Tibetan
དེབ་འདིའི་བཀོད་སྒྲིག་ཇི་ལྟར་བྱས་ཚུལ། འཇམ་མགོན་བློ་གྲོས་མཐའ་ཡས་ཀྱིས་མཛད་པའི་ཐེག་པའི་སྒོ་ཀུན་ལས་བཏུས་པ་གསུང་རབ་རིན་ པོ་ཆེའི་མཛོད་བསླབ་པ་གསུམ་ལེགས་པར་སྟོན་པའི་བསྟན་བཅོས་ཤེས་བྱ་ཀུན་ཁྱབ་ཅེས་བྱ་བ་འདི་ཉིད་ གནས་བཅུའི་སྒོ་ནས་འཆད་པར་བྱ་བ་ལ། གསུང་འབུམ། པོད། ཨེ། ཝཾ། མཱ། ཡཱ། ཞེས་བཞི་ཡོད་པ་ལས། པོད། ཝཾ༽ གནས་ལྔ་པ་དང་། གནས་དྲུག་པའི་འགྲེལ་པ་འདིའི་མ་ཕྱི་ནི་དཔལ་སྤུང་དགོན་པའི་པར་ མ་གཞིར་བཟུང་སྟེ་ནི་ཏཱརྠ་ནས་ཁཾ་ཕིའུ་ཊར་གྱིས་པར་གཞི་བསྒྲིགས་ཏེ་འདིར་པར་སྐྲུན་ཞུས་པ་ལགས། ཐོག་མར་ལེའུ་དང་ནང་གསེས་ས་བཅད་བཅས་ལ་རགས་བསྡུས་ཀྱི་དཀར་ཆག་བཀོད་ཡོད། གཞུང་འགྲེལ་གྱི་ས་བཅད་ཆ་ཚང་ཟུར་དུ་བཏོན་ཏེ་དེབ་འདིའི་མཇུག་ཏུ་བསྒྲིགས་ཡོད། འགྲེལ་པའི་རྩ་བའི་ས་བཅད་ཀྱི་མཚམས་ཐིག་ཕྲེང་ཕྱེས་ནས་གཞུང་གི་རྩ་བའི་ཚིག་རྣམས་མངོན་པར་ གསལ་བའི་མཚོན་བྱེད་དུ་ཡིག་གེའི་མདོག་སྔོན་པོའི་གཟུགས་སུ་བསྒྱུར་ནས་བཞག་ཡོད། གཟིགས་ཀློག་བདེ་བའི་ཕྱིར་གནས་རེ་རེའི་མཚམས་ནས་ལྡེབ་ངོས་གསར་དུ་བཟུང་ཞིང་། རྩ་བ་དང་། ལུང་འདྲེན། ས་བཅད། གཞུང་དོན་སོ་སོའི་བརྗོད་མཚམས་བཅས་ལ་ཐིག་ཕྲེང་ཕྱེས་ཡོད། མ་ཕྱིའི་ཕྱག་དཔེ་གློག་གིས་སྐྱར་པར་བྱེད་སྐབས་ཞུས་ནོར་སོང་བའམ་ཆད་ལྷག་ཡོད་པའི་དྭོགས་གཞི་ཅན་ལ་ནོར་བཅོས་དང་ཁ་སྐོང་གང་ཞུས་པ་རྣམས་གུག་རྟགས་འདི་ལྟ་བུའི་[ ]ནང་བཞག་ཡོད། དམིགས་བསལ་སྔ་རབས་ཀྱི་གསུང་རབ་འགའ་ཞིག་ལ་དེང་སང་ཡོངས་གྲགས་ཀྱི་བོད་ཀྱི་བརྡ་སྤྲོད་ཀྱི་ གཞུང་དང་མི་མཐུན་པ་མང་དུ་མཆིས་པ་རྣམས་ལ། རྩོམ་པ་པོའི་བརྡ་སྤྲོད་འགྲེལ་ཚུལ་གྱི་དགོངས་པ་དང་ དུས་རབས་སོ་སོ་སྟོན་པའི་ཕྱིར། མ་ཕྱིར་གང་ཡང་མ་བཅོས་པར་སོར་བཞག་ཞུས་ཡོད། མདོར་ན། ཚད་ལྡན་གྱི་མཁས་དབང་དམ་པ་རྣམས་ལ་དྭོགས་གཅོད་གང་ལྕོག་ཞུས་ནས་མ་དཔེ་ལ་ བསྒྱུར་བཅོས་གང་ཡང་མ་བྱས་པར་ང་ཚོས་དག་བཅོས་སོགས་གང་བྱས་པ་ཐམས་ཅད་ཟུར་མཆན་དང་ གུག་རྟགས་འདི་[ ]ནང་བཀོ་དེ། དེབ་ཀྱི་དབྱིབས་བཀོད་སོགས་ལེགས་པར་བསྒྲིགས་ནས་དེང་དུས་ཀྱི་ སྤུས་ཚད་དང་ལྡན་པའི་དཔེ་དེབ་གསར་བསྐྲུན་ཞུས་པ་ལགས། འོན་ཀྱང་བདག་ཅག་ལ་དཔེ་ཚོགས་འདི་ལྟ་བུའི་ཕྱོགས་བསྒྲིགས་ལ་གོམས་ཆ་ཆུང་བའི་ཁར། མ་ཕྱིའི་ ཕྱག་དཔེར་ཡིག་སྐྱོན་ཡང་མི་ཉུང་བ་མཆིས་པས། ཞུ་དག་དང་ལེགས་བཅོས་སོགས་སོ་སོའི་བློའི་ནུས་པ་ གང་ཐོན་ཞུས་ཁུལ་བྱས་ཀྱང་ད་དུང་ཐེ་ཚོམ་གྱི་གཞིར་གྱུར་པ་མང་བའི་རྐྱེན་གྱིས། ཆད་ལྷག་འཛོལ་སོགས་ ཀྱི་སྐྱོན་ཅི་མཆིས་པ་གཟུར་གནས་ཀྱི་དཔྱོད་ལྡན་མཁས་དབང་རྣམས་ལ་བཟོད་གསོལ་དང་། དེ་བཞིན་ སྐྱོན་བསངས་དགེ་སྤེལ་ལ་སྨིན་པའི་དགོངས་འཆར་གང་ཡོད་ངེས་པར་སྩོལ་གནང་ཡོང་བ་ཞུ་ཞེས་ཞུ། ༢༠༢༣ ཟླ་བ། ༡༠ ཚེས། ༡༨ ལ། དཀར་ཆག ག༥ གནས་ལྔ་པ། ལྷག་པ་ཚུལ་ཁྲིམས་ཀྱི་བསླབ་པའི་རིམ་པར་ཕྱེ་བ། (༢ན) ང༡ དང་པོ། སློབ་དཔོན་དང་སློབ་མའི་མཚན་ཉིད། བསྟེན་ཚུལ། འཆད་ཉན་བཅས་བཤད་པའི་སྐབས། (༢ན) ང༢ གཉིས་པ། སོ་ཐར་གྱི་སྡོམ་པ་རབ་ཏུ་ཕྱེ་བའི་སྐབས། (༡༩ན) ང༣ གསུམ་པ། བྱང་སེམས་ཀྱི་བསླབ་པ་བརྗོད་པའི་སྐབས། (༥༠བ) ང༤ བཞི་པ། རིག་འཛིན་གྱི་སྡོམ་པ་སྤྱིར་བཤད་པའི་སྐབས། (༦༨བ) ག༦ གནས་དྲུག་པ། ཐོས་པའི་རིམ་པར་ཕྱེ་བ། (༡༠༢བ) ང༡ དང་པོ། ཐུན་མོང་རིག་པའི་གནས་དང་འཇིག་རྟེན་པའི་ལམ་རྣམ་པར་བཞག་པའི་སྐབས། (༡༠༢བ) ང༢ གཉིས་པ། ཐེག་པ་ཆེ་ཆུང་ཤེས་བྱ་སྤྱིའི་གནས་རྣམ་པར་གཞག་པའི་སྐབས། (༡༨༡ན) ང༣ གསུམ་པ། རྒྱུ་མཚན་ཉིད་ཀྱི་ཐེག་པ་རྣམ་པར་གཞག་པའི་སྐབས། (༢༢༣ན) ས་བཅད། སུབྷཱཥིཏཔརིསམཱུརཛྙེཡཱནྟཱནཱཾསམུདྲནཱམསརྦཛྙེཡསྥརཎནྠནཱཡསྟོཀོཀྟིབྷིཿབིགྷཊྚིཏཔུསྟཀཾཔྲཐམབིཛཧཱརཾ། ༄༅། །ཤེས་བྱ་ཀུན་ལ་ཁྱབ་པའི་གཞུང་ལུགས་ཉུང་ངུའི་ཚིག་གིས་རྣམ་པར་འགྲོལ་བ་ལེགས་བཤད་ཡོངས་འདུ་ཤེས་བྱ་མཐའ་ཡས་པའི་རྒྱ་མཚོ་ཞེས་བྱ་བ་ལས། གླེགས་བམ་གཉིས་པ་བཞུགས་སོ། ། གནས་ལྔ་པ། ལྷག་པ་ཚུལ་ཁྲིམས་ཀྱི་བསླབ་པའི་རིམ་པར་ཕྱེ་བ། དང་པོ། སློབ་དཔོན་དང་སློབ་མའི་མཚན་ཉིད། བསྟེན་ཚུལ། འཆད་ཉན་བཅས་བཤད་པའི་སྐབས། དེ་ལྟར་རྒྱལ་བའི་བསྟན་པ་རིན་པོ་ཆེ་འཇིག་རྟེན་དུ་འཚོ་ཞིང་གཞེས་པའི་སྒོར་འཇུག་པ་དེའི་ཚེ། ཐོག་མ་ཁོ་ནར་ཐར་པ་དམ་པའི་མངོན་པར་རྟོགས་པ་ཐམས་ཅད་ཀྱི་གཞི་རྟེན་དགེ་བའི་བཤེས་གཉེན་ལེགས་པར་བསྟེན་ཞིང༌། སྡོམ་པ་གསུམ་ལ་སློབ་དགོས་པས་ལྷག་པ་ཚུལ་ཁྲིམས་ཀྱི་བསླབ་པའི་རིམ་པར་ཕྱེ་བ་སྟེ། ག༥ གནས་ལྔ་པ་ལ་སྐབས་བཞི། ང༡ སློབ་དཔོན་དང་སློབ་མའི་མཚན་ཉིད་བསྟེན་ཚུལ་འཆད་ཉན་བཅས་བཤད་པ། ང༢ སོ་ཐར་གྱི་སྡོམ་པ་རབ་ཏུ་དབྱེ་བ། ང༣ བྱང་སེམས་ཀྱི་བསླབ་པ་བརྗོད་པ། ང༤ གསང་སྔགས་རིག་འཛིན་གྱི་སྡོམ་པ་སྤྱིར་བཤད་པ་དང་བཅས་པའོ། ། ང༡ དང་པོ་ལ་བཅུ། ཅ༡ དགེ་བའི་བཤེས་གཉེན་ཇི་ལྟར་འཚོལ་བ། ཅ༢ བཤེས་གཉེན་བསྟེན་པའི་འཐད་པ། ཅ༣ བསྟེན་བྱ་སློབ་དཔོན་གྱི་དབྱེ་བ་དང་མཚན་ཉིད། ཅ༤ དེ་ལས་འཕྲོས་པའི་འཇུག་ལྡོག་བྱ་ཚུལ། ཅ༥ སྟེན་བྱེད་སློབ་མའི་མཚན་ཉིད། ཅ༦ ཇི་ལྟར་བསྟེན་པའི་ཚུལ། ཅ༧ དེ་ལྟར་བསྟེན་པའི་དགོས་ཆེད་ཕན་ཡོན། ཅ༨ འགལ་ཟླ་སྡིག་གྲོགས་སྤང་བ། ཅ༩ མཐུན་རྐྱེན་དད་པ་སྐྱེད་པ། ཅ༡༠ དམ་པའི་ཆོས་འཆད་ཉན་བྱ་བའི་ཚུལ་ལོ། ། ཅ༡ དང་པོ་ནི། (༢ན) ཕན་བདེའི་འབྱུང་གནས་རྒྱལ་བའི་བསྟན་པ་ལ། ། དལ་འབྱོར་དོན་ཡོད་ཕྱིར་དུ་འཇུག་པ་ན། ། ཐོག་མར་དགེ་བའི་བཤེས་གཉེན་བཙལ་ཞིང་བསྟེན། ། འདི་དང་གཏན་གྱི་ཕན་པ་དང་བདེ་བ་མ་ལུས་པའི་འབྱུང་གནས་རྒྱལ་བའི་བསྟན་པ་རིན་པོ་ཆེ་བརྒྱ་ལམ་ན་མཚན་ཙམ་ཡང་ཐོས་པར་དཀའ་བ་ཉིད་འཇིག་རྟེན་དུ་གནས་པ་ལ། དལ་འབྱོར་གྱི་ཆོས་དང་ལྡན་པའི་ཡིད་བཞིན་ནོར་བུ་ལྟ་བུའི་མི་ལུས་ཐོབ་པ་དག་ཆུད་ཟོས་སུ་མི་བཏང་བར་དོན་ཡོད་པར་བགྱི་བའི་ཕྱིར་དུ་འཇུག་པའི་བློ་གྲོས་དང་ལྡན་པ་དག །ཐོག་མར་ཁོ་ན་དགེ་བའི་བཤེས་གཉེན་མཚན་ཉིད་དང་ལྡན་པ་བཙལ་ནས་རྙེད་པ་ན་ཚུལ་བཞིན་དུ་བསྟེན་པར་བྱའོ། ། འདི་ལ་ཕྱོགས་གསུམ། དང་པོ་ནི། སྤེལ་མར་བསྟོད་པ་ལས། བགྲོད་པ་གཅིག་དང་ཐབས་བདེ་དང༌། ། ལེགས་པར་འབྲེལ་དང་ཉེས་པ་མེད། ། ཐོག་མ་བར་དང་མཐར་དགེ་བ། ། ཁྱོད་ཀྱི་བསྟན་འདྲ་གཞན་ལ་མེད། ། ཅེས་ཐར་པའི་ལམ་དུ་བགྲོད་པ་གཅིག་ཅིང་འཇུག་པའི་ཐབས་བདེ་བ་ལ་ཞུགས་ནས་ལེགས་པའི་འབྲས་བུ་ཁོ་ནར་འབྲེལ་ཞིང་ཆགས་(༢བ)སོགས་ཀྱི་ཉེས་སྐྱོན་མེད་པ། ཐོག་མར་ཐོས་པ། བར་དུ་བསམ་པ། ཐ་མ་སྒོམ་པའི་དུས་ཐམས་ཅད་མངོན་མཐོ་ངེས་ལེགས་ཀྱི་རྒྱུ་འབའ་ཞིག་ཏུ་གྱུར་པས་དགེ་བའི་ཕྱིར་རྣམ་པ་ཀུན་ཏུ་ཕན་བདེའི་འབྱུང་གནས་ནི་སངས་རྒྱས་ཀྱི་བསྟན་པ་ཁོ་ན་ལས། དྲང་སྲོང་སེར་སྐྱ་སོགས་སྟོན་པ་གཞན་གྱི་བསྟན་པ་ལ་མེད་པས། རྒྱལ་སྲས་ཞི་བ་ལྷས། འགྲོ་བའི་སྡུག་བསྔལ་སྨན་གཅིག་པུ། ། བདེ་བ་ཐམས་ཅད་འབྱུང་བའི་གནས། ། བསྟན་པ་རྙེད་དང་བཀུར་སྟི་དང༌། ། བཅས་ཏེ་ཡུན་རིང་གནས་གྱུར་ཅིག ། ཅེས་སྨོན་ལམ་དུ་མཛད་པས་མཚོན་ནོ། ། གཉིས་པ་ནི། ཡབ་སྲས་མཇལ་བའི་མདོ་ལས། མི་ཁོམ་བརྒྱད་པོ་ཐམས་ཅད་རབ་སྤངས་ཤིང༌། ། དལ་བ་ཕུན་ཚོགས་རྙེད་དཀའ་ཐོབ་གྱུར་ནས། ། བདེ་གཤེགས་བསྟན་ལ་དད་པ་རྙེད་གྱུར་པའི། ། མཁས་པ་རྣམས་ཀྱིས་རིགས་པའི་རྣལ་འབྱོར་སྤྱོད། ། ཅེས་དལ་འབྱོར་གྱི་མི་ལུས་ཐོབ་པ་དོན་ཡོད་པར་བྱེད་པ་ནི་སངས་རྒྱས་ཀྱི་བསྟན་པ་ལ་དད་ཅིང་འཇུག་པ་ཁོ་ན་ཡིན་ནོ། ། གསུམ་པ་ནི། འཕགས་པ་བརྒྱད་སྟོང་པ་ལས། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས། དང་པོ་ཉིད་དུ་དགེ་བའི་བཤེས་གཉེན་དག་ལ་བསྙེན་པར་བྱ། བསྟེན་པར་བྱ། བསྙེན་བཀུར་བར་བྱའོ། །ཞེས་གསུངས་པ་ལྟར་རོ། ། བཤེས་གཉེན་ཇི་ལྟ་བུ་ཞིག་འཚོལ་ཞེ་ན། ཆེད་དུ་བརྗོད་པའི་ཚོམ་ལས། དམན་པ་བསྟེན་པས་མི་དག་ཉམས་འགྱུར་ཞིང༌། ། ཐད་ཀར་བབས་པ་བསྟེན་པས་སོ་ན་གནས། ། གཙོ་བོ་བསྟེན་པས་དམ་པ་ཐོབ་པར་འགྱུར། ། དེ་ཕྱིར་བདག་བས་གཙོར་གྱུར་བསྟེན་པར་བྱ། ། བཤེས་གཉེན་དེའང་། ཚུལ་ཁྲིམས་དང་། མང་དུ་ཐོས་པ་དང་། ཏིང་ངེ་འཛིན་ལ་སོགས་པ་རང་ལས་ཀྱང་ཡོན་ཏན་གྱིས་དམན་པ་བསྟེན་པས་སྟེན་པའི་མི་དག་ལ་ཡང་ཡོན་ཏན་གང་ཡང་མི་སྐྱེ་བར་སྐྱོན་མང་པོ་སྐྱེད་པས་(༣ན)ཉམས་པར་འགྱུར་ཞིང༌། ཐད་ཀར་བབས་པ་སྟེ་ཡོན་ཏན་རང་དང་མཉམ་པ་བསྟེན་པས་འཕེལ་འགྲིབ་མེད་པར་རང་