Tibetan
ལ་སོགས་པའི་དབྱེ་བ་མང་ངོ༌། ། དྲུག་པ་སོགས་ལའང་ནང་གསེས་ཤིན་ཏུ་མང་སྟེ། ཡི་གེ་བཅུ་པ་ལ་མཚོན་ན། ལྕི་ཡང་སྦྱོར་ཚུལ་གྱི་དབྱེ་བས་རྣམ་གྲངས་ཆིག་སྟོང་ཉེར་བཞི་འགྱུར་ཞིང༌། དེ་རྣམས་ཀྱང་མིང་གི་ངེས་པ་གསལ་བ་དབུས་ཕྲ། གཞོན་ནུ་རོལ་པ། འདྲ་མཚུངས། གློག་ཕྲེང༌། དག་པའི་སྣང་བ་ལ་སོགས་པ་དང༌། གཞུང་དུ་མིང་དངོས་སུ་མ་གསུངས་པ་ཤིན་ཏུ་མང་བ་དེ་དག་ནི་བྲྀཏྟ་སྟེ། དེ་ལའང་ནང་གསེས་སུ་རྐང་པ་བཞི་ཀ་ཡི་གེའི་གྲངས་དང་ལྕི་ཡང་མཚན་ཉིད་མཚུངས་པ་མཉམ་པའི་བྲྀཏྟ་སྟེ། དབུས་ཕྲ་ལ་སོགས་པའོ། ། དེ་ལས་ལྡོག་པ་ནི། མི་མཉམ་པའི་བྲྀཏྟ་སྟེ། དེ་ལའང་། ཁ་སྒོ་དང༌། རྐང་བཞི་འཕེལ་དང༌། སྟེང་འགྲོ་དང༌། དལ་གྱི་འགྲོ་བ་བཞིའོ། ། རྐང་པ་ཟུང་གཉིས་མི་མཉམ་ལ་ཟུང་མཉམ་པའི་མཚན་ཉིད་ལྟ་བུའི་འདྲེས་པ་ནི། ཕྱེད་མཉམ་པའི་བྲྀཏྟ་སྟེ། ཉེར་བཀྲ་ལ་སོགས་པ་རྣམས་ཀྱིས་བཅིངས་པས་མཛེས་པར་བྱས་པའོ། ། ད༢ གཉིས་པ་[ཛཱ་ཏི་]ནི། ཕྱི་མ་བགྲང་བ་ཛཱ་ཏི་འཕགས་མ་དང༌། ། རོ་ལངས་དམར་སེར་རྣམས་ལ་གཞན་བཤད་འདུ། ། ཡི་གེའི་ངོ་གྲངས་བགྲང་དུ་མེད་པ་ཕྱི་མོ་བགྲང་བའི་སྡེབ་སྦྱོར་ནི་ཛ་ཏི་ཞེས་བྱ་སྟེ། སྔ་མ་ཡི་གེ་བརྒྱད་ཡོད་པ་ལ་ཡི་གེ་བརྒྱད་པའི་སྡེབ་སྦྱོར་ཞེས་པ་ལྟ་བུའི་ཚབ་ཏུ་འདིར་ཕྱི་མོ་བརྒྱད་ཚང་དགོས་ཏེ། དེའང་(༡༦༤ན)དབྱངས་ཐུང་ངུ་། གསལ་བྱེད་དབྱངས་གཅིག་པ་རྣམས་ནི་ཕྱི་མོ་གཅིག་པར་བགྲང༌། དབྱངས་རིང་པོ། གསལ་བྱེད་དབྱངས་གཉིས་པ་སྟེ་རིང་པོ་དང་མཚམས་སྦྱོར་གྱི་ཡི་གེ་སྲོག་ཏུ་ཞུགས་པ་སོགས། མདོར་ན། ལྕི་བ་རྣམས་ནི་ཕྱི་མོ་གཉིས་པར་བགྲང༌། གསལ་བྱེད་སྲོག་མེད་ནི་ཕྱེད་པར་བགྲང་བ་ཡིན་ལ། དེ་ལའང་། ཕྱི་མོ་འགོད་ཚུལ་དང༌། རྐང་བཞི་མཉམ་མི་མཉམ་ཕྱེད་མཉམ་གྱི་དབྱེ་བས་ཛཱ་ཏི་དང༌། རོ་ལངས་ཅན་དང༌། དམར་སེར་ཅན་གསུམ་གྱི་ནང་གསེས་བཅས་རིན་འབྱུང་གཞུང་དུ་བཤད་ཅིང༌། ཐོས་ཆུང་སོགས་ལས་ཅུང་ཟད་འདྲ་མིན་མང་དུ་བཤད་པ་ཐམས་ཅད་ཀྱང་ངོ་བོ་འདི་དག་ཏུ་འདུའོ། ། འདི་དག་ཏུ་ཡི་གེ་གསུམ་རེ་ལ་ཚོགས་རེ་བྱས་པས་ལྕི་ཡང་གི