Tibetan
མེད་དོ། ། ཉ༤ བཞི་པ་[མཐུན་རྐྱེན་ཆོ་ག་ཚོགས་པར་སྒྲུབ་པ་]ལ་གཉིས། ཏ༡ དུས་ཁྲིམས་དང༌། ཏ༢ གཏན་ཁྲིམས་སོ། ། ཏ༡ དང་པོ་ནི། སྐྱབས་སུ་མ་སོང་བ་ལ་ཐར་སྡོམ་མེད། ། བསྙེན་གནས་སྡོམ་ལྡན་ལས་བླང་ཉིན་ཞག་མཐའ། ། མཛོད་ལས། སྡོམ་པ་ཀུན་ལ་ཡོད་མོད་ཀྱང༌། ། སྐྱབས་སུ་མ་སོང་བ་ལ་མེད། ། ཅེས་པས་མཆོག་གསུམ་ལ་སྐྱབས་སུ་འགྲོ་བ་སྔོན་དུ་མ་སོང་བ་ལ་བསྙེན་གནས་ཀྱིས་མཚོན་སོ་ཐར་གྱི་སྡོམ་པ་མེད་པས་ཐམས་ཅད་ཀྱི་ཐོག་མར་སྐྱབས་འགྲོའི་སྡོམ་པ་བཟུང་དགོས་ལ། བླང་བའི་ཡུལ། བྱེ་སྨྲས་རིས་བརྒྱད་ཀ་དགེ་སློང་ལས་བླང་དགོས་པར་འདོད་ཅིང༌། མདོ་སྡེ་པས་བསྙེན་གནས་དགེ་བསྙེན་ཡན་ཆད་གང་རུང་བ་ལས་བླང་བར་འདོད་དེ། གནས་འཇོག་གི་མདོ་ལས། དགེ་སློང་ངམ་བྲམ་ཟེའམ་ཁྱིམ་པའམ་རབ་ཏུ་བྱུང་བ་གང་ཡང་རུང་བ་ཆོ་ག་ཤེས་པ་ཞིག་གི་མདུན་དུ་འདུག་ལ། ཞེས་དང༌། ལུང་རྣམ་འབྱེད་ལས། ཁྱིམ་བདག་མགོན་མེད་ཟས་སྦྱིན་གྱིས་སྐྱེ་བོ་མང་པོ་ལ་བསྙེན་གནས་འབོགས་པར་བཤད་པས་སོ། ། གང་ལྟར། བསྙེན་གནས་སྡོམ་པ་དང་ལྡན་པ་ལས་དེ་རིང་ཉི་མ་མ་ཤར་གོང་དུ་བླངས་ནས། སང་ཉི་མ་མ་ཤར་བར་ཉིན་ཞག་གི་མཐའ་ཅན་དུ་སྲུང་བར་འདོད་པ་མཐུན་ཡང༌། དམིགས་བསལ་ཐོག་མར་(༢༢བ)སློབ་དཔོན་ལས་ཟླ་བ་བྱུང་ངོ་ཅོག་གི་ཉ་སྟོང་བརྒྱད་ལ་བསྲུང་བར་ཁས་བླངས་ཆབ་གཅིག་ཏུ་བྱས་ཀྱང་ཕྱིས་སྲུང་བའི་དུས་དེ་དང་དེར་ལེན་དགོས་ལ། སྔར་སྟབས་གཅིག་ཏུ་བླངས་པའི་དགོས་པ་ནི། བྱེ་སྨྲ་ལྟར་ན། ཟས་ཟོས་རྗེས་བླངས་ཀྱང་སྐྱེ་བ་དང༌། མདོ་སྡེ་པ་ལྟར་ན། རྟེན་གྱི་དྲུང་དུ་རང་ཉིད་ཀྱིས་བླངས་ཀྱང་སྐྱེ་བའི་དོན་དུ་འདོད་དོ། ། དེའང་ལེན་ཡུལ་ལས་དམའ་བར་འདུག་ལ། རྗེས་ཟློས་ལན་གསུམ་བྱེད་པ་ནི་ཆོ་གའི་དངོས་གཞིའོ། ། ཏ༢ གཉིས་པ་[གཏན་ཁྲིམས་]ནི། དགེ་བསྙེན་ལ་སོགས་རང་རང་ཆོ་གས་ཏེ། ། དགེ་ཚུལ་དགེ་སློང་མངོན་གྱུར་བཅུ་དགོས་སོ། ། དགེ་བསྙེན་ལ་སོགས་པའི་ཚིག་གསུམ་ནི་རང་རང་གི་ལུགས་ཀྱི་མཐུན་རྐྱེན་ཚང་བའི་ཆོ་གས་བསྒྲུབ་པར་བྱ་སྟེ། དེའང་བསླབ་ཚིགས་ཕྱི་མ་རྣམས་ནི་སྔ་མ་སྔོན་དུ་མ་སོང་བར་བསྒྲུབ་ཏུ་མི་རུང་ལ། དགེ་བསྙེན་དང་དགེ་ཚུལ་གྱི་སྡོམ་པ་ཁོ་ན་ཙམ་བླང་བར་འདོད་པས་ནི་དེ་དང་དེའི་ཆོ་ག་ཁོལ་དུ་བཏོན་ཏེ་སྡོམ་པ་འབོག་གོ། ། འདིར་ཚིགས་གསུམ་རིམ་ནོད་ཀྱི་དབང་དུ་བྱས་ན། ཚིགས་དང་པོ་དགེ་བསྙེན་ལ། སྣ་གཅིག་སྤྱོད་སོགས་ཉི་ཚེ་བ་དང་། ཡོངས་རྫོགས་གཉིས་ལས། རིས་བརྒྱད་ཀྱི་ཟླས་ཕྱེ་བའི་དགེ་བསྙེན་དུ་འགྱུར་བ་ལ་བསླབ་གཞི་ལྔ་འཛིན་པའི་ཡོངས་རྫོགས་དགེ་བསྙེན་ཉིད་བཟུང་དགོས་པས། རབ་བྱུང་གི་མཁན་པོར་འོས་པའི་དགེ་སློང་དེས་རབ་ཏུ་དབྱུང་བར་རུང་མི་རུང་བརྟགས་པའི་ཕྱིར་བར་ཆད་འདྲི། སྐྱབས་འགྲོ་དང་དགེ་བསྙེན་ཉིད་དུ་ཁས་བླངས་པས་དངོས་གཞི་བསྒྲུབ། འཇུག་ཏུ་བསླབ་པ་ཁས་བླང་བས་བཟུང་ངོ༌། ། ཉི་ཚེ་བ་རྣམས་ཀྱང་དེ་ཉིད་ཁ་སྤོས་པས་ཆོག་ཅིང་རབ་བྱུང་མི་བྱེད་པ་ལ་བར་ཆད་དྲི་མི་དགོས་པ་ནི་ཁྱད་པར་རོ། ། ཚིགས་གཉིས་པ་དགེ་ཚུལ་ལ། སྦྱོར་བ་བར་མ་རབ་བྱུང་གི་ཆོ་ག་ནི། དགེ་བསྙེན་དེ་ཉིད་ལ་ལས་བྱེད་པས་བར་ཆད་དྲིས་ཏེ་དག་པར་འདུག་ན་དགེ་འདུན་ལ་རབ་ཏུ་དབྱུང་བར་ཞུ། གནང་ན་མཁན་པོ་ལ་གསོལ་བ་འདེབས། རྟགས་དང་མིང་དང་བསམ་པ་སྟེ་བརྗེ་བ་གསུམ་བྱས་ནས་མཁན་པོས་བར་མ་རབ་བྱུང་དུ་(༢༣ན)བསྒྲུབ། དངོས་གཞི་མཁན་པོས་ལས་བྱེད་པའི་དགེ་སློང་ལ་གཏད། དེས་བསྒྲུབ་བྱ་དེ་འགལ་རྐྱེན་བར་ཆད་ཀྱི་ཆོས་བཞི་དང་བྲལ་ཞིང༌། མཐུན་རྐྱེན་ལྔ་ཚང་བའི་སྒོ་ནས་སྐྱབས་འགྲོ་རྩོམ་བྱེད་དུ་བྱས་ཏེ་དགེ་ཚུལ་ཉིད་དུ་བསྒྲུབ། རྗེས་ནི། དགེ་སློང་གཞན་ཞིག་གིས་གྲིབ་ཚོད་གཞལ་ཏེ་དགེ་ཚུལ་ཐོབ་པའི་དུས་གོ་བརྗོད་ཅིང༌། སློབ་དཔོན་གྱིས་དགེ་ཚུལ་གྱི་བསླབ་གཞི་བཅུ་བརྗོད་པ་ཁས་བླང་དུ་གཞུག་གོ། ། དེ་ལ་མཐུན་རྐྱེན་ལྔ་ནི། ཡུལ། རྒྱུད། རྟགས། བསམ་པ། ཆོ་ག་དང་ལྔའོ། ། དང་པོ་ནི། དཀོན་མཆོག་གསུམ་དད་པའི་ཡུལ་ན་ཡོད་ཅིང༌། སྡོམ་པ་འབོགས་པར་བྱེད་པའི་དགེ་སློང་དངོས་སུ་ཡོད་པའོ། ། གཉིས་པ་ནི། རྒྱུད་ཚོགས་སུ་མ་ཚང་བ། སྡོམ་པ་རྙིང་པས་རྒྱུད་མ་བཀག་པ། ཚིགས་སྔ་མ་སྔོན་དུ་སོང་བའོ། ། གསུམ་པ་ནི། ཁྱིམ་པའི་རྟགས་སྤོང་ལ། ལུས་ཀྱི་བྱི་བྱད་གོས། སྣོད་སྤྱད་ཀྱི་རྟགས་གསུམ་གྱི་སྒོ་ནས་རབ་བྱུང་གི་ཆ་ལུགས་དང་ལྡན་པའོ། ། བཞི་པ་ནི། རྒྱུའི་ཀུན་སློང་ཐོབ་འདོད། དུས་ཀྱི་ཀུན་སློང་ཐོབ་ཤེས། འགལ་རྐྱེན་ལྔ་དང་བྲལ་བ། མཐུན་རྐྱེན་ཕུན་ཚོགས་གསུམ་དང་ལྡན་པ། དེ་ཐམས་ཅད་ངེས་འབྱུང་གི་བསམ་པས་ཟིན་པའོ། ། ལྔ་པ་ནི། སྐྱབས་འགྲོ་རྩོམ་བྱེད་དུ་བྱས་ནས་དགེ་ཚུལ་དུ་བསྒྲུབ་པའི་སྔགས་ཚིག་ལན་གསུམ་བརྗོད་པའོ། ། ཚིགས་གསུམ་པ་བསྙེན་པར་རྫོགས་པ་དགེ་སློང་ནི། སྤྱིར་མངོན་དུ་གྱུར་པ་བཅུ་ཚང་དགོས་ཏེ། དེ་ལ་དང་པོ་སངས་རྒྱས་མངོན་གྱུར་ནི། རྒྱལ་བའི་སྐུ་བརྙན་བྱིན་རླབས་ཅན་བཤམས་པ། གཉིས་པ་ཆོས་མངོན་གྱུར་ནི། ལས་བྱེད་པ་པོ་རྣམས་ཀྱིས་བསླབ་པ་ལ་བརྩོན་པ་རྟོགས་པའི་ཆོས་དང༌། ལས་ཀྱི་ཆོ་ག་དངོས་སུ་ཡོད་པས་ལུང་གི་ཆོས་ཀྱི་དོན་ཚང་བ། གསུམ་པ་དགེ་འདུན་མངོན་གྱུར་ནི། གྲངས་ཚང་བ། ཁ་སྐོང་གི་ཆོས་དང་ལྡན་པ། མི་མཐུན་པ་གཉིས་དང་བྲལ་བ་སྟེ། མཚན་ཉིད་གསུམ་ལྡན་ནོ། ། དེའང་དང་པོ་ནི། ཚོགས་སུ་ལོངས་པ་སྟེ། (༢༣བ)མཁན་པོ་མ་གཏོགས་པའི་བཞི་ཚང་བ། གཉིས་པ་ནི། མི་འདུག་པར་འགྲེང་བ་དང༌། ཚུལ་དེ་ཆད་ལས་སོགས་བྱ་བའི་འོས་སུ་གྱུར་པ་དང༌། ལུས་དངོས་སུ་མ་འདུས་པར་འདུན་པ་སོགས་ཕུལ་བ་དང༌། བསྙེན་པར་མ་རྫོགས་པ་དང༌། སྡོམ་པ་ཉམས་པ་དང༌། མཚམས་མེད་བྱས་པ་དང༌། ཆང་འཐུང་བ་སོགས་ལ་སྡིག་པ་མེད་པར་འདོད་པའི་སྡིག་ལྟ་ཅན་དང༌། ས་ཐ་དད་པ་སྤོ་མགུ་སྤྱོད་པ་ཅན་དང༌། སྨྱོན་པ་སོགས་འཁྲུལ་པ་དང་བཅས་པ་དང༌། མཚམས་གཅིག་ཏུ་མིན་པར་མཚམས་ཐ་དད་དུ་གནས་པ་དང༌། མཚན་ཐ་དད་པ་དགེ་སློང་མ་ལྟ་བུ་དང༌། དཀོན་མཆོག་གཞན་དུ་འཛིན་པ་རྣམས་མིན་པ་ཞིག་དགོས་སོ། ། གསུམ་པ་ནི། འདུན་དག་ཕུལ་བ་སོགས་ཀྱིས་ལས་གྲལ་ཏུ་དངོས་སུ་མ་འདུས་པ་དང་འདུས་པ་ཕྱིར་ལོག་གཉིས་སོ། ། བཞི་པ་མཁན་པོ་མངོན་གྱུར་ནི། སྤྱིར་བརྟན་མཁས་ཀྱི་ཡོན་ཏན་ཕུན་སུམ་ཚོགས་ཤིང༌། ཁྱད་པར་བསྒྲུབ་བྱའི་ངོས་ནས་མཐོང་ཐོས་དོགས་གསུམ་གྱི་སྐྱོན་མེད་པའོ། ། ལྔ་པ་སློབ་དཔོན་མངོན་དུ་གྱུར་པ་ནི། དགེ་འདུན་གྱི་དབུས་སུ་ལས་ཀྱི་ཆོ་ག་བརྡ་སྤྲོད་པ་ལ་མཁས་པའི་ལས་སློབ་དང༌། འདུན་འཇིགས་ཞེ་སྡང་རྨོངས་པས་འགྲོ་བ་བཞི་བྲལ་ལྐོག་ཏུ་བར་ཆད་དྲིས་ནས་ནང་དུ་ཞུ་བ་ལ་མཁས་པའི་གསང་སྟོན་ནོ། ། འགྲོ་བ་བཞིའི་དོན་ཡང་བསྒྲུབ་བྱ་དེ་ལ། དགའ་བ་དང༌། སྐྲག་པ་དང༌། མི་མཐུན་པ་དང༌། བར་ཆད་ཡོད་མེད་མི་ཤེས་པ་སྟེ། བསྒྲུབ་བྱ་དང་གསང་སྟོན་མཛའ་བ་ཞིག་ཡིན་ན་བར་ཆད་ཡོད་ཀྱང་གསང་ནས་མི་སྨྲ་བ་དང༌། སྐྲག་ནས་སྨྲ་མི་ཕོད་པ་དང༌། མི་མཐུན་ན་ལོག་པར་སྨྲ་བ་དང༌། མ་ཤེས་ན་མི་རྟོགས་པའི་སྐྱོན་འཇུག་པས་སོ། ། དྲུག་པ་བསྙེན་པར་རྫོགས་འདོད་མངོན་དུ་གྱུར་པ་ནི། བསམ་པ་ཐག་པ་ནས་ནོད་པར་འདོད་ཅིང་ངེས་འབྱུང་དང་ལྡན་པ། ལོ་ཉི་ཤུ་ལོན་ཅིང་སྨྲ་ཤེས་དོན་གོ་ཤེས་པ་རང་བཞིན་དུ་གནས་པ། མི་མཐུན་པའི་སེམས་མ་སྐྱེས་པ། ངེས་པ་ལྔ་དང་(༢༤ན)བྲལ་ཞིང་རྒྱུད་ཚོགས་སུ་མ་ཚང་བའོ། ། བདུན་པ་ཡོ་བྱད་མངོན་གྱུར་ནི། ཡོ་བྱད་ལྔ་ཚང་བ་སྟེ་ཆོས་གོས་གསུམ་ཚད་ལྡན་དངོས་སམ་རྒྱུ་རུང་བ་ཁྲུ་གང་ཡན་ཆད་ལོངས་པ། ལྷུང་བཟེད་རུང་བ་ཚད་ལྡན་གདིང་བ་ཆུ་ཚགས་བཅས་པའོ། ། བརྒྱད་པ་ཡང་དག་མངོན་གྱུར་ནི། བར་ཆད་ཀྱི་ཆོས་བཞི་སོགས་དང་མི་ལྡན་པ། དགུ་པ་གསོལ་བ་མངོན་གྱུར་ནི། དགེ་འདུན་ལ་གསོལ་བ་ལན་གསུམ་བཏབ་པ། བཅུ་པ་ལས་མངོན་གྱུར་ནི། གསོལ་བ་དང་བཞིའི་ལས་ཀྱི་ཆོ་ག་ཚང་ལ་མ་ནོར་མ་འཁྲུགས་པ་རྣམས་སོ།། བྱེ་བྲག་སྦྱོར་དངོས་རྗེས་ཀྱི་བྱ་བ་གསུམ་གྱིས་བསྡུས་ཏེ། སྦྱོར་བ་མངོན་གྱུར་དང་པོ་དགུ་སྔོན་དུ་སོང་ནས། དངོས་གཞི་གསོལ་བའི་ལས་བྱས་ཤིང་ཆགས་པའི་སྒོ་ནས་དགེ་འདུན་ལས་བསྙེན་པར་རྫོགས། རྗེས་བསྙེན་བཀུར་གྱི་གནས་དང་གནས་མ་ཡིན་པར་ཤེས་པའི་ཕྱིར་སྡོམ་པ་ཐོབ་མཚམས་ཀྱི་དུས་གོ་བརྗོད། ཐོབ་པ་མི་ཉམས་ཤིང་འཕེལ་བར་བྱ་བའི་ཕྱིར་བསླབ་བྱ་ཡུལ་ལ་གདམས་པ་དགུ། སློབ་བྱེད་ཡུལ་ཅན་ལ་གདམས་པ་གཉིས་ཏེ་བཅུ་གཅིག་བརྗོད་པས་གྲུབ་བོ། ། བུད་མེད་དགེ་བསྙེན་དང་དགེ་ཚུལ་མར་བསྒྲུབ་པའི་ཆོ་ག་ཕ་ཆོག་བཞིན་ལས། བསྒྲུབ་བྱའི་མིང་བསྒྱུར་ཅིང་དྲི་ཚིག་ལྷག་པོར་བཅུག །དེ་རྗེས་ཁྱིམ་སོ་མ་བཟུང་ན་ལོ་བཅོ་བརྒྱད་དང་བཟུང་ན་ལོ་བཅུ་ལོན་པ་དེ་ཉིད། ཡུལ་དབུས་སུ་དགེ་སློང་མ་བཅུ་གཉིས། མཐའ་འཁོབ་ཏུ་དྲུག་ཚོགས་ཀྱིས་གསོལ་བ་དང་གཉིས་ཀྱི་ལས་ཀྱིས་དགེ་སློབ་མའི་གདམས་པ་སྦྱིན། དེ་རྗེས་ཁྱིམ་སོ་བཟུང་ན་ལོ་བཅུ་གཉིས། མ་བཟུང་ན་ལོ་ཉི་ཤུ་ལོན་པ་ལ་དགེ་སློང་མའི་དགེ་འདུན་གྲངས་སྔར་དང་འདྲ་བ་དང་མཁན་མོས་རྔུལ་གཟན་དང་ཤིང་ང་དཔུང་བཅད་གཉིས་བསྣན་པའི་ཆོས་གོས་ལྔ་དང་བཅས་པའི་རྟགས་སྦྱིན། བར་ཆད་དྲིས་ཏེ་ཚངས་སྤྱོད་ཉེར་གནས་ཀྱི་སྡོམ་པ་སྦྱིན། དེ་ནས་དགེ་འདུན་ཕའི་ཚོགས་བསྣན་ཏེ་གཉིས་(༢༤བ)ཀའི་དགེ་འདུན་དང་བཅས་ཏེ་བསྙེན་པར་རྫོགས་ཤིང༌། རྗེས་གདམས་ངག་བརྗོད་པ་ལའང་ཕམ་པ་བརྒྱད་དང་ལྕི་བའི་ཆོས་བརྒྱད་སོགས་འཕྲི་བསྣན་དགོས་ཀྱང་བོད་ཡུལ་འདིར་དགེ་སློབ་མ་དང་དགེ་སློང་མ་སྒྲུབ་པའི་སྲོལ་ཐོག་མ་ནས་མ་བྱུང་ངོ༌། ། ཇ༥ ལྔ་པ་ཐོབ་པ་མི་ཉམས་པའི་བསླབ་བྱ་བརྗོད་པ་ལ་གཉིས། ཉ༡ སྤྱིར་བཤད་པ་དང༌། ཉ༢ སོ་སོར་བཤད་པའོ། ། ཉ༡ དང་པོ་ནི། གང་ཟག་གཞན་བརྟེན་བློ་དག་མི་མཐུན་ཤེས། ། བསླབ་པ་ཡོངས་སྦྱོང་བདེར་གནས་རྐྱེན་གྱིས་བསྲུང༌། ། སྤྱིར་བསླབ་པ་སྲུང་བའི་ཐབས་ལྔ་སྟེ། གང་ཟག་གཞན་ལ་བརྟེན་ནས་སྲུང་བ་ནི། མང་ཐོས་མཁས་པའི་གདམས་ངག །བཙུན་པའི་ཕྱག་ལེན་མིག་ལྟོས་ལ་བརྟེན་ཅིང༌། ཁྱད་པར་བསྙེན་པར་རྫོགས་ནས་གནས་ཀྱི་སློབ་དཔོན་ལ་བརྟེན་དགོས་ཏེ་མདོ་ཙམ་འོག་ཏུ་འཆད་དོ། ། རང་གི་བློའམ་བསམ་པ་དག་པས་སྲུང་བ་ནི། བླང་དོར་གྱི་གནས་ལ་སྤྲོ་བའི་བརྩོན་འགྲུས། འཇུག་ལྡོག་གི་གནས་ལ་གཟོབ་པའི་བག་ཡོད། རང་གི་རྒྱུད་ལ་རྟོག་པའི་དྲན་པ་དང་ཤེས་བཞིན། གཞན་ལ་ལྟོས་ནས་ངོ་ཚ་ཤེས་ཤིང་རང་ལ་ལྟོས་ནས་ཁྲེལ་ཡོད་པ་དང་མ་བྲལ་བས་སོ། ། མི་མཐུན་ཕྱོགས་ངོ་ཤེས་པས་སྲུང་བ་ནི། སྡོམ་པ་གཏོང་བའི་རྒྱུ། ཉམས་པའི་རྒྱུ། གནས་པའི་རྐྱེན། སེམས་རབ་ཏུ་དད་པ་ལ་གེགས་བྱེད་པའི་རྒྱུ་རྣམས་ངོ་ཤེས་པས་ཏེ། མདོར་ན། འདུལ་བའི་སྡེ་སྣོད་ལ་སློབ་ཅིང་ཐོས་བསམ་བྱ་བས་སོ། ། བསླབ་པ་ཡོངས་སུ་སྦྱོང་བས་སྲུང་བ་ནི། གཞི་གསུམ་གྱི་ཕྱག་ལེན་མི་འདོར་བས་སོ། ། བདེར་གནས་ཀྱི་རྐྱེན་བསྟེན་པས་སྲུང་བ་ནི། གོས་ལ་བརྟེན་པའི་ལྟུང་བ་སོ་དྲུག །ཟས་ལ་ཉེར་གཉིས། སྣོད་སྤྱད་ལ་གསུམ། གནས་མལ་ལ་བཅུ་རྣམས་སྤང་ཞིང་བསྲུང་ངོ༌། ། ཉེས་པ་འབྱུང་བའི་རྒྱུའི་གཙོ་བོ། མི་ཤེས་པ། མ་གུས་པ། བག་མེད་པ། ཉོན་མོངས་པ་མང་བ་རྣམས་ཡིན་པས། དེ་དག་གི་གཉེན་པོར་སྲུང་བའི་ཐབས་ལྔ་པོ་བརྟེན་ནས་(༢༥ན)བསླབ་པ་མིག་གི་འབྲས་བུ་ལྟར་བསྲུང་བ་ལ་བརྩོན་པར་བྱའོ། ། ཉ༢ གཉིས་པ་སོ་སོར་བཤད་པ་ལའང་གཉིས། ཏ༡ ཁྱིམ་པའི་ཕྱོགས་སུ་གཏོགས་པའི་དང༌། ཏ༢ རབ་བྱུང་གི་ཕྱོགས་སུ་གཏོགས་པའི་བསླབ་བྱའོ། ། ཏ༡ དང་པོ་ལ་གཉིས། ཐ༡ བསྙེན་གནས་དང༌། ཐ༢ དགེ་བསྙེན་ནོ། ། ཐ༡ དང་པོ་ནི། བསྙེན་གནས་རྩ་བཞི་ཆང་དང་གར་ཕྲེང་སོགས། ། མལ་སྟན་ཆེ་མཐོ་ཕྱི་དྲོའི་ཁ་ཟས་སྤང༌། ། ཚུལ་ཁྲིམས་བག་ཡོད་བརྟུལ་ཞུགས་ཡན་ལག་བརྒྱད། ། གཏན་དུ་སྲུང་བ་གོ་མིའི་དགེ་བསྙེན་གྲགས། ། ཐོག་མར་བསྙེན་གནས་ཀྱི་བསླབ་པ་ནི། སྲོག་གཅོད་པ། མ་བྱིན་པར་ལེན་པ། མི་ཚངས་པར་སྤྱོད་པ། རྫུན་སྨྲ་བ་སྟེ་རྩ་བ་བཞི། ཆང་འཐུང་བ། གར་སོགས་ཕྲེང་སོགས། མལ་སྟན་ཆེ་མཐོ། ཕྱི་དྲོའི་ཁ་ཟས་བཅས་སྤང་ངོ༌། ། དེ་ལ་གར་སོགས་ཞེས་པ་ནི། གླུ་གར་དང༌། རོལ་མོའི་སྒྲ་དང༌། ཕྲེང་སོགས་ནི། ཕྲེང་བ་དང་སྤོས་ཉུག་པ་དང་རྒྱན་དང་ཁ་དོག་འཆང་བའོ། ། སྤོས་ཉུག་ཅེས་པ་ནི། སྤོས་ཀྱིས་གོས་སོགས་དྲི་ཞིམ་པར་བྱེད་པའོ། ། མལ་སྟན་ཆེ་མཐོ་ཞེས་པ་ནི། རིན་པོ་ཆེ་སོགས་རྒྱུ་བཟང་པོ་ལས་བྱས་པ་ནི་ཆེན་པོ་དང༌། མཐོན་པོ་ནི། ཁྲུ་གང་ཡན་ཆད་དུ་ལོངས་པ་སྟེ། ཆོས་འཆད་པ་པོ་ནི་མ་གཏོགས་སོ། ། དེའི་ཐོག་མ་བཞི་ནི་ཚུལ་ཁྲིམས་ཀྱི་ཡན་ལག་དང་། དེའི་འོག་གཅིག་བག་ཡོད་ཀྱི་ཡན་ལག་དང༌། མཐའ་མ་གསུམ་བརྟུལ་ཞུགས་ཀྱི་ཡན་ལག་ཅེས་བྱ། འདིར་བརྟུལ་ཞུགས་ཞེས་པའང་སྔ་མ་ཁྱིམ་པའི་སྤྱོད་པ་ཁ་ན་མ་ཐོ་བ་བརྟུལ་ནས། ཕྱི་མ་བསྙེན་གནས་ཀྱི་སྤྱོད་པ་ལ་ཞུགས་པའི་དོན་ཏེ་གཞན་ལའང་དེས་མཚོན་ནོ། ། ཡན་ལག་བརྒྱད་ཀྱི་སྟེང་དུ་ཇོ་བོ་རྗེའི་ཕྱག་ལེན་གྱིས་ཟས་དཀར་གསུམ་ཉིད་བརྟེན་པ་དང༌། བག་ཡོད་པའི་སླད་དུ་ཆབ་ལེན་པ་གཉིས་བསྣན་པར་མཛད་དོ། ། དེའང་དགེ་བསྙེན་ཐོབ་པ་ཞིག་གིས་འདི་བསྲུངས་ན་དགེ་བསྙེན་གྱི་གསོ་སྦྱོང་དུ་འགྱུར་ལ། དགེ་བསྙེན