Tibetan
སྤྱོད་རྣམ་པར་དག་པ་ལ་སྟོང་པར་ཞུགས་པའི་ཐ་སྙད་བྱེད་ཅིང༌། སླར་རབ་བྱུང་གི་ལོའི་ནག་ཟླའི་ཚེས་གཅིག་ནས་ལོ་ཟླ་གཟའ་སྐར་ཐམས་ཅད་ཀྱི་རྟག་པའི་ལོངས་སྤྱོད་གསར་དུ་འཆར་བ་ཡིན་ནོ། ། ད༣ གསུམ་པ་[ཕྱི་རོལ་གྱི་བརྩི་བའི་གཞི་བཤད་པ་]ནི། ནང་ཉིད་ཇི་ལྟར་ཕྱི་རོལ་སྣང་བ་ལས། ། བགྲོད་བྱ་ཁྱིམ་སྐར་བགྲོད་བྱེད་གཟའ་རྣམས་སྐྱེས། ། ཉི་མས་ཁྱིམ་སྤྱོད་དུས་བཞི་གཡས་སུ་འཁོར། ། སྐར་ཁྱིམ་གོ་ལ་རླུང་འགྲོས་ཉིན་ཞག་རེར། ། གཡས་བསྐོར་གཟའ་རྣམས་རང་འགྲོས་ཡུལ་ལ་སྤྱོད། ། ནང་རྡོ་རྗེའི་ལུས་ཀྱི་གནས་ལུགས་ཇི་ལྟ་བར་ཕྱི་རོལ་དུ་སྣང་བ་ལས། ཐོག་མར་བགྲོད་བྱའི་ཡུལ་གོ་ལའི་སྟེང་(༡༥༩བ)དུ་ཁྱིམ་བཅུ་གཉིས་རྒྱུ་སྐར་ཉེར་བརྒྱད་རྣམས་ཆགས། དེའི་སྟེང་དུ་བགྲོད་བྱེད་གཟའ་བཅུ་པོ་སྐྱེས། གནམ་ལ་ཉི་མས་ཁྱིམ་བཅུ་གཉིས་པོ་གཡོན་བསྐོར་དུ་སྤྱོད་ཅིང་ས་ལ་ལས་ཀྱིས་དུམ་བུ་བཅུ་གཉིས་སུ་དུས་བཞི་གཡས་བསྐོར་གྱི་ཚུལ་གྱིས་འཕོ་ཞིང་རྒྱུ་སྟེ་འཁོར་བའོ། ། དེ་ལྟར་རྒྱུ་སྐར་གྱི་ཁྱིམ་དང་གོ་ལ་རྣམས་ནི་རླུང་འགྲོས་ལ་བརྟེན་ནས་ཉིན་ཞག་རེ་རེར་གཡས་སུ་བསྐོར་ཅིང༌། གཟའ་རྣམས་ནི་རང་རང་གི་འགྲོས་ཀྱིས་ཡུལ་རྒྱུ་སྐར་ཁྱིམ་གྱི་ལོངས་སྤྱོད་ལ་སྤྱོད་པའོ། ། དེའང་གཟའ་གཞན་ནི། རྒྱུ་སྐར་གྱི་སྟེང་དུ་རང་འགྲོས་ཁ་ཤར་དུ་ཕྱོགས་པས་རི་རབ་ལ་གཡོན་བསྐོར་གྱིས་རྒྱུ་ལ། སྒྲ་གཅན་ནི། དོན་དམ་པའི་རིགས་པས་བསོད་ནམས་དང་ལྡན་པའི་ཕྱིར་གཟའ་གཞན་གྱི་སྟོབས་འཕྲོག་ཅིང༌། ཁྱིམ་གྱི་རླུང་འགྲོས་བཞིན་དུ་ཁ་ནུབ་ཏུ་ཕྱོགས་ནས་རི་རབ་ལ་གཡས་བསྐོར་གྱིས་བསྐོར་ཞིང༌། ནམ་གྲུ་ནས་ཐ་སྐར་གྱི་བར་ལུགས་ལྡོག་ཏུ་སྤྱོད་དོ། ། དེའང་སྒྲ་གཅན་ནི། ནང་དུ་དབུ་མ་ཡེ་ཤེས་ཀྱི་ཆ་ཡིན་ལ། དེ་ནི་ཀུན་རྫོབ་འཁྲུལ་པའི་རྣམ་པ་འཇིག་པར་བྱེད་པ་རྡོ་རྗེ་ལྟ་བུའི་ཏིང་ངེ་འཛིན་གྱིས་རྟོགས་པར་བྱ་བ་ཡིན་པའི་རིགས་པས་ཕྱི་འཇིག་རྟེན་གྱི་ཁམས་ལ་ཡང་གཟའ་གཞན་ནི་གཡོན་དུ་སྤྱོད་ཅིང་སྟོབས་དམན་ལ། སྒྲ་གཅན་བསོད་ནམས་ཀྱི་སྟོབས་ལྷག་པས་སོ། ། དུས་གསུམ་ཚིགས་མཚམས་མུན་ཅན་ཉི་ཟླ་ཕྲད། ། དེས་ན་རང་ལུས་ལ་དབུ་མ་སྟོང་པའི་རང་བཞིན་ཁམས་སྒྲིབ་ཐོགས་དང་བྲལ་བ་ཡར་སྣ་ཆུའི་ཁམས་དཔྱིད་ཀྱི་གོང་བུ་དང་མར་སྣ་མེའི་ཁམས་འབར་བའི་ཐིག་ལེ་དང་ལྡན་པ། ཕྱི་ནང་དག་པ་གཅིག་པའི་ཕྱིར་སྒྲ་གཅན་ཡང་ལུས་སྟོང་པ་ནམ་མཁའི་ཁམས་སྒྲིབ་ཐོགས་དང་བྲལ་ལ། གདོང་ཆུའི་རང་བཞིན་ནག་པོ་མུན་པའི་བདག་ཉིད་དང༌། འཇུག་མ་མེའི་ཁམས་དམར་པོ་འབར་བའི་རང་བཞིན་གཉིས་ནི་སྒྲིབ་བྱེད་ཀྱི་ནུས་པ་ཅན་རགས་པའི་རྣམ་པ་སྟེ། ནང་དུ་རྡུལ་དང་སྙིང་སྟོབས་དང་མུན་པའི་དུས་གསུམ་གྱི་ཐ་མར་མུན་པ་ཆེན་(༡༦༠ན)པོའི་རླུང་གིས་རོ་མའི་སྟོབས་འཕྲོག་ཅིང་ས་ཆུ་མེ་རླུང་ནམ་མཁའ་ཡེ་ཤེས་ཀྱི་ཁམས་དྲུག་རྫོགས་པ་ན་རྐྱང་མའི་སྟོབས་འཕྲོག་པས་ཕྱི་རོལ་དུ་ཟླ་བ་གཉིས་ལ་ཡན་ལག་རེའམ། དུས་རེར་བྱས་པའི་དུས་གསུམ་རྫོགས་པའི་དཀར་ནག་གི་ཚིགས་མཚམས་སུ་མུན་ཅན་ཉི་མ་ལ་འཇུག་ཅིང༌། ཟླ་བ་དྲུག་རྫོགས་པ་ན་ཟླ་བ་ལ་སྒྲ་གཅན་འཇུག་པར་སྣང་བ་དང༌། ཁྱད་པར་ཉི་འཛིན་ལ་རྟེན་འབྲེལ་ཡན་ལག་བཅུ་གཉིས་རིམ་པར་འཁོར་བའི་རེག་པའི་རྟེན་འབྲེལ་གནམ་སྟོང་ལ་འཆར་བ་དགོས་ཏེ། དེ་ཡང་ལུག་གི་ཁྱིམ་ཟླ་ནས་བརྩམས་ཏེ་ཟླ་བ་བཅུ་གཉིས་ཡན་ལག་རེར་འཇོག་ལ། ཡན་ལག་རེའི་ཉིན་ཞག་དང་པོ་ལ་མ་རིག་པ། གཉིས་པ་ལ་འདུ་བྱེད། གསུམ་པ་ལ་རྣམ་ཤེས། བཞི་པ་ལ་མིང་གཟུགས། ལྔ་པ་ལ་སྐྱེ་མཆེད་དྲུག །དྲུག་པ་ལ་རེག་པ། བདུན་པ་ལ་ཚོར་བ། བརྒྱད་པ་ལ་སྲེད་པ། དགུ་པ་ལ་ལེན་པ། བཅུ་པ་ལ་སྲིད་པ། བཅུ་གཅིག་པ་ལ་སྐྱེ་བ། བཅུ་གཉིས་པ་ལ་རྒ་ཤི་དང༌། བཅུ་གསུམ་པ་ལ་མ་རིག་པ་ནས་ཉེར་བཞི་ལ་རྒ་ཤི་དང༌། ཡང་ཉེར་ལྔ་ལ་མ་རིག་པ་ནས་དྲུག་པ་ལ་རྒ་ཤི། བདུན་པ་ལ་མ་རིག་པ་ནས་བཅོ་བརྒྱད་པ་ལ་རྒ་ཤི་དང༌། བཅུ་དགུ་ལ་མ་རིག་པ་ནས་གནམ་སྟོང་ལ་རྒ་ཤིའོ། ། མདོར་ན། གནམ་སྟོང་ལ་རེག་པ་ཡོད་པ་དང་རྒ་ཤི་ཡོད་པ་སྤེལ་མར་འབྱུང་བའི། རེག་པ་ཡོད་པའི་ཚེ་འཛིན་རེག་པའི་ཡན་ལག་དབུས་དེར་སྒྲ་གཅན་རྒྱུ་བ་དེ་ཡིས་ཟླ་བ་ཉི་མ་དག་ནི་འཛིན་པར་འགྱུར་ཞེས་སོ། ། ཉི་ཟླ་རླུང་འགྲོས་ཁྱིམ་ཚེས་ཉིན་ཞག་བྱུང༌། ། དུས་གསུམ་མཚམས་བཞི་ཐུན་བརྒྱད་དུས་སྦྱོར་ནི། ། བཅུ་གཉིས་ཡུད་ཙམ་སུམ་ཅུ་དབུགས་ཉི་ཁྲི། ། ཆིག་སྟོང་སུམ་བརྒྱ་ཆུ་སྲང་སུམ་སྟོང་དང༌། ། དྲུག་བརྒྱ་ཆུ་ཚོད་དྲུག་ཅུས་གོ་ལ་འཁོར། ། ཉི་མ་དང་ཟླ་བ་དང་རླུང་སྟེ་གོ་ལའི་འགྲོས་གསུམ་ལ་བརྟེན་ནས་ཁྱིམ་ཞག་དང༌། ཚེས་ཞག་དང༌། ཉིན་ཞག་རྣམས་བྱུང་ཞིང༌། སྔ་མ་རིང༌། (༡༦༠བ)བར་མ་ཐུང༌། ཕྱི་མ་དེ་གཉིས་ཀྱི་བར་ཏེ་ཞིབ་པར་གོང་དུ་བཤད་ཟིན་པ་ལྟར་རོ། ། དེའང་ལོ་ཟླ་ལ་སོགས་པ་དུས་རྣམ་པར་གཞག་པའི་གཙོ་བོ་ནི་ཉི་མའི་འགྲོས་ལ་བརྟེན་པ་སྟེ། ཉིན་ཞག་གཅིག་ལ་དུས་སྦྱོར་བཅུ་གཉིས་ཡོད་པའི་དུས་སྦྱོར་བཞི་ལ་དུས་རེར་བྱས་པའི་དུས་གསུམ་དང༌། དུས་སྦྱོར་གསུམ་ལ་ཐུན་མཚམས་རེར་བྱས་པའི་ཐུན་མཚམས་བཞི་དང༌། དུས་སྦྱོར་ཕྱེད་དང་གཉིས་ལ་ཐུན་ཚོད་རེར་བྱས་པའི་ཐུན་ཚོད་བརྒྱད་དང༌། དབྱུ་གུ་ལྔ་ལ་དུས་སྦྱོར་རེ་བྱས་པའི་དུས་སྦྱོར་བཅུ་གཉིས་དང༌། ཆུ་ཚོད་གཉིས་ལ་ཡུད་ཙམ་རེར་བྱས་པའི་ཡུད་ཙམ་སུམ་ཅུ་དང༌། དབུགས་ཉི་ཁྲི་ཆིག་སྟོང་དྲུག་བརྒྱ་དང༌། དབུགས་དྲུག་ལ་ཆུ་སྲང་དུ་བྱས་པའི་སྲང་སུམ་བརྒྱ་དྲུག་ཅུ་དང༌། ཆུ་སྲང་དྲུག་ཅུ་ཆུ་ཚོད་དུ་བྱས་པའི་ཆུ་ཚོད་དྲུག་ཅུས་ཞག་རེ་བཞིན་གོ་ལ་འཁོར་བར་འགྱུར་ལ། གཟའ་གཞན་ཡང་དེའི་རྗེས་སུ་འབྲངས་པས་འཇིག་རྟེན་དུ་རྒྱུ་ཞིང་ལེགས་ཉེས་ཀྱི་འབྲས་བུ་འབྱིན་པར་བྱེད་དོ། ། འདིར་ཞར་བྱུང་ལོ་ཟླའི་མགོ་འཛིན་པའི་ཚུལ་ཡང་། མདོ་སྡེ་ཉི་མའི་སྙིང་པོར། བདག་གིས་རྒྱུ་སྐར་སྨིན་དྲུག་བརྗོད། ། ཟླ་བ་ཉ་ཚེ་ཟླ་རངས་འགྱུར། ། སྟོན་ཟླ་ཐ་ཆུང་ཞེས་གྲགས་པ། ། ལོ་འགོར་བདག་གིས་བརྗོད་པར་བྱ། ། ཞེས་དང་པོར་ལོ་ལ་བཀོད་པའི་གོ་རིམ་གྱིས་རྒྱུ་སྐར་གྱི་དང་པོ་སྨིན་དྲུག་ཡིན་པས་ན་སྨིན་དྲུག་གི་ཟླ་བར་ལོ་འགོར་གསུངས་ཤིང༌། འཇིག་རྟེན་གྱི་གྲགས་པས་དཔྱིད་ར་ལོ་འགོར་བྱེད་པ་ལ་འདུལ་མངོན་ལས་ལུགས་དེ་གཉིས་ཀ་དང༌། ཐ་སྐར་གྱི་ཟླ་བ་ལོ་འགོར་བྱེད་པའང་འབྱུང་ཞིང༌། རྒྱ་རྩིས་པས་ཧོར་ཟླ་དང་པོ་སྟག་ལ་དཔྱིད་རར་བྱས་ནས་དེ་ལོ་འགོར་འཇོག་ཀྱང་དུས་ཀྱི་འཁོར་ལོ་འདིར་འཇིག་རྟེན་ཆགས་པའི་དབང་དུ་བྱས་པའི་ལོ་འགོ་དང༌། ཉི་ཁྱིམ་གཙོ་བོར་བྱས་པའི་ལོ་འགོ་དང༌། ར་གོས་པ་གཙོ་བོར་བྱས་པའི་ལོ་འགོ་སྟེ་གསུམ་ལས་དང་པོ་ནི། དབྱར་འབྲིང་ཀརྚའི་ཟླ་བ་ནས་འཛིན་ཏེ་འཇིག་རྟེན་ཆགས་ནས་ཆེར་མ་ལོན་པ་སྟོན་དཔྱིད་དང་ཉི་(༡༦༡ན)ཟླ་སོགས་མེད་པ་ན་ཉི་མ་ནབས་སོའི་བཞི་གསུམ་ཀརྚའི་ཁྱིམ་གྱི་དང་པོ་ནས་ལོངས་སྤྱོད་སྐྱེས་པས་དུས་ཀྱི་དང་པོ་དབྱར་ཡིན་པར་གསུངས་པས་སོ། ། གཉིས་པ་ནི། ཉི་མ་ལུག་ཁྱིམ་དུ་ཐུགས་པའི་དུས་ཏེ་གཟའ་སྐར་དང་དུས་རྣམས་ཉི་མའི་རྗེས་སུ་འབྲང་ཞིང་དེའི་ཁྱིམ་གྱི་དང་པོ་ལུག་ཡིན་པས་སོ། ། གསུམ་པ་ནི། ནག་ཟླའི་དཀར་ཚེས་གཅིག་ནས་ལོ་མགོ་འཛིན་པ་སྟེ་དུས་འཁོར་གསུངས་པའི་ཟླ་བ་ཡིན་པའི་ཕྱིར་རོ། ། འདི་དང་འཇིག་རྟེན་པ་དང་ཕྱི་རོལ་པ་ནི་ཡར་ངོ་སྔོན་འགྲོར་བྱེད་ལ། མཛོད་འགྲེལ་ལས་ཟླ་བ་ཐམས་ཅད་ནི་མར་གྱི་ངོ་སྔ་སྟེ་ཞེས་གསུངས་ཤིང༌། སྡོམ་བརྩོན་དང་པོར་ངལ་བ་ལྟར་སྣང་ཡང་མཐར་རྒྱས་པར་འགྱུར་བའི་ཆོས་མཐུན་གྱིས་སངས་རྒྱས་པ་མར་ངོ་སྔོན་འགྲོ་བྱེད་པ་མང་བས་རྒྱུད་འགྲེལ་དུ་ཡང་ཕལ་ཆེར་མར་ངོ་སྔོན་འགྲོ་བྱས་ཀྱང་དགོས་པའི་དབང་གིས་རེས་འགའ་ཡར་ངོ་སྔོན་འགྲོར་ཡང་གསུངས་ལ། ཡང་རྩ་རྒྱུད་ལས། མར་ངོ་སྔོན་འགྲོ་དང་བསྡུས་རྒྱུད་དུ་མུ་སྟེགས་གཞུག་ཕྱིར་ཡར་ངོ་སྔོན་འགྲོ་གསུངས་ཞེས་ཀྱང་གྲགས་སོ། ། ད༤ བཞི་པ་[ཇི་ལྟར་བརྩི་བའི་ཚུལ་བཤད་པ་]ནི། གཟའ་ཚེས་སྐར་སྦྱོར་བྱེད་པའི་ཡན་ལག་ལྔ། ། གཟའ་ལྔ་སྒྲ་གཅན་ཏཏྐཱལ་སྦྱོར་ཚུལ་བརྟག ། འབྲས་བུ་ལུང་སྟོན་རྩིས་ཕྲན་གཞན་ཡང་བསླབ། ། དེ་ལྟར་བརྩི་བྱའི་གཞི་དང་རྩི་བྱེད་ཀྱི་གནད་རྣམས་ལེགས་པར་ངེས་ནས། ཉིན་རེ་ལ་སོགས་པའི་ངེས་པ་ཇི་ལྟར་རྩི་བའི་ཚུལ་ནི། ཉི་མ་སོགས་རེས་གཟའ་བདུན། ཐ་སྐར་སོགས་རེས་འགྲོགས་ཟླ་སྐར་རམ་རོས་ཀྱི་སྐར་མ། ཉི་མས་སྤྱོད་པའི་རྒྱུ་དཀར། སེལ་བ་ལ་སོགས་བཞི་སྦྱོར་བ་ཉེར་བདུན། འཕོ་བའི་བྱེད་པ་བདུན་དང་རྟག་བྱེད་བཞི་སྟེ་ཡན་ལག་ལྔ་ཇི་ལྟར་འཆར་བ་དང༌། དྲག་གཟའ་གསུམ། ཞི་གཟའ་གཉིས་ཏེ་གཟའ་ལྔ་པོ་རྒྱུ་སྐར་གྱི་ཡུལ་ལ་འགྲོས་བཞིས་ཇི་ལྟར་རྒྱུ་བ་དང༌། སྒྲ་གཅན་གདོང་མཇུག་གང་དུ་སྤྱོད་པ། ཏཏྐཱ་ལ་སྟེ་དུས་སྦྱོར་གང་ཞིག་འཆང་བ། (༡༦༡བ)ཆོས་དང་དུས་ལ་རྩ་བ་དང་ཡན་ལག་གི་དབྱངས་འཆར་བའི་ཚུལ་རྣམས་ཞིབ་མོར་བརྟག་ཅིང༌། འབྲས་བུ་བཟང་ངན་ལུང་སྟོན་པར་བྱེད་པ་དུས་འཁོར་ལས་གསུངས་པ་དང༌། གཡུལ་ལས་རྣམ་པར་རྒྱལ་བའི་རྒྱུད་དོན་དབྱངས་འཆར་བ་ལ་གཙོ་བོར་བརྟན་ཅིང་མན་ངག་གནད་ཀྱི་འཁོར་ལོ་རྣམས་ཀྱིས་བླང་དོར་ལྐོག་གྱུར་མངོན་སུམ་དུ་སྟོན་པ་རྣམས་དང༌། བརྩི་བྱ་འབྱུང་བ་ལྔ་ལ། རྩི་བྱེད་རང་བཞིན་གཞིའི་གཙུག་ལག་དང༌། འབྱུང་བ་རང་རྒྱུད། སྣང་བ་ཡུལ། གཅོད་བྱེད་ཡིད། འཛིན་པ་སེམས་ཀྱི་གབ་ཙེ་བཞིས་བསྡུས་པའི་མ་རིག་འཁྲུལ་སྣང་གི་གཙུག་ལག་གཉིས་ཀྱི་སྒོ་ནས་ལེགས་ཉེས་ལུང་བསྟན་པ་འབྱུང་རྩིས་སམ་ནག་རྩིས་སུ་གྲགས་པ་སོགས་རྩིས་ཕྲན་གཞན་ཡང་བསླབ་པར་བྱའོ། ། ཐ༢ གཉིས་པ་སྙན་ངག་བཤད་པ་ལ་གཉིས། ད༡ ལུས་དང༌། ད༢ རྒྱན་ནོ། ། ད༡ དང་པོ་ནི། སྙན་དངགས་འདོད་དོན་ལུས་ལ་བཅད་ལྷུག་སྤེལ། ། གྲོལ་བ་རིགས་མཛོད་འདུས་པ་སརྒས་བཅིངས། ། ཚིགས་བཅད་རྐང་བཞི་ལྷུག་པ་བརྗོད་དང་གཏམ། ། སྤེལ་མ་གཙོ་ཕལ་ཟློས་གར་ཙམྤཱུ་སྟེ། ། དེའང་མདོ་ལས། དམ་པའི་ཆོས་གསལ་བར་བྱ་བའི་ཕྱིར་སྙན་དངགས་བྱའོ། །དཀོན་མཆོག་གསུམ་ལ་བསྟོད་པ་བྱའོ། །དེ་ལས་བླ་ན་མེད་པའི་བྱང་ཆུབ་འཐོབ་པར་འགྱུར་རོ། །ཞེས་སོགས་འབྱུང་བ་ལྟར། མཁས་པའི་བྱ་བ་གསུམ་གྱི་མཆོག་རྩོམ་པ་བཟང་ངན་ནི་སྙན་དངགས་ཤེས་མི་ཤེས་ཀྱི་རྗེས་སུ་འགྲོ་ལྡོག་བྱེད་པས། འདིའི་གཙོ་བོའི་དོན་ལུས་དང་། རྒྱན་གཉིས་སུ་གནས་པ་ལས། དང་པོ་ནི། ལུས་ནི་རེ་ཞིག་འདོད་པ་ཡི། ། དོན་གྱི་རྣམ་བཅད་ཚིག་གི་ཕྲེང༌། ། ཞེས་གསུངས་པ་ལྟར། སྙན་དངགས་མཁན་གྱིས་བརྗོད་པར་འདོད་པའམ་བསམ་པའི་དོན་ནི་སྙན་དངགས་ཀྱི་ལུས་ཏེ། དོན་ངེས་པར་བྱས་ནས་ཚིགས་ལེགས་པར་བསྡེབས་པ་ལ་འདོད་པའི་དོན་གྱིས་རྣམ་པར་བཅད་པ་ཞེས་གསུངས་སོ། །(༡༦༢ན) ལུས་དེའང་ཚིགས་སུ་བཅད་པའི་ཚེགས་བར་བདུན་དང་དགུ་ལ་སོགས་པ་དང༌། མ་བཅད་པའི་ལྷུག་པ་དང༌། དེ་དག་སྤེལ་མ་གསུམ་དུ་གནས་སོ། ། ཚིགས་བཅད་སྦྱར་ཚུལ་ལམ་རིགས་ཀྱི་སྒོ་ནས་དབྱེ་ན། གྲོལ་བ། རིགས། མཛོད། འདུས་པ་ཞེས་བྱ་བ་བཞི་སྟེ། རིམ་བཞིན་ཚིགས་བཅད་གཅིག་གི་ནང་དུ་དོན་ཅིག་རང་དབང་ཅན་དུ་རྫོགས་པར་སྟོན་པ་དང༌། བརྗོད་བྱའི་དོན་གཅིག་ལ་ཤློཀ་མང་དུ་ཚོགས་ཤིང་བྱ་ཚིག་གཅིག་གིས་གསལ་བར་བྱས་པ་དང༌། གཅོད་མཚམས་དང་བྱ་ཚིག་སྣ་ཚོགས་ཤིང་ཤློཀའི་གྲངས་ངེས་མེད་པ་མཛོད་ལྟར་འདུས་པ་དང༌། བརྗོད་བྱའི་ཚིག་དོན་གཅིག་ལ་ཤློ་ཀ་དང་བྱ་ཚིག་མང་པོ་ཅན་ཏེ། དེ་དག་ཀྱང་སརྒྒ་ཞེས་པ་ལེའུ་རབ་བྱེད་དམ་སྐབས་དུ་མས་བཅིངས་པ་ནི་སྙན་དངགས་ཆེན་པོ་ཞེས་བྱའོ། ། ཚིགས་སུ་བཅད་པ་དེའང་། མངོན་པ་ཀུན་བཏུས་ལས། རྐང་པ་གཅིག་ནས་དྲུག་པའི་བར་དུ་ཡོད་པར་བཤད་ཀྱང་། སྙན་དངགས་པའི་ལུགས་རྐང་པ་བཞི་པ་ཁོ་ན་ཡིན་ལ། ལྷུག་པ་ལ་བརྗོད་པ་དང་གཏམ་ཞེས་མིང་གཉིས་སུ་ཡོད་ཀྱང༌། སློབ་དཔོན་དཎྜིས་དེ་གཉིས་དོན་གཅིག་ཏུ་བཞེད་ཅིང༌། པཎྜི་ཏ་རིག་བྱེད་རྒྱ་མཚོས། བརྗོད་པའི་མཚན་ཉིད། ལྷུག་པའི་སྙན་དངགས་གང་ཞིག །སྔོན་བྱུང་གི་གཏམ་རྒྱུད་ལས་དྲངས་པ་མ་ཡིན་པའི་རིགས་བརྗོད་པ་དང༌། གཏམ་གྱི་མཚན་ཉིད། ལྷུག་པའི་སྙན་དངགས་གང་ཞིག །སྔོན་བྱུང་བའི་གཏམ་བརྒྱུད་ལས་བརྩམས་ཏེ་བརྗོད་པ་ཤས་ཆེ་བ་ཡིན། ཞེས་བཞེད་ལ། མེ་ལོང་དུའང༌། སྔོན་བྱུང་གཏམ་ལས་གྱུར་པའམ། ། ཅིག་ཤོས་ལེགས་པ་ལ་བརྟེན་ནས། ། ཞེས་འབྱུང་བ་དང་མཐུན་པས་ལེགས་ཞེས་མཁས་པ་སྔ་རབས་པ་དུ་མ་གསུང་ངོ༌། ། སྤེལ་མ་ལའང་། གཙོ་བོ་དང་། ཕལ་པ་གཉིས་ཀྱི། དང་པོ་ནི། སྐད་རིགས་བཞི་ཚང་ཞིང་བཅད་ལྷུག་སྤེལ་མའི་བདག་ཉིད་ཅན་ཟློས་གར་ཉིད་ཡིན་ལ། གཉིས་པ་ནི། སྐད་རིགས་གང་རུང་ལ་(༡༦༢བ)བརྟེན་ཅིང་བཅད་ལྷུག་བསྲེས་པ་ཙམྤཱུ་ཞེས་གྲགས་པ་དེ་ཡིན་པ་དང༌། གཞན་ཡང་རྗོད་བྱེད་ཀྱི་སྒོ་ནས་དབྱེ་ན། ལེགས་སྦྱར། རང་བཞིན། ཟུར་ཆག །འདྲེས་མ་དང་བཞིར་བཤད་དོ། ། ད༢ གཉིས་པ་རྒྱན་ནི། མཛེས་བྱེད་ཚིག་སྦྱོར་མཐུན་མིན་ཡོན་ཏན་བཅུ། ། ཐུན་མོང་དོན་རྒྱན་སྒྲ་དང་གབ་པའི་ཚིག ། སྐྱོན་སྤངས་རྩོམ་པ་འཇིག་རྟེན་རྒྱན་དུ་བྱེད། ། མེ་ལོང་གཞུང་ལས། སྙན་དངགས་མཛེས་པར་བྱེད་པ་ཡི། ། ཆོས་རྣམས་རྒྱན་ཞེས་རབ་ཏུ་བརྗོད། ། ཅེས་འབྱུང་བ་ལྟར། ཇི་ལྟར་སྐྱེས་བུའི་ལུས་ལ་དོ་ཤལ་དང་དཔུང་རྒྱན་ལ་སོགས་པས་མཛེས་པར་བྱེད་པ་བཞིན་དུ་སྙན་དངགས་ཀྱི་ལུས་ལའང་སྦྱར་བ་ལ་སོགས་པའི་དོན་གྱི་རྒྱན་གྱིས་མཛེས་པར་བྱེད་པའི་ཕྱིར། དེ་ལྟ་བུའི་ཚིག་སྦྱོར་བ་ནི་རྒྱན་ཞེས་བྱ་སྟེ། དེའང་དཎྜིའི་གཞུང་ལས། ཤར་ལྷོའི་ལམ་སྲོལ་སོ་སོ་བ། ། སྦྱར་བ་རབ་དྭངས་མཉམ་ཉིད་དང༌། ། སྙན་དང་ཤིན་ཏུ་གཞོན་པ་དང༌། ། དོན་གསལ་བ་དང་རྒྱ་ཆེ་དང༌། ། བརྗིད་དང་མཛེས་ལྡན་ཏིང་ངེ་འཛིན། ། ཡོན་ཏན་འདི་བཅུ་བཻ་དརྦྷའི། ། ལམ་གྱི་སྲོག་ཏུ་བཤད་པ་ཡིན། ། འདི་དག་ཕལ་ཆེར་ལྡོག་པས་ནི། ། གཽ་ཌའི་ལམ་དག་མཚོན་པ་ཡིན། ། ཅེས་ཐུན་མོང་མིན་པའི་ཡོན་ཏན་བཅུ་དང༌། ཤར་ལྷོ་འདོད་པ་མཐུན་པ་ཐུན་མོང་གི་ལམ་སྲོལ་ལ། དོན་རྒྱན། སྒྲ་རྒྱན། གབ་ཚིག་གསུམ་སྟེ། དེ་ཡང༌། རང་བཞིན་བརྗོད་དང་དཔེ་དང་ནི། ། གཟུགས་ཅན་གསལ་བྱེད་བསྐོར་བ་དང༌། ། འགོག་དང་དོན་གཞན་བཀོད་པ་དང༌། ། ལྡོག་པ་ཅན་དང་སྲིད་པ་ཅན། ། བསྡུས་དང་ཕུལ་བྱུང་རབ་བརྟགས་དང༌། ། རྒྱུ་དང་ཕྲ་མོ་ཆ་དང་རིམ། ། དགའ་དང་ཉམས་ལྡན་གཟི་བརྗིད་ཅན། ། རྣམ་གྲངས་བརྗོད་དང་ཀུན་ཏུ་ཕན། ། རྒྱ་ཆེ་བསྙོན་དོར་སྦྱོར་བ་དང༌། ། ཁྱད་པར་མཚུངས་པར་སྦྱོར་བ་དང༌། ། འགལ་དང་སྐབས་མིན་བསྟོད་པ་དང༌། ། ཟོལ་བསྟོད་ངེས་པར་བསྟན་པ་དང༌། ། ལྷན་ཅིག་བརྗོད་དང་ཡོངས་བརྗེས་ཤེས། ། རབ་སྤེལ་དེ་ནས་དགོངས་པ་ཅན། ། (༡༦༣ན)འདི་དག་ཚིག་རྣམ་དག་གི་ནི། ། རྒྱན་དུ་སྔོན་གྱི་མཁས་པས་བསྟན། ། ཅེས་དོན་རྒྱན་སུམ་ཅུ་རྩ་ལྔ་ནང་གསེས་ཀྱི་དབྱེ་བས་དུ་མར་འགྱུར་བ་དང༌། སྒྲ་རྒྱན་ལ། ཟུང་ལྡན་དང་། བྱ་དཀའི་ཁྱད་པར་གཉིས། རྩེད་མོའི་འདུན་སར་བཞད་གད་ལ་སོགས་པའི་ཆེད་དུ་ཉེ་བར་མཁོ་བའི་གབ་ཚིག་གི་རྒྱན་བཅུ་དྲུག་རྣམས་སོ། ། མདོར་ན། ཚིག་རྒྱན་ཐམས་ཅད་རང་བཞིན་བརྗོད་པ་དང་། འཁྱོགས་བརྗོད་གཉིས་སུ་འདུ་ཞིང༌། དེ་དག་གི་ཚིག་སྦྱོར་སྐབས། དོན་ཉམས་དོན་འགལ་དོན་གཅིག་པ། ། ཐེ་ཚོམ་ཅན་དང་རིམ་པ་ཉམས། ། སྒྲ་ཉམས་གཅོད་མཚམས་ཉམས་པ་དང༌། ། སྡེབ་སྦྱོར་ཉམས་དང་མཚམས་སྦྱོར་བྲལ། ། ཡུལ་དུས་སྒྱུ་རྩལ་འཇིག་རྟེན་དང༌། ། ལུང་རིགས་དག་དང་འགལ་བ་སྟེ། ། སྐྱོན་བཅུ་དེ་དག་སྙན་དངགས་ལ། ། སྙན་ངག་མཁན་གྱིས་སྤང་བར་བྱ། ། ཞེས་པ་ལྟར་སྐྱོན་བཅུ་དང༌། གཞན་ཡང་གྲོང་ཚིག་དང་དཔེ་སྐྱོན་ལ་སོགས་པ་སྤངས་པ་དང༌། ཇི་སྐད་དུ། རང་བཞིན་གྱིས་གྲུབ་སྤོབས་པ་དང༌། ། མང་དུ་ཐོས་པ་དྲི་མེད་དང༌། ། མངོན་པར་སྦྱོར་བ་མི་དམན་པ། ། སྙན་ངག་ཕུན་སུམ་ཚོགས་པའི་རྒྱུ། ། ཞེས་འབྱུང་བའི་རྒྱུ་ཚོགས་དང་ལྡན་པའི་རྩོམ་པ་ནི་འཇིག་རྟེན་གྱི་རྒྱན་དུ་བྱེད་དེ། སློབ་དཔོན་དཔའ་བོས་མཛད་པའི་བསྟོད་པ་བཞིན་ནོ། ། འདི་ལ་སྤྱིར་བཏང་དཔེར་བརྗོད་ཤར་པའི་ལམ་ལ་དཔག་བསམ་འཁྲི་ཤིང་དང༌། ལྷོ་པའི་ལམ་ལ་སྐྱེས་རབས་སོ་བཞི་པ་ཡིན་ཟེར་བ་འདྲ་རུང་ཙམ་ཡོད་པར་སྣང་ངོ༌། ། ཐ༣ གསུམ་པ་སྡེབ་སྦྱོར་བཤད་པ་ལ་གསུམ། ད༡ བྲྀཏྟ། ད༢ ཛཱ་ཏི། ད༣ ངོ་མཚར་རྟོགས་བྱེད་ཀྱི་སྦྱོར་བ་བཤད་པའོ། ། ད༡ དང་པོ་ནི། ཚིགས་བཅད་སྡེབ་སྦྱོར་ཡི་གེ་དྲུག་པ་ནས། ། རྒྱུན་ཆགས་བར་དུ་བགྲང་བ་བྲྀཏྟ་སྟེ། ། མཉམ་དང་མི་མཉམ་ཕྱེད་མཉམ་དག་གིས་བཅིངས། ། སྙན་དངགས་ཚིགས་སུ་བཅད་པ་ལ་ཤིན་ཏུ་གལ་ཆེ་བའི་རིགས་པ་ནི། ཇི་སྐད་དུ། ཚིགས་བཅད་རྐང་བཞི་དེ་ཡང་ནི། ། བྲྀཏྟ་ཛཱ་ཏི་ཞེས་རྣམ་གཉིས། ། ཞེས་དང༌། (༡༦༣བ) རིག་དེ་སྙན་དངགས་རྒྱ་མཚོ་ནི། ། ཟབ་མོ་བརྒལ་འདོད་རྣམས་ཀྱི་གྲུ། ། ཞེས་འབྱུང་བ་ལྟར། ཙྪནྜ་སའི་སྒྲ་ལས་དྲངས་པའི་སྡེབ་སྦྱོར་ལ། བྲྀཏྟ་དང་། ཛཱ་ཏི་གཉིས་སུ་ཡོད་པའི། གཉིས་ཀའང་ཚིགས་གཅད་རྐང་པ་བཞི་པའི་དབང་དུ་བྱས་པ་སྟེ། དང་པོ་ནི། རྐང་པ་བཞི་ཀར་ཡི་གེའི་གྲངས་སྙོམས་པའི་ཡི་གེ་བགྲང་བ་ཡིན་ལ། དེའང་ཡི་གེ་དྲུག་པ་དབྱངས་སྒྲོག་དང་བདུན་པ་རབ་དགའ་ནས། ཉེར་དྲུག་པ་ལྷག་པར་བྱེད་ལྡན་གྱི་བར་ངེས་པ་ཅན་དང༌། ཉེར་བདུན་ཕན་ཆད་ལ་རྒྱུན་ཆགས་ཞེས་བྱ་ཞིང་། དེ་ལའང་རྒྱུན་ཆགས་དང་རབ་བསགས་དང་པོ་ནས་བརྒྱད་པ་