Tibetan
བདུན་ཚུན་ཆད་དོ། ། གོས་ལེན་པའི་སྤང་བ་ནི། རང་ལ་ཆོས་གོས་རྣམ་གསུམ་ཡོད་བཞིན་དུ་འཁོར་གསུམ་ཁེབས་པའི་ཚད་དུ་ལོངས་པའི་གོས་ཉེ་དུ་མ་ཡིན་པའི་དགེ་སློང་མ་ལས་བླངས་པའོ། ། སློང་བའི་སྤང་བ་ནི། ཉེ་དུ་མ་ཡིན་པའི་ཁྱིམ་པ་ལ་བཤད་མ་ཐག་པ་ལྟར་བསླངས་པའོ། ། སློང་བ་རིགས་པ་སློང་བའི་སྤང་བ་ནི། ཆོས་གོས་རྣམ་གསུམ་མེད་པའི་དགེ་སློང་གིས་ཉེ་དུ་མ་ཡིན་པའི་ཁྱིམ་པ་ལ་སྟོད་གཡོགས་སྨད་གཡོགས་ཟུང་གཅིག་གི་ཚད་ལས་ལྷག་པ་བསླངས་པའོ། ། སྤགས་པ་སློང་བའི་སྤང་བ་ནི། ཁྱིམ་པ་ཉེ་དུ་མ་ཡིན་པས་བློས་གང་སྤོགས་ཀྱིས་སྦྱིན་པར་རྩོམ་པའི་ཚེ་དེ་ལས་ལྷག་པའི་རིན་ཐང་སོགས་བཟང་བ་ཞིག་དགོས་ཞེས་བསླངས་པ་ལྟ་བུའོ། །(༣༡ན) སོ་སོ་ནས་སྤགས་པ་སློང་བའི་སྤང་བ་ནི། ཁྱིམ་གཅིག་ནས་ཐུན་མོང་དུ་ཕུལ་བ་དང་ཕོ་མོ་གཉིས་སོ་སོར་ཕུལ་བའི་ཁྱད་པར་ཙམ་མ་གཏོགས་འདྲའོ། ། བསྐུལ་བའི་སྤང་བ་ནི། གོས་ཉོ་བའི་རིན་གྱི་རིན་པོ་ཆེ་ཞལ་ཏ་པ་ལ་གཏད་ནས་ལན་གསུམ་གྱི་བར་དུ་བསྐུལ་བ་དང་ལན་གསུམ་གྱི་བར་དུ་མཐོང་སར་བསྡད་པ་ལས་ལྷག་པའི་བསྐུལ་མས་གོས་བླངས་པའོ། ། ཙ༢ བཅུ་ཚན་གཉིས་པ་ནི། སྲིན་བལ་བལ་ནག་ཆ་གཉིས་ལོ་དྲུག་དང༌། ། མཐོ་གང་མི་ལྷན་ཁུར་རྨེལ་གསེར་དངུལ་རེག ། བུན་སྐྱེད་ཉོ་ཚོང༌། ཞེས་པ་སྟེ། སྲིན་བལ་གྱི་སྟན་གྱི་སྤང་བ་ནི། རིན་ཐང་ཅན་གྱི་དངོས་པོ་སྲིན་བལ་ལྟ་བུ་ལས་གྲུབ་པའི་འཁོར་གསུམ་ཁེབས་པའི་མཐའི་ཚད་དུ་ལོངས་པའི་སྟན་བྱེད་པའོ། ། བལ་ནག་གི་སྟན་གྱི་སྤང་བ་ནི། བལ་ནག་པོ་འབའ་ཞིག་ལས་གྲུབ་པའི་སྟན་ཚད་གོང་དང་འདྲ་བའོ། ། ཆ་གཉིས་བསྲེས་པའི་སྤང་བ་ནི། སྟན་ལ་ཆ་བཞིར་བགོས་པའི་ཆ་གཉིས་ལས་ལྷག་པ་བལ་ནག་གིས་བྱས་པའོ། ། ལོ་དྲུག་གི་སྤང་བ་ནི། ལོ་དྲུག་གི་བར་དུ་ལོངས་སྤྱད་རྒྱུའི་རང་ལ་སྟན་ཡོད་བཞིན་དུ་སྟན་གསར་པ་ཆེད་དུ་བྱས་པའོ། ། མཐོ་གང་གི་སྤང་བ་ནི། གདིང་བ་གསར་པ་དྲུབ་པའི་ཚེ། རྙིང་པ་ནས་བདེ་བར་གཤེགས་པའི་མཐོ་གང་གི་ཚད་དེ་མིའི་ཁྲུ་ཕྱེད་དོ་མ་གླན་པར་ལོངས་སྤྱད་པའོ། ། ལམ་དུ་བལ་ཐོགས་པའི་སྤང་བ་ནི། ཆགས་སེམས་ཀྱིས་ཀུན་ནས་བསླང་སྟེ་བལ་ལ་སོགས་པའི་ཁུར་ཆེན་པོ་ཁུར་ནས་ཉི་མ་གཅིག་གི་ནང་དུ་རྒྱང་གྲགས་ལས་འདས་པར་ཕྱིན་པའོ། ། བལ་འཁྲུར་འཇུག་པའི་སྤང་བ་ནི། རང་གི་ཉེ་དུ་མ་ཡིན་པའི་དགེ་སློང་མ་ལ་བལ་འཁྲུད་པ་དང་རྨེལ་བ་དང་འཚེད་དུ་འཇུག་པའོ། ། རིན་པོ་ཆེ་ལ་རེག་པའི་སྤང་བ་ནི། ཆགས་སེམས་ཀྱི་སྒོ་ནས་རུང་བ་མ་བྱས་པའི་གསེར་ལ་སོགས་པའི་རིན་པོ་ཆེ་ལ་རེག་གམ་རེག་ཏུ་བཅུག་ནས་བདག་གིར་བྱས་པའོ། ། མངོན་ཚན་ཅན་གྱི་སྤང་བ་ནི། ཆགས་སེམས་ཀྱིས་ཉེ་དུ་མ་ཡིན་པའི་ཁྱིམ་པ་ལ་(༣༡བ)གསེར་ལ་སོགས་པ་བུན་སྐྱེད་དམ་ཁེ་སྤོགས་བྱེད་དུ་བཅུག་པའོ། ། ཉོ་ཚོང་བྱེད་པའི་སྤང་བ་ནི། རིན་པོ་ཆེ་མ་ཡིན་པའི་དངོས་པོ་འབྲུ་སོགས་གཞན་ལ་ཁེ་སྤོགས་བྱེད་པ་སྟེ་སྔ་ཕྱི་དེ་གཉིས་སྐྱེད་ཐོབ་པ་ན་དངོས་གཞིར་འགྱུར་རོ། ། ཙ༣ བཅུ་ཚན་གསུམ་པ་ནི། ལྷུང་བཟེད་ཐ་ག་གཉིས། ། བྱིན་འཕྲོག་གཏད་འབྱུང་འབྲལ་སྤང་རས་ཆེན་དང༌། ། བསྔོས་བསྒྱུར་གསོག་འཇོག་སྤང་འབྲལ་ལྟུང་བའི་སྡེ། ། ལྷུང་བཟེད་སྤང་ལྟུང་གཉིས་ལས། དང་པོ་ལྷུང་བཟེད་འཆང་བའི་སྤང་བ་ནི། བྱིན་གྱིས་མ་བརླབས་པའི་ལྷུང་བཟེད་ཞག་བཅུ་འཆང་བའོ། ། ལྷུང་བཟེད་ལྷག་པོ་འཚོལ་བའི་སྤང་བ་ནི། རང་ལ་ལྷུང་བཟེད་ཚད་ལྡན་ཡོད་བཞིན་དུ་ཁྱིམ་པ་ཉེ་དུ་མ་ཡིན་པ་ལས་ལྷུང་བཟེད་བཙལ་ནས་ཐོབ་པའོ། ། ཐ་ག་གཉིས་ལས་ཐགས་འཐག་ཏུ་འཇུག་པའི་སྤང་བ་ནི། ཁྱིམ་པ་ཉེ་དུ་མ་ཡིན་པ་ལ་གླ་རྔན་མ་བྱིན་པར་ཐགས་འཐག་ཏུ་བཅུག་པའོ། ། འཐག་པ་བསྐྱེད་པའི་སྤང་བ་ནི། ཉེ་དུ་མ་ཡིན་པའི་ཁྱིམ་པས་ཐག་བཏགས་ནས་རང་ལ་སྟེར་བར་ཁས་བླངས་པ་ན་ཐག་མཁན་ལ་གླ་རྔན་བྱིན་ནས་སྦྱིན་བདག་གི་བློ་དང་མི་འཚམས་པའི་བཟང་རིན་ཆེན་པོར་འཐག་ཏུ་བཅུག་པའོ། ། བྱིན་འཕྲོག་གི་སྤང་བ་ནི། དགེ་སློང་གཞན་ལ་ཡོ་བྱད་བྱིན་པ་སླར་ཕྲོགས་པའོ། ། གཏད་པ་ལས་བྱུང་བའི་སྤང་བ་ནི། སྦྱིན་བདག་གིས་གཏད་པའི་དབྱར་གྱི་རྙེད་པ་དབྱར་མཚམས་ཀྱི་ནང་དུ་ལོངས་སྤྱད་པའོ། ། དགོན་པའི་འབྲལ་བའི་སྤང་བ་ནི། དགེ་སློང་དགོན་པ་བས་ཆོས་གོས་དང་བྲལ་ནས་ཞག་བདུན་ཕན་ཆད་འདས་པའོ། ། རས་ཆེན་གྱི་སྤང་བ་ནི། དབྱར་ཁས་ལེན་གྱི་སྔ་རོལ་ཟླ་གཅིག་ཡན་དང༌། དགག་དབྱེ་གྲོལ་ནས་ཟླ་ཕྱེད་ཕན་འདས་བར་རས་ཆེན་བཙལ་བ་དང་བཅངས་པའོ། ། བསྔོས་པ་གཞན་དུ་བསྒྱུར་བའི་སྤང་བ་ནི། དགེ་འདུན་ལ་བསྔོས་པའི་ཡོ་བྱད་རང་ཉིད་ལ་བསྒྱུར་བའོ། །གསོག་འཇོག་གི་སྤང་བ་ནི། སྨན་གསུམ་པོ་གང་རུང་དུས་ལས་འདས་པར་བཅངས་པའོ། །(༣༢ན) འདི་ལ་སྤང་ལྟུང་སུམ་ཅུ་ཞེས་པའི་དོན་ནི། གང་ལས་ལྟུང་བ་བྱུང་བའི་རྒྱུར་གྱུར་པའི་རྫས་དེ་ཞག་གཅིག་གི་སྔོན་དུ་སྤང་བའི་འབྲལ་བ་སྔོན་དུ་བཏང་ནས་གདོད་བཤགས་པར་བྱ་དགོས་པའི་ལྟུང་བ་ཡིན་པས་སོ། ། དེ་ལ་སྤང་ལྟུང་གང་རུང་ཞིག་སྔོན་དུ་བྱུང་བའི་སྟེང་དུ་འཚོ་བའི་ཡོ་བྱད་གང་བདག་གིར་བྱས་ཀྱང་ལྟུང་བ་དེ་བཅོས་ཚེ་ལྟུང་བ་འབྱུང་བའི་རྫས་དང༌། ཡོ་བྱད་རྟིང་མ་དེ་རྣམས་ཀྱང་མཉམ་དུ་སྤང་འབྲལ་ཞག་གཅིག་སྔོན་དུ་འགྲོ་དགོས་ཏེ། ལྟུང་བའི་ཤན་ཕྱི་མ་རྡེག་བྱེད་ཀྱིས་སྔ་མ་བརྡེག་བྱ་ལ་ཕོག་པས་སོ། ། མ༢ གཉིས་པ་ལྟུང་བྱེད་འབའ་ཞིག་པ་ལ། བཅུ་ཚན་དགུ་ཡོད་པའི། ཙ༡ དང་པོ་ནི། རྫུན་སྐྱོན་ཕྲ་མ་སྐྱོ་སྔོགས་སྟོན་དང་འདོན། ། བརྗོད་སྨྲ་སྐུར་འདེབས་ཁྱད་གསོད། ཅེས་པ་སྟེ། རྫུན་སྨྲ་བའི་ལྟུང་བྱེད་ནི། ཕམ་ལྷག་སྦོམ་པོ་ཉེས་བྱས་བཞིའི་ནང་ཚན་གྱི་རྫུན་མ་ཡིན་པའི་ཤེས་བཞིན་དུ་རྫུན་སྨྲ་བའོ། ། སྐྱོན་བརྗོད་པའི་ལྟུང་བྱེད་ནི། དགེ་སློང་རིགས་རུས་ངན་པ་དང་དབང་པོ་མ་ཚང་བ་སོགས་ལ་དེའི་སྐྱོན་བརྗོད་པའོ། ། ཕྲ་མ་བྱེད་པའི་ལྟུང་བྱེད་ནི། བསམ་བཞིན་དུ་དགེ་སློང་གཞན་ཕན་ཚུན་དུ་ཕྲ་མ་བཅུག་ནས་ཕྱེ་བའོ། ། སྐྱོ་སྔོགས་བྱེད་པའི་ལྟུང་བྱེད་ནི། དགེ་སློང་གཞན་དག་གི་རྩོད་པ་ཞི་བར་བྱས་པ་སྐྱོ་སྔོགས་ཀྱི་སྒོ་ནས་སླར་རྩོད་པ་སློང་བའོ། ། བུད་མེད་ལ་ཆོས་སྟོན་པའི་ལྟུང་བྱེད་ནི། སྐྱེས་པ་གཞན་མེད་པའི་སར་བུད་མེད་ལ་ཚིག་ལྔ་དྲུག་ལས་མང་བའི་ཆོས་སྟོན་པའོ། ། བསྙེན་པར་མ་རྫོགས་པ་དང་ལྷན་ཅིག་འདོན་པའི་ལྟུང་བྱེད་ནི། རྒོད་བག་གི་བསམ་པའི་སྒོ་ནས་བསྙེན་པར་མ་རྫོགས་པ་དང་ལྷན་ཅིག་ཏུ་ཆོས་ཀྱི་ཚིག་གདངས་སྣ་ཚོགས་ཀྱིས་འདོན་པའོ། ། གནས་ངན་ལེན་བརྗོད་པའི་ལྟུང་བྱེད་ནི། ཕམ་ལྷག་གི་རིགས་བྱུང་བ་ལ་རང་ཉིད་དེའི་ལྟུང་བ་གླེང་བར་མ་བསྐོས་བཞིན་དུ་བསྙེན་པར་མ་རྫོགས་པ་ལ་སྨྲ་བར་བྱེད་པའོ། ། མི་ཆོས་བླ་མ་བདེན་པར་སྨྲ་བའི་ལྟུང་བྱེད་ནི། རང་ཉིད་ཀྱིས་མི་ཆོས་བླ་མའི་ཡོན་ཏན་(༣༢བ)ཐོབ་པ་དེ་དགོས་པ་ཁྱད་པར་ཅན་མེད་བཞིན་དུ་ཡུལ་བསྙེན་པར་མ་རྫོགས་པ་ལ་སྨྲ་བའོ། ། བཤེས་ངོར་བྱེད་ཅེས་སྐུར་པ་འདེབས་པའི་ལྟུང་བྱེད་ནི། དགེ་འདུན་སྤྱིའི་བྱ་བ་བྱེད་པའི་དགེ་སློང་ལ་སྤྱི་རྫས་ཀྱི་སྟེང་ནས་འོས་པ་བྱིན་པ་ལ་མ་བཟོད་པར་དགེ་འདུན་ལ་སྐུར་པ་འདེབས་པའོ། ། ཁྱད་གསོད་ཀྱི་ལྟུང་བྱེད་ནི། བསླབ་པའི་གཞི་ཕྲ་མོ་འདི་རྣམས་ཀྱིས་ཅི་བྱ་ཞེས་ཁྱད་གསོད་ཀྱི་ཚིག་སྨྲ་བའོ།། ཙ༢ བཅུ་ཚན་གཉིས་པ་ནི། སྐྱེ་འཇིག་འཕྱ། ། རྣར་གཟོན་མལ་གདིང་སྐྲོད་གནོན་དབུག་འདེབས་བརྩིགས། ། ས་བོན་དང་སྐྱེ་བ་འཇིག་པའི་ལྟུང་བྱེད་ནི། རྩྭ་སྔོ་ལྗོན་ཤིང་གཅོད་པ་དང༌། མེ་སོགས་ཀྱིས་རུང་བ་མ་བྱས་པའི་ས་བོན་གྱི་རིགས་ཉམས་པར་བྱས་པའོ། ། འཕྱ་བའི་ལྟུང་བྱེད་ནི། དགེ་འདུན་གྱི་ཞལ་ཏ་ཆོས་དང་མཐུན་པར་བྱེད་པའི་དགེ་སློང་ལ་དངོས་སུ་འཕྱ་བའམ་གཞན་ལ་སྨོད་པའི་ཟོལ་གྱིས་འཕྱ་བའོ། ། བསྒོ་བ་རྣར་གཟོན་པའི་ལྟུང་བྱེད་ནི། དགེ་འདུན་གྱིས་ཕྱིར་བཅོས་ལ་དགོད་པའི་ཆེད་དུ་ལྟུང་བ་གླེང་བ་ན་ཁས་མི་ལེན་པར་ཐབས་སྣ་ཚོགས་ཀྱིས་བསྒྱུར་བའོ། ། གནས་མལ་ལས་གྱུར་པའི་ལྟུང་བྱེད་ནི། ཁྲི་ལ་སོགས་པ་དགེ་འདུན་གྱི་གནས་མལ་རང་གིས་ལོངས་སྤྱོད་པའི་མཐར་ཚག་མ་བྱས་པར་ཉི་མ་རླུང་ཆར་པ་སོགས་ཀྱིས་ཆུད་ཟོས་སུ་འཇུག་པའོ། ། གདིང་བ་ལས་གྱུར་པའི་ལྟུང་བྱེད་ནི། གཙུག་ལག་ཁང་དུ་རང་གི་གདིང་བའི་འོག་ཏུ་བཏིང་བའི་རྩྭ་དང་ལོ་མ་ལ་སོགས་པ་རྗེས་སུ་མ་བསྡུས་པའོ། ། སྐྲོད་པའི་ལྟུང་བྱེད་ནི། ཞེ་སྡང་གི་སེམས་ཀྱིས་དགེ་སློང་གཞན་གནས་ཁང་ནས་ཕྱི་རོལ་ཏུ་འདོན་པའོ། ། ཕྱིས་གནོན་བྱེད་པའི་ལྟུང་བྱེད་ནི། གཙུག་ལག་ཁང་ལ་སྔར་ཞུགས་པའི་དགེ་སློང་ལ་ལུས་ངག་གང་རུང་གིས་གནོད་པ་རྩོམ་པའམ། རང་གི་ལུས་ཀྱིས་དགེ་སློང་གཞན་བརྫིས་ཤིང་གནོན་པའོ། ། རྩ་བ་འབྱུང་བའམ་དབུག་པའི་ལྟུང