Tibetan
དབྱེ་བ་མེད་པ་ལ་སོགས་པ་མི་གསལ་བའི་རྟགས་ཞེས་བྱ་སྟེ། དེ་ལྟར་ན་མིང་གི་རང་བཞིན་དྲུག་གོ། ། ད༢ གཉིས་པ་[རྐྱེན་]ནི། རྐྱེན་ནི་བྱིངས་ཉིད་བྱིངས་སྒྲུབས་ནྲལ་སོགས། ། བྱིངས་ལས་ཚིག་སྒྲུབ་ཏི་ངྲའི་རྣམ་དབྱེ་སྟེ། ། བྱིངས་ལས་མིང་སྒྲུབ་ཀྲྀཏྲ་རྣམས་བྱིངས་དང་འབྲེལ། ། མིང་ལ་ཀྱཙྲ་སོགས་སྦྱར་མིང་ཉིད་བྱིངས། ། བུད་མེད་རྐྱེན་སྦྱར་རྟགས་ཉིད་རྟགས་སུ་སྒྲུབ། ། དེ་ཕན་སྦྱར་བས་མིང་ཉིད་མིང་སོགས་ཏེ། ། སུ་པྲ་སྦྱར་མིང་ལས་ཚིག་ཏུ་སྒྲུབ་པར་བྱེད། ། བྱིངས་ལས་དོན་སྟོན་བྱེད་ཀྱི་སྒྲར་སྒྲུབ་པར་བྱེད་པ་རྐྱེན་ལ་ཤིན་ཏུ་མང་ཡང་བསྡུ་ན་རྣམ་པ་བདུན་དུ་འདུས་པ་ཡིན་ཏེ། བྱིངས་ཉིད་སླར་ཡང་བྱིངས་སུ་སྒྲུབ་ཅིང་དེའི་མཐར་རྐྱེན་གཞན་འཇུག་པ་ས་ནྲལ་སོགས་པའི་རྐྱེན་རྣམས་དང༌། བྱིངས་ལས་ཚིག་ཏུ་སྒྲུབ་པར་བྱེད་པ་ལ་ཡིག་དབྱངས་མེད་བསྒྱུར་བའི་ཏིངྲའི་རྣམ་དབྱེ་བཅོ་བརྒྱད་དེ་ཀ་ལཱ་པར་ཀུན་བཤད་ཏི་སོགས་ཀྱི་རྣམ་དབྱེ་བརྒྱ་དང་བརྒྱད་ཅུར་གྲགས་པ་བྱེད་དངོས་ལས་གསུམ་སྟོན་པར་བྱེད་པ་རྣམས་དང༌། བྱིངས་ལས་མིང་དུ་སྒྲུབ་པར་བྱེད་པ་ཀྲྀཏྲ་ཀྱི་རྐྱེན་ཙཱནྡ་པར་སྐབས་དང་པོའི་རྐང་པ་ཕྱེད་གསུམ་དང༌། ཀ་ལཱ་པར་ལེའུ་ལྔས་རྒྱས་པར་བཤད་པ་རྣམས་ནི་བྱིངས་ཁོ་ན་དང་འབྲེལ་བ་ཡིན་ལ། མིང་གི་མཐར། ཀྱཙྲ་དང༌། སོགས་ཁོངས་ནས་ཀཱམྱཙྲ་དང༌། ཎི་ཙྲ་ལ་སོགས་པ་རྣམས་ནི་མིང་ཉིད་བྱིངས་སུ་སྒྲུབ་པར་བྱེད་པའི་རྐྱེན་དང༌། མིང་གི་(༡༡༢བ)མཐར། དཱི་ཥྲ་ཌཱ་པྲ་ཙཱ་པྲ་སོགས་བུད་མེད་ཀྱི་རྐྱེན་སྦྱར་བ་ནི་རྟགས་ཉིད་རྟགས་སུ་སྒྲུབ་པའི་རྐྱེན་དང༌། ཙཱནྡ་པར་རྐང་པ་དགུ་ཙམ་གྱིས་ཤིན་ཏུ་རྒྱས་པར་བསྟན་པ་གཙོ་བོར་མིང་དང་འགའ་ཞིག་ཚིག་མཐར་ཡང་སྦྱོར་བས་སྦྱོར་ཡུལ་གྱི་ངག་དེ་ལ་ཕན་འདོགས་པར་བྱེད་པ་དེ་ཕན་དུ་གྲགས་པ་སྟེ་མིང་ཉིད་མིང་དུ་སྒྲུབ་པ་དང༌། སོགས་ཁོངས་ནས་ཚིག་ཏུ་སྒྲུབ་པའི་རྣམ་དབྱེ་དངོས་མིན་ཀྱང་དེ་དང་ཆ་འདྲ་བར་བྱེད་པའང་ཁ་ཅིག་ཡོད་པ་དང༌། རྟགས་གསུམ་མཐར་སུ་པྲའི་རྣམ་དབྱེ་བདུན་གསུམ་ཉེར་གཅིག་སྦྱར་བས་བྱེད་ཅན་དྲུག་དང་འབྲེལ་བ་ལ་སོགས་པའི་དོན་སྟོན་པར་བྱེད་པ་མིང་ལས་ཚིག་ཏུ་སྒྲུབ་པར་བྱེད་པ་རྣམས་སོ། ། རིགས་དང་ཡོན་ཏན་བྱ་བ་ངོ་བོའི་སྒྲ། ། བཞིའམ་ཡང་ན་བྱེད་དངོས་ལས་སུ་འདུ། ། བྱིངས་ལས་རྐྱེན་གྱིས་སྒྲུབ་པའི་སྒྲ་དུ་མར་བཤད་པ་དེ་རྣམས་ཀྱང་མདོར་བསྡུ་ན། པུ་རོ་ཥཿསྐྱེས་བུ། གཽཿབ་ལང༌། ཨ་ཤྭཿརྟ་ལ་སོགས་པ་རིགས་བརྗོད་པའི་སྒྲ་དང༌། ནཱི་ལཿསྔོན་པོ། ཤུཀླཿདཀར་པོ་ལ་སོགས་པ་ཡོན་ཏན་བརྗོད་པའི་སྒྲ། པ་ཙ་ཏི། འཚེད་པར་བྱེད། པ་ཋ་ཏི། ཀློག་པར་བྱེད། ལྟ་བུ་བྱ་བ་བརྗོད་པའི་སྒྲ་དང༌། དེ་དག་ལས་གཞན་པ་ངོ་བོའི་དོན་ཙམ་ལས་ཁྱད་པར་གྱི་བྱ་བ་མེད་པ་རྣམས་ནི་ཇི་ལྟ་བའི་སྒྲ་སྟེ་རྣམ་པ་བཞིར་བསྡུ་བ་མི་ཤྲའི་རིགས་ཀྱི་སློབ་དཔོན་མཆོག་སྲེད་ཀྱིས་བཤད་པ་དང༌། ཡང་ན། བྱེད་པ་དང༌། དངོས་པོ་དང༌། ལས་སྟོན་པའི་སྒྲར་ཐམས་ཅད་འདུའོ། ། ད༣ གསུམ་པ་[རྣམ་འགྱུར་རྣམས་སོ་སོར་བཤད་པ་]ནི། རྣམ་འགྱུར་དངོས་དང་བསྡུ་བ་གཉིས་ཡིན་ཏེ། ། བསྒྱུར་རམ་དབྱི་བ་རྣམ་འགྱུར་ངོ་བོ་ལ། ། བྱིངས་རྐྱེན་རྟགས་དང་གློ་བུར་མི་ཟད་ཚིག ། བརྗོད་དང་ཁྱད་དོན་རྗེས་སུ་འབྲེལ་རྣམས་དབྱེ། ། བྱིངས་དང་རྐྱེན་རྣམས་ཕྲད་པ་ལ་སོགས་ལས་གཟུགས་གཞན་དུ་གྲུབ་པ་རྣམ་འགྱུར་ཅེས་བྱ་སྟེ། དེ་ལ། རྣམ་འགྱུར་དངོས་དང༌། དེའི་ཆར་གཏོགས་པ་བསྡུ་བ་དང་གཉིས་སོ། ། དང་པོ་ནི། བྱིངས་ཀྱི་དང་པོ་ཥྲའི་ས། ཎྲའི་ན་རུ་བསྒྱུར་བ་དང༌། རྗེས་འབྲེལ་དབྱི་བ་(༡༡༣ན)རྣམས་ནི་རྣམ་འགྱུར་ཅེས་བྱ་བའི་ངོ་བོ་ཡིན་ལ། དབྱི་བ་ནི་བྱིངས་ཀྱི་རྗེས་སུ་འབྲེལ་བ་ཨ་ལ་སོགས་པའི་དབྱངས་དང༌། ཊུ་ཌུ་སོགས་གསལ་བྱེད་ཨི་རྭ་སོགས་གཉིས་ཀ་རྣམས་དང༌། རྐྱེན་གྱི་རྗེས་སུ་འབྲེལ་བ་སནྲ་གྱི་ནུ། གྷ་ཧའི་ཉ་ལྟ་བུ་གསལ་བྱེད་དང༌། ལ་ཊྲའི་ཊྲ་དང་ཨ། ང་སིའི་དྲ་དང་ཨི་ལྟ་བུ་དབྱངས་གསལ་གཉིས་ཀ་དང༌། རིང་ཐུང་གི་རྟགས་ཀྱི་རྗེས་འབྲེལ་ཏྲ་ཡིག་དང༌། གློ་བུར་བའི་རྐྱེན་ཨཱ་ག་མ་རྣམས་ཀྱི་རྗེས་འབྲེལ་ནུ་མའི་མྲ་ལྟ་བུ་དང༌། གཞན་ཡང་མི་ཟད་པའི་སྡེ་ཚན་དང་ཚིག་མཐའི་རྗེས་འབྲེལ་ཁ་ཅིག་སྟེ། དེ་དག་རྣམས་ལས་ཨ་ནི་སྒྲ་དེ་ཉིད་རྗོད་པར་བྱེད་པའི་དོན་ཡིན་ཏེ། དེའང་སྒྲའི་བྱ་བ་དངོས་ལ་གསལ་བྱེད་ཀ་ལྟ་བུ་ཞིག་ལས་མི་མཁོ་ཡང་དབྱངས་མེད་བརྗོད་དུ་མེད། ཀྲ་ལ་ཨ་ཞུགས་པ་དེ་རྐྱེན་གཞན་དང་སྦྲེལ་བའི་ཚེ་དབྱི་བ་ལྟ་བུ་དང༌། འགའ་ཞིག་ཁྱད་པར་གྱི་དོན་ཡིན་ཏེ་ཁྱད་ཆོས་ཀྱི་བྱ་བ་བྱུང་ཟིན་ནས་མཚོན་བྱེད་ཉིད་དབྱི་བ་དང༌། འགའ་ཞིག་རྗེས་སུ་འབྲེལ་བ་ཙམ་སྟེ་ངོ་བོའམ་རང་བཞིན་གྱི་དོན་མཚོན་པས་བྱ་བ་བྱུང་ནས་དེ་རྣམས་དབྱི་བར་བྱའོ། ། དོན་དང་རྣམ་པ་ཉེ་སྒྱུར་ཨཱ་ག་མ། ། ཡན་ལག་རྣམ་འགྱུར་ཡིན་ནོ་ཕྲད་པ་ལ། ། ཡི་གེ་རྐྱེན་དང་རྣམ་པར་དབྱེ་བ་གསུམ། ། མཚམས་སྦྱོར་བསྒྱུར་སོགས་ལུས་འགྱུར་མཐའ་ཡས་སོ། ། དོན་དང་རྣམ་པ་གཉིས་ཀ་གཞན་དུ་སྒྱུར་བར་བྱེད་པ་ཉི་བསྒྱུར་ཉི་ཤུ་པོ་རྣམས་ཏེ། ཐོབ་པའི་དོན་ཅན་གྱི་ནཱིའི་སྔོན་དུ་ཉེ་བསྒྱུར་པྲ་བཞག་པས། པྲ་ཎཱི་འདྲེན་པའམ་གཙོ་བོ་ལ་འཇུག་པ་དང༌། མཱ་ན་ཞེས་པའི་ཁམས་གཅིག་ལ། ཉེ་བསྒྱུར་པྲ་དང་ཕྲད་ན་པྲ་མཱ་ཎ། ཚད་མ། ཨ་ནུ་དང་ཕྲད་ན་ཨ་ནུ་མཱ་ན། རྗེས་དཔག ། དེ་བཞིན་དུ། ཨུ་པ་མཱ། དཔེ། པྲ་ཏི་མཱ། གཟུགས་བརྙན། ཨ་བྷི་མཱ། མངོན་པའི་ང་རྒྱལ་དུ་འགྱུར་བ་སོགས་ཤིན་ཏུ་མང་པོ་རྣམས་དང༌། ཨཱ་ག་མའི་རྐྱེན་ནི་ཐོག་མཐའ་བར་གསུམ་དུ་མ་ངེས་པར་གློ་བུར་དུ་འབྱུང་བ་སྟེ། ཨ་(༡༡༣བ)ཡ་དང༌། ཀཱ་རའི་བར་དུ་ས་ཀྲ་ཨཱ་ག་མ་བྱིན་པས། ཨ་ཡ་སྐཱ་ར་ལྕགས་ལ་འཇུག་པ་ལྟ་བུ་རྣམས་ནི་ཡན་ལག་གི་རྣམ་འགྱུར་ཡིན་ནོ། ། ཕྲད་པའི་རྣམ་འགྱུར་ལ། བྱིངས་དང་རྐྱེན་འཕྲད་པས་སྠཱའི་ཏིཥྛ། དྲྀཤྱའི་བ་ཤྱ་སོགས་ཡི་གེ་གཟུགས་གཞན་དུ་བསྒྱུར་བ་དང༌། ཡོན་ཏན་དང་འཕེལ་བ་སོགས་ཡན་ལག་ཙམ་བསྒྱུར་བ་དང༌། ཀྲྀཏྲ་རྐྱེན་ཡུ་ཨ་ན། བུ་ཨ་ཀ་རུ་བསྒྱུར་བ་སོགས་དང༌། དེ་ཕན་གྱི་རྐྱེན་ཚྲ་ཨཱི་ཡྲ་རུ་བསྒྱུར་བ་ལྟ་བུ་དང༌། རྣམ་པར་དབྱེ་བ་ཀུན་བཤད་ཏིངྲ་སོགས་བཅོ་བརྒྱད་ལ྄་དབྱངས་མེད་བསྒྱུར་བ་ལས་བྱུང་བ་སོགས་དང༌། སུ་སོགས་ཀྱི་ཊཱ་ཨི་ན། བེཡ་རུ་བསྒྱུར་བ་ལ་སོགས་པ་སྟེ། མདོར་ན། ཡི་གེ། རྐྱེན། རྣམ་དབྱེ་བསྒྱུར་བ་གསུམ། ཨ་དང་ཨ་འདུས་པས་ཨཱ་རིང་པོ་གཅིག་ཏུ་གྱུར་བ་དང༌། ཨ་ཨི་འདུས་པས་ཨེ། ཨ་ཨུ་འདུས་པས་ཨོ་རུ་གྱུར་པ་ལྟ་བུ་དབྱངས་གསལ་ཕྲད་པའི་མཚམས་སྦྱོར་གྱིས་གཟུགས་གཞན་དུ་བསྒྱུར་བ་སོགས་སྒྲའི་ལུས་འགྱུར་མཐའ་ཡས་སོ། ། ཁྱད་པར་གྲངས་སྔོན་གྲངས་མེད་དང་པོ་སོགས། ། གཞན་དོན་དང་གི་དོན་གྱི་ཚིག་སྡུད་དྲུག ། རྣམ་འགྱུར་གཉིས་པ་ཚིག་སྡུད་ལ་བརྟེན་པ་ནི་མིང་ངམ་རྟགས་ལ་སུ་སོགས་ཀྱི་རྣམ་དབྱེ་བྱིན་ནས་ཚིག་ཏུ་གྲུབ་པའི་མིང་གཉིས་སམ་མང་པོ་ཕྱོགས་སུ་སྡུད་པ་ནི་ཚིག་སྡུད་དེ། དེ་ལའང་དབྱེ་བ་རྣམ་པ་དྲུག་སྟེ། ཀརྨ་དྷཱར། ལས་འཛིན་པ་སྟེ། ལས་ནི་འཛིན་པར་བྱ་བའི་ཁྱད་པར་ཡིན་པས་ཁྱད་པར་ཅན་གྱི་བསྡུ་བ་དང༌། དྭི་གུ། བ་གཉིས་པ། ཞེས་གྲངས་གཉིས་ཀྱི་སྐད་དོད་དྭི་སྔོན་དུ་ཡོད་པ་ལྟ་བུ་གྲངས་སྔོན་མ་ཅན་གྱི་བསྡུ་བ་དང༌། ཨུ་པ་ཀུམྦྷ། ཉེ་བའི་བུམ་པ་ལྟ་བུ་མི་ཟད་པ་བརྗོད་བྱའི་གཙོ་བོར་གྱུར་པ་མི་ཟད་པའི་བསྡུ་བ་དང༌། ཏཏྤུ་རུཥ། དེའི་སྐྱེས་བུ་སྟེ། འདིར་ཏཏ་དང་པུ་རུ་ཥའི་བར་ནས་རྣམ་དབྱེ་དྲུག་པ་བསྡུས་པས་མཚོན་རྣམ་དབྱེ་བདུན་གསུམ་ཉེར་གཅིག་རང་རང་གི་དོན་ལ་སྦྱར་བ་བསྡུས་པ་དང་པོ་ལ་སོགས་པའི་བསྡུ་བ། བ་ཧུ་བྲཱི་ཧིཿ། འབྲུ་མང་(༡༡༤ན)པོ་པ། ཞེས་པ་འབྲུ་མང་བ་ཙམ་མ་ཡིན་པ། དེའི་ཡུལ་ལམ་བདག་པོ་ལྟ་བུའི་དངོས་པོ་གཞན་གྱི་དོན་སྟོན་པ་གཞན་དོན་གྱི་བསྡུ་བ། དྭནྡྲཿ། གཉིས་དང་གཉིས་ཞེས་པ་ལྟ་བུ་ངང་གི་དོན་འཇུག་པའི་ཙའི་སྒྲ་བསྡུས་པ་ངང་གི་དོན་གྱི་ཚིག་སྡུད་དེ་ཐམས་ཅད་ཀྱང་དོན་མང་པོ་རྣམས་དོན་གཅིག་ཏུ་སྦྱོར་བ་དང༌། བརྗོད་པ་དུ་མ་དང་རྣམ་དབྱེ་མང་པོ་རྣམས་གཅིག་ཏུ་སྦྱོར་བ་དང༌། བརྗོད་མི་བདེ་བ་དང་ཚིག་ཉུང་བརྗོད་བདེར་སྦྱོར་བ་ནི་བསྡུ་བའི་དགོས་པ་སྟེ། སྤྱིར་དྲུག །ནང་གསེས་སུ་ཉེར་བརྒྱད་ཙམ་དུ་འགྱུར་བར་བཤད་དོ། ། ཐ༣ གསུམ་པ་དོན་བསྡུ་ནི། ངོ་བོ་མིང་ཚིག་རྣམ་འགྱུར་གསུམ་དུ་འདུ། ། སྒྲ་ཤེས་དོན་གྱི་ཆ་ལ་རྨོངས་མི་འགྱུར། ། དེ་དག་ཐམས་ཅད་སྒྲའི་ངོ་བོར་བསྡུ་ན། མིང་དང༌། ཚིག་དང༌། རྣམ་འགྱུར་གསུམ་དུ་འདུ་བ་ཡིན་ནོ། ། དེ་ལྟར་ལེགས་པར་སྦྱར་བ་སྒྲའི་སྦྱོར་བ་ཚུལ་བཞིན་དུ་ཤེས་ན་ཚིག་ལ་ལྟ་ཅི་སྨོས་ཏེ། དོན་གྱི་ཆ་ལའང་རྨོངས་པར་མི་འགྱུར་བས་ཚིག་དོན་གཉིས་ཀ་བདེ་བླག་ཏུ་རྟོགས་པའི་བློ་གྲོས་སྐྱེ་བར་འགྱུར་རོ། ། ཏ༢ གཉིས་པ་ཚད་མའམ་གཏན་ཚིག་རིག་པ་བཤད་པ་ལ་གཉིས། ཐ༡ དགོས་འབྲེལ་གྱིས་མཚམས་སྦྱར། ཐ༢ རིག་ལམ་དངོས་བཤད་པའོ། ། ཐ༡ དང་པོ་ནི། དོན་ལ་འཁྲུལ་པ་ཚར་གཅོད་ཚད་མ་ནི། ། དངོས་བསྟན་མེད་པའི་ཤེས་བྱ་ཇི་སྙེད་པའི་དོན་ལ་རང་བློ་ལྐོག་གྱུར་ཏུ་འདོད་པ་ལ་སོགས་པ་ལོག་པར་རྟོག་པའི་འཁྲུལ་པ་ཚར་གཅོད་པའི་རིག་གནས་ཚད་མ་ནི་རིག་པའི་དབང་ཕྱུག་གཉིས་ཀྱི་རྗེས་འབྲང་གཞིར་བཞག །ཁས་ལེན་སྐྱོང་ཚུལ་གྱི་སྲོལ་མི་འདྲ་བ་འགའ་ཞིག་བྱུང་བ་ལས་འདིར་འདུས་ཤིང་གསལ་བ་ཚད་མ་ཕྱི་རབས་པ་ལ་ཡོངས་སུ་གྲགས་པའི་བསྡུས་པ་ཅུང་ཟད་བསྟན་པར་བྱའོ། ། ཐ༢ གཉིས་པ་[རིག་ལམ་དངོས་བཤད་པ་]ལ་གསུམ། ད༡ བསྡུས་པ་རྒྱས་པར་བཤད་པ། ད༢ དེ་རྟོག་གེའི་ཚིག་དོན་བརྒྱད་དང་གནས་གསུམ་དུ་བསྡུ་བ། ད༣ དེ་དག་གི་སྙིང་པོ་ཚུལ་ལྔར་བསྡུ་བའོ། ། ད༡ དང་པོ་ལ་གཉིས། ན༡ མདོར་བསྟན། (༡༡༤བ) ན༢ རྒྱས་བཤད་དོ། ། ན༡ དང་པོ་ནི། ཡུལ་དང་ཡུལ་ཅན་དེ་རྟོགས་བྱེད་པའི་ཐབས། ། གཏན་ཚིག་རིག་པ་ཐམས་ཅད་ཡུལ་དང༌། ཡུལ་ཅན་དང༌། དེ་རྟོགས་པར་བྱེད་པའི་ཐབས་གསུམ་ལས་འཕྲོས་པའོ། ། ན༢ གཉིས་པ་[རྒྱས་བཤད་]ལ་བཞི། པ༡ ཡུལ། པ༢ ཡུལ་ཅན། པ༣ རྟོགས་བྱེད་རྒྱས་པར་བཤད། པ༤ ལུགས་སྲོལ་གཞན་ཞར་བྱུང་སྨོས་པའོ། ། པ༡ དང་པོ་ནི། ཡུལ་ཤེས་གཞལ་བྱ་གོ་ཡུལ་རྟོགས་བྱ་སྟེ། ། ཚད་མས་རྟོགས་པར་བྱ་བ་ནི་ཤེས་བྱ་ཡིན་ལ། ཡུལ་དང་ཤེས་བྱ་གཞལ་བྱ་རྣམས་གཙོ་བོར་དོན་གཅིག་ཡིན་པས། ཡུལ་གྱི་མཚན་ཉིད་གོ་བར་བྱ་བའམ་རིག་པར་བྱ་བ། ཤེས་བྱའི་མཚན་ཉིད་བློ་ཡི་ཡུལ་དུ་བྱར་རུང་བ། གཞལ་བྱའི་མཚན་ཉིད་ཚད་མས་རྟོགས་པར་བྱ་བའོ། ། ཡུལ་ལ་ངོ་བོ་དངོས་པོ་དངོས་མེད་དང༌། ། འདུས་བྱས་མ་བྱས་རྟག་དང་མི་རྟག་གོ། ། ཡུལ་ལ་ངོ་བོའི་སྒོ་ནས་དབྱེ་ན། དངོས་པོ་དང་། དངོས་མེད། འདུས་བྱས་དང་། འདུས་མ་བྱས། རྟག་པ་དང་། མི་རྟག་པའོ། ། མཚན་ཉིད་རིམ་པ་བཞིན། དོན་བྱེད་ནུས་པ། དོན་བྱེད་ནུས་སྟོང་། དཔེར་ན། ནམ་མཁའ་ལྟ་བུ། རང་གི་རྒྱུ་རྐྱེན་ལས་སྐྱེས་པ། རང་གི་རྒྱུ་རྐྱེན་ལས་མ་སྐྱེས་པ། མི་འཇིག་པའི་ཆོས། རང་གྲུབ་དུས་ལས་དུས་གཉིས་པར་མི་སྡོད་པའི་