Tibetan
ངེ་འཛིན་ལ་བསླབ་པས་སེམས་ནང་དུ་ཞི་བར་གནས་པ། སེམས་ལས་སུ་རུང་བའི་ཞི་གནས་ལ་བརྟེན་ཏེ་ཡང་དག་པའི་དོན་ལ་སོ་སོར་དཔྱོད་པའི་ཤེས་རབ་སྐྱེས་པས་རྨོངས་པ་ཉེ་བར་ཞི་བ། སློབ་མ་ལས་དམན་པའམ་མཉམ་པ་མ་ཡིན་པ་ཡོན་ཏན་ཆེས་ལྷག་པ། གཞན་གྱི་དོན་ལ་སྤྲོ་བ་བརྟན་པའི་བརྩོན་འགྲུས་དང་བཅས་པ། སྡེ་སྣོད་གསུམ་མང་དུ་ཐོས་པའི་ལུང་གིས་ཕྱུག་པ། ཐོས་བསམ་བསྒོམ་པའི་སྟོབས་ཀྱིས་ཆོས་ཐམས་ཅད་ཀྱི་དེ་ཁོ་ན་ཉིད་རབ་ཏུ་རྟོགས་པ། གདུལ་བྱའི་བློ་ཚོད་དང་བསྟུན་པའི་ལམ་གྱི་རིམ་པ་སྨྲ་བ་སྟེ་བཤད་མཁས་པ་དང་ལྡན་པ། རྙེད་བཀུར་སོགས་ལ་མི་ལྟ་བར་སྙིང་རྗེས་ཆོས་སྟོན་པའི་ཀུན་སློང་དག་པས་བརྩེ་བའི་བདག་ཉིད། ཡང་ཡང་འཆད་པས་མི་ངལ་ཞིང་ཁོང་ཁྲོ་བ་སོགས་བཟོད་པའི་སྐྱོ་ངལ་སྤངས་པ་ལ་བརྟེན་པར་བྱའོ། ། དེ་ཡང་། དུལ་བ། ཞི་བ། ཉེ་བར་ཞི་བ། དེ་ཉིད་རྟོགས་པ་རྣམས་ནི་རྟོགས་པའི་ཡན་ལག །ལུང་གིས་ཕྱུག་པ་ནི་ལུང་གི་ཡན་ལག །ཡོན་ཏན་ལྷག་པ་བཅས་ཆོས་དྲུག་པོ་རང་གིས་ཐོབ་པའི་ཡོན་ཏན། ལྷག་མ་(༥བ)བཞི་པོ་གཞན་རྗེས་སུ་འཛིན་པའི་ཡོན་ཏན་ཏེ། དེ་དག་དང་ལྡན་པ་ནི་སྐྱེས་བུ་ཆེན་པོ་ཞེས་བྱའོ། ། གཞན་ཡང་ཐོས་སོགས་བཅུ་གཉིས་ལྡན་པ་མཆོག ། དེ་ལས་གཞན་ཡང་། མང་ཐོས་ལ་སོགས་པའི་ཡོན་ཏན་བཅུ་གཉིས་དང་ལྡན་པ་ནི་མཆོག་ཏུ་གསུངས་ཏེ། འཕགས་པ་ཀླུ་སྒྲུབ་ཀྱིས། མང་དུ་ཐོས་ཤིང་ཤེས་རབ་ཆེ། ། ཟང་ཟིང་རྙེད་པ་དོན་མི་གཉེར། ། བྱང་ཆུབ་སེམས་ལྡན་སྙིང་རྗེ་ཆེ། ། དཀའ་བ་བཟོད་ཅིང་སྐྱོ་ངལ་ཆུང༌། ། མན་ངག་ཆེ་ཞིང་ལམ་ལས་གྲོལ། ། རིགས་ལ་མཁས་ཤིང་དྲོད་ཚད་ཤེས། ། བཅུ་གཉིས་ལྡན་ལ་བསྟེན་པར་བྱ། ། ཞེས་གསུངས་པ་ལྟར་རོ། ། ཉ༣ གསུམ་པ་སྔགས་ཀྱི་སློབ་དཔོན་ནི། རྡོ་རྗེ་སློབ་དཔོན་བརྟན་དུལ་བློ་གྲོས་ཅན། ། བཟོད་ལྡན་གཡོ་མེད་སྔགས་རྒྱུད་སྦྱོར་བ་ཤེས། ། བརྩེ་ལྡན་མཁས་ཤིང་དེ་ཉིད་བཅུ་མཐར་སོན། ། དཀྱིལ་འཁོར་ལས་མཁས་སྔགས་བཤད་སྤྱོད་པ་ཤེས། ། སྔགས་ཀྱི་རྡོ་རྗེ་སློབ་དཔོན་གྱི་དབྱེ་བ་ནི་འོག་ཏུ་འཆད། མཚན་ཉིད་རྒྱ་ཆེར་གསུངས་ཀྱང་། མདོར་བསྡུས་བླ་མ་ལྔ་བཅུ་པ་ལས་བཤད་པ་ལྟར་ན། ཐུན་མོང་གི་མཚན་ཉིད་ནི། ལུས་ངག་སེམས་རྣམས་མ་འཚུབས་པས་བརྟན་པ། སེམས་ཀྱི་བསླབ་པ་དང་ལྡན་པས་འདུལ་བ། ཆོས་རབ་ཏུ་རྣམ་པར་འབྱེད་པའི་བློ་གྲོས་ཅན། སློབ་མའི་བྱ་བ་ལ་བཟོད་པ་དང་ལྡན་པས་ཁོང་མི་ཁྲོ་བ། རང་གི་ཉེས་པ་བཅབ་པའི་གཡོ་དང་། གཞན་བསླུ་བའི་བསམ་པས་ཡང་དག་པ་མ་ཡིན་པའི་དོན་སྟོན་པའི་སྒྱུ་མེད་པས་དྲང་བ་སྟེ་དྲུག ། ཁྱད་པར་གྱི་མཚན་ཉིད་ནི། ཕྲིན་ལས་བཞི་ལ་སོགས་པའི་སྔགས་ཀྱི་སྦྱོར་བ་དང་མཐའ་དྲུག་ལ་སོགས་པ་རྒྱུད་ཀྱི་སྦྱོར་བ་ཤེས་པ། གཞན་ལ་སྙིང་བརྩེ་བ་དང་ལྡན་པ། ཐུན་མོང་བའི་གཞུང་ལུགས་རྣམས་ལའང་ཅི་རིགས་པར་མཁས་ཤིང༌། དེ་ཉིད་རྣམ་པ་བཅུའི་མཐར་སོན་པ། བསྙེན་སོགས་དག་པར་བྱས་ཤིང་དབང་བསྐུར་བའི་བྱ་བ་ཁོང་དུ་ཆུད་པས་དཀྱིལ་འཁོར་བྲི་བའི་ལས་ལ་མཁས་པ། དབང་པོ་རབ་འབྲིང་(༦ན)ཐ་མའི་ཚུལ་དང་མཐུན་པར་སྔགས་བཤད་པའི་སྤྱོད་པ་ཤེས་པ་སྟེ། དེ་ཉིད་བཅུ་ལ་ཚན་པ་གསུམ་དུ་དབྱེ་ནས་བསྡོམས་པས་དགུ། ཐུན་ཁྱད་གཉིས་ཀ་བསྡོམས་པས་བཅོ་ལྔའོ། ། དེ་ཉིད་བཅུ་ལ་ནང་གསེས་སུ་དབྱེ་ན་གསུམ་གྱི། དང་པོ་རྡོ་རྗེ་སློབ་དཔོན་ལ་ཉེ་བར་མཁོ་བའི་དེ་ཉིད་བཅུ་ནི། རབ་གནས་ཀྱི་རྒྱུད་ལས། དཀྱིལ་འཁོར་ཏིང་འཛིན་ཕྱག་རྒྱ་དང༌། ། སྟངས་སྟབས་སྔགས་དང་འདུག་སྟངས་དང༌། ། བཟླས་བརྗོད་སྦྱིན་སྲེག་གཏོར་མ་དང༌། ། ལས་ལ་སྦྱར་དང་སླར་བསྡུ་བའོ། ། ཞེས་འབྱུང་བ་ལྟར་དང༌། ཆོ་གའི་དེ་ཉིད་བཅུ་གུར་གྱི་དགོངས་པ་ཌོམྦྷི་པའི་དེ་ཉིད་བཅུ་པ་ལས་འབྱུང་བ། སྲུང་བ་དབང་བསྐུར་གཏོར་མ་བཟླས་བསྒོམ་དང༌། ། ཕྱིར་ཟློག་པ་དང་དཀྱིལ་འཁོར་སྒྲུབ་པ་དང༌། ། སྡིག་སྦྱོང་བ་དང་གཤེགས་སུ་གསོལ་བ་དང༌། ། དེ་ཉིད་བཅུ་ཞེས་རྒྱལ་བ་རྣམས་ཀྱིས་གསུངས། ། ཞེས་འབྱུང་བ་དང༌། དེ་ཁོ་ན་ཉིད་ཀྱི་དེ་ཉིད་བཅུ་རྒྱུད་འབུམ་ལྔའི་དགོངས་པ་རིན་ཆེན་འབར་བ་ལས་འབྱུང་བ། རྡོ་རྗེ་དྲིལ་བུ་ཡེ་ཤེས་དང༌། ། ལྷ་དང་དཀྱིལ་འཁོར་སྦྱིན་སྲེག་དང༌། ། སྔགས་དང་རྡུལ་ཚོན་གཏོར་མ་དང༌། ། དབང་བསྐུར་དེ་ཉིད་བཅུ་རིག་པས། ། ཞེས་གསུངས་ཏེ། དེ་ལྟར་ན་དེ་ཁོ་ན་ཉིད་སུམ་ཅུ་ཐམ་པའོ། ། ཡང་ན། རབ་གནས་ཀྱི་རྒྱུད་ལས་འབྱུང་བ་དེ་དང་འདྲ་བ་རྡོ་རྗེ་སྙིང་རྒྱན་ལས་ཕྱིའི་དེ་ཉིད་བཅུར་གསུངས་པ་དང༌། དེ་ཉིད་འདུས་པ་ལས་དེ་དང་ཕྱོགས་མཚུངས་གསུངས་པ་རྣམས་ནི་ཡོ་གའི་ལུགས་ཡིན་ལ། སྙིང་རྒྱན་ལས། ཕྱིར་ཟློག་གཉིས་ཀྱི་ཆོ་ག་དང༌། ། གསང་བ་ཤེས་རབ་ཡེ་ཤེས་དང༌། ། ཁ་སྦྱོར་དབྱེ་བའི་ཆོ་ག་དང༌། ། གཏོར་མ་རྡོ་རྗེའི་བཟླས་པ་དང༌། ། དྲག་ཤུལ་སྒྲུབ་པའི་ཆོ་ག་དང༌། ། རབ་ཏུ་གནས་དང་དཀྱིལ་འཁོར་སྒྲུབ། ། གསང་བའི་དེ་ཉིད་བཅུ་ཡིན་ནོ། ། ཞེས་འབྱུང་བ་དང༌། བླ་མའི་ཡོན་ཏན་ཡོངས་བཟུང་གི་རྒྱུད། མཉམ་སྦྱོར་འགྲེལ་པ། མན་སྙེ་སོགས་ལས་འབྱུང་བ་ནི་བླ་མེད་ཀྱི་དབང་དུ་(༦བ)བྱས་པར་མི་བསྐྱོད་ཡབ་སྲས་བཞེད་དོ། ། ཡང་ན་མཛོད་གསུམ་ལྡན་ཞིང་ཆུ་བོ་རྫོགས། ། གཉེར་ལྡན་རྒྱུད་དང་ལས་མཁས་དྲོད་ཚད་འཆང༌། ། ཡང་གསང་སྔགས་སྔ་འགྱུར་གྱི་ཕྱོགས་ལས་བཤད་པ་ལྟར་ན། དམ་པའི་མཛོད་གསུམ་ལྡན་པ་སྟེ། དེའང་བདེན་པ་དབྱེར་མེད་དུ་རྟོགས་པའི་ལྟ་བ། བསྐྱེད་རྫོགས་མཐར་ཕྱིན་པའི་ཏིང་འཛིན། སྤྱི་དང་བྱེ་བྲག་གི་དམ་ཚིག་ལས་མི་འདའ་བ་སྟེ་གསུམ་དང༌། ཡང་ན། བསྐྱེད་པའི་མཛོད་མ་ཧཱ། རྫོགས་པའི་མཛོད་ཨ་ནུ། ལྟ་བའི་མཛོད་ཨ་ཏི་གསུམ་ལ་མཁས་པ། ཕན་ནུས་ཟབ་མོའི་དབང་གི་ཆུ་བོ་རྫོགས་པ། གསང་སྔགས་ཡལ་བར་མི་འདོར་ཞིང་སྣོད་ལྡན་རྗེས་སུ་འཛིན་པའི་གཉེར་དང་ལྡན་པ། རྒྱུད་སྡེ་ལ་མཁས་ཤིང་ལུང་གི་དོན་ཁྲོལ་བ། ཕྲིན་ལས་ཏེ་སྒྲུབ་པའི་ཆོག་ཁྲིགས་ལ་མཁས་པ། སྙན་བརྒྱུད་ཀྱི་མན་ངག་ཉམས་སུ་མྱོང་བའི་དྲོད་རྟགས་འཆང་བ་སྟེ། མཛོད་གསུམ་སོ་སོར་བགྲང་བས་རང་བཞིན་བརྒྱད་ལྡན་གྱི་རྡོ་རྗེ་སློབ་དཔོན་དུ་སངས་རྒྱས་གསང་བའི་ལམ་རིམ་ལས་བཤད་དོ། ། མདོར་ན་བརྒྱུད་པ་དམ་ཚིག་མན་ངག་ལྡན། ། རྒྱུད་དོན་རིག་པ་གསུམ་ལས་དགེ་སློང་མཆོག ། བླ་མའི་མཚན་ཉིད་ནི། ཇི་སྐད་བཤད་པ་ཐམས་ཅད་མདོར་བསྡུ་ན། རྡོ་རྗེ་འཆང་ནས་ད་ལྟའི་བར་དུ་སྨིན་གྲོལ་གྱི་བརྒྱུད་པ་མ་ཆད་ཅིང་དམ་སེལ་གྱི་སྐྱོན་མ་ཞུགས་པ། སྡོམ་པ་དང་དམ་ཚིག་བརྟུལ་ཞུགས་ལ་གནས་པ། བརྒྱུད་པ་ནས་བརྒྱུད་པར་བྱུང་བའི་མན་ངག་དང་ལྡན་པ། བཀའ་བསྟན་བཅོས་སྤྱི་དང་ཁྱད་པར་རྒྱུད་ཀྱི་དོན་རིག་པ། གཞན་ཕན་སྙིང་རྗེའི་ཐུགས་དང་ལྡན་པ་ལ་ཐམས་ཅད་འདུའོ། ། མཚན་ཉིད་དེ་ལྡན་གྱི་རྟེན་ཡང་། དགེ་བསྙེན། དགེ་ཚུལ། དགེ་སློང་གསུམ་ལས། དང་པོ་ནི། ས་ཐོབ་པ་མ་གཏོགས་ཐ་མར་གསུངས་ཏེ། རྡོ་རྗེ་སྙིང་འགྲེལ་ལས། ས་ཐོབ་མ་གཏོགས་ཁྱིམ་པ་ནི། ། རྒྱལ་པོས་བླ་མར་མི་བྱ་སྟེ། ། དེ་ལ་ཐོས་པ་ཡོངས་ཤེས་པས། ། གང་ཞིག་རྟགས་ཅན་བྱ་བ་ཉིད། ། ས་ཐོབ་མ་གཏོགས་སློབ་དཔོན་ནི། ། ཁྱིམ་གནས་གང་ཚེ་མཆོད་བྱེད་པ། ། དེ་ཚེ་སངས་རྒྱས་ཆོས་དང་ནི། ། དགེ་འདུན་རྣམས་ལ་གུས་མེད་འགྱུར། ། ཞེས་སོ། །(༧ན) གཉིས་པ་ནི། རབ་བྱུང་གི་ཕྱོགས་ཡིན་པས་སྔ་མ་ལས་འཕགས་ཀྱང་ཕྱི་མ་ལ་ལྟོས་ན་འབྲིང་ཡིན་ལ། དགེ་སློང་ཁོ་ན་མཆོག་ཡིན་ཏེ། དུས་འཁོར་རྩ་རྒྱུད་ལས། དེ་ཉིད་བཅུ་ནི་ཡོངས་ཤེས་པ། ། གསུམ་ལས་དགེ་སློང་མཆོག་ཡིན་ནོ། ། འབྲིང་ནི་དགེ་ཚུལ་ཞེས་བྱ་སྟེ། ། ཁྱིམ་གནས་དེ་ལ་ཐ་མའོ། ། ཞེས་གསུངས་པ་ལྟར་རོ། ། ཁྱད་པར་ཟུང་འཇུག་རྡོ་རྗེའི་ཡེ་ཤེས་གང༌། ། རྒྱུད་ལ་སྐྱེད་ནུས་དཔལ་ལྡན་བླ་མ་སྟེ། ། ཁྱད་པར་ཟུང་འཇུག་ཕྱག་རྒྱ་ཆེན་པོ་རྡོ་རྗེའི་ཡེ་ཤེས་གང་དེ་སློབ་མའི་རྒྱུད་ལ་སྐྱེད་པར་ནུས་པས་མཆོག་གི་དངོས་གྲུབ་ཀྱི་ལྷན་ཅིག་བྱེད་རྐྱེན་དུ་གྱུར་པ་ནི་དཔལ་ལྡན་བླ་མ་ཞེས་བྱ་སྟེ། དེའི་མཚན་ཉིད་ནི། བསྡུས་རྒྱུད་ལས། སངས་རྒྱས་ཞལ་འདི་གང་གི་ཐུགས་དང་ཞལ་ལ་གནས་པར་གྱུར་པ་དེ་ནི་དཔལ་ལྡན་བླ་མའོ། །ཞེས་སངས་རྒྱས་ཀྱི་ཞལ་ལམ་སྒོར་གྱུར་པའི་དབང་བཞི་པ་ཟུང་འཇུག་གི་ལམ་འདི་ཉིད་གང་གི་ཞལ་ལས་རྒྱུད་ཀྱི་ངེས་པ་བྱང་ཆུབ་སེམས་དཔའི་འགྲེལ་པས་གསལ་བར་བྱས་པ་བཞིན་དུ་སློབ་མའི་བློ་ལ་འགོད་པར་ནུས་ཤིང༌། ཏིང་ངེ་འཛིན་གྱི་ཡན་ལག་ཐུགས་ལ་བཞུགས་པས་སློབ་མའི་རྒྱུད་ལ་བྱིན་རླབས་ཀྱི་ངོ་བོར་རྟོགས་པ་སྤོ་བར་ནུས་པ་སྔགས་ཀྱི་ངེས་པས་ས་དང་པོ་ཐོབ་པ་ནི་བླ་མ་ཙམ་ལས་ཀྱང་ཆེས་ཁྱད་པར་དུ་གྱུར་པའི་དཔལ་ལྡན་བླ་མ་ཞེས་བྱའོ། ། ཅ༤ བཞི་པ་དེ་ལས་འཕྲོས་པའི་འཇུག་ལྡོག་བྱ་བའི་ཚུལ་ནི། ལྡོག་པ་སྐྱོན་ཅན་སྤངས་ལ་མཚན་ཉིད་ཀྱང༌། ། ཐམས་ཅད་ཚང་དཀོན་ཡོན་ཏན་མང་བ་བཟུང༌། ། གོང་སྨོས་ཀྱི་མཚན་ཉིད་རྣམས་ལས་ལྡོག་པ་ནི་སངས་རྒྱས་ཀྱི་བསྟན་པ་ལས་ཕྱི་རོལ་ཏུ་གྱུར་པ་མཚན་ཉིད་དང་མི་ལྡན་པའི་སྐྱོན་ཅན་ཡིན་པའི་ཕྱིར་འདུ་འཛི་སྙན་གྲགས་ལ་སོགས་པ་ཆེ་ཡང་དཔྱོད་ལྡན་རྣམས་ཀྱིས་(༧བ)བརྟགས་ལ་སྔོན་བླ་མར་འབྲེལ་ནའང་བཏང་སྙོམས་སུ་བཞག་ཅིང༌། མ་འབྲེལ་ན་ཐོག་མ་ནས་མི་བསྟེན་པར་སྤང་བར་བྱ་སྟེ། ས་སྐྱ་པཎ་ཆེན་གྱིས། སངས་རྒྱས་བསྟན་བཞིན་མི་བྱེད་པའི། ། བླ་མ་ཡིན་ཀྱང་བཏང་སྙོམས་བཞག ། ཅེས་གསུངས་སོ། ། གཞན་ཡང་བསྡུས་རྒྱུད་ལས། ང་རྒྱལ་དང་ལྡན་ཁྲོ་བས་ཟིལ་མནན་དམ་ཚིག་རྣམས་བྲལ་རྫས་ལ་བརྐམ་ཞིང་ཐོས་པ་དག་ཀྱང་མེད། ། སློབ་མ་རྣམས་ནི་བསླུ་བ་དོན་དུ་གཉེར་ཞིང་མཆོག་གི་བདེ་བའི་གནས་ལས་སེམས་ཉམས་དབང་མ་བསྐུར།། ལོངས་སྤྱོད་དག་ལ་ཀུན་ཆགས་བག་མེད་རྩུབ་མོའི་ཚིག་དང་བཅས་ཤིང་དབང་པོའི་དོན་དུ་འདོད་ལྡན་པ། ། དེ་ཉིད་དམྱལ་བ་བཞིན་དུ་སློབ་མ་མཁས་པ་རྣམས་ཀྱིས་རྫོགས་པའི་བྱང་ཆུབ་རྒྱུར་ནི་སྤང་བར་བྱ། ། ཞེས་པས་མཚོན་གཞན་དག་ལས་ཀྱང་མང་དུ་བྱུང་བའི་ཚུལ་ཤེས་པར་བྱས་ལ་སྤང་ངོ༌། ། ལེགས་པའི་མཚན་ཉིད་ཀྱང་ཐམས་ཅད་ཚང་བ་དུས་དབང་གིས་ཤིན་ཏུ་དཀོན་པས་དེ་ལྟར་མ་རྙེད་ཀྱང་སྐྱོན་ཉུང་ཞིང་ཡོན་ཏན་མང་བ་བླ་མར་བཟུང་བར་བྱ་སྟེ། དོན་དམ་བསྙེན་པ་ལས། རྩོད་ལྡན་དབང་གིས་བླ་མར་སྐྱོན་དང་ཡོན་ཏན་འདྲེས། ། རྣམ་པ་ཀུན་ཏུ་སྡིག་དང་བྲལ་བ་ཡོད་མ་ཡིན། ། དེ་ཕྱིར་ཡོན་ཏན་ལྷག་པ་ཡང་ནི་ལེགས་དཔྱད་ནས། ། བུ་རྣམས་ཀྱིས་ནི་དེ་ལ་བསྟེན་པར་བྱ་བའོ། ། ཞེས་གསུངས་པ་ལྟར་རོ། ། ཅ༥ ལྔ་པ་གང་གིས་བསྟེན་པ་སློབ་མའི་མཚན་ཉིད་བཤད་པ་ལའང་གཉིས། ཆ༡ བསྟེན་བྱ། ཆ༢ སྤང་བྱ་ཞར་བྱུང་དང་བཅས་པའོ། ། ཆ༡ དང་པོ་ལ་གསུམ། ཇ༡ སོ་ཐར། ཇ༢ བྱང་སེམས། ཇ༣ སྔགས་ཀྱི་སྣོད་རུང་ངོ༌། ། ཇ༡ དང་པོ་ནི། སོ་ཐར་སྣོད་ལྡན་སྡོམ་པའི་བར་ཆད་མེད། ། སོ་ཐར་གྱི་སྡོམ་པའི་སྣོད་དང་ལྡན་པ་ནི་འཆད་པར་འགྱུར་བ་སྡོམ་པའི་མི་མཐུན་ཕྱོགས་འགལ་རྐྱེན་བར་ཆད་ཀྱི་ཆོས་བཞི་དང་བྲལ་བ་ཞིག་དགོས་ཏེ། སྤྱིར་སྡོམ་པ་སྐྱེ་བའི་རྟེན་ནོ། ། ཁྱད་པར་སུམ་བརྒྱ་པ་ལས། སློབ་དཔོན་ལ་གུས་ཚུལ་ཁྲིམས་ཡང་དག་དང༌། ། བསམ་གཏན་དང་ནི་འདོན་ལ་རྟག་བརྩོན་དང༌། །(༨ན) གྲིམས་ཤིང་དུལ་ལ་བཟོད་དང་ལྡན་པ་ནི། ། སྡོམ་བརྩོན་གནས་པའི་ཆོས་ལྡན་ཤེས་པར་བྱ། ། ཞེས་གསུངས་ཏེ། མཁན་པོ་དང་ཁྱད་པར་གནས་དང་ཀློག་པའི་སློབ་དཔོན་ལ་རྟག་ཏུ་གུས་པ། ལྟུང་བ་འབྱུང་བའི་རྒྱུ་བཞི་སྤངས་པས་ཚུལ་ཁྲིམས་ཡང་དག་པར་འཛིན་ནུས་པ། སྤོང་བ་བསམ་གཏན་དང་ཀློག་པ་ཁ་ཏོན་ནམ་འདོན་པ་ལ་རྟག་ཏུ་བརྩོན་པ། བློ་ཤིན་ཏུ་གྲིམས་ཤིང་རྒྱུད་དང་ཀུན་སྤྱོད་རང་བཞིན་གྱིས་དུལ་བ། སློབ་དཔོན་གྱིས་བསྒོ་བ་དང་གཞན་གྱིས་གནོད་པ་ལ་བཟོད་པ་དང་ལྡན་པ་ནི་སོ་ཐར་གྱི་སྡོམ་པ་ལ་བརྩོན་ནུས་ཤིང་མི་ཉམས་པར་གནས་པའི་ཆོས་དང་ལྡན་པར་ཤེས་པར་བྱའོ། ། ཇ༢ གཉིས་པ་[བྱང་སེམས་]ནི། བྱང་སེམས་སྣོད་གྱུར་དད་བརྩེ་བློ་གྲོས་ལྡན། ། སྤྱད་པ་སྤྱོད་བཟོད་རང་ཞི་དོན་མི་གཉེར། ། བརྩོན་ལྡན་སྟོང་ཉིད་ཐོས་ལ་དགའ་བ་ཡིན། ། བྱང་སེམས་ཀྱི་སྡོམ་པའི་སྣོད་དུ་གྱུར་པ་ནི། ཐེག་པ་ཆེན་པོའི་སྡེ་སྣོད་དང་དགེ་བའི་བཤེས་གཉེན་ལ་དད་པ། སེམས་ཅན་ལ་སྙིང་བརྩེ་བ། ཟབ་ཅིང་རྒྱ་ཆེ་བ་རྟོགས་པའི་བློ་གྲོས་དང་ལྡན་པ། བསྡུ་དངོས་བཞི་དང་ཕར་ཕྱིན་དྲུག་ལ་སོགས་པ་སྤྱད་པ་རྒྱ་ཆེན་པོ་ལ་མི་ཞུམ་པར་སྤྱོད་པར་བཟོད་པ། རང་ཉིད་ཁོ་ན་ཞི་བདེའི་གོ་འཕང་ཙམ་དོན་དུ་མི་གཉེར་ཞིང་སེམས་ཅན་ཐམས་ཅད་བསྒྲལ་བ་ལ་དགའ་བ། བརྩོན་འགྲུས་རྒྱུན་མི་འཆད་པ་དང་ལྡན་ཞིང་ཟབ་མོ་སྟོང་པ་ཉིད་ཀྱི་དོན་ཐོས་ན་སེམས་ལ་དགའ་བ་སྐྱེ་བ་