Tibetan
ཕྱག་ཆེན་ཐིག་ལེ་ལས། དེ་ལྟ་བུ་ཡི་བླ་མ་ཡིས། ། འབད་པས་སློབ་མ་བརྟག་པར་བྱ། ། ཇི་ལྟར་སྲེག་ལ་སོགས་པས་གསེར། ། བརྟག་མཁས་པས་ནི་རིན་པོ་ཆེ། ། ཇི་ལྟར་བདེ་ལྡན་བུ་མོ་ནི། ། དེ་ལྟར་སློབ་མ་བརྟག་པར་བྱ། །(༩བ) དེ་བས་ཐམས་ཅད་རབ་འབད་དེ། ། ཕན་ཚུན་སོ་སོར་བརྟག་པར་བྱ། ། དེ་ལྟ་མིན་ན་སྐྱོན་དུ་འགྱུར། ། ཞེས་གསུངས་པ་ལྟར་རོ། ། ཁྱད་པར་གསང་སྔགས་ཀྱི་བླ་མས་སློབ་མ་མ་བརྟགས་པར་སུ་རུང་ལ་དབང་བསྐུར་ན་སྣོད་མིན་གྱིས་དམ་ཚིག་མི་ཐུབ་པས་འདི་ཕྱི་གཉིས་ཀར་ཕུང་ཞིང་དམ་ཚིག་ཉམས་པར་འགྱུར་བ་དང༌། རང་གི་དངོས་གྲུབ་ཀྱང་རྒྱང་རིང་དུ་བྱེད་པ་དང་བགེགས་ཀྱི་འཚེ་བ་སོགས་ཉེས་པ་མང་དུ་འབྱུང་ལ། སློབ་མས་ཀྱང་བླ་མའི་མཚན་ཉིད་མ་བརྟགས་པར་གང་རུང་ལས་དབང་བླངས་ན་ལོག་པའི་བཤེས་གཉེན་གྱིས་བསླུས་པར་འགྱུར་བ་དང༌། དམ་ཚིག་སྲུང་མི་ནུས་པས་དངོས་གྲུབ་ཀྱི་རྩ་བ་འཆད་པ་དང༌། ལམ་ངན་པར་དཀྲི་བས་དལ་འབྱོར་ཆུད་འཛའ་བ་སོགས་ཀྱི་ཉེས་དམིགས་མང་དུ་འབྱུང་བ་ཡིན་ནོ། ། ཆ༢ གཉིས་པ་[དེ་ནས་བསྟེན་པ་]ནི། ཐར་འདོད་རྙེད་བཀུར་རིམ་གྲོ་སྒྲུབ་པས་བསྟེན། ། ཞེས་པ་སྟེ། དེ་ལ་གཉིས། བསམ་པ་དང་། སྦྱོར་བའོ། ། དང་པོ་ནི། སྡུད་པ་ལས། དེ་ལྟ་བས་ན་བྱང་ཆུབ་དམ་པ་འཚོལ་བ་ཡི། ། བསམ་པ་དྲག་ལྡན་མཁས་པས་ང་རྒྱལ་ངེས་བཅོམ་སྟེ། ། ནད་པའི་ཚོགས་ཀྱིས་གསོ་ཕྱིར་སྨན་པ་བསྟེན་པ་ལྟར། ། གཡེལ་བ་མེད་པར་དགེ་བའི་བཤེས་གཉེན་བསྟེན་པར་བྱ། ། ཞེས་གསུངས་པ་ལྟར། ཐར་པ་བླ་ན་མེད་པའི་བྱང་ཆུབ་ཀྱི་གོ་འཕང་དམ་པ་དོན་དུ་གཉེར་བར་འདོད་པའི་བསམ་པ་གཏིང་ཚུགས་པས་གཡོ་བ་མེད་པར་བསྙེན་བཀུར་བའོ། ། གཉིས་པ་སྦྱོར་བ་ནི། བསྙེན་བཀུར་བའི་ཚུལ་ཡང༌། མདོ་སྡེ་རྒྱན་ལས། རྙེད་པ་བཀུར་སྟི་དག་དང་རིམ་གྲོ་དང༌། ། སྒྲུབ་པའི་སྒོ་ནས་བཤེས་གཉེན་བསྟེན་པར་བྱ། ། ཞེས་དོན་གསུམ་དུ་གསུངས་པའི་དང་པོ་རྙེད་པ་སྟོབ་པ་ནི། བཟའ་བ་དང་བགོ་བ་ལ་སོགས་ཡོད་ཅིང་འབྱོར་ན་ཇི་ལྟར་བཞེད་པ་བཞིན་སྤྲོ་བ་དང་བཅས་པས་ཕུལ། དེར་མ་ཟད་བུ་དང་ཆུང་མ་རང་ལུས་ཚུན་ཆད་ཀྱང་འབུལ་དགོས་པར་གསུངས། བཀུར་སྟིའི་རིམ་པ་ནི། མཐོང་ཕྱག་དང་ལྡང་བ་(༡༠ན)དང་བསྔགས་པ་བརྗོད་པ་ལ་སོགས་པ་རྟག་ཏུ་གུས་པའི་སྤྱོད་ལམ་བསྟེན་ཞིང༌། སྐུའི་གྲིབ་མའང་འགོམ་པར་མི་བྱ་ན་གཞན་ལ་ལྟ་ཅི་སྨོས་ཏེ། ན་བཟའ། བཞུགས་གདན། ཉེར་སྤྱད། མཆིལ་ལྷམ། བཞོན་པ། གཟུངས་མ་ལ་སོགས་པ་ལ་བཀས་མ་གནང་བར་མི་འགོམ། མི་སྤྱད་ཅིང་། སྤྱན་སྔར་ཉལ་བསྙེས་མཆིལ་སྣབས་འདོར་བ་ལྐོག་ཏུ་བསྔགས་པ་མ་ཡིན་པ་བརྗོད་པ་ལ་སོགས་པ་མ་གུས་པའི་སྤྱོད་ལམ་རྣམ་པ་ཐམས་ཅད་དུ་སྤང༌། གཉིས་པ་རིམ་གྲོ་བྱ་བ་ནི། ཕྱག་སྔོན་དུ་འགྲོ་བས་ཁྲུས་བཀུ་མཉེ་དྲིལ་ཕྱིས་སོགས་འཕྲལ་གྱི་བྱ་བ་ཐམས་ཅད་ཞི་དེས་དང་ཡིད་གཞུངས་པར་བྱ། གསུམ་པ་སྒྲུབ་པའི་སྒོ་ནས་བསྟེན་པ་ནི། བླ་མས་བསྒོ་བ་ཐམས་ཅད་ལ་སྒྲུབ་པ་བཀའ་བློ་བདེ་བ་དང༌། ཆོས་བསྟན་པ་ཐམས་ཅད་ལ་ཐོས་བསམ་སྒོམ་པ་སོགས་ཅི་རིགས་པར་ནན་ཏན་གྱིས་སྒྲུབ་པ་ནི་སྔ་མ་རྣམས་ལས་ཀྱང་བསྙེན་བཀུར་གྱི་མཆོག་སྟེ། ཡང་དག་པའི་དགེ་བའི་བཤེས་གཉེན་སྒྲུབ་པའི་མཆོད་པས་མཉེས་པར་བྱ་བ་ཡིན་གྱི། རྙེད་སོགས་ཀྱིས་མ་ཡིན་པའི་ཕྱིར་རོ། ། སྡོང་པོ་བཀོད་པ་ལས་ཀྱང༌། ཁྱོད་ཀྱིས་དགེ་བའི་བཤེས་གཉེན་འཚོལ་བ་ལ་ཡོངས་སུ་མི་སྐྱོ་བར་བྱའོ། །རྙེད་ནས་ཀྱང་དེའི་རྗེས་སུ་སྒྲུབ་པ་ལ་བསྙེལ་བ་མེད་པའི་སྲི་ཞུ་བྱའོ། །ཁུར་ཐམས་ཅད་ཀྱིས་མི་སྐྱོ་བས་ས་ལྟ་བུའི་འདུ་ཤེས་བསྐྱེད་པར་བྱའོ། །ཅི་བསྒོ་བ་ཉན་པར་བྲན་ལྟ་བུའི་འདུ་ཤེས་བསྐྱེད་པར་བྱའོ། །ཞེས་སོགས་གསུངས་སོ། ། ཅ༧ བདུན་པ་དེ་ལྟར་བསྟེན་པའི་དགོས་པ་ལ་གཉིས། ཆ༡ རིགས་པས་དགོས་པ་བསྒྲུབ་པ། ཆ༢ ཕན་ཡོན་གྱི་ལུང་སྨོས་པའོ། ། ཆ༡ དང་པོ་ནི། ཚངས་སྤྱོད་རིལ་པོ་མ་འདྲེས་ཡོངས་རྫོགས་དག ། ད་ལྟ་བཤེས་གཉེན་ང་བསྟེན་སྡུག་བསྔལ་ལས། ། གྲོལ་བའི་རིགས་པ་ལྟོས་ཞེས་རྒྱལ་བས་གསུངས། ། དགེ་བའི་བཤེས་གཉེན་བསྟེན་པས་ཚངས་པར་སྤྱོད་པ་རིལ་པོ་དང་མ་འདྲེས་པ་ཡོངས་སུ་(༡༠བ)རྫོགས་པ་དང་ཤིན་ཏུ་རྣམ་པར་དག་པའི་བར་དུ་འགྱུར་བ་དང༌། ད་ལྟ་དགེ་བའི་བཤེས་གཉེན་ང་བསྟེན་པས་སྲིད་པའི་སྡུག་བསྔལ་ལས་ཚེགས་མེད་པར་གྲོལ་བའི་རིགས་པའམ་དཔེ་ལ་ལྟོས་ཞེས་རྒྱལ་བ་སྟོན་པ་ཐུགས་རྗེ་ཅན་དེས་ལེགས་པར་གསུངས་ཤིང་གདམས་པར་མཛད་དེ། མདོ་ལས། ཀུན་དགའ་བོ། འདི་ལྟ་སྟེ། དགེ་བའི་བཤེས་གཉེན་དང་དགེ་བའི་གྲོགས་པོ་ཚངས་པར་སྤྱོད་པ་ཡོངས་སུ་རྫོགས་པ་ཡིན་ནོ། །ཞེས་དང༌། བཤེས་སྤྲིངས་ལས། དགེ་བའི་བཤེས་གཉེན་བསྟེན་པ་ཚངས་པར་སྤྱོད། ། ཡོངས་སུ་རྫོགས་པར་ཐུབ་པས་གསུངས་དེའི་ཕྱིར། ། དགེ་བའི་བཤེས་གཉེན་བསྟེན་བགྱི་བཤེས་གཉེན་ལ། ། བསྟེན་ནས་རབ་ཏུ་མང་པོས་ཞི་བ་ཐོབ། ། ཅེས་སོ། ། ཆ༢ གཉིས་པ་[ཕན་ཡོན་གྱི་ལུང་སྨོས་པ་]ནི། གཞན་ཡང་བཤེས་གཉེན་བསྟེན་པའི་ཕན་ཡོན་མང༌། ། དེ་ལས་གཞན་ཡང་། མདོ་རྒྱུད་རྣམས་ལས་དགེ་བའི་བཤེས་གཉེན་བསྟེན་པའི་ཕན་ཡོན་མང་པོ་མཐའ་ཡས་པར་གསུངས་ཏེ། སྡོང་པོ་བཀོད་པ་ལས། དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་རྣམས་ནི་ངན་འགྲོར་མི་ལྟུང༌། བྱ་བ་མ་ཡིན་པ་རྣམས་ཁོང་དུ་ཆུད་པར་མི་བྱེད། བག་མེད་པའི་གནས་ལས་ཟློག །འཁོར་བའི་གྲོང་འཁྱེར་ནས་འདོན། བྱང་ཆུབ་སེམས་དཔའི་བསླབ་པ་ལས་འགལ་བར་མི་བྱེད། འཇིག་རྟེན་ཐམས་ཅད་ལས་མངོན་པར་འཕགས། ལས་དང་ཉོན་མོངས་པས་ཐུབ་པར་དཀའོ། །རིགས་ཀྱི་བུ། དེ་ལྟ་བས་ན། དེ་ལྟར་ཡིད་ལ་བྱེད་པ་རྒྱུན་མ་ཆད་པས་དགེ་བའི་བཤེས་གཉེན་རྣམས་ཀྱི་དྲུང་དུ་འགྲོ་བར་བྱའོ། །ཞེས་པས་མཚོན། ལུང་རྣམས་ཀྱི་དོན་བསྡུས། ཀུན་མཁྱེན་དྲི་མེད་འོད་ཟེར་གྱི་ཞལ་ནས། བླ་མ་བསྟེན་པའི་ཡོན་ཏན་མཐའ་ཡས་ཏེ། ། ཡང་དག་ལམ་ཆུད་བླང་དོར་དམིགས་རྣམ་ཕྱེད། ། ཚོགས་རྫོགས་སྒྲིབ་སྦྱངས་བར་ཆད་རབ་ཞི་ཞིང༌། ། རང་ཡང་སྐྱེ་བོ་དམ་པའི་གནས་ཐོབ་ནས། ། མྱུར་དུ་ཐར་པའི་གྲོང་དུ་ཕྱིན་པ་འོ། ། ཞེས་གསུངས་སོ། ། གཞན་ཡང་། སངས་རྒྱས་ཀྱི་གོ་འཕང་ལ་(༡༡ན)ཉེ་བ་དང་རྒྱལ་བ་རྣམས་དགྱེས་པ་དང༌། དགེ་བའི་བཤེས་གཉེན་གྱིས་མི་ཕོངས་པ་དང་། ངན་འགྲོར་མི་ལྟུང་བ་དང་། ལས་ངན་པ་དང་ཉོན་མོངས་པས་ཐུབ་པར་དཀའ་བ་དང༌། བྱང་སེམས་ཀྱི་སྤྱོད་པ་དང་མི་འགལ་ཞིང་དེ་ལ་དྲན་པ་དང་ལྡན་པས་ཡོན་ཏན་གྱི་ཚོགས་ཀྱིས་ཇེ་མཐོ་ཇེ་མཐོར་འགྱུར་ཞིང་། གནས་སྐབས་དང་མཐར་ཐུག་གི་དོན་ཐམས་ཅད་འགྲུབ་པར་གསུངས་པ་དང༌། གཞན་ཡང་། བཤེས་གཉེན་བཀུར་བས་ནི། ངན་འགྲོ་མྱོང་བའི་ལས་རྣམས་ཚེ་འདི་ལ་ལུས་སེམས་ལ་གནོད་པ་ཕྲ་མོ་ཙམ་མམ། རྨི་ལམ་དུ་མྱོང་བས་ཀྱང་ལས་དེ་འདྲོངས་ནས་ཟད་པར་འགྱུར་བ་དང༌། སངས་རྒྱས་དཔག་ཏུ་མེད་པ་ལ་ཡོན་ཕུལ་བ་སོགས་ཀྱི་དགེ་རྩ་རྣམས་ཟིལ་གྱིས་གནོན་པ་སོགས་ཀྱི་ཕན་ཡོན་ཆེ་བར་གསུངས་སོ། ། བསྟེན་ཚུལ་ལོག་ན། ཚེ་འདིར་ནད་དང་གདོན་དུ་མས་འཚེ་བ་དང་། ཕྱི་མར་ངན་འགྲོའི་སྡུག་བསྔལ་དཔག་ཏུ་མེད་པར་མྱོང་བ་དང༌། ཡོན་ཏན་མ་སྐྱེས་པ་རྣམས་མི་སྐྱེ། སྐྱེས་པ་རྣམས་ཀྱང་ཉམས་པར་འགྱུར་བས་ན། ལག་ན་རྡོ་རྗེ་དབང་བསྐུར་བའི་རྒྱུད་ལས། གསང་བ་པའི་བདག་པོ་སློབ་དཔོན་ལ་སློབ་མས་ཇི་ལྟར་བལྟ་བར་བྱ་ཞེ་ན། སངས་རྒྱས་བཅོམ་ལྡན་འདས་ལ་ཇི་ལྟ་བ་དེ་བཞིན་དུའོ། །ཞེས་དང༌། ཐེག་པ་ཆེན་པོའི་མདོ་སྡེ་དང་འདུལ་བ་ལས་ཀྱང་དེ་ལྟར་གསུངས་པ་ཡོད་པས་སྐྱོན་རྟོག་གི་བློ་སྤངས་ཏེ་སངས་རྒྱས་ལས་ལྷག་པའི་གུས་པ་ཆེན་པོས་བསྟེན་པར་བྱའོ། ། བླ་མ་མཆོད་པའི་ཕན་ཡོན་ཀྱང་བསམ་གྱིས་མི་ཁྱབ་སྟེ། གསང་བ་འདུས་པར། ཕྱོགས་བཅུ་དུས་གསུམ་གྱི་སངས་རྒྱས་མཆོད་པ་བས། བླ་མའི་བ་སྤུའི་ཁུང་བུ་གཅིག་མཆོད་པས་བསོད་ནམས་ཆེའོ། །ཞེས་དང༌། དཔལ་འབྱུང་བའི་མདོ་ལས། དགེ་བའི་བཤེས་གཉེན་མགུ་བར་བྱས་ན་སངས་རྒྱས་ཀྱི་བྱང་ཆུབ་ཐོབ་བོ། །ཞེས་སོགས་འབྱུང་ཞིང༌། མདོར་ན། བསོད་ནམས་དང་ཡེ་ཤེས་ཀྱི་ཚོགས་རྫོགས་པ་དང༌། རྐྱེན་ངན་པའི་བར་ཆད་ཐམས་ཅད་ཞི་བ་དང༌། དཔལ་དང་འབྱོར་བ་ཆེ་བ་དང༌། མྱུར་དུ་སངས་རྒྱས་(༡༡བ)ཐོབ་པ་སོགས་མཐོང་བ་དང༌། མ་མཐོང་བའི་ཆོས་ཀྱི་ཡོན་ཏན་དཔག་ཏུ་མེད་པ་ཐོབ་བོ། ། སྤྱིར་ཡུལ་མཆོག་བླ་མ་དང༌། མཁན་པོ་དང༌། སློབ་དཔོན་དང༌། ནད་པ་དང༌། ཆོས་སྨྲ་བ་དང༌། སྲིད་པ་ཐ་མ་པའི་བྱང་ཆུབ་སེམས་དཔའ་དང༌། ཉན་ཐོས་དང༌། རང་སངས་རྒྱས་འཕགས་པ་དང༌། ཕ་མ་རྣམས་ལ་བསོད་ནམས་དང་བསོད་ནམས་མ་ཡིན་པའི་ལས་གང་བྱས་ཀྱང་སྟོབས་ཆེ་སྟེ། མཛོད་ལས། འཕགས་པ་མིན་ཡང་ཕ་མ་དང༌། ། ནད་པ་དང་ནི་ཆོས་སྨྲ་དང༌། ། སྐྱེ་མཐའི་བྱང་ཆུབ་སེམས་དཔའ་ལ། ། ཡོན་ནི་གཞལ་དུ་མེད་པར་གསུངས། ། ཞེས་ཀྱང་བྱུང་ངོ༌། ། ཅ༨ བརྒྱད་པ་འགལ་ཟླ་སྤང་བར་བཤད་པ་ལ་གཉིས། ཆ༡ སྡིག་པའི་གྲོགས་དང༌། ཆ༢ བདུད་ཀྱི་བར་ཆད་དོ། ། ཆ༡ དང་པོ་ནི། རྒྱུད་ངན་དག་སྣང་ཆུང་ཞིང་ཕྱོགས་རིས་ཆེ། ། མཆོག་འཛིན་བདག་བསྟོད་གཞན་སྨོད་སྡིག་པའི་བཤེས། ། སྤྱིར་བླ་མ་དང་མཁན་སློབ་དང་གྲོགས་མཆེད་ལ་སོགས་པ་ཚེ་འདིར་སྣང་ལ་ཞེན་ཞིང་མི་དགེ་བའི་ལས་ལ་སྦྱོར་བར་བྱེད་པ་ཐམས་ཅད་མི་དགེ་བའི་བཤེས་གཉེན་ཡིན་པས་སྤང་དགོས་ཤིང༌། བྱེ་བྲག་ལྟར་སྣང་བཟང་པོའི་ངང་ཚུལ་དང་ལྡན་ཀྱང་ཐར་པ་ལ་བར་དུ་གཅོད་པར་བྱེད་པ། རང་རྒྱུད་ངན་པ་དང༌། དག་སྣང་ཆུང་བ་དང༌། ཕྱོགས་རིས་ཆེ་བ་དང༌། རང་གི་ལྟ་བ་དང་ཆོས་ཁོ་ན་མཆོག་ཏུ་འཛིན་པ་དང༌། བདག་ལ་བསྟོད་པ་དང༌། གཞན་ལ་སྨོད་པ་དང༌། ཆོས་ལུགས་གཞན་ལ་ཟུར་གྱིས་སྨོད་ཅིང་སྤོང་བ་དང༌། བླ་མ་དགེ་བའི་བཤེས་གཉེན་གཞན་དོན་གྱི་ཁུར་བསྣམས་པ་དག་ལ་སྨོད་པའི་རིགས་ཅན་དེ་དག་དང་འགྲོགས་པ་ན། རང་ཡང་དེའི་ཕྱོགས་དང་བཤེས་འདྲིས་བསྟེན་པས་དེའི་ཉེས་པ་ཞར་ལ་འགོ་བས་རིམ་གྱིས་རྒྱུད་ངན་པར་གྱུར་ཏེ། འདུལ་བ་ལུང་ལས། མི་ཡི་མདུན་ན་ཉ་རུལ་ལ། ། ཀུ་ཤ་ཉིད་ཀྱིས་དམ་དཀྲིས་པ། ། དེ་ནི་རིང་པོར་མི་ཐོགས་པར། ། ཀུ་ཤ་ཉིད་ཀྱང་དེ་འདྲར་འགྱུར། ། དེ་བཞིན་སྡིག་པའི་གྲོགས་བསྟེན་པས། ། རྒྱུན་དུ་དེ་འདྲར་འགྱུར་བ་ཉིད། ། ཅེས་གསུངས་པ་བཞིན་ནོ། །(༡༢ན) དེས་ན་དྲན་པ་ཉེར་གཞག་ལས། དགེ་བའི་ཆོས་ཐམས་ཅད་ཀྱི་བར་དུ་གཅོད་པའི་གཙོ་བོ་ནི་སྡིག་པའི་གྲོགས་པོ་ཡིན་ལ། དེ་དང་ལྷན་ཅིག་འགྲོགས་པའམ། གཏམ་སྨྲ་བའམ། གྲིབ་མས་ཕོག་པ་ཙམ་ཡང་སྤང་བར་བྱའོ། །ཞེས་གསུངས་པ་ལྟར། རྣམ་པ་ཀུན་ཏུ་སྡིག་པའི་བཤེས་འདྲིས་སྤང་བ་ལ་བརྩོན་པར་བྱའོ། ། ཆ༢ གཉིས་པ་[བདུད་ཀྱི་བར་ཆད་]ནི། བདུད་ཀྱི་བར་ཆད་ངོ་ཤེས་གཉེན་པོས་གཞོམ། ། ཡང་དག་པའི་ཆོས་དང་བླ་མ་ཕྲད་ཅིང་ཐོས་བསམ་སྒོམ་པ་ལ་ཞུགས་པ་དེའི་ཚེ་བདུད་ཀྱི་བར་ཆད་འབྱུང་བར་འགྱུར་ཏེ། སྡུད་པ་ལས། རིན་ཆེན་ཆོས་ཀྱང་དཀོན་ལ་རྟག་ཏུ་འཚེ་བའང་མང༌། ། ཐེག་པར་གསར་དུ་ཞུགས་པའི་སེམས་ཅན་བློ་ཆུང་བ། ། གང་ཞིག་དཀོན་པའི་རིན་ཆེན་འདི་ནི་མ་རྙེད་པ། ། དེ་ལ་བར་ཆད་བྱ་ཕྱིར་བདུད་ནི་སྤྲོ་བར་འགྱུར། ། ཞེས་གསུངས། དེ་ལ་ཡང་སྤྱིའི་བདུད་ཉོན་མོངས་སོགས་བཞི། བྱེ་བྲག་ཕྱི་ནང་གསང་བའི་བདུད་དྲུག་གསུམ་བཅོ་བརྒྱད་ལ་སོགས་པ་མདོ་དང་མན་ངག་ལས་གསུངས་ཤིང༌། བདུད་དེ་དག་འཇུག་པའི་རྒྱུ། ལས་དང་སྤྱོད་ཡུལ། བྱིན་གྱིས་བརླབས་པའི་རྟགས། ཞི་བར་བྱེད་པའི་ཐབས་རྣམས་ཐུན་མོང་དང་ཐུན་མོང་མ་ཡིན་པ་རྒྱ་ཆེར་ཡོད་པ་ལས། སྐབས་སུ་བབས་པ་ནི་བཤེས་གཉེན་གྱི་སྐྱོན་ལ་རྟོག་ཅིང་ཐོས་བསམ་ལ་བརྩོན་པར་མི་འདོད་པ་དང༌། དབྱེན་དང་བྲེ་མོ་ལ་སོགས་ཁོང་ཁྲོ་བའི་རྒྱུ་བསྟེན་པ། བཟའ་བཏུང་གནས་མལ་ཚོང་ལ་སོགས་པའི་རྣམ་པར་གཡེང་བ་དང༌། གཉིད་རྨུགས་ལེ་ལོའི་དབང་དུ་བྱིང་བ་དང༌། འདོད་ཆགས་སོགས་རྣམ་པར་རྟོག་པའི་གཞན་དབང་དུ་གྱུར་པ་རྣམས་ནི་བདག་གི་ཐར་པ་ལ་བར་དུ་གཅོད་པའི་བདུད་དུ་ངོ་ཤེས་པར་བྱས་ལ། བླ་མ་དང་མཆེད་གྲོགས་ལ་དད་གུས། ཐོས་བསམ་སྒོམ་གསུམ་ལ་བརྩོན་འགྲུས། ཆོས་ལ་ཐེ་ཚོམ་མེད་པའི་ཡིད་ཆེས། རྣམ་རྟོག་དང་གཡེང་བའི་གཞན་དབང་དུ་མ་ཤོར་བར་གཉེན་པོའི་གོ་ཆ་དང་ལྡན་པས་བདུད་གཞོམ་པ་ལ་མཁས་པར་བྱའོ། ། ཅ༩ དགུ་པ་དད་པ་བསྟེན་པར་(༡༢བ)བཤད་པ་ནི། དང་བ་ཡིད་ཆེས་འདོད་པའི་དད་པ་བསྐྱེད། ། སྤྱིར་དཀར་པོའི་ཆོས་ཐམས་ཅད་ཀྱི་སྔོན་དུ་འགྲོ་ཞིང་། ཁྱད་པར་བཤེས་གཉེན་བསྟེན་ཞིང་ལམ་ལ་བརྩོན་པའི་ཐོག་མ་ཁོ་ནར་དད་པ་རྣམ་གསུམ་བསྐྱེད་པ་གལ་ཆེ་སྟེ། དཀོན་མཆོག་ཏ་ལའི་མདོ་ལས། དད་པ་སྔོན་འགྲོ་མ་ལྟར་བསྐྱེད་པ་སྟེ། ། དོགས་པ་སེལ་ཞིང་ཆུ་བོ་རྣམས་ལས