Tibetan
སུ་ཡོད་པ་ཡོངས་གྲུབ་ཚེའི་ནད་བརྒྱ་རྩ་གཅིག ། གསོ་བྱེད་གཉེན་པོ་ལ། སྟོང་དང་། རྩ་གཉིས། མདོར་བསྡུས་པས། སྨན། དཔྱད། ཟས། སྤྱོད་བཞི། སྨན་ལ། ཞི་བྱེད། སྦྱོང་བྱེད་གཉིས། ཞི་བྱེད་ལ། བསིལ། དྲོད། སྦྱོང་བྱེད་ལ། དྲག་དང་། འཇམ་པ་གཉིས། དཔྱད་ལ། འཇམ། རྩུབ་(༡༥༥ན)གཉིས། ཟས་ལ། ཕན། གནོད་གཉིས། སྤྱོད་ལམལ། དྲག །དལ་གཉིས་ཏེ། མདོར་དྲིལ་བའི་གཉེན་པོ་བཅུར་གསུངས་སོ། ། གསོ་ཐབས་ལག་ལེན་སུམ་རྒྱ་དྲུག་ཅུ། མདོར་བསྡུས་བརྟག་ཐབས་གསོ་ཚུལ་བཅོས་ཐབས་གསུམ། དང་པོ་ལ། རག་པ་རྩ། མཐོང་བ་ཆུ་ལ་བརྟག་པ་གཉིས། གཉིས་པ་ལ། གསོ་ཚུལ་རྣམ་པ་དགུ། གསུམ་པ་ལ། ཞི་བྱེད་ཐང་ཕྱེ་རིལ་བུ་ལྡ་གུ་སྨན་མར་ཐལ་སྨན་ཁཎྜ་སྨན་ཆང་སྡེ་ཚན་བརྒྱད། དེའི་ལོག་གནོན་རིན་པོ་ཆེའི་སྦྱོར་བ། ཐུག་ཕྲང་སྔོ་སྦྱོར་གྱི་སྡེ། སྦྱོང་བྱེད་སྔོན་འགྲོ་སྣུམ་འཆོས། བཤལ་སྐྱགས་སྣ་སྨན་འཇམ་རྩི་ནི་རུ་ཧ་སྟེ་དངོས་གཞི་ལས་ལྔ། ལོག་གནོན་རྩ་སྦྱོང་སྟེ་བདུན། དཔྱད་ལ་གཏར་སྲེག་དུག་ལུམ་བྱུགས་པ། ལོག་གནོན་ཐུར་མའི་དཔྱད་བཅས་ཉི་ཤུ་རྩ་གསུམ། ཐལ་སྨན་སོགས་ཕྱི་མ་ལྔ་ཞི་བྱེད་རྩ་བའི་སྡེ་ཚན་ལྔར་འདུས་པས་ལག་ལེན་བཅོ་བརྒྱད་ཀྱི་གྲངས་སུ་དྲིལ་བ་ཡིན་ནོ། ། ད༢ གཉིས་པ་གསོ་བའི་ཚུལ་བཞི་རྒྱས་པར་བཤད་པ་ལ་གཉིས། ན༡ མདོར་བསྟན། ན༢ རྒྱས་བཤད་དོ། ། ན༡ དང་པོ་ནི། གསོ་བྱ་གང་ཕྱིར་ལུས་དང་གང་གསོ་ནད། ། གསོ་བྱེད་སྤྱོད་ལམ་ཟས་སྨན་དཔྱད་རྣམས་ཏེ། ། གསོ་ཐབས་ནད་མེད་གནས་དང་གནས་འགྱུར་གསོ། ། གསོ་མཁན་རྩ་བ་ཡན་ལག་བཅས་པས་བསྡུས། ། གོང་དུ་སྨོས་པའི་བཤད་པའི་རྒྱུད་ཀྱི་སྡོམ་ཉིད་གསོ་རིག་སྤྱིའི་མདོ་ཆིངས་ཆེན་པོ་ཡིན་པས་དེ་ཉིད་ཅུང་ཟད་བཀྲོལ་ན། གསོ་བྱའི་ཡུལ་ལ་གང་གི་ཕྱིར་གསོ་བ་ལུས། གང་ཞིག་གསོ་བ་དེ་ལས་འབྱུང་བའི་ནད་གཉིས། གསོ་བྱེད་ཀྱི་གཉེན་པོ་སྤྱོད་ལམ་ཟས་སྨན་དཔྱད་དང་བཞི། ནད་དེ་གཉེན་པོས་ཇི་ལྟར་གསོ་བའི་ཚུལ་ལམ་ཐབས་ལ་ནད་མེད་རིང་དུ་གནས་པ་དང༌། རྣམ་གྱུར་གསོ་བའི་ཐབས་གཉིས། གསོ་བྱེད་ཀྱི་མཁན་པོ་སྨན་པ་རྩ་བ་བཞི་ལ་ཡན་ལག་བཅུ་གཅིག་ལྡན་པ་དང་བཅས་པས་གསོ་རིག་གི་ལུས་ཡོངས་སུ་རྫོགས་པ་བསྡུས་སོ། ། ན༢ གཉིས་པ་ལ་(༡༥༥བ)བཞི། པ༡ གསོ་བྱ། པ༢ གསོ་བྱེད། པ༣ གསོ་ཐབས། པ༤ གསོ་མཁན་ནོ། ། པ༡ དང་པོ་ལ་གཉིས། ཕ༡ ལུས་དང༌། ཕ༢ ནད་དོ། ། ཕ༡ དང་པོ་ནི། ལུས་ལ་རྒྱུ་རྐྱེན་རྟགས་ཀྱིས་ཆགས་ཚུལ་རྟོགས། ། འདྲ་དཔེ་ཉམས་སྦྱར་ལུས་ཟུང་རྩ་དང་གནད། ། བུ་གའི་གནས་ཕུགས་གནོད་བྱ་གནོད་བྱེད་ཀྱི། ། མཚན་ཉིད་ལས་དབྱེ་འཇིགས་ལྟས་གཏན་ལ་དབབ། ། གང་གི་དོན་དུ་གསོ་བ་ལུས་ལ་ཆགས་པའི་རྒྱུད་དཀར་དམར་རྣམ་ཤེས་གསུམ། འཕེལ་བའི་རྐྱེན་ལྟེ་འཁོར་དང་བུ་སྣོད་ཀྱི་རྩ་ལས་བྱུང་བའི་བཅུད་བཙའ་བའི་རྟགས་དང་བཅས་པས་ཆགས་པའི་ཚུལ་རྟོགས། རྟེན་ཁང་བཟང་བརྟེན་པ་རྒྱལ་བློན་བཙུན་འབངས་དང་བཅས་པའི་འདྲ་དཔེ་སྦྱར་བས་ལུས་གནས་ཀྱི་ཉམས་ཤེས། ནད་དང་དྭངས་སྙིགས་ཤ་རུས་ལ་སོགས་པའི་ལྡང་ཚད་ལུས་ཟུངས་ཀྱི་གནས་ལུགས། ཆགས་སྲེད་འབྲེལ་པ་ཚེ་སྟེ་འབྲེལ་པ་རྩའི་གནས་ལུགས། ཤ་ཚིལ་རུས་པ་ཆུ་རྒྱུས་དོན་སྣོད་རྩའི་གནད་བདུན་ཏེ་གཉན་པ་གནད་ཀྱི་གནས་ལུགས། ཕྱི་ནང་དྭངས་སྙིགས་ཟས་ཀྱི་རྒྱུ་ལམ་བུ་གའི་གནས་ལུགས་བཞིས་ལུས་ཀྱི་གནས་ལུགས་རྟོགས་གནོད་བྱ་ཁམས་ལ་ལུས་ཟུང་བདུན་དང་དྲི་མ་གསུམ། གནོད་བྱེད་ཉེས་པ་རླུང་མཁྲིས་བད་ཀན་ནང་གསེས་དབྱེ་བ་བཅོ་ལྔ་དང་བཅས་པ། གྲུབ་ཚུལ་རང་བཞིན་མེ་དྲོད་ལྟོ་བ་གནས་པ་བྱེད་ལས་མཚན་ཉིད་ཀྱི་སྒོ་ནས་ལུས་ཀྱི་མཚན་ཉིད་རྟོགས། སྤྱིར་སྒོ་གསུམ་དགེ་མི་དགེ་ལུང་མ་བསྟན་ལ་སྤྱོད་ཅིང་བྱེ་བྲག་དབང་པོ་ལྔ་ཡིས་རང་གིས་ཡུལ་ལ་སྤྱོད་པ་ལུས་ཀྱི་ལས་དང༌། རྟེན་ཕོ་མོ་མ་ནིང༌། ན་ཚོད་རྒན་བྱིས་དར་མ། རང་བཞིན་ཉེས་གསུམ་སོ་སོའི་མི། ནད་རྣམ་པར་མ་གྱུར་པ་དང་གྱུར་པའི་དབྱེ་བས་དེ་དག་རྫོགས། རིང་བ་ཉེ་བ་མ་ངེས་ངེས་པ་ཅན་བཞིས་ལུས་འཇིག་པའི་ལྟས་གཏན་ལ་དབབ་པ་སྟེ་ནང་གསེས་དུ་མ་དང་བཅས་པའི་རྣམ་གྲངས་བདུན་གྱིས་གང་གསོ་བ་ལུས་ཀྱི་གནས་ལུགས་ལ་མཁས་པར་བྱའོ། ། ཕ༢ གཉིས་པ་[ནད་]ནི། ནད་ལ་དུག་(༡༥༦ན)གསུམ་ཉེས་གསུམ་ཉེ་རིང་རྒྱུ། ། སྐྱེ་མཆེད་གསོག་ལྡངས་སློང་རྐྱེན་སྐྱེད་བྱེད་དེ། ། ལམ་དྲུག་ཞུགས་པའི་མཚན་ཉིད་འཕེལ་ཟད་འཁྲུགས། ། རྒྱུ་དང་རྟེན་དང་རྣམ་པའི་སྒོ་ནས་དབྱེ། ། གང་གསོ་བ་ནད་ལ། རིང་རྒྱུ་མ་རིག་པ་ལས་བྱུང་བའི་དུག་གསུམ་དང་། ཉེ་བའི་རྒྱུ་དེས་བསྐྱེད་པའི་ཉེས་པ་གསུམ་ནི་ནད་ཀྱི་རྒྱུ། དུས་དབང་པོ་སྤྱོད་ལམ་དམན་ལྷག་ལོག་པ་སྐྱེ་མཆེད་ཀྱི་རྐྱེན། རྒྱུ་ངོ་བོ་དུས་ཀྱི་སྒོ་ནས་གསོག་ལྡང་བཞི་གསུམ་བྱེད་པ་གསོག་ལྡང་གི་རྐྱེན། ཐུན་མོང་ཁྱད་པར་སློང་བའི་རྐྱེན་ཏེ་ནད་སྐྱེད་བྱེད་ཀྱི་རྐྱེན་གསུམ། ཉེས་གསུམ་རང་གནས་འཕང་བྱའི་ཡུལ་ལ་འཕེན་བྱེད་ཀྱི་རྐྱེན་བཞིས་འཕངས་པ་འཇུག་སྒོའི་ལམ་དྲུག་ཏུ་ཞུགས་ནས་རང་གནས་སུ་རྟེན་པ་ནད་འཇུག་ཚུལ། ཞུགས་ནས་ནང་ལུས་ཟུང་དྲི་མ་གསུམ་པོ་ལྡང་ཚད་ལས་འཕེལ་བ་དང་ཟད་པ་དང་ཕན་ཚུན་འཁྲུགས་པ་གསུམ་པོ་ནད་ཀྱི་མཚན་ཉིད། སྔོན་གྱི་ལས། ཚེ་འདིའི་ཉེས་པ། དེ་གཉིས་འདྲེས་པ་ལས་བྱུང་བ་སྟེ་རྒྱུའི་དབྱེ་བ་གསུམ། སྐྱེས་པ་བུད་མེད་བྱིས་པ་རྒས་པ་ཀུན་ཁྱབ་ཐུན་མོང་སྟེ་རྟེན་གྱི་དབྱེ་བ་ལྔ། ཕྱི་མ་ལ་ཉེས་པ་གཙོ་བོ་རིགས་དང་གནས་ཀྱི་དབྱེ་བ་གསུམ། ནང་གསེས་དང་བཅས་པ་གནོད་བྱ་ཉི་ཤུ་རྩ་ལྔ་ལ་རྐྱང་པ་ལྡན་འདུས་འདྲེས་པའི་རིགས་ཀྱི་རྣམ་པའི་སྒོ་ནས་དབྱེ་བ་གྲངས་མེད་པ་རྣམས་ནི་ནད་ཀྱི་དབྱེ་བ་སྟེ་རྣམ་གྲངས་ལྔ་ཡི་སྒོ་ནས་གསོ་བྱ་ནད་ཀྱི་མཚན་ཉིད་ལེགས་པར་རྟོགས་པར་བྱའོ། ། པ༢ གཉིས་པ་གསོ་བྱེད་ཀྱི་ཚུལ་བཤད་པ་ནི། སྤྱོད་ལམ་རྒྱུན་སྤྱོད་དུས་སྤྱོད་གནས་སྐབས་ཏེ། ། ཟས་ཚུལ་བསྡམ་དང་ཟས་ཚོད་རན་པར་བཟའ། ། སྨན་ལ་རོ་ནུས་ཞུ་རྗེས་སྦྱོར་བའི་ཐབས། ། འཇམ་རྩུབ་དྲག་དཔྱད་དེ་ཡི་ཆ་བྱད་བཅས། ། ནད་གསོ་བྱེད་གཉེན་པོ་རྣམས་ཀྱི་ཐོག་མར་གལ་ཆེ་བ་བྱ་བ་སྤྱོད་ལམ་གྱི་གནས་ལ། ཚེ་རྐྱང་འཇིག་རྟེན་པ་དང་དམ་པ་རྣམས་ཀྱི་རྒྱུན་དུ་སྐྱེད་པ། དུས་དྲུག་ཏུ་གསོག་ལྡང་གི་གཉེན་པོ་བསྟེན་པའི་དུས་སྤྱོད།(༡༥༦བ) ནད་མི་སྐྱེ་བ་དང་སྐྱེས་པ་ཞི་བའི་གནས་སྐབས་ཀྱི་སྤྱོད་ལམ་སྟེ་གསུམ། འཚོ་བ་ཟས་ལ། བཟའ་བྱའི་ཟས་དང་བཏུང་བྱའི་སྐོམ་གྱི་ཚུལ་ལམ་རྣམ་གྲངས་ཤེས་པར་བྱ་བ། ལུས་ལ་མི་འཕྲོད་པ་བསྡམ་པར་བྱ་བ། ཟས་ཀྱི་ཚོད་རན་པར་བཟའ་བ་གསུམ། སྦྱོར་བ་སྨན་ལ་རོ་དྲུག་ནུས་པ་བརྒྱད་ལས་སྐྱེས་པའི་ཡོན་ཏན་བཅུ་བདུན་ཞུ་རྗེས་གསུམ་རྣམས་ནད་ཀྱི་འབྱུང་བའི་གཉེན་པོར་སྤྲད་པའི་རོ་བསྡེབས་སྦྱོར་བ་ལྔ་བཅུ་རྩ་བདུན་དང་རྐྱང་པ་དྲུག་བཅས་དྲུག་ཅུ་རྩ་གསུམ་ནི་སོ་སོར་འཕེལ་ཟད་བདུན་ཅུ་རྩ་བཞིའི་གཉེན་པོར་སྦྱར་ཞིང༌། ནུས་པར་སྦྱོར་བ་ཞི་སྦྱོང་གཉིས་ནད་རིགས་སྤྱིའི་གཉེན་པོར་སྦྱོར་བའི་ཐབས་ལ་མཁས་པར་བྱ་བ་དང༌། ཆ་བྱད་དཔྱད་ལ། འཇམ་པོའི་དཔྱད་དུག་ལུམ་བྱུགས་པ། རྩུབ་པའི་དཔྱད་གཏར་སྲེག་དབུག་པ། དྲག་པོའི་དཔྱད་འདྲལ་གཅོད་འདྲུད་དང་འབྱིན་པ་བཞི། དེ་དག་གི་ཆ་བྱད་ཟུག་རྔུ་བརྟག་པའི་དཔྱད་ཁབ་མགོ་སོགས་བཅུ་བཞི། ཟུག་རྔུ་འབྱིན་པ་སེང་གེ་ཁ་སོགས་སྐམ་པའང་རིགས་དྲུག །ཤ་འདྲལ་ཁྲག་དབྱུང་བྱེའུའི་སྒྲོ་འདྲ་སོགས་བཙག་བུའི་སྡེ་དྲུག །བཙག་དབུགས་འདྲེན་དཔྱད་སྦུགས་ཐུར་སྨྱུ་གུ་ལ་སོགས་ཐུར་མ་དགུ། གཅེའུ་རྔབས་ར་བུམ་པ་ལ་སོགས་པ་ཆ་བྱད་ཕྲན་བུ་དང་བཅས་པ་སྟེ། དེ་དག་གིས་རྣམ་པར་གྱུར་བའི་ནད་ཀྱི་རིགས་སྙིང་རྗེས་གསོ་བ་ལ་བརྩོན་པར་བྱའོ། ། པ༣ གསུམ་པ་[གསོ་ཐབས་བཤད་པ་]ལ་གཉིས། ཕ༡ ནད་མེད་གནས་ཤིང་འཚོ་བ་དང༌། ཕ༢ ན་བ་བསོ་བར་བྱ་བའོ། ། ཕ༡ དང་པོ་ནི། ནད་མེད་བདེར་གནས་རྒས་པའི་ནད་ལས་བསྲིང༌། ། རྣམ་པར་མ་གྱུར་པ་ནད་མེད་ཀྱི་ཐ་མལ་གྱི་ལུས་པོ་མི་ན་བར་གནས་པ་དང་རིང་དུ་འཚོ་ཞིང་བདེ་བར་གནས་པའི་ཐབས་མཆོག་ནད་ཀྱི་རྒྱུ་རྐྱེན་སྤང་བ་ལ་བསླབ། ལོ་ཟླ་མང་དུ་འདས་པས་ལུས་ཟུངས་ཀྱི་སྟོབས་འགྲིབས་ཏེ། རྟེན་སྙིང་ནས་རྒས་པས་ཚེ་ཟད་པར་ཉེ་བ་ལ་བཅུད་ལེན་གྱི་སྦྱོར་བས་སྟོབས་སྐྱེད་ཅིང་ཚེ་བསྲིང་བར་བྱའོ། ། ཕ༢ གཉིས་པ་[ན་བ་བསོ་བར་བྱ་བ་]ནི། ན་བ་རྒྱུ་དང་(༡༥༧ན)མཚན་ཉིད་ཕན་གནོད་བསྟེན། ། ངན་གཡོ་སྐྱོན་དང་སྤང་བླང་མུ་བཞིས་བརྟག ། སྤྱི་དང་བྱེ་བྲག་ཁྱད་པར་ཚུལ་གྱིས་གསོ། ། ཐུན་མོང་ཁྱད་པར་གསོ་བའི་ཐབས་ལྡན་བྱ། ། ན་བ་གསོ་བའི་ཐོག་མར་ངོས་བཟུང་རྟགས་ལ་མཁས་པར་བྱ་དགོས་པས། དེའང་སློང་བྱེད་རྒྱུ། མཚན་ཉིད་རྟགས། ཕན་གནོད་གོམས་པ་བསྟན་པ་གསུམ་གྱིས་ཉེས་པ་དངོས་སུ་བརྟག །ངན་གཡོ་སྐྱོན་ཏེ་ཐབས་ཀྱི་སྒོ་ནས་མི་ཤེས་པའི་གྲགས་པ་མི་ཕོག་པར་བརྟག །ན་བ་ཐམས་ཅད་འཚོ་བ་མ་ཡིན་ཅིང་ཐམས་ཅད་འཆི་བའང་མ་ཡིན་པས་གསོ་སླ་བ་དང་གསོ་དཀའ་བ་དང་གསོ་རུང་བ་ཙམ་དང་སྤང་བར་བྱ་བ་སྟེ་སྤང་བླང་མུ་བཞིའི་སྒོ་ནས་བརྟག ། རྟོགས་ནས་ཇི་ལྟར་གསོ་བར་བྱེད་པ་ལ། གསོ་ཚུལ། གསོ་ཐབས་གཉིས། དང་པོ་ལ་གསུམ། ཉེས་གསུམ་གསོག་དུས་ཞི་བྱེད་དང་ལྡང་དུས་སྦྱོང་བྱེད་ཀྱིས་བཅོས་ཤིང་ཞི་བའི་སྐབས་སུ་མི་འཁྲུགས་པར་བྱ་བ་སྤྱིའི་གསོ་ཚུལ། མ་ཞུར་བཅས་པ་དང་རྐྱང་པ་དང་གཞན་དབང་ཅན་གསུམ་གང་མཚམས་སུ་བཅོས་པ་བྱེ་བྲག་གི་གསོ་ཚུལ། མ་རྟོགས་དོགས་པ་དང་བཅས་པ་ལ་སད་མདའ་བཏང་བ། ངོས་ཟིན་ངེས་པ་རྙེད་ནས་སྨན་དཔྱད་དངོས་སུ་སྦྱོར་བ། གཉེན་པོའི་ཐོག་ཏུ་མི་འབབས་པ་ལ་ནད་ལམ་དུ་གཟུད་པ། སྔར་བཅོས་དམན་ལྷག་ལོག་པ་ལ་གཉེན་པོ་བསྒྱུར་བ། ཤིན་ཏུ་སྟོབས་ཆེན་གྱི་ནད་ལ་གཉེན་པོ་རྩ་ལ་སྤུགས་པ། ནད་སྟོབས་ཆུང་ངུའི་རིགས་ལ་གཉེན་པོ་ཆ་ཡིས་བསྐྱེད་པ། ཉེས་གསུམ་རྐྱང་པའི་ནད་ལ་གཉེན་པོ་གཞན་གནོད་མེད་པ། ལྡན་པ་དང་འདུས་པའི་ནད་ལ་འདུ་བ་ཆ་སྙོམས་སུ་བཅོས་པ། ཐམས་ཅད་ལའང་བཅོས་བྱ་འཆོས་བྱེད་འཚམས་ཤིང་མ་ནོར་བ་སྟེ་ཁྱད་པར་གྱི་གསོ་ཚུལ་དགུ་ཡིས་ནད་རྣམས་གསོ་བར་བྱ་ཞིང༌། ཐུན་མོང་གསོ་ཡུལ་ཅུང་ཟད་སོགས་བརྟག་པར་བྱ་བ་དང༌། ཚོ་ཆེས་སོགས་ཉམས་དམད་པའི་ཐབས་གཉིས། ཁྱད་པར་ཚ་བ་བསིལ། (༡༥༧བ)གྲང་བ་དྲོད། རླུང་སྣུམ་དྲོ་སོགས་ཉེས་གསུམ་སོ་སོར་གསོ་བའི་ཐབས་དང་ལྡན་པར་བྱའོ། ། པ༤ བཞི་པ་[གསོ་མཁན་]ནི། སྨན་པ་རྒྱུ་དྲུག་མཆོག་གྱུར་ལས་ལ་མཁས། ། རང་གཞན་འཕྲལ་ཡུན་བདེ་ལེགས་འབྲས་བུར་སྤྱོད། ། གསོ་བའི་བྱ་བ་བྱེད་པའི་སྨན་པའི་མཚན་ཉིད་ཀྱང་རྒྱུ་དྲུག་དང་ལྡན་པ་སྟེ། བློ་གྲོས་ཆེ་བ་བློ་བརྟན་པ་བློ་གཟེག་པ་སྟེ་བློ་དང་ལྡན་པ། བྱམས་པ་དང་སྙིང་རྗེར་ལྡན་པ་བསམ་པ་དཀར་བ། བློ་བཞག་དྲུག་གཟུང་བྱ་གཉིས་ཤེས་པ་གསུམ་སྟེ་དམ་ཚིག་དང་ལྡན་པ། ལག་པ་བཟོ་ངག་ཚིག་སྙན་རིག་པ་བཀྲ་བ་སྟེ་རྣམ་པ་བཟོ་བ། བདག་དོན་བསླབ་སྦྱོང་དང་གཞན་དོན་གསོ་དཔྱད་ལ་ལེ་ལོ་མེད་པས་བྱ་བ་ལ་བརྩོན་པ། དམ་པའི་མཚན་ཉིད་ལྡན་ཅིང་ཐུན་མོང་གི་ཀུན་སྤྱོད་ལེགས་པ་སོགས་མི་ཆོས་ལ་མཁས་པ་རྣམས་སོ། ། དེའང་རིགས་བརྒྱུད་མེད་ཅིང་མཐོང་གོམས་ཆུང་བ་སོགས་ཐ་མའི་སྐྱོན་བཅུ་གཉིས་སྤངས་ཤིང་མཆོག་གི་ཡོན་ཏན་རྣམས་དང་ལྡན་པ། ཐུན་མོང་སྒོ་གསུམ་གསོ་དཔྱད་ཀྱི་ལས་དང་ཁྱད་པར་ལྟ་སྒོམ་སྤྱོད་པའི་བྱ་བ་ལ་མཁས་པ་སྟེ། དེ་ལྟ་བུའི་ཚུལ་རྣམས་ཇི་སྐད་བཤད་པ་ལྟར་ཚད་དང་ལྡན་པར་འབྲེལ་བས་རང་གཞན་གཉིས་ཀ་འཕྲལ་དང་ཡུན་དུ་བདེ་ལེགས་ཀྱི་འབྲས་བུ་ལ་སྤྱོད་པར་འགྱུར་རོ། ། ཉ༢ གཉིས་པ་རིག་གནས་ཆུང་བ་བཤད་པ་ལ་གཉིས། ཏ༡ མཚམས་སྦྱར་བ་དང༌། ཏ༢ དངོས་སོ། ། ཏ༡ དང་པོ་ནི། རིག་གནས་ཆུང་བ་ལྔ་རུ་གྲགས་པ་ལས། ། རིག་གནས་ཆུང་བ་ལྔར་གྲགས་པ་འདི་ལ་བཞེད་ཚུལ་འགའ་ཞིག་སྣང་ཡང༌། མངོན་པར་འབྱུང་བའི་རྒྱུད་ལས། བྱང་ཆུབ་སེམས་དཔའ་སེམས་ཅན་འདུན་པར་བྱ་བའི་ཕྱིར་གཞན་དག་ལ་སྙན་པར་དངགས་པའི་བསྟན་བཅོས་དང༌། མིང་གཅིག་དོན་དུ་མར་འཇུག་པ་དང༌། དོན་གཅིག་ཉིད་ཀྱང་མིང་གི་རྣམ་གྲངས་དུ་མས་མངོན་པར་བརྗོད་པའི་བསྟན་བཅོས་དང༌། ལྕི་བ་དང་ཡང་བའི་ཡི་གེ་བསྒྱུར་བ་དང་སྤེལ་བའི་སྒོ་ནས་ཚིགས་སུ་བཅད་པ་སྡེབ་པའི་བསྟན་(༡༥༨ན)བཅོས་དང༌། མདོ་འཛིན་པ་དང༌། བཞད་གད་དང༌། སྐད་དུ་མ་གཞན་དུ་བསྒྱུར་བས་འགྲོ་བ་དགའ་བར་བྱེད་པ་ཟློས་གར་གྱི་བསྟན་བཅོས་དང༌། གྲངས་ཀྱི་རིག་པས་གཞལ་ཏེ་ངོ་མཚར་བར་སྟོན་པ་རྩིས་ཀྱི་བསྟན་བཅོས་རྣམས་ཀྱང་བསླབ་པར་བྱ་སྟེ། བྱང་ཆུབ་སེམས་དཔའ་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འདོད་པའི་ཕྱིར་རོ། །ཞེས་གསུངས་པ་ལྟར། ཕྱིས་ནས་ཆབ་གཅིག་བཞེད་པར་སྣང་བ་ལས། ཞེས་མཚམས་སྦྱར་བའོ། ། ཏ༢ གཉིས་པ་[དངོས་བཤད་པ་]ལ་ལྔ། ཐ༡ སྐར་རྩིས། ཐ༢ སྙན་དངགས། ཐ༣ སྡེབ་སྦྱོར། ཐ༤ མངོན་བརྗོད། ཐ༥ ཟློས་གར་རོ། ། ཐ༡ དང་པོ་ལ་བཞི། ད༡ སྤྱིའི་དོན། ད༢ ནང་གི་ངེས་པ། ད༣ ཕྱི་རོལ་གྱི་བརྩི་བའི་གཞི། ད༤ ཇི་ལྟར་བརྩི་བའི་ཚུལ་བཤད་པའོ། ། ད༡ དང་པོ་ནི། ཀུན་རྫོབ་བླང་དོར་སྟོན་པའི་སྐར་རྩིས་ནི། ། དེ་ཉིད་སྟོང་པ་རགས་སྣང་བརྩི་བའི་གཞི། ། རྟེན་འབྲེལ་གྲངས་ཀྱི་རིག་པ་བརྩི་བའི་ཚུལ། ། དེའང་ཀུན་རྫོབ་ཀྱི་གྲངས་དང་གནས་ཚུལ་ལ་མི་རྨོངས་པས་བླང་དོར་མ་འཆུག་པར་སྟོན་པར་བྱེད་པ་ནི་དགོས་པའོ། ། དགོས་པ་དེ་ལྡན་གྱི་སྐར་རྩིས་ཞེས་གྲགས་པ་ལ་ཕྱི་ནང་གི་ལུགས་གཉིས་ལས་འདིར་རྒྱུད་ཀྱི་རྒྱལ་པོ་ལས་གསུངས་པའི་རྗེས་སུ་འབྲངས་པ་ནི་ཆེས་དགོས་པ་དང་བཅས་པ་ཡིན་པས། དེ་ལྟར་ན་ཐོག་མར་ནང་གི་ངེས་པ་ཤེས་པ་གལ་ཆེ་བས། དེ་ཁོ་ན་ཉིད་སྟོང་པ་སྤྲོས་བྲལ་གྱི་གནས་ལུགས་དེ། འཁྲུལ་ཚུལ་མ་རིག་པས་བསླད་པའི་དབང་གིས་ཡུལ་ཡུལ་ཅན་ནམ་ཕྱི་ནང་སོགས་གཉིས་ཆོས་དང༌། རྩ་རླུང་ཐིག་ལེའམ་ཉི་ཟླ་སྒྲ་གཅན་གྱིས་མཚོན་གསུམ་ཆོས་སོགས་རགས་སྣང་མཐའ་ཡས་པར་སྒྲོ་བཏགས་པའི་སྣང་ཆ་ཙམ་ནི་སོ་སྐྱེ་རྣམས་ཀྱིས་བརྩི་བྱའི་གཞི་དང༌། རྟེན་ཅིང་འབྲེལ་བར་འབྱུང་བའི་གྲངས་ཀྱི་རིགས་པ་ནི་རྩི་བའི་ཚུལ་ལམ་རྩི་བྱེད་ཡིན་ནོ། ། ད༢ གཉིས་པ་[ནང་གི་ངེས་པ་བཤད་པ་]ནི། དབུ་མའི་དབུགས་ལས་གཟའ་ཡི་རྐང་པ་འབྱུང༌། ། དུས་བཞིའི་མཐའ་རུ་དེ་དག་སྟོང་པར་འཇུག ། སླར་ཡང་རྟོགས་(༡༥༨བ)པས་དུས་ཀྱི་ངེས་པ་འཆར། ། དབུ་མའི་དབུགས་ནི། ཡེ་ཤེས་ཀྱི་རླུང་སྟེ། དབུ་མ་ལ་བརྟེན་ནས་རྩ་གཞན་མངོན་པར་སྐྱེ་བ་ལྟར། ཡེ་རླུང་ལ་བརྟེན་ནས་ལས་ཀྱི་རླུང་འབྱུང་བ་ལྔའི་བདག་ཉིད་སྐྱེ་བའམ་རྒྱུ་བར་བྱེད། གཡོན་རྐྱང་མ་ལ་བརྟེན་ཏེ་སྙིང་སྟོབས་ཀྱི་རང་བཞིན་གཟུང་བ་ཡུལ་གྱི་ཆ་བསྐྱེད་པ་ནམ་མཁའ་རླུང་མེ་ཆུ་སའི་རིམ་པས་ཞི་གཟའ་ལྔ་རྒྱུ་ལ། གཡས་རོ་མ་ལ་བརྟེན་ཏེ་འཛིན་པ་བདག་རྟོག་གི་ཆ་གཙོ་བོར་བསྐྱེད་པ་རྡུལ་གྱི་རང་བཞིན་ས་ཆུ་མེ་རླུང་ནམ་མཁའི་རིམ་པས་དྲག་གཟའ་ལྔ་རྒྱུ་བའི་ཕྱིར་ཕྱི་རོལ་འཇིག་རྟེན་གྱི་ཁམས་ལ་ཡང་མེ་རླུང་གི་གྲངས་བཞིན་དུ་གཟའ་རྣམས་ཀྱི་དལ་རྐང་མྱུར་རྐང་སོགས་འབྱུང་ངོ༌། ། དུས་བཞིའི་མཐའ་རུ་གཟའ་དེ་དག་སྟོང་པར་འཇུག་པའི་ལོ་གྲངས་སོགས་གོང་དུ་སྨོས་པ་ལྟར་ལ། ནང་ལུས་དང་སྦྱར་ན། སྐྱེས་བུ་ལང་ཚོ་རྒྱས་ཤིང་ནད་ལ་སོགས་པས་མ་གཟིར་བ་ཞིག་མཚན་གཞིར་བྱས་ཏེ་རྩ་རྐྱང་མ་ལ་བརྟེན་ཏེ་སྣ་གཡོན་ནས་དང་པོར་ནམ་མཁའ་རླུང་མེ་ཆུ་ས་སྟེ་འབྱུང་བ་བསྐྱེད་པའི་རིམ་པས་དཀྱིལ་འཁོར་རེ་ལ་སུམ་བརྒྱ་དྲུག་ཅུ་སྟེ་དཀྱིལ་འཁོར་ལྔ་རྒྱུ་ལ། དེ་ནས་རོ་མ་ལ་བརྟེན་ཏེ་གཡས་སུ་ས་ཆུ་མེ་རླུང་ནམ་མཁའ་སྟེ་འབྱུང་བ་སྡུད་པའི་རིམ་པས་ལུགས་བཟློག་ཏུ་དཀྱིལ་འཁོར་ལྔ་རྒྱུ་སྟེ། དཀྱིལ་འཁོར་རམ་འཕོ་ཆུང་རེ་ལ་སུམ་བརྒྱ་དྲུག་ཅུ་དང༌། དཀྱིལ་འཁོར་ལྔ་རྫོགས་པ་ནི་འཕོ་ཆེན་ཡིན་པས་དེ་ལ་དབུགས་སྟོང་དང་བརྒྱད་བརྒྱ་འབྱུང༌། དེ་ལྟར་སྐྱེད་སྡུད་ཀྱི་བྱ་བ་གཉིས་རྫོགས་པས་འཕོ་ཆེན་གཉིས་ཀྱི་མཚམས་སུ་ནང་དུ་དབུ་མ་ལ་འཇུག་སྟེ། འཇིག་རྟེན་ཆགས་ཤིང་ཞིག་པའི་བྱ་བ་རྫོགས་ནས་སྟོང་པར་གནས་པའམ། གཟའ་རྣམས་ཀྱི་དཀྱིལ་འཁོར་རྫོགས་པ་ན་སྟོང་པ་ལ་འཇུག་པ་དང༌། ལུས་ཅན་རྣམས་སྐྱེ་འཆིའི་གནས་སྐབས་ཀྱི་འོག་ཏུ་རང་བཞིན་འོད་གསལ་དུ་འཇུག་པ་ལ་སོགས་པའི་དོན་ནོ། ། ཚུལ་དེས་གཡས་ནས་ལུག་སོགས་མི་མཉམ་པའི་ཁྱིམ་གྱི་འཕོ་ཆེན་དྲུག་དང༌། གཡོན་ནས་གླང་སོགས་མཉམ་(༡༥༩ན)པའི་ཁྱིམ་གྱི་འཕོ་ཆེན་དྲུག་སྟེ། དུས་སྦྱོར་གྱི་འཕོ་བ་བཅུ་གཉིས་ལ་དབུགས་ཉི་ཁྲི་ཆིག་སྟོང་དྲུག་བརྒྱར་ལོངས་ཏེ་རང་དབུགས་ཀྱི་ཞག་གཅིག་ཏུ་འཇོག་གོ། ། དེས་ན་ནང་དུ་འཕོ་ཆེན་གཉིས་ལ་འབྱུང་བ་བསྐྱེད་སྡུད་རྫོགས་ནས་དབུ་མར་སྟོང་པ་ལ་གཞོལ་བ་བསྟན་པའི་དོན་དང་མུ་སྟེགས་གཞུག་པའི་ཆེད་དུ་མི་ལོ་སྟོང་དང༌། ཉིས་བརྒྱ་ལ་དབུགས་རེར་བྱེད་པའི་གཙོ་བོ་ནུས་པའི་མིང་ཅན་ཞིག་ཡོད་པ་ལྟར་བཞག་ནས་དེའི་དབུགས་གྲངས་ཀྱི་འཕོ་ཆེན་གཉིས་རྫོགས་པ་ན་ཕྱིར་དུས་ཆེན་པོ་གཅིག་རྫོགས་ཤིང༌། དེའི་འཕོ་མཚམས་སུ་དབུ་མར་འཇུག་པ་དང་ཕྱིར་གཟའ་རྣམས་སྟོང་པ་ལ་འཇུག་པར་སྦྱར་ནས་གསུངས་པའོ། ། སྟོང་འཇུག་ལ་མཚུར་ལུགས་པ་རྣམས་ནི་རྒྱུད་ལས་གསུངས་པའི་རང་རྩིས་ཉིད་སྒྲ་ཅི་བཞིན་པར་བཟུང་ལ། ཕུག་ལུགས་པ་རྣམས་དེ་མུ་སྟེགས་ཀྱི་མི་རྟོག་པའི་ཕྱིར་སྦས་རྩིས་ཡིན་པས་སྒྲ་ཇི་བཞིན་མིན་པར་བཟུང་ནས་གྲུབ་མཐའི་ཞིབ་རྩིས་གསར་དུ་འཆོས་པར་མཛད་དོ། ། སླར་ཡང་སེམས་ཅན་རྣམས་ཀྱི་ཀུན་ཏུ་རྟོག་པའི་དབང་གིས་རླུང་གིས་འཕོ་བ་སྐྱེ་བ་དེ་བཞིན་ཕྱི་རོལ་དུའང་དུས་ཀྱི་ངེས་པ་རིམ་བཞིན་འཆར་བས། དུས་བཞི་སོ་སོའི་ཟད་པ་མེ་སྟག་གི་དབོ་ཟླ་བའི་གནམ་སྟོང་ཉ་ཁྱིམ་གྱི་མཐར་གཟའ་རྣམས་ཀྱི་ལོངས་