Tibetan
ལས་གསུངས་སོ། ། ཏ༢ གཉིས་པ་རབ་བྱུང་ཕྱོགས་གཏོགས་ཀྱི་བསླབ་བྱ་ལ་གསུམ། ཐ༡ དགེ་ཚུལ་ཕ་མ། ཐ༢ དགེ་སློབ་མ། ཐ༣ དགེ་སློང་ཕ་མའི་བསླབ་བྱའོ། ། ཐ༡ དང་པོ་ནི། དགེ་ཚུལ་ཡན་ལག་བརྒྱད་སྟེང་གསེར་དངུལ་སྤང༌། ། བླངས་འདས་བཅུ་ཡིན་ཕྱོགས་མཐུན་དགེ་སློང་བཞིན། ། བསྲུང་བྱ་ཉེས་མེད་བཅུ་གསུམ་ལ་སོགས་པའོ། ། དགེ་ཚུལ་གྱི་བསླབ་བྱ་བླངས་འདས་དངོས། ཕྱོགས་མཐུན་བསྡམ་བྱའི་ཉེས་བྱས། རབ་བྱུང་གི་དུས་སུ་བླངས་པ་ལས་འདས་པའི་ཕྱོགས་མཐུན་གསུམ་དུ་ཡོད་པ་ལས། དང་པོ་ནི། བསྙེན་གནས་ཀྱི་སྐབས་སུ་བཤད་པའི་ཡན་ལག་བརྒྱད་ལ་གར་སོགས་དང༌། ཕྲེང་སོགས་སོ་སོར་དབྱེ། དེ་སྟེང་གསེར་དངུལ་ལེན་པ་སྤང་བ་བཅས་བླངས་འདས་རགས་པ་བཅུར་གསུངས་པ་ནི་བསླབ་གཞི་མང་པོ་ཐོས་ནས་ཞུམ་པ་རྣམས་ལ་གཙོ་ཆེ་བར་དགོངས་པ་སྟེ། དེའང་རྩ་བ་བཞི་ནི་དགེ་སློང་དང་འདྲ་ཡང་། འདིར་ཕམ་འདྲའི་ཉེས་བྱས་དང༌། ཆང་འཐུང་བ་སོགས་དྲུག་ནི་བཤགས་བྱའི་ཉེས་བྱས། དེ་ལས་ཞིབ་མོར་དབྱེ་ན་སུམ་ཅུ་སོ་གསུམ་དུ་གྱུར་ཏེ། རྩ་བ་བཞི་ལས། སྲོག་གཅོད་ཀྱི་ཆར་གཏོགས་དུད་འགྲོ་གསོད་པ། སྲོག་ཆགས་བཅས་པའི་རྩྭ་དང་ཆུར་སྤྱོད་པ་གསུམ། རྫུན་གྱི་ཆར་གཏོགས་གཞི་མེད་བག་ཙམ་གྱི་སྐུར་འདེབས། དགེ་འདུན་དབྱེན། དེ་རྗེས་ཕྱོགས། ཁྱིམ་སུན་འབྱིན། ཤེས་བཞིན་རྫུན་དུ་སྨྲ་བ། བཤེས་ངོར་འཕྱ་བ། ཞལ་ཏ་པར་འཕྱ་བ། ཟས་ཅུང་ཟད་ཀྱི་ཕྱིར་ཆོས་སྟོན་ཞེས་པའི་སྐུར་འདེབས། ལྷག་མའི་སྐུར་འདེབས། བསླབ་པ་ལ་ཁྱད་གསོད་ཀྱིས་སྤོང་བ། ལྷག་པོ་ལེན་ཕྱིར་འབྲས་ཆན་འགེབས་པ་སྟེ་བཅུ་གཉིས། དེ་ལྟར་རྩ་བཞི་དང་དེའི་ཆར་གཏོགས་བཅོ་ལྔ་སྟེ་བཅུ་དགུ། ཆང༌། གར་སོགས་གསུམ། ཕྲེང་སོགས་གསུམ། མལ་སྟན་ཆེ་མཐོ་རྣམས་སོ་སོར་བགྲངས་པ་དང༌། (༢༧ན)ཕྱི་དྲོའི་ཁ་ཟས། གསེར་དངུལ་ལེན་པ་རྣམས་བསྣན་པས་སུམ་ཅུ། ཉམས་པ་གསུམ་དང་བཅས་པས་བླངས་འདས་སུམ་ཅུ་སོ་གསུམ་མོ། །འདི་ལ་བཤད་པའི་རྣམ་གྲངས་གཞན་ཡང་ཡོད་དོ། ། གཉིས་པ་ནི། གནང་བའི་ཉེས་མེད་རྣམས་མ་གཏོགས་དགེ་སློང་གི་ལྟུང་བ་ཐམས་ཅད་དགེ་ཚུལ་ལའང་ཕྱོགས་མཐུན་གྱི་ཉེས་བྱས་སུ་འགྱུར་ཞིང༌། དེ་དག་བཤགས་ཡུལ་ལ་མི་ལྟོས་པར་ཡིད་ཀྱིས་བསྡོམས་པ་ཙམ་གྱིས་འདག་པར་འགྱུར་རོ། ། གསུམ་པ་ནི། ཁྱིམ་པའི་རྟགས་སྤོང་བ། རབ་བྱུང་གི་རྟགས་ལེན་པ། མཁན་པོར་གུས་པར་ཁས་བླངས་པ་གསུམ་ལས་ཉམས་པའོ། ། དེ་གསུམ་ནི། རབ་བྱུང་གཏོང་བྱེད་ཀྱི་རྒྱུ་ཡང་ཡིན་ཏེ། བསམ་པ་ཐག་པ་ནས་ཁྱིམ་པའི་རྟགས་ཉིན་གཅིག་ཙམ་བླངས་པས་ཀྱང་དེ་གཏོང་བར་བཤད་པའི་ཕྱིར་རོ། ། དེས་ན། སུམ་བརྒྱ་པར་རྒྱས་པར་བཤད་པ་བཞིན་ཕྱོགས་མཐུན་རྣམས་དགེ་སློང་བཞིན་དུ་བསྲུང་བར་བྱ་ཞིང༌། དགེ་ཚུལ་ལ་ཉེས་མེད་དུ་གནང་བ་ནི་བཅུ་གསུམ་དང༌། སོགས་ཁོངས་ནས། བོད་ཀྱི་འདུལ་འཛིན་རྣམས་ཀྱིས་རུང་མཐུན་དྲུག་བསྣན་པར་བཤད་པའི་བཅུ་དགུ་པོ་རྣམས་ནི་ཉེས་པ་མེད་པའོ། ། དེ་ལ་ཉེས་མེད་བཅུ་གསུམ་ནི། ཆོས་གོས་ལྷུང་བཟེད་འཆང་འབྲལ་ས་རྐོ་དང༌། ། རིན་ཆེན་མེ་རེག་སྤངས་ཟ་ཤིང་འཛེག་གཅོད། ། བྱིན་ལེན་མེད་ཟ་རྩྭ་སྔོན་མི་གཙང་འདོར། ། གསོག་འཇོག་ཟ་དང་ས་བོན་འཇོམས་པའོ། ། དྲུག་ནི་ཟླ་འཇོག་གསོག་འཇོག་དགོན་པ་འབྲལ། ། མ་སྨྲས་འདུན་སྒྱུར་མ་རྫོགས་ལྷན་ཅིག་ཉལ། ། ཞེས་པ་རྣམས་སོ། ། ཐ༣ གཉིས་པ་[དགེ་སློབ་མ་]ནི། དགེ་སློབ་མ་ནི་རྩ་བ་རྗེས་མཐུན་དྲུག ། དགེ་ཚུལ་གྱི་བསླབ་གཞི་བཅུ་ཐོབ་པའི་སྟེང་དུ་དགེ་སློབ་མའི་སྡོམ་པ་བླངས་ནས་ལོ་གཉིས་སུ་དེའི་བསླབ་བྱ་ལ་སློབ་པ་སྟེ། ས་གའི་ལྷས། གཅིག་པུར་ལམ་དུ་མི་འགྲོ་ཞིང༌། ། ཆུ་བོའི་ཕ་རོལ་རྐྱལ་མི་བྱ། ། སྐྱེས་པ་ལ་ནི་མི་རེག་ཅིང༌། ། དེ་དང་ལྷན་ཅིག་འདུག་མི་བྱ། ། ཁ་ན་མ་ཐོ་མི་འཆབ་ཅིང༌། ། གཉེན་(༢༧བ)དུ་འགྱུར་བར་མི་བྱ་སྟེ། ། རྩ་བའི་ཆོས་དྲུག་འདི་དག་ནི། ། དགེ་སློབ་མ་ལ་གསུངས་པ་ཡིན། ། ཞེས་དང༌། ས་ལེ་སྦྲམ་ནི་ལེན་པ་དང༌། ། གསང་བའི་གནས་ཀྱི་སྤུ་འདྲེག་དང༌། ། ས་རྣམས་རྐོ་བར་བྱེད་པ་དང༌། ། རྩྭ་སྔོན་ལ་སོགས་གཅོད་པ་དང༌། ། བྱིན་ལེན་མ་བྱས་ཟ་བ་དང༌། ། གསོག་འཇོག་བྱས་པ་ཟ་བ་ལས། ། ལྡོག་པ་ཞེས་བྱ་དེ་བཞིན་གཞན། ། རྗེས་མཐུན་ཆོས་ནི་དྲུག་ཏུ་འདོད། ། ཅེས་གསུངས་ཤིང༌། གཞན་ཡང་ཉེས་མེད་བདུན་མ་གཏོགས་པ་དགེ་སློང་མའི་བསླབ་གཞི་མཐའ་དག་ཕྱོགས་མཐུན་རྣམས་བསྲུང་བྱར་བཤད་དོ། ། ཐ༣ གསུམ་པ་དགེ་སློང་གི་བསླབ་བྱ་བརྗོད་པ་ལ། [ད༡ གནས་བཅའ་བའི་ཚུལ། ད༢ གནས་ཀྱི་སློབ་དཔོན་ལ་བསྟེན་ཚུལ། ད༣ བསླབ་བྱ་དངོས།] ད༡ [དང་པོ་]ཐོག་མར་གནས་བཅའ་བའི་ཚུལ་ནི། དགེ་ཚུལ་དང་བསྙེན་རྫོགས་བྱས་མ་ཐག་པ་དེས། རང་ཉིད་བསྙེན་པར་རྫོགས་ནས་ལོ་བཅུ་བར་མ་ཆད་དུ་ལོན་པ་དང༌། ལྔ་ཕྲུགས་དང་ལྡན་པ་སྟེ་བརྟན་མཁས་ཀྱི་ཡོན་ཏན་གཉིས་དང་ལྡན་པ་མ་བྱུང་གི་བར་དུ་གནས་ཀྱི་བླ་མ་ཁྱད་པར་ཅན་ལ་བསྟེན་ནས་བླང་དོར་མ་ནོར་བར་བྱེད་པ་སྟེ། དེའང་མཁན་པོ་ཡོད་ན་དེར་གྱུར་པ་ཉིད་ཀྱིས་གནས་ཀྱི་བླ་མར་ཡང་གྱུར་ཟིན་པ་ཡིན་པས་གནས་གསར་དུ་འཆའ་མི་དགོས། མེད་ན་བླ་མར་འོས་པའི་དགེ་སློང་ཞིག་ལ་གནས་འཆའ་བའི་ཆོ་ག་བྱས་ཏེ། ལྷན་ཅིག་གནས་པས་ཞག་གཉིས་པའི་སྐྱ་རེངས་ཤར་བའི་ཚེ་དེ་ཉིད་གནས་ཀྱི་སློབ་དཔོན་དུ་འགྱུར་ཞིང༌། བླ་མ་གཅིག་གི་འཁོར་དུ་གནས་པ་དགེ་སློང་གི་ཚོགས་མང་པོ་དག་རུང་མོད། དགེ་ཚུལ་ནི་གཅིག་ལས་བཞག་ཏུ་མི་རུང་བར་བཤད་ལ། དེ་ཡང་ནུབ་གསུམ་ལས་ལྷག་པར་ལྷན་ཅིག་གནས་སུ་མི་རུང་བས། ལྷན་ཅིག་གནས་པ་ཞེས་མི་བྱ་སྟེ། ཉེ་གནས་ཞེས་བྱའོ། ། ད༢ [གཉིས་པ་]གནས་ཀྱི་སློབ་དཔོན་ལ་བསྟེན་ཚུལ་ནི། གནས་པས་གནས་ལ་མ་ཞུས་པར་བྱ་བ་མི་བྱའོ། །ཞེས་པས་ཉེ་འཁོར་གྱི་མཆོད་རྟེན་ལ་ཕྱག་བྱ་བ་དང༌། བཤང་གཅི་འདོར་བ། ཞག་གཅིག་གཞན་དུ་ཕྱིན་པ་ལ་སོགས་པའི་བྱ་བ་དང་དུས་ཀྱི་དམིགས་བསལ་གསུངས་པ་རྣམས་མ་(༢༨ན)གཏོགས་བྱ་བ་ཐམས་ཅད་རང་ཉམས་སུ་མི་གཏོང་བར་དེ་ལ་ཞུ་ཞིང༌། དེས་ཀྱང་ལེགས་པར་འདོམས་པའི་སྒོ་ནས་ཚུལ་བཞིན་དུ་བསྟན་པ་ཡིན་ནོ། ། གནས་བཅས་པ་འཇིག་པའི་རྒྱུ་ནི། གནས་དང་གནས་པ་གཉིས་ཀ་ལ་ལྟོས་མེད་ཀྱི་འདུ་ཤེས་སྐྱེས་པའོ། ། ད༣ [གསུམ་པ་]བསླབ་བྱ་དངོས་ལ་གཉིས། ན༡ དགག་པའི་བསླབ་བྱ་དང༌། ན༢ བསྒྲུབ་པའི་བསླབ་བྱའོ། ། ན༡ དང་པོ་ལ་གཉིས། པ༡ དགེ་སློང་ཕའི་བསླབ་བྱ། པ༢ དགེ་སློང་མའི་བསླབ་བྱའོ། ། པ༡ དེའི་དང་པོ་ལ་གཉིས། ཕ༡ མདོར་བསྟན། ཕ༢ རྒྱས་བཤད་དོ། ། ཕ༡ དང་པོ་ནི། དགེ་སློང་ཚུལ་ཁྲིམས་ལྟུང་བ་སྡེ་ལྔ་སྟེ། ། དགེ་སློང་རྣམས་ལ་ཚུལ་ཁྲིམས་སུ་བཅས་པར་མཛད་པ་ནི་ལྟུང་བ་སྡེ་ལྔ་སྟེ། ཕམ་པའི་སྡེ། ལྷག་མའི་སྡེ། ལྟུང་བྱེད་ཀྱི་སྡེ། སོ་སོར་བཤགས་པའི་སྡེ། ཉེས་བྱས་ཀྱི་སྡེའོ། ། ཕ༢ གཉིས་པ་[རྒྱས་པར་བཤད་པ་]ལ་ལྔ། ཕམ་པ་ནས་ཉེས་བྱས་ཀྱི་བར་རོ། ། བ༡ དང་པོ་ནི། མི་ཚངས་སྤྱོད་དང་མ་བྱིན་ལེན་པ་དང༌། ། སྲོག་གཅོད་བླ་མའི་རྫུན་སྨྲ་ཕམ་པའི་སྡེ། ། གཞི་བསམ་སྦྱོར་བ་མཐར་ཐུག་ཚང་ན་ཉམས། ། ཡན་ལག་མ་ཚང་སྦོམ་པོ་ལ་སོགས་མང༌། ། དེ་ལ་ཕམ་པའི་སྡེ་ཚན་ལ་བཞི་ཡོད་པའི། མི་ཚངས་སྤྱོད་ཀྱི་ཕམ་པ་ནི། ཕོ་མོ་མ་ནིང་མི་དང་དུད་འགྲོ་སོགས་གང་གིའང༌། གསོན་པོའམ་ལུས་ཕྱེད་དུ་ལངས་པའི་རོ་ལྟ་བུའི་ཁ་བཤང་ལམ་ཟག་བྱེད་གསུམ་པོ་གང་རུང་དུ་ནོར་བུ་བཅུག་ཅིང་རེག་པ་ལས་བྱུང་བའི་བདེ་བ་རྫོགས་པར་ཉམས་སུ་མྱོང་བའོ། ། མ་བྱིན་ལེན་གྱི་ཕམ་པ་ནི། གཞན་གྱི་དངོས་པོ་རིན་ཐང་ཚང་བ་རང་གིས་དངོས་སུ་བརྐུས་པའམ་གཞན་རྐུར་བཅུག་པའོ། ། རིན་ཐང་གི་ཚད་ནི། རྒྱ་གར་དུ་མགྲོན་བུ་བཞི་བརྒྱ་ཀར་ཤ་པཎའི་ཆ་བཞིའི་ཚད་ཡིན་ལ། དེ་དང་མཉམ་པའི་དངོས་པོ་བརྐུས་པ་སྟེ། བོད་དུ་མུ་གེ་མེད་པའི་ཚེ་ནས་ཁལ་གཅིག་ཙམ་དང༌། མུ་གེ་བྱུང་བའི་ཚེ་ནས་ཁལ་ཕྱེད་ཙམ་གྱིས་ཀྱང་ལོངས་པར་མངོན། གཙོ་བོ་ནི་ཡུལ་སོ་སོའི་རིན་ཐང་གི་སྐབས་ཐོབ་རྩི་དགོས་པར་བཤད་དོ།། (༢༨བ)སྲོག་གཅོད་ཀྱི་ཕམ་པ་ནི། མིའམ་མངལ་དུ་ཡོད་པའི་མེར་མེར་པོ་ལ་སོགས་པ་མཚོན་དུག་རིག་སྔགས་ཀྱིིས་བསད་པའམ། གཞན་གསོད་དུ་བཅུག་ཀྱང་རུང་སྟེ། མཛོད་ལས། དམག་ལ་སོགས་པ་དོན་གཅིག་ཕྱིར། ། ཐམས་ཅད་བྱེད་པ་པོ་བཞིན་ལྡན། ། ཞེས་སོ། ། མི་ཆོས་བླ་མའི་རྫུན་སྨྲ་བའི་ཕམ་པ་ནི། མིའི་རྟེན་ལ་སྒྲུབ་པར་སླ་བའི་ཆོས་མ་ཡིན་པ། དེ་དག་གི་གོང་མའམ་བླ་མ་ལྟ་བུར་གྱུར་པའི་ཡོན་ཏན་ཞིག་མ་ཐོབ་བཞིན་དུ་ཐོབ་ཅེས་སྨྲས་པ་སྟེ། དཔེར་ན། ལྷ་མ་མཐོང་བར་ལྷ་མཐོང་ངོ་ཞེས་པས་མཚོན་ཏེ། རང་ཉིད་སངས་རྒྱས་མ་ཡིན་པར་སངས་རྒྱས་སུ་ཁས་ལེན་པ། མངོན་ཤེས་དང་གྲུབ་རྟགས་སོགས་མེད་བཞིན་དུ་ཡོད་པར་ཁས་འཆེ་བ་སོགས་ཀྱང་འདིའི་གྲངས་སུ་འགྲོ་ཞིང༌། ས་གའི་ལྷས། འདིར་ནི་སྒྲིབ་པ་རྣམ་པ་ལྔ། ། མི་རྣམས་ཀྱིས་ནི་ཆོས་སུ་ཐོས། ། དེ་ཟད་བླ་མའི་ཆོས་སུ་འདོད། ། ཅེས་པས། འདོད་པ་ལ་འདུན་པ། གནོད་སེམས། གཉིད་རྨུག །རྒོད་འགྱོད། ཐེ་ཚོམ་སྟེ། སྒྲིབ་པ་ལྔ་པོ་ནི་མི་རྣམས་ཀྱི་རང་བཞིན་ནམ་ཆོས་ཡིན་ལ། དེ་ཟད་པས་བླ་མ་སྟེ་ཁམས་གོང་མའི་སེམས་ཐོབ་པས་སོ། །བཅས་ལྡན་དགེ་སློང་གིས་འདི་བཞི་གང་རུང་ལ་སྤྱད་ནས་སྐད་ཅིག་མ་གཅིག་བཅབས་ཀྱང་སྡོམ་པ་ལྷག་མ་མེད་པར་བྱེད་པས་ན་རྩ་བའི་ལྟུང་བ་སྟེ། མི་མཐུན་ཕྱོགས་ཀྱིས་གཉེན་པོ་མཐུ་མེད་པར་བཅོམ་པའི་ཕྱིར་ཕམ་པ་བཞི་ཞེས་བྱ་སྟེ་ཕམ་པའི་སྡེའོ། ། འདིར་གོང་འོག་ཐམས་ཅད་དུ་གླེང་གཞི། ཉེས་དམིགས། འབྲས་བུ། བསམ་པ། སྦྱོར་བ། མཐར་ཐུག །སེལ་བ། ལྟུང་མེད། བསླབ་བྱ་སོགས་ཞིབ་པར་ཡོད་ནའང་བློ་གྲོས་ཀྱི་རྩལ་དང་ལྡན་པ་རྣམས་ཀྱིས་རྩོད་དུས་ཀྱི་ཀུན་མཁྱེན་གཉིས་པ་བུ་སྟོན་ཆོས་རྗེ་དང༌། རྗེ་བརྒྱད་པའི་འདུལ་ཊཱིཀ་ཆེན་པོ་སོགས་གཞུང་ལུགས་རྣམས་དང༌། བློ་གྲོས་མ་སྦྱངས་པ་དག་གིས་ལོ་ཆེན་དྷརྨ་ཤྲཱིའི་སྡོམ་འགྲེལ། པད་དཀར་ཞབས་དང་རྗེ་དབོན་ཀརྨའི་སྡོམ་གསུམ་(༢༩ན)སོགས་ལས་ཞིབ་ཏུ་རྟོགས་པར་བྱ་དགོས་ཀྱི། འདིར་མ་སྤྲོས་སོ། ། སྐབས་འདིར། མི་ཤེས་སུ་མི་རུང་བ་ལྟུང་བ་རྣམས་ལ་གཞི་བསམ་སྦྱོར་བ་མཐར་ཐུག་གི་ཡན་ལག་བཞི་ཚང་བ་དང་མ་ཚང་བ་ལས་ལྟུང་བའི་དངོས་གཞི་སོགས་སུ་འགྱུར་བས་དཔེར་མཚོན་ན། མི་ཚངས་སྤྱོད་ལ་གཞི་རྨ་གསུམ་པོ་གང་རུང་མ་ཉམས་པ་དང༌། ཕོ་དབང་ནད་མེད་ལས་སུ་རུང་བ། བསམ་པ་འཇིགས་དང་ངོ་ཚ་མེད་པ་ཆགས་པར་གྱུར་པ། སྦྱོར་བ་ཅུང་ཟད་བཅུག་པ། མཐར་ཐུག་བདེ་བ་ཉམས་སུ་མྱོང་བ་བཅས་ཚང་ན་ཕམ་པའི་དངོས་གཞི་དང༌། དེ་ལས་ཡན་ལག་སྣ་རེ་མ་ཚང་ན་ཕམ་པའི་སྦོམ་པོ། དེའང་ཡན་ལག་མང་ཉུང་གིས་ལྕི་ཡང་གཉིས་སུ་ཡོད་ཅིང༌། ཕམ་པ་གཞན་རྣམས་དང་ལྷག་མ་སོགས་ལའང་ཡན་ལག་བརྩི་ཞིང་ཡན་ལག་རེ་རེ་མ་ཚང་ན་ལྷག་མའི་སྐབས