Tibetan
ཀའི་བཤད་སྲོལ་དང་འགྲེལ་ཊཱིཀ་ལ་མ་ལྟོས་པར་སྡེ་བདུན་གྱི་དགོངས་པ་དཔྱིས་ཕྱིན་པ་རང་སྟོབས་ཁོ་ནས་བསྡུས་ཤིང་བཀྲལ་བ་ཐུན་མིན་གྱི་བསྟན་བཅོས་རིག་གཞུང་རྒྱ་མཚོ་ཞེས་རིགས་པའི་ཚུལ་སྔ་ན་མེད་པའི་ཤིང་རྟའི་ལམ་སྲོལ་གཉིས་པ་དང༌། རྔོག་ལོ་ཆེན་པོ་དང་ཁྱད་པར་ཕྱ་བ་ཆོས་སེང་སོགས་ཀྱིས་རྒྱ་ཆེར་སྤེལ་བའི་ཚད་མ་སྔ་རབས་པའི་ལུགས་ཞེས་གྲགས་པ་སོགས་བརྗོད་བྱའི་སྤྱི་ལྡོག་འདྲ་བ་ལ་རྗོད་བྱེད་ཁས་ལེན་སྐྱོང་ཚུལ་ཅུང་ཟད་ཀྱི་ཟུར་མི་འདྲ་བའི་ལུགས་སྲོལ་ཐ་དད་པ་དཔེར་མཚོན་ན། སྐྱེད་ཚལ་བ་རྣམས། ཁ་དོག་དཀར་དམར་རྫས་ཆོས་ལྡོག་ཆོས་གཉིས། ། འགལ་དང་མི་འགལ་སྤྱི་དང་བྱེ་བྲག་གཉིས། ། འབྲེལ་དང་མི་འབྲེལ་ཐ་དད་ཐ་མིན་གཉིས། ། རྗེས་སུ་འགྲོ་ལྡོག་རྒྱུ་དང་འབྲས་བུ་གཉིས། ། སྔ་བཙན་བར་བཙན་ཕྱི་བཙན་མཚན་མཚོན་གཉིས། ། རྟགས་མང་གསལ་མང་དགག་པ་འཕར་ཚུལ་གཉིས། ། དངོས་འགལ་བརྒྱུད་འགལ་ཁྱབ་མཉམ་རྣམ་པ་གཉིས། ། ཡིན་གྱུར་མིན་གྱུར་ཡིན་ལོག་མིན་ལོག་གཉིས། ། ཡོད་རྟོགས་མེད་རྟོགས་དངོས་རྟོགས་རྟགས་རྟོག་གཉིས། ། ཞེས་བསྡུས་ཚན་བཅོ་བརྒྱད་དུ་བསྡུ་ཚུལ་སོགས་མང་ཡང་(༡༢༡ན)གཙོ་བོ་དེ་དག་རྣམས་སུ་འདུས་སོ། ། ད༢ གཉིས་པ་རྟོག་གེའི་ཚིག་དོན་བརྒྱད་དང་གནས་གསུམ་དུ་བསྡུ་བ་ནི། ཚད་མའི་གཞུང་གི་བརྗོད་བྱ་ཐམས་ཅད་ཀྱང༌། ། མངོན་རྗེས་ལྟར་སྣང་བཅས་པ་བདག་རིག་བྱེད། ། སྒྲུབ་དང་སུན་འབྱིན་ལྟར་སྣང་བཅས་པ་ཡིས། ། གཞན་ལ་གོ་བྱེད་རྟོག་གེའི་ཚིག་དོན་བརྒྱད། ། ཚད་མའི་གཞུང་རྣམས་ཀྱི་བརྗོད་བྱ་ཐམས་ཅད་མདོར་བསྡུ་ན། མངོན་སུམ་དང༌རྗེས་སུ་དཔག་པ་གཉིས། དེ་རེ་རེ་ལ་ཡང་དག་ལྟར་སྣང་བཅས་པས་གཉིས་ཏེ་བཞི་ནི་བདག་ཉིད་ཀྱིས་རིག་པའམ་གོ་བར་བྱེད་པའི་ཐབས་ཡིན་ལ། སྒྲུབ་ངག་དང་སུན་འབྱིན་གཉིས། རེ་རེ་ལ་ཡང་དག་དང་ལྟར་སྣང་བཅས་པས་གཉིས་ཏེ་བཞི་ནི་གཞན་ལ་གོ་བར་བྱེད་པས་རྟོག་གེའི་ཚིག་དོན་བརྒྱད་དུ་གྲགས་པའང་རང་དོན་དང་གཞན་དོན་གཉིས་སུ་འདུའོ། ། མདོར་ན་གཞལ་བྱ་མངོན་ལྐོག་ཤིན་ལྐོག་གསུམ། ། འཇལ་བྱེད་མངོན་རྗེས་དཔྱད་གསུམ་དག་པའི་ལུང༌། ། མངོན་སུམ་བཞི་དང་རྗེས་དཔག་གཏན་ཚིག་གསུམ། ། ཐ་སྙད་སྣ་ཚོགས་དེ་ལས་འཕྲོས་པའོ། ། ཚད་མའི་དོན་ཐམས་ཅད་མདོར་བསྡུ་ན། གཞལ་བྱ་མངོན་གྱུར། ལྐོག་གྱུར། ཤིན་ཏུ་ལྐོག་གྱུར་གསུམ། འཇལ་བྱེད་མངོན་སུམ། རྗེས་དཔག །དཔྱད་གསུམ་དག་པའི་ལུང་གསུམ་གྱིས་གཞལ་བ་ལ་ཐམས་ཅད་འདུ་ཞིང༌། དེའང་གཞལ་བྱ་མངོན་གྱུར་ནི། ཚུར་མཐོང་གི་དབང་དུ་བྱས་ཏེ་ཕྱི་རོལ་གཞན་རིག་མངོན་སུམ་གྱིས་མྱོང་སྟོབས་ཀྱིས་སྒྲོ་འདོགས་གཅོད་ནུས་པ་གཟུགས་སྒྲ་དྲི་རོ་རེག་བྱའི་སྐྱེ་མཆེད་ལྔ་དང༌། རང་རིག་ཚད་མས་མྱོང་ཞིང་རིགས་པའི་སྒོ་ནས་སྒྲོ་འདོགས་གཅོད་ནུས་པ་ཤེས་པའི་སྟེང་གི་མྱོང་བྱ་ཙམ་དུ་ཟད་པས་རྣམ་ཤེས་ཚོགས་དྲུག་གི་སྐྱེ་མཆེད་དང༌། ཆོས་ཀྱི་སྐྱེ་མཆེད་ཀྱི་ཕྱོགས་གཅིག་སེམས་བྱུང་རྣམས་ཀྱི་མྱོང་རིག་གི་ཆའོ། །འཕགས་པ་ལ་བདེན་བཞི་མི་རྟག་བཅུ་དྲུག་སོགས་བདག་མེད་ཀྱི་གནས་ལུགས་སངས་(༡༢༡བ)རྒྱས་ལ་ཤེས་བྱ་ཇི་སྙེད་པའང་མངོན་གྱུར་ཡིན་པར་དངོས་སྨྲ་རྣམས་འདོད་ཀྱང་ཆོས་ཀྱི་གྲགས་པས་སངས་རྒྱས་ཀྱི་མཁྱེན་ཚུལ་བསམ་གྱིས་མི་ཁྱབ་པར་གསུངས་གཞལ་བྱ་འདིའི་འཇལ་བྱེད་མངོན་སུམ་ནི་མངོན་སུམ་བཞི་སྟེ། དབང་པོའི་དང༌། ཡིད་ཀྱི་དང༌། རང་རིག་དང༌། རྣལ་འབྱོར་མངོན་སུམ་མོ། ། ལྐོག་གྱུར་ནི། དབང་པོ་གཟུགས་ཅན་རྣམས་དང༌། བདེན་བཞི་མི་རྟག་པ་དང༌། གྱུར་བའི་སྡུག་བསྔལ་དང༌། བདག་གི་བས་སྟོང་པ་དང༌། བདག་མེད་པ་སོགས་རྣམ་པ་བཅུ་དྲུག་པོ་རྣམས་དང༌། དེས་མཚོན་པའི་གང་ཟག་གི་བདག་མེད་དང་ཆོས་ཀྱི་བདག་མེད་དང༌། བདག་གཅིག་དང་དེ་བྱུང་གི་འབྲེལ་བ་དང༌། རྒྱུའམ་ནུས་པ་དང༌། སེམས་ཀྱི་སྟེང་གི་ཀུན་བྱང་གི་ས་བོན་དང་སྤང་གཉེན་གྱི་བྱ་བྱེད་ལ་སོགས་པ་ནི་གཞལ་བྱ་གཉིས་ལ་ལྐོག་གྱུར་ཡིན་ཏེ། དངོས་པོ་སྟོབས་ཞུགས་ཀྱི་གཏན་ཚིག་ཁོ་ནས་སྒྲུབ་དགོས་པའི་ཕྱིར། དེའང་གཞལ་བྱ་གང་ཟག་གི་མངོན་སུམ་གྱིས་མི་འགྲུབ་ཅིང་ཁུངས་རྣམ་དག་ལ་ལྟོས་དགོས་པའི་ཕྱིར་རོ། ། གཞལ་བྱ་འདིའི་འཇལ་བྱེད་དང་སྒྲུབ་བྱེད་དངོས་སྟོབས་རྗེས་དཔག་གི་རྟེན་གཏན་ཚིགས་ནི་རྣམ་པ་གསུམ་སྟེ། འབྲས་བུའི་དང༌། རང་བཞིན་གྱི་དང༌། མ་དམིགས་པའི་གཏན་ཚིགས་ཞེས་བྱའོ། ། ཤིན་ཏུ་ལྐོག་གྱུར་ནི། དགེ་སྡིག་སོགས་མངོན་སུམ་དང་དངོས་སྟོབས་ཀྱི་གཏན་ཚིགས་གཉིས་ཀས་མི་འགྲུབ་པར་ལུང་ཙམ་ལ་བརྟེན་ནས་རྟོགས་དགོས་པའི་གཞལ་བྱ་སྟེ། ལུང་ཡང་དཔྱད་གསུམ་གྱིས་མ་དག་པ་ནི་ལོག་ཕྱོགས་སྟོན་པའང་ཡོད་པས་ངེས་པའི་གེགས་བྱེད་ཙམ་དུ་ཟད་ལ། དཔྱད་གསུམ་གྱིས་དག་པའམ། ཡིད་ཆེས་ཉེས་ཟད་ཀྱི་ཚིག་དགོངས་གཞི་དགོས་པ་སོགས་མེད་པའི་ངེས་དོན་ཀྱི་ཚིག་རྣམས་ཏེ། རིགས་པའི་ཐ་སྙད་སྣ་ཚོགས་པ་ནི་རྩ་བ་དེ་དག་ལས་འཕྲོས་པ་ཁོ་ནའོ། ། དཔྱད་པ་གསུམ་ནི། མངོན་གྱུར་སྟོན་པ་ལ་མངོན་(༡༢༢ན)སུམ་གྱིས། ལྐོག་གྱུར་ལ་དངོས་པོ་སྟོབས་ཞུགས་རྗེས་དཔག་གིས། ཤིན་ཏུ་ལྐོག་གྱུར་ལ་རང་ཚིག་སྔ་ཕྱི་འགལ་བས་མི་གནོད་པའོ། ། ད༣ གསུམ་པ་དེ་དག་གི་སྙིང་པོ་ཚུལ་ལྔར་བསྡུ་བ་ནི། ཆོས་ཅན་དབྱེ་གཞི་ཆོས་ཀྱི་དབྱེ་བ་དང༌། ། ངེས་བྱའི་རྣམ་གཞག་ངེས་བྱེད་ཐལ་འགྱུར་དང༌། ། ལྟ་བ་དབུ་མར་འཇུག་པའི་ཚུལ་ལྔ་པོ། ། རིག་པའི་དབང་ཕྱུག་རྣམས་ཀྱིས་བསྡུས་པ་སྟེ། ། ཐ་སྙད་ཀྱིས་གཞལ་དོན་དམ་ཚད་མར་སྒྲུབ། ། ཤེས་བྱ་གཞལ་བྱ་གཞི་གྲུབ་ཡོད། ། ཆོས་དང་གཞི་དང་རྟེན་འབྲེལ་དང༌། ། དམིགས་པ་ཆོས་ཅན་ཡུལ་རྣམས་ནི། ། ཁྱབ་མཉམ་དབྱེ་གཞི་ཆོས་ཅན་ཡིན། ། ཅེས་པ་ལྟར། མིང་གི་རྣམ་གྲངས་དེ་ལྡན་གྱི་ཤེས་བྱ་ནི་དབྱེ་གཞི། དབྱེ་ན་དངོས་པོ་རྟག་པ་གཉིས། ། དགག་སྒྲུབ་མཚན་མཚོན་མཚན་གཞི་གསུམ། ། བྱས་དང་མ་བྱས་སྐྱེས་མ་སྐྱེས། ། འདུས་བྱས་མ་བྱས་དངོས་དངོས་མེད། ། འཇིག་དང་མི་འཇིག་ལ་སོགས་པའོ། ། ཞེས་སྤྱིའི་དབྱེ་བ་དང༌། དེ་ལས་བྱེ་བྲག་རྒྱ་ཆེར་དབྱེ་བ་ནི་ཆོས་ཀྱི་དབྱེ་བ། རྫས་ལྡོག་འགལ་འབྲེལ་སྤྱི་བྱེ་བྲག ། མཚན་མཚོན་རྒྱུ་འབྲས་ཡོད་མེད་རྟོགས། ། ཡིན་མིན་ལོག་དང་རྗེས་འགྲོ་ལྡོག ། དགག་གཞི་བརྩི་ཚུལ་སྔ་ཕྱི་བཙན། ། སྐོར་འབེབས་དང་ནི་བཅུ་གསུམ་ཡོད། ། ཅེས་ནང་གསེས་ཀྱི་དབྱེ་བ་དང་བཅས་པ་ནི་ངེས་པར་བྱ་བའི་རྣམ་གཞག ། ཤེས་པར་འདོད་པའི་ཆོས་ཅན་དང༌། ། བསྒྲུབ་བྱའི་ཆོས་སུ་བཟུང་བྱ་དང༌། ། ཤེས་བྱེད་ཀྱི་ནི་གཏན་ཚིག་གསུམ། ། ཐལ་ངག་འགོད་པའི་རྒྱུ་ཡིན་ནོ། ། ཞེས་སོགས་ངེས་བྱེད་ཐལ་འགྱུར་ཁྱབ་ལན་དང་བཅས་པ། གཞན་ཡང་བསྡུས་པའི་རིགས་པ་ལ། ། དཔྱད་ན་ཐོག་མཐའ་མི་རྙེད་ཅིང༌། ། དབུས་སུའང་གནས་པར་མི་འགྱུར་ཏེ། ། ཁས་བླངས་ཐམས་ཅད་འཇིག་པར་འགྱུར། ། ཐོག་མཐའ་མེད་ཅིང་དབུས་མི་དམིགས། ། ཁས་བླངས་མེད་ཅིང་གྲུབ་མཐའ་མེད། ། དེ་ཚེ་དབུ་མ་ཆེན་པོ་འོ། །(༡༢༢བ) ཞེས་པ་ལྟར། ཚད་འབྲས་དངོས་པོ་ཐམས་ཅད་བདག་མེད་སྤྲོས་བྲལ་གྱི་ཐོག་ཏུ་གཏན་ལ་འབེབས་པ་ནི་ལྟ་བ་དབུ་མར་འཇུག་པ་སྟེ། གར་དབང་ཆོས་ཀྱི་དབང་ཕྱུག་ལ་སོགས་པ་སྒྲུབ་བརྒྱུད་རིན་པོ་ཆེའི་སྐྱེས་ཆེན་རིགས་པའི་དབང་ཕྱུག་རྣམས་ཀྱིས་རྣམ་པར་བཞག་པའི་བསྡུས་པ་སྟེ། རྒྱས་པར་གཞུང་ཉིད་དུ་ལྟ་བ་ལས་འདིར་བསྡུ་མི་ནུས་ཤིང༌། ཐ་སྙད་ཀྱི་རིགས་པས་གཞལ་ནས་དོན་དམ་ཚད་མར་སྒྲུབ་པའི་དོན་ནི་ཐམས་ཅད་གཅིག་ཏུ་མཐུན་ནོ། ། གཞུང་ལུགས་རྣམས་ཀྱི་དོན་རིགས་པའི་རྣམ་དཔྱོད་ཀྱིས་གཏན་ལ་འབེབས་པ་ལ་འདི་ཉིད་མེད་དུ་མི་རུང་བ་ཡིན་པས་བསྡུས་ཚད་ལ་དང་པོར་འཇུག་པའི་ཕྱོགས་ཙམ་ཞར་བྱུང་དུ་སྨོས་ན། དེའང་དང་པོ་རྟགས་གསལ་གྱི་ངོས་འཛིན་ཚུལ་དང༌། སྔ་རྒོལ་ལ་ཕྱི་རྒོལ་གྱིས་ལན་བརྗོད་ཚུལ་གཉིས་ལས། དང་པོ་ལ། དཔེར་ན། བུམ་པ་ཆོས་ཅན། མི་རྟག་པར་ཐལ། བྱས་པ་ཡིན་པའི་ཕྱིར། ཞེས་པ་ལྟ་བུ་ཆོས་ཅན་ནམ། རྩོད་གཞི་བུམ་པ་དེ་ཉིད། མི་རྟག་པ་བསྒྲུབ་བྱའམ་གསལ་བ། བྱས་པ་སྒྲུབ་བྱེད་དམ་རྟགས་སམ་གཏན་ཚིག་ཏུ་ངོས་འཛིན་པར་བྱའོ། ། གཉིས་པ་སྔ་རྒོལ་ལ་ཕྱི་རྒོལ་གྱིས་རྩོད་ལན་འདེབས་ཚུལ་ལ་ཅུང་ཟད་ཕྱེ་ནས་བཤད་པ་དང༌། བསྡུས་ཏེ་བཤད་པའོ། ། དང་པོ་ལའང་། ཚད་མ་དང༌། ཚད་མིན་གཉིས་ལས། དང་པོ་ཚུལ་གསུམ་ཚད་མས་ངེས་པའི་གཏན་ཚིག་ནི། དཔེར་ན། བུམ་པ་ཆོས་ཅན། མི་རྟག་པར་ཐལ། བྱས་པའི་ཕྱིར། ཞེས་པ་ལྟ་བུ་འདོད་པའི་རྒོལ་བ་ལ། རྟགས་བྱས་པ་དེ་ཉིད་ཆོས་ཅན་བུམ་པ་ལ་འཇུག་པས་ཕྱོགས་ཆོས་ཀྱི་ཚུལ་ངེས་པ། རྟགས་བྱས་པ་དེ། སྒྲུབ་ཆོས་སམ་གསལ་བ་མི་རྟག་པ་དང་འགལ་བ་མ་ཡིན་པས་རྗེས་འགྲོའི་ཚུལ་ངེས་པ། རྟགས་བྱས་པ་དེ་ཉིད་གསལ་བ་མི་རྟག་པ་ལ་མ་ངེས་པ་མ་ཡིན་པས་ལྡོག་ཚུལ་ངེས་པ་བཅས་ཚུལ་གསུམ་པོ་དེ་ཉིད་ཚད་མས་ངེས་ན། ལན་འདེབས་པ་པོས་ལན་འདེབས་དགོས། གཉིས་པ་མ་ངེས་པ་ལ། མ་གྲུབ་པ་དང༌། འགལ་བ། མ་(༡༢༣ན)ངེས་པ་གསུམ་ལས། དང་པོ་ནི། ཕྱོགས་ལ་སྒྲུབ་བྱེད་དུ་མ་གྲུབ་པ་མ་གྲུབ་པའི་མཚན་ཉིད། དཔེར་ན། བུམ་པ་ཆོས་ཅན། མི་རྟག་པར་ཐལ། མ་བྱས་པའི་ཕྱིར་ལྟ་བུ། མ་བྱས་པའི་རྟགས་དེ་ཆོས་ཅན་ལ་མི་འཇུག་པ་དང༌། བུམ་པ་ཆོས་ཅན། རྟག་པར་ཐལ། མ་བྱས་པའི་ཕྱིར་ལྟ་བུ་རྟགས་གསལ་གཉིས་ཀར་ཆོས་ཅན་བུམ་པ་ལ་མི་འཇུག་པ་དང༌། ལུང་པ་མང་པོ་འདི་ག་ན་ཆོས་ཅན། རྨ་བྱ་ཡོད་པར་ཐལ། རྨ་བྱའི་སྒྲ་གྲགས་པའི་ཕྱིར་ལྟ་བུ་ཆོས་ཅན་ལ་ཐེ་ཚོམ་ཟ་ནས་རྟགས་མ་གྲུབ་པ་དང༌། ཕ་ཀིའི་གཞི་འདི་ཆོས་ཅན། མེ་ཡོད་པར་ཐལ། དུ་བ་རླངས་པ་གང་རུང་ཞིག་ཡོད་པའི་ཕྱིར། ལྟ་བུ་རྟགས་ལ་ཐེ་ཚོམ་ཟ་ནས་རྟགས་མ་གྲུབ་པ་དང༌། མོ་གཤམ་གྱི་བུ་ཆོས་ཅན། མི་བཟང་བར་ཐལ། མི་རིགས་བཟང་བའི་ཕྱིར་ཟེར་བ་ལྟ་བུ། ཆོས་ཅན་མེད་པས་རྟགས་མ་གྲུབ་པ་རྣམས་ལ་ལན་འདེབས་པ་པོས་རྟགས་མ་གྲུབ་ཅེས་བརྗོད་པར་བྱའོ། ། གཉིས་པ་འགལ་བའི་གཏན་ཚིག་ནི། བསྒྲུབ་པར་བྱ་བ་སྒྲུབ་བྱེད་ཕྱིན་ཅི་ལོག་གིས་སྒྲུབ་པ་འགལ་བའི་གཏན་ཚིགས་མཚན་ཉིད། དཔེར་ན། སྒྲ་ཆོས་ཅན། རྟག་པ་ཡིན་པར་ཐལ། བྱས་པ་ཡིན་པའི་ཕྱིར་ཟེར་བ་ལྟ་བུ། རྟགས་བྱས་པ་དེ་སྒྲ་ཆོས་ཅན་ལ་འཇུག་ཀྱང༌། གསལ་བ་མི་རྟག་པ་དང་འགལ་བས་ལན་འདེབས་པ་པོས་ཁྱབ་པ་འགལ་ཞེས་སྨྲའོ། ། གསུམ་པ་མ་ངེས་པའི་གཏན་ཚིག་ནི། མཐུན་ཕྱོགས་མི་མཐུན་ཕྱོགས་གཉིས་ཀར་ཡོད་པས་ཐེ་ཚོམ་ཟ་བ་མ་ངེས་པའི་མཚན་ཉིད། དཔེར་ན། པདྨ་རཱ་གའི་ཁ་དོག་ཆོས་ཅན། དམར་པོ་ཡིན་པར་ཐལ། ཁ་དོག་ཡིན་པའི་ཕྱིར། ཁ་དོག་གི་རྟགས་འདི་ཉིད། མཐུན་ཕྱོགས་པདྨ་རཱག་གི་དམར་པོ་དང༌། དེ་ལས་མི་མཐུན་པའམ་འགལ་ཕྱོགས་ཆོས་དུང་དཀར་པོ་སོགས་གཞན་ལའང་འཇུག་པས་མ་ངེས་སོ། ། གཉིས་པ་བསྡུས་ཏེ་བཤད་པ་ནི། རྟགས་དེ་རྩོད་གཞི་ཆོས་ཅན་ལ་མི་འཇུག་ན་རྟགས་མ་གྲུབ། བསྒྲུབ་བྱའི་གསལ་(༡༢༣བ)བ་དང་འགལ་ན་ཁྱབ་པ་འགལ་བ་དང༌། བསྒྲུབ་བྱའི་གསལ་བ་མ་ངེས་ན་ཁྱབ་པ་མ་ངེས་པ་དང༌། རྟགས་དེ་ཆོས་ཅན་ལ་མི་འཇུག་ཙམ་ན་གསལ་བ་དང་འགལ་བ་མ་ངེས་གང་ཡིན་ཀྱང་རྟགས་མ་གྲུབ་ལན་འདེབས། མ་གྲུབ་དང་འགལ་མ་ངེས་གསུམ་པོ་གང་ཡང་མ་ཡིན་ན་འདོད་ལན་འདེབས་སོ། ། གཞན་ཡང་ཁྱབ་པ་སྒོ་བརྒྱད་བརྩི་བའི་སྐབས་སུ། རྟགས་དེ་ཡིན་ན་གསལ་བ་དེ་ཡིན་པས་ཁྱབ་པ་རྗེས་ཁྱབ། རྟགས་དེ་མིན་ན་གསལ་བ་དེ་མིན་པས་ཁྱབ་པ་འགལ་ཁྱབ། གསལ་བ་ཡིན་ན་རྟགས་དེ་ཉིད་ཡིན་པས་ཁྱབ་པ་མཐུན་ཁྱབ། གསལ་བ་མིན་ན་རྟགས་དེ་ཉིད་མིན་པས་ཁྱབ་པ་ལྡོག་ཁྱབ། མདོར་ན། རྗེས་འགལ་གཉིས་དང་དེའི་ཕྱིན་ཅི་ལོག་བཅས་བཞི་པོ་དེ་ནི། རྟགས་ནས་གསལ་ལ་སློང༌། ཐུར་ལྡོག་གཉིས་དང་དེའི་ཕྱིན་ཅི་ལོག་བཅས་བཞི་པོ་དེ་ནི་གསལ་ནས་རྟགས་ལ་སློང་བ་སོགས་ཀྱང་ཤེས་པར་བྱའོ། ། སྤྱིར་རྩོད་པའི་རྒྱུ་ནི། སྐྱེས་ཐོབ་ཀྱི་ཤེས་རབ་ཆེ་བ། སྒྲ་ཚད་ལ་བློ་སྦྱང་བ། རང་གཞན་གྱི་གཞུང་ལུགས་ལ་བློ་སྦྱངས་པའོ། ། རྩོད་པ་མཛེས་པའི་རྒྱན་ནི། བཞིན་གྱི་མདངས་གསལ་བ། ངག་སྙན་ཅིང་འཇམ་པ། ཕ་རོལ་དམའ་འབེབས་པའི་ཚིག་མདའ་མི་འཕེན་པ། ལུང་དང་རིག་པ་གསལ་ལ་རྣོ་བ། སྒྱིད་ལུགས་པ་དང་ང་རྒྱལ་མེད་པ། རིགས་ལམ་འདོར་བའི་གཡོ་སྒྱུ་དང་ཆགས་སྡང་མེད་པ། རང་གཞན་གྱི་དོན་དང་བསྟན་པ་ལ་གཅེས་པར་འཛིན་པ་རྣམས་སོ། ། རྩོད་པའི་དཔེ་ནི། རང་གཞན་གྱི་གཏི་མུག་གཅོད་པ་འཁོར་ལོ་ལྟ་བུ། སུན་འབྱིན་པའི་རླུང་གིས་མི་གཡོ་བ་ལྷུན་པོ་ལྟ་བུ། ཚིག་དོན་ལ་མ་རྨོངས་པ་ཐུབ་པའི་དབང་པོའི་སྲས་ལྟ་བུ་དགོས་སོ། ། རྩོད་པའི་འབྲས་བུ་ནི། རྩོད་པའི་རྒྱུ། རྒྱན། བསམ་པ། སྦྱོར་བ་ཕུན་སུམ་ཚོགས་པ་ལ་བརྟེན་ནས་རྟོག་པ་འཕེལ་བས་རང་རྒྱུད་ཚིམས་པ། སྙན་པའི་གྲགས་པས་ཕྱོགས་ཀུན་ཁྱབ་པ། བསྟན་(༡༢༤ན)པ་སྲུང་བ་ལ་ཆོས་ཀྱི་རྒྱལ་པོར་འགྱུར་བ་སྟེ། དེ་ལྟ་བུ་ལ་བསླབ་པར་བྱའོ། ། ཏ༣ གསུམ་པ་བཟོ་རིག་པ་བཤད་པ་ལ་གཉིས། ཐ༡ དགོས་འབྲེལ་མཚམས་སྦྱར་དང་བཅས་པས་མདོར་བསྟན། ཐ༢ སྒོ་གསུམ་གྱི་བཟོ་རིག་བྱེ་བྲག་རྒྱས་པར་བཤད་པའོ། ། ཐ༡ དང་པོ་ནི། དོན་གཉེར་རྗེས་འཛིན་བཟོ་རིག་མཐའ་ཡས་ཀྱང༌། ། སྒོ་གསུམ་བཟོ་ལ་ཤེས་བྱ་ཀུན་ཀྱང་འདུ། ། འདོད་རྒུ་དོན་དུ་གཉེར་བ་རྗེས་སུ་འཛིན་པ་ནི་བཟོ་རིག་པ་ཡིན་ལ། དེའང་འདུལ་བ་ལུང་ལས། ཀུན་དགའ་ར་བ་གཙུག་ལག་ཁང༌། ། མལ་སྟན་འཚོ་བ་ནར་མ་དང༌། ། གློ་བུར་ནད་པ་ནད་གཡོག་དང༌། ། ཡུལ་ངན་ཚེ་ན་སྦྱིན་པ་ནི། ། རྫས་ལས་བྱུང་བའི་བསོད་ནམས་བདུན། ། ཞེས་པའི་དང་པོ་གཉིས་པ་དང༌། ། བཞི་ཡིས་ཚངས་པའི་བསོད་ནམས་སྐྱེད། ། ཞེས་སྔོན་མེད་པའི་གནས་སུ་རིང་བསྲེལ་སྙིང་པོ་ཅན་གྱི་མཆོད་རྟེན་བྱེད་པ་དང༌། དགེ་འདུན་གྱི་ཀུན་དགའ་ར་བ་ལོངས་སྤྱོད་དང་བཅས་བསྐྲུན་པ་དང༌། དགེ་འདུན་བྱེ་བ་བསྡུམ་པ་དང༌། ཉམས་ལེན་གྱི་གཙོ་བོ་བྱམས་སོགས་ཚད་མེད་བཞི་བསྒོམ་པ་བཞི་པོ་གནས་སྐབས་ཚངས་པའི་བསོད་ནམས་སྐྱེད་པ་ལ་རྣམ་སྨིན་མཉམ་པར་གསུངས་པ་དང༌། རྒྱལ་བའི་བསྟན་དང་འཇིག་རྟེན་པའི་ཉེ་བར་མཁོ་བ་ཇི་སྙེད་པ་ཐམས་ཅད་ཀྱང་རིག་ལམ་འདི་ལ་མ་བརྟེན་པར་མི་འགྲུབ་པ་དང༌། བཟོ་རིག་ལ་མི་གུས་པ་གཅེར་བུ་པའི་གྲུབ་མཐའ་ཡིན་པར་གསུངས་པས་འདི་ཉིད་ཤེས་པ་ནི་ཤིན་ཏུ་གལ་ཆེ་ཞིང་དེའི་ལུགས་སྲོལ་གྱི་དབྱེ་བ་མཐའ་ཡས་ཀྱང༌། སྒོ་གསུམ་གྱི་བཟོ་ལ་བཟོ་རིག་ཙམ་དུ་མ་ཟད་ཤེས་བྱ་ཀུན་ཀྱང་འདུ་བས་མཁས་པ་རྣམས་ཀྱི་དེ་ལྟ་བུའི་རྣམ་གཞག་བྱས་སོ། ། དེའང་ཐམས་ཅད་ལ་ཡིད་སྔོན་དུ་འགྲོ་ཡང༌། དེས་ཀུན་ནས་བསླངས་པའི་ལུས་གཙོ་བོར་བྱེད་པས་ལུས་བཟོ་སྟེ། གར་ཐིག་དབྱངས་གསུམ་དུ་གྲགས་པའི་དང་པོ་གཉིས་ལྟ་བུའོ། ། ངག་གཙོ་བོར་བྱེད་པས་ངག་གཟོ་སྟེ། གསུམ་པ་ལྟ་བུའོ། ། ལུས་ངག་(༡༢༤བ)གཙོ་བོར་མི་བྱེད་པ་ཡིད་ཀྱིས་འགྲུབ་པས་ཡིད་བཟོ་སྟེ། བསམ་བྱུང་གི་རིག་ཤེས་ཁྱད་པར་ཅན་ལྟ་བུའོ། ། ཐ༢ གཉིས་པ་ལ་གསུམ། ད༡ ལུས་བཟོ། ད༢ ངག་བཟོ། ད༣ ཡིད་ཀྱི་བཟོ་གནས་བཤད་པའོ། ། ད༡ དང་པོ་ལ་གཉིས། ན༡ མཆོག་དང༌། ན༢ ཕལ་པའོ། ། ན༡ དང་པོ་ལ་གཉིས། པ༡ མདོར་བསྟན། པ༢ རྒྱས་བཤད་དོ། ། པ༡ དང་པོ་ནི། ལུས་བཟོ་མཆོག་ནི་སྐུ་གསུང་ཐུགས་རྟེན་ཏེ། ། ལུས་བཟོ་ལ་གཙོ་ཕལ་གཉིས་ཡོད་པའི། མཆོག་གམ་གཙོ་བོ་ནི། སྐུ་རྟེན་རྒྱལ་བའི་སྐུ་བརྙན་བྲིས་འབུར། གསུང་རྟེན་འཕགས་བོད་ཡིག་རིགས། ཐུགས་རྟེན་མཆོད་རྟེན་དང་ཕྱག་མཚན་གྱི་རིགས་ལ་སོགས་པ་རྣམས་ཡིན་པས་རིམ་པར་བཤད་པར་བྱ་སྟེ། ཞེས་སོ། ། པ༢ གཉིས་པ་[རྒྱས་བཤད་]ལ་གསུམ། ཕ༡ སྐུ་རྟེན། ཕ༢ གསུང་རྟེན། ཕ༣ ཐུགས་རྟེན་བཤད་པའོ། ། ཕ༡ དང་པོ་ལའང་གསུམ། བ༡ བཟོ་བོའི་མཚན་ཉིད་བྱིན་རླབས་སོགས་བཤད་པ། བ༢ བརྟེན་པ་ལྷའི་ཆ་ཚད། བ༣ རྟེན་གཞལ་ཡས་ཁང་འཕྲོས་དོན་ཙམ་སྨོས་པའོ། ། བ༡ དང་པོ་ནི། ལྷ་བཟོ་མཁས་དང་གཙང་སྦྲ་བསྙེན་གནས་ལྡན། ། གསང་སྔགས་ནང་པར་དབང་ཐོབ་དམ་ཚིག་ཅན། ། རྒྱུ་དང་ལག་ཆར་བཅས་པར་བྱིན་གྱིས་བརླབ། ། གང་གིས་རྟེན་སྐྲུན་པ་པོ་བཟོ་བོ་ལ། སྐྱོན། ཡོན་རྣམ་པ་གཉིས་ཡོད་དེ། དང་པོ་སྐྱོན་ནི། དཔལ་འབྱོར་རྒྱ་མཚོར། ཡོན་ཏན་མི་མཁས་ང་རྒྱལ་ཆེ། ། འགྲོགས་པ་མི་བདེ་བཀུར་སྟི་འདོད། ། འཕྲལ་དུ་ཚིག་རྩུབ་ཕུག་འདོད་ཆེ། ། ཡོན་རྒྱགས་གླ་ཐང་ཆད་མེད་འབེབས། ། དེས་ཀྱང་མི་ཚིམ་རྒྱུ་ཆ་རྐུ། ། ཅུང་ཟད་ཙམ་ལ་བཟོ་འཕྲོ་འཇོག ། འགྲོ་སྡིགས་བྱེད་ཅིང་ཆང་ནག་འཚོལ། ། དགེ་ལས་སྡིག་པར་སྒྱུར་མཁན་ཡིན། ། ཅེས་འབྱུང་བ་ལྟ་བུའི་སྐྱོན་དང་མི་ལྡན་ཅིང༌། སམྦུཊི་ལས། དུལ་ཞིང་དང་ལྡན་ལང་ཚོར་བབ། ། དབང་པོ་རྣམ་གསལ་རྣམ་རྟོག་མེད། ། ཁྲོ་མེད་ལྐོག་འཕྱས་མི་བྱེད་ཅིང༌། ། ཤིན་ཏུ་མཁས་ལ་སྤྲོ་བ་ཆེ། ། བཟོད་ལྡན་སྙིང་རྗེ་ཆེན་པོ་ཅན། ། ཞེས་དང༌། དཔལ་འབྱོར་རྒྱ་མཚོར། (༡༢༥ན) འདོད་པ་ཆུང་ཞིང་བཀུར་སྟི་སླ། ། མཁས་ཤིང་ཁེངས་མེད་ཁ་ལ་ཉན། ། ལྷ་ལ་གུས་ཤིང་སྤྱོད་ལེགས་པའོ། ། ཞེས་འབྱུང་བ་ལྟར། རང་བཞིན་དང་བཟོའི་མཚན་ཉིད་ལ་མཁས་པའི་ཡོན་ཏན་དང་ལྡན་པས་ལས་ལ་ཞུགས་པ་ན། ཆགས་བྲལ་གྱི་སྐུ་དང་གསང་སྔགས་ཕྱིའི་ལྷ་ལ་ཁྲུས་དང་གཙང་སྦྲ་ལ་གནས་ཤིང་བསྙེན་གནས་ཀྱི་སྡོམ་པ་དང་ལྡན་