Tibetan
ཐོད་པ་ལྟག་སྤྲོད་ཀྱི་མཚན་ཉིད་དང་བཟོ་ཚུལ་ཁྱད་པར་ཅན། རྒྱན་དྲུག་དང་དགང་གཟར་བླུགས། རྙིང་མའི་རྒྱུད་གཞུང་རྣམས་ལས་རྒྱ་ཆེར་གསུངས་པའི་ཕུར་བུ་རྡོ་རྗེ་རྩེ་ལྔ་དང་སྣ་ཚོགས་རྡོ་རྗེས་མཚན་པའི་ཁ་ཊྭཱཾ་ག་རིགས་གཉིས། སོགས་ཁོངས་ནས། རལ་གྲི། དགྲ་སྟྭ། རྩེ་གསུམ་གྱིས་མཚོན་པའི་ཕྱག་མཚན་གྱི་ཚད་དབྱིབས་དང་རྣམ་བཞག་ཞིབ་མོར་ཤེས་པ་ཤིན་ཏུ་གལ་ཆེའང་། འདིར་གཞུང་མང་བའི་འཇིགས་པས་མ་སྤྲོས་ལ། དེ་དག་གི་ཚུལ་རྟོགས་པར་འདོད་ན་སློབ་དཔོན་རིག་བྱིན་གྱིས་མཛད་པའི་བྱ་བཏུས་དང༌། གོང་སྨོས་བོད་གཞུང་དེ་དག་སོགས་སུ་གསལ་བ་ལས་ཤེས་པར་བྱའོ། ། རྔ་སིལ་གར་འཆམས་སོགས་ཀྱང་ལུས་ཀྱི་ལས། ། སྣང་ཤས་དང་འཕྱོར་འདོད་དབང་གིས་སེམས་ཀུན་ཏུ་གཡེང་བའི་རྒྱུ་མ་ཡིན་པར་དཀོན་མཆོག་མཆོད་པའི་དོན་དང་སྔགས་ཀྱི་ཚུལ་དང་འབྲེལ་བར། རྔ་ཆེ་ཆུང༌། སྦུབ་ཆོལ་དང་སིལ་སྙན་བསྐུལ་བ། གར་འཆམས་སྟངས་སྟབས་ལ་སོགས་པ་རྣམས་ཀྱང་ལུས་ཀྱི་བཟོ་(༡༤༦བ)ཁྱད་པར་ཅན་གྱི་ཕྱོགས་སུ་གཏོགས་ཏེ། དེའང་རྔ་ཤིང་གི་རྒྱུ། གཡོགས་ཀྱི་ཚུལ། སྦུབས་སིལ་གྱི་བཟང་ངན་རྣམས་སྔོན་གྱི་བསྟན་བཅོས་དང་དཔྱད་དོན་རྣམས་ལས་འབྱུང་བ་ལྟར་ཤེས་པར་བྱ་ཞིང༌། རྔ་རྡུང་ཚུལ་མཁས་པ་ཙནྡྲ་ཤྲཱིས། རྒྱ་མཚོ་ཆེན་པོའི་ཀློང་མི་དཀྲུག ། རི་རབ་གླིང་བཞི་མཐའ་མི་བསྐོར། ། རི་ཐང་མཚམས་ཀྱི་བྲག་མི་གཤགས། ། རི་དྭགས་རྒྱལ་པོའི་གདོང་མི་བསྙུན། ། ཅེས་དང༌། ལྕེ་འབབ་བྲང་བརྡུང་སློང་མོའི་སྐང༌། ། བྱ་བྲན་གཤོག་རྡེབ་མི་བསྐུལ་བའི། ། ཚུལ་བརྒྱད་འོག་ངོས་མཁྱིད་གང་སོར། ། རྔ་གཡོག་རང་ལྗིད་ཉིད་ཀྱིས་ནི། ། བསྐུལ་མ་ཐག་ཏུ་སོ་སོར་ཕྲལ། ། གྲལ་ལ་བསྒྲིགས་ཏེ་བརྡུང་བ་ན། ། ཕན་ཚུན་གཅིག་གིས་གཅིག་ནོན་ཙམ། ། ནོར་བུ་བསྟར་ལ་བརྒྱུས་པ་ལྟར། ། མཐོ་དམན་འབུར་ཁྱོད་སྤང་བར་བྱ། ། སྙོམས་ཤིང་མཛེས་པར་བསྟར་ལ་བསྒྲིགས། ། ཞེས་དང༌། ཞི་བའི་རྔ་བརྡུང་བྱེད་པ་ན། ། རྔ་ཐབས་དལ་ལ་ལྷོད་པར་བརྡུང༌། ། རྒྱས་པའི་རྔ་བརྡུང་བྱེད་པ་ན། ། རྔ་ཐབས་གསལ་ལ་འཁྲོལ་བར་བརྡུང༌། ། དབང་གི་རྔ་བརྡུང་བྱེད་པ་ན། ། རྔ་ཐབས་སྙན་ལ་འཇེབས་པར་བརྡུང༌། ། དྲག་པོའི་རྔ་བརྡུང་བྱེད་པ་ན། ། རྔ་ཐབས་དྲག་ལ་མྱུར་བར་བརྡུང༌། ། དྲག་བརྡུང་རྒྱུན་ཆགས་བྱེད་པ་ན། ། གནམ་ལྕགས་ལྟར་ཡང་དབབ་པར་བྱ། ། ཞེས་དང་སོ་སོའི་ཉམས་སོགས་རྒྱས་པར་བཤད་པ་ལྟར་རོ། ། སྦུབས་སིལ་ཡང་དེ་ཉིད་ཀྱིས། ། ཕོ་སྒྲ་དིང་ཟིལ་ལྡན་པར་བརྡུང༌། ། མོ་སྒྲ་སྙན་ཅིང་མཛེས་པར་བརྡུང༌། ། ཕྱེད་མ་དྭངས་ཁྲོལ་ཆགས་པར་བརྡུང༌། ། ཞི་ལ་སྦྲང་ཆར་ཟིམ་བུ་ལྟར། ། རྒྱས་ལ་རྫི་ཆར་གཡོས་པ་ལྟར། ། དབང་ལ་དྲག་ཆར་འབབས་པ་ལྟར། ། དྲག་ལ་ཐོག་སེར་འབྱིན་པ་ལྟར། ། ཞེས་སོགས་དང་འདྲ་དཔེ་བཅུ་གཉིས་ཀྱིས་སྒོ་ནས་རྔ་སྒྲ་དང་སྦྱོར་བའི་ཚུལ་བཤད་པ་དང༌། འཇམ་དབྱངས་བསོད་ནམས་དབང་པོའི་རོལ་མོའི་བསྟན་བཅོས་གཅིག་ཤེས་ཀུན་གྲོལ་(༡༤༧ན)ལས། སྤྱིར་གྱི་རོལ་མོ་གང་དཀྲོལ་ཡང༌། ། དམ་དུ་བཟུང་བར་མི་བྱ་ཞིང༌། ། བྲང་ལག་མི་སྦྱར་མན་ངག་ཡིན། ། དབྱུག་པ་ལྟ་བུར་མི་ཕྱར་ཞིང༌། ། ཀ་བ་ལྟ་བུར་བསྲང་མི་བྱ། ། ཞེས་དང༌། ཙནྡྲས། བར་སྣང་མིག་ཡུག་གདངས་མི་དགག ། བྲང་དང་པུས་མོ་ལ་མི་རེག ། ཅེས་དང༌། དཔུང་པ་ལག་ངར་ཚིགས་ནས་ལྷོད། ། ལག་པའི་མཐིལ་ནས་འཕྲུལ་ཆགས་ཚད། ། རང་ལྗིད་ཁོ་ནས་སྒྲ་བསྐུལ་གྱིས། ། འདབ་མའི་རྩེ་མོ་རྩལ་གྱིས་མིན། ། ཅེས་སོགས་སྤང་བླང་གི་མཚན་ཉིད་དང༌། འཇབ་འཕར་འུར་དིང་སྙན་རྩུབ་དང༌། ། ཕྲ་སྦོམ་དྭངས་འཁྲོལ་ལ་སོགས་པའི། ། སྒྲ་ཐབས་རྣམ་དབྱེ་རྟོགས་པར་བྱོས། ། ཞེས་སྐབས་དང་བསྟུན་པའི་སྒྲ་ཐབས་ཀྱི་རྣམ་པར་དབྱེ་བ་ལ་མཁས་དགོས་པ་སོགས་བཤད་དོ། ། དེ་བཞིན་དུ་དུས་འཁོར་མཁའ་འགྲོ་རྒྱ་མཚོ་རྡོ་རྗེ་གུར་ཡོ་གའི་རྒྱུད་དང་རྡོ་རྗེ་ཕྲེང་བ་སོགས་ནས་བཤད་པའི་ས་བཟུང་བའི་སྟངས་སྟབས། མཆོད་པའི་གར་གྱི་བྱེ་བྲག་རྣམས་དང༌། རྙིང་མའི་སྒྱུ་འཕྲུལ་ཁྲོ་བོ། ཚོགས་ཆེན་འདུས་པ་སྒྲུབ་པ་བཀའ་བརྒྱད། ཁྱད་པར་རྡོ་རྗེ་ཕུར་པ་ལ་སྦྱོར་བའི་ཁྲག་འཐུང་རྩ་འཆམས། གྲུབ་འཆམས་ཀྱི་རིགས། གཞན་ཡང་གསར་རྙིང་ཐམས་ཅད་ལ་མགོན་འཆམས་སོགས་ཇི་སྙེད་ཡོད་པ་ཐམས་ཅད་སྤྱིར་གར་གྱི་ཉམས་དགུའི་རྣམ་པ་དང་ལྡན་ཅིང༌། ཁྱད་པར་སློབ་དཔོན་ཙནྡྲས། ལུས་ཀྱི་སྟོད་ལ་སེང་ཆགས་དང༌། ། སྐེད་པ་ལ་ནི་འཁྲིལ་ཆགས་དང༌། ། ཚིག་བཞི་ལ་ནི་འཕྲུལ་ཆགས་དང༌། ། བཞག་ཤ་ལ་ནི་ལྷོད་ཆགས་དང༌། ། ཤ་འགྱུར་ལ་ནི་མར་ཆགས་དང༌། ། རྣམ་འགྱུར་ལ་ནི་འགྱིང་ཆགས་དང༌། ། སྤྱོད་པ་ལ་ནི་དལ་ཆགས་དང༌། ། སྒྱིད་པ་ལ་ནི་ལྡེམ་ཆགས་དང༌། ། རྐང་མགོ་ལ་ནི་བདེ་ཆགས་དང༌། ། ཀུན་ཏུ་དཔའ་ཞིང་བརྗིད་ཆགས་པའོ། ། ཡང་སྨྲས་པ། (༡༤༧བ) འཇིགས་ཤིང་རྔམས་པའི་གར་རྣམས་ལ། ། ཧ་ཅང་གསོར་ན་སྐྱོན་ཡིན་ནོ། ། འགྱིང་ཞིང་མཉེན་པའི་གར་རྣམས་ལ། ། ཧ་ཅང་བཅོས་ཆུང་སྐྱོན་ཡིན་ནོ། ། འཁྱུག་ཅིང་བདེ་བའི་གར་རྣམས་ལ། ། ཧ་ཅང་རྟབས་རྟོབས་སྐྱོན་ཡིན་ནོ། ། དལ་ཞིང་ལྷོད་པའི་གར་རྣམས་ལ། ། ཧ་ཅང་སྒྱིད་ལུགས་སྐྱོན་ཡིན་ནོ། ། སྒེག་ཅིང་ཆགས་པའི་གར་རྣམས་ལ། ། ཧ་ཅང་བསྒྱུར་ན་སྐྱོན་ཡིན་ནོ། ། ཞེས་དང༌། གཞན་ཡང་སྤང་བླང་གི་བྱེ་བྲག །སྤྱིའི་གདམས་པ་བཅས་ཞིབ་པར་བསྟན་པ་རྣམས་ནི་སྤྱིར་ཤེས་དགོས་ལ། བྱེ་བྲག་རང་རང་གི་ལུགས་སྲོལ་འཁྲུལ་མེད་རྩ་བའི་ཁུངས་གང་ཡིན་པ་ལ་མཁས་པར་བསླབ་དགོས་པ་དང༌། ཁྱད་པར་ས་གར་མཆོད་གར་རྣམས་ནི་རྒྱུད་དང་འཕགས་ཡུལ་གྱི་ཕྱག་བཞེས་དང་འབྲེལ་བས་ཁུངས་དང་དགོས་པ་ཆེ་བ་སྨོས་མ་དགོས། རྙིང་མའི་ཁྲག་འཐུང་རྩ་འཆམས་སུ་གྲགས་པ་འདི་ཉིད་རྒྱུད་གང་ནས་བཤད་ན། ཡེ་ཤེས་རྔམ་གློག་ལས། ཆོས་ཀུན་མཉམ་པའི་ངང་རྟོགས་ན། ། བསྒུལ་ཞིང་བསྐྱོད་པ་ཐམས་ཅད་ཀུན། ། ཕྱག་རྒྱ་ཡིན་པར་དཔའ་བོས་གསུངས། ། རང་གི་ལྷ་ཡི་ཏིང་འཛིན་གྱིས། ། སྟང་སྟབས་འདི་ལ་གང་གནས་པ། ། སངས་རྒྱས་ཉིད་ཀྱང་སྐྲག་འགྱུར་ན། ། དྲེགས་པའི་ཚོགས་ལྟ་སྨོས་ཅི་དགོས། ། ཞེས་དང༌། ཐབས་ཀྱི་ཞགས་པའི་རྒྱུད་ལས་ཀྱང་ཕྱག་རྒྱ་བཅིང་ཚུལ་དེའི་དགོས་པ་བཅས་བསྟན། དེ་ཉིད་སྒྲུབ་པ་པོའི་གང་ཟག་ལྟ་བ་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོར་རྟོགས་ཤིང་སྒོམ་པ་ཏིང་ངེ་འཛིན་ལས་སུ་རུང་བར་སྣང་སྤྱོད་ལྷའི་ཕྱག