་དབང་གིས་ཚོགས་བརྒྱད་དུ་འགྱུར་ཏོ། ། དང་པོར་བར་དང་མཐའ་རྣམས་སུ། ། ལྕི་བ་ཉིད་གྱུར་བྷ་ཛ་ས། ། ཡང་བ་ཉིད་གྱུར་ཡ་ར་ཏ། ། ལྕི་བ་ཡང་ཉིད་མ་ནའོ། ། ཞེས་འབྱུང་བ་ལྟར་ལ། དེ་རེ་རེ་ལའང་། དགེ་བ་དང་མི་དགེ་བ་སྟོན་པའི་ལྷ་རེ་རེ་ཡོད་པར་བཤད་དེ། བྷ་ཡིག་ས་གཞི་དཔལ་ནི་རྒྱས་བྱེད་ཛ་ཡིག་ཆུ་ལྟེ་འཕེལ་བའོ་ར་ཡིག་མེ་སྟེ་འཆི། ། ས་ཡིག་རླུང་སྟེ་ཕ་རོལ་ཡུལ་དུ་རིང་པོར་འགྲོ་བྱེད་ཏ་ཡིག་ནམ་མཁའ་སྟོང་པའི་འབྲས། ། ཡ་ཡིག་ཉི་མ་རྒྱ་ཆེན་ནད་ནི་ལེན་བྱེད་མ་ཡིག་ཟླ་བ་གྲགས་པ་དྲི་མ་མེད། ། ན་ཡིག་ལྷ་སྟེ་བདེ་རབ་སྟེར་མཁས་པས་ཚོགས་རྣམས་ཀྱིས་ནི་འབྲས་བུ་འདིར་རབ་བཤད། ། ཅེས་པ་ལྟར་ལ། དེའང་དང་པོའི་ཚོགས་དེ་ལ་བརྟག་པར་བཤད་དོ། ། དེ་བཞིན་དུ། སྡེབ་སྦྱོར་ཡི་གེ་དྲུག་པ་ནས་རབ་བསགས་སམ་རྒྱུན་ཆགས་ཀྱི་བར་རྣམས་ལའང་ལྷ་རེ་རེ་ཡོད་པར་འདོད་དེ། སྡེབ་སྦྱོར་གཱ་ཡ་ཏྲིའི་ལྷ་རྟ་མགྲིན་དུ་བཤད་ཅིང་དེའི་གཟུགས་ཀྱང་ཡོད་པར་སྣང་ལ། འོན་ཀྱང་འདི་དག་ནི་ཕྱི་རོལ་པའི་ལྷ་རུ་སྣང་ངོ༌། ། ད༣ གསུམ་པ་[ངོ་མཚར་རྟོགས་བྱེད་ཀྱི་སྦྱོར་བ་བཤད་པ་]ནི། པྲསྟཱ་ར་འགོད་སྤྱི་གྲངས་ནཥྚ་དབྱེ། ། ཨུདྡིཥྚ་བཟུང་ཡང་བ་ཨ་དྷཱ་བརྟག །(༡༦༤བ) ཁྱད་པར་དྲུག་དང་ཐུན་མོང་རྟོག་བྱེད་གཅིག ། མཉམ་པའི་བྲྀཏྟ་ཁོ་ན་ལ་སྦྱར་བ་ངོ་མཚར་བའི་རིགས་པས་རྟོགས་པར་བྱེད་པ་ལ་དྲུག ། དང་པོ་ནི། ཡི་གེ་གཅིག་པ་ནས་བཟུང་རྒྱུན་ཆགས་ཀྱི་བར་གྱི་ལྕི་ཡང་སྤེལ་བའི་ཚུལ་སྟོན་པ་པྲསྟཱ་ར་འགོད་ཚུལ། གཉིས་པ་ནི། ཡི་གེ་བཅུ་པ་ལྟ་བུའི་སྡེབ་སྦྱོར་རེ་རེ་ལ་རྣམ་གྲངས་དུ་ཡོད་སྟོན་པ་སྤྱིའི་རྣམ་གྲངས་རྟོགས་བྱེད། གསུམ་པ་ནི། སྤྱི་གྲངས་དེ་ལས་གང་རུང་ཞིག་ཁོལ་དུ་འདོན་པའི་བཀོད་བྱ་ཇི་ལྟར་ཡོད་རྟོགས་པར་བྱེད་པ། དཔེར་ན། ཡི་གེ་དྲུག་པའི་སྡེབ་སྦྱོར་ལ་སྤྱིའི་རྣམ་གྲངས་དྲུག་ཅུ་རྩ་བཞི་ཡོད་པའི་ནང་ནས་བཅུ་བཞི་པ་དེ་གློ་བུར་བཀོད་ན་པྲསྟཱ་ར་འགོད་མི་དགོས་པར་ལྕི་ཡང་བདེ་བླག་ཏུ་རྟོགས་བྱེད་ནཥྚའི་ཆོ་ག ། བཞི་པ་ནི། ཐོག་མར་ཡི་གེ་བཅུ་པ་ལས་མ་ས་ཛ་ག་ལྟ་བུའི་པྲསྟཱར་བཀོད། སླར་འདི་ཡི་གེ་བཅུ་པའི་སྡེབ་སྦྱོར་གྱི་ནང་གསེས་སུ་དུ་བ་ཡིན་ཅེས་འདྲི་ན་བདེ་བླག་ཏུ་རྟོགས་པའི་ཐབས་ཨུ་དྡིཥྚ་བཟུང་བ། སྡེབ་སྦྱོར་འདི་ལ་ལྕི་བ་འབའ་ཞིག་པ་དུ། གཅིག་ཡང་བ་དུ། གཉིས་ཡང་བ་དུ་ཞེས་སོགས་འདྲི་ན། དེ་རྟོགས་བྱེད་ཡང་བའི་བྱ་བ། པྲསྟཱ་རའི་ཕྲེང་སྟེང་འོག་གི་གླིང་དང་བར་གྱིས་ཇི་ཙམ་འགྲོ་བ་རྟོགས་བྱེད་ལ་ཨ་དྷྭའི་བརྟག་པ་སྟེ་མཉམ་པའི་བྲྀཏྟ་ཁྱད་པར་དུ་རྟོགས་པར་བྱེད་པའི་ཆོ་ག་དྲུག་ཡོད་ཅིང༌། བྲྀཏྟ་ཛཱ་ཏི་ཐུན་མོང་དུ་ཡི་གེ། ཕྱི་མོ། ལྕི་ཡང་གི་གྲངས་རྟོགས་པར་བྱེད་པའི་ཐབས་རེ་རེ་ལ་གསུམ་གསུམ་ཡོད་ཀྱང་། སྤྱིར་ཐུན་མོང་རྟོགས་བྱེད་ཅེས་བསྡམས་པས་གཅིག་གོ། ། དེ་དག་ནི་སློབ་དཔོན་རིན་འབྱུང་ཞི་བས་མཛད་པའི་གཞུང་ལས་ཇི་ལྟར་གསུངས་པའི་དོན་ཏོ། ། གཞུང་འདི་ནི། ཇི་སྐད་དུ། མདོར་བསྡུས་ཚིགས་སུ་བཅད་པ་དང༌། ། འདི་ཡིས་དཔེར་བརྗོད་བགྱིས་པ་དང༌། ། མ་འདྲེས་རིམ་པས་འདོན་པ་དང༌། ། མཐར་སྡོད་ཚོགས་ཉིད་ཡོན་ཏན་ཡིན། ། ཅེས་དམར་སེར་ཅན་གྱི་གཞུང་ལས་ཡོན་ཏན་བརྒྱད་ཀྱིས་འཕགས་པར་བཤད་པ་དང༌། མཛད་པ་པོ་ཁྱད་(༡༦༥ན)དུ་འཕགས་པས་ངོ་མཚར་བའི་གཞུང་ཡིན་ནོ། ། ཐ༤ བཞི་པ་མིང་གི་མངོན་བརྗོད་བཤད་པ་ལ་གཉིས། ད༡ སྤྱིར་མིང་གི་མཚན་ཉིད་དབྱེ་བ་སོགས་བཤད་པ། ད༢ བྱེ་བྲག་མངོན་བརྗོད་ཀྱི་ཚུལ་བཤད་པའོ། ། ད༡ དང་པོ་ནི། ཐོག་མའི་འདོད་རྒྱལ་རྗེས་གྲུབ་དོན་དང་ལྡན། ། དངོས་མིང་དེ་བཞིན་བཏགས་མིང་འདྲ་འབྲེལ་གྱི། ། རྒྱུ་མཚན་ལས་བྱུང་དེ་ཉིད་ལྡོག་པའི་མིང༌། ། འབྲེལ་ལ་རྒྱུ་མིང་འབྲས་དང་འབྲས་མིང་རྒྱུ། ། ཚོགས་པ་ཡ་རྒྱལ་ལ་བཏགས་ལྡོག་པ་སོགས། ། རང་གི་གདགས་གཞི་ཡི་གེ་དུ་མ་འདུས་ནས་དོན་གྱི་ངོ་བོ་ཙམ་སྟོན་པའི་རྗོད་བྱེད་ནི་མིང་གི་མཚན་ཉིད། དེ་བཏགས་པའི་དགོས་པ་ནི། འཕགས་པའི་ཞལ་ནས། མིང་དུ་གདགས་པར་མ་མཛད་ན། ། འཇིག་རྟེན་ཐམས་ཅད་རྨོངས་པར་འགྱུར། ། དེ་བས་རྨོངས་པ་བསལ་བའི་ཕྱིར། ། མགོན་པོས་མིང་དུ་གདགས་པར་མཛད། ། ཅེས་གསུངས་པ་ལྟར། ཐ་སྙད་བརྡར་གོ་བ་ནི་མིང་ལ་རགས་ལས་པའོ། ། དེ་ལའང་། རྒྱུ་མཚན་དང་དགོས་པ་ལ་མ་ལྟོས་པར་ཐོག་མའི་བརྡ་སྦྱར་བ་ནི་འདོད་རྒྱལ་གྱི་མིང་སྟེ། ནམ་མཁའ་ས་ཆུ་ལ་སོགས་པ་ལྟ་བུ། སྨྲ་སྒོ་ལས། འདོད་རྒྱལ་ཐོག་མའི་མིང་གང་ཡིན། ། ངེས་ཚིག་གཞི་མེད་ཆོས་ཉིད་བཞིན། ། ཅེས་བཤད་དོ། ། སྔར་ཐ་སྙད་གྲུབ་ཟིན་པའི་མིང་དོན་གཞན་གྱི་མིང་དུ་བཏགས་པ་ནི། རྗེས་སུ་གྲུབ་པའི་མིང་སྟེ། དེ་ལའང་། རྗེས་གྲུབ་འདོད་རྒྱལ་[དོན་དང་མི་ལྡན་པ་ནི།] གྱི་སྒྲ་བཤད་དུ་མི་རུང་བ། ཁྱི་ནག་པོ་ལ་དུང་ཞེས་བཏགས་པ་ལྟ་བུ། རྗེས་གྲུབ་དོན་དང་ལྡན་པ་ནི། སྒྲ་བཤད་དུ་རུང་བ། ཁྱི་དཀར་པོ་ལ་དུང་ཞེས་བཏགས་པ་ལྟ་བུའོ། ། ཡང་མིང་ལ་དབྱེ་ན། དངོས་མིང་དང༌། དེ་བཞིན་བཏགས་མིང་གཉིས། དང་པོ་ནི། འདོད་རྒྱལ་ཐོག་མའི་མིང་དུ་གྲགས་པའམ་དངོས་ཀྱི་སྒྲ་བཤད་གསུམ་པོ་གང་རུང་ཚང་བ། དེ་ལ་དབྱེ་ན། འདོད་རྒྱལ་ཐོག་མའི་དངོས་མིང༌། ལྷ་ཞེས་པ་ལྟ་བུ། (༡༦༥བ) རྗེས་གྲུབ་འདོད་རྒྱལ་གྱི་དངོས་མིང༌། ལྗོན་ཤིང་ལ་རྐང་འཐུང་ཞེས་པ་ལྟ་བུ། དོན་ལྡན་འཁྲུལ་མེད་ཀྱི་དངོས་མིང༌། སྐྱེས་བུ་དཔའ་བོ་ལ་སྟག་ཅེས་པ་ལྟ་བུའོ། ། བཏགས་མིང་གི་མཚན་ཉིད་ནི། བཏགས་པའི་སྒྲ་བཤད་ལྔ་པོ་གང་རུང་ཚང་བ། དེ་ལ་དབྱེ་ན། འདྲ་བ་རྒྱུ་མཚན་དུ་བྱས་པ། འབྲེལ་པ་རྒྱུ་མཚན་དུ་བྱས་པའམ་དེ་ལས་བྱུང་བ། དེ་གཉིས་ཀ་ལྡོག་པ་རྒྱུ་མཚན་དུ་བྱས་པའི་བཏགས་མིང་གསུམ་དུ་ཡོད། དང་པོ་ནི། སྨན་བྱ་རོག་རྐང་ཞེས་པ་ལྟ་བུ། གཉིས་པ་ནི། འབྲེལ་མིང་ལ་རྒྱུ་མིང་འབྲས་བུ་ལ་བཏགས་པ་མ་ཞུ་བའི་ནད་ལ་མ་ཞུ་བ་བརྗོད་པ་ལྟ་བུ། འབྲས་མིང་རྒྱུ་ལ་བཏགས་པ་སྒྲོན་མེའི་ཤིང་ངམ། ཕྱུག་པོ་སེར་སྣ་ཅན་ལ་ཡི་དྭགས་སུ་བརྗོད་པ་ལྟ་བུ། ཚོགས་པའི་མིང་ཡ་རྒྱལ་ལ་བཏགས་པ་སྐྱེས་བུ་འགའ་ཞིག་ལ་ལྷའམ། བུད་མེད་ཁ་ཅིག་གི་མིང་དུ་བུ་མོ་བརྗོད་པ་ལྟ་བུ། དེ་ལས་ལྡོག་པ། ཡ་གྱལ་གྱི་མིང་ཚོགས་པ་ལ་བཏགས་པ་གསེར་སོགས་ལ་ལྕགས་ཞེས་བརྗོད་པ་ལྟ་བུ་དང་བཞིའོ། ། གསུམ་པ་འདྲ་འབྲེལ་གཉིས་ཀ་ལས་ལྡོག་པའི་མིང་ནི། གཟའ་མིག་དམར་ལ་བཀྲ་ཤིས་དང༌། བྱེད་པ་བིཥྚི་ལ་བཟང་པོ་ཞེས་བརྗོད་པ་ལྟ་བུ་སོགས་སོ། ། ད༢ གཉིས་པ་[བྱེ་བྲག་མངོན་བརྗོད་ཀྱི་ཚུལ་བཤད་པ་]ནི། མིང་གཅིག་དོན་མང་དོན་གཅིག་མིང་མང་གིས། ། མངོན་བརྗོད་ཁམས་དང་མིང་དོན་ཁོང་ཆུད་བྱ། ། དེ་ལྟར་བཤད་པའི་མིང་རྣམས་ཀྱང་མིང་གཅིག་ཁོ་ན་དོན་མང་པོ་ལ་འཇུག་པ། དཔེར་ན། འཆི་མེད་མཛོད་ལས། ཀཿནི་ཚངས་པ་རླུང་ཉི་བདག ། ཀཾ་ནི་མགོ་དང་ཆུ་དག་ལ། ། ཞེས་དང༌། དབང་ཆེན་གུ་གུལ་འུག་པ་དང༌། ། སྦྲུལ་འཛིན་རྣམས་ལ་ཀཽ་ཤི་ཀཿ ། ཞེས་དང༌། ཨརྠ་བརྗོད་བྱ་ནོར་ཚིག་དོན། ། དགོས་པ་དང་ནི་ལྡོག་པ་ལ། ། ཞེས་དང༌། ཨནྟ་རཾ་ནི་གོ་སྐབས་མཚམས། ། སྨད་གོས་སྒྲིབ་དབྱེ་དེ་ཡི་དོན། ། སྐྱོན་བྲལ་ཕྱི་རོལ་བདག་གི་བ། ། སྐབས་དབུས་གང་གི་བདག་ལ་ཡང༌། ། ཞེས་དང༌། སྭ་སྟི་སྨོན་བདེ་བསོད་ནམས་ཚོགས། །(༡༦༦ན) ཞེས་དང༌། ཀླུ་སྒྲུབ་ཞབས་ཀྱིས། ངག་ཕྱོགས་ས་དང་འོད་ཟེར་དང༌། ། ཕྱུགས་དང་མིག་དང་རྡོ་རྗེ་དང༌། ། མཐོ་རིས་ཆུ་སྟེ་དོན་དགུ་ལ། ། མཁས་པས་གོ་སྒྲ་ངེས་པར་བཟུང༌། ། ཞེས་པ་ལྟ་བུ་དང༌། གཞན་ཡང་། མངོན་བརྗོད་མུ་ཏིག་ཕྲེང་བ་དང༌། དཔལ་སྒྲའི་སྙེ་མ་སོགས་ནས་མཐའ་ཡས་པ་འབྱུང་བ་ལྟར་ལེགས་སྦྱར་ལ་ཤིན་ཏུ་མང་ཞིང༌། བོད་སྐད་ལའང༌། གཉིས་སྐྱེས་ཞེས་པའི་མིང༌། ཟླ་བ། བྲམ་ཟེ། བྱ་སོགས་ལ་འཇུག་པ་དང༌། མཁའ་འགྲོ་ཞེས་པ་གྲུབ་པའི་རྣལ་འབྱོར་མ་དང༌། ཨོ་རྒྱན་སོགས་ཞིང་སྐྱེས་ཀྱི་མི་མོ། ཉི་མ། འདབ་ཆགས། མདའ་ལའང་འཇུག་པའི་མཚོན་ཏེ་རྒྱ་ཆེར་རྟོགས་པར་བྱའོ། ། དོན་གཅིག་ལ་མིང་མང་པོ་དང་ལྡན་པ་ནི། འཆི་མེད་མཛོད་ལས། མཐོ་རིས་མི་ཟད་མི་བདེ་མེད། ། ལེགས་གནས་སུམ་རྩེན་སྐབས་གསུམ་གནས། ། ལྷ་ཡི་འཇིག་རྟེན་ཞེས་མཐོ་རིས་ཀྱི་མིང་གི་རྣམ་གྲངས་དང༌། ཀུན་མཁྱེན་བདེ་གཤེགས་སངས་རྒྱས་དང༌། ། ཆོས་ཀྱི་རྒྱལ་པོ་དེ་བཞིན་གཤེགས། ། ཀུན་ཏུ་བཟང་པོ་བཅོམ་ལྡན་འདས། ། བདུད་ཐུལ་རྒྱལ་བ་འཇིག་རྟེན་རྒྱལ། ། མངོན་ཤེས་དྲུག་ལྡན་སྟོབས་བཅུ་པ། ། གཉིས་མེད་གསུང་བ་རྣམ་པར་འདྲེན། ། ཐུབ་དབང་དཔལ་སྟུག་སྟོན་པའོ། ། ཞེས་སངས་རྒྱས་ཀྱི་མཚན་གྱི་རྣམ་གྲངས་སུ་གསུངས་པ་ལྟ་བུ་ཤིན་ཏུ་མང་པོ་རྣམས་ཏེ། མངོན་བརྗོད་དེ་རྣམས་ཀྱང་ལེགས་སྦྱར་ལ་བྱིངས་ཀྱི་ཁམས་དང༌། སྐད་གཉིས་ཀར་མིང་དེའི་དོན་ནམ་རྒྱུ་མཚན་ཀྱང་ཁོང་དུ་ཆུད་པར་བྱ་དགོས་ཏེ། དཔེར་ན། ལེགས་སྦྱར་ལ། བུདྡྷཿཞེས་པ་བུདྡྷི་རྟོགས་པའི་བྱིངས་ལ་དངོས་པོའི་དོན་ཀྟ་རྐྱེན་དུ་སྦྱར་ནས་བསྒྲུབ་པས་གཉིད་དང་བྲལ་བ་ལྟ་བུའི་སངས་པའམ་ཤེས་བྱའི་དངོས་པོ་ཐམས་ཅད་ཇི་བཞིན་དུ་རྟོགས་པའི་དོན་དུ་འགྱུར་བ་དང༌། དེ་ཉིད་བོད་སྐད་དུ། སངས་རྒྱས་ཞེས་སྔོན་གྱི་ལོ་ཙཱ་བ་ཆེན་པོ་རྣམས་ཀྱིས་དོན་ལ་བརྟོན་ནས་བསྒྱུར་བར་མཛད་དེ། དེ་ཡང༌། མ་རིག་གཉིད་ལས་(༡༦༦བ)སངས་ཕྱིར་དང༌། ། ཤེས་བྱ་ལ་ནི་བློ་རྒྱས་ཕྱིར། ། སངས་རྒྱས་པདྨ་ལྟར་སངས་རྒྱས། ། ཞེས་ངེས་ཚིག་དང་སྦྱར་དགོས་པས་མཚོན་ཏེ་རྗེས་སུ་དཔག་པར་བྱའོ། ། ཐ༥ ལྔ་པ་ཟློས་གར་ནི། མཚམས་སྦྱོར་ལྔ་དང་འཇུག་པའི་ཡན་ལག་དང༌། ། མཚན་ཉིད་བཅུ་དྲུག་སྒེག་དང་ཕྲེང་བ་སོགས། ། ཀུན་དགའི་རོ་ལྡན་ཟློས་གར་དང་མཚུངས་པ། ། སེམས་ཅན་མགུ་བྱེད་སྤྱོད་པ་ཀུན་ལ་བསླབ། ། ཟློས་གར་གྱི་བཤད་པ་བོད་ཀྱི་རྟོག་བཟོ་མཁན་རྣམས་ཀྱིས་བཤད་པ་ནི་ཕལ་ཆེར་ཇི་བཞིན་མ་ཡིན་པས་རྗེས་ཟློས་མ་བྱས་ལ། ཀུན་མཁྱེན་བསྟན་པའི་ཉིན་བྱེད་ཀྱིས་རྒྱ་དཔེ་དང་ཟློས་གར་གྱི་སྦྱོར་བའང་གཟིགས་ནས་ཕྱོགས་མཚོན་ཙམ་གྱི་གསུང་གི་རྒྱུན་ནི། སྤྱིར་ཟློས་གར་ལ་དོན་གྱི་ཆིངས་གསུམ། མཚམས་སྦྱོར་གྱི་ཡན་ལག །འཇུག་པའི་ཡན་ལག །མཚན་ཉིད་ཀྱི་དབྱེ་བའོ། ། དང་པོ་ལ། མཚམས་སྦྱོར་གྱི་ཡན་ལག་ནི། བརྗོད་བྱའི་དོན་གྱི་ཁྱད་པར་སྡེ་ཚན་མི་འདྲ་བ་རྣམས་རྗོད་བྱེད་ཀྱང་སྐད་རིགས་སྣ་ཚོགས་པས་ལབ་དགོས་པ་དེ་དག་གི་བར་དུ་མཚམས་སྦྱོར་བྱེད་ཡིན། དེ་ལས་སྒོའི་མཚམས་སྦྱོར་བ་ནི། དྲི་བ་དང༌ལན་གྱི་སྒོའི་མཚམས་སྦྱོར་ནི་དྲི་ལན་ཏེ་ཕན་ཚུན་དྲི་བ་དྲི་ལན་གྱི་རྣམ་པ་བྱེད་རྒྱུ་དུ་མ་ཞིག་ཡོད་པའི་མིང་དང༌། སྙིང་པོ་ནི། སྐབས་འགར་གྲོས་བྱེད་པ་ལྟ་བུའི་ཚིག་མང་པོ་ཕན་ཚུན་དུ་སྨྲས་པའི་མཐར་