Tibetan
སྲོག་གཅོད་པ་ནི་སེམས་ཅན་གང༌། ། རྫུན་དུ་སྨྲ་ལ་དགའ་བ་གང༌། ། གཞན་གྱི་ནོར་ལ་ཆགས་པ་དང༌། ། རྟག་ཏུ་འདོད་པ་སྤྱོད་གང་དང༌། ། ཞེས་དགོངས་ཏེ་གསུངས་པའི་དམ་ཚིག་བཞིར་བཤད་དེ། བསྐྱེད་རིམ་ལ་གནས་པས་གཞན་དོན་དུ་འགྱུར་ན། དེ་དག་དངོས་སུ་ཡང་བྱ་ལ། རྫོགས་རིམ་ལ་གནས་པས་(༧༨ན)རླུང་འགོག་པ་སྲོག་གཅོད། རྟེན་འབྲེལ་གྱི་རིམ་པ་ཤེས་པས་ཆོས་སྨྲ་བ་རྫུན་སྨྲ། སངས་རྒྱས་ཀྱི་ཡེ་ཤེས་ཕྱག་རྒྱའི་སྟོབས་ལས་སྒྲུབ་པ་མ་བྱིན་ལེན། ཆོས་ཉིད་དེ་བཞིན་ཉིད་ལ་སྤྱོད་པའི་འདོད་པ་སྤྱོད་པ་སྟེ། ལས་དང་པོ་བས་ཀྱང་འདི་དག་མོས་པའི་ཚུལ་གྱིས་བཟུང་ཞིང་རྒྱུ་ཚོགས་ལ་བསླབ་དགོས་པ་ཡིན་ནོ། ། བདེ་མཆོག་ཚངས་སྤྱོད་ཉེར་གཉིས་རིག་མར་བརྒྱད། ། འཁོར་ལོ་བདེ་མཆོག་གི་རྒྱུད་གཞུང་རྣམས་སུ་ཚངས་སྤྱོད་ཉི་ཤུ་རྩ་གཉིས་ཞེས་གསུངས་པ་ནི་དམ་པ་སྔ་མ་ཕལ་པོ་ཆེ་རྩ་ལྟུང་བཅུ་བཞི། ཡན་ལག་སྦོམ་ལྟུང་བརྒྱད་བསྡོམས་པ་ལ་བཞེད་པས་དེ་ནི་ཕྱིས་ནས་འཆད་པར་འགྱུར་ཞིང༌། ཐུན་མོང་མ་ཡིན་པའི་བརྟུལ་ཞུགས་ནི། ཚེས་བཅུའི་མཆོད་པ། ལག་མཆོད། རྡོ་རྗེ་བཞིའི་ངེས་དོན་གྱི་མཆོད་པ། ཕྱག་རྒྱ་བཞི་བརྟེན་པ། དཔའ་བོ་དང་རྣལ་འབྱོར་མ་མཆོད་པ། བརྡའི་ཀུན་སྤྱོད། ཐུན་མོང་མ་ཡིན་པའི་དམ་ཚིག་བརྒྱད་རྣམས་སུ་ཅི་རིགས་པར་འདུ་བའི་ཐོག་མར་ཚེས་བཅུའི་མཆོད་པ་ལའང་ནང་གསེས་སུ་གཞོན་ནུ་མ་དང་རིགས་ལྡན་མའི་མཆོད་པ། ཕྱི་རོལ་མཆོད་པ། གཏོར་ཆོག་ཆེ་ཆུང་སོགས་མང་དུ་ཡོད་ཅིང༌། ཕྱི་མའི་སྡོམ་ནི། གཡོན་པའི་ཀུན་སྤྱོད་རྨོངས་པས་བགྲོད། ། ཐ་དད་འཛིན་དང་གུས་པ་ལྷོད། ། ཕྱག་རྒྱ་མི་སྒྲུབ་ཕྱག་རྒྱ་འབྲལ། ། སྤྱོད་པ་ཉམས་དང་དམ་རྫས་ཁྲོ། ། ཞེས་པ་སྟེ། དང་པོ་ནི། གཡོན་པའི་ཀུན་སྤྱོད་ཡིན་ཏེ། རྒྱུན་གྱི་དུས་སུ་དུས་བཞིར་མ་དྲན་པ་དང༌། ཚོགས་དང་ལག་མཆོད་སོགས་ཁྱད་པར་གྱི་དུས་སུ་མ་བྱས་ན་ལྟུང་བའོ། ། གཉིས་པ་ནི། ལམ་སྒོམ་པ་དང༌། དབང་བསྐུར་བ་དང༌། བཅུད་ལེན་དང༌། དམ་ཚིག་གི་རྫས་ལ་སོགས་པ་མ་ཡིན་པར་འཛག་པ་དོན་གཉེར་གྱི་བུད་མེད་ལ་སྲེད་པའི་དབང་འབའ་ཞིག་གིས་ཕྱག་རྒྱ་ལ་བགྲོད་ན་ལྟུང་བའོ། ། གསུམ་པ་ནི། རང་གཞན་ཐ་དད་དུ་འཛིན་པ་སྟེ། ཆོས་ཐམས་ཅད་རང་བཞིན་སྟོང་པ་ཉིད་དུ་མཉམ་པར་རྣམ་པར་མི་རྟོག་(༧༨བ)པའི་ཚུལ་གྱིས་སྐྱོང་དགོས་པ་ཡིན་ལ། ཐུན་བཞིར་དེ་ཉིད་མི་དྲན་ན་ལྟུང་བའོ། ། བཞི་པ་ནི། ལམ་གཞན་ལ་མོས་པས་ལམ་འདི་ལ་གུས་པ་ལྷོད་པའམ་སྐྱོན་དུ་འཛིན་པས་ཐེ་ཚོམ་སྐྱེས་ཏེ་སྒྲུབ་པ་ལ་ཆེད་ཆེར་མི་འཛིན་ན་ལྟུང་བའོ། ། ལྔ་པ་ནི། ཐིག་ལེ་འཆིང་བ་དང་བདེ་སྟོང་དུ་སྐྱོང་བའི་ནུས་པ་དང་ལྡན་པས་ཕྱག་རྒྱ་བརྟེན་པར་བྱ་སྟེ་མི་བརྟེན་ན་ལྟུང་བའོ། ། དྲུག་པ་ནི། ལས་རྒྱ་ལ་བརྟེན་ཏེ་ཡེ་ཤེས་སྒྲུབ་པའི་འགོ་བརྩམས་ནས་བདེ་བ་ཆེན་པོའི་ཡེ་ཤེས་བརྟན་པར་མ་བྱས་པ་དང༌། སྤྱོད་པ་ལ་སོགས་པའི་ལམ་གྱི་འབྲས་བུ་མངོན་དུ་མ་གྱུར་བར་དུ་གྲོགས་ཕྱག་རྒྱ་དང་མི་འབྲལ་བར་བྱ་སྟེ་བྲལ་ན་ལྟུང་བའོ། ། བདུན་པ་ནི། ཕྱག་རྒྱའི་ལམ་ལས་བྱང་ཆུབ་ཀྱི་སེམས་ཀུནྡ་དབབ་བཟློག་གི་སྦྱོར་བས་ཕྱིར་མི་ལྟུང་ཞིང་སྤྱི་བོར་མི་གཡོ་བར་བརྟན་པར་བྱེད་པ་ལས། གསང་དབང་བསྐུར་བ་སོགས་དམིགས་བསལ་གྱི་དུས་མ་ཡིན་པར་ཐིག་ལེ་འཛག་པར་བྱེད་ན་ལྟུང་བའོ། ། བརྒྱད་པ་ནི། ཤེས་རབ་མའི་བྷ་ག་ལས་བྱུང་བའི་སིཧླ་ག་པུར་དྲི་ཆུ་ལ་སོགས་པ་བཟའ་ཞིང་བསྟེན་པར་བྱ་བ་ཡིན་པ་ལ། མི་གཙང་བའི་སེམས་ཀྱིས་མི་བཟའ་ཞིང་ཡིད་ཀྱིས་སྤོང་ན་ལྟུང་བའོ། ། དེ་རྣམས་སྔགས་སྐྱེས་ཞིང་སྐྱེས་ལྷན་སྐྱེས་ཏེ། ཕོ་ཉ་གསུམ་གྱི་ལམ་སྒྲུབ་པ་ལ་གནས་པ་ཙམ་གྱིས་གཙོ་བོར་བསྒྲུབ་པར་བྱ་དགོས་པས་རིག་མ་ལ་བརྟེན་པའི་བརྟུལ་ཞུགས་བརྒྱད་དུ་གྲགས་སོ། ། གུར་ལས། བཅུ་བཞི་མངོན་བརྗོད་བླ་མར་དགུ། ། རྡོ་རྗེ་གུར་གྱི་རྒྱུད་ལས། ལས་དང་པོ་བའི་བསྒྲུབ་བྱ་བཅུ་བཞིར་གསུངས་ཏེ། སྡོམ་ནི། དཀོན་མཆོག་མི་སྤང་དམ་ཚིག་རྣམས་ལ་སྤྱད། ། རྡོ་རྗེ་དྲིལ་བུ་གླེགས་བམ་གཙུག་ཏུ་བཅངས། ། སྦྱིན་སྲེག་དཀྱིལ་འཁོར་རབ་གནས་ལས་ལ་བརྩོན། ། འབྱུང་པོར་གཏོར་མ་སྦྱིན་ཞིང་བཟླས་བསྒོམ་འབད། ། སློབ་མར་ཆོས་བཤད་སེམས་ཅན་བྱམས་པས་བསྡུ། ། རྒྱལ་ལ་ཚོགས་གསོག་ཛམ་ལར་ཆུ་སྦྱིན་བཏང༌། ། མཆོད་རྟེན་སཱཙྪ་དགེ་བའི་ལས་བྱ་འོ། ། ཞེས་སོ། །(༧༩ན) མངོན་བརྗོད་བླ་མར། རྒྱུན་གྱི་བྱ་བའི་སྤྱོད་པ། མཆོད་པའི་དེ་ཉིད་ཀྱི་སྤྱོད་པ། གསང་ཞིང་སྤང་བའི་སྤྱོད་པ། རིག་པའི་ཕོ་ཉའི་སྤྱོད་པ། སྔགས་ཀྱི་བཟླས་པའི་སྤྱོད་པ། ཞིང་ལ་གུས་པའི་སྤྱོད་པ། སྤྱོད་པའི་བརྟུལ་ཞུགས་ཀྱི་སྤྱོད་པ། ཀློག་པ་ཐོས་བསམ་གྱི་སྤྱོད་པ། སྒྲུབ་པ་བརྟན་པོར་བྱིན་གྱིས་བརླབས་པའི་སྤྱོད་པ་སྟེ། རྣམ་པ་དགུར་གསུངས་སོ། ། ཁྱད་པར་དུས་ཀྱི་འཁོར་ལོར་ཉི་ཤུ་ལྔ། ། བསྲུང་བྱ་ལྔ་ནི་རྩ་བཞི་ཆང་དང་བཅས། ། ཁྱད་པར་དུས་ཀྱི་འཁོར་ལོའི་རྒྱུད་ལས་རྡོ་རྗེ་སེམས་དཔའི་བརྟུལ་ཞུགས་ཉི་ཤུ་རྩ་ལྔར་གསུངས་པ་ལས། ཐོག་མར་བསྲུང་བྱ་ལྔ་ནི། རྩ་བཞི་ཆང་དང་བཅས་པ་སྟེ། དེའང༌། འཚེ་དང་མི་བདེན་སོགས་ཀྱིས་བསྟན་པའི་དོན་ལས། འཚེ་བ་ནི་མིའམ་མིར་ཆགས་པ་བསོད་པ་ལྟ་ཞོག་སྟེ། ཐ་ན་གྲོག་སྦུར་ཡན་ཆད་ལ་འཚེ་བ་གཞིར་བཅས་འགོག་པ། མི་བདེན་པ་ནི་མིའི་ཆོས་བླ་མ་སྨྲ་བ་ལྟ་ཞོག་སྟེ་བཞད་གད་ཙམ་གྱི་ཆེད་དུའང་རྫུན་མི་སྨྲ་བ། ཚངས་སྤྱོད་ཀྱི་སྡོམ་པ་ནོད་མ་ནོད་གང་ཡིན་ཀྱང་རུང་སྟེ་གཞན་གྱི་བུད་མེད་སོགས་ལོག་གཡེམ་གྱི་ཡུལ་ཡོད་དགུ་ཅོག་སྤོང་བ། གཞན་ནོར་རིན་ཐང་ལོངས་པ་ལྟ་ཅི་སྨོས་པས་ཏིལ་གྱི་ཤུན་པ་ཡན་ཆོད་བདག་གིར་མི་བྱེད་པ་སྟེ་རྩ་བ་བཞི་དང༌། ཆང་གི་བཏུང་བ་དམ་ཚིག་གི་ཆེད་དུ་དང་ལམ་སྒོམ་པའི་ཆེད་དུ་བརྟེན་པ་ནི་མ་བཀག་གི། སྨྱོས་པ་ལས་བགེགས་འདྲེན་པར་གྱུར་པ་རྣམས་སྤང་བར་བྱ་སྟེ། དགེ་བསྙེན་གྱི་བསླབ་པའི་གནས་ལྔ་པོ་ངོ་བོ་ངེས་པ་དང་ཀུན་སློང་རྒྱ་ཆེར་བཏང་བ་སྟེ་ལྷག་པའི་སྡིག་པ་ལྔ་ཞེས་བྱའོ། ། དེ་དག་བསྲུང་བར་ནུས་ཤིང་འདོད་ན་བརྟུལ་ཞུགས་ལྷག་མ་ཉི་ཤུ་སྦྱིན་པར་བྱ་བ་ནི། རྒྱན་པོ་བཟའ་མིན་ངན་ཚིག་འབྱུང་པོ་དང༌། ། ཀླ་ཀློའི་ཆོས་ནི་བྱ་བ་མིན་པ་ལྔ། ། དུད་འགྲོ་བྱིས་པ་ཕོ་མོ་མཆོད་རྟེན་སྣུན། ། གྲོགས་དཔོན་སངས་རྒྱས་དགེ་འདུན་ཡིད་བརྟོན་འཁུ། ། གཟུགས་སྒྲ་དྲི་རོ་རེག་བྱ་ཞེན་པ་སྟེ། ། སྣུན་མིན་ལ་སོགས་དམ་སྡོམ་ཀུན་གྱི་གཞི། ། དེ་ལ་(༧༩བ)རྒྱན་པོ་སྟེ། ཆོ་ལོ་ནི་དེ་ཉིད་ཀྱི་དུས་འདས་ཏེ་དགེ་བའི་ཕྱོགས་ཉམས་པར་བྱེད་པ། བཟའ་མིན་ཏེ་ཁ་ན་མ་ཐོ་བའི་ཟས་ནི་རིན་དང་བཟའ་བའི་དོན་དུ་བསད་པའི་ཤ་ལ་སོགས་པ་སྟེ་ཆོས་དང་མི་མཐུན་པའི་ལོག་པའི་འཚོ་བ། ཚིག་ངན་ཀློག་པ་ནི་དམག་དང་ཆོམ་རྐུན་དང་རྒྱལ་པོ་སོགས་ཀྱི་གཏམ་སྨྲ་བ། འབྱུང་པོའི་ཆོས་ནི་རིག་བྱེད་ལས་འབྱུང་བའི་ཕ་མེས་ཀྱི་མཚུན་གསོལ་བ་སོགས་དང༌། མཐོ་རིས་ཀྱི་ཆེད་དུ་ཕྱུགས་ཀྱི་མཆོད་སྦྱིན་བྱེད་པ། ཀླ་ཀློའི་ཆོས་ནི་མཁོ་བའི་བརྟུལ་ཞུགས་འཛིན་པ་རྣམས་ཏེ་ཉེས་པའི་སྡིག་པ་བྱས་པ་མ་ཡིན་པ་ལྔ། བ་ལང་སོགས་དུད་འགྲོ། བྱིས་པ། སྐྱེས་པ་ཕོ། སྐྱེས་དམན་མོ། མཆོད་རྟེན་གྱི་སྒྲས་བསླབ་པ་ལྡན་པའི་གང་ཟག་དང་དཀོན་མཆོག་གསུམ་གྱི་རྟེན་གསུམ་ལ་སྣུན་ཞིང་བཤིག་པ་ནི་གསོད་པ་ལྔ་སྟེ། འདི་དག་འཚེ་བ་ལས་ལོགས་སུ་སྨོས་པ་ནི་འདི་རྣམས་བརྟུལ་ཞུགས་སུ་འཛིན་པ་ལས་ལྡོག་པའི་ཕྱིར་དུའོ། ། ཆོས་འཇིག་རྟེན་ལ་ཕན་པའི་གྲོགས་དང༌། ལུགས་གཉིས་ཀྱིས་བཀུར་འོས་རྗེ་དཔོན་རྒན་རབས་སོགས་དང༌། ལྷ་མིའི་བླ་མ་སངས་རྒྱས་དང༌། དགེ་འདུན་དང༌། ཡིད་བརྟན་པ་བླ་མ་ལ་འཁུ་བ་སྟེ། འཁུ་བ་ལྔ་དང༌། མིག་གཟུགས་ལ་ཞེན་པ་ནས་ལུས་རེག་བྱ་ལ་ཞེན་པའི་བར་ཡང་སྲིད་འཕེན་ནུས་ཀྱི་ལས་སུ་རྫོགས་པར་ཞེན་པ་ལྔ། ཕྱི་མ་རྣམས་ལའང་འདི་དག་ཚིག་གི་སྒྲ་སྦྱར་བས་སྣུན་མིན་ལ་སོགས་པ་ལྔ་ཕྲག་གསུམ་སྟེ་ཐམས་ཅད་བསྡོམས་པའི་སྡོམ་པ་ཉེར་ལྔ་པོ་འདི་དག་ནི་དམ་ཚིག་དང་སྡོམ་པ་ཐམས་ཅད་ཀྱི་གཞི་རྟེན་དུ་གྱུར་པའོ། ། དེའང་བརྟུལ་ཞུགས་ཉེར་ལྔ་པོ་འདི་དག་ནི་ངེས་པར་དབང་གི་སྔོན་དུ་འགྲོ་དགོས་པའི་བརྟུལ་ཞུགས་ཡིན་ལ། གོང་མ་རྣམས་དེ་ལྟར་མ་ངེས་ཀྱང་འདིར་ཕྱོགས་གཅིག་ཏུ་འཆད་བདེ་བ་དང༌། དེ་དག་ལས་ཕལ་ཆེར་དབང་བསྐུར་དངོས་གཞི་མ་ཐོབ་ཀྱང་དཀྱིལ་འཁོར་དུ་ཞུགས་པ་ཙམ་གྱིས་དེ་དང་དེའི་བརྟུལ་ཞུགས་འཛིན་དགོས་པའང་ཡོད་པས་ཐོག་མར་སྨོས་པའོ། །(༨༠ན) ཕ༢ གཉིས་པ་བསྒྲུབ་བྱ་སྡོམ་པ་བཤད་པ་ལ་གཉིས། བ༡ ཐུན་མོང་དང་། བ༢ ཐུན་མོང་མ་ཡིན་པའོ། ། བ༡ དང་པོ་ནི། སྡོམ་པ་ཐུན་མོང་ལྔའམ་རིགས་དྲུག་ནི། ། མི་བསྐྱོད་ཕྱག་རྒྱ་བླ་མ་རིན་པོ་ཆེ། ། སྦྱིན་པ་རྣམ་བཅུ་འཁོར་ལོར་བཟའ་བ་བཅུ། ། རལ་གྲིར་མཆོད་པ་པདྨར་འགོག་པའི་སྡོམ། ། རྡོར་སེམས་བྱང་ཆུབ་སེམས་ཏེ་དྲང་ངེས་གཉིས། ། འདིར་ཉམས་སུ་བླང་བྱ་སྒྲུབ་པའི་ཚུལ་ཁྲིམས་ལ་སྡོམ་པ། སྤང་བྱ་བཟློག་པའི་ཚུལ་ཁྲིམས་ལ་དམ་ཚིག །ཞེས་བཞག་པའི་ལུགས་དང༌། དེ་གོ་ཟློག་པ་དང༌། དེ་གཉིས་དོན་གཅིག་མིང་གི་རྣམ་གྲངས་སུ་བྱེད་པའི་ལུགས་སྲོལ་གསུམ་དུ་ཡོད་པ་དོན་ལ་ཐམས་ཅད་འགལ་བ་མེད་ཀྱང་འཆད་བདེ་བས་སྔ་མའི་དབང་དུ་བྱས་ཏེ། སྡོམ་པའི་སྒྲ་དོན། སམྦརའི་སྒྲ་ལས། ཐ་མལ་སྒོ་གསུམ་བག་ཆགས་དང་བཅས་པ་ཐབས་ཤེས་ཁྱད་པར་ཅན་གྱིས་རྡོ་རྗེ་བཞིའི་ངོ་བོ་སྡོམ་པའི་དོན་ཏེ། དེ་ལ་རྒྱུད་སྡེ་ཐུན་མོང་གི་རིགས་ལྔ་སྤྱི་དང་བྱེ་བྲག་གི་སྡོམ་པ་རྣམས་གོང་དུ་སྨོས་པ་ཉིད་དེ། འམ་ཞེས་པ་ནི་ཚིག་ཕྱི་མ་འབྱེད་པའི་སྒྲའོ། ། འདིར་དཔལ་དུས་ཀྱི་འཁོར་ལོ་ལས་གསུངས་པ་རྒྱལ་བ་རིགས་དྲུག་གི་དམ་ཚིག་ལའང་གཉིས། དང་པོ་དྲང་དོན་ལྟར་ན། མི་བསྐྱོད་པ་སྟེ། རྡོ་རྗེ་རྩེ་ལྔ་པའི་རིགས་ལ། རྡོ་རྗེ་ཐུགས་སྟོང་པ་ཉིད། དྲིལ་བུ་གསུང་སྙིང་རྗེ་ཆེན་པོ། ཕྱག་རྒྱ་ལྷའི་སྐུ་སྟེ་ལུས་ངག་ཡིད་གསུམ་གྱི་གསང་བ་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ལས་ནམ་ཡང་འདའ་བར་མི་བསྐྱོད་པའི་ངོ་བོ་ཉིད་དུ་གདོད་མ་ནས་གནས་པ་ནི་གཞིའི་དམ་ཚིག ། དེ་རྣལ་འབྱོར་པའི་བློའི་རིམ་པས་ལུས་ངག་ཡིད་གསུམ་རྡོ་རྗེ་གསུམ་དུ་ངོ་འཕྲོད་ཅིང༌། རྣལ་འབྱོར་དུ་མོས་པ་ནི་འཛིན་པ་སྟེ། ཉེར་ལེན་གྱི་རྒྱུའི་སྟེང་ནས་བཞག་པ་དང༌། ལྷན་ཅིག་བྱེད་པའི་རྐྱེན་གྱི་གཙོ་བོ་ནི་བླ་མ་ཡིན་པས་དེ་ཉིད་བསྟེན་ཚུལ་རྣམ་པ་ཐམས་ཅད་ཀྱིས་བསྟེན་དགོས་པ་ནི་འདའ་བྱ་མིན་པའི་དམ་ཚིག ། དེ་ཉིད་གཙོ་བོར་བཟུང་སྟེ་ང་རྒྱལ་བཅགས་(༨༠བ)ལ་བསྟེན་པར་བྱེད་པ་ནི་འཛིན་པའི་དོན་ཏོ། ། མཚོན་བྱེད་རྟགས་ཀྱི་རྡོར་དྲིལ་མཚན་ཉིད་དང་ལྡན་པ། ལག་པའི་ཕྱག་རྒྱ་དང་རུས་པའི་ཕྱག་རྒྱ་ལྔ་ལ་སོགས་པ་རྣམས་ཀྱང་ཚུལ་བཞིན་བཅངས། རིན་ཆེན་རིགས་ལ་སྦྱིན་པ་རྣམ་པ་བཅུ་ནི། རིན་ཆེན་ལྕགས་ཟངས་བ་ལང་རྟ། ། གླང་ཆེན་བུ་མོ་ཡུལ་འཁོར་དང༌། ། འདོད་པའི་ཆུང་མ་རང་གི་ཤ། ། སྦྱིན་པ་རྣམ་པ་བཅུ་རུ་འདོད། ། ཅེས་པ་རྣམས་ལས་དང་པོ་བས་དངོས་སུ་སྦྱིན་ནུས་པ་སྦྱིན་ཞིང༌། མི་ནུས་པ་སྨོན་ལམ་གྱི་ཡུལ་དུ་བྱ། འཁོར་ལོའི་དམ་ཚིག་ཤ་ལྔ་བདུད་རྩི་ལྔ་ལ་སོགས་པའི་བཟའ་བའི་དམ་ཚིག་དང༌། དེའི་ཆོས་མཐུན་རྣལ་འབྱོར་དང་མཐུན་པའི་ཁ་ཟས། དེ་ལ་ག་པུར་རྒྱུ་ཡི་ཕྱིར། ། ཤ་ནི་རྟག་ཏུ་བཟའ་བར་བྱ། ། ཁྱད་པར་དུ་ཡང་ཆང་ཉིད་དོ། ། ཞེས་པ་རྣམས་བསྟེན། རལ་གྲིའི་རིགས་ཀྱི་དམ་ཚིག་ཡུལ་མཆོག་ལ་བསོད་ནམས་བསགས་པ་སྟེ། སངས་རྒྱས་བྱང་ཆུབ་སེམས་དཔའ་རྣམས་ལ་མེ་ཏོག་སོགས་མཆོད་པའི་རྣམ་པ་ཇི་སྙེད་པས་མཆོད། པདྨ་རིགས་ཀྱི་དམ་ཚིག་ནི། ཚངས་སྤྱོད་དེ་དབང་བདུན་ཡན་ཆད་དུ་ལོག་གཡེམ་འགོག་པ་དང༌། དབང་གོང་མ་རྣམས་སུ་བུད་མེད་དང་འགྲོགས་པ་ལས་ཀྱང་ཁུ་བ་མི་འཕོ་བའི་འཛག་མེད་ཀྱི་སྡོམ་པ་བསྲུང༌། རྡོ་རྗེ་སེམས་དཔའ་སྟེ། རྡོ་རྗེ་རྩེ་གཅིག་པའི་རིགས་ཀྱི་དམ་ཚིག་ཏུ་དམིགས་མེད་ཀྱི་སྙིང་རྗེ་དང་དོན་དམ་རིག་པའི་ཡེ་ཤེས་ཀྱི་སྟོང་ཉིད་ཟུང་དུ་འཇུག་པའི་བྱང་ཆུབ་ཀྱི་སེམས་བཟུང་བའོ། ། གཉིས་པ་ངེས་དོན་ལྟར་ན། མི་བསྐྱོད་པའི་རིགས་ལ། རྡོ་རྗེ་ཐུགས་ཀྱི་དམ་ཚིག་མི་འགྱུར་བའི་བདེ་བ་དང༌། དྲིལ་བུ་གསུང་གི་དམ་ཚིག་ངག་གཞོམ་མེད་ཀྱི་སྒྲ་དང༌། ཕྱག་རྒྱ་སྐུའི་དམ་ཚིག་ལུས་སྟོང་གཟུགས་སུ་བྱེད་པ་ལ་བསླབ། སློབ་དཔོན་གྱི་དམ་ཚིག་ནི། སྒྲུབ་པ་པོའི་ཉམས་རྟོགས་ཀྱི་ཁྱད་པར་གྱིས་མོས་གུས་མཆོག་དམན་གྱི་ཁྱད་པར་མ་གཏོགས་རྣམ་པ་འདྲ་བ་ཡིན། རིན་ཆེན་རིགས་ཀྱི་དམ་ཚིག་ནི། རླུང་བཅུ་(༨༡ན)དབུ་མར་བཅིངས་པ་དང༌། རྣམ་སྣང་རིགས་ཀྱི་དམ་ཚིག་ནི། ཕུང་པོ་ལྔའི་དྭངས་མ་དང༌། དབང་པོ་ལྔའི་དྭངས་མ་འཛག་མེད་དུ་བྱེད་པ་དང༌། དོན་ཡོད་རིགས་ལ། དྲོད་དང་རྗེས་ཆགས་ཀྱིས་གཏུམ་མོ་འབར་བས་ཐིག་ལེ་ཞུ་བ་དང༌། ལྡོག་སྟེ་བདེ་བས་ཕུང་ཁམས་དབང་ཡུལ་ཚིམས་པར་བྱེད་པ་དང༌། འོད་དཔག་མེད་ཀྱི་རིགས་ལ། སྟོང་གཟུགས་ཕྱག་ཆེན་ལ་བསྟེན་ནས་ཞུ་བདེ་འགྱུར་མེད་དུ་བསྒྲུབ་པ། རྡོ་རྗེ་སེམས་དཔའི་རིགས་ལ། མི་འགྱུར་བའི་བདེ་བ་དང་རྣམ་ཀུན་མཆོག་ལྡན་ཟུང་འཇུག་ཏུ་བསྒོམ་པ་རྣམས་ཏེ། དེའང་བསྐྱེད་རིམ་པས་དྲང་དོན། རྫོགས་རིམ་པས་ངེས་དོན་ལ་བསླབ་བོ། ། སྤྱིར་གསང་སྔགས་ཀྱི་ལམ་ཐམས་ཅད་ཚོགས་གསུམ་གྱིས་བསྡུས་པའི་ཕྱིར། བསོད་ནམས་ཚོགས་ཀྱི་ཕྱིར་རིན་པོ་ཆེའི་སྦྱིན་པ་དང་ལས་རིགས་ཀྱི་མཆོད་པའི་སྡོམ་པ་གཉིས། ཚུལ་ཁྲིམས་ཀྱི་ཚོགས་ཀྱི་རྒྱུ་འཁོར་ལོའི་དམ་ཚིག །དངོས་པདྨའི་དམ་ཚིག་གཉིས། ཡེ་ཤེས་ཀྱི་ཚོགས་རྡོ་རྗེ་རྩེ་ལྔ་རྩེ་གཅིག་གཉིས་ཏེ། སྔགས་ཀྱི་དམ་ཚིག་དང་སྡོམ་པ་མཐའ་དག་འདིར་འདུ་བ་ཡིན་ནོ། ། གོ་རིམ་ཡང་། ཉམས་ལེན་གྱི་འགྲོས་དང་མཐུན་པར་གནས་པས་ལག་ལེན་དེ་ཁོ་ན་ལྟར་འདེབས་དགོས་ཏེ། རྒྱུད་འདིར་ཞུགས་ནས་ལུས་ཐ་མལ་གྱི་སྣང་ཞེན་བསལ་ཏེ་ལྷའི་སྐུར་བྱ་བ་ཕྱག་རྒྱའི་དམ་ཚིག་དང༌། ངག་ཐ་མལ་གྱི་སྣང་ཞེན་བསལ་ནས་སྔགས་སུ་བྱ་བ་དྲིལ་བུའི་དམ་ཚིག་དང༌། སེམས་ཐ་མལ་གྱི་རྟོག་པ་བསལ་ནས་སྐབས་གང་ཡང་རུང་བའི་དེ་ཁོ་ན་ཉིད་དུ་བྱ་བ་རྡོ་རྗེའི་དམ་ཚིག་སྟེ། རྣམ་པར་རྟོག་པའི་བློས་བཏགས་པའི་ཕྱིར་རྣམ་ཤེས་ཀྱི་ཕྱོགས་ཀྱི་དམ་ཚིག་དང༌། དེ་ལྟར་ལུས་ངག་ཡིད་གསུམ་སངས་རྒྱས་ཀྱི་རྡོ་རྗེ་གསུམ་དུ་དབང་དུས་སུ་ངོ་སྤྲད་ཅིང་རྣལ་འབྱོར་དུ་བྱས་པས་མངོན་སུམ་གྱི་མཚན་ཉིད་ཅན་དུ་ལུས་སྟོང་གཟུགས། ངག་གཞོམ་མེད་ཀྱི་ནཱ་དའི་རང་སྒྲ། སེམས་བདེ་བ་ཆེན་པོར་མངོན་དུ་གྱུར་པ་སྟེ་དེ་དག་ནི་ཡེ་ཤེས་ཀྱི་ཕྱོགས་ཀྱི་དམ་ཚིག་གསུམ་བཟུང་བ་(༨༡བ)ཡིན་ལ། དེ་གཉིས་ཀར་ཡང་ལྷན་ཅིག་བྱེད་རྐྱེན་གྱི་གཙོ་བོ་སངས་རྒྱས་ཀྱི་ཕྲིན་ལས་ཀྱི་བདག་རྐྱེན་བྱེད་པའི་རྡོ་རྗེ་སློབ་དཔོན་ཉིད་བསྟེན་པར་བྱ་བ་སྟེ། མ་རིག་པའི་དངོས་ཀྱི་གཉེན་པོར་འགྱུར་བའི་ཕྱིར་རོ། ། འདི་ནི་གསང་སྔགས་ཀྱི་ལམ་ཐམས་ཅད་ཀྱི་སྙིང་རྩ་ཡིན་ལ་འདི་ལས་ནམ་དུ་ཡང་གཡོ་ཞིང་འཕགས་པར་བྱ་བ་མ་ཡིན་པས་ན་མི་བསྐྱོད་པའི་དམ་ཚིག་ཅེས་བྱའོ། ། དེ་ཉིད་རྣལ་འབྱོར་དུ་བྱས་པ་ལས་མ་རིག་པའི་གཉེན་པོར་འགྱུར་ཞིང༌། འཁོར་བའི་རྩ་བ་མ་རིག་པ་ཡིན་མོད་ཀྱི་འཁོར་བར་ཡང་སྲིད་འཕེན་པ་པོ་སྲེད་པ་ཡིན་པས། དེའི་གཉེན་པོར་ཕྱི་རོལ་གྱི་འདོད་པ་རྣམས་ལ་མ་ཆགས་པ་ཞིག་དགོས་པས་འདོད་པ་བཅུ་གཞན་ལ་སྦྱིན་ཏེ་མ་ཆགས་པར་བྱ་བ་དང༌། དེ་ལྟ་བུའི་སེམས་རྣལ་འབྱོར་དུ་བྱེད་པ་ལ་ལུས་ཀྱང་དེ་དང་མཐུན་པར་སྦྱངས་པ་ཞིག་དགོས་པས་བཟའ་བའི་དམ་ཚིག་བཅུ་བསྟེན་ཏེ། དེའང་ཟག་མེད་ཀྱི་གཟུགས་ཕུང་སྒྲུབ་པར་བྱེད་པའམ། ཡོན་ཏན་ཁྱད་པར་ཅན་གྱི་མངོན་ཤེས་ལྔས་ཡུལ་སྣང་བའི་བྱ་བ་བྱེད་པའི་ཕྱིར་རྣམ་སྣང་གི་དམ་ཚིག ། དེ་ལྟར་མ་ཆགས་པ་དང་ལུས་ལས་སུ་རུང་བས་སྒོ་གསུམ་དབྱེར་མེད་པའི་རྣལ་འབྱོར་གྱིས་བླ་མ་དེ་བཞིན་གཤེགས་པ་ཐམས་ཅད་ཀྱི་བདག་ཉིད་དུ་སྒྲུབ་པར་བྱེད་པ་ལ་ཚོགས་གསུམ་དགོས་པས་མཆོད་པ་ནི་བསོད་ནམས་ཀྱི་ཚོགས་ཡིན་ལ། དེ་གཟུགས་སྐུའི་རྒྱུ་ཡིན་པས་གཞན་དོན་ལ་མྱུར་བ་ཉིད་ཀྱི་ཕྱིར། མྱུར་འགྲོའི་རྟ་མཆོག་གི་རིགས་དོན་གྲུབ་ཀྱི་དམ་ཚིག ། འཛག་མེད་ནི་ཚུལ་ཁྲིམས་ཀྱི་ཚོགས་ཏེ་འོད་མཐའ་ཡས་པའི་རྒྱུ་ཡིན་པའི་ཕྱིར། འོད་དཔག་མེད་ཀྱི་དམ་ཚིག ། བྱང་ཆུབ་ཀྱི་སེམས་ནི་ཡེ་ཤེས་ཀྱི་ཚོགས་ཏེ་སྟོང་ཉིད་སྙིང་རྗེ་རྩེ་གཅིག་པས་རྡོ་རྗེ་སེམས་དཔའི་དམ་ཚིག་ཏུ་བཞག་པའོ། ། བསྡུས་རྒྱུད་རྣམས་སུ་འབྱུང་བ་ནི་དྲང་དོན་གཙོ་ཆེ་ལ་འདིར་ནི་ངེས་དོན་ཁོ་ནའི་དབང་དུ་བྱས་ཏེ་གོ་རིམ་དང་ངོས་འཛིན་མི་འདྲ་བ་ཡིན་ནོ། ། བ༢ གཉིས་པ་[ཐུན་མོང་མ་ཡིན་པ་]ནི། ཐུན་མིན་རྡོ་རྗེར་སྲོག་གཅོད་རལ་གྲིར་རྫུན། ། རིན་ཆེན་ནོར་དང་ཆུ་སྐྱེས་བུད་མེད་(༨༢ན)འཕྲོག ། འཁོར་ལོར་ཤ་ཆང་གྲི་གུག་མི་སྨད་གཏོང༌། ། སྒྲུབ་པོ་གྲུབ་པའི་ཚོད་སྦྱར་དངོས་སྦས་གཉིས། ། འདིའང་དམ་པ་དང་པོའི་སངས་རྒྱས་ལས་གསུངས་པ་སྟེ། དེ་ལ། དངོས། སྦས་གཉིས་རེར་ཡོད་པ་ལས། རྡོ་རྗེའི་རིགས་ལ། དྲང་དོན་དུ། ཇི་སྲིད་འཚོའི་བར་མཚམས་མེད་ལྔ་སོགས་མི་དགེ་བ་བྱེད་པ་དང་། ཞིང་བཅུ་ཚང་བའི་ཉམས་པ་ཞི་བའི་ལས་ཀྱིས་གདུལ་མ་ནུས་པ་རྣམས་མི་བསྐྱོད་པའི་ཏིང་ངེ་འཛིན་གྱིས་ཁ་སྦྱོར་ཕྱེ་སྟེ་བསད་པ་དང༌། ངེས་དོན་དུ། སྲོག་ནི་རོ་རྐྱང་གི་རླུང་ཡིན་ལ། དེ་བསད་པ་ནི་དབུ་མར་འགོག་པ་སྟེ། དབུ་མར་སྲོག་རེངས་པ་ལས་མཐར་ཐུག་པ་གཙུག་ཏོར་དུ་རླུང་སེམས་བརྟན་པ་ལ་བྱ་ཞིང༌། དེས་ཁུ་བ་སྟེང་དུ་བགྲོད་དེ། དངོས་ས་བཅུ་གཉིས་པ་དང་རྗེས་མཐུན་ལས་དང་པོ་བས་ཁུ་བ་སྟེང་དུ་འཆིང་བ་ལ་བསླབ་པའོ། ། རལ་གྲིའི་རིགས་ལ། དྲང་དོན་དུ། ལམ་མ་ཡིན་པར་ལྟུང་བ་བདེན་པར་སྨྲས་ཀྱང་ཡིད་མི་རྟོན་པ་རྣམས་ཆོས་མ་ཡིན་པ་ལས་