Tibetan
དེ་དག །གང་རྣམས། དེ་རྣམས། ཇི་སྙེད། དེ་སྙེད། ཅི་ནས་ཀྱང་ལྟ་བུ་མང་པོ་རྣམས་སོ། ། ཡང་ལས་གང་ཞིག་བྱེད་པོ་གཞན་དང་དངོས་སུ་འབྲེལ་བའི་དབང་དུ་བྱས་ནས་བྱེད་པ་པོའི་དངོས་པོ་དེ་ཉིད་དང་དེའི་བྱེད་པ་དང་བཅས་པ་ལ་ནི་བདག་ཅེས་བྱ་ཞིང༌། དེས་བསྐུལ་བར་བྱ་བའི་(༡༠༨ན)ཡུལ་གྱི་དངོས་པོ་བྱ་བ་དང་བཅས་པ་ལ་ནི་གཞན་ཞེས་བྱའོ། ། དེ་བཞིན་དུ་བྱེད་པ་པོ་གཞན་དང་དངོས་སུ་འབྲེལ་མ་འབྲེལ་ཇི་ལྟར་ཡང་རུང་བྱ་བ་བྱས་ཟིན་པ་ནི་དུས་འདས་པ་དང༌། བྱ་བ་བྱེད་པར་འགྱུར་བ་ནི་དུས་མ་འོངས་པ་དང༌། བྱ་བ་བྱེད་བཞིན་པ་ནི་དུས་ད་ལྟ་བ་ཡིན་ནོ། །གཞན་དུ་བྱེད་པའི་ལས་དང་བྱ་བའི་ལས་ཞེས་ལས་ཀྱི་ཚིག་ལ་གཉིས་སུ་དབྱེ་བའང་དབྱེ་བ་དེ་དག་ཏུ་འདུས་ཏེ། དུས་གསུམ་གྱི་དབང་གིས་བྱེད་པའི་ལས་ནི་དུས་ད་ལྟ་བ་དང༌། བྱ་བའི་ལས་ནི་དུས་མ་འོངས་པར་འདུ་ཞིང་། བདག་གཞན་གྱི་དབང་གིས་བྱེད་པ་པོ་གཞན་དང་དངོས་སུ་འབྲེལ་བའི་བྱེད་པ་བདག་དང་བྱ་བ་གཞན་ཡིན་པར་བཤད་མ་ཐག་པ་ལྟར་རོ། ། དེས་ན། དུས་གསུམ་གྱི་དབྱེ་བས་ནི་བྱེད་ལས་དང་འབྲེལ་བའི་ངག་གི་སྦྱོར་བ་ཐམས་ཅད་ལ་ཁྱབ་ཅིང༌། བདག་གཞན་གྱི་དབྱེ་བས་ནི་དེ་ཙམ་དུ་ཁྱབ་པ་མ་ཡིན་ཀྱང༌། བྱེད་པ་པོ་དང་བྱ་བའི་ཡུལ་གྱི་སྒྲ་རྣམས་བསྡུ་བའི་ཕྱིར་བདག་གཞན་གྱི་དབྱེ་བ་ཟུར་དུ་བྱུང་བ་ཡིན་ནོ། ། དེ་ལ་བྱེད་པ་པོ་བདག་གི་དངོས་པོའི་སྒྲ་ནི། སྒྲུབ་པ་པོ། སྟོན་པ་པོ། སྒྲུབ་བྱེད། སྟོན་བྱེད་ལྟ་བུ། དེའི་བྱེད་པའི་ཚིག་གསལ་བར་བྱེད་པ་ནི། སྒྲུབ་པར་བྱེད་པ། སྟོན་པར་བྱེད་པ། སྒྲུབ་བོ། སྟོན་ནོ་ལྟ་བུ། བྱ་བའི་ཡུལ་གཞན་གྱི་དངོས་པོའི་སྒྲ་ནི། སྒྲུབ་པར་བྱ་བ། བསྟན་པར་བྱ་བ། བསྒྲུབ་བྱ། བསྟན་བྱ་ལྟ་བུ། དེའི་བྱ་བའི་ཚིག་ནི། བསྒྲུབ་པར་བྱ། བསྟན་པར་བྱ། བསྒྲུབ་བོ། བསྟན་ནོ་ལྟ་བུ་དང༌། དེར་མ་འདུས་པ་དུས་གསུམ་ལས། འདས་པའི་སྒྲ་ནི། བསྒྲུབས། བསྟན། གྲུབ་ལྟ་བུ། ད་ལྟ་བའི་སྒྲ་ནི། སྒྲུབ་བཞིན་པ། སྟོན་བཞིན་པ། འགྲུབ་པར་བྱེད་པ། འཆད་པར་བྱེད་ལྟ་བུ། མ་འོངས་པའི་སྒྲ་ནི། འགྲུབ་པར་འགྱུར། འཆད་པར་འགྱུར། འགྲུབ་བོ། འཆད་དོ། འགྲུབ་པར་བྱ། འཆད་པར་བྱ་ལྟ་བུ་མང་པོ་རྣམས་སོ། ། དེ་ལ་ལྕགས་གསེར་དུ་བསྒྱུར་ལྟ་བུ། བྱེད་པ་པོ་དང་དངོས་སུ་འབྲེལ་བ་དང༌། ལྕགས་གསེར་དུ་གྱུར་ལྟ་བུ། བྱེད་པ་པོ་དང་དངོས་སུ་མ་འབྲེལ་(༡༠༨བ)བའོ། ། ཉ༦ དྲུག་པ་[བཀླག་ཐབས་]ནི། ཐོག་མར་ང་རོ་ཕྱིས་ནས་སྦྱོར་ཀློག་སྦྱང༌། ། གནས་དང་བྱེད་རྩོལ་རང་མཐུན་དབྱུང་ཞིང་བརྗོད། ། བྱང་ནས་གང་ལ་གང་གིས་ཇི་ལྟ་བུར། ། ཅི་ལྟར་འཇུག་སོགས་ཐུ་མིའི་གཞུང་བཟང་བསླབ། ། བརྗོད་པའི་ཕྱི་མོ་སངས་རྒྱས་ཕྲིན་ལས་སོ། ། བསླབ་ཚུལ་གྱི་གོ་རིམ་ཡང་ཐོག་མར་ང་རོ་ལ་སྦྱང་བར་བྱ་སྟེ། ང་རོ་ཞེས་པ་སྒྲ་ཙམ་ལ་འཇུག་པས་ཡི་གེ་རྐྱང་པ་རྣམས་རང་རང་གི་སྐྱེ་གནས་དང་མཐུན་པ་དང༌། དབྱངས་ལྡན་རྣམས་ཀྱང་སོ་སོའི་ང་རོ་དབྱུང་ཚུལ་བཅས་ཡི་གེ་རེ་རེ་ནས་ཀློག་པའི་སྒྲ་གདངས་ལ་སྦྱང་བར་བྱ་ཞིང༌། དེ་ལ་གོམས་ནས་སྔོན་རྗེས་མིང་གཞི་གསུམ་ཚེགས་བར་གཅིག་ཏུ་སྦྱོར་བའི་ཀློག་ཚུལ་སྦྱང༌། དེ་དག་ཀྱང་གོང་སྨོས་ལེགས་སྦྱར་གྱི་རིགས་འགྲེས་ཏེ་སོ་སོའི་སྐྱེ་གནས་བྱེད་པ། ཕྱི་ནང་གི་རྩོལ་བ་རང་རང་དང་མཐུན་པར་དབྱུང་ཞིང་བརྗོད་དེ། ཞིབ་པར་རྗེ་བཙུན་བསོད་ནམས་རྩེ་མོའི་གསུང་རབ་སོགས་ལས་རྟོགས་པར་བྱའོ། ། ཀློག་ལེགས་པར་བྱང་ནས་སྔོན་རྗེས་ཀྱི་འཇུག་པ་རྣམས་ཡུལ་གང་ལ་འཇུག །འཇུག་པོ་གང་གིས་འཇུག །ཚུལ་ཇི་ལྟར་འཇུག །དགོས་པ་ཅིའི་ཕྱིར་འཇུག་པ་ལ་སོགས་པའི་རྣམ་བཞག་ཞིབ་མོ་ཐུ་མི་སཾ་བྷོ་ཊའི་གཞུང་བཟང་སུམ་ཅུ་པ་དང་རྟགས་ཀྱི་འཇུག་པ་ལ་བསླབ་པར་བྱ་སྟེ། གཞུང་འདི་ནི་གངས་ཅན་གྱི་ལྗོངས་འདིར་བརྗོད་པ་ཐམས་ཅད་འབྱུང་བའི་ཕྱི་མོའམ་རྩ་བ་སངས་རྒྱས་ཀྱི་ཕྲིན་ལས་སུ་གྲུབ་པ་ཡིན་གྱི། གང་ཟག་གི་བློས་རྣམ་པར་བརྟག་པ་ཙམ་ནི་མ་ཡིན་ནོ། ། ཉ༧ བདུན་པ་[འཇུག་པའི་གནས་བརྒྱད་བཤད་པ་]ནི། ཀུན་ཀྱང་ཟིན་པའི་སྒྲ་དང་ཡུལ་གྱི་སྐད། ། ངོ་བོའི་མིང་དང་མཚོན་བྱེད་མཚན་མ་སྟེ། ། གོ་བྱེད་བརྡ་དང་ཐ་སྙད་ཤེས་བརྗོད་འཇུག ། ཚིག་དོན་གནས་བརྒྱད་སྒྲ་དོན་འདྲེས་འཛིན་བློ། ། དོན་དམིགས་སྒྲ་བྱུང་མཐུན་སྣང་ཐུན་མོང་གྲགས། ། མངོན་ཞེན་རིམ་པའི་ཆོས་ལྔ་ལྡན་པར་སྐྱེ། ། ཡི་གེས་དོན་སྟོན་པར་བྱེད་པ་ཀུན་ཀྱང་འཇུག་པའི་གནས་བརྒྱད་ལ་བརྟེན་པ་(༡༠༩ན)ཡིན་ཏེ། བརྒྱད་ནི། སྒྲ་དང་སྐད། མིང་དང་མཚན་མ། བརྡ་དང་ཐ་སྙད། ཚིག་དང་དོན་རྣམས་སོ། ། དེ་ལ་སྒྲ་ནི། འདིར་ཟིན་པའི་སྒྲ་སེམས་ཅན་དུ་སྟོན་ཅིང་ལུང་སྟོན་པའོ། ། སྐད་ནི། འཕགས་བོད་རྒྱ་ནག་ལ་སོགས་པ་རང་རང་གི་ཡུལ་གྱི་བརྡ་གོ་བར་བྱེད་པའོ། ། མིང་ནི། ངོ་བོ་ཉིད་ཀྱི་ཚིག་བླ་དྭགས། ཆོས་མངོན་པའི་ལུགས་ཀྱི་ཡི་གེ་འདུས་པའི་བདག་ཉིད་ཅན་དང༌། བརྡ་སྤྲོད་པའི་ལུགས་ཀྱི་རྣམ་དབྱེའི་མཐའ་ཅན། བུམ་པ། སེང་གེ་ལ་སོགས་པ་བརྗོད་པ་དེས་དོན་ལ་བློ་གཞོལ་བར་བྱེད་པས་ནཱ་མ་སྟེ་མིང་ཞེས་བྱ་ལ། དོན་དེ་མཚོན་པར་བྱེད་ཅིང་སྣང་བར་ནུས་པའི་ཆ་ནས་མཚན་མ་ཞེས་བྱའོ། ། བརྡ་ནི། དོན་དེ་ལ་ཐ་སྙད་བྱ་བའི་ཕྱིར་ཐོག་མར་མིང་དུ་བཏགས་པ་སྟེ། གོ་བར་བྱེད་པ་དང་སྨྲ་བར་བྱེད་པའི་དུས་ཅན་ནོ། ། ཐ་སྙད་ནི། འཇུག་པར་བྱེད་པའི་བདག་ཉིད་ཤེས་བརྗོད་འཇུག་གསུམ་གྱི་རང་བཞིན་ཅན་ཏེ། དེའང་འདི་ཀ་བ་ཡིན་ནོ་སྙམ་པའི་ཤེས་པ་ནི་བཏགས་པའི་ཤེས་པ་དང༌། ཀ་བ་ཞེས་པའི་སྒྲར་བརྗོད་པ་ནི་བརྗོད་པ་དང༌། ཀ་བ་ཡིན་པས་ཁང་ཁྱིམ་བྱེད་པར་རྩོམ་པ་ནི་འཇུག་པ་སྟེ། སྤྱི་དངོས་ལ་མེད་ཀྱང་འཇུག་ལྡོག་བྱེད་པའི་ཕྱིར་ནན་གྱིས་བཏགས་པ་སྟེ། གདུང་འདེགས་ཀྱི་ཤིང་ལ་ཀ་བ་ཞེས་བཏགས་པ་ལྟ་བུའོ། ། དེ་དག་ཀྱང་དོན་དེའི་ངོ་བོ་ཙམ་བརྗོད་པའི་ཆ་ནས་མིང་དང༌། དོན་དེ་མཚོན་པར་བྱེད་པས་མཚན་མ་ཐ་སྙད་ཀྱི་ཕྱིར་སྔར་མེད་པ་ལ་གློ་བུར་དུ་འདོད་པས་སྦྱར་བ་བརྡ་དང༌། དེ་ཉིད་འཇུག་ལྡོག་བྱེད་པའི་ཕྱིར་བརྗོད་པས་ཐ་སྙད་དོ། ། ཚིག་ནི། ཆོས་མངོན་པའི་ལུགས་ཀྱིས། མིང་འདུས་ནས་དོན་གྱི་ཁྱད་པར་བརྗོད་པ་སྟེ། འདུས་བྱས། མི་རྟག་ཅེས་པ་ལ་སོགས་པ་ལྟ་བུའོ། ། བརྡ་སྤྲོད་པའི་ལུགས་ཀྱིས་རྣམ་དབྱེ་ཏིངྲ་སུ་པྲ་གང་རུང་གི་མཐའ་ཅན་དོན་གྱི་ངོ་བོ་དང་ཁྱད་པར་ཅི་རིགས་པ་བརྗོད་པའོ། ། དོན་ནི། ཆོས་རྣམས་ཀྱི་གནས་ལུགས་ཇི་ལྟར་གནས་པ་ཉིད་དོ། ། དེ་ལྟར་གནས་བརྒྱད