Tibetan
བཟློག་པའི་སླད་དུ་རྫུན་སྨྲ་བ་དང༌། ངེས་དོན་དུ། བདེན་པའི་ཚིག་ནི་རིས་བཅས་གཉིས་ཆོས་རྣམས་ཡིན་ལ། བདེན་པ་མིན་པ་རབ་ཏུ་མི་གནས་པའི་ཆོ་ག་གསུང་རྣམ་པ་ཐམས་ཅད་པ་སྙིང་གར་གཞོམ་དུ་མེད་པའི་རང་སྒྲའི་ངོ་བོར་གནས་ཏེ། དངོས་ས་ལྔ་པ་དང་དྲུག་པ་ཡིན་ལ། ལས་དང་པོ་བས་གཞོམ་མེད་ཀྱི་རང་སྒྲ་ཐོས་པའི་ཐབས་སོར་སྡུད་སྒོམ་པའོ། ། རིན་པོ་ཆེའི་རིགས་ལ། དྲང་དོན་དུ། ནོར་ལ་སྲེད་ཅིང་བརྐམ་པས་རྒྱུད་བཅིངས་པ་དག་ཡི་དྭགས་ཀྱི་འགྲོ་བ་ལས་བཟློག་པའི་སླད་དུ་མ་བྱིན་པར་བླངས་ཏེ་འཕྲོག་ལ། དེ་ཉིད་ཚོགས་ཀྱི་སླད་དུ་གཞན་ལ་སྦྱིན་པ་དང༌། ངེས་དོན་དུ། གཞན་ནི་རྡོ་རྗེ་སེམས་དཔའ་སྟེ། དེའི་ནོར་རིན་པོ་ཆེ་དང་མཚུངས་པའི་འགྱུར་མེད་ཀྱི་བདེ་བ། གང་ལས་དབྲོག་ན་སྟོང་གཟུགས་དང་གཉིས་མེད་དུ་བྱ་བ་གནས་མགྲིན་པར་དངོས་ས་བརྒྱད་པ་ལ་སྟེ། ལས་དང་པོ་བས་མི་འགྱུར་བའི་བདེ་ཆེན་གྱི་ལམ་སྒོམ་པའོ། ། པདྨའི་རིགས་ལ། དྲང་དོན་དུ། བུད་མེད་ལ་སྲེད་ཅིང་ཆགས་པས་དུད་(༨༢བ)འགྲོར་སྐྱེ་བ་བཟློག་པའི་དོན་དུ་བུད་མེད་དབྲོག་པ་དང༌། ངེས་དོན་དུ། གཞན་གྱི་བུད་མེད་སྟོང་གཟུགས་ཕྱག་རྒྱ་ཆེན་མོ་ཡིན་ལ། འཕྲོག་པ་ནི་དེ་མངོན་དུ་བྱེད་པ་སྟེ་དངོས་ས་དགུ་པ་བཅུ་པ་གཉིས་དང༌། ལས་དང་པོ་བས་སྟོང་གཟུགས་ཀྱི་ལམ་ལ་བསླབ་པའོ། ། འཁོར་ལོའི་རིགས་ལ། དྲང་དོན་དུ། རིགས་ཀྱིས་དྲེགས་ཤིང་ང་རྒྱལ་བ་གཞིག་པའི་སླད་དུ་ཆང་དང་སྒྲོན་མ་ཞེས་པ་ཤ་ལྔ་དང་བདུད་རྩི་ལྔ་ལ་བསྟེན་པ་དང༌། ངེས་དོན་དུ། ཆང་ནི་ལྷན་ཅིག་སྐྱེས་པའི་ཡེ་ཤེས། ཤ་ལྔ་ནི་རྣམ་པ་གཞན་པའི་དབང་པོ་ལྔ། བདུད་རྩི་ལྔ་ནི་སངས་རྒྱས་ལྔ། བཟང་པོའི་ཡུལ་ཞེས་གསུངས་པ་ནི་རྣམ་པ་གཞན་པའི་ཡུལ་ལྔ་སྟེ། བཤང་གཅི་ཁུ་བའི་དྭངས་མ་ལྟེ་བར་ལུགས་ཟློག་ཏུ་བརྟན་པ་དངོས་ས་བཞི་པ། ལས་དང་པོ་བས་སོར་བསམ་གྱི་ཡན་ལག་ལ་བསླབ་པའོ། ། གྲི་གུག་གི་རིགས་ལ། དྲང་དོན་དུ། ལས་རྒྱའི་དངོས་གྲུབ་ཀྱི་སླད་དུ་བུད་མེད་རྣམ་པར་མི་སྨད་ཅིང་གཏོང་བ་ཆེན་པོ་རང་ལུས་སྦྱིན་པར་གཏོང་བར་བྱ་བ་དང༌། ངེས་དོན་དུ། མི་འགྱུར་བའི་བདེ་བའི་རྒྱུར་མཁའི་