Tibetan
བྱང་ཆུབ་ཀྱི་སེམས་བརྟན་པོར་སྒོམ་པའི་སྒོ་ནས་བཤགས་པར་བྱ་བ་སྤྱོད་འཇུག་ལས་གསུངས་སོ། ། སློབ་དཔོན་ནག་པོ་པས་དབང་རབ་ཆོས་ཐམས་ཅད་སྐྱེ་བ་མེད་པར་ཤེས་པ། དབང་འབྲིང་གིས་རིག་སྔགས་ཀྱི་ལྷ་ལ་(༥༦བ)གསོལ་བ་བཏབ་པ། དབང་པོ་ཐ་མས་ལྟུང་བ་དངོས་པོར་འཛིན་པས་འགྱོད་ཅིང་གཞན་གྱི་དྲུང་དུ་ཉེས་པ་འཆགས་པ་དང་གསུམ་དུ་བསྡུ་བར་མཛད་དོ། ། སྤྱིར་ཉིན་མཚན་ལ་ཆ་གསུམ་གསུམ་དྲུག་ཏུ་དབྱེ་བའི་ཐུན་ཚད་རེ་རེའི་ཁོང་དུ་ལྟུང་བ་བྱུང་བ་དེའི་མཇུག་ཏུ་གཉེན་པོས་མ་སླེབས་ན་ཐུན་འདས་ཞེས་པ་ལྟུང་བ་དངོས་གཞིར་འགྱུར། བཤགས་ཚད་དེ་ལས་མ་འདས་ན་ཚུལ་ཁྲིམས་རྣམ་པར་དག་པས་གོང་སྨོས་ཕྱིར་བཅོས་ཙམ་གྱིས་གསོར་རུང་ལ། ལྟུང་བ་ཞག་གྲངས་སུ་ལུས་པ་ལྟ་བུའི་བཤགས་ཚད་ལས་འདས་ན་སྟོབས་བཞི་དང་ལྡན་པས་བཤགས་ཤིང་བསྡོམས་ནས་ལྟུང་བ་ལས་ལྡངས། སླར་བསྐྱར་ཏེ་བླང་བས་སོར་ཆུད་དོ། ། དེ་ལ་སྟོབས་བཞི་ནི། རྟེན་གྱི་སྟོབས་གཙོ་རྒྱལ་མ་སོགས་སྐྱབས་འགྲོ། རྣམ་པར་སུན་འབྱིན་པའི་སྟོབས་འགྱོད་པ་དྲག་པོས་ལྟུང་བའི་མིང་ནས་སྨོས་པ། གཉེན་པོ་ཀུན་ཏུ་སྤྱོད་པའི་སྟོབས་དེ་བཞིན་གཤེགས་པའི་ཡིག་བརྒྱ་གཙོ་བོར་གྱུར་པའི་གཟུངས་སྔགས་བཟླ་བ་སོགས་གཉེན་པོ་སྒོ་དྲུག་ཏུ་གྲགས་པ། སོར་ཆུད་པའི་སྟོབས་ཕྱིན་ཆད་མི་བྱེད་པར་བསྡམ་པའོ། ། ཉ༥ ལྔ་པ་འཇུག་པའི་བསླབ་བྱ་འཕྲོས་སུ་སྨོས་པ་ནི། འཇུག་པའི་བསླབ་བྱ་དུས་ཚོད་ནུས་དང་སྦྱར། ། གོང་དུ་དགག་ཕྱོགས་ཀྱི་བསླབ་བྱ་གཙོ་བོར་བསྟན་ལ། འཇུག་པའི་བསླབ་བྱ་འགའ་ཞིག་གཤམ་དུའང་འཆད་པར་འགྱུར་བ་དང་གཞུང་ལུགས་རྣམས་སུ་རྒྱས་པར་འབྱུང་བ་དེ་དག་རང་བློས་ཇི་ཙམ་ནུས་པ་བསྲུང་ཞིང༌། དུས་ཀྱང་ཞག་དང་ཟླ་བ་དང་ལོ་དང་ཇི་སྲིད་འཚོ་བ་དང་བྱང་ཆུབ་ཀྱི་བར་ཇི་ཙམ་ལེན་ནུས་པ་དེ་ཙམ་བླང་བར་རུང་སྟེ། བསླབ་བཏུས་ལས། སྡོམ་པ་བདག་ཉིད་ཀྱི་སྟོབས་དང་སྦྱར་ནས་བླང་བར་བྱ་སྟེ། དེ་ལྟ་མ་ཡིན་ན་སངས་རྒྱས་བྱང་སེམས་ཐམས་ཅད་དང་ལྷ་དང་བཅས་པའི་འཇིག་རྟེན་བསླུས་པར་འགྱུར་རོ། །ཞེས་པ་ལྟར་རོ། ། ཇ༢ གཉིས་པ་རྒྱ་ཆེན་སྤྱོད་རྒྱུད་ཀྱི་ལུགས་སྲོལ་འཆད་པ་ལ་བཞི། ཉ༡ མ་ཐོབ་(༥༧ན)པ་འཐོབ་བྱེད། ཉ༢ ཐོབ་པ་སྲུང་ཚུལ། ཉ༣ ཉམས་ན་ཕྱིར་བཅོས། ཉ༤ སློབ་ཚུལ་འཕྲོས་སུ་སྨོས་པའོ། ། ཉ༡ དང་པོ་ནི། རྒྱ་ཆེན་སྤྱོད་ལུགས་སོ་ཐར་རིས་བདུན་པོ། ། གང་རུང་ལྡན་ལ་མཁས་ནུས་སྡོམ་ལྡན་གྱིས། ། སྨོན་པ་སེམས་བསྐྱེད་སྡེ་སྣོད་བསླབས་ནས་ཕྱིས། ། འཇུག་སེམས་བར་ཆད་དྲི་སོགས་རྒྱས་པར་སྦྱིན། ། རྒྱ་ཆེན་སྤྱོད་པའི་ལུགས་ཀྱི་བྱང་སེམས་ཀྱི་སྡོམ་པ་གང་ལ་སྐྱེ་བའི་རྟེན་ནི་ངེས་པར་སོ་ཐར་རིས་བདུན་གང་རུང་སྔོན་དུ་སོང་བ་ཞིག་ལས་བར་ཆད་དང་བཅས་པ་རྣམས་ལ་དངོས་སུ་མི་སྐྱེ་བར་བཤད། གང་ལས་བླང་བའི་སློབ་དཔོན་མཚན་ཉིད་གོང་དུ་སྨོས་པ་དང༌། བསྡུ་ན། རབ་སྡེ་སྣོད། ཐ་ན་བྱང་སྡོམ་འབོགས་ཆོག་ལ་མཁས་པ། བརྡ་སྤྲོད་པར་ནུས་པ། སྡོམ་པ་ཐོབ་ལ་མ་ཉམས་པ། བརྩེ་བ་དང་ལྡན་པས་སློབ་མ་སྐྱོང་བ་སྟེ་ཆོས་བཞི་ལྡན་གྱི་སྡོམ་པ་འབོག་པར་གསུངས་ཤིང༌། དེའང་སྲོག་དང་ཚངས་སྤྱོད་ལ་གནོད་ན་མ་གཏོགས་བླ་མ་ངེས་པར་དགོས་ཤིང༌། གལ་ཏེ། མ་རྙེད་ན་རྟེན་གྱི་དྲུང་དུ་བླང་རུང་སྟེ། བྱང་ས་ལས། དགེ་བའི་བཤེས་གཉེན་མཚན་ཉིད་ལྡན་པ་རྒྱང་གྲགས་དང་དཔག་ཚད་ཀྱི་བར་དུ་སྲོག་དང་ཚངས་སྤྱོད་ལ་མི་གནོད་ཙམ་དུ་བཙལ་ཀྱང་མ་རྙེད་ན་དཀོན་མཆོག་གི་རྟེན་གྱི་དྲུང་དུ་བདག་ཉིད་ཀྱིས་བླངས་པས་ཀྱང་སྐྱེའོ། །ཞེས་པ་ལྟར་རོ། ། ཉམས་ན་གསོ་བ་ལ་བླ་མ་ངེས་པར་དགོས་པ་གནས་བརྟན་བྱང་བཟང་སོགས་བཞེད་དོ། ། ལེན་པའི་ཆོ་ག་ཐོགས་མེད་སོགས་ཀྱི་གཞུང་དུ་སྨོན་སེམས་ལེན་པའི་སྒྲོས་མི་གསལ་ཡང་ཇོ་བོ་རྗེས་གསལ་བར་གསུངས་པ་བྱམས་མགོན་ནས་བརྒྱུད་པའི་མན་ངག་སྙན་བརྒྱུད་དུ་བཞེད་ཅིང༌། དེ་ལ་དོན་གསུམ། རྟེན་ངེས་པར་བྱ་བ། སྦྱོར་བ་རྗེས་སུ་སྒྲུབ་པ། རང་བཞིན་གཏན་ལ་དབབ་པའོ། ། དང་པོ་ནི། མཐའ་གཉིས་ཀྱི་ཞེན་པ་བཀག་ནས་བྱང་སེམས་ལ་སྤྲོ་བ་བསྐྱེད་པའོ། ། གཉིས་པ་ལ་གཉིས། སྨོན་པ་དང༌། འཇུག་པའོ། །(༥༧བ) དང་པོ་ལ། སྦྱོར་བའི་ཆོས་ཡུལ་སྟེན་ཐབས་ཁྱད་པར་ཅན་གསུམ་དང་འབྲེལ་བར་གསོལ་གདབ་སྐྱབས་འགྲོ་ཚོགས