Tibetan
གི་ངེས་པའོ། །འབུར་སྐུ་རྣམས་ཀྱི་སྤྱིའི་ཚད་ཀྱང་བྲིས་སྐུ་དང་གཅིག་པ་ཡིན་ལ་རྒྱབ་མདུན་འཁོར་བའི་ཆ་ཚད་ལྷག་པོར་བསྣན་དགོས་ཏེ་ཞིབ་པར་རྗེ་བརྒྱད་པའི་ཉི་མ་ཆེན་པོའི་མེ་ལོང་སོགས་ལས་རྟོགས་པར་བྱའོ། །ལུགས་གཉིས་པ་ཐེག་ཆེན་བརྒྱད་དུ་བསྡུས་པའི་རྣམ་གཞག་ལག་ལེན་སྨན་བླ་དོན་གྲུབ་ཀྱིས་མཛད་པའི་ཆ་ཚད་ཡིད་བཞིན་ནོར་བུ། དེ་ལས་ཁྱད་པར་མང་པོའི་ཟུར་ཆོས་ཅན་གཡའ་སེལ་སོགས་ཞིབ་ཅིང་རྒྱས་པས་འདིར་མ་སྤྲོས་ལ། དེ་ལྟར་ཐལ་མོ་དང་སོར་(༡༢༩བ)ཚད་ཀྱི་རིང་ཐུང་དེའང་ལས་རླུང་དབུ་མར་འགགས་པ་དང་མ་འགག་པའི་རིམ་པས་ཁྱད་ཞུགས་པར་གསུངས་སོ། ། ཙ༣ གསུམ་པ་དེ་ལས་འཕྲོས་པའི་ཉེ་བར་མཁོ་བའི་རྣམ་བཞག་བཤད་པ་ལ་བདུན། ཚ༡ ཉམས། ཚ༢ རྒྱན། ཚ༣ ཕྱག་མཚན། ཚ༤ ཁྲི་རྒྱབ། ཚ༥ སྐྱོན་སེལ། ཚ༦ ཚོན་མདངས། ཚ༧ རྣམ་འགྱུར་རྣམས་སོ། ། ཚ༡ དང་པོ་ནི། མཚན་དཔེ་ཞི་ཆགས་ཁྲོ་སྒེག་གར་གྱི་ཉམས། ། སྐུ་གཟུགས་དེ་དག་ཀྱང་སངས་རྒྱས་ལོངས་སྐུ་དང་སྤྲུལ་སྐུ་དག་ལ་མཚན་བཟང་སོ་གཉིས་དང་དཔེ་བྱད་བརྒྱད་ཅུ་ལས་དངོས་སུ་ཇི་ལྟར་འབྲིར་རུང་བ་ཐམས་ཅད་གསལ་ལ་རྫོགས་པ་དང༌། གཤེགས་པ་སོགས་ལ་ཞི་ཞིང་འཛུམ་པའི་མདངས་ཅན། ལྷ་མོ་ཕལ་ཆེར་ཆགས་ཤིང་གཞོན་པའི་ཚུལ། ཁྲོ་བོ་རྣམས་རྔམས་ཤིང་མི་སྡུག་པ་དང་རོལ་པའི་ཁྲོ་བོ་སོགས་ཁྲོ་འཛུམ་སྒེག་པའི་ཉམས་ཅན། གཞན་ཡང་གར་གྱི་ཉམས་དགུ་དང་ལྡན་པ་ཞེས་འབྱུང་བ་ལྟར། རྒྱན་དང་མདངས་ཀྱིས་སྒེག་པ་དང༌། འགྱིང་ལ་རོལ་པས་དཔའ་བ་དང༌། སྤྱན་ལོག་ཁྲོ་གཉེར་གྱིས་མི་སྡུག་པ་དང༌། འཛུམ་ཞིང་ཧ་ཧའི་སྒྲས་དགོད་པ་དང༌། ཧི་ཧི་དང་ཧཱུྃ་ཕཊ་སྒྲོག་པས་དྲག་ཤུལ་དང་ལྡན་པ་དང༌། སོ་ཐམ་པ་དང་མགོ་གུག་ཅིང་མཚོན་ཆ་ཕྱར་གདེངས་ཀྱིས་འཇིགས་སུ་རུང་བ་དང༌། སྤྱན་དམར་ཟིམ་ཟིམ་དང་གཞོན་ཤས་སྙིང་རྗེ་དང༌། ཞལ་གདངས་རྐན་རྡེབ་པས་རྔམ་པ་དང༌། མཉེན་ལྕུགས་འཇམ་པའི་མིག་སྣ་རྩེར་བལྟས་པས་ཞི་བ་སྟེ། དེ་ལྟ་བུའི་གར་གྱི་ཉམས་དགུ་ལས་བཟོ་བོས་བསྒྲུབ་ཏུ་རུང་བ་རྣམས་དང་ལྡན་པར་བྱའོ། ། གཞན་ཡང༌། ཞལ་གྱི་དབྱིབས་ནི་རྣམ་པ་བཞི། ། སྐྱེས་བུ་ཆེ་དང་ལྷ་མོ་ཡི། ། ཁྱིམ་བྱའི་སྒོ་ང་ཏིལ་གྱི་དབྱིབས། ། ཞེས་དང༌། ཁྲོ་བོ་རྣམས་ཀྱི་རྣམ་འགྱུར་དབྱིབས། ། ཟླུམ་པོ་དག་དང་གྲུ་བཞི་སྟེ། ། ཞེས་གསུངས་པ་ལྟར། ཞལ་དབྱིབས་ཐ་དད་པ་དང༌། སངས་རྒྱས་མཉམ་གཞག་སྤྱན་ནི་གཞུ་ཡི་དབྱིབས། ། མགྲོན་བུའམ་ནི་པདྨ་འདབ་མའི་དབྱིབས། ། ཨུཏྤ་ལ་འདྲ་ཞི་མ་ཁྲོ་ཡི་སྤྱན། ། ལྷ་མོ་ཞི་བའི་(༡༣༠ན)སྤྱན་ནི་ཉ་ལྟོ་འདྲ། ། གཡེམས་མའི་མིག་ནི་འོད་མའི་གཞུ་འདྲ་སྟེ། ། ཤིན་ཏུ་ཁྲོས་སྤྱན་ཟླུམ་དང་གྲུ་བཞི་འོ། ། ཞེས་སྤྱན་གྱི་དབྱིབས་མི་འདྲ་བ་རྣམས་དང༌། རྡོ་རྗེ་སྐྱིལ་ཀྲུང་ཡོངས་སུ་གྲགས། ། བྱིན་པ་གཡས་སྟེང་གཡོན་པ་བཞག ། པུས་མོ་སྨད་པ་པདྨའི་སྟབས། ། ལོང་བུ་བསྣོལ་ཏེ་མཐེ་བོང་དག ། རྩེ་མོ་སྤྲད་པ་ལ་ཡང་ཟེར། ། གཡས་པ་རྡོར་སྐྱིལ་ལྟ་བུ་ལ། ། གཡོན་པ་གཡས་པའི་བརླ་འོག་བཞག ། སེམས་དཔའི་སྐྱིལ་མོ་ཀྲུང་ཞེས་བྱ། ། གཡོན་པ་བཀན་པའི་སོར་མོ་རྣམས། ། གཡས་པའི་བརླ་ལ་མ་རེག་ཙམ། ། གཡས་པ་འགྱིང་སྟབས་བརྐྱང་བ་ནི། ། སྐྱིལ་ཀྲུང་ཕྱེད་པ་ཞེས་བྱའོ། ། གཡོན་བརྐྱང་བྲང་བ་གདན་ལ་བཙུགས། དེ་ཡི་བརླ་ལ་གཡས་མཐིལ་སྦྱར། ། བཞེངས་པའི་ཕྱེད་སྐྱིལ་གར་སྟབས་སོ། ། གཡོན་པའི་བྱིན་པ་བསྐུམ་པ་ལས། ། གཡས་པ་འགྱིང་བཅས་དོར་སྟབས་ཅན། ། གཡས་བརྐྱང་བཟློག་པ་གཡོན་བརྐྱང་ངོ༌། ། སོར་མོ་མདུན་བསྟན་རྟིང་བར་དུ། ། ཁྲུ་གང་སོར་གཉིས་བརླ་བྱིན་པ། ། དྲང་པོར་བསྲང་བ་ས་གའི་སྟབས། ། དེ་ལས་ལུས་སྨད་པུས་མོའི་བར། ། ཁྲུ་དོ་ངང་པའི་གཤོག་པ་ལྟར། ། ལོགས་སུ་བརྐྱངས་པ་ཟླུམ་པོ་ཟེར། ། སོར་མོ་བཅུ་པོ་མདུན་དུ་སྒྲིགས། ། དྲང་པོར་བཞེངས་པ་མཉམ་པའི་སྟབས། ། རྐང་གཉིས་ཁྲི་ལས་ཐུར་དུ་བརྐྱང༌། ། སོར་མོ་མདུན་བསྟན་བཟང་པོའི་སྟབས། ། ཞབས་མཐིལ་ཁ་སྦྱར་བདེ་ལེགས་ཅན། ། ཙོག་པུར་རྐང་གཉིས་མཐོ་གང་པར། ། སྟན་ལ་བཀོད་པ་ཙོག་པུའི་སྟབས། ། གཡས་པའི་ཕྱེད་ཀྲུང་སོར་མོ་རྣམས། ། གཡོན་པའི་ལོང་བུར་གཏད་པ་ནི། ། གཡོན་རོལ་ཡིན་ཞིང་གཡས་རོལ་བཟློག ། འདི་ནི་བཞེངས་པ་ལ་ཡང་སྦྱར། ། གཡོན་པའི་སྐྱིལ་ཀྲུང་ཕྱེད་པ་ལ། ། དེ་དང་ཉེ་བར་གཡས་པ་ཡི། ། པུས་མོ་དྲང་པོར་བཞག་པ་ནི། །(༡༣༠བ) དཔའ་བོའི་འདུག་སྟངས་ཞེས་བྱའོ། ། གཡོན་པ་དེ་བཞིན་བྱས་པའི་སྟེང༌། ། པུས་མོ་གཡས་པ་བསྙལ་བ་ལས། ། རྐང་གཡས་གཡོན་པའི་བརླ་མཐིལ་དུ། ། བཞག་པ་དཔའ་མོའི་འདུག་སྟངས་སོ། ། མི་མཉམ་རུས་སྦལ་བུང་བའི་སྟབས། ། དེ་སོགས་འདིར་ནི་མ་སྤྲོས་སོ། ། ཞེས་ཞབས་ཀྱི་སྟངས་སྟབས་ཁྱད་པར་སོགས་ཤིན་ཏུ་མང་པོ་རྣམས་ཀྱང་ཁོང་ཆུད་པར་བྱའོ། ། ཚ༢ གཉིས་པ་[རྒྱན་]ནི། ཆོས་གོས་རིན་ཆེན་རྒྱན་བརྒྱད་དར་གོས་གཉིས། ། ཕྱག་རྒྱ་དུར་ཁྲོད་དཔལ་ཆས་བརྒྱད་དམ་བཅུ། ། སྤྲུལ་པའི་སྐུ་ཆགས་བྲལ་གྱི་རྣམ་པ་ཅན་རྣམས་ལ་ཆོས་གོས་རྣམ་པ་གསུམ། ལོངས་སྐུ་རྣམས་ལ་རིན་པོ་ཆེའི་རྒྱན་བརྒྱད་དེ། དབུ་རྒྱན། སྙན་རྒྱན། མགུལ་རྒྱན། དཔུང་རྒྱན། དོ་ཤལ། སེ་མོ་དོ། གདུ་བུ། སྐ་རགས་སམ་འོག་པག་རྣམས་ལ་རྩ་བའི་རྒྱན་ཀྱང་ཟེར། དེ་སྟེང་སྙན་གོང་ཨུཏྤ་ལ། རྐང་གདུབ་གཡེར་ཁ་སོགས་ཉེ་བའི་རྒྱན་དུ་གྲགས་པ་རྣམས་ཏེ། དེ་དག་ཀྱང་སྔོན་གྱི་མཁས་པས། རྣ་རྒྱན་མགུལ་རྒྱན་ལག་གདུབ་གསུམ། ། ལྗི་ལྗི་འདྲ་ཞིག་དགོས་པ་ཡིན། ། དབུ་རྒྱན་དཔུང་རྒྱན་རྐང་གདུབ་སྐེད། ། ཡང་ཡང་འདྲ་ཞིག་འདོད་པ་ཡིན། ། ཅེས་སྨྲའོ། ། དར་གོས་གཉིས་ནི། སྟོད་གཡོགས་དང་། སྨད་ཤམ་ཡིན་ལ། རྙིང་མ་བཀའ་མར་དར་གྱི་ཆས་གོས་ལྔར་གྲགས་སྟེ། ཟི་ལྡིར། ཅོད་པན། གར་གྱི་ཕུ་དུང༌། གསང་ཁེབས། ཚི་གུའི་སྨད་དཀྲིས་རྣམས་སོ། ། མ་རྒྱུད་གཙོ་བོར་གྱུར་པའི་རྒྱུད་སྡེའི་ལྷ་ཡབ་རྣམས་ལ། སྤྱི་བོར་རུས་པའི་འཁོར་ལོ་རྡོ་རྗེ་ཕྱེད་པའི་ཏོག་དང་བཅས་པ། རྣ་རྒྱན། མགུལ་རྒྱན། གདུ་བུ། སྐ་རགས། ཚངས་སྐུད་དམ་མཆོད་ཕྱིར་ཐོགས་ཏེ་ཕྱག་རྒྱ་དྲུག་དང༌། དེའི་ཡུམ་རྣམས་ལ་ཚངས་སྐུད་སྤངས་པའི་ཕྱག་རྒྱ་ལྔའི་རྒྱན་བྱ་དགོས་ཤིང༌། འདི་དག་གི་ཚད་དང་དག་པ་རྣལ་འབྱོར་མ་ཀུན་སྤྱོད་ཀྱི་