Tibetan
བར་བྱ་བའི་ཕྱིར་རོ། ། བྱང་ཆུབ་སེམས་དཔའ་ནི། སྒྲའི་རིག་པ་འཚོལ་བར་བྱེད་དེ། ཚིག་དང་ཡི་གེ་བཟང་པོ་ངེས་པའི་ཚིག་བཟང་པོ་སྤྱོད་པས་ལེགས་པར་སྦྱར་ཏེ་བརྗོད་པ་ལ་མོས་པ་རྣམས་བདག་ལ་ཡིད་ཆེས་པའི་ཕྱིར་དང༌། དོན་གཅིག་ལའང་ངེས་པའི་ཚིག་རྣམ་པ་སྣ་ཚོགས་ཀྱི་རྗེས་སུ་ཐ་སྙད་བཏགས་པ་ལ་འཇུག་པར་བྱ་བའི་ཕྱིར་རོ། ། བྱང་ཆུབ་སེམས་དཔའ་ནི། གསོ་བའི་བསྟན་བཅོས་འཚོལ་བར་བྱེད་དེ། སེམས་ཅན་རྣམས་ཀྱི་ནད་རྣམ་པ་སྣ་ཚོགས་རྣམས་རྣམ་པར་ཞི་བར་བྱ་བའི་ཕྱིར། སྐྱེ་བོའི་ཚོགས་ཆེན་པོ་ལ་ཕན་གདགས་པའི་ཕྱིར་རོ། ། བྱང་ཆུབ་སེམས་དཔའ་ནི། འཇིག་རྟེན་པའི་ལས་ཀྱི་གནས་ཤེས་པ་རྣམས་འཚོལ་བར་བྱེད་དེ། སེམས་ཅན་རྣམས་ཀྱི་དོན་དུ་ཚེགས་ཆུང་(༡༠༤ན)ངུས་ལོངས་སྤྱོད་སྒྲུབ་པའི་ཕྱིར་དང༌། སེམས་ཅན་རྣམས་ཀྱི་གཅེས་པར་བྱ་བ་བསྐྱེད་པའི་ཕྱིར་དང༌། བཟོ་དང་ལས་ཀྱི་གནས་ཤེས་པར་སྦྱིན་པའི་ཕན་འདོགས་བསྡུ་བའི་ཕྱིར་རོ། །ཞེས་དང༌། བྱང་ཆུབ་སེམས་དཔའ་རིག་པའི་གནས་ལྔ་པོ་འདི་དག་འཚོལ་བའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཡེ་ཤེས་ཀྱི་ཚོགས་ཆེན་པོ་ཡོངས་སུ་རྫོགས་པར་བྱ་བའི་ཕྱིར་ཏེ། ཐམས་ཅད་ལ་དེ་ལྟར་མ་བསླབ་ན་ནི་རིམ་གྱིས་ཐམས་ཅད་མཁྱེན་པའི་ཡེ་ཤེས་སྒྲིབ་པ་མེད་པ་ཐོབ་པར་མི་འགྱུར་རོ། །ཞེས་རྒྱས་པར་གསུངས་པ་ལྟར། མདོར་ན། རྣམ་པ་ཐམས་ཅད་མཁྱེན་པའི་ཡེ་ཤེས་འཐོབ་པའི་ཚོགས་ཀྱི་རྒྱུའམ་དོན་གྱི་སླད་དུ་བརྩོན་པར་བྱའོ། ། ཅ༣ གསུམ་པ་གཞུང་དོན་དངོས་བཤད་པ་ལ་གསུམ། ཆ༡ ཤེས་བྱའི་གཞི་མ་ཡི་གེའི་སྦྱོར་བ། ཆ༢ ཐུན་མོང་རིག་པའི་གནས་ཡན་ལག་དང་བཅས་པ། ཆ༣ ཚུར་མཐོང་འཇིག་རྟེན་པའི་ལམ་བཤད་པའོ། ། ཆ༡ དང་པོ་ལ་གཉིས། ཇ༡ རང་བཞིན་ངོས་བཟུང༌། ཇ༢ མཚན་ཉིད་ཞིབ་མོར་བཤད་པའོ། ། ཇ༡ དང་པོ་ནི། ཤེས་བྱའི་གཞི་མ་ཡི་གེའི་སྦྱོར་བ་སྟེ། ། སྐད་དང་ཡི་གེའི་རིགས་གྱུར་མཐའ་ཡས་ཀྱང༌། ། རྩ་བ་དབྱངས་གསལ་གཉིས་ཡིན་སྒྲ་ཙམ་ནི། ། རྣམ་སྨིན་སྐྱེས་མིན་རྒྱུ་མཐུན་རྒྱས་བྱུང་འདོད། ། སངས་རྒྱས་ཀྱིས་གསུངས་པའི་བསླབས་པའི་ཚུལ་རྣམས་ཀྱང་ལྟོས་པའི་སྒོ་ནས་འཛིན་ཅིང༌། ཕྱི་རོལ་རིག་བྱེད་བཞི་ལ་སོགས་པ་སྨྲ་བ་རྣམས་ཀྱི་རྒྱུ་ཡིན་པ་དང༌། འཇིག་རྟེན་པ་ཀུན་ཐུན་མོང་དུ་མིང་ཚིག་བརྗོད་པ་ཐམས་ཅད་ཡི་གེ་ལ་བརྟེན་པའི་ཕྱིར་ཤེས་བྱ་ཀུན་གྱི་གཞིར་གྱུར་པ་ནི་ཡི་གེའི་སྦྱོར་བ་ཡིན་པས་ཐོག་མར་བསླབ་ཅིང་མཁས་པར་ཁོང་དུ་ཆུད་པར་བྱ་བ་གལ་ཆེ་སྟེ། ཐུ་མི་སཾ་བྷོ་ཊས། བསླབ་པ་ཀུན་གྱི་གཞི་འཛིན་ཅིང༌། ། རིག་བྱེད་སྨྲ་བ་རྣམས་ཀྱི་རྒྱུ། ། མིང་ཚིག་བརྗོད་པ་ཀུན་གྱི་གཞི། ། ཡི་གེའི་སྦྱོར་བ་བཤད་པར་བྱ། ། ཞེས་གསུངས་པ་ལྟར་རོ། ། འཇིག་རྟེན་ན་སྐད་རིགས་མི་གཅིག་པ་དང་དེ་མཚུངས་བློའི་རྩལ་གྱིས་བསྐྲུན་པའི་ཡི་གེའི་རིགས་སུ་གྱུར་པའང་(༡༠༤བ)མཐའ་ཡས་པས་བརྗོད་པར་མི་ནུས་ཀྱང་། སྐད་དང་ཡི་གེ་ཐམས་ཅད་ཀྱི་རྩ་བ་ནི། དབྱངས། གསལ་གཉིས་ཡིན་ལ། དེ་ལ། སྒྲ་དང་། གཟུགས་གཉིས་ལས། སྒྲའི་ཁམས་ཙམ་ནི། རྣམ་སྨིན་ལས་སྐྱེས་པ་མིན་པས་བརྗོད་འདོད་ཡོད་ན་འབྱུང་ལ། མེད་ན་མི་འབྱུང་བའི་ཕྱིར་དང༌། རྣམ་སྨིན་སྐྱེས་རྣམས་ནི། འདོད་ཀྱང་མི་འབྱུང་ལ། མི་འདོད་ཀྱང་འབྱུང་བའི་ཕྱིར། དེས་ན་སྒྲ་ནི། རྒྱུ་མཐུན་ནམ། སྐལ་མཉམ་དང་། རྒྱས་བྱུང་བཞིས་བསྐྱེད་པར་བྱེ་སྨྲ་རྣམས་འདོད་དོ། ། རྒྱས་བྱུང་བཞི་ནི། ཟས། གཉིད། ལེགས་སྤྱད། ཏིང་འཛིན་རྣམས་སོ། ། ཇ༢ གཉིས་པ་མཚན་ཉིད་ཞིབ་པར་བཤད་པ་ལ་བདུན། ཉ༡ ངོ་བོ། ཉ༢ ངེས་ཚིག ། ཉ༣ རྣམ་པ། ཉ༤ དབྱེ་བ། ཉ༥ སྦྱོར་ཚུལ། ཉ༦ བཀླག་ཐབས། ཉ༧ འཇུག་པའི་གནས་བརྒྱད་བཤད་པའོ། ། ཉ༡ དང་པོ་ནི། ཡི་གེའི་ངོ་བོ་སྐད་གདངས་མིག་འཛུམ་ཚད། ། གཅིག་གཉིས་གསུམ་ཡུན་ཐུང་རིང་ཤིན་ཏུ་རིང༌། ། ཆ་ཤས་སྐད་ཅིག་རེ་རེ་གཞན་རྣམས་རྒྱུན། ། ལྡན་མིན་འདུ་བྱེད་ཉིད་དུ་མཛོད་ལས་བཤད། ། ཡི་གེའི་ངོ་བོ་ནི། སྐད་ཀྱི་གདངས་འབའ་ཞིག་ཡིན་ཏེ། རྣམ་འགྲེལ་ལས། ཡི་གེ་ཀུན་སློང་ཤེས་པ་ལས། ། སྐྱེ་ལ་ཤེས་པས་སྒྲ་སྐྱེའོ། ། ཞེས་སོ། ། དེའང་བརྗོད་འདོད་དབང་གིས་རླུང་གཡོས། དེ་ལས་ཡི་གེའི་གདངས་སྐྱེ། དེ་ཉིད་མིག་འཛུམ་གྱི་ཚད་གཅིག་དང༌། གཉིས་དང༌། གསུམ་གྱི་ཡུན་ལ་རིམ་པར་ཐུང་ངུ་། རིང་པོ། ཤིན་ཏུ་རིང་པོའི་ཐ་སྙད་སྦྱར་བ་སྟེ། སྔ་མ་ལས། ཡི་གེའི་བདག་ཉིད་ཀུན་མཐའ་ཡང༌། ། མིག་འཛུམ་ཚད་དུ་གནས་པ་ཡིན། ། ཞེས་སོ། ། དེ་ལ་ཡི་གེའི་ཆ་ཤས་ནི་སྐད་ཅིག་རེ་རེ་བ་ཡིན་ལ། གཞན་རྣམས་དེ་ཉིད་འདུས་པའི་རྒྱུན་ཏེ། བྱེ་མདོ་རྣམས་ཤེས་བྱའི་གཞི་རྣམས་ལས་ལྡན་མིན་འདུ་བྱེད་ཉིད་དུ་འདོད་པར་མཛོད་ལས་བཤད་དོ། ། ཉ༢ གཉིས་པ་[ངེས་ཚིག་]ནི། ངེས་ཚིག་རང་བཞིན་འགྱུར་མེད་མིང་ཚིག་གསལ། ། དོན་རྣམས་རྗོད་བྱེད། ཅེས་པ་སྟེ། ཡི་གེའི་ངེས་ཚིག་ནི། ལེགས་སྦྱར་ལ་སྐད་དོད་གསུམ་ཡོད་པའི། ཨཀྵར་ནི། མི་འགྱུར་བ་སྟེ། ཡུལ་སོ་སོའི་སྐད་འགྱུར་ཀྱང་དབྱངས་གསལ་གྱི་རང་(༡༠༥ན)བཞིན་འགྱུར་བ་མེད་པའམ། ཨའམ་ཀ་ལྟ་བུའི་གཟུགས་གཅིག་རྣམ་གྲངས་གཞན་དུ་མི་འགྱུར་བ་དང༌། བྱཉྫན་ནི། གསལ་བྱེད་དེ། མིང་ཚིག་ཐམས་ཅད་གསལ་བར་བྱེད་པ་དང༌། བརྞ་ནི། རྗོད་བྱེད་དེ། དོན་ཐམས་ཅད་རྗོད་པར་བྱེད་པས་སོ། ། ཉ༣ གསུམ་པ་[རྣམ་པ་]ནི། ཡིག་གཟུགས་ལཱཉྫ་སོགས། ། ཞེས་པ་སྟེ། ཡི་གེའི་གཟུགས་ནི། ཚངས་པའི་ཡི་གེ་ལཱཉྫ་ན་སོགས་ཡིག་རིགས་དྲུག་ཅུ་རྩ་བཞི་གཙོ་བོར་གྱུར་པའི་ཡི་གེའི་དབྱེ་བ་མཐའ་ཡས་པ་རྣམས་སོ། ། ཉ༤ བཞི་པ་[དབྱེ་བ་]ལ་གཉིས། ཏ༡ ལེགས་སྦྱར་གྱི་ལུགས། ཏ༢ བོད་སྐད་ཀྱི་ལུགས་སོ། ། ཏ༡ དང་པོ་ནི། དབྱེ་བ་ཐུན་མོང་ཙམ་དུ་འཕགས་ཡུལ་གྱི། ། སྐད་རིགས་བཞི་ཡི་གཙོ་བོ་ལེགས་སྦྱར་ལ། ། དབྱངས་ཡིག་མཚུངས་དང་མཚམས་སྦྱོར་གསལ་བྱེད་ནི། ། སྡེ་པ་མཐར་གནས་དྲོ་བ་རྩ་བ་ཉིད། ། ཨཱ་ལི་བརྒྱ་དང་སོ་གཉིས་ཀཱ་ལི་ལ། ། རྐྱང་པ་སོ་གཉིས་དབྱངས་བཅས་བཞི་སྟོང་དང༌། ། སུམ་བརྒྱ་ང་དྲུག་དེ་དག་གནས་བརྒྱད་དང༌། ། བྱེད་པ་རྩོལ་བ་ཕྱི་ནང་དག་ལས་སྐྱེ། ། ཡི་གེའི་དབྱེ་བ་སྒྲ་མདོ་སོ་སོའི་ལུགས་དང་ཐུན་མོང་མ་ཡིན་པའི་རྒྱུད་སྡེ་ལས་གསུངས་པའི་རྣམ་གཞག་མང་ཡང་ཐུན་མོང་ཙམ་དུ་འཕགས་ཡུལ་གྱི་སྐད་རིགས་ཆེན་པོ་བཞིར་གྲགས་པའི། གཙོ་བོ་ལེགས་པར་སྦྱར་བ་ལ། དབྱངས་དང་། གསལ་བྱེད་གཉིས། དབྱངས་ལ། ཨ་ཨཱ་ནས་ལྀ་ལཱྀའི་བར་མཚུངས་པའི་ཡི་གེ་བཅུ། ཨེ་ཨཻ་ཨོ་ཨཽ་སྟེ། མཚམས་སྦྱོར་གྱི་ཡི་གེ་བཞི་བསྡམས་པས་དབྱངས་བཅུ་དྲུག ། གསལ་བྱེད་ལ་ནི། ཀ་སྡེ་སོགས་སྡེ་པ་ལྔ། ཡ་ར་ལ་ཝ་སྟེ་མཐར་གནས་བཞི། ཤ་སོགས་དྲོ་བའི་ཡི་གེ་བཞི་སྟེ། སུམ་ཅུ་རྩ་གསུམ་དུ་བཤད་པ་ནི་རྩ་བ་ཉིད་ཡིན་ལ། དེ་ལས་འཕྲོས་པའི་དབྱེ་བ་ཙཱནྡྲ་པ་ར་ན། ཨ་ཨི་ཨུ་རྀ་བཞི་ལ། ཐུང་ངུ་། རིང་པོ། ཤིན་ཏུ་རིང་པོ་སྟེ་གསུམ་གསུམ། དེ་དག་རེ་རེ་ལའང་སྐད་གདངས་མཐོ་བས་བརྗོད་པ་ཨུ་དཱཏྟ། དམའ་བས་བརྗོད་པ་ཨ་ནུ་དཱཏྟ། བར་མས་བརྗོད་པ་སྭ་རི་ཏ་གསུམ་གསུམ་སྟེ་སུམ་ཅུ་སོ་དྲུག །དེ་རྣམས་ལ་རྗེས་སུ་སྣ་ལྡན་ཅན་དང་། རྗེས་སུ་སྣ་ལྡན་(༡༠༥བ)མ་ཡིན་པ་གཉིས་གཉིས་ཕྱེ་བས་བདུན་ཅུ་རྩ་གཉིས། མཚམས་སྦྱོར་བཞི་ལ་ཐུང་ངུ་མེད་པས་རིང་པོ་དང་ཤིན་ཏུ་རིང་པོ་གཉིས་གཉིས། ལཾ་ལ་རིང་པོ་མེད་པས་ཐུང་ངུ་དང་ཤིན་ཏུ་རིང་པོ་གཉིས། དེ་དག་ལྔ་པོ་རེ་རེ་ལའང༌། ཨུ་དཱཏྟ། ཨ་ནུ་དཱཏྟ། སྭ་རི་ཏ་དང་གསུམ་གསུམ་དུ་ཕྱེ་བས་སུམ་ཅུ། དེ་རྣམས་སྣ་ལྡན་སུམ་ཅུ། སྣ་མེད་སུམ་ཅུ་དང་བཅས་པས་དྲུག་ཅུ་སྟེ་གོང་དང་བསྡམས་པས་ཨཱ་ལི་ལ་བརྒྱ་དང་སོ་གཉིས། ཀཱ་ལི་ལ་རྐྱང་པ་སུམ་ཅུ་རྩ་གསུམ། དེ་སྟེང་རྣམ་བཅད། ང་རོ། ལྕེ་རྩ་ཅན། མཆུ་ཅན་བཞི་བསྣན་པས་སུམ་ཅུ་སོ་བདུན། རྩ་བའི་གསལ་བྱེད་སོ་གསུམ་ལ། ག་གཅིག་པུ་ལའང་དབྱངས་བརྒྱ་སུམ་ཅུ་སོ་གཉིས་ཞུགས་པ་སྟེ། བསྡམས་པས་གསལ་བྱེད་བཞི་སྟོང་སུམ་བརྒྱ་ང་དྲུག་ཡོད་དོ། ། ཡི་གེ་དེ་རྣམས་ཀྱང་གནས་དང་བྱེད་པ་དང་རྩོལ་བ་རྣམས་ལ་བརྟེན་ནས་སྐྱེ་བ་ལས། གནས་ནི། བྲང་དང་མགྲིན་པ་སྤྱི་བོ་དང༌། ། དེ་བཞིན་ལྕེ་རྩ་དང་ནི་སོ། ། སྣ་དང་མཆུ་དང་རྐན་ཀྱང་སྟེ། ། ཡི་གེའི་གནས་ནི་བརྒྱད་རྣམས་སོ། ། ཞེས་གསུངས་པ་ལྟར། ཨ་དང་ཀ་སྡེ་དང་ཧ་ཡིག་དང་རྣམ་བཅད་རྣམས་མགྲིན་པའི་སྐྱེ་གནས་ཅན་ནོ། ། ཨི་ཨེ་ཨཻ་རྣམས་མགྲིན་པ་དང་རྐན་ནོ། །ཨུ་ཨོ་ཨཽ་རྣམས་མགྲིན་པ་དང་མཆུའོ། །རྀ་དང་ཊ་སྡེ་དང་ར་ཡིག་དང་ཥ་ཡིག་རྣམས་སྤྱི་བོའོ། །ལྕེ་རྩ་ཅན་ནི་ལྕེ་ཡི་རྩ་བའོ། །ལྀ་དང་ཏ་སྡེ་དང་ལ་ཡིག་དང་ས་ཡིག་རྣམས་སོའོ། །རྗེས་སུ་ང་རོ་ནི་སྣའོ། །ད་ཉ་ཎ་ན་མ་རྣམས་ནི་རང་རང་གི་མགྲིན་པ་སོགས་ཀྱི་རྗེས་སུ་སྣའོ། །ཨི་དང་ཙ་སྡེ་དང་ཡ་ཡིག་དང་ཤ་ཡིག་རྣམས་རྐན་ནོ། །ཨུ་དང་པ་སྡེ་དང་མཆུ་ཅན་གྱི་ཡི་གེ་ནི་མཆུའོ། །ཝ་ཡིག་ནི་སོ་དང་མཆུ་དག་གོ། ། འདིར་བྲང་ཞེས་པ་མགྲིན་བྱུང་གི་ཡི་གེ་རྣམས་བྲང་གི་གནས་ལ་ལྟོས་པ་དང༌། ཡི་གེ་གཞན་རྣམས་ཀྱང་མགྲིན་པ་ལ་ལྟོས་ཤིང་། དེ་ཉིད་ཀྱིས་བྲང་གི་གནས་ལ་ལྟོས་དགོས་པར་གྲུབ་པའི་ཕྱིར་བརྗོད་པའོ། ། བྱེད་པ་ལ། ལྕེ་རྩ་ཅན་རྣམས་ཀྱི་བྱེད་པ་ནི་ལྕེའི་(༡༠༦ན)རྩ་བའོ། །རྐང་བྱུང་རྣམས་ཀྱི་བྱེད་པ་ནི་ལྕེའི་དབུས་སོ། །སྤྱི་བྱུང་རྣམས་ཀྱི་ལྕེའི་རྩེ་མོ་དང་ཉེ་བའོ། །སོ་བྱུང་རྣམས་ཀྱི་ལྕེ་རྩེའོ། །ལྷག་མ་རྣམས་ནི་རང་གནས་ཀྱི་བྱེད་པ་ཅན་ནོ། ། རྩོལ་བ་ནི། ནང་དང་། ཕྱི་རོལ་གཉིས་ཏེ། ནང་གི་རྩོལ་བ་ལའང་། བཙུམས་པ་དང༌། ཕྱེ་བ་དང༌། ཕྲད་པ་དང༌། ཅུང་ཟད་ཕྲད་པ་སྟེ་བཞིའོ། ། དེ་ལས་བཙུམས་པའི་རྩོལ་བ་ཅན་ནི། ཨ་ཡིག་གོ། ། ཕྱེ་བ་ནི། དབྱངས་གཞན་རྣམས་དང་དྲོ་བ་རྣམས་སོ། ། འདིར་དྲོ་བ་ཞེས་པ་ནི་འོག་ནས་འཆད་པ་ལྟར་རོ། ། ཕྲད་པ་ནི། སྡེ་པའི་ཡི་གེ་རྣམས་ཏེ་རྩོལ་བ་ཆེན་པོས་བཙིར་ནས་མཐོན་པོར་བརྗོད་པ་རྣམས་སོ། ། ཅུང་ཟད་ཕྲད་པ་ནི། མཐར་གནས་རྣམས་སོ། ། ཕྱིའི་རྩོལ་བ་ལའང༌། སྒྲ་མེད་དང༌། སྲོག་ཆུང་དང༌། སྲོག་ཆེན་དང༌། སྒྲ་ལྡན་དང༌། དྲོ་བ་སྟེ་ལྔ་ལས། སྒྲ་མེད་པ་རྣམས་ནི། སྡེ་པ་རྣམས་ཀྱི་དང་པོ་དང་གཉིས་པ་རྣམས་དང་ཤ་ཥ་ས་རྣམས་དང་ལྕེ་རྩ་ཅན་དང་མཆུ་ཅན་རྣམས་སོ། ། སྲོག་ཆུང་བ་ནི། སྡེ་པ་རྣམས་ཀྱི་དང་པོ་དང་གསུམ་པ་དང་ལྔ་པ་རྣམས་དང་མཐར་གནས་རྣམས་སོ། ། སྲོག་ཆེ་བ་ནི། སྡེ་པ་རྣམས་ཀྱི་གཉིས་པ་དང་བཞི་པ་རྣམས་དང་ཤ་ཥ་ས་ཧ་རྣམས་སོ། ། སྒྲ་ལྡན་ནི། སྡེ་པ་རྣམས་ཀྱི་གསུམ་པ་བཞི་པ་ལྔ་པ་རྣམས་དང་རྗེས་སུ་ང་རོ་ཅན་དང་བཅས་པ་རྣམས་དང་མཐར་གནས་དང་ཧ་ཡིག་རྣམས་སོ། ། དྲོ་བ་ནི། སྡེ་པ་རྣམས་ཀྱི་གཉིས་པ་དང་བཞི་པ་དང་ཤ་ཥ་ས་ཧ་རྣམས་ཏེ། གཞུང་གཞན་དུ། ཤ་ཥ་ས་ཧ་རྣམས་ཁོ་ན་ལ་དྲོ་བའི་ཡི་གེར་བཤད་དོ། ། སྐབས་འདིར། སྔགས་ཀྱི་བཀླག་ཐབས་ཉེ་བར་མཁོ་ཡང་ཚིག་ཉུང་ངུས་དོན་ལེགས་པར་སྟོན་མི་ནུས་པས་དམ་པ་སྔ་མ་རྣམས་ཀྱིས་མཛད་པ་ལས་རྟོགས་པར་བྱ་བ་ཁོ་ནའོ། ། ཏ༢ གཉིས་པ་[བོད་སྐད་ཀྱི་ལུགས་]ནི། བོད་སྐད་ཨཱ་ལི་མཚོན་བྱེད་ཨི་སོགས་བཞི། ། ཀཱ་ལི་སུམ་ཅུར་སྔོན་རྗེས་མིང་གཞི་དབྱེ། ། རྐྱང་འཕུལ་མགོ་ཅན་བརྩེགས་འདོགས་འཇུག་དང་བཅས། ། བོད་སྐད་དང་སྦྱར་བའི་བོད་ཀྱི་ཡི་གེ་ནི་རྩ་བ་ཨཱ་ལི་ཀཱ་ལི་སྟེ་ཨ་ཕྲེང་(༡༠༦བ)ཀ་ཕྲེང་གཉིས། དེ་ལ་ཨཱ་ལིའི་བྱ་བ་གསལ་བར་མཚོན་པར་བྱེད་པ་ཨི་སོགས་ཏེ། གི་གུ་ཞབས་ཀྱུ་འགྲེང་བུ་རྣ་རུ་བཞི། འདི་རྣམས་ཨ་ལ་སྦྱར་བ་ནི་རྐྱང་པ་བརྗོད་དུ་མེད་པས་སོ། ། ཀཱ་ལི་ཀ་ནས་ཨའི་བར་སུམ་ཅུ་ཐམ་པ་ཡོད་ཅིང་། དེ་ལས་ག་ད་བ་མ་འ་སྟེ་སྔོན་འཇུག་ལྔ། ག་ང་ད་ན་བ་མ་འ་ར་ལ་ས་སྟེ་རྗེས་འཇུག་བཅུ། འཕྲོས་མིང་གཞིའི་ཡི་གེ་ཉི་ཤུ་རྣམས་སུ་དབྱེར་ཡོད་ལ། དེའང་སྔོན་འཇུག་རྣམས་ནི་མིང་གི་སྔོན་དུ་འཇུག་ཅིང༌། རྗེས་འཇུག་རྣམས་ནི་རྗེས་ཁོ་ནར་འཇུག་པ་དང༌། མིང་གཞི་རྣམས་ནི་སྔོན་རྗེས་གང་དུའང་མི་འཇུག་པར་འཇུག་པ་རྣམས་ཀྱི་གཞིར་གྱུར་པའོ། ། ཡི་གེ་དེ་དག་མིང་དུ་བསྒྲུབ་པ་ན་རྐྱང་པ་ཁོ་ན་ཡིན་པ་ཀ་བ་ལྟ་བུ། སྔོན་འཇུག་གིས་འཕུལ་བ་མགོ་བོ་ལྟ་བུ་རྐྱང་འཕུལ། དབྱེ་བ་ལྟ་བུ་འདོགས་འཕུལ། བསྒྲུབ་བྱ་ལྟ་བུ་བརྩེགས་འཕུལ་རྣམས་དང༌། ར་ལ་སའི་མགོ་ཅན་གསུམ། ཡི་གེ་གསུམ་རེ་བརྩེགས་པ་སྒྲ་ལྟ་བུ། ཡ་ར་ལ་ཝའི་འདོགས་བཞི། རྗེས་འཇུག་བཅུ་ཞུགས་པ་རྟག་ལྟ་བུ་རྐྱང་འཇུག་དང༌། རྟགས་ལྟ་བུ་ཡང་འཇུག་དང་བཅས་པ་རྣམས་སུ་ཡོད་དོ། ། ཉ༥ ལྔ་པ་[སྦྱོར་ཚུལ་]ནི། རྣམ་དབྱེ་ཕྲད་སོགས་སྦྱོར་བས་དོན་སྟོན་ལ། ། བདག་གཞན་དུས་གསུམ་བྱ་བྱེད་སྒོ་ནས་འཇུག ། མིང་དེ་ལས་ཚིག་ཏུ་སྒྲུབ་པ་ན་སླར་བསྡུ་དང་ལ་དོན་ཨི་ལྡན་སོགས་རྗེས་འཇུག་ལ་ལྟོས་པའི་ཕྲད་རྣམ་དབྱེ་དང་བཅས་པ། དགར་དང་བརྣན་པ་ལ་འཇུག་པའི་ནིའི་སྒྲ་སོགས་ཕྲད་རང་དབང་ཅན་དྲུག་པོ་རྣམས་སྦྱོར་བས་དོན་དང་དོན་གྱི་ཁྱད་པར་སྟོན་པའི་ཚིག་ཏུ་གྲུབ་ལ། སྔོན་རྗེས་ཀྱི་སྦྱོར་བ་རྣམས་ནི་བདག་གཞན་དང་དུས་གསུམ་དང་བྱ་བྱེད་སྟོན་པའི་སྒོ་ནས་འཇུག་གོ། ། དེའང་ཡི་གེ་དུ་མ་འདུས་པ་ལས་མིང༌། མིང་དུ་མ་འདུས་པ་ལས་ཚིག་ཏུ་གྲུབ་སྟེ། དེ་དག་གི་བྱེད་ལས་ཀྱང་། སློབ་དཔོན་བློ་གྲོས་བརྟན་པས། དོན་གྱི་ངོ་བོ་བརྗོད་པ་མིང༌། ། དེ་ཡི་ཁྱད་པར་སྟོན་པ་ཚིག ། གང་ཡང་མི་སྟོན་ཡི་གེའོ། ། ཞེས་གསུངས་ཏེ། དཔེར་ན། བུམ་པ། བ་ལང་ཞེས་པ་ལྟ་བུ་དོན་གྱི་ངོ་བོ་སྟོན་པའི་མིང་། (༡༠༧ན)འདུས་བྱས། མི་རྟག་ཅེས་པ་དང༌། ཟག་བཅས། སྡུག་བསྔལ་ཞེས་པ་ལྟ་བུ་དེའི་ཁྱད་པར་སྟོན་པའི་ཚིག་གོ། ། ཨ་ཨཱ་ཀ་ཁ་ག་གྷ་ང་ཞེས་སོགས་གང་ཡང་མི་སྟོན་པ་ཡི་གེ་ཡིན་ནོ། ། ཚིག་གི་ཆ་ཐར་རྣམ་དབྱེ་དང་ཕྲད་གང་རུང་མ་ཞུགས་པར་དོན་གྱི་ཁྱད་པར་རྫོགས་པར་སྟོན་མི་ནུས་ལ། རྣམ་དབྱེ་ཞེས་པའང་། ལས་དང་བྱེད་པ་སོགས་དོན་དང༌། གཅིག་གཉིས་མང་པོ་སྟེ། ཚིག་གི་རྣམ་གྲངས་རྣམ་པར་དབྱེ་བར་བྱེད་པས་དེར་བརྗོད། དེ་ཡང་རྣམ་དབྱེ་དང་པོ་ངོ་བོ་བརྗོད་པ་ནི། སངས་རྒྱས། ཆོས། ལྷ། བདག་ལྟ་བུ་དོན་གྱི་ངོ་བོ་ཙམ་ལས་ཁྱད་པར་མི་སྟོན་ཅིང་། ལེགས་སྦྱར་ལ་རྣམ་དབྱེ་དང་པོའི་རྐྱེན་སྦྱོར་དུ་ཡོད་ཀྱང་། བོད་སྐད་ལ་རྣམ་དབྱེ་དང་པོ་དང་མིང་རྐྱང་གཉིས་ལ་ཁྱད་པར་མེད་ལ། སངས་རྒྱས་ཞེས་པས་གཅིག་ཚིག །སངས་རྒྱས་དག་ཅེས་པས་གཉིས་ཚིག །སངས་རྒྱས་རྣམས་ཞེས་པས་མང་པོའི་ཚིག་མཚོན་ཏེ་གཞན་ལའང་དེས་འགྲེ་བར་ནུས་སོ། ། གཉིས་པ་ལས་སུ་བྱ་བ་ནི། སངས་རྒྱས་ལ་ཕྱག་འཚལ་ལོ། །རྒྱ་གར་དུ། འགྲོ་ལྟ་བུ། ལ་དང་དུའི་སྒྲས་བྱ་བའི་ཡུལ་མཚོན་པ་དང༌། གསུམ་པ་བྱེད་པ་པོ་ནི། སངས་རྒྱས་ཀྱིས་ཆོས་གསུངས། བདག་གིས་ལས་བྱ་ལྟ་བུ། ཀྱིས་དང་གིས་དག་གིས་བྱེད་པ་པོའི་སྒྲ་མཚོན་པ་དང༌། བཞི་པ་ཆེད་དུ་བྱ་བ་ནི། སློང་མོ་བ་ལ་ཟས་སྦྱིན། ཞིང་ལ་ཆུ་འདྲེན་ལྟ་བུ། བྱ་བ་དེས་ཡུལ་དེ་ལ་ཕན་འདོགས་པ་ལའི་སྒྲས་གོ་བ་དང༌། ལྔ་པ་འབྱུང་ཁུངས་སམ་གང་ལས་འབྲེལ་བ་ནི། སངས་རྒྱས་ལས་ཆོས། རྒྱ་མཚོ་ནས་རིན་པོ་ཆེ་ལྟ་བུ། དངོས་པོ་དེ་བྱུང་བའི་ཁུངས་ནི་ལས་ནས་ཀྱི་སྒྲས་མཚོན་པ་དང༌། དྲུག་པ་འབྲེལ་བ་ནི། སངས་རྒྱས་ཀྱི་སྐུ། སེམས་ཅན་གྱི་ཁམས་ལྟ་བུ། ཕན་ཚུན་རྟེན་བརྟེན་པ་སོགས་སུ་འབྲེལ་བའི་དོན་ནི་ཀྱི་དང་གྱི་སྒྲས་སྟོན་པ་དང༌། བདུན་པ་གནས་གཞི་ནི། བརྟན་པར་བཞུགས། ཁྱིམ་དུ་མི་ལྟ་བུ། གནས་པའམ་རྟེན་པའི་གཞི། ར་དང་དུའི་སྒྲས་མཚོན་པའོ། ། དེ་ལ། གཉིས་པ། བཞི་པ། བདུན་པ་རྣམས་མཚོན་བྱེད་ཀྱི་སྒྲ་ནི་(༡༠༧བ)ལ་དོན་དྲུག་ཅེས་བྱ་སྟེ། ལ་ན་ཏུ་དུ་སུ་རུ་རྣམས་དང༌། བྱེད་སྒྲ་ནི། ཀྱིས་གྱིས་གིས་ཡིས་འིས་ལྔ། འབྱུང་ཁུངས་ཀྱི་སྒྲ་ནི། ལས་ནས། འབྲེལ་སྒྲ་ནི། ཀྱི་གྱི་གི་ཡི་འི་རྣམས་སོ། ། དེ་དག་ལས་སྐབས་རེར་རྣམ་དབྱེའི་དོན་མི་སྟོན་པར་ཕྲད་ཙམ་ལ་འཇུག་པའང་ཡོད་ཅིང༌། སླར་བསྡུའི་གོ་ངོ་སོགས་སྦྱོར་ཡུལ་ལ་ལྟོས་པའི་ཕྲད་རྣམས་སྦྱོར་ཚུལ་དང་བཅས་དཔེར་བརྗོད་པ་ནི། དག་ལ་གསལ་ན་ལེགས་མོད་ཀྱི། ། བསྟན་གྱི་འཇུག་གི་འཆད་བྱ་ཡི། ། མཁས་པར་བྱས་ནས་ཚུལ་བརྟག་གོ། ། བྱ་བ་བཟང་ངོ་ལེགས་བཀོད་དོ། ། འབྱོན་ནོ་གྲུབ་བོ་དོན་བསམ་མོ། ། བྱའོ་ཕྱིར་རོ་ལྷ་རྒྱལ་ལོ། ། བལྟས་སོ་བསྟན་ནོ་ལྷ་ཆོས་པ། ། སྒྲུབ་བོ་དགའ་འོ་གསར་མ་པ། ། ཤམ་རྙོག་མི་ལྟུང་དགེ་བ་ཅན། ། ད་ནི་ཅི་ཕྱིར་ཀྱེ་ཀྱེ་བུ། ། ཀྭ་ཡེ་གྲོགས་དག་བགྲོད་ཅིང་མཆིས། ། བདེ་ཞིང་དགྱེས་ཞེས་ཡོད་ཅེས་ཐོས། ། གསལ་ཞེས་མཛེས་ཞེས་ཞད་ཅིག་གདའ། ། ནམ་ཞིག་གྲོས་ཤིག་གདབ་ཅེའོ། ། སུ་ཡོད་ཅེ་ན་གང་ཞེ་ན། ། མ་བྱས་ཞེ་ན་བྱོས་ཤིག་གུ། ། འཁོད་ཀྱང་འགྲོ་བཟང་དྲན་ན་ཡང༌། རྒྱུག་གམ་འདོང་ངམ་བསྡོད་དམ་ཅི། ། མདུན་ནམ་རྒྱབ་བམ་ལེགས་བསམ་མམ། ། བྱའམ་འཆར་རམ་ཅིང་ཐལ་ལམ། ། རྒྱས་སམ་དེ་དག་དཔལ་འབྱོར་རྣམས། ། མཁས་ཏེ་འཆད་དེ་ཀུན་ཆུབ་སྟེ། ། ཇི་སྙེད་བདེ་དང་ལྡན་ནོ་ལོ། ། ལྟ་བུ་དང༌། ཡང་སྦྱར་ཡུལ་ལ་མི་ལྟོས་པར་ཡང་རང་ཉིད་ཀྱི་བརྗོད་དོན་གསལ་བར་མཚོན་པ་ཅན་གྱི་འཕྲད་ནི། གང༌། ཅི། དེ། འདི། སུ། ཡང༌། ནམ། སླར། འོ་ན། ལ་ལ། ཇི། ཞེས་པ་ལྟ་བུ་ཕྲད་རྐྱང་པ་རྣམས་དང༌། ཕྲད་གཉིས་གསུམ་སོགས་འདུས་པ། གང་དག །