་རྒྱས་ཐེབས་པ་རྡོ་རྗེའི་ཟློས་གར་ལ་རང་བྱན་ཚུད་པས། ཇི་ལྟར་སྒྲུབ་པའི་ཚུལ་སྒྱུ་འཕྲུལ་དྲྭ་བ་རྩ་བཤད་ཀྱི་རྒྱུད། འཇིག་རྟེན་འདས་མདོ་ཧེ་རུ་ཀ་གལ་པོ་སོགས་བླ་ན་མེད་པའི་རྡོ་རྗེ་རིགས་ཀྱི་རྒྱུད་རྣམས་ལས་བསྟན་པའི་དོན་རྒྱལ་པོ་ཛཿནས་མཁས་པ་མི་གསུམ་ལ་བརྒྱུད་དེ་བོད་ཀྱི་ལོ་ཙཱ་བ་རྨ་གཉགས་དཔལ་གྱི་བུ་བརྒྱད། གནུབས་དང་ཟུར་ནས་འདར་ལ་བཀའ་བབས་ཤིང༌། (༡༤༨ན)མཐར་གསང་ཆེན་བསྟན་པའི་མངའ་བདག་སྨིན་གླིང་སྐུ་མཆེད་ནས་རྒྱས་པར་མཛད་ཅིང༌། ལོ་ཆེན་རིན་པོ་ཆེས་འཆམས་ཡིག་ཀུན་བཟང་རོལ་པ་མཛད་དེ་ལེགས་པར་གཏན་ལ་ཕབ་པ་འདི་ལ། དཀྱིལ་འཁོར་གྱིས་ས་ཆོག་དང་འབྲེལ་བའི་ཁྲག་འཐུང་རྩ་འཆམས་དང༌། དྲག་པོའི་ལས་སྦྱོར་དང་འབྲེལ་བའི་དགྲ་བགེགས་བྲུབ་འཆམས་གཉིས། དང་པོ་ལ། དོན་ཚན་བཅུ་གསུམ་གྱི། ཐོག་མར་རང་ལུས་ལ་བགེགས་ཀྱིས་མི་ཚུགས་པའི་ཕྱི་ལྷའི་ང་རྒྱལ་གྱིས་བྱིན་གྱིས་བརླབས་པའི་ཆས་གོས་བགོ་ཞིང་ཕྱག་མཚན་བཟུང༌། གཉིས་པ་ནི། ལྷ་སྲིན་གྱི་ཟེར་མི་ལྡང་བའི་ཕྱིར་གསེར་སྐྱེམས་བསྔོ། གསུམ་པ་ནི། གསང་སྒྲོགས་ཀྱི་ཉེས་པ་སྤང་བའི་ཕྱིར་སྣོད་བཅུད་དཀྱིལ་འཁོར་དུ་གསལ་བས་ལུས་འགྱུར་ཐུན་མོང་དུ་གཅེས་པའི་ཡན་ལག་བཅུ། ཕྱག་རྒྱ་ལ་མཁས་པ་གསུམ། ལུས་རྒྱན་དཔེ་གསུམ་དང་མཐུན་པའི་ཡོན་ཏན་དང་ལྡན་པས་དཀྱིལ་འཁོར་གྱི་ས་གཞིར་འགྲོ། བཞི་པ་ནི། རིགས་དང་མཐུན་པའི་རང་གནས་སུ་འདུག ། ལྔ་པ་ནི། སློབ་དཔོན་འཁོར་ལོའི་མགོན་པོར་བསྐྱེད་ལ། གཞན་སྲས་ཀྱི་བྱ་བས་དཀྱིལ་འཁོར་རྫོགས་པར་སྤྲོས་ལ། བསྐུར། བརླབ། དྲང་། བསྟིམ། མཆོད། བསྟོད་བྱ། དྲུག་པ་ནི། ཕྱོགས་ཀྱི་སློབ་མ་རྣམས་རིགས་བཞིའི་ཡུམ་དུ་བྱིན་བརླབ། བདུན་པ་ནི། ཕྱོགས་བཞིའི་ཡུམ་གྱིས་མཆོད་བསྟོད་སྔོན་དུ་འགྲོ་བས་དཀྱིལ་འཁོར་བཤད་པར་གསོལ་བ་གདབ། བརྒྱད་པ་ནི། སློབ་དཔོན་གྱིས་མཁའ་ཁྱབ་ཀྱི་རྒྱལ་བ་རྣམས་ཀྱི་ཐུགས་དམ་བསྐུལ། དགུ་པ་ནི། ཞེ་སྡང་རྡོ་རྗེའི་གར་གྱིས་བཀའ་བསྒོ་ཞིང་བགེགས་བསྐྲད། བཅུ་པ་ནི། དཀྱིལ་འཁོར་ལྷའི་སྟངས་སྟབས་ཀྱིས་ས་བཟུང་བ་ལ། འཆམས་བསྐོར་གསུམ་རང་ཆོས་དབྱིངས་བསྐྱེད། དབང་སྡུད་མཁའ་འགྲོ་དཔའ་བསྐྱེད་དང༌། ། ཉམས་པའི་བླ་འགུགས་དམ་ཅན་འབོད། ། ནམ་མཁའ་བར་སྣང་ས་གཞི་གསུམ། ། འཁོར་ལོ་རྟགས་བརྒྱད་པདྨོར་བརླབ། ། རྡོ་རྗེ་ཕྱེད་རྐྱང་སྔགས་གསུམ་གྱིས། ། ས་བཙལ་འདུལ་ཞིང་རློབ་པའོ། །(༡༤༨བ) ཞེས་པ་ལྟར། སྔོན་འགྲོའི་སྟངས་སྟབས་བཅུ་གཉིས་ཀྱིས་སྤྱིར་རློབ། མཁའ་རླུང་རཀྟ་ཞིང་ཆེན་དང༌། ། ཀེང་རུས་མེ་དཀྱིལ་གཞལ་ཡས་ཁང༌། ། ཞེས་རྟེན་བསྐྱེད་པ་བདུན། གཙོ་བོ་དང་ནི་རིགས་བཞི་དང༌། ། རིགས་ལྔའི་ཡུམ་དང་ཀོ་རཱི་བརྒྱད། ། སིཾ་ཧ་མ་བརྒྱད་སྒོ་མ་བཞི། ། དབང་ཕྱུག་མ་དང་ཕྲ་མེན་གྱི། ། བམ་ལེན་དཔལ་ཆེན་སྟོབས་འཆམས་སོ། ། ཞེས་པའི་ནང་ཚན་གཙོ་བོ་དཔལ་ཆེན་པོའི་འགྱིང་འཆམས་ནང་གསེས་དགུ་དང་བཅས་པས་བརྟེན་པ་བསྐྱེད་པ་སྟེ། དངོས་གཞི་སོ་སོའི་སྟངས་སྟབས་ཀྱིས་བྱེ་བྲག་ཏུ་བྱིན་བརླབ། བཅུ་གཅིག་པ་ནི། ཕྱོགས་བཅུའི་བགེགས་ལ་ཕུར་བུས་གདབ། བཅུ་གཉིས་པ་ནི། རྟག་ཆད་ཀྱི་མཐའ་བསལ། བཅུ་གསུམ་པ་ནི། བསྔོ་སྨོན་དང་ཤིས་པ་བརྗོད་པས་མཐའ་བརྒྱན་པའོ། ། དེ་ལྟར་གྱིས་པས་རྡོ་རྗེའི་ལུས་ཀྱི་སྤྱོད་པ་ལ་བརྟེན་ནས་ཚོགས་གཉིས་རླབས་པོ་ཆེ་སྤེལ་ཞིང་ལས་དང་དངོས་གྲུབ་བདེ་བླག་ཏུ་འགྲུབ་པར་བྱེད་པའི་ཐབས་རྨད་དུ་བྱུང་བ་ཡིན་ལ། བྲུབ་འཆམས་ལའང་། དྲག་པོའི་ལས་དང་འབྲེལ་བའི་ཚམ་རྔམས་ཀྱི་སྟངས་སྟབས་དགོས་པ་ཁྱད་འབྲེལ་ཅན་སྣང་ཡང་། འདིར་མ་སྤྲོས་ལ། ས་ལུགས་ཀྱི་ཕུར་པའི་རྩ་འཆམས་ཀྱང་དཔལ་ལྡན་བླ་མ་དམ་པའི་སྐབས་སུ་འདི་ཉིད་ཁ་བསྒྱུར་བ་ཡིན་པ་དང༌། བཀྲ་ཤིས་ཟུར་མང་གི་བདེ་མཆོག་ཚོགས་གར་ཆེན་མོར་གྲགས་པའི་གར་སྣ་སུམ་བརྒྱ་དྲུག་ཅུ་པ་འདིའང་ཏེ་ལོ་སངས་རྒྱས་ཀྱི་རྣམ་འཕྲུལ་དྲུང་རྨ་སེ་བློ་གྲོས་རིན་ཆེན་ལ་ཆོས་རྗེ་དེ་བཞིན་གཤེགས་པ་འཁོར་ལོ་སྡོམ་པ་དངོས་ཀྱི་སྐུར་བཞེངས་ནས་ཡུད་ཙམ་གཅིག་ལ་སྩལ་བར་ཡང་གྲགས་ཤིང༌། སངས་རྒྱས་ཞིག་ཆེན་གྱི་ཡེ་ཤེས་ཀྱི་སྐུས་རྗེས་སུ་བཟུང་སྟེ་ཤིན་ཏུ་རྒྱས་པར་སྩལ་བའི་བྱིན་རླབས་ཀྱི་སྒོ་ཆེན་པོ་ལྡན་