Tibetan
སྦྱོང་གི་རྩ་བ་གཏོང་ལེན་ལ་ནན་ཏན་བྱ། ལྔ་པ་བྱང་སེམས་ཉམས་པ་དང་བརྗེད་པའི་རྒྱུ་སྤངས་ཤིང་དེ་ལས་ལྡོག་པ་བླང་བ་ནི། རང་གི་བླ་མ་དང་གཞན་མཆོད་པར་འོས་པ་རྫུན་ལ་སོགས་པས་བསླུ་བ། སྡིག་ལྟུང་སོགས་ལ་འགྱོད་དགོས་མོད། དེ་ལས་གཞན་འགྱོད་པའི་གནས་མིན་པ་ལ་འགྱོད་པ་བསྐྱེད་པ། བྱང་ཆུབ་ཏུ་སེམས་བསྐྱེད་པའི་གང་ཟག་ལ་ཞེ་སྡང་གིས་མི་སྙན་པར་བརྗོད་པ། འགྲོ་བ་གང་ཡང་རུང་བ་ལ་གཡོ་སྒྱུ་ཆེ་ཕྲ་བྱས་ན། དེ་དག་གིས་ཚོར་མ་ཚོར་དགའ་མ་དགའ་གང་ཡིན་ཀྱང་རུང་ལྟུང་བར་འགྱུར་བས་ནག་པོའི་ཆོས་བཞི་ཞེས་བྱའོ། ། དེ་དག་གིས་ནི་ཐུན་ཚོད་ལས་འདས་ན་སྡོམ་པ་འཇིག་པས་བཤགས་སྡོམ་འཕྲལ་དུ་བྱ་དགོས་སོ། ། དེས་ན་དེ་དག་སྤངས་ལ་ནག་པོའི་ཆོས་བཞིའི་གཉེན་པོར་དཀར་པོའི་ཆོས་བཞི་བསྒྲུབ་པར་བྱ་སྟེ། ཤེས་བཞིན་དུ་སྲོག་གི་ཕྱིར་ཡང་རྫུན་མི་སྨྲ་བ་དང༌། སེམས་ཅན་ཐམས་ཅད་དགེ་བ་ལ་འགོད་ཅིང་ཁྱད་པར་ཐེག་ཆེན་ལ་འགོད་པ་དང༌། སེམས་བསྐྱེད་པའི་བྱང་ཆུབ་སེམས་དཔའ་ཐམས་ཅད་(༦༡ན)ལ་སངས་རྒྱས་ཀྱི་འདུ་ཤེས་བཞག་ཅིང་ཡོན་ཏན་བསྒྲག་པ་དང༌། སེམས་ཅན་ལ་ལྷག་པའི་བསམ་པས་གནས་པའོ། །འདི་དག་ནི་འོད་སྲུང་གིས་ཞུས་པའི་མདོ་ལས་གསུངས་སོ། ། ཇ༢ གཉིས་པ་[དམ་པ་གསུམ་]ནི། བྱ་བྱེད་ཕྲིན་ལས་དམ་པ་གསུམ་ལ་སྨོན། ། སེམས་ཅན་ཐམས་ཅད་ཀྱི་དོན་དུ་སངས་རྒྱས་བསྒྲུབ་པར་བྱའོ་སྙམ་པ་འབྲས་བུ་ལ་སྨོན་པ། དེའི་ཆེད་དུ་བྱང་ཆུབ་ཀྱི་སྤྱོད་པ་ལ་བསླབ་པར་བགྱིའོ་སྙམ་པ་བྱེད་པ་སྟེ་ཐབས་ལ་སྨོན་པ། སེམས་ཅན་ཐམས་ཅད་ཀྱི་རེ་བ་ཡིད་བཞིན་དུ་བསྐང་བར་བགྱིའོ་སྙམ་པ་ཕྲིན་ལས་ལ་སྨོན་པ་སྟེ་སྐྱེས་བུ་དམ་པའི་སྨོན་པ་གསུམ་ལ་རྟག་ཏུ་སྨོན་པ་དང་ལྡན་པར་བྱའོ། ། ཇ༣ གསུམ་པ་[ཉམས་པའི་རྒྱུ་སྤོང་བའི་ཚུལ་]ནི། ཞུམ་དང་སྐྲག་སོགས་མི་མཐུན་ཉམས་རྒྱུ་སྤང༌། ། མགོ་དང་ཡན་ལག་བུ་དང་ཆུང་མ་གཏོང་བ། ཚུལ་ཁྲིམས་བརྩོན་འགྲུས་བརྩམས་པ་སོགས་སྤྱད་དཀའ་བས་བློ་ཞུམ་པ་དང༌། གྲངས་མེད་སུམ་ཅུ་ལ་སོགས་པར་ཚོགས་གསོག་པའི་ཡུན་རིང་ཆེས་པས་དེ་ཙམ་མི་ནུས་སྙམ་དུ་སྒྱིད་ལུག་པ་དང༌། འཁོར་བ་མཐོ་དམན་གང་དུ་སྐྱེས་ཀྱང་བདེ་བ་སྤུ་རྩེ་ཙམ་མེད་པ་ལ་སྐྲག་ནས་འཁོར་བ་སྤང་བར་སེམས་པ་སོགས་ནི་སེམས་བསྐྱེད་པ་དང་མི་མཐུན་པའི་ཕྱོགས་ཉམས་པའི་རྒྱུ་ཡིན་པས་སྤང་བར་བྱའོ། ། ཆ༢ གཉིས་པ་འཇུག་པའི་བསླབ་བྱ་བཤད་པ་ལ་གཉིས། ཇ༡ མདོར་བསྟན། ཇ༢ རྒྱས་བཤད་དོ། ། ཇ༡ དང་པོ་ནི། འཇུག་པར་དགག་སྒྲུབ་ཕྱོགས་གཉིས་བསླབ་བྱ་ཀུན། ། སྡོམ་དང་ཆོས་སྡུད་དོན་བྱེད་གསུམ་དུ་འདུ། ། འཇུག་པའི་བསླབ་བྱ་ལ། དགག་པའི་ཕྱོགས་དང་། སྒྲུབ་པའི་ཕྱོགས་གཉིས་སུ་ཡོད་ཅིང༌། དེ་གཉིས་ལ་ཐེག་པ་གོང་འོག་གི་བསླབ་བྱ་ཕལ་ཆེར་ཀུན་འདུ་བས་རྒྱ་ཆེ་ཡང་། མདོར་བསྡུ་ན། ཉེས་སྤྱོད་སྡོམ་པ། དགེ་བ་ཆོས་སྡུད། སེམས་ཅན་དོན་བྱེད་ཀྱི་ཚུལ་ཁྲིམས་གསུམ་དུ་འདུའོ། ། དེ་གསུམ་ཡང་བྱང་སའི་དགོངས་པ་རྗེ་ཟླ་འོད་གཞོན་ནུས་བསྡུས་པར། དང་པོ་ནི། སེམས་གནས་པར་(༦༡བ)བྱེད་པའོ། །གཉིས་པ་ནི། རང་རྒྱུད་ཀྱི་ཆོས་སྨིན་པར་བྱེད་པའོ། །གསུམ་པ་ནི། སེམས་ཅན་ཡོངས་སུ་སྨིན་པར་བྱེད་པའོ། །ཞེས་གསུངས་སོ། ། ཇ༢ གཉིས་པ་[རྒྱས་བཤད་]ལ་གཉིས། ཉ༡ དགག་པའི་ཕྱོགས་དང༌། ཉ༢ སྒྲུབ་པའི་ཕྱོགས་བཤད་པའོ། ། ཉ༡ དང་པོ་ལ་གཉིས། ཏ༡ ངོ་བོ་ངོས་འཛིན། ཏ༢ བླང་དོར་བྱེ་བྲག་ཏུ་བཤད་པའོ། ། ཏ༡ དང་པོ་ནི། དགག་ཕྱོགས་སྡོམ་པ་གོང་སྨོས་ལུགས་སྲོལ་གཉིས། ། དགག་ཕྱོགས་ཀྱི་བསླབ་བྱ་ནི། སྡོམ་པའི་ཚུལ་ཁྲིམས་ཏེ། དེ་ལ་ཐུན་མོང་བ་སོ་ཐར་རིས་བརྒྱད་རང་གིས་བླངས་པ་དེ་དང༌། ཐུན་མོང་མ་ཡིན་པ་གོང་བཤད་ཤིང་རྟའི་སྲོལ་གཉིས་ཀྱི་རྩ་བ་དང་ཡན་ལག་གི་ཉེས་ལྟུང་རྣམས་སྡོམ་པ་ཡིན་ནོ། ། བྱང་སེམས་ཀྱི་སྡོམ་པའི་མི་མཐུན་ཕྱོགས་གཞན་ཡང་ཐེག་ཆེན་གྱི་མདོ་སྡེ་རྣམས་ལས་འབྱུང་བ། མི་དགེ་བ་བཅུ། འཇིག་རྟེན་ཆོས་བརྒྱད། འཕགས་ལམ་ཡན་ལག་བརྒྱད་ཀྱི་ལྡོག་པ་ལོག་པར་ལྟ་བ་དང༌། ལོག་པའི་རྟོག་པ་སོགས་བརྒྱད། ཁ་གསག །གཞོག་སློང༌། ཐོབ་འཇལ། རྙེད་འཚོལ། གཡོ་སྒྱུ་སྟེ་ལོག་འཚོ་ལྔ། ཤན་པ། ཆང་འཚོང༌། སྨད་འཚོང༌། རྒྱལ་པོ། གདོལ་པའི་གནས་སུ་འགྲོ་བ་སྟེ་སྤྱོད་ཡུལ་མིན་པ་ལྔ། མ་བསྔོས་པ། ལོག་པར་བསྔོས་པ། དགེ་བ་ལ་འགྱོད་པ། ཁོང་ཁྲོ་བ་སྟེ་དགེ་བ་འཛད་པའི་རྒྱུ་བཞི། ལྟ་བ་ཐ་དད་པས་གཟིགས་པ། སྡིག་གྲོགས་དང་སྡིག་ལྟ་འཛིན་པ་སོགས་བདུད་ཀྱི་ལས་སུ་བཤད་པ་མཐའ་དག་སྤང་བར་བྱའོ། ། ཏ༢ གཉིས་པ་[བླང་དོར་བྱེ་བྲག་ཏུ་བཤད་པ་]ནི། དགོས་པ་མེད་པར་བཅས་རང་ཉེས་ཀུན་དང༌། ། རང་དང་གཞན་རྒྱུད་སྨིན་པར་བྱེད་པའི་གེགས། ། འདིར་བདེ་ཕྱི་མར་སྡུག་དང་གཉིས་ཀར་སྡུག ། ལྟུང་དང་ལྟུང་མེད་གཟུགས་བརྙན་རྣམ་ཀུན་སྤང༌། ། དགོས་པ་ཁྱད་པར་ཅན་མེད་པར་བཅས་པ་དང་རང་བཞིན་གྱི་ཉེས་པ་ཁ་ན་མ་ཐོ་བའི་རིགས་ཀུན་དང༌། རང་དང་གཞན་གྱི་རྒྱུད་སྨིན་པར་བྱེད་པའི་གེགས་སུ་གྱུར་པ། དཔེར་ན། ཁྱིམ་པའི་རྟགས་དང་སྤྱོད་ལམ་འཆང་བ་ལྟ་བུ། ཚེ་འདིར་བདེ་བ་ལྟར་(༦༢ན)སྣང་ཡང་ཕྱི་མར་སྡུག་བསྔལ་གྱི་འབྲས་བུ་བསྐྱེད་པ་ལོག་འཚོའི་ཟས་ནོར་ལ་སྤྱོད་པ་ལྟ་བུ། འདི་དང་ཕྱི་མ་གཉིས་ཀར་སྡུག་བསྔལ་བ་དམག་འཁྲུག་གི་བཀོད་པ་བཤམ་པ་ལྟ་བུ། ལྟུང་བ་དངོས་སྔར་སྨོས་པ་རྣམས་དང༌། ལྟུང་མེད་ཀྱི་གཟུགས་བརྙན་རྣམས་ཀྱང་རྣམ་པ་ཀུན་ཏུ་སྤང་བར་བྱ་བ་ཡིན་ནོ། ། འདིར་སྡུག་ཕྱི་མར་བདེ་དང་གཉིས་ཀར་བདེ། ། ལྟུང་མེད་ལྟུང་བའི་གཟུགས་བརྙན་སྤྱད་པར་བྱ། ། ཚེ་འདིར་སྡུག་བསྔལ་ཡང་ཕྱི་མར་བདེ་བ་ཆེན་པོ་ཐོབ་པ་ཆོས་ཕྱིར་དཀའ་བ་སྤྱོད་པའམ་ཞིང་དག་པ་ལ་བདོག་རྒུ་གཏོང་བ་ལྟ་བུ། འཕྲལ་ཡུན་གཉིས་ཀར་བདེ་བ་ཚུལ་ཁྲིམས་ལེགས་པར་བསྲུང་བ་ལྟ་བུ་ལྟུང་བ་མེད་པ་རྣམས་དང་ལྟུང་བའི་གཟུགས་བརྙན་ལའང་སྤྱད་ཅིང་བསྒྲུབ་པར་བྱའོ། ། ལྟུང་བའི་རྣམ་གཞག་མུ་བཞིར་བརྩི་ཚུལ་ཡང༌། སྡོམ་པའི་ཚུལ་ཁྲིམས་ལ། ཞེ་སྡང་གིས་སྲོག་གཅོད་པ་ལྟུང་བ་དང༌། ཕན་སེམས་ཀྱིས་གསོད་ན་ལྟུང་བའི་གཟུགས་བརྙན། སྙིང་རྗེས་མི་གསོད་པ་ལྟུང་མེད། གཞན་ལ་ཕན་ཀྱང་མི་གསོད་པ་ལྟུང་མེད་ཀྱི་གཟུགས་བརྙན་ནོ། ། དགེ་བ་ཆོས་སྡུད་ལ། སེར་སྣས་མི་སྦྱིན་པ་ལྟུང་བ། ཕན་སེམས་ཀྱིས་མི་སྟེར་བ་ལྟུང་བའི་གཟུགས་བརྙན། བསམ་པ་དག་པས་སྟེར་བ་ལྟུང་མེད། གཞན་ལ་གནོད་ཕྱིར་སྟེར་བ་ལྟུང་མེད་ཀྱི་གཟུགས་བརྙན་ནོ། ། སེམས་ཅན་དོན་བྱེད་ལ། ནད་གཡོག་མ་བྱས་པ་ལྟུང་བ། དོན་ཆེན་སྒྲུབ་ཕྱིར