Tibetan
ཀྱི་དམ་ཚིག་གསང་བ་སྤྱི་རྒྱུད་ལས་གསུངས་པ་ནི་བཅུ་བཞི་སྟེ། ཐུན་མོང་དང་ཐུན་མོང་མ་ཡིན་པའི་དཀོན་མཆོག་གསུམ་ལ་དད་པ། གསང་སྔགས་རིག་སྔགས་གཟུངས་སྔགས་ཀྱི་ཚོགས་ལ་བཟང་ངན་མི་འཛིན་པར་ཕྱོགས་གཅིག་ཏུ་དད་པ། ཐེག་པ་ཆེན་པོ་ལ་ཁྱད་པར་མོས་ཤིང་དེའི་བསླབ་བྱ་སྒྲུབ་པ། བླ་མ་དང༌། བྱ་རྒྱུད་ལ་ཞུགས་པ། དེའི་དམ་ཚིག །བསྟན་པ་ལ་ཞུགས་པའི་མཛའ་བོ་བཞི་སྟེ་ཞིང་མཆོག་ལ་གུས་པ། རང་འདོད་ཀྱི་ལྷ་ལ་མ་གྲུབ་པའི་དྲག་ཤུལ་སྦོགས་ཆོག་དང་ཐུན་མོང་སྒྲུབ་པའི་ལྷ་ལའང་ལས་མ་གྲུབ་པས་མི་སྡང་བ། ཉ་སྟོང་བརྒྱད་གསུམ་སོགས་དུས་མཚམས་བཟང་པོར་མཆོད་པ་མི་བཅག་པ། མུ་སྟེགས་སྟོན་པ་སོགས་གཞན་གྱི་གཞུང་མི་བཀུར་བ། གློ་བུར་དུ་ལྷག་པའི་མགྲོན་ལ་ཟས་སྐོམ་སོགས་མཆོད་པ། སྲོག་ཆགས་ཀུན་ལ་བྱམས་པའི་སེམས་བརྟན་པ། བསོད་ནམས་ཀྱི་ཚོགས་གོང་དུ་སྤེལ་བ། དཔུང་བཟང་ལས་བཤད་པའི་བླང་དོར་དང་ལྡན་པས་བཟླས་བརྗོད་ལ་བརྩོན་པ། རང་རིགས་སུ་མ་ཟད་རིགས་སྤྱིར་བསྟན་པའི་དམ་ཚིག་གཞན་རྣམས་ཀྱང་བསྲུང་བ་ལ་བརྩོན་པ། དམ་ཚིག་མེད་པ་དང་ཉམས་པ་ལ་སྔགས་དང་ཕྱག་རྒྱ་མི་སྦྱིན་པ། སྔགས་རྒྱུད་རྣམས་ཀྱང་སྦ་ཞིང་སྲུང་ལ་རང་ཉིད་ཀྱིས་ཐོས་བསམ་སྒོམ་པས་རྟོགས་པར་བྱ་བ་རྣམས་སོ། ། ཞར་བྱུང་ལེགས་གྲུབ་ནས་གསུངས་པ་སུམ་ཅུའང་སྡོམ་དུ་བཀོད་ན། དཀོན་མཆོག་སྔགས་དང་ཐེག་པ་ཆེ་ལ་མོས། །(༧༤ན) ལྷ་ལ་དུས་མཚམས་མགྲོན་ལ་གློ་བུར་མཆོད། ། བསོད་ནམས་ཚོགས་བསགས་བཟླས་བརྗོད་ཚུལ་བཞིན་བརྩོན། ། སྤྱི་དང་བྱེ་བྲག་རིགས་ཀྱི་དམ་ཚིག་བརྟན། ། རྒྱུད་སྲུང་རྟོགས་དང་སྒོ་གསུམ་ཉེར་ཞི་བྱ། ། ཁྲུས་དང་གཙང་སྦྲ་བཅུ་གཉིས་སྒྲུབ་ཕྱོགས་སོ། ། ལྷ་ལ་མི་སྡང་གཞན་གྱི་གཞུང་མི་མཆོད། ། མ་གནང་མི་ལེན་གསང་སྔགས་རང་བཟོར་མིན། ། གདོན་གྱི་ལས་མིན་ལས་སྒྲུབ་གཞན་མི་བསྒྱུར། ། དམ་མེད་མི་སྦྱིན་ཕྱག་རྒྱ་སོགས་མི་འགོངས། ། མ་བསྡོམས་པ་མིན་མ་གནང་ཟས་མི་ཟ། ། བྱམས་པ་མི་གཏོང་མ་ཟིན་སྨྲ་བ་མིན། ། ཁྲོས་ནས་དྲག་ཤུལ་མི་སྤྱོད་བདག་མི་བརྙས། ། གཞན་སུན་མི་འབྱིན་གནས་ངན་ལེན་རྣམས་སྤངས། ། ལྟད་མོ་མི་ལྟ་བཤང་གཅི་ཆུར་མི་དོར། ། བཅོ་བརྒྱད་དེ་དག་དགག་པའི་སྒོ་ནས་གསུངས། ། ཞེས་སོ། ། ན༢ གཉིས་པ་[རིགས་སོ་སོའི་དམ་ཚིག་]ནི། སོ་སོའི་རིགས་ཀྱི་དམ་ཚིག་རྒྱུད་ལྟར་སྤྱད། ། འཇིག་རྟེན་ལས་འདས་པའི་རིགས་གསུམ། འཇིག་རྟེན་པའི་རིགས་གསུམ་སོ་སོར་དམིགས་བསལ་དུ་བཤད་པའི་བླང་དོར་ཇི་སྙེད་ཡོད་པ་རྣམས་ཀྱང་སྤྱིའི་དམ་ཚིག་གཞིར་བཞག་པའི་སྟེང་དུ་རང་རིགས་ཀྱི་དམ་ཚིག་རྒྱུད་དང་རྟོག་པ་རྣམས་ནས་གསུངས་པ་ལྟར་སྤྱད་པར་བྱའོ། ། དམ་ཚིག་དེ་རྣམས་ཀྱང་བྱ་སྤྱོད་ཀྱི་དབང་ཞུས་པ་རྣམས་ཀྱིས་བསྲུང་བྱ་ཡིན་པར་མ་ཟད་རྣལ་འབྱོར་བླ་མེད་ལ་ཞུགས་པ་རྣམས་ཀྱིས་ཀྱང་བསྲུང་དགོས་པར་དགྲ་ནག་གི་འགྲེལ་པ་རིན་ཆེན་སྒྲོན་མེ་ལས་བཤད་དོ། ། ན༣ གསུམ་པ་[ཉམས་ན་ཕྱིར་བཅོས་བྱ་བའི་ཚུལ་]ནི། འགལ་ན་རང་རིག་འབུམ་མམ་མེས་རྨོངས་གཟུངས། ། ཞི་བའི་སྲེག་བླུགས་སོགས་ཀྱིས་ཕྱིར་བཅོས་བྱ། ། དམ་ཚིག་རྣམས་ཐོག་མར་ཤེས་པར་བྱས་ནས་ཉེས་ལྟུང་གིས་མི་གོས་པ་ལ་འབད། གལ་ཏེ་འགལ་བར་གྱུར་ན་དེ་མ་ཐག་ཏུ་ཕྱིར་བཅོས་དགོས་ཤིང༌། བཅོས་ཚུལ་རང་རང་གི་རིག་པའི་སྙིང་པོ་འབུམ་ཕྲག་གཅིག་བཟླ་བའམ། ཡང་ན། མེས་རྨོངས་བྱེད་པའི་གཟུངས་ཏེ། རྡོ་རྗེ་མི་ཕམ་པ་མེ་ལྟར་(༧༤བ)རབ་ཏུ་རྨོངས་པར་བྱེད་པའི་གཟུངས་སྟོང་ཕྲག་གཅིག་བཟླ་བའམ། ཡང་ན། ཞི་བའི་སྲེག་བླུགས་གྲངས་དེ་སྙེད་དམ། སོགས་ཁོངས་ནས་དཀྱིལ་འཁོར་དུ་སླར་ཡང་ནས་ཡང་དུ་འཇུག་པ་རྣམས་ཀྱིས་ཕྱིར་བཅོས་བྱ་བ་སྤྱི་རྒྱུད་ནས་གསུངས་ཤིང༌། དུས་ཀྱང་ལེགས་གྲུབ་ལས། ཉིན་མོ་བག་མེད་བྱས་པ་དག ། མཚན་མོ་སོ་སོར་བཤགས་པར་བྱ། ། ནུབ་མོར་བྱས་པའང་ནངས་པར་བཤགས། ། ཞེས་གསུངས་པ་ལྟར། ཉིན་མོར་བྱུང་བ་རྣམས་མཚན་མོ་དང༌། དེ་ལ་བྱུང་བ་རྣམས་ཉིན་མོར་བཤགས་ཏེ་དག་པར་བྱ་དགོས་སོ། ། ད༢ གཉིས་པ་སྤྱོད་རྒྱུད་ཀྱི་དམ་ཚིག་བཤད་པ་ནི། སྤྱོད་རྒྱུད་མི་དགེ་བཅུ་དང་དམ་པའི་ཆོས། ། བྱང་ཆུབ་སེམས་སྤང་སེར་སྣ་འགྲོ་ལ་གནོད། ། བཅུ་བཞི་སྤང་བྱ་ཕྱིར་བཅོས་གོང་འོག་མཚུངས། ། སྤྱོད་པའི་རྒྱུད་སྤྱིར་དམ་ཚིག་ཁྱད་པར་བ་བཅུ་བཞི་རྣམ་སྣང་མངོན་བྱང་ལས་གསུངས་ཏེ། དེའང་ལུས་ཀྱི་མི་དགེ་བ་གསུམ། ངག་གི་བཞི། ཡིད་ཀྱི་གསུམ་བཅས་མི་དགེ་བ་བཅུ་སྤངས་པས་དགེ་བ་བཅུ་ལ་གནས་པ་དང༌། དམ་པའི་ཆོས་གཏོང་བ། བྱང་ཆུབ་ཀྱི་སེམས་སྤང་བ། ཆོས་ནོར་ལ་སེར་སྣ་བྱེད་པ། འགྲོ་བ་ལ་གནོད་པར་བྱེད་པ་ནི་རྩ་བ་བཞི་སྟེ་བསྡོམས་པས་བཅུ་བཞི་ནི་སྤང་བྱའི་དམ་ཚིག་གོ། ། འོ་ན་མི་དགེ་བ་བཅུ་སྤངས་པ་ནི་ཉན་རང་དང༌འཇིག་རྟེན་མུ་སྟེགས་པ་ལའང་ཡོད་པས་དེ་དང་ཁྱད་པར་ཅི་ཡོད་སྙམ་ན། ཉན་རང་ཐབས་ཤེས་རབ་དང་མི་ལྡན། འཇིག་རྟེན་མུ་སྟེགས་པ་དངོས་ལ་ཞེན་ཅིང་གཞན་རྐྱེན་གྱིས་འཇུག་ལ། བྱང་སེམས་ཐབས་ཤེས་རབ་དང་ལྡན་པས་ཆོས་ཐམས་ཅད་མཉམ་པ་ཉིད་ཀྱི་སྒོ་ནས་གཞན་གྱི་དྲིང་མི་འཇོག་པས་ཁྱད་པར་ཆེའོ། ། བྱེ་བྲག་རིགས་སོ་སོའི་དམ་ཚིག་ཀྱང་དེ་ཉིད་ཀྱི་རྒྱུད་སོ་སོ་ལས་འབྱུང་བ་ལྟར་བླང་དོར་བྱ་དགོས་ལ། ཉམས་ན་ཕྱིར་བཅོས་བྱ་བའི་ཚུལ་ནི་གོང་བྱ་རྒྱུད་སྐབས་སུ་བཤད་པ་ལྟར་བྱ་དགོས་ཤིང་། དེ་ནི་འོག་ཏུ་འཆད་པར་འགྱུར་བའི་རྣལ་འབྱོར་བླ་མེད་རྒྱུད་ཀྱི་དམ་(༧༥ན)ཚིག་ལའང་མཚུངས་སོ། ། རྗེ་པད་དཀར་ཞབས་ཀྱིས་སྐབས་འདིར་དམ་ཚིག་ཆེན་པོ་ལ་འཇུག་པའི་ཕྱིར་འཇུག་པའི་སེམས་དང༌། དམ་ཚིག་ཆེན་པོ་ཉིད་ལ་ཞུགས་པ་གནས་པའི་སེམས་དང༌། དམ་ཚིག་ཆེན་པོར་ཆུད་ནས་དེ་ལ་སེམས་ཅན་རབ་ཏུ་འགོད་པ་ལྡང་བའི་སེམས་ཀྱི་སྡོམ་པ་གསུམ་ནི་བསླབ་པར་བྱ་བའི་དམ་ཚིག་གསུམ་དང༌། སྔར་སྨོས་པ་དེ་ཉིད་རབ་བྱུང་གི་རྩ་ལྟུང་བཅུ་བཞིར་བཞག །ཁྱིམ་པ་ལ་ལོག་གཡེམ། སྲོག་གཅོད། མ་བྱིན་ལེན། རྫུན་སྨྲ། ལོག་ལྟ་རྣམས་ཀྱི་སྟེང་དུ་ལྟུང་བའི་རྩ་བ་བཞི་བསྣན་པས་དགུར་དབྱེ་བར་མཛད་དོ། ། ད༣ གསུམ་པ་རྣལ་འབྱོར་རྒྱུད་ཀྱི་དམ་ཚིག་བཤད་པ་ལ་གསུམ། ན༡ བཤད་རྒྱུད་གཙོ་བོར་བྱེད་པ་རིགས་ལྔའི་དམ་ཚིག ། ན༢ རྩ་རྒྱུད་གཙོ་བོར་བྱེད་པ་ལྷ་ལྔའི་དམ་ཚིག་དང་རྩ་ལྟུང་བཅུ་པོ། ན༣ བཤད་རྒྱུད་ཀྱི་བཤད་པའི་རྣམ་གྲངས་གཞན་བསྟན་པའོ། ། ན༡ དང་པོ་ལ་གཉིས། པ༡ མདོར་བསྟན། པ༢ རྒྱས་བཤད་དོ། ། པ༡ དང་པོ་ནི། རྣལ་འབྱོར་རྒྱུད་ལ་དགག་སྒྲུབ་ཕྱོགས་བཅུ་བཞི། ། རྣལ་འབྱོར་རྒྱུད་ལ་བཤད་རྒྱུད་རྡོ་རྗེ་རྩེ་མོ་ལས་རྒྱ་ཆེར་གསུངས་པའི་གཙོ་བོར་དགག་ཕྱོགས་བཅུ་བཞི་དང༌། སྒྲུབ་ཕྱོགས་བཅུ་བཞི་སྔོན་གྱི་མཁས་པ་རྣམས་ཀྱིས་བསྡུ་བར་མཛད་དོ། ། པ༢ གཉིས་པ་ལ་གཉིས། ཕ༡ སྒྲུབ་ཕྱོགས་དང༌། ཕ༢ དགག་ཕྱོགས་ཀྱི་བཅུ་བཞི་བཤད་པའོ། ། ཕ༡ དང་པོ་ནི། སྒྲུབ་ཕྱོགས་རིགས་ལྔར་མཆོག་གསུམ་བཟུང་བ་གསུམ། ། སྦྱིན་བཞི་འཛིན་གསུམ་བརྩོན་གཅིག་རིམ་བཞིན་ནོ། ། དེའང༌། སངས་རྒྱས་ཆོས་དང་དགེ་འདུན་ཏེ། ། དཀོན་མཆོག་གསུམ་ལ་སྐྱབས་སུ་སོང༌། ། ཞེས་སོགས་ཀྱི་སྡོམ་པ་བསྒྲགས་ཏེ་སྣོད་བརྟགས་པ་ན་སྣོད་རུང་དུ་གྱུར་པ་དེས་དཀྱིལ་འཁོར་དུ་འཇུག་པའི་སྐབས་དང་འབྲེལ་བར། ཇི་ལྟར་དུས་གསུམ་མགོན་པོ་རྣམས། ། ཞེས་པ་ནས། སེམས་ཅན་མྱ་ངན་འདས་ལ་འགོད། ། ཅེས་པའི་བར་ལན་གསུམ་གྱིས་ཕས་ཕམ་པ་བཅུ་བཞི་ལས་ལྡོག་ཅིང༌། སྒྲུབ་ཕྱོགས་ཡན་ལག་བཅུ་(༧༥བ)བཞི་རྫོགས་པས་སྔགས་སྡོམ་ཆོ་ག་བཞིན་དུ་བཟུང་བ་ནི་ཐོག་མར་དམ་ཚིག་ཇི་ལྟར་བཟུང་བའི་ཚུལ་ཡིན་ལ། དེ་ལྟར་བཟུང་བའི་དམ་ཚིག་སྒྲུབ་ཕྱོགས་བཅུ་བཞི་རིགས་ལྔར་བསྡུས་པ་ནི། དཀོན་མཆོག་གསུམ་བཟུང་བ་སྟེ། རྣམ་སྣང་གི་རིགས་ཀྱི་དམ་ཚིག་གསུམ། རྡོ་རྗེའི་ཕྱག་རྒྱ་དང༌། དྲིལ་བུའི་ཕྱག་རྒྱ་དང༌། སློབ་དཔོན་བཟུང་བ་སྟེ། རྡོ་རྗེ་རིགས་ཀྱི་དམ་ཚིག་གསུམ། ཆོས་དང༌། ཟང་ཟིང་དང༌། མི་འཇིགས་པ་དང༌། བྱམས་པའི་སྦྱིན་པ་སྟེ། རིན་ཆེན་རིགས་ཀྱི་དམ་ཚིག་བཞི། ཕྱི་བྱ་སྤྱོད་དང༌། གསང་བ་རྣལ་འབྱོར་རྒྱུད་དང༌། ཐེག་པ་གསུམ་འཛིན་པ་སྟེ། པདྨའི་རིགས་ཀྱི་དམ་ཚིག་གསུམ། མཆོད་པའི་ལས་ལ་བརྩོན་པའི་ལས་ཀྱི་རིགས་ཀྱི་དམ་ཚིག་གཅིག་སྟེ་བཅུ་བཞིའོ། ། དེ་དག་རིགས་སོ་སོའི་དམ་ཚིག་ཏུ་འཇོག་པའི་རྒྱུ་མཚན་ཡང་། རྣམ་སྣང་ནི། དེ་བཞིན་གཤེགས་པ་རྣམས་ཀྱི་སྐུའི་རིགས་ཡིན་ལ། སྐུ་ནི། དགེ་ཆོས་ཐམས་ཅད་ཀྱི་རྟེན་བྱེད་ཅིང་དགེ་ཆོས་ཐམས་ཅད་ཀྱི་རྩ་བ་ཡང་གསུམ་ལ་སྐྱབས་སུ་འགྲོ་བ་ཡིན་པས་སོ། ། མི་བསྐྱོད་པ་ནི། ཐུགས་ཀྱི་རིགས་ཡིན་ལ། ཐུགས་ནི། སྟོང་ཉིད་དང་སྙིང་རྗེ་དབྱེར་མེད་དུ་གྲུབ་པ་དེའི་བདག་ཉིད་རྡོར་དྲིལ་དང་དེའི་དོན་སྟོན་པའི་སློབ་དཔོན་བཟུང་བའོ། ། རིན་འབྱུང་ནི། ཡོན་ཏན་གྱི་རིགས་ཡིན་ལ། ཡོན་ཏན་ནི། ཡིད་བཞིན་གྱི་ནོར་བུ་ལྟར་འདོད་དགུ་འབྱུང་བས་སྦྱིན་པ་བཞིས་སེམས་ཅན་རྣམས་ཀྱི་རེ་འདོད་སྐོང་བའོ། ། འོད་དཔག་མེད་ནི། གསུང་གི་རིགས་ཡིན་ལ། གསུང་ལས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་འབྱུང་ཞིང་བརྒྱད་ཁྲི་བཞི་སྟོང་ཡང་ཕྱི་ནང་གསང་ཐེག་གསུམ་དུ་འདུས་པས་སོ། ། དོན་གྲུབ་ནི། ཕྲིན་ལས་ཀྱི་རིགས་ཡིན་ལ། ཕྲིན་ལས་ཀྱི་ངོ་བོ་ཡང་སངས་རྒྱས་མཆོད་པ་དང་སེམས་ཅན་གྱི་དོན་བྱེད་པར་ངེས་ཤིང་མཆོད་པའི་ལས་ཅི་ནུས་བྱ་བས་ནི་དེ་གཉིས་ཀ་འགྲུབ་པས་སོ། ། ཕ༢ གཉིས་པ་[དགག་ཕྱོགས་ཀྱི་བཅུ་བཞི་བཤད་པ་]ནི། དགག་ཕྱོགས་དཀོན་མཆོག་བྱང་སེམས་དོར་བ་དང༌། ། ལྷ་དང་སྔགས་རྒྱ་བླ་མར་སྨད་ཅིང་འགོམས། ། བཟའ་མིན་གསང་བསྒྲགས་འདོར་འཚེ་དམན་ལ་དགའ། ། སྐྱོ་དང་སྤྱོད་དོར་བྱ་(༧༦ན)མིན་བྱ་བ་སྟེ། ། དེ་དག་བཤད་རྒྱུད་གཙོར་བྱས་རིགས་ལྔའིའོ། ། དགག་པའི་ཕྱོགས་ནས་སྨོས་པའི་བསླབ་བྱ་ནི། དཀོན་མཆོག་གསུམ་མི་སྤང༌། བྱང་སེམས་མི་འདོར། ལྷ་རྣམས་ལ་མི་སྨད། སྔགས་རྒྱ་ལ་མི་སྨད། སློབ་དཔོན་ལ་མི་བརྙས། བླ་མའི་བཞོན་པ་སོགས་དང་མཚོན་ཆ་ཕྱག་མཚན་མི་འགོམ། བཟའ་བྱ་མིན་པ་མི་བཟའ། གསང་བའི་ཡེ་ཤེས་མི་བསྒྲགས། སྔགས་རྒྱའི་བསླབ་པ་མི་འདོར། གནོད་འཚེ་མི་བྱ། ཐེག་དམན་ལ་མི་དགའ། སེམས་ཅན་གྱི་དོན་ལ་དཀའ་བས་མི་སྐྱོ། ཕྱིན་དྲུག་གི་སྤྱོད་པ་མི་འདོར། བྱ་མིན་མི་བྱ་བ་བཅས་བཅུ་བཞི་སྟེ། དགག་སྒྲུབ་དེ་དག་ནི་བཤད་རྒྱུད་གཙོར་བྱས་པའི་རིགས་ལྔའི་དམ་ཚིག་ཅེས་བྱའོ། ། ན༢ གཉིས་པ་རྩ་རྒྱུད་གཙོ་བོར་བྱས་པའི་ལུགས་གཉིས་བཤད་པ་ནི། རྩ་རྒྱུད་དཔལ་མཆོག་ལུགས་སོགས་གཞན་དུ་ཤེས། ། རྩ་རྒྱུད་དེ་ཉིད་འདུས་པ་དང་དཔལ་མཆོག་ནས་གསུངས་པའི་ལུགས་སོགས་འདིར་ཡི་གེ་མང་གིས་དོགས་ནས་མ་སྤྲོས་པས་གཞན་དུ་ཤེས་པར་བྱའོ་ཞེས་སྨོས་པ་འགྲེལ་པའི་ཚིག་གིས་ཁ་བསྐངས་པ་ལ། དང་པོ་དེ་ཉིད་འདུས་པ་ལས་གསུངས་པ་ལྷ་ལྔའི་དམ་ཚིག་ནི། བྱང་ཆུབ་ཀྱི་སེམས་རྣམ་པ་གཉིས་ལ་གོམས་པར་བྱེད་པ་དང༌། དེ་ཉིད་ནན་ཏན་གྱིས་གོང་དུ་སྤེལ་བ་ནི་དེ་བཞིན་གཤེགས་པའི་དམ་ཚིག ། ཉན་ཐོས་རྣམས་འདོད་པའི་ཡུལ་ལ་ཟུག་རྔུ་དང་འདྲ་བར་ལྟ་ཞིང་སྤོང་བ་དེ་བཞིན་དུ་སྐྱོ་བ་མི་བསྐྱེད་པར་བྱང་ཆུབ་ཀྱི་སེམས་བརྟན་པ་དང༌། རྗེས་སུ་ཆགས་པ་དང༌། མགུ་བ་ལ་སོགས་པས་རྗེས་སུ་ཆགས་པ་དེ་བཞིན་གཤེགས་པའི་རིགས་ཀྱི་དམ་ཚིག ། གདུག་ཅིང་གདུལ་དཀའ་བའི་སེམས་ཅན་རྣམས་ལ་ཁྲོ་བ་ལྟར་བཅོས་ཏེ་མངོན་སྤྱོད་ཀྱི་ལས་ལ་སློབ་པ་རྡོ་རྗེ་རིགས་ཀྱི་དམ་ཚིག ། དོན་དམ་སྟོང་ཉིད་དུ་ཤེས་པའི་ངང་ལས་ཕྱག་རྒྱ་ཆེན་པོའི་སྐུར་ལྡངས་པ་ལ་སོགས་པས་འགྲོ་བ་ལ་ཇི་ལྟར་ཕན་པ་དེ་ལྟར་སྦྱོར་བ་ནི་པདྨའི་རིགས་ཀྱི་དམ་ཚིག ། དངོས་པོ་རྣམ་པ་(༧༦བ)མང་ཉུང་གང་ཡང་རུང་ཉིན་རེ་བཞིན་དུ་ཇི་ལྟར་འདོད་པ་སྦྱིན་པ་རིན་ཆེན་རིགས་ཀྱི་དམ་ཚིག་སྟེ། གཞན་དོན་གྱི་ཕྲིན་ལས་སུ་སོང་བའི་ཆ་ནས་ལས་ཀྱི་རིགས་ཀྱི་དམ་ཚིག་ཤུགས་ལས་ཐོན་པ་ཡིན་ནོ། ། གཉིས་པ་ལ་དཔལ་མཆོག་དང་པོ་ལས་རྩ་ལྟུང་བཅུར་གསུངས་པ་ནི། སྨོན་སེམས་སྤོང་བ། འཇུག་སེམས་སྤོང་བ། བདེན་གཉིས་སེམས་བསྐྱེད་དེ་ཟླ་བ་རྡོ་རྗེའི་ཏིང་འཛིན་སྤོང་བ། རྗོད་བྱེད་སྡེ་སྣོད་འཐིང་བསླད་ཀྱིས་སྤོང་བ། བརྗོད་བྱ་ཉམས་ལེན་སྤོང་བ། རྨོངས་པས་ཆོས་ལ་སྨོད་པ། ཕྱག་རྒྱ་བཞི་འབྲེལ་གྱི་རྣལ་འབྱོར་གྱིས་བྱིན་གྱིས་བརླབས་པའི་ལུས་སེམས་དཀའ་ཐུབ་ཀྱིས་གདུང་བ། དམ་ཚིག་རྣལ་འབྱོར་རྡོར་དྲིལ་སྤོང་བ། ཕྱག་རྒྱ་བཞི་སྤངས་ནས་ཐ་མལ་དུ་གནས་པ། རྡོ་རྗེ་སློབ་དཔོན་སྤང་བ་སྟེ་བཅུ་དང༌། དེ་སྟེང་རྡོ་རྗེ་འབྱུང་བ་ལས་བཤད་པའི་མ་སྨིན་པ་ལ་གསང་བ་སྒྲོག་པ་བསྣན་པས་བཅུ་གཅིག་གོ། ། ན༣ གསུམ་པ་བཤད་རྒྱུད་ལ་བརྟེན་པའི་རྣམ་གྲངས་གཞན་ཞར་བྱུང་ཐོབ་ཚུལ་བཅས་བཤད་པ་ནི། ཡང་ན་རིགས་ལྔ་སོ་སོ་སྤྱི་མདོར་བསྡུས། ། སྤྱི་ལ་རྩ་བ་ཡན་ལག་གོ་རིམ་བཞིན། ། བྱང་སེམས་ཕམ་པ་བཅུ་བཞི་རྩ་བཞི་ཆང༌། ། སྡོམ་དང་དམ་པ་བསྟེན་སོགས་དགེ་ཆོས་སྡུད། ། ལྡོག་ཕྱོགས་བཞི་བྲལ་དོན་བྱེད་ཚུལ་ཁྲིམས་ཏེ། ། མི་བརྙས་ཐུན་མོང་བཟུང་རྣམས་ཕྱི་མའོ། ། བསླབ་གཞི་ཀུན་སྲུང་ཁས་བླངས་ཐོབ་པ་སྟེ། ། རྩ་ལྟུང་བཅུ་སོགས་ཆོ་གས་ཐོབ་པར་འདོད། ། ཡང་བཤད་རྒྱུད་རྡོ་རྗེ་རྩེ་མོ་ལས་སྡོམ་པ་བསྒྲག་བཟུང་གསུངས་པ་འདི་ཉིད་བླ་མེད་དང་ཐུན་མོང་དུ་འགྱུར་བའི་སྡོམ་པའི་ཆིངས་སུ་སྣང་བས་དེའི་ལུགས་ལྟར་ན། རིགས་ལྔ་སོ་སོའི་དམ་ཚིག །སྤྱིའི་དམ་ཚིག །སྡོམ་པ་མདོར་བསྡུས་ཏེ་བསྒྲག་པ་གསུམ། དང་པོ་ནི། གོང་དུ་བཤད་པ་ལྟར་རོ། ། སྤྱི་ལ། རྩ་བ་དང་། ཡན་ལག་གཉིས། དེ་དག་གི་ངོས་འཛིན་ཀྱང་འཆད་འགྱུར་གོ་རིམ་ལྟར་སྦྱར་ཏེ། རྩ་བའི་དམ་ཚིག་ནི། ནམ་མཁའི་སྙིང་པོའི་མདོར་གསུངས་པའི་བྱང་སེམས་ཀྱི་ཕམ་པ་བཅུ་བཞི་སྤོང་བའོ། (༧༧ན)ཡན་ལག་གི་དམ་ཚིག་ནི། ཚུལ་ཁྲིམས་རྣམ་པ་གསུམ་སྟེ་དེའང་བསྒྲག་ཚིག་གི་སྐབས་སུ་མ་མཐའ་དགེ་བསྙེན་གྱི་བསླབ་པ་ཙམ་མེད་ཀ་མེད་ཀྱི་དབང་དུ་མཛད་དེ། ཁྱོད་ཀྱིས་སྲོག་ཆགས་བསད་མི་བྱ། ། ཞེས་སོགས་འབྱུང་བ་ལྟར་རྩ་བ་བཞི་ཆང་དང་བཅས་པ། གཞན་ཡང་། སེམས་ཅན་གྱི་དོན་དུ་འགྱུར་ན་མ་གཏོགས་ཉེས་པར་སྤྱོད་པ་མཐའ་དག་སྤོང་བ་སྡོམ་པའི་ཚུལ་ཁྲིམས། དམ་པ་ཉེ་བར་བསྟེན་པ་དང༌། སོགས་ཁོངས་ནས་རྣལ་འབྱོར་ཅན་ལ་བསྙེན་བཀུར། ཕྱིན་དྲུག་དང་ངོ་བོ་གཅིག་པའི་ཐེག་ཆེན་དགེ་བཅུ་སྒྲུབ་པ་དགེ་བ་ཆོས་སྡུད་ཀྱི་ཚུལ་ཁྲིམས། ཐེག་དམན་ལ་འདོད་པ། གཞན་དོན་ལ་རྒྱབ་ཀྱིས་ཕྱོགས་པ། འཁོར་བ་སྤང་བ། མྱང་འདས་ལ་ཆགས་པ་སྟེ་ཐེག་ཆེན་དང་མི་མཐུན་པའི་ལྡོག་ཕྱོགས་བཞི་དང་བྲལ་བ་ནི་སེམས་ཅན་དོན་བྱེད་ཀྱི་ཚུལ་ཁྲིམས་སོ། ། ལྷ་དང་ལྷ་མིན་གནོད་སྦྱིན་སོགས་ལ་མི་བརྙས་པ་དང༌། རྡོ་རྗེ་སོགས་ཕྱག་རྒྱ། བླ་མའི་བཞོན་པ། ཕྱག་མཚན་མཚོན་ཆ་དང་ལྷའི་མཚན་མ་རྣམས་མི་འགོམ་པ་དང༌། སྡོམ་པ་འོག་མ་རྣམས་གོང་མར་འདུ་བས་ཕར་ཕྱིན་དང་བྱ་སྤྱོད་ཀྱི་སྡོམ་པ་ཐུན་མོང་བ་རྣམས་ཀྱང་བཟུང་བ་ནི་ཕྱི་མ་སྟེ། མདོར་བསྡུས་བསྒྲགས་པ་ལས་བཟུང་བའོ། ། པད་དཀར་ཞབས་ཀྱིས། རིགས་ཀྱི་རྗེས་སུ་མཐུན་པའི་དམ་ཚིག་སྒྲུབ་ཕྱོགས་ཀྱི་ཆོས་བཅུ་བཞི། དེའི་མི་མཐུན་ཕྱོགས་ཀྱི་ལྟུང་བ་ལ་དགག་ཕྱོགས་བཅུ་བཞི་རྩ་བ་དང༌། ཁྱོད་ཀྱིས་སྲོག་ཆགས་བསད་མི་བྱ། །ལ་སོགས་པས་བསྟན་པ་ཡན་ལག་གི་ལྟུང་བ། ཉམས་སུ་བླངས་པའི་དམ་ཚིག་གོང་སྨོས་ལྷ་ལྔའི་དམ་ཚིག་རྣམས་ཏེ་རྣམ་པ་གསུམ་དུ་བསྡུ་བར་མཛད་དོ། ། སྤྱིར་རྣལ་འབྱོར་རྒྱུད་ལས་དམ་ཚིག་དང་ལྟུང་བའི་རྣམ་གྲངས་བཤད་པ་ནི་ཤིན་ཏུ་མང་བས་མཐའ་གཅིག་ཏུ་བསྡུ་མི་ནུས་སོ། ། དེ་ལྟར་བཤད་པའི་དགག་སྒྲུབ་ཀྱི་ཕྱོགས་བཅུ་བཞི་སོགས་བསླབ་བཞི་ཀུན་སྲུང་བ་ནི་ཁས་བླངས་པའི་ཚུལ་གྱིས་ཐོབ་པ་དང༌། རྩ་ལྟུང་བཅུ་ལ་སོགས་པ་ནི་ཆོ་གས་(༧༧བ)ཐོབ་པའི་སྡོམ་པར་འདོད་དོ། ། ཉམས་ན་ཕྱིར་བཅོས་པའི་ཚུལ་སྔར་སྨོས་པ་དང༌། འཆད་འགྱུར་སྙིང་པོ་རྒྱན་ལས་གསུངས་པ་རྣམས་ཀྱང་སྦྱར་རོ། ། ད༤ བཞི་པ་རྣལ་འབྱོར་བླ་མེད་ཀྱི་དམ་ཚིག་བཤད་པ་ལ་གསུམ། ན༡ དམ་ཚིག་རྣམ་གཞག་རྒྱས་པར་བཤད། ན༢ དབྱེ་བསྡུའི་རྣམ་གྲངས་གཞན་བསྟན། ན༣ ཉམས་པའི་ཚད་དང་ཕྱིར་བཅོས་ཀྱི་ཐབས་བསྟན་པའོ།། ན༡ དང་པོ་ལ་གཉིས། པ༡ མདོར་བསྟན། པ༢ རྒྱས་བཤད་དོ། ། པ༡ དང་པོ་ནི། བླ་མེད་བརྟུལ་ཞུགས་སྡོམ་པ་དམ་ཚིག་གསུམ། ། རྣལ་འབྱོར་བླ་མེད་ཀྱི་དབང་གིས་སྡོམ་པ་ནོས་པས་བསྲུང་བར་བྱ་བ་ནི། རྡོ་རྗེའི་བརྟུལ་ཞུགས། རིགས་སོ་སོའི་སྡོམ་པ། རྩ་བ་ཡན་ལག་གི་དམ་ཚིག་སྟེ། བླང་དོར་བྱ་བའི་རིགས་གསུམ་ཡོད་དོ། ། པ༢ གཉིས་པ་ལ་གསུམ། ཕ༡ བརྟུལ་ཞུགས། ཕ༢ སྡོམ་པ། ཕ༣ དམ་ཚིག་བཤད་པའོ། ། ཕ༡ དང་པོ་ནི། བརྟུལ་ཞུགས་སོ་སོར་དམིགས་སུ་གསུངས་པ་སྟེ། ། འདུས་པར་རིགས་ལྔ་དགོངས་ཏེ་གསུངས་པ་བཞི། ། ཐ་མལ་གྱི་ལས་སྤྱོད་དང་རྣམ་པར་རྟོག་པ་བརྟུལ་ནས་སྒོ་གསུམ་རྡོ་རྗེ་སེམས་དཔའི་ཚུལ་ལ་ཞུགས་པ་ནི་བླ་མེད་ཀྱི་སྡོམ་པའི་ཐོག་མར་བཤད་ལ། དེའང་རྒྱུད་སྡེ་སོ་སོ་ནས་རང་ལུགས་ཐ་དད་དམིགས་བསལ་དུ་གསུངས་པ་རྣམས་ཏེ། དཔལ་གསང་བ་འདུས་པར། བསྐྱེད་རིམ་གྱི་བརྟུལ་ཞུགས་སུ། ཤ་ཆེན་སྐུ། བཤང་བ་དང་གཅི་བ་གསུངས། ཁུ་བ་དང་ཁྲག་ཐུགས་ཏེ་རྡོ་རྗེ་གསུམ་མམ། ཡང་ན་བདུད་རྩི་ལྔ་པོ་རིགས་ལྔའི་དམ་ཚིག་ཏུ་བསྟེན་པར་གསུངས་པ་དང༌། རྫོགས་རིམ་ལ། དེ་དག་ཕུང་པོ་ལྔ་པོ་འོད་གསལ་དུ་སྡུད་པའི་ཐབས་ལ་བསླབ་པ་དང༌། རྒྱུད་ལེའུ་བཞི་པ་ལས།