Tibetan
ཟིན་པ་ནི་ཤིང་གྲིབ་ལྟ་བུ་ལ་མཚམས་ཆེ་ཆུང་གང་རུང་བཅད་པ་ལ། བྱེད་པ་པོ་རབ་བྱུང་སྡེ་ལྔས། སྦྱོར་བ་ལྟུང་བ་བྱུང་ན་བཤགས་བསྡོམས་བྱིན་རླབས་བྱ་ཞིང་ཚད་དང་ལྡན་པའི་གཎྜིས་དགེ་འདུན་བསྡུས་ལ་རྒྱུན་ཆགས་གསུམ་པ་དང་ཆོས་འཆད་ཉན་གྱི་དོད་ཚུལ་ཁྲིམས་རབ་བསྔགས་ཀྱི་མདོ་འདོན། རྒྱུད་དག་པ་དང་བློ་མཐུན་བྱས་ལ་འདུ་བར་མི་ནུས་པས་གསོ་སྦྱོང་ཉམས་སུ་མྱོང་བ་བསྒྲུབ། དངོས་གཞི་གནས་བརྟན་གྱིས་སོ་ཐར་གྱི་མདོ་འདོན་ཞིང་རྗེས་བསྔོ་སྨོན་བྱ་བ་སོགས་སོ། ། གནས་དེར་དགེ་སློང་གསུམ་ལས་མེད་ན་ཕན་ཚུན་གཅིག་གི་མདུན་ན་གཅིག་འདུག་ནས་བྱིན་གྱིས་བརླབས་ཤིང༌། རང་གཅིག་པུ་ལས་མེད་ན་ཡིད་ཀྱིས་བསམ་ཞིང་བརྗོད། དེ་ཙམ་ཡང་མ་གྲུབ་ན་ཐུབ་པའི་(༣༩བ)སྔོན་གྱི་གསོ་སྦྱོང་ཚིགས་སུ་བཅད་པ་ཕྱེད་དང་བཞི་ཙམ་འདོན་པར་བྱའོ། ། དེ་དག་གི་སྐབས་སུ་གནས་བརྟན་གྱི་ཚད་ནི། སྤྱིར་གནས་བརྟན་རྒྱལ་ཚབ་ལྟ་བུ་ཞེས་བསྙེན་པར་རྫོགས་ནས་ལོ་ཉི་ཤུ་རྩ་ལྷག་ལོན་པ་དང༌། གནས་བརྟན་སེང་གེ་ལྟ་བུ་ཞེས་རྫོགས་ནས་ཉི་ཤུ་ལོན་པ་སྟེ་འདུལ་བ་ལ་མཁས་པ་གཞན་ལ་བརྟེན་མི་དགོས་པའི་རང་དབང་ཅན་ནོ། ། བྱིས་པ་ལྟ་བུ་ཞེས་རྫོགས་ནས་དྲུག་ཅུ་ལོན་ཡང་འདུལ་བ་མི་ཤེས་པ་དང༌། གནས་བརྟན་སྲེད་ད་ལྟ་བུ་ཞེས་ཚུལ་ཁྲིམས་འཆལ་པ་བཞིར་བཤད་པ་ལས་སྔ་མ་གཉིས་བཟུང་ངོ༌། ། གསུམ་པ་ནི། རབ་གནས་སོགས་བཀྲ་ཤིས་པའི་དུས་དང༌། ཆར་ཧ་ཅང་ཆེ་བ་དང་ཆུང་བ་དང༌། བྱི་བ་ནེ་ཙོ་ཆ་ག་པ་རྒྱལ་པོ་ངན་པ་སོགས་བཀྲ་མི་ཤིས་པ་ཤིས་པར་བྱ་བའི་དུས་སུའོ། ། བཞི་པ་ནི། སེར་བ་ཆོམ་རྐུན་ནད་ཡམས་སོགས་གནོད་པ་བྱུང་ཟིན་ལྡོག་པའམ་སླར་མི་འབྱུང་བའི་ཕྱིར་བྱེད་པའོ། ། ལྔ་པ་ནི། དགེ་འདུན་བྱེ་བ་བསྡུམ་པའི་ཕྱིར་གསོ་སྦྱོང་བྱེད་པའོ། ། དེ་ལྟར་བཀྲ་ཤིས་པ་སོགས་དུས་མ་ངེས་པའི་གསོ་སྦྱོང་གསུམ་ཡང༌། གསོལ་བའི་ལས་ཀྱི་ཚེ་རང་རང་གི་དུས་བརྗོད་དགོས་པའི་ཁྱད་པར་ཙམ་མ་གཏོགས་གཞན་ཆོ་ག་ཐམས་ཅད་དུས་ངེས་པའི་གསོ་སྦྱོང་དང་འདྲའོ། ། བ༢ གཉིས་པ་དབྱར་གནས་ནི། དབྱར་གནས་སྔ་ཕྱི་གཉིས་ཡོད་ཟླ་གསུམ་མཐར། ། དབྱར་གནས་ལ་གཉིས་ཏེ། དབྱར་སྔ་མ་དང༌། ཕྱི་མའོ། ། དེ་གཉིས་ཀྱི་ཁྱད་པར་དབྱར་སྔ་མ་ཡིན་ན་གྲོ་ཞུན་ཟླ་བ་དབྱར་ཟླ་ཐ་ཆུང་གི་མར་ངོའི་ཚེས་གཅིག་དང༌། ཕྱི་མ་ཡིན་ན་ཁྲུམ་ཟླ་སྟོན་རའི་མར་ངོའི་ཚེས་གཅིག་ནས་དབྱར་ཟླ་གསུམ་དུ་ཁས་ལེན་པའམ། བུ་སྟོན་སོགས་ཀྱིས་སྣོན་ཟླའི་བཅུ་དྲུག་ལ་དབྱར་སྔ་མ་ཁས་ལེན་པ་ལེགས་གསུངས་ཤིང་ཞྭ་དམར་དྲུག་པའང་དེ་ལྟར་བཞེད། གང་ལྟར་རིང་སྦྱོར་འཐབ་བཀྲོལ་ཅན་མེད་ཅིང་སྡེ་སྣོད་འཛིན་པ་སོགས་ཡོད་པས་བདེ་བར་གནས་པའི་རྐྱེན་ཚང་བར་གཙུག་ལག་ཁང་བྱི་དོར་སོགས་སྔ་རོལ་ནས་བྱས། ཉེ་སྦྱོར་གསོ་སྦྱོང་གི་མཇུག་ཏུ་ཚུལ་ཤིང་བྲིམ་ཞིང་གནས་(༤༠ན)མལ་སྟོབ། དངོས་གཞི་ཕྱི་ནང་བླ་གབ་དང་བཅས་པའི་གནས་སུ་དགེ་སློང་གི་མདུན་དུ་སྔགས་ཚིག་ལན་གསུམ་བརྗོད་པས་གནས་པར་ཁས་བླངས་ཏེ། བྱིན་གྱིས་མ་བརླབས་པར་མཚམས་ཀྱི་ཕྱི་རོལ་ཏུ་སྐྱ་རེངས་འཆར་བར་མི་སྡོད་པར་ཐོས་བསམ་སྒོམ་པ་ལ་བརྩོན་པའི་མཐར་དགག་དབྱེ་བྱའོ། ། བ༣ གསུམ་པ་དགག་དབྱེ་ནི། དུས་དང་དུས་མིན་ལ་ཡང་དགག་པ་དབྱེ། ། དགག་དབྱེ་ལ་གསུམ། དུས་དང༌། དུས་མ་ཡིན་པ་དང༌། ཡང་སྒྲས་གློ་བུར་དུའང་བྱ་དགོས་པའོ། ། དང་པོ་ནི། དབྱར་གནས་ཟླ་བ་གསུམ་རྫོགས་པའི་ཉ་ལ་བྱ་སྟེ། རིང་སྦྱོར་སྤྱོད་ཡུལ་གྱི་གྲོང་དུ་གོ་བར་བྱ་ཞིང་གཙུག་ལག་ཁང་བརྒྱན། བཅུ་བཞིའི་མཚན་ཐོག་ཐག་ཏུ་ཆོས་ཀྱི་དོན་གཏན་ལ་དབབ། ཉེ་སྦྱོར་བཅོ་ལྔའི་ཉིན་ཕན་ཚུན་བཟོད་གསོལ་སོགས་ཀྱི་མཐར་བསྐོས་པའི་བྱེད་པ་པོས་གསོལ་བའི་ལས་ཀྱིས་ཐུགས་བསྟུན། དངོས་གཞི་རྩྭ་དརྦྷ་བཟུང་ལ་ལྟུང་བའི་དགག་དབྱེ་དང༌། དབྱར་ནང་གི་རྙེད་པ་བགོ་བའི་ཕྱིར་རྫས་ཀྱི་དགག་དབྱེ་བྱ། རྗེས་ཚེས་བཅུ་དྲུག་གི་ཉིན་གནས་ལ་ལྷག་པར་ཞེན་པ་སྤང་བའི་ཕྱིར་ལྗོངས་རྒྱུ་བར་བྱའོ། ། གཉིས་པ་ནི། གལ་ཏེ་རྐྱེན་དབང་གིས་ཟླ་བ་གསུམ་དབྱར་གནས་པར་མ་གྲུབ་ན་གསོ་སྦྱོང་གསུམ་མམ་གཉིས་སོང་བའི་འོག་ཏུ་དགག་དབྱེ་བྱར་རུང་བའོ། ། གསུམ་པ་ནི། དམག་འཁྲུག་ལ་སོགས་པའི་རྐྱེན་གྱིས་གློ་བུར་དུ་འགྱེས་དགོས་པ་བྱུང་ན་ཚོགས་ཀྱི་དགག་དབྱེ་བྱ། དགེ་སློང་གང་རུང་རྐྱེན་དབང་གིས་འགྲོ་དགོས་པ་བྱུང་ནའང་དེ་ལྟར་རོ། ། ཡང་དགེ་སློང་བཞི་ལས་མེད་ན་དགག་དབྱེ་བྱེད་པ་པོ་མི་བསྐོ་བར། གསོལ་བའི་ལས་དང་དགག་དབྱེ་དངོས་བྱའོ། །དགེ་སློང་གསུམ་མམ་གཉིས་ལས་མེད་ན་དགག་དབྱེ་བྱིན་གྱིས་བརླབས། རང་གཅིག་པུ་ལས་མེད་ན་དངོས་གཞི་ཙམ་ལན་གསུམ་བརྗོད་པ་ཡིན་ནོ། །དབྱར་གནས་ཀྱི་སྐབས་སུ་འཁྲུག་ལོང་སྐྱེད་པའི་རྒྱུ་ལྟུང་བ་གླེང་དྲན། ཆད་ལས། རྙེད་པ་བགོ་བ། (༤༠བ)མཚམས་ཀྱི་ཕྱི་རོལ་ཏུ་མཚན་གཅིག་འདའ་བ་བཞི་པོ་དགག་བྱ་ཡིན་ལ། དེ་དག་གི་སྐབས་དབྱེ་བས་དགག་དབྱེ་ཞེས་བྱའོ། ། པ༢ གཉིས་པ་བདེ་བར་གནས་པ་རྐྱེན་གྱི་གཞི་ལ་གཉིས། ཕ༡ གོས་དང༌། ཕ༢ སྨན་ནོ། ། ཕ༡ དང་པོ་ལ་གསུམ། བ༡ སྲ་བརྐྱང༌། བ༢ གོས། བ༣ ཀོ་ལྤགས་ཀྱི་གཞིའོ། ། བ༡ དང་པོ་ནི། བདེར་གནས་རྐྱེན་གྱི་གཞི་ནི་སྲ་བརྐྱང་འདིང༌། ། འཚོ་བ་བདེ་བར་གནས་པའི་རྐྱེན་ལ་གོས་སྨན་གཉིས་ཡོད་པའི་གོས་ཀྱི་བྱེ་བྲག །བག་ཡངས་དང་འབྲེལ་བ་སྲ་བརྐྱང་འདིང་བ་ནི། དབྱར་གནས་ཀྱི་རྙེད་པའི་ཆོས་གོས་གསར་པ་དགེ་འདུན་སྤྱི་ལ་དབང་བ་རྣམས་མང་ཉུང་གང་ཡང་རུང་བ་སྟེ། དབྱར་སྔ་ཕྱི་གང་ཡིན་པའི་དབྱར་གནས་གྲོལ་བའི་དགག་དབྱེའི་ཕྱི་ཉིན་ཚེས་བཅུ་དྲུག་ནས་ཟླ་བ་ལྔ་ཡི་བར་དུ་སྲ་བརྐྱང་འདིང་བར་དགེ་འདུན་གྱི་ལས་ཀྱིས་བསྐོས་ཏེ་དགེ་སློང་ལ་གཏད་ནས་དགེ་སློང་དེས་བཏིང་བའི་ཆོ་ག་དང་བཅས་པས་ལེན་ཏེ། ཚག་སྦྱོང་བྱེད་པ་ལས་མཚམས་ཀྱི་ཕྱི་རོལ་དུ་མི་ཁྱེར་བ་དང་མི་གཙང་བའི་ཁང་པ་དང་སྟེང་ཐོག་མེད་སར་མི་བཞག་པ་དང༌། དུས་དུས་སུ་རླུང་སེང་དང་རྡུལ་སྤྲུགས་སོགས་བྱའོ། ། འདི་འདིང་བ་པོ་ལ་འཆང་འབྲལ་འཇོག་གསུམ་གྱི་ལྟུང་བ་མེད་པ་སོགས་ཕན་ཡོན་བཅུར་གསུངས། བོད་དུ་རྒྱལ་པོའི་བཀས་བཅད་དེ་སྤྱོད་པ་བག་ཡངས་དང་འབྲེལ་བ་བཀག་པའི་དབང་གིས་འདིའི་ཕྱག་ལེན་མ་བྱུང་ངོ༌། ། བ༢ གཉིས་པ་[གོས་ཀྱི་གཞི་]ནི། གོས་ལ་འཚོ་མཁོ་ལྷག་པའི་ཡོ་བྱད་དེ། ། འཚོ་བ་རུང་བས་ཁ་བསྒྱུར་བཅུ་གསུམ་མོ། ། འཚོ་བའི་ཡོ་བྱད་དང་འབྲེལ་བ་གོས་ལའང༌། འཚོ་བའི་ཡོ་བྱད། མཁོ་བའི་ཡོ་བྱད། ལྷག་པའི་ཡོ་བྱད་གསུམ་གྱི་དང་པོ་འཚོ་བའི་ཡོ་བྱད་ནི། ལོག་འཚོས་མ་བསྒྲུབས་ཤིང་རྒྱུ་ཧ་ཅང་ངན་པ་དང་བཟང་བ་མ་ཡིན་པའི་རྒྱུར་རུང་བ་བལ་གོས་ལ་སོགས་པ་བདུན། རྔ་མོང་དང་རའི་སྤུ་ལ་སོགས་པ་མི་རུང་བ་ལས་མ་བྱས་ཤིང་སྤུ་ཤིན་ཏུ་ཆེ་བ་དང་ཁ་ཚར་ཕུན་ཚར་མ་བཅད་པ་སོགས་མ་ཡིན་པ། མི་རུང་བའི་ཚོན་ཆེན་བརྒྱད་སྤངས་ཏེ་རུང་བའི་ཚོན་གསུམ་གྱིས་ཁ་བསྒྱུར་བར་བྱའོ། །(༤༡ན) དེ་ལྟར་ཡང༌། རྒྱ་སྐྱེགས་ལེ་བརྒན་རྩི་དང་བཙོད། ། སྨན་ཤིང་རྩི་དང་མཐིང་ཤིང་མཚལ། ། སིནྡྷུ་ར་དང་གུར་གུམ་སྟེ། ། འདི་དག་ཚོན་ཆེན་བརྒྱད་དུ་འདོད། ། ཅེས་དང༌། སྔོན་པོ་བཙག་དང་ངུར་སྨྲིག་རྩི། ། འདི་དག་རུང་བའི་ཚོན་གསུམ་སྟེ། ། ཞེས་སོ། ། དེ་ལ་སྤྱིར་བཏང་དུ་གོས་མཚོན་གྱིས་དྲས་པ་ཞིག་དགོས་ཏེ། མཚོན་གྱིས་མ་དྲས་པའི་གོས་བཅང་བར་མི་བྱའོ་ཞེས་པས་གྲིས་དྲས་ནས་འཚོ་བའི་ཡོ་བྱད་བཅུ་གསུམ་པོ་གང་རུང་ཚད་དང་ལྡན་པར་དྲུབས་པ་སྟེ། སྣམ་སྦྱར། བླ་གོས། མཐང་གོས། ཤམ་ཐབས། ཤམ་ཐབས་ཀྱི་གཟན། རྔུལ་གཟན། རྔུལ་གཟན་གྱི་གཟན། གདོང་ཕྱིས། རྣག་གཟན། གཡན་དགབ། སྐྲ་བཟེད། གདིང་བ། དབྱར་གྱི་གོས་རས་ཆེན་རྣམས་སོ། ། དེ་ལ་སྣམ་སྦྱར་ནི། སྣམ་ཕྲན་དགུ་ནས་ཉེར་ལྔའི་བར་ཏེ། དགུ་མ། བཅུ་གཅིག །བཅུ་གསུམ་མ་གསུམ་ནི་གླེགས་བུ་ཕྱེད་དང་གསུམ་མོ། ། བཅོ་ལྔ། བཅུ་བདུན། བཅུ་དགུ་གསུམ་ནི་གླེགས་བུ་ཕྱེད་དང་བཞི་པའོ། ། ཉེར་གཅིག །ཉེར་གསུམ། ཉེར་ལྔ་གསུམ་ནི་གླེགས་བུ་ཕྱེད་དང་ལྔ་པའོ། ། ཚད་ནི། ཆེ་སྐོར་གསུམ་དཔངས་སུ་ཁྲུ་གསུམ་དང་སྲིད་དུ་ཁྲུ་ལྔ། ཆུང་གསུམ། དེ་ལས་ཁྲུ་ཕྱེད་ཕྱེད་ཕྲི་བ། འབྲིང་གསུམ་དེ་གཉིས་ཀྱི་བར་རོ། ། བླ་གོས་ནི། སྣམ་ཕྲན་བདུན། གླེགས་བུ་ཕྱེད་དང་གསུམ་པ། ཚད་སྣམ་སྦྱར་ལྟར་གསུམ་མོ། ། མཐང་གོས་ནི། སྣམ་ཕྲན་ལྔ་དང་གླེགས་བུ་ཕྱེད་དང་གཉིས་པ། ཚད་དཔངས་སུ་ཁྲུ་དོ་དང༌། སྲིད་དུ་ཁྲུ་ལྔའམ་བཞི། ཐ་ན་འཁོར་གསུམ་ཁེབས་པས་ཀྱང་རུང་ཞིང༌། ལུས་སྦོམ་པས་མི་ཡོགས་ན་རལ་ཁ་དཔུང་ཆད་སྣོན་པར་བཤད་དོ། ། སྤྱིར་ཁྲུ་ལ་རྡུལ་ཁྲུ། ལག་ཁྲུ། ལུས་ཁྲུ་གསུམ་ལས་འདིར་ལུས་ཁྲུ་སྟེ། མདོ་རྩར། ཁྲུའི་དོན་ནི་ལུས་ཀྱི་ཆ་བདུན་ལས་གཉིས་སོ། ། ཞེས་གསུངས་པའི་ཕྱིར། ཤམ་ཐབས་དང་དེའི་གཟན་མཐང་གོས་དང་ཚད་འདྲ་ཞིང༌། རྔུལ་(༤༡བ)གཟན་དང་དེའི་གཟན་བླ་གོས་དང་ཚད་འདྲ་སྟེ། དེ་དང་དེ་ཉིན་མོ་དང་མཚན་མོ་མཐང་གོས་བླ་གོས་ཀྱི་འོག་ཏུ་གྱོན་པའི་གོས་ཡིན་པའི་ཕྱིར། གདོང་ཕྱིས་སྲིད་དང་ཞེང་དུ་ཁྲུ་གང་པ་རྣག་གཟན་བླ་གོས་དང་མཉམ་པ། སྐྲ་བཟེད་སྲིད་དུ་ཁྲུ་གསུམ་དང་ཞེང་དུ་ཁྲུ་ཕྱེད་དང་གཉིས་པ། གཡན་དགབ་སྲིད་དུ་ཁྲུ་དྲུག་དང་ཞེང་དུ་ཁྲུ་གསུམ། གདིང་བ་སྲིད་དུ་ཁྲུ་གསུམ་ཞེང་དུ་ཁྲུ་དོ་དང་སོར་དྲུག །གླེགས་བུ་ཕྱེད་དང་གཉིས་པ། དབྱར་གྱི་གོས་རས་ཆེན་ནི། སྲིད་དུ་ཁྲུ་དགུ། ཞེང་དུ་ཁྲུ་གསུམ་དང་སོར་བརྒྱད་པའོ། ། གཉིས་པ་མཁོ་བའི་ཡོ་བྱད་ནི། འཚོ་བའི་ཡོ་བྱད་གང་རུང་གི་དབྱིབས་སུ་མ་དྲུབས་པའི་གོས་ཀྱི་ཁྱད་པར་ཁྲུ་གང་ཡན་ཆད་མ་ངེས་པ་དར་གོས་སྣམ་བུ་ལྟ་བུ་ནོར་གྱི་འདུ་ཤེས་སྐྱེ་བ་དང༌། ཞྭ་དང་སྐ་རགས་སོགས་གོས་ཀྱི་འདུ་ཤེས་སྐྱེ་བའི་ཡོ་བྱད་དག་གོ། ། གསུམ་པ་ལྷག་པའི་ཡོ་བྱད་ནི། སྣམ་སྦྱར་གཉིས་པ་ལྟ་བུ་འཚོ་བའི་ཡོ་བྱད་གང་རུང་གི་དབྱིབས་སུ་དྲུབས་པའི་ལྷག་པོ་དང༌། སྐ་རགས་གཉིས་པ་ལྟ་བུ་མཁོ་བའི་ཡོ་བྱད་ཀྱི་གོས་ལྷག་པོ་དག་གོ། ། གཞན་ཡང་འཚོ་བའི་ཡོ་བྱད་ཕྲན་ཚེགས་ཞྭ་ལྷམ་སྐ་རགས་སོགས་དང༌། མཁོ་ལྷག་ཕྲན་ཚེགས་ནི་དེ་དག་གི་རྒྱུར་བསྔོས་ཤིང་ཁྲུར་མ་ལོངས་པ་སྟེ་ཐམས་ཅད་ཀྱང་རང་རང་གི་ཆོ་གས་བྱིན་གྱིས་བརླབ་དགོས་སོ། ། ཡོ་བྱད་དེ་དག་སྤྱིར་རབ་བྱུང་ཚུལ་ལྡན་དང༌། ཁྱད་པར་སྣམ་སྦྱར་དགེ་སློང་ཁོ་ནས་བཅང༌། དེའང་རྟེན་ལ་ཕྱག་འཚལ་ཞིང་བསོད་སྙོམས་རྒྱུ་བ། ཆོས་འཆད་ཉན་དང་ལས་ཆོག་ལ་འདུས་པའི་ཚེ་མ་གཏོགས་རྟག་ཏུ་མི་གྱོན་ཞིང་བླ་གོས་མཐང་གོས་གཉིས་ནི་ཉིན་མོ་ཕལ་ཆེར་དུ་བགོ། དེའང་རྒྱགས་པ་ལ་སོགས་པའི་ཕྱིར་དུ་མ་ཡིན་པར་དགེ་སྦྱོང་གི་དྲན་པ་གསོ་བའི་རྟེན་དུ་བཅང་ཞིང་རྙིང་ནས་བཅོས་སུ་མི་རུང་ན་ས་དང་བསྲེས་ནས་མཆོད་རྟེན་ལ་སོགས་པའི་སེར་ཁ་ལ་བསླན་པར་བཤད་དོ། ། བ༣ གསུམ་པ་[ཀོ་ལྤགས་ཀྱི་གཞི་]ནི། ཀོ་ལྤགས་སྟན་ལྷམ། ཞེས་པས་སྟོན་ཏེ། དམིགས་(༤༢ན)བསལ་དང་འབྲེལ་བ་ཀོ་ལྤགས་ནི། ཡུལ་དབུས་སུ་གནས་མལ་སྐྱོབ་པའི་ཕྱིར་ཀོ་ལྤགས་ཀྱི་ལྷམ་ཙམ་དང༌། གཙུག་ལག་ཁང་ལས་གཞན་པའི་ཁྱིམ་དུ་སྟན་གཞན་མེད་ན་ཀོ་ལྤགས་ལ་འདུག་པ་ཙམ་གནང་གི་ཉལ་བར་མ་གནང་ལ། མཐའ་འཁོབ་ཏུ་ནི་གྲང་བ་སྐྱོབ་པའི་ཕྱིར་གནང་བས་ལྷམ་དང་མལ་སྟན་གཉིས་ཀ་བསྟེན་དུ་རུང་ཞིང༌། དེའི་ཁྱད་པར་ཁྲ་བོ་དང་གསེར་དངུལ་གྱི་རྒྱན་ཅན་སོགས་སྒེག་རྫས་དང་སྒྲ་སྒྲོག་པའི་མཆིལ་ལྷམ་བསྟེན་དུ་མི་རུང་བའོ། །ཆུ་ལ་ཆབ་རོམ་ཙམ་ཆགས་པའི་ཡུལ་དུ་ཞྭ་དང་ལྷམ་ཡུ་ཅན་གཉིས་ཀ་གནང་བའི་བསླབ་བྱར་གསུངས་སོ། ། ཕ༢ གཉིས་པ་སྨན་གྱི་གཞི་ནི། སྨན་ལ་དུས་ཐུན་ཚོད། ། ཞག་བདུན་རུང་དང་འཚོ་བཅང་རྣམ་པ་བཞི། ། བདེར་གནས་ཀྱི་རྐྱེན་གྱུར་སྨན་ལའང་བཞི་ཡོད་པའི་དང་པོ་དུས་སུ་རུང་བ་ནི། བཀྲེས་པ་སེལ་བྱེད་སྐྱ་རེངས་ཤར་ནས་གུང་ཚིགས་ཚུན་དུ་བཟའ་བ་ལས་ཕྱི་དྲོ་ལོངས་སྤྱོད་དུ་མི་རུང་བ་བཟའ་བ་ལྔ་དང་བཅའ་བ་ལྔ་ལ་སོགས་པ་སྟེ། བཟའ་བ་ལྔ་ནི། ཟན་དང༌། འབྲས་ཆན་དང༌། ལྡེ་གུ་དང༌། ཤ་དང༌། ཁུར་བ་ལྔའོ། ། བཅའ་བ་ལྔ་ནི། རྩ་བ་དང༌། སྡོང་བུ་དང༌། ལོ་མ་དང༌། མེ་ཏོག་དང༌། འབྲས་བུའོ། ། གཉིས་པ་ཐུན་ཚོད་དུ་རུང་བ་ནི། སྐོམ་པ་སེལ་བའི་བཏུང་བ་སྟེ་བྱིན་བརླབས་ནས་ཐུན་ཚོད་ཀྱི་མཐའ་སྟེ་ཉིན་མཚན་གྱི་མཚམས་ཀྱི་བར་རུང་ཞིང་དེ་ནས་ལུས་ན་གསོག་འཇོག་གི་ཉེས་པ་སྐྱེད་པར་བྱེད་པ་སྟེ། ཀུ་ཤུ་དང་རྒུན་འབྲུམ་དང་འབྲ་གོ་སོགས་ལས་བྱས་པའི་བཏུང་བ་དང༌། དར་བའི་དྭངས་མ་སྟེ་ཆུར་ཁུ་དང༌། ཞོ་ཁ་ཆུ་སྟེ་ཞོའི་ཆུ་དང༌། ཙབ་མོ་ཞེས་པ་འབྲས་ཁྲེ་གྲོ་སོགས་བཙོས་པའི་ཁུ་བ་ཕབ་མ་བཏབ་པར་མནན་པ་དང༌། འོ་མ་དང༌། ཇ་ལ་སོགས་པའི་བཏུང་བ་མཚན་ཉིད་ལྔ་ལྡན་ཏེ། རུང་ཆུས་བསླད་པ། ཚགས་ཀྱིས་བཙགས་པ། ཤིན་ཏུ་སླ་བ། བཞིན་སྣང་བ། འདམ་བུ་ཉག་མའི་མདོག་ལྟ་བུ་རྣམས་སོ། ། གསུམ་པ་ཞག་བདུན་པ་ནི། བཀྲེས་པ་དང༌། འདུས་པའི་ནད་གཉིས་ཀ་སེལ་བ་སྟེ། (༤༢བ)བྱིན་བརླབས་ནས་ཞག་བདུན་ཚུན་ཆོད་དུ་བཟའ་རུང་བའོ། ། དེའང་། བུ་རམ་དང༌། འབྲུ་མར་དང༌། སྦྲང་རྩི་དང༌། མར་དང༌། ཁ་ར་དང༌། ཧྭགས་དང༌། ཉ་དང༌། ཕག་དོམ་རི་བོང་གི་ཞག་རྣམས་སོ། ། བཞི་པ་འཚོ་བཅང་ནི། འདུས་པའི་ནད་སེལ་བ་སྨན་དངོས་རྣམས་ཏེ་བྱིན་བརླབས་ཏེ་ནམ་འཚོའི་བར་དུ་བཅང་རུང་བའོ། ། མཚམས་བཙོས་དང་ཞག་ལོན་སོགས་ཀྱི་ཉེས་པ་ཁེགས་པའི་ཕྱིར་དུས་བཞིར་བྱིན་གྱིས་བརླབས་པའི་རུང་ཁང་བཅད། ཟས་ལ་ལོངས་སྤྱོད་པའི་ཚུལ་དང་འདུ་ཤེས་སོགས་ཀྱང་གཞུང་ནས་བཤད་པ་ལྟར་བྱའོ། ། པ༣ གསུམ་པ་ཆོ་ག་ཁྱད་འབྲེལ་ལས་ཀྱི་གཞི་ནི། ལས་ལ་བརྒྱ་རྩ་གཅིག་ཡོད་གསུམ་དུ་འདུ། ། ཐམས་ཅད་ལ་ཁྱབ་པ་ལས་ཀྱི་གཞི་ལ། གསོལ་བ་རྐྱང་པའི་ལས་ཉེར་བཞི། གསོལ་བ་དང་གཉིས་ཀྱི་ལས་བཞི་བཅུ་རྩ་བདུན། གསོལ་བ་དང་བཞིའི་ལས་སུམ་ཅུ་སྟེ་བསྡོམས་པས་བརྒྱ་རྩ་གཅིག་གོ། ། དང་པོ་ནི། གསང་སྟོན་བསྐོ་བ་སོགས་གསོལ་བ་འབའ་ཞིག་པ་སྟེ་གསོལ་བ་ཁོ་ན་ལས་བརྗོད་པ་མེད་པས་སོ། ། གཉིས་པ་ནི། གནས་བློ་མཐུན་སོགས་གསོལ་བ་ཚར་གཅིག་དང༌། ལས་དངོས་ཚར་གཅིག་བཅས་རྣམ་གྲངས་གཉིས་འབྱུང༌། གསུམ་པ་ནི། བསྙེན་རྫོགས་སོགས་གསོལ་བ་ལན་གཅིག་དང༌། ལས་དངོས་ཚར་གསུམ་བརྗོད་པ་ཡིན་ལ། བརྒྱ་རྩ་བརྒྱད་པོ་བསྡུ་ན་ཚན་པ་གསུམ་པོ་དེར་འདུའོ། ། པ༤ བཞི་པ་ཉེས་པ་དག་བྱེད་ཕྱིར་བཅོས་ཀྱི་གཞི་ལ་གསུམ། ཕ༡ སྡོམ་པ་གཏོང་བའི་རྒྱུ། ཕ༢ ལྟུང་བ་ཕྱིར་བཅོས། ཕ༣ རྩོད་པ་ཕྱིར་བཅོས་སོ། ། ཕ༡ དང་པོ་ནི། ཕུལ་དང་ཤི་འཕོས་སྡིག་ལྟ་སོགས་ཀྱིས་གཏོང༌། ། སོ་ཐར་གྱི་སྡོམ་པ་སྤྱིའི་གཏོང་རྒྱུ་ནི་བཞི་སྟེ། བརྡ་འཕྲོད་པའི་དྲུང་དུ་བསམ་པ་ཐག་པ་ནས་བསླབ་པ་ཕུལ་བ། ཤི་འཕོས་པ། རྒྱུ་འབྲས་མེད་ལྟ་སོགས་སྡིག་ལྟ་སྐྱེས་པ། སོགས་ཁོངས་ནས་མཚན་གཉིས་ཅིག་ཅར་བྱུང་བ་དང༌། མཚན་ལན་གསུམ་གྱུར་པ་རྣམས་ཀྱིས་གཏོང་ཞིང༌། གཞན་ཡང༌། ལོ་ཉི་ཤུ་མ་ལོན་པ་ལ་མའི་མངལ་ཤོལ་(༤༣ན)གྱི་ཟླ་བས་ཁ་བསྐངས་ཀྱང་ཉི་ཤུ་མ་ཚང་བར་བསྙེན་པར་རྫོགས་ནས་ཕྱིས་དེར་ཤེས་པས་ཀྱང་གཏོང་ངོ༌། ། ལྟུང་དང་སྡོམ་ཡོད་ནོར་ལྡན་བུ་ལོན་ཅན། ། གཅིག་སྤྱད་ཀུན་ཉམས་བཞེད་སྲོལ་ཐ་དད་གཉིས། ། ཁ་ཆེ་བྱེ་བྲག་སྨྲ་བ་རྣམས་ཀྱིས་རྩ་ལྟུང་འཆབ་བཅས་བྱུང་ཡང་སྡོམ་པ་མི་གཏོང་སྟེ། ཕྱོགས་གཅིག་ཉམས་པས་སྡོམ་པ་ཟད་པར་གཏོང་བ་མི་རིགས་པའི་ཕྱིར། དེ་འདྲ་དེ་སྡོམ་ལྡན་དང་ཚུལ་འཆལ་གཉིས་ཀ་ཡིན་ཏེ། མི་འགའ་ཞིག་ལ་ནོར་དང་ལྡན་ལ་བུ་ལོན་ཡང་ཆགས་པ་བཞིན་ནོ་ཞེས་འདོད་ལ་འབྲི་གུང་སྐྱོབ་པ་དང་ཞྭ་དམར་དྲུག་པ་སོགས་ཀྱང་དེ་དང་ཕྱོགས་མཚུངས་བཞེད། མདོ་སྡེ་པ་དང་བོད་སྔ་རབས་པ་རྣམས་ཕམ་པ་རྣམས་རྩ་བ་ཆད་པའི་ལྟུང་བ་ཡིན་པའི་ཕྱིར། ཤིང་ཏཱ་ལའི་མགོ་བཅད་ན་སོགས་ཀྱི་དཔེས་རྩ་ལྟུང་གཅིག་སྤྱད་ན་ཀུན་ཉམས་ནས་དེའི་རྒྱུད་ལ་དགེ་སློང་གི་སྡོམ་པ་མེད་པ་ལ་བཞེད་པ་སྟེ་སྲོལ་ཐ་དད་གཉིས་ཡོད། དེའང་། སྡོམ་པའི་ངོ་བོ་གཟུགས་ཅན་ལ་འདོད་པའི་ཚེ། བསླབ་པ་བཞི་སོགས་གཟུགས་སོ་སོར་ཡོད་དགོས་པས་གཅིག་ཞིག་ཀྱང་གཞན་ཞིག་མི་སྲིད་ཅིང་ཤེས་པར་འདོད་པའི་ཚེ་རྫས་སོ་སོ་བ་མེད་པས་གཅིག་གཏོང་ན་ཐམས་ཅད་གཏོང་བར་གྲུབ་བོ། ། སྒྲུབ་མ་ནུས་སོགས་ཉེས་མེད་སྐབས་ཀྱང་ཡོད། ། བསྒྲུབ་པར་མ་ནུས་པ་ནི་ལུས་སེམས་རང་དབང་དུ་མ་འདུས་པ་སྟེ། རྨི་ལམ་དུ་མི་ཚངས་སྤྱོད་བྱས་པ་ལྟ་བུ་དང༌། ལས་དང་པོ་བ་སྤང་བླང་མ་ཤེས་པ་དང༌། ཡིད་རྣལ་དུ་མ་གནས་པ་སྨྱོན་པས་མི་བསད་པ་ལྟ་བུ་ཕམ་པའི་ལྟུང་བ་སྤྱད་ཀྱང་དངོས་གཞིའི་ཉེས་པ་ཇི་ལྟ་བ་མེད་པའི་སྐབས་ཀྱང་ཡོད་དོ། ། བསླབ་ཚིགས་ཀུན་ཀྱང་རྩ་བཞི་ཉམས་པས་འཇིག ། སོ་ཐར་རིས་བརྒྱད་ཀྱི་བསླབ་ཚིགས་ཀུན་ཀྱང་རྩ་བ་བཞི་ཉམས་པས་སྡོམ་པ་འཇིག་པ་ནི་མཐུན་ཞིང་དེའང་འཆབ་བཅས་བྱུང་ན་ཆེས་ལྕིའོ། ། ཕ༢ གཉིས་པ་ལྟུང་བ་ཕྱིར་བཅོས་ལ་གཉིས། བ༡ སྤྲོ་བ་མཐོལ་བཤགས། བ༢ མི་སྤྲོ་བ་ནན་ཏུར་གྱིས་ཕྱིར་བཅོས་པའོ། ། བ༡ དང་པོ་ནི། དགེ་(༤༣བ)བསྙེན་སླར་བསྐྱར་དགེ་ཚུལ་དགེ་སློང་དག ། འཆབ་བཅས་གསོར་མི་རུང་ལ་འཆབ་མེད་བཅོས། ། ལྷག་མ་སྤོ་མགུ་སྤང་བཤགས་སྡོམ་སོགས་ཀྱིས། ། ལྟུང་བ་ཕྱིར་བཅོས། ཞེས་པ་སྟེ། དགེ་བསྙེན་ལ་རྩ་ལྟུང་བྱུང་ན་སྡོམ་པ་བསྐྱར་ནས་བླང༌། ཆང་འཐུང་བ་སོགས་ཡན་ལག་གི་ལྟུང་བ་བྱུང་ན་སྡོམ་ལྡན་གཅིག་གི་མདུན་དུ་བཤགས་སོ། ། དགེ་ཚུལ་དང་དགེ་སློང་དག་ལ་རྩ་ལྟུང་འཆབ་བཅས་བྱུང་ན་རྒྱུད་གསོར་མི་རུང་དུ་སོང་བས། ཚེ་འདིར་ལྟུང་བ་ཕྱིར་བཅོས་སུ་མེད་པས་