Tibetan
བའང་མེད་པས། དེ་དང་ཆ་མཚུངས་པ་བྱང་ཆུབ་སེམས་དཔའ་རྣམས་ཀྱི་བྱ་བ་སེམས་ཅན་(༡༦༨ན)མགུ་བྱེད་ཀྱི་སྤྱོད་པ་ཀུན་ལ་བསླབ་པར་བྱ་སྟེ། སེམས་ཅན་མགུ་བྱེད་མ་རྟོགས་པ། ། སངས་རྒྱས་མཉེས་པའི་ཐབས་གཞན་མེད། ། ཅེས་གསུངས་པ་ལྟར་རོ། ། ཆ༣ རྩ་བའི་གསུམ་པ་ཚུར་མཐོང་འཇིག་རྟེན་པའི་ལམ་རྣམ་པར་བཞག་པ་ལ་གཉིས། ཇ༡ སྤྱིར་བསྟན་པ་དང༌། ཇ༢ བྱེ་བྲག་ཏུ་དབྱེ་བའོ། ། ཇ༡ དང་པོ་ནི། ཚེ་འདིའི་བདེ་སྐྱིད་ཙམ་རྟོག་ཐ་མལ་པ། ། གྲུབ་མཐས་བློ་བསྒྱུར་ལམ་དང་ལྡན་པ་སྟེ། ། ཡང་དག་ཡང་དག་མིན་པའི་ལྟ་བ་མང༌། ། འོག་མ་བརྒྱ་ལས་གོང་མ་རེ་རེ་ཙམ། ། བསྡུ་ན་ཕྱི་ནང་གཉིས་ཡོད། ཅེས་པ་སྟེ། སྤྱིར་སེམས་ཅན་གྱི་རིས་ན་ཤེས་བྱའི་གནས་ཚུལ་དང་འཇིག་རྟེན་ཕྱི་མ་ཕན་ཆད་ལ་རྟོགས་དཔྱོད་གང་ཡང་མི་འཇུག་པར་ཚེ་འདི་ཁོ་ནའི་བདེ་སྡུག་གི་བླང་དོར་ཙམ་འབའ་ཞིག་རྟོགས་པ་ནི་ཐ་མལ་པ་ཞེས་བྱ་ལ། གྲུབ་མཐས་བློ་བསྒྱུར་ཅིང་ཤེས་བྱ་ལ་རྟོག་དཔྱོད་ཅུང་ཟད་ཞུགས་པ་ནི་ལམ་དང་ལྡན་པ་ཞེས་བྱ་སྟེ་འཇིག་རྟེན་ཕལ་པ་ལས་ཆེས་མཆོག་ཏུ་གྱུར་པའོ། ། དེས་ན་འཇིག་རྟེན་ན་གྲུབ་མཐས་བློ་ཁ་བསྒྱུར་བ་རྣམས་ནི། རང་རང་གི་རིགས་པས་གྲུབ་ཅིང་དེ་ལས་འདའ་བར་མི་ནུས་པ་ལ་གྲུབ་པའི་མཐའ་ཞེས་བྱ་ཞིང་དེ་ཉིད་བདེན་པ་ཡིན་གྱི། འཇིག་རྟེན་ན་ཇི་ལྟར་གྲགས་པ་རྣམས་ནི་བདེན་པར་མ་ངེས་སོ་ཞེས་ཟེར་ཏེ། དེ་སྐད་དུ་ཡང༌། སྤྱོད་འཇུག་ལས། འཇིག་རྟེན་པ་ཡིས་དངོས་མཐོང་ཞིང༌། ། ཡང་དག་ཉིད་དུའང་རྟོགས་བྱེད་ཀྱི། ། སྒྱུ་མ་ལྟ་བུ་མིན་པས་འདིར། ། རྣལ་འབྱོར་པ་དང་འཇིག་རྟེན་རྩོད། ། ཅེས་གསུངས་སོ། ། གྲུབ་མཐའ་སྨྲ་བ་དེ་ལའང་མངོན་མཐོའི་ཐེག་པ་ལ་སོགས་ཡང་དག་དང༌། རྟག་ཆད་དུ་འཛིན་པ་སོགས་ཡང་དག་པ་མ་ཡིན་པའི་ལྟ་བ་ནི་མང་སྟེ། སློབ་དཔོན་སྨན་པའི་ཞབས་ཀྱིས། ལྟ་བ་ལྔ་བརྒྱ་བདུན་ཅུ་དང༌། ། རྟོག་གེ་འབར་བ་ལས་ལྟ་བའི་རྩ་བ་བརྒྱ་རྩ་བཅུ་དང་དེ་ལས་ཕྱེ་བ་སུམ་བརྒྱ་དྲུག་ཅུ་རྩ་གསུམ་དང༌། ཡེ་ཤེས་སྙིང་པོ་ཀུན་བཏུས་ཀྱི་བཤད་སྦྱར་ལས་ཡ་མཚན་ཅན་གྱི་ལྟ་བ་དྲུག་ཅུ་རྩ་དྲུག་དང༌། (༡༦༨བ) མདོ་སྡེ་ཚངས་པའི་དྲྭ་བ་ལས་ལྟ་བ་དྲུག་ཅུ་རྩ་གཉིས་དང༌། ངང་པ་ཆེར་འབྱུང་གི་མདོ་ལས་དམ་པ་མ་ཡིན་པའི་ལྟ་བ་ཉི་ཤུ་རྩ་བརྒྱད་དང༌། ཐེག་ཆེན་ལ་དད་པ་རབ་ཏུ་སྒོམ་པའི་མདོ་ལས་ལྟ་ངན་ཉི་ཤུ་རྩ་དྲུག་གསུངས་པ་དང༌། གཞན་ཡང་། འཇིགས་ཚོགས་ལ་ལྟ་བ་ཉི་ཤུ་དང༌། རྟོག་དཔྱོད་ཀྱི་ལྟ་བ་ལས་ཕ་རོལ་སྨྲ་བ་བཅུ་དྲུག་དང༌། ལུང་མ་བསྟན་གྱི་ལྟ་བ་བཅུ་བཞི་དང༌། མཐར་འཛིན་གྱི་ལྟ་བ་བརྒྱད་དམ་བཞིའམ་གཉིས་ཏེ་ཡང་དག་པ་མ་ཡིན་པའི་ལྟ་བ་མང་དུ་བཤད་པས་མཚོན་ནོ། ། ངན་སོང་གསུམ་དང་ལྷ་མི་ཕལ་མོ་ཆེ་སོགས་འཇིག་རྟེན་ཕལ་པ་བརྒྱ་སྟོང་དུ་མའི་ནང་དུ་གྲུབ་མཐའི་ལམ་ལ་ཞུགས་པ་ནི་རེ་རེ་ཙམ་དུ་ཟད་ལ། དེ་དག་ཀྱང་འོག་མ་འོག་མ་ལ་ཞུགས་པ་ནི་ཆེས་མང་ལ་གོང་མ་གོང་མ་ལ་ཞུགས་པ་ནི་ཆེས་ཉུང་སྟེ། ཇོ་བོ་རྗེས། དེང་སང་རྒྱ་གར་ན་མུ་སྟེགས་ཀྱིས་གྲུབ་མཐའ་ལ་མཁས་པ་བརྒྱ་བརྒྱའི་ཚེ་ན་བྱེ་བྲག་ཏུ་སྨྲ་བའི་གྲུབ་མཐའ་ཤེས་པ་རེ་རེ། དེ་བརྒྱ་བརྒྱ་ན་མདོ་སྡེ་པ་རེ་རེ། དེ་བརྒྱ་བརྒྱ་ན་སེམས་ཙམ་རྣམ་བདེན་པ་རེ་རེ། དེ་བརྒྱ་བརྒྱ་ན་རྣམ་རྫུན་པ་རེ་རེ། དེ་བརྒྱ་བརྒྱ་ན་དབུ་མ་རང་རྒྱུད་པ་རེ་རེ། དེ་བརྒྱ་བརྒྱ་ན་ཟླ་བ་གྲགས་པའི་ལུགས་ཤེས་པ་རེ་རེ་ཙམ་ལས་མེད། ཅེས་གསུངས་པ་ལྟར་རོ། ། གྲུབ་མཐའ་སྨྲ་བ་ལ་ནང་གསེས་བྱེ་བྲག་གི་རྣམ་དབྱེ་ཆེས་མང་ཡང་རིས་མི་མཐུན་པའི་སྒོ་ནས་བསྡུ་ན། གཞན་སྡེ་ཕྱི་རོལ་མུ་སྟེགས་པ་དང༌། རང་སྡེ་ནང་པ་སངས་རྒྱས་པ་གཉིས་སུ་ཡོད་པས་དེ་དག་གི་ཚུལ་རིམ་བཞིན་འཆད་པར་བྱའོ། ། ཇ༢ གཉིས་པ་བྱེ་བྲག་ཏུ་དབྱེ་བ་ལ་གཉིས། ཉ༡ ཕྱི་རོལ་མུ་སྟེགས་པའི་ལམ་སྲོལ་མདོར་བསྟན། ཉ༢ མངོན་མཐོའི་ཐེག་པ་རྒྱས་པར་བསྟན་པའོ། ། ཉ༡ དང་པོ་ལ་གསུམ། ཏ༡ ངོ་བོ། ཏ༢ དབྱེ་བ། ཏ༣ དེ་ཉིད་རྒྱས་པར་བཤད་པའོ། ། ཏ༡ དང་པོ་ནི། ཕྱི་པ་ལ། ། མུ་སྟེགས་ཞེས་གྲགས། ཞེས་པ་སྟེ། བསྟན་པ་འདི་དང་སྟོན་པ་འདི་ལས་ཕྱི་རོལ་དུ་ཕྱོགས་ཏེ་འཇིག་རྟེན་པའི་ཤེས་རབ་ཀྱིས་ཤེས་བྱའི་གནས་ལ་དཔྱོད་ཀྱང་ཡིན་(༡༦༩ན)ལུགས་ཀྱི་མྱང་འདས་དང་རྗེས་སུ་མཐུན་པའི་ལམ་མེད་པས་ཕྱི་རོལ་པ་ཞེས་བྱ། འོན་ཀྱང་དེ་ལ་ཅུང་ཟད་ཉེ་བར་གྱུར་པས་ཐར་པའི་མུ་དང་སྟེགས་ལ་གནས་པས་ན་མུ་སྟེགས་ཞེས་བྱ་སྟེ། བཟང་སྤྱོད་འགྲེལ་པ་ལོ་ཆེན་ཡེ་ཤེས་སྡེས་མཛད་པ་ལས། མུ་སྟེགས་ཅན་ཞེས་བྱ་བ་ལ། མུ་སྟེགས་ནི། དཔེར་ན་ཆུའི་རྫིང་བུའམ་མཚེ་འུར་འཇུག་པའི་མུར་ཐེམ་པ་བྱས་པ་ལྟ་བུའམ་རབ་བརྒལ་བའི་རབ་ཁ་བདེ་བ་ལ་མུ་སྟེགས་ཞེས་བྱའོ། །དེ་བཞིན་མྱ་ངན་ལས་འདས་པའི་མཚོར་འཇུག་པའི་མུ་སྟེགས་དང༌། འཁོར་བའི་ཆུ་བོ་ལས་བརྒལ་བའི་ཐབས་ལམ་གྱི་རབ་ཁ་ལ་མུ་སྟེགས་ཞེས་བྱ་སྟེ། གང་སུ་དག་ལ་ལམ་དེ་ཡོད་ཅིང་དེ་སྤྱོད་ན་དེ་དག་ནི་མུ་སྟེགས་ཅན་ཏེ། ཞེས་གསུངས་པ་ལྟར་རོ། ། མཚན་ཉིད་ནི། ལྟ་སྒོམ་སྤྱོད་འབྲས་བཞིའི་སྒོ་ནས་སངས་རྒྱས་པའི་འགལ་ཟླར་གྱུར་པའི་གྲུབ་མཐའ་སྨྲ་བ་པོའོ། ། ཏ༢ གཉིས་པ་[དབྱེ་བ་]ནི། བཏགས་སྤྲུལ་རང་རྒྱུད་གསུམ། ། ཞེས་པ་སྟེ། སྤྱིར་མུ་སྟེགས་ཙམ་ལ། བཏགས་པ་བ་དང༌། སྤྲུལ་པ་དང༌། རང་རྒྱུད་པ་གསུམ་ལས། བཏགས་པ་བ་ནི། ལང་གཤེགས་ལས། ཇི་སྲིད་སེམས་ནི་འཇུག་པའི་བར། ། དེ་སྲིད་འཇིག་རྟེན་རྒྱང་འཕེན་ཡིན། ། ཅེས་པ་དང༌། མདོ་གཞན་ལས། འཇིག་རྟེན་རྒྱང་འཕེན་པའི་ཚིག་ལྷུར་ལེན་པའི་དགེ་སྦྱོང་རུལ་བ་སོགས་གསུངས་ཤིང༌། གནས་མ་བུ་དང་ཕུང་པོ་ལ་སོགས་བདེན་པར་སྨྲ་བ་རྣམས་དང་རིགས་ཆད་པའི་ལོག་རྟོགས་ཅན་ཞི་བའི་བདེ་བ་ལ་ཡིད་སྐྱོ་བ་རྣམས་ལ་མུ་སྟེགས། ཞེས་བཏགས་པ་རྣམས་སོ། ། སྤྲུལ་པའི་དབང་དུ་བྱས་ནས་ནི། བདེན་སྨྲའི་མདོ་ལས། ཡིད་བཞིན་ནོར་བུ་འཆིང་བུ་ཕྲད་གྱུར་པ། ། བདེན་པའི་ཚུལ་དུ་ནམ་ཡང་འབྱུང་བ་མེད། ། དེ་བཞིན་སངས་རྒྱས་རིན་ཆེན་མུ་སྟེགས་ཅན། ། ཞིང་གཅིག་ཏུ་ནི་ནམ་ཡང་འབྱུང་མི་འགྱུར། ། མུ་སྟེགས་ཅན་སྒོ་འདི་ནི་བསམ་གཏན་དང༌། ། མངོན་ཤེས་དབང་བསྒྱུར་མཁས་ཡིན་ཤེས་པར་གྱིས། །(༡༦༩བ) ཤེས་རབ་ཐབས་ཀྱིས་སྤྱོད་པའི་བློ་ལྡན་རྣམས། ། རྣམ་པར་འཕྲུལ་བ་སྣ་ཚོགས་སྟོན་པར་བྱེད། ། ཅེས་སོགས་མདོ་སྡེ་རྣམས་ལས་མང་དུ་གསུངས་པ་རྣམས་སོ། ། རང་རྒྱུད་པའི་དབང་དུ་བྱས་ནས། ཡུམ་ལས། ཀུན་ཏུ་རྒྱུ་བརྒྱ་ཀླན་ཀ་ཚོལ་བའི་བསམ་པས་འོངས་པ་དེ་དག་ལ་དཀར་པོའི་ཆོས་གཅིག་ཙམ་ཡང་ངས་མ་མཐོང་ངོ༌། །ཞེས་སོགས་འབྱུང་བ་ལྟར་རོ། ། ཏ༣ གསུམ་པ་རྒྱས་པར་བཤད་པ་ལ་གསུམ། ཐ༡ བསམ་གཏན་པ། ཐ༢ རྟོག་གེ་པ། ཐ༣ ཞར་བྱུང་ཀླ་ཀློ་སོགས་སྤང་བྱར་བསྟན་པའོ། ། ཐ༡ དང་པོ་ནི། ཕྱི་མར་བསམ་གཏན་པ་ནི་ལྔ་མངོན་ཤེས། ། གོང་དུ་དབྱེ་བ་གསུམ་སྨོས་པའི་ཕྱི་མ་མུ་སྟེགས་རང་རྒྱུད་པ་ནི་འདིར་བཤད་བྱའི་གྲུབ་མཐའ་སྟེ། དེ་ལའང་། བསམ་གཏན་པ་དང་། རྟོག་གེ་པ་གཉིས་ཀྱི། དང་པོ་ནི། བསམ་གཏན་གཟུགས་མེད་ཀྱི་མངོན་ཤེས་ལྔ་ལྡན་ཏེ། སློབ་དཔོན་དཔའ་བོས། དྲང་སྲོང་ཆེན་པོ་ལྔ་མངོན་ཤེས། ། ཞེས་གསུངས་པ་ལྟར་རོ། ། དེ་ཡང་ཡེ་ཤེས་རྒྱས་པ་དང་རྟོག་གེ་འབར་བ་སོགས་ནས་བསམ་གཏན་དམན་འབྲིང་མཆོག་གསུམ་གྱིས་རིམ་པ་བཞིན་དུ་བསྐལ་པ་སུམ་ཅུ་དང་དྲུག་ཅུ་དང་དགུ་བཅུ་རྗེས་སུ་དྲན་པར་བཤད་ལ། དེ་འདྲ་བ་རྣམས་ནི་འཁོར་བ་ཐོག་མ་མེད་པ་ནས་བྱུང་ཞིང༌། རྟོག་གེ་པ་ཡང་སྤྱིར་དེ་དང་འདྲ་མོད་ཀྱི། འཆད་འགྱུར་གྱི་གྲུབ་མཐའ་ཕལ་ཆེར་ནི་བསྐལ་པ་འདི་ཉིད་ལ་བྱུང་བའོ། ། ཐ༢ གཉིས་པ་[རྟོག་གེ་པ་]ལ་གཉིས། ད༡ མདོར་བསྟན་དང་འབྲེལ་པར་ཆད་སྨྲ་བཤད། ད༢ རྟག་སྨྲའི་དབྱེ་བ་དགོད་པའོ། ། ད༡ དང་པོ་ནི། རྟོག་གེ་པ་ཡི་རྩ་བ་རྟག་ཆད་སྨྲ། ། དེ་ལ་རྒྱང་འཕེན་པ་རྣམས་འགྲོ་བ་གསུམ། ། གསལ་དང་མི་གསལ་སེམས་ཅན་ངོ་བོས་བྱུང༌། ། རྒྱུ་སོགས་མ་མཐོང་མེད་སྨྲ་ཚེ་སྔ་ཕྱི། ། ལས་སོགས་འགོག་ཕྱིར་མཐོ་རིས་ཙམ་ཡང་མེད། ། མུ་སྟེགས་ཀྱི་གྲུབ་མཐའི་དབྱེ་བ་སྤྱིར་ལེགས་སྙིང་པོ་ཀུན་བཏུས་ལས། ཡོན་ཏན་ཅན་པ། གྲངས་ཅན་པ། ཚངས་པ་པ་སྟེ་གསུམ། རྟོག་གེ་འབར་བ་ལས། གྲངས་ཅན་པ། བྱེ་བྲག་པ། རིག་བྱེད་ཀྱི་མཐའ་གསང་བ་པ། (༡༧༠ན)སྤྱོད་པ་ཅན་ཏེ་བཞི། དུས་འཁོར་ལས། ཚངས་པ་པ། དབང་ཕྱུག་པ། ཁྱབ་འཇུག་པ། རྒྱང་འཕེན་པ། གཅེར་བུ་པ། སྐབས་གཞན་དུ་གྲངས་ཅན་པ་སྟེ་དྲུག ། ས་སྐྱ་པའི་གཞུང་ལུགས་ལེགས་བཤད་ལས། རྟག་སྨྲ་གྲངས་ཅན་པ། ཕུར་བུ་པ། བྱེ་བྲག་པ། རིག་པ་ཅན་པ། གཅེར་བུ་པ་སྟེ་ལྔ་དང༌། ཆད་སྨྲ་ཚུ་རོལ་མཛེས་པ། སྤྱོད་པ་པ། རིག་བྱེད་ཀྱི་མཐའ་གསང་བར་སྨྲ་བ། དབུ་མའི་ཚུལ་དུ་སྨྲ་བ་བཞི་སྟེ་དགུ་དང༌། བཅོམ་རལ་བའི་གྲུབ་མཐའ་རྒྱན་གྱི་མེ་ཏོག་ལས། རྒྱང་འཕེན་པ་སོགས་བཅུ་གཉིས་འོག་ཏུ་འཆད་འགྱུར་ལྟར་བཤད་པས་མཚོན་གཞུང་ལུགས་རྣམས་སུ་རྣམ་གྲངས་དུ་མ་འབྱུང་ཡང༌། རྟོག་གེ་པ་ཐམས་ཅད་ཀྱི་རྩ་བ་རྟག་སྨྲ་དང་ཆད་སྨྲ་གཉིས་སུ་འདུ་ཞིང༌། དེ་ཐམས་ཅད་ཀྱང་ཐུན་མོང་དུ་ཁྱབ་འཇུག་དང་དབང་ཕྱུག་དང་ཚངས་པ་ལྷར་འཛིན་པ་དང༌། རིག་བྱེད་བཞི་ཆོས་སུ་འཛིན་པ་དང༌། བདག་དང་རྟག་དངོས་སྨྲ་བ་དང༌། འཚེ་བ་ཆོས་སུ་སྨྲ་བ་དང༌། སངས་རྒྱས་པའི་ལུགས་ལ་སྡང་སྨྲས་བྱེད་པ་སོགས་སུ་ཕལ་ཆེར་མཐུན་ནོ། ། མུ་སྟེགས་བྱེད་ཐམས་ཅད་ལྷ་དེ་གསུམ་ལ་སྐྱབས་སུ་འགྲོ་ཞིང་རིག་བྱེད་བཞི་འཛིན་པ་དང༌། ཉེར་ལེན་བཞི་ལས་བདག་ཏུ་སྨྲ་བ་ཉེ་བར་ལེན་པ་སྤྱིའི་ཆོས་ཡིན་ཏེ། རྒྱང་འཕེན་པས་ཀྱང་འབྱུང་བཞི་དང་རྫས་གཅིག་པའི་བདག་འདོད་པའི་ཕྱིར་རོ། ། དེ་ལ་ལས་འབྲས་མེད་པར་འདོད་པས་འཇིག་རྟེན་པའི་ཡང་དག་པ་ལྟ་བ་ལས་རྒྱང་རིང་དུ་སོང་བའི་རྒྱང་འཕེན་པ་ནི། སྔོན་གྱི་ཚེ་ལྷ་དང་ལྷ་མིན་འཐབ་པ་ན་ལྷ་རྣམས་རང་བཞིན་དགེ་བས་འཐབ་རྩོད་ལ་སྤྲོ་བར་མ་གྱུར་པས་གཡུལ་ཕམ་པར་ཉེ་བ་ན། དྲང་སྲོང་ཕུར་བུས་ལྷ་རྣམས་འཐབ་མོ་ལ་གཞུག་པའི་ཆེད་དུ་ཆད་པར་ལྟ་བའི་གཞུང་བརྩམས་ཏེ་བསྟན་པས་ཡིད་ཆེས་ཏེ་ལྷ་རྣམས་གཡུལ་ལས་རྒྱལ། ཕྱིས་ཕུར་བུས་ལྟ་ངན་ལྷའི་ཡུལ་དུ་དར་བར་དོགས་ཏེ་གླེགས་བམ་གངྒཱའི་ཆུ་ལ་བསྐུར་བ་དྲང་སྲོང་ཞིག་གིས་རྙེད་ནས་འཕགས་ཡུལ་དུ་(༡༧༠བ)དར། དེ་ལས་བཏུས་ཏེ་དྲང་སྲོང་འཇིག་རྟེན་མིག་གིས་བརྩམས་པའི་རྩ་བ་ལ་འཇུག་སྟོབས་ཀྱིས་འགྲེལ་པ་བྱས་པའི་རྗེས་འབྲངས་ཆད་སྨྲའི་སྟོན་པ་སྙོམས་འཇུག་པ་དྲུག །རྗེས་སྒྲོགས་པ་དྲུག །རྟོག་གེ་པའམ་སྟོན་པ་དྲུག་ཏུ་གྲགས་པ་རྣམས་སོ། ། གཞན་ཡང་དྲང་སྲོང་འཇིག་མིག་གིས་རང་གི་བུ་མོ་ལ་བསྒྲོད་པར་འདོད་ནས་བརྩམས་པའང་བཤད་ལ་གང་ལྟར། དམ་བཅའ་ནི། སྒྲུབ་པ་བཞི་དང་དགག་པ་ལྔ་སྟེ། འབྱུང་བ་རྒྱུ་དུས་ན་མི་གསལ་བའི་བདག་དང༌། འབྲས་དུས་ན་ལུས་སེམས་རྫས་གཅིག་ཏུ་མངོན་དུ་གྱུར་པ་གསལ་བའི་བདག་དང༌། ལྷ་དང་ཡི་དྭགས་དམྱལ་བ་མེད་པས་འགྲོ་བ་དྲུག་མི་བདེན་ཅིང་འགྲོ་བ་གསུམ་ཡིན་ཏེ་གསལ་བ་མི་དང་དུད་འགྲོ། མི་གསལ་བ་འབྱུང་བཞི་རི་དང་ཤིང་སོགས་རྣམ་ཤེས་ཀྱི་ནུས་པ་མ་ཟད་པའི་འགྲོ་བ་བཅས་གསུམ་དང༌། རང་ཉིད་རྗེས་དཔག་མི་འདོད་པས་གཏན་ཚིགས་མེད་ཀྱང་གཞན་ལ་གྲགས་པའི་རྟགས་ཀྱི་དགོད་ཚུལ། བུམ་པ་ཆོས་ཅན། ལུས་སེམས་རྫས་གཅིག་པའི་སྐྱེས་བུ་དང་བུམ་པ་གང་རུང་གི་བརྡ་དང་བཅས་པ་ཡིན་ཏེ། ཨུཏྤལ་མིན་པའི་དངོས་པོ་ཡིན་པའི་ཕྱིར། དཔེར་ན། རྩིག་པ་བཞིན། ཞེས་སོགས་སྒྲུབ་པར་བྱེད་དོ། ། དགག་པ་ལྔ་ནི། སྲན་མ་ཟླུམ་ཞིང་ཚེར་མ་རྣོ་བ་སོགས་ཀྱིས་དཔེས་བདེ་སྡུག་ངོ་བོ་ཉིད་ཀྱིས་བྱུང་བས་རྒྱུ་ལ་སོགས་པ་མ་མཐོང་བ་ནི་མེད་པར་སྨྲ་སྟེ། དེའང༌། ཚེ་སྔ་ཕྱི་འགོག་པ་དང༌། ལས་རྒྱུ་འབྲས་འགོག་པ་དང༌། དཀོན་མཆོག་གསུམ་འགོག་པ་དང༌། མ་མཐོང་བའི་དངོས་པོ་འགོག་པ་དང༌། རྗེས་དཔག་ཚད་མ་འགོག་པའོ།། འདི་དག་ནི་ལྟ་བ་རྣམས་ཀྱི་མ་རུང་པ་དང༌། གྲུབ་མཐའ་སྨྲ་བ་རྣམས་ཀྱི་ཐ་ཆད་དང༌། རྨོངས་པ་རྣམས་ཀྱི་ཚབ་ཆེ་ཤོས་ཡིན་པས་ཐར་པ་ལྟ་ཅི་སྨོས། མཐོ་རིས་ཀྱི་ལུས་རྟེན་ཙམ་ཐོབ་པའི་རྒྱུའང་མེད་དེ། འབྲས་བུ་ངན་འགྲོ་འབའ་ཞིག་པའོ། ། ད༢ གཉིས་པ་[རྟག་པར་སྨྲ་བའི་དབྱེ་བ་དགོད་པ་]ནི། རྟག་པར་སྨྲ་བའི་ཕྱི་མོ་གྲངས་ཅན་པ། ། ཚད་མ་གསུམ་གྱིས་དེ་ཉིད་(༡༧༡ན)ཉེར་ལྔ་གཞལ། ། ཁྱད་པར་ལྔ་ལྡན་རྩ་བའི་རང་བཞིན་བདག ། གཙོ་བོ་ཡོན་ཏན་གསུམ་སྙོམས་དེ་ལས་བློ། ། དེ་ལས་ང་རྒྱལ་དེ་ཙམ་འབྱུང་ཆེན་ལྔ། ། ལས་དང་དབང་པོ་ཡིད་བཅས་ལུགས་འབྱུང་འཁོར། ། རྣམ་འགྱུར་ལྡོག་པས་སྐྱེས་བུ་ཐར་པར་འདོད། ། མུ་སྟེགས་རྟག་པར་སྨྲ་བ་ཐམས་ཅད་ཀྱི་ཕྱི་མོ་ནི་གྲངས་ཅན་པ་ཡིན་ཏེ། དེའང་སྔོན་ཚེ་ལོ་དཔག་མེད་ཀྱི་དུས་དྲང་སྲོང་སེར་སྐྱ་ཞེས་པས་བསྟི་གནས་སུ་བསྒོམས་པས་མུ་སྟེགས་ཀྱི་ཐར་པ་ཐོབ་པར་རློམ་ནས་རང་གིས་མཐོང་བའི་དེ་ཉིད་གཞན་ལ་བསྟན་ཕྱིར་གྲངས་ཅན་གྱི་བསྟན་བཅོས་བྱས་ཤིང༌། ཕྱིས་རྣལ་འབྱོར་སྤྱོད་པ་དབང་ཕྱུག་ལྷར་འཛིན་པའི་དྲང་སྲོང་ཆུ་ཀླུང་གིས་ཀྱང་དབང་ཕྱུག་ནག་པོའི་རྒྱུད་སུམ་ཅུ་པ་དང་དྲུག་པ་སོགས་བྱས་པས་དེ་དག་སྟོན་པར་འཛིན་ལ། དབུ་མ་ལ་འཇུག་པ་ལས། དེ་དབྱེ་ཅུང་ཟད་ཅུང་ཟད་ལ་བརྟེན་ནས། ། མུ་སྟེགས་ཅན་རྣམས་ལུགས་ནི་ཐ་དད་གྱུར། ། ཞེས་གསུངས་པ་ལྟར་འདི་ལས་ལུགས་སྲོལ་ཐ་དད་པ་མང་དུ་གྱེས་སོ། ། འདིའི་གྲུབ་མཐའ་ནི། མངོན་སུམ་ཚད་མ་དབང་པོའི་འཇུག་པ། རང་དོན་རྗེས་དཔག་ནོར་བདག་གི་འབྲེལ་པ་སོགས་འབྲེལ་པ་བདུན། གཞན་དོན་རྗེས་དཔག་རྣལ་འབྱོར་ལྡན་པ་དང་བསལ་ཏེ་འོངས་པ་གཉིས་ཏེ། འཇལ་བྱེད་ཚད་མ་གསུམ་གྱིས་གཞལ་བྱའི་ཤེས་བྱ་དེ་ཉིད་ཉེར་ལྔ་གཞལ་བར་འདོད་དེ། ཉེར་ལྔ་ནི། གཙོ་བོ་དང་ཆེན་པོ་དང་ང་རྒྱལ་གསུམ་དང༌། སྒྲ་རེག་གཟུགས་རོ་དྲི་སྟེ་དེ་ཙམ་ལྔ། མཁའ་སོགས་འབྱུང་བ་ལྔ། རྣ་བ་པགས་པ་མིག་ལྕེ་སྣ་སྟེ་ནང་བློའི་དབང་པོ་ལྔ་དང༌། ལག་རྐང་འཕོངས་འདོམས་ངག་སྟེ་ཕྱི་ལས་ཀྱི་དབང་པོ་ལྔ་དང༌། གཉིས་ཀའི་དབང་པོ་ཡིད་དེ་དབང་པོ་བཅུ་གཅིག །ཐ་མ་བདག་ཤེས་རིག་གི་སྐྱེས་བུ་རྣམས་སོ། ། བསྡུ་ན། གཙོ་བོ་དང་བདག་ཤེས་རིག་གི་སྐྱེས་བུ་གཉིས་སུ་འདུ་སྟེ། རང་བཞིན་དང་རང་བཞིན་མིན་པ་གཉིས་སོ། ། དེ་ལ་བདག་གི་ངོ་བོ་ནི། བྱེད་པ་པོ་དང་། ཟ་བ་པོ་གཉིས་ལས། ཡུལ་ལ་ལོངས་སྤྱོད་པས་(༡༧༡བ)ཟ་བ་པོ། འཇིག་མི་སྲིད་པས་རྟག་པ། གང་ཡང་མི་སྐྱེད་པས་བྱེད་པོ་མིན་པ། རྡུལ་མུན་སྙིང་སྟོབས་གསུམ་གྱི་ཡོན་ཏན་མེད་པ། ཡུལ་དུས་ཐམས་ཅད་ལ་ཁྱབ་པའི་ཕྱིར་བྱ་བ་མེད་པ་སྟེ། ཁྱད་པར་རམ་མཚན་ཉིད་ལྔ་དང་ལྡན་པ། རྣམ་འགྱུར་རྣམས་ཀྱི་རྩ་བའི་རང་བཞིན་བདག་ཤེས་རིག་གི་སྐྱེས་བུ་ཞེས་བྱའོ། ། གཙོ་བོ་ལ། སྤྱིའི་ངོ་བོ་ནི། བདག་ལས་གཞན་ཉེར་བཞི་པོ་ཀུན་ལ་སྤྱི་མིང་གཙོ་བོ་ཞེས་བྱ་ཞིང༌། ཡུལ་ཡུལ་ཅན་གཉིས་ལས། ཡུལ་དང་ཡོན་ཏན་དང་བེམ་པོ་ཡིན་ནོ། ། ཁྱད་པར་ཉེར་ལྔའི། དང་པོ་རང་བཞིན་རྒྱུའི་གཙོ་བོ་ནི། རྡུལ་མུན་སྙིང་སྟོབས་ཀྱི་ཡོན་ཏན་གསུམ་ཆ་སྙོམས་པར་གནས་པའི་སྐབས་ཏེ། དེ་གསུམ་གྱི་མཚན་ཉིད་ཀྱང་། གཡོ་དང་འཇུག་པ། ལྕི་དང་གཡོགས་པ། ཡང་དང་རབ་ཏུ་གསལ་བའོ། ། འདི་ནི་རང་བཞིན་ཡིན་གྱི། རྣམ་འགྱུར་མ་ཡིན་པས་རབ་ཏུ་བྱེད་པ་ཁོ་ན་ཡིན་ཟེར་རོ། ། གཙོ་བོ་དེ་ལས་ཆེན་པོ་ཞེས་བྱ་བའི་བློ་བྱུང༌། དེ་ལས་ང་རྒྱལ་གསུམ་བྱུང༌། དེ་ལས་མཆེད་པ་ནི་རྣམ་འགྱུར་ང་རྒྱལ་ལས་དེ་ཙམ་ལྔ། དེ་ལྔ་ལས་འབྱུང་ཆེན་ལྔ། སྙིང་སྟོབས་ང་རྒྱལ་ལས་ལས་ཀྱི་དབང་པོ་ལྔ་དང༌། བློའི་དབང་པོ་ལྔ། གཉིས་ཀའི་དབང་པོ་ཡིད་གཅིག་བཅས། མུན་ཅན་ང་རྒྱལ་ནི་ང་རྒྱལ་སྔ་མ་གཉིས་ཀ་འཇུག་པར་བྱེད་པ་པོའོ། །བློ་ང་རྒྱལ་དེ་ཙམ་ལྔ་བཅས་རང་བཞིན་ལ་ལྟོས་ནས་རྣམ་འགྱུར་ཡིན་ལ། བློ་ཆེན་པོ་ང་རྒྱལ་ཆེན་པོ་སོགས་རང་གི་རྣམ་འགྱུར་ལ་ལྟོས་ནས་རང་བཞིན་དུ་བཞག །གཞན་བཅུ་དྲུག་པོ་རྣམ་འགྱུར་ཁོ་ནར་འདོད་དེ། བདག་ཤེས་རིག་གི་སྐྱེས་བུས་རྣམ་འགྱུར་སྐྱེད་བྱེད་རང་བཞིན་གྱི་མཚང་མ་རིག་པར་ལུགས་འབྱུང་དུ་ཞེན་ནས་ཡུལ་སྒྲ་སོགས་ལ་ལོངས་སྤྱོད་པ་དེ་སྲིད་དུ་སྐྱེས་བུ་དེ་འཁོར་བ་པ་ཡིན་ལ། དེས་དེ་ལ་ལོངས་སྤྱོད་པས་སུན་ཏེ་བསམ་གཏན་བསྒོམ་པའི་མངོན་ཤེས་ཀྱིས་རང་བཞིན་གྱི་སྤྱོད་པའི་མཚང་ལ་བལྟས་པས་དེ་ངོ་ཚ་བས་སྐྱེངས་ནས་བྲོས་པར་འགྱུར་ལ། དེ་དང་བྲལ་བས་དེས་བསྐྱེད་པའི་རྣམ་འགྱུར་(༡༧༢ན)ཐམས་ཅད་ཀྱང་སྐྱེ་བའི་རིམ་པ་ལས་བཟློག་ནས་དེ་ཉིད་དུ་ཐིམ་སྟེ། བདག་སྐྱེས་བུ་འབའ་ཞིག་གསལ་བར་གནས་པའི་ཚེ་ཐར་པ་ཐོབ་པར་འདོད་དོ། ། བྱེ་བྲག་པ་ནི་རྫས་དང་ཡོན་ཏན་ལས། ། སྤྱི་བྱེ་འདུ་བ་ཚིག་གི་དོན་དྲུག་སྨྲ། ། རིག་པ་ཅན་པ་དེ་མཚུངས་ཚད་མ་བཞི། ། གསལ་བའི་གཟུགས་བརྒྱད་སོགས་འདོད་དབང་ཕྱུག་པ། ། གཉིས་པ་བྱེ་བྲག་པ་ནི། དྲང་སྲོང་གཟེགས་ཅན་གྱི་རྗེས་སུ་འབྲང་བ་སྟེ། བདག་དུས་ཕྱོགས་ནམ་མཁའ་ཡིད་འབྱུང་བ་བཞི་བཅས་དགུ་པོ་ནི་རྫས་བློ་བདེ་སྡུག་འབད་པ་ཆོས་ཆོས་མིན་བྱ་བའི་ཤུགས་བཅས་བདག་གི་ཡོན་ཏན་དགུ། འདེགས་འཇོག་བརྐྱང་བསྐུམ་འགྲོ་བ་ལྔ་ནི་ལས། བྱེ་བྲག་ལ་ཁྱབ་པར་བྱེད་པ་ནི་སྤྱི། སྤྱིའི་དོན་རྣམས་གསལ་བར་བྱེད་པ་བྱེ་བྲག །རྫས་རྣམས་དངོས་འབྲེལ་རྒྱུད་འབྲེལ་གཉིས་སུ་ཡོད་པ་འདུ་བ་སྟེ་ཤེས་བྱ་ཚིག་གི་དོན་དྲུག །ཚད་མ་གསུམ་དང་སྒྲ་བྱུང་ཚད་མ་བཅས་བཞིས་འཇལ་བར་བྱེད་ལ།