་ནད་གཡོག་མ་བྱས་པ་ལྟུང་བའི་གཟུགས་བརྙན། བརྩེ་བས་ནད་གཡོག་བྱེད་པ་ལྟུང་མེད། ནད་གཡོག་གཞན་ཡོད་བཞིན་དུ་རང་གི་སྤོང་ཀློག་སོགས་དོན་ཆེན་དོར་ནས་ནད་གཡོག་བྱས་ན་ལྟུང་མེད་ཀྱི་གཟུགས་བརྙན་ཏེ། དེ་ལ་ལྟུང་བའི་གཟུགས་བརྙན་ནི་དོན་ལ་ལྟུང་མེད་དང༌། ལྟུང་མེད་ཀྱི་གཟུགས་བརྙན་ནི་ལྟུང་བ་ཡིན་ནོ། ། སྙིང་བརྩེ་ལྡན་ལ་ཀུན་ཀྱང་ཉེས་པ་མེད། ། སྡོམ་པ་ཉི་ཤུ་པ་ལས། (༦༢བ) སྙིང་བརྩེར་ལྡན་ཕྱིར་བྱམས་ཕྱིར་དང༌། ། སེམས་དགེ་བ་ལ་ཉེས་པ་མེད། ། ཅེས་གསུངས་པ་ལྟར། གཞན་ལ་སྙིང་བརྩེར་ལྡན་པ་སོགས་རྒྱུ་གསུམ་གྱིས་རང་འདོད་མེད་པར་ཡུལ་དེ་ལ་ཕན་པའི་བསམ་པ་འབའ་ཞིག་དང་ལྡན་པས་ནི་གཏོང་བའི་རྒྱུ་འགའ་ཞིག་མ་གཏོགས་པ་མུ་བཞི་པོ་གང་ཞིག་སྤྱད་ཀྱང་ཉེས་པ་མེད་པར་མ་ཟད་བསྒྲུབ་པའི་བསླབ་བྱར་གསུངས་སོ། ། ཉ༢ གཉིས་པ་སྒྲུབ་ཕྱོགས་བཤད་པ་ལ་གཉིས། ཏ༡ མདོར་བསྟན། ཏ༢ རྒྱས་པར་བཤད་པའོ། ། ཏ༡ དང་པོ་ནི། སྒྲུབ་ཕྱོགས་དགེ་བ་ཆོས་སྡུད་ཕར་ཕྱིན་དྲུག ། སྒྲུབ་ཕྱོགས་ནི། དགེ་བ་ཆོས་སྡུད་ཀྱི་ཚུལ་ཁྲིམས་ཏེ། དེའང་མཉམ་མེད་དྭགས་པོས། བྱང་ཆུབ་སེམས་དཔའ་སྡོམ་པའི་ཚུལ་ཁྲིམས་ཡང་དག་པར་བླངས་པའི་འོག་ཏུ་བྱང་ཆུབ་ཆེན་པོའི་ཕྱིར་ལུས་དང་ངག་གི་དགེ་བ་བསགས་པ་གང་ཅིའང་རུང་བ་དེ་དག་ཐམས་ཅད་ནི་མདོར་བསྡུ་ན་དགེ་བ་ཆོས་སྡུད་ཀྱི་ཚུལ་ཁྲིམས་ཡིན་ནོ། །ཞེས་གསུངས་པའི་དོན་མདོ་དང་བསྟན་བཅོས་ལས་ཤིན་ཏུ་རྒྱ་ཆེར་གསུངས་པ་ཐམས་ཅད་བསྡུ་ན་ཕ་རོལ་ཏུ་ཕྱིན་པ་དྲུག་ལ་འདུ་བས་སོ། ། ཏ༢ གཉིས་པ་ལ་གཉིས། ཐ༡ བསྡུས་དོན་རྣམ་པར་གཞག ། ཐ༢ ཡན་ལག་རྒྱས་པར་བཤད་པའོ། ། ཐ༡ དང་པོ་ནི། གྲངས་ངེས་གོ་རིམ་མཚན་ཉིད་ངེས་པའི་ཚིག ། རབ་ཏུ་དབྱེ་དང་བསྡུ་བས་རྣམ་པར་གཞག ། ཕར་ཕྱིན་ཐུན་མོང་གི་རང་བཞིན་གྲངས་ངེས་པ་དྲུག་སྟེ། དང་པོ་རྣམ་གྲངས་ངེས་པ་ནི། མངོན་མཐོའི་དོན་དུ་སྦྱིན་ཚུལ་བཟོད་གསུམ་དང་ངེས་ལེགས་ཀྱི་དོན་དུ་རྗེས་མ་གསུམ་མོ། ། ཡང་ན། གཞན་དོན་སྒྲུབ་ཕྱིར་སྔ་མ་གསུམ་དང་། རང་དོན་སྒྲུབ་ཕྱིར་ཕྱི་མ་གསུམ་མོ། ། གཉིས་པ་གོ་རིམ་ནི། སྦྱིན་པ་ལ་བརྟེན་ནས་ཚུལ་ཁྲིམས་དང་ཚུལ་ཁྲིམས་ལ་བརྟེན་ནས་བཟོད་པ་སོགས་སྐྱེ་བའི་རིམ་པས་སམ། ཡང་ན་སྦྱིན་པ་ལས་ཚུལ་ཁྲིམས་མཆོག་ཏུ་གྱུར་པ་སོགས་ཡོན་ཏན་དམན་པ་སྔོན་དང་མཆོག་ཕྱི་ནས་བསྟན་པའི་རིམ་པའམ། ཡང་ན། རགས་པ་སྔོན་དང་ཕྲ་བ་ཕྱི་ནས་ཏེ་གང་ལྟར་འཇུག་སླ་བ་དག་སྔོན་དུ་བསྟན་ཏོ། །(༦༣ན) གསུམ་པ་མཚན་ཉིད་ནི། ཁྱད་པར་བཞི་ལྡན་ཏེ། སེར་སྣ་ལ་སོགས་པ་རང་གི་མི་མཐུན་ཕྱོགས་ཉམས་པར་བྱེད་པ། གྲོགས་ནི། འཁོར་གསུམ་མི་རྟོག་པའི་ཡེ་ཤེས་དང་ལྡན་པ། བྱེད་ལས་ནི། གཞན་གྱི་འདོད་དོན་རྫོགས་པར་བྱེད་པ། འབྲས་བུ་ནི། གདུལ་བྱའི་རྒྱུད་ཐེག་པ་གསུམ་ལ་སྨིན་པར་བྱེད་པའོ། ། བཞི་པ་ངེས་ཚིག་ནི། འཇིག་རྟེན་པ་དང་ཉན་རང་གི་དགེ་བ་ཀུན་ལས་ཕུལ་དུ་བྱུང་བའི་ཕ་རོལ་ཏུ་འགྲོ་བས་ཕ་རོལ་ཏུ་ཕྱིན་པའོ། ། ལྔ་པ་རབ་དབྱེ་ནི། སྦྱིན་པའི་སྦྱིན་པ། སྦྱིན་པའི་ཚུལ་ཁྲིམས་སོགས་རེ་རེ་ལའང་དྲུག་དྲུག་སྟེ། སོ་དྲུག་གམ་བརྒྱ་སྟོང་དུའང་དབྱེར་ཡོད་དོ། ། དྲུག་པ་བསྡུ་བ་ནི། ཚོགས་གཉིས་སུ་འདུ་སྟེ། སྦྱིན་ཚུལ་གཉིས་བསོད་ནམས་ཀྱི་ཚོགས། ཤེས་རབ་ཡེ་ཤེས་ཀྱི་ཚོགས་དང་། གཞན་གསུམ་གཉིས་ཀར་གཏོགས་པའོ། ། བསླབ་པ་གསུམ་དུའང་འདུ་སྟེ། ལྷག་པ་ཚུལ་ཁྲིམས་ཀྱི་བསླབ་པ་ནི་དང་པོ་གསུམ། སེམས་ཀྱི་བསླབ་པ་ལྔ་པ། ཤེས་རབ་ཀྱི་བསླབ་པ་དྲུག་པ་སྟེ། བརྩོན་འགྲུས་ཐམས་ཅད་ཀྱི་གྲོགས་སོ། ། ཐ༢ གཉིས་པ་[ཡན་ལག་རྒྱས་པར་བཤད་པ་]ནི། སྦྱིན་པ་ཟང་ཟིང་ཆོས་དང་མི་འཇིགས་པ། ། ཚུལ་ཁྲིམས་སྡོམ་དང་ཆོས་སྡུད་དོན་བྱེད་གསུམ། ། བཟོད་པ་གནོད་དང་དཀའ་བ་སྟོང་ཉིད་ལ། ། བརྩོན་འགྲུས་གོ་ཆ་སྦྱོར་དང་ཆོག་མི་ཤེས། ། བསམ་གཏན་བདེར་གནས་སྒྲུབ་དང་དོན་ལ་དམིགས། ། ཤེས་རབ་འཇིག་རྟེན་འཇིག་རྟེན་འདས་དམན་མཆོག ། ཡང་ན་ཐོས་བསམ་སྒོམ་ལས་བྱུང་རྣམས་བསྒྲུབ། ། འདི་རྣམས་རེ་རེ་ལའང་། མཚན་ཉིད། སྒྲ་དོན། དབྱེ་བ། དགོས་པ་བཞིར་འཆད་དུ་ཡོད་པ་ནི་འདིར་མ་སྤྲོས་པས། འོག་ཏུ་ཤེས་པར་བྱ་དགོས་ལ། ངོ་བོ་ཙམ་སྨོས་ན། སྦྱིན་པ་ལ་གསུམ་སྟེ། བསམ་པ། དངོས་པོ། ཞིང་དང་། ཐབས་མ་དག་པ་བཞི་སྤངས་པའི་སྒོ་ནས་བདོག་པའི་དངོས་