Tibetan
ཁོང་དུ་ཆུད་དེ་ལམ་ཉམས་སུ་ལེན་པ་ལ་མ་འཁྲུལ་བའི་ཤེས་རབ་བསྐྱེད་ནས། བཞི་པ་ནི། གསང་སྔགས་ཀྱི་སྒོར་སྤྱད་པ་སྤྱོད་པ་རྣམས་ཀྱིས་ཆེད་དུ་གཉེར་བྱའི་དོན་གྱི་གཙོ་བོ། གཞན་དོན་ཕུན་ཚོགས་ཀྱི་རྟེན་རང་དོན་ཕུན་སུམ་ཚོགས་པ་རྫོགས་པའི་བྱང་ཆུབ་མངོན་དུ་བྱེད་པའི་ཉེར་ལེན་གྱི་རྒྱུ་རིགས་ཁམས་ས་བོན་སྨིན་བྱེད་ཀྱིས་གསོས་བཏབ་པ་དེ་ཉིད། ལྷན་ཅིག་བྱེད་པའི་རྐྱེན་གྲོལ་བྱེད་རིམ་པ་གཉིས་ཀྱིས་གནས་སྐབས་བཞིའི་བག་ཆགས་དང་འབྲེལ་བའི་སྒྲིབ་པ་གསུམ་དྲུངས་ནས་འབྱིན་པ་སྟེ། དེའང་ཐམས་ཅད་བྱང་ཆུབ་ཀྱི་ལམ་དུ་འགྱུར་བའི་ཕྱིར་རྟོགས་པའི་ལྟ་བ་གཞིར་བཞག །རྒྱུད་སྡེ་འོག་མ་གསུམ་པོར་མཚན་བཅས་ལྷའི་རྣལ་འབྱོར་དང་མཚན་མེད་དེ་ཁོ་ན་ཉིད་ཀྱི་རྣལ་འབྱོར་ལ་བརྩོན་ཞིང་བླ་མེད་དུ་ཏིང་ངེ་འཛིན་གསུམ། བསྙེན་བསྒྲུབ་ཡན་ལག་བཞི། མངོན་རྟོགས་ཡན་ལག་དྲུག་ལ་སོགས་པས་རྟེན་བསྐྱེད་པའི་རིམ་པ་བསྒོམ་ཞིང་བཟླས་པ་གཏོར་མ་རབ་གནས་སྦྱིན་སྲེག་སོགས་རྡོ་རྗེ་སློབ་དཔོན་གྱི་ལས་རབ་འབྱམས་རྣམས་སྒྲུབ་པ་དང༌། སྣང་ཕྱོགས་སྟོང་ཕྱོགས་ཟུང་འཇུག་གསུམ་མམ་རང་བྱིན་རླབས་དང་དཀྱིལ་འཁོར་འཁོར་ལོའམ་རྡོ་རྗེའི་རྣལ་འབྱོར་ཟབ་མོས་བརྟེན་པ་རྫོགས་པའི་རིམ་པ་བསྒོམ་སྟེ་བག་ཆགས་དང་བཅས་པའི་སེམས་སྦྱོང༌། ལྔ་པ་ནི། ལས་དང་པོ་བས་ཨ་བ་དྷཱུ་ཏི་ཀུན་འདར་གྱི་སྤྱོད་པ། རྣལ་འབྱོར་ཐོབ་པས་ཀུན་བཟང༌། གྲུབ་པ་ཐོབ་པས་ཕྱོགས་ལས་རྣམ་རྒྱལ་གསུམ་མམ། འདོད་འཇུག་དང་བརྟན་སློབ་ཀྱི་སྤྱོད་པ་སྤྲོས་བཅས་སྤྲོས་མེད་ཤིན་ཏུ་སྤྲོས་མེད་ཚུལ་དུ་སྦྱར་ནས་རིམ་པ་གཉིས་ཀྱི་བོགས་དབྱུང་བས་གང་ཟག་རྣམ་པ་བཞིར་རིམ་གྱིས་ན་(༡༠༠ན)འཕོས་ཏེ། གསལ་སྣང་མཆེད་ཅིང་ཐུན་མོང་གི་དངོས་གྲུབ་འགྲུབ་པའི་ཚོགས་ལམ་གསུམ། དབུ་མར་རླུང་སེམས་ཐིམ་པའི་བདེ་སྟོང་གི་ཡེ་ཤེས་བརྟན་པས་སྦྱོར་ལམ་དྲོད། དཀྱིལ་འཁོར་འཁོར་ལོ་རྒྱུན་མི་འཆད་པར་སྣང་བ་རྣམ་རྟོག་དང་བྲལ་བའི་སྐུ་ཐོབ་པས་རྩེ་མོ། རང་བཞིན་བརྒྱད་ཅུའི་རྟོག་པ་མངོན་གྱུར་འགགས་པས་བཟོད་པ། མཐོང་བའི་ལམ་དུ་སྦྱོར་ནུས་པའི་ཡེ་ཤེས་ལ་རྩོལ་བ་ཆོས་མཆོག་གི་བར་དུ་བགྲོད་ཅིང༌། དེ་ནས་ཕྱི་རོལ་དུ་ཡུལ་ཆེན་རྣམས་བགྲོད་པ་དང་ནང་དུ་རྩ་རླུང་ཐིག་ལེའི་འགྲོས་རྣམས་དབུ་མར་ཐིམ་པ་ལས་གནས་སྐབས་ཀྱི་འབྲས་བུ་ས་བཅུ་གཉིས་དང༌། ཉེ་རྒྱུས་མཚམས་སྦྱར་བས་མཐར་ཐུག་གི་འབྲས་བུ་སངས་རྒྱས་ཀྱི་ས་ལ་མི་སློབ་པའི་ཟུང་འཇུག་ཁ་སྦྱོར་བདུན་ལྡན་རྡོ་རྗེ་འཆང་གསང་བ་བསམ་གྱིས་མི་ཁྱབ་པའི་དབང་ཕྱུག་ཆེན་པོ་རྟག་པ་དམ་པའི་གོ་འཕང་ལ་དབང་འབྱོར་བར་འགྱུར་རོ། ། སྡོམ་པ་གསུམ་ལས་བརྩམས་པའི་ལམ་རིམ་དེ་དག་གོ་བདེ་བའི་སླད་དུ་མདོ་ཙམ་སྨོས་པ་སྟེ། རྒྱས་པར་ཕྱི་ནས་འཆད་པར་འགྱུར་བ་ཉིད་དོ། ། ཅ༢ གཉིས་པ་སྡོམ་གསུམ་སྤྱི་དོན་བཤད་པ་ལ་གསུམ། ཆ༡ གཅིག་ལྡན་ལ་སོགས་པའི་གྲངས། ཆ༢ གང་ཟག་གཅིག་ལ་ལྡན་ལུགས། ཆ༣ བསྲུངས་པའི་ཕན་ཡོན་སྨོས་པས་འཇུག་བསྡུ་བའོ། ། ཆ༡ དང་པོ་ནི། སྡོམ་པ་གསུམ་པོ་གཅིག་གཉིས་གསུམ་ལྡན་སོགས། ། དབྱེར་ཡོད། ཅེས་པ་སྟེ། དེ་ལ་གཅིག་ལྡན་ནི། ཐེག་དམན་སོ་ཐར་རྒྱུད་ལྡན་གྱི་གང་ཟག་སྟེ་འདི་ལ་སོ་ཐར་ཙམ་ལྡན་གྱི་གོང་མ་གཉིས་མི་ལྡན་པའི་ཕྱིར། གཉིས་ལྡན་ནི། བྱང་སྡོམ་དང་ལྡན་པ་སྟེ་ཐེག་ཆེན་སོ་ཐར་དང་བྱང་སྡོམ་གཉིས་རྫས་གཅིག་པར་ལྡན་པའི་ཕྱིར། སུམ་ལྡན་གྱི་དབང་དུ་བྱས་པ་ནི། སྔགས་སྡོམ་ཅན་ཏེ། སྔགས་སྡོམ་ཡིན་ན་སོ་བྱང་སྡོམ་ལྡན་ཡིན་པ་ཞིག་དགོས་པའི་ཕྱིར། དེའང་དགེ་སློང་རྡོ་རྗེ་འཛིན་པའི་རྒྱུད་ཀྱི་སྡོམ་པ་གསུམ་པོ་ངོ་བོ་གཅིག་ལ་ལྡོག་པའི་སྒོ་ནས་ཕྱེ་བ་སྟེ། དེའི་རྒྱུད་ཀྱི་ངེས་པར་འབྱུང་བའི་ཚུལ་ཁྲིམས་དེ། གཞན་(༡༠༠བ)གནོད་གཞིར་བཅས་སྤོང་བའི་ཆ་ནས་ཐར་སྡོམ། གཞན་ཕན་བསམ་པས་ཟིན་པའི་ཆ་ནས་བྱང་སྡོམ། འབྲས་བུ་ལམ་བྱེད་ཀྱི་ཐབས་ཀྱིས་ཟིན་པའི་ཆ་ནས་སྔགས་སྡོམ་དུ་བཞག་པའི་ཕྱིར། སོགས་ཁོངས་ནས་སྡོམ་པ་གསུམ་རིམ་པར་ཞུགས་པ་དང་གོང་མ་གཉིས་གང་རུང་ཐོག་མར་ཞུས་ནས་སླར་སོ་ཐར་གྱི་སྡོམ་པ་ཞུ་བ་སོགས་ཀྱི་ལྡན་ཚུལ་དབྱེ་བ་མང་དུ་འགྱུར་རོ། ། ཆ༢ གཉིས་པ་[གང་ཟག་གཅིག་ལ་ལྡན་ལུགས་]ལ་གཉིས། ཇ༡ མདོར་བསྟན། ཇ༢ རྒྱས་བཤད་དོ། ། ཇ༡ དང་པོ་ནི། གང་ཟག་གཅིག་ལ་སུམ་ལྡན་ཚེ། ། གནས་ཚུལ་འཕགས་བོད་གཉིས་སུ་བཞེད་སྲོལ་མང༌། ། གང་ཟག་གཅིག་གིས་སོ་བྱང་སྔགས་ཀྱི་སྡོམ་པ་རིམ་ཅན་དུ་ཞུས་ནས་རྒྱུད་ལ་གསུམ་ཀ་ལྡན་པའི་ཚེ། གནས་ཚུལ་ཇི་ལྟར་ལྡན་ཞེ་ན། འདི་ལ་འཕགས་བོད་གཉིས་སུ་བཞེད་སྲོལ་མི་མཐུན་པ་མང་དུ་བྱུང་ངོ༌ཞེས་སོ། ། ཇ༢ གཉིས་པ་[རྒྱས་བཤད་]ལ་གཉིས། ཉ༡ འཕགས་ཡུལ་བའི་བཞེད་སྲོལ། ཉ༢ བོད་ཀྱི་སློབ་དཔོན་རྣམས་ཀྱི་བཞེད་སྲོལ་ལོ། ། ཉ༡ དང་པོ་ནི། འཇིགས་མེད་ཞབས་ཀྱིས་སྤོང་སེམས་རིགས་མཐུན་ཀྱང༌། ། རྣམ་པ་ཐ་དད་པཎ་ཆེན་བི་བྷཱུ་ཏིས། ། གོང་མས་འོག་མ་ཟིལ་གནོན་ཐ་དད་བཞེད། ། སྤྱིར་འཕགས་ཡུལ་དུའང་དབང་གི་ལྡེའུ་མིག་ལས་གསུངས་པ་ལྟར་ན། སྔགས་སྡོམ་གྱི་རྟེན་བྱང་སྡོམ་དང་དེའི་རྟེན་སོ་ཐར་དུ་བཤད་པ་རྟེན་ཅན་དང༌། གོང་མ་ཐོབ་པ་ན་འོག་མ་འཕེལ་ཞིང་དག་པར་འདོད་པ་དང༌། སྡོམ་པ་གཅིག་ཉིད་ཕྱི་སོ་ཐར། ནང་བྱང་སྡོམ། གསང་བ་སྔགས་སུ་འདོད་པ་དང༌། གོང་མ་གོང་མ་ལ་འོག་མ་འོག་མ་ཚང་བར་འདོད་པ་སྟེ་ཡར་ལྡན་དང༌། གོང་མ་ཐོབ་པས་འོག་མའང་གནས་འགྱུར་བ་སྟེ་རིམ་པ་ཅན་དུ་འདོད་པ་དང༌། གཅིག་དང་གཅིག་མ་འདྲེས་པ་སྟེ་མ་འདྲེས་ཡོངས་རྫོགས་སུ་འདོད་པ་དང་དྲུག་ཡོད་པར་བཤད་དོ། ། དེ་ལས་དེང་སང་བོད་འདིར་གྲགས་ཆེ་བ་ནི་སློབ་དཔོན་ཆེན་པོ་འཇིགས་མེད་ཞབས་ཀྱིས། གསེར་གྱི་རྒྱན་གསེར་ཡིན་པར་རིགས་གཅིག་ཀྱང་མགོ་རྒྱན་དང་རྐང་རྒྱན་ལག་གདུབ་ཏུ་ཐ་དད་པ་བཞིན་དུ། སྡོམ་གསུམ་(༡༠༡ན)སྤོང་བའི་སེམས་པར་རིགས་མཐུན་ཀྱང་གསུམ་པོ་རྣམ་པ་ཐ་དད་པར་བཞེད་པ་དང༌། པཎ་ཆེན་བི་བྷཱུ་ཏི་ཙནྡྲས་སྡོམ་གསུམ་འོད་ཕྲེང་དུ་སྡོམ་པ་གསུམ་སྐར་མ་ཟླ་བ་ཉི་མའི་དཔེས་གོང་མས་འོག་མ་སྟེ་ཕྱི་རིམ་གྱིས་སྔ་མ་ཟིལ་གྱིས་མནན་ནས་བག་ལ་ཞ་བར་འགྱུར་ཡང་ངོ་བོ་ཐ་དད་དུ་བཞེད་པ་གཉིས་སྣང་ངོ༌། ། ཉ༢ གཉིས་པ་[བོད་ཀྱི་སློབ་དཔོན་རྣམས་ཀྱི་བཞེད་སྲོལ་]ནི། ངོ་བོ་ཐ་དད་བསྲུང་ན་འཆོལ་བར་བསྲུངས། ། འདོམ་ཐུག་གོང་མ་གཙོ་ཞིང་འོག་མ་ཡི། ། སྐྱོན་ཀུན་ཟིལ་གནོན་ཡོན་ཏན་ཡར་ལྡན་ཚུལ། ། གཏོང་དང་ཐོབ་པའི་ས་མཚམས་ཐ་དད་ཅེས། ། མཉམ་མེད་དྭགས་པོ་རྗེས་འབྲངས་བཅས་པས་བཞེད། ། རྗེ་སྒམ་པོ་པའི་གསུངས་ལས། ངོ་བོ་ཐ་དད། བསྲུང་ན་འཆོལ་བར་བསྲུང༌། འདོམ་ཐུག་ན་གོང་མ་གཙོ། འོག་མའི་སྐྱོན་ཟིལ་གྱིས་གནོན། ཡོན་ཏན་ཡར་ལྡན་ཡིན་ཅེས་གསུངས་ཏེ། དང་པོ་ནི། སྡོམ་གསུམ་གང་ལས་བྱུང་བའི་སྡེ་སྣོད། ལེན་པའི་ཡུལ་དང་དུས་ཚོད། བསམ་པ་ཆོ་ག་བསྲུང་བྱ་གཏོང་རྒྱུ་ཕན་ཡོན་ཉམས་པ་གསོར་ཡོད་མེད་སོགས་ཐ་དད་པས་ངོ་བོ་ཐ་དད། རྣམ་པ་མི་དགེ་བ་སྡོམ་ཞིང་གཉེན་པོ་ཡང་དག་ལྟ་བ་སྐྱེད་པས་མཚོན་སྤོང་སེམས་ཙམ་དུ་རིགས་གཅིག་པས་སྡོམ་གསུམ་གཉེན་པོའི་གནད་ལ་གཅིག །སྤང་གཉེན་གྱི་ཡུལ་གང་དང་ཕྲད་པ་དེ་དང་དེར་རང་རང་གི་ལུགས་བཞིན་བསྲུང་དགོས་པས་བསྲུང་ན་འཆོལ་བར་བསྲུང༌། ཚོགས་ཀྱི་དམ་རྫས་ལྟ་བུ་མ་བརྟེན་ན་སྔགས་དང་འགལ་ལ་བརྟེན་ན་སོ་ཐར་དང་འགལ་བ་ལྟ་བུ་འདོམ་ཐུག་ན་གོང་མ་གཙོར་སྤྱད། དེ་ལྟར་ནའང་བསམ་པ་དང་ཐབས་ཁྱད་པར་ཅན་གྱིས་ཟིན་པས་སོ་ཐར་གྱི་བཅས་འདས་ཉེས་པ་མི་འབྱུང་བས་འོག་མའི་སྐྱོན་ཟིལ་གྱིས་གནོན། ཉེས་ལྟུང་མེད་པ་ཙམ་དུ་མ་ཟད་གོང་མའི་ཕན་ཡོན་རྒྱ་ཆེན་པོ་འབྱུང་བས་ཡོན་ཏན་ཡར་ལྡན་ཡིན་ཅེས་མཉམ་མེད་དྭགས་པོ་ཉིད་དང་རྗེས་འབྲང་ཟུང་བཞི་ཡ་བརྒྱད་ཀྱི་མཁས་གྲུབ་རྣམས་དང༌། ཁྱད་པར་རྒྱལ་དབང་ཐམས་ཅད་མཁྱེན་(༡༠༡བ)པ་བདུན་པ་ཆོས་གྲགས་རྒྱ་མཚོའི་ཞལ་སྔ་ནས་གསུངས་སོ། ། རྗེ་བཙུན་གྲགས་པ་ཀུན་མཁྱེན་ཀློང་ཆེན་སོགས། ། རང་ལྡོག་མ་འདྲེས་དགག་དགོས་ཡོངས་སུ་རྫོགས། ། ངོ་བོ་གནས་འགྱུར་ཡོན་ཏན་ཡར་ལྡན་པས། ། གནད་ཀྱིས་མི་འགལ་དུས་སྐབས་གཙོར་སྤྱད་གསུངས། ། ས་སྐྱའི་རྗེ་བཙུན་གྲགས་པ་རྒྱལ་མཚན་ཁུ་དབོན། ཀུན་མཁྱེན་ཀློང་ཆེན་རབ་འབྱམས། སོགས་ཁོངས་ནས་ལོ་ཆེན་རིན་བཟང༌། རོང་ཟོམ་ཆོས་བཟང་རྗེས་འབྲང་དང་བཅས་པ་རྣམས་ནི། སྡོམ་པ་གསུམ་བླངས་པའི་ཡུལ་སོགས་ཐ་དད་པས་རང་རང་གི་ལྡོག་ཆ་མ་འདྲེས། དགག་བྱ་ཉོན་མོངས་པ་རང་མཚན་པ་སྤོང་བ་དང༌། དགོས་པ་ཉོན་མོངས་པས་མི་འཆིང་བ་གནད་གཅིག་པས་དགག་འོས་དགག་དགོས་ཡོངས་རྫོགས། ཟངས་རྡོ་ལས་ཟངས་དང་དེའང་གསེར་འགྱུར་གྱི་རྩིས་གསེར་དུ་བསྒྱུར་བའི་དཔེས་སོ་ཐར་སྡོམ་པ་དེ་ཐེག་ཆེན་སེམས་བསྐྱེད་ཀྱིས་ཟིན་ན་དེའི་སྡོམ་པ་དང༌། དེའང་ཐབས་ཤེས་ཁྱད་པར་ཅན་གྱིས་ཟིན་པ་ན་སྔགས་སྡོམ་དུ་གནས་འགྱུར་བས་ངོ་བོ་གནས་འགྱུར། གོང་མའི་སྡོམ་པ་ཉམས་སུ་བླངས་པས་འོག་མའི་དགག་དགོས་ཡར་ལྡན་དུ་རྫོགས་པའི་ཕྱིར་ཡོན་ཏན་ཡར་ལྡན་ཡིན་པས་བསྲུང་སྡོམ་ཁ་ཅིག་འགལ་བ་ལྟར་སྣང་ཡང་ལྟ་བ་དང་ཐབས་ཀྱི་སྤྱོད་པའི་གནད་ཀྱིས་མི་འགལ་ལ། དུས་སྐབས་ཀྱིས་གཙོ་བོར་གང་འགྱུར་སྤྱད་པར་གསུངས་པ་དང༌། པཎ་ཆེན་པདྨ་དབང་རྒྱལ་གྱིས། སྡིག་ཏོ་མི་དགེའི་ཕྱོགས་དང་ཚོགས་པའི་གསེབ། ། འོག་མ་གཙོར་སྤྱོད་འདོད་པས་དབེན་པ་དང༌། ། སྤྱོད་པའི་དུས་དང་དབེན་པར་གསང་སྔགས་སྤྱད། ། ནང་མ་འདོམ་ན་མ་འདྲེས་ཡོངས་རྫོགས་བསྲུང༌། ། འདོམ་ན་དགག་དགོས་བརྩི་ཞེས་མཁས་རྣམས་བཞེད། ། ཅེས་གསུངས་སོ། ། དགེ་ལྡན་པ་རྣམས་ཐ་དད་རྟེན་ཅན་ཏེ། ། སོ་སོར་ལུང་དང་རིགས་པའི་སྒྲུབ་བྱེད་མང༌། ། རི་བོ་དགེ་ལྡན་པ་ནི་ཐོབ་ཚུལ་གཏོང་རྒྱུ་སོ་སོར་ངེས་པས་སྡོམ་གསུམ་ཚུལ་ཐ་དད། འོག་མ་གོང་མའི་ཡན་ལག་ཏུ་འགྱུར་(༡༠༢ན)བའི་དཔེར། སྣོད་ཤིན་ཏུ་དྭངས་པར་ཆུ་གཙང་བླུགས་པའི་ནང་དུ་རིན་པོ་ཆེ་ཨིནྡྲ་ནཱི་ལ་ལྟ་བུ་བཅུག་ན་ཆུ་མདོག་ཀྱང་རིན་པོ་ཆེའི་ཁ་དོག་ཏུ་འགྱུར་བས་མཚོན་པས་གོང་མ་འོག་མའི་རྟེན་ཅན་དུའང་དོན་གྱིས་བཞེད་པ་སྟེ། ལུགས་དེ་དག་སོ་སོ་ནས་ལུང་དང་རིགས་པའི་སྒྲུབ་བྱེད་མང་དུ་མཛད་པར་སྣང་ངོ༌། ། ཆ༣ གསུམ་པ་[བསྲུངས་པའི་ཕན་ཡོན་སྨོས་པས་འཇུག་བསྡུ་བ་]ནི། སུམ་ལྡན་རྡོ་རྗེ་འཛིན་མཆོག་བརྩོན་ལྡན་ན། ། ཚེ་ལུས་གཅིག་གིས་རྡོ་རྗེ་འཆང་འགྲུབ་འགྱུར། ། སུམ་ལྡན་རྡོ་རྗེ་འཛིན་པ་ནི་གཙོ་བོའི་སྒྲས་སྨོས་པ་སྟེ། སྔགས་པ་རྣམས་ཀྱི་མཆོག་དེའམ། གང་ཡང་སྔགས་ཀྱི་སྒོར་ཞུགས་པ་རྣམས་དམ་ཚིག་མ་ཉམས་ཤིང་ལམ་ལ་བརྩོན་འགྲུས་དང་ལྡན་ན། ཚེ་གཅིག་ལུས་གཅིག་གིས་རྡོ་རྗེ་འཆང་གི་གོ་འཕང་འགྲུབ་པར་འགྱུར་བ་རྒྱུད་སྡེ་རྣམས་ལས་ཡང་ཡང་གསུངས་ཤིང༌། རྗེ་རང་བྱུང་ཞབས་ཀྱིས་ཀྱང༌། མ་ཉམས་རབ་ནི་ཚེ་གཅིག་གིས། ། རྡོ་རྗེ་སེམས་དཔའ་ཉིད་འགྲུབ་ཅིང༌། ། ཐུན་མོང་དངོས་གྲུབ་ཐམས་ཅད་ཀུན། ། ཐོགས་མེད་བསམ་པ་ཙམ་གྱིས་འགྲུབ། ། ཅེས་གསུངས། ལམ་ལ་བརྩོན་མི་ནུས་ཀྱང་དམ་ཚིག་མ་ཉམས་ན་ཡུན་རིང་མི་འགོར་བར་དངོས་གྲུབ་ཐོབ་སྟེ། རྒྱུད་ལས། གལ་ཏེ་དམ་ཚིག་སྡོམ་ལ་གནས། ། སྐྱེ་འདིར་ལས་དབང་གིས་མ་འགྲུབ། ། སྐྱེ་བ་གཞན་དུ་དངོས་གྲུབ་ཐོབ། ། ཅེས་གསུངས་པ་ལྟར་རོ། ། རིག་འཛིན་གྱི་སྡོམ་པ་སྤྱིར་བཤད་པ་དང་བཅས་པའི་སྐབས་སོ། ། རིག་འཛིན་གྱི་སྡོམ་པ་སྤྱིར་བཤད་པ་དང་བཅས་པ་སྐབས་བཞི་པའི་འགྲེལ་པའོ། ། ཐེག་པའི་སྒོ་ཀུན་ལས་བཏུས་པ་གསུང་རབ་རིན་པོ་ཆེའི་མཛོད་བསླབ་པ་གསུམ་ལེགས་པར་སྟོན་པའི་བསྟན་བཅོས་ཤེས་བྱ་ཀུན་ཁྱབ་ཅེས་བྱ་བ་ལས། ལྷག་པ་ཚུལ་ཁྲིམས་ཀྱི་བསླབ་པའི་རིམ་པར་ཕྱེ་བ་སྟེ། གནས་ལྔ་པའི་འགྲེལ་པ་གྲུབ་བོ།། །། གནས་དྲུག་པ། ཐོས་པའི་རིམ་པར་ཕྱེ་བ། དང་པོ། ཐུན་མོང་རིག་པའི་གནས་དང་འཇིག་རྟེན་པའི་ལམ་རྣམ་པར་བཞག་པའི་སྐབས། དེ་ལྟར་ཆོས་དཀར་མཐའ་དག་གི་གཞི་མ་ལྷག་པའི་ཚུལ་ཁྲིམས་ལ་ལེགས་པར་གནས་པའི་གང་ཟག་དེས་ཐར་པ་དང་ཐམས་ཅད་མཁྱེན་པའི་ལམ་ཕྱིན་ཅི་མ་ལོག་པར་ཤེས་པའི་སླད་དུ་ཤེས་བྱའི་གནས་རྒྱ་མཚོ་ལྟ་བུ་ལ་(༡༠༢བ)ཐོས་པའི་ཤེས་རབ་བཙལ་བར་བྱ་དགོས་པས། ག༦ དེའི་རིམ་པར་ཕྱེ་བ་གནས་དྲུག་པ་ལ་སྐབས་བཞི། ང༡ ཐུན་མོང་རིག་པའི་གནས་དང་འཇིག་རྟེན་པའི་ལམ་རྣམ་པར་བཞག་པ། ང༢ ཐེག་པ་ཆེ་ཆུང་གི་ཤེས་བྱ་སྤྱིའི་གནད་རྣམ་པར་གཞག་པ། ང༣ རྒྱུ་མཚན་ཉིད་ཀྱི་ཐེག་པ་རྣམ་པར་གཞག་པ། ང༤ གསང་སྔགས་རྡོ་རྗེ་ཐེག་པ་རྣམ་པར་བཞག་པའོ། ། ང༡ སྐབས་དང་པོ་ལ་གསུམ། ཅ༡ དགོས་པ་དང་འབྲེལ་བར་མཚམས་སྦྱར། ཅ༢ ཐོས་པ་འཚོལ་བའི་ཚུལ་གསུམ་བཤད། ཅ༣ གཞུང་དངོས་ལ་འཇུག་པའོ། ། ཅ༡ དང་པོ་ནི། མང་ཐོས་ཡོན་ཏན་ཀུན་གྱི་གཞི་ཡིན་ཕྱིར། ། ཐོག་མར་ཐོས་པ་ཕྱོགས་མེད་བཙལ་བར་བྱ། ། གཞི་རྟེན་ཚུལ་ཁྲིམས་རྣམ་པར་དག་པ་དང་ལྡན་པའི་སྟེང་དུ་ཤེས་བྱའི་གནས་སྤྱི་དང་ཁྱད་པར་དམ་པའི་ཆོས་མདོ་སྔགས་ཀྱི་ཚུལ་མང་དུ་ཐོས་པ་ནི་ཡོན་ཏན་ཀུན་གྱི་གཞི་ཡིན་ཏེ། བྱང་ཆུབ་སེམས་དཔའི་སྡེ་སྣོད་ལས། ཐོས་པས་ཆོས་རྣམས་ཤེས་པར་འགྱུར། ། ཐོས་པས་སྡིག་ལས་ལྡོག་པར་འགྱུར། ། ཐོས་པས་དོན་མེད་སྤང་བར་འགྱུར། ། ཐོས་པས་མྱ་ངན་འདས་པ་ཐོབ། ། ཅེས་པའི་དོན་གོ་རིམ་བཞིན་དུ། ཕྱི་ནང་གི་གྲུབ་མཐའ་ཤེས་པས་བླང་དོར་གྱི་གནས་ཤེས་པ་དང༌། ཚུལ་ཁྲིམས་ཀྱི་བསླབ་པ་ཐོས་ནས་ཉེས་སྤྱོད་ལས་ལྡོག་པ་དང༌། སེམས་ཀྱི་བསླབ་པ་ཐོས་ནས་དོན་མེད་པའི་འདོད་པ་ཡོངས་སུ་སྤང་བ་དང༌། ཤེས་རབ་ཀྱི་བསླབ་པ་ཐོས་ནས་ཟག་མེད་མངོན་དུ་བྱས་པའི་མྱང་འདས་ཐོབ་པ་སྟེ་བཞི་ལ་རྣམ་བཤད་རིགས་པ་ལས་བཤད་དོ། ། ལུང་རྣམ་འབྱེད་ལས་མང་དུ་ཐོས་པ་ལ་ཕན་ཡོན་ལྔ་ཡོད་པར་གསུངས་ཤིང༌། གཞན་ཡང་མདོ་དང་བསྟན་བཅོས་རྣམས་ལས་མང་ཐོས་ཀྱི་ཡོན་ཏན་མཐའ་ཡས་པ་གསུངས་པའི་ཕྱིར། ཐོག་མར་ཐོས་པ་ཕྱོགས་མེད་དུ་ཡོངས་སུ་བཙལ་བར་བྱའོ། ། ཅ༢ གཉིས་པ་ཐོས་པ་འཚོལ་བའི་ཚུལ་གསུམ་བྱང་ས་ལྟར་བཤད་པ་ནི། ཅི་ཞིག་འཚོལ་ན་སྡེ་སྣོད་བསྟན་བཅོས་བཟོ། ། ཇི་ལྟར་གུས་དང་བརྩོན་འགྲུས་གྲོགས་ལྡན་པས། ། ཅི་ཕྱིར་ཡང་དག་རིགས་སོགས་དོན་དུའོ། །(༡༠༣ན) དེ་ལ་བྱང་ཆུབ་སེམས་དཔའ་ཆོས་འཚོལ་བ་དག་གིས་ཅི་ཞིག་འཚོལ་ན། སྡེ་སྣོད་བསྟན་བཅོས། འཇིག་རྟེན་པའི་བཟོ་དང་ལས་ཀྱི་གནས་ཤེས་པ་རྣམས་འཚོལ། སྡེ་སྣོད་གང་ཞེ་ན། བྱང་ཆུབ་སེམས་དཔའི་སྡེ་སྣོད་དང༌། ཉན་ཐོས་ཀྱི་སྡེ་སྣོད་དོ། ། དེའང་གསུང་རབ་ཡན་ལག་བཅུ་གཉིས་ལས། ཤིན་ཏུ་རྒྱས་པའི་སྡེ་སྣོད་ནི་དང་པོ་དང༌། ལྷག་མ་རྣམས་ནི་ཉན་ཐོས་ཀྱི་སྡེ་སྣོད་དུ་བཤད་ལ། དེ་དག་ནི་ནང་གི་བསྟན་བཅོས་སམ་ནང་རིག་པ་ཞེས་བྱའོ། ། བསྟན་བཅོས་གང་ཞེ་ན། མདོར་བསྡུ་ན་རྣམ་པ་གསུམ་སྟེ། གཏན་ཚིག་དང༌། སྒྲ་དང༌། གསོ་བ་རིག་པའི་བསྟན་བཅོས་རྣམས་ཏེ། སྟོན་པ་གཉིས་ཀྱི་དབང་དུ་བྱས་ནས་ཕྱི་རོལ་པའི་བསྟན་བཅོས་ཞེས་བྱའོ། ། གསུམ་པ་ནི། བཟོ་ལ་སོགས་པར་གཏོགས་པ་སུམ་ཅུ་ལ་སོགས་པ་སྟེ། འཇིག་རྟེན་པའི་རིག་པའི་གནས་སུ་འཇོག་པ་ལས་བསྟན་བཅོས་སུ་མི་བགྲང་ངོ༌། ། ཇི་ལྟར་འཚོལ་ན། འབྲས་བུ་ལ་ཉེ་བར་སྦྱོར་བའི་རྒྱུར་ཤེས་པས་ནམ་ཡང་མི་ལྷོད་པའི་གུས་པ་དང་བརྩོན་འགྲུས་རྒྱུན་མི་འཆད་པའི་གྲོགས་དང་ལྡན་པས་ཤེས་པར་བྱ་བ་མཐར་ཕྱིན་པར་མ་གྱུར་གྱི་བར་དུ་འཚོལ། ཅིའི་ཕྱིར་འཚོལ་ན། ཆོས་རྣམས་ཀྱི་མཚན་ཉིད་རྣམ་པར་ངེས་པ་ཞེས་བྱ་བའི་མདོ་ལས། འཇམ་དཔལ་ཆོས་རྣམས་ཀྱི་ངོ་བོ་དང་མཚན་ཉིད་ཤེས་པས་དོན་སོ་སོ་ཡང་དག་པ་རིག་པ་ཐོབ་བོ། །དབྱེ་བ་སྣ་ཚོགས་པ་དང་དེའི་རྣམ་པར་གཞག་པ་ལ་མཁས་པས་སྤོབས་པ་སོ་སོར་ཡང་དག་པ་རིག་པ་ཐོབ་བོ། །མིང་གི་རྣམ་གྲངས་སྣ་ཚོགས་ལ་མཁས་པས་ཆོས་སོ་སོ་ཡང་དག་པ་རིག་པ་ཐོབ་བོ། །ངེས་པའི་ཚིག་ལ་མཁས་པས་ངེས་ཚིག་སོ་སོ་ཡང་དག་པ་རིག་པ་ཐོབ་བོ། །འཇམ་དཔལ་དེའི་ཕྱིར་ཐམས་ཅད་མཁྱེན་པ་དོན་དུ་གཉེར་ན་ཐོག་མར་ཐོས་པ་དང་བསམ་པའི་ཤེས་རབ་བསྐྱེད་པར་བྱ་སྟེ། འདི་ནི་སངས་རྒྱས་ཐམས་ཅད་ཀྱི་ཡུམ་ཡིན་པའི་ཕྱིར་རོ་ཞེས་དང༌། གདགས་པའི་མདོ་ལས། མིང་ཚིག་ཡི་གེ་ལ་མཁས་པས་ཆོས་(༡༠༣བ)དེའི་དོན་ལ་མཁས་པའི་དོན། ཚིག་བླ་དྭགས་ལ་མཁས་པས་ངེས་པའི་ཚིག །དེ་དག་ལ་ཐོགས་པ་མེད་པར་བྱང་ཆུབ་པས་སྤོབས་པ་སོ་སོ་ཡང་དག་པར་རིག་པ་འཐོབ་པར་འགྱུར་བ་སོགས་གསུངས་ཤིང་མཛོད་འགྲེལ་ལས་ཀྱང་དེ་དང་མཐུན་པར་བཤད་དོ། ། ཁྱད་པར་ཐབས་ལ་མཁས་པ་དྲིན་ལན་བསབས་པའི་མདོ་ལས། རིག་པའི་གནས་ལྔ་བསླབ་པའི་དགོས་པ་བཅས་རྒྱས་པར་གསུངས་པའི་དོན་བསྡུས་བྱང་ཆུབ་སེམས་དཔའ་རྣམ་པར་སྤྱོད་པའི་ཆོས་འཚོལ་བའི་སྐབས་སུ་འདི་ལྟར་འབྱུང་སྟེ། དེ་ལ་བྱང་ཆུབ་སེམས་དཔའ་ཅིའི་ཕྱིར་ཐོས་པ་འཚོལ་བར་བྱེད་ཅེ་ན། བྱང་ཆུབ་སེམས་དཔའ་ནི། ཆོས་རྗེས་སུ་མཐུན་པའི་ཆོས་ཀྱི་ནན་ཏན་གྱིས་ཡང་དག་པར་བསྒྲུབ་པར་བྱ་བའི་ཕྱིར་དང༌། གཞན་དག་ལའང་རྒྱ་ཆེར་ཡང་དག་པར་བསྟན་པར་བྱ་བའི་ཕྱིར་སངས་རྒྱས་ཀྱི་བཀའ་ཡོངས་སུ་འཚོལ་བར་བྱེད་དོ། ། བྱང་ཆུབ་སེམས་དཔའ་ནི། གཏན་ཚིགས་ཀྱི་རིགས་པ་འཚོལ་བར་བྱེད་དེ། བསྟན་བཅོས་དེ་ཉིད་ལས་ལེགས་པར་བཤད་པ་དང་ཉེས་པར་བརྗོད་པ་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པར་བྱ་བའི་ཕྱིར་དང༌། ཕས་ཀྱི་རྒོལ་བ་ཚར་གཅོད་པར་བྱ་བའི་ཕྱིར་དང༌། བསྟན་པ་འདི་ལ་མ་དད་པ་རྣམས་དད་པར་བྱ་བའི་ཕྱིར་དང༌། དད་པ་རྣམས་ཀྱང་ཕྱིར་ཞིང་འཕེལ་