Tibetan
ཉན་བཤད་འཛིན་ཞིང་སྒྲུབ་པ་དང༌། ། སྤེལ་མར་(༡༨ན)བྱས་པའི་ཕན་ཡོན་མཐའ་ཡས་སོ། ། དེ་ལ་སྤྱིར་ཐོས་བསམ་བྱས་པའི་ཕན་ཡོན་ནི། ལུང་རྣམ་འབྱེད་ལས། མང་དུ་ཐོས་པ་ལ་ཕན་ཡོན་ལྔ་ཡོད་དེ། ཕུང་པོ་ལ་མཁས་པ་དང༌། ཁམས་ལ་མཁས་པ་དང༌། སྐྱེ་མཆེད་ལ་མཁས་པ་དང༌། རྟེན་ཅིང་འབྲེལ་བར་འབྱུང་བ་ལ་མཁས་པ་དང༌། དེའི་གདམས་ངག་རྗེས་སུ་བསྟན་པ་གཞན་ལ་རག་མ་ལས་པ་ཡིན་ནོ། །ཞེས་དང༌། སྐྱེས་རབས་སོགས་ལས་ཀྱང་རྒྱ་ཆེར་འབྱུང་བ་ལྟར་རོ། ། བྱེ་བྲག་ཆོས་ཉན་པའི་ཕན་ཡོན་ནི། རྣམ་བཤད་རིགས་པ་ལས། བཅོམ་ལྡན་འདས་ཀྱིས་ཆོས་ཉན་པ་ལ་ཕན་ཡོན་ལྔ་གསུངས་ཏེ། ཐོས་པ་ཐོས་པར་འགྱུར་བ་དང༌། ཐོས་པ་ཡོངས་སུ་བྱང་བར་འགྱུར་བ་དང༌། སོམ་ཉི་སྤོང་བ་དང༌། ལྟ་བ་དྲང་པོར་བྱེད་པ་དང༌། ཤེས་རབ་ཀྱིས་ཚིག་དང་དོན་ཟབ་མོ་རྟོགས་པར་འགྱུར་བའོ། །ཞེས་གསུངས་ཤིང༌། སྤྱིར་ཆོས་ཐོས་པའི་ཕན་ཡོན་ནི། བསམ་གྱིས་མི་ཁྱབ་པ་མདོ་རྒྱུད་ཀུན་ནས་གསུངས་སོ། ། བཤད་པའི་ཕན་ཡོན་ཡང་། སངས་རྒྱས་ལ་མཆོད་པའི་མཆོག་ཏུ་འགྱུར་བ། སེམས་ཅན་ལ་སྦྱིན་པའི་མཆོག་ཏུ་འགྱུར་བ། བསོད་ནམས་འཕེལ་ཞིང་མངོན་ཤེས་ཐོབ་པར་འགྱུར་བ་གསུམ་དང༌། དེ་ལས་འཕྲོས་ཏེ་ཆོས་སྦྱིན་གྱི་ཕན་ཡོན་ཉི་ཤུ་ཐམ་པ་ལྷག་པའི་བསམ་པ་བསྐུལ་བའི་མདོ་ལས་བཤད་པ་སོགས་ཤིན་ཏུ་མང་ངོ༌། ། ཆོས་འཛིན་པའི་ཕན་ཡོན་ནི། དེ་བཞིན་གཤེགས་པའི་གསང་བ་བསྟན་པ་ལས། དམ་ཆོས་འཛིན་པའི་བསོད་ནམས་ནི། ། སངས་རྒྱས་ཀུན་གྱིས་ནན་ཏན་དུ། ། བསྐལ་པ་བྱེ་བར་བརྗོད་མཛད་ཀྱང༌། ། མཐར་མི་ཕྱིན་པར་འགྱུར་བ་ལགས། ། ཞེས་སོགས་རྒྱ་ཆེར་འབྱུང་ངོ༌། ། ཁྱད་པར་ཐེག་ཆེན་གྱི་ཆོས་ཉན་བཤད་བགྱིས་པའི་ཕན་ཡོན་ནི། གཞི་དུས་སུ་ཐེག་དམན་གྱི་དགེ་བ་ཟིལ་གྱིས་གནོན་པ། ལམ་དུས་སུ་སྒྲིབ་པ་མ་ལུས་པ་སྤོང་བ། འབྲས་དུས་སུ་རྫོགས་པའི་སངས་རྒྱས་ཐོབ་པའི་ལུང་རྒྱ་ཆེར་འབྱུང་ངོ༌། ། རྟོགས་པའི་ཆོས་ལ་སྒྲུབ་པ་(༡༨བ)བྱས་པ་ནི་ཡོན་ཏན་དེ་དག་ལས་ཀྱང་ཆེས་ཁྱད་པར་དུ་འཕགས་ཏེ། ཐ་ན་ཆོས་བདག་མེད་པ་ཡིད་ལ་བྱས་ཏེ་དགོན་པའི་ཕྱོགས་སུ་གོམ་པ་བདུན་བོར་བའི་བསོད་ནམས་ཀྱང་བསམ་ལས་འདས་པར་གསུངས་སོ། ། སྒྲུབ་པ་དང་བྲལ་བའི་བཤད་པ་ཁོ་ན་ལ་འབྱམས་པ་ནི་ཤིན་ཏུ་སྙིང་པོ་མེད་པས་མདོ་ལས་སྨྲ་བ་ལ་དགའ་བའི་ཉེས་པ་ཉི་ཤུ་ལ་སོགས་པ་གསུངས་ཤིང༌། མ་ཐོས་པར་ཚུལ་ཁྲིམས་དང་ཏིང་ངེ་འཛིན་སོགས་སྒྲུབ་པ་ལ་ཞུགས་ཀྱང་ལོང་བ་ལམ་དུ་ཞུགས་པ་དང་འདྲ་བས་གཉིས་ཀ་དང་ལྡན་པ་ནི་ཡོན་ཏན་མཆོག་ཏུ་ཆེ་སྟེ། མདོ་སྡེ་རྒྱན་ལས། དེ་ལྟར་རྣལ་འབྱོར་ཅན་གྱི་སྒོམ་པ་གང་ཡིན་དེ་ཡང་དོན་མེད་མིན། ། དེ་ལྟར་བདེ་བར་གཤེགས་ཀྱི་བསྟན་པ་གང་ཡིན་དེ་ཡང་དོན་མེད་མིན། ། གལ་ཏེ་ཐོས་པ་ཙམ་གྱིས་དོན་མཐོང་འགྱུར་ན་སྒོམ་པ་དོན་མེད་འགྱུར། ། གལ་ཏེ་མ་ཐོས་པར་ཡང་སྒོམ་འཇུག་འགྱུར་ན་བསྟན་པ་དོན་མེད་འགྱུར། ། ཞེས་གསུངས་པ་ལྟར་རོ། ། དེས་ན། བཤད་སྒྲུབ་སྤེལ་མར་བྱས་པའི་ཡོན་ཏན་ནི་བསམ་ལས་འདས་པར་གསུངས་ཏེ། འཕགས་པ་ཀླུ་སྒྲུབ་ཀྱིས། ཤེས་རབ་རྒྱས་བྱེད་པ་ནི་ཐོས་པ་སྟེ། ། བསམ་པ་དང་ནི་གཉིས་པོ་ཡོད་གྱུར་ན། ། དེ་ལས་སྒོམ་པ་ཡང་ནི་རབ་ཏུ་འབྱུང༌། ། དེས་ནི་བྱང་ཆུབ་བླ་ན་མེད་པ་འཐོབ། ། ཅེས་གསུངས་སོ། ། སློབ་དཔོན་དང་སློབ་མའི་མཚན་ཉིད་དམ་ཆོས་འཆད་ཉན་གྱི་ཚུལ་བཅས་བཤད་པའི་སྐབས་སོ། ། སློབ་དཔོན་དང་སློབ་མའི་མཚན་ཉིད་དམ་ཆོས་འཆད་ཉན་གྱི་ཚུལ་བཅས་བཤད་པ་སྐབས་དང་པོའི་འགྲེལ་པའོ།། །། གཉིས་པ། སོ་ཐར་གྱི་སྡོམ་པ་རབ་ཏུ་ཕྱེ་བའི་སྐབས། ང༢ སྐབས་གཉིས་པ་སོ་སོ་ཐར་པའི་སྡོམ་པ་རབ་ཏུ་དབྱེ་བ་ལ་གཉིས། ཅ༡ སྡོམ་གསུམ་སྤྱིར་བཏང་བ། ཅ༢ བྱེ་བྲག་སོ་ཐར་ཉིད་བཤད་པའོ། ། ཅ༡ དང་པོ་ནི། ཡོན་ཏན་གཞི་རྟེན་ཚུལ་ཁྲིམས་རྣམ་པ་གསུམ། ། དགྲ་བཅོམ་སེམས་དཔའ་རྒྱལ་བའི་རྗེས་སློབ་སྟེ། ། སོ་ཐར་བྱང་སེམས་རིག་འཛིན་སྡོམ་པར་གྲགས། ། བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོའི་རིང་ལུགས་ལ་འཇུག་པ་དག་གིས་ཐོག་མར་བསླབ་པར་བྱ་བ་ནི། ཡོན་ཏན་ཐམས་ཅད་ཀྱི་གཞི་རྟེན་སྟོན་པ་ཉིད་ཀྱིས་བཅས་པའི་ཚུལ་ཁྲིམས་རིན་པོ་ཆེ་རྣམ་པ་(༡༩ན)གསུམ་སྟེ། རྒྱུད་རྡོ་རྗེ་རྩེ་མོར། གལ་ཏེ་དེ་དག་རབ་བྱུང་གྱུར། ། སྡོམ་པ་གསུམ་དང་ཡང་དག་ལྡན། ། སོ་སོ་ཐར་དང་བྱང་ཆུབ་སེམས། ། རིག་འཛིན་རང་གི་ངོ་བོའོ། ། ཞེས་དང༌། སྡོམ་པ་གསུམ་ལ་གནས་པ་ནི། ། དང་པོ་ཁྲུས་སུ་བཤད་པ་ཡིན། ། ཅེས་གསུངས་པ་ལྟར། སངས་རྒྱས་ཀྱི་བསྟན་པའི་ཉམས་ལེན་སྙིང་པོ་བསྡུས་པ་སྟེ། དེ་ཡང༌། ཇོ་བོ་རྗེ་ལྷ་གཅིག་གིས། དང་པོའི་སྡོམ་པ་ནི། དགྲ་བཅོམ་པ་རྣམས་ཀྱི་རྗེས་སུ་སློབ་པའོ། ། བར་མའི་སྡོམ་པ་ནི། སྔོན་གྱི་བྱང་ཆུབ་སེམས་དཔའ་རྣམས་ཀྱི་རྗེས་སུ་སློབ་པའོ། ། སྔགས་ཀྱི་སྡོམ་པ་ནི། སངས་རྒྱས་རྣམས་ཀྱི་རྗེས་སུ་སློབ་པའོ། ། ཞེས་གསུངས་པ་ལྟར། ཉན་ཐོས་དང༌། བྱང་ཆུབ་སེམས་དཔའ་དང༌། དེ་བཞིན་གཤེགས་པའི་འདུལ་བའམ། སོ་སོ་ཐར་པའི་སྡོམ་པ། བྱང་ཆུབ་སེམས་དཔའི་སྡོམ་པ། རིག་པ་འཛིན་པའི་སྡོམ་པ་ཞེས་ཡོངས་སུ་གྲགས་སོ། ། ཅ༢ གཉིས་པ་[བྱེ་བྲག་སོ་ཐར་ཉིད་བཤད་པ་]ལ་བཞི། ཆ༡ ཉན་ཐོས་ཀྱི་སོ་ཐར་སྤྱིར་བཤད། ཆ༢ ཐེག་ཆེན་གྱི་སོ་ཐར་ཁྱད་པར་དུ་དབྱེ། ཆ༣ དེ་དག་གི་དོན་མདོར་བསྡུ། ཆ༤ སྐྱོན་དང་ཡོན་ཏན་སྨོས་པའོ། ། ཆ༡ དང་པོ་ལ་དྲུག ། ཇ༡ སྡོམ་པའི་ངོ་བོ། ཇ༢ སྒྲ་དོན། ཇ༣ དབྱེ་བ། ཇ༤ མ་ཐོབ་པ་འཐོབ་བྱེད། ཇ༥ ཐོབ་པ་མི་ཉམས་པར་བསྲུང་ཚུལ། ཇ༦ འཕྲོས་དོན་སྨོས་པའོ། ། ཇ༡ དང་པོ་ལ་གསུམ། ཉ༡ མཚན་གཞི། ཉ༢ མཚན་ཉིད། ཉ༣ བཞེད་ཚུལ་ལོ། ། ཉ༡ དང་པོ་ནི། ཉན་ཐོས་སོ་ཐར་རང་ཞི་དོན་གཉེར་ཅན། ། ངེས་འབྱུང་ཀུན་བསླངས། ཞེས་པ་སྟེ། ཐེག་དམན་ཉན་ཐོས་ལུགས་ཀྱི་སོ་ཐར་སྡོམ་པའི་མཚན་གཞི་ནི། རང་ཉིད་ཞི་བ་དོན་དུ་གཉེར་བའི་བློས་འཇིགས་སྐྱོབ་དང་ལེགས་སྨོན་ཙམ་མ་ཡིན་པར་འཁོར་བ་མཐའ་དག་ལས་ངེས་པར་འབྱུང་བའི་བསམ་པས་ཀུན་ནས་བསླངས་པའི་ཚུལ་ཁྲིམས་སོ། ། ཉ༢ གཉིས་པ་[མཚན་ཉིད་]ནི། གཞན་གནོད་གཞི་དང་བཅས། ། སྤོང་སེམས་མཚུངས་ལྡན། ཞེས་པ་སྟེ། གཞན་གནོད་གཞིར་བཅས་སྤོང་བའི་སེམས་པ་མཚུངས་ལྡན་དང་བཅས་པ་ནི་དེའི་མཚན་ཉིད་དེ། དེའང་གཞན་ལ་གནོད་(༡༩བ)པ་ནི་ལུས་ངག་གི་མི་དགེ་བ་བདུན་དང༌། གཞི་ནི་སྤྱིར་དོན་ལྔ་ལ་འཇུག་ཀྱང་འདིར་རྒྱུའི་དོན་ཏེ། ཡིད་ཀྱི་མི་དགེ་བ་གསུམ་མོ། ། བཅས་པ་ནི་ཕན་ཚུན་སྡུད་པ་སྟེ། མདོར་ན་སོ་ཐར་རིས་བདུན་ཆར་ཡང་མི་དགེ་བ་བཅུ་སྤོང་དུ་གྲུབ་བོ། ། མཚུངས་ལྡན་དང་བཅས་པ་ནི། སེམས་པ་གཙོ་བོ་ཡིན་པས་དེ་དང་མཚུངས་ལྡན་རྣམས་ཀྱང་སྡོམ་པར་སོང་བའི་དོན་ཏོ་ཞེས་པ་ནི་ཀརྨ་ཤིང་རྟར་གསུངས་སོ། ། གཞན་གནོད་ལུས་ངག་གི་སྤོང་བདུན། གཞི་ནི། འཁོར་དང་བཅས་པའི་དོན་ཏེ། དེའི་ཕྱོགས་གཏོགས་ཀྱིས་སྤང་བྱ་སྤངས་པས། མདོར་ན། ཐར་སྡོམ་གྱི་མཚན་ཉིད་ལུས་ངག་གི་ཉེས་པ་ཙམ་སྤོང་བའི་ཚུལ་ཁྲིམས་ཏེ། མཛོད་འགྲེལ་ལས། ལུས་ངག་སྡོམ་པའི་ཕྱིར། སོ་སོ་ཐར་པའི་སྡོམ་པ་ཞེས་ཀྱང་བྱའོ། །ཞེས་པའི་དོན་འདི་ནི་བསྟན་བཅོས་མཁན་པོ་ཆབས་གཅིག་ཏུ་བཞེད་པར་སྣང་བས། ལུགས་སྔ་མ་གཙོ་བོར་ཐེག་ཆེན་སོ་ཐར་དང༌། ཕྱི་མ་ཉན་ཐོས་སོ་ཐར་གྱི་མཚན་ཉིད་དུ་བཟུང་ན་ལེགས་པར་སྣང་ངོ༌། ། ཉ༣ གསུམ་པ་[བཞེད་ཚུལ་]ནི། བྱེ་སྨྲས་གཟུགས་ཅན་འདོད། ། ཅེས་པ་སྟེ། གཙོ་བོ་སྨོས་པས་ཞར་བྱུང་དང་བཅས་པ་གོ་བར་བྱེད་པ་སྟེ། བྱེ་སྨྲས། སྡོམ་པའི་ངོ་བོ་རྣམ་པར་རིག་བྱེད་དང་རིག་བྱེད་མ་ཡིན་པ་གང་རུང་གི་བསྡུས་པའི་གཟུགས་ཅན། གང་ཟག་དང་ཐོབ་པ་ཐག་པ་ལྟ་བུས་སྦྲེལ་བ། མདོ་སྡེ་པས། རྒྱུད་ཡོངས་སུ་འགྱུར་བའི་ཁྱད་པར། སེམས་ཙམ་པས། འཆལ་ཚུལ་སྤོང་བའི་སེམས་པ་རྒྱུན་ཆགས་ས་བོན་དང་བཅས་པ། དབུ་མ་རང་སྟོང་པས། སྤོང་སེམས་མཚུངས་ལྡན་དང་བཅས་པ་སྟེ། མདོར་ན། མདོ་སྡེ་པ་ཡན་གྱིས་ངེས་འབྱུང་གི་བསམ་པ་ཉེར་ལེན་གྱི་རྒྱུ། མངོན་གྱུར་སོགས་ལྷན་ཅིག་བྱེད་པའི་རྐྱེན་བྱས་ཏེ་ཤེས་པའི་ངོ་བོར་སྐྱེ་བར་འདོད་པ་མཚུངས། འདི་གོ་དཀའ་བས་ཅུང་ཟད་སྤྲོ་ན། དང་པོ་ནི། ཡང་དག་པར་བླངས་པའི་ཚུལ་ཁྲིམས་སོ་ཐར་གྱི་སྡོམ་པ་སྐད་ཅིག་དང་པོ་དེ་མཁན་སློབ་སོགས་གཞན་གྱི་རྣམ་པར་རིག་བྱེད་ལ་བརྟེན་ནས། རྣམ་པ་རིག་(༢༠ན)བྱེད་དང་རིག་བྱེད་མ་ཡིན་པ་གཉིས་ཀའི་ངོ་བོར་སྐྱེ། སྐད་ཅིག་གཉིས་པ་ཕྱིན་ནས་སྡོམ་པ་གཏོང་བའི་རྒྱུ་མ་བྱུང་གི་བར་དུ་རྣམ་པར་རིག་བྱེད་མ་ཡིན་པའི་ངོ་བོར་རྒྱུད་ལ་ལྡན་པ་ཡིན་ལ། སྡོམ་པ་དེའི་ནང་གསེས་སྲོག་གཅོད་སྤོང་བ་སོགས་ལས་ལམ་གཟུགས་ཅན་བདུན་ཡང་དེའི་རིགས་པས་སྐད་ཅིག་དང་པོར་གཉིས་ཀ་དང༌། གཉིས་པ་ཕྱིན་ཆད་རིག་མིན་གྱི་གཟུགས་སུ་ཡོད་པའི་ཕྱིར། སྐད་ཅིག་དང་པོ་དེར་དགོངས་ནས་གཉིས་ཀ་ཡོད་དོ་ཞེས་པའོ། ། གཉིས་པ་ནི། ཚིག་གསུམ་སོ་སོའི་ལས་མཆོག་སྔོན་དུ་འགྲོ་བའི་སྒོ་ནས། སེམས་ཕྱིར་ཞིང་འབྱུང་བ་ང་དགེ་བསྙེན་ཡིན་ནོ་དགེ་ཚུལ་ཡིན་ནོ་སྙམ་པ་ལྟ་བུའི་སེམས་ཀྱི་རྒྱུད་སྔ་མ་ལས་ཕྱི་མ་སྐྱེ་བ་ནི་ཡོངས་སུ་འགྱུར་བ་སྟེ། དེ་ཙམ་སྡོམ་པའི་ངོ་བོར་འདོད། གསུམ་པ་ནི། རྣམ་རིག་སྨྲ་བས་ཀུན་གཞི་འདོད་པའི་ཕྱིར་སྡོམ་པ་སོགས་ལུས་ཀྱི་ལས་ཀྱང་སེམས་ཀྱི་རྒྱུན་དུ་ཁས་བླངས་ཏེ་སྡོམ་པའི་ངོ་བོ་སེམས་པ་ཁོ་ན་ལ་བྱས་ན་གཡེང་བ་དང་སེམས་མེད་པའི་སྐབས་སོགས་སུ་རྒྱུན་ཆད་པར་འགྱུར་ཞིང༌། བག་ཆགས་ཙམ་ལ་བྱས་ན་གཏོང་རྒྱུ་བྱུང་བའི་ཚེ་ནའང་མི་གཏོང་བར་འགྱུར་བས་སྤོང་བའི་སེམས་པའི་རྒྱུན་དང༌། བག་ཆགས་ཀྱི་ས་བོན་ཀུན་གཞི་ལ་བཞག་པ་དང་བཅས་པ་ལ་འདོད་དོ། ། བཞི་པ་ནི། རང་སྟོང་པས་ཀུན་གཞི་ཁས་མི་ལེན་པས་སྤོང་བའི་སེམས་པ་དེ་དང་མཚུངས་ལྡན་དང་བཅས་པ་ལ་འདོད་པ་ཡིན་ནོ། ། ཟླ་གྲགས་ཀྱིས་དབུ་མ་ཕུང་པོ་ལྔ་པར་རྣམ་པར་རིག་མིན་གྱི་གཟུགས་སུ་མཛད་ལ། རྗེ་འབྲི་གུང་པ་སྟག་ཚང་ལོ་ཙཱ་རྣམས་ཀྱིས་ཀྱང་དེ་ལྟར་རྩལ་དུ་བཏོན་ནས་བཤད་དོ། ། མདོར་ན། ངེས་འབྱུང་གི་བསམ་པས་ཟིན་པའི་ཉེས་སྤྱོད་སྡོམ་པའི་ཚུལ་ཁྲིམས་འདོད་པའི་སས་བསྡུས་པའི་སྡོམ་པ་གཟུགས་ཅན་དུ་ཕལ་ཆེར་བཞེད་པ་མཐུན་ནོ། ། ཇ༢ གཉིས་པ་སྒྲ་དོན་ནི། ཚུལ་ཁྲིམས་ལེགས་སྤྱད་ལས་དང་སྡོམ་པ་ཞེས། ། སྤྱིར་པྲ་ཏི་མོཀྵ་སྟེ། སོ་སོ་ཐར་པའི་སྒྲ་ནི་གང་ཟག་སོ་སོ་འཁོར་བ་ལས་སྒོ་(༢༠བ)ཐར་དུ་བྱེད་པས་དེ་སྐད་དུ་གྲགས་ཤིང༌། ཐར་སྡོམ་དེས་ཉོན་མོངས་པའི་ཚ་གདུང་ལས་བསིལ་བ་ཐོབ་པ་དང་སྒོ་གསུམ་གྱི་ངང་ཚུལ་བཟང་བར་བྱེད་པས་ཤཱི་ལ་སྟེ་ཚུལ་ཁྲིམས། མཁས་པས་བསྔགས་པའི་གནས་སུ་བྱེད་པས་ལེགས་སྤྱད། བྱ་བའི་རང་བཞིན་ཡིན་པའི་ཕྱིར་ལས། འཆལ་ཚུལ་འགོག་པའི་ཆུ་ལོན་དུ་གྱུར་པས་སམ་ལུས་ངག་ཡང་དག་པར་སྡོམ་པས་སྡོམ་པ་ཞེས་པའི་མིང་རྣམས་ཀྱིས་མངོན་པར་བརྗོད་དོ། ། ཇ༣ གསུམ་པ་དབྱེ་བ་ལ་གཉིས། ཉ༡ སའི་སྒོ་ནས་སྤྱིར་དབྱེ་བ། ཉ༢ རྟེན་གྱི་སྒོ་ནས་བྱེ་བྲག་ཏུ་དབྱེ་བའོ། ། ཉ༡ དང་པོ་ནི། སོ་ཐར་བསམ་གཏན་ཟག་མེད་ས་ཡིས་བསྡུས། ། སྡོམ་པ་དེའང་། འདོད་པའི་སས་བསྡུས་པ་སོ་ཐར་གྱི་སྡོམ་པ། གཟུགས་ཀྱི་སས་བསྡུས་པ་བསམ་གཏན་གྱི་སྡོམ་པ། ཁམས་གསུམ་ལས་འདས་ཤིང་འཕགས་པའི་སས་བསྡུས་པ་ཟག་མེད་ཀྱི་སྡོམ་པ་སྟེ། སས་བསྡུས་པ་གསུམ་མོ། ། དང་པོ་ནི། ཆོས་འདི་པ་རྣམས་ཀྱི་འདོད་པ་ན་སྤྱོད་པའི་ཉེས་སྤྱོད་སྤངས་པའི་ཚུལ་ཁྲིམས། གཉིས་པ་ནི། གཟུགས་ཁམས་ན་སྤྱོད་པའི་ཏིང་འཛིན་གྱིས་ཐོབ་པའི་ཚུལ་ཁྲིམས། གསུམ་པ་ནི། འཇིག་རྟེན་ལས་འདས་པའི་ཟག་མེད་ཀྱི་ཤེས་རབ་ལས་ཐོབ་པའི་ཚུལ་ཁྲིམས་སོ། ། བྱེ་སྨྲ་ལྟར་ན། དེ་གསུམ་རྫས་འགལ་བས་རྒྱུད་གཅིག་ལ་མི་ལྡན་པར་འདོད། ཐེག་ཆེན་པ་ལྟར་ན། ཐེག་ཆེན་འཕགས་རྒྱུད་ཀྱི་སྡོམ་པ་དེ་རིམ་བཞིན་ཉེས་སྤྱོད་སྤོང་བ། བསམ་གཏན་དངོས་གཞིས་བསྡུས་པ། འཕགས་ལམ་གྱི་ངོ་བོ་ཡིན་པའི་ཆ་ནས་ཐར་སྡོམ་སོགས་གསུམ་པོ་ཡིན་པས་མི་འགལ་བར་ལྷན་ཅིག་གནས་པར་འདོད་དོ། ། ཉ༢ གཉིས་པ་[རྟེན་གྱི་སྒོ་ནས་བྱེ་བྲག་ཏུ་དབྱེ་བ་]ནི། དགེ་སློང་དགེ་ཚུལ་དགེ་བསྙེན་ཕ་མ་གཉིས། ། དགེ་སློབ་བསྙེན་གནས་རིས་བརྒྱད་རྫས་སུ་བཞི། ། མཚན་ཉིད་ལྡན་པ་རིས་བདུན་ཁོ་ནའོ། ། རྟེན་གྱི་སྒོ་ནས་དབྱེ་ན། དགེ་སློང་ཕ་མ་གཉིས། དགེ་ཚུལ་ཕ་མ་གཉིས། དགེ་བསྙེན་ཕ་མ་གཉིས། དགེ་སློབ་མ་སྟེ། རིས་བདུན་ནམ། (༢༡ན)དགེ་བསྙེན་ལས་བསྙེན་གནས་ལོགས་སུ་ཕྱེ་བས་རིས་བརྒྱད་དོ། ། དེ་དག་ཀྱང་ཐ་དད་པའི་ངོ་བོའམ་རྫས་སུ་བསྡུ་ན། དགེ་སློང་། དགེ་ཚུལ་ཏེ། རབ་བྱུང་གི་ཕྱོགས་གཉིས། དགེ་བསྙེན། བསྙེན་གནས་ཏེ། ཁྱིམ་པའི་ཕྱོགས་གཉིས། བསྡོམས་པས་བཞིར་འདུས་སོ། ། དེ་དག་ལས་སོ་ཐར་མཚན་ཉིད་དང་ལྡན་པ་ནི་རིས་བདུན་ཁོ་ན་ཡིན་ལ། དེའང་བསྙེན་གནས་མ་གཏོགས་པའི་བདུན་དུ་བཞེད་པ་དང༌། དགེ་སློབ་མ་ཇི་སྲིད་འཚོ་བ་དང་ཉིན་ཞག་གི་མཐའ་ཅན་གང་དུའང་མི་རུང་བས་དེ་མ་གཏོགས་པའི་བདུན་དུ་བཞེད་པ་གཉིས་སུ་སྣང་ངོ༌། ། ཇ༤ བཞི་པ་མ་ཐོབ་པ་འཐོབ་བྱེད་ཀྱི་ཚུལ་བཤད་པ་ལ་བཞི། ཉ༡ ཆོ་གའི་དབྱེ་བ། ཉ༢ སྐྱེ་བའི་རྟེན། ཉ༣ འགལ་རྐྱེན་བར་ཆད་དང་བྲལ་བ། ཉ༤ མཐུན་རྐྱེན་ཆོ་ག་ཚོགས་པར་སྒྲུབ་པའོ། ། དང་པོ་ནི། འཐོབ་བྱེད་སྔོན་དང་ད་ལྟའི་ཆོ་ག་སྟེ། ། སྡོམ་པ་མ་ཐོབ་པ་འཐོབ་བྱེད་ཀྱི་ཆོ་ག་ལ་ཚེགས་ཆུང་ངུས་རྫོགས་པ་སྔོན་གྱི་ཆོ་ག །ཚེགས་དང་བཅས་པས་རྫོགས་པ་ད་ལྟའི་ཆོ་ག་གཉིས་ཡོད། སྔོན་ཆོག་ལའང་བྱེ་བྲག་སྨྲ་བ་རྣམས་ཀྱིས་རྣམ་པ་བཅུར་བཤད་དེ། རྫོགས་པའི་སངས་རྒྱས་དང་རང་སངས་རྒྱས་གཉིས་ཟད་མི་སྐྱེ་ཤེས་ནས་བྱང་ཆུབ་བརྙེས་པའི་རང་བྱུང་གིས་དང༌། ལྔ་སྡེ་བཟང་པོ་མཐོང་ལམ་སྐྱེས་ཚེ་ཡེ་ཤེས་ཁོང་ཆུད་ཀྱིས་དང༌། ཤཱ་རིའི་བུ་སོགས་ཚུར་ཤོག་གིས་དང༌། འོད་སྲུང་ཆེན་པོ་སྟོན་པར་ཁས་བླངས་པས་དང༌། བཟང་སྡེས་ཚོགས་དྲུག་ཅུ་ལ་སྐྱབས་གསུམ་ཁས་བླངས་པས་དང༌། སྐྱེ་དགུའི་བདག་མོ་སོགས་ལྕི་ཆོས་བརྒྱད་སྤོང་བར་ཁས་བླངས་པས་དང༌། ལེགས་བྱིན་དྲིས་པའི་ལན་ལ་དགྱེས་པས་དང༌། མཆོད་སྦྱིན་མ་ཕ་མའི་དབང་དུ་སོང་བ་ལ་དགེ་སློང་མ་ཨུཏྤ་ལས་ཕོ་ཉ་བྱས་ཏེ་དགེ་འདུན་གྱིས་འཕྲིན་ཆོག་ལ་བརྟེན་ནས་དང༌། དགེ་འདུན་གྱི་གྲངས་མཐའ་ཡུལ་དབུས་སུ་བཅུ་དང་མཐའ་འཁོབ་ཏུ་ལྔ་ཚོགས་ཀྱིས་གསོལ་བཞིའི་ལས་ཀྱིས་རབ་བྱུང་བསྙེན་རྫོགས་ཅིག་ཅར་དུ་བྱེད་པ་རྣམས་སོ། འདི་རྣམས་ནི་མཁན་པོ་(༢༡བ)འཕགས་པ་ཡིན་པ་དང༌། གདུལ་བྱ་ལས་ཉོན་རྣམ་སྨིན་གྱི་སྒྲིབ་པ་གསུམ་ཤས་ཆུང་ཞིང༌། ཤེས་རབ་དང་། རྒྱུད་དང་། དབང་པོ་གསུམ་སྨིན་པའི་གདུལ་བྱ་བློ་དག་པ་ཤ་སྟག་གི་རྒྱུད་ལ་བྱུང་བ་སྟེ། ཕྱི་མ་བཅས་ནས་སྔ་མའི་ཆོ་ག་དེ་བྱར་མི་རུང་ངོ༌། ། སྔོན་ཆོག་གི་རྗེས་སུ་བཅས་པའི་གསོལ་བཞིའི་ལས་འཁོར་དང་བཅས་པ་སྟོན་པ་འདས་ནས་ད་ལྟའི་བར་དུ་བྱ་བ་ནི་ད་ཆོག་སྟེ། ཡུལ་དབུས་སུ་བཅུ་ཚོགས་དང་མཐའ་འཁོབ་ཏུ་ལྔ་ཚོགས་ཀྱིས་བསྒྲུབ་རུང་བའོ། ། ཡུལ་དབུས་མཐའི་ཁྱད་པར་ལ་ས་ཚིགས་ཀྱི་དབང་དུ་བྱས་ན་རགས་པར་འཕགས་ཡུལ་དབུས་དང༌། གཞན་རྣམས་མཐའ་འཁོབ་ཏུ་བརྩི། ཆོས་ཚིགས་ཀྱིས་ཕྱེ་ན་ལུང་རྟོགས་ཀྱི་བསྟན་པ་གནས་པ་དབུས་དང༌། ལྡོག་པ་མཐའ་འཁོབ་བོ། ། ཉ༢ གཉིས་པ་རྟེན་ནི། གླིང་གསུམ་སྐྱེས་པ་བུད་མེད་སྐྱེ་བའི་རྟེན། ། ཐར་སྡོམ་གང་གིས་བླང་བའི་རྟེན་ལ་རིས་བརྒྱད་ཀའང་གླིང་གསུམ་གྱི་སྐྱེས་པ་བུད་མེད་མ་གཏོགས་གཞན་ལ་མི་སྐྱེ་བར་འདོད་དེ། མདོ་རྩར། མི་མ་ཡིན་པའི་འགྲོ་བ་པ་དང༌། བྱང་གི་སྒྲ་མི་སྙན་པ་གཉིས་ནི་སྡོམ་པའི་ཞིང་ཉིད་མ་ཡིན་ནོ། །ཞེས་ཟ་མ་དང་མ་ནིང་ལའང་སྡོམ་པ་སྐྱེ་བའི་ཆོས་ཉིད་མེད་པར་གསུངས་པའི་ཕྱིར་རོ། ། མདོ་སྡེ་པས་བསྙེན་གནས་དུད་འགྲོ་སོགས་ལའང་སྐྱེ་བར་འདོད་དེ། འདུལ་བ་ལུང་ལས་ཀླུ་གཞོན་ནུ་ཙམ་པོ་ཞེས་པ་ཚེས་བརྒྱད་ལ་བསྙེན་གནས་བསྲུང་བར་བཤད་པ་དང༌། སྐྱེས་རབས་ལས་གོང་མ་སྲེག་སོགས་བཞིས་བསྙེན་གནས་བསྲུངས་པར་བཤད་པ་སྒྲ་ཇི་བཞིན་དུ་ཁས་ལེན་པས་སོ། ། ཉ༣ གསུམ་པ་[འགལ་རྐྱེན་བར་ཆད་དང་བྲལ་བ་]ནི། ངེས་པ་ལྔ་དང་བར་ཆད་བཞི་རྣམས་བྲལ། ། མཐུན་རྐྱེན་ཚང་བའི་ཡུལ་འདིར་བསྲུང་གི། གཞན་དུ་བསྲུང་མི་ནུས་སྙམ་པ་ལྟ་བུ་ཡུལ། ལོའམ་ཟླ་བ་གཅིག་ཙམ་དུ་སྤོང་གི། དེ་ཕན་ཆད་བསྲུང་མི་ནུས་སྙམ་པ་ལྟ་བུ་དུས། རྩོད་པའི་སྐབས་མ་གཏོགས་གཞན་དུ་བསྲུང་སྙམ་པ་ལྟ་བུ་ཚེ། དགྲ་མ་གཏོགས་པ་གཞན་གྱི་སྲོག་མི་གཅོད་སྙམ་པ་ལྟ་བུ་སེམས་ཅན། བསླབ་བྱ་རགས་པ་འགའ་ཞིག་ལས་ཕྲ་བ་(༢༢ན)རྣམས་བསྲུང་མི་ནུས་སྙམ་པ་ལྟ་བུ་ཡན་ལག་ངེས་པ་སྟེ། ངེས་པ་ལྔ་དང་བྲལ་བས་སོ་ཐར་གྱི་སྡོམ་པ་ཐོབ་ཅིང༌། དེའང་དགེ་སློང་ལ་ངེས་པ་ལྔ་བྲལ། དགེ་ཚུལ་ལའང་ཆ་འདྲ་ཞིག་དགོས་སོ། །ངེས་པ་ལྔ་ལྡན་གྱིས་ནི་སྡོམ་པ་མི་ཐོབ་ཀྱང་ལེགས་སྤྱད་ཙམ་དུ་འགྱུར་རོ། ། གཞན་ཡང་། མ་ནིང་དང་མཚམས་མེད་བྱས་པ་སོགས་སྐྱེ་བའི་བར་ཆད། རྒྱལ་པོ་དང་ཕ་མས་མ་གནང་བ་སོགས་གནས་པའི་བར་ཆད། བྱ་རོག་སྐྲོད་མི་ནུས་པའམ་ནད་དང་སྡུག་བསྔལ་གྱིས་ཉེན་པ་སོགས་ཁྱད་པར་དུ་འགྱུར་བའི་བར་ཆད། སྐྲ་སེར་ཅན་དང་རྣ་རྡུམ་སོགས་མཛེས་པའི་བར་ཆད་བཞི་རྣམས་དང་བྲལ་བའང་དགོས་ཏེ། དེ་དག་ཁྱིམ་པའི་ཕྱོགས་ཀྱི་ཁྲིམས་གཉིས་ལ་ནི་ངེས་པ་