པོ་མཐའ་དག་གཏོང་བ་དང༌། ཤིན་ཏུ་གཏོང་བ་དང༌། གཏོང་བ་ཆེན་པོ་སྟེ། ཟང་ཟིང་གི་སྦྱིན་པ། བློའི་ནུས་པ་དང་མཐུན་པར་ཐེག་པ་ཆེ་ཆུང་གི་ཆོས་བཤད་པ་ཆོས་ཀྱི་(༦༣བ)སྦྱིན་པ། རྒྱལ་པོ་སྟག་སེང་མེ་ཆུ་ནད་མཚོན་སོགས་གནས་སྐབས་མཐར་ཐུག་གི་འཇིགས་པ་ལས་སྐྱོབ་པ་ནི་མི་འཇིགས་པའི་སྦྱིན་པའོ། ། ཡང་ན། ཡང་ཡང་སྦྱིན་པ། ཕྱོགས་རིས་མེད་པ། བསམ་པ་རྫོགས་པར་སྦྱིན་པ་གསུམ་དུའང་བཤད་དོ། ། ཚུལ་ཁྲིམས་ལ་གསུམ། ཉེས་སྤྱོད་སྡོམ་པ། དགེ་བ་ཆོས་སྡུད། སེམས་ཅན་དོན་བྱེད་གསུམ་བཤད་ཟིན་དང་འཆད་པར་འགྱུར་བ་ལྟར་རོ། ། བཟོད་པ་ལ་གསུམ། བདག་དང་བདག་གི་ཕྱོགས་སུ་གནོད་པ་ལ། སྤྱོད་འཇུག་ལྟར་ཐབས་དགུ་དང་། བྱང་ས་ལྟར་འདུ་ཤེས་ལྔ་སོགས་བསྒོམས་ནས་ཇི་མི་སྙམ་པ་གནོད་པ་ལ་བཟོད་པ། ཆོས་ཀྱི་ཕྱིར་དུ་ངལ་དུབ་བཀྲེས་སྐོམ་སོགས་དཀའ་བ་སྤྱད་ནུས་པ་སྡུག་བསྔལ་དང་ལེན་གྱི་བཟོད་པ། སྟོང་པ་ཉིད་སོགས་ཟབ་མོའི་གནས་ལ་ཞུམ་པ་དང་སྐྲག་པ་སྤངས་པ་ཆོས་ལ་ངེས་སེམས་ཀྱི་བཟོད་པའོ། ། བརྩོན་འགྲུས་ལ་གསུམ། བྱང་ཆུབ་མ་ཐོབ་ཀྱི་བར་བརྩོན་པ་མི་འདོར་བའི་བློས་ཐུན་ཁོངས་རེ་རེར་ཡང་དགེ་བ་ལ་བརྩོན་འགྲུས་རྩོམ་པ་གོ་ཆའི་བརྩོན་འགྲུས། ཉོན་མོངས་པ་སྤོང་བ། དགེ་བ་སྒྲུབ་པ། སེམས་ཅན་གྱི་དོན་བྱ་བའི་གནས་གསུམ་ལ་བཏང་སྙོམས་མེད་པ་སྦྱོར་བའི་བརྩོན་འགྲུས། དེའི་བར་པ་ལ་གནས་དེ་ལ་རྟག་ཏུ་བྱེད་པའི་བརྩོན་འགྲུས། གུས་པའི་བརྩོན་འགྲུས། ཉོན་མོངས་པས་མི་གཡོ་བའི་བརྩོན་འགྲུས། རྐྱེན་གྱིས་མི་ལྡོག་པའི་བརྩོན་འགྲུས། ང་རྒྱལ་མེད་པའི་བརྩོན་འགྲུས་ལྔར་དབྱེར་ཡོད། ངོམས་པ་མེད་པར་དགེ་བ་ལ་སྤྱོད་པ་ཆོག་མི་ཤེས་པའི་བརྩོན་འགྲུས་སོ། ། བསམ་གཏན་ལ་གསུམ། ལུས་སེམས་ཤིན་ཏུ་སྦྱངས་པ་ཞི་རགས་ཀྱི་རྣམ་པར་སྐྱེས་པ་ནི་མཐོང་ཆོས་བདེར་གནས་ཀྱི་བསམ་གཏན། ཐུན་མོང་ཟད་པར་ཟིལ་གནོན་རྣམ་ཐར་ལ་སོགས་པ་རྣམས་དང༌། ཐུན་མིན་བྱང་སེམས་ཁོ་ནའི་ཁྱད་ཆོས་ཀྱི་ཡོན་ཏན་རྣམས་བསྐྱེད་པའི་ཏིང་ངེ་འཛིན་ལ་གཞོལ་བ་ནི་ཡོན་ཏན་སྒྲུབ་པའི་བསམ་གཏན། ཏིང་ངེ་འཛིན་གྱི་(༦༤ན)སྟོབས་ཀྱིས་མངོན་ཤེས་རྫུ་