Tibetan
པ། གསང་སྔགས་ནང་གི་ལྷ་ལ་དབང་བསྐུར་བ་ཐོབ་ཅིང་དམ་ཚིག་དང་ལྷའི་རྣལ་འབྱོར་ལྡན་པས་སྐྱེ་བོ་ཕལ་གྱིས་མི་མཐོང་བར་མཚམས་བཅད་དེ་མཆོད་གཏོར་དམ་རྫས་ཡང་ཡང་འབུལ་དགོས་ལ། བཟོ་བོ་ཀུན་རྣམ་སྣང་ངམ་བགེགས་མཐར་བྱེད་དང༌། སྐུ་རྒྱུ་དང་ལག་ཆ་རྣམ་སྣང་དུ་བསྐྱེད་པའང་གསུངས་ཤིང༌། ཐིག་ཚོན་རྣམས་ནི་དཀྱིལ་ཆོག་ནས་འབྱུང་བའི་ཆོ་གས་བྱིན་གྱིས་བརླབ། ཡིག་མཁན་འོད་དཔག་མེད། སྨྱུ་གུ་དང་སྣག་ཚའང་བྱིན་གྱིས་བརླབས་པའི་ཚུལ་ཕྲེང་བ་སོགས་སུ་བཤད་པ་ལྟར་ཏེ། དེ་དག་ཀྱང་ཐོག་མར་དབུ་འཛུགས་པའི་སྐབས་སུ་ངེས་པར་ལག་ཏུ་ལེན་པ་གལ་ཆེའོ། ། ཞར་བྱུང་སྐུ་གཟུགས་བཞེངས་པའི་བདག་རྐྱེན་སྦྱིན་བདག་ལའང་། སྐྱོན། ཡོན་གཉིས་ལས། དང་པོ་ནི། དཔལ་འབྱོར་རྒྱ་མཚོར། སྡིག་ལ་མི་འཛེམ་དད་འདུན་ཆུང༌། ། ཕན་ཡོན་མ་མཐོང་ཡིད་མི་ཆེས། ། སྒྲུབ་བློ་མེད་པའམ་ཡོད་ན་ཡང༌། ། ཚེ་འདིའི་ལོ་འདོད་གྲགས་འདོད་ཕྱིར། ། རྐྱེན་དང་མི་འཚམས་བློ་རྒྱ་བསྐྱེད། ། ངང་ཐུང་བློ་དོག་བཟོད་བསྲན་ཆུང༌། ། ལྷ་དང་བཟོ་བོ་སྨོད་བྱེད་ཅིང༌། ། འགྱོད་པ་སྐྱེས་ནས་འཕྲོ་འཇོག་པའོ། ། ཞེས་བཤད་པའི་སྐྱོན་འདི་དག་དང་ནམ་ཡང་མི་ལྡན་པ་ཞིག་དགོས་ལ། གཉིས་པ་ཡང་། དེ་ཉིད་ལས། ཕན་ཡོན་མཐོང་བའི་ཤེས་རབ་ཅན། ། རྩེ་གཅིག་སེམས་པའི་བསམ་གཏན་ཅན། ། བརྟན་ཞིང་སྤྲོ་བའི་བརྩོན་འགྲུས་ཅན། ། དཀའ་སྤྱད་མི་སྐྱོ་བཟོད་བསྲན་ཅན། ། ངང་རིང་ཚིག་འཇམ་ཚུལ་ཁྲིམས་ཅན། ། གཡོ་མེད་གཏོང་ཕོད་སྦྱིན་པར་ལྡན། ། ལྷ་དང་བཟོ་བོར་དད་གུས་ལྡན། ། རིམ་གྱིས་དགའ་སྤྲོ་སྒོམ་པའོ། ། ཞེས་དང༌། (༡༢༥བ) མི་གཡོ་བའི་རྒྱུད་ལས་ཀྱང༌། བྲིས་སྐུ་ཚད་དང་ལྡན་པ་ཡོངས་སུ་ཟིན་པ་དང༌། འདྲི་མཁན་ལ་ཁོ་རང་ཇི་ལྟར་འདོད་པའི་ཡོན་བབ་པ་བཞིན་སྦྱིན་པར་བྱའོ། །ཞེས་དང༌། རབ་གནས་ཀྱི་རྒྱུད་དུ། བཟོ་བོ་མ་མཉེས་པའི་ལྷ་ལ་ནི་ཡེ་ཤེས་པ་མི་འཇུག་སྟེ། རབ་གནས་ཀྱི་ཐོག་མར་བཟོ་བོ་མཉེས་པར་བྱའོ། །ཞེས་པ་ལ་སོགས་མདོ་རྒྱུད་དུ་མ་ནས་བཟོ་བོ་མགུ་བ་བགྱིད་པ་སྦྱིན་བདག་གི་དམ་ཚིག་གཙོ་བོར་གསུངས་ལ། བཟོ་བོ་སུན་ཕྱུང་བ་ནི། ལྷ་ལ་སུན་ཕྱུང་བ་ཡིན་ཕྱིར་བཤེས་གཉེན་བསྟེན་པའི་ཚུལ་གྱིས་ལྷ་བཟོ་ལ་དད་པ་དང་བཀུར་སྟིས་ལྷ་བཞིན་དུ་མཆོད་པར་བྱའོ། ། དེང་སང་སྐུ་གསུང་ཐུགས་རྟེན་ཉོ་ཚོང་བྱེད་པ་ནའང་བཟོ་བོ་དང་བདག་པོས་ཡུལ་དུས་དང་འཚམས་པའི་རིན་ཐང་གང་བཅད་པའི་དཔའ་བོའི་རིན་གཞལ་ན་ལེགས་པར་འགྱུར་གྱི། བལ་བོད་ཀྱིས་ཉོ་ཚོང་གཏམ་པ་ལྟ་བུས་ནི་གཉིས་ཀ་ལ་ཉེས་པ་ཆེན་པོ་སྐྱེད་པའི་རྒྱུར་འགྱུར་བའང་ཞར་བྱུང་དུ་འཕྲོས་པའོ། ། བ༢ གཉིས་པ་བརྟེན་པ་ལྷའི་ཆ་ཚད་བཤད་པ་ལ་གཉིས། མ༡ དམ་ཚིག་བྲིས་སྐུ། མ༢ ཆ་ཚད་དངོས་བཤད་པའོ། ། མ༡ དང་པོ་ནི། གཞུང་མཐུན་དམ་ཚིག་བྲིས་སྐུ་མཆོག་ཡིན་ཏེ། ། རྒྱུད་སྡེ་སོ་སོའི་གཞུང་དང་མཐུན་པའི་དམ་ཚིག་གི་བྲིས་སྐུ་ནི་སྐུ་བརྙན་རྣམས་ཀྱི་ནང་ནས་མཆོག་ཏུ་གྱུར་པ་ཡིན་ཏེ། དེའང་དགྱེས་རྡོར་རྒྱུད་ཀྱི་བརྟག་པ་ཕྱི་མ་ལེའུ་དྲུག་པ་ལས། འདིར་ནི་བྲི་མཁན་དམ་ཚིག་ཅན། ། སྒྲུབ་པོའང་དམ་ཚིག་ཅན་གྱིས་ནི། ། བྲིས་སྐུ་འཇིགས་པ་བྲི་བ་ཉིད། ། སྐྱེས་པའི་ཐོད་གནས་ཁ་དོག་ལྔ། ། རོ་ཡི་སྐྲ་ཡི་པིར་ཉིད་ཀྱིས། ། བྲིས་སྐུ་བླ་མ་བྲི་བ་ཉིད། ། གང་གང་སྐུད་པ་འཁལ་པ་དང༌། ། གང་གང་རས་ཡུག་འཐག་པ་དང༌། ། དེ་ཡང་དམ་ཚིག་ཅན་ངེས་མས། ། དམ་ཚིག་བྱིན་རླབས་རྣལ་འབྱོར་པས། ། ཟླ་བ་ཟླ་བའི་མར་ངོ་ཡི། ། བཅུ་བཞི་པ་ལ་ཁྱིམ་དབེན་པར། །(༡༢༦ན) ཕྱེད་ན་མ་རུངས་སེམས་ཀྱིས་ནི། ། ཆང་གི་བཏུང་བ་ཅུང་ཟད་ལས། ། ལུས་ལ་ནི་རཾ་ཤུ་བསམས་ནས། ། དེ་བཞིན་གཅེར་བུར་གྱུར་པ་ཡང༌། ། འབགས་པ་དང་ནི་མ་དག་པས། ། དེ་ལ་དམ་ཚིག་རབ་ཏུ་བཟའ། ། བཞིན་བཟང་སྙིང་རྗེ་ལྡན་པ་དང༌། ། གཟུགས་ལ་ལང་ཚོ་སྐལ་བཟང་མ། ། མེ་ཏོག་འབྲས་ཤིང་སྒྲུབ་པོ་དགའ། ། རང་གི་ཕྱག་རྒྱ་གཡོན་དུ་བཞག ། ཅེས་སོགས་བླ་མེད་ནས་བཤད་པ་དང༌། འཇམ་དཔལ་རྩ་རྒྱུད་ནས་རས་བྲིས་ཆེ་ཆུང་གི་ཆོ་ག་ཤིན་ཏུ་རྒྱས་པ་ཕན་ཡོན་ཚད་མེད་པ་དང་བཅས་ལེགས་པར་བཤད་པ་ལྟར་བསྒྲུབ་པར་བྱ་སྟེ། སྡོམ་འབྱུང་ལས། སྔགས་པ་ལས་ནི་དང་པོ་པས། ། གཟུགས་བརྙན་ལ་སོགས་བྱ་བ་སྟེ། ། བྲིས་སྐུ་བསྒྲུབ་ན་མྱུར་བར་ནི། ། དངོས་གྲུབ་རྒྱ་ཆེན་ཐོབ་པར་འགྱུར། ། ཞེས་གསུངས་སོ། ། མ༢ གཉིས་པ་ཚད་བཤད་པ་ལ་གསུམ། ཙ༡ སྤྱིར་བཤད་པ། ཙ༢ བྱེ་བྲག་ཏུ་བཤད་པ། ཙ༣ དེ་ལས་འཕྲོས་པའི་ཉེ་བར་མཁོ་བའོ། ། ཙ༡ དང་པོ་ནི། ཆ་ཚད་དུས་ཀྱི་འཁོར་ལོར་རང་སོར་ནི། ། བརྒྱ་དང་ཉེར་ལྔ་སྡོམ་འབྱུང་བརྒྱ་ཉི་ཤུ། ། གདན་བཞི་དེ་མཚུངས་དམར་ནག་ཞལ་ཚད་བརྒྱད། ། མདོ་དང་རྒྱ་གཞུང་དེ་མཐུན་དེ་རྗེས་འབྲང༌། ། སྐུ་གཟུགས་ཀྱི་ཆ་ཚད་ནི་མདོ་རྒྱུད་རྣམས་ལས་ནན་ཏན་དུ་གསུངས་ཏེ། དེའང་རྒྱུད་ཀྱི་རྒྱལ་པོ་དུས་ཀྱི་འཁོར་ལོ་ལས། (༡༢༦བ) རྒྱལ་བའི་བདག་པོའི་གཙུག་ཏོར་ནས་ནི་མཛོད་སྤུའི་དབུས་སུ་ཕྱེད་དང་བཅས་པ་ཉི་མའི་སོར་དུ་འགྱུར། ། དེ་ནས་མགྲིན་པའི་ཆུ་སྐྱེས་དེ་བཞིན་སྙིང་ག་དང་ནི་དེ་ནས་ལྟེ་གསང་ཆུ་སྐྱེས་དེ་བཞིན་ནོ། ། ཞབས་ཀྱི་མཐིལ་དང་རྗེ་དར་བརླ་དང་དཔྱི་ཡང་མ་ནུ་དེ་ཉིད་རིག་བྱེད་རྣམས་ཀྱི་སྟེ། །བྲང་ཕྱེད་ཕྱེད་བཅས་ཉི་མས་རང་དཔུང་དཔུང་ལག་རྣམས་ནི་མཁའ་མིག་རྒྱལ་པོ་ཉི་མའི་ཚད་ཀྱིས་སོ། ། ཉི་ཤུ་རྩ་ལྔ་ལྷག་པའི་བརྒྱ་ཕྲག་གང་ཞིག་དུས་དང་དགུ་ཡི་མི་རྣམས་ཀྱི་ནི་འཇིག་རྟེན་ཚད། ། རིག་བྱེད་ཕྱེད་དང་བཅས་པའི་གཞི་དང་ཆུ་གཏེར་ཆུ་གཏེར་ཕྱེད་དང་བཅས་པའི་རིག་བྱེད་རིག་བྱེད་ཀྱིས། ། གཙུག་ཏོར་མགོ་བོ་འོག་ཏུ་འགྱུར་ཏེ་རྒྱལ་བའོ་བདག་པོའི་དཔལ་ལྡན་དཔྲལ་བ་དག་དང་ཤངས་དང་ནི། ། ཤངས་ཀྱི་འོག་ཏུ་ཀོས་ཨོལ་སྐོའི་མཐའ་དང་དེ་ནས་མགྲིན་པ་དག་སྟེ་མགྲིན་པའི་རྩ་བའི་ཆུ་སྐྱེས་དབུས། ། དེ་ནས་སྙིང་ག་ལྟེ་བ་གསང་བར་མིའི་བདག་པོ་ཕྱེད་བཅས་ཉི་མ་རྣམས་ཀྱི་རིམ་པར་འགྱུར། ། ཅེས་རང་སོར་བརྒྱ་ཉི་ཤུ་རྩ་ལྔ་པ་ཁོ་ན་གསལ་བར་གསུངས་ཤིང༌། དེ་ཉིད་དཀྱིལ་འཁོར་སོགས་ཕྱི་ནང་གི་དག་སྦྱོང་ཡང་རྒྱས་པར་འབྱུང་ངོ༌། ། བདེ་མཆོག་བཤད་རྒྱུད་སྡོམ་འབྱུང་ལེའུ་སུམ་ཅུ་པ་ལས། ལྷ་ཡི་རི་མོ་གཟུགས་དག་གི། ། ཁྱོན་དང་གཟུགས་ཀྱི་མཚན་ཉིད་དོ། ། ཚངས་པའི་རི་མོའི་གཟུགས་ཀྱི་སྔར། ། ཆ་ལྔ་དག་ནི་གདན་ཡིན་ནོ། ། སྐུ་ནི་དུམ་བུ་གསུམ་ཅན་གྱི། ། ཞེས་སོགས་ཀྱི་སོར་མོ་བརྒྱ་ཉི་ཤུ་པ་ལས་དབྱེ་བའི། ཐལ་མོ་བཅུ་གཉིས་པ། བཅུ་པ། དགུ་པ་སོགས་གསལ་བར་གསུངས་སོ། ། གདན་བཞིའི་བཤད་རྒྱུད་མནྟྲ་ཨཾ་ས་ལས་གསུངས་པའང་འགྱུར་ཁྱད་མ་གཏོགས་ཕལ་ཆེར་འདི་དང་འདྲ་ལ། ཞལ་ཚད་དགུ་པ་གསལ་པོར་མ་གསུངས་སོ། ། སློབ་དཔོན་རཏྣ་རཀྵི་ཏས་སྡོམ་འབྱུང་གི་འགྲེལ་པར་ཀྱོག་བཤད་མཛད་པ་ནི། དུས་དེ་ཙམ་ན་མ་ག་དྷཱ་དང༌། བལ་པོའི་ཡུལ་གྱི་རི་མོ་མཁན་རྣམས་ལ་ཇི་ལྟར་གྲགས་པ་དེ་ལྟར་དཔྱད་པ་མེད་པར་བཀོད་པ་ཡིན་པས་སྡོམ་འབྱུང་གི་རྒྱུད་དོན་དུ་བཟུང་བར་མི་བྱའོ། ། གཤིན་རྗེ་གཤེད་དམར་ནག་གི་རྒྱུད་ལས་ཀྱང་ཞལ་ཚད་བརྒྱད་པ་གསུངས་ཤིང༌། གཞན་ཡང་། ཤཱ་རིའི་བུས་ཞུས་པའི་མདོར་གྲགས་པ། བལ་པོའི་དཔེ་ལས་བསྒྱུར་ངེས་པ་ཕྱིས་འགྱུར་བ་འདི་ལས་ཀྱང༌། ཕལ་ཆེར་དུས་འཁོར་གྱི་འདི་དང་མཐུན་པར་གསུངས་ལ། ཀྲི་ཡ་ས་མུཙྪར་ཡང་མདོ་འདིའི་ལུང་ཅི་རིགས་པར་དྲངས་སོ། ། གཞན་ཡང་། སྔོན་རབས་སུ་དར་བའི་རྒྱ་གཞུང་དུ་གྲགས་པ་ཁ་ཅིག་ཀྱང་དེ་དག་དང་མཐུན་ཅིང་། མི་མཐུན་པའི་ཁྱད་པར་ཡང་ཕྲ་མོ་ཡོད་པ་ནི་སྔར་སྨོས་པའི་རྒྱུད་དེ་དག་(༡༢༠ན)གི་རྗེས་འབྲང་དུ་མངོན་ལ། དེ་དག་ཁ་ཅིག་ལ་ཕྱིས་ཀྱི་མཁས་པ་རྣམས་དགག་གཞག་མཛད་པ་ལ་ནི་སྙིང་པོ་གང་ཡང་མེད་དེ། བཟོ་ཡི་གནས་དང་སྨན་གྱི་སྦྱོར་བ་དང༌། ། སྔགས་ཀྱི་ཆོ་ག་ཆོས་ཉིད་ཟབ་མོ་སྟེ། ། འདི་དག་རྟོག་གེའི་རིགས་པས་བརྟག་བྱ་མིན། ། བདག་ཉིད་སྒྲོག་དང་ང་རྒྱལ་སྤང་བར་རིགས། ། ཞེས་ཇོ་ནང་རྗེ་བཙུན་ཆེན་པོས་གསུངས་སོ། ། འཇལ་བྱེད་རང་སོར་ཕྱེད་དང་བཅུ་གསུམ་མམ། ། བཅུ་གཉིས་ཐལ་མོ་སྐབས་སྦྱར་ཚད་ལྔ་ཡི། ། དང་པོ་གཉིས་པ་དུས་འཁོར་སྡོམ་འབྱུང་ལྟར། ། གསུམ་པ་བཞི་པ་ཐལ་མོ་དགུ་བརྒྱད་དེ། ། མདོ་རྒྱུད་དངོས་བསྟན་ཡིན་གྱི་བསྒྲིམས་ཏེ་འབད། ། དེ་དག་ལ་འཇལ་བྱེད་ཀྱི་བརྡ་ཁྱད་ཀྱང༌། སྐུ་གཟུགས་དེ་ཉིད་ཀྱི་རང་སོར་ཕྱེད་དང་བཅུ་གསུམ་མམ་བཅུ་གཉིས་རེ་ལ་ཞལ་ཚད་གཅིག་ཟེར། ཞལ་ཚད་དེ་ལ་མཐོ། ཐལ་མོ། མཐིལ། ཆ་ཆེན་ཏེ་མིང་གི་རྣམ་གྲངས་ལྔ། ཞལ་ཚད་ཆེ་ཆུང་དེ་དག་རྒྱུད་ཀྱི་ལུགས་གཉིས་སྐབས་དང་སྦྱར་བ་ཡིན་ནོ། །རང་སོར་གཅིག་ལ་ཆ་ཆུང༌། དེའི་བཞི་ཆ་ལ་རྐང་པ། བརྒྱད་ཆ་ལ་ནས་ཞེས་བྱ་ཞིང༌། དེས་གཞལ་བའི་ཆ་ཚད་རྩ་བ་ནི་རྣམ་པ་ལྔ་སྟེ། དང་པོ་བརྒྱ་དང་ཉེར་ལྔ་པ། གཉིས་པ་བརྒྱ་དང་ཉི་ཤུ་པ་གཉིས་དུས་འཁོར་དང་སྡོམ་འབྱུང་གི་ལུགས་ལྟར་དང༌། གསུམ་པ་དང་བཞི་པ་ནི་ཐལ་མོ་དགུ་པ་དང་བརྒྱད་པ་སྟེ། ལྷའི་ཆ་ཚད་བཞི་པོ་འདི་དག་མདོ་རྒྱུད་ཀྱི་དངོས་བསྟན། མཁས་པའི་རིག་བཟོས་མ་བསླད་པ་ཡིན་པས་བློ་ལྡན་རྣམས་བསྒྲིམས་ཏེ་འབད་པར་བྱའོ། ། གཤེགས་སེམས་ཁྲོ་དང་ཆགས་བྲལ་གང་འོས་སྦྱར། ། བཞི་པ་ཤིན་ཏུ་ཁྲོས་པ་རྣམས་ལའོ། ། ཐལ་མོ་དྲུག་པ་ཕྱིས་བྱུང་བོད་ཀྱི་ལུགས། ། ཆ་ཚད་གསུམ་པོ་དེ་ནི་གཤེགས་པ་དང་གཤེགས་མ། སེམས་དཔའ་སེམས་མ། དཀྱིལ་འཁོར་གྱི་གཙོ་བོ་ཁྲོ་བོ་ཁྲོ་མོ། མཆོག་གི་སྤྲུལ་སྐུ་ཆགས་བྲལ་གྱི་རྣམ་པ་ཅན་སོགས་གང་ལ་གང་འོས་རིགས་པས་དཔྱད་དེ་སྦྱར་(༡༢༧བ)ཞིང༌། ཆ་ཚད་བཞི་པ་དེ་ནི་ཤིན་ཏུ་ཁྲོས་པ་སྟེ་གཤིན་རྗེ་གཤེད་དང་ཕྱག་རྡོར་ལ་སོགས་པ་རྣམས་ལ་སྦྱར་བར་བྱའོ། །ཆ་ཚད་ལྔ་པ་ཐལ་མོ་དྲུག་པའི་ཚད་ཀྱིས་ནག་པོ་ཆེན་པོས་མཚོན་ཕོ་ཉ་སྲིན་པོའི་གཟུགས་ཅན་སོགས་འབྲི་བར་བཤད་པ་དང༌། མ་ཧཱ་ཀཱ་ལ་ཞལ་ཚད་གསུམ་པར་བཤད་པ་སོགས་ནི་ཕྱིས་བྱུང་བོད་ཀྱི་མཁས་གྲུབ་རྣམས་ཀྱི་ལུགས་སྲོལ་ཡིན་ལ། རཏྣ་རཀྵི་ཏ་དང་བལ་པོའི་མཁས་པ་འགའ་ཞིག་གིས་ཚོགས་ཀྱི་བདག་པོ་སོགས་ཞལ་ཚད་ལྔ་པར་བཤད་པའང་ཡོད་དོ། ། དེ་དག་གི་ལག་ལེན་ནི་འདིར་འབྲིར་མ་ལྡོངས་པས་རྟོགས་པར་འདོད་ན་རྗེ་བཙུན་རིན་པོ་ཆེའི་གསུང་རབ་སྐུ་གཟུགས་ཀྱི་ཆ་ཚད་བསྟན་པ་བདེ་སྐྱིད་འབྱུང་གནས་ཉིད་རྒྱ་གཞུང་ཕལ་པ་རྣམས་ལས་ཀྱང་ཁྱད་པར་འཕགས་པས་དེར་བལྟ་བར་བྱའོ། ། ཆ་ཚད་བཞི་པོ་སྦྱོར་ཚུལ་ཡང་། དེ་ཉིད་ལས། དེ་བཞིན་གཤེགས་པ་ཡབ་ཡུམ་ཕྱོགས་མཚུངས་ཤིང༌། ། བྱང་ཆུབ་སེམས་དཔའ་ཡབ་ཡུམ་ཕྱོགས་མཚུངས་ལ། ། རྒྱལ་བའི་