Tibetan
བརྒྱད་འབྱུང་བ་ནི། མ་ག་དྷཱར་བདེ་བྱེད། སིངྒ་ལར་རི་པོ་ཏ་ལ། བལ་པོར་བྱ་ཁྲི་ཁ་ཤོར། སིང་(༡༤༢ན)ག་གླིང་དུ་གེའུ་དོ་ཤ། ལི་ཡུལ་གོ་མ་ས་ལ་གན་དྷ། ཁ་ཆེར་ཀ་ན་ག །ཟ་ཧོར་དུ་བདེ་སྤྱོད་གཞོན་ནུའི་མཆོད་རྟེན་ནོ། ། ལྔ་པ་ལ། ཉན། རང་། ཐེག་ཆེན་གྱི་གསུམ་མོ། ། དང་པོ་ནི། ཆོས་གོས་བཞི་བལྟབས་ཀྱི་སྟེང་དུ་ལྷུང་བཟེད་སྦུབ་པ་ལ་མཁར་གསིལ་བཙུགས་པ་ལྟ་བུའོ། ། གཉིས་པ་ནི། རྨང་གྲུ་བཞིའི་སྟེང་དུ་ངོས་གྲུ་བཞི་བང་རིམ་ཟླུམ་པོ་བཅུ་གཉིས་པ་འཁོར་ལོ་རྩིབས་བརྒྱད་པ་ཅན་ནོ། ། གསུམ་པ་ནི། སློབ་དཔོན་འཕགས་པ་ཀླུ་སྒྲུབ་ཀྱིས། ལྷུང་བཟེད་སྦུབ་པ་ལྟ་བུ་བིམ་པའམ་ཟླུམ་པོ་དང༌། ཁང་བུ་ལྟ་བུ་དང་རྒྱལ་མཚན་ལྟ་བུའི་མཆོད་རྟེན་བརྒྱད་ལ་སོགས་པ་གསུངས། རྒྱུད་སྡེ་སོ་སོའི་དབང་དུ་བྱས་ནས། བྱ་སྤྱོད་ཀྱི་མཆོད་རྟེན་བང་རིམ་ནང་དུ་བཅག་ཅིང་ཕྱིར་འབུར་བའམ་དབུས་འབུར་ལ་མཐའ་གཉིས་ནང་དུ་བཅུམས་པ་འཁོར་ལོ་བཅུ་གཉིས་ལ་སོགས་པའང་བཤད་པར་གྲགས། རྣལ་འབྱོར་རྒྱུད་ཀྱི་སྔར་བཤད་པའི་རྡོ་རྗེའི་བརྩེགས་པ་སོགས་དང་། བླ་མེད་ཀྱི་དུས་འཁོར་ནས་གསུངས་པ་སོགས་སོ། ། བ༢ གཉིས་པ་ལག་ཏུ་བླང་བྱ་དངོས་ལ་གཉིས། མ༡ ཐུན་མོང་དང་། མ༢ ཐུན་མིན་ནོ། ། མ༡ དང་པོ་ནི། ལག་ཏུ་བླང་བྱ་སོ་སྐྱེ་ཉན་རང་རྒྱལ། ། ལུང་ལས་འབྱུང་ཞིང༌། དེ་ལྟར་བཤད་པ་རྣམས་ལས་ད་ལྟ་ལག་ཏུ་བླང་བྱ་དངོས་ནི། སོ་སྐྱེ་ཉན་ཐོས་རང་རྒྱལ་རྒྱལ་བའི་མཆོད་རྟེན་རྣམས་ཏེ། དེའང་སོ་སོའི་སྐྱེ་བོ་ལ་གདུགས་མེད་པའི་བྱི་བོའོ། །ཉན་ཐོས་ཀྱི་འབྲས་བུའི་གྲངས་ཀྱི་གདུགས། རང་རྒྱལ་གྱི་གདུགས་བདུན། སངས་རྒྱས་ཀྱི་གདུགས་བཅུ་གསུམ། ཆར་ཁེབས་ཏོག་དང་བཅས་པ་རྣམ་པ་ཐམས་ཅད་པར་བཞེངས་པ་འདུལ་བ་ལུང་ལས་གསུངས་ཏེ། འདིར་གདུགས་ནི་ཆོས་འཁོར་དང༌། ཆར་ཁེབས་ནི་གདུགས་ལ་ངོས་འཛིན་དགོས་སོ། ། རྒྱལ་བའི་མཆོད་རྟེན་བརྒྱད། ། ཆ་ཚད་ངེས་མེད་འོན་ཀྱང་དྲི་མེད་འགྲེལ། ། བོད་ཀྱི་མཁས་པ་ཕལ་ཆེར་དཔའ་བོར་བྱེད། ། དེ་ལའང་ཆ་ཆེན་བཅུ་དྲུག་པ་ལ་སོགས། ། དཔང་དང་དེ་(༡༤༢བ)ཕྱེད་ལྷག་བཅས་རྒྱ་ཚད་སྨྲ། ། བྱེ་བྲག་བརྒྱུད་པའི་མན་ངག་ཏུ་ནང་དུ་ཆོས་ཀྱི་རིང་བསྲེལ་ཙམ་བཞུགས་ན་ཐམས་ཅད་ཀྱང་ཆོས་སྐུའི་མཆོད་རྟེན་དུ་འགྱུར་བར་བཞེད་པའི་ཕྱིར། རྒྱལ་བའི་མཆོད་རྟེན་རྣམ་པ་ཐམས་ཅད་པ་ཉིད་དེང་སང་བཞེངས་པ་ལྷུར་བྱེད་པས། དེ་ལའང་ཚེམས་དང་དབུ་སྐྲ་སེན་མོ་རིང་བསྲེལ་གྱི་མཆོད་རྟེན་སོགས་བཅོམ་ལྡན་འདས་བཞུགས་པ་དང་མ་བཞུགས་པའི་ཚེ་དད་ལྡན་རྣམས་ཀྱིས་བརྩིགས་པའི་དབྱིབས་དང་རྣམ་པ་ཐ་དད་པ་མང་བ་ལས། གཙོ་བོར། སྤྲུལ་པས་མཛད་པ་སྔོན་བསྟན་ཕྱིར། ། མཆོད་རྟེན་བརྒྱད་དུ་སྐུ་གདུང་བཞག ། ཅེས་ལས་ཀྱི་མཐའ་བརྗོད་པའི་མདོ་ལས་གསུངས་པ་ལྟར། སྟོན་པའི་མཛད་པ་ཁྱད་པར་ཅན་གཙོ་བོར་གྱུར་པ་དག་བསྟན་པའི་ཚེ་ཡུལ་ལྗོངས་སོ་སོའི་སྐྱེ་བོ་རྣམས་ཀྱིས་མཆོད་རྟེན་བརྩེགས་ཏེ་དུས་སྟོན་གྱི་སྲོལ་ཚུགས་པ་ལས། དཔལ་མགོན་ཀླུ་སྒྲུབ་ཀྱིས་ཡོངས་གྲགས་དང་མཐུན་པར་གནས་བརྒྱད་ཀྱི་མཆོད་རྟེན་ལ་བསྟོད་པ་དང་རྣམ་གཞག་མཛད་པ་ལྟར་མཆོད་རྟེན་བརྒྱད་དུ་ཡོངས་སུ་གྲགས་པ་སྟེ། དང་པོ་ནི། བདག་ཅག་གི་སྟོན་པ་སྐུ་བལྟམས་པའི་ཚེ། གྲོང་ཁྱེར་སེར་སྐྱར་བྱུང་བ་བདེ་གཤེགས་མཆོད་རྟེན་ནམ། བཀྲ་ཤིས་འབྱུང་བའི་མཆོད་རྟེན་ཟླུམ་པོ་པདྨའི་འདབ་མ་ཅན་གྱི་བང་རིམ་བཞིའམ་བདུན་བརྩེགས་པ། པད་འདབ་ཀྱིས་སྤྲས་པ། གཉིས་པ་ནི། རྒྱལ་པོའི་ཁབ་ཏུ་མངོན་པར་བྱང་ཆུབ་པའི་ཚེ། བྱང་ཆུབ་ཆེན་པོའི་མཆོད་རྟེན་གྲུ་བཞི། བང་རིམ་བཞི་པ། གསུམ་པ་ནི། ཝ་ར་ཎཱ་སིར་ཆོས་འཁོར་བསྐོར་བའི་ཚེ། ཡེ་ཤེས་མཆོད་རྟེན་ནམ་ཆོས་འཁོར་མཆོད་རྟེན་དུ་གྲགས་པ་གྲུ་བཞི། བང་རིམ་བཞི། གློ་འབུར་དང་བཅས་པ་སྒོ་རབ་བརྒྱ་རྩ་བརྒྱད། འབྲིང་ང་དྲུག །ཐ་མ་བཅུ་དྲུག་པ། བཞི་པ་ནི། མཉན་ཡོད་ཛེ་ཏཱའི་ཚལ་དུ་ཆོ་འཕྲུལ་བསྟན་པའི་ཚེ། མུ་སྟེགས་ཕམ་བྱེད་ཀྱི་མཆོད་རྟེན་ནམ་ཆོ་འཕྲུལ་མཆོད་རྟེན་གྲུ་བཞི། བང་རིམ་བཞི་པ། ཕྱོགས་རེར་གློ་འབུར་དང་བཅས་པའམ། འདིའང་ཟླུམ་པོ་བང་རིམ་བཞི་པ་པད་འདབ་ཅན། (༡༤༣ན) ལྔ་པ་ནི། ཡངས་པ་ཅན་གསལ་ལྡན་དུ་བྱུང་བ་སྟོན་པ་སུམ་རྩེན་དུ་དབྱར་གནས་མཛད་དེ་ཡུམ་བདེན་པ་ལ་བཀོད་ཅིང་སྔ་དྲོ་དགག་དབྱེ་མཛད། ཕྱི་དྲོ་ཛམྦུའི་གླིང་དུ་ཕེབས་པའི་ཚེ། ལྷ་བབས་མཆོད་རྟེན་ནམ་སུམ་ཅུ་རྩ་གསུམ་ལྷའི་མཆོད་རྟེན་དུ་གྲགས་པ། བང་རིམ་བཞིའམ་བརྒྱད་པ། ངོས་རེར་གློ་འབུར་དང་བཅས་པའི་གློ་འབུར་གྱི་དབུས་ན་ཐེམ་སྐས་ཡོད་པ། དྲུག་པ་ནི། རྒྱལ་པོའི་ཁབ་ཏུ་ལྷས་བྱིན་གྱིས་དགེ་འདུན་གྱི་དབྱེན་བྱས་པ་མཆོག་ཟུང་གིས་འདུམས་པའི་ཚེ། དབྱེན་ཟླུམ་མཆོད་རྟེན་ནམ། འོད་ཟེར་ཅན་ནམ། བྱམས་དངོས་མཆོད་རྟེན་དུ་གྲགས་པ། བང་རིམ་བཞི་པ། གྲུ་བཞིའི་ཟུར་བཞི་མཉམ་པར་བཅད་པ་ལྟ་བུ། བདུན་པ་ནི། ཡངས་པ་ཅན་དུ་སྐུ་ཚེའི་འདུ་བྱེད་ཟླ་བ་གསུམ་དུ་བྱིན་གྱིས་བརླབས་པའི་ཚེ། བྱིན་རླབས་མཆོད་རྟེན་ནམ། རྣམ་རྒྱལ་མཆོད་རྟེན་དུ་གྲགས་པ་ཟླུམ་པོ་བང་རིམ་གསུམ་པ། བརྒྱད་པ་ནི། གྲོང་ཁྱེར་རྩྭ་ཅན་དུ་མྱ་ངན་ལས་འདས་པའི་ཚེ། མྱང་འདས་མཆོད་རྟེན་དུ་གྲགས་པ་བང་རིམ་མེད་པ་གདན་ཁྲིའི་སྟེང་དུ་བུམ་གདན་ཡན་ཆད་བཞུགས་པ་རྣམས་སོ། ། སྤྱིར་མཆོད་རྟེན་གྱི་ཚད་དབྱིབས་ངེས་པ་མེད་དེ། མདོ་སྡེ་རྣམས་ལས་སངས་རྒྱས་ཀྱི་རིང་བསྲེལ་བཞུགས་པའི་མཆོད་རྟེན་དང་དཔག་ཚད་ཀྱི་རྒྱ་ཁྱོན་གསུངས་པ་དང༌། ཡང་མཆོད་རྟེན་ནི་སྐྱུ་རུ་རའི་འབྲུ་ཙམ། གདུགས་ནི་རྒྱ་ཤུག་གི་ལོ་མ་ཙམ། སྲོག་ཤིང་ནི་ཁབ་ཙམ་ཞེས་ཁང་བུ་བརྩེགས་པའི་མདོ་ལས་བཤད་པས་རང་རང་གི་སེམས་ཀྱི་སྟོབས་དང་འབྱོར་པའི་ཁྱད་པར་ལ་དཔག་གོ། ། འོན་ཀྱང་བཟོ་ཉེས་འགོག་པའི་སླད་དུ་ཆ་ཚད་ཀྱི་ལག་ལེན་གལ་ཆེ་བས་དེའི་ཚུལ་གཙུག་ཏོར་དྲི་མེད་ཀྱི་འགྲེལ་པ་རྒྱ་གཞུང་དུ་གྲགས་པ་ལ་བོད་ཀྱི་མཁས་པ་ཕལ་ཆེར་དཔང་པོ་བྱེད་ཅིང༌། བུ་སྟོན། སྟག་ཚང་ལོ་ཙཱ། སྤྲུལ་སྐུ་འཕྲང་ཁབ་དཔལ་ལྡན་བཟང་པོ་སོགས་ཀྱིས་ཆ་ཚད་ཀྱི་བསྟན་བཅོས་མཛད། དེ་དག་གི་ལེགས་ཆ་བསྡུས་པ་མི་དབང་སངས་རྒྱས་རྒྱ་མཚོའི་ཆ་ཚད་ཉིད་ད་ལྟ་ཀུན་ལ་རྒྱུག་ཆེ་ཞིང༌། དྲི་མེད་ཀྱི་(༡༤༣བ)ལུགས་དེ་ལའང་རྨངས་དགེ་བ་ནས་ཏོག་གི་བར་ཆ་ཆེན་བཅུ་དྲུག་གིས་གཞལ་བ་དང༌། སོགས་ཁོངས་ནས། པད་ཆུང་ཡན་ལ་ཆ་ཆེན་བཅུ་གཉིས་དངོས་སུ་བསྟན། སེང་ཁྲི་ཕྱིན་ཆད་མཛེས་ཆ་བཙལ་བས