Tibetan
འབུར་དང་གྱེན་དུ་བསླངས་པའི་ཁྱད་པར་སོགས་ལས་སྤྱི་ཁོག་ཤེས་པར་འགྱུར་ཞིང༌། སྤྱིར་དཀྱིལ་འཁོར་ལ། ཚད་བཅས་དང༌། ཚད་མ་ངེས་པ་གཉིས་སུ་གསུངས། དང་པོ་ལའང་། ལྷའི་སྒོ་ནས་ཚད་བཞག་པ་ནི། གུར་ལས། རྡོ་རྗེ་ཅན་གྱི་ཁྲུ་གསུམ་སྟེ། ། སངས་རྒྱས་དཀྱིལ་འཁོར་ཁྲུ་བཞི་པ། ། ཁྲུ་ལྔ་པ་ནི་སྣང་བྱེད་ལའོ། ། གར་དབང་ཕྱུག་གི་ཁྲུ་དྲུག་པ། ། རྟ་ཡི་རྒྱལ་པོ་ཁྲུ་བདུན་པའོ། ། ཞེས། མི་བསྐྱོད། རྣམ་སྣང་། རིན་འབྱུང་། འོད་དཔག་མེད། དོན་གྲུབ་རྣམས་ཀྱི་དཀྱིལ་འཁོར་ལ་ཁྲུ་གསུམ་ནས་བདུན་གྱི་བར་དུ་གསུངས་པ་དང༌། འདུས་པ་རྩ་རྒྱུད་ཀྱི་ལེའུ་བཞི་པར། ཐུགས་དཀྱིལ་ཁྲུ་བཅུ་གཉིས། ལེའུ་བཅུ་དྲུག་པར། སྐུ་དཀྱིལ་ཁྲུ་བཅུ་དྲུག་དང་། གསུང་དཀྱིལ་ཉི་ཤུ་པར་གསུངས་པ་ལྟ་བུ་སྟེ། རྩ་ཐིག་གི་ངོས་བཞི་ཀའི་དབང་དུ་བྱས་པའོ། ། སྦྱིན་བདག་གི་སྒོ་ནས་བཞག་པ་ནི། ཕྲེང་བར་རྒྱུད་ཀྱི་ལུང་དྲངས་པ་ལས། འཛམ་བུ་གླིང་གི་དབང་ཕྱུག་གམ། འཁོར་ལོས་བསྒྱུར་བའི་རྒྱལ་པོ་ཡིས། ། ཀུན་ནས་དཔག་ཚད་མཐའ་རུ་ནི། ། ཕྱི་རོལ་དཀྱིལ་འཁོར་བྲི་བར་བྱ། ། ཞེས་དང༌། ཛ་ཡ་སེ་ནས། དཀྱིལ་འཁོར་ཁྲུ་ནི་བརྒྱད་པར་འདོད། ། གཞན་དག་རྒྱལ་པོ་ལ་ཁྲུ་བརྒྱ། ། མཐར་སྐྱེས་རྣམས་ཀྱི་དེ་ཡི་ཕྱེད། ། གཙོ་བོ་རྣམས་ཀྱི་དེ་ཕྱེད་གསུངས། ། ཚོང་དཔོན་རྣམས་ཀྱི་ཁྲུ་བཅུ་གཉིས། ། སྒྲུབ་པོ་རྣམས་ཀྱི་ཁྲུ་དྲུག་པ། ། ཞེས་སྦྱིན་བདག་གི་འབྱོར་པའི་ཁྱད་པར་ལ་དཔག་པར་གསུངས་སོ། ། གཉིས་པ་མ་ངེས་པའང་། བཞི་བརྒྱ་ལྔ་བཅུ་པ་ལས། (༡༣༤ན) སེམས་ཅན་བསམ་པ་ལ་བརྟེན་ནས། ། ཚད་ལ་སོགས་པ་ངེས་མཛད་ཀྱི། ། ཐབས་ཤེས་ལས་བྱུང་དངོས་གྲུབ་ལ། ། ཚད་སོགས་ངེས་པས་ཅི་ཞིག་བྱ། ། དེ་ནི་ཁྲུ་གཅིག་ནས་བརྩམ་སྟེ། ། ཇི་སྲིད་ཁྲུ་སྟོང་བར་དུ་བྱ། ། དེ་ལྟར་འཁོར་ལོ་དེ་ཐིག་གདབ། ། ཅེས་དང༌། རྡོར་ཕྲེང་སོགས་ལས་ཀྱང་དེ་མཚུངས་བཤད་པ་ལྟར་རོ། །ཚད་ཅན་ད་ལྟ་ལག་ལེན་དུ་བྱེད་པ་ལ་རྒྱུད་སྡེ་སོ་སོའི་ལུགས་སྲོལ་ཨགྷ་ཡ་དང་ཤྲདྡྷྭ་ཀ་རའི་བཞེད་སྲོལ་གཉིས་ཡོངས་སུ་གྲགས་ཤིང༌། དེ་ལས་ཀྱང་རྡོར་ཕྲེང་གི་རྗེས་སུ་འབྲང་བ་མང་ལ། དེའང༌། སྒོ་ཚད་ཆ་ཆེན་རྣམ་གྲངས་ཏེ། ། ཆ་ཆེན་རེ་ལ་ཆ་ཆུང་བཞི། ། དེ་ཡི་ཕྱེད་ལ་ཞི་བར་གྲགས། ། རྡོ་རྗེ་ཕྲེང་བ་ལས་གསུངས་པའི། ། རིང་བ་མདའ་ཡབ་མདའ་ཡབ་དང༌། ། དཀྱིལ་འཁོར་འཁོར་དང་བཅས་པ་ཡི། ། ཉིས་འགྱུར་ཆ་ཆེན་ཉེར་བཞི་དང༌། ། ཆ་ཆུང་དགུ་བཅུ་རྩ་དྲུག་གོ། ། དད་བྱེད་གོ་ཆས་བཞེད་པ་ཡི། ། ཐུང་བ་རྩ་ཐིག་རྩ་ཐིག་བར། ། རྩ་བའི་དཀྱིལ་འཁོར་དངོས་ཀྱི་ནི། ། ཉིས་འགྱུར་ཆ་ཆེན་བཅུ་དྲུག་དང༌། ། ཆ་ཆུང་དྲུག་ཅུ་རྩ་བཞིའོ། ། རྩ་ཐིག་དཀྱིལ་འཁོར་དངོས་ཡིན་པས། ། དེ་ཡི་བརྒྱད་ཆ་སྒོ་ཚད་དུ། ། རྒྱུད་སྡེ་ཕལ་ལས་གསུངས་བཞིན་གྲགས། ། གདན་བཞི་སྡོམ་བྱུང་ལྔ་ཆ་དང༌། ། ཁམས་གསུམ་རྣམ་རྒྱལ་དགུ་ཆ་དང༌། ། དཀྱིལ་འཁོར་བཀོད་པར་བཅུ་ཆར་གསུངས། ། སྒོ་ལའང་གཉིས་གཉིས་མཉམ་པ་དང༌། ། གཉིས་མཉམ་གཉིས་མི་མཉམ་པ་དང༌། ། བཞི་མཉམ་ཉིད་དང་རིགས་གསུམ་བཤད། ། རྟ་བབས་ཚད་ཅན་ཚད་མེད་འདྲེས། ། བར་པའི་ཚད་ལ་ངེས་མེད་ཀྱང༌། ། རྒྱ་བལ་བྲིས་ཐང་ཅི་རིགས་འབྱུང༌། ། ཕྱི་མ་ཞེང་ལ་སྒོ་ཚད་གསུམ། ། དཔའ་ལ་ངེས་མེད་རིན་འབྱུང་ཞབས། ། འཇིག་རྟེན་སར་བྱེད་ཉིད་དུ་བཤད། ། དང་པོ་སྣམ་བུ་བཞི་མ་ནི། ། སྒོ་ཚད་གཅིག་སྟེ་རྒྱ་བོད་ཀྱི། །(༡༣༤བ) མཁས་གྲུབ་སྔ་མ་ཕལ་ཆེར་བཞེད། ། ཕྲེང་བའི་རྟ་བབས་ལུགས་བཞི་ལ། ། དུས་ཀྱི་འཁོར་ལོ་དེ་ཡི་ལུགས། ། སྣམ་བུ་བཅུ་གཅིག་ཚུལ་གསུམ་ལ། ། སྒོ་ཚད་གསུམ་པའི་རྟ་བབས་ལ། ། གཉིས་མཉམ་དགུ་མཉམ་བྱ་བ་དང༌། ། ལྔ་མཉམ་གསུམ་གསུམ་མཉམ་པ་གཉིས། ། སྒོ་ཚད་གཅིག་ལའང་ཕྱི་མ་ལྟར། ། མཉམ་གསུམ་ལུགས་སྲོལ་རྣམས་སུ་ཡོད། ། སྣ་ཚོགས་རྡོ་རྗེའང་ཡོད་མེད་མར། ། མཁས་པ་སྒོ་དྲུག་ཕྱིན་ཆད་ནས། ། གདན་དེ་ངེས་པ་ཅན་དུ་བྱེད། ། ཐོག་ཕུབ་མཆོད་རྟེན་མཁར་ཐབ་དང༌། ། རྒྱལ་ཁབ་རི་བོའི་གུར་ཏེ་བཞི། ། ཐིག་རིང་ཐིག་ཐུང་མན་ངག་ཐིག ། མཁས་པའི་ལག་ལེན་དུ་མ་འབྱུང༌། ། ཞེས་པ་ནི་དཀྱིལ་འཁོར་བྲིས་འབུར་སྤྱིའི་ལུགས་སྲོལ་མདོ་ཙམ་སྨོས་པའོ། ། བྲིས་པའི་དཀྱིལ་འཁོར་ལ་ཚོན་རྩེའང་། འབྱོར་པ་རབ་ཀྱིས་ཨིནྡྲ་ནཱི་ལ་དང་པདྨ་རཱ་ག་སོགས་མཆོག་གི་རིན་ཆེན་རྣམས་ཀྱི་ཕྱེ་མ་ལས་བྱ་དགོས་པ་དང༌། འབྲིང་རྣམས་ཀྱིས་འབྲས་སོགས་འབྲུ་སྣ་ཚོགས་ཀྱི་ཕྱེ་མ་ཁ་བསྒྱུར་བ་དང༌། ཐ་མས་མེ་ཏོག་གི་ཕྱེ་མའམ་ཁམ་སའམ། བླ་མེད་ལ་དུར་ཁྲོད་ཀྱི་སོལ་བ་དང་རུས་ཕྱེ་ལ་སོགས་པས་ཀྱང་བྲི་བར་རྒྱུད་རྣམས་ལས་གསུངས་ཤིང༌། ད་ལྟའི་ལག་ལེན་ལ་རྡུལ་ཚོན་གྱི་བཟོ་ཐབས་ཀྱང་གནས་དུས་དང་བསྟུན་པ་མང་བས་གང་ཡང་སླ་ཆོས་དེས་ཆོག་ཏུ་མ་སོང་བ་སོ་སོའི་ལག་རྒྱུན་བཞིན་དགོས་པ་དང༌། ཕྲེང་བ་ལས། སྦོམས་སུ་སྒོ་ཡི་ཉི་ཤུ་ཆར། ། རེ་ཁཱ་ཡང་དག་དྲངས་པར་བྱ། ། མཉམ་ཞིང་དྲང་པོ་མ་ཆད་པར། ། ཇི་ལྟར་རིགས་པ་ཕན་ཚུན་གྱི། ། བར་གྱི་ཚད་ནི་ནས་ཙམ་སྟེ། ། འོག་དང་སྟེང་ནི་ཅི་མཛེས་བྱ། ། སྦོམ་པོར་བཀྱེ་ན་ནད་འབྱུང་ངོ༌། ། ཕྲ་མོ་ཡིས་ནི་ནོར་རྣམས་ཉམས། ། ཡོན་པོ་ཡིས་ནི་རྣམ་པར་སྡང༌། ། ཆད་ན་བླ་མ་སློབ་མ་འཆི། ། གཡས་བསྐོར་མིན་པར་བཀྱེ་ན་ནི། ། ཚོན་རྣམས་ཕུར་བུས་བཏབ་པར་འགྱུར། ། ཞེས་གསུངས་པ་ལྟར། བྲི་ཉེས་པའི་ཉེས་དམིགས་རྣམས་ངེས་པས་ནན་ཏན་བསྐྱེད་ཅིང་གཟོབ་སྟེ་བྲི་དགོས་སོ། ། བརྟེན་པ་ལྷ་མཚན་དགོད་པའི་ཚུལ་ཡང་། ཁ་ཅིག་གིས་སྐུ་ཁོ་ན་བྲི་དགོས་པར་(༡༣༥ན)འདོད་པ་དང༌། ཕལ་ཆེར་ཚོན་སྤུངས་སམ་ཐིག་ལེ་ཁོ་ནས་ཆོག་པར་འདོད་པ་སོགས་སྣང་མོད། དུས་འཁོར་འགྲེལ་ཆེན་ལས། འདིར་ཐམས་ཅད་དུ་རྡུལ་ཚོན་གྱི་དཀྱིལ་འཁོར་གྱི་ཉི་མ་དང་ཟླ་བའི་གདན་རྣམས་ལ། རགས་པ་དང༌། ཕྲ་བ་དང་། གཞན་གྱི་དབྱེ་བས་དགོད་པ་རྣམ་པ་གསུམ་སྟེ། དེ་ལ་གཞན་གྱི་དབྱེ་བ་ནི། སྔགས་ཀྱི་ས་བོན་དགོད་པའོ། །ཕྲ་བའི་དབྱེ་བ་ནི། སྔགས་ཀྱི་ས་བོན་ཡོངས་སུ་གྱུར་པའི་རྡོ་རྗེ་ལ་སོགས་པའི་མཚན་མ་དགོད་པའོ། །རགས་པའི་དབྱེ་བ་ནི། རྡོ་རྗེ་ལ་སོགས་པའི་མཚན་མ་ཡོངས་སུ་གྱུར་པའི་ལྷའི་གཟུགས་དགོད་པའོ། །ཞེས་དང༌། ཀླུ་བྱང་གིས། ཇི་ལྟར་ནུས་པས་དཀྱིལ་འཁོར་དུ། ། ས་བོན་དགོད་བྱ་ཡང་ན་ནི། ། མཚན་མའམ་ལྷ་ཡི་གཟུགས་ཉིད་དེ། ། ལུགས་མའམ་འདུ་བྱས་དགོད་པར་བྱ། ། ཞེས་དང༌། སམྦུ་ཊི་དང་མན་ངག་སྙེ་མ་སོགས་ལས་ཀྱང་དེ་བཞིན་གསུངས་པ་དང༌། སྤྱི་རྒྱུད་ལས། བློ་དང་ལྡན་པས་མ་བསླབ་པར། ། ཕྱག་རྒྱ་རྣམས་སུ་དགོད་པར་བྱ། ། བསླབ་པས་ཀྱང་ནི་ཕྱེ་བ་ཡི། ། ཡན་ལག་རྫོགས་པར་རབ་ཏུ་དཀའ། ། ཡན་ལག་རྫོགས་ཤིང་རྒྱས་བྱས་ན། ། ཆོ་གའི་ལས་ལ་རིང་ཏུ་ཐོགས། ། གཟུགས་རྣམས་ལེགས་པར་བསྒྲུབ་ན་ནི། ། མང་པོ་རྣམས་ནི་ཟིན་མི་འགྱུར། ། ཡན་ལག་ཉམས་ན་བྱིན་མི་རློབས། ། དངོས་མི་འགྲུབ་པར་རབ་ཏུ་བཤད། ། དེ་ལྟ་བས་ན་མཁས་པ་ཡིས། ། ཕྱག་རྒྱའི་གཟུགས་སུ་ལྷ་རྣམས་དགོད། ། ཅེས་སོགས་གསུངས་ཏེ། ལྷའི་སྐུ་ཡོངས་རྫོགས་བྲིས་ན་རིང་དུ་འགོར་བས་ཆོ་ག་མི་རྫོགས་པར་འགྱུར་ལ། ལྷའི་ཡན་ལག་ཉམས་ན་བྱིན་གྱིས་མི་རློབ་པས་ཕྱག་མཚན་བྲི་བ་ཉིད་ཤིན་ཏུ་བསྔགས་པར་མཛད་ཅིང༌། ད་ལྟའི་མཁས་པ་ཚད་ལྡན་རྣམས་ཀྱི་ཕྱག་ལེན་དུ། གཙོ་བོ་ལ་སྐུ། འཁོར་རྣམས་ལ་ཕྱག་མཚན། ཡང་འཁོར་སྒོ་བ་སོགས་ལ་ས་བོན་དགོད་པར་མཛད་པ་ནི་ཤིན་ཏུ་ལེགས་ཤིང་སྤྲོས་པ་འཚམས་ལ། ཡང་ཕྲེང་(༡༣༥བ)བ་ལས། དེ་ལ་སྐལ་བ་དང་མི་ལྡན་པ་འདུས་པ་ན་མཚན་མ་དང་ཕྱག་རྒྱ་ཉིད་ཇི་ལྟར་རིགས་པར་བྲིའོ། །སྐལ་བ་དང་མི་ལྡན་པ་མེད་ན་ལྷའི་སྐུ་བྲི་བར་བྱ་ཞིང་བྲིས་སྐུའམ་ལུགས་མའམ་བཟོ་བོས་ལེགས་པར་འདུ་བྱས་པ་བཞག་པར་བྱའོ། །ཞེས་དང༌། མན་ངག་སྙེ་མར། མུ་སྟེགས་ཅན་སོགས་མ་དད་པས་མཐོང་བའི་སར་ལྷ་སྐུ་བྲི་ཡང་ཡུམ་དང་སྦྱོར་བ་བྲི་མི་རུང་བའང་བཤད་ལ། ཕྱག་རྡོར་དབང་བསྐུར་ལས་ནི། གཙོ་བོ་ལ་ཕྱག་མཚན་དང༌། འཁོར་རྣམས་ཀྱི་གནས་སུ་ཐིག་ལེ་ཙམ་དགོད་པར་ཡང་བཤད་དོ། ། གཞན་ཡང་མངོན་བརྗོད་ལས། ཚོན་ནམ་ཡང་ན་པིར་རྣམས་ཀྱིས། ། བྲིས་པ་རྣམས་ཀྱིས་རྣམ་པས་སྤྲས། ། ཞེས་གསུངས་པས། ས་བོན་སོགས་དཀྱིལ་འཁོར་དུ་དགོད་པ་ནི་ཚོན་ནམ་པིར་རམ་སྨྱུ་གུས་བྲིས་པས་ཀྱང་རུང་ངོ༌། ། སྒྱུ་འཕྲུལ་ལུགས་སོགས་བརྡ་དོན་གཞན་པའང་ཡོད། ། གསང་སྔགས་སྔ་འགྱུར་རྡོར་སེམས་སྒྱུ་འཕྲུལ་དྲྭ་བ་སོགས་བཀའ་གཏེར་རྣམས་ལས་གཞལ་ཡས་ཁང་གི་རྣམ་བཞག་བླ་མེད་སྤྱི་ཁྱབ་དང་ཅུང་ཟད་མི་མཐུན་པའི་བརྡ་དང་དོན་གྱི་ཁྱད་པར་གཞན་པའང་ཡོད་དེ། གསང་སྙིང་ལ་མཚོན་ན། འགྲེལ་ཆུང་ལས། གཞལ་ཡས་གཞི་དང་རྒྱུ་དང་རྒྱ། ། དབྱིབས་དང་གློ་འབུར་རྩེ་མོ་དང༌། ། རྒྱན་དང་སྒོ་ཁྱུད་རྟ་བབས་དང༌། ། མཚན་ཉིད་གདན་གྱི་རྣམ་པ་སྟེ། ། ཞེས་དབྱེ་བ་བཅུ་གཅིག་ཏུ་གསུངས་པ་ལས། རྩེ་མོ་ནི་སྒྱུ་འཕྲུལ་རང་ལུགས་ཀྱི་ཁྱད་ཆོས་ཏོག་གི་འོག་ཏུ་དབྱིབས་བུམ་པའི་ལྟོ་བ་ལྟ་བུའི་ཟླུམ་པོའི་རྣམ་པས་བསྐོར་བ་དང༌། རྒྱན་ལ་ཡང༌། འོག་དང་ལོགས་ཀྱི་རྒྱན་དང་ནི། ། སྟེང་དང་སྒོ་དང་ཕྱི་རོལ་དང༌། ། ངོ་བོ་ཉིད་དང་བདག་པོའི་རྒྱན། ། ཅེས་རྣམ་གྲངས་བདུན་ཡོད་པ་དང༌། རྟ་བབས་ལ། རྒྱུའི་རྟ་བབས་ནི་སྒོ་ཁང་གི་ནང་སྒོ་ཕུག་ཕྱི་ནང་གཉིས་སུ་ཐེམ་སྐས་བཞི་བཞི་རྟ་བབས་ཞོན་གྱི་རྟ་བབས་བརྒྱད་དུ་གྲགས་པ་དང༌། འབྲས་བུའི་རྟ་བབས་ནི་སྣམ་བུ་བརྒྱད་མར་བཤད་པ་སོགས་རྣམ་པར་དབྱེ་བ་མང་ངོ༌། །(༡༣༦ན) ཕ༢ གཉིས་པ་གསུང་རྟེན་བཤད་པ་ལ་གསུམ། བ༡ ཡིག་རིགས་སྤྱིར་བསྟན། བ༢ བོད་ཀྱི་ཡི་གེ་ཁྱད་པར་དུ་དབྱེ། བ༣ འབྲི་ཐབས་བསྟན་པའོ། ། བ༡ དང་པོ་ནི། གསུང་རྟེན་མདོ་ལས་ཡིག་རིགས་དྲུག་བཅུ་བཞི། ། ཡུལ་གླིང་སོ་སོའི་ཡི་གེ་ཀུན་གྱི་མཆོག ། ལཉ྄་ཝར་ལ་སོགས་མགོ་རྐེ་ཁ་དོག་དང༌། ། ཁོག་པ་ཁ་གསུམ་མགོ་རྗེས་རགས་པའོ། ། གསུང་གི་རྟེན་བཟོ་བོས་བཞེངས་པར་བྱ་བ་ནི་ཡི་གེ་གླེགས་བམ་ཡིན་ལ། དེའང་རྒྱ་ཆེར་རོལ་པའི་མདོ་ལས་ཡིག་རིགས་དྲུག་བཅུ་རྩ་བཞིར་གསུངས་ཏེ། དེའང༌། ཚངས་པ་ཁ་རོཥྚི་དང་པདྨའི་སྙིང༌། ། ཨངྒ་བངྒ་མ་ག་དྷ་བཀྲ་ཤིས། ། སོར་གདུབ་སཱ་ཀ་ནི་དང་སཱ་དྷ་ནི། ། ཨ་ཧུ་རྩུབ་མོ་འགྲོ་ལྡིང་མོན་ཡུལ་དང༌། ། ལྷོ་ཕྱོགས་དྲག་པོ་གྲངས་དང་སྤྱིའུ་ཚུགས། ། རྗེས་མཐུན་དྷ་རིགས་ཌ་དང་ཁྱ་སྱཱ་དང༌། ། རྒྱ་ནག་ཧུ་ན་དབུས་དང་རྒྱལ་གྱི་ཡིག ། ལྷ་ཀླུ་གནོད་སྦྱིན་དྲི་ཟ་མིའམ་ཅི། ། ལྟོ་འཕྱེ་ལྷ་མིན་མཁའ་ལྡིང་བྱ་རོག་སྐད། ། རི་དྭགས་འཁོར་ལོ་ས་ལྷ་བར་སྣང་ལྷ། ། ནུབ་བྱང་ཤར་གླིང་འདེགས་བཞག་རབ་ཏུ་བཞག ། རྒྱ་མཚོ་རྡོ་རྗེ་འཕྲིན་དང་རབ་ཏུ་འཕྲིན། ། རྣམ་བཞག་ཆུང་མིན་བསྟན་བཅོས་རྩིས་འདེགས་སྐོར། ། རྐང་པས་བྲིས་དང་ཕྱི་མའི་ཚིག་གཉིས་གྲུབ། ། ཕྱི་མ་བཅུ་གྲུབ་བར་སྒྲུབ་སྒྲ་ཀུན་བསྡུས། ། རིགས་མཐུན་རྣམ་བསྲེས་དྲང་སྲོང་དཀའ་ཐུབ་གདུངས། ། གསལ་བ་ས་རབ་ལྟ་དང་སྨན་རྒྱུ་མཐུན། ། སྙིང་པོ་ཐམས་ཅད་ཀུན་ཏུ་བསྡུས་པ་འོ། ། དེ་དག་ལས་ཚངས་པའི་ཡི་གེ་ལཉྩ་ནི། དེ་ལའང་། ཁོང་སེང་དང་། ཤ་ཆེན་གཉིས། དེ་དང་མཐུན་པ་དྷ་རི་ཀའི་ཡིག་རིགས་ལྔ། མགོ་གྱེན་བཟེད་ན་གར་ལ་རིགས་མི་འདྲ་བ་དྲུག །དེའི་མགོ་ཐུར་དུ་བཀུག་པ་ཀླུའི་ཡི་གེ་ཝརྟཱུ་་ལ་རྒྱ་མཚོ་མཐའ་རྣམས་དང་དྲུག་ཅུ་རྩ་བཞི་པོ་དེར་དངོས་སུ་མི་འདྲེན་པ་ཀསྨཱི་ར་མི་འདྲ་བ་གསུམ། གཽ་ཌ། གྷ་ཧུ་ར། སིནྡྷུ། གྷོ་ལའི་ཡིག་རིགས་གཉིས། མ་ག་དྷ་ཡིག །ཀ་མ་ཏའི་ཡི་གེ། པུཀྐི། མཎཀྐ་ལའི་ཡི་གེ། ཟངས་གླིང་གི་ཡི་གེ། (༡༣༦བ)སྲིན་པོའི་ཡི་གེ་རྣམས་ནི་བོད་དུའང་འབྲི་བའི་རྒྱུན་བྱུང་བས་མཚོན། ཡུལ་གླིང་སོ་སོའི་ཡི་གེའི་རིགས་འདྲ་མིན་མཐའ་ཡས་པ་མཆིས་པས། ཀུན་གྱི་མཆོག་ནི་ལཉྩ་ཝར་གཉིས་ཡིན་ལ། སོགས་ཁོངས་ནས་དེ་དག་གི་འབྲི་ཚུལ་ཤེས་ན་ན་ག་ར་ཡིག་སོགས་ལའང་དཀའ་བ་མེད་ཅིང༌། བྲིས་ཐིག་ཞིབ་ཆ་ལག་ཏུ་མི་ལོངས་པས། དཀྱུས་ལ་མགོ་རྐེ་གཉིས་ལ་མྱུ་གུའི་ཁ་དོ། ཁོག་པ་ལ་ཁ་གསུམ་སྟེ་དབང་སྨྱུག་ཁམས་ལྔ། རིང་ཆ་དང་ཕའི་རྒྱབ་ལག་སོགས་མིན་པའི་ཡིག་འབྲུ་སྤྱི་ཞེང་ལ་རང་ཁམས་གསུམ། དེ་དག་ཀྱང་ཕལ་ཆེར་ཐོག་མར་ཁོང་ནས་འབུབས་ཤིང་མགོ་རྗེས་སུ་འཐེན་པ་ནི་འབྲི་ཚུལ་རགས་པའོ། ། བ༢ གཉིས་པ་[བོད་ཀྱི་ཡི་གེ་ཁྱད་པར་དུ་དབྱེ་བ་]ནི། བོད་ཡིག་གཟབ་ཆེན་གཟབ་ཆུང་འབྲུ་ཆེ་ཆུང༌། ། བཤུར་མ་དཀྱུས་ཡིག་དྲུག་ལ་ཐམས་ཅད་འདུ། ། བོད་ཀྱི་ཡིག་རིགས་ཕྱིས་སུ་རིམ་པར་དར་བའི་རྣམ་གྲངས་མི་འདྲ་བ་མང་ཡང༌། རྩ་བ་གཟབ་ཆེན་དང་གཟབ་ཆུང་གཉིས། འབྲུ་ཆེན་དང་འབྲུ་ཆུང་གཉིས། བཤུར་མ་དཀྱུས་ཡིག་གཉིས་ཏེ་དྲུག་ལ་ཐམས་ཅད་འདུའོ།། གཟབ་ལ་སྣ་མ་གསར་ལེབ་རིམ་པར་དགུ། ། གཡུ་ཁྲིའི་རྗེས་འབྲང་སྦལ་ལུགས་མང་ལུགས་གཉིས། ། བོད་ཡིག་གི་མཆོག་གཟབ་མའམ་དབུ་ཅན་ལ། ཐོག་མར་ཐུ་མི་སཾ་བྷོ་ཊ་ཉིད་ཀྱི་ཕྱག་བྲིས་སྦལ་ནག་ན་ལ་རྒྱངས་པ་འདྲ་བ་དང༌། དེའི་རྗེས་སུ་ཕྱ་དར་རིན་ཆེན་འབར་ཞེས་བྱ་བས་སོ་ཕག་གཤིབས་པ་ལྟ་བུ་དང༌། དེའི་རྗེས་སུ་ཆབ་དཀར་བེའུ་ཚེས་བྱ་ཕོ་འཇོལ་བ་ལྟ་བུ་དང༌། དེའི་རྗེས་སུ་གཙང་དགེ་བསྙེན་དབང་གིས་ནས་ནག་བཀྲམ་པ་ལྟ་བུ་དང༌། དེའི་རྗེས་སུ་འབྲེའོ་ཁྲོམ་ཞེས་པས་མུ་ཏིག་བསྟར་ལ་བརྒྱུས་པ་ལྟ་བུ་དང༌། དེའི་རྗེས་སུ་ཚེ་སྤོང་བྱང་ཆུབ་ཀྱིས་སྦུར་ནག་འཕྲད་པ་ལྟ་བུ་དང༌། དེའི་རྗེས་སུ་ཐེ་ཡོན་ཏན་བྱ་བས་ཉ་ཆུ་ནས་ཕྱུངས་པ་ལྟ་བུ་དང༌། དེའི་རྗེས་སུ་གྲ་རྒོད་རྣམ་གཉིས་ཞེས་པས་སེང་གེ་གནམ་དུ་འཆོང་བ་ལྟ་བུ་རིམ་པར་བྲིས་པ་སྟེ། དེ་རྣམས་ལ་སྣ་མ་ཟེར། བསྟན་པ་ཕྱི་(༡༣༧ན)དར་གྱི་ཐོག་མར་སྒྲོ་ཉ་ཤ་རི་ཞེས་པ་དང་མཐོང་བ་རྡོ་རྗེ་དཔོན་སློབ་ཀྱི་རིང་ལ་གསེར་ལེབ་གྲུབ་བཞི་སྟེ་རིམ་པ་དགུ་བྱུང༌། དེའི་རྗེས་སུ་ཁྱུང་པོ་གཡུ་ཁྲི་འབར་ཞེས་བྱ་བས་དཀྱིལ་འཁོར་གྱི་ཐིག་ལ་དཔེ་བླངས་ནས་ཆ་ཆེན་ཆ་ཆུང་དུ་བགོས་པ་སོགས་ཐིག་དང་སྨྱུ་གུ་ཤོག་ཆག་འབྲི་ལུགས་སོགས་ཀྱི་བསྟན་བཅོས་བྱས་ཏེ་སློབ་མ་བསམ་གྱིས་མི་ཁྱབ་པ་བསྐྱང༌། དེའི་ནང་ནས་སྦལ་ལུགས་དང་མང་ལུགས་གཉིས་སུ་གྱེས་ཏེ། ད་ལྟ་འཕན་ཡུལ་དང་ངོར་དུ་ཡོད་པ་རྣམས་ཡིན་པར་གྲགས་སོ། ། གཅེས་བརྒྱད་འདོན་བཅུ་མ་ཆོས་ཉེར་གཅིག་དང༌། ། བུ་ཆོས་བཅུ་དྲུག་སྤྱི་ཆོས་གསུམ་ལྡན་བྱ། ། ལུགས་དེ་རྣམས་ཀྱི་སྤྱི་ལ་གཅེས་པ་བརྒྱད་ནི། སྣག་ལམ་ཟླུམ་ལ་སྒྲོས་ཆགས་གཅེས། ། གཅིག་པུར་སྐྱེས་ལ་དཔུང་ཐུང་གཅེས། ། གདགས་པ་ཅན་ལ་ཟུར་ཐིག་གཅེས། ། སྟོད་ཕུབས་ཅན་ལ་ཕོ་བ་གཅེས། ། སྨད་ཕུབ་ཅན་ལ་འཁོང་འདྲེན་གཅེས། ། རྐང་པ་རྟར་ཞོན་ཕྱི་འབྲང་གཅེས། ། ཡར་ཕུལ་མཐར་རྒྱས་སྒྲོས་གནོན་གཅེས། ། མིག་ཅན་དག་ལ་རྐེ་གཙང་གཅེས། ། ཞེས་དང༌། འདོན་པ་བཅུའམ་བཅུ་བཞིར་ཡང་གྲགས་པ་ནི། ཁང་མགོ་ལ་འདོན། མཁྲང་དཔུང་ལ་འདོན། སྒྲོས་སྦོ་ཐེམ་ལ། བཤན་མར་འཐེན་ལ། སྤྱང་ཁོག་པ་ལ། ཧྲམ་སྣག་སྣ་ལ། ཧུར་མིག་འདྲིལ་ལ། གཡེར་ཡར་འཕུལ་ལ། ཡང་ཡ་བཏགས་ལ། གྲུང་ཟགས་མཆུ་ལ། བཟང་མགོ་དཔུང་ལ། འཛུམ་དཀར་ནག་སྣ་ལ། གཉེན་བསྣོལ་མཚམས་སུ། འཁྱུག་ཡན་ལག་ལ་འདོན་པ་རྣམས་དང༌། མ་ཆོས་ཉེར་གཅིག་ནི། མགོ་རབ་ཐག་ཟླུམ་གྲིས་བཅད་འདྲ་བ། འབྲིང་ཀ་གཞུ། ཐ་མ་ཚག་མགོ་སྟེ། མགོ་གསུམ། (༡༣༧བ) དཔུང་རབ་ཐུགས་ཀར་རྡོར་འཛིན། འབྲིང་མདའ་འཕེན། ཐ་མ་ལག་ཆག་འཕྲེད་ཉལ་ཏེ། དཔུང་གསུམ། སྦོ་རབ་སྒྲོས་ཆགས་གྲི་ལྟག་འདྲ་བ། འབྲིང་སྤུ་ཐག་སྒྲིམ་འདྲ། ཐ་མ་གྲོག་སྐེད་འདྲ་བ་སྟེ། སྦོ་གསུམ། ཟག་མཆུ་རབ་གསེགས་སྦྱོར་ཐུང་རྣོ། འབྲིང་འགྱེའོ་ཕག་སྣ། ཐ་མ་རྐུར་པོ་གླང་སྣ་སྟེ། ཟག་མཆུ་གསུམ། རབ་རྒྱ་ཁབ་བསླང་འདྲ། འབྲིང་རྔ་དབྱུག་འཕྱར་འདྲ། ཐ་མ་ལག་མགོ་བཅད་འདྲ་སྟེ། ཡར་འཐེན་གསུམ། རབ་སྒོ་ལྕགས་རྐང་འདྲ། འབྲིང་ཁྱི་གུའི་མཇུག་འདྲ། ཐ་མ་འབུ་མཇུག་སྦྲང་རྐང་འདྲ་བ་སྟེ། མར་འཐེན་གསུམ། རབ་ཉ་མིག །འབྲིང་ནས་འདྲ། ཐ་མ་ཟུར་གསུམ་ཁྲོ་མིག་སྟེ། མིག་གསུམ་བཅས་ཉེར་གཅིག ། བུ་ཆོས་བཅུ་དྲུག་ནི། གཉིས་ཆོད་འཛུམ་ལ་མཐོ་དམན་མེད་པ་ན་རོའི་ཆོས་གསུམ། གསེགས་ཀྱིས་གཞོལ་བ་སྟོད་སྨད་ཕྱེད་པ་སྟེ་འགྲེང་བུའི་གཉིས། ཟླུམ་འདྲིལ་འཁྱུག་པ་སྟེ་གི་གུ་གསུམ། གདགས་པ་ཅན་ལྡན་ཐབས་བརྐྱངས་པ་མདུང་ཚུགས་གསུམ། སྦྲེལ་ལྡན་པ་སྟེ་ཞབས་ཀྱུའི་གསུམ། རྟ་སྦྲེལ་འཕངས་མ་བསྐྱིལ་བ་སྟེ་ར་ཏའི་གཉིས། འཁྱུག་སྙོམས་འདེགས་ལ་དཀྱིལ་ཡངས་ཏེ་ཡ་བཏགས་ཀྱི་གསུམ་སྟེ། བསྡམས་པས་བཅུ་དྲུག ། གཟུགས་དཀྱུས་སུ་མ་གོལ་བ། དཀྱུས་ཉིད་ཚང་ནས་མ་ཡར་བ། གཟུགས་དཀྱུས་ཤན་ཕྱེད་པ་སྟེ། སྤྱི་ཆོས་གསུམ་དང་ལྡན་པར་བྱ་ཞིང༌། དེའང་ཐིག་སྒྲོམ་གྲུ་བཞི་ལག་ལེན་ལྟར་བཙལ་ལ། ཕུབ་དང་དཔུང་པ་ཆ་གཅིག །ཟག་མཆུ་ཆ་གཉིས།