་མ་ཐོབ་པས་(༢༥བ)བསྲུང་ན་ནི་བསྙེན་གནས་ཉིད་དང་། དགེ་ཚུལ་ཐོབ་པ་ཡན་གྱིས་ནི་འདི་ཆེད་དུ་གཉེར་བྱ་མ་ཡིན་ནོ། ། གསོ་སྦྱོང་ཡན་ལག་བརྒྱད་ཇི་སྲིད་འཚོའི་བར་གཏན་ཁྲིམས་སུ་བསྲུང་བ་ནི་གོ་མཱིའི་དགེ་བསྙེན་དུ་བཤད་ལ། སློབ་དཔོན་དབྱིག་གཉེན་གྱིས། གོ་མཱིའི་དགེ་བསྙེན་ཞེས་བྱ་བ་འདི་ནི། འཕགས་པ་གནས་བརྟན་པའི་མན་ངག་བརྒྱུད་པ་ལས་ཐོས་ཀྱི་བདེ་བར་གཤེགས་པས་གསུངས་པ་ནི་མ་མཐོང་ངོ༌། །ཞེས་གསུངས། འོན་ཀྱང་ཐེག་ཆེན་གྱི་སྡེ་སྣོད་ལས་གསུངས་ཏེ། རྒྱལ་བུ་སྙིང་རྗེ་ཆེར་སེམས་ཀྱིས་བསྙེན་གནས་ཡན་ལག་བརྒྱད་ཇི་སྲིད་འཚོའི་བར་དུ་བླང་བར་དཀོན་བརྩེགས་ལས་བཤད་པའི་ཕྱིར་རོ། ། དབྱིག་གཉེན་གྱི་གསུང་དེ་ནི་འདུལ་བའི་སྡེ་སྣོད་ལས་དངོས་སུ་མི་གསལ་བའི་དོན་ནོ། ། ཐ༢ གཉིས་པ་[དགེ་བསྙེན་]ནི། དགེ་བསྙེན་ལྔ་ལས་སྐྱབས་གསུམ་འཛིན་པ་ཡིས། ། མཐུན་མིན་གསུམ་དང་ཐུན་མོང་ལྔ་ལ་བསླབ། ། རྩ་བཞི་ཆང་བཅས་སྤོང་ཚུལ་རིམ་པ་ཡིས། ། སྣ་གཅིག་སྣ་འགའ་ཕལ་ཆེར་ཡོངས་རྫོགས་སྤྱོད། ། མདོ་སྡེ་པ་རྣམས་ཚངས་སྤྱོད་ཉིད་ཀྱང་འདོད། ། དགེ་བསྙེན་ལ་ནང་གསེས་ཀྱི་དབྱེ་བ་ལྔ་སྟེ། ཐོག་མར་སྐྱབས་འགྲོ་བླངས་ནས་དེའི་བསླབ་བྱ་ཙམ་སྲུང་བ་ནི། སྐྱབས་གསུམ་འཛིན་པའི་དགེ་བསྙེན་དུ་གྲགས་ཏེ། དེའི་བསླབ་བྱ་ནི། སངས་རྒྱས་ལ་སྐྱབས་སུ་སོང་ནས་འཇིག་རྟེན་པའི་ལྷ་གཞན་ལ་ཕྱག་མི་བྱེད། ཆོས་ལ་སྐྱབས་སུ་སོང་ནས་སེམས་ཅན་ལ་གནོད་འཚེ་སྤོང༌། དགེ་འདུན་ལ་སྐྱབས་སུ་སོང་ནས་གྲོགས་མུ་སྟེགས་ཅན་དང་མི་འགྲོགས་པ་སྟེ་དགག་པའི་བསླབ་བྱ་གསུམ་དང༌། སྐུ་རྟེན་སཱཙྪའི་དུམ་བུ་ཙམ་དང༌། གསུང་རྟེན་ཡིག་འབྲུ་ཙམ་དང༌། དགེ་འདུན་ལྷན་པ་སེར་པོ་དང་ལྡན་ཙམ་ཡན་ལ་མཆོག་གསུམ་གྱི་ངོ་བོར་བལྟ་བ་ནི་བསྒྲུབ་པའི་བསླབ་བྱ་གསུམ་སྟེ། ཐུན་མོང་མ་ཡིན་པའི་གསུམ་ཚན་གཉིས་དང༌། སྲོག་དང་རྒྱལ་སྲིད་ལ་སོགས་པའི་ཆེད་དུའང་དཀོན་མཆོག་མི་སྤང་བ་དང༌། དགོས་གལ་ཇི་ལྟར་ཆེ་ཡང་དཀོན་མཆོག་ལ་བློ་གཏད་པ་ལས་འཇིག་རྟེན་པའི་ཐབས་(༢༦ན)གཞན་མི་འཚོལ་བ་དང༌། རྟག་ཏུ་ཡོན་ཏན་དྲན་པས་དུས་ཀྱི་མཆོད་པ་མི་བཅག་པ་དང༌