Tibetan
ཀྱི་ཕྱོགས་རྣམས་བརྩོན་པ་ཆེན་པོས་སྤང་བླང་བྱ་བ་ནི་བསླབ་པ་བཟུང་བ། དགོས་པ་དང་བྲལ་བའི་མཆོང་རྒྱུག་སོགས་ལུས་ཀྱི་སྤྱོད་པ། སྨྲ་བ་མང་པོ་དང་རྩུབ་པ་དང་རྣོན་པོ་སྟེ་ངག་གི་སྤྱོད་པ། རྙེད་བཀུར་ལ་ཞེན་པ་དང་གཉིད་རྨུགས་ལ་ཆགས་པ་སོགས་ཡིད་ཀྱི་སྤྱོད་པ་སྟེ་སྒོ་གསུམ་གྱི་འདུ་བྱེད་མ་དག་པ་གསུམ་པོ་སྤོང་ཞིང༌། ལུས་ཀྱིས་ཞི་དལ་འཛུམ་བག །ངག་གིས་སྨྲ་བ་ཉུང་ཞིང་འཇམ་པ། ཡིད་ཀྱིས་མ་ཆགས་པ་དང་དད་པ་སོགས་གསུམ་ལ་བསླབ་པ་ནི་བསླབ་པ་དག་པར་བྱེད་པ། ཡེ་ཤེས་དང་ཤེས་རབ་དང་བསྔོ་བ་གསུམ་གྱིས་བསླབ་པ་སྤེལ་བའོ། ། གཞན་ཡང་། ཕལ་པོ་ཆེའི་སྤྱོད་ཡུལ་ཡོངས་སུ་དག་པའི་མདོ་སྡེ་ལས་གསུངས་པ་སེམས་བསྐྱེད་བཞི་བཅུ་རྩ་གཅིག་གི་ཚུལ་གྱིས་བློ་སྦྱོང་བ་སོགས་ཀྱིས་ཀྱང་སེམས་དང་བསླབ་པ་བསྲུང་བ་ལ་བརྩོན་པར་བྱའོ། ། གཞན་ཡང་བསླབ་བཏུས་ལས། བདག་གི་ལུས་དང་ལོངས་སྤྱོད་དང༌། ། དུས་གསུམ་དགེ་བ་སྐྱེས་པ་རྣམས། ། སེམས་ཅན་ཀུན་ལ་བཏང་བ་དང༌། ། དེ་བསྲུང་དག་པ་སྤེལ་བའོ། ། ཞེས་པས་གཞི་གསུམ་བཏང་བ་དང༌། བསྲུང་བ་དང༌། དག་པ་དང༌། སྤེལ་བ་བཞིས་བྱང་སེམས་ཀྱི་སྡོམ་པ་མཐའ་དག་བསྡུས་པར་བཤད་ཅིང༌། ཇི་ལྟར་སྒྲུབ་ཚུལ་ཀྱང་ལས་དང་པོ་བས་བསྲུང་བ། མོས་སྤྱོད་པས་དག་པ། མ་དག་ས་བདུན་ལ་གནས་པས་བཏང་བ། དག་པ་ས་གསུམ་ལ་གནས་པས་སྤེལ་བ་གཙོ་བོ་སྒྲུབ་པར་བཤད་པ་སོགས་ཀྱང་ཁོང་དུ་(༦༥བ)ཆུད་པར་བྱའོ། ། ཅ༦ དྲུག་པ་དོན་དམ་བྱང་ཆུབ་ཀྱི་སེམས་བསྐྱེད་པའི་ཚུལ་བཤད་པ་ལ་ལྔ། ཆ༡ རྒྱུ། ཆ༢ ངོ་བོ། ཆ༣ དབྱེ་བ། ཆ༤ ཆོ་ག ། ཆ༥ རང་བཞིན་ངོས་བཟུང་བའོ། ། ཆ༡ དང་པོ་ནི། དོན་དམ་བྱང་ཆུབ་སྤྱོད་པ་རླབས་ཆེན་རྒྱུ། ། དོན་དམ་བྱང་ཆུབ་ཀྱི་སེམས་སྐྱེ་བའི་རྒྱུ་ནི། སྤྱིར་ཀུན་རྫོབ་བྱང་ཆུབ་ཀྱི་སེམས་སྔོན་དུ་སོང་བ་དང༌། ཁྱད་པར་མཉམ་མེད་དྭགས་པོས། ལུང་དང༌། སྒྲུབ་པ་དང༌། རྟོགས་པའི་ཁྱད་པར་དག་གིས་བསྐྱེད་དོ། །ཞེས་གསུངས་པ་ལྟར། ལུང་གི་ཆོས་ལ་ཐོས་བསམ། རྟོགས་པའི་ཆོས་ལ་སྒྲུབ་པ། གཉིས་ཀའི་གྲུབ་འབྲས་སམ་བླ་སློབ་མཚན་ལྡན་གྱི་རྟེན་འབྲེལ་འགྲིགས་པའི་བྱིན་རླབས་ལས་རང་གི་སྙིང་དབུས་སུ་སད་པའི་རྟོགས་པའི་ཁྱད་པར་རྣམས་ཀྱིས་བསྐྱེད་ལ། ཐམས་ཅད་དུའང་བྱང་ཆུབ་ཀྱི་སྤྱོད་པ་རླབས་ཆེན་སྤྱད་པ་ནི་དེའི་རྒྱུའོ།། ཆ༢ གཉིས་པ་[ངོ་བོ་ངོས་བཟུང་བ་]ནི། ངོ་བོ་འཕགས་པའི་མཉམ་གཞག་ཡེ་ཤེས་ཏེ། ། ངོ་བོ་ནི། བྱང་འཕགས་ཀྱི་མཉམ་གཞག་དང༌། སངས་རྒྱས་ཀྱི་སའི་མཉམ་བརྗེ་དབྱེར་མེད་ཀྱི་ངོ་བོར་གྱུར་པའི་སེམས་བསྐྱེད་རྣམ་པར་མི་རྟོག་པའི་ཆོས་ཉིད་མངོན་སུམ་དུ་རྟོགས་པའི་ཡེ་ཤེས་ཏེ། མཉམ་མེད་དྭགས་པོས། འོ་ན། དོན་དམ་བྱང་ཆུབ་ཀྱི་སེམས་བསྐྱེད་དེ་ཇི་ཙམ་ཞིག་སྙམ་ན། སྟོང་ཉིད་སྙིང་རྗེའི་སྙིང་པོ་ཅན་གསལ་ལ་མི་གཡོ་བ་སྤྲོས་པའི་མཚན་མ་དང་བྲལ་བའོ། །ཞེས་གསུངས་སོ། ། ཆ༣ གསུམ་པ་[དབྱེ་བ་ངོས་བཟུང་བ་]ནི། རྣམ་པའི་དབྱེ་བ་དང་པོའི་ས་ལ་སོགས། ། སྟོང་པ་ཉིད་ཀྱི་ངོ་བོ་ལ་དབྱེར་མེད་ཀྱང་སྐྱེ་ཚུལ་གྱི་རྣམ་པའི་དབང་དུ་བྱས་ན་དབྱེ་བ་མང་སྟེ། དང་པོའི་སའི་རྟོགས་པ་དང༌། སོགས་ཁོངས་ནས་སངས་རྒྱས་ཀྱི་བར་དུའོ། ། ཆ༤ བཞི་པ་[ཆོ་ག་ངོས་བཟུང་བ་]ནི། ཆོ་གས་སྐྱེ་དང་མི་སྐྱེ་བཞེད་སྲོལ་གཉིས། ། དོན་དམ་སེམས་བསྐྱེད་དེ་ཉིད་ཆོས་རྗེས་འཇིག་རྟེན་གསུམ་མགོན་ལ་སོགས་པ་རྣམས་ནི་རྒྱུད་དང་མདོའི་ལུང་ལ་བརྟེན་ཏེ་ཆོ་གས་སྐྱེ་བར་བཞེད་དེ། རྒྱུད་ལས་བཤད་པ་དེ་ཆོ་གས་སྐྱེ་ན་མདོ་ལས་བཤད་པ་དེའང་སྐྱེ་སྟེ། སོ་ཐར་གྱི་སྡོམ་(༦༦ན)ཆོག་བཞིན། སྔགས་སུ་དོན་དམ་དུ་སེམས་བསྐྱེད་པ་ཡོད་ལ་དེའི་ཐ་སྙད་མ་བཤད་པའང་ཡིན་ཏེ། ཟླ་བ་རྡོ་རྗེའི་སེམས་བསྐྱེད་ལ་དོན་དམ་དུ་སེམས་བསྐྱེད་པ་ཡོངས་སུ་གྲགས་པའི་ཕྱིར། དེ་དག་རྣམ་པ་ལམ་བྱེད་ཀྱི་ཕྱིར་རྗེས་མཐུན་ཙམ་ལས་དངོས་མི་སྐྱེ་བས་དེའི་ཐ་སྙད་མི་འཐོབ་ཅེ་ན། འཇུག་པ་སེམས་བསྐྱེད་ལའང་དེ་དང་མཚུངས་པ་སོགས་ཀྱི་དགོངས་པས་ཕྱག་ལེན་དུ་མཛད་དེ། དཔེར་ན། སོ་ཐར་སྡོམ་རྐྱང་ཙམ་ཕྱིས་ངེས་འབྱུང་གིས་ཟིན་ན་སྡོམ་པ་མཚན་ཉིད་པར་འགྱུར་བར་བཞེད་པ་དང༌། བྱང་སྡོམ་ཡང་ཐོག་མར་སེམས་དགེ་བའི་ངོ་བོ་ཙམ་སྐྱེས་པ་དེ་ཚོགས་ལམ་དངོས་ལ་ཞུགས་པ་ན་སེམས་སེམས་བྱུང་རིལ་གྱིས་སྡོམ་པའི་ངོ་བོར་འགྲོ་བས་སྨོན་འཇུག་མཚན་ཉིད་པར་འགྱུར་བར་བཞེད་པ་དང༌། འདིར་ཆོ་གའི་སྟོབས་ལས་རྣམ་པར་མི་རྟོག་པའི་ཡེ་ཤེས་བློ་ཡུལ་དུ་བྱས་པའི་རྒྱུན་ཕྱིས་དགེ་རྩ་སྨིན་པས་མངོན་སུམ་དུ་རྟོགས་པ་ཆ་མཚུངས་པའོ། ། ས་སྐྱ་པཎ་ཆེན་གྱིས། དོན་དམ་སེམས་བསྐྱེད་སྒོམ་པའི་སྟོབས་ལས་སྐྱེའི་ཆོ་གས་མི་སྐྱེ། གལ་ཏེ་སྐྱེ་ན་བརྡ་བྱུང་དུ་འགྱུར་བས་མི་འཐད། དོན་དམ་སེམས་བསྐྱེད་བྱའོ། །ཞེས་གསུངས་པ་ཡོད་སྲིད་ཀྱང་། དམ་བཅའ་ཙམ་ཡིན་གྱི། ཆོ་ག་མ་ཡིན་པར་གསུངས་པས་དེ་དང༌། མངའ་རིས་པཎ་ཆེན་གྱི་རྗེས་འབྲང་རྣམས་ཀྱང་སེམས་བསྐྱེད་འདི་ནི་ཆོ་ག་ལས་མི་སྐྱེ་བར་བཞེད་པ་སྟེ། སྲོལ་གཉིས་སུ་སྣང་ངོ༌། ། དེ་དག་ཀྱང་། འགལ་བ་མ་ཡིན་ཏེ། སྔ་མས་རྗེས་མཐུན་ཙམ་ཆོ་གས་ཀྱང་བསྐྱེད་ནུས་པ་དང༌། ཕྱི་མས་མཚན་ཉིད་པ་བསྐྱེད་མི་ནུས་པ་ལ་དགོངས་པའོ། ། དེས་ན། རྗེས་འབྲང་དག་མཐའ་གཅིག་ཏུ་ཆོ་གས་མི་སྐྱེ་བར་ཁ་ཚོན་གཅོད་པ་ནི་རིགས་པ་མ་ཡིན་ཏེ། དབང་བཞི་པའི་ཡེ་ཤེས་ཚིག་ཙམ་གྱིས་སྐྱེ་བ་དང༌། དོན་དམ་སེམས་བསྐྱེད་ཆོ་གས་སྐྱེ་བར་བཤད་པ་གཉིས་རིག་པ་དང་སྒྲུབ་བྱེད་མཚུངས་པའི་ཕྱིར་རོ། ། ཆ༥ ལྔ་པ་[རང་བཞིན་ངོས་བཟུང་བ་]ནི། དམ་པ་གསུམ་གྱིས་ཟིན་པའི་(༦༦བ)སེམས་བསྐྱེད་ཅེས། ། ཆོས་དབྱིངས་མངོན་སུམ་རྟོགས་པའི་ཡེ་ཤེས་སོ། ། དོན་དམ་པའི་སེམས་བསྐྱེད་ཀྱི་རང་བཞིན་དངོས་དེ་གང་ལ་བྱེད་ན་སྔགས་སུ་གཟུང་འཛིན་གཉིས་མེད་ཀྱི་ཡེ་ཤེས་སུ་བཤད་པ་དང༌། སློབ་དཔོན་སོ་སོའི་བཞེད་ཚུལ་གྱིས་ཕྲ་རགས་མང་དུ་སྣང་ཡང༌། ཕར་ཕྱིན་ཐེག་པ་ལྟར་ན། མདོ་སྡེ་རྒྱན་ལས། རྫོགས་པའི་སངས་རྒྱས་རབ་མཉེས་བྱས། ། བསོད་ནམས་ཡེ་ཤེས་ཚོགས་རབ་བསགས། ། ཆོས་ལ་མི་རྟོག་ཡེ་ཤེས་ནི། ། སྐྱེས་ཕྱིར་དེ་ནི་དམ་པར་འདོད། ། ཅེས་ཡོངས་འཛིན་དང༌། རྗེས་སྒྲུབ་དང༌། རྟོགས་པ་སྟེ་དམ་པ་གསུམ་གྱིས་ཟིན་པའི་སེམས་བསྐྱེད་ཅེས་བཤད་དེ། ཚོགས་སྦྱོར་གྱི་གནས་སྐབས་སུ་བདག་རྐྱེན་རྫོགས་པའི་སངས་རྒྱས་མཉེས་པར་བྱས་ཤིང༌། རྒྱུ་བསོད་ནམས་དང་ཡེ་ཤེས་ཀྱི་ཚོགས་བསྐལ་པ་གྲངས་མེད་གཅིག་ཏུ་བསགས་པའི་སྟོབས་ཀྱིས། ས་དང་པོ་ཆོས་ཀྱི་བདག་མེད་མངོན་སུམ་དུ་རྟོགས་པའི་ཡེ་ཤེས་རང་གི་ངང་གིས་སྐྱེས་པ་ལ་དོན་དམ་སེམས་བསྐྱེད་དུ་འཇོག་པར་མཁས་པ་རྣམས་བཞེད་དོ། ། ཅ༧ རྩ་བའི་བདུན་པ་འཆལ་ལྡན་གྱི་སྐྱོན་ཡོན་བཤད་པ་ནི། ཉམས་ན་ཉེས་བཞི་མ་ཉམས་བརྒྱད་གཉིས་སོགས། ། འཕྲལ་ཡུན་ཕན་བདེ་ཀུན་གྱི་འབྱུང་གནས་སོ། ། བྱང་སེམས་ཀྱི་བསླབ་པ་ཉམས་ན་ཉེས་དམིགས་ཚད་མེད་པར་གསུངས་ལ། བསྡུ་ན་བཞི་སྟེ། སྤྱི་ལ་གསུམ། ཁྱད་པར་ལ་གཅིག་གོ། ། དེ་ལ་ལྟུང་བ་སྤྱིའི་ཉེས་དམིགས་གསུམ་ནི། སྟོན་པ་སངས་རྒྱས། ཡུལ་སེམས་ཅན། བྱེད་པ་པོ་རང་ཉིད་བཅས་བསླུས་ཏེ་ཁས་བླངས་ཉམས་པས་ཀུན་གྱིས་སྨད་པའི་གནས་སུ་འགྱུར་བ་དང༌། རྒྱལ་པོ་རྒྱལ་སྲིད་ཤོར་བ་ལྟར་སྙིང་དོན་ཤོར་བས་འཕྲལ་ཡུན་དུ་མི་འདོད་པ་ཐམས་ཅད་འདུ་བ་དང༌། ཕྱི་མ་ངན་འགྲོར་ལྟུང་ཞིང་དེ་ལས་ཐར་དཀའ་བའོ། ། ཁྱད་པར་རྩ་ལྟུང་ལས་འདས་ན། སྔོན་བསྐྱེད་པའི་བྱང་སེམས་ཀྱི་དགེ་རྩ་ཐམས་ཅད་ཐལ་བར་རློག་པ་དང༌། དེས་དཀོན་མཆོག་ལྷ་དང་བཅས་(༦༧ན)པ་བསླུས་པ་དང༌། དེའི་རྒྱུས་སེམས་ཅན་དམྱལ་བ་ཆེན་པོར་སྐྱེ་བར་འགྱུར་རོ། ། བཤགས་སྡོམ་བྱེད་པ་སོགས་ངོ་ཚ་ཁྲེལ་ཡོད་ཀྱི་ཕྱོགས་དང་ལྡན་ཀྱང་ལྟུང་བ་ལ་སྤྱོད་ན་ས་ཐོབ་པ་ལ་ཡུན་རིང་དུ་འགོར་བ་སྟེ། དེ་ལྟར་ལྟུང་བ་སྟོབས་ལྡན་དང༌། ། བྱང་ཆུབ་སེམས་སྟོབས་ལྡན་པ་དག ། འཁོར་བར་རེས་ཀྱིས་འདྲེ་བྱེད་ན། ། ས་ཐོབ་པ་ལ་ཡུན་རིང་ཐོགས། ། ཞེས་གསུངས་པའི་ཕྱིར་ཐོག་མ་ཉིད་ནས་མི་འབྱུང་བ་ལ་འབད་པར་བྱའོ། ། མ་ཉམས་པར་བསྲུངས་པའི་ཕན་ཡོན་ནི་མཐའ་ཡས་ཀྱང་བསྡུ་ན་སྨོན་པ་ལ་བརྒྱད། འཇུག་པ་ལ་དེའི་སྟེང་དུ་ཁྱད་པར་གྱི་ཕན་ཡོན་གཉིས་སུ་བཤད་དེ། མཉམ་མེད་དྭགས་པོས། སྨོན་སེམས་ཀྱི་ཕན་ཡོན་བརྒྱད་དེ། ཐེག་པ་ཆེན་པོ་པར་ཆུད་པར་འགྱུར་བ་དང༌། བྱང་ཆུབ་སེམས་དཔའི་བསླབ་པ་ཐམས་ཅད་ཀྱི་རྟེན་དུ་འགྱུར་བ་དང༌། སྡིག་པ་ཐམས་ཅད་རྩད་ནས་གཅོད་པར་འགྱུར་བ་དང༌། བླ་ན་མེད་པའི་བྱང་ཆུབ་ཀྱི་རྩ་བ་ཚུགས་པར་འགྱུར་བ་དང༌། བསོད་ནམས་དཔག་ཏུ་མེད་པ་འཐོབ་པར་འགྱུར་བ་དང༌། སངས་རྒྱས་ཐམས་ཅད་མཉེས་པར་འགྱུར་བ་དང༌། སེམས་ཅན་ཐམས་ཅད་ལ་ཕན་པར་འགྱུར་བ་དང༌། མྱུར་དུ་མངོན་པར་རྫོགས་པར་འཚང་རྒྱ་བར་འགྱུར་རོ། །ཞེས་གསུངས་སོ། ། འཇུག་པ་ལ་དེ་དག་གི་སྟེང་དུ་ཁྱད་པར་སེམས་བསྐྱེད་པ་ནས་བརྩམས་གཉིད་དམ་བག་མེད་པ་ལ་སོགས་པའི་དུས་ཐམས་ཅད་དུའང་རང་དོན་བསོད་ནམས་རྒྱུན་མི་འཆད་པ་དང༌། གཞན་གྱི་སྡུག་བསྔལ་སེལ་ཞིང་ཕན་པ་སྒྲུབ་པ་སོགས་གཞན་དོན་སྣ་ཚོགས་སུ་འབྱུང་བའོ། ། ཕ་རོལ་ཏུ་ཕྱིན་པ་དྲུག་པོ་རེ་རེ་ལའང་ཕན་ཡོན་ཚད་མེད་པར་གསུངས་པ་སོགས་མདོར་ན་འདི་ནས་སངས་རྒྱས་ཐོབ་ཀྱི་བར་གྱི་ཡོན་ཏན་མཐའ་དག་བྱང་ཆུབ་ཀྱི་སེམས་རིན་པོ་ཆེ་ཁོ་ན་ལས་འབྱུང་བས་འཕྲལ་དང་ཡུན་གྱི་ཕན་བདེ་མ་ལུས་པའི་འབྱུང་གནས་ཉིད་དོ། ། འཕྲོས་དོན་ཐེག་ཆེན་ལམ་གྱི་རིམ་པའང་། མདོར་བསྡུ་ན། མགོན་པོ་བྱམས་པས། (༦༧བ)མདོ་སྡེའི་རྒྱན་ལས། རིགས་དང་ཆོས་ལ་མོས་པ་དང༌། ། དེ་བཞིན་དུ་ནི་སེམས་བསྐྱེད་དང༌། ། སྦྱིན་པ་ལ་སོགས་བསྒྲུབ་པ་དང༌། ། སེམས་ཅན་རྣམས་ཡོངས་སྨིན་བྱེད་དང༌། ། སྐྱོན་མེད་པ་ལ་འཇུག་ཉིད་དང༌། ། ཞིང་ནི་ཡོངས་སུ་དག་པ་དང༌། ། མི་གནས་མྱ་ངན་འདས་པ་དང༌། ། བྱང་ཆུབ་མཆོག་ལམ་སྟོན་པའོ། ། ཞེས་གསུངས་པ་ལྟར། ཐོག་མར་སྐལ་བ་དང་ལྡན་པའི་གཞི་ཐེག་པ་ཆེན་པོའི་རིགས་སད་པའི་རྟགས་སུ་སྙིང་རྗེ་དང༌། མོས་པ་དང༌། བཟོད་པ་དང༌། དགེ་བ་སོགས་ལ་མངོན་པར་སྤྲོ་བའི་གང་ཟག་གིས་ཆོས་འདི་པ་ལ་མི་ཕྱེད་པའི་མོས་པས་མཚམས་སྦྱར་ཏེ་བསྟན་པ་སྤྱིའི་འཇུག་སྒོ་སྐྱབས་འགྲོ་དང༌། བྱེ་བྲག་ཐེག་ཆེན་གྱི་འཇུག་སྒོ་བྱང་ཆུབ་མཆོག་ཏུ་སེམས་བསྐྱེད་པ་སྔོན་དུ་འགྲོ་བས། རང་སྨིན་པར་བྱེད་པ་སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་དྲུག་བསྒྲུབ་ཅིང༌། གཞན་སེམས་ཅན་རྣམས་ཡོངས་སུ་སྨིན་པར་བྱེད་པ་བསྡུ་བའི་དངོས་པོ་བཞི་ལ་མཉམ་རྗེས་གཉིས་ཀྱི་སྒོ་ནས་ཅི་ནུས་སུ་འབད་པས་རང་ཤུགས་ཀྱིས་ཆོས་ལས་བློ་གཞན་དུ་མི་འགྲོ་ཞིང༌། དད་པ་དང་ངེས་འབྱུང་དང༌། བསྒོམ་པ་སོགས་ལ་སུན་པ་མེད་པར་པདྨོའི་མཚོ་ལ་ངང་མོ་འཇུག་པ་བཞིན་སྤྲོ་བ་ངང་གིས་འཕེལ་བ་ན་ཚོགས་ལམ་ཆུང་ངུ་ཐོག་མར་རྒྱུད་ལ་སྐྱེས་པ་ཡིན་ནོ། ། དེ་ནས་ཏིང་ངེ་འཛིན་སྐྱོན་མེད་པ་དང༌། ཞིང་ཡོངས་སུ་དག་པ་འཕགས་པའི་ཆོས་ལ་འཇུག་པའི་སླད་དུ་ལམ་ལ་འབད་པས། བདེན་པ་བཞིའི་དོན་ལ་གསལ་སྣང་ཅུང་ཟད་རྙེད་པ་ནི་ཚོགས་ལམ། དེ་ཉིད་བསྒོམས་པའི་སྟོབས་དང༌། ཚོགས་བསགས་པའི་སྟོབས་གཉིས་འཛོམས་པས་ཕུང་པོ་ལྔ་སྒྱུ་མ་ལྟར་རྟོགས་ཤིང༌། ཆོས་ཀྱི་བདག་མེད་ལ་གསལ་སྣང་རིམ་གྱིས་རྙེད་པ་ནི་སྦྱོར་ལམ། བདག་མེད་གཉིས་ཀྱི་དོན་ཇི་བཞིན་པ་དང་པོར་མཐོང་བ་མཐོང་ལམ། མཐོང་ཟིན་པའི་ཏིང་ངེ་འཛིན་ཁྱད་པར་ཅན་གྱི་འཇུག་ངོགས་ལ་གོམས་པར་བྱེད་པ་སྒོམ་ལམ། ཤེས་བྱ་དང་སྤང་བྱ་(༦༨ན)མཐར་ཕྱིན་པ་མི་སློབ་པའི་ལམ་སྟེ། དེ་ཡང་མཐོང་ལམ་གྱིས་ཡེ་ཤེས་ཁོང་དུ་ཆུད་པ་དང༌། ས་དང་པོ་གསར་དུ་ཐོབ་པ་དུས་མཉམ། དེ་ནས་སྒོམ་ལམ་གྱིས་ས་དགུ་པའི་བར་བགྲོད་ནས། མི་སློབ་པའི་ལམ་དུ་ས་བཅུ་པ་ཆོས་ཀྱི་སྤྲིན་རྒྱ་མཚོར་འཇུག་པ་སྟེ། མདོར་ན། དེ་ལྟ་བུའི་ལམ་དང་ས་དེ་དག་ཀྱང༌། རྟོགས་པ་སེམས་བསྐྱེད་ལ་བརྟེན་ནས། ཤེས་རབ་སྟོང་པ་ཉིད་བསྒོམས་པས་ཉེར་ལེན་གྱི་རྒྱུ་དང༌། ཐབས་སྙིང་རྗེ་ཆེན་པོས་ལྷན་ཅིག་བྱེད་པའི་རྐྱེན་བྱས་ནས་ལམ་ལྔ་འགྲུབ། ཀུན་རྫོབ་སེམས་བསྐྱེད་ལ་བརྟེན་ནས། ཐབས་སྙིང་རྗེས་ཉེར་ལེན་གྱི་རྒྱུ་དང༌། ཤེས་རབ་སྟོང་པ་ཉིད་ཀྱིས་ལྷན་ཅིག་བྱེད་པའི་རྐྱེན་བྱས་ནས་ས་བཅུ་ཐོབ་ལ། སངས་རྒྱས་པ་ནའང་ལམ་མཐར་ཐུག་པ་ཆོས་སྐུ་དང༌། ས་མཐར་ཐུག་པ་གཟུགས་སྐུ་ཡིན་ནོ། ། དེ་ལྟར་ས་ལམ་མཐར་ཕྱིན་པའི་འབྲས་བུ་ནི། ཤེས་རབ་ཆེན་པོས་འཁོར་བ་དང༌། སྙིང་རྗེ་ཆེན་པོས་མྱ་ངན་ལས་འདས་པའི་མཐའ་ལ་མི་གནས། བྱང་ཆུབ་མཆོག་སྟེ་སངས་རྒྱས་ཀྱི་སའི་ཡོན་ཏན་མཐའ་དག་ལྷུན་གྱིས་གྲུབ། ནམ་མཁའ་ཇི་སྲིད་བར་དུ་སེམས་ཅན་གྱི་ཁམས་ལ་ལམ་སྟོན་པའི་ཕྲིན་ལས་རྒྱུན་མི་འཆད་པར་འགྱུར་རོ། ། བྱང་ཆུབ་སེམས་ཀྱི་བསླབ་པ་བརྗོད་པའི་སྐབས་སོ། ། བྱང་ཆུབ་སེམས་ཀྱི་བསླབ་པ་བརྗོད་པ་སྐབས་གསུམ་པའི་འགྲེལ་པའོ།། །། བཞི་པ། རིག་འཛིན་གྱི་སྡོམ་པ་སྤྱིར་བཤད་པའི་སྐབས། ང༤ སྐབས་བཞི་པ་རིག་འཛིན་གྱི་སྡོམ་པ་བཤད་པའི་ལེའུ་འདི་ལ་དུམ་བུ་གཉིས། ཅ༡ སྔགས་སྡོམ་བཤད་པ། ཅ༢ སྡོམ་གསུམ་སྤྱི་དོན་བཤད་པའོ། ། ཅ༡ དང་པོ་ལ་གཉིས། ཆ༡ མདོར་བསྟན། ཆ༢ རྒྱས་བཤད་དོ། ། ཆ༡ དང་པོ་ནི། རིག་འཛིན་སྡོམ་པར་གསར་རྙིང་བཞེད་སྲོལ་གཉིས། ། གསང་སྔགས་རིག་པ་འཛིན་པའི་སྡོམ་པ་ལ་ཕྱི་འགྱུར་གསར་མར་གྲགས་ཆེ་བ་དང༌། སྔ་འགྱུར་རྙིང་མར་གྲགས་ཆེ་བའི་བཞེད་སྲོལ་ཐ་དད་པ་གཉིས་སུ་མཆིས་སོ། ། ཆ༢ གཉིས་པ་[རྒྱས་བཤད་]ལ་གཉིས། ཇ༡ སྔགས་གསར་མའི་ལུགས་དང༌། ཇ༢ རྙིང་མའི་ལུགས་སོ། ། ཇ༡ དང་པོ་ལའང་གཉིས། ཉ༡ འཇུག་ཚུལ་སྤྱིར་བསྟན། ཉ༢ སྡོམ་པ་དངོས་བྱེ་བྲག་ཏུ་བཤད་པའོ། ། ཉ༡ དང་པོ་ནི། (༦༨བ) ཕྱི་འགྱུར་ལུགས་ལ་རིམ་དང་ཅིག་ཅར་འཇུག ། སྔགས་ཀྱི་ཐེག་པ་འདི་ལ་ཕྱི་འགྱུར་བ་རྣམས་ཀྱི་ལུགས་སུ་སྐལ་དམན་རིམ་གྱིས་འཇུག་པ་དང༌། སྐལ་ལྡན་ཅིག་ཅར་དུ་འཇུག་པའི་ལུགས་གཉིས་སུ་གསུངས་པ་ལས། སྔ་མ་ནི། དངོས་སུ་དགྱེས་པ་རྡོ་རྗེའི་རྒྱུད་ལ་བརྟེན་ཀྱང་ཤུགས་ཀྱིས་རྒྱུད་གཞན་དག་ལ་དཀྲི་བའི་ཆིངས་ཆེན་པོ་ཡིན་ཏེ། བརྟག་གཉིས་ལས། དང་པོར་གསོ་སྦྱོང་སྦྱིན་པར་བྱ། ། དེ་རྗེས་བསླབ་པའི་གནས་བཅུ་ཉིད། ། ཅེས་སྤྱོད་པ་རིམ་འཇུག་གི་ཚུལ་དང༌། དེ་ལ་བྱེ་བྲག་སྨྲ་བ་བསྟན། ། མདོ་སྡེ་པ་ཡང་དེ་བཞིན་ནོ། ། དེ་ནས་རྣལ་འབྱོར་སྤྱོད་པ་ཉིད། ། དེ་ཡི་རྗེས་སུ་དབུ་མ་བསྟན། ། ཅེས་པ་ལྟ་བ་རིམ་འཇུག་དང༌། སྔགས་ཀྱི་རིམ་པ་ཀུན་ཤེས་ནས། ། དེ་རྗེས་ཀྱེ་ཡི་རྡོ་རྗེ་བསྟན། ། ཅེས་རྒྱུད་སྡེ་རིམ་འཇུག་གི་ཚུལ་བསྟན་པ་དང་མཐུན་པར། སྔ་འགྱུར་ཕུར་པ་ཞེ་སྡང་ཁྲོས་པའི་རྒྱུད་ལས་ཀྱང༌། སོ་སོ་ཐར་པ་དང་པོར་སྦྱིན། ། དེ་ལ་ཉན་ཐོས་ཆོས་རྣམས་བསྟན། ། དེ་ནས་བྱང་ཆུབ་སྡོམ་ཆེན་སྦྱིན། ། དེ་ལ་དབུ་མའི་ཆོས་རྣམས་བཤད། ། མཐར་ནི་འབྲས་བུ་ཐེག་ཆེན་གྱི། ། དབང་སྦྱིན་འབྲས་བུའི་རྒྱུད་འདི་བཤད། ། ཅེས་འབྱུང་ངོ༌། ། ཕྱི་མ་ནི། ཐེག་ཆེན་ཐུན་མོང་མ་ཡིན་པའི་སྐྱབས་སེམས་ཀྱི་སྡོམ་པ་ཙམ་རྒྱུད་ལ་ལྡན་པས་དབང་དང་དམ་ཚིག་བླང་ཆོག་པར་བཞེད་དོ། ། ཉ༢ གཉིས་པ་[སྡོམ་པ་དངོས་བྱེ་བྲག་ཏུ་བཤད་པ་]ལ་བདུན། ཏ༡ སྔགས་སྡོམ་གྱི་ངོ་བོ། ཏ༢ དེའི་དབྱེ་བ། ཏ༣ ཇི་ལྟར་ཐོབ་ཚུལ། ཏ༤ ཐོབ་མཚམས་ཀྱི་དུས། ཏ༥ གོང་འོག་གི་ཁྱད་པར་འདུ་ཚུལ་དང་བཅས་པ། ཏ༦ སྐྱེ་བའི་རྟེན། ཏ༧ དམ་ཚིག་དངོས་བཤད་པའོ། ། ཏ༡ དང་པོ་ནི། ངོ་བོ་གཟུང་འཛིན་འཕོ་བཅས་སྡོམ་པ་ཡི། ། བདེ་ཆེན་ཡེ་ཤེས་ཐབས་ལ་སེམས་མཚུངས་བཅས། ། མདོར་ན་སྒོ་གསུམ་ཐབས་ཤེས་བསྡོམས་པའི་ཁྲིམས། ། སྔགས་སྡོམ་གྱི་ངོ་བོ་ནི་བསྡམ་བྱ་གཟུང་འཛིན་གྱི་རྣམ་རྟོག་འཕོ་བའི་བག་ཆགས་དང་བཅས་པ། སྡོམ་བྱེད་བདེ་བ་ཆེན་པོའི་ཡེ་ཤེས་དེ་འཛིན་པར་དམ་བཅས་ནས། དེའི་ཐབས་ལ་སློབ་པའི་སེམས་པ་(༦༩ན)མཚུངས་ལྡན་དང་བཅས་པ་གང་ཞིག་རང་རྒྱུ་དབང་བསྐུར་སོ་སོ་ལས་མངོན་དུ་གྱུར་པའོ། ། རྒྱུད་སྡེ་བཞི་པོ་ཡེ་ཤེས་མངོན་དུ་བྱེད་པའི་ཐབས་ལ་ཟབ་མི་ཟབ་ཀྱི་ཁྱད་པར་ཡོད་ཀྱང་མངོན་དུ་བྱ་རྒྱུའི་ཡེ་ཤེས་ལ་ཁྱད་པར་མེད་པས་དབང་དོན་ཐམས་ཅད་རྒྱ་ཆེ་ཆུང་ཙམ་ལས་བདེ་བ་ཆེན་པོའི་ཡེ་ཤེས་སུ་འདོད་པ་ཡིན་ནོ། ། མདོར་ན། བསྡམ་བྱ་སྒོ་གསུམ་ཕྲ་བའི་བག་ཆགས་དང་བཅས་པ། སྡོམ་བྱེད་ཐབས་ཤེས་ཁྱད་པར་ཅན་གྱིས་ཟིན་པའི་སེམས་པ་ས་བོན་དང་བཅས་པ། རང་རྒྱུ་དབང་ལས་གསར་དུ་ཐོབ་པའི་སྡོམ་པའི་ཚུལ་ཁྲིམས་སོ། ། འདི་ལ་རིག་འཛིན་གྱི་སྡོམ་པ་ཞེས་བྱ་བའི་རིག་པ་ནི་གཟུང་འཛིན་གཉིས་མེད་མཆོག་ཏུ་མི་འགྱུར་བའི་བདེ་བ་ཆེན་པོའི་ཡེ་ཤེས་ཡིན་ལ། དེ་ཉིད་གཞི་གདོད་མ་ནས་གྲུབ་པ་སླར་གསལ་གདབ་པའི་ཚུལ་གྱིས་འཛིན་པ་དང༌། དེའི་ཐབས་ལྷའི་རྣམ་པའམ་ཡེ་ཤེས་ཀྱི་བྱིན་གྱིས་བརླབས་པ་ལ་སྡོམ་པར་གཞག་པ་སྔགས་ཀྱི་ཐེག་པའི་ཁྱད་ཆོས་སོ། ། གཞན་ཡང༌། ཀུན་རྫོབ་དོན་དམ་གཟུགས་ཅན་གྱི། ། བྱང་ཆུབ་སེམས་ནི་རབ་ཏུ་བསྐྱེད། ། ཅེས་ཕར་ཕྱིན་དང་ཐུན་མོང་བའི་སྟེང་དུ། ཀུན་རྫོབ་ཀུནྡ་ལྟ་བུ་སྟེ། ། དོན་དམ་བདེ་བའི་གཟུགས་ཅན་ནོ། ། ཞེས་ཁམས་བྱང་ཆུབ་ཀྱི་སེམས་དང་དེ་བརྟན་པ་ལས་བདེ་བ་ཆེན་པོ་མངོན་དུ་གྱུར་པས་གསང་སྔགས་ཀྱི་སྡོམ་པ་ཁྱད་པར་དུ་འཕགས་པའང་ཤེས་པར་བྱའོ། ། ཏ༢ གཉིས་པ་དབྱེ་བ་ལ་གསུམ། ཐ༡ བརྗོད་བྱ་