་སྒྲོལ། ། དད་པ་བདེ་ལེགས་གྲོང་ཁྱེར་མཚོན་བྱེད་ཡིན། ། ཅེས་སོགས་གསུངས་སོ། ། དེ་ལ་དང་བའི་ངོ་བོ་ནི། སྤང་བླང་གི་ཡུལ་འཇུག་ལྡོག་ལ་དམིགས་པའི་བློ་རབ་ཏུ་དང་བ་སྟེ། དེ་ལ་དབྱེ་ན། ཆོས་མངོན་པར། དད་པ་གང་ཞེ་ན། ལས་དང་འབྲས་བུ་དང་བདེན་པ་དང༌། དཀོན་མཆོག་ལ་མངོན་པར་ཡིད་ཆེས་པ་དང༌། འདོད་པ་དང༌། སེམས་དང་བའོ། །ཞེས་གསུངས་པས། དང་བའི་དད་པ། ཡིད་ཆེས་པའི་དད་པ། འདོད་པའི་དད་པ་རྣམས་སུ་ཡོད་པ་ལས། དང་པོ་ནི། ཡུལ་དཀོན་མཆོག་ལ་བརྟེན་ཏེ། དཀོན་མཆོག་གསུམ་དང་བླ་མར་མོས་ཤིང་སེམས་དང་བའོ། གཉིས་པ་ནི། ལས་རྒྱུ་འབྲས་ལ་ཡིད་ཆེས་པའོ། ། གསུམ་པ་ནི། བླ་ན་མེད་པའི་བྱང་ཆུབ་ཐོབ་པའི་ཆེད་དུ་གུས་པ་དང་བཅས་ཏེ་ལམ་ལ་སློབ་པའོ། ། དེ་ཉིད་ལས། འདུན་དང་ཞེ་སྡང་འཇིགས་པ་དང༌། ། རྨོངས་པས་གང་ཞིག་ཆོས་མི་འདའ། ། དེ་ནི་དད་པ་ཅན་ཞེས་བྱ། ། ངེས་པར་ལེགས་པའི་སྣོད་མཆོག་ཡིན། ། ཅེས་ཆགས་སྡང་རྨོངས་གསུམ་སོགས་ཀྱི་དོན་དུ་ཆོས་མི་གཏོང་བ་ནི་དད་པ་སྐྱེས་པའི་ཚད་ཡིན་ལ། ཕན་ཡོན་ནི། སྐྱེས་བུ་མཆོག་གི་སེམས་སྐྱེ། མི་ཁོམས་པ་བརྒྱད་སྤངས་པ་སོགས་མཐའ་ཡས་ཤིང༌། དད་པ་དང་ལྡན་ན་དེ་བཞིན་གཤེགས་པ་རྣམས་ཀྱང་དེའི་དྲུང་དུ་བྱོན་ནས་ཆོས་སྟོན་ཏེ། དཀོན་མཆོག་ཏ་ལར། རྒྱལ་དང་རྒྱལ་བའི་ཆོས་ལ་དད་གྱུར་ཅིང༌། ། རྒྱལ་སྲས་རྣམས་ཀྱི་སྤྱོད་ལ་དད་བྱེད་ལ། ། བྱང་ཆུབ་བླ་ན་མེད་ལ་དད་གྱུར་ན། ། སྐྱེས་བུ་ཆེན་པོ་རྣམས་ཀྱི་སེམས་སྐྱེའོ། ། ཞེས་དང༌། བྱང་སེམས་ཀྱི་སྡེ་སྣོད་ལས། (༡༣ན)དེ་ལྟར་དད་པ་ལ་གནས་པའི་བྱང་ཆུབ་སེམས་དཔའ་སངས་རྒྱས་བཅོམ་ལྡན་འདས་རྣམས་ཀྱིས་སངས་རྒྱས་ཀྱི་ཆོས་རྣམས་ཀྱི་སྣོད་དུ་རིག་ནས་དེའི་དྲུང་དུ་གཤེགས་ཏེ་བྱང་ཆུབ་སེམས་དཔའི་ལམ་ཡང་དག་པར་སྟོན་ཏོ། །ཞེས་གསུངས་སོ། ། མདོར་ན། དད་པ་ནི། དཀར་པོའི་ཆོས་ཐམས་ཅད་ཀྱི་རྟེན་དུ་གྱུར་པས་སྐྱེད་ཅིང་འཕེལ་བའི་རྒྱུ་དང་རྐྱེན་བསྟེན། འགྲིབས་པའི་རྒྱུ་རྐྱེན་སྤངས་ལ། སྐྱེས་པ་རྣམས་ཀྱང་བརྟན་པ་ལ་འབད་པར་བྱའོ། ། ཅ༡༠ བཅུ་པ་ཆོས་འཆད་ཉན་ཇི་ལྟར་བྱ་བའི་ཚུལ་འཆད་པ་ལ་བཞི། ཆ༡ སྦྱོར་བ། ཆ༢ དངོས་གཞི། ཆ༣ རྗེས་ཀྱི་བྱ་བ། ཆ༤ འཆད་ཉན་ལ་སོགས་པའི་ཕན་ཡོན་སྨོས་པའོ། ། ཆ༡ དང་པོ་ལ་གཉིས། ཇ༡ སློབ་དཔོན་དང༌། ཇ༢ སློབ་མའི་བྱ་བའོ། ། ཇ༡ དང་པོ་ནི། དམ་ཆོས་འཆད་པའི་སྦྱོར་བར་བཀོད་པ་བཤམ། ། བདུད་རིས་ཚར་བཅད་ཀུན་སྤྱོད་དག་པར་བྱ། ། ཞེས་པ་སྟེ། འདི་ལ་གསུམ། དང་པོ་བཀོད་པ་བཤམ་པ་ནི། དམ་ཆོས་པདྨ་དཀར་པོ་ལས། གཙང་ཞིང་ཡིད་དུ་འོང་བའི་ས་ཕྱོགས་སུ། ། མཛེས་པའི་ཁྲི་སྟན་ལེགས་པར་བཤམས་ནས་ནི། ། གོས་བཟང་ཡིད་འོང་གཙང་མ་རྣམས་བགོས་ཏེ། ། བཅོས་མའི་རས་སོགས་རྣམ་པ་མང་བཏིང་ནས། ། རྐང་རྟེན་བཅས་པའི་ཁྲི་ལ་འདུག་ནས་ནི། ། རྩེ་གཅིག་ཉན་པའི་འཁོར་གྱི་ཚོགས་ནང་དུ། ། ཟང་ཟིང་རྙེད་དང་གྲགས་ལ་མི་སེམས་པར། ། བྱམས་པའི་སེམས་ཀྱིས་ལེ་ལོ་མེད་པར་སྟོན། ། ཞེས་སོགས་རྒྱས་པར་གསུངས་པ་བཞིན་ནོ། ། གཉིས་པ་བདུད་ཚར་གཅོད་པ་ནི། བློ་གྲོས་རྒྱ་མཚོས་ཞུས་པའི་མདོ་ལས། བདག་ལ་སྨན་པ། ཆོས་ལ་སྨན། ཉན་པ་པོ་ནད་པ། དེ་བཞིན་གཤེགས་པ་ལ་སྐྱེས་བུ་དམ་པ། ཆོས་ཀྱི་ཚུལ་ཡུན་རིང་དུ་གནས་པ་སྟེ་འདུ་ཤེས་ལྔ་བསྐྱེད་ལ། དཔག་ཚད་བརྒྱ་ཚུན་ཆད་དུ་བདུད་རིས་ཀྱི་ལྷ་འོང་བར་མི་ནུས་པའི་སྔགས་བསྒྲག་པར་གསུངས་པ་བཞིན་བྱ་བ་ཡིན་ནོ། ། གསུམ་པ་ཀུན་སྤྱོད་དག་པར་བྱ་བ་ནི། ལུས་ཉལ་བ་དང༌། (༡༣བ)བསྙེས་པ་དང༌། རྐང་བརྐྱངས་ལ་སོགས་པ་སྤངས་ཏེ་ཤཱཀྱའི་རྒྱལ་པོས་ཆོས་ཀྱི་འཁོར་ལོ་བསྐོར་བའི་ཚུལ་དུ་བྱ། ངག་སྒྲ་མང་པོ་དང༌། ཟློས་པ་དང༌། སྐད་གདངས་ཞན་པ་དང༌། སྒྲ་གསང་མཐོ་དམན་ལ་སོགས་པ་སྤངས་ཏེ་དབྱངས་ཀྱི་ཡན་ལག་ཕུན་སུམ་ཚོགས་པས་གསལ་ལ་དག་པར་བཤད། ཡིད་ཆགས་སྡང་སྤངས་ཏེ་སྟོང་པ་ཉིད་དང་ལྷའི་ཏིང་འཛིན་སོགས་སྐབས་དང་བསྟུན། སེམས་ཅན་ཐམས་ཅད་ཕན་བདེ་ལ་འགོད་པར་འདོད་པའི་བསམ་པས་ཆོས་ཀྱི་ཆར་དབབ་བོ་སྙམ་པར་བྱའོ། ། ཇ༢ གཉིས་པ་[སློབ་མའི་བྱ་བ་]ནི། ཡོན་དབུལ་སྤྱོད་ལམ་བསྟེན་ཞིང་དགའ་བ་བསྒོམ། ། སློབ་མའི་བྱ་