ། །དེ་ཉིད་ཐོག་མར་བསྒོམ་པས་སྙིང་རྗེ་སྐྱེ་སྟེ། དེ་ནི་སེམས་ཅན་ཐམས་ཅད་སྡུག་བསྔལ་རྒྱུ་དང་བཅས་པ་ལས་བྲལ་བར་འདོད་པའི་བློའོ། །དེ་ལས་སངས་རྒྱས་ཐོབ་འདོད་བྱང་ཆུབ་ཀྱི་སེམས་སྐྱེ་བར་འགྱུར་བས་བྱམས་པ་ནི་ཆོས་དཀར་ཐམས་ཅད་ཀྱི་རྒྱུ་ཡིན་པ་རྒྱལ་པོ་ལ་གདམས་པའི་མདོ་ལས་གསུངས་སོ། ། ཅ༢ གཉིས་པ་སྡོམ་པའི་ངོ་བོ་ནི། ངོ་བོ་གཞན་དོན་རྫོགས་བྱང་འཐོབ་འདོད་བློས། ། སྒོ་གསུམ་ཉེས་སྤྱོད་སྤོང་བའི་ཚུལ་ཁྲིམས་སོ། ། བྱང་ཆུབ་ཏུ་སེམས་བསྐྱེད་པའི་སྡོམ་པ་སྤྱིའི་ངོ་བོ་ནི། གཞན་དོན་དུ་རྫོགས་པའི་བྱང་ཆུབ་འཐོབ་པར་འདོད་པའི་བློས་ཀུན་ནས་བསླངས་པའི་དམིགས་པ་ཁྱད་པར་ཅན་གང་ཞིག །དེའི་མཐུན་ཕྱོགས་སྒྲུབ་ཅིང་མི་མཐུན་ཕྱོགས་སྒོ་གསུམ་གྱི་ཉེས་སྤྱོད་སྤོང་བའི་སེམས་པ་མཚུངས་ལྡན་དང་བཅས་པའི་ངེས་འབྱུང་གི་ཚུལ་ཁྲིམས་ཏེ། མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། ། ཡང་དག་རྫོགས་པའི་བྱང་ཆུབ་འདོད། ། ཅེས་གསུངས་སོ། ། ཅ༣ གསུམ་པ་རྣམ་པར་དབྱེ་བ་ལ་དྲུག ། ཆ༡ མཚན་གཞི། ཆ༢ སྐྱེ་ཚུལ། ཆ༣ ས་མཚམས། ཆ༤ རྟེན། ཆ༥ ཡུལ། ཆ༦ ཆོ་གའི་སྒོ་ནས་དབྱེ་བའོ། ། ཆ༡ དང་པོ་ནི། དབྱེ་སྒོ་འདོད་དང་བརྩོན་སེམས་མཚུངས་ལྡན་གྱིས། ། སྨོན་འཇུག ། ཅེས་པ་སྟེ། སེམས་བསྐྱེད་དེའང་མཚན་གཞིའི་སྒོ་ནས་དབྱེ་ན། སྨོན་པ་སེམས་བསྐྱེད་ཀྱི་སྡོམ་པ་དང༌། འཇུག་པ་(༥༡བ)སེམས་བསྐྱེད་ཀྱི་སྡོམ་པ་གཉིས། དང་པོ་ནི། ཐེག་ཆེན་སློབ་པའི་སེམས་བསྐྱེད་ཀྱི་ཚུལ་ཁྲིམས་གང་ཞིག །གཞན་དོན་དུ་རྫོགས་བྱང་འཐོབ་པར་འདོད་པའི་སེམས་པ་མཚུངས་ལྡན་དང་བཅས་པའོ། ། གཉིས་པ་ནི། ཚུལ་ཁྲིམས་གང་ཞིག །དེའི་དོན་དུ་སྤྱོད་པ་རྒྱ་ཆེན་པོ་ལ་བརྩོན་པར་འདོད་པའི་སེམས་པ་མཚུངས་ལྡན་དང་བཅས་པའོ། ། སྨོན་འཇུག་གཉིས་ཀྱི་མཚན་གཞིའང་ཐེག་ཆེན་ཚོགས་སྦྱོར་བའི་རྒྱུད་ཀྱི་སེམས་བསྐྱེད་རྣམས་དང༌། བྱང་འཕགས་ཀྱི་རྗེས་ཐོབ་ཀྱི་ངོ་བོར་གྱུར་པའི་སེམས་བསྐྱེད་ལྟ་བུའོ། ། འདི་གཉིས་ཀྱི་ཁྱད་པར་ནི། སློབ་དཔོན་དཾཥྚ་སེ་ན་ལ་སོགས་པ་ནི་འཇིག་རྟེན་པའི་ལམ་གྱིས