ནི་རིགས་སད་པའི་རྟགས་ཡིན་པར་གསུངས་ཏེ། ཆོས་བཅུ་པའི་མདོ་ལས། བྱང་ཆུབ་སེམས་དཔའ་བློ་ལྡན་གྱི། ། རིགས་ནི་མཚན་མ་དག་ལས་ཤེས། ། དུ་བ་ལས་ནི་མེར་ཤེས་དང༌། ། ཆུ་སྐྱར་ལས་ནི་ཆུ་བཞིན་ནོ། ། ཞེས་སོ། ། གཞན་ཡང་བཞི་བརྒྱ་པ་ལས། གཟུར་གནས་བློ་ལྡན་དོན་གཉེར་བ། ། ཉན་པོ་སྣོད་ཅེས་བྱ་བར་བཤད། ། ཅེས་རང་གི་ལུགས་ལ་ཆགས་ཤིང་གཞན་ལུགས་ལ་སྡང་བའི་ཕྱོགས་ལྷུང་མེད་པས་གཟུ་བོར་གནས་པ། ལེགས་བཤད་ལས་(༨བ)ཡང་དག་པ་དང་ཉེས་བཤད་ལས་ལྟར་སྣང་གཉིས་འབྱེད་པའི་བློ་དང་ལྡན་པ། ཐེག་པ་ཆེན་པོ་ལ་དོན་གཉེར་ཆེ་བ་དང་ལྡན་པ་གསུམ་ཚང་ན་དགེ་བའི་བཤེས་གཉེན་གྱི་ཡོན་ཏན་ཀྱང་ཡོན་ཏན་དུ་མཐོང་ལ། དེ་གསུམ་མི་ལྡན་ན་བཤེས་གཉེན་ཡོན་ཏན་ཆེན་པོ་དང་ལྡན་ཀྱང་སྐྱོན་དུ་མཐོང་བར་འགྱུར་རོ། ། ཇ༣ གསུམ་པ་[སྔགས་ཀྱི་སྣོད་རུང་]ནི། སྔགས་ཀྱི་སྣོད་རུང་དེ་སྟེང་བླ་མར་གུས། ། གསང་ཐུབ་བློ་ཆེ་དམ་ཚིག་སྒྲུབ་ལ་བརྩོན། ། གསང་སྔགས་ཀྱི་སྨིན་གྲོལ་སྦྱིན་པའི་སྣོད་དུ་རུང་བ་ནི། བཤད་མ་ཐག་པ་དེ་དག་གི་སྟེང་དུ་བླ་མ་ལ་ཤིན་ཏུ་གུས་པ། ཟབ་མོའི་ལྟ་སྤྱོད་ལ་སོགས་པ་གསང་ཐུབ་པ། གསང་སྔགས་དོན་ལ་ཐེ་ཚོམ་མེད་ཅིང་དེ་ཉིད་རྟོགས་པའི་བློ་རྒྱ་ཆེ་བ། སྤང་བླང་གི་དམ་ཚིག་དང་སྒྲུབ་པ་ལ་བརྩོན་ནུས་པ་རྣམས་སུ་ཅི་རིགས་པར་འདུ་ལ། བསྡུས་རྒྱུད་དང་བཤད་རྒྱུད་རྡོར་ཕྲེང་སོགས་ལས་ནི་རྒྱ་ཆེར་གསུངས་སོ། ། སྔ་འགྱུར་གྱི་རྒྱུད་སྒྱུ་འཕྲུལ་ལས། སྟོན་པ་མཆོད་བརྩོན་རྟོགས་པ་གསལ། ། དམ་ཚིག་སྔགས་དང་ཕྱག་རྒྱ་རྣམས། ། མ་ཉམས་ཤེས་ཤིང་ཡོ་བྱད་ལྡན། ། ཅེས་པས། སྟོན་པ་བླ་མ་ལ་མཆོད་པས་དབང་རྣམས་རིམ་པར་ཐོབ་པ། གུས་སྦྱོར་དང་རྟག་སྦྱོར་གྱི་བརྩོན་འགྲུས་ཀྱིས་ཐོས་བསམ་ཡལ་བར་མི་འདོར་བ། རྟོགས་བྱའི་ལྟ་བ་ལ་རྣམ་པར་དཔྱོད་པའི་བློ་གྲོས་ཕྱིན་ཅི་མ་ལོག་པར་གསལ་བ། རྩ་བ་དང་ཡན་ལག་གི་དམ་ཚིག་མ་ཉམས་ཤིང༌། སྔགས་དང་ཕྱག་རྒྱ་ལ་སོགས་པའི་དོན་རྣམས་ཀྱང་ཁོང་དུ་ཆུད་ལ། མཐུན་རྐྱེན་གྱི་ཡོ་བྱད་དང་ལྡན་པ་དག་ལམ་འདིར་གཞུག་པར་བྱ་བའི་སྣོད་ལྡན་དུ་བསྟན་ཏོ། ། ཆ༢ གཉིས་པ་སྤང་བྱ་ཞར་བྱུང་བཅས་བཤད་པ་ནི། སྐྱོན་སྤངས་འདྲེས་ལ་དད་སོགས་ལྡན་པ་བཟུང༌། ། སློབ་མའི་ཡོན་ཏན་གང་ལས་ལྡོག་པ་ནི་སྐྱོན་དང་བཅས་པས་སྤང་བར་བྱ་བ་ཡིན་ཏེ། སྡོམ་འབྱུང་ལས། སྙིང་རྗེ་མེད་ཅིང་ཁྲོ་ལ་གདུག ། ཁེངས་དང་མ་བསྡོམས་རྣམ་གཡེང་ཅན། ། མ་རུང་རྨོངས་པ་སྙོམ་ལས་ཅན། ། གཞན་གྱི་སྲོག་ལ་བརྩེ་བ་བྲལ། ། ཕ་རོལ་རྫས་ལ་མངོན་པར་ཞེན། ། བླ་མས་རྟག་ཏུ་སྤང་བར་བྱ། ། ཞེས་དང༌། (༩ན) རིམ་ལྔ་ལས། བླ་མ་ལ་བརྙས་སྒྱུ་ཅན་དད་པ་མེད། ། སྔགས་ཀྱིས་རློམ་ཞིང་གླེགས་བམ་མཐོང་བས་ཁེངས། ། དད་པ་མེད་དང་དབང་བསྐུར་དམན་པ་ལ། ། གདམས་པའི་རིམ་པའང་དེ་ལ་བརྗོད་མི་བྱ། ། ཞེས་གསུངས་པ་ལྟར་རོ། ། སྐྱོན་ཡོན་འདྲེས་པ་ལ་དད་པ་དང་སོགས་ཁོངས་ནས་དོན་གཉེར་ལྡན་པ་ནི་མཚན་ཉིད་ཐམས་ཅད་མ་ཚང་ཡང་རྗེས་སུ་བཟུང་བར་བྱ་སྟེ། སྤྱི་རྒྱུད་ལས། སློབ་མ་ཡན་ལག་མ་ཉམས་དང༌། ། ལྷག་པར་ཡོན་ཏན་ལྡན་པ་དང༌། ། ནད་མེད་རིགས་ནི་བཙུན་པ་དང༌། ། དད་ཅིང་བརྟུལ་བཞུགས་ལྡན་པ་དཀོན། ། དཀོན་མཆོག་གསུམ་ལ་གང་དད་ཅིང༌། ། ཐེག་པ་ཆེན་པོའི་ལུགས་ལ་དགའ། ། བསོད་ནམས་ལྡན་པའི་སེམས་ཅན་ནི། ། ཆེན་པོ་དེ་དག་མདོར་བཟུང་ངོ༌། ། བདེ་གཤེགས་གསང་སྔགས་སྒྲུབ་པ་ལ། ། དོན་གཉེར་བརྩོན་པ་སློབ་མ་ནི། ། གཟུགས་ངན་ཡོན་ཏན་མི་ལྡན་ཡང༌། ། བློ་དང་ལྡན་པས་གཞུག་པར་བྱ། ། ཞེས་གསུངས་སོ། ། ཅ༦ དྲུག་པ་ཇི་ལྟར་བསྟེན་པའི་ཚུལ་བཤད་པ་ལ་གཉིས། ཆ༡ ཐོག་མར་འབྲེལ་བ་བརྟག་པ། ཆ༢ དེ་ནས་བསྟེན་པའོ། ། ཆ༡ དང་པོ་ནི། རིན་ཆེན་ལྟ་བུའི་དཔོན་སློབ་འབྲེལ་བརྟགས་ནས། ། དེ་ལྟར་བཤད་པའི་ཡོན་ཏན་དང་ལྡན་པ་རིན་པོ་ཆེ་ལྟ་བུའི་དཔོན་སློབ་ཚོགས་པ་ན་ཐོག་མར་ཡས་མས་སུ་འབྲེལ་བརྟག་པ་ནི་ཅི་ནས་ཀྱང་གལ་ཆེ་སྟེ། བླ་མ་ལྔ་བཅུ་པ་ལས། བླ་མ་དང་ནི་སློབ་མ་དག ། མཚུངས་པར་དམ་ཚིག་ཉམས་འགྱུར་བས། ། དཔའ་བོས་དང་པོར་སློབ་དཔོན་དང༌། ། སློབ་མའི་འབྲེལ་བ་བརྟག་པར་བྱ། ། ཞེས་དང༌།