འཕྲུལ་ལ་སོགས་པས་འགྲོ་བ་འདུལ་བ་ནི་སེམས་ཅན་གྱི་དོན་ལ་དམིགས་པའི་བསམ་གཏན་ནོ། ། ཤེས་རབ་ལ་གསུམ། ཐུན་མོང་རིག་པའི་གནས་ལ་མཁས་པ་ནི་འཇིག་རྟེན་པའི་ཤེས་རབ། འཇིག་རྟེན་ལས་འདས་པའི་ཤེས་རབ་ལ་གཉིས་ཏེ། ཉན་རང་གི་ཆོས་ལས་བདེན་བཞི་རྟོགས་པ་དང༌། ཐེག་ཆེན་གྱི་ཆོས་ལས་བདག་མེད་གཉིས་རྟོགས་པའི་ཤེས་རབ་སྟེ། དེ་དག་ཀྱང་སྔ་མ་སྔ་མ་དམན་པའི་ཤེས་རབ་དང་ཕྱི་མ་ཕྱི་མ་མཆོག་གི་ཤེས་རབ་བོ། ། ཡང་ན། ཐོས་བྱུང་། བསམ་བྱུང་། སྒོམ་བྱུང་གི་ཤེས་རབ་རྣམས་ཏེ། དང་པོ་ནི། ལུང་རིགས་དུ་མ་ཐོས་ཤིང་དེའི་དོན་ཤེས་པ། གཉིས་པ་ནི། གྲུབ་མཐའ་བཞི་བདེན་པ་གཉིས་དྲང་ངེས་སོགས་འབྱེད་པས་ཤེས་བྱ་ལ་སྒྲོ་འདོགས་ཆོད་པའོ།། གསུམ་པ་ནི། དེ་དག་གི་དོན་བསྒོམས་པས་གནས་ལུགས་ཇི་བཞིན་དུ་རྟོགས་པའོ། ། ཤེས་རབ་རྗེས་ཞུགས་ཀུན་ཀྱང་ཕ་རོལ་ཕྱིན། ། སྤྱིར་ཕར་ཕྱིན་དྲུག་གའང་དམ་པ་དྲུག་དང་ལྡན་པར་ཉམས་སུ་བླང་དགོས་ཏེ། རྟེན་དམ་པ་བྱང་ཆུབ་ཀྱི་སེམས་དང་ལྡན་པ། དངོས་པོ་དམ་པ་སྦྱིན་སོགས་ཕྱོགས་རེ་མ་ཡིན་པར་གཞི་ཐམས་ཅད་ལ་འཇུག་པ། ཆེད་དུ་བྱ་བ་དམ་པ་སེམས་ཅན་ཐམས་ཅད་ཀྱི་དོན་དུ་སྦྱོར་བ། ཐབས་དམ་པ་འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པ། བསྔོ་བ་དམ་པ་བླ་ན་མེད་པའི་བྱང་ཆུབ་ཏུ་བསྔོ་བ། རྣམ་དག་དམ་པ་སྒྲིབ་གཉིས་ཀྱི་དངོས་གཉེན་དུ་སྤྱོད་པ་རྣམས་སོ། ། ཁྱད་པར་སྡུད་པ་ལས། དམུས་ལོང་དམིགས་བུ་མེད་པ་བྱེ་བ་ཁྲག་ཁྲིག་རྣམས། ། ལམ་ཡང་མི་ཤེས་གྲོང་ཁྱེར་འཇུག་པར་ག་ལ་ནུས། ། ཤེས་རབ་མེད་ན་མིག་མེད་ཕ་རོལ་ཕྱིན་ལྔ་འདིའི། ། དམིགས་བུ་མེད་པས་བྱང་ཆུབ་རེག་པར་ནུས་མ་ཡིན། ། ཞེས་གསུངས་པ་ལྟར། ཕར་ཕྱིན་ལྔ་པོ་རྣམ་པར་མི་རྟོག་པའི་ཤེས་རབ་ཀྱིས་མ་ཟིན་ན་འཇིག་རྟེན་པའི་ལེགས་སྤྱད་ཙམ་དུ་འགྱུར་ལ། ཤེས་རབ་རྗེས་སུ་ཞུགས་ན་སྦྱིན་སོགས་ཀུན་(༦༤བ)ཀྱང་འཇིག་རྟེན་ལས་འདས་པའི་ཕ་རོལ་ཏུ་ཕྱིན་པ་ཞེས་བྱའོ། ། གསུམ་པ་དོན་བྱེད་ཀྱི་ཚུལ་ཁྲིམས་བཤད་པ་ནི། སེམས་ཅན་དོན་བྱེད་བསྡུ་དངོས་བཞི་སོགས་སྤྱད། ། དགེ་བ་ཆོས་སྡུད་ཀྱིས་རང་རྒྱུད་སྨིན་ནས་སེམས་ཅན་དོན་བྱེད་ཀྱི་ཚུལ་ཁྲིམས་བསྡུ་བའི་དངོས་པོ་བཞི་ལ་སྤྱད་པར་བྱ་སྟེ། དེའང་། སྦྱིན་པ། སྙན་སྨྲ། དོན་མཐུན། དོན་སྤྱོད་བཞི་སྟེ། གདུལ་བྱ་འཁོར་དུ་མ་འདུས་པ་བསྡུ་བར་བྱ་བའི་ཕྱིར་ཐོག་མར་ཟང་ཟིང་གི་སྦྱིན་པས་མགུ་བར་བྱེད་པ་དང་པོ། འཁོར་དུ་འདུས་ནས་སྙན་པར་སྨྲ་བའི་གཏམ་གྱིས་བློ་རིམ་གྱིས་དྲངས་ཏེ་དམ་པའི་ཆོས་བསྟན་པས་དེ་སྒྲུབ་པ་ལ་དོན་གཉེར་གྱི་མོས་འདུན་དང་སྤྲོ་བ་སྐྱེད་དུ་འཇུག་པ་གཉིས་པ། བྱིས་པ་ཁ་ཟས་འཇམ་རྩུབ་ཀྱིས་རིམ་པར་གསོ་བ་ལྟར་ཆོས་གཅིག་གིས་བློ་རིས་ཐ་དད་སྨིན་པར་མི་ནུས་པས་གདུལ་བྱའི་བློ་དང་འཚམས་པའི་ཆོས་ལ་སྤྱོད་དུ་འཇུག་པ་གསུམ་པ། སེམས་ཅན་དེ་དག་དམ་པའི་ཆོས་དང་དགེ་བའི་སྤྱོད་པ་ལ་འདྲེན་པའི་ཕྱིར་རང་ཡང་དོན་དེ་ལ་མཐུན་པར་སློབ་པ་བཞི་པའོ། ། སོགས་ཁོངས་ནས་གོང་སྨོས་སེམས་ཅན་དོན་བྱེད་ཀྱི་འགལ་ཟླ་བཅུ་གཅིག་པོ་སྒྲུབ་པའི་སྒོ་ནས་དང་དུ་བླང་བར་བྱའོ། ། ཆ༣ གསུམ་པ་སྨོན་འཇུག་གི་བསླབ་བྱ་གཉིས་པོ་ཇི་ལྟར་བསྲུང་བའི་ཚུལ་བཤད་པས་འཇུག་བསྡུ་བ་ནི། དྲན་དང་ཤེས་བཞིན་སེམས་དང་བསླབ་པ་བསྲུང༌། ། ཇི་སྐད་བཤད་པའི་ཚུལ་དེ་དག་དུས་རྟག་ཏུ་སྲུང་སེམས་མི་བརྗེད་པའི་དྲན་པ་དང༌། རང་རྒྱུད་ལ་ཉེས་པ་བྱུང་མ་བྱུང་རྟོག་པའི་ཤེས་བཞིན་དང༌། འཇུག་ལྡོག་གི་གནས་ལ་གཟོབ་པ་ལྷུར་ལེན་པའི་བག་ཡོད་དང་གསུམ་བསྟེན་པས་སེམས་བསྲུང་བར་བྱ་ཞིང༌། བྱེ་བྲག་ཏུ་བྱང་ཆུབ་ཀྱི་སེམས་རིན་པོ་ཆེ་སྐྱེས་པ་དང༌། དེའི་བསླབ་པ་སློབ་པ་གཉིས་ཀའང་བསྲུང་དག་སྤེལ་གསུམ་གྱི་ཐབས་ལ་བརྩོན་པ་བསྐྱེད་པར་བྱ་སྟེ། དེའང་སེམས་དེ་ཉིད་མི་ཉམས་པར་སྲུང་བ་ནི། སྨོན་འཇུག་གི་རང་བཞིན་ལ་སེམས་(༦༥ན)གནས་པ་སྟེ། མཐུན་ཕྱོགས་བསླབ་པར་བྱ་བའི་གནས་སོ། ། སེམས་དེའི་དྲི་མ་དག་པར་བྱེད་པ་ནི། ཉེས་སྤྱོད་ཐམས་ཅད་ལས་ཟློག་པར་བྱེད་པ་སྟེ་མི་མཐུན་པའི་ཕྱོགས་སྤོང་བའི་བསླབ་བྱའོ། ། དགེ་བ་སྤེལ་བའི་ཐབས་ནི། བདག་གི་བདེ་བ་དང་གཞན་གྱི་སྡུག་བསྔལ་བརྗེ་བ་ལ་སྤེལ་མར་སྦྱོང་སྟེ། མཐུན་ཕྱོགས་ཀྱི་བསླབ་བྱའོ། ། དེ་བཞིན་དུ་དགག་སྒྲུབ་