Tibetan
གསུམ་པ་ནི། དོན་དམ་པར་དམ་ཚིག་གི་ངོ་བོ་ལ་འདའ་ཉམས་དང་བྲལ་བས་བསྲུང་མཚམས་མེད་པ་དང༌། རྣམ་པ་གཟུང་འཛིན་ལས་འདས་པས་ཕྱལ་པ་སྟེ་ཕྱ་ལེར་ཁྱབ་པ་དང༌། དེ་དག་སེམས་ཉིད་གཅིག་པུའི་དབྱིངས་སུ་འདུས་པ་དང༌། ཆོས་ཉིད་བསམ་གྱིས་མི་ཁྱབ་པའི་ངང་ལས་མ་གཡོས་ན་སྡོམ་པ་དང་དམ་ཚིག་ཐམས་ཅད་རང་བཞིན་གྱིས་རྣམ་པར་དག་ཅིང་ལྷུན་གྱིས་གྲུབ་པ་སྟེ། གནས་ལུགས་རྟོགས་པ་རབ་ཀྱི་དམ་ཚིག་གོ། ། བཞི་པ་ནི། ལེའུ་དྲུག་ཅུ་རྩ་བཞི་པར། ཝ་དང་ཅང་ཤེས་གྱི་ལིང་སོགས་ཀྱི་དཔེས་བསྟན་པའི་དོན་གནུབས་ཆེན་པོ་སོགས་ཀྱིས་བཀྲལ་བ་ལྟར་ན། ཝ་གལ་ལ་ཟིན་ན་སྲོག་ལ་མི་ལྟ་བར་ལག་པ་བཅད་ནས་འགྲོ་བ་ལྟར། རྣལ་འབྱོར་པས་སྲོག་ལ་བབས་ཀྱང་དམ་ཚིག་སྲུང་བ་སྟེ། མི་མཐུན་ཕྱོགས་བརྟུལ་ཞིང་དམ་ཚིག་གི་སྟོབས་ལ་ཞུགས་པའི་ཐབས་སོ། ། ཅང་ཤེས་རྟས་ཐམས་ཅད་ཤེས་ཤིང་མྱུར་མགྱོགས་ཀྱིས་ས་ཐམས་ཅད་ཡུད་ཙམ་གྱིས་བསྐོར་བ་ལྟར། ཤེས་རབ་ཀྱིས་ཤེས་བྱ་སྤྱི་དང་རང་གི་མཚན་ཉིད་ཐམས་ཅད་ལ་ཐོགས་པ་མེད་པའི་བརྟུལ་ཞུགས་སོ། ། གྱི་ལིང་རྩལ་ཆེ་(༩༥བ)བས་ཅིར་ཡང་འགྱུར་བ་ལྟར། ལུས་གུས་པས་གར་དང་ཕྱག་རྒྱ་འཁྲུལ་འཁོར་ལ་བརྩོན་པ་ལེ་ལོ་གཞོམ་པའི་བརྟུལ་ཞུགས་སོ། ། གླང་ཆེན་ཆང་གིས་མྱོས་པས་དགྲ་ཟིན་མི་འབྱེད་པར་གང་སྣང་གཞོམ་པ་ལྟར། འཁོར་འདས་དབྱེར་མེད་དུ་ཤེས་པས་ལྟ་སྤྱོད་ཀྱི་དགྲ་བཞི་བཅོམ་པའི་སྤྱོད་པའོ། ། སྟག་དཔའ་རྟུལ་ཟ་བྱེད་ཀྱི་སེམས་གཏུམ་རྔམས་འཁྲུགས་པ་ལྟར། གནས་ལུགས་རྟོགས་པའི་ཏིང་འཛིན་དཔའ་བོའི་བརྟུལ་ཞུགས་སྟོབས་དང་ལྡན་ཞིང༌། སྤྱོད་པའི་བརྟུལ་ཞུགས་ཀྱིས་ཞིང་བཅུ་སྒྲོལ་བ་ཟ་བྱེད་གཏུམ་རྔམས་འཁྲུགས་པའི་ཚུལ་གདུལ་བྱ་དང་མཐུན་པ་སྟེ། རུ་དྲ་བསྒྲལ་ནས་གནས་སྤར་བ་ལྟ་བུའི་སྤྱོད་པའོ། ། ཁྱུང་ཆེན་ནམ་མཁར་ལྡིང་བས་གནམ་འཕང་རྩོལ་མེད་དུ་གཅོད་ཅིང་མ་བལྟས་པར་ཐམས་ཅད་གསལ་བ་ལྟར། ལྟ་བས་དབྱིངས་དང་ཡེ་ཤེས་དབྱེར་མེད་དུ་རྟོགས་པས་རྩོལ་བ་མེད་པའི་སྤྱོད་པའོ། ། དོམ་གྱིས་གང་ལ་དམིགས་པ་ཐེ་ཚོམ་མེད་པར་འཇིགས་ཤིང་འདྲལ་བར་བྱེད་པ་ལྟར། རྣལ་འབྱོར་ལྟ་སྤྱོད་ཀྱི་གདེང་དང་ལྡན་པས་ཐེ་ཚོམ་མེད་པར་མངོན་སྤྱོད་ཀྱི་ལས་ལ་སྦྱོར་བའི་བརྟུལ་ཞུགས་སོ། ། རྒྱ་མཚོའི་གཏིང་གི་གསེར་འགྱུར་བ་མེད་པ་ལྟར། ཟབ་དོན་གསང་ཐུབ་ཅིང་ཉམས་སུ་ལེན་པ་ལ་བློ་མི་ལྡོག་པར་བརྟན་པའི་བརྟུལ་ཞུགས་སོ། ། ལྐུགས་པ་གཏི་མུག་ཅན་གྱིས་བླང་དོར་མི་འབྱེད་པ་ལྟར། འཁོར་འདས་སོགས་རིས་སུ་མི་འབྱེད་པའི་མཉམ་བཞག་གིས་བདག་མེད་རྟོགས་པའི་ཤེས་རབ་མཐར་ཕྱིན་པའི་བརྟུལ་ཞུགས་སོ། ། རི་རབ་མི་གཡོ་བ་ལྟར། བླ་མ་དང་གྲོགས་ལ་དད་གུས་མི་འགྱུར་བ་དང་ཏིང་ངེ་འཛིན་བྱིང་རྒོད་ཀྱིས་མི་གཡོ་བའི་གཉེན་པོར་བརྟེན་པའི་ཐབས་ཀྱི་བརྟུལ་ཞུགས་སོ། ། ནམ་མཁའ་ཡངས་ལ་རྒྱ་ཆེ་བས་སྤང་ལེན་མེད་པ་ཅིའང་ཤོང་བ་ལྟར། རྣལ་འབྱོར་པ་མཆེད་ཀྱི་ནང་དུ་ཤོང་ཡངས་ཆེ་བ་དང་བདག་ཉིད་ཆེན་པོའི་ལྟ་སྤྱོད་འདིའི་ནང་དུ་འཁོར་འདས་དང་ཐེག་པ་གང་ཡང་མ་ཤོང་བ་མེད་པར་སྤྱོད་བའི་བརྟུལ་ཞུགས་སོ། །(༩༦ན) ཐོག་གང་ལ་བབས་ཀྱང་འཇོམས་པ་ལྟར། རྣལ་འབྱོར་པ་དྲག་པོའི་ཏིང་ངེ་འཛིན་གྱིས་དགྲ་བགེགས་གང་ཡང་ཐོགས་མེད་དུ་འཇོམས་པའི་བརྟུལ་ཞུགས་སོ། ། ལག་ན་རྡོ་རྗེས་ལོག་ལྟ་ཅན་ཐམས་ཅད་འཇོམས་པ་ལྟར། རྣལ་འབྱོར་པས་ཁྲོ་བོ་བསྒོམས་ནས་བར་དུ་གཅོད་པ་ཐེ་ཚོམ་མེད་པར་འཇོམས་པའི་བརྟུལ་ཞུགས་སོ། ། བྱ་རོག་གིས་དགྲ་དང་གཟན་གཉིས་དུས་གཅིག་ཏུ་མིག་གིས་བསྲུང་བ་ལྟར། ཕྱི་ནང་གི་དམ་ཚིག་འདི་དག་རྒྱུན་དུ་སྤོང་ལེན་དུས་གཅིག་ཏུ་བརྩོན་པའི་ཐབས་ཀྱི་བརྟུལ་ཞུགས་སོ། ། གླང་ཆེན་ཆུ་རབ་བདེ་བ་དང་མི་བདེ་བ་ལ་ལྟོས་པ་མེད་པར་འཇུག་པ་ལྟར། བདག་ཉིད་ཆེན་པོའི་ལྟ་སྤྱོད་གདེང་དང་ལྡན་པས་སྤང་བླང་གཉིས་མེད་དུ་སྤྱོད་པའམ། གདུལ་བྱ་མི་གདམ་པར་ཕྲིན་ལས་བཞིའི་ལས་མཛད་པའི་བརྟུལ་ཞུགས་སོ། ། སེང་གེ་གྲོགས་མེད་གཅིག་པུར་སྡོད་པ་ལྟར། ལྟ་སྤྱོད་མི་མཐུན་པའི་གྲོགས་ངན་སྤངས་ནས་གཅིག་པུར་དགོན་པར་གནས་པས་ལྟ་སྒོམ་སྐྱོང་བའི་བརྟུལ་ཞུགས་སོ། ། ངང་པ་ཕོ་མོ་མི་འབྲལ་བར་བདེ་བར་འགྲོགས་པ་ལྟར། སེམས་ཅན་ལ་སྙིང་བརྩེ་བས་ཐར་པའི་བདེ་ལ་འགོད་པའི་ཐབས་དང་མི་འབྲལ་བར་འགྲོགས་པའི་བརྟུལ་ཞུགས་སོ། ། སྒྱུ་མ་མཁན་གྱིས་བྱས་པའི་གཟུགས་བརྙན་ལྟར། ཕུང་ཁམས་སྐྱེ་མཆེད་རྒྱལ་བའི་དཀྱིལ་འཁོར་སྒྱུ་མ་ལྟ་བུ་ཡིན་པར་ཤེས་ནས་དེ་ལྟར་སྒོམ་ཞིང་སྟོན་པ་ནི་ཐབས་མཁས་ཀྱིས་འདྲིད་པའི་བརྟུལ་ཞུགས་སོ། ། ཕག་གིས་གཙང་དམེ་མེད་པར་ཐམས་ཅད་བཟའ་བ་ལྟར། དམ་རྫས་ལྔ་བླང་དོར་མེད་པར་མཉམ་ཉིད་དུ་སྤྱོད་པའི་བརྟུལ་ཞུགས་སོ། ། ཅེ་སྤྱང་ཐོགས་པ་མེད་པར་གསོད་ལ་དགའ་བ་ལྟར། ལྟ་སྤྱོད་གོམས་པའི་ཐུགས་རྗེས་ལོག་ལྟ་ཅན་རྟོག་པས་བསྒྲལ་ཞིང་རྣམ་ཤེས་ཟག་མེད་ལ་བཀོད་པས་ཚོགས་གཉིས་རྫོགས་པའི་ཐབས་ཀྱི་བརྟུལ་ཞུགས་སོ། ། གློག་གིས་ཐམས་ཅད་དུས་གཅིག་ལ་མྱུར་དུ་གསལ་བ་ལྟར། ལམ་ཉམས་(༩༦བ)སུ་བླངས་པས་རང་དོན་མྱུར་དུ་འགྲུབ་ཅིང་གཞན་དོན་མྱུར་བར་འགྲུབ་པར་བརྩོན་པའི་བརྟུལ་ཞུགས་སོ། ། བྱ་རྒོད་ཚུལ་ཁྲིམས་སྲོག་གཅོད་ལ་འཛེམ་པ་ལྟར། བརླངས་སྤྱོད་ཀྱི་བརྟུལ་ཞུགས་ཐེག་པ་གཞན་ལ་མི་འཚམས་པ་ལྟར་སྣང་ཡང་འདིར་བདག་ཉིད་ཆེན་པོའི་ཚུལ་དུ་སྤྱད་ན་དམ་ཚིག་སྐྱོང་ཞིང་ཉེས་པ་དག་པའི་བརྟུལ་ཞུགས་སོ། ། རྒྱལ་པོ་བག་དང་ལྡན་པས་རྒྱལ་ས་གནོན་ཞིང་རང་ལས་འཁོར་གཅེས་པར་སྐྱོང་བ་ལྟར། དབྱིངས་ཡེ་ཤེས་དབྱེར་མེད་བདེ་བ་ཆེན་པོར་རྟོགས་གོམས་ཀྱི་ཐབས་ལ་འབད་པའི་རྣལ་འབྱོར་པས་བརྟུལ་ཞུགས་ཀྱི་རྒྱལ་ས་གནོན་ཞིང་ཆོས་ཐམས་ཅད་རང་ལས་མི་གཞན་པར་རྟོགས་པས་འགྲོ་བ་སྐྱོང་ཞིང་ཉེས་པ་རང་སར་དག་པའི་བརྟུལ་ཞུགས་སོ། ། དེ་རྣམས་ཀྱང་བདག་དོན་དང་གཞན་དོན་དང་གཉིས་ཀའི་དོན་བློ་རབ་ཅིག་ཅར་བས་ཉམས་སུ་ལེན་བྱར་གསུངས་སོ། ། ལྔ་པ་ནི། མི་ཤིགས་པ་ནི་སེང་གེ་སྟེ། ། གཅན་གཟན་རྒྱལ་པོའི་ཁྲི་མི་གཞིག ། ཅེས་སོགས་གསུངས་པའི་དོན། སྔར་སྨོས་པའི་ལྷག་པའི་དམ་ཚིག་ཉི་ཤུ་དང་གནད་གཅིག་གོ། ། དྲུག་པ་ནི། རྡོ་རྗེ་གོ་ཕུར་ཊྭཱཾ་ཆེན་སོགས་ཀྱིས་བསྟན་པའི་དོན། བསམ་གཏན་གྱི་སྲོག་གཅོད་པ་གཉིད་དང༌། ཆང་སྤང་བ། གསང་སྔགས་བརྡ་སྐད་ཀྱིས་སྨྲ་བ། ལེ་ལོ་གཞོམ་པའོ། ། བདུན་པ་ནི། རྣལ་འབྱོར་སྤྱོད་པ་ལ་རྒྱུན་གྱི་བར་དུ་གཅོད་པའི་བདུད་ལྔར་བཤད་པ། རྣམ་པར་རྟོག་པ་དང༌། ལེ་ལོ་དང༌། འདུ་འཛི་དང༌། ཚིག་རྩུབ་དང༌། ཁྲོ་གཏུམ་སྤང་བའོ། ། བརྒྱད་པ་ནི། ལྟ་སྒོམ་སྤྱོད་གསུམ་བཅོས་མ་རང་གར་ཤོར་བའི་དགྲ། ལྟ་བ་དམན་ལ་སྤྱོད་པ་རྩིངས་པ་འཆལ་བའི་དགྲ། རྩ་བ་དང་ཡན་ལག་གི་དམ་ཚིག་ཉམས་པ་ལྟུང་བའི་དགྲ། ཚོད་ཡོད་ལེ་ལོས་འབྲས་བུ་འཕྲོག་པའི་དགྲ་སྟེ་བཞི་པོ་དེ་གཞོམ་པའོ། །(༩༧ན) དགུ་པ་ནི། སྣོད་རྣམ་པར་དག་པའི་འོག་མིན་གྱི་ཞིང༌། འདོད་ཡོན་རྣམ་པར་དག་པ་མཆོད་པའི་ཡོ་བྱད། འཁོར་རྣམ་པར་དག་པ་ལྷའི་དཀྱིལ་འཁོར། ཉོན་མོངས་རྣམ་པར་དག་པ་ཡེ་ཤེས་ཆེན་པོར་རྟོགས་པའོ། ། དེ་དག་ཀྱང་བསྡུ་ན། བསྲུང་མཚམས་མེད་པ་ཆོས་ཉིད་ཅིག་ཅར་བའི་དམ་ཚིག་དང༌། བསྲུང་མཚམས་ཡོད་པ་སྙིང་རྗེའི་དམ་ཚིག་རིམ་གྱིས་པའི་སྡོམ་པ་གཉིས་སུ་འདུ་བར་བཤད་དེ། སྤྱི་མདོ་ལས། བསྲུང་བྱ་བསྲུང་དུ་མེད་པ་ནི། ། ཆོས་ཉིད་དམ་ཚིག་དམ་པ་ཡིན། ། ཞེས་དང༌། དམ་ཚིག་འདི་ནི་རྨད་པོ་ཆེ། ། ཀུན་གྱི་ཐུན་མོང་མ་ཡིན་ཕྱིར། ། མོས་པ་ཆུང་ངུ་ཐམས་ཅད་ལ། ། བསྲུང་བའི་མཚམས་དག་བཟུང་བར་བྱ། ། ཞེས་སོ། ། ཏ༣ གསུམ་པ་[་ཨ་ཏི་ཡོ་གའི་ལུགས་]ནི། སྐུ་གསུང་ཐུགས་ལ་ཕྱི་ནང་གསང་བ་གསུམ། ། རེ་རེར་གསུམ་དབྱེ་ཉི་ཤུ་རྩ་བདུན་ནི། ། ཨ་ཏིའི་དམ་ཚིག་སྤྱི་ཡིན་ཁྱད་པར་ཆེ། ། མེད་པ་ཕྱལ་པ་ལྷུན་གྲུབ་གཅིག་པུའོ། ། ཨ་ཏི་རྫོགས་པ་ཆེན་པོའི་ལུགས་སུ། སྤྱི་དང་། ཁྱད་པར་གཉིས་ལས། དང་པོ་ནི། རྩ་བ་སྐུ་གསུང་ཐུགས་ཀྱི་དམ་ཚིག་གསུམ་ལ། ཕྱི། ནང་། གསང་བ་གསུམ་གསུམ། དེ་རེ་རེ་ལའང་གསུམ་རེར་དབྱེ་བས་ཉི་ཤུ་རྩ་བདུན་ཏེ། དང་པོ་སྐུའི་དམ་ཚིག་གསུམ་ཚན་གསུམ་གྱི་ཕྱིའི་དམ་ཚིག་ཕྱི་ནང་གསང་གསུམ་ནི། རིམ་པར་མ་བྱིན་ལེན། མི་ཚངས་སྤྱོད། སྲོག་གཅོད་གསུམ་སྤང་བའོ། ། ནང་གི་གསུམ་ནི། ཕ་མ་རྡོ་རྗེ་སྤུན་སྲིང་དང་རང་ལུས་སྨོད་པ། ཆོས་དང་གང་ཟག་ལ་སྨོད་པ། རང་ལུས་ལ་རྡེག་འཚོག་དང་དཀའ་ཐུབ་ཀྱིས་བརྙས་ཤིང་གདུང་བ་རྣམས་སྤང་བའོ། ། གསང་བའི་གསུམ་ནི། རྡོ་རྗེ་སྤུན་སྲིང་གི་ལུས་ལ་རྡེག་པར་གཟས་ཤིང་རྒྱན་ལ་སྨོད་པ། རྡོ་རྗེ་མཆེད་ལྕམ་ལ་རྡེག་པ་དང་བླ་མའི་ཡུམ་ལ་གཙེས་པ། བླ་མའི་གྲིབ་མར་འགོང་བ་དང་སྤྱན་སྔར་ལུས་ངག་གི་སྤྱོད་པ་བག་མེད་རྣམས་སྤང་བའོ། ། གཉིས་པ་གསུང་གི་དམ་ཚིག་གསུམ་ཚན་གསུམ་གྱི། ཕྱིའི་གསུམ་ནི། རྫུན་ཚིག །ཕྲ་མ། གཞན་གྱི་ཞེར་འདེབས་པའི་ཚིག་སྨྲ་བ་རྣམས་སྤང་བའོ། ། ནང་གི་གསུམ་ནི། ཆོས་ཀྱི་ཚིག་སྨྲ་བ། དོན་ཡིད་ལ་བསམ་པ། གནས་ལུགས་སྒོམ་པར་བྱེད་(༩༧བ)པ་རྣམས་ལ་གཤེ་སྐུར་འདེབས་པ་སྤང་བའོ། ། གསང་བའི་གསུམ་ནི། རྡོ་རྗེ་སྤུན་སྲིང་གི་ཚིག །བླ་མའི་ཕྱག་རྒྱ་དང་ཉེ་འཁོར་གྱི་ཚིག །བླ་མའི་གསུང་རྣམས་ལ་བརྙས་ཤིང་གཅོག་པ་རྣམས་སྤང་བའོ། ། གསུམ་པ་ཐུགས་ཀྱི་དམ་ཚིག་གསུམ་ཚན་གསུམ་གྱི། ཕྱིའི་གསུམ་ནི། གནོད་སེམས། བརྣབ་སེམས། ལོག་ལྟ་གསུམ་སྤང་བའོ། ། ནང་གི་གསུམ་ནི། སྤྱོད་པ་ལོག་པ་བག་མེད། སྒོམ་པ་ལོག་པ་བྱིང་རྒོད་དང་གོལ་སྒྲིབ། ལྟ་བ་ལོག་པ་རྟག་ཆད་མཐར་འཛིན་རྣམས་སྤང་བའོ། ། གསང་བའི་གསུམ་ནི། ཉིན་ཞག་གི་ཐུན་རེ་རེ་བཞིན་ལྟ་སྒོམ་སྤྱོད་གསུམ་ཡིད་ལ་མ་བྱས་པ། ཡི་དམ་གྱི་ལྷ་ཡིད་ལ་མ་བྱས་པ། བླ་མའི་རྣལ་འབྱོར་དང་མཆེད་ལྕམ་ལ་བརྩེ་གདུང་ཡིད་ལ་མ་བྱས་པ་རྣམས་སྤང་བའོ།། དེ་དག་ནི་ཨ་ཏིའི་དམ་ཚིག་སྤྱི་ཡིན་ནོ། ། གཉིས་པ་ཁྱད་པར་ཆེན་པོའི་དམ་ཚིག་བཞི་ནི། ངོ་བོ་ཀ་དག་ལ་བལྟས་ནས་ཁྲེགས་ཆོད་ཀྱི་དམ་ཚིག་ཏུ་སྣོད་བཅུད་སྣང་སྲིད་ཀྱི་ཆོས་ཐམས་ཅད་ཡེ་ནས་མེད་པ་སྒྱུ་མའི་དཔེ་བརྒྱད་ལྟར་ཤེས་པས་སྣང་བ་ལ་བདེན་ཞེན་གྲོལ། སེམས་འཛིན་གྱི་འཇུར་བུས་མ་བཅིངས་པའི་རིག་པ་རྟེན་མེད་ཕྱལ་པར་བསྐྱངས་པས་སྣང་བཏགས་ཆོས་ཉིད་དུ་གྲོལ། རང་བཞིན་ལྷུན་གྲུབ་ལ་ལྟོས་ནས་ཐོད་རྒལ་གྱི་དམ་ཚིག་ཏུ་འོད་ལྔ་རང་གསལ་ལྷུན་གྲུབ་སྣང་བ་བཞིིའི་ཉམས་ལེན་དང་མ་བྲལ་བས་སངས་རྒྱས་རང་ཆས་སུ་འགྲུབ་པར་ཐག་བཅད་པས་འབྲས་བུ་གཞན་ནས་འཚོལ་བའི་བློ་ལྡོག །རྣམ་རྟོག་བྱུང་ཚོར་རྐྱེན་སྣང་ཅི་བྱུང་ཅི་ཤར་རང་བྱུང་གི་ཡེ་ཤེས་གཅིག་པུར་ཐག་ཆོད་པས་ཆོས་ཉིད་གདོད་མའི་ཟད་སར་གཏན་སྲིད་ཟིན་པའོ། ། ཉ༣ གསུམ་པ་ཉམས་བཤགས་ཀྱི་ཚུལ་བཤད་པ་ལའང་གཉིས། ཏ༡ ཉམས་ཚུལ་དང༌། ཏ༢ བཅོས་ཚུལ་ལོ། ། ཏ༡ དང་པོ་ནི། ཉམས་པ་ཆེ་དང་རྩ་ལག་ཟླས་ཞར་ལྔ། ། མ་བཤགས་མི་འདོད་ཀུན་འབྱུང་མནར་མེད་སྐྱེ། ། དུས་འདས་རལ་བའི་ཉམས་ཚུལ་རྣམས་(༩༨ན)གོང་དུ་སྨོས་པ་ལྟར་ལ། གཞན་ཡང་སྤྱི་མདོ་དགོངས་འདུས་ལས་ཉམས་པ་ལྔར་བཤད་པའི་ཉམས་པ་ཆེན་པོའམ་ཀུན་ཏུ་ཉམས་པ་ནི་ཡུལ་ཆེས་གཉན་པ་ལ་ཀུན་དཀྲིས་དྲག་པོས་སྤྱད་པའམ་ལན་གྲངས་མང་དུ་བྱུང་བ་དང་དུས་འདས་རལ་བ་ལ་སོགས་པ་ཡིན་ལ། རྩ་བ་ཉམས་པ་དང་ཡན་ལག་ཉམས་པ་གཉིས་ནི་དེ་དག་དང༌། ཟླས་ཉམས་ནི་ཉམས་པ་དང་འགྲོགས་པའི་ཉེས་པ་དང༌། ཞར་ཉམས་ནི་གཞན་གྱི་ངོ་དགར་ཐལ་བའི་ཉེས་པའོ། ། དེ་ལྟར་བཤད་པའི་དམ་ཚིག་དེ་དག་ཐམས་ཅད་བླངས་ཟིན་ནས་མ་ཉམས་པར་བསྲུང་བ་དང༌། ཅིས་ཀྱང་ཉམས་ན་དེ་མ་ཐག་ཏུ་བཤགས་པའི་ཆོ་ག་རྒྱུད་ལུང་མན་ངག་རྣམས་ལས་འབྱུང་བ་བཞིན་ཚུལ་བཞིན་དུ་བྱ་བ་ཤིན་ཏུ་གལ་ཆེ་ཡི། མ་བཤགས་ན་ཚེ་འདིར་མི་འདོད་པ་སྣ་ཚོགས་པ་འབྱུང་ཞིང་། ཕྱི་མ་མནར་མེད་རྡོ་རྗེའི་དམྱལ་བ་ཆེན་པོར་སྐྱེས་ནས་ནམ་མཁའ་མ་ཞིག་གི་བར་དུ་ཐར་བ་མེད་པར་གསུངས་ཏེ། ཟླ་གསང་ཐིག་ལེ་ལས། དམ་ཚིག་སྡོམ་པ་ཉམས་པ་ལ། ། སངས་རྒྱས་བྱང་ཆུབ་སེམས་དཔའ་རྣམས། ། བྱིན་གྱིས་རློབས་པར་མི་མཛད་དོ། ། སྤོས་དང་མེ་ཏོག་ལ་སོགས་པ། ། ཕུལ་ཡང་བཞེས་པར་མི་འགྱུར་ཏེ། ། ནད་དང་དུག་དང་དགྲ་རྣམས་ཀྱིས། ། བསད་ནས་སེམས་ཅན་དམྱལ་བར་འགྲོ། ། ཞེས་དང༌། ཡེ་ཤེས་གྲུབ་པ་ལས། དམ་ཚིག་ཉམས་པ་སྡུག་བསྔལ་ཏེ། ། ལུས་དང་དེ་བཞིན་ཡིད་དང་ནི། ། དེ་ཡི་ཡོན་ཏན་ཉམས་འགྱུར་ཞིང༌། ། མྱུར་བ་ཉིད་དུ་འཆི་བར་འགྱུར། ། ཤི་ནས་དམྱལ་བའི་སྡུག་བསྔལ་ནི། ། བསྐལ་པ་བྱེ་བ་བརྒྱ་ཕྲག་ཏུ། ། མྱོང་ནས་གནས་ལས་འཕོ་འགྱུར་ནས། ། གདོལ་པའམ་དམན་པའི་རིགས་སུ་སྐྱེ། ། ལྐུགས་པའམ་ཡང་ན་འོན་པར་སྐྱེ། ། ཞེས་སོགས་གསར་རྙིང་གི་རྒྱུད་གཞུང་དུ་མར་མགྲིན་གཅིག་ཏུ་གསུངས་སོ། ། ཏ༢ གཉིས་པ་[བཅོས་ཚུལ་]ནི། ཉན་ཐོས་རྫ་བཞིན་བྱང་སེམས་གསེར་དངུལ་སྣོད། ། ཆག་དང་(༩༨བ)འདིར་ནི་ཞོམ་པ་དང་སྦྱར་ཏེ། ། གསོར་མི་རུང་དང་གསོར་རུང་རང་སྟོབས་སོས། ། ཉམས་པ་གསོར་རུང་ངམ་ཞེ་ན། ཉན་ཐོས་ཀྱི་ཕམ་པ་འཆབ་བཅས་བྱུང་བ་ནི་རྫ་སྣོད་ཆག་པ་སླར་བཅོས་སུ་མི་རུང་བ་བཞིན་དང༌། བྱང་སེམས་ཀྱི་སྡོམ་པ་ནི་གསེར་དངུལ་གྱི་སྣོད་ཆག་པ་མགར་བའི་རྩོལ་བས་ད་དུང་བཅོས་སུ་རུང་བ་དང༌། སྔགས་ཀྱི་སྡེ་སྣོད་འདིར་ནི་གསེར་སྣོད་ཞོམ་པ་རང་ཉིད་ཀྱི་རྩོལ་བས་ཀྱང་བསྲང་ཐུབ་པའི་དཔེ་དང་སྦྱར་ཏེ། རིམ་བཞིན་གསོར་མི་རུང་བ་དང༌། གསོར་རུང་བ་དང༌། རང་སྟོབས་ཀྱིས་སོས་པ་རྒྱུད་ལུང་རྣམས་ནས་གསུངས་སོ། ། ལས་རྫས་འདུན་དང་ཏིང་འཛིན་དེ་ཉིད་དེ། ། སྤྱི་ཁྲུས་ཆེན་པོས་ཀུན་ཀྱང་དག་ཚངས་འགྱུར། ། ཇི་ལྟར་གསོ་བའི་ཐབས་ཀྱང་སྤྱི་མདོ་ལས་རྣམ་གྲངས་ལྔར་གསུངས་པའི། དང་པོ་ལས་ཀྱིས་སྐོང་བ་སྦྱིན་སྲེག་དང་བཟླས་བརྗོད་ཉམས་པ་ཆེན་པོ་ལ་ཁྲི་ཕྲག་བཅུ་གསུམ་གྱིས་མཚོན་ཚོད་དང་དཔགས། རྫས་ཀྱིས་སྐོང་བ་རིགས་ལྔའི་དམ་ཚིག་དང་མཐུན་པའི་དམངས་གདོལ་སོགས་རིགས་ལྔའི་བླ་མ་དངོས་སམ་དེར་མོས་པས་སངས་རྒྱས་རིགས་ལྔའི་རང་བཞིན་ཅན་ལ་རིགས་མཐུན་གྱི་རིན་པོ་ཆེ་ཕངས་པ་མེད་པར་འབུལ། འདུན་པས་སྐོང་བ་དང་འདོད་པའི་དད་པས་གནོང་འགྱོད་དྲག་པོས་བཤགས། ཏིང་ངེ་འཛིན་གྱིས་སྐོང་བ་སྟོབས་བཞིའི་སྒོ་ནས་བཤགས་པས་རྟེན་གྱི་གནས་གསུམ་གྱི་འོད་ཟེར་གྱིས་རང་གི་སྡིག་སྒྲིབ་སྦྱང་བར་བསམ་པ་སྟེ། དེ་ལའང་ཏིང་ངེ་འཛིན་གྱི་མེས་སྲེག་པ་དང༌། བྱང་ཆུབ་སེམས་ཀྱི་འོད་ཟེར་གྱིས་མུན་པ་ཐམས་ཅད་བསལ་བ་དང༌། སྤྱོད་པ་རླབས་པོ་ཆེའི་ཆུས་བཀྲུ་བ་ལ་སོགས་པའོ། ། དེ་ཁོ་ན་ཉིད་ཀྱིས་སྐོང་བ་ནི། ཀུན་འདུས་ལས། ཤེས་རབ་ཆེན་པོས་རྒྱུད་ཀྱི་བག་ཆགས་ཐམས་ཅད་རང་བཞིན་མེད་པར་ཤེས་པ་དང༌། ཞེས་པས་འཁོར་གསུམ་མི་དམིགས་པའི་ཤེས་རབ་སྒོམ་པ་ནི་སྡིག་སྦྱོང་རྣམས་ཀྱི་ནང་ནས་ཕུལ་དུ་བྱུང་བའོ། ། ཁྱད་པར་རྣལ་འབྱོར་གྱི་སྤྱི་ཁྲུས་ཆེན་པོ་ན་རཀ་དོང་སྤྲུགས་ཀྱི་མན་(༩༩ན)ངག་ལ་བརྟེན་ནས་ཕྱི་ཡོ་བྱད་ཚོགས་ཀྱི། ནང་ཕུང་པོ་རྟེན་གྱི། གསང་བ་བྱང་ཆུབ་སེམས་ཀྱི་བསྐང་བཤགས་གསུམ་ཉ་སྟོང་ཚེས་བརྒྱད་ལ་བྱས་ན་དེ་ཚུན་ཆད་ཀྱི་ཉམས་ཆགས་ཐམས་ཅད་དག་ཚངས་སུ་འགྱུར་བར་གསུངས་པས་གཡར་དམ་བྱ་བར་རིགས་སོ། ། འདིར་འཕྲོས་དོན་དུ་རྡོ་རྗེ་ཐེག་པའི་ལམ་རིམ་མདོར་བསྡུ་ན། སློབ་དཔོན་སྐལ་བཟང་རྡོ་རྗེས། སྐལ་པ་དང་ལྡན་གང་ཟག་གིས། ། བླ་མ་དམ་པར་གྱུར་པ་ལ། ། སེམས་བསྐྱེད་སྡོམ་བླང་དབང་ནོད་ཅིང༌། ། དེ་ཉིད་བསྲུང་དང་མཚན་ཉིད་ཤེས། ། སེམས་སྦྱོང་སྤྱོད་པ་དག་པ་དང༌། ། ཆོ་ག་ལྔ་ཡི་མཚན་ཉིད་དོ། ། ཞེས་མ་སྨིན་པ་སྨིན་པར་བྱེད་པ་དབང་གི་ཆོ་ག །སྨིན་པ་མི་ཉམས་པར་བྱེད་པ་དམ་ཚིག་སྲུང་བའི་ཆོ་ག །བླ་མ་ལས་རྒྱུད་མཉན་ནས་མཚན་ཉིད་ཤེས་པར་བྱེད་པའི་ཆོ་ག །བྱང་ཆུབ་འགྲུབ་པར་བྱེད་པ་སེམས་སྦྱོང་བའི་ཆོ་ག །དེ་མཐར་ཕྱིན་པའི་ཐབས་སྤྱོད་པ་དགེ་བའི་ཆོ་ག་དང་ལྔར་བསྡུས་པ་ལས། དང་པོ་ནི། རྒྱུ་རྒྱུད་ཐོག་མཐའ་མེད་པའི་བྱང་ཆུབ་སེམས་ཀྱི་རིགས་སད་པས་ཁམས་དྲུག་དང་ལྡན་པའི་རྡོ་རྗེའི་ལུས་རྩ་ཐིག་རླུང་གསུམ་གྱི་ཚོགས་པ་སྐྱོན་མེད་པའི་རྟེན་ཅན་མཚུངས་པར་ལྡན་པའི་རྒྱུ་དང༌། བསྙེན་སོགས་ཀྱིས་དག་པར་བྱས་པས་དཀྱིལ་འཁོར་བཞེངས་པ་དང་སྒྲུབ་ཅིང་མཆོད་པའི་བྱ་བ་མ་འཁྲུལ་བར་བྱས་པ་ལྷན་ཅིག་བྱེད་པའི་རྒྱུ། དབང་བསྐུར་གྱི་སྣོད་རུང་པདྨ་ལྟ་བུ་ལ་སོགས་པའི་གང་ཟག་ལྔ་པོ་རྒྱུའི་རྐྱེན། བསྐུར་མཁན་སློབ་དཔོན་ཕྱི་ནང་གི་དེ་ཉིད་བཅུ་ལ་སོགས་པ་མཚན་ཉིད་དང་ལྡན་ཞིང་ཏིང་ངེ་འཛིན་རྩལ་རྫོགས་པ་བདག་པོའི་རྐྱེན། རྫས་སྔགས་ཕྱག་རྒྱ་ཏིང་ངེ་འཛིན་ལེགས་པར་ཚོགས་པ་དམིགས་པའི་རྐྱེན། བུམ་པའི་དབང་སོགས་སྔ་མས་གོ་ཕྱེས་ནས་ཕྱི་མ་རྣམས་རིམ་གྱིས་བསྐུར་ཐོབ་ཏུ་སྨིན་པ་དེ་མ་ཐག་པའི་རྐྱེན་ཏེ་རྒྱུ་གཉིས་རྐྱེན་བཞི་ཚོགས་པས་སྔགས་ཀྱི་འཇུག་སྒོ་དབང་བསྐུར་བ་ཐོབ་ནས། གཉིས་པ་ནི། དབང་སྲོག་དམ་ཚིག་བྱ་སྤྱོད་རྣལ་འབྱོར་སོ་སོ་ལས་བཤད་(༩༩བ)པ་རྣམས་དང༌། ཁྱད་པར་བླ་མེད་ཀྱི་བརྟུལ་ཞུགས་དང་སྡོམ་པ་དང་རྩ་བ་ཡན་ལག་གི་དམ་ཚིག་བཟང་བ་དང་བསྲུང་བ་དྲང་ངེས་ལྡེམ་པོར་དགོངས་ཏེ་གསུངས་པ་རྣམས་རྟོགས་པའི་ཚོད་དང་སྦྱར་ཏེ་སྲོག་བཞིན་བསྲུང༌། གསུམ་པ་ནི། རྗོད་བྱེད་ཚིག་གི་རྒྱུད་བླ་མ་ལས་མཉན་ཞིང་ཚུལ་བཞི་དང་སྦྱར་བས་བརྗོད་བྱ་དོན་གྱི་རྒྱུད་ལེགས་པར་