་བྱེད་ནི། །གཙུག་ལག་ཁང་གི་ཐོག་སྙི་བ་ལ་ཁྲི་རྐང་རྣོན་པོའི་ལྗིད་བཀལ་(༣༣ན)ནས་བུག་པ་ཕུག་པའོ། ། སྲོག་ཆགས་དང་བཅས་པས་འདེབས་པའི་ལྟུང་བྱེད་ནི། གཞན་དོན་དུ་སྲོག་ཆགས་ཡོད་པ་ཤེས་བཞིན་དུ་ཆུ་ལ་རྩྭ་དང་རྩྭ་ལ་ཆུ་སོགས་འདེབས་ནས་ལོངས་སྤྱོད་པའོ། ། རིམ་པ་ལྷག་པ་བརྩིག་པའི་ལྟུང་བྱེད་ནི། གཞི་མི་བརྟན་སར་རམ་ཆར་ཆུ་བྱུང་བའི་དུས་སུ་གནོད་པ་སྲུང་བའི་ཐབས་མ་བྱས་པར། ཉི་མ་གཅིག་ལ་གཙུག་ལག་ཁང་རྩིག་པ་རིམ་པ་གསུམ་ལས་ལྷག་པ་བརྩིགས་པའོ། ། ཙ༣ བཅུ་ཚན་གསུམ་པ་ནི། མ་བསྐོས་ཉི་ནུབ་ཕྱིར་སྟོན་ཆོས་གོས་གཉིས། ། མཉམ་འགྲོ་གྲུར་འཇུག་འདུག་འགྲེང་སྦྱོར་བཅུག་དང༌། ། དགེ་སློང་མ་ལ་ཆོས་སྟོན་པའི་ལྟུང་བྱེད་ནི། དགེ་སློང་མའི་སྟོན་པར་མ་བསྐོས་བཞིན་དུ་ཆོས་སྟོན་པའོ། ཉི་མ་ནུབ་ཀྱི་བར་དུ་ཆོས་སྟོན་པའི་ལྟུང་བྱེད་ནི། དགེ་སློང་མའི་སྟོན་པ་ཡིན་ཡང་འཇིགས་པ་ཡོད་པའི་སར་ཉི་མ་ནུབ་ནས་ཆོས་སྟོན་པའོ། ། ཟས་ཅུང་ཟད་ཙམ་གྱི་ཕྱིར་དུ་ཆོས་སྟོན་ནོ་ཟེར་བའི་ལྟུང་བྱེད་ནི། ཕྲག་དོག་གི་སྒོ་ནས་དགེ་སློང་མའི་སྟོན་པར་བསྐོས་པའི་དགེ་སློང་ལ་བཟའ་བཏུང་ལྟ་བུ་གཞི་གཅིག་ལ་བརྟེན་ནས་སྐུར་པ་འདེབས་པའོ། ། ཆོས་གོས་གཉིས་ལས་གོས་བྱིན་པའི་ལྟུང་བྱེད་ནི། ཉེ་དུ་མ་ཡིན་པའི་དགེ་སློང་མར་གོས་བྱིན་པའོ། ། གོས་བྱེད་པའི་ལྟུང་བྱེད་ནི། ཉེ་དུ་མ་ཡིན་པའི་དགེ་སློང་མའི་གོས་འཚེམ་པའོ། ། ལམ་དུ་འགྲོ་བའི་ལྟུང་བྱེད་ནི། དགེ་སློང་མ་དང་ལྷན་ཅིག་རྒྱང་གྲགས་ལས་འདའ་བར་བྱེད་པའོ། ། དགེ་སློང་མ་དང་ལྷན་ཅིག་གྲུར་འཇུག་པའི་ལྟུང་བྱེད་ནི། དགེ་སློང་མ་དང་ལྷན་ཅིག་གྲུར་ཞུགས་ཏེ་ཆུའི་རྒྱུན་ཕྱོགས་སམ་ལྡོག་ཕྱོགས་གང་རུང་ལ་རྒྱང་གྲགས་ཀྱི་བར་ཕྱིན་པའོ། ། དབེན་པ་སྐྱབས་ཡོད་དུ་འདུག་པའི་ལྟུང་བྱེད་ནི། ཉེ་དུ་མ་ཡིན་པའི་བུད་མེད་དང་ལྷན་ཅིག་དབེན་པ་སྐྱབས་ཡོད་དུ་སྡོད་པའོ། ། འགྲེང་བའི་ལྟུང་བྱེད་ནི། འགྲེང་བ་དང་སྡོད་པ་ཙམ་མ་གཏོགས་སྔར་ལྟར་རོ། ། ཟས་སྦྱོར་(༣༣བ)དུ་འཇུག་པའི་ལྟུང་བྱེད་ནི། ཉེ་དུ་མ་ཡིན་པའི་དགེ་སློང་མ་བརྒྱུད་ནས་ཁྱིམ་བདག་ལ་རང་གི་བཟའ་བཏུང་སྦྱོར་དུ་བཅུག་པའོ། ། ཙ༤ བཅུ་ཚན་བཞི་པ་ནི། ཡང་ཡང་འདུག་ཟ་ལྷག་ལེན་སྤངས་པ་སྟོབ། ། འདུས་དང་དུས་མིན་གསོག་འཇོག་མ་བྱིན་སློང༌། ། ཡང་ཡང་ཟ་བའི་ལྟུང་བྱེད་ནི། ཉེ་དུ་མ་ཡིན་པའི་ཁྱིམ་པ་ལ་དུས་རུང་གི་ཁ་ཟས་ཀྱི་བསོད་སྙོམས་ཉིན་གཅིག་ལ་གཉིས་གསུམ་བསླངས་པའོ། ། ཟས་ཟ་བའི་ལྟུང་བྱེད་ནི། མུ་སྟེགས་ཀྱི་རབ་བྱུང་ཡོད་པའི་ཁྱིམ་དུ་ཞག་གཅིག་ལས་ལྷག་པ་གནས་ཏེ་ཟ་བའོ།། ལྷག་པ་ལེན་པའི་ལྟུང་བྱེད་ནི། ཉེ་དུ་མ་ཡིན་པའི་ཁྱིམ་པ་ལ་དུས་གཅིག་ལ་ལྷུང་བཟེད་གསུམ་ལས་ལྷག་པ་ལེན་པའོ། ། སྤངས་པ་ཟ་བའི་ལྟུང་བྱེད་ནི། བྱིན་ལེན་བྱས་པའི་ཟས་བསམ་སྦྱོར་གྱིས་སྤངས་པ་སླར་ལྷག་པོ་མ་བྱས་པར་ཟ་བའོ། ། ཁ་ཟས་ཟོས་མ་ཟིན་པར་ལྡངས་ནའང་བརྩམས་ལྡངས་ཞེས་བྱ་བའི་ལྟུང་བའོ། ། སྤངས་པ་སྟོབ་པའི་ལྟུང་བྱེད་ནི། དགེ་སློང་གཞན་གྱིས་སྤངས་པའི་ཟས་ལྷག་པོ་མ་བྱས་བཞིན་དུ་བྱས་སོ་ཞེས་བསྟབས་ན་སྟོབ་པ་པོ་ལ་ལྟུང་བའོ། ། འདུས་ཤིང་ཟ་བའི་ལྟུང་བྱེད་ནི། མཚམས་ནང་དུ་བསམ་པ་མི་མཐུན་པས་ཀུན་ནས་བསླངས་ཏེ་ལོགས་སུ་འདུས་ཏེ་ཟ་བའོ། ། དུས་མ་ཡིན་པར་ཟ་བའི་ལྟུང་བྱེད་ནི། གླིང་འདིའི་ཉི་མ་ཕྱེད་ཡོལ་ནས་སང་གི་སྐྱ་རེངས་མ་ཤར་གྱི་བར་དུ་དུས་རུང་གི་སྨན་ཟ་བའོ། ། གསོག་འཇོག་བྱས་པ་ཟ་བའི་ལྟུང་བྱེད་ནི། སྨན་གསུམ་པོ་གང་རུང་ལོངས་སྤྱད་པའི་ལྷག་མ་དང་དུས་ལས་འདས་པར་གསོག་འཇོག་བྱས་ནས་ལོངས་སྤྱོད་པའོ། ། བྱིན་ལེན་མ་བྱས་པ་ཟ་བའི་ལྟུང་བྱེད་ནི། སྨན་བཞི་པོ་གང་རུང་བྱིན་ལེན་མ་བྱས་པར་ཟ་བའོ། ། ཟས་བསོད་པ་སློང་བའི་ལྟུང་བྱེད་ནི། ཉེ་དུ་མ་ཡིན་པའི་ཁྱིམ་པ་ལས་ཁ་ཟས་བཟང་པོ་ཅི་བདེར་མ་བསྟབས་ཀྱང་ཆོག་མི་ཤེས་པར་བསླངས་ཏེ་ཟོས་པའོ། ། ཙ༥ བཅུ་ཚན་ལྔ་པ་ནི། (༣༤ན) ཆུར་སྤྱོད་ཉལ་སར་འདུག་འགྲེང་གཅེར་བུར་སྦྱིན། ། དམག་ལ་ལྟ་གནས་བཤམས་དཀྲུགས་རྡེག་གཟས་འཆབ། ། སྲོག་ཆགས་དང་བཅས་པའི་ཆུ་ལ་ལོངས་སྤྱོད་པའི་ལྟུང་བྱེད་ནི། རང་དོན་དུ་སྲོག་ཆགས་གནས་པའི་ཆུ་ལ་ཁྲུས་དང་བཏུང་བ་སོགས་བྱེད་པ་དང་རྩྭ་ཤིང་ལ་ལོངས་སྤྱོད་པའོ། ། ཉལ་པོ་བྱེད་པའི་ཁྱིམ་དུ་གནས་པའི་ལྟུང་བྱེད་ནི། ཁྱིམ་པ་ཕོ་མོ་ཉལ་པོ་བྱེད་སར་འདུག་སྟེ་དེ་ལ་བར་དུ་གཅོད་པར་བྱེད་པའོ། ། ཉལ་པོ་བྱེད་པའི་ཁྱིམ་དུ་འགྲེང་བའི་ལྟུང་བྱེད་ནི། འདུག་པ་དང་འགྲེང་བའི་ཁྱད་པར་མ་གཏོགས་སྔར་ལྟར་རོ། ། གཅེར་བུ་པ་ལ་ཟས་སྦྱིན་པའི་ལྟུང་བྱེད་ནི། དགོས་པ་ཁྱད་པར་ཅན་མེད་པར་ཕྱི་རོལ་པ་ལ་གཏོགས་པའི་ཕོ་མོ་ལ་ཟས་སྟེར་བའོ། ། དམག་ལ་ལྟ་བའི་ལྟུང་བྱེད་ནི། མཚམས་ཀྱི་ཉེ་འཁོར་ལས་འདས་ཏེ་དམག་ལ་ལྟ་ཞིང་མཐོང་བའོ། ། དམག་གི་ནང་དུ་གནས་པའི་ལྟུང་བྱེད་ནི། དགོས་པ་ཁྱད་པར་ཅན་མེད་པར་དམག་གི་ནང་དུ་ཞག་གཅིག་ལས་འདས་པར་གནས་པའོ། ། བཤམས་པ་དཀྲུགས་པའི་ལྟུང་བྱེད་ནི། དགོས་པ་ཁྱད་པར་ཅན་མ་ཡིན་པར་དམག་གི་གོ་མཚོན་དཀྲུགས་ཤིང་རེག་པ་དང་དཔུང་གི་རུ་བཀོད་བྱས་པའོ། ། རྡེག་པའི་ལྟུང་བྱེད་ནི། དགེ་སློང་ལ་རང་གིས་རྡེག་གམ་གཞན་བརྡེག་ཏུ་འཇུག་པའོ། ། བརྡེག་པར་གཟས་པའི་ལྟུང་བྱེད་ནི། དགེ་སློང་ལ་བརྡེག་པར་བརྩམས་པའོ། ། གནས་ངན་ལེན་འཆབ་པའི་ལྟུང་བྱེད་ནི། དགོས་པ་ཁྱད་པར་ཅན་མ་ཡིན་པར་དགེ་སློང་གཞན་ལ་ཕམ་ལྷག་གི་ལྟུང་བ་བྱུང་བ་ཤེས་བཞིན་དུ་འཆབ་པའོ། ། ཙ༦ བཅུ་ཚན་དྲུག་པ་ནི། གཅོད་རེག་འདུན་བསྒྱུར་མ་རྫོགས་ལྟ་མི་འདོར། ། རྗེས་ཕྱོགས་བསྙིལ་སྡུད་གོས་གྱོན་སྨོས་རེག་ཁྲུས། ། ཟན་གཅོད་དུ་འཇུག་པའི་ལྟུང་བྱེད་ནི། གནོད་སེམས་ཀྱི་སྒོ་ནས་གྲོགས་དགེ་སློང་ལ་དུས་རུང་གི་ཟས་བཀག་པའོ། ། མེ་ལ་རེག་པའི་ལྟུང་བྱེད་ནི། དུས་བྱིན་གྱིས་མ་བརླབས་པ་དང་ན་བའི་དབང་གིས་མ་ཡིན་པར་མེ་ལ་རེག་པའོ། ། རེག་དགོས་ན་དུས་བྱིན་གྱིས་བརླབས་པ་ནི། ཆོས་ལྡན་གྱི་དོན་དཔེར་ན་དགེ་འདུན་སྤྱིའི་ལྷ་ཚོན་(༣༤བ)སོགས་ཀྱི་དོན་འདི་ལྟ་བུའི་ཚེ་སྟོན་པས་གནང་བ་ཡིན་སྙམ་དུ་དུས་དྲན་བྱས་ནས་རེག་གོ། ། མེ་མ་མུར་ལ་རེག་ན་ཉེས་བྱས་དང་མེ་ལྕེ་ལ་བུད་ཤིང་བཅུག་ན་དངོས་དང་སྐྲ་སོགས་གཞན་བཙུད་པ་ཉེས་བྱས་སོ། ། སྤྱིར་འདུལ་བ་ལུང་ལས་འདི་ལྟ་བུའི་བྱིན་རླབས་བཅུ་གཅིག་གསུངས་ཏེ། དེ་ཡང༌། གོས་དང་ལྷུང་བཟེད་རིན་པོ་ཆེ། ། ལྟུང་བ་གསོ་སྦྱོང་དབྱར་དང་ནི། ། དགག་དབྱེ་སྨན་དང་རུང་ཁང་དང༌། ། རྙེད་པ་དུས་ཀྱི་བྱིན་བརླབ་བོ། ། ཞེས་སོ། ། འདུན་པ་ཕྱིར་བསྒྱུར་བའི་ལྟུང་བྱེད་ནི། དགེ་འདུན་ལས་ལ་མི་མཐུན་པ་མེད་པར་བྱ་བའི་ཕྱིར་དུ་འདུན་པ་ཕུལ་བར་སླར་འདུན་པ་ཕྱིར་བྱིན་ཅིག་ཅེས་ལྡོག་ཏུ་བཅུག་པའོ། ། ནུབ་ལྷག་པོར་ཉལ་བའི་ལྟུང་བྱེད་ནི། བསྙེན་པར་མ་རྫོགས་པ་དང་ལྷན་ཅིག་ཏུ་མཚམས་ནང་གཅིག་ཏུ་ནུབ་གཉིས་ལས་ལྷག་པར་ཉལ་བའོ། ། སྡིག་ལྟ་མི་གཏོང་བའི་ལྟུང་བྱེད་ནི། སྟོན་པའི་གསུང་ལ་ཡིད་མི་ཆེས་པའི་སྡིག་ལྟ་སྐྱེས་པ་གཞན་གྱིས་བཟློག་པའི་མཐའ་ལ་མི་གཏོང་བའོ། ། སྤངས་པ་རྗེས་སུ་ཕྱོགས་པའི་ལྟུང་བྱེད་ནི། དགེ་འདུན་གྱི་གནས་ནས་ཕྱུང་བའི་དགེ་སློང་དང་ལྷན་ཅིག་སྤྱོད་ལམ་མཐུན་པའོ། ། དགེ་ཚུལ་བསྙིལ་བ་སྡུད་པའི་ལྟུང་བྱེད་ནི། དགེ་ཚུལ་སློང་མ་གཏོགས་སྔར་ལྟར་རོ། ། གོས་ཁ་མ་བསྒྱུར་བ་གྱོན་པའི་ལྟུང་བྱེད་ནི། རུང་བའི་ཚོན་གསུམ་གྱིས་ཁ་མ་བསྒྱུར་བའི་ཁྲུ་གང་དུ་ལོངས་པའི་གོས་གཞན་གྱི་གཡོགས་མེད་པར་གྱོན་པའོ། ། ལོངས་པ་སྟེ་རྒྱགས་པའི་གཞིར་གཏོགས་རིན་པོ་ཆེ་ལ་རེག་པའི་ལྟུང་བྱེད་ནི། རྒོད་བག་གི་བསམ་པས་རང་ལ་མི་དབང་བའི་ནོར་བུ་དང་མུ་ཏིག་སོགས་རིན་པོ་ཆེའམ། རིན་པོ་ཆེའི་མིང་གིས་སྨོས་པ། དུང༌། རྔ་བོ་ཆེ་རོལ་ཆ་མཚོན་ཆ་ལ་རེག་པའོ། ། འདི་ནི་རེག་པ་ཙམ་ལས་བདག་ཏུ་བཟུང་བ་མི་དགོས་ཤིང་རྒྱགས་པའི་བསམ་པས་རྒྱན་དང་བྱུགས་པ་གླུ་དང་རོལ་མོ་བསྒྲགས་པ་སོགས་ཀྱང་འདིའི་ཁོངས་སུ་གཏོགས་སོ། ། ཁྲུས་བྱེད་པའི་ལྟུང་བྱེད་ནི། ནད་པ་དང་ཚ་བའི་དུས་ཟླ་བ་གསུམ་མ་གཏོགས་ཁྲུས་སྔ་མ་ཟིན་ནས་(༣༥ན)ཟླ་བ་ཕྱེད་ཀྱི་སྔ་རོལ་དུ་ཁྲུས་བྱེད་པའོ། ། ཙ༧ བཅུ་ཚན་བདུན་པ་ནི། གསོད་འགྱོད་གཡའ་བསྒག་ཆུར་རྩེ་ལྷན་ཅིག་ཉལ། ། དངངས་སྦེད་ལོངས་སྤྱོད་སྐུར་འདེབས་བུད་མེད་འགྲོགས། ། དུད་འགྲོ་གསོད་པའི་ལྟུང་བྱེད་ནི། བསམ་བཞིན་དུ་དུད་གྲོ་ཆེ་ཕྲ་གསོད་པའོ། ། འགྱོད་པ་སྐྱེད་པའི་ལྟུང་བྱེད་ནི། བསྙེན་རྫོགས་ཀྱི་ཡོན་ཏན་ལ་སྨོད་པའམ་ཁྱོད་ལ་སྡོམ་པ་མ་སྐྱེས་ཞེས་སོགས་ཀྱི་སྒོ་ནས་དགེ་སློང་གཞན་ཡིད་མི་བདེ་