་བསྡུས་པ་སྨོན་པ་དང་། འདས་ལམ་གྱིས་བསྡུས་པ་འཇུག་པར་བཞེད་ཅིང༌། ཨ་བྷ་ཡ་དང་སྨྲྀ་ཏི་སོགས་ནི་འོག་གི་འདུན་པ་དང་ལྡན་པའི་སེམས་བསྐྱེད་སོགས་གསུམ་སྨོན་པ་དང༌། གཞན་བཅུ་དགུ་འཇུག་པར་བཞེད་ལ། རྒྱ་མཚོ་སྤྲིན་ལ་སོགས་པ་ནི་བྱང་ཆུབ་ཀྱི་བློ་ཆོ་གས་མ་བསྐྱེད་པ་སྨོན་པ་དང་། ཚོགས་བསྐྱེད་འཇུག་པར་འདོད་པ་དང༌། རྒྱ་ཆེན་སྤྱོད་རྒྱུད་དང་ཇོ་བོ་རྗེ་ནི་འབྲས་བུ་ལ་དམ་འཆའ་བ་སྨོན་པ་དང་། དེའི་རྒྱུ་ལ་དམ་འཆའ་བ་འཇུག་པར་བཞེད་པ་དང༌། ཡང་ཁ་ཅིག །ཕྱིར་མི་ལྡོག་པ་མ་ཐོབ་ཀྱི་བར་དུ་སྨོན་པ་དང་། ཐོབ་ནས་འཇུག་པར་འདོད་ལ། ཟབ་མོ་ལྟ་རྒྱུད་དང་ཞི་བ་ལྷའི་བཞེད་པ་ནི་སེམས་ཅན་ལ་སྙིང་རྗེ་སོགས་ཀྱིས་བྱང་ཆུབ་འཐོབ་པར་འདོད་པའི་བློ་ཙམ་སྐྱེ་བ་ཆོ་ག་ལ་མ་བརྟེན་པ་དང༌ཆོ་གས་ཁས་བླངས་པ་འགྲོ་བར་འདོད་པ་ལྟ་བུ་ནི་སྨོན་པའི་སེམས་དང༌། དེའི་སྡོམ་པ་ཡང་དག་པར་བླངས་པ་ཕྱིན་ཆད་འགྲོ་བཞིན་པ་ལྟ་བུ་འཇུག་པའི་སེམས་སུ་བཞེད་དེ། དེའང་། སྨོན་པ་ནི་སེམས་བསྐྱེད་ཉིད་དང་། འཇུག་པ་ནི་སྡོམ་པའོ། ། འདིར་ས་སྐྱའི་རྗེ་བཙུན་རྣམས་ཀྱིས། སྨོན་པའི་སེམས། སྨོན་པའི་སེམས་བསྐྱེད། སྨོན་པ་མི་ཉམས་པར་བསྲུང་བ། འཇུག་པའི་སེམས། འཇུག་པའི་སེམས་བསྐྱེད། འཇུག་པ་མི་ཉམས་པར་བསྲུང་བ། ཞེས་དང༌། དེའི་སྨོན་འཇུག་(༥༢ན)གི་སེམས་རྐྱང་པ་སྡོམ་པ་མིན་ལ། སྨོན་འཇུག་གི་སེམས་བསྐྱེད་པ་མི་མཐུན་ཕྱོགས་གཞིར་བཅས་སྤོང་སེམས་དང་ལྡན་ན་མཚན་ཉིད་ཚང་བས་སྡོམ་པར་འགྱུར་བ་བཞེད་དོ། ། ཆ༢ གཉིས་པ་[སྐྱེ་ཚུལ་གྱི་སྒོ་ནས་དབྱེ་བ་]ནི། སྐྱེ་ཚུལ་དབང་གིས་རགས་ཕྲ་གཉིས། ། སྐྱེ་ཚུལ་གྱིས་དབྱེ་ན། རགས་པ་བརྡ་ལས་འབྱུང་བ་དང༌། ཕྲ་བ་ཆོས་ཉིད་ཀྱིས་ཐོབ་པ་གཉིས་ཏེ། ཤཱནྟི་པའི་བཞི་བརྒྱ་ལྔ་བཅུ་པའི་འགྲེལ་པ་ལས། བྱང་ཆུབ་ཀྱི་སེམས་འདི་ཡང་ཇི་སྲིད་སྟོང་པ་ཉིད་ལ་ལྷག་པར་མོས་པར་བྱེད་ཀྱི། མངོན་སུམ་དུ་མི་བྱེད་པ་དེ་སྲིད་ཀྱི་བར་དུ་ནི་བརྡར་བཏགས་པ་ཉིད་ཡིན་ལ། ཡང་གང་གི་ཚེ། མངོན་སུམ་དུ་བྱེད་པ་དེའི་ཚེ་ནི་དོན་དམ་པ་ཡིན་པ་ཤེས་པར་བྱའོ། །ཞེས་པ་ལྟར་