་སུ་ལྷག་མའི་སྦོམ་པོ་ཞེས་བྱ་ཞིང༌། ལྟུང་བ་གཞན་རྣམས་ལ་ཡན་ལག་རེ་རེ་མ་ཚང་ན་ཉེས་བྱས་སོ། ། འདི་ལ་བདག་གིས་འདོད་པ་བརྟེན་ནོ་བསམས་པ་ཙམ་གྱིས་ནི་བསྡམ་བྱའི་ཉེས་བྱས་དང༌། བསམ་པ་དེའི་སྟེང་དུ་སྦྱོར་བ་དེ་གཉེར་ཞིང་ཕམ་པ་དངོས་སུ་མ་གྱུར་པ་ཚུན་ཆོད་ལ་སྦྱོར་ལྟུང་ཞེས་དང༌། སྨྱོན་པ་ལ་ནི་ལྟུང་བ་མེད་པ་སྟེ། དེས་ཐམས་ཅད་ལ་འགྲེ། རྣམ་གཞག་ཕྲ་ཞིབ་མང་ཡང་གཙོ་ཆེ་བ་ནི་དེ་དག་གོ། ། བ༢ གཉིས་པ་[ལྷག་མའི་སྡེ་]ནི། ཁུ་བ་འབྱིན་རེག་འཁྲིག་ཚིག་བསྙེན་བཀུར་བསྔགས། ། སྨྱན་བྱེད་ཁང་པ་ཁང་ཆེན་གཞི་མེད་དང༌། ། བག་ཙམ་གཞི་བརྗོད་དབྱེན་དང་དེ་རྗེས་ཕྱོགས། ། སུན་འབྱིན་བཀའ་བློ་མི་བདེ་ལྷག་མའི་སྡེ། ། གང་སྤྱད་སྡོམ་པའི་ལྷག་ཙམ་ལུས་པར་འདོད། ། དགེ་འདུན་ལྷག་མའི་སྡེ་ལ་བཅུ་གསུམ་ཡོད་པའི། ཁུ་བ་འབྱིན་པའི་ལྷག་མ་ནི། གཞན་གྱི་ཁ། བཤང་ལམ། ཟག་བྱེད་གསུམ་གང་རུང་མ་ཡིན་པའི་ལུས་ཀྱི་ཆ་ཤས་སམ། རང་གི་སོར་མོ་ལྟ་བུས་ཁུ་བ་འབྱིན་པའོ། ། རེག་པའམ་འཛིན་པའི་ལྷག་མ་ནི། ཆགས་(༢༩བ)སེམས་ཀྱིས་བུད་མེད་ཀྱི་ཤ་རྗེན་པ་ལ་རེག་པའོ། ། འཁྲིག་ཚིག་སྨྲ་བའི་ལྷག་མ་ནི། ཆགས་སེམས་ཀྱིས་ཀུན་ནས་བསླངས་ཏེ་བུད་མེད་ལ་འཁྲིག་ཚིག་སོགས་བཙོག་གཏམ་སྣ་ཚོགས་སྨྲ་བའོ། ། བསྙེན་བཀུར་བསྔགས་པའི་ལྷག་མ་ནི། ཆགས་སེམས་ཀྱིས་བུད་མེད་ལ་འཁྲིག་པས་བསྙེན་བཀུར་ན་ལེགས་སོ་ཞེས་བསྔགས་པ་བརྗོད་པའོ། ། སྨྱན་བྱེད་པའི་ལྷག་མ་ནི། འཕྲིན་ལན་གསུམ་བསྐྱལ་བའི་སྒོ་ནས་སྔར་མི་མཐུན་པའི་སྐྱེས་པ་དང་བུད་མེད་འཁྲིག་པ་བསྟེན་པ་ལ་མཐུན་པར་སྦྱར་བའོ། ། འདི་ནི་རང་གིས་དངོས་སུ་མ་བྱས་པར་གཞན་ལ་བྱེད་དུ་བཅུག་ཀྱང་རུང་སྟེ། ཇི་སྐད་དུ། རང་ངམ་གཞན་བྱེད་འཇུག་ཀྱང་རུང༌། ། བུད་མེད་སྐྱེས་པ་ཕྲད་ན་ནི། ། དགེ་འདུན་ལྷག་མའི་རལ་གྲི་ཡིས། ། རང་གི་མགོ་ནི་གཅོད་པར་བྱེད། ། ཅེས་སོ། ། ཁང་པའི་ལྷག་མ་ནི། གཞི་མ་དག་པའི་སར་རང་དོན་དུ་ཚད་ལས་འདས་པའི་ཁང་པ་བརྩིགས་པའོ། ། ཁང་ཆེན་གྱི་ལྷག་མ་ནི། གཞི་དང་དངོས་པོ་མ་དག་པས་དགེ་སློང་བཞི་ཡན་ཆད་ཀྱི་དོན་དུ་ཁང་པ་ཆེན་པོ་བརྩིགས་པའོ། ། ཁང་པའི་ཚད་ནི། ལྡང་བ་ན་ལག་མི་འཐོགས་པ། ཉལ་ན་རྐང་ལག་བརྐྱང་བསྐུམ་མི་འཐོགས་པ། འགྲོ་ན་ཕྱོགས་རེར་གོམ་པ་གསུམ་གསུམ་བགྲོད་ཐུབ་པ། སྡོད་ན་སྐྱིལ་ཀྲུང་བཅའ་བ་ལ་མི་གནོད་པའོ། ། ལྷག་པ་ནི། སྲིད་དུ་མིའི་ཁྲུ་བཅོ་བརྒྱད་དང་ཞེང་དུ་ཁྲུ་ཕྱེད་དང་བཅུ་གཅིག་གི་ཚད་ལས་འདས་པའོ། ། གཞི་མེད་ཀྱི་ལྷག་མ་ནི། དགེ་སློང་གཞན་ལ་ཕམ་པའི་མཐོང་ཐོས་དོགས་གསུམ་མེད་བཞིན་དུ་སྒྲོ་བཏགས་ནས་སྐུར་པ་བཏབ་པའོ། ། བག་ཙམ་གྱི་ལྷག་མ་ནི། དགེ་སློང་གཞན་ལ་སྐུར་པ་འདེབས་པའི་གཞི་བག་ཙམ་ཡོད་པ་རྒྱུ་མཚན་དུ་བྱས་ནས་ཕམ་པའི་སྐུར་འདེབས་བྱས་པའོ། ། དབྱེན་བྱེད་པའི་ལྷག་མ་ནི། དགེ་འདུན་གྱི་དབྱེན་གྱི་གཞི་ལ་ཞུགས་པ་ལ། དགེ་སློང་གཞན་གྱིས་ལན་གསུམ་བཟློག་ཀྱང་མི་ཉན་པའོ། ། དེ་རྗེས་ཕྱོགས་ཀྱི་ལྷག་མ་ནི། དགེ་འདུན་གྱི་དབྱེན་བྱེད་པ་(༣༠ན)དེའི་གྲོགས་དགེ་སློང་གཞན་གྱིས་བྱེད་པ་ལ་ལན་གསུམ་གྱི་བར་དུ་བཟློག་ཀྱང་མི་ཉན་པའོ། ། ཁྱིམ་སུན་འབྱིན་པའི་ལྷག་མ་ནི། སྤྱོད་པ་ངན་པས་ཁྱིམ་བདག་དགེ་འདུན་ལ་དད་པ་བཟློག་པར་བྱས་པ་ན། དེའི་ཉེས་པས་རང་བསྐྲད་པ་ན་སྐྲོད་པ་པོའི་དགེ་འདུན་ལ་སྐུར་པ་འདེབས་ཏེ། གཞན་གྱིས་བཟློག་ཀྱང་མི་ཉན་པའོ། ། བཀའ་བློ་མི་བདེ་བའི་དགེ་འདུན་ལྷག་མ་ནི། རང་ཉིད་ལ་ལྟུང་བ་བྱུང་བ་ལ་གཞན་གྱིས་གླེང་བ་ན་དང་དུ་མི་ལེན་པས་བཀའ་བློ་མི་བདེ་བ་སྟེ་གཞན་གྱིས་བཟློག་ཀྱང་མི་ཉན་པར་བློ་མི་བདེ་བར་བཅོས་པའོ། ། བཅུ་གསུམ་པོ་དེ་དག་ནི་དགེ་འདུན་ལྷག་མའི་སྡེ་ཞེས་བྱ་སྟེ། གསོ་བ་དགེ་འདུན་ལ་རགས་ལས་ཤིང་སྡོམ་པ་རྣམ་དག་གི་ལྷག་མ་ཙམ་ལུས་པས་ན་དེ་སྐད་དུ་གྲགས་སོ། ། འཕྲོས་དོན་རྩ་བའི་མདོར། དབེན་པ་སྐྱབས་ཡོད་འདུག་པའོ། །ཞེས་མ་ངེས་པ་གཉིས་གསུངས་ཏེ། ཁྲིམས་གྲོགས་མེད་པའི་དབེན་པར་སྒྲིབ་བྱེད་ཀྱི་སྐྱབས་ཡོད་པའི་གནས་སུ་དགེ་སློང་དང་བུད་མེད་ལྷན་ཅིག་ཏུ་འདུག་པའི་ཚེ། གནས་དེ་མི་ཚངས་སྤྱོད་བྱར་རུང་མི་རུང་གི་ཁྱད་པར་ལས། དགེ་སློང་དེ་ལ་ཕམ་ལྷག་ལྟུང་བྱེད་གསུམ་གང་རུང་ངམ། ལྷག་མ་དང་ལྟུང་བྱེད་གཉིས་གང་བྱུང་མ་ངེས་པའམ་དངོས་པོ་ལ་མཐའ་གང་དུ་འགྱུར་མ་ངེས་པའོ། ། བ༣ གསུམ་པ་[ལྟུང་བྱེད་ཀྱི་སྡེ་]ལ་གཉིས། མ༡ སྤང་བའི་ལྟུང་བ། མ༢ ལྟུང་བྱེད་འབའ་ཞིག་པའོ། ། མ༡ དང་པོ་ལ། བཅུ་ཚན་གསུམ་གྱི། ཙ༡ བཅུ་ཚན་དང་པོ་ནི། འཆང་འབྲལ་འཇོག་དང་འཁྲུར་འཇུག་ལེན་དང་སློང༌། ། ཚད་དང་རིན་ཐང་སོར་སྤགས་བསྐུལ་བ་ལྷག ། དེ་ལ་གོས་ལྷག་འཆང་བའི་སྤང་བ་ནི། ཆོས་གོས་ཀྱི་རྒྱུར་མ་བསྔོས་པའི་ཁྲུ་ཚད་དུ་ལོངས་པ་ཡན་ཆད་ཀྱི་གོས་ལྷག་པོ་རང་ཉིད་དབང་བ་བྱིན་གྱིས་མ་བརླབས་པར་ཞག་བཅུ་མ་རྫོགས་ཀྱི་བར་དུ་འཇོག་པའོ། ། འབྲལ་བའི་སྤང་བ་ནི། ཆོས་གོས་རྣམ་གསུམ་དང་ཉིན་ཞག་ཕྲུགས་གཅིག་གི་བར་དུ་འབྲལ་བའོ། ། ཟླ་འཇོག་གི་སྤང་བ་ནི། ཆོས་གོས་གསུམ་གང་རུང་མེད་པས་ཆོས་གོས་ཀྱི་རྒྱུར་བསྔོས་པ་(༣༠བ)ཁྲུ་ཚད་དུ་ལོངས་ཤིང་འཁོར་གསུམ་མི་ཁེབས་པའི་གོས་བྱིན་གྱིས་མ་བརླབས་པར་ཟླ་བ་གཅིག་གི་བར་དུ་འཆང་བའོ།། འཁོར་གསུམ་ནི། ལྟེ་བའི་འཁོར་ལོ། པུས་མོའི་འཁོར་ལོ་གཉིས་དང་བཅས་པའོ། ། གོས་བྱིན་གྱིས་མ་བརླབས་པར་ཞག་བཅུ་འདས་པའི་བཅུ་གཅིག་གི་སྐྱ་རེངས་ཤར་བའི་དུས་གོས་དེ་ལ་བརྟེན་པའི་ཞག་བཅུ་འཆང་བའི་ལྟུང་བ་འབྱུང་བར་མ་ཟད་དེའི་རྗེས་སུ་རྙེད་པའི་ཞག་བཅུ་མ་སོང་བ་ཞིག་ལ་ཡང་ཤན་སྟོབས་ཀྱིས་ཞག་བཅུ་འཆང་བའི་ལྟུང་བ་འབྱུང་བ་དང༌། ཐོག་མར་ཟླ་འཇོག་གི་ལྟུང་བ་འབྱུང་བའི་གོས་ཞིག་རྙེད་པའི་རྗེས་སུ་ཆོས་གོས་ཡོངས་རྫོགས་རྙེད་ན་ཞག་བཅུ་གཅིག་གི་སྐྱ་རེངས་ཤར་བའི་ཚེ། སྔ་མས་ཞག་བཅུ་འཆང་བའི་ལྟུང་བ་བསྐྱེད་ནུས་པ་སོགས་ཤན་གྱི་སྐོར་རྣམ་གྲངས་མང་ཞིང༌། གོས་ལ་བཤད་པ་འདིས་ལྷུང་བཟེད། སྨན་ལྟུང་བའི་ཤན་རྣམས་ལའང་རིགས་འགྲེ་བར་བྱའོ། ། འབྲལ་སྤང་སྐབས་མཚམས་ཐ་དད་དང༌། གནང་བ། བྱིན་རླབས་སོགས་ཀྱང་གལ་ཆེ་བས་གཞན་དུ་བལྟ་བར་བྱའོ། ། ཆོས་གོས་འཁྲུར་འཇུག་གི་སྤང་བ་ནི། རང་གི་ཉེ་དུ་མ་ཡིན་པའི་དགེ་སློང་མ་ལ་གོས་རྙིང་པ་འཁྲུར་བཅུག་པའོ།། འདིར་ཉེ་དུ་ཞེས་པ་ནི། ཕ་མ་གང་རུང་གི་རྒྱུད་མི་ཚིགས་