པདྨར་བསྲུབས་པ་ལས་ཁུ་བ་མི་འཕོ་བ་ཚངས་པར་སྤྱོད་པའི་སྡོམ་པ་ལ་གནས་པ་སྟེ། དངོས་གསང་བའི་འཁོར་ལོར་ཁུ་བ་བརྟན་པས་ས་དང་པོ་དང༌། ལས་དང་པོ་བས་བྱེད་བཅིངས་ཀྱི་སྦྱོར་བས་རྡོ་རྗེ་བྱང་སེམས་གསང་བར་བརྟན་པ་ལ་བསླབ་ཅིང༌། བུ་དང་ཆུང་མ་སོགས་དང་ལྷན་ཅིག་རང་གི་ལུས་ཀྱང་གཏོང་བར་བྱའོ། ། དེ་དག་ཀྱང་ནུས་པ་མ་ཐོབ་པའི་སྒྲུབ་པ་པོ་རྣམས་དང་ཏིང་ངེ་འཛིན་གྱི་ཡན་ལག་ལ་བརྟེན་ནས་མངོན་ཤེས་ལྔ་ལ་སོགས་པ་ཐོབ་པའི་གྲུབ་པ་རྣམས་ཀྱི་རྒྱུད་ཚོད་དང་སྦྱར་ཏེ། དངོས་བསྟན་དང་སྦས་དོན་གཉིས་སུ་དགོངས་ནས་གསུངས་པ་སྟེ། མངོན་ཤེས་མ་ཐོབ་པར་ཞི་རྒྱས་དབང་དགུག་མ་གཏོགས་སྲོག་གཅོད་སོགས་དྲག་པོའི་ལས་མི་བྱ་བར་གསུངས་པས། གྲུབ་པ་ཐོབ་པ་རྣམས་ཀྱིས་དངོས་དང༌། ལས་དང་པོ་བ་རྣམས་ཀྱིས་བསམ་པའི་སྒོ་ནས་དང༌། རྣལ་འབྱོར་པ་རྣམས་ཀྱིས་ཇི་ལྟར་རིགས་པར་(༨༣ན)བློ་ཚོད་དང་སྦྱར་ཏེ་བྱ་བ་ཡིན་ནོ། ། འདི་ལ་ལུས་སོགས་གཏོང་བ་ནི་བསོད་ནམས་ཀྱི་ཚོགས་དང༌། བུད་མེད་ལ་མི་སྨད་པ་ཚུལ་ཁྲིམས་ཀྱི་ཚོགས་དང༌། བདུད་རྩི་ལྔ་སོགས་བརྟེན་པ་ཡེ་ཤེས་ཀྱི་ཚོགས་སུ་གསུངས་སོ། ། འདིར་རྒྱལ་བ་གཉིས་པ་རང་བྱུང་ཞབས་ཀྱིས་རྒྱུད་སྡེ་སྤྱི་འགྲོའི་དབང་དུ་མཛད་དེ། དམ་ཚིག་རྒྱ་མཚོ་ལས། ཁྱད་པར་བླ་མེད་སྡོམ་པ་ནི། ། རྡོ་རྗེའི་རིགས་ལ་སྲོག་གཅོད་དེ། ། ཞིང་བཅུ་རླུང་དང་རྟོག་པར་གསུངས། ། རིན་ཆེན་རིགས་ལ་མ་སྦྱིན་ལེན། ། ནོར་དང་བུད་མེད་ཐེག་པ་ཆེ། ། གཞན་དང་རང་དོན་སྒྲུབ་བྱེད་པའོ། ། པདྨ་རིགས་ཀྱི་དམ་ཚིག་མཆོག ། ལས་ཆོས་དམ་ཚིག་ཕྱག་རྒྱ་ཆེ། ། བུད་མེད་ཡིན་ཏེ་བསྟེན་པའོ། ། ལས་ཀྱི་རིགས་ནི་རྫུན་དུ་སྨྲས། ། བདག་དང་སེམས་ཅན་མི་དམིགས་པར། ། མྱ་ངན་འདས་ལ་འགོད་པར་གྲགས། ། འཁོར་ལོའི་རིགས་ལ་ཤ་ལྔ་དང༌། ། ཆང་དང་ཡུལ་ཀུན་བསྟེན་པ་སྟེ། ། ཕྱི་ནང་གསང་བའི་རིམ་པ་ཡིས། ། མ་ཉམས་སྤྱོད་པ་བླ་ན་མེད། ། ཅེས་གསུངས་སོ། ། ཕ༣ གསུམ་པ་སྤང་བྱ་དམ་ཚིག་བཤད་པ་ལ་བཞི། བ༡ རྩ་བའི་ལྟུང་བ། བ༢ ཡན་ལག་གི་ལྟུང་བ། བ༣ ཕྲ་མོ་ཉེར་བརྒྱད། བ༤ ཞར་བྱུང་དབང་བཞིའི་དམ་ཚིག་བཤད་པའོ། ། བ༡ དང་པོ་ནི། དམ་ཚིག་རྩ་བའི་ལྟུང་བ་བཅུ་བཞི་སྟེ། ། སློབ་དཔོན་བརྙས་དང་བཀའ་འདས་སྤུན་ལ་ཁྲོ། ། བྱམས་བཏང་བྱང་སེམས་སྤོང་དང་ཆོས་ལ་སྨོད། ། གསང་སྒྲོགས་ཕུང་པོར་བརྙས་དང་སོམ་ཉི་ཟ། ། གདུག་ལ་བྱམས་ལྡན་དེར་རྟོག་སེམས་སུན་འབྱིན། ། དམ་ཚིག་རྙེད་འདོར་བུད་མེད་སྨོད་པའོ། ། དེའང་དམ་ཚིག་གི་སྐད་དོད་ས་མ་ཡ་ནི། ཇི་སྐད་དུ། ས་མ་ཡ་མཉམ་ཇི་བཞིན་སྤྱོད། ། གྲུབ་པའི་མཐའ་དང་ཕུན་སུམ་ཚོགས། ། ཁྲིམས་བཅའ་གཞན་ཡང་རྒྱས་པར་བསྟན། ། བརྡ་དང་དུས་དང་སྐད་རྣམས་ལའོ། ། ཞེས་དོན་བཅུ་ལ་འཇུག་པར་བཤད་པ་ལས། སྐབས་འདིར་ཇི་བཞིན་པར་སྤྱོད་པ་དང༌། དམ་པའི་ཚིག་(༨༣བ)གིས་ཁྲིམས་སུ་བཅས་པ་དེ་ལས་འདར་མེད་པའི་དོན་སོགས་སུ་བཟུང་བར་བྱ་སྟེ། དེ་ལ་ཕྱིར་བཅོས་དང་མ་འབྲེལ་ན་མནར་མེད་སོགས་སུ་ལྟུང་བའི་རྩ་བར་གྱུར་པས་རྩ་བའི་ལྟུང་བ་ཞེས་གྲགས་པ་ནི་བཅུ་བཞི་སྟེ། རྩ་ལྟུང་དང་པོའི་ཡུལ་རྡོ་རྗེ་སློབ་དཔོན་ལའང༌། དམ་ཚིག་བཟླས་པ་སྦྱིན་པ་དང༌། ། འཆད་བྱེད་མན་ངག་སྟོན་པ་དང༌། ། དབང་བསྐུར་བ་དང་ལས་བྱེད་པ། ། སློབ་དཔོན་དྲུག་ཏུ་རབ་ཏུ་བརྗོད། ། ཅེས་གསུངས་པ་ལས་གཙོ་བོར་གྱུར་པ་དབང་བསྐུར་རྒྱུད་བཤད་མན་ངག་ཕོག་པ་དང༌། ཁྱད་པར་དེ་ཁོ་ན་ཉིད་ཀྱི་ཡེ་ཤེས་མཚོན་པར་མཛད་པ་ནི་དཔལ་ལྡན་བླ་མ་ཞེས་བྱ་སྟེ། དེའི་ཐུགས་དཀྲུགས་སམ་དེ་ལ་རྡེག་འཚོག་སྐུར་འདེབས་ལོག་ལྟ་སོགས་སྒོ་གསུམ་གང་ཡང་རུང་བས་སྤྱོས་ཤིང་བརྙས་ན་རྩ་ལྟུང་དང་པོར་གྱུར་ཏེ། དེའང་ཡུལ་བླ་མ་དམ་པ་ཡིན་པ། མི་དགེ་བ་སྤྱད་ན་དེ་མི་དགྱེས་པར་ཤེས་པ། ལས་ལུས་ངག་གི་རྣམ་པར་རིག་བྱེད་དུ་བླ་མའི་དངོས་སུ་ཐོན་པར་སྤྱད་པ། གཞན་དོན་དུ་འགྱུར་བ་སོགས་ཀྱི་དགོས་པ་མེད་པར་རང་དོན་ལྷུར་བླངས་པ། ཕྱི་ནས་སྦྱོང་སེམས་མེད་པ་སྟེ་ཡན་ལག་དྲུག་དང་ལྡན་ན་རྫོགས་པའོ། ། དབང་བསྐུར་བ་སོགས་གསུམ་ཀའམ་གཉིས་སམ་གཅིག་ལྡན་གྱིས་ལྟུང་བའི་ཡུལ་ལས་ལྕི་ཡང་གསུམ་ལ་སོགས་པའང་དབྱེར་ཡོད་དོ། ། གཉིས་པ་བཀའ་ལས་འདས་པ་ནི། སྤྱིར་རྒྱལ་བའི་བཀའ་ལས་འདས་པར་བཤད་དེ། རང་གི་བློ་དང་མ་འཚམས་ཀྱང་སྨོད་ཅིང་སྤངས་ན་འདིར་གྱུར་ཏེ། དེའང་ཐེག་ཆེན་གྱི་ཆོས་སྤངས་ན་ཕམ་པ། རང་འདོད་ཀྱི་བཀའི་ཚིག་དང་མི་མཚུངས་པའི་བཀའ་གཞན་ལ་སྡང་ན་སྦོམ་པོ། སྒྲོ་སྐུར་ཆུང་ངུ་ནི་ཉེས་བྱས་སུ་འགྱུར་ལ། བྱེ་བྲག་ཏུ། བླ་མ་དེས་རང་ལ་མི་དགེ་བཅུ་སོགས་ལས་བཟློག་པའི་ཆེད་དུ་གདམས་པ་ལས་ལྐོག་ཏུ་དེ་དག་སྤྱད་ནས་བཀའ་དེ་འགོངས་ན་རྩ་ལྟུང་དུ་གྱུར་ཏེ། ཡན་ལག་བླ་མ་དམ་པ་ཡིན་པ། སྤྱད་ན་མི་དགྱེས་པར་ཤེས་པ། ལྐོག་ཏུ་ལུས་ངག་གིས་སྤྱད་པ། གོང་སྨོས་ཡན་ལག་ཕྱི་མ་(༨༤ན)གསུམ་མཚུངས་པ་ལས་རྫོགས་པའོ། ། གསུམ་པ་སྤུན་ལ་ཁྲོས་པ་ནི། ཡུལ་སྤུན་ལའང་སྤྱིར་སངས་རྒྱས་ཀྱི་བསྟན་པ་ལ་ཞུགས་པ་ཐམས་ཅད། ཉེ་བ་ཐེག་ཆེན་སེམས་བསྐྱེད་དང་ལྡན་པ། ཁྱད་པར་སྔགས་ཀྱི་ཐེག་པར་ཞུགས་ཤིང་སྔགས་སྡོམ་དང་ལྡན་པ། དེ་ལས་ཀྱང་ཁྱད་པར་བླ་མ་གཅིག་གིས་དབང་བཞི་རྫོགས་པར་བསྐུར་བའི་རྡོ་རྗེའི་སྤུན་ཏེ། རྒན་ནམ་གཞོན་ཡང་རུང་ལུས་ངག་ཡིད་གསུམ་གྱི་སྒོ་ནས་ཁྲོས་པས་མི་བསྔགས་པ་བརྗོད་པ་དང་རྡེག་བརྡུང་སོགས་བྱས་ན་རྩ་ལྟུང་དུ་འགྱུར་རོ། །དེའི་ཡན་ལག་ཡུལ་དེར་ངེས་པ། དེ་ལ་ཁྲོས་ན་མི་དགའ་བར་ཤེས་པ། ལུས་ངག་གིས་ཐོན་པར་ཁྲོས་པ། ཡན་ལག་ཕྱི་མ་གསུམ་མཚུངས་པ་ལས་འགྱུར་རོ། ། སློབ་དཔོན་ཡེ་ཤེས་ཞབས་ཀྱིས་སྤུན་གྱི་དབྱེ་བ་ལྔར་བཤད་པ་དང༌། དུས་འཁོར་ལས་སྤྱིར་སེམས་ཅན་ཐམས་ཅད་རིང་བའི་སྤུན་སོགས་སྤུན་བདུན་གྱི་དབྱེ་བར་གསུངས་པ་ལས་ཕྱི་མ་རྣམས་རིམ་པར་ལྕི་བའོ། ། བཞི་པ་བྱམས་པ་བཏང་བ་ལ་ཚུལ་བཞི་སྟེ། ཆུ་ལ་རི་མོ་བྲིས་པ་ལྟ་བུ། བྱེ་མ་ལ་རི་མོ་བྲིས་པ་ལྟ་བུ། ས་གས་པ་ཆུས་བགས་ཀྱིས་སྦྱར་བ་ལྟ་བུ། རྡོ་ཆག་པའམ་ཤིང་ཐོག་ས་ལ་ལྟུང་བ་སླར་ལྷན་དུ་མེད་པ་ལྟ་བུའི་དུས་མྱུར་བུལ་རིམ་པས་བཏང་བ་རྣམས་ལས། འགའ་ཞིག་ཕྱི་མ་གཉིས་འདིའི་གཞིར་འཆད་ཀྱང༌། དོན་ལ་ཕྱི་མ་སླར་བཅོས་སུ་མེད་པ་སེམས་ཅན་གཅིག་གི་ཡུལ་ལའང་འདི་ལ་ཕན་ནམ་དུའང་མི་འདོགས་སྙམ་དུ་བྱང་ཆུབ་ཏུ་འགོད་པར་འདོད་པའི་སེམས་བཏང་ན་རྩ་ལྟུང་དུ་གྱུར་ཏེ། ཡན་ལག་ཡུལ་སེམས་ཅན། དེ་ལ་ནམ་ཡང་ཕན་པར་མི་སེམས་པ། སླར་སྦྱོང་སེམས་མེད་པ་སྟེ་གསུམ་གྱིས་རྫོགས་པའོ། ། ལྔ་པ་རྟེན་ཀུནྡ་ལྟ་