། ཕན་ཡོན་ཤེས་པས་རང་སྐྱབས་སུ་འགྲོ་ཞིང་གཞན་དག་ཀྱང་འགྲོར་གཞུག་པ་དང༌། གར་འགྲོའི་ཕྱོགས་ཀྱི་སངས་རྒྱས་དང་དེའི་སྐུ་གཟུགས་ལ་ཕྱག་འཚལ་བ་རྣམས་ནི་ཐུན་མོང་གི་བསླབ་བྱ་ལྔར་ཇོ་བོ་རྗེས་གསུངས་པ་ལྟར་ལ་བསླབ་བོ། ། བསླབ་བྱ་འདི་དག་ནི་དགེ་བསྙེན་དུ་མ་ཟད་བསྙེན་གནས་དགེ་ཚུལ་གྱིས་མཚོན་སྡོམ་པ་གོང་འོག་ཐམས་ཅད་ཀྱི་སྔོན་དུ་འགྲོ་བ་ཡིན་ནོ། ། དེ་སྟེང་དགེ་བསྙེན་གྱི་བསླབ་པ་དངོས་ལ་རྩ་བ་བཞི་དང༌། དེ་དག་བསྲུང་ནུས་པའི་ཡན་ལག་ཏུ་མྱོས་འགྱུར་ཆང་དང་བཅས་པ་སྤོང་ཚུལ་གྱི་རིམ་པས་རྣམ་གྲངས་བཞིར་གྱུར་ཏེ། སྲོག་གཅོད་ཙམ་སྤོང་བ་སྣ་གཅིག་སྤྱོད་པ་དང༌། དེའི་སྟེང་མ་བྱིན་ལེན་ཙམ་སྤོང་བ་སྣ་འགའ་སྤྱོད་པ་དང༌། དེ་གཉིས་ཀྱི་སྟེང་རྫུན་དང་གསུམ་སྤོང་བ་ཕལ་ཆེར་སྤྱོད་པ་དང༌། དེ་གསུམ་གྱི་སྟེང་དུ་འདོད་ལོག་དང་ཆང་སྟེ་ལྔ་ཆར་སྤོང་བ་ཡོངས་རྫོགས་དགེ་བསྙེན་ནོ། ། དེ་བཞི་ལ་བྱེ་བྲག་ཏུ་སྨྲ་བ་ལྟར་ན། སྡོམ་པ་ལེན་པའི་ཚེ། དགེ་བསྙེན་ཙམ་དུ་ཁས་བླངས་ནས་ཕྱིས་བསྲུང་དུས་སྣ་གཅིག་སོགས་གང་འདོད་བསྲུང་བ་ལ་དེ་དག་སྤྱོད་ཅེས་འདོད། མདོ་སྡེ་པ་ལྟར་ན། ལེན་པའི་ཚེ། བདག་སྣ་གཅིག་སྤྱོད་པའི་དགེ་བསྙེན་དུ་བཟུང་དུ་གསོལ་ཞེས་པ་ལྟ་བུ་གང་འདོད་ཁས་བླངས་ནས་དེ་བསྲུང་དགོས་ཀྱི། གཞན་དུ་ཡོངས་རྫོགས་བླངས་ནས་ཕྱིས་དེ་ལྟར་མ་བསྲུང་ན་ཚུལ་འཆལ་དུ་འགྱུར་བའི་ཕྱིར། ཞེས་འདོད། ཡོངས་རྫོགས་དགེ་བསྙེན་གྱི་སྟེང་དུ་མི་ཚངས་སྤྱོད་སྤོང་བའི་ཚངས་སྤྱོད་དགེ་བསྙེན་ཉིད་ཀྱང་དེ་ཉིད་ཀྱིས་འདོད་དེ། རྒྱན་གྱིས་བརྒྱན་པར་བྱས་ཀྱང་ཆོས་སྤྱོད་ལ། ། ཞེས་སོགས་དང༌། ཆོ་འཕྲུལ་བསྟན་པའི་མདོ་ལས་ཀྱང་འདི་དང་གོ་མཱིའི་དགེ་བསྙེན་གཉིས་ཀ་གསལ་བར་བསྟན་ཏོ། ། འདི་གཉིས་ནི་ཁྱིམ་ཐབས་སྤངས་པས་ཁྱིམ་པ་མ་ཡིན་ལ། རྟགས་མ་བླངས་པས་རབ་བྱུང་དུའང་མི་གཏོགས་སོ། ། དགེ་བསྙེན་གྱི་སྡོམ་ལྡན་སྔགས་ལ་ཞུགས་པ་ཡིན་ན། རབ་བྱུང་གི་རྟགས་དང་(༢༦བ)ལས་ཀྱི་ཆོ་ག་ཕྱི་དྲོའི་ཁ་ཟས་ལྟ་བུ་བཅས་རྐྱང་འགའ་ཞིག་མ་གཏོགས་པ་ལྷག་མ་རྣམས་འདུལ་བའི་སྡེ་སྣོད་ལྟར་བསླབ་དགོས་པ་དཔུང་བཟང་