་བསགས་གྲུབ་ནས། དངོས་གཞི་ལ་རང་སྟོབས་རིགས་སད་པ། གཞན་སྟོབས་རྫོགས་བྱང་གི་ཕན་ཡོན་མཐོང་བ་ལ་སོགས་པ། སྦྱོར་བའི་སྟོབས་འཁོར་བར་སྐྱོ་བ། མྱང་འདས་ལ་མི་ཞེན་པ། བྱང་ཆུབ་ཀྱི་སེམས་ལ་སྤྲོ་བའི་འདུ་ཤེས་བསྐྱེད་དེ་སྡོམ་པ་བླང༌། རྗེས་སྤྲོ་བ་བསྐྱེད་པ། བསླབ་བྱ་བསྟན་པ། གཏང་རག་བཏང་བ་རྣམས་ཀྱིས་གྲུབ་བོ། ། གཉིས་པ་ལ་འཇུག་སྡོམ་ནི། སྨོན་སེམས་བསྐྱེད་པ་དེས་བྱང་སེམས་ཀྱི་སྡེ་སྣོད་བསླབས་ནས་ཕྱིས་དད་ཅིང་བསྒྲུབ་པར་ནུས་པ་དེ་བླང་བའི་ཆོ་ག་ལ། སྦྱོར། དངོས། རྗེས་གསུམ་ལས། སྦྱོར་བ་ནི། གསོལ་བ་གདབ་པ། བསམ་པ་བརྟགས་པ། མྱུར་དུ་སྦྱིན་པར་གསོལ་བ་འདེབས་པ། བར་ཆད་དྲི་བ། བསླབ་པའི་གནས་གོ་བར་བྱས་ནས་སྤྲོ་བ་དྲི་བ་རྣམས་སོ། ། དངོས་གཞི་ནི། ཁས་བླངས་ལན་གསུམ་གྱིས་སྡོམ་པ་བཟུང༌། རྗེས་ནི། ཆོག་མཁྱེན་པར་གསོལ་བ། ཕན་ཡོན་བསྟན་པ། གསང་བར་གདམས་པ། བསླབ་བྱ་བསྟན་པ། གཏང་རག་འབུལ་བ་རྣམས་སོ། ། གསུམ་པ་ནི། སྨོན་འཇུག་གི་རྒྱུ་དང༌། ངོ་བོ་དང༌། དབྱེ་བ་དང༌། ཕན་ཡོན་རྣམས་ཤེས་པར་བྱ་བ་སྟེ། དེ་ལྟ་བུའི་ཚུལ་གྱིས་རྒྱས་པར་སྦྱིན་ནོ། ། སྡོམ་པ་སྐྱེ་བའི་དུས་མཚམས་ནི་ལུགས་གཉིས་ཀར་བརྗོད་པ་གསུམ་གྱི་མཐའ་ལ་སྐྱེའོ། ། ཉ༢ གཉིས་པ་ཐོབ་པ་མི་ཉམས་པར་སྲུང་བའི་བསླབ་བྱ་བཤད་པ་ལ་གཉིས། ཏ༡ མདོར་བསྟན། ཏ༢ རྒྱས་པར་བཤད་པའོ། ། ཏ༡ དང་པོ་ནི། བསྲུང་བྱ་རྩ་བཞི་ཡན་ལག་ཞེ་དྲུག་སྟེ། ། སྨོན་འཇུག་སྡོམ་པ་ཐོབ་པའི་གང་ཟག་གིས་བསྲུང་བྱ་རྩ་བའི་ལྟུང་བ་བཞི། ཡན་ལག་གི་ཉེས་བྱས་ཞེ་དྲུག་སྤང་བར་བྱ་སྟེ། ཞེས་སོ། ། ཏ༢ གཉིས་པ་ལ་གཉིས། ཐ༡ རྩ་བ། ཐ༢ ཡན་ལག་གོ། ། ཐ༡ དང་པོ་ནི། རྙེད་བཀུར་ཆགས་པས་བདག་བསྟོད་གཞན་ལ་སྨོད། ། བཀྲེན་ལ་སེར་སྣས་ཆོས་དང་ནོར་མི་སྟེར། །(༥༨ན) བཤགས་ཀྱང་མི་ཉན་ཁྲོས་པས་གཞན་ལ་འཚོགས། ། ཐེག་ཆེན་སྤོང་ཞིང་དམ་ཆོས་འདྲར་སྣང་སྟོན། ། ཀུན་དཀྲིས་དབང་གིས་རབ་འབྲིང་ཐ་གསུམ་འགྱུར། ། ཞེས་བྱང་སའི་དོན་བསྡུས་སྡོམ་པ་ཉི་ཤུ་པར་གསུངས་པ་ཉན་ཐོས་ཀྱི་ཕམ་པ་དང་འདྲ་བའི་རྩ་བའི་ལྟུང་བ་