Tibetan
ལ་སྟོང་ཕྲག་གསུམ་ཅུ་རྩ་དྲུག་ཏུ་བཟླས་ཤིང་ཕྱིས་མི་བྱེད་པའི་སྡོམ་སེམས་དང་ལྡན་པ་ལ་སླར་དབང་བདུན་སྦྱིན། བུམ་པ་དང་གསང་དབང་ཐུན་མིན་ཐོབ་པ་ནི་སློབ་དཔོན་གྱིས་གསུངས་པའི་ཆད་ལས་ཉམས་སུ་བླངས་ནས་སླར་དབང་ནོད་པར་གསུངས། ཆད་ལས་སམ་ཕྱིར་བཅོས་ཉམས་སུ་བླང་བར་བྱ་བའི་རྣམ་གྲངས་ཉེར་ལྔ་སྙིང་པོ་རྒྱན་ལས་འབྱུང་བ་ནི། ཚོགས་ཞིང་ལ་བཤགས་དྲལ་བའི་སྔགས་རྒྱས་སྦྱོང༌། ། ཕྱི་ནང་ཆུས་བཀྲུ་གཏུམ་མོས་ས་བོན་བསྲེག ། སྐྱེ་མེད་དོན་སྒོམ་ཕྱི་ནང་དབང་བཞི་ལེན། ། ཚོགས་སུ་ཞུ་དང་རྟེན་ལ་སྨྲེ་བཤགས་བརྗོད། །(༩༡ན) མཎྜལ་སོགས་འབུལ་བདེ་གཤེགས་མཆོད་རྟེན་བཞེངས། ། ཞི་བའི་མེས་སྦྱང་མཆོད་གཏོར་རྒྱ་ཆེན་བཏང༌། ། ལྷ་ཡི་སྔགས་བཟླ་ཟབ་མོའི་བསམ་གཏན་བསྒོམ། ། སེམས་ཅན་སྲོག་སྐྱབས་མདོ་རྒྱུད་གསུང་རབ་བཀླག ། བླ་མ་གཙུག་བསྟེན་ཟབ་མོའི་བདག་འཇུག་བྱ། ། བདེར་གཤེགས་ཡིག་བརྒྱ་དུས་བཟང་གཟུངས་སྔགས་བཟླ། ། ལྟུང་བཤགས་ལན་དྲུག་རྡོར་སེམས་བསྒོམ་བཟླས་བྱ། ། རྡོ་རྗེ་གསུམ་ལྡན་བླ་མའི་རྣལ་འབྱོར་དང༌། ། དཔྱིད་ཐིག་དང་ནི་ཕྲ་མོའི་རྣལ་འབྱོར་བསྒོམ། ། ཞེས་སོ། ། སྦྱིན་སྲེག་བཟླས་སྒོམ་ཚོགས་ཀྱི་འཁོར་ལོ་སོགས། ། ཉམས་འདས་རལ་བའི་ཚོད་དང་སྦྱར་ཏེ་བྱ། ། ཕྲ་རགས་གང་ཡང་ཐུན་ཚོད་མ་འདས་བཤགས། ། ཁྱད་པར་རྒྱུད་སྡེ་གོང་འོག་ཀུན་ཏུ་དམིགས་སུ་བསལ་ནས་གསུངས་པ་སྡིག་པ་སྦྱོང་བའི་སྲེག་བླུགས་སྤྱི་དང་ཁྱད་པར་རྡོ་རྗེ་མཁའ་འགྲོའི་སྦྱིན་སྲེག །རང་ལྷའི་བཟླས་བསྒོམ། ཚོགས་ཀྱི་འཁོར་ལོ་དངོས་སམ་རྗེས་མཐུན་དཔའ་བོའི་སྟོན་མོ་ལ་སོགས་པ་ཁྱད་པར་འཕགས་པའི་ཕྱིར་བཅོས་རྣམས་ཉམས་པ་དང་འདས་པ་དང་རལ་བའི་ཚོད་དང་སྦྱར་ལ་གྲངས་དང་བརྩོན་པ་ཆ་ཡིས་བསྐྱེད་པར་བྱའོ། ། དེའང་ཉིན་མཚན་གྱི་དྲུག་ཆའི་ནང་དུ་གཉེན་པོས་མ་སླེབ་ན་ཐུན་ཚོད་ལས་འདས་པ་ཞེས་བྱ་བ་དང༌། ཞག་གཅིག་གིས་བར་མ་ཆོད་ན་འགལ་བ་དང༌། ཟླ་བས་བར་མ་ཆོད་པ་ཚུན་ཆད་ཉམས་པ། ལོ་གཅིག་ཚུན་ཆད་འདས་པ་དང༌། ལོ་གཉིས་སམ་གསུམ་ཚུན་ཆད་རལ་བ་ཞེས་དུས་ལ་ལྟོས་ནས་ཉེས་པ་ཕྱི་རིམ་གྱིས་ལྕི་བ་སྟེ། དེ་ཚུན་ཆད་སྙིང་ནས་བརྩོན་པ་ཆེན་པོས་བཤགས་ན་ལྡང་ལ། ལོ་གསུམ་འདས་པ་ཕན་ཆད་ནི་གསོར་མི་རུང་བར་ངེས་པར་དམྱལ་བར་འགྲོ་བར་གསུངས་སོ། །(༩༡བ) དེས་ན་ལྟུང་བ་གང་ལའང་དྲན་ཤེས་ཀྱི་གཉེན་པོས་ཟིན་པར་བྱས་ཏེ་ཐོག་མ་ནས་མི་འབྱུང་བ་ལ་བརྩོན། གལ་ཏེ་བྱུང་ན་ཕྲ་རགས་གང་ཡང་ཐུན་ཚོད་ལས་མ་འདས་པར་བཤགས་པས་སོར་ཆུད་པར་འགྱུར་རོ། ། རྡོར་སེམས་དམ་ཚིག་རྡོ་རྗེའི་བཟླས་བསྒོམ་དང༌། ། དབང་དང་བདག་འཇུག་ཀུན་ལ་མཆོག་ཏུ་འགྱུར། ། ཐུན་ཚོད་ཀྱི་ནང་དུ་བཤགས་པའི་ཐབས་གཙོ་བོར་གྱུར་པ་ཉམས་སུ་ལེན་བདེ་ཞིང་ཕན་ཡོན་ཤིན་ཏུ་ཆེ་བ་ནི་རྡོ་རྗེ་སེམས་དཔའ་དང་དམ་ཚིག་རྡོ་རྗེའི་བཟླས་བསྒོམ། དབང་བསྐུར་ཞུ་བའམ་བདག་ཉིད་ཕྱི་ནང་གི་དཀྱིལ་འཁོར་དུ་འཇུག་པ་རྣམས་དགོས་པ་ཁྱད་པར་ཅན་དང་འབྲེལ་བས་ཀུན་ལ་མཆོག་ཏུ་འགྱུར་བའི་ཕྱིར་དུས་རྟག་ཏུ་འདི་ཁོ་ནར་བརྩོན་པར་འོས་ཞེས་སླར་ཡང་བསྐྱར་ནས་བཤད་དོ། ། འདིར་གོ་རིམ་ཡང་ཐོག་མར་ཚོགས་སམ་རྟེན་གྱི་སྤྱན་སྔར་ཉེས་པ་ཚིག་གིས་བཤགས། བར་དུ་བདག་འཇུག་གམ་དབང་བསྐུར་བླང༌། མཐར་སྡིག་པ་སྦྱོང་བའི་ཐབས་ལ་བརྩོན་པ་རྡོ་རྗེ་འཛིན་པ་ཆེན་པོ་རྣམས་ཀྱི་ཕྱག་ལེན་ནོ། ། གོང་མ་རང་བྱིན་རླབས་དང་ལྟ་བས་བསྐང༌། ། དབང་གོང་མ་ཁྱད་པར་བ་རྣམས་ནོས་པ་ལ་རྩ་ལྟུང་བྱུང་ན་ཐུན་མོང་བའི་ཆད་ལས་སྡིག་སྦྱོང་སོགས་ཀྱིས་སྦྱོང་བར་མི་ནུས་པས། བསོད་ནམས་ཀྱི་ཚོགས་ཀྱི་དོན་དུ་བསྐྱེད་རིམ། ཚུལ་ཁྲིམས་ཀྱི་ཚོགས་ཀྱི་དོན་དུ་ཕྲ་ཐིག་སོགས་རང་བྱིན་རླབས་ཀྱི་རིམ་པ་དང༌། ཞུ་བདེའི་ཡེ་ཤེས་སྤེལ་བ། འཁོར་གསུམ་རྣམ་པར་མི་རྟོག་པའི་ལྟ་བ་ལ་རྟག་ཏུ་མཉམ་པར་བཞག་སྟེ་བསྐང༌། དེའང་བུམ་དབང་སོགས་ནི་སློབ་དཔོན་གྱི་གཞན་རྐྱེན་ལས་ལྡངས་ནུས་པ་ཡིན་ལ། འདིར་ནི་རང་སེམས་རྣམ་པར་དག་པས་ལྡངས་དགོས་སོ། ། ཇ༢ གཉིས་པ་གསང་སྔགས་སྔ་འགྱུར་གྱི་ལུགས་ལྟར་བཤད་པ་ལ་གསུམ། ཉ༡ ཐུན་མོང་གི་ལུགས་སྦྱོར་བསྟན། ཉ༢ བྱེ་བྲག་གི་ལུགས་ཁྱད་པར་དུ་དབྱེ། ཉ༣ ཉམས་བཤགས་ཀྱི་ཚུལ་དཔེ་བཅས་སྨོས་པའོ། ། ཉ༡ དང་པོ་ལ་གཉིས། ཏ༡ མདོར་བསྟན། ཏ༢ རྒྱས་བཤད་དོ། ། ཏ༡ དང་པོ་ནི། སྔ་འགྱུར་ཐབས་ཀྱི་ཐེག་པ་ཐུན་མོང་དུ། ། སྤྱི་དང་ཁྱད་པར་ལྷག་པའི་དམ་ཚིག་ཅེས། ། སྔ་འགྱུར་གྱི་རིང་ལུགས་ལ་ཐེག་པ་རིམ་པ་དགུར་དབྱེ་བའི་ནང་(༩༢ན)ལྷག་པ་གསུམ་ཐུན་མོང་དུ་བསྲུང་བྱར་གྲགས་ཆེ་བ་ནི། སྤྱི་དང༌། ཁྱད་པར་དང༌། ལྷག་པའི་དམ་ཚིག་ཅེས་རྣམ་པ་གསུམ་དུ་རྣལ་འབྱོར་སྤྱི་ཁྲུས། བདེར་འདུས་ཞི་བའི་རྒྱུད་ལ་སོགས་པ་ནས་གསུངས་ཤིང༌། དམ་ཚིག་སྒྲ་དོན་ཀྱང་འདའ་དཀའ་རྡོ་རྗེའི་ཐ་ཚིག་ཅེས་པས་ཇི་ལྟར་བཅས་པ་ལས་མི་འདའ་བ་ཡལ་གམ་བཅས་པའི་ཐ་ཚིག་ལ་འཇུག་པ་སྔར་དང་མཚུངས་ལ། ཧེ་རུ་ཀ་འདུས་པའི་རྒྱུད་ལས། མི་འདའ་དམ་པ་མཆོག་གྱུར་པ། ། འདས་པར་གྱུར་ན་ཚིག་པར་བཤད། ། ཅེས་བསྲུངས་མ་བསྲུངས་ཀྱི་ཁེ་ཉེན་ལས་བཞག་པའང་ཡོད་དོ། ། ཏ༢ གཉིས་པ་[རྒྱས་བཤད་]ནི། སོ་བྱང་ཕྱི་རྒྱུད་གསུམ་གྱི་བསྲུང་མཚམས་སྤྱི། ། རྩ་བ་སྐུ་གསུང་ཐུགས་དང་བྱང་ཆུབ་སེམས། ། ཡན་ལག་སྤྱད་བྱ་མི་སྤང་དང་དུ་ལེན། ། བསྒྲུབ་དང་ཤེས་བྱ་ལྔ་ལྔ་ཁྱད་པར་ཏེ། ། དྲང་ངེས་དུས་ཚོད་འབྲེལ་བས་བསྲུངས་ཏེ་སྤྱད། ། སྒྲུབ་པའི་དམ་ཚིག་ཉི་ཤུ་ལྷག་པའོ། ། དེའང་སོ་བྱང་གཉིས་དང་ཕྱི་རྒྱུད་སྡེ་གསུམ་གྱི་སྡོམ་པའི་བསྲུང་མཚམས་རྣམས་ནི་ཐུན་མོང་སྤྱིའི་དམ་ཚིག་ཡིན་ལ། རྩ་བ་སྐུ་གསུང་ཐུགས་གསུམ་དང་བྱང་ཆུབ་སེམས་ཀྱི་དམ་ཚིག །ཡན་ལག་སྤྱད་བྱ་ལྔ། མི་སྤང་བ་ལྔ། དང་དུ་ལེན་པ་ལྔ། བསྒྲུབ་བྱ་ལྔ། ཤེས་པར་བྱ་བ་ལྔ་སྟེ་ལྔ་ཕྲག་ལྔ་ནི་ཁྱད་པར་གྱི་དམ་ཚིག་དང༌། བསྙེན་སྒྲུབ་ལ་སོགས་པ་སྐབས་སུ་ལྷག་པོར་བསྲུང་དགོས་པའི་དམ་ཚིག་ཉི་ཤུ་ནི་ལྷག་པའི་དམ་ཚིག་ཅེས་བྱའོ། ། དེ་ལས་རྩ་བ་སྐུའི་དམ་ཚིག་ནི་བླ་མ་དང་མཆེད་ལ་བསྲུང་སྟེ། དེའང་སྒེག་པ་རྡོ་རྗེའི་དམ་ཚིག་གསལ་བཀྲ་ལས། སྤྱི་དང་འདྲེན་དང་དམ་ཚིག་དབང༌། ། ཉམས་ཆགས་སྐོང་དང་ཤེས་རྒྱུད་འགྲོལ། ། མན་ངག་ལུང་གི་སློབ་དཔོན་རྣམས། ། ཞེས་པའི་སློབ་དཔོན་དྲུག་ཇི་ལྟར་བཀུར་ཚུལ་གྱི་དཔེ་ཡང་རིམ་བཞིན། དེ་ཉིད་ལས། ཡུལ་ལ་དབང་བའི་རྒྱལ་པོ་དང༌། ། ཁུ་བོ་ཕ་དང་མ་དང་མིག ། སྙིང་བས་ལྷག་པའི་ཚུལ་བལྟས་ཏེ། ། ཞེས་དང༌། (༩༢བ) ཁྱད་པར་ཞི་རྒྱུད་ལས་གསུངས་པ་ལྟར། དབང་བསྐུར། རྒྱུད་བཤད། མན་ངག་ནོད་པའི་སློབ་དཔོན་གསུམ་ནི། སངས་རྒྱས་ལས་ལྷག་པའམ་མཉམ་པའམ་དཀོན་མཆོག་བཞི་པར་ལྟ་བ་གང་རུང་གིས་སྒོ་གསུམ་གཡོ་ཟོལ་མེད་པས་ཐུགས་ཅི་མཉེས་དང་བཀའ་ཅི་གསུང་སྒྲུབ་པའི་སྒོ་ནས་བཀུར་བར་བྱ། མཆེད་ལའང་སྤྱི་རིང་ཉེ་བ་འདྲེས་པའི་མཆེད་བཞི་དང༌། དེ་རྣམས་ཀྱང་ཡང་དག་ལམ་དུ་ཞུགས་པའི་མཆེད་ཕྱི་མ་གསུམ་དང༌། དེའི་ནང་ནས་ཀྱང་འདྲེས་པའི་མཆེད་ལྷག་པར་ཡང་གཉན་པར་ཤེས་པའི་རིམ་པས་མི་འབྲལ་ཞིང་བྱམས་པས་བཀུར་རོ། ། གསུང་གི་དམ་ཚིག་ནི། གསལ་བཀྲ་ལས། རྩ་བ་སྐྱེད་དང་ལས་སྔགས་དང༌། ། དམ་ཚིག་ལས་དང་ཆོས་དང་ནི། ། སྐུ་ཉིད་ཕྱག་རྒྱ་ཆེན་པོ་བཞི། ། ཞེས་པས་ཡུལ་སྔགས་གསུམ་དང་ཕྱག་རྒྱ་བཞི་བརྩོན་པ་རབ་ཀྱིས་ཆུ་བོའི་རྒྱུན། འབྲིང་གིས་ཟླ་བ་ངོ་རེ། ཐ་མས་ཀྱང་ལོ་ཟླའི་དུས་མཆོད་ཀྱི་རྒྱུན་མ་ཆགས་པར་བྱ། ཐུགས་ཀྱི་དམ་ཚིག་ནི། གསང་བ་བཅུ། དམ་མེད། དམ་ཉམས། ཐ་མལ་པ་ལ་མི་བསྒྲགས་པ་སྟེ། གསང་བ་བཅུ་ནི། གསལ་བཀྲ་ལས། ལྟ་ཟབ་སྤྱོད་པ་བརླང་པོ་དང༌། ། ལྷའི་མིང་གཟུངས་དང་གྲུབ་རྟགས་རྣམས། ། སྤྱི་གསང་རྣམ་པ་བཞི་ཡིན་ནོ། ། ཞེས་དང༌། སྒྲུབ་པའི་གནས་དུས་གྲོགས་དང་རྫས། ། བར་དུ་གསང་ལ་བསྒྲུབ་པར་བྱ། ། ཞེས་པ་ལྟར་སྤྱི་གསང་བཞི་པར་གསང་བཞི་སྟེ་བརྒྱད་དང༌། གསང་བར་འོས་པ་ཐུན་མོང་མ་ཡིན་པའི་སྔགས་ཀྱི་སྤྱོད་པ་དང་དམ་རྫས། མཆེད་ཀྱི་ངན་སྤྱོད་སོགས་མཐོང་ཐོས་སུ་མི་རུང་བ་རྣམས་དང༌། གསང་བར་གཉེར་གཏད་པ་བླ་མ་དང་མཆེད་ཀྱིས་གསང་བར་བཀའ་རྒྱས་བཏབ་པ་རྣམས་སོ། ། བྱང་ཆུབ་སེམས་ཀྱི་དམ་ཚིག་ནི་ལྷག་པའི་བདེན་པ་དབྱེར་མེད་སྤྱོད་ཡུལ་དང་བྲལ་བའི་གནས་ལུགས་རྟོགས་པ་ལྟ་བུའི་དམ་ཚིག ། དེ་ཉིད་སྤང་ཐོབ་མེད་པར་མངོན་དུ་གྱུར་པའི་འབྲས་བུ་ལ་དམིགས་པ་སྨོན་(༩༣ན)པ་དང༌། དེ་སྒྲུབ་པའི་ཕྱིར་རང་གནས་ཀྱི་ཡེ་ཤེས་དང་རྗེས་སུ་མཐུན་པར་སྒོ་གསུམ་སྤྱོད་ཡུལ་དང་བཅས་པའི་སྣང་བ་ཐམས་ཅད་ལྷའི་སྐུ་གསུང་ཐུགས་ཀྱི་ཕྱག་རྒྱ་ལས་མི་འདའ་བས་གང་ཤར་དག་པའི་སྣང་བར་ལམ་དུ་ཁྱེར་བར་འཇུག་པའི་སེམས་ལ་བསླབ་པར་བྱའོ། ། ཡན་ལག་སྤྱད་བྱ་ལྔ་ནི། དྲང་དོན་དུ། སྦྱོར་སྒྲོལ་མ་བྱིན་ལེན་དང་རྫུན་ངག་བརླང་པོར་སྨྲ་བ་ལྔ་རང་དོན་མེད་པའི་ཐབས་མཁས་གཞན་དོན་དུ་འགྱུར་ན་སྤྱད་པར་བྱ་ཞིང༌། སྦས་དོན། གཟུང་འཛིན་རྟོགས་པའི་སྲོག་རང་རིག་པའི་ཡེ་ཤེས་ཀྱིས་གཅོད་པ། བཙུན་མོའི་ཤུ་ཀྲ་མ་བྱིན་པར་ལེན་པ། ཁ་སྦྱོར་ལས་ཞུ་བདེ་འགྱུར་མེད་སྒྲུབ་པའི་འདོད་སྤྱོད། འཁོར་བ་མེད་སྣང་ལས་འགྲོ་བ་སྒྲོལ་བའི་རྫུན་ཚིག །བརྗོད་མེད་རྟོགས་པས་གབ་སྦས་མེད་པར་སྨྲ་བའི་བརླང་ཚིག་རྣམས་སོ། ། མི་སྤང་བ་ལྔ་ནི། ལོག་པའི་དུག་ལྔ་རང་མཚན་པ་རྣམས་ཀྱང་ཉན་ཐོས་ལྟར་དགྲར་ལྟ་བས་མི་སྤངས་ཏེ་ཐབས་ཀྱིས་ཟིན་ན་སྤྱད་ཀྱང་རྣམ་པར་གྲོལ་བའི་མྱུར་ལམ་ཡིན་པ་དང༌། རང་བཞིན་གདོད་ནས་ཡེ་ཤེས་ལྔ་ཡིན་པའི་ཕྱིར་རོ། ། སྦས་དོན་ཡང་དག་པའི་དུག་ལྔ་སྟེ། ཆོས་ཐམས་ཅད་མཉམ་པ་ཉིད་དུ་རྫོགས་པས་ལྟ་བ་ལ་ཕྱོགས་རིས་དང་། སྤྱོད་པ་བླང་དོར་གྱིས་འབྱེད་པ་མེད་པའི་གཏི་མུག །དེ་ལྟར་མ་རྟོགས་པ་ལ་དམིགས་པ་མེད་པའི་སྙིང་རྗེ་ཆེན་པོས་རྗེས་སུ་ཆགས་པའི་འདོད་ཆགས། རང་རིག་པའི་ཡེ་ཤེས་ཀྱིས་ལོག་རྟོག་འཇོམས་པའི་ཞེ་སྡང༌། མཉམ་ཉིད་རྟོགས་པའི་ལྟ་བ་གཤོངས་སུ་མི་འབེབས་པའི་ང་རྒྱལ། གཉིས་འཛིན་གྱི་ལྟ་སྤྱོད་མཉམ་ཉིད་ཀྱི་ཀློང་དུ་མི་ཤོང་བའི་ཕྲག་དོག་རྣམས་རྟོགས་གོམས་ཀྱི་ཐབས་ཀྱིས་མི་སྤོང་བའོ། ། དང་དུ་བླང་བ་ལྔ་ནི། དྲི་ཆེན་དྲི་ཆུ་རཀྟ་མཱཾ་ས་རྡོ་རྗེ་ཟིལ་པ་ལྔ་ནི་ཆོས་ཉིད་རང་བཞིན་དང༌། རང་གི་ངོ་བོ་དང༌། མཐུ་དང༌། བྱིན་གྱིས་རླབས་ཀྱིས་གྲུབ་པའི་རྫས་ཁྱད་པར་ཅན་ཡིན་པས་མི་འདོར་བར་དང་དུ་བླང་བར་བྱའོ། ། སྦས་དོན་དུ། ཕུང་ལྔའི་དྭངས་མ་འཛག་མེད་དུ་(༩༣བ)བཅིང་བས་དང་དུ་བླང་བའོ། ། ཤེས་པར་བྱ་བ་ལྔ་ནི། ཆོས་ཐམས་ཅད་ཡེ་ནས་སངས་རྒྱས་པས་ཕུང་པོ་ལྔ་དེ་བཞིན་གཤེགས་པ་ཡབ་ལྔ། འབྱུང་བ་ལྔ་ཡུམ་ལྔ། དབང་པོ་དང་དབང་ཤེས་ལྔ་སེམས་དཔའ། ཡུལ་ལྔ་སེམས་མ། ཁ་དོག་ལྔ་རིགས་ལྔ་ཡེ་ཤེས་ལྔ་སོགས་ལྔ་ཚན་གྱི་རྟོག་ཚོགས་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་དུ་ཤེས་རབ་ཀྱིས་སྒྲོ་འདོགས་བཅད་ནས་ཤེས་པར་བྱེད་པའོ། ། བསྒྲུབ་པར་བྱ་བ་ལྔ་ནི། ཤེས་པར་བྱ་བའི་དམ་ཚིག་ལྔ་པོ་དེ་རྟོགས་གོམས་ཀྱི་སྦྱོར་བས་རང་རྒྱུད་ལ་ཚུལ་བཞིན་དུ་སྒྲུབ་པའི་ཐབས་ལ་བརྩོན་པར་བྱེད་པའོ། ། དེ་ལ་ཤེས་པར་བྱ་བ་ལྟ་བའི་དམ་ཚིག །དེ་ལྟར་རྟོགས་ནས་སྒྲུབ་པར་བྱེད་པ་བསྒོམ་པའི་དམ་ཚིག །སྤྱད་དང་མི་སྤང་དང་དུ་བླང་བ་གསུམ་པོ་དྲང་དོན་ལྟར་ན། སྤྱོད་པའི་དམ་ཚིག་གཙོ་ཆེ་བ་ཡིན་པས་དེ་དག་ཀྱང་མཉམ་གཞག་ཏུ་ངེས་དོན་དང༌། ལྟ་དགོངས་ཀྱི་གདེང་དང་ཚོགས་དབེན་ལ་སོགས་པའི་ཡུལ་དུས་ཀྱི་གནས་སྐབས་བརྩིས་ནས་དུས་ཚོད་དང་འབྲེལ་བའི་དགོངས་པ་བླངས་ཏེ་རིམ་པ་མ་ནོར་བར་བསྲུངས་ཏེ་སྤྱད་པར་བྱའོ། ། སྒྲུབ་པའི་དམ་ཚིག་ཉི་ཤུ་ནི། བདེ་འདུས་ཞི་རྒྱུད་ལས། གཅན་གཟན་རྒྱལ་པོའི་ཁྲི་མི་གཞིག ། ཅེས་སོགས་བརྡ་ཡིས་བསྟན་པ་རྣམས་ཏེ། རྡོ་རྗེ་སློབ་དཔོན་གྱི་སྐུ་ལ་མི་འཚེ་ཞིང་བཀའ་མི་གཅོག་པ་དང༌། བླ་མའི་ཡུམ་ལ་མི་སྤྱོད་པ་དང༌། དད་པ་ཅན་གྱི་ཚོགས་མི་བཅག་པ་དང༌། དཀོན་མཆོག་དང་མཁས་པའི་དཀོར་ལ་མི་འབག་ཅིང་ཆང་མྱོས་པར་མི་འཐུང་བ་དང༌། རྡོ་རྗེ་སྤུན་གྱི་ཡུམ་ལ་མི་སྤྱོད་པ་དང༌། མཚན་དང་མི་ལྡན་པའི་གཟུངས་མ་མི་བསྟེན་པ་དང༌། མཚན་ཉིད་དང་མི་ལྡན་པའི་དམ་རྫས་མི་བསྟེན་པ་དང༌། མཁས་པའི་ཡོན་ཏན་ལ་མི་སྨོད་པ་དང༌། སྣོད་མིན་ལ་གསང་ཆོས་མི་སྟོན་པ་དང༌། མཚན་ལྡན་གྱི་གཟུངས་མ་དང་སྣོད་ལྡན་གྱི་སློབ་མ་མི་སྤང་བ་དང༌། དོན་བདེ་སྟོང་དང་རྟགས་ཡབ་ཡུམ་མི་འབྲལ་བ་དང༌། མཆེད་ལྕམ་ལ་ཀྱལ་ཁ་ཙམ་(༩༤ན)དུའང་ནང་འཐབ་མི་བྱེད་པ་དང༌། གཞན་གྱིས་སྤྱད་པའི་ལྷག་མ་མི་སྤྱོད་པ་དང༌། བླ་མའི་གདན་ས་མི་རློམ་པ་དང༌། རང་གཞན་གྱི་མཚམས་མི་དབྲལ་བ་དང༌། ཏིང་ངེ་འཛིན་བྱིང་རྒོད་ཀྱི་དབང་དུ་མི་གཏོང་བ་དང༌། བཟླས་པ་དང་ཆོ་ག་མི་ཚིག་གིས་བར་མི་གཅོད་པ་དང༌། དབང་རྟགས་ཀྱི་ཕྱག་རྒྱ་ལས་མི་འདའ་ཞིང་བརྡའ་མི་བརྗེད་པར་བྱ་བ་དང༌། རྣལ་འབྱོར་པའི་དཀྱིལ་འཁོར་མི་དཀྲུག་ཅིང་སྐྱེ་བོའི་མཐུ་ཟློག་མི་བྱེད་པ་དང༌། སློབ་དཔོན་གཙུག་ཏུ་འཁུར་བ་ལས་ཉམས་པར་མི་བྱ་བ་རྣམས་སོ། ། ཉ༢ གཉིས་པ་[བྱེ་བྲག་གི་ལུགས་ཁྱད་པར་དུ་དབྱེ་བ་]ལ་གསུམ། ཏ༡ མ་ཧཱ། ཏ༢ ཨ་ནུ། ཏ༣ ཨ་ཏི་ཡོ་གའི་ལུགས་སོ། ། ཏ༡ དང་པོ་ནི། བྱེ་བྲག་མ་ཧཱའི་རྩ་བ་སྒྱུ་འཕྲུལ་ལས། ། རྩ་བ་བླ་མེད་མི་སྤང་བླ་མ་བཀུར། ། སྔགས་རྒྱ་མི་བཅད་མཆེད་བྱམས་གསང་བ་བཅུ། ། མི་བསྒྲགས་ལྔའོ་ཡན་ལག་དམ་ཚིག་བཅུ། ། མི་སྤང་མི་འདོར་ལྔ་སྟེ་དེ་དག་ལས། ། སུམ་བརྒྱ་དྲུག་ཅུ་དེ་ལས་མཐའ་ཡས་སྤྲོ། ། བྱེ་བྲག་མ་ཧཱ་ཡོ་ག་ཏནྟྲ་སྡེ་ཆེན་པོ་བཅོ་བརྒྱད་ཀྱི་རྩ་བ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་རྒྱུད་ལས། རྩ་བ་བླ་མེད་མི་སྤང་བ་དང༌། བླ་མ་གུས་པས་བཀུར་བ་དང༌། སྔགས་གསུམ་ཕྱག་རྒྱ་བཞི་མི་གཅོད་པ་དང༌། མཆེད་ལ་བྱམས་པ་དང༌། གསང་བ་བཅུ་གཞན་ལ་མི་བསྒྲགས་པ་དང་ལྔར་གསུངས་ལ། དང་པོ་ནི། ཡུལ་ལྷག་པ་དོན་དམ་དང་ཀུན་རྫོབ་བྱང་སེམས་གཉིས་སྣང་སྟོང་དབྱེར་མེད་དུ་རྟོགས་ནས་སྒོ་གསུམ་ལྷའི་སྐུ་གསུང་ཐུགས་ཀྱི་ཕྱག་རྒྱ་ལས་མི་འདའ་བར་བྱེད་པ་སྟེ། ལྷག་མ་བཞི་ནི་སྔར་སྨོས་པ་ལྟར་རོ།། ཡན་ལག་དམ་ཚིག་བཅུ་ནི། མི་སྤང་བ་ལྔ་དུག་ལྔ། མི་འདོར་བ་ལྔ་དམ་རྫས་བདུད་རྩི་ལྔ་སྟེ། དེ་དག་གི་རྩ་བ་ལྔ་པོ་རེ་རེ་ལ་ཐབས་ཤེས་གཉིས་གཉིས་སུ་ཕྱེ་བས་བཅུ། ཡང་ལྔ་པོ་ལ་སུམ་ཅུ་རེ་ཕྱེ་བས་བརྒྱ་ལྔ་བཅུ། བསྡོམས་པས་བརྒྱ་དང་དྲུག་ཅུ། ཡན་ལག་གི་དམ་ཚིག་བཅུ་པོ་རེ་རེ་ལ་ཉི་ཤུ་ཉི་ཤུར་ཕྱེ་བས་ཉིས་བརྒྱ། སྔ་ཕྱི་བསྡམས་པས་སུམ་བརྒྱ་དྲུག་(༩༤བ)ཅུའོ། ། དབྱེ་ཚུལ་དེ་དག་ཀྱང་ཕྲ་རྒྱས་སོགས་ལས་ཞིབ་པར་འབྱུང་ངོ༌། ། དེ་ལས་ཀྱང་སེམས་ཀྱི་རྟོག་ཚོགས་ཇི་སྙེད་པའི་གཉེན་པོར་དམ་ཚིག་ཀྱང་དེ་སྙེད་མཐའ་ཡས་པར་སྤྲོས་པའི་ཕྱིར་བརྗོད་ཀྱིས་མི་ལངས་ཏེ། སྙིང་པོ་ལས། འཇིག་རྟེན་དྲུག་གི་ཕྱོགས་བཅུ་ན། ། སྲིད་གསུམ་འགྲོ་བ་ཇི་སྙེད་པའི། ། རྟོག་འདུལ་དམ་ཚིག་དེ་སྙེད་སྤྲོ། ། ཞེས་འབྱུང་ངོ༌། ། ཐེག་ཆེན་འོག་མའི་བསླབ་བཞི་མཐའ་དག་ལས། ། ཆེ་བ་བདུན་གྱིས་འཕགས་པ་རོང་ཟོམ་བཞེད། ། ཉན་ཐོས་ཀྱི་ཐར་སྡོམ་ལས་བྱང་སེམས་ཀྱི་སྡོམ་པ་དམིགས་པ་ཆེན་པོ་སོགས་ཆེ་བ་