Tibetan
ཆ་གསུམ་རྐང་པ་སྟེ། ཅ་ཆ་ར་འ་རིང་བ་སྐྱོན། ད་ན་ཞ་གསུམ་རིང་ཐུང་གཉིས་ཀ་སྐྱོན། ཀ་ག་ཤ་གསུམ་ཐུང་ན་སྐྱོན་ཡིན་ལ། འདོགས་འབྲེལ་ཆ་བཞི། སྟེང་གི་ཡན་ལག་ཆ་གཉིས། ཐིག་ཤིང་ལོགས་ལ་ཆ་དྲུག་ཏུ་བྱས་ལ། སྐྱོན་རྣམས་སྤངས་ཏེ་བྲི་བར་བཤད་པ་ནི་རགས་པ་ཡིན་ཏེ། ཞིབ་པར་ལག་ལེན་ལས་རྟོགས་དགོས་སོ། ། འབྲུ་ཆེན་ལི་ལུགས་ལྡན་ལུགས་རིམ་མཆེད་མང༌། ། བོད་ཡིག་གཤར་མ་རྣམས་ཀྱི་མཆོག་ཏུ་གྱུར་པ་འགྲུ་ཆེན་ལ་ལི་ལུགས་ཀྱི་བྲིས་རྒྱུན་ཆད། ལྡན་མ་རྩེ་མང་གི་ལུགས་ཡིན་པས་སམ། ཡི་གེ་ཚད་དང་ལྡན་པས་ལྡན་ལུགས་ཞེས་པ་ཐིག་ཚད་ཆེ་བའི་ཁོངས་ནས་དྲངས་པ་དང་(༡༣༨ན)དབྱིབས་འདྲའང་ཐིག་ཚད་ཆུང་བའི་འབྲུ་ཆུང༌། དེ་ཉིད་ལ་ཡིག་འབྲུ་བཅོ་བརྒྱད་ཙམ་འདྲ་མིན་ཡོད་པའི་འབྲུ་ཚ་རྣམས་ནི་སྔོན་གྱི་རྩ་བའི་ཡིག་རྒྱུན་ཡིན་ལ། དེ་ལས་མཆེད་པ་ཚེག་ལྟར་གྲུ་བཞི་བསྒྲིགས་པ་ཚེག་བྲིས། དེ་ལས་འཇམ་པ་ཟླུམ་བྲིས། དེའི་སུག་པོ་དང་ཡན་ལག་རིང་དུ་བཏང་བ་འབའ་ཧོ། དེ་ལས་ཐུང་དུ་བཏང་བ་ལ་སུག་ཐུང༌། དེ་ལས་མཉེན་པ་གྲ་རིས། སུག་པོ་ནང་འཐེན་རྣམས་བཀུག་པ་སུམ་ཆ་ཆགས། དེ་ལས་མཉེན་པ་སུག་སྐོར། དེ་ལས་བདེ་བ་ཕྲིན་ཡིག་དཀྱུས་མ། དེ་རྣམས་ལའང་ཡུལ་སོ་སོའི་ལག་རྒྱུན་མི་འདྲ་བ་ནི་ཆེས་མང་ངོ༌། ། བ༣ གསུམ་པ་[འབྲི་ཐབས་བསྟན་པ་]ནི། ཆ་ཚད་བྲི་གཞི་སྣག་སྨྱུག་མཁས་པར་བསླབ། ། གཙང་སྒྲོས་དག་པ་ཆེ་ཕྲ་ཀུན་ལ་གཅེས། ། གསུང་རབ་གཟབ་སོགས་གོ་རིམ་འཛོལ་མེད་འབྲི། ། ཡིག་རིགས་གཞན་པ་མཐའ་ཡས་སྤྲོར་མི་ལངས། ། ཡི་གེ་འབྲི་བའི་ཐོག་མར་ཆ་ཚད་དང་དབྱིབས་ལ་བསླབ་པ་གལ་ཆེ་སྟེ། དེའང་གསུང་རབ་མང་དུ་བྲི་བའི་ཡིག་མཁན་རྣམས་ལ་དབུ་ཅན་འབྲུ་མ་ཚེགས་སྒྲིག་ཟླུམ་རིས་རྣམས་གཅེས། དགེ་བའི་བཤེས་གཉེན་རྣམས་ལ་སུག་ཐུང་དང་གྲ་རིས་གཅེས། སྡེ་དཔོན་རྣམས་ལ་འབའ་ཧོ་དང་སུག་སྐོར་གཅེས། སྐྱེ་བོ་གཞན་རྣམས་ལ་འཕྲིན་ཡིག་གཅེས་པར་བཤད་པས་རང་རང་ལ་འཁོར་བ་དེ་ཉིད་ཁྱད་པར་དུ་སྦྱང་བདར་བྱ། བྱང་ནས་བྲི་བའི་སྐབས་སུ་འབྲི་གཞི་ཤོག་བུ། འབྲི་བྱེད་མཚལ་སྣག་སྨྱུ་གུའི་བྱ་བ་རྣམས་སྔོན་གྱི་བསྟན་བཅོས་རྣམས་དང་ལག་རྒྱུན་ཁུངས་དག་ལས་འབྱུང་བ་བཞིན་མཁས་པར་བསླབས་ནས་གཟབ་སྟེ་ལག་ཏུ་བླངས་པས་སྔོན་གྱི་མཁས་པའི་ལག་རྗེས་ལ་འགྲན་བཟོད་པར་འགྱུར་རོ། ། དེ་དག་ཀྱང་སྔོན་རབས་ཀྱི་བསྟན་བཅོས་ལས་ཚིག་ཚོགས་རྒྱས་བསྡུས་དང༌། ལག་ལེན་གྱི་བྱེ་བྲག་མཐའ་ཡས་པ་འབྱུང་བ་ལས། ད་ལྟ་ལག་ལེན་དུ་བྱེད་པ་རྣམས་བསྡུས་ཏེ་བཀོལ་ནས་ཕྱོགས་ཙམ་བཤད་ན། ཡི་གེ་འབྲི་བའི་གཞི་དང་ནི། ། འབྲི་བའི་(༡༣༨བ)ལག་ཆ་འབྲི་རྫས་གསུམ། ། དང་པོ་ལ་ཡང་རབ་འབྲིང་ཐ། ། རབ་ནི་ཤོག་ལྡུམ་དུང་ལོ་མ། ། ས་ནག་ཤུག་པ་ཡོད་པ་དང༌། ། རྫ་བྲག་མེད་སར་སྐྱེས་པ་ལེགས། ། བྱེ་མ་ས་དམར་གཡམ་པའི་ནང༌། ། སྐྱེས་པ་མདོག་སེར་ཚོས་དཀའ་སྲ། ། ཤུན་མཐུག་འབུ་ཡོད་དམན་པའོ། ། ལེགས་པར་བཏུས་ནས་ས་རྡུལ་བཀྲུ། ། ཕྱི་ཤུན་བད་བརྡར་སྙིང་པོ་བླང༌། ། བྱ་རྡོ་བསྲེགས་པ་ཆུ་འཁྱག་ཏུ། ། འཕངས་ཏེ་དཀྲུགས་པ་གར་སླ་ནི། ། དར་བ་ཙམ་བྱས་ལྕེ་ཐོག་ཏུ། ། རྒྱ་ཚྭ་ལྟར་འབིགས་ལེགས་པའི་རྟགས། ། ལམ་དུ་མ་སོང་ངར་མི་འབྱུང༌། ། དེ་ཉིད་གྲུངས་བཞུགས་སྙིགས་མེད་ཀྱི། ། ཁུ་བའི་ནང་དུ་ཤོག་ལྡུམ་བཙོ། ། ཐལ་ཁུས་བཙོས་ཀྱང་མཚོན་ཙམ་འོང༌། ། ཚོས་ནས་རྡོ་གཏུན་མཁྲེགས་པར་བརྡུངས། ། ཟན་ལྟར་གྱུར་ནས་ཁ་རེའི་ཚད། ། ཆ་བསྒོས་སྣོད་དུ་དེ་མཉམ་གྱི། ། ཆུ་དང་ལྷན་ཅིག་དཀྲུགས་པ་དེ། ། མ་རྙོགས་དྭངས་བའི་ཆུ་འཁྱིལ་ནང༌། ། ཤོག་བྲེ་མ་ཡོ་བཞག་ལ་བླུགས། ། རྒྱུ་འདིས་སྲབ་མཐུག་གང་ཡང་ལེགས། ། འབྲིང་ནི་ཨ་ཀ་རུའི་ཤུན་པ། ། སྔོ་བཤུས་བྱས་པའི་བར་ཤུན་དེ། ། ཡུད་ཙམ་བཙོས་ལ་ཁུ་ཐོག་ཕོ། ། བཙོ་བརྡུང་དཀྲུགས་བླུགས་གོང་དང་འདྲ། ། གླེགས་བམ་ཤོག་མཐུག་ཁྱད་པར་བཟང༌། ། ཐ་མ་རེའུ་ལྕག་རྩ་བ་བརྐོ། ། ཕྱི་ལྐོག་ནང་སྙིང་བསལ་བ་ཡི། ། བར་ཤུན་རྡོ་ཁུས་གཙོ་བར་བྱ། ། ཐལ་ཁུས་གཙོས་ན་བལ་ལྟར་ལྷོད། ། དུག་འདོན་ཨ་རུ་ཐུན་གཅིག་འདེབས། ། འདི་ཡང་བྱེ་མ་ས་འབོལ་དང༌། ། ས་ནག་སྙི་སར་སྐྱེས་པ་བཟང༌། ། ཡིག་བསྐུར་འབྲི་བའི་སྲབ་ཤོག་ལས། ། གླེགས་བམ་ཧ་ཅང་ལེགས་མི་འགྱུར། ། ཡུལ་ཕྱོགས་ཐ་དད་ནས་འབྱུང་བའི། ། ཤོག་བུ་བཟང་ངན་སྣ་ཚོགས་པ། ། རྒྱུད་དང་བཟོ་ཐབས་བྱེད་པས་ཏེ། ། མང་དུ་སྤྲོས་ཀྱང་དགོས་པས་དབེན། ། དེ་ནས་ནག་དྲི་འཛར་འཛེར་སོགས། ། སྤུ་གཅོད་རྡོ་ནི་དཀར་སོབ་ཀྱིས། ། དྲུད་བདར་བུག་བརྡོལ་(༡༣༩ན)མེད་པ་བྱ། ། ཤོག་རྒྱུ་གཙང་ན་བརྡུང་ཟིན་རྗེས། ། དྲུད་པས་ས་རྡོའི་ར་རི་འདོན། ། མདོག་དཀར་ཁམས་འཛིན་ལེགས་པར་བཤད། ། གང་ལྟར་སང་རུལ་མེད་པའི་གྲོ། ། ཆུ་ཚན་གྱིས་བཀྲུས་ཞིབ་པར་བཏགས། ། ཆུ་ནང་འོ་མ་ལྟ་བུར་དཀྲུགས། ། ལྦུ་བ་གང་བྱུང་བཅད་ལ་དོར། ། ཅུང་ཟད་གྲུངས་བཅུག་ཡུན་རིང་དུ། ། བཞག་ན་སླ་བའི་ཉེན་ཡོད་དོ། ། གྲོ་ཕྱེ་ཞག་གྲངས་ཉི་ཤུ་ཕན། ། རྙིང་པ་དམ་རྩི་ལྷོད་པས་སྤང༌། ། དྭངས་མ་ཆ་གཉིས་བགོས་པ་ཡི། ། ཆ་གཅིག་ཚོས་པར་བཀོལ་ལ་ཕོག ། ཆ་གཅིག་བསྲེས་ལ་རླུང་མེད་ཅིང༌། ཉི་མ་ཚ་དང་རླན་ཡོད་ཀྱི། ། ས་རུ་ཤོག་གུ་དྲངས་ནས་བསྐམ། ། ཡང་ན་སླ་ཚོས་བག་ཆུ་ལ། ། དར་བ་མར་ཚག་བཞི་ཆ་བསྲེ། ། ཅུང་ཟད་དྲངས་ནས་འདྲེན་པར་བྱ། ། ཧ་ཅང་ཚ་ན་ཤོག་གུ་ཆང༌། ། གྲང་ན་དམ་ལྷོད་སྐྱོ་མས་གོས། ། སྐམ་ཐག་ཆོད་ནས་ས་རྡུལ་བསལ། ། སྔོ་དང་བྱེ་མས་སྦང་བཤད་ཀྱང༌། ། སྐྱོན་རེ་ཡོད་པས་སྐམ་པོ་ཁ། ། བཅུ་རེའི་བར་དུ་ཆུར་བཅུག་པའི། ། རློན་པ་རེ་རེ་བཞག་ནས་མནན། ། རིང་ན་ཞག་གཅིག་ཐུང་ན་ཡང༌། ། ཇ་སྦྱོར་ཡུན་ཙམ་བཞག་ནས་སུ། ། ཡང་བསྡམས་ཡང་བསྲེ་སྐམ་རློན་སྙོམས། ། མཆིན་པ་ལྟ་བུའི་རྡོ་འཇམ་སྟེང༌། ། གཡག་རྭ་སྣུམ་དྲེག་མེད་པས་བརྡུང༌། ། མ་འཛོམ་ཤིང་གི་སྟན་གཏུན་ནི། ། འཇམ་པོས་བརྡུངས་ཀྱང་སྐྱོན་མི་འབྱུང༌། ། བག་ཆུ་ཆེས་ན་བག་ཆུ་བྱུགས། ། ཆུང་ན་མུར་སྦྱིན་བཏང་བར་བཤད། ། སྐམ་པོ་ཅུང་ཟད་དབུར་དཀའ་ལ། ། ནེམ་ཡོད་ཙམ་དེ་སླ་ཞིང་ལེགས། ། དབུར་གདན་མི་འགུལ་བརྟན་པ་དགོས། ། དུང་སྔོ་མཆང་ལ་རི་མོ་མང༌། ། ཁྱད་འཕགས་གསེར་ཕྲའམ་གཟི་ཡིན་ལ། ། མ་རྙེད་གཡག་རྒོད་རྭ་ཅོ་ནི། ། གནག་ཅིང་སྣུམ་པ་དེས་ཀྱང་རུང༌། ། ཐིག་ཤིང་དྲང་ཞིང་སྙོམས་པ་ལ། ། དྲི་བཟང་ཡུ་བ་སྐྱེར་ཤུན་གྱི། ། ཁུ་བས་བྱང་ཆུབ་རྒྱུན་ལམ་དང༌། །(༡༣༩བ) ཕྱི་ནང་ཐིག་སྐོར་མཚལ་གྱིས་གདབ། ། རྒྱས་བསྡུས་གླེགས་བམ་ཆེ་ཆུང་བསྟུན། ། ཟུབ་དང་མི་སྙོམས་འཁྱོགས་པ་སྐྱོན། ། འབྲི་བའི་ལག་ཆ་རྒྱ་སྨྱུག་ནི། ། སྡོང་པོ་ཆེར་སྐྱེས་ཤ་མཐུག་ལྕི། ། མདོག་སེར་མ་འཆུས་སྦུ་གུ་མེད། ། རྩི་འཇམ་སོས་མནན་འདྲེད་པ་ནི། ། སྣག་གསེར་ཡིག་རིགས་ཀུན་ལ་བསྔགས། ། འཇང་སྨྱུག་མདོག་ནག་སྦུ་གུ་ཅན། ། སིབ་ཅེས་དཀྱུས་ཡིག་འབྲི་ལ་བདེ། ། ལྕགས་སྨྱུག་གསུང་རབ་གཏོས་ཆེར་བཟང༌། ། ལྷོ་སྨྱུག་རོང་སྨྱུག་ལེགས་པའང་རུང༌། ། སྨྱུག་རྣམས་ཡུན་རིང་དུང་ཁང་དུ། ། བཏགས་ལ་བ་རྐང་རྙིང་པ་རབ། ། མ་རྙེད་རྐང་མར་རྙིང་པས་བྱུགས། ། ཡོས་ཚན་ནང་བཅུག་འཇམ་གྱིས་ཕྱི། ། རུས་པ་ལྟ་བུར་མཁྲེགས་པར་འགྱུར། ། བཟོ་གནས་ལེགས་ཉེས་གྲི་ལ་རགས། ། ལྕགས་རིགས་བཟང་ཞིང་ཞུན་ཐར་ཐོན། ། རྣོ་གཉེན་ངར་གསུམ་འཛོམ་པའི་གྲི། ། རྩེ་དང་སོ་རྣོ་གྲང་བ་གཞོལ། ། ལྟག་པ་དྲང་ཞིང་སྲབ་པ་ནི། ། བདར་རྡོ་སྲབ་གཉེན་རན་པ་ལ། ། ཕྱི་ལ་ཁལ་གཅིག་ནང་དུ་དྲུག ། བདར་བས་རྣོ་ཚད་སྤུ་གཤོག་ནུས། ། ཧ་ཅང་བདར་ན་རྡུལ་དུ་འགྲོ། ། ཅུང་ཟད་བཙུགས་བདར་མཐུག་རྣོ་འབྱུང༌། ། སྨྱུ་གུ་མཐོ་བས་མི་རིང་ཞིང༌། ། མཛུབ་བས་མི་ཐུང་ཕྲ་སྒོམ་རན། ། མཐེབ་མཛུབ་ཚད་སྦྱར་འགྲིམས་བདེར་གཞོག ། རྩེ་སོར་ཕྱེད་གཉིས་གཞལ་བའི་སར། ། སུམ་གཉིས་རྫིང་ལ་སུམ་གཅིག་མཆུ། ། གཟོབ་འདོད་གས་ཆུང་མགྱོགས་འདོད་ཆེ། ། རྫིང་འདྲ་ཡུར་བ་འདྲ་བ་ཞེས། ། རྒྱབ་ནས་བལྟས་ཏེ་གཡས་གཡོན་སྙོམས། ། རྫིང་མཆུ་ཧ་ཅང་མི་སྲབ་ལ། ། བཅད་ཁ་གྱེན་གསེགས་རིམ་གཅོད་བྱ། ། གསུམ་ལྡན་ལྔ་འཛོམ་ཞེས་པའི་དོན། ། སྨྱུ་གུ་མཆུ་ལ་མཁས་གྱུར་ན། ། ཡི་གེའི་འབྲུ་ལ་མཁས་པར་བཤད། །(༡༤༠ན) ཡིག་གཟུགས་བཟང་ངན་ལག་པའི་རྒྱུ། ། མགྱོགས་དལ་སྦྱངས་པ་ཆེ་ཆུང་སྟེ། ། དག་ཆ་རྣམ་རྟོག་རྒོད་གཡུང་གཙོ། ། མཐེབ་མཛུབ་ཤིན་སྙོམས་འཕུར་འཛུམ་རན། ། ཆིག་འཐེན་ཤེས་དང་དྲང་མྱུར་ལྡན། ། སྒྲོས་དག་སྐྱོན་གསུམ་འཛོམ་པ་མཆོག ། འབྲི་བའི་རྫས་ནི་སྣག་མཚལ་གཉིས། ། དང་པོ་སྣག་ཚའི་རྒྱུ་རབ་ནི། ། མར་ནག་མེ་ཏོག་བསགས་པའམ། ། སྒྲོན་ཤིང་འབྲིང་ནི་ཉ་བྲིད་པའི། ། ཤུན་པ་དེ་གཉིས་སྔོ་བཤུས་བྱ། ། གྲོ་གའང་དེ་དང་ཕྱོགས་མཚུངས་ལ། ། ཐ་མ་ཐང་ཚིལ་རྒན་ཆེས་ཁྲག ། གཞོན་ཆེས་འབྱར་བག་ཅན་མིན་པ། ། ཚིལ་བུ་འདྲ་དེ་མང་དུ་བསགས། ། བརྩིགས་ཐབས་འཁོར་མོའམ་བྲུ་ཐབ་སྟེང༌། ། རྫ་ཁོག་ཞབས་རྡོལ་ལྔ་བདུན་བརྩེགས། ། ཐབ་ནང་ཤིང་ལ་མེ་སྦར་བའི། ། འོག་མའི་དྲེགས་པ་དམན་པས་སྤང༌། ། གོང་མ་རྣམས་ཀྱི་དུད་པ་བསྡུས། ། ཆགས་དཀའ་འགྲིམ་རྡུར་འབྱུང་བས་ན། ། དབེན་པའི་གནས་སུ་གཟབ་སྟེ་བྱ། ། ལྕགས་སྣོད་སྤྱིན་ཆུའི་དྭངས་མ་ལ། ། བཏབ་སྟེ་མེ་སྟེང་ཅུང་ཟད་དཀྲུགས། ། སྤྱིན་བཞུར་ཁུ་བ་བླུགས་ལ་མཉེ། ། བྲེ་རེ་ཉིན་རེར་འདུར་བ་དང༌། ། ཚོག་སྒྲ་གྲགས་ན་ཚད་དུ་བཤད། ། འོན་ཀྱང་ཤེད་མཉམ་རན་པས་འདུར། ། ཇི་ཙམ་སོང་བ་དེ་ཙམ་ལགས། ། སྐམ་ཐག་ཡང་ཡང་གཅོད་པ་ནི། ། མཚལ་སྣག་མན་ངག་མཆོག་ཏུ་བཟུང༌། ། གར་སླ་ཟན་ཙམ་གྱུར་པའི་དུས། ། ལག་པར་འབྱར་ན་དམ་ཆུང་ལ། ། སྲ་ཞིང་འཐས་ན་ཆེ་བའི་སྐྱོན། ། ཤ་རྗེས་དོད་ཅིང་མི་འབྱར་བ། ། དམ་ལྷོད་རན་པའི་ཚད་དུ་བཟུང༌། ། གཞན་ཡང་སྔོན་རབ་བསྟན་བཅོས་ལས། ། མ་ནུ་རུ་རྟས་འཇམ་ཞིང་སྨེ། ། ཙནྡན་ཁུ་བས་སྒྱུར་གུས་འཛིན། ། རྐྱ་སྐྱེགས་དམར་མདངས་འོད་དུ་འཚེར། ། གླ་རྩིས་རྒྱུན་དུ་དྲི་བཟང་འཐུལ། ། དབང་ལག་སུག་པའི་སུ་བས་ནི། ། འོད་འབར་དམ་འབྱོར་བླ་ན་མེད། ། སྤྱི་བཞུར་ཁུ་བས་ཤིན་ཏུ་རྒྱུག ། ག་བུར་ཆུ་ཡིས་དབྱར་མི་རུལ། ། སྒ་སྐྱ་པི་ལིང་ཁུ་བས་ནི། །(༡༤༠བ) དགུན་གྱི་དུས་སུ་འཁྱག་མི་འགྱུར། ། ཞེས་སོགས་བཤད་ཅིང་ཐང་ཁྲག་དང༌། ། གྲོ་ནས་ཡོས་ཚིག་ཁུ་བ་སོགས། ། སྲེ་བའི་ལག་ལེན་མང་ན་ཡང༌། ། སུག་པ་སྤྱི་བཞུང་སོགས་འགའ་ལས། ། ཕལ་ཆེར་སྐྱོན་དང་བཅས་པ་ཉིད། ། སྦྱོར་སྡེ་མང་བས་ལེགས་པ་མིན། ། རྒྱུ་བཟང་གནད་ཤེས་ལས་ནུས་དགོས། ། ཕོན་ཉུང་བཟོ་ན་མི་གཞོན་གྱི། ། ལག་པར་འཕུར་མཉེད་བྱས་པ་མཆོག ། མཚལ་རབ་བཅག་མཚམས་ཤེལ་དཀར་འདྲ། ། འབྲིང་པོ་དམར་དྭངས་ཐ་མ་སྨུག ། དཀར་འཇམ་གཏུན་ནང་ཕྲུམ་ཕྲུམ་བརྡུང༌། ། ཨ་རུའི་དྭངས་ཆུ་མཚལ་ནུབ་བླུགས། ། ལན་གསུམ་བར་དུ་ཁ་ཆུ་ཕོ། ། གཏུན་སྐོར་ཅུང་ཟད་བྱ་བར་གཅེས། ། དེ་ནས་ཡུན་རིང་བར་དུ་སྤྱད། ། རྒྱ་སྤྱིན་རབ་ཡིན་མ་རྙེད་ན། ། སྤྱིན་སད་ཁུ་དྭངས་བླུགས་ལ་བསྡུ། ། མགྱོགས་འདོད་མཚལ་ཕྱེ་སྤྱིན་ཆུར་སྦྱར། ། གཡའ་མེད་སྣོད་དུ་དལ་བུས་མཉེ། ། ཤེད་དྲག་ནག་པོར་འགྱུར་བས་ན། ། མཚལ་ལ་མི་རྒན་ལག་སྟབས་གནད། ། གང་ཡང་སྦྱར་ནས་འབྲི་བའི་ཚེ། ། ཀ་པི་དྲུག་སྦྱོར་འདོད་པ་ན། ། གཡའ་དྲི་མེད་པའི་སྣོད་གཙང་མར། ། མཚལ་གྱི་སུམ་གཉིས་ཀ་པི་དང༌། ། སྦྱིན་ཆུ་སུམ་ཆ་ཙམ་གཅིག་བླུགས། ། ཡུན་རིང་བར་དུ་ཉི་མར་བདུག ། རྒྱ་ཚྭ་ཞོ་ཚད་ཚྭ་ལ་ནི། ། ཚྭ་འདེབས་སྤོས་དཀར་ཐལ་ཙམ་བཏབ། ། དེ་དག་ཡོན་ཏན་རིམ་བཞིན་དུ། ། འོད་འཕྲོ་དམ་བྱེད་གཤེར་བག་གཅོད། ། དམར་འཚེར་བདེ་ལ་སྐམ་རྩི་བྱེད། ། འགྲིམ་དཀའ་སེར་ན་ཆུ་གཙང་བླུགས། ། མདངས་སྐྱ་སྨུག་ན་ཀ་པི་བསྣན། ། དེ་ལ་ཀ་པི་སྦྱོར་བའི་ཐབས། ། དཔྱིད་དམ་སྟོན་མཇུག་བརྐོས་པ་ཡི། ། ལུག་སུག་གད་བདར་ལེགས་བྱས་ལ། ། ལྕགས་མིན་སྣོད་དུ་བཙོ་ཞིང་བཞུར། ། ཚགས་བཙགས་གོང་གི་རྫས་རྣམས་བཏབ། ། དལ་འཇམ་དཀྲུགས་ཤིང་མེ་ལ་གདུད། ། སུམ་སྦྱོར་མཚལ་དང་ཀ་པི་ལ། ། རྒྱལ་མོ་ཀ་ར་ཅུང་ཟད་འདེབས། །(༡༤༡ན) མདངས་ལེགས་དཀྱུས་ཀྱི་ལག་ལེན་ཏེ། ། མཚལ་སྤྱིན་གཉིས་སྦྱོར་སྟབས་བདེའི་བཟོ། ། གང་ཡང་མེ་ཡིས་མ་གདུང་གཅེས། ། གཞན་ཡང་བྱ་ཡི་སྒོང་སྤྲི་དང༌། ། ཆུ་སེར་དྭངས་མ་སྦྱོར་བ་སོགས། ། འཕྲལ་བདེ་ལེགས་ཀྱང་སྐྱོན་ཅན་སྤང༌། ། ལོ་གྲངས་ལོན་ཀྱང་མདངས་མ་ཡལ། ། རླན་དང་ཕྲད་ཀྱང་འབྱར་འགོས་མེད། ། བཀྲག་སྣུམ་འོད་ལྡན་མཚལ་སྣག་ནི། ། གླེགས་བམ་འབྲི་བའི་བཅུད་མཆོག་གོ། ། དེ་ལྟར་ཡང་དག་རྒྱུན་ལས། སྣག་ཤོག་སྨྱུ་གུ་མི་གཟོབ་པར། ། ཡི་གེ་གཟོབ་འདོད་ཡིག་མཁན་འཁྲུལ། ། ཞེས་བྱ་བ་ཡིན་པས་རྒྱུ་དང་ལག་ཆ་གཟབ་ཅིང༌། སྣག་ལམ་གཙང་བ། འབྲུ་ཁོག་སྒྲོས་པ། ཆད་ལྷག་ནོར་འཁྲུལ་མེད་པའི་དག་པ་གསུམ་ནི་འབྲི་བྱ་ཆེ་ཕྲ་ཀུན་ལ་ཤིན་ཏུ་གཅེས་སོ། ། གོ་རིམ་ཡང་གསུང་རབ་ཆེན་པོ་དག་ལ་གཟབས་ཆེན་གཟབས་ཆུང༌། རྒྱ་གར་མཁས་པའི་གཞུང་འགྲེལ་རྣམས་འབྲུ་ཆེན། བོད་ཀྱི་གཞུང་ལུགས་རྣམས་འབྲུ་ཆུང་སྟེ། ཆེ་བའི་དབང་གིས་འཛོལ་མེད་དུ་འབྲི་བ་གནའ་བོའི་ལུགས་བཟང་ཡིན་ཅིང༌། ཡིག་གསར། བརྡ་ཡིག །གཏེར་ཡིག་གིས་མཚོན་པའི་ཡིག་རིགས་གཞན་པ་ནི་མཐའ་ཡས་པས་འདིར་སྤྲོར་མི་ལངས་སོ། ། ཕ༣ གསུམ་པ་ཐུགས་རྟེན་བཤད་པ་ལ་བཞི། བ༡ མཆོད་རྟེན་གྱི་དབྱེ་བ་སྤྱིར་བསྟན། བ༢ ལག་ཏུ་བླང་བྱ་བྱེ་བྲག་ཏུ་བཤད། བ༣ ལུགས་སྲོལ་ཁྱད་པར་ཅན་འཕྲོས་སུ་སྨོས། བ༤ ཕྱག་མཚན་འཕྲོས་དོན་བཅས་འཆད་པའོ། ། བ༡ དང་པོ་ནི། ཐུགས་རྟེན་རང་བཞིན་ལྷུན་གྲུབ་བླ་ན་མེད། ། བྱིན་རླབས་དངོས་གྲུབ་ཐེག་པ་སོ་སོ་ལྔ། ། ཐུགས་སམ་ཆོས་སྐུ་མཆོད་རྟེན་ཅེས་སྤྱི་མིང་བྱེ་བྲག་ཏུ་བཏགས་པ་འདི་ལ། སྤྱིར་རང་བཞིན་ལྷུན་གྱིས་གྲུབ་པ་དང༌། བླ་ན་མེད་པ་དང༌། བྱིན་གྱིས་བརླབས་པ་དང༌། དངོས་གྲུབ་འབྱུང་བ་དང༌། ཐེག་པ་སོ་སོའི་མཆོད་རྟེན་ལྔར་བཤད་པའི། དང་པོ་ནི། རྡོ་རྗེ་བཀོད་པའི་རྒྱུད་ལས། (༡༤༡བ) འདོད་ཁམས་དབང་གི་རི་བོ་ལ། ། གཟུགས་ཁམས་བང་རིམ་ཁྲི་འཕང་ཅན། ། གཟུགས་མེད་བུམ་རྟེན་བུམ་པར་བཅས། ། སྐུ་གདུང་ཆེན་པོ་རྒྱུན་དུ་གནས། ། ཞེས་དང༌། ལུང་མཆོག་བླ་མ་ལས་ཀྱང་ཕྱི་སྣོད་ནང་བཅུད་མཆོད་རྟེན་གྱི་རྣམ་པར་བཤད་པ་དང༌། དུས་འཁོར་ལས། དཀྱིལ་འཁོར་བཞི་པོ་བང་རིམ་དང༌། རི་རབ་བུམ་པ་དང༌། རི་རབ་ཀྱི་མགྲིན་པ་དང་། གདོང་མན་ཆོད་བྲི་དང༌། དེ་ཡན་སྐྲ་ཆོས་འཁོར་ཆར་ཁེབས་ཀྱི་རྣམ་པར་གསལ་བར་བཤད་པ་ལྟ་བུའོ། གཉིས་པ་ནི། ཚད་མེད་མཐའ་ཡས་ལས་བྱུང་འབྲས། ། ཤར་དུ་བྱམས་པ་རྡོ་རྗེ་བརྩེགས། ། ལྷོ་རུ་སྙིང་རྗེ་རིན་ཆེན་བརྩེགས། ། ནུབ་ཏུ་དགའ་བ་པདྨ་བརྩེགས། ། བྱང་དུ་བཏང་སྙོམས་རྒྱ་གྲམ་བརྩེགས། ། རང་བྱུང་རིན་ཆེན་སྣང་བའོ། ། ཞེས་པས། ཤར་དུ་བྱམས་པ་ཚད་མེད་རྡོ་རྗེ་མཐའ་ཡས་བརྩེགས་པ་ལ་སོགས་པ་བཞིར་ཐིག་ལེ་དབང་གི་རྒྱུད་ཅེས་བྱ་བ་ལས་བཤད་པར་གྲགས་སོ། ། གསུམ་པ་ནི། འཁོར་ལོ་འབྱུང་བའི་རྒྱུད་དུ་གྲགས་པ་ལས། ། བྱིན་རླབས་སྐུ་གདུང་ཆ་བརྒྱད་གླིང་བཞིར་སྣང༌། ། ཞེས་པའི་འགྲེལ་པར། ཤར་ལུས་འཕགས་ན། བྱིན་ལྡན་སྙོམས་གཏེར་དང༌། མཐར་ལེགས་གཡུང་དྲུང་ཏོག་གཉིས། ལྷོ་ཛམྦུ་གླིང་ན་ཐུགས་རྗེ་སྤྲུལ་པ་དང༌། ཡིད་བཞིན་ལྷུན་གྲུབ་གཉིས། ནུབ་བ་ལང་སྤྱོད་ན་དཔེ་མེད་བསམ་འདས་དང༌། རྨད་གྲགས་ཆོས་དབྱིངས་གཉིས། བྱང་སྒྲ་མི་སྙན་ན་ཡོན་ཏན་རིན་ཆེན་བརྩེགས་དང༌། ཁམས་གསུམ་བདེ་རྒྱས་སྒྲོན་མེའི་མཆོད་རྟེན་གཉིས་བཞུགས་པར་བཤད་དོ། ། བཞི་པ་ནི། བདུད་རྩི་མཆོག་གི་རྒྱུད་ལས། རོ་ཡི་སྲུང་མ་ཆེན་མོ་ནི། ། མ་མོ་ཆེན་མོ་བརྒྱད་བཞག་གོ། ། དེ་དག་རྟེན་གནས་ཆེན་མོ་ཡང༌། ། མཆོད་རྟེན་བརྒྱད་དུ་རྣམ་པར་བཞག ། ཅེས་པའི་འགྲེལ་པར། སྔོན་ཧེ་རུ་ཀས་དྲག་པོ་བཏུལ་བའི་ཚེ་ཡུལ་བརྒྱད་ཀྱི་དུར་ཁྲོད་དུ། མ་མོ་བརྒྱད་ཀྱི་རྟེན་དངོས་གྲུབ་འབྱུང་བའི་མཆོད་རྟེན་