Tibetan
དོན་གྱི་རྒྱུད་ཀྱི་སྒོ་ནས། ཐ༢ རྗོད་བྱེད་རྒྱུད་སྡེ་བཞིའི་སྒོ་ནས། ཐ༣ འཐོབ་བྱེད་ཆོ་གའི་སྒོ་ནས་དབྱེ་བའོ། ། ཐ༡ དང་པོ་ནི། དབྱེ་བ་བརྗོད་བྱ་རྒྱུ་ཐབས་འབྲས་བུ་གསུམ། ། སྣང་གྲགས་ཆོས་ཀུན་ལྷན་སྐྱེས་ཡེ་ཤེས་དང༌། ། མཚན་རྟོགས་ཕྲ་རགས་བསྐྱེད་དང་རྫོགས་པར་ཏེ། ། རང་སྣང་སྐུ་དང་ཡེ་ཤེས་ངོ་བོར་སྡོམ། ། སྔགས་སྡོམ་གྱི་དབྱེ་བའི་རྣམ་གྲངས་མང་དུ་མཆིས་ཀྱང་། འདིར་རེ་ཞིག་བརྗོད་བྱ་དོན་གྱི་རྒྱུད་ཀྱི་སྒོ་ནས་དབྱེ་ན། རྒྱུ་རྒྱུད། ཐབས་རྒྱུད། འབྲས་རྒྱུད་ཀྱི་(༦༩བ)སྔགས་སྡོམ་གསུམ་ཡོད། དང་པོ་ནི། སྣང་གྲགས་ཀྱི་ཆོས་ཀུན་རང་བཞིན་ལྷན་ཅིག་སྐྱེས་པའི་ཡེ་ཤེས་ཀྱི་ངང་དུ་སྡོམ་པ། གཉིས་པ་ནི། གཉིས་སྣང་གི་མཚན་རྟོག་ཕྲ་རགས་ཐམས་ཅད་བསྐྱེད་དང་རྫོགས་པའི་རྣལ་འབྱོར་དུ་སྡོམ་པ། གསུམ་པ་ནི། རང་སྣང་དུ་ཤར་བའི་ཆོས་ཐམས་ཅད་སྐུ་དང་ཡེ་ཤེས་ཀྱི་ངོ་བོར་སྡོམ་པ་སྟེ། སྔ་མ་ནི་སྔགས་སྡོམ་བཏགས་པ་བ་དང་། ཕྱི་མ་གཉིས་ནི་མཚན་ཉིད་པའོ། ། ཐ༢ གཉིས་པ་[རྗོད་བྱེད་རྒྱུད་སྡེ་བཞིའི་སྒོ་ནས་དབྱེ་བ་]ནི། རྗོད་བྱེད་བྱ་སྤྱོད་རྣལ་འབྱོར་བླ་མེད་བཞི། ། རྗོད་བྱེད་རྒྱུད་སྡེ་བཞིའི་སྒོ་ནས་དབྱེ་ན། བྱ་བ། སྤྱོད་པ། རྣལ་འབྱོར། བླ་མེད་ཀྱི་སྔགས་སྡོམ་བཞི་སྟེ། དང་པོ་ནི། རྒོད་པའི་བདེ་བ་ལམ་བྱེད་ཀྱི་སྒོ་ནས་གཟུང་འཛིན་གྱི་རྟོག་པ་དང་འཕོ་བའི་བག་ཆགས་སྡོམ་པར་བྱེད་པའི་བདེ་ཆེན་གྱི་ཡེ་ཤེས་འཛིན་པར་དམ་བཅས་པ། གཉིས་པ་ནི། བལྟས་པའི་བདེ་བ་ལམ་བྱེད་ཀྱི་སྒོ་ནས་དེ་ལྟར་དམ་བཅས་པ། གསུམ་པ་ནི། ལག་བཅངས་ཀྱི་བདེ་བ་ལམ་བྱེད་ཀྱི་སྒོ་ནས་དེ་ལྟར་དམ་བཅས་པ། བཞི་པ་ནི། དབང་པོ་གཉིས་སྦྱོར་གྱི་བདེ་བ་ལམ་བྱེད་ཀྱི་སྒོ་ནས་དེ་ལྟར་དམ་བཅས་པའོ། ། དེ་ལྟར་ན། ཐེག་པ་ཐུན་མོང་གི་སྤང་བྱ་གཟུང་འཛིན་གྱི་རྣམ་རྟོག་ཕྲ་རགས་བཞི་དང༌། ཐུན་མོང་མ་ཡིན་པ་སྔགས་ཀྱི་སྤང་བྱ་འཕོ་བའི་བག་ཆགས་ཕྲ་རགས་བཞིའི་གཉེན་པོར་ཆོ་ག་མི་འདྲ་བ་བཞིའི་དབྱེ་བས་གཟུང་འཛིན་གཉིས་མེད་ཀྱི་རིག་པ་བདེ་བ་ཆེན་པོའི་ཡེ་ཤེས་དེ་འཛིན་པར་དམ་བཅས་པ་ནི་རྒྱུད་སྡེ་བཞི་པོའི་རིག་པ་འཛིན་པའི་སྡོམ་པ་སོ་སོའི་ཁྱད་པར་དུ་བྱ་བ་དག་ཡིན་ནོ། ། ཐ༣ གསུམ་པ་[འཐོབ་བྱེད་ཆོ་གའི་སྒོ་ནས་དབྱེ་བ་]ནི། འཐོབ་བྱེད་ཆོ་གའི་དབང་གིས་གསུམ་ཡིན་ཏེ། ། རྒྱུན་བཤགས་སྐབས་སུ་རང་ལུགས་སོ་བྱང་དང༌། ། འཇུག་པས་ལྷ་དང་སྐལ་མཉམ་སྡོམ་པ་སྟེ། ། དངོས་གཞིས་བསྐྱེད་རྫོགས་སྡོམ་པ་ཀུན་ཐོབ་བོ། ། འཐོབ་བྱེད་ཆོ་གའི་དབང་གིས་དབྱེ་བ་གསུམ་དུ་འགྱུར་བ་ཡིན་ཏེ། སྟ་གོན། འཇུག་པ། དངོས་གཞིའི་སྐབས་སུ་ཐོབ་པའོ། ། དང་པོ་ནི། རྒྱུན་བཤགས་ཀྱི་སྐབས་སུ་སྔགས་རང་ལུགས་ཀྱི་སོ་ཐར་(༧༠ན)དང་བྱང་སེམས་ཀྱི་སྡོམ་པ་ཐོབ་པ་དང༌། སྔགས་སྡོམ་གྱི་རང་ལྡོག་གནས་གསུམ་བྱིན་རླབས་ཀྱི་སྐབས་སུ་ཇི་ཙམ་ཐོབ་པ་ཐམས་ཅད་སྐབས་འདིར་སྔགས་སྡོམ་གྱི་ངོ་བོར་སྐྱེ་བ་དེ་དག་གོ། ། གཉིས་པ་ནི། ཕྱི་འཇུག་གི་འདོད་འདྲིའི་ལན་གདབ་དང་ཟླ་བ་རྡོ་རྗེ་ངོ་སྤྲད་པའི་དུས་སུ་ཐོབ་པ་དང༌། ནང་འཇུག་གི་དམ་གཞག་དང་ཡེ་ཤེས་དབབ་པ་དང་ལྷ་ངོ་བསྟན་པའི་སྐབས་སུ་ཐོབ་པ་རྣམས་ལ་ལྷ་དང་སྐལ་མཉམ་གྱི་སྡོམ་པ་ཞེས་གསུངས་པ་དེ་རྣམས་སོ། ། གསུམ་པ་དངོས་གཞིའི་སྐབས་སུ་ཐོབ་པ་ལའང་ནང་གསེས་སུ། རྒྱུད་སྡེ་འོག་མ་གསུམ་ལ་རང་རང་གི་དབང་གི་དངོས་གཞིའི་སྐབས་སུ་ཐོབ་པ་རྣམས་དང༌། བླ་མེད་ལ་བུམ་དབང་གི་སྐབས་སུ་བསྐྱེད་རིམ་གྱི་སྡོམ་པ་ཐོབ་ཅིང༌། དེ་ལའང་རྣལ་འབྱོར་རྒྱུད་དང་ཐུན་མོང་བའི་བུམ་དབང་གི་སྡོམ་པ་དབང་གི་སྔོན་འགྲོའི་རིགས་ལྔའི་སྡོམ་བཟུང་གི་སྐབས་ཁས་བླངས་ཀྱིས་ཐོབ་པ་དང༌། བླ་མེད་ཐུན་མོང་མ་ཡིན་པའི་བུམ་དབང་གི་སྡོམ་པ་མཐའ་རྟེན་གྱི་སློབ་དཔོན་སྨད་པར་མི་བྱ་ཞིང་ཞེས་སོགས་ཀྱི་མཐར་ཐོབ་པ་གཉིས། དབང་གོང་མའི་སྐབས་སུ་ཐོབ་པའི་རྫོགས་རིམ་གྱི་སྡོམ་པ་རྣམས་སོ། ། བསྐྱེད་རྫོགས་ཀྱི་སྡོམ་པ་དེ་གཉིས་ཀྱི་ཁྱད་པར་ཡང་། བདེ་ཆེན་གྱི་ཡེ་ཤེས་མངོན་དུ་མ་གྱུར་པ་འཛིན་པ་དང་། མངོན་དུ་གྱུར་ཟིན་འཛིན་པའི་དབྱེ་བས་ཕྱེ་བ་ཡིན་ལ། དེ་གཉིས་ཀྱི་ཆོ་ག་ཡང་། ཡེ་ཤེས་དེ་གཉིས་བརྒྱུད་ནས་འདྲེན་པ་དང་དངོས་སུ་འདྲེན་པའི་ཁྱད་པར་ཡོད་དོ།། ཏ༣ རྩ་བའི་གསུམ་པ་ཇི་ལྟར་ཐོབ་ཚུལ་བཤད་པ་ནི། ཐོབ་ཚུལ་འཇུག་པར་ཁས་བླངས་ཚུལ་གྱིས་ཏེ། ། ཆོ་གའི་མཐའ་རུ་རྣམ་དག་རྫོགས་པར་ཐོབ། ། སྔགས་སྡོམ་ཇི་ལྟར་ཐོབ་པའི་ཚུལ་ལ་གཉིས་ཏེ། ཁས་བླངས་ཀྱིས་ཐོབ་པ་དང༌། ཆོ་གས་ཐོབ་པའོ། ། དང་པོ་ནི། སྟ་གོན་ནམ་འཇུག་པའི་སྐབས་ཀྱི་སྡོམ་བཟུང་ལན་གསུམ་གྱི་མཐར་ཐོབ་མོད། འོན་ཀྱང་དངོས་གཞིའི་ཆོ་ག་ལ་མ་ལྟོས་པར་སྐབས་དེར་ཁས་བླངས་པའི་དམ་ཚིག་རྣམས་(༧༠བ)ཀྱང་བསྲུང་བར་དབང་བ་མ་ཡིན་ཏེ། དཔེར་ན། བར་མ་རབ་བྱུང་གི་སྐབས་སུ་རབ་བྱུང་དུ་ཁས་བླངས་ཀྱང་རབ་བྱུང་གི་སྡོམ་པ་སྲུང་བ་དགེ་ཚུལ་ལམ་དགེ་སློང་དུ་སྒྲུབ་པའི་ཆོ་ག་ལ་ལྟོས་པ་བཞིན་ནོ། ། འོ་ན་དེའི་ཐོབ་ཚུལ་ཇི་ལྟར་ཡིན་སྙམ་ན། དབང་གི་དངོས་གཞི་ལ་བརྟེན་ནས་སྔགས་སྡོམ་མཚན་ཉིད་པ་ཐོབ་ཚེ་དམ་ཚིག་དང་སྡོམ་པ་འདི་དག་བསྲུང་བར་བྱའོ་ཞེས་ཁས་བླངས་པའི་ཚུལ་གྱིས་སོ། ། གཉིས་པ་ནི། དེ་ཉིད་སྔགས་སྡོམ་གྱི་གཙོ་བོ་ཡིན་པས་བྱ་རྒྱུད་ལ་ཆུ་ཅོད་པན་གྱི་དབང༌། སྤྱོད་རྒྱུད་ལ་ཆུ་སོགས་དབང་ལྔ། རྣལ་འབྱོར་རྒྱུད་ལ་ཕྱིར་མི་ལྡོག་པའི་དབང༌། བླ་མེད་ལ་དབང་བཞི་རྫོགས་པར་ཐོབ་པའི་ཚེ་རྒྱུད་སྡེ་བཞི་པོ་རང་རང་གི་རྡོ་རྗེ་སློབ་དཔོན་གྱི་དབང་རྫོགས་པར་ཐོབ་ཅིང༌། དེའི་ཚེ་རང་རང་གི་སྔགས་སྡོམ་གྱི་གཙོ་བོ་རྫོགས་པར་འཐོབ་པར་གྱུར་བས་མདོར་ན་སོ་སོའི་དབང་གི་ཆོ་ག་གྲུབ་པའི་མཐའ་རུ་སྔགས་སྡོམ་རྣམ་པར་དག་པ་རྫོགས་པའི་ཚུལ་དུ་ཐོབ་པ་ཡིན་ནོ། ། འོན་ཀྱང་བྱ་སྤྱོད་གཉིས་ལ་རྡོ་རྗེ་སློབ་དཔོན་གྱི་དབང་ཇི་ལྟར་ཞེ་ན། སྤྱིར་རྒྱུད་སྡེ་རང་རང་གི་དབང་བསྐུར་རྒྱུད་འཆད་རབ་གནས་སོགས་རྡོ་རྗེ་སློབ་དཔོན་གྱི་ཕྲིན་ལས་བྱེད་པ་ལ་དེའི་དབང་ཐོབ་དགོས་པའི་རིགས་པས་རྒྱུད་སྡེ་བཞི་ཀ་ལ་རང་གི་རྡོ་རྗེ་སློབ་དཔོན་གྱི་དབང་ཡོད་པར་གྲུབ་ཅིང༌། ལུང་གིས་ཀྱང་ཤེས་ཏེ། ཕྱག་རྡོར་དབང་རྒྱུད་ལས། ལག་པ་གཡས་སུ་རྡོ་རྗེ་དང༌། ། གཡོན་དུ་འཁོར་ལོ་བཞག་ནས་སུ། ། སློབ་མ་དེ་ལ་འདི་སྐད་དུ། ། རྡོ་རྗེ་སློབ་དཔོན་ཁྱོད་འགྱུར་ཏེ། ། ཞེས་དང༌། སྤྱི་རྒྱུད་ལས། སློབ་དཔོན་གོ་འཕང་རབ་སྒྲུབ་ཕྱིར། ། དང་པོ་ཡོངས་སུ་བསྒྲག་པ་ཡིན། ། ཞེས་སློབ་དཔོན་གྱི་གོ་འཕང་བསྒྲུབ་པའི་ཆེད་དུ་དབང་དང་པོ་ཆུ་དང་ཅོད་པན་གྱི་དབང་བསྐུར་བར་གསུངས་པའི་ཕྱིར་རོ། ། འོ་ན་ཡེ་ཤེས་ཐིག་ལེ་ལས་སློབ་དཔོན་གྱི་དབང་རྣལ་འབྱོར་རྒྱུད་ཀྱི་ཁྱད་ཆོས་སུ་བཤད་པ་མིན་ནམ་སྙམ་ན། དེ་ནི་ཕྱིར་མི་ལྡོག་པའི་འཁོར་ལོའི་དབང་ལ་དགོངས་པས་སྐྱོན་མེད་དོ། ། ཏ༤ བཞི་པ་(༧༡ན)ཐོབ་མཚམས་ཀྱི་དུས་ནི། ཐོབ་དུས་སྒོ་གསུམ་བྱིན་རླབས་ས་བོན་ཐེབས། ། སྡོམ་བཟུང་གསལ་གདབ་དབབ་པས་བྱིན་གྱིས་བརླབས། ། དབང་བསྐུར་དངོས་གཞིས་འཕེལ་རྒྱས་མཐར་ཐུག་གོ། ། སྡོམ་པ་ཐོབ་པའི་དུས་ནི་སྤྱིར་སྡོམ་པ་སྐྱེ་བའི་ཐོག་མ་སློབ་མའི་སྒོ་གསུམ་རྡོ་རྗེ་གསུམ་དུ་བྱིན་གྱིས་བརླབས་པའི་དུས་དེ་ནས་འགོ་བཟུང་བ་ཡིན་ལ། སྐྱེས་ཟིན་པའི་མཐའ་ནི་རྒྱུད་སྡེ་རང་རང་གི་དབང་གི་མཐའ་རྟེན་རྫོགས་ཟིན་པའི་དུས་དེ་ཁོ་ནའོ། ། སྐྱེ་ཚུལ་ཡང་སློབ་མའི་སྒོ་གསུམ་རྡོ་རྗེ་གསུམ་དུ་བྱིན་གྱིས་བརླབས་པས་སྔགས་སྡོམ་གྱི་ས་བོན་བཏབ། རིགས་ལྔའི་སྡོམ་བཟུང་ལན་གསུམ་གྱིས་དེ་ཉིད་གསལ་གདབ། ཡེ་ཤེས་ཕབ་པས་དེ་ཉིད་བྱིན་གྱིས་བརླབས། དབང་བསྐུར་དངོས་རིག་དབང་ལྔ་བརྟུལ་ཞུགས་ཀྱི་དབང་དང་བཅས་པ་བསྐུར་བས་ཆོས་ཅན་ཕུང་པོ་ལྔ་རེ་རེ་བ་དྲི་བཅས་ཀྱི་ཆོས་ཉིད་དང་བཅས་དྲུག་པོ་སངས་རྒྱས་རིགས་ལྔ་རྡོར་སེམས་དང་དྲུག་ཏུ་བྱིན་གྱིས་བརླབས་ཏེ་དེ་ཉིད་རྒྱས་པར་བྱས། བུམ་དབང་བསྐུར་བས་ཐ་མལ་སྣང་ཞེན་གྱི་དྲི་མ་སྦྱངས་ནས་བརྟན་གཡོ་སྣོད་བཅུད་ཐམས་ཅད་རྟེན་བརྟེན་པར་བཅས་པའི་དཀྱིལ་འཁོར་གྱི་རོལ་པར་ཤར་ཏེ། དེ་ཉིད་ཤིན་ཏུ་རྒྱས་པར་བྱས། མཆོག་དབང་གོང་མ་གསུམ་བསྐུར་བས་གྱ་ནོམ་ལྟར་ཞེན་པའི་དྲི་མ་ཡང་སྦྱངས་ནས་སྲིད་ཞི་ཐམས་ཅད་བདེ་བ་དང་སྟོང་པ་ཟུང་དུ་འཇུག་པའི་ཡེ་ཤེས་ཆེན་པོར་གྲོལ་ནས་དེ་ཉིད་ཡོན་ཏན་འཕེལ་རྒྱས་མཐར་ཐུག་པར་བྱས་པ་ལས་རྣལ་འབྱོར་བླ་མེད་ཀྱི་སྔགས་སྡོམ་ཡོངས་སུ་རྫོགས་པར་སྐྱེས་ཤིང་ཐོབ་པ་ཡིན་ནོ། ། སྤྱིར་རྒྱུད་སྡེ་བཞི་པོ་རང་རང་གི་དབང་གི་དངོས་གཞི་རྫོགས་པར་ཐོབ་པའི་ཚེ་རང་རང་གི་དབང་བསྐུར་བ་དང་རྒྱུད་འཆད་པ་དང་རབ་ཏུ་གནས་པ་སོགས་ལ་དབང་བའི་ཕྱིར་ན་རང་རང་གི་རྡོ་རྗེ་སློབ་དཔོན་གྱི་དབང་ཐོབ་པ་ཡིན་ལ། དེའི་ཚེ་མཐའ་རྟེན་དུ་སློབ་དཔོན་ལ་དགོས་པའི་དམ་ཚིག་རྣམས་(༧༡བ)རྒྱས་པར་བསྒྲགས་ནས་བསྡུས་ཏེ་བཟུང་བ་ལན་གསུམ་བྱས་པའི་མཐར་སྔགས་སྡོམ་ཡང་ཡོངས་སུ་རྫོགས་པར་ཐོབ་པ་ཡིན་ཏེ། དེའི་ཚེ་དེ་འདྲ་རེ་རང་རང་ལ་ལྟོས་པའི་རྩ་བའི་ལྟུང་བ་དེ་དང་དེ་བསྐྱེད་པའི་རྟེན་དུ་རུང་བ་ཡིན་ལ། དེའི་སྔ་རོལ་དུ་མ་ཡིན་པའི་ཕྱིར་རོ། ། ཏ༥ ལྔ་པ་གོང་འོག་གི་ཁྱད་པར་འདུ་ཚུལ་དང་བཅས་པ་ནི། རྒྱུད་སྡེ་འོག་མར་མ་རྫོགས་ཕལ་ཆེར་རྫོགས། ། གོང་མར་ཡོངས་རྫོགས་སྔགས་སྡོམ་ཞེས་བྱར་འགྱུར། ། བདེ་སྟོང་གཉིས་སམ་ཟུང་འཇུག་གཅིག་ཏུའང་འདུ། ། ཐོབ་ཚུལ་རྒྱ་ཆེ་ཆུང་གི་དབང་གིས་རྒྱུད་སྡེ་འོག་མ་བྱ་སྤྱོད་གཉིས་ནི་མ་རྫོགས་པའི་སྔགས་སྡོམ། རྣལ་འབྱོར་རྒྱུད་ནི་ཕལ་ཆེར་རྫོགས་པའི་སྔགས་སྡོམ། གོང་མ་བླ་མེད་དུ་ཡོངས་སུ་རྫོགས་པའི་སྔགས་སྡོམ་ཞེས་བྱ་བའི་ཐ་སྙད་ཀྱང་ཐོབ་པར་འགྱུར་བ་མཁས་པ་སྔ་མ་རྣམས་བཞེད་དོ། ། སྡོམ་པ་དང་དམ་ཚིག་དེ་དག་མདོར་བསྡུ་ན། ཐབས་བདེ་བ་ཆེན་པོ་དོན་དམ་པའི་དམ་ཚིག །ཤེས་རབ་རྣམ་བཅས་སྟོང་ཉིད་ཀུན་རྫོབ་པའི་དམ་ཚིག་གཉིས་སམ། ཐབས་ཤེས་ཟུང་འཇུག་ཨེ་ཝྃ་གྱི་སྡོམ་པ་གཅིག་པུར་ཡང་འདུ་སྟེ། བརྟག་གཉིས་ལས། སངས་རྒྱས་ཀུན་གྱི་སྡོམ་པ་ནི། ། ཨེ་ཝྃ་རྣམ་པར་རབ་ཏུ་གནས། ། ཨེ་ཝྃ་རྣམ་པའི་བདེ་ཆེན་པོ། ། དབང་ལས་ཡང་དག་ཤེས་པར་བྱ། ། ཞེས་སོ། ། ཨེ་ཝྃ་སྡོམ་པ་དེའང་རྒྱུ་དང་འབྲས་བུའི་གནས་སྐབས་གཉིས་ཀར་འཇུག་པའི་ཕྱིར་སངས་རྒྱས་ཀྱིས་ཀྱང་དམ་ཚིག་ཆེན་པོར་གསུངས་ཏེ། འདུལ་བ་ཕྱི་མ་ལས། འཇིག་རྟེན་སྤྱོད་ལས་རྣམ་གྲོལ་བ། ། གང་བཤད་དམ་ཚིག་སྡོམ་པ་སྟེ། ། ཞེས་དང༌། འཇམ་དཔལ་སྒྱུ་འཕྲུལ་དྲྭ་བ་ལས། འགྲོ་བའི་བླ་མ་སྟོན་པ་པོ། ། དམ་ཚིག་ཆེན་པོ་དེ་ཉིད་མཁྱེན། ། ཅེས་དང༌། སྡོམ་འབྱུང་སོགས་ལས་ཀྱང་རྒྱ་ཆེར་གསུངས་སོ། ། ཏ༦ དྲུག་པ་གང་ལ་སྐྱེ་བའི་རྟེན་བཤད་པ་ནི། སྐྱེ་བའི་རྟེན་ལ་བྱེ་བྲག་མ་མཆིས་ཀྱང༌། ། ཐུན་མོང་སྡོམ་ཙམ་འཛིན་པར་མི་ནུས་ན། ། དབང་བསྐུར་མི་རུང་འཇུག་པ་ཙམ་ཞིག་སྦྱིན། །(༧༢ན) སྔགས་སྡོམ་སྐྱེ་བའི་རྟེན་ནི་གཙོ་བོར་ཁམས་དྲུག་ལྡན་པའི་མིའི་ལུས་རྟེན་ཅན་དུ་གཟུང་དགོས་ཤིང༌། དེ་ལའང་ལས་དང་རིགས་བཟང་ངན་ལ་སོགས་པའི་བྱེ་བྲག་གི་ཁྱད་པར་མ་མཆིས་ཏེ། དམ་པ་དང་པོའི་རྒྱུད་ལས། གདོལ་པ་སྨྱིག་མ་མཁན་ལ་སོགས། ། མཚམས་མེད་ལྔ་ནི་བྱེད་པ་ཡང༌། ། སྔགས་ཀྱི་སྤྱོད་པ་རྗེས་སྤྱད་ན། ། ཚེ་འདི་ཉིད་ལ་སངས་རྒྱས་འགྲུབ། ། ཅེས་གསུངས་པ་དང༌། ཨོ་རྒྱན་གྱི་གནས་སུ་ཀླུ་རྣམས་ལ་དབང་བསྐུར་བར་བཤད་པ་དང༌། རྒྱུད་སྡེ་རྣམས་ལས་ལྷ་དང་ལྷ་མིན་ལ་སོགས་པ་རྒྱུད་མཉན་པའི་སྣོད་དུ་བསྡུས་པས་དད་ཅིང་མོས་པ་ཐམས་ཅད་རྗེས་སུ་བཟུང་བར་བྱ་བར་གསུངས་ཀྱང༌། བསྙེན་གནས་དང་སྨོན་སེམས་ཀྱིས་མཚོན། ཐུན་མོང་སོ་བྱང་གི་སྡོམ་པ་ཙམ་ཡང་འཛིན་པར་མི་ནུས་པའི་བློ་སྟོབས་དམན་ན་དབང་བསྐུར་དུ་མི་རུང་ཡང་དོན་དུ་གཉེར་ན་འཇུག་པ་ཙམ་ཞིག་ནི་སྦྱིན་པར་བྱ་སྟེ། དེ་ལས་དེ་ཉིད་ཀྱི་རྣམ་པར་གྲོལ་བའི་རྒྱུར་འགྱུར་རོ། ། དེ་ལྟར་ཡང་རྡོ་རྗེ་རྩེ་མོ་ལས། གང་ཞིག་སྡོམ་པ་མི་ལེན་ཞིང༌། ། ཤིན་ཏུ་གདུལ་དཀའ་དད་མེད་ལ། ། གཞུག་པ་ཙམ་ནི་སྦྱིན་པར་བྱ། ། དེ་ལ་ལས་ནི་མི་བྱའོ། ། ཞེས་དང༌། མཐོང་བ་ཙམ་གྱི་མོད་ལ་ནི། ། སྡོམ་པ་དག་པར་འགྱུར་བ་ཡིན། ། ཅེས་སོགས་གསུངས་པས་སོ། ། ཏ༧ བདུན་པ་བསྲུང་བྱའི་དམ་ཚིག་དངོས་འཆད་པ་ལ་གཉིས། ཐ༡ རྒྱུད་སྡེ་བཞི་ཐུན་མོང་དུ་བསྟན་པ། ཐ༢ སོ་སོའི་རྣམ་པར་དབྱེ་བའོ། ། ཐ༡ དང་པོ་ནི། དབང་བསྐུར་སྡོམ་ཐོབ་དམ་ཚིག་སྲོག་ལྟར་བཟུང༌། ། གཞི་ནི་ཡང་དག་ལྟ་དང་སྐྱབས་སེམས་ལྡན། ། དཀྱིལ་འཁོར་དབང་ཐོབ་བཞི་སྟེ་ཐུན་མོང་ངོ༌། ། དཀྱིལ་འཁོར་ཆེན་པོའི་དབང་བསྐུར་བ་ཡོངས་སུ་རྫོགས་པ་ཐོབ་ནས་རྡོ་རྗེ་ཐེག་པའི་དམ་ཚིག་དང་སྡོམ་པ་མཐའ་དག་ཐོབ་པ་ཡིན་པས་དེ་དང༌། འཇུག་པ་ཙམ་ལའང་སྡོམ་བཟུང་གི་སྐབས་སུ་སྔགས་སྡོམ་བཏགས་པ་བ་ཁས་བླངས་པའི་ཚུལ་དུ་ཐོབ་(༧༢བ)པས། དེ་ཕྱིན་ཆད་ཇི་ལྟར་ཁས་བླངས་པའི་དམ་ཚིག་དང་སྡོམ་པ་ལ་བརྩོན་པར་བྱས་ནས་ལམ་སྒོམ་ན་དངོས་གྲུབ་མྱུར་དུ་འཐོབ་པར་འགྱུར་ལ། སྲུང་སྡོམ་ཡལ་བར་དོར་ནས་ལམ་ལ་འབད་ཀྱང་ཉེས་པ་ཆེན་པོའི་གཞིར་འགྱུར་བས་དམ་ཚིག་སྲོག་ལྟར་དུ་བསྲུང་དགོས་ཏེ། སྡོམ་འབྱུང་ལས། ཅི་སྟེ་དངོས་གྲུབ་མཆོག་འདོད་ན། ། སྲོག་ནི་ཡོངས་སུ་བཏང་ཡང་བླ། ། འཆི་བའི་དུས་ལ་བབས་ཀྱང་བླ། ། རྟག་ཏུ་དམ་ཚིག་བསྲུང་བར་བྱ། ། ཞེས་གསུངས་སོ། ། དེ་ལ་བསྲུང་བྱའི་དམ་ཚིག་གི་ཐོག་མར་རྒྱུད་སྡེ་ཐམས་ཅད་ཀྱི་གཞིར་གྱུར་པའི་ཐུན་མོང་གི་དམ་ཚིག་ནི་རྩ་བའི་དམ་ཚིག་ཆེན་པོ་བཞིར་གྲགས་པ་འཇིག་རྟེན་པའི་ཡང་དག་ལྟ་བ། དཀོན་མཆོག་གསུམ་ལ་སྐྱབས་སུ་འགྲོ་བ། བྱང་ཆུབ་ཆེན་པོར་སེམས་བསྐྱེད་པ། དཀྱིལ་འཁོར་དུ་དབང་བསྐུར་བ་རྣམས་ཡིན་ཏེ། སྔགས་ལ་འཇུག་པ་དྲུག་ཅུ་པ་ལས། དེ་ལ་གཞི་ཡི་དམ་ཚིག་ནི། ། རྣམ་པ་བཞིར་ནི་ཤེས་བྱ་སྟེ། ། ཡང་དག་ལྟ་དང་ལྡན་པ་དང༌། ། དཀོན་མཆོག་གསུམ་པོ་མི་སྤོང་དང༌། ། བྱང་ཆུབ་སེམས་དང་ལྡན་པ་དང༌། ། དབང་བསྐུར་ཡང་དག་མི་སྤོང་བའོ། ། ཞེས་དང༌། འཇམ་དཔལ་རྩ་རྒྱུད་ལས། གཞིའི་དམ་ཚིག་བཞི་པོ་སོ་སོར་རྒྱས་པར་བཤད་པའི་རྗེས་སུ། ཀྱེ་རྒྱལ་བའི་སྲས། ངའི་སྔགས་ཀྱི་ཡུལ་རྨད་དུ་བྱུང་བ་ལས་འཇུག་པའི་དམ་ཚིག་ནི་མདོར་བསྡུ་ན་རྣམ་པ་གཉིས་ཏེ། གཞི་དང་ཡན་ལག་གོ། ། དེ་ལ་གཞི་ཇི་ལྟ་བུ་ཞེ་ན། མངོན་པར་དབང་བསྐུར་བ་མི་གཏོང་བ་ནི་གཞི་སྟེ། ཇི་ལྟར་ཡང་དག་པའི་ལྟ་བ་མེད་པ་ལ་སྡོམ་བརྩོན་མེད་པ་དང༌། སྐྱབས་སུ་མ་སོང་བ་ལ་ཆོས་འདི་པར་གཏོགས་པ་མེད་པ་དང༌། བྱང་ཆུབ་ཏུ་སེམས་མ་བསྐྱེད་པ་ལ་བྱང་ཆུབ་སེམས་དཔའ་མེད་པ་ལྟར་མངོན་པར་དབང་བསྐུར་བ་མ་བྱས་པ་དག་ལ་ཡང་སྔགས་པའི་ཐ་སྙད་མེད་པར་རིག་པར་བྱའོ་ཞེས་སོགས་རྒྱས་པར་འབྱུང་ངོ༌། ། དེས་ན་རྩ་བའི་ཆེན་པོ་བཞིའི་དམ་ཚིག་འདི་ནི་རྒྱུད་སྡེ་བཞིའི་ལམ་གྱི་རིམ་པ་(༧༣ན)གང་ལ་འཇུག་ཀྱང་མེད་ཐབས་མེད་པས་ཐུན་མོང་གི་དམ་ཚིག་ཏུ་བཞག་པའོ། ། ཐ༢ གཉིས་པ་སོ་སོར་བཤད་པ་ལ་བཞི། ད༡ བྱ་རྒྱུད། ད༢ སྤྱོད་རྒྱུད། ད༣ རྣལ་འབྱོར། ད༤ རྣལ་འབྱོར་བླ་མེད་ཀྱི་དམ་ཚིག་བཤད་པའོ། ། ད༡ དང་པོ་ལ། སྤྱིར་བྱ་བའི་རྒྱུད་རྣམས་ལས་དམ་ཚིག་གི་རིམ་པ་གྲངས་སུ་ཆད་པ་དང་མ་ཆད་པ་ཅི་རིགས་གསུངས་པ་ལ་མཁས་པ་རྣམས་ཀྱིས་རྣམ་བཞག་སྣ་ཚོགས་སྨྲ་ནའང༌། བུ་སྟོན་གྱི་སྤྱི་རྣམ་དུ་ཇོ་བོའི་དམ་ཚིག་བསྡུས་པར་བྱ་རྒྱུད་ལ་རྩ་ལྟུང་སུམ་ཅུ་གསུངས་པས་དེ་ལེགས་གྲུབ་ལས་གསུངས་པའི། མཁས་པས་ཞེ་སྡང་མི་བྱ་འོ། ། ཞེས་སོགས་འདི་ཡིན་ནམ་དཔྱད་ཅེས་འབྱུང་བ་དང༌། དུས་འཁོར་ལས་རྒྱུད་བཞི་ཀ་ལ་རྩ་ལྟུང་བཅུ་བཞིར་གསུངས་པ་དེ་ངོས་འཛིན་ཚེ་གསང་བ་སྤྱི་རྒྱུད་ཀྱི་འདི་ལ་བྱེད་པ་དང༌། ངོར་ཆེན་སོགས་ཀྱིས་སྤྱི་རྒྱུད་ལས་གསུངས་པ་དེའི་དང་པོ་གསུམ་སྤྱིའི་དམ་ཚིག །ཕྱི་མ་རྣམས་ལ་ནང་གསེས་དབྱེ་བ་དང་བཅས་པའི་བཅུ་གསུམ་དབང་ལས་ཐོབ་པའི་དམ་ཚིག་ཅེས་དབྱེ་བར་མཛད་ཅིང༌། ཀུན་མཁྱེན་པདྨ་དཀར་པོས། བསླབ་པར་བྱ་བའི་དམ་ཚིག་སུམ་ཅུ། བསྲུང་བར་བྱ་བའི་རྩ་ལྟུང་བཅུ་དྲུག །ཅེས་རྣམ་པར་བཞག་པའི་དང་པོ་ལེགས་གྲུབ་ལས་སྒྲུབ་ཚིག་གིས་གསུངས་པ་བཅུ་གཉིས། དགག་ཚིག་གིས་གསུངས་པ་བཅོ་བརྒྱད་བཅས་བསྡམས་པ་དང༌། གཉིས་པ་ནི། གོང་སྨོས་སྤྱིའི་དམ་ཚིག་བཞིའི་སྟེང་དུ་བླ་མ་ལ་འཁུ་བ་བཅས་འཇམ་དཔལ་རྩ་རྒྱུད་ལས་བསྟན་པ་ལྔ། དཔུང་བཟང་གིས་ཞུས་པ་ལས་གསུངས་པ་མཚམས་མེད་ལྔ་དང་ཉེ་བ་ལྔ་དཀོན་མཆོག་ལ་གནོད་པར་བྱེད་པ་བཅས་བཅུ་གཅིག་བསྡམས་པས་བཅུ་དྲུག་གོ། ། གཞན་ཡང་། བོ་དོང་པཎ་ཆེན་གྱི་རྒྱུད་སྡེ་སྤྱི་རྣམ་བྱམས་པ་གླིང་པའི་སྔགས་འདུལ་ཆེན་མོ་སོགས་སུ་འདི་དག་ལ་གྲངས་འདྲེན་ཚུལ་མང་ཉུང་དབྱེ་བསྡུ་ཅི་རིགས་བཤད་ཀྱང་། སྤྱི་རྒྱུད་ལས་གསུངས་པ་འདི་ལ་གཙོ་བོར་བྱེད་པ་ཐམས་ཅད་མཐུན་ནོ། ། གཞུང་དངོས་ལ་(༧༣བ)གསུམ། བྱ་རྒྱུད་སྤྱིའི་དམ་ཚིག་དང༌། རིགས་སོ་སོའི་དམ་ཚིག །ཉམས་ན་ཕྱིར་བཅོས་བྱ་བའི་ཚུལ་ལོ། ། དང་པོ་ནི། བྱ་རྒྱུད་སྤྱི་ཡི་དམ་ཚིག་བཅུ་བཞི་སྟེ། ། དཀོན་མཆོག་སྔགས་ལ་དད་དང་ཐེག་ཆེན་མོས། ། ཞིང་མཆོག་ལ་གུས་མི་སྡང་དུས་མཚམས་མཆོད། ། གཞན་གཞུང་མི་བཀུར་མགྲོན་མཆོད་བྱམས་སེམས་བརྟན། ། བསོད་ནམས་བཟླས་པ་དམ་ཚིག་གཞན་སྲུང་བརྩོན། ། དམ་མེད་སྔགས་རྒྱ་མི་སྦྱིན་རྒྱུད་ཀྱང་རྟོགས། ། བྱ་རྒྱུད་