སོ་ན་གནས་ཤིང༌། རང་ལས་ཡོན་ཏན་ལྷག་པར་གྱུར་པའི་གཙོ་བོ་བསྟེན་པས་དམ་པ་སྟེ། འདོད་པའི་དོན་མཆོག་ཐོབ་པར་འགྱུར་བ་དེའི་ཕྱིར་རྣམ་པ་ཀུན་ཏུ་བདག་བས་ལྷག་ཅིང་འཕགས་པ་གཙོ་བོ་བསྟེན་པར་བྱ་སྟེ། དེ་ཉིད་ལས། ཚུལ་ཁྲིམས་ཉེ་བར་ཞི་བ་དང༌། ། ཤེས་རབ་ཆེས་མཆོག་ལྷག་པ་ཡི། ། གཙོ་བོ་གང་ཡིན་དེ་བསྟེན་ན། ། གཙོ་བོ་ལས་ཀྱང་ཆེས་གཙོར་འགྱུར། ། ཞེས་བཤད་དོ། ། ཅ༢ གཉིས་པ་[བཤེས་གཉེན་བསྟེན་པའི་འཐད་པ་]ནི། འཐད་པ་ལུང་རིགས་དཔེ་ཡི་སྒོ་ནས་བཙལ། ། དགེ་བའི་བཤེས་གཉེན་བསྟེན་དགོས་པའི་འཐད་པ་ལ། ལུང་དང་། རིགས་པ། དཔེ་ཡི་སྒོ་ནས་བཙལ་བ་གསུམ་གྱི། དང་པོ་ནི། སྡུད་པ་ལས། སློབ་མ་བཟང་པོ་བླ་མ་གུས་ལྡན་དེ་དག་གིས། ། བླ་མ་མཁས་པ་དག་ལ་རྟག་ཏུ་བསྟེན་པར་བྱ། ། ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང༌། ། ཞེས་དང༌། སྡོང་པོ་བཀོད་པ་ལས། རིགས་ཀྱི་བུ། ཁྱོད་ཀྱི་དགེ་བའི་ཆོས་ཐམས་ཅད་ནི་དགེ་བའི་བཤེས་གཉེན་ལས་འབྱུང་ངོ༌། །དགེ་བའི་བཤེས་གཉེན་དེ་ནི་བསྐལ་པ་རྒྱ་མཚོ་ཐམས་ཅད་ནས་བསོད་ནམས་དང་ཡེ་ཤེས་ཀྱི་ཚོགས་བསགས་པ་དག་གིས་རྙེད་ནས་ཆོས་ཐོབ་པར་འགྱུར་གྱི། གཞན་དུ་ནོར་བུའི་མཆོག་རྙེད་པ་ལས་ཀྱང་ཕྲད་པར་ཤིན་ཏུ་དཀའོ། །དེའི་ཕྱིར། རྟག་ཏུ་གུས་པས་བསྙེན་བཀུར་ལ་མི་སྐྱོ་བར་བྱའོ། །ཞེས་སོགས་ལུང་མཐའ་ཡས་པ་འབྱུང་ངོ༌། ། གཉིས་པ་ནི། ཐམས་ཅད་མཁྱེན་པ་ཐོབ་པར་འདོད་པའི་གང་ཟག་དེ་ཆོས་ཅན། ཁྱོད་ཀྱིས་དགེ་བའི་བཤེས་གཉེན་བསྟེན་དགོས་པར་དམ་བཅའ། རང་ཉིད་ཀྱིས་ཚོགས་གསོག་པ་དང༌། སྒྲིབ་པ་སྦྱོང་མི་ཤེས་པའི་ཕྱིར། གཏན་ཚིག་དེའི་མཐུན་པའི་དཔེ་ནི། དུས་གསུམ་གྱི་སངས་རྒྱས་བཞིན་ནོ། །བཟློག་པའི་དཔེ་ནི། རང་སངས་རྒྱས་བཞིན་ཞེས་པ་ལ་སོགས་པའི་དཔེ་དུ་མས་བསྟན་པ་བཞིན་ནོ། ། གསུམ་པ་ནི། དཔལ་འབྱུང་གི་རྣམ་ཐར་ལས།དགེ་བའི་བཤེས་གཉེན་ནི་ཕ་རོལ་ཏུ་ཕྱིན་པའི་ལམ་དུ་འཛུད་པས་ལམ་མཁན་ལྟ་བུའོ། །ཞེས་དང༌། དགེ་བསྙེན་མ་མི་གཡོ་བའི་རྣམ་ཐར་ལས་ཀྱང༌། དགེ་བའི་བཤེས་གཉེན་རྣམས་ནི་བདག་ཅག་ཐམས་ཅད་མཁྱེན་པའི་གནས་སུ་ཕྱིན་པར་སྐྱེལ་བས་སྐྱེལ་མ་ལྟ་བུའོ། །ཞེས་དང༌། སྡོང་པོ་བཀོད་པ་ལས། དགེ་བའི་བཤེས་གཉེན་ནི་འཁོར་བའི་ཆུ་བོ་ཆེན་པོ་ལས་སྒྲོལ་བས་ན་མཉན་པ་ལྟ་བུའོ། །ཞེས་པ་ལ་སོགས་པ་དུ་མས་(༣བ)བསྟན་པ་བཞིན་ནོ། ། ཅ༣ གསུམ་པ་གང་ཞིག་བསྟེན་བྱ་སློབ་དཔོན་བཤད་པ་ལ་གཉིས། ཆ༡ སྤྱི་དང༌། ཆ༢ བྱེ་བྲག་གོ། ། ཆ༡ དང་པོ་ལའང་གཉིས། ཇ༡ དབྱེ་བ་དང་། ཇ༢ མཚན་ཉིད་དོ། ། ཇ༡ དང་པོ་ནི། དབྱེ་བ་སྤྱིར་ནི་སོ་སྐྱེ་བྱང་ཆུབ་སེམས། ། སྤྲུལ་རྫོགས་རང་གི་གནས་སྐབས་བཞི་དང་སྦྱར། ། དགེ་བའི་བཤེས་གཉེན་གྱི་དབྱེ་བ་སྤྱི་ཙམ་དུ་བཞི། སོ་སོ་སྐྱེ་བོ་དང༌། བྱང་ཆུབ་སེམས་དཔའ་དང༌། སངས་རྒྱས་སྤྲུལ་པའི་སྐུ་དང༌། ལོངས་སྤྱོད་རྫོགས་པའི་སྐུའོ། ། དེ་དག་ཀྱང་རང་གི་གནས་སྐབས་བཞི་དང་སྦྱར་ཏེ། རང་ཉིད་ལས་དང་པོ་བའི་དུས་སུ་སངས་རྒྱས་དང་ས་ཆེན་པོ་ལ་གནས་པའི་བྱང་ཆུབ་སེམས་དཔའ་རྣམས་ལ་བསྟེན་པའི་ནུས་པ་མེད་པས། དགེ་བའི་བཤེས་གཉེན་སོ་སོ་སྐྱེ་བོ་ལ་བསྟེན་པའོ། ། རང་ལས་ཀྱི་སྒྲིབ་པ་ཕལ་ཆེར་ཟད་ཙ་ན། དགེ་བའི་བཤེས་གཉེན་ས་ཆེན་པོ་ལ་གནས་པའི་བྱང་ཆུབ་སེམས་དཔའ་ལ་བསྟེན་པར་ནུས་པའོ། ། རང་ཚོགས་ལམ་ཆེན་པོ་ཡན་ཆད་ལ་གནས་ཙ་ན། དགེ་བའི་བཤེས་གཉེན་སངས་རྒྱས་སྤྲུལ་པའི་སྐུ་ལ་བསྟེན་པར་ནུས་པའོ། ། རང་ས་ཆེན་པོ་ལ་གནས་ཙ་ན། དགེ་བའི་བཤེས་གཉེན་ལོངས་སྤྱོད་རྫོགས་པའི་སྐུ་ལ་བསྟེན་པར་ནུས་པའོ། ། དེ་དག་ལས་བདག་ཅག་ལས་དང་པོ་བ་ལས་དང་ཉོན་མོངས་པའི་མུན་ཁང་ན་འདུག་པའི་ཚེ། དགེ་བའི་བཤེས་གཉེན་གོང་མ་རྣམས་བསྟེན་པ་ལྟ་ཞོག །ཞལ་མཐོང་བ་ཙམ་(༤ན)ཡང་མེད་པ་ལ། དགེ་བའི་བཤེས་གཉེན་སོ་སོ་སྐྱེ་བོ་དང་མཇལ་བས། དེའི་གསུང་གི་སྒྲོན་མེས་ལམ་སྣང་བར་བྱས་ནས། དགེ་བའི་བཤེས་གཉེན་གོང་མ་རྣམས་དང་མཇལ་བར་འགྱུར་ཏེ། དེས་ན་ཐམས་ཅད་ལས་དྲིན་ཆེ་བ་ནི་དགེ་བའི་བཤེས་གཉེན་སོ་སོ་སྐྱེ་བོ་ཡིན་ནོ། ། ཇ༢ གཉིས་པ་[མཚན་ཉིད་]ནི། སོ་སྐྱེའི་མཚན་ཉིད་ཡོན་ཏན་བརྒྱད་བཞི་གཉིས། ། བཤེས་གཉེན་གསུམ་པོས་ལས་དང་པོ་བ་ལ་ཕན་མི་ཐོགས་པས་མཚན་ཉིད་སྨོས་མ་དགོས། སོ་སྐྱེའི་བཤེས་གཉེན་གྱི་མཚན་ཉིད་ལ་ཡོན་ཏན་བརྒྱད་དམ་བཞིའམ་གཉིས་དང་ལྡན་པ་དགོས་པར་གསུངས་ཏེ། བརྒྱད་ནི། ཚུལ་ཁྲིམས་ལྡན་ཞིང་མང་དུ་ཐོས། ། རྟོགས་པ་དང་ནི་སྙིང་བརྩེར་ལྡན། ། མི་འཇིགས་བཟོད་ལྡན་སྐྱོ་བ་མེད། ། ཚིག་གི་བྱ་བ་ལྡན་པའོ། ། ཞེས་བྱང་ས་ལས་བཤད་པའི་དོན་སྡོམ་དུ་བྱས་པའོ། ། བཞི་ནི། མང་དུ་ཐོས་པས་སྟོན་པ་རྒྱ་ཆེ་བ་དང༌། ཤེས་རབ་ཆེ་བས་གཞན་གྱི་ཐེ་ཚོམ་གཅོད་པ་དང༌། སྐྱེས་བུ་དམ་པའི་ལས་བྱེད་པས་ཚིག་བཟུང་བར་འོས་པ་དང༌། ཀུན་ནས་ཉོན་མོངས་པ་དང་རྣམ་པར་བྱང་བ་གཉིས་ཀྱི་མཚན་ཉིད་ཀྱི་དེ་ཁོ་ན་ཉིད་སྟོན་པ་བཞིར་མདོ་སྡེ་རྒྱན་ལས་བཤད་དོ། ། གཉིས་ནི། སྤྱོད་འཇུག་ལས། རྟག་པར་དགེ་བའི་བཤེས་གཉེན་ནི། ། ཐེག་ཆེན་དོན་ལ་མཁས་པ་དང༌། ། བྱང་ཆུབ་སེམས་དཔའི་བརྟུལ་ཞུགས་མཆོག ། སྲོག་གི་ཕྱིར་ཡང་མི་གཏོང་ངོ༌། ། ཞེས་གསུངས་པ་ལྟར་མཁས་ཤིང་སྡོམ་པ་དང་ལྡན་པའོ། ། ཆ༢ གཉིས་པ་བྱེ་བྲག་ལའང་གཉིས། ཇ༡ དབྱེ་བ་དང་། ཇ༢ སོ་སོའི་མཚན་ཉིད་དོ། ། ཇ༡ དང་པོ་ནི། བྱེ་བྲག་སོ་བྱང་སྔགས་གསུམ་རིམ་པ་བཞིན། ། བྱེ་བྲག་སྡོམ་པ་གསུམ་གང་ལས་བླངས་པའི་ཡུལ་གྱི་དབང་གིས་དབྱེ་ན། སོ་ཐར། བྱང་སེམས། སྔགས་ཀྱི་སློབ་དཔོན་གསུམ། དེ་དག་གི་མཚན་ཉིད་ཀྱང་གོ་རིམ་བཞིན་བཤད་པར་བྱའོ་ཞེས་མཚམས་སྦྱར་ནས། ཇ༢ གཉིས་(༤བ)པ་ལ་གསུམ། ཉ༡ སོ། ཉ༢ བྱང་། ཉ༢ སྔགས་ཀྱི་སློབ་དཔོན་བཤད་པའོ། ། ཉ༡ དང་པོ་ནི། མཁན་སློབ་གསང་སྟོན་གནས་ཀློག་སློབ་དཔོན་ལྔ། ། དེ་ལས་ཐོག་མར་འདུལ་བ་ཁོ་ན་ལའང་རབ་བྱུང་དང་བསྙེན་རྫོགས་གནང་བའི་མཁན་པོ། ལས་བྱེད་པ་སློབ་དཔོན། གསང་སྟེ་སྟོན་པ། གནས་སམ་ཀློག་པའི་སློབ་དཔོན་དང་བཞི། དེ་སྟེང་དགེ་ཚུལ་གྱི་སློབ་དཔོན་བསྣན་ན་ལྔར་ཡང་བཤད་དོ། ། དེ་དག་སྤྱིའི་མཚན་ཉིད་ནི། སུམ་བརྒྱ་པ་ལས། ཚུལ་ཁྲིམས་ལྡན་ཞིང་འདུལ་བའི་ཆོ་ག་ཤེས། ། ནད་པར་སྙིང་བརྩེ་འཁོར་ནི་དག་པ་དང༌། ། ཆོས་དང་ཟང་ཟིང་ཕན་འདོགས་ལ་བརྩོན་པ། ། དུས་སུ་འདོམས་པ་དེ་དག་བླ་མར་བསྔགས། ། ཞེས་བསྙེན་པར་རྫོགས་ནས་ལོ་བཅུ་ལོན་ཞིང་སྐྱོན་མ་བྱུང་བས་ཚུལ་ཁྲིམས་དང་ལྡན་པ་ནི་བརྟན་པའི་ཡན་ལག །སྡེ་སྣོད་འདུལ་བའི་ཆོ་ག་མ་འཁྲུལ་བར་བློ་ནས་ཤེས་པ་མཁས་པའི་ཡན་ལག །སློབ་མ་ནད་པ་ལ་སྙིང་བརྩེ་ཞིང་རང་གི་འཁོར་ཚུལ་ཁྲིམས་དང་ལྡན་པས་དག་པ། ཆོས་དང་ཟང་ཟིང་སྟེ་ཕན་འདོགས་གཉིས་ཀྱིས་ཕན་གདགས་པ་ལ་བརྩོན་པ། བསླབ་བྱ་རྣམས་དུས་དང་དུས་སུ་གདམས་པ་རྣམས་ནི་ཕན་འདོགས་པའི་ཡན་ལག་སྟེ་དེ་ལྟ་བུ་ནི་སོ་སོ་ཐར་པའི་བླ་མར་བསྔགས་སོ། ། བྱེ་བྲག་མཁན་པོ་ནི། བརྟན་མཁས་བཙུན་དང་ཕན་འདོགས་པའི་ཡན་ལག་བཞི་དང་ལྡན་པ། བརྟན་མཁས་ལའང་ལྷན་ཅིག་ཏུ་སྦྱར་བའམ་ལྔ་ཕྲུགས་ཉེར་གཅིག་དང་ལྡན་པ་སྟེ། མདོ་རྩའི་འགྲེལ་ཆེན་དང་པད་དཀར་ཞབས་ཀྱིས་བཤད་པ་ལྟར་ཤེས་པར་བྱ། ཕན་འདོགས་ལའང་ཡན་ལག་བཅུ་གཉིས་སུ་བཤད་དེ། སྙིང་རྗེ་བཟོད་ལྡན་ང་བཞིན་པའོ། ། ཞེས་པ་ལྟར་རོ། ། ལས་བྱེད་པའི་སློབ་དཔོན་ནི། དགེ་སློང་གི་སྡོམ་པ་རྣམ་པར་དག་ཅིང༌། མཚན་མཐུན་པ། ལྟ་བ་མཐུན་པ། ཐ་སྙད་གསུམ་ལྡན། ལུས་ཐ་མལ་དུ་(༥ན)གནས་པ། ས་རང་བཞིན་དུ་གནས་པ་སྟེ། ཆོས་དྲུག་གི་སྟེང་དུ་སྡོམ་པ་འབོགས་པ་ལ་མཁས་པའོ། ། གསང་སྟོན་ནི། ཆོས་དྲུག་པོའི་སྟེང་དུ་བར་ཆད་དྲི་བ་ལ་མཁས་པའོ། ། གནས་སློབ་ནི། མཁན་པོའི་མཚན་ཉིད་ཀྱི་ཁར་སྤང་བླང་གི་ལུང་འབོགས་པས་སློབ་མའི་རྒྱུད་དག་པར་སྒྲུབ་ནུས་པའོ། ། ཀློག་སློབ་ནི། སློབ་དཔོན་གྱི་ཆོས་ཀྱི་ཁར་སྡེ་སྣོད་གསུམ་ལ་བློ་གྲོས་གསལ་བའོ། ། ཉ༢ གཉིས་པ་བྱང་སྡོམ་གྱི་སློབ་དཔོན་ནི། མདོ་སྡེ་རྒྱན་ལས། བཤེས་གཉེན་དུལ་བ་ཞི་བ་ཉེར་ཞི་བ། ། ཡོན་ཏན་ལྷག་པ་བརྩོན་བཅས་ལུང་གིས་ཕྱུག ། དེ་ཉིད་རབ་ཏུ་རྟོགས་པ་སྨྲ་མཁས་ལྡན། ། བརྩེ་བའི་བདག་ཉིད་སྐྱོ་ངལ་སྤངས་ལ་བསྟེན། ། ཞེས་ཆོས་བཅུ་དང་ལྡན་པ་ཞིག་དགོས་པར་གསུངས་ཏེ། ཚུལ་ཁྲིམས་བསླབ་པའི་སྲབ་བཟང་པོས་སེམས་ཀྱི་རྟ་རྒོད་དུལ་བ། དྲན་པ་དང་ཤེས་བཞིན་གྱིས་ཏིང་