བུའི་བྱང་ཆུབ་ཀྱི་སེམས་ཉམས་པ་སྟེ། འགྲེལ་ཆེན་དུ། དེ་ཁོ་ན་ཉིད་མི་ཤེས་པར་དབང་པོ་གཉིས་སྦྱོར་གྱི་བདེ་བས་སངས་རྒྱས་ཐོབ་པར་འདོད་པའི་བློས་ཁུ་བ་བཏང་ན་འདའ་སྟེ་རྩ་བའི་ལྟུང་བ་ལྔ་(༨༤བ)པར་འགྱུར་རོ། །ཞེས་འབྱུང་བས་རྩ་ལྟུང་གི་ངོ་བོ་བསྟན་ཏེ། དེའང་ཆོས་ཐམས་ཅད་ཀྱི་རྩ་བ་ཀུན་རྫོབ་དང་དོན་དམ་གྱི་བྱང་ཆུབ་སེམས་གཉིས་ལས། སངས་རྒྱས་ཀྱི་སྐུ་གཉིས་འགྲུབ་པར་འགྱུར་བ་ལས་གཟུགས་སྐུའི་རྒྱུ་ཀུན་རྫོབ་བྱང་སེམས་ཀུནྡ་ལྟ་བུ་དེ་ཉིད་ཡིན་པས་དེ་ཉམས་པ་ལྟུང་བའི་ངོ་བོའོ། ། ཡན་ལག་ཤེས་རབ་ཆེན་པོས་དེ་ཁོ་ན་ཉིད་མི་འགྱུར་བའི་བདེ་བ་མི་ཤེས་པ། འགྱུར་བའི་བདེ་བ་འཆོར་བས་སངས་རྒྱས་འཐོབ་པར་འདོད་པ། གསང་སྔགས་དབང་གི་རྫས་དང༌། ཤེས་རབ་ཡེ་ཤེས་ཀྱི་དབང་གཞན་ལ་བསྐུར་བའི་བདེ་བའི་རྐྱེན་མིན་པ། བདུད་རྩི་རིལ་བུ་སོགས་ཀྱི་ཆེད་མ་ཡིན་པ་སྟེ། ཡན་ལག་ལྔས་རྩ་ལྟུང་དུ་འགྱུར་རོ། ། དྲུག་པ་ནི། སྤྱིར་རྙེད་བཀུར་འདོད་པས་གྲུབ་མཐའ་གཞན་ལ་སྨོད་པ་སྟེ། ཐེག་ཆེན་གྱི་མདོ་སྡེ་སྨད་ན་སྦོམ་པོ། ཐེག་དམན་ལ་ཉེས་བྱས། ཕྱི་རོལ་པ་སོགས་ལ་ཕྲ་མོའི་ཉེས་བྱས། དེ་དག་འདུལ་བའི་བསམ་པས་སྨད་ན་ཉེས་པ་མེད་པའི་སྟེང་བསོད་ནམས་ཐོབ་པར་གསུངས་ལ། བྱེ་བྲག་ཏུ། ནང་པའི་གྲུབ་མཐའ་སྔགས་དང་ཕ་རོལ་ཏུ་ཕྱིན་པ་གཉིས་རྒྱུ་འབྲས་ཀྱི་འབྲེལ་བར་ཡོད་དེ། འཁོར་ལོ་རིམ་པ་གསུམ་ལས། དང་པོར་གང་ཟག་གི་བདག་མེད་དང་གཟུང་བ་དོན་སྤྱི་བདེན་མེད་དུ་རྟོགས་པར་བསྟན་ལ། བར་པར་ཆོས་ཐམས་ཅད་སྨྲ་བསམ་བརྗོད་པ་ལས་འདས་པའི་སྟོང་པ་ཉིད་དུ་རྟོགས་པར་བསྟན། ཕྱི་མར་ཉམས་ལེན་གྱི་ངོ་བོར་སོ་སོ་རང་རིག་དང་འཆད་པའི་སྒོར་སེམས་འོད་གསལ་བ་རྟོགས་པར་བསྟན་ལ། དེ་འདྲ་བ་དེ་རྒྱུད་སྡེ་བཞིའི་རིམ་པས་མཐར་བདེ་སྟོང་ཟུང་འཇུག་གི་ཨེ་ཝྃ་རོ་མཉམ་དུ་རྟོགས་པར་བསྟན་པའི་ཕྱིར་མཐར་ཐུག་དེ་ཁོ་ན་ཉིད་གཅིག་པ་ལ། སྔགས་ཀྱི་ངེས་དོན་གྱི་སྙིང་པོ་ཅན་གྱི་ཤེར་ཕྱིན་ཟབ་མོ་ལ་དམན་པར་བལྟས་ཏེ་སྨོད་ན་རྩ་ལྟུང་དྲུག་པར་གྱུར་ཏེ། ཡན་ལག་ངེས་དོན་སྔགས་སུ་གནས་པའི་ཤེར་ཕྱིན་དང་སྔགས་མཆོག་དམན་(༨༥ན)དུ་བཟུང