བདུན་གྱིས་འཕགས་ལ། ཐེག་ཆེན་དང་རྒྱུད་སྡེ་འོག་མའི་བསླབ་གཞི་མཐའ་དག་ལས་ཀྱང་བླ་མེད་ཀྱི་སྡོམ་པ་ཆེ་བ་བདུན་གྱིས་འཕགས་པ་རོང་ཟོམ་པཎྜི་ཏ་བཞེད་དེ། དཀོན་མཆོག་འགྲེལ་ལས། ཀུན་ཏུ་བཟང་པོའི་ཕྱག་རྒྱས་བཏབ་པས་ཡོན་ཏན་བཙལ་བ་མེད་པར་ལྷུན་གྱིས་གྲུབ་པ་དང༌། འཇིག་རྟེན་གྱི་གཙོ་བོ་ལྷ་ཆེན་པོ་རྣམས་དང་དེའི་འཁོར་མ་མོ་དང་མཁའ་འགྲོ་མ་རྣམས་ཀྱིས་བཀུར་གནས་དམ་པར་མཐོང་བས་མཐུ་དང་བྱིན་རླབས་ཁྱད་པར་དུ་འཕགས་པ་དང༌། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཉེ་བའི་སྲས་དང་སྤུན་དུ་དགོངས་པས་ཐུགས་རྗེ་བྱིན་རླབས་མྱུར་དུ་འབྱུང་བ་དང༌། དེ་བཞིན་གཤེགས་པ་ཉིད་དང་སྤྱོད་ཡུལ་མཐུན་པས་སྤྱོད་ཡུལ་ཁྱད་པར་དུ་འཕགས་པ་དང༌། ཆོས་ཐམས་ཅད་ཀུན་ཏུ་བཟང་པོའི་ཞིང་དུ་སྦྱོར་བས་འཇིགས་པ་དང་བག་ཚ་བ་ཐམས་ཅད་མེད་པ་དང༌། བཀྲི་བ་དང་ངེས་པའི་དོན་དུ་གསུངས་པའི་སྡོམ་པ་ཇི་སྙེད་པ་ཐམས་ཅད་ཀྱང་རང་བཞིན་ལྷུན་གྱིས་གྲུབ་པར་འདུས་པ་དང་ཉམས་པར་གྱུར་ཀྱང་བསྐང་བའི་ཐབས་ཡོད་པ་སྟེ། དེ་ལྟར་རྣམ་པ་བདུན་ལ་སོགས་པའི་ཡོན་ཏན་མཐའ་ཡས་པས་ཁྱད་པར་འཕགས་སོ། །ཞེས་སོགས་རྒྱས་པར་འབྱུང་ངོ༌། ། ཏ༢ གཉིས་པ་[་ཨ་ནུ་ཡོ་གའི་ལུགས་]ནི། ཨ་ནུ་སྤྱི་ཡི་དམ་ཚིག་རྣམ་གྲངས་དགུ། ། མདོར་བསྡུས་བསྲུང་མཚམས་མེད་པ་ཆོས་ཉིད་དང༌། །(༩༥ན) ཡོད་པ་སྙིང་རྗེའི་དམ་ཚིག་གཉིས་སུ་བཤད། ། ལུང་ཨ་ནུ་ཡོ་ག་སྤྱིའི་དམ་ཚིག་ཏུ་སྤྱི་མདོའི་ལེའུ་རེ་དྲུག་པར། གལ་མདོ་ངེས་པའི་དམ་ཚིག་བཞི། ཐུན་མོང་གི་ཉི་ཤུ་རྩ་བརྒྱད། ལྷག་པའི་དམ་ཚིག་བཞི། བརྟུལ་ཞུགས་ཀྱི་ཉེར་གསུམ། སྒྲུབ་པའི་ཉི་ཤུ། སྤྱོད་ལམ་རྒྱུན་གྱི་བཞི། བདུད་ལྔ་སྤོང་བ། དགྲ་བཞི་གཞོམ་པ། ལྟ་བའི་དམ་ཚིག་སྟེ་རྣམ་གྲངས་དགུར་གསུངས་པའི་དོན་མདོར་བསྡུས་ཏེ་བཤད་ན། དང་པོ་ནི། ལུས་དང་ངག་དང་ཡིད་དང་སྤྱོད་ཡུལ་ཡོངས་སུ་དག་པར་བྱའོ། ། གཉིས་པ་ནི། རྩ་བ་སྐུ་གསུང་ཐུགས་རྡོ་རྗེའི་དམ་ཚིག་གསུམ། ཡན་ལག་སྤྱད་བྱ་ལྔ། དང་བླང་ལྔ། མི་འདོར་བ་ལྔ། ཤེས་བྱ་ལྔ། བསྒྲུབ་བྱ་ལྔ་སྟེ་གོང་དུ་བཤད་པ་དང་འདྲའོ། །