་པོ་དེ་དག་ལ་ཡི་གེ་དག་ཇི་ལྟར་འཇུག་ན། སྒྲ་(༡༠༩བ)དང་དོན་གཅིག་ཏུ་བསྲེས་ནས་འཛིན་པའི་བློའི་དབང་གིས་འཇུག་སྟེ། བློ་དེ་སྐྱེ་བ་ལ་ཡང༌། བརྡ་བྱེད་པའི་དུས་ན་ཤེས་པ་གཞན་ལས་ཁྱད་པར་དུ་བྱེད་པའི་ཆོས་ལྔ་དང་ལྡན་པ་དགོས་ཏེ། དོན་ལ་དམིགས་པ་དང༌། སྒྲ་ལས་བྱུང་བ་དང༌། མཐུན་པར་སྣང་བ་དང༌། ཐུན་མོང་དུ་གྲགས་པ་དང༌། མངོན་པར་ཞེན་པ་རྣམས་སོ། ། དེ་དག་སོ་སོའི་ནུས་པ་ཡང༌། དོན་ལ་དམིགས་པས་ནི་དོན་སྤྱིའི་ནུས་པ་སྐྱེད་པར་བྱེད་དོ། ། སྒྲ་ལས་བྱུང་བ་ནི་སྒྲ་སྤྱིའི་རྣམ་པ་སྐྱེད་པར་བྱེད་དོ། ། མཐུན་པར་སྣང་བ་དང༌ཐུན་མོང་དུ་གྲགས་པས་ནི་ཞེན་པ་སྐྱེ་ཞིང་གཞན་ལ་གོ་བར་ནུས་སོ། ། མངོན་པར་ཞེན་པས་ནི་མིང་དང་མིང་ཅན་འབྲེལ་བར་བྱེད་དོ། ། དེ་ལྟར་རིམ་པར་སྐྱེ་བའི་ཆོས་དང་ལྡན་པ་ལས་མིང་ལ་སོགས་པ་སྐྱེ་བ་དང༌། མངོན་པར་ཞེན་པའི་རིམ་པ་ལའང་བཞི་ལ་སོགས་པ་དབྱེ་བའི་ཚུལ་ཞིབ་མོ་ནི་གནས་བརྒྱད་རྩ་འགྲེལ་སོགས་ལས་རྟོགས་པར་བྱའོ། ། ཆ༢ གཉིས་པ་ཐུན་མོང་རིག་པའི་གནས་རྣམས་བཤད་པ་ལ་གཉིས། ཇ༡ དགོས་འབྲེལ་གྱིས་མཚམས་སྦྱར་བ། ཇ༢ རིག་གནས་དངོས་བཤད་པའོ། ། ཇ༡ དང་པོ་ནི། རྒྱལ་བའི་སྲས་ཀྱིས་མི་བསླབ་ཤེས་བྱའི་གནས། ། མ་མཆིས་དེ་བས་ཚར་གཅོད་རྗེས་བཟུང་དང༌། ། ཀུན་ཤེས་བྱ་ཕྱིར་རིག་པའི་གནས་ལ་བསླབ། ། ཐེག་ཆེན་གྱི་ལམ་ཞུགས་རྒྱལ་བའི་སྲས་པོ་རྣམས་ཆོས་འཚོལ་གྱི་སྐབས་སུ་རིག་པའི་གནས་ལྔ་སོགས་མི་བསླབ་པའི་ཤེས་བྱའི་གནས་ཅིའང་མ་མཆིས་ཏེ་ཐམས་ཅད་མཁྱེན་པའི་གོ་འཕང་བསྒྲུབ་པ་ན་རྒྱུ་དང་འདྲ་བའི་འབྲས་བུ་འབྱུང་བའི་ཕྱིར། བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས། རྒྱལ་སྲས་རྣམས་ཀྱིས་མི་བསླབ་པའི། ། དངོས་དེ་གང་ཡང་ཡོད་མ་ཡིན། ། དེ་ལྟར་གནས་པའི་མཁས་པ་ལ། ། བསོད་ནམས་མི་འགྱུར་གང་ཡང་མེད། ། ཅེས་དང༌། ཀླུ་སྒྲུབ་ཞབས་ཀྱིས། དེ་འདྲའི་ས་བོན་ཐམས་ཅད་ལས། ། རྒྱུ་དང་འདྲ་བའི་འབྲས་བུ་འབྱུང༌། ། ས་བོན་མེད་པར་འབྲས་ཡོད་པ། ། ཤེས་ལྡན་གང་གིས་བསྒྲུབ་པར་ནུས། ། ཞེས་(༡༡༠ན)རྒྱུ་རིགས་འདྲ་བས་འབྲས་བུ་རིགས