་ནས་སྨོད་ཚིག་དངོས་སུ་བརྗོད་པ། དེ་ལེགས་བཤད་དུ་འཛིན་པ། ཕར་ཕྱིན་ཐེག་པ་ཁོ་ནར་འཆེལ་བ་དྲང་བའི་ཆེད་སོགས་མ་ཡིན་པ་སྟེ་ཡན་ལག་གསུམ་གྱིས་རྫོགས་པའོ། ། བདུན་པ་ནི། མ་སྨིན་པའི་མི་ལ་གསང་བ་སྦྱིན་པ་སྟེ། དབང་གིས་མ་སྨིན་ཞིང་ཉན་ཐོས་སོགས་ཀྱི་ཐེག་པར་འཆེལ་བ། གསང་བའི་གཏམ་ཐོས་ན་སྐྲག་ཅིང་མ་གུས་པར་འགྱུར་བའི་རིགས་ཅན་ལ་བདེ་བ་ཆེན་པོའི་གསང་བ་བསྒྲགས་ན་བདུན་པར་འགྱུར་ཏེ། ཡན་ལག་མ་སྨིན་པའི་ཉན་རང་གི་རིགས་གསང་བ་ཐོས་ན་སྐྲག་ཅིང་མི་གུས་པར་འགྱུར་བའི་རིགས་ཅན་ཡིན་ལ། དེ་ལ་བདེ་བ་ཆེན་པོའི་གསང་བ་བསྒྲགས་པ། ཡན་ལག་ཕྱི་མ་གཉིས་འདྲ་སྟེ་དེས་རྫོགས་སོ། ། དཱ་རི་ཀ་པས་བདེ་ཆེན་གྱི་གསང་བ་བསྒྲགས་ན་མཆོག་གི་དངོས་གྲུབ་ཀྱི་བར་ཆད་དུ་འགྱུར་ཞིང༌། གསང་སྔགས་སྤྱིའི་གསང་བ་བསྒྲགས་ན་ཐུན་མོང་གི་དངོས་གྲུབ་ཀྱི་བར་ཆད་དུ་འགྱུར་བར་བཤད་དོ། ། འདིར་མ་སྨིན་པ་ལ་བཞི་སྟེ། ཆོས་ལ་ཁོང་ཁྲོ་བའི་ལོག་ལྟ་ཅན་རྒྱུས་མ་སྨིན་པ། བདག་ཏུ་ལྟ་བ། འཁོར་བ་ལ་སྐྱོ་བ། སེམས་ཅན་གྱི་དོན་མི་བྱེད་པ་གསུམ་རྐྱེན་གྱིས་མ་སྨིན་པ་སྟེ། འདོད་ཆེན་མུ་སྟེགས་ཉན་རང་གི་སྒྲིབ་པ་བཞིའོ། །མ་སྨིན་པ་རིམ་པ་ལྟར་གོང་མ་རྣམས་གསང་དགོས་པར་གསུངས་སོ། ། བརྒྱད་པ་ཕུང་པོ་ཉོན་མོངས་པ་ནི། སྤྱིར་རང་གཞན་གྱི་ཕུང་ཁམས་སྐྱེ་མཆེད་ཐམས་ཅད་ལ་མི་བརྙས་ཏེ་གཟུགས་སྐུ་དྲི་བཅས་ཡིན་པས་སོ། ། བྱེ་བྲག་ཏུ། བུམ་དབང་གིས་ཕུང་སོགས་སངས་རྒྱས་ཀྱི་ངོ་བོར་ངོ་སྤྲད་པ་ཉིད་འདོད་ཡོན་གྱིས་མཉེས་པར་མཆོད་པ་ལས་རྟེན་བདེ་བ་འཕེལ། དེས་བརྟེན་པ་ཡེ་ཤེས་དེ་ཁོ་ན་ཉིད་མངོན་དུ་འགྱུར་བ་ཡིན་པ་ལ། ཕུང་པོ་ཀུན་འབྱུང་གི་གཙོ་བོར་བཟུང་སྟེ། མཚོན་གྱིས་བཅད་པ་དང༌། མེར་སྲེག་པ་སོགས་ཀྱི་དཀའ་སྤྱད་དང༌། སྨྱུང་གནས་ལ་སོགས་པའི་དཀའ་ཐུབ་ཀྱིས་ལུས་གདུང་བར་བྱེད་ན་རྩ་ལྟུང་དུ་གྱུར་ཏེ། ཡན་ལག་ཕུང་སོགས་དེ་དག་ཏུ་ཤེས་པ་ཤེས་བཞིན་དུ་ལུས་གདུང་(༨༥བ)བར་བྱེད་པ། ཡན་ལག་ཕྱི་མ་གཉིས་སྔ་མ་དང་འདྲ་བ་སྟེ་བཞིས་རྫོགས་སོ། ། དེ་ལྟ་ན། རྒྱུད་སྡེ་མང་པོར་སྨྱུང་བར་གནས་པར་གསུངས་པ་དེ་དག་ཅི་ཞེ་ན