གྲོས་ཐག་བཅད་པའི་ཚུལ་གྱིས་གཏན་ལ་ཕབ་པ་ལ་སྙིང་པོ་ཟེར། མི་བཟོད་པ་ནི། མཚང་ནས་འབྲུ་བའི་བརྗོད་པས་དེའི་རང་མཚང་ལ་ཕོག་པའི་རྣམ་པས་མི་བཟོད་པའམ་ཆགས་པས་གཟིར་ནས་མི་བཟོད་པའི་ཚུལ་བྱེད་པའོ། ། ངེས་པ་ཐོབ་བྱེད་ནི། ཐེ་ཚོམ་དང་བཅས་པའི་བརྗོད་པ་མང་པོའི་མཐར་དོན་གཅིག་ལ་ངེས་པ་རྙེད་པ་ལྟར་བྱེད་པ་སྟེ། དེ་རྣམས་ལ་མཚམས་སྦྱོར་གྱི་ཡན་ལག་ལྔ་ཞེས་གྲགས་སོ། ། གཞན་ཡང་སྙན་ངག་མེ་ལོང་གི་རྒྱ་འགྲེལ་སློབ་དཔོན་རཏྣ་ཤྲཱིས་མཛད་པ་ལས། མཚམས་སྦྱོར་རྣམས་ནི། སྒོ་དང༌། (༡༦༧ན)ལན་གྱི་སྒོ། སྙིང་པོ། མི་བཟོད་པ། ངེས་ཐོབ་སྟེ་ལྔར་བཤད་དོ། ། དེ་ལ། ཉེ་བར་ལེན་པ། ཉེ་བར་མཁོ་བ། ཡོངས་སུ་འཇོག་པ། རྣམ་པར་སྲེད་པ། རིག་པ། ཐོབ་པ། མཉམ་པར་འཇོག་པ། སྒྲུབ་པ། བརྙེས་པ། དབྱེ་བ། དབྱེ་བར་བྱེད་པ་རྣམས་ནི་སྒོའི་ཡན་ལག་རྣམས་སོ། ། ཡོངས་སུ་འགྲོ་བ། རྣམ་པར་འདར་བ། གདུང་བ། རྩེད་མོ། རྩེད་མོའི་མདངས། རབ་ཏུ་འགྲོ་བ། འགལ་བ། ཉེ་བར་གནས་པ། མ་དག་པ། སྐྱེ་བོ་འགོད་པར་རྩོམ་པ། ཡི་གེ་བསྡུ་བ་རྣམས་ནི་ལན་གྱི་སྒོའི་ཡན་ལག་རྣམས་སོ། ། མ་བྱུང་བ་དཔེར་བརྗོད་པ། ལམ་གྱི་རང་བཞིན་དཔེར་བརྗོད་པའི་རིམ་པ་བསྡུ་བ། རྗེས་སུ་དཔག་པ། སློང་བ། བརྟག་དཔྱད། གཟེར་བ། སྟོབས་ལྷག་པ། ཡིད་འབྱུང་བ། འཚབ་པ་རྣམས་ནི་སྙིང་པོའི་ཡན་ལག་རྣམས་སོ། ། རྒོལ་བ། འཐོར་བ། འཛག་པ། ནུས་པ། ཕན་ཚུན་དུ་གནས་པ། འགྲོ་བ་པ་གསལ་བ། འབྱེད་པ། འགོག་པ། འགལ་བ། ལེན་པ། འདྲིད་པ། རབ་ཏུ་སྲེད་པ་ནི་མི་བཟོད་པའི་ཡན་ལག་རྣམས་སོ། ། མཚམས་སྤྱོད། འགོག་པ། སྤེལ་བ། གཏན་ལ་ཕབ་པ། སྨོད་པ་གསལ་བ། རབ་དྭངས། ཀུན་དགའ། དུས། ཉེ་བར་སྦེད་པ། བསམ་པ་སྔ་མ་འཆད་པ། སྙན་ངག་བསྡུ་བ། རང་གིས་སྟོན་པ་རྣམས་ནི་ངེས་ཐོབ་ཀྱི་ཡན་ལག་རྣམས་སོ། །ཞེས་གསུངས། གཉིས་པ་འཇུག་པའི་ཡན་ལག་ལ། བྷཱ་ར་ཏཱི། སཱ་ཏྭ་ཏི། ཀཻ་ཤི་ཀཱི། ཨཱ་ར་བྷ་ཊཱི། ཞེས་པ་བཞི་སྟེ། སོ་སོར་ཡང་ཡན་ལག་བཞིའོ། ། དེ་ལ་བྷཱ་ར་ཏིའི་ཡན་ལག་བཞི་ནི། རབ་ཏུ་སྤང་པ་དང༌། ཀུན་ཏུ་སྒོ་དང༌། ཕྲེང་བ་དང༌། བཟོ་བྱེད་པའོ། ། སཱ་ཏྭ་ཏཱི་ཡི་ཡན་ལག་བཞི་ནི། ཤིན་ཏུ་འཇོག་པ། ཡོངས་སུ་བསྒྱུར་བ། སྨྲ་བ་དང་བཅས་པ། འཕྲག་ཏུ་བཟློག་པ་རྣམས་སོ། ། ཀཻ་ཤི་ཀཱིའི་ཡན་ལག་བཞི་ནི། རྩེད་མོ། གསལ་བ། རྩེད་མོ་འབྱེད་པ། རྩེད་མོར་འགྲོ་བ་རྣམས་སོ། ། ཨ་ར་བྷ་ཏཱིའི་ཡན་ལག་(༡༦༧བ)བཞི་ནི། བསྡུས་པ། ཀུན་ལྟུང༌། གནས་སྐབས་འཇོག་པ། ཀུན་ཏུ་འཐོར་བ་སྟེ། དེ་རྣམས་ནི་འཇུག་པའི་ཡན་ལག་གོ། ། གསུམ་པ་མཚན་ཉིད་ཀྱི་དབྱེ་བ་ནི། རྒྱ་འགྲེལ་ལས། རྒྱན། ཡི་གེ། བསྡུས་པ། མཛེས་པ། དཔེར་བརྗོད། རྒྱུ་ཡང་དག་པར་སྦྱོར་བ། མཐོང་བའི་མཐའ། ཐོབ་པ། མངོན་པར་མཐོ་བ། ངེས་པར་བསྟན་པ། ངེས་ཚིག །གྲུབ་པ། ཁྱད་པར་བྱེད་པ། ཡོན་ཏན་ལྷུང་བ། ཕུལ་བྱུང༌། རྟོག་གེ་མཚུངས་པ། ཚིག་བཏུས་པ། བསྟན་པ། ཉེ་བར་བསྟན་པ། རྣམ་པར་དཔྱད་པ། གོ་ལྡོག་པ། ཉམས་པ། རྗེས་ཁྲིད། ཕྲེང་བ། ཡོན་སྦྱིན་པ། སྨོད་པ། དོན་གྱི་དབང༌། རབ་ཏུ་གྲུབ་པ། དྲི་བ། འགོད་པ་དང་བཅས་པ། རེ་བ། ཆ་ཤས། བསྡུས་པ། ཡོན་ཏན་སྒྲོགས་པ། མ་བརྗོད་པར་གྲུབ་པ། དགའ་བའི་ཚིག་སྟེ། སུམ་ཅུ་རྩ་དྲུག་ཏུ་བཤད་པ་རྣམས་དང༌། གཞན་ཡང༌། སྒེག་པའི་ཡན་ལག་དང༌། ཕྲེང་བའི་ཡན་ལག་དང༌། མཚམས་སྦྱོར་གཞན་པའི་ཡན་ལག་ལ་སོགས་པ་སྟེ། དེ་རྣམས་ཐམས་ཅད་ཀྱང་གར་གྱི་རྣམ་འགྱུར་ཤིན་ཏུ་ཁྲོ་བའི་ཉམས་དང༌། ཆགས་པས་གཟིར་བའི་ཉམས་དང༌། མྱ་ངན་གྱིས་སྡུག་བསྔལ་བའི་ཉམས་དང༌། ཡ་མཚན་པས་ངོ་མཚར་བའི་ཉམས་སོགས་སྔོན་བྱུང་གི་གཏམ་རྒྱུད་དང་རྗེས་སུ་འབྲེལ་བའི་ལུས་ངག་གི་རྣམ་འགྱུར་ལ་བརྟེན་ནས་མངོན་སུམ་ལྟ་བུར་ཉམས་སུ་མྱོང་བར་བྱེད་པ་སྟེ། དེ་རྣམས་ཀྱི་མཚན་ཉིད་རྒྱས་པ་ནི་འདིར་ཡི་གེའི་ལས་སུ་ཆེ་བས་གཞན་དུ་ཤེས་པར་བྱའོ། ། མདོར་ན། ལུས་ངག་གི་འགྱུར་བ་དང་ལན་མང་པོ་ཟློས་ཀྱང་ཡིད་འཕྲོག་པའི་གར་དུ་གྱུར་པས་འགྲོ་བ་མཐོང་ཐོས་ཀུན་དགའ་བ་སྐྱེད་པའི་རོའམ་ཉམས་དང་ལྡན་པ་འཕགས་པའི་ཡུལ་དུ་ཟློས་གར་གྱི་རིག་པ་ཡ་མཚན་ཆེ་བར་གྲགས་ཀྱང་གངས་ཅན་དུ་དེའི་བསྟན་བཅོས་མ་བྱུང་ཞིང་ཐར་པ་དོན་དུ་གཉེར་བ་ལ་ཉེ་བར་མཁོ་