རིགས་འཁྲུངས་རྒྱལ་བའི་སྲས་ཡིན་པས། ། བྱང་ཆུབ་སེམས་དཔའང་སངས་རྒྱས་དང་མཚུངས་ཕྱིར། ། ཆ་ཚད་གསུམ་པོ་འདི་དག་སངས་རྒྱས་དང༌། ། བྱང་སེམས་ཡབ་ཡུམ་ཀུན་ལ་གང་འོས་སྦྱོར། ། ཅི་སྟེ་སོ་སོར་སྦྱོར་བ་ལ་དགའ་ནའང༌། ། ཕྲ་སྦོམ་ཁྱད་པར་ཞི་ཁྲོ་ལ་རིགས་པས། ། བརྒྱ་དང་ཉེར་ལྔ་སངས་རྒྱས་ཞི་བ་དང༌། ། བརྒྱ་དང་ཉི་ཤུ་ཧེ་རུ་ཀ་ལ་སྦྱར། ། ཧེ་རུ་ཀ་དཔལ་སྐུ་ཡི་ཁྱད་པར་འགའ། ། ཐལ་མོ་བརྒྱད་པ་བྱེད་པའི་སྐབས་ཀྱང་ཡོད། ། སྤྱན་མ་སྒྲོལ་མ་ལ་སོགས་ཞི་བ་མཚུངས། ། རྡོ་རྗེ་ཕག་མོ་ཧེ་རུ་ཀར་མཚུངས་ཤིང༌། ། གཙུག་ཏོར་མེད་ཀྱང་གཙུག་གི་ནོར་བུ་ནི། ། དེ་ཡི་ཚབ་ཏུ་སྦྱར་བས་མི་རུང་མེད། ། གཙུག་ཏོར་བྲལ་ཞིང་ནུ་མ་བྷ་ག་དང༌། ། སྐེད་ཕྲ་སྟོད་ཞུམ་བརླ་དང་རོ་སྨད་རྒྱས། ། དཔྲལ་བའི་ཟུར་ཞུམ་མིག་རྒྱས་ཟུར་མིག་སོགས། ། མོ་གཟུགས་ཡིན་ཕྱིར་ལྷ་མོ་(༡༢༨ན)རྣམས་ལ་དགོས། ། ཡབ་རྣམས་དེ་ལས་ལྡོག་པའི་ཚུལ་དུ་ཡོད། ། ལྷག་མ་ཆ་ཚད་རིག་པས་མཚུངས་པར་བྱ། ། སེམས་དཔའ་ཆེན་པོ་རྣམས་ཀྱང་དེ་དག་མཚུངས། ། མཐོ་དགུ་པ་ནི་སེམས་དཔའ་ཕལ་པ་དང༌། ། བརྒྱ་སྦྱིན་ལ་སོགས་འཇིག་རྟེན་ཞི་བའི་ལྷ། ། རོལ་པའི་ཁྲོ་བོ་ཧེ་རུ་ཀ་ལས་གཞན། ། དེ་རྣམས་སོ་སོའི་རིགས་ཀྱི་ལྷ་མོར་བཅས། ། དེ་དག་ཚད་དེས་ལེགས་པར་བྲིས་པ་ན། ། རྣམ་གྲངས་ཚུལ་གྱིས་ལེགས་པར་འགྱུར་བའང་ཡོད། ། ཅེས་གསུངས་སོ། ། དུས་འཁོར་ལས་གསུངས་པའི་མིའི་ཆ་ཚད་ནི་ཉན་ཐོས་ལ་འོས་ཀྱང་། ལྷའི་ཆ་ཚད་གྲལ་དུ་བསྡུ་བར་མ་མཛད་ཅིང༌། རང་རྒྱལ་གཙུག་ཏོར་སོགས་ཀྱིས་འཕགས་པས་ཐལ་མོ་དགུ་པར་བཞེད་པ་དང༌། སོ་སོའི་འདྲ་འབགས་རྣམས་ནི་ཆ་ཚད་དང༌། ། མཐུན་པར་མི་དགོས་རང་རང་དབྱིབས་བཞིན་བྱ། ། བཟོ་ཉེས་འགོས་ཕྱིར་ཆ་ཚད་མཛད་པ་སྟེ། ། སྐྱེས་བུ་དམ་པས་མཛད་ཅིང་བཟོ་གནད་ཀྱི། ། འཕྲུལ་ལ་ལེགས་པར་སྦྱང་ན་ངེས་པ་མེད། ། ཅེས་ཀྱང་གསུངས་སོ། ། ལྷ་རིགས་ཆགས་བྲལ་འཁོར་ལོས་བསྒྱུར་བ་དང༌། ། ཞི་བ་རྒྱན་མེད་དྲང་སྲོང་རིགས་ངན་ཚུལ། ། སངས་རྒྱས་རོལ་པའི་ཁྲོ་བོ་ཁྲོ་བོའི་རྒྱལ། ། སེམས་དཔའ་མཆོག་ཕལ་ཕྱག་བརྙན་ཕོ་ཉར་བསྡུ། ། ཆ་ཚད་བགོ་ཡུལ་ལྷའི་རྣམ་པ་མང་ཡང་རིགས་ཀྱི་སྒོ་ནས་བསྡུ་བའི་ཐ་སྙད་སྦྱོར་ན། རབ་བྱུང་གི་རྣམ་པ་ལ་ཆགས་བྲལ་གྱི་སྐུ་དང༌། ཞི་བ་རྒྱན་ཅན་ལ་འཁོར་ལོས་སྒྱུར་བའི་ཆ་བྱད་དང༌། ཞི་བ་རྒྱན་མེད་ལ། དྲང་སྲོང་གི་ཆ་བྱད་དང་། རིགས་ངན་གྱི་ཆ་བྱད་གཉིས་ཡོད་ཅིང༌། བདེ་དགྱེས་དུས་འཁོར་སོགས་ཧེ་རུ་ཀ་སངས་རྒྱས་ཁྲོ་བོ་དང༌། ཐལ་མོ་དགུ་པའི་ཁྲོ་བོ་རོལ་པའི་ཁྲོ་བོ་ཕལ་པའམ་སེམས་དཔའི་ཁྲོ་བོ། དམར་ནག་འཇིགས་གསུམ་རྟ་མགྲིན་ལ་སོགས་པ་ཁྲོ་བོའི་རྒྱལ་པོ་དང༌། འཇམ་དཔལ་དབྱངས་དང་སྤྱན་རས་གཟིགས་དང་ཀུན་ཏུ་བཟང་པོ་སོགས་ཉེ་བའི་སྲས་བརྒྱད་ལྟ་བུ་སེམས་དཔའ་མཆོག་(༡༢༨བ)དང༌། དེ་དག་གི་སྒོས་ཀྱི་འཁོར་ཞི་བ་ཕོ་མོ་ལ་བྱང་སེམས་ཕལ་པ་དང༌། ནག་པོ་ཆེན་པོ་དང༌། ལྷ་མོ་རེ་མ་ཏི་ལ་སོགས་པ་ཕོ་ཉ་ཕྱག་བརྙན་ཞེས་བྱ་བ་རྣམས་སུ་བསྡུ་ཞིང༌། དྲང་སྲོང་ནི་སངས་རྒྱས་ཀྱི་མཚན་གྱི་རྣམ་གྲངས་ཡིན་པས། སངས་རྒྱས་ཁྲོ་བོ་ཟེར་བའི་དོན་ཡིན་ལ། གཞན་ཁྲོ་བོ་ལ་གནོད་སྦྱིན་ཁྲོས་པ་དང༌། སྲིན་པོ་ཁྲོས་པ་དང༌། གཤིན་རྗེས་ཁྲོས་པ་སོགས་ཀྱི་དབྱེ་བ་བྱས་ནས་ཉམས་ཐ་དད་པར་དགོས་པར་བོད་རྣམས་འདོད་ཀྱང་ངེས་པ་མེད་པར་གསུངས་སོ། ། ཙ༢ གཉིས་པ་བྱེ་བྲག་ཏུ་བཤད་པ་ནི། འོན་ཀྱང་དེང་སང་ཆ་ཚད་བཅུ་གཅིག་ཏུ། ། གྲགས་ཆེ་ཀུན་ཀྱང་ཚངས་ཐིག་སྔོན་སོང་ནས། ། ཆགས་བྲལ་ལོངས་སྐུ་སོར་མོ་བརྒྱ་ཉེར་ལྔ། ། བྱང་སེམས་བརྒྱ་དང་ཉི་ཤུ་དྲང་སྲོང་ཁྲོས། ། ཐལ་མོ་བཅུ་གཉིས་ཡུམ་རྣམས་ཐལ་མོ་དགུ། ། གཤིན་རྗེ་གནོད་སྦྱིན་བརྒྱད་དང་སྲིན་པོ་ཁྲོས། ། དྲུག་ལྔ་གསུམ་ཡོད་ཉན་རང་མི་དང་མཚུངས། ། ཚངས་སོགས་ཆ་ཆེན་དགུ་ཡིན་གླིང་བཞིའི་མི། ། སྲིད་དུ་མཐོ་བདུན་ཞེང་ལ་བརྒྱད་དུ་འགྱུར། ། དེ་དག་ལས་རླུང་འགག་པའི་རིམ་པར་གསུངས། ། དཀྱུས་ཀྱི་ལག་ལེན་ལ་གོང་སྨོས་ཁོ་ནས་ཁྱབ་མོད། འོན་ཀྱང་དེང་སང་བྲིས་འབུར་ཐམས་ཅད་ལ་སྒར་སྨན་གྱི་ལུགས་སྲོལ་གཉིས་སུ་གྲགས་ཆེ་བས། དང་པོ་ལྟར་ན་ཆོས་རྗེ་རིན་ཆེན་གྲུབ་སོགས་ཀྱིས་ཆ་ཚད་བཅུ་གཅིག་ཏུ་བཤད་ཅིང༌། གཉིས་པ་ལྟར་ན་ཐིག་ཆེན་བརྒྱད་ཏུ་གྲགས་ཆེ་ལ། དེ་དག་ཀུན་ཀྱང་ཚངས་ཐིག་སྔོན་དུ་སོང་ནས་བཅུ་གཅིག་པའི་ཕྱོགས་ལ། ཚད་དང་པོས་སངས་རྒྱས་ཆགས་བྲལ་གྱི་རྣམ་པ་དང༌། གཉིས་པ་རིགས་ལྔ་སོགས་ལོངས་སྐུ་རྣམས་ནི་སོར་མོ་བརྒྱ་ཉེར་ལྔ་པ། གསུམ་པ་བྱང་ཆུབ་སེམས་དཔའ་ཞི་བ་རྣམས་སོར་མོ་བརྒྱ་དང་ཉི་ཤུ། བཞི་པ་དུས་ཀྱི་འཁོར་ལོ་སོགས་དྲང་སྲོང་ཁྲོས་པའི་ཉམས་ཅན་རྣམས་ཐལ་མོ་བཅུ་གཉིས་པ། ལྔ་པ་སྣ་ཚོགས་ཡུམ་སོགས་དཀྱིལ་འཁོར་དབང་མོ་རྣམས་དང་ལྷ་མོ་སྒྲོལ་མ་སོགས་(༡༢༩ན)རིགས་ཀྱི་ཡུམ་རྣམས་ཡིད་འོང་ཐལ་མོ་དགུ་པ། དྲུག་པ་གཤིན་རྗེ་གཤེད་སོགས་གཤིན་རྗེ་ཁྲོས་པ་དང༌། བདུན་པ་ཕྱག་ན་རྡོ་རྗེ་སོགས་གནོད་སྦྱིན་ཁྲོས་པ་རྣམས་ནི་ཐལ་མོ་བརྒྱད་པར་བྱ་བ་དང༌། བརྒྱད་པ་སྲིན་པོ་ལྟར་ཁྲོས་པ་ལ་ལེགས་ལྡན་ནག་པོ་ཆེན་པོ་སོགས་ཐལ་མོ་དྲུག་པ་ལུགས་འདི་གཤེད་ནག་གི་འགྲེལ་པ་ནས་བཤད་པར་བཞེད། ཚོགས་བདག་སོགས་མིའུ་ཐུང་མཐོ་ལྔ་པ། རྡོ་རྗེ་བེར་ཅན་ཞལ་གཟིགས་ལ་བརྟེན་པ་ལྟ་བུ་ཤིན་ཏུ་ཁྲོས་པ་ཞལ་ཚད་གསུམ་པ་སྟེ་ནང་གསེས་གསུམ་ཡོད་ཅིང༌། དགུ་པ་ཉན་རང་གཉིས་གླིང་འདིའི་མི་དང་མཚུངས་ལ། བཅུ་པ་ཚངས་དང་བརྒྱ་བྱིན་སོགས་འཇིག་རྟེན་སྐྱོང་བ་རྣམས་ཆ་ཆེན་དགུ་པ་ཡིན་ལ། དེའི་ནང་གསེས་རྣམ་སྲས་སོགས་ཁ་ཅིག་མཐོ་བརྒྱད་པའི་ཚད་ཡིན་པ་རཏྣ་རཀྵི་ཏས་བཤད། བཅུ་གཅིག་པ་གླིང་བཞིའི་མི་རྣམས་ཀྱི་ལུས་ཚད་ནི་ཆུ་ཞེང་ཚད་མི་མཉམ་པས་སྲིད་དུ་མཐོ་བདུན། ཞེང་ལ་མཐོ་བརྒྱད་དུ་འགྱུར་བར་དུས་འཁོར་དང་སློབ་དཔོན་དཔའ་བོས་བཤད་ཅིང༌། ཁ་ཅིག་དེ་ལས་ལྡོག་པ་དར། ཡང་ཆུ་ཞེང་མཉམ་པའང་ཡོད་ལ། མིའི་རྟེན་ཅན་གྱི་བླ་མ་སོགས་ནི་ཇི་ལྟར་རང་གི་ལུས་ཀྱི་དབྱིབས་བྱད་ལ་ཡོད་པ་དེ་ལྟར་འདྲ་འབག་ཏུ་བྱ་བར་སྣང་མོད། འོན་ཀྱང་རང་སེམས་སངས་རྒྱས་སུ་ངོ་སྤྲོད་པའི་རྩ་བའི་བླ་མ་དམ་པའི་སྐུ་གཟུགས་ནི་རྫོགས་པའི་སངས་རྒྱས་ཀྱི་སྐུའི་ཚད་བཞིན་བྱ་བ་སྐྱོབ་པ་འཇིག་རྟེན་གསུམ་མགོན་གྱི་རྡོ་རྗེའི་གསུང་