Tibetan
བསྟན་པ་ནུབ། ། ཅེས་གསུངས་ཤིང༌། ཆེན་པོ་དྲུག་ནི། སློབ་དཔོན་ཙནྡྲས། ཆེན་པོ་དྲུག་ལ་གྱེར་བར་བྱ། ། སྒྲུབ་མཆོད་དབང་བསྐུར་རབ་ཏུ་གནས། ། དུས་མཆོད་གཤིན་དོན་སྦྱིན་སྲེག་རྒྱས། ། ཞེས་པ་ལྟར། སྐབས་སུ་བབ་པས་བླང་ངོ༌། ། ཚོགས་སུ་སེང་གེའི་ང་རོ་ལ་སོགས་པ། ། ཁྱད་པར་བཅུ་གཉིས་གཞན་ཡང་མཚམས་པར་སྦྱར། ། སྐབས་སུ་བབས་པ་ཇི་ལྟར་བླང་ན། ཚོགས་སུ་ལེན་པའི་དབྱངས་སྐད་གཟེངས་མཐོ་བར་དགོས་པས་སེང་གེའི་ང་རོ་ཞེས་བྱ་བ་དང༌། སོགས་ཁོང་ནས། ལེན་ཚུལ་གྱི་ཁྱད་པར་བཅུ་གཉིས་དང༌། གཞན་ཡང་ཇི་ལྟར་མཚམས་པར་སྦྱར་དགོས་ཏེ། ཇི་སྐད་དུ། ཚོགས་སུ་སེང་གེའི་ང་རོ་སྟེ། ། དབེན་པ་བུང་བ་རོལ་བའི་ཚུལ། ། མཁས་པའི་མདུན་སར་ནེ་ཙོའི་དབྱངས། ། རྨ་བྱ་འཇོལ་སྒེག་རྨོངས་ནང་དུ། ། སྐྱོ་ཚེ་དང་བ་ཀུན་འདྲེན་པ། ། རྗེས་སུ་དགའ་ལ་འདོད་ལྷའི་མདའ། ། མཆོད་ལ་དགའ་བའི་མེ་ཏོག་སྟེ། ། བ་ཚྭའི་ཆུ་ཀླུང་སྡིག་སྦྱོང་ལ། ། རང་ཕྱོགས་བསྟོད་ན་ལྷ་ཡི་རྔ། ། ཕ་རོལ་སྨོད་ན་འཁོར་ཟིལ་གནོན། ། ཀུན་ཏུ་སྙན་པ་དྲི་ཟའི་དབྱངས། ། སྤེལ་བ་མེ་ཏོག་ཕྲེང་ལྡན་ཡིན། ། དེ་ལ་སོགས་པའི་རྣམ་པ་ཡིས། ། སྤེལ་བའི་ཁྱད་པར་ལེགས་བརྟགས་ཏེ། ། དབྱངས་ཀྱི་སྦྱོར་བ་གཞན་ལ་ཡང༌། ། ཇི་ལྟར་མཚམས་པར་སྦྱར་བར་བྱ། ། ཞེས་བཤད་པ་ལྟར་རོ། ། དཀྱུས་སུ་ཉེས་པ་མཁོ་བའི་མཚན་ཉིད་མདོར་བསྡུ་ན། འདེགས་དང་འཇོག་དང་སྦོམ་དང་ཕྲ། ། གྲིམ་དང་ལྷོད་དང་འགྱུར་དང་ལྡེམ། ། (༡༥༡ན)སྙན་གསང་གཅོད་སྦྲེལ་བཅུ་གཉིས་སོ། ། ཞེས་པ་སྟེ། དེ་དག་ཀྱང་ཙནྡྲས། རིང་ཡང་མགོ་ལུས་མཚམས་པ་དང༌། ། ཐུང་ཡང་ཡན་ལག་རྫོགས་པའོ། ། བརྗིད་དང་ལྡན་ཡང་སྒེག་ཆགས་པ། ། སྙན་ཡང་རུས་པ་མ་ཤོར་དང༌། ། གྱོང་ཡང་སྐབས་སུ་ཁུགས་པ་དང༌། ། དིག་ཀྱང་ཚིག་གི་གོ་གསལ་དང༌། ། མགྲིན་པ་མང་ཡང་སྐད་ཅིག་དང༌། ། སྐད་ཅིག་ང་རོ་དུ་མས་བརྒྱན། ། མདོར་ན་བླུན་པོ་ཡིད་འཛིན་ཅིང༌། ། མཁས་པ་དགྱེས་པ་བསྐྱེད་པའོ། ། ཡོན་ཏན་མཆོད་འོས་ཐམས་ཅད་མཉེས། ། ཡ་རབས་དང་འདྲེན་དམན་པ་མགུ། ། ཟིལ་ཆགས་མང་པོའི་དབུས་ན་བརྗིད། ། མཁས་པའི་ཡིད་འཕྲོག་ཀུན་གྱིས་བསྔགས། ། དགྲ་བགེགས་འབྱེར་ཞིང་དངོས་གྲུབ་འདུ། ། འདི་ལས་བདེན་འབྲས་འབྱུང་བར་ངེས། ། ཞེས་གསུངས་པའི་མཚན་ཉིད་དང་ལྡན་པར་བྱའོ། ། ན༢ གཉིས་པ་[ངག་བཟོ་ཕལ་པ་]ནི། ཕལ་པ་གླུ་དང་གླིང་བུ་གྲལ་འཕྲོས་སོགས། ། ངག་བཟོ་ཕལ་པ་ནི། དགའ་སྟོན་གྱི་སྐབས་ཁྲོམ་གྱི་དབུས་སུ་གླུ་གཞས་ཀྱི་སྦྱོར་བ་འདོད་པ་དང་ནོར་གྱི་གཏམ་ལ་སོགས་པ་ལུགས་གང་གིའང་དོན་དང་འབྲེལ་ཞིང་གདངས་སྙན་པའི་གླུ་ལེན་པ་ལ་སྦབ། ཁ་གཤགས་འགྱེད་པ་སོགས་ཀྱང་དོན་བཟང་ལ་ཐོགས་པ་མེད་པ་དང༌། གླིང་བུ་པི་ཝང་རྫ་རྔ་དང༌། ། མཁར་རྔ་རྔ་ཟླུམ་རྔ་བོ་ཆེ། ། རྔ་ཕྲན་ཆ་ལང་ཀ་ན་ཌི། ། དུང་དང་རྒྱུད་མངས་ལ་སོགས་པ། ། ཇི་སྙེད་སིལ་སྙན་སྦྱོར་བཤད་པ། ། དེ་སྙེད་ལ་ནི་མཁས་པར་བྱ། ། ཞེས་གསུངས་པ་ལྟར་རྣམ་པར་རྩེ་བའི་རོལ་མོའི་སྦྱོར་བ་རྣམས་དང༌། འབེལ་གཏམ་མམ་གྲལ་འཕྲོས་སྐད་ཆེ་ལ་སྒྲ་དག་པ། དོན་བཟང་ལ་ཚིག་གི་སྐྱོན་གྱིས་མ་བསླད་པ་ལ་སོགས་པ་རྣམས་སོ། ། ད༣ གསུམ་པ་ཡིད་བཟོ་ལ་གཉིས། ན༡ མཆོག་དང༌། ན༢ ཕལ་པའོ། ། ན༡ དང་པོ་ནི། ཡིད་བཟོ་མཆོག་ནི་ལེགས་གསུངས་ཐོས་བསམ་སྒོམ། ། ཡིད་ཀྱི་བཟོ་གནས་སུ་གྱུར་པ་མཆོག་གམ་ཁྱད་པར་ཅན་ནི། (༡༥༡བ)ལེགས་པར་གསུངས་པའི་བཀའ་དང༌། དེའི་དགོངས་པ་འགྲེལ་བར་བྱེད་པའི་བསྟན་བཅོས་ཁྱད་པར་དུ་འཕགས་པ་རྣམས་ལ། དང་པོ་ཐོས་པས་བླང་དོར་གྱི་མིག་ཕྱེད་པ། བར་དུ་ལེགས་པར་བསམ་པས་ཐེ་ཚོམ་གྱི་སྒྲོ་འདོགས་ཆོད་པ། ཐ་མ་ཚུལ་བཞིན་བསྒོམ་པས་གནས་ལུགས་ཀྱི་དོན་གཏན་ལ་ཕེབ་པ་རྣམས་སོ། ། ན༢ གཉིས་པ་[ཡིད་བཟོ་ཕལ་པ་]ནི། ཕལ་པ་རིག་གནས་བཅོ་བརྒྱད་སྒྲ་ཚད་སོགས། ། ས་གཞི་རིན་ཆེན་ལྗོན་ཤིང་རྟ་གླང་གཏེར། ། ཕོ་མོ་བརྟག་པ་བརྒྱད་དང་ཐུན་མོང་དུ། ། ལུགས་ཀྱི་བསྟན་བཅོས་སྒྱུ་རྩལ་དྲུག་ཅུ་བཞི། ། སྡེ་བཞི་ལ་སོགས་རྣམ་གྲངས་ཅི་སྙེད་དོ། ། ཡིད་བཟོ་ཕལ་པ་ནི། མཛོད་ཀྱི་རང་འགྲེལ་དུ། རོལ་མོ་འཁྲིག་ཐབས་འཚོ་ཚིས་གྲངས་དང་སྒྲ། ། གསོ་སྤྱད་ཆོས་ལུགས་བཟོ་འཕངས་གཏན་ཚིགས་དང༌། ། རྣལ་འབྱོར་ཐོས་པ་དྲན་པ་སྐར་མའི་སྤྱད། ། རྩིས་མིག་འཁྲུལ་འཁོར་སྔོན་རབས་སྔོན་བྱུང་རིགས། ། འདི་དག་རིག་པའི་གནས་ཆེན་བཅོ་བརྒྱད་ཡིན། ། ཅེས་བཤད་པ་རྣམས་དང༌། གོང་དུ་སྨོས་པའི་སྒྲ་དང་ཚད་མ་ལ་སོགས་པ་རྣམས་དང༌། བརྟག་པ་བརྒྱད་དུ་གྲགས་པ་ལས། ས་གཞི་དང་ཆུ་བརྟག་པ་ནི། སློབ་དཔོན་དུ་ཧ་རས་བྱས་པའི་འབུམ་དཀར་ནག་ཁྲ་གསུམ་གྱི་རྒྱུད་ལ་སོགས་པ་ལྟ་བུ་དང༌། རིན་པོ་ཆེ་བརྟག་པ་ནི། པཎྜི་ཏ་མ་ཧཱ་ཨོ་ཥ་དྷིས་མཛད་པའི་བསྟན་བཅོས་དང༌། དེ་ལས་འཕྲོས་ནས་བོད་དུ་བྱས་པ་དཔྱད་དོན་པད་དཀར་ཆུན་པོ་སོགས་སྔ་ཕྱི་དུ་མར་བྱུང་བ་རྣམས་དང༌། མིའི་ནོར་བུ་གསང་སྔགས་ནང་གི་ལྷུང་བཟེད་ཀ་པཱ་ལའང་དེར་གཏོགས་པས་དེའི་ཚུལ་རྒྱུད་ཆེན་སྡོམ་པ་འབྱུང་བ་སོགས་ལས་གསལ་བར་གསུངས་པ་ལྟར་བོད་ཀྱི་མཁས་པ་རྣམས་ཀྱི་ཡིག་ཆ་དང༌། རྒྱུར་བ་མ་རི་ཐོད་མཁར། སྒེར་རྒྱུད་དུར་ཁྲོད་ཐོད་ནག །ལུང་ལྷ་མོ་གནས་མཁར་སོགས་ལ་བརྟེན་པའི་མན་ངག་གཏེར་མའི་ཕྱོགས་ལས་ཀྱང་འབྱུང་བ་རྣམས་དང༌། ལྗོན་ཤིང་དང་གླང་པོ་བརྟག་པ་ནི། བོད་དུ་མ་འགྱུར་ལ། (༡༥༢ན) ས་འོག་གི་གཏེར་བརྟག་པའང་། རྒྱུད་སྡེ་འགའ་ཞིག་ལས་ཕྱོགས་མཚོན་གསུངས་པ་ཙམ་ལས་རྒྱ་གཞུང་ཁུངས་ཐུབ་མ་འགྱུར། རྟ་བརྟག་པ་ནི། དྲང་སྲོང་གིས་བྱས་པའི་ཤ་ལི་ཧོ་ཏྲ་དང༌། གྲུ་གུ་སེང་མདོ་འོད་ཆེན་གྱིས་བསྒྱུར་བའི་མེ་ལོང་སྐོར་གསུམ་དང༌། རྒྱལ་པོ་ཁྲི་སྲོང་ལྡེའུ་བཙན་ལ་སོགས་པ་རྗེ་བློན་བཅུ་གསུམ་གྱིས་བྱས་པའི་བསྟན་བཅོས་སོ་སོ་བ་རྣམས་དང༌། མི་དཔྱད་ཐོར་བུ་དང་ཁྱད་པར་རྒྱུད་སྡེ་ལས་བཤད་པའི་རྣལ་འབྱོར་ཕོ་མོ་བརྟག་པ། གསང་སྔགས་རྙིང་མའི་མཁའ་འགྲོ་བརྟག་འབུམ་ལས་བཤད་པའི་བུད་མེད་བརྟག་པ་བཅས་བརྒྱད་དང༌། ཤེས་རབ་སྡོང་བུར། མི་ཡི་ཆོས་ལུགས་ལེགས་སྤྱད་ན། ། ལྷ་ཡུལ་འགྲོ་བ་ཐག་མི་རིང༌། ། ལྷ་དང་མི་ཡི་ཐེམ་སྐས་ལ། ། འཛེགས་ན་ཐར་པ་གམ་ན་ཡོད། ། ཅེས་གསུངས་པ་ལྟར། གཙུག་ལག་གཉིས་ཀྱི་ཐུན་མོང་རྩ་བའམ་ཐོག་མར་འཇུག་པའི་གཞི་ལུགས་ཀྱི་བསྟན་བཅོས་བཤེས་པའི་སྤྲིང་ཡིག །ཤེས་རབ་བརྒྱ་པ། ཤེས་རབ་སྡོང་བུ། སྐྱེ་བོ་གསོ་ཐིག །ཚིགས་སུ་བཅད་པའི་མཛོད། ཚིགས་སུ་བཅད་པ་བརྒྱད། དྲི་མ་མེད་པའི་དྲིས་ལེན། ཙ་ན་ཀའི་རྒྱལ་པོའི་ལུགས་ཀྱི་བསྟན་བཅོས་མ་སུ་རཀྵས་མཛད་པ་དང༌། དེ་དག་ཐམས་ཅད་ཀྱི་སྙིང་པོ་བསྡུས་པ་ས་སྐྱའི་ལེགས་བཤད། གཞན་ཡང་བོད་དུ་རྒྱལ་བ་ཏེ་ནེ་དང་འབྲོམ་སྟོན་པའི་མཛད་པའི་ལྷ་ཆོས་མི་ཆོས་གནད་ཀྱི་ཕྲེང་བ་སོགས་ལའང་མཁས་པར་བྱ་དགོས་པ་དང༌། གཞན་ཡང་སྒྱུ་རྩལ་དྲུག་ཅུ་རྩ་བཞི་ནི། བྱེ་བྲག་རྟོགས་བྱེད་དུ། བཟོ་ལ་སོགས་པར་གཏོགས་པ་སུམ་ཅུ་ནི། ཡི་གེ། ལག་རྩིས། གྲངས། རྩིས་ཆེན། ཐོར་ཙུགས། གོམ་སྟབས། ལྕགས་ཀྱོས། བསྒྱུར་ཐབས། རལ་གྲིའི་ཐབས། ཞགས་པ་གདབ་པ། མདའ་བོ་ཆེ་འཕེན་པ། མདུན་དུ་བསྣུར་བ། བཅད་པ། དྲལ་བ། དབུག་པ། རྒྱང་ནས་འཕོག་པ། སྒྲ་གྲགས་པར་འཕོག་པ། གནད་དུ་འཕོག་པ། (༡༥༢བ)མི་ཆོར་བར་འཕོག་པ། ཚབས་ཆེ་བར་འཕོག་པ། མཆོངས་པ། གྱད་ཀྱི་འཛིན་སྟངས། བང་རྐྱལ། བརྒལ་བ། གླང་པོ་ཆེའི་གཉར་ཞོན་པ། རྟ་ལ་ཞོན་པ། ཤིང་རྟའི་ཐབས། མདའ། གཞུ། གྱད་སྟོབས་དང་སུམ་ཅུའོ། ། རོལ་མོའི་བྱེ་བྲག་བཅོ་བརྒྱད་ནི། བྲོ། རྔ་བོ་ཆེ། རྫ་རྔ། རྔ་ཕྲན། རྔ་ཆེན་པོ། འཁར་རྔ། པི་ཝང་རྒྱུད་གཅིག་པ། རྫ་རྔ་ཁ་གཅིག་པ། ལྕགས་ཀྱི་སིལ་ཁྲོལ། འཁར་བའི་སིལ་ཁྲོལ། པི་ཝང་རྒྱུད་གསུམ་པ། རྡ་མ་ཀུནྡ། སིལ་སྙན། གླུ་དབྱངས་དང་བསྟུན་པ། ཕེག་རྡོབ། རོལ་མོའི་སྒྲ། པི་ཝང༌། གླིང་བུ་དང་བཅོ་བརྒྱད་དོ། ། གླུ་དབྱངས་ཀྱི་ངེས་པ་བདུན་ནི། བར་མ། དྲང་སྲོང༌། ས་འཛིན། དྲུག་ལྡན། ལྔ་པ། བློ་གསལ། འཁོར་ཉན་དང་བདུན་ནོ། ། གར་གྱི་ཆ་བྱད་དགུ་ནི། སྒེག་པ། དཔའ་བ། མི་སྡུག་པ། དྲག་ཤུལ། བཞད་གད། འཇིགས་རུང༌། སྙིང་རྗེ། རྔམས་པ། ཞི་བ་དང་དགུའོ། །ཞེས་བཤད་ཅིང༌། སློབ་དཔོན་ཚུལ་ཁྲིམས་བསྐྱངས་ཀྱིས་ལུང་ཕྲན་ཚེགས་ཀྱི་རྒྱ་ཆེར་འགྲེལ་དུའང་དེ་དང་འདྲ་མིན་གསུངས་པ་ལ་སོགས་པ་རྣམས་བཟོ་གནས་ཕལ་པ་གཙོ་བོར་ཡིད་སྔོན་དུ་འགྲོ་བའི་བྱ་བ་ཅན་ཡིན་ལ། དེ་ཐམས་ཅད་ཀྱང་བསྡུ་ན། སྡེ་བཞིར་འདུ་བ་ཡིན་ཏེ། དེ་ལ་ནོར་རམ་དོན་གྱི་སྡེ་ནི། ཐོས་པ་ལ་སོགས་པ་དང༌། རྫས་ཀྱི་དངོས་པོ་ཚོང་དང་རིན་པོ་ཆེ་ལ་སོགས་པ་ལོངས་སྤྱོད་བརྩོན་པས་སྒྲུབ་ཅིང༌། བསགས་པ་རྣམས་བསྲུང་བའོ། ། འདོད་པའི་སྡེ་ནི། ངན་འགྲོ་མ་ཡིན་པ་ལྷ་མི་སོགས་ཀྱི་འདོད་པའི་ཡོན་ཏན་ཡུལ་ལ་ཉེ་བར་སྤྱོད་པའོ། ། ཆོས་ཀྱི་སྡེ་ནི། མངོན་མཐོ་མཐོ་རིས་གསུམ་དང༌། ངེས་ལེགས་བྱང་ཆུབ་གསུམ་གྱི་རྒྱུ་སྟེ། དཀར་པོའི་ཆོས་མཐའ་ཡས་པའོ། ། ཐར་པའི་སྡེ་ནི། སྡུག་བསྔལ་རྒྱུ་བཅས་ལས་ལྡོག་པའི་ཐེག་པ་གསུམ་གྱི་བྱང་ཆུབ་བོ། ། དང་པོ་གཉིས་འཁོར་བའི་དབང་དུ་བྱས་ཏེ། འདོད་པ་དོན་དུ་གཉེར་བ་དག་དེའི་རྒྱུ་ནོར་སྒྲུབ་པ་དང༌། ཕྱི་མ་གཉིས་མྱང་འདས་ཀྱི་དབང་(༡༥༣ན)དུ་བྱས་ཏེ། ཐར་པ་དོན་གཉེར་རྣམས་ཆོས་བསྒྲུབ་པ་ལ་བརྩོན་པའི་ཕྱིར་རྒྱུ་འབྲས་ཕྲུགས་གཉིས་ཀྱི་ཚུལ་དུ་གནས་པའོ། ། སོགས་ཁོངས་ནས་ཤེས་བྱའི་རྣམ་གྲངས་ཇི་སྙེད་ཐམས་ཅད་ཡིད་ཀྱི་བཟོར་འདུས་ཏེ། ཀུན་མཁྱེན་དྲི་མེད་འོད་ཟེར་གྱིས། འགྲོ་བ་དྲུག་དང་སྐྱེ་བ་རྣམ་པ་བཞི། ། བཞི་དྲུག་དུས་བཅུ་དངོས་པོ་བཅུ་བདུན་དང༌། ། ཡོ་བྱད་བཅུ་བཞི་རྗེས་སུ་སྤྱོད་པ་བརྒྱད། ། འཇིག་རྟེན་སྤྱོད་བཅུ་གཏམ་ནི་རྣམ་པ་གསུམ། ། ཉེས་རྩོམ་ཉེར་གཉིས་དེ་བཞིན་སེམས་ཅན་རིགས། ། དྲུག་ཅུ་རྩ་གསུམ་དུས་བརྒྱད་འཇུག་པ་བཞི། ། འཚོ་བ་དྲུག་དང་ཀུན་ནས་བསྲུང་བ་དྲུག ། ང་རྒྱལ་བདུན་དང་རྒྱགས་པ་རྣམ་པ་བདུན། ། ཐ་སྙད་བཞི་དང་ཐ་སྙད་མང་པོའི་གཞི། ། མཁས་པ་དྲུག་དང་བཀའ་ཡི་དངོས་པོ་དགུ། ། འཁོར་གྱི་དངོས་པོ་བརྒྱད་ལ་སོགས་པ་གྲགས། ། ཞེས་པ་ལ་སོགས་པ་གསུངས་སོ། ། ཏ༤ བཞི་པ་གསོ་བ་རིག་པ་བཤད་པ་ལ་གཉིས། ཐ༡ དགོས་པ་དང་འབྲེལ་བའི་བཤད་བྱ་ངོས་བཟུང༌། ཐ༢ གསོ་རིག་དངོས་ཀྱི་ཚུལ་བཤད་པའོ། ། ཐ༡ དང་པོ་ནི། ལུས་སྲོག་གསོ་བའི་རིག་པ་ཀུན་གྱི་བཅུད། ། དཔལ་ལྡན་རྒྱུད་ཆེན་བདུད་རྩི་སྙིང་པོའི་ལུས། ། རྟེན་ལུས་དང་བརྟེན་པ་སྲོག་བཅས་མིན་པར་གནས་ཤིང་ན་བ་གསོ་བར་བྱེད་པའི་རིག་པ་སྟོན་པའི་གཞུང་ལུགས་མཐའ་ཡས་ཀྱང༌། དེ་དག་ཐམས་ཅད་ཀྱི་བཅུད། དཔལ་ལྡན་བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ཆེན་པོ་ཞེས་བྱ་བ། གོ་སླ། དོན་བཟང༌། ཡན་ལག་བརྒྱད་ཀྱི་དོན་རྫོགས་པར་སྟོན་ཅིང་། མཆོག་དམན་ཀུན་ལ་ཕན་པ་རླབས་སུ་ཆེ་བས་བོད་དུ་འགྱུར་བའི་བཀའ་དང་བསྟན་བཅོས་རྣམས་ཀྱི་ནང་ནས་ངོ་མཚར་རྨད་དུ་བྱུང་བ་འདིའི་ལུས་རྣམ་པར་བཞག་པ་རགས་པ་ཙམ་ཤེས་ན་གསོ་དཔྱད་ཀུན་གྱི་དོན་བདེ་བླག་ཏུ་མཐོང་བར་འགྱུར་བས་མདོ་ཙམ་བཤད་པར་བྱ་བ་ཡིན་ནོ། ། ཐ༢ གཉིས་པ་[གསོ་རིག་དངོས་ཀྱི་ཚུལ་བཤད་པ་]ལ་གཉིས། ད༡ རྒྱུད་བཞིའི་ལུས་མདོར་བསྟན། ད༢ གསོ་བའི་ཚུལ་བཞི་རྒྱས་པར་(༡༥༣བ)བཤད་པའོ། ། ད༡ དང་པོ་ལ་བཞི། ན༡ རྩ་རྒྱུད། ན༢ བཤད་རྒྱུད། ན༣ མན་ངག ། ན༤ ཕྱི་མའི་རྒྱུད་ཀྱི་ལུས་མདོར་བསྟན་པའོ། ། ན༡ དང་པོ་ནི། རྩ་བ་གནས་ལུགས་ངོས་འཛིན་གསོ་བ་སྟེ། ། རྩ་བ་ཐུགས་ཀྱི་རྒྱུད་དུ། གནས་ལུགས་ནད་གཞི། ངོས་འཛིན་རྟགས། གསོ་བྱེད་ཐབས་ཀྱི་རྩ་བ་གསུམ། དང་པོ་ལ། རྣམ་པར་མ་གྱུར་པ་ལུས་ཆུ་ལྟ་བུ་དང༌། རྣམ་པར་གྱུར་པ་ནད་ཆབ་རོམ་ལྟ་བུའི་སྡོང་པོ་གཉིས། ལུས་ཀྱི་ཡལ་ག །ནད་དང་། ལུས་ཟུང་དྲི་མ་གསུམ། ནད་ལ་སྲོག་འཛིན་སོགས་རླུང་ལྔ། འཇུ་གྱིད་སོགས་མཁྲིས་པ་ལྔ། སྟེན་བྱེད་སོགས་བད་ཀན་ལྔ། ཤ་ཁྲག་ཚིལ་རུས་རྐང་དང་ཁུ་བ་སྟེ་དྭངས་མ་བདུན། བཤང་གཅི་རྡུལ་བའི་དྲི་མ་གསུམ་སྟེ་ལོ་འདབ་ཉི་ཤུ་རྩ་ལྔ། ནད་ཀྱི་ཡལ་ག་རྒྱུ་རྐྱེན་འཇུག་སྒོ་རྟེན་གནས་རྒྱུ་ལམ་ལྡང་དུས་འབྲས་བུ་ལྡོག་རྒྱུ་མདོར་སྒྲིལ་བཅས་དགུ། རྒྱུ་དུག་གསུམ། རྐྱེན་དུས་གདོན་ཟས་དང་སྤྱོད་ལམ་བཞི། ཤ་པགས་རྩ་རུས་དོན་སྣོད་དེ་འཇུག་སྒོ་དྲུག །གནས་ལུས་ཀྱི་སྟོད་སྨད་བར་གསུམ། ལུས་ཟུང་དྲི་མ་དབང་པོ་དོན་སྣོད་ལྔ་པོ་སོ་སོར་རླུང་མཁྲིས་བད་ཀན་རྒྱུ་བའི་ལམ་བཅོ་ལྔ། ན་སོ་གསུམ། ཡུལ་གསུམ། དུས་གསུམ་སྟེ་ལྡང་དུས་དགུ། འཚོ་བ་གསུམ་ཟད་པ་སོགས་འབྲས་བུ་སྲོག་གཅོད་ཀྱི་ནད་དགུ། རླུང་མཁྲིས་བད་ཀན་ཞི་མ་ཞི་གཉིས་གཉིས་བཞི་རུ་ལྡོག་པའི་རྒྱུ་བཅུ་གཉིས། དེ་དག་མདོ་དོན་དྲིལ་བ་ཚ་གྲང་གཉིས་སུ་འདུས་པ་སྟེ་ལོ་འདབ་དྲུག་ཅུ་རྩ་གསུམ། གཉིས་པ་ལ། ལྟ་རེག་དྲི་བའི་སྡོང་པོ་གསུམ། ལྟ་བའི་ཡལ་ག་ལྕེ་དང་ཆུ་ལ་ལྟ་བ་གཉིས། དེ་རེ་རེ་ལ་ནད་གསུམ་གྱིས་དབྱེ་བས་ལོ་འདབ་དྲུག །རེག་པའི་ཡལ་ག་ནད་གསུམ་དང་ལོ་འདབ་དེ་མཚུངས་གསུམ། དྲི་བའི་ཡལ་ག་སློང་རྐྱེན་ན་ལུགས་གོམས་པའི་སྒོ་ནས་དྲི་བ་གསུམ། ཡང་ལ་རྩུབ་པ། རྣོ་ཞིང་ཚ་བ། ལྕི་ལ་སྣུམ་པའི་ཟས་དང་སྤྱོད་ལམ་གྱིས་རིམ་བཞིན་རླུང་མཁྲིས་བད་ཀན་སློང་བ་སོགས་དྲི་བའི་དབྱེ་བས་ལོ་འདབ་ཉི་ཤུ་རྩ་དགུ། གསུམ་པ་ལ། ཟས་(༡༥༤ན)སྤྱོད་སྨན་དཔྱད་ཀྱི་སྡོང་པོ་བཞི། ཟས་ཀྱི་ཡལ་ག་ཟས་གསུམ་སྐོམ་གསུམ་སྟེ་དྲུག །རླུང་ཟས་བཅུ་བཞི། མཁྲིས་ཟས་བཅུ་གཉིས། བད་ཀན་ཟས་སྐོམ་དགུ་སྟེ་ལོ་འདབ་སུམ་ཅུ་སོ་ལྔ། སྤྱོད་ལམ་གྱི་ཡལ་ག་རང་རང་དང་སྦྱར་བའི་གཉེན་པོ་གསུམ། རེ་རེ་ལ་གནས་དང་སྤྱོད་ལམ་གྱིས་དབྱེ་བའི་ལོ་འདབ་དྲུག །སྨན་གྱི་ཡལ་ག་རླུང་སྨན་སོགས་གསུམ་ལ་རོ་ནུས་གཉིས་གཉིས་དབྱེ་བས་དྲུག །རླུང་ལ་ཁུ་བ་དང་སྨན་མར། མཁྲིས་པར་ཐང་དང་ཅུར་ནི་ས། བད་ཀན་ལ་རིལ་བུ་ཏྲེས་སམ་སྟེ་ཞི་བྱེད་དྲུག །རླུང་འཇམ་རྩི། མཁྲིས་པ་བཤལ། བད་ཀན་སྐྱུགས་ཀྱིས་སྤྱོད་པ་སྟེ། སྤྱོད་བྱེད་གསུམ་བཅས་དྲིལ་བས་བཅོ་ལྔ། རླུང་ལ་རོ་མངར་སྐྱུར་ལན་ཚྭ་གསུམ། ནུས་པ་སྣུམ་ལྕི་འཇམ་པ་གསུམ་སོགས་གཞན་གཉིས་ལའང་དེ་བཞིན་སྦྱར་བས་བཅོ་བརྒྱད། ཁུ་བ་གསུམ། སྨན་མར་ལྔ། ཐང་དང་ཕྱེ་མ་བཞི་བཞི། རིལ་བུ་གཉིས། ཏྲེས་སམ་ལྔ། སྦྱོང་བྱེད་སྔ་མ་ལ་གསུམ། བར་མ་ལ་བཞི། ཕྱི་མ་ལ་གཉིས་ཏེ་དྲིལ་བས་དགུ། སྔ་ཕྱི་བསྡམས་པས་ལོ་འདབ་ལྔ་བཅུ་ཐམ་པ། དཔྱད་ཀྱི་ཡལ་ག་རླུང་མཁྲིས་བད་ཀན་གྱི་དཔྱད་གསུམ། སྔ་མ་ལ་བཀུ་མཉེ་དང་ཧོར་གྱི་མེ་བཙའ་གཉིས། བར་མ་ལ་རྡུལ་དབྱུང་གཏར་ག་ཆུའི་འཁྲུལ་འཁོར། ཕྱི་མ་ལ་དུག་དང་མེ་བཙའ་བཅས་ལོ་འདབ་བདུན་ཏེ། མདོར་ན། གསོ་ཡུལ་ནད་གཞི་ལ་རྣམ་གྲངས་བརྒྱད་ཅུ་རྩ་བརྒྱད། ངོས་བཟུང་བརྟག་པ་ལ་སུམ་ཅུ་སོ་བརྒྱད། གསོ་བྱེད་གཉེན་པོའི་ཐབས་དགུ་བཅུ་རྩ་བརྒྱད་ཀྱི་ནང་དུ་གསོ་བ་རིག་པའི་དོན་མ་ལུས་པ་གཏན་ལ་དབབ་ནས་མྱ་ངན་མེད་པའི་ལྗོན་ཤིང་གི་དཔེ་དང་སྦྱར་བར་མཛད་དེ། དེ་ལྟར་ལེགས་པར་ཤེས་ཤིང་ལག་ཏུ་བླངས་པས་ནད་མེད་པ་དང་ཚེ་རིང་བ་གཉིས་མེ་ཏོག་ཆོས་དང་ནོར་དང་བདེ་བས་འབྱོར་པ་འབྲས་བུའི་མཐུན་དཔེར་སྦྱོར་བ་ནི། རྒྱུད་ཉིད་ལས། རྩ་བ་གསུམ་ལས་(༡༥༤བ)འདྲིལ་བའི་སྡོང་བུ་དགུ། ། གྱེས་པའི་ཡལ་ག་བཞི་བཅུ་རྩ་བདུན་ཏེ། ། ལོ་འདབ་ཉིས་བརྒྱ་རྩ་བཞིར་རྒྱས་པ་ཡིན། ། གསལ་བའི་མེ་ཏོག་འབྲས་བུ་ལྔ་རུ་སྨིན། ། འདི་དག་རྩ་བའི་རྒྱུད་ཀྱི་སྡོམ་དུ་བཤད། ། ཅེས་གསུངས་སོ། ། ན༢ གཉིས་པ་[བཤད་རྒྱུད་]ནི། གསོ་བྱ་གསོ་བྱེད་གསོ་ཚུལ་གསོ་བས་བཤད། ། བཤད་པ་སྐུ་ཡི་རྒྱུད་ཀྱི་བསྟན་བྱ་གསོ་རིག་ཐམས་ཅད་ཚུལ་བཞིར་དྲིལ་བ་ནི་འོག་ཏུ་ཅུང་ཟད་འཆད་པར་འགྱུར་རོ། ། ན༣ གསུམ་པ་[མན་ངག་]ནི། ལུས་དང་བྱིས་པ་མོ་ནད་གདོན་མཚོན་དུག ། རྒས་པ་རོ་ཙའི་མན་ངག་ཡན་ལག་བརྒྱད། ། མན་ངག་ཡོན་ཏན་རྒྱུད་ལེའུ་དགུ་བཅུ་རྩ་གཉིས་ཡོད་པ་ལས། ལུས་ཀྱི་བཅོས་ལེའུ་བདུན། བྱིས་པ་དང་མོ་ནད་ལ་གསུམ་གསུམ། གདོན་དང་མཚོན་རྨ་ལ་ལྔ་ལྔ། དུག་ལ་གསུམ། རྒས་པ་གསོ་བའི་ཐབས་བཅུད་ལེན་ལ་གཅིག །རོ་ཙ་དང་དེའི་ཡན་ལག་བུད་མེད་བཙའ་སྲུང་གི་ཐབས་ལ་གཉིས་བཅས་ཀྱིས་གསོ་བྱེད་གཉེན་པོའི་མན་ངག་རྫོགས་པར་བསྟན་པ་སྟེ། སྤྱིར་ལུས་ལ་སོགས་པ་དེ་རྣམས་གསོ་ཡུལ་གྱི་ཡན་ལག་བརྒྱད་དུ་ཡོངས་སུ་གྲགས་ཤིང༌། གསོ་དཔྱད་ཆེ་ཆུང་ཐམས་ཅད་དེ་ལས་འཕྲོས་པ་ཤ་སྟག་གོ། ། ན༤ བཞི་པ་[ཕྱི་མའི་རྒྱུད་ཀྱི་ལུས་མདོར་བསྟན་པ་]ནི། ནད་དང་གཉེན་པོ་ཐབས་སུ་ཕྱི་མར་དྲིལ། ། རྒྱས་པར་བཤད་པ་དེ་དག་གསོ་ཡུལ་གྱི་ནད། གསོ་བྱེད་གཉེན་པོ་གསོ་བའི་ཐབས་གསུམ་ཞེས་ཕྱི་མ་ཕྲིན་ལས་ཀྱི་རྒྱུད་དུ་ལག་ལེན་སྙིང་པོར་དྲིལ་ནས་བསྟན་ཏེ། དེའང་གསོ་ཡུལ་ནད་ལ་རྒྱས་པར་སྟོང་དང་ཉིས་བརྒྱ། བསྡུ་ན་ཀུན་བརྟགས་གདོན། ལྟར་སྣང་འཕྲལ། ཡོངས་གྲུབ་ཚེ། གཞན་དབང་སྔོན་ལས་ཀྱི་ནད་བཞི་པོ་རེ་རེ་ལ་བརྒྱ་དང་གཅིག་སྟེ། བསྡམས་པས་བཞི་བརྒྱ་རྩ་བཞི། དེ་ལས་ཀྱང་བཅོས་དགོས་ཤིང་བཅོས་