་འདྲ་འབྱུང་བའི་ཚུལ་འདི་ནི་འཇིག་རྟེན་པའི་ལུགས་དང་ཡང་མཐུན་ལ། དེ་བས་ན་ཤེས་བྱ་ཀུན་ལ་བློ་སྦྱང་དགོས་པར་གྲུབ། དེའི་ཡང་ཐོག་མར་ཀླུ་སྒྲུབ་ཞབས་ཀྱིས། ཐ་སྙད་ལ་ནི་མ་བརྟེན་པར། ། དམ་པའི་དོན་ནི་བསྟན་མི་ནུས། ། དམ་པའི་དོན་ནི་མ་རྟོགས་པར། ། མྱ་ངན་འདས་པ་ཐོབ་མི་འགྱུར། ། ཞེས་དོན་དམ་པའི་གནས་ལུགས་རྟོགས་པར་བྱེད་པའང་ཐ་སྙད་ལ་བརྟེན་དགོས་ཤིང༌། དེའི་གནས་ཐམས་ཅད་བསྡུ་ན་རིག་པའི་གནས་བཅུ་ལ་འདུ་ཞིང༌། དེའང་རིག་གནས་ཆུང་བ་ལྔ་པོ་སྒྲ་ལ་སོགས་པའི་ཡན་ལག་ཡིན་པས་གཙོ་བོར་རིག་པའི་གནས་ལྔ་དང༌། དེ་ཡང༌། སྒྲ་དང་ཚད་མའི་ཚིག་དོན་ལ་འཁྲུལ་པ་ཚར་གཅོད། བཟོ་དང་གསོ་བས་གདུལ་བྱ་སྤྱི་དང་བྱེ་བྲག་རྗེས་སུ་འཛིན། ནང་དོན་རིག་པས་བདག་ཉིད་ཀུན་མཁྱེན་བསྒྲུབ་པའི་ལམ་གྱི་རྣམ་པ་ཀུན་ཤེས་པར་བྱེད་པས་ན། ཚར་བཅད། རྗེས་འཛིན། ཀུན་མཁྱེན་གྱི་རིག་གནས་གསུམ་དུའང་འདུས་པས་དེ་དག་ལ་བསླབ་པར་བྱ་སྟེ། མདོ་ལས། བྱང་ཆུབ་སེམས་དཔའ་རིག་པའི་དངོས་པོ་ལྔ་མ་བསླབ་ན་ནི་ནམ་དུའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐམས་ཅད་མཁྱེན་པའི་ཡེ་ཤེས་ཐོབ་པར་མི་ནུས་སོ། ། དེ་བས་ན་བླ་ན་མེད་པའི་བྱང་ཆུབ་ཐོབ་པར་བྱ་བའི་ཕྱིར་རིག་པའི་དངོས་པོ་ལྔ་བསླབས་པར་བྱའོ་ཞེས་དང༌། རྒྱལ་ཚབ་མ་ཕམ་པས། རིག་པའི་གནས་ལྔ་དག་ལ་བརྩོན་པར་མ་བྱས་ན། ། འཕགས་མཆོག་གིས་ཀྱང་ཐམས་ཅད་མཁྱེན་ཉིད་འཐོབ་མི་འགྱུར། ། དེ་བས་གཞན་དག་ཚར་བཅད་རྗེས་སུ་བཟུང་ཕྱིར་དང༌། ། བདག་ཉིད་ཀུན་ཤེས་བྱ་ཕྱིར་དེ་ལ་དེ་བརྩོན་བྱ། ། ཞེས་གསུངས་སོ། ། ཇ༢ གཉིས་པ་རིག་གནས་དངོས་བཤད་པ་ལ་གཉིས། ཉ༡ རིག་ལམ་ཆེ་བ་དང༌། ཉ༢ ཆུང་བའོ། ། ཉ༡ དང་པོ་ལ་བཞི། ཏ༡ སྒྲ། ཏ༢ ཚད་མ། ཏ༣ བཟོ། ཏ༤ གསོ་བ་རིག་པའོ། ། ཏ༡ དང་པོ་ལ་གསུམ། ཐ༡ མདོར་བསྟན། ཐ༢ རྒྱས་བཤད། ཐ༣ དོན་བསྡུའོ། ། ཐ༡ དང་པོ་ནི། (༡༡༠བ) ཚིག་གི་འཁྲུལ་པ་སེལ་བྱེད་བརྡ་སྤྲོད་ནི། ། རང་བཞིན་རྐྱེན་དང་རྣམ་འགྱུར་གསུམ་དུ་འདུ། ། རྗོད་བྱེད་ཚིག་གི་འཁྲུལ་པ་ཚར་གཅོད་ཅིང་སེལ་བར་བྱེད་པ་བརྡ་སྤྲོད་པའི་རིག་པ་ནི། རང་བཞིན་དང༌། རྐྱེན་དང༌། རྣམ་འགྱུར་གསུམ་དུ་འདུའོ། ། ཐ༢ གཉིས་པ་ལ་གསུམ། ད༡ རང་བཞིན། ད༢ རྐྱེན། ད༣ རྣམ་འགྱུར་རྣམས་སོ་སོར་བཤད་པའོ། ། ད༡ དེའི་དང་པོ་ལའང་གཉིས། ན༡ བྱིངས་ཀྱི་རང་བཞིན། ན༢ མིང་གི་རང་བཞིན་ནོ། ། ན༡ དང་པོ་ནི། རང་བཞིན་བྱིངས་ལ་དྲུག་སྟེ་བཀླགས་མ་བཀླགས། ། གཉིས་ལྡན་མིང་རྐྱེན་གཉིས་ཀའི་བྱིངས་རྣམས་ཏེ། ། བསྡུ་ན་ལས་བཅས་ལས་མེད་གཉིས་སུ་འདུ། ། རྐྱེན་སོགས་ཀྱིས་བསྒྲུབ་པར་བྱ་བའི་གཞི་ནི་རང་བཞིན་ཏེ། དེ་ལའང་། དངོས་དང་། བཏགས་པ་བ་གཉིས་ལས། ཁམས་སམ་བྱིངས་ནི་སྒྲའི་བསྒྲུབ་གཞི་དངོས་ཡིན་ལ། དེ་ལའང་ནང་གསེས་སུ་དབྱེ་ན་དྲུག་ཡོད་དེ། བྱིངས་མདོ་ལེའུ་དགུའི་ནང་དུ་བསྟན་པའི། བྷུ་ཡོད་པ་ལའོ། །ཙི་ཏཱི་སེམས་པར་བྱེད་པ་ལའོ། །ཞེས་སོགས་ནི་ཡོངས་སུ་བཀླགས་པའི་བྱིངས། ཨ་དོ་ལ་ཡ་ཏི་ལ་སོགས་པ་མདོ་འགྲེལ་གང་དུའང་མེད་པ་འཇིག་རྟེན་གྱི་ཉེར་སྤྱོད་ལ་གྲགས་པ་ནི་ཡོངས་སུ་མ་བཀླགས་པའི་བྱིངས། ཛུ་དང་སྐ་ལ་སོགས་པ་མདོ་དང་རྒྱ་འགྲེལ་གྱི་ཟུར་ནས་ཐོན་ཅིང་བྱིངས་ཀྱི་ཚོགས་སུ་མ་བཀླགས་པ་ནི་མདོའི་བྱིངས་སམ་གཉིས་ཀ་ལྡན་པས་ཡོངས་སུ་བཀླགས་ཤིང་མ་བཀླགས་པའི་བྱིངས། སནྲ་ལ་སོགས་པ་ལས་ཡ་ཀྲའི་རྐྱེན་སྦྱོར་བའི་ཡུལ་ཀཎྜཱུ་ལ་སོགས་པ་ཉི་ཤུ་པོ་རྣམས་ནི་མིང་ཡང་ཡིན་ཏེ་ཀཎྜཱུ་ལུས་གཡའ་བའི་སྐད་དོན་ཡིན་ལ། བྱིངས་ཀྱང་ཡིན་ཏེ། སླར་ཡ་ཀྲའི་རྐྱེན་འཇུག་པའི་ཕྱིར་མིང་གི་བྱིངས། བྱིངས་གང་ཡང་རུང་བ་ལ་སནྲ་ལ་སོགས་པའི་རྐྱེན་བཅུ་གཉིས་གང་རུང་སྦྱར་བས། དེའི་མཐའ་ཡང་བྱིངས་ཉིད་དུ་འགྱུར་བ་ནི་རྐྱེན་གྱི་བྱིངས། ཡོངས་སུ་བཀླགས་པའི་བྱིངས་ལས་མིང་དུ་བསྒྲུབ་པའི་ཕྱིར་རམ། མིང་རྣམས་ལས་ཀྱང་བྱིངས་ཉིད་དུ་བསྒྲུབ་པའི་ཕྱིར་ཀྭི་པྲ་ལ་སོགས་པའི་རྐྱེན་ཕྱིས་པའི་མཐའ་རྣམས་མིང་དང་རྐྱེན་(༡༡༡ན)མཐའ་གཉིས་ཀའང་ཡིན་ལ། སླར་ཀུན་བཤད་ཀྱི་སྒྲུབ་པའང་འཇུག་པའི་ཕྱིར་དེ་ལ་ལྟོས་ནས་བྱིངས་སུའང་འགྱུར་བས་རྐྱེན་དང་མིང་གི་བྱིངས་རྣམས་ཏེ་དེ་ལྟར་དྲུག་གོ། ། དེ་དག་ཀྱང་བསྡུ་ན། ལས་བཅས། ལས་མེད་གཉིས་སུ་འདུ་སྟེ། དེའང་པུཉྫ་རཱ་ཛར། རྟོག་པ་ཤེས་པ་མཐོང་ཐོས་ཚེ། ། བཟའ་བ་དང་ནི་འཁྲིག་པ་དང༌། ། བྱེད་པ་འཚོང་བ་འཛིན་དང་རྐུ། ། སྦྱིན་པ་མཆོད་པ་འདོད་དང་རེག ། དུང་པ་བསྟོད་པ་ཆགས་དང་བཟོད། ། གསོ་བ་སེམས་པ་འགྲོ་འགོག་སོགས། ། སྨྲ་བ་གསོད་པ་ལ་སོགས་ལས། ། བརྗོད་པས་ལས་དང་བཅས་པར་ཤེས། ། ཞེས་གསུངས་པ་ལྟར། བྱིངས་གང་ཞིག་རྟོག་པ་དང་ཤེས་པ་དང་མཐོང་བ་དང་ཐོས་པ་ལ་སོགས་པ་ལྟ་བུ་བྱ་བ་དང་ལྡན་པ། བྱ་བ་དེའི་ཡུལ་ལ་རྣམ་དབྱེ་གཉིས་པ་ལས་ཀྱི་རྣམ་དབྱེ་འཇུག་དགོས་པའི་ཕྱིར་བྱེད་པ་དང་བཅས་པ་ནི་ལས་བཅས་ཡིན་ལ། མཚོ་ལྡན་མའི་རབ་བྱེད་ལས། ངོ་ཚ་ཡོད་དང་གནས་མེལ་ཚེ། ། འཕེལ་ཟད་འཇིགས་དང་འཚོ་དང་འཆི། ། ཉལ་བ་རྩེད་མོ་འོད་གསལ་དོན། ། བྱིངས་ཚོགས་དེ་རྣམས་ལས་མེད་བཤད། ། ཅེས་པས་ཤཱི་དྲ་ཉལ་བ་ལའོ། ། ཞེས་པ་ལྟ་བུའི་བྱིངས་རྣམས་ནི་ལས་ཀྱི་རྣམ་དབྱེ་ལ་སོགས་མི་དགོས་པར་ངོ་བོ་ཉིད་ཀྱིས་བྱ་བ་འབྱུང་བར་གྲུབ་པས་ལས་མེད་པ་ཞེས་བྱའོ། ། འདིར་བརྡ་སྤྲོད་པ་མ་སྦྱངས་པ་ལ་དཔེར་མཚོན་ན། བྱིངས་ཞེས་བྱ་བ་ནི་བོད་ཀྱི་ཡི་གེ་ཀ་ལ་སོགས་པ་ལྟ་བུ་དེ་ཁོ་ནས་དོན་མི་སྟོན་པ་ཡིན་ཏེ། བྷཱུ་ཡོད་པ་ལའོ། །ཞེས་པས་ཡོད་པའི་ཁམས་ཙམ་ལས་གང་ཡང་མི་སྟོན། རྐྱེན་སྦྱར་བ་ནི། སྔོན་རྗེས་ཀྱི་འཇུག་པ་སྦྱར་བ་ལྟ་བུ་སྟེ། ཀ་ལ་སྔོན་འཇུག་བ་དང་རྗེས་འཇུག་འ་སྦྱར་བས་བཀའ་ཞེས་གསུང་རབ་ལ་སོགས་པའི་དོན་སྟོན་པ་སྟེ། བྷཱུ་ལ་རྐྱེན་ཨཙྲ་སྦྱར་བས་བྷ་བ་གྲུབ་པ་སྲིད་པ་ལ་འཇུག །གྷ་ཉྲ་སྦྱར་བས་བྷཱ་བ་གྲུབ་པ་དངོས་པོ་ལ་འཇུག་པ་སྟེ་བྱིངས་ལས་མིང་དུ་གྲུབ་པ་ཡིན། རྣམ་འགྱུར་ནི། བོད་སྐད་(༡༡༡བ)ལ་ཡ་ར་ལ་འདོགས་གཟུགས་གཞན་དུ་འགྱུར་བ་ལྟར། འདིར་ཡང་བྱིངས་བྷཱུ་ལ། རྐྱེན་ཨཙྲ་སྦྱར་བས་གཟུགས་གཞན། བྷ་བ་ཞེས་པར་སོང་བ་སོགས་རིགས་ཤིན་ཏུ་མང༌། རྣམ་དབྱེ་ལེགས་སྦྱར་ལ་ཏིངྲ་དང་སུ་བྲ་རིགས་གཉིས་ཡོད་ཅིང་བོད་སྐད་ལ་གཅིག་ལས་མེད་པ་དེའི་ཚུལ་ནི་གོང་སྨོས་ལྟར་རོ། ། ན༢ གཉིས་པ་[མིང་གི་རང་བཞིན་]ནི། མིང་གི་རང་བཞིན་རྟགས་གསུམ་དག་པ་འདྲེས། ། གཏིབས་དང་ཉེར་སྒྲུབ་ཀུན་འཇུག་མི་གསལ་དྲུག ། སུཔྲའི་རྣམ་དབྱེ་སྦྱོར་ཡུལ་ལ་ལྟོས་ནས་རང་བཞིན་བཏགས་པ་བར་བཞག་པ་མིང་གི་རང་བཞིན་ནི། སྤྱིར་སྐྱེས་པ། བུད་མེད། མ་ནིང་སྟེ། རྟགས་གསུམ་གང་རུང་གི་མཐའ་རུ་གནས་ཤིང༌། དེའི་ནང་གསེས་དབྱེ་བས་རྟགས་དྲུག་ཏུའང་འགྱུར་ཏེ། དེ་ལ། བྲྀཀྵཿཤིང་ལྟ་བུ་སྐྱེས་པ། ཁ་ཊྭཱ། མལ་ཁྲི། ལྟ་བུ་བུད་མེད། ཀུཎྜཾ་མེ་ཐབས་ལྟ་བུ་མ་ནིང་སྟེ། རང་རང་གི་རྟགས་མཐའ་དེ་ལ་རྟགས་གཞན་གྱི་བྱ་བ་མི་འཇུག་པ་ནི་དག་པའི་རྟགས། པུ་རུ་ཥཿསྐྱེས་བུ། པུ་རུ་ཥི། སྐྱེས་བུ་མོ་ལྟ་བུ། ཕོ་མོ་བརྗོད་པའི་སྒྲ་རྣམས་སྐྱེས་པ་དང་བུད་མེད་གཉིས་ཀྱི་རྟགས་ཀྱི་ཆོ་ག་འཇུག་པ། གྷྲྀ་ཏཿགྷྲྀ་ཏཾ། མར་ལྟ་བུ། སྐྱེས་པ་དང་མ་ནིང་གཉིས་ཀྱི་ཆོ་ག་འཇུག་པ་སྟེ། རྟགས་གཉིས་ཀྱི་ཆོ་ག་འདྲེས་པ་རྣམས་ནི་འདྲེས་པའི་རྟགས། པཱ་ཏྲཿཔ་ཏྲཱི། པ་ཏྲཾ། ལྷུང་བཟེད་ལྟ་བུ། སྒྲ་གཅིག་ལ་རྟགས་གསུམ་ཀ་སྦྱར་དུ་ཡོད་པ་ནི་གཏིབས་པའི་རྟགས། རྟགས་དེ་ཉིད་ཁ་དོག་དང་ཡོན་ཏན་ལ་སོགས་པ་ཁྱད་གཞི་ལས་ཁྱད་ཆོས་འབྱེད་པར་བྱེད་པ། ཤུཀླཿཤུཀླཱ། ཤུཀླཾ། དཀར་པོ། པ་ཊུཿཔ་ཊཱིཿཔ་ཊུ། མཁས་པ་ལྟ་བུ་ནི་ཉེ་བར་སྒྲུབ་པའི་རྟགས། འདོད་འཇོ་ལས། གྲོང་དང་བློན་པོ་སོགས་དང་རྟགས། ། རང་བཞིན་བྷ་ག་པྲ་ཀྲྀ་ཏིཿ ། སྙིང་སྟོབས་རྡུལ་དང་མུན་པ་རྣམས། ། མཉམ་པའི་གནས་སྐབས་ལ་ཡང་བལྟ། ། ཞེས་བྱཱ་ཌིས་སོ། ། འཁོར་བའི་ལམ་དང་དགའ་བ་ཡི། ། བུ་ག་པྲ་ཀྲྀ་ཏིཿནི་མོ། ། ཞེས་སྐབས་གསུམ་གྱི་ལྷག་མ་ལས་ཀྱང་རྣམ་གྲངས་སུའོ་(༡༡༢ན)ཞེས་པྲ་ཀྲྀ་ཏི་གཅིག་པུའི་སྒྲ་དོན་མང་པོ་དེ་དག་ལ་འཇུག་པས། སྡེབ་སྦྱོར་ལ་སྒྲ་དེ་གང་འཇུག་རྟགས་ཀྱི་ངེས་པ་ལ་ལྟོས་དགོས་ཏེ། པྲ་ཀྲྀ་ཏིཿཞེས་པའི་རྟགས་སུ་བསྒྲུབ་ན་རང་བཞིན་དང༌། གྲོང་པ་སྟེ་ཆང་འཚོང་རྫ་མཁན་སོགས་ལ་འཇུག་པ་དང༌། པྲ་ཀྲྀ་ཏཱི། བུད་མེད་ཀྱི་རྟགས་སུ་བསྒྲུབ་ན་སྐྱེ་གནས་སོགས་ལ་འཇུག་པར་ཤེས་དགོས་པ་ནི་ཀུན་ཏུ་འཇུག་པའི་རྟགས། ཨུཙྪཻཿམཐོན་པོ་ལྟ་བུ་མི་ཟད་པའི་སྡེ་ཚན་ལས་བྱུང་བའི་སྒྲའི་གཟུགས་མང་པོ་ལ་རྣམ་དབྱེ་ཐམས་ཅད་འཇིག་པར་འགྱུར་བས་གཟུགས་ཀྱི་