བཞི་སྟེ། དང་པོ་རྙེད་བཀུར་ལ་ཆགས་པའི་དབང་གིས་བདག་བསྟོད་གཞན་ལ་སྨོད་པ། གཉིས་པ་ལོངས་སྤྱོད་ཡོད་བཞིན་དུ་བཀྲེན་པ་སྟེ། དབུལ་ཕོངས་སྙིང་རྗེ་བའི་གནས་ལ་སེར་སྣའི་དབང་གིས་ཆོས་འདོད་པ་ལ་ཆོས་མི་སྟེར་ཞིང་ནོར་འདོད་པ་ལ་ཟང་ཟིང་མི་སྟེར་བ། གསུམ་པ་གཞན་གྱིས་བཤགས་སྦྱངས་བྱས་པས་ཀྱང་མི་ཉན་པར་ཁྲོ་བས་ལག་པ་དང་དབྱུག་པ་སོགས་ཀྱིས་རྡེག་པ། བཞི་པ་བྱང་ཆུབ་སེམས་དཔའི་སྡེ་སྣོད་ཐེག་པ་ཆེན་པོ་ལ་སྐུར་པ་འདེབས་ཤིང་སྤོང་བ་དང༌། དམ་པའི་ཆོས་མ་ཡིན་པ་ཆོས་ལྟར་བཅོས་པ་ལ་དགའ་ཞིང་ཆོས་དེ་སྟོན་པའོ། ། དེ་བཞིའང་སྡོམ་པ་དང་ལྡན། ཤེས་པ་རྣལ་དུ་གནས། ཀུན་དཀྲིས་ཆེན་པོས་བསླངས་པ་སྟེ། ཡན་ལག་གསུམ་ཚང་ན་ཉན་ཐོས་ཀྱི་ཕམ་པ་དང་འདྲ་ལ། ཀུན་དཀྲིས་འབྲིང་དང་ཆུང་ངུས་བྱས་པ་ནི་ལྷག་མ་དང་ལྟུང་བྱེད་བཞིན་ནོ། ། དེ་ལ་ཀུན་དཀྲིས་ཆེ་ཆུང་དབང་གིས་ལྟུང་བ་རབ་འབྲིང་ཐ་གསུམ་དུ་འགྱུར་བའི་ཀུན་དཀྲིས་དེའང་། རྒྱུན་ཆད་མེད་པར་སྤྱོད་པ་དང༌། ངོ་ཚ་དང་ཁྲེལ་མེད་པ་དང༌། ལས་དེས་མགུ་ཞིང་དེ་ལ་ཡོན་ཏན་དུ་ལྟ་བ་རྣམས་ནི་ཆེན་པོ་ཡིན་ལ། ཡན་ལག་མང་ཉུང་གིས་འབྲིང་དང་ཐ་མར་འགྱུར་བ་དང༌། ངོ་ཚ་སྐྱེ་བའི་དུས་སྔ་ཕྱི་དང༌། སྐྱེས་པའི་ཡུན་རིང་མྱུར་ལ་སོགས་པའི་ཁྱད་པར་ཡང་ཡོད་དོ། ། ཐ༢ གཉིས་པ་ཡན་ལག་གི་ཉེས་བྱས་ཞེ་དྲུག་བཤད་པ་ལ་གཉིས། ད༡ དགེ་བ་ཆོས་སྡུད་དང་འགལ་བ་སོ་བཞི། ད༢ སེམས་ཅན་དོན་བྱེད་དང་འགལ་བ་བཅུ་གཉིས་སོ། ། ད༡ དང་པོ་ལའང༌། ན༡ སྦྱིན་པ་དང་འགལ་བ་བདུན། ན༢ ཚུལ་ཁྲིམས་དང་འགལ་བ་དགུ། ན༣ བཟོད་པ་དང་འགལ་བ་བཞི། ན༤ བརྩོན་(༥༨བ)འགྲུས་དང་འགལ་བ་གསུམ། ན༥ བསམ་གཏན་དང་འགལ་བ་གསུམ། ན༦ ཤེས་རབ་དང་འགལ་བ་བརྒྱད་དོ། ། ན༡ དང་པོ་ནི། མི་མཆོད་རྗེས་འཇུག་མ་གུས་ལན་མི་འདེབས། ། མི་འགྲོ་བྱིན་སྤོང་འཆད་མིན་སྦྱིན་འགལ་བདུན། ། དཀོན་མཆོག་གསུམ་མི་མཆོད་པ་དང༌། འདོད་སེམས་ཀྱི་རྗེས་སུ་འཇུག་པ་གཉིས་ཟང་ཟིང་གི་སྦྱིན་པ་དང་འགལ། བསླབ་པ་རྒན་པ་ལ་མ་གུས་པ་དང༌། དྲིས་པ་ལ་ལན་མི་འདེབས་པ་གཉིས་མི་འཇིགས་པའི་སྦྱིན་པ་དང་འགལ། མགྲོན་བོས་སར་མི་འགྲོ་བ་དང༌། གཞན་གྱིས་བྱིན་པ་ཁྲོས་ནས་སྤོང་སྟེ་མི་ལེན་པ་གཉིས་ནི་གཞན་གྱི་སྦྱིན་པའི་རྐྱེན་མི་བྱེད་པའོ། །ཆོས་འདོད་པ་ལ་འཆད་པ་མིན་པ་ནི་ཆོས་སྦྱིན་དང་འགལ་བ་སྟེ། སྦྱིན་པ་དང་འགལ་བ་བདུན་ནོ། ། ན༢ གཉིས་པ་[ཚུལ་ཁྲིམས་དང་འགལ་བ་དགུ་]ནི། ཡལ་འདོར་མི་སློབ་ཆུང་དང་གནང་མི་སྤྱོད། ། ལོག་འཚོ་འཕྱར་དགོད་འཁོར་སེམས་གྲགས་ངན་དང༌། ། ཉོན་མོངས་མི་འཆོས་ཚུལ་ཁྲིམས་འགལ་བ་དགུ། ། ཚུལ་ཁྲིམས་འཆལ་པ་ཡལ་བར་འདོར་བ། ཕ་རོལ་པོ་དད་པའི་ཕྱིར་ཤེས་བྱ་མི་སློབ་པ། སེམས་ཅན་དོན་ལ་བརྩོན་པ་ཆུང་བ། སྙིང་རྗེ་དང་བཅས་ལ་དགོས་པ་ཡོད་ན་མི་དགེ་བ་གནང་ཡང་མི་སྤྱོད་པ་བཞི་གཞན་དོན་གཙོ་བོར་གྱུར་པ་དང་འགལ་བ། ལོག་འཚོ་ལྔ་དང་དུ་ལེན་པ། འཕྱར་གཡེང་རྒོད་བག་གིས་རྩེ་བ། ཞེན་སྲེད་དབང་གིས་འཁོར་བ་གཅིག་པུས་བགྲོད་པར་སེམས་པ་གསུམ་རང་དོན་གཙོ་བོར་གྱུར་པ་དང་འགལ་བ། གྲགས་པ་ངན་པ་ལ་མི་འཛེམ་པ། ཉོན་མོངས་པ་མི་འཆོས་པ་གཉིས་ནི་གཉིས་ཀ་ཆ་མཉམ་དང་འགལ་བ་སྟེ། ཚུལ་ཁྲིམས་དང་འགལ་བ་དགུའོ། ། ན༣ གསུམ་པ་[བཟོད་པ་དང་འགལ་བ་བཞི་]ནི། ཆོས་བཞི་མི་སྒྲུབ་ཁྲོ་འདོར་བཤགས་མི་ཉན། ། ཁྲོས་པའི་རྗེས་འཇུག་བཟོད་དང་འགལ་བ་བཞི། ། གཤེ་བའི་ལན་དུ་སླར་མི་གཤེ། ཁྲོས་པའི་ལན་དུ་སླར་མི་ཁྲོ། རྡེག་པའི་ལན་དུ་སླར་མི་རྡེག །མཚང་འབྲུ་བའི་ལེན་དུ་སླར་མཚང་མི་འབྲུ་བ་སྟེ། དགེ་སྦྱོང་གི་ཆོས་བཞི་(༥༩ན)གསུངས་བཞིན་མི་སྒྲུབ་པར་གཤེ་ལ་སླར་གཤེ་བ་སོགས་ལོག་པར་སྒྲུབ་པ། རང་ལ་ཁྲོས་པ་ཞི་བས་རྗེས་སུ་མི་བཟུང་བར་ཡལ་བར་འདོར་བ། ཆོས་བཞིན་དུ་བཤགས་པ་ལ་མི་ཉན་པ། ཁྲོས་པའི་སེམས་ཀྱི་རྗེས་སུ་འཇུག་པ་ནི་བཟོད་པ་དང་འགལ་བ་བཞིའོ། ། ན༤ བཞི་པ་[བརྩོན་འགྲུས་དང་འགལ་བ་གསུམ་]ནི། འཁོར་སྡུད་མི་སེལ་བྲེ་མོ་བརྩོན་འགལ་གསུམ། ། རྙེད་བཀུར་འདོད་ཕྱིར་འཁོར་སྡུད་པ། ལེ་ལོ་ལ་སོགས་པ་མི་སེལ་བ། ཆགས་པའི་སེམས་ཀྱིས་འདུ་འཛི་བྲེ་མོའི་གཏམ་ལ་དགའ་བ་ནི་བརྩོན་འགྲུས་དང་འགལ་བ་གསུམ་མོ། ། ན༥ ལྔ་པ་[བསམ་གཏན་དང་འགལ་བ་གསུམ་]ནི། མི་འཚོལ་མི་སྤོང་རོར་ཆགས་བསམ་གཏན་གསུམ། ། ཏིང་ངེ་འཛིན་མི་འཚོལ་བ། བསམ་གཏན་གྱི་སྒྲིབ་པ་སོགས་མི་སྤོང་བ། བསམ་གཏན་གྱི་རོ་ལ་ཡོན་ཏན་དུ་ལྟ་ཞིང་ཆགས་པ་ནི་བསམ་གཏན་དང་འགལ་བ་གསུམ་མོ། ། ན༦ དྲུག་པ་[ཤེས་རབ་དང་འགལ་བ་བརྒྱད་]ནི། ཉན་ཐོས་ཐེག་སྤོང་དེ་དང་ཕྱི་རོལ་བརྩོན། ། དེར་དགའ་ཁྱད་ཆོས་མི་མོས་ཕྱིར་མི་འགྲོ། ། བདག་བསྟོད་གཞན་སྨོད་ཚིག་བརྟོན་ཤེས་རབ་བརྒྱད། ། དགེ་ཆོས་སྡུད་དང་འགལ་བ་སོ་བཞིའོ། ། ཉན་ཐོས་ཀྱི་ཐེག་པ་ལ་མ་གུས་པས་སྤོང་བ། རང་ལུགས་ཐེག་ཆེན་སྤངས་ནས་ཉན་ཐོས་ཐེག་པ་དེ་ལ་བརྩོན་པ། དེ་བཞིན་ཕྱི་རོལ་གྱི་བསྟན་བཅོས་ལ་བརྩོན་པ། ཐེག་ཆེན་ལ་བརྩོན་ཡང་ཉན་ཐོས་དང་ཕྱི་རོལ་བསྟན་བཅོས་དེ་ལ་དགའ་བ་ནི་ཡུལ་དམན་པ་དང་འབྲེལ་བའི་ཉེས་པའོ། ། ཐེག་པ་ཆེན་པོའི་ཁྱད་ཆོས་ལ་མི་མོས་པ། ང་རྒྱལ་དང་ལེ་ལོ་ལ་སོགས་པས་དམ་ཆོས་ཚོལ་བའི་ཕྱིར་མི་འགྲོ་བ། བདག་ལ་བསྟོད་ཅིང་གཞན་ལ་སྨོད་པ། དོན་ལ་མི་བརྟོན་ཚིག་ལ་བརྟོན་པ་བཞི་ནི་ཡུལ་དམ་པ་དང་འབྲེལ་བའི་ཉེས་པ་སྟེ། ཤེས་རབ་དང་འབྲེལ་བ་བརྒྱད་དེ་བསྡོམས་པས་དགེ་བ་ཆོས་སྡུད་དང་འགལ་བ་སུམ་ཅུ་རྩ་བཞིའོ། ། ད༢ གཉིས་པ་སེམས་ཅན་དོན་བྱེད་དང་འགལ་བ་ལའང་གཉིས། ན༡ དོན་བྱ་བའི་སྤྱི་དང་འབྲེལ་བ། ན༢ དོན་བྱ་བའི་ཁྱད་པར་དང་འབྲེལ་བའོ། ། ན༡ དང་པོ་ནི། དགོས་གྲོགས་མི་བྱེད་ནད་(༥༩བ)དང་སྡུག་མི་སེལ། ། མི་འཆོས། ཞེས་པ་སྟེ། དགོས་ངེས་པའི་གྲོགས་སུ་འགྲོ་བར་མི་བྱེད་པ། ནད་པའི་རིམ་གྲོ་སྤོང་བ་དང༌། གཞན་གྱི་སྡུག་བསྔལ་སེལ་བར་མི་བྱེད་པ། བག་མེད་དུ་ཞུགས་པ་ལེགས་པར་མི་འཆོས་པ་བཞིའོ། ། ན༢ གཉིས་པ་[དོན་བྱ་བའི་ཁྱད་པར་དང་འབྲེལ་བ་]ནི། མི་བཟོ་མི་བསལ་སྦྱིན་མི་བྱེད། ། མི་འདོགས་མི་བསྟུན་མི་བསྔགས་ཚར་མི་གཅོད། ། མི་འདུལ་སེམས་ཅན་དོན་བྱེད་འགལ་བཅུ་གཉིས། ། བྱས་པ་དྲིན་དུ་མི་བཟོ་བ། གཞན་གྱི་མྱ་ངན་མི་བསལ་བ། ནོར་འདོད་པ་ལ་ཡོད་བཞིན་དུ་སྦྱིན་པར་མི་བྱེད་པ། འཁོར་ལ་ཕན་མི་འདོགས་པ། གཞན་གྱི་བློ་དང་མི་བསྟུན་པ། ཡོན་ཏན་ཅན་ལ་བསྔགས་པ་བརྗོད་པས་མི་བསྔགས་པ་དྲུག་ནི་ཕན་མི་འདོགས་པའི་ཉེས་པའོ། ། ལོག་པར་ཞུགས་པ་ཚར་མི་གཅོད་པ། རྫུ་འཕྲུལ་དང་མངོན་ཤེས་ཀྱིས་འདུལ་འོས་པ་མི་འདུལ་བ་གཉིས་ནི་ཚར་མི་གཅོད་པའི་ཉེས་པ་སྟེ་བསྡོམས་པས་སེམས་ཅན་དོན་བྱེད་དང་འགལ་བ་བཅུ་གཉིས་སོ། ། ཉོན་མོངས་ཅན་མིན་ཉེས་མེད་གསུམ་གསུམ་འགྱུར། ། ཉེས་བྱས་ཞེ་དྲུག་པོ་འདི་དག་མ་གུས་པ་དང་སྙོམ་ལས་ཀྱིས་སྤྱད་པའི་ཉོན་མོངས་པ་ཅན་དང༌། བརྗེད་པ་དང་བག་མེད་པ་སོགས་ཀྱིས་སྤྱད་པ་ཉོན་མོངས་ཅན་མིན་པ་དང༌། དགེ་འདུན་གྱི་ཁྲིམས་སྲུང་བ་དང་སེམས་འཁྲུགས་ནས་སྤྱད་པ་ཉེས་མེད་དེ་གསུམ་གསུམ་དུ་དབྱེ་བའི་ཚུལ་བྱང་ས་ལས་བཤད་དོ། ། ཉ༣ གསུམ་པ་ཉམས་ན་ཕྱིར་བཅོས་བྱ་བའི་ཚུལ་ནི། རྩ་ལྟུང་ཀུན་དཀྲིས་ཆེར་སྤྱད་སྨོན་པའི་སེམས། ། ཉམས་ན་སྡོམ་པ་བཏང་བས་བསྐྱར་ནས་བླང༌། ། འབྲིང་དང་ཆུང་ངུ་གསུམ་དང་གཅིག་ལ་བཤགས། ། ཉེས་བྱས་ཉོན་མོངས་མི་མོངས་སེམས་ཀྱིས་ཏེ། ། རྩ་བའི་ལྟུང་བ་ཀུན་དཀྲིས་ཆེན་པོས་སྤྱད་པ་དང༌། བྱང་ཆུབ་ཏུ་སྨོན་པའི་སེམས་ཉམས་པ་ནི་བྱང་ས་ལས་གཏོང་བའི་རྒྱུ་གཉིས་སུ་བཤད་པ་ལྟར་སྡོམ་པ་རྩད་ནས་གཏོང་བས་བཤགས་སྡོམ་སྔོན་དུ་འགྲོ་བས་བསྐྱར་ནས་བླང༌། འོན་ཀྱང་བསྐྱར་གྲངས་གསུམ་ལས་(༦༠ན)ལྷག་པར་བྱར་མེད་ཅེས་ཀློང་ཆེན་ཞབས་ཀྱིས་གསུངས། ཀུན་དཀྲིས་འབྲིང་དང་ཆུང་ངུས་སྤྱད་པའི་ཕམ་འདྲ་ནི་རིམ་བཞིན་སྡོམ་ལྡན་གསུམ་ཡན་ཆད་དང༌། གཅིག་གི་མདུན་དུ་བཤགས་ཤིང་བསྡམ། ཉེས་བྱས་ཞེ་གཉིས་ཉོན་མོངས་ཅན་ནི་འཛོམས་ན་སྡོམ་ལྡན་གྱི་དྲུང་དུ་བཤགས། ཉོན་མོངས་ཅན་མ་ཡིན་པ་ནི་རང་སེམས་དཔང་པོར་བྱས་ཏེ་ཡིད་ཀྱིས་རྒྱལ་བ་སྲས་བཅས་ཀྱི་སྤྱན་སྔར་བཤགས་པས་འདག་གོ། ། འདིར་ཡང་གཏོང་རྒྱུ་ཐུན་མོང་བ་རྣམས་ནི་གོང་དུ་སྨོས་པ་བཞིན་ཤེས་པར་བྱ་དགོས་ལ། དེ་ལས་སྡོམ་པ་ཕུལ་བ་ནི་ཉན་ཐོས་ཀྱི་སྐབས་སུ་བསླབ་བྱར་གསུངས་མོད། བྱང་སྡོམ་ཕུལ་ན་ཉེས་པ་ཤིན་ཏུ་ལྕི་བས་རྣམ་པ་ཀུན་ཏུ་དགག་བྱ་ཡིན་ལ། ཤི་འཕོས་ཤིང་བརྗེད་པ་སོགས་ཀྱིས་ནི་སྡོམ་པ་ཉམས་པར་མི་འགྱུར་ཏེ། བྱང་ས་ལས། བྱང་ཆུབ་སེམས་དཔའ་ཚེ་བརྗེས་ཏེ་བརྗེད་ན་ཡང་དགེ་བའི་བཤེས་གཉེན་བསྟེན་པ་ལ་བརྟེན་ནས་དྲན་པ་གསོ་བའི་ཕྱིར་ཡང་དང་ཡང་དུ་ནོད་པར་ཟད་ཀྱི་གསར་དུ་ཡང་དག་པར་ལེན་པ་ནི་མ་ཡིན་ནོ། །ཞེས་སོ། ། ཉ༤ བཞི་པ་འཕྲོས་དོན་ནི། བསླབ་བྱ་ཀུན་སློབ་བྱང་ཆུབ་བར་དུའོ། ། ལུགས་འདིར་ཐོག་མར་སྡོམ་པ་བླངས་པ་ནས་བཟུང་སྨོན་འཇུག་གི་བསླབ་བྱ་མཐའ་དག་སློབ་དགོས་པ་དང༌། དུས་ཀྱང་དེ་ནས་བཟུང་བྱང་ཆུབ་ཀྱི་བར་དུ་ལེན་པ་ཁོ་ན་ལས་ལུགས་སྔ་མ་ལྟར་འདོད་པ་དང་སྦྱར་བ་ནི་མ་བཤད་པས་དེ་དག་ཀྱང་མ་འདྲེས་པར་བྱའོ། ། ཅ༥ རྩ་བའི་ལྔ་པ་ལུགས་གཉིས་ཐུན་མོང་གི་བསླབ་བྱ་བཤད་པ་ལ་གསུམ། ཆ༡ སྨོན་པའི་བསླབ་བྱ། ཆ༢ འཇུག་པའི་བསླབ་བྱ། ཆ༣ གཉིས་ཀའི་སྲུང་ཚུལ་བསྟན་པའོ། ། ཆ༡ དང་པོ་ལ་གསུམ། ཇ༡ རྩ་བ་ལ་སོགས་པ་ལྔ། ཇ༢ དམ་པ་གསུམ། ཇ༣ ཉམས་པའི་རྒྱུ་སྤོང་བའི་ཚུལ་ལོ། ། ཇ༡ དང་པོ་ནི། ཐུན་མོང་སྨོན་སེམས་སེམས་ཅན་བློས་མི་སྤང༌། ། ཕན་ཡོན་བསམ་ཞིང་ཚོགས་བསག་བྱང་སེམས་སྦྱངས། ། བླ་མ་མཆོད་འོས་བསླུ་ཞིང་གནས་མིན་འགྱོད། ། བྱང་སེམས་ལ་སྡང་འགྲོ་ལ་གཡོ་སྒྱུ་སྟེ། །(༦༠བ) ནག་པོའི་ཆོས་བཞི་སྤངས་ལ་དཀར་ཆོས་སྒྲུབ། ། ཤིང་རྟའི་སྲོལ་གཉིས་ཀའི་ཐུན་མོང་དུ་ཐོག་མར་སྨོན་པ་སེམས་བསྐྱེད་ཀྱི་བསླབ་བྱ་ལ་ལྔ། དང་པོ་རྩ་བ་སེམས་ཅན་བློས་མི་སྤངས་པ་ནི་དགྲ་ལྟ་བུ་གཅིག་གམ། འབུ་སྲིན་ཙམ་ལའང་ཁྱད་དུ་གསོད་ནས་བློས་བཏང་བ་དང༌། གཉིས་པ་མཐུན་པའི་རྐྱེན་བྱང་ཆུབ་སེམས་ཀྱི་ཕན་ཡོན་བསམ་པ་ནི་བཀའ་བསྟན་བཅོས་དུ་མ་ལས་བྱུང་བ་རྣམས་དྲན་ཞིང་བརྗོད་དེ། ཇོ་བོ་ཆེན་པོས། ངན་འགྲོ་ལས་ནི་ལྡོག་བགྱིད་ཅིང༌། ། སོགས་ཤར་ཤར་གསུངས་པ་གྲགས་པ་ལྟ་བུ་དང༌། གསུམ་པ་རྒྱུ་ཚོགས་གཉིས་བསགས་པ་ལ་བརྩོན་པ་ནི། ཆོས་སྤྱོད་བཅུ། ཕར་ཕྱིན་དྲུག་སོགས་བསོད་ནམས་དང་ཡེ་ཤེས་ཀྱི་ཚོགས་སུ་འགྱུར་རོ་ཅོག་ཟུང་འབྲེལ་དུ་བསྒྲུབ། བཞི་པ་ཐབས་བྱང་ཆུབ་ཀྱི་སེམས་ལ་སྦྱང་བ་ནི། ཉིན་མཚན་དུས་དྲུག་ཏུ་སེམས་བསྐྱེད་བླང་ཞིང་བྱམས་པ་དང་སྙིང་རྗེ་སྒོམ། དེའི་མན་ངག་བློ་