། དེ་ནི་ལུས་གདུང་བར་བྱེད་པའི་ཆེད་དུ་མ་ཡིན་ཏེ། ལྷ་མཉེས་པར་བྱེད་པའི་གཙང་བྱེད་དམ། ནང་གི་ཁྲུས་ཀྱི་ཡན་ལག་ཡིན་པས་དེ་ལ་ནི་ཉེས་པ་མེད་ཀྱི། སྟེང་དུ་ཕན་ཡོན་ཆེའོ། ། དགུ་པ་ནི། སྤྱི་ལྟར་ན། བདེན་པ་གཉིས་ལས་དོན་དམ་བདེན་པར་སོམ་ཉི་ཟ་བ་རྩ་ལྟུང་བཅུ་གཅིག་པར་བཤད་ཅིང༌། འདིར་སྔ་མ་ཆོས་ཐམས་ཅད་ཆུ་ཟླ་ལྟ་བུར་རང་བཞིན་མེད་པར་སྣང་ཙམ་པ་ཀུན་རྫོབ་ཀྱི་བདེན་པ་རྟེན་ཅིང་འབྲེལ་བར་འབྱུང་བ་ལ་ལོག་པར་རྟོག་པ་སྟེ། སེམས་ཅན་སངས་རྒྱས་སུ་འགྱུར་བ་དང༌། སངས་རྒྱས་ལ་རྟོག་པ་མེད་ཅིང་མཁྱེན་པའི་ཡེ་ཤེས་མངའ་བ་འགལ་འདུར་བཟུང་བ་སོགས་ཡིན་པར་བཤད་ལ། བྱེ་བྲག་ཏུ། དག་པའི་ཆོས་ཀྱི་སྤྱི་དོན་སྟོང་པ་ཉིད་ལ་སོགས་པ་སྟོང་ཉིད་ལ་མི་མོས་ཤིང་ཡིད་གཉིས་ཟ་བ། སྤྲོས་བཅས་དང་དུ་ལེན་པས་རྩ་ལྟུང་དུ་འགྱུར་རོ། ། ཡན་ལག་ཡུལ་དག་པའི་ཆོས་སྟོང་པ་ཉིད་ལ། བསམ་པ་མི་མོས་ཤིང་སྤྲོས་བཅས་དང་དུ་ལེན་པ། ཡན་ལག་ཕྱི་མ་གཉིས་མཚུངས་ཏེ་བཞིས་རྫོགས་སོ། ། བཅུ་པ་ནི། སྤྱི་ལྟར་ན། བདུད་དང་མུ་སྟེགས་ཕྱིར་རྒོལ་དྲེགས་པ་ཅན་བྱམས་པས་མི་འདུལ་བའི་གདུག་པ་ཅན་ལ་བྱམས་པར་བྱེད་པ་ཡིན་ལ། བྱེ་བྲག་ཏུ། ལས་རྒྱ་གཙོ་བོར་གྱུར་པའི་སེམས་ཅན་ལ་ཁ་ཞེ་མི་མཐུན་པའི་གཡོ་སྒྱུའི་བྱམས་པ་བྱས་པ་ལས་ལྟུང་བར་གྱུར་ཏེ། ཡན་ལག་ཡུལ་ཕྱག་རྒྱ་གཙོ་བོར་གྱུར་པའི་སེམས་ཅན་ལ། བསམ་པ་ཞེ་གནག་ཅིང་ཁ་འཇམ་པའི་སྒྱུའི་བྱམས་པ་བྱེད་པ། ཕྱི་མ་གཉིས་མཚུངས་པའི་ཡན་ལག་བཞི་རྫོགས་སོ། ། གཞན་དུ། གོང་སྨོས་ལྟར་གདུག་པའི་སེམས་ཅན་ཕྲིན་ལས་དྲག་པོས་ཚར་བཅད་བྱ་ཡིན་པ་ལ། དེ་ལྟར་མ་བྱས་ན་ལྟུང་བར་བཤད་མོད། འདིར་ནི་དབང་གསུམ་པའི་མི་མཐུན་ཕྱོགས་ལ་བཞག་དགོས་པས་འདི་ཉིད་དོ། ། བཅུ་གཅིག་པ་ནི། སྤྱིར་ཐ་སྙད་ལས་འདས་(༨༦ན)པའི་ཡུལ་ལ་སྒྲོ་སྐུར་བྱེད་པ་སྟེ་ཆོས་ཐམས་ཅད་ཆོས་ཉིད་དེ་བཞིན་ཉིད་དང༌། ཆོས་ཉིད་ཁོ་ན་ཆོས་ཐམས་ཅད་ཀྱི་རང་བཞིན་ཡིན་པ་དེ་ལྟར་མ་རྟོགས་ཏེ་ཡོད་མེད་ཡིན་མིན་སོགས་རྟོག་གེའི་བློས་ཁ་ཚོན་གཅོད་པ་དང༌། བྱེ་བྲག་ཏུ། སངས་རྒྱས་ཀྱི་སྐུ་གསུང་ཐུགས་ཀྱི་བདག་ཉིད་མི་འགྱུར་བའི་བདེ་བ་འཇིག་རྟེན་ན་དཔེར་བྱ་བ་ཐམས་ཅད་ལས་འདས་པ་མིང་སོགས་དང་བྲལ་བ་དང༌། བདེ་བ་དེ་སྦྱིན་པ་མོ་དེ་ཉིད་ཀྱི་སྣང་ཆ་རྣམ་པ་ཐམས་ཅད་པའི་སྟོང་པ་ཉིད་ལ་རྟོག་ཅིང་ཐེ་ཚོམ་ཟ་བར་གྱུར་ཏེ། ཡན་ལག་ཡུལ་འགྱུར་དེ་གཏན་མ་ཡིན་པའི་འགྱུར་མེད་ཀྱི་བདེ་བ་ལ། དེ་ལས་གཞན་དུ་དེ་ཁོ་ན་ཉིད་རྟོགས་པ། ཕྱི་མ་གཉིས་མཚུངས་ཏེ་ཡན་ལག་བཞིས་རྫོགས་སོ། ། བཅུ་གཉིས་པ་ནི། སྤྱིར་དད་ལྡན་སེམས་ཅན་སུན་མི་འབྱིན་པ་སྟེ། དད་ལྡན་སྔགས་ལས་ལྡོག་ན་ཕམ་པ། མདོ་དང་ཉན་ཐོས་ལས་ལོག་ན་སྦོམ་པོ། རེ་ཞིག་ལྡོག་ན་ཉེས་བྱས་སུ་བཤད་ཅིང༌། བྱེ་བྲག་ཏུ། དག་པའི་སེམས་ཅན་ནི་ནང་དུ་དེ་ཁོ་ན་ཉིད་ཀྱི་ཡེ་ཤེས་ལ་གནས་ཤིང་ཕྱིའི་སྤྱོད་པ་མ་ངེས་པ་སྟེ། དེ་ལ་ཕྲག་དོག་གིས་སྨོད་ཅིང་སུན་འབྱིན་པར་བྱེད་ན་རྩ་བའི་ལྟུང་བར་གྱུར་ཏེ། ཡན་ལག་ཡུལ་དག་པའི་སེམས་ཅན་ལ། བསམ་པ་ཕྲག་དོག་གི་བློས་སུན་འབྱིན་བརྗོད་པ། ཡན་ལག་ཕྱི་མ་གཉིས་མཚུངས་པ་སྟེ་བཞིས་རྫོགས་སོ། ། བཅུ་གསུམ་པ་ནི། སྤྱོད་པའི་དུས་ལ་སོགས་པར་ཚོགས་འཁོར་རམ་དཔའ་བོ་དཔའ་མོའི་སྟོན་མོ་གང་ཡིན་ཀྱང་རུང༌། ཕྱི་ནང་གི་ཤ་ལྔ་བདུད་རྩི་ལྔ་ལ་སོགས་པའི་བསྟེན་བྱའི་དམ་ཚིག་རྣམས་ལ་ཉན་ཐོས་ཀྱི་བརྟུལ་ཞུགས་ཁོ་ནར་འཆེལ་བ་ལ་སོགས་པས་ཐེ་ཚོམ་ཟ་ཞིང་སྤོང་བར་བྱེད་ན་རྩ་བའི་ལྟུང་བར་འགྱུར་རོ། །ཡན་ལག་དམ་ཚིག་སྤྱོད་པའི་དུས་ཡིན་པ། བསྟེན་བྱའི་དམ་ཚིག་སྤངས་པ། ཡན་ལག་ཕྱི་མ་གཉིས་སྔར་ལྟ་བུ་སྟེ་བཞིས་རྫོགས་སོ། ། བཅུ་བཞི་པ་ནི། ཡུལ་བུད་མེད་སྤྱི་ལ་ཞེ་ནས་སྨོད་པའི་བསྟིང་ཚིག་བརྗོད་ན་ལྟུང་བར་གྱུར་ཏེ། ཡན་ལག་ཡུལ་བུད་མེད་སྤྱི་ལ་(༨༦བ)བསམ་པ་ཞེ་ནས་སྨོད་ཚིག་བརྗོད་པ། ཡན་ལག་ཕྱི་མ་གཉིས་འདྲ་བའི་བཞིས་རྫོགས་སོ། །འདིར་སྤྱིར་བཤད་པ་རྣམས་ནི་བླ་མེད་ཀྱི་འཆད་ཚུལ་སྤྱི་ལ་གྲགས་པ་ལྟར་དང༌། བྱེ་བྲག་ཏུ། སྨོས་པ་རྣམས་ནི་དུས་འཁོར་ལས་ཇི་ལྟར་གསུངས་པ་ལྟར་ཏེ། རྡོ་རྗེ་སྙིང་རྒྱན། གཤིན་རྗེ་གཤེད་དམར་ནག་གི་རྒྱུད་ལས་གྲངས་དེ་དང་མཚུངས་པར་འབྱུང་ཞིང༌། རྡོ་རྗེ་གུར་ལས་བཅུ་གསུམ་དུ་བཤད་དོ། ། རྩ་ལྟུང་བཅུ་བཞི་པོ་དེ་ལ། ཡུལ།