རྒྱུད་དང༌། རྡོ་རྗེ་མཁའ་འགྲོ་ནས་ཀྱང་གསུངས་སོ། ། ཁྲོ་བོ་སྤྱི་ལ་དུར་ཁྲོད་ཀྱི་ཆས་བརྒྱད་དེ། དེ་ཡང་བགོ་བའི་གོས་གསུམ་ནི། མི་སྤགས་ཀྱི་གཡང་གཞི། (༡༣༡ན)གླང་ཆེན་གྱི་ཀོ་རློན། སྟག་ལྤགས་ཀྱི་ཤམ་ཐབས་རྣམས་སོ། ། གདགས་པའི་རྒྱན་གཉིས་ནི། སྦྲུལ་དང་། ཐོད་པ་སྟེ། རྒྱལ་རིགས་དཀར་ཁྲའི་དབུ་རྒྱན། རྗེའུ་རིགས་སེར་ཁྲའི་སྙན་རྒྱན། བྲམ་ཟེ་རིགས་དམར་ཁྲའི་མགུལ་རྒྱན། དམངས་རིགས་ནག་ཁྲས་སྐ་རགས། གདོལ་རིགས་ལྗང་ཁྲས་ཕྱག་གདུབ་ཞབས་གདུབ་བྱས་པ་དང༌། ཐོད་པ་སྐམ་པོས་དབུ་རྒྱན། རློན་པས་སེ་རལ་ཁ། ཚལ་བུས་དཔུང་རྒྱན་བྱས་པའོ། ། བྱུག་པའི་རྫས་གསུམ་ནི། སྨིན་མཚམས་ཐལ་ཆེན་གྱི་ཚོམ་བུ། མཁུར་ཚོས་ལ་རཀྟའི་ཐིག་ལེ། ལྐོག་མར་ཞག་གི་ཟོ་རིས་རྣམས་སོ། ། རྙིང་མ་ལ་དཔལ་གྱི་ཆས་བརྒྱད་དུ་གྲགས་པ་ནི། ཇི་སྐད་དུ། གཟི་བརྗིད་འབར་བ་ཆུ་སྲིན་བརྗིད་པའི་ཆས། ། ཐབས་དང་ཤེས་རབ་ཟུང་འབྲེལ་ཉི་ཟླའི་ཆས། ། གདུག་པ་ཅན་སྲེག་ཡེ་ཤེས་མེ་ཡི་ཆས། ། སྐྱེ་ཤི་རྩད་གཅོད་མཆེ་བ་ཟླ་ཚེས་ཆས། ། ཁྱབ་མཛད་རེ་སྐོང་རྡོ་རྗེ་གཤོག་པའི་ཆས། ། མངའ་ཐང་ཡོངས་རྫོགས་རྡོ་རྗེ་གླག་པའི་ཆས། ། སངས་རྒྱས་སར་བགྲོད་དབང་གི་བསེ་ཁྲབ་ཆས། ། གནོད་གདུག་ཟློག་བྱེད་རྒྱ་བྱེའུ་ལྕགས་ཀྱི་ཆས། ། ཞེས་པ་ལྟར་བརྒྱད་དམ། མི་འགྱུར་སྤྱི་གཙུག་རྡོ་རྗེ་ཕྱེད་པ། གདུག་པ་ཐལ་འབྱིན་ཕུར་བུའི་ཤམ་ཐབས་གཉིས་བསྣན་པའི་དཔལ་གྱི་ཆས་བཅུར་ཡང་བཞེད་དེ། སྔ་མ་ནི་རྒྱུད་ཡེ་ཤེས་རྔམ་གློག་སོགས་དང༌། ཕྱི་མ་བཀའ་བརྒྱད་ལས་གཙོ་བོར་བཤད་པ་སྟེ། འདི་དག་ལ་ཅུང་ཟད་འདྲ་མིན་འགའ་རེ་འབྱུང་ངོ༌། ། ཚ༣ གསུམ་པ་[ཕྱག་མཚན་]ནི། ཕྱག་མཚན་དང་པོའི་རྡོ་རྗེ་ཁ་ཊྭཱཾ་སོགས། ། མཁའ་འགྲོ་རྒྱ་མཚོ་སོགས་དཀྱིལ་འཁོར་གྱི་གཙོ་བོ་ཕྱག་མང་རྣམས་ལ་ཕྱག་མཚན་གྱི་དབྱེ་བའང་དུ་མར་བཤད་པ་ལས་གཙོ་བོར་གྱུར་པ་དང་པོའི་རྡོ་རྗེ་དང༌། ཁ་ཊྭཱཾ་ག་ལ་སོགས་པ་སྟེ། ཕྱོགས་མཚོན་ཅུང་ཟད་བསྡུ་ན། (༡༣༡བ) ཕྱག་མཚན་དང་པོའི་རྡོ་རྗེ་ནི། ། རྭ་བཞི་