་ལུགས་སྲོལ་མང་དུ་གྱུར་པར་སྣང་བ་དེ་དག་དཔང་གི་ཚད་དང༌། དཔང་གི་ཕྱེད་དང༌། དཔང་གི་ཕྱེད་ལས་ཅུང་ཟད་ལྷག་པ་རྒྱ་ཚད་དུ་སྨྲ་བ་སོགས་སྣང་ངོ༌། ། རྗེ་བརྒྱད་པས་ནི་དུས་འཁོར་ཡེ་ཤེས་ལེའུའི་ཚད་ལས་དཔག་ཏེ་མཆོད་རྟེན་བརྒྱད་ཀྱི་ཐིག་ཚད་ཁྱད་པར་འཕགས་པ་གསལ་བར་མཛད་པ་ནི་ཉི་མ་ཆེན་པོའི་མེ་ལོང་དུ་བལྟའོ། ། འདིར་མཁོ་བའི་བརྡ་ཁྱད་ནི། གདན་གྱི་ས་འཛིན་ཐེམ་སྐས་གསུམ། ། ཐིག་གདན་སེང་ཁྲི་པད་ཆུང་དང༌། ། གཟུངས་ས་བང་ཆེན་རྨངས་དགེ་བ། ། དེ་སྟེང་སྤྱི་ལ་བང་རིམ་བཞི། ། བུམ་རྟེན་བུམ་པ་བྲེ་རྟེན་དང༌། ། ཐེ་འདེགས་པདྨ་འོད་ཟེར་ཕྲེང༌། ། ཕོ་འཁོར་མོ་འཁོར་བཅས་བཅུ་གསུམ། ། ཐུགས་རྗེ་མདོ་གཟུངས་ཞུ་རྒྱ་གྲམ། ། གདུགས་དང་ཆར་ཁེབས་ཟླ་ཕྱེད་ཉི། ། ནོར་བུ་ཏོག་དང་བཅས་པའོ། ། འདི་རྣམས་ཀྱི་རྣམ་དག་སློབ་དཔོན་ཤཱནྟིཾ་གརྦྷའི་མཆོད་རྟེན་གྱི་ཆ་དབྱེ་བ་ལས་གསུངས་པའི་དོན་ནི། བདག་ཟུངས་རྗེས་སུ་དྲན་པ་དྲུག ། བང་ཆེན་དགེ་བཅུ་རྨངས་ཚད་མེད། ། ཡང་ན་དེ་གཉིས་ལྡོག་པའང་བཤད། ། བང་རིམ་བཞི་པོ་རིམ་པ་བཞིན། ། དྲན་པ་ཉེར་བཞག་ཡང་དག་སྤོང༌། ། རྫུ་འཁྲུལ་རྐང་བཞི་དབང་པོ་ལྔ། ། བུམ་རྟེན་སྟོབས་ལྔ་བུམ་པ་ནི། ། བྱང་ཆུབ་ཡན་ལག་བྲེ་འཕགས་ལམ། ། རྒྱུ་ཡི་ཆོས་རྣམས་རྣམ་པར་དག ། སྲོག་ཤིང་ཀུན་རྫོབ་ཕ་རོལ་སེམས། ། རྗེས་དྲན་བདེན་བཞི་ཟད་མི་སྐྱེ། ། ཤེས་པ་བཅུ་ཡི་ངོ་བོ་དང༌། ། པདྨ་ཐབས་དང་ཤེས་རབ་སྟེ། ། འཁོར་ལོ་སྟོབས་བཅུ་དྲན་ཉེ་གསུམ། ། ཆར་ཁེབས་ཐུགས་རྗེ་ཏོག་ཆོས་སྐུ། ། མཆོད་རྟེན་ཉིད་ཀྱི་ངོ་བོར་བཤད། ། རྒྱན་རྣམས་རྒྱལ་བའི་ཡོན་ཏན་ཏེ། ། རྡོ་རིང་མི་འཇིགས་བཞི་དང་ལྡན། །(༡༤༤ན) ཐེམ་སྐས་སྲུང་བ་མེད་པ་བཞི། ། རྒྱལ་མཚན་བདུད་བཞིའི་གཡུལ་ལས་རྒྱལ། ། མེ་ཏོག་ཕྲེང་བ་མཚན་དཔེ་འབར། ། རྒྱལ་མཚན་བཞི་ནི་བདེན་བཞིའི་དོན། ། དྲིལ་བུ་ཚངས་དབྱངས་དྲུག་ཅུའི་གསུང༌། ། ཉི་ཟླ་ཡེ་ཤེས་སྣང་བ་སྐྱེད། ། མེ་ལོང་ཡེ་ཤེས་བཞི་དང་ལྡན། ། ཅོད་པན་ཆོས་ཀྱི་རྒྱལ་སྲིད་ཐོབ། ། བ་དན་ཆོས་ཀྱི་སྙན་པས་ཁྱབ། ། འབྲས་བུའི་ཆོས་རྣམས་དག་པའོ། ། སྒོ་མང་བདེན་བཞི་རྣམ་ཐར་བརྒྱད། ། རྟེན་འབྲེལ་སྟོང་ཉིད་བཅུ་དྲུག་གོ། ། གློ་བུར་ཁྱད་པར་འཕགས་པ་ཡི། ། རྣམ་པར་འཕྲུལ་པས་འགྲོ་དོན་མཛད། ། ཐེམ་སྐས་སངས་རྒྱས་གཞན་དོན་བྱོན། ། པདྨ་འཁོར་བའི་སྐྱོན་མ་གོས། ། བང་རིམ་མེད་པ་སྲིད་པ་ཡི། ། འཇུག་པ་བྲལ་ཞིང་སྤྲོས་པ་མེད། ། དབྱེན་ཟླུམ་དེ་རྒྱུ་དུག་གསུམ་དང༌། ། ལྟ་བཅད་རྣམ་ཐར་བརྒྱད་མཚོན་ནོ། །ཞེས་སོ། ། མ༢ གཉིས་པ་[ཐུན་མོང་མ་ཡིན་པ་]ནི། ཐུན་མིན་དུས་འཁོར་ལས་གསུངས་ཡེ་ཤེས་ཀྱི། ། མཆོད་རྟེན་སངས་རྒྱས་སྐྱིལ་ཀྲུང་ལྟེ་བ་མན། ། བང་རིམ་ལྟེ་འབུར་བུམ་གདན་དཔུང་པའི་བར། ། བུམ་ལྡིར་མགྲིན་པ་བྲེ་དང་མཛོད་སྤུའི་བར། ། བྲེ་གདོང་དེ་ཡན་ཆོས་འཁོར་ཏོག་དང་བཅས། ། ཕྱི་ནང་གཞན་གསུམ་རྣམ་དག་གཅིག་ཏུ་མཐུན། ། ཐུན་མོང་མ་ཡིན་པའི་མཆོད་རྟེན་དུས་ཀྱི་འཁོར་ལོ་ལས་གསུངས་པ་ཡེ་ཤེས་མཆོད་རྟེན་ནི། སངས་རྒྱས་སྐྱིལ་མོ་ཀྲུང་དུ་བཞུགས་པའི་ལྟེ་བ་མན་ཆད་བང་རིམ། ལྟེ་འབུར་བུམ་གདན། དེ་ནས་དཔུང་པའི་བར་བུམ་ལྡིར། མགྲིན་པ་བྲེ་དང༌། ཀོསྐོ་ནས་སྣ་རྩེ་མཛོད་སྤུའི་བར་བྲེ་གདོང༌། དེ་ནས་རལ་པའི་ཐོར་ཅོག་གི་བར་ལ་ཆོས་འཁོར་ཆར་ཁེབས་ཏོག་དང་བཅས་པ་སྟེ། དེའང་དཔང་གི་ཚད་ནི་སོར་མོ་ཕྱེད་དང་བཅུ་གཉིས་པ་ཕྲག་ལྔར་སྟག་ཚང་ལོ་ཙཱ་སོགས་བཞེད་པ་ཡོངས་གྲགས་ཀྱི་དབང་དུ་བྱས་པ་སྟེ། གསང་གནས་ནས་གཙུག་ཏོར་བར་གྱི་འཁོར་ལོ་ལྔའི་དག་པ་དང་སྦྱར། འབེ་ལོ་ཚེ་དབང་ཀུན་ཁྱབ་ནི། དཔང་ལ་སོར་མོ་ལྔ་བཅུ་དང༌། རྒྱ་ཚད་དེའི་ཕྱེད་དེ་སོར་(༡༤༤བ)ཕྱེད་ཀྱིས་ལྷག་པའི་བཅུ་གཉིས་པ་ཚན་པ་བཞི་ནི་རླུང་དཀྱིལ་ནས་གཟུགས་མེད་པར་དཔག་ཚད་འབུམ་ཕྲག་བཞི་དང་སྦྱར་བ་ཕྱི་འཇིག་རྟེན་གྱི་དག་པ། རྐང་མཐིལ་ནས་གཙུག་ཏོར་བར་ནང་རྡོ་རྗེའི་ལུས་ལའང་དེ་བཞིན་དུ་སྦྱར་བས། གཞན་ལྷའི་སྐུའི་དག་པའང་ཞར་ལས་འགྲུབ་པར་བཞེད་དེ། མདོར་ན། ཕྱི་ནང་གཞན་གསུམ་པོ་རྣམ་དག་ཕྱོགས་གཅིག་ཏུ་མཐུན་པའོ། ། བ༣ གསུམ་པ་ལུགས་སྲོལ་ཁྱད་པར་ཅན་འཕྲོས་སུ་སྨོས་པ་ནི། ཁྱད་པར་དཔལ་མཆོག་རོག་པ་མེད་པ་དང༌། ། བལ་ཡུལ་རང་བྱུང་མཆོད་རྟེན་ཆེན་པོ་ཡི། ། ཚད་དབྱིབས་སྔོན་བྱུང་མཁས་རློམས་མ་ཐོས་མང༌། ། ཐུན་མོང་དུ་ཡོངས་སུ་གྲགས་པ་དེ་དག་ལས་ཀྱང་ཁྱད་པར་དུ་འཕགས་པ། ཛྙཱ་ན་བིམྦ་ཀཱ་ཡ། ཡེ་ཤེས་གཟུགས་ཀྱི་སྐུའམ་དཔལ་རེག་པ་མེད་པའི་མཆོད་རྟེན་ཅེས་འཕགས་ཡུལ་ལྷོ་ཕྱོགས་རྒྱ་མཚོའི་འགྲམ་ཀོངྐུ་ནའི་ཡུལ་མཆོད་རྟེན་གྲོང་ཟེར་བའི་སྟེང་གི་ནམ་མཁའ་འཇའ་ཚོན་གྱི་རྣམ་པར་བཞུགས་པ་ཡིན་ཅིང༌། མཆོད་རྟེན་འདིས་ཁྱབ་པའི་འོག་ཀུན་ནི། རྗེ་ས་པཎ་གྱིས། ཙཱ་རི་ཏྲ་ཞེས་བྱ་བའི་ཡུལ། ། ལྷོ་ཕྱོགས་རྒྱ་མཚོའི་འགྲམ་དུ་ཡོད། ། ཞེས་གསུངས་པའི་ཙཱ་རི་ཏྲ་ཞེས་པའི་ཡུལ་དེ་ཡིན་ལ། ཡུལ་དེར་རྡོ་རྗེ་ཕག་མོས་སྲིད་པ་གསུམ་གྱི་ཆང་དགུག་པར་གྲགས་པ། སྦྱར་ཆང་དང་འབྲུ་ཆང་རྣམས་སྦྱར་ཐེངས་རེ་ལ་མང་དུ་བསྲིང་ནས་སླར་བཅུད་མེད་པར་སོང་ཚེ། ཡུད་ཙམ་རེ་བསྙལ་ནས་བཞག་ན་སླར་གསར་པར་འགྲོ་བ། དེ་འདྲ་ལན་བདུན་བདུན་འབྱུང་བ། དུས་བཟང་ལ་ལུང་པ་ཀུན་ཆང་གི་དྲིས་ཁྱབ་པ་ཞིག་ཡོད་དོ། ། དེར་མཚོ་ཆེན་པོ་ཞིག་ཏུ་འཇམ་དཔལ་གྱི་རྡོ་སྐུ་ཆེན་པོ་ཉལ་ཐབས་སུ་བཞུགས་པ་ཛྙཱ་ན་ཀཱ་ཡ་ཟེར་བ་ཞིག་ཡོད་དེ། དེ་གཉིས་ལ་དུས་བཟང་རྣམས་སུ་ལྷས་མཆོད་པའི་རོལ་མོ་སྣ་ཚོགས་དང༌། སྤོས་ཀྱི་དྲི་དང༌། མཚན་མོར་མེ་མར་གྱི་སྣང་བ་དུ་མ་འབྱུང་བའང་ཀུན་གྱིས་མཐོང་ཐོས་སུ་གྱུར་པ་ཡོད་དོ། ། མཆོད་རྟེན་དེ་ཡང་སོ་སྐྱེ་ཕལ་པ་རྣམས་ཀྱིས་ཀྱང་མཐུན་སྣང་གྲུབ་པར་དུས་རྟག་(༡༤༥ན)ཏུ་ནམ་མཁར་དུ་བ་ལྟ་བུའི་གཟུགས་སུ་གནས་པས་དུ་བ་ཅན་གྱི་མཆོད་རྟེན་དུ་གྲགས། དེ་ཉིད་ཀྱི་རྣམ་པ་ཇོ་ནང་རྗེ་བཙུན་རིན་པོ་ཆེས་ལྗགས་བཀོད་མ་ལས་རིག་འཛིན་ཚེ་དབང་ནོར་བུའི་ཆ་ཚད་ཀྱིས་གཏན་ལ་ཕབ་པ་སྟེ། མཚོན་དོན་ཀྱང༌། ཐེམ་སྐས་སྐྱབས་འགྲོ་རིམ་གསུམ་རྡོར་གདན་དང༌། ། གསེར་ཕྱེ་པདྨ་ཕ་གུ་གྲུབ་མཐའ་བཞི། ། གདོང་ཆེན་གོང་འོག་བར་གསུམ་འཁོར་དང་བཅས། ། རིམ་བཞིན་དཔལ་མཆོག་ཐུགས་གསུང་སྐུའི་དཀྱིལ་འཁོར། ། བུམ་པ་བདེ་གཤེགས་འཕར་དང་བྲེ་འཁོར་བཅས། ། དགའ་བ་བཞི་མཚོན་ཆོས་འཁོར་ས་བཅུ་གསུམ། ། ཏོག་ནི་བདེ་ཆེན་སྐུ་དང་ཆར་ཁེབས་ནི། ། སྐུ་གསུམ་དག་གི་མཛད་པ་མཚོན་པ་དང༌། ། བུམ་སྐུ་ཆོས་དང་ལོངས་སྤྱོད་རྫོགས་པའི་སྐུ། ། རྟ་བབས་ཀྱིས་ནི་སྤྲུལ་པའི་སྐུ་ཡང་མཚོན། ། གདོང་ཆེན་འོག་མ་དཔལ་ལྡན་རྒྱུ་སྐར་དལ། ། སྟེང་གཉིས་བུམ་སོགས་ཆོས་དབྱིངས་གསུང་དབང་གི། ། དཀྱིལ་འཁོར་མཚོན་པར་བཤད་པ་གཞན་ཡང་ཡོད། ། དེ་ལྟ་བས་ན་ཕན་ཡོན་ཡང་ཐུན་མོང་ཐེག་པའི་ལུགས་དང༌། རྒྱུད་སྡེ་འོག་མའི་ལུགས་ཀྱི་མཆོད་རྟེན་ལས་ཁྱད་པར་དུ་མས་འཕགས་པ་དང༌། གཞན་ཡང་མཆོད་རྟེན་འདི་བཞུགས་པའི་ས་ཕྱོགས་སུ་འབྲུ་འཕེལ་བ་དང་ཤིང་འབྲས་དང་བུ་རམ་དང་ཆང་སོགས་བཟའ་བཏུང་གི་ཚོགས་ཀྱིས་འབྱོར་པའང་བཤད་དོ། ། བལ་པོའི་ཡུལ་གྱི་པདྨའི་རི་བོའམ་གླང་རུའི་རིར་རང་བྱུང་མཆོད་རྟེན་ཆེན་པོ་རྗེ་བོ་དམ་པ་ཞེས་བྱ་བ། སྐྱེ་དགུ་རྣམས་ཚེ་ལོ་སྟོང་ཕྲག་བདུན་ཅུར་འཚོ་བའི་ཚེ་འདྲེན་པ་ཆོས་ཀྱི་རྒྱལ་པོ་གཙུག་ཏོར་ཅན་འཇིག་རྟེན་དུ་བྱུང་བ་ན། རིན་པོ་ཆེའི་པདྨའི་སྙིང་པོའི་ཟེའུ་འབྲུ་ལས་ཆོས་དབྱིངས་ཤེལ་གྱི་རང་བཞིན་ཅན་དུ་རང་བྱུང་ཞིང༌། གསེར་ཐུབ་ཀྱི་དུས་སུ་འཇམ་དཔལ་གྱིས་ཆོས་དཔལ་བཤེས་གཉེན་རྗེས་སུ་བཟུང་བའི་སླད་དུ་མཆོད་རྟེན་འདིར་ཆོས་དབྱིངས་གསུང་དབང་གི་དཀྱིལ་འཁོར་སྤྲུལ་པས་མཆོད་རྟེན་གྱི་མཚན་ཀྱང་དེར་ཆགས་ལ། འོད་སྲུང་(༡༤༥བ)གི་དུས་སུ་གྲུབ་པའི་སློབ་དཔོན་ཞི་བའི་དཔལ་གྱིས་སས་གཡོགས་ཏེ་སྦས་པ་ཕྱིས་བདག་ཅག་གི་སྟོན་པ་འཇིག་རྟེན་དུ་བྱོན་པའི་ཚེ་དེའི་ཚུལ་སྣང་བར་མཛད་པའི་སྔོན་གྱི་རབས་ཀུན་མཁྱེན་བསྟན་པའི་ཉིན་བྱེད་ཀྱིས་གསར་འགྱུར་གྱིས་མཚོན། ཚད་དང་དབྱིབས་ཀྱི་ཁྱད་པར་སྔོན་བྱུང་མཁས་པར་སྙེམས་ཤིང་རློམས་པ་ཕལ་མོ་ཆེས་མ་ཐོས་པའང་མང་དུ་སྣང་ངོ༌། ། རྙིང་མར་དགེ་གནས་བརྒྱད་ཀྱི་མཆོད་རྟེན་དང༌། ། ཐེག་རིམ་དགུ་ཡི་ཚད་དབྱིབས་ལ་སོགས་གསུངས། ། གསང་སྔགས་རྙིང་མའི་རྒྱུད་དུ་གོང་སྨོས་དགེ་གནས་བརྒྱད་ཀྱི་མཆོད་རྟེན་དང༌། བྱང་ཆུབ་སེམས་དཔའི་སྤྱོད་དབང་ལས་ཐེག་པ་རིམ་པ་དགུ་སོ་སོའི་མཆོད་རྟེན་གྱི་ཚད་དང་དབྱིབས་བཤད་པ་ལ་སོགས་པ་བཀའ་གཏེར་རྣམས་ལས་རྣམ་གྲངས་མང་པོར་གསུངས་ཀྱང༌། རྩ་བ་གོང་དུ་སྨོས་པ་དེ་དག་ཏུ་འདུ་ལ། གོང་གི་དབྱེ་བ་ལ་སོགས་པ་རྣམས་ཀྱང་འགྲོ་མགོན་ཆོས་རྒྱལ་འཕགས་པའི་ཞལ་སློབ་ཚ་མོ་རོང་པ་བསོད་ནམས་འོད་ཟེར་གྱིས་མཛད་པའི་རྟེན་གསུམ་བཞེངས་ཐབས་ཡོན་ཏན་འབྱུང་གནས་ཉིད་ཁུངས་ལྡན་དང་སྔ་ཤོས་སུ་སྣང་བ་མ་ཟད། བཀའ་བརྒྱད་གསང་བ་ཡོངས་རྫོགས་ཀྱི་མཆོད་རྟེན་བཞེངས་ཐབས་དང་དོན་གཅིག་ཏུ་སྣང་བ་དང༌། སྟག་ལོའི་དཔལ་འབྱོར་རྒྱ་མཚོ་ཡང་གཞི་དེ་ལ་བརྟེན་པར་སྣང་བས་དེ་ཉིད་སོར་བཞག་ཏུ་སྨོས་པའོ། ། བ༤ བཞི་པ་ཕྱག་མཚན་འཕྲོས་དོན་བཅས་འཆད་པ་ནི། རྡོར་དྲིལ་ཕུར་བུ་ཁ་ཊྭཱཾ་ལ་སོགས་པའི། ། ཚད་དང་རྣམ་བཞག་བྱ་བཏུས་སོགས་སུ་གསལ། ། ཐུགས་རྟེན་དུ་གཏོགས་པ་ཕྱག་མཚན་རྣམས་ཀྱི་གཙོ་བོར་གྱུར་པ་རྡོར་དྲིལ་ལ་ཡོ་གའི་བཤད་རྒྱུད་རྩེ་མོ་ནས་གསུངས་པའི་མཚན་ཉིད་ལ་ཕྱི་དྲིལ་དང༌། དུས་འཁོར། སྡོམ་འབྱུང༌། སམྦྷུ་ཊི་ལ་སོགས་ནས་བཤད་པ་ལ་ནང་དྲིལ་དུ་སྔ་རབས་པ་རྣམས་ཐ་སྙད་མཛད་ཅིང༌། དེའང་གངས་དཀར་རྡོ་རྗེ་གདན་པ་དང་མཁས་གྲུབ་དགེ་ལེགས་དཔལ་བ་སོགས་ཀྱིས་རྣམ་བཞག་རྒྱ་ཆེར་མཛད་ཀྱང་། སོ་སོའི་ལུགས་གྲགས་ཆེ་བས་མ་སྨོས་ལ། དེ་གཉིས་ཀྱི་(༡༤༦ན)ཁྱད་པར་སྟག་ཚང་ལོ་ཙཱས། རྩེ་ལྔ་དང་རྩེ་དགུ་གང་ཡིན་ཀྱང་རྭ་རྣམས་ཆུ་སྲིན་གྱི་ཁ་ནས་མ་ཐོན་ཞིང་པདྨ་ལ་གནས་པ་དང༌། མཐར་རྭའི་རྩེ་རྣམས་དབུས་རྭ་དངོས་ལ་མ་ཟུག་པར་དབུས་རྭའི་མཐར་པདྨ་འཁོར་ལོ་ལ་སོགས་པའི་མཚོན་བྱེད་ཀྱིས་བསྐོར་བ་ལ་ཟུག་ཅིང༌། རྭ་རྣམས་བ་དི་རའི་ཚེར་མ་ལྟར་རྣོ་ཞིང་ཟུར་དང་ལྡན་པ་མིན་པར་ཟླུམ་པོར་གནས་པ་དང༌། དྲིལ་བུའི་ཚངས་མགོའི་འོག་ཏུ་བུམ་པའི་དོད་དུ་བུག་པ་ཡོད་པ་དང༌། རྫ་མར་གྲགས་པའི་སྟེང་གི་པད་འདབ་ཀྱི་ཤར་དུ་སྤྱན་མའི་ས་བོན་ནམ་ཕྱག་མཚན་ཡོད་པ་རྣམས་ནི་ཕྱི་ཡིན་ལ། དེ་ལས་བཟློག་ཅིང་སྒྲོལ་མའི་ས་བོན་ནམ་ཕྱག་མཚན་ཡོད་པ་ནི་ནང་ཡིན་ནོ། །ཞེས་བཤད་དོ། ། ཡོ་གའི་ལུགས་ལ་རིགས་ལྔའི་རྡོ་རྗེ་དང་དྲིལ་བུ་སོ་སོར་ཡོད་ཅིང༌། བླ་མེད་ལ་དུས་འཁོར་ལུགས་དང་རྒྱུད་སྡེ་སྤྱི་འགྲོའི་ལུགས་གཉིས། ཌཱ་མ་རུའམ་ཅང་ཏེའུ་ལ་དྲྭ་བ་ཅན།