དངོས་པོ་རྣམས་སོ། ། དངོས་ལ་བེམ་རིག་རྒྱུ་འབྲས་ནང་གསེས་བཅས། ། དངོས་པོ་ལ་ངོ་བོའི་སྒོ་ནས་དབྱེ་ན། བེམ། རིག་གཉིས། བེམ་པོའི་མཚན་ཉིད་ནི། རྡུལ་དུ་གྲུབ་པ། གཉིས་པའི་མཚན་ཉིད་ནི། ཡུལ་རིག་པ། བེམ་པོ་ལ་དབྱེ་ན། ཕྱི་དོན་བེམ་པོ་དང་། ནང་དོན་བེམ་པོ་གཉིས། མཚན་ཉིད་རིམ་བཞིན། ཕྱིའི་རྡུལ་དུ་གྲུབ་པ་དང་། ནང་གི་རྡུལ་དུ་གྲུབ་པ། ཕྱི་དོན་བེམ་པོ་ལ་དབྱེ་ན། གཟུགས། སྒྲ། དྲི། རོ། རེག་བྱ་ལྔ། མཚན་ཉིད་རིམ་བཞིན། བེམ་པོ་གང་ཞིག །མིག་རྣ་སྣ་ལ་སོགས་པའི་དབང་ཤེས་ཀྱི་དངོས་ཡུལ་དུ་གྱུར་པ། ནང་དོན་བེམ་པོ་ལ་དབྱེ་ན། མིག །རྣ། སྣ། ལྕེ། ལུས་ཀྱི་དབང་པོ་གཟུགས་ཅན་ལྔ། མཚན་ཉིད། ནང་དོན་བེམ་(༡༡༥ན)པོ་གང་ཞིག །མིག་སོགས་དབང་ཤེས་ཀྱི་བདག་རྐྱེན་དུ་རུང་བ། དངོས་པོ་ལ་བྱེད་པའི་སྒོ་ནས་དབྱེ་ན། རྒྱུ་དང་། འབྲས་བུ་གཉིས། མཚན་ཉིད། ཆོས་དེ་ཡོད་མེད་ཀྱི་རྗེས་སུ་འགྲོ་ལྡོག་བྱེད་པའི་དོན་གཞན་ཕྱི་མ་ རྒྱུ་ལ་ངོ་བོའི་སྒོ་ནས་དབྱེ་ན། དངོས་རྒྱུ་དང་། བརྒྱུད་རྒྱུ་གཉིས། མཚན་ཉིད་རིམ་བཞིན་ཆོས་དེའི་རྒྱུ་གང་ཞིག །ཆོས་དེའི་རྒྱུ་དང་ཁྱོད་ཀྱི་འབྲས་བུ་གཉིས་ཀ་ཡིན་པ་མེད་པ་ས་བོན་དང་མྱུ་གུ་ལྟ་བུ། གང་ཞིག་ཆོས་དེའི་རྒྱུ་དང་ཁྱོད་ཀྱི་འབྲས་བུ་གཉིས་ཀ་ཡིན་པ་ཡོད་པ་རྒྱུ་ས་བོན་ལས་རིམ་པར་མྱུ་གུ་སོགས་མཐར་འབྲས་བུ་ལྟ་བུའོ། ། རྒྱུ་ལ་གཙོ་ཕལ་གྱི་དབྱེ་བ་དང་རྐྱེན་བཞིའི་དབྱེ་བ་སོགས་ནང་གསེས་མང་ཞིང༌། ཞར་བྱུང་དུས་གསུམ་སོགས་ནི། འདས་པའི་མཚན་ཉིད་ཐལ་ཟིན་པ། མ་འོངས་པའི་མཚན་ཉིད་མ་སླེབ་ཅིང་ཐལ་མ་ཟིན་པ། ད་ལྟར་གྱི་མཚན་ཉིད་སྐྱེས་ལ་མ་འགག་པ། རགས་པའི་མཚན་ཉིད་རང་གི་བདག་ཉིད་དུ་གྱུར་པའི་ཕྱོགས་ཆ་ཡོད་པའི་རྡུལ། དཔེ་བུམ་པ་ལྟ་བུ། ཆ་མེད་ཀྱི་རྡུལ་གྱི་མཚན་ཉིད་རང་གི་བདག་ཉིད་དུ་གྱུར་པའི་ཕྱོགས་ཆ་མེད་པའི་རྡུལ། དཔེ་མདུན་གྱི་རྡུལ་ཆུང་ཐ་གཅིག་ལྟ་བུའོ། ། རྒྱུན་གྱི་མཚན་ཉིད། རང་གི་བདག་ཉིད་དུ་གྱུར་པའི་སྐད་ཅིག་སྔ་ཕྱི་དུ་མ་ཡོད་པའི་དངོས་པོ། དཔེར་ན། ལོ་ལྟ་བུ། སྐད་ཅིག་ཆ་མེད་ཀྱི་མཚན་ཉིད་ནི། རང་གི་བདག་ཉིད་དུ་གྱུར་པའི་སྐད་ཅིག་སྔ་ཕྱི་མེད་པའི་དངོས་པོ། དཔེར་ན། ཡི་གེའི་ཆ་ཤས་སུ་གྱུར་པའི་སྐད་ཅིག་དྲུག་ཅུའི་དང་པོ་ལྟ་བུའོ། ། བྱེད་ཚུལ་དབྱེ་བ་སྣང་ཞེན་འཇུག་ཡུལ་གསུམ། ། ཡུལ་ལ་ཡུལ་དུ་བྱེད་ཚུལ་མི་འདྲ་བའི་སྒོ་ནས་དབྱེ་ན། སྣང་ཡུལ་ལམ་གཟུང་ཡུལ། ཞེན་ཡུལ། འཇུག་ཡུལ་དང་གསུམ། གཟུང་ཡུལ་གྱི་མཚན་ཉིད་ནི། སྣང་ནས་རིག་པར་བྱ་བ། དོན་སྤྱི་ལྟ་བུ། ཞེན་ཡུལ་གྱི་མཚན་ཉིད་ནི། ཞེན་ནས་རིག་པར་བྱ་བ། ཁང་པ་གཞན་ན་གནས་པའི་མིའི་སྡོད་ལུགས་ལྟ་བུ། འཇུག་ཡུལ་གྱི་མཚན་ཉིད་ནི། བླང་དོར་བྱ་བའི་ཕྱིར་ཞུགས་པ་ན་མི་སླུ་བ། དཔེར་ན། སོ་(༡༡༥བ)ནམ་བྱེད་པའི་སྐྱེས་བུ་ལ་ས་བོན་དང་ཆུ་ལུད་དྲོད་གཤེར་ཚོགས་པའི་ཞིང་ལྟ་བུ་སྟེ། འདི་གསུམ་ལའང་ནང་གསེས་དབྱེ་བ་མང་ངོ༌། ། གཞལ་བྱ་རྟོགས་ཚུལ་རང་དང་སྤྱི་མཚན་ནམ། ། མངོན་ལྐོག་ཤིན་ལྐོག་བརྗོད་བྱ་ཞོར་ལ་བཞག ། གཞལ་བྱ་ལ་རྟོགས་ཚུལ་གྱི་སྒོ་ནས་དབྱེ་ན། རང་མཚན་དང་། སྤྱི་མཚན་གཉིས་སམ། ཡང་ན། གཞལ་བྱ་མངོན་གྱུར། ལྐོག་གྱུར། ཤིན་ཏུ་ལྐོག་གྱུར་གསུམ་སྟེ། དེ་ལ་རང་མཚན་གྱི་མཚན་ཉིད་ནི། དོན་དམ་པར་དོན་བྱེད་ནུས་པ། དཔེར་ན། སྔོན་པོ་ལྟ་བུའོ། ། སྤྱི་མཚན་གྱི་མཚན་ཉིད་ནི། དོན་དམ་པར་དོན་བྱེད་མི་ནུས་པའི་ཆོས། རྟོག་པ་ལ་ཡུལ་དུས་འདྲེས་པར་སྣང་བའི་སྣང་ཡུལ། དཔེར་ན། རྟོག་པ་ལ་ལྟོ་ལྡིར་ཞབས་ཞུམ་སྣང་བ་ལྟ་བུའོ། ། གཞལ་བྱ་མངོན་འགྱུར་གྱི་མཚན་ཉིད་ནི། མངོན་སུམ་ཚད་མས་རྟོགས་པར་བྱ་བ། དཔེར་ན། སྔོན་པོ་ལྟ་བུའོ།། གཞལ་བྱ་ལྐོག་གྱུར་གྱི་མཚན་ཉིད་ནི། རྗེས་དཔག་ཚད་མས་རྟོགས་པར་བྱ་བ། དཔེར་ན། སྔོན་པོ་མི་རྟག་པ་ལྟ་བུའོ། ། ཡང་ན་དེ་གཉིས་ཀྱི་མཚན་ཉིད་ནི། མྱོང་སྟོབས་ཀྱིས་སྒྲོ་འདོགས་བཅད་པར་བྱ་བ་དང༌། རྟགས་སྟོབས་ཀྱིས་སྒྲོ་འདོགས་བཅད་པར་བྱ་བ། གཞལ་བྱ་ཤིན་ཏུ་ལྐོག་གྱུར་གྱི་མཚན་ཉིད་ནི། དཔྱད་པ་གསུམ་གྱིས་དག་པའི་ལུང་ལ་བརྟེན་ནས་རྟོགས་པར་བྱ་བ། དཔེར་ན། སྦྱིན་པས་ལོངས་སྤྱོད་ཁྲིམས་ཀྱིས་བདེ། ། ཞེས་པའི་ལུང་རང་གི་བསྟན་བྱའི་དོན་ལ་མི་སླུ་བ་ལྟ་བུའོ། ། བརྗོད་བྱའི་མཚན་ཉིད་ནི། བརྡ་ལས་གོ་བར་བྱ་བ། འདི་ལའང་། ཞེན་པའི་བརྗོད་བྱ་དང༌། དངོས་ཀྱི་བརྗོད་བྱ། ཡང་ན། འཆད་དུས་འཇུག་དུས་ཀྱི་བརྗོད་བྱ་མཆིས་པའང་ཡུལ་གྱི་ཞར་བྱུང་དུ་རྣམ་པར་གཞག་གོ།། པ༢ གཉིས་པ་[ཡུལ་ཅན་]ནི། ཡུལ་ཅན་གོ་བྱེད་རྗོད་དང་ཤེས་པ་གཉིས། ། ཡུལ་དེ་དག་ལ་རྟོག་པར་བྱེད་པའི་ཡུལ་ཅན་གྱི་མཚན་ཉིད་ནི། གོ་བྱེད་དམ་རིག་བྱེད། དབྱེ་ན། རྗོད་བྱེད་དང་། ཤེས་པ་གཉིས། རྗོད་བྱེད་ཀྱི་མཚན་ཉིད་ནི། བརྡའི་དབང་གིས་བརྗོད་བྱ་གོ་བྱེད། ཤེས་པའི་མཚན་ཉིད་ནི། བེམ་པོ་ལས་ལོག་པའི་གསལ་ཞིང་རིག་པའོ། ། རྗོད་བྱེད་(༡༡༦ན)ངོ་བོ་མིང་ཚིག་ངག་དང་གསུམ། ། བརྗོད་བྱ་རིགས་བརྗོད་ཚོགས་བརྗོད་རྗོད་པའི་ཚུལ། ། ཆོས་དང་ཆོས་ཅན་མི་ལྡན་གཞན་ལྡན་གཅོད། ། འཆད་དུས་ཞེན་དངོས་ཡི་གེ་གང་ཟག་ཀྱང༌། ། རྗོད་བྱེད་ལ་ངོ་བོའི་སྒོ་ནས་དབྱེ་ན། མིང་། ཚིག །ངག་གསུམ། མིང་གི་མཚན་ཉིད་ནི། ཡུལ་གྱི་ངོ་བོ་ཙམ་རྗོད་བྱེད། དཔེར་ན། བུམ་པ་ཞེས་པ་ལྟ་བུ། ཚིག་གི་མཚན་ཉིད་ནི། ཡུལ་གྱི་ངོ་བོ། ཡང་ཁྱད་ཆོས་དང་སྦྱར་ནས་རྗོད་བྱེད། དཔེར་ན། བུམ་པ་ཆུང་ངུ་ཞེས་པའི་སྒྲ་ལྟ་བུ། ངག་གི་མཚན་ཉིད་ནི། ཡུལ་གྱི་ཁྱད་ཆོས་ཀྱང་འཇུག་ལྡོག་གི་གཞི་དང་སྦྱར་ནས་རྗོད་བྱེད། དཔེར་ན། བུམ་པ་ཆུང་ངུས་ཆུ་སྐྱོར་ཅིག་ཅེས་པའི་སྒྲ་ལྟ་བུའོ། ། རྗོད་བྱེད་ལ་བརྗོད་བྱའི་སྒོ་ནས་དབྱེ་ན། རིགས་རྗོད་ཀྱི་སྒྲ་དང་། ཚོགས་རྗོད་ཀྱི་སྒྲ་དང་གཉིས། དང་པོའི་མཚན་ཉིད་ནི། རང་གིས་ཟིན་པར་བརྗོད་པའི་བརྗོད་བྱའི་དོན་དེ་ཡིན་ན་རིགས་སྤྱི་ཡིན་པ། དཔེར་ན། གཟུགས་ཞེས་པའི་སྒྲ་ལྟ་བུའོ། ། ཚོགས་རྗོད་ཀྱི་སྒྲའི་མཚན་ཉིད། རང་གིས་ཟིན་པར་བརྗོད་པའི་བརྗོད་བྱ་ཡིན་ན་རྡུལ་རྫས་བརྒྱད་འདུས་པའི་གོང་བུ་ཡིན་པ། དཔེར་ན། རི་བོ་གངས་ཅན་ཞེས་པའི་སྒྲ་ལྟ་བུའོ། ། བརྗོད་བྱ་ལ་བརྗོད་ཚུལ་གྱི་སྒོ་ནས་དབྱེ་ན། ཆོས་བརྗོད་ཀྱི་སྒྲ་དང༌། ཆོས་ཅན་བརྗོད་པའི་སྒྲ་གཉིས། དང་པོའི་མཚན་ཉིད་ནི། རང་གིས་ཟིན་པར་བརྗོད་པའི་བརྗོད་བྱའི་ཁྱད་ཆོས་གཞན་རྣམས་རང་གི་བརྗོད་བྱར་སྤངས་པའི་སྒོ་ནས་བརྗོད་བྱ་གོ་བྱེད། དཔེར་ན། བ་གླང་རྟ་མིན་པ་ཉིད་ཡིན་ནོ་ཞེས་པའི་སྒྲ་ལྟ་བུའོ། ། ཆོས་