པ་དང༌། གུ་རུ་ཆོས་ཀྱི་དབང་ཕྱུག་དག་པའི་སྣང་བར་ཟངས་མདོག་དཔལ་རིར་སློབ་དཔོན་ཆེན་པོའི་སྤྱན་སྔར་བྱོན་པའི་ཚེ་ཇི་ལྟར་མཇལ་ཞིང་རྗེས་སུ་གདམས་པ་སྩལ་བའི་དོན་མ་(༡༤༩ན)ནོར་བ་ཚེས་བཅུའི་གར་འཆམས་ཡོངས་སུ་གྲགས་པ་འདིའང་ཐ་ན་དུད་འགྲོ་ཡན་ཆད་གང་གིས་མཐོང་ཚད་སློབ་དཔོན་ཆེན་པོའི་གདུལ་བྱར་འགྱུར་བའི་ཕན་ཡོན་དང་ལྡན་པར་གསུངས་པས་མཚོན། ཐམས་ཅད་ལའང་དགོས་པ་དང་ལྡན་པས་རང་རང་གི་ལུགས་སྲོལ་ཕྲ་མོ་ཙམ་ཡང་མ་འཆུགས་པར་བྱ་དགོས་སོ། ། ན༢ གཉིས་པ་ལུས་བཟོ་ཕལ་པ་བཤད་པ་ནི། ཕལ་པ་ཁང་ཁྱིམ་གྲུ་གཟིང་གོས་རྒྱན་ཟས། ། གཞོམ་དང་སྲུང་བའི་འཁྲུལ་འཁོར་གོ་མཚོན་སོགས། ། ལུས་ཀྱི་བཟོ་ཕལ་པ་ནི། རྒྱལ་པོའི་ཕོ་བྲང་སོགས་ཁང་པ་བརྩེགས་པ་དང་ཁང་མིག་ལྔ་བརྒྱ་པ། སྐྱེ་བོའི་ཁང་ཁྱིམ། རྒྱ་མཚོ་ཆེན་པོར་བགྲོད་པའི་གྲུ་གཟིངས་ཆེན་པོ། རྒྱ་གར། བལ་པོ། རྒྱ་ནག་སོགས་ཀྱི་ཆུ་ལ་བགྲོད་པའི་གྲུ་ཆུང༌། ཕོ་མོའི་ཆོས་དང་རྒྱན་གྱི་ཁྱད་པར་བཟའ་བཏུང་གི་གཡོས་སྦྱོར་བ་རྣམས་དང༌། གཞན་ཡང་། ཕ་རོལ་གྱི་དགྲ་སྡེ་གཞོམ་པའི་ངོ་མཚར་གྱི་སྦྱོར་བ་བསྡུས་པའི་རྒྱུད་ལས་བཤད་པ། ཐང་རྫོང་གཞིག་པ་རྡོའི་འཁྲུལ་འཁོར་ཏེ་སྒྱོགས། ཆུ་རྫོང་འཇོམས་པ་ཀྲུའི་འཕྲུལ་འཁོར། རི་རྫོང་འཇོམས་པ་མེའི་འཕྲུལ་འཁོར། རལ་གྲི་འཁོར་བ་གྲི་གུག་གི་འཕྲུལ་འཁོར། རྩེ་མོ་འབྱེད་པ་རླུང་གི་འཕྲུལ་འཁོར། རྩིག་པ་འཇིག་པ་གུར་གྱི་འཕྲུལ་འཁོར། གོ་ཆ་འཇིགས་པ་ལྕགས་མདའི་འཕྲུལ་འཁོར་རྣམས་དང༌། རང་ཕྱོགས་སྲུང་བ་རལ་གྲིའི་འཕྲུལ་འཁོར། རྒྱལ་རིགས་འཐབ་པ་ཤིང་རྟའི་ཚད། ལྟད་མོ་ལ་འགྲོ་བའི་དོན་དུ་ཁང་བཟང་གི་མཚན་ཉིད། དགའ་སྟོན་གྱི་དོན་དུ་ཁྱོགས་ཀྱི་མཚན་ཉིད། ལྡུམ་རར་བཅུ་པའི་དོན་དུ་ཆུ་གྱེན་དུ་འདྲེན་པའི་འཕྲུལ་འཁོར་སོགས་དང༌། གཞན་ཡང་། ཁྲབ་རྨོག་ཕུབ་སོགས་གོ་ཆ་དང༌། མདའ་གཞུ་རལ་གྲི་སོགས་མཚོན་ཆའི་རིགས་བཟོ་བའི་བློ་གྲོས་དང༌། ལག་པའི་རྩལ་རྣམས་སོ། ། ད༢ གཉིས་པ་ངག་བཟོ་ལའང་གཉིས། ན༡ མཆོག་དང༌། ན༢ ཕལ་པའོ། ། ན༡ དང་པོ་ནི། ངག་བཟོ་མཆོག་གྱུར་རྩོད་(༡༤༩བ)འཆད་རྩོམ་པ་དང༌། ། ངག་བཟོ་རྣམས་ཀྱི་ནང་ནས་མཆོག་ཏུ་གྱུར་པ་ནི། གཞན་གྱི་ལོག་རྟོག་འཇོམས་པའི་རྩོད་པ་དང༌། གདུལ་བྱ་རྗེས་སུ་འཛིན་པའི་འཆད་པ་དང༌། བསྟན་པ་གསལ་བར་བྱེད་པའི་རྩོམ་པ་དང་གསུམ་ཡིན་ཏེ། དེ་དག་ཀྱང་སོ་སོའི་སྐྱོན་རྣམས་དང་མི་ལྡན་ཅིང་ཡོན་ཏན་རྣམས་ཚོགས་པས་གཟུགས་བརྙན་ཙམ་དུ་མ་སོང་བ་དགོས་སོ། ། ལྷན་སྐྱེས་རོལ་མོ་འདྲེན་བཀུག་སྒྱུར་དང་ལྟེངས། ། ལྗོན་པ་མེ་ཏོག་འཁྲི་ཤིང་ཆུ་ཀླུང་བླ། ། གནད་གསུམ་སྔོན་འགྲོས་སྐྱོན་དྲུག་རྒྱུ་ལྔ་སྤང༌། ། ཆེན་པོ་དྲུག་སོགས་སྐབས་སུ་བབས་པར་བླང༌། ། སློབ་དཔོན་ཙནྡྲ་ཤྲཱིས་དབྱངས་ཀྱི་བསྟན་བཅོས་བློ་གསལ་མགུལ་རྒྱན་ལས། ཉམས་ལྡན་ངག་གི་རིག་བྱེད་ཀྱིས། ། འཕགས་པ་མཆོད་དང་སེམས་ཅན་དོན། ། བྱེད་དང་དངོས་གྲུབ་རྣམ་གཉིས་རྒྱུ། ། ཞེས་བཤད་པ་ལྟར། དགོས་པ་དང་ལྡན་པའི་ལྷན་སྐྱེས་རོལ་མོ་སྟེ་དབྱངས་ཀྱི་བྱེ་བྲག་དཀོན་མཆོག་མཆོད་པའི་དབྱངས་འདུལ་བ་ལས་ཀྱང༌། དང་པོར་སྟོན་པས་གླུ་གར་དང་རོལ་མོའི་སྒྲ་སོགས་བྱེད་པ་བཀག་པས། སངས་རྒྱས་ཀྱི་བསྟོད་ཚིགས་ལ་སོགས་པའི་ཁ་ཏོན་རྣམས་ཅལ་ཅོལ་རམ་རོམ་དུ་གྱུར། དེ་ལ་མུ་སྟེགས་སོགས་ཀྱིས་འཕྱས་ཤིང་ཁྱིམ་པ་རྣམས་མ་དད་པ་ལ་བརྟེན་ནས། ཁྱིམ་བདག་མགོན་མེད་ཟས་སྦྱིན་གྱིས་སྟོན་པ་ལ་ཞུས། དེའི་ཚེ་སྟོན་པས། དཀོན་མཆོག་མཆོད་པའི་དོན་དུ་དབྱངས་ཀྱི་ང་རོ་བྱ་བར་རྗེས་སུ་གནང་བ་ལ། དབྱངས་ཀྱི་ང་རོ་ཇི་ལྟར་བྱ་མ་ཤེས་པར་སླར་ཞུས་པས། བྲམ་ཟེ་རིག་བྱེད་འདོན་པ་ལྟ་བུའི་གདངས་ཀྱི་འདོན་པར་གསུངས། སྔགས་ཀྱི་སྐབས་ལོ་ཆེན་རིན་ཆེན་བཟང་པོ་ནམ་དར་བའི་ཡོ་གའི་གདངས་དང༌། མགོན་པོ་ལྕམ་དྲལ་གྱི་གདངས་དབྱངས་ཆེ་ཆུང༌། སྔགས་རྙིང་མའི་རིག་འཛིན་རྣམས་ཀྱི་གསུང་རྒྱུན་བར་མ་ཆད་པ་རྣམས་ནི་སྔ་ཤོས་ཡིན་ལ། ཕྱིས་སུ་གྲུབ་མཐའ་སོ་སོར་གྲགས་པ་རྣམས་ཀྱང་དགོས་པ་དང་(༡༥༠ན)ལྡན་པ་འབའ་ཞིག་ཡིན་ཏེ། དེ་དག་སྤྱིར་བསླབ་པའི་གནས། སློབ་པའི་སློབ་དཔོན། བསླབ་ཡུལ་སློབ་མ། ཇི་ལྟར་སློབ་པའི་ཚུལ། སྐྱོན་དང་ཡོན་ཏན་སོགས་འདིར་མ་སྨོས་ལ། བསླབ་བྱའི་དབྱངས་ཀྱི་ངོ་བོ་ང་རོ་རྣམ་པ་བཞི། ཡན་ལག་བཅུ་གཉིས། སྤེལ་མའི་སྦྱོར་བ་མཐའ་ཡས་པར་འགྱུར་ཞིང༌། དེའང་ང་རོ་བཞི་ལས་གང་གིས་འདྲེན་པ་ལའང་ལྔ། ཨ་ཞེས་དྲང་པོ། ཨེ་བསྒྲེང་བ། ཨི་བཀུག་པ། ཨོ་བསྟོད་པ། ཨུ་ཞེས་སྨད་པའི་ང་རོས་དྲངས་པའོ། ། ཁུག་གིས་བཀུག་པ་ལ་རྐྱང་པ་དང་བརྩེགས་པ། ཉིས་འགྱུར་གྱིས་བསྒྱུར་བ་ལ་མགྲིན་བསྒྱུར། ལྕེ་བསྒྱུར་སྣ་ལྡན་བསྒྱུར་གསུམ། ལྟེངས་ཀྱིས་ལྟེངས་པ་ལ་རིང་བ་དང་ཐུང་བའི་ལྟེངས་གཉིས་ཏེ། དེ་དག་ཀྱང༌། ས་སྐྱ་པཎ་ཆེན་གྱིས། མཆོད་དབྱངས་བསྒྱུར་བ་གཙོ་བོ་སྟེ། ། གླུ་ལ་འདྲེན་པ་གཙོ་བོ་ཡིན། ། རྟོགས་བརྗོད་ལ་ནི་འགྱུར་ཐུང་ངོ༌། ། རྗེས་སུ་བརྗོད་ལ་བསྒྱུར་འདྲེན་ཐུང༌། ། སྤྱིར་ནི་ཀུན་ལ་ཀུན་འཇུག་ཀྱང༌། ། འདི་དག་གཙོ་བོར་འདྲེན་པ་མཐོང༌། ། ཞེས་གསུངས་པ་ལྟར་རོ། ། དེའང་རྟོགས་སླ་བའི་ཕྱིར་དཔེ་དང་སྦྱར་ན། འདྲེན་པ་གཙོ་བོར་བྱེད་པ་ལ་དཔག་བསམ་ལྗོན་ཤིང༌། བཀུག་པ་གཙོ་བོར་བྱེད་པ་ལ་མེ་ཏོག་འཁྲི་ཤིང༌། ལྟེང་གཙོ་བོར་བྱེད་པ་ལ་དབུས་ཞན་པས་ཆུ་ཀླུང་དལ་གྱིས་འགྲོ་བ། འགྱུར་ཁུགས་མང་བ་ལ་རྒྱ་མཚོའི་ཟླ་བ་ཞེས་བཤད་དོ། ། ཐམས་ཅད་ཀྱང་སྤོབས་པའི་གནད། དུས་ཀྱི་གནད། སྦྱངས་པའི་གནད་གསུམ་སྔོན་དུ་འགྲོ་བས། ཡེངས་པ་སོགས་བློའི་སྐྱོན། ཟུར་མ་ཕྱིན་པ་སོགས་ཚིག་གི་སྐྱོན། འཕེལ་འགྲིབ་སོགས་གདངས་ཀྱི་སྐྱོན། ཡ་ཡོ་སོགས་ལུས་ཀྱི་སྐྱོན། མི་འགྲིག་པ་གྲོགས་ཀྱི་སྐྱོན། སྨྲ་དགོད་སོགས་ཉན་པ་པོའི་སྐྱོན་ཏེ། སྐྱོན་དྲུག་དང༌། གཞན་ཡང༌། ཚིག་ལ་རྨོངས་ན་བརྙས་པའི་རྒྱུ། ། དབྱངས་སྦྱོར་མེད་ན་བཞད་གད་རྒྱུ། ། དུས་ཚོད་མེད་ན་(༡༥༠བ)སྐྱོ་བའི་རྒྱུ། ། དགོས་པ་མེད་ན་སྡིག་པའི་རྒྱུ། ། མཁས་པ་འདུ་ཞིང་མང་པོས་བསྐོར། ། གྲོགས་པོ་ངན་ཞིང་འགྲན་ཟླ་མང༌། ། སྦྱངས་པ་ཆུང་ཞིང་སྤོབས་པ་ཞན། ། བློ་གྲོས་ངན་པ་སྡུག་པའི་རྒྱུ། ། ཞེས་པ་ལྟར། སྡིག་པ་འབྱུང་བའི་རྒྱུ་ལྔ་སྤངས། ཇི་སྐད་དུ། ཆེན་པོ་དྲུག་ལ་མ་གྱེར་ན། ། ཡོ་ག་དབྱངས་ཀྱི་