དབུས་ལ་མ་རེག་ཙམ། ། མདོག་དམར་ཁྲོ་བོའི་རྡོ་རྗེ་རྭ། ། ཕྱོགས་བཞིར་ཤིན་ཏུ་གྱེས་པའོ། ། ཁ་ཊྭཱཾ་རྡོ་རྗེ་མི་མགོ་གསུམ། ། བུམ་པ་རྒྱ་གྲམ་ཡུ་བ་བཅས། ། སྐུ་ཡི་སྲིད་ཚད་ཉིད་དང་མཉམ། ། དར་དཔྱངས་དྲིལ་བུ་ཅང་ཏེའུ་ཕྱང༌། ། ག་དའི་དབྱུག་པ་དཔག་ཆེན་མདའི། ། ཝ་གཞུ་ཉིད་དང་མཚུངས་པའོ། ། བི་དྷི་པཱ་ལ་མདུང་རྩེ་རྣོ། ། རྨ་བྱའི་སྒྲོ་ཕོན་ཡུ་བར་ལྡན། ། རྡོ་རྗེ་རྩེ་ལྔའི་རྭ་བཞི་སྤངས། ། ཨ་ཀ་པཱུ་ཙི་ཀ་བཛྲ། ། མདུང་ཐུང་ཀ་ཎཱ་ཡ་ཞེས་པ། ། འདི་གཉིས་རྡོ་རྗེ་རྩེ་གཅིག་པ། ། ཐོད་ཚལ་རྩེ་ཐོད་ཌཱ་མ་རུ། ། དྲྭ་བ་ཅན་དང་དྲྭ་བ་མེད། ། རལ་གྲི་ཆུ་གྲི་ཕེ་ཊ་ཀ ། གྲི་གུག་དགྲ་སྟྭ་གཏུན་ཤིང་དང༌། ། མདུང་རིང་མདུང་ཐུང་ཕུབ་རིགས་གསུམ། ། བྷོ་ཀཾ་རྫ་རྔ་རྔ་ཟླུམ་དང༌། ། རྔ་ཆེན་ཌཱ་ཀ་པ་ཊ་ཧ། ། རྡོ་རྗེ་དྲིལ་བུ་ལ་སོགས་པའོ། ། ཚ༤ བཞི་པ་[ཁྲི་རྒྱབ་]ནི། བྱང་ཕྱོགས་དག་པའི་ཁྲི་འགྱོགས་ལེ་ཚན་བདུན། ། ཕྱིན་དྲུག་ངོ་བོ་རྒྱབ་ཡོལ་རྒྱན་དྲུག་སོགས། ། བླ་མའི་ཡོན་ཏན་ཡོངས་བཟུང་གི་རྒྱུད་དོན་བཞིན་གདན་ཁྲི་རྒྱབ་ཡོལ་དང་བཅས་པ་ལ། བྱང་ཕྱོགས་ཀྱི་ཆོས་ཀྱི་སྡེ་ཚན་བདུན་དག་པའི་ཆོས་དང་སྦྱར་བ་ཁྲི་འགྱོགས་ལེ་ཚན་བདུན་དུ་གྲགས་པ་ནི། ཁྲི་གདན། ཁྲི་གདོང་། ཁྲི་ཡི་རྐང་། ཁྲི་རྨང་གཉིས་དང་། བ་གམ་དང་། ལན་ཀན་ཏེ་རྣམ་པ་བདུན་ནོ། ། འདེགས་བྱེད་ལ། སེང་གེ། གླང་པོ། རྨ་བྱ། ཤང་ཤང་རྣམས་དང༌། ཉི་ཟླ་པདྨའི་གདན་རྣམས་ནི་རིམ་བཞིན། སྟོབས་དང་། དབང་བཅུ། སྨོན་ནས་ཤེས་པ། བྱང་ཆུབ་ཀྱི་ཕྱོགས། དོན་དམ་ཨེ། ཀུན་རྫོབ་ཝྃ། སྒྲིབ་གསུམ་གྱིས་མ་གོས་པའི་ཡོན་ཏན་རྣམས་དང་སྦྱར་རོ། ། ཕྱིན་དྲུག་གི་ངོ་བོ་རྒྱབ་ཡོལ་ལ་རྒྱན་སྣ་དྲུག་སྟེ། མཁའ་ལྡིང་དང༌། ཆུ་སྲིན་དང༌། བྱིས་པ་དང༌། གླང་པོ་ཆེ་དང༌། ཤ་ར་བྷ་སྟེ་བསེ་ཁ་སྒོ་དང༌། ཀླུ་ཕྲུག་རྣམས་ཀྱང་རིམ་བཞིན། ཤེས་རབ་དང༌། བསམ་གཏན་དང༌། བརྩོན་འགྲུས་དང༌། བཟོད་པ་དང༌། ཚུལ་ཁྲིམས་དང༌། སྦྱིན་པ་བཅས་ཕ་རོལ་ཏུ་ཕྱིན་པ་དྲུག་ལུགས་ལྡོག་པ་དང་སྦྱར་བའོ། ། སོགས་ཁོངས་ནས། ཁྲི་ལ་བརྩེགས་ཉི་ཤུ་རྩ་གཅིག་ལ་(༡༣༢ན)སོགས་པའི་སྤྲོས་པ་དང༌། རྒྱབ་ཡོལ་རྒྱས་པ་ལ་ཕུབ་ལ་ཞོལ་བཏགས་པ་ལྟ་བུ། འབྲིང་པོ་ལ་པད་འདབ་ལྟ་བུ། བསྡུས་པ་ལ་ལྕགས་རྩེ་མ་དང་སྒང་གཟུགས་མ་ལ་སོགས་པ་རྒྱས་འབྲིང་བསྡུས་པའི་རྣམ་གཞག་མང་ཞིང༌། འབྲིང་པོའི་ཚད་ནི་སྟག་ཚང་ལོ་ཙཱའི་དཔལ་འབྱོར་རྒྱ་མཚོ་ལས་ཞིབ་པར་འབྱུང་བ་དང༌། ཕྱིས་སུ་ཁྲི་རྒྱབ་བྲིས་འབུར་གཉིས་ཀ་ལ་བཞེངས་པ་ཉུང་ཡང་གྲུབ་ན་བསོད་ནམས་རླབས་ཆེན་གྱི་རྒྱུར་འགྱུར་བ་ཡིན་ནོ། ། བོད་ཀྱི་མཁས་པ་མང་པོས་ཁྲི་དྲུག་འགྱོགས་འདི་རྒྱ་གར་ན་ལྷ་ཁང་གི་སྒོ་རྒྱན་དུ་ཡོད་པས་ལྷའི་རྒྱབ་ཡོལ་དུ་འཁྲུལ་ནས་བོད་དུ་དེའི་རྒྱན་འབྱམས་[བྱས་]པ་ཙམ་ལས་ཁུངས་ཡང་དག་མེད་པར་འདོད་ཅིང༌། དེ་བཤད་པའི་ཁུངས་བླ་མའི་ཡོན་ཏན་ཡོངས་བཟུང་སོགས་ཙ་མིའི་རྒྱུད་གསུམ་པོ་ཡང་རྒྱུད་ཡང་དག་མ་ཡིན་པར་འཆད་མོད། འོན་ཀྱང་ཁྲི་རྒྱན་གྱི་བཀོད་པ་འདི་ལྟ་བུ་རྒྱ་གར་གྱི་བཟོ་ཡིན་ངེས་འགའ་ལའང་མཐོང་ཞིང་ཁུངས་ཀྱི་རྒྱུད་དེ་རྒྱུད་ཡང་དག་ཏུ་རང་བྱུང་ཞབས་བཞེད་པའི་ཕྱིར་ཁོ་བོ་ཅག་ནི་དེ་ལ་ཚད་མར་བྱེད་ཅེས་ཀུན་མཁྱེན་དྷརྨཱ་ཀ་རས་གསུངས་སོ། ། ཚ༥ ལྔ་པ་[སྐྱོན་སེལ་]ནི། རིང་ཐུང་སྦོམ་ཕྲ་ཡོ་སོགས་སྐྱོན་མི་ལྡན། ། རྒྱུད་སྡོམ་པ་ལས། རིང་བ་གསུམ་ནི་སྐྱོན་ཆེ་སྟེ། ། ཨོལ་སྐོ་མགྲིན་པ་བྱིན་པའོ། ། སྣ་དང་རྣ་བ་སོར་མོ་སོགས། ། གསུམ་པོ་ཐུང་བ་ཉེས་པ་ཆེ། ། བྱིན་པ་ཞབས་སོགས་མཁུར་བ་དག ། གསུམ་པོ་སྦོམ་པ་སྐྱོན་ཆེན་ཏེ། ། འགྲམ་པ་བྲང་དང་རྩིབས་ལོགས་གསུམ། ། ཞོམ་པ་ཉེས་པ་ཆེན་པོའོ། ། ནུ་མ་རྣ་བ་དཔྲལ་བ་གསུམ། ། འཁྱོག་པ་ཉེས་པ་ཆེན་པོ་སྟེ། ། བརླ་དང་དཀུ་དང་ནམ་ཚོང་གཉིས། ། གསུམ་པོ་ཞོམ་པ་སྐྱོན་ཆེའོ། ། ཞེས་སོགས་སྐྱོན་རེ་རེས་ཉེས་པ་ཆེན་པོ་སོ་སོར་སྐྱེད་པའི་ཚུལ་དང༌། (༡༣༢བ) འདིར་ནི་སྤྱན་སོགས་ཡོ་བའམ། ། ཕྱག་རྒྱ་ཕྱག་མཚན་ནོར་གྱུར་ན། ། མྱ་ངན་སྡུག་བསྔལ་གྱིས་རབ་གདུང༌། ། གཟུགས་བརྙན་སྐྱོན་སོགས་མཚན་ཉིད་དེ། ། དེ་ཕྱིར་སྐྱོན་བཏགས་བཅོས་པར་བྱ། ། རྒྱབ་ཡོལ་གདུགས་དང་གདན་རྣམས་ཏེ། ། གསུམ་པོ་ཆུང་ཞིང་དོག་པའི་སྐྱོན། ། མཛའ་བོས་མི་སྙན་བརྗོད་པ་དང༌། ། དཔལ་ཉམས་འཆི་བར་འགྱུར་བ་ཡིན། ། འདི་དག་ཉེས་པ་ཆེན་པོ་སྟེ། ། མཁས་པས་ལེགས་པར་བརྟག་པར་བྱ། ། ཞེས་སོགས་གསུངས་པའི་སྐྱོན་རྣམས་དང་མི་ལྡན་པ་ཤིན་ཏུ་གལ་ཆེ་ཞིང༌། གཞན་ཡང་ཚད་དང་མི་ལྡན་པའི་ལྷར་ཡེ་ཤེས་སེམས་དཔའ་མི་འཇུག་པ་དང༌། སྐྱོན་ཅན་གྱི་སྐུ་གཟུགས་དེ་གང་དུ་ཡོད་པའི་ས་ཕྱོགས་ཀྱི་བཟང་པོའི་དཔྱད་རྣམས་ཀྱང་ཉམས་པར་འགྱུར་བ་སོགས་མི་དགེ་བ་འབའ་ཞིག་འབྱུང་བ་གསུངས་པས། དེ་ལྟ་བུ་ནི་གཙང་མའི་སར་དོར་བར་བྱའོ། ། ཚ༦ དྲུག་པ་[ཚོན་མདངས་]ནི། རྩ་བ་ཡན་ལག་ཚོན་སྦྱོར་མདངས་དང་བཅས། ། ཚོན་སྦྱོར་ལའང་རྩ་བའི་ཚོན། དཀར། སེར། དམར། སྔོ། ལྗང་གུ་ལྔ། ཡན་ལག་གི་ཚོན་འབྲིང་པོ། ལི་ཁྲི་ཤ་ཁ་ན་རོས་གསུམ། ། མོན་ཁ་དུད་ཁ་ཇ་ཁ་གསུམ། ། སྨུག་པོ་རུས་ཁ་གཡུ་ཁའོ། ། དེ་དག་རེ་རེ་ལའང་ནང་གསེས་མང་དུ་བྱར་ཡོད་ཅིང༌། ཡན་ལག་རྒྱས་པ་སུམ་ཅུ་རྩ་གཉིས་ནི། དཀར་པོ་དཀར་སེར་དཀར་དམར་ཆུ་ཤེལ་མདོག ། སེར་པོ་སེར་སྐྱ་དམར་སེར་ལི་ཁྲི་མདོག ། དམར་པོ་དམར་སྐྱ་དམར་སྨུག་རྒྱ་སྐག་མདོག ། སྔོན་པོ་སྔོ་སྐྱ་མཐིང་ནག་གཡུ་ཁ་མདོག ། ལྗང་གུ་ལྗང་སེར་ལྗང་སྐྱ་ལྗང་ནག་གོ། ། ཤ་ཁ་ཇ་ཁ་མོན་ཁ་ཐལ་ཁ་དང༌། ། སྨུག་པོ་སྨུག་ནག་ན་རོས་གློ་བ་ཁ། ། དུད་ཁ་རེ་ཁ་རུས་ཁ་མུན་མདོག་གོ། ། ཞེས་པ་ཡོངས་གྲགས་ཀྱི་སྦྱོར་ཚུལ་ཏེ་ཚོན་གྱི་ཁྱད་པར་སོགས་ལས་ཀྱང་མཐའ་ཡས་པར་འགྱུར་རོ། ། གང་ལྟར། སྣུམ། བརྗིད། བཀྲག་གསུམ་འཛོམ་ན་ཚོན་སྦྱོར་ལེགས་པའི་ཚད་དུ་བཤད་དོ། ། མདངས་ལ་དང་བཙག་མདང་ཡུངས་ཞི་བརྡལ་འདྲ། འབར་མདངས་ཀུ་ཤའི་རྩེ་འདྲ། བཤལ་མདངས་འཇའ་ཚོན་ཡལ་འདྲ་རྣམས་དང༌བཅད་ཀྱི་ཚུལ་དང་བཅས་པ་རྣམས་ཀྱང་རེ་(༡༣༣ན)རེས་རེ་རེ་མ་བསླད་པར་དགོས་སོ། ། ཚ༧ བདུན་པ་[རྣམ་འགྱུར་]ནི། རྣམ་འགྱུར་ཡུལ་བཀོད་སོ་སོའི་ལུགས་མཐུན་ནོ། ། རྩ་བའི་བ་ཏྲ་རིགས་བརྒྱད། མེ་རི་རིགས་གསུམ་གྱིས་མཚོན་གཟུགས་དང་རྣམ་འགྱུར་མི་འདྲ་བའི་ཁྱད་པར་དུ་མ་རྣམས་དང༌། ལྷག་པར་འཕགས་ཡུལ་རྒྱ་ནག་བོད་ཡུལ་སོགས་ཡུལ་བཀོད་སོ་སོའི་ལུགས་དང་མཐུན་པར་བྱ་སྟེ། ཇི་སྐད་དུ། ཁང་བཟང་ལ་སོགས་བྱང་ཆུབ་ཤིང༌། ། མེ་ཏོག་སྣ་ཚོགས་མཆོད་པའི་སྤྲིན། ། རྟེན་འབྲེལ་རི་མོ་རིན་ཆེན་ཕྲེང༌། ། བཟོ་མཐའ་མ་འདྲེས་རང་རང་བརྒྱུད། ། རྒྱ་གར་བཟོ་ཡི་ཁྱད་ཆོས་ཡིན། ། མཛེས་ལྡན་རི་མོ་མདང་ལྡན་པར། ། བཀྲ་ཤིས་གཟུགས་བརྙན་གོས་ཀྱི་རྒྱུད། ཁྲི་དང་མཚར་བའི་བྱེ་བྲག་རྣམས། ། རྒྱ་ནག་བཟོ་ཡི་ཁྱད་ཆོས་ཡིན། ། ཆུ་གནས་སྲོག་ཆགས་མཚོ་དང་རྫིང༌། ། དྲི་ཞིམ་ནགས་ཚལ་ཀླུ་ཡི་རྫས། ། སྨན་སྤོས་ལྷབ་ལྷུབ་རི་མོ་རྣམས། ། ཁ་ཆེ་བཟོ་ཡི་ཁྱད་ཆོས་ཡིན། ། འབྱུང་བཞི་པ་ཏྲ་འཇའ་དང་སྤྲིན། ། ཤིང་ལྗོན་རིན་ཆེན་སྣལ་རིས་རྒྱས། ། ནམ་མཁའི་སྲོག་ཆགས་ལྷ་ཡི་རྫས། ། བལ་པོ་བཟོ་ཡི་ཁྱད་ཆོས་ཡིན། ། བྲག་དང་སྤང་རི་རི་དྭགས་དང༌། ། བླ་བྲེ་ཆུན་འཕྱང་མཛེས་པའི་རྒྱན། ། སྣ་ཚོགས་གཟུགས་དང་གངས་རིའི་ཁྲོད། ། གངས་ཅན་བཟོ་ཡི་ཁྱད་ཆོས་ཡིན། ། ཅེས་བཤད་པ་སོགས་ཀྱི་རྣམ་འགྱུར་ལག་ཏུ་ལོངས་པ་དགོས་སོ། ། བ༣ གསུམ་པ་རྟེན་ཞལ་ཡས་ཁང་འཕྲོས་ཙམ་སྨོས་པ་ནི། རྟེན་གནས་གཞལ་ཡས་ཁང་ལ་བློས་བསླང་དང༌། ། བྲིས་ཐིག་ཡོངས་གྲགས་རྡོར་ཕྲེང་རྗེས་སུ་འབྲངས། ། ལྷའི་རྟེན་གཞལ་ཡས་ཁང་ནི། བི་མཱ་ནའི་སྒྲ་ལས་གཞལ་དུ་མེད་པ་སྟེ། མཁའ་འགྲོ་རྒྱ་མཚོར་གཞལ་ཡས་ཁང་པདྨའི་རྣམ་པ་ཅན་དུ་བཤད་པ་དང༌། ཐེག་པ་ཆེན་པོའི་མདོ་སྡེ་རྣམས་ལས་ཐར་པ་ཆེན་པོའི་ཕོ་བྲང་གི་བཀོད་པ་ཚད་མེད་པར་བཤད་པ་སོགས་ལ་འཇུག་ཅིང༌། འདིར་ལག་ཏུ་བླང་བྱ་རྒྱུད་སྡེ་རྣམས་(༡༣༣བ)ལས་བྱང་ཕྱོགས་སོ་བདུན་གྱི་དག་པ་སྦྱོར་བའི་ཆེད་དུ་གྲུ་བཞི་སྒོ་བཞི་རྟ་བབས་དང་བཅས་པའི་ཁང་བཟང་གསུངས་པ་ཁོ་ན་ཡིན་ལ། དེ་ལའང་། བློས་བསླང་དང༌། བྲི་ཆའི་རྣམ་བཞག་གཉིས་ཡོད་ཅིང༌། བྲིས་ཐིག་ཞིབ་ཆ་ཤེས་ན་བློས་བསླང་ལའང་