Tibetan
ཡོན་ཏན་དགུ་པོ་བདག་ལ་འདུ་བྱ་བར་ཡོད་པ་དེ་སྲིད་དུ་དགེ་མི་དགེའི་ལས་སྒྲུབ་པར་བྱེད་པས་འཁོར་བར་འགྱུར་ལ། སྐྱེས་བུའི་ཚིག་གི་དོན་དྲུག་ཤེས་ནས་ཡོན་ཏན་དགུ་པོ་རྩ་བ་བཅས་བཅད་པས་བདག་གཅིག་པུར་གནས་པ་ན་ཐར་པ་ཐོབ་པར་འདོད། གསུམ་པ་རིག་པ་ཅན་པ་ནི། ཤེས་བྱ་ཚིག་གི་དོན་དྲུག་དེ་དང་མཚུངས་ལ། འཇལ་བྱེད་ཚད་མ་བཞི་དབང་དོན་ཕྲད་པའི་རྟོག་པ་མ་འཁྲུལ་པ་མངོན་སུམ་ཚད་མ། རྗེས་དཔག་རང་གཞན་གཉིས། སྒྲ་བྱུང་ཚད་མ་ཡིད་ཆེས་པའི་ཚིག་དང་ཉེ་བར་འཇལ་བའི་དཔེ་རྣམས་སོ། ། གཞལ་བྱ་ཡིན་ན་དངོས་པོ་ཡིན་པས་ཁྱབ་ཅིང་དངོས་མེད་མི་འདོད། དེ་ལ་དངོས་པོ་ནི། བདག་ལུས་དབང་པོ་དོན་བློ་ཡིད་འཇུག་པ་སྐྱོན་སྲིད་པ་ཕྱི་མ་འབྲས་བུ་སྡུག་བསྔལ་བྱང་གྲོལ་བཅུ་གཉིས་སོ། ། བཞི་པ་དབང་ཕྱུག་པ་ནི། དབང་ཕྱུག་འཇིག་རྟེན་གྱི་བྱེད་པ་པོ་ཡིན་ཏེ། མུན་པ་སེལ་ཕྱིར་ཉི་ཟླ་གཉིས། ། བརྟན་གཡོ་སྐྱེད་ཕྱིར་འབྱུང་བ་ལྔ། ། སྨིན་པར་བྱེད་པའི་ཕྱིར་མཆོད་(༡༧༢བ)སྦྱིན་ཏེ། གསལ་བའི་གཟུགས་བརྒྱད་སྤྲུལ་ཅིང༌། ཕྲ་བ། ཡང་བ། མཆོད་པར་འོས་པ། བདག་པོར་གྱུར་པ། དབང་དུ་གྱུར་པ། གར་ཡང་ཕྱིན་པ། འདོད་དགུར་སྒྱུར་བ། དགའ་མགུར་གནས་པ་སྟེ་ཡོན་ཏན་བརྒྱད་དང་ལྡན་པར་འདོད། འཇིག་རྟེན་པ་ལས་སོགས་རང་དབང་མེད་ཅིང་དབང་ཕྱུག་མཆོད་པ་དང༌། འཁྲིག་པ་བསྟེན་པས་མཚོན་བྱ་ལས་འདས་པའི་ཡེ་ཤེས་སྐྱེས་ནས་གྲོལ་བར་འདོད་དེ། བྱེ་བྲག་པ་སོགས་གསུམ་ཀའང་དབང་ཕྱུག་པའི་གྲུབ་མཐའ་སྨྲ་བའི་ནང་གསེས་སོ། ། འཇུག་པ་བཅུ་ལས་རྩོམ་སོགས་ཁྱབ་འཇུག་པ། ། རིག་བྱེད་ཚད་མར་ཁས་ལེན་ཚངས་པ་པ། ། ས་འོག་སྐྱེས་བུར་རོ་གཅིག་གསང་བ་པ། ། དངོས་ཀུན་སྒྲ་ཡི་བདག་ཉིད་བརྡ་སྤྲོད་པ། ། ལྔ་པ་ཁྱབ་འཇུག་པ་ནི། གཅེར་བུ་པའི་སྟོན་པ་གཞོན་ནུ་མ་ལེན་སོགས་ཀྱིས་སྐལ་ལྡན་ནོར་ལྷ་འདི་ནི་ཐམས་ཅད་མཁྱེན་པ། ཐམས་ཅད་གཟིགས་པ། འགྲོ་བ་ཐམས་ཅད་ཀྱི་བྱེད་པ་པོ། ཐར་པར་སྦྱིན་པར་བྱེད་པ། ཞེས་སོགས་བརྗོད་ལ། དེ་རང་ཉིད་ཀྱང༌། འདི་སྐད་དུ། ང་ནི་མེ་ཆུ་རླུང་ཡང་ཡིན། ། བཟའ་བཏུང་སྐྱེ་དགུའི་བདག་པོའང་ང༌། ། ང་ནི་བྲམ་ཟེའི་ལུས་སུ་གནས། ། སྤྱོད་པ་པོ་ཡིན་སྦྱིན་པོའང་ཡིན། ། ཞེས་པ་ལྟར། མངོན་པའི་ང་རྒྱལ་ཆེན་པོ་དང་ལྡན་པའོ། ། རྗེས་འབྲངས་རྣམས་དེའི་འཇུག་པ་བཅུ་ལས་རྩོམ་པའི་ལོ་རྒྱུས་དང༌། རྟག་ཆད་དུ་ལྟ་བ་འཛིན་ཏེ། དེའང་འདིས་ཉ་བོ་ཆེར་སྤྲུལ་ནས་སྔོན་དུས་ཀྱི་དབང་གིས་རིག་བྱེད་བཞི་རྒྱ་མཚོར་ནུབ་པ་བཏོན་པ་དང་རུས་སྦལ་དུ་སྤྲུལ་ཏེ་འཇིག་རྟེན་བཏེགས་ནས་གནས་པ་དང༌། ཕག་རྒོད་ཀྱི་གཟུགས་ཀྱིས་ཚངས་པའི་འཇིག་རྟེན་མན་མནན་པ་དང༌། མི་སེང་གེའི་སྟོད་ཅན་དུ་སྤྲུལ་ནས་ལྷ་མིན་དབང་པོ་འགྲོ་བ་སྐྱོབ་གསེར་གྱི་སྟན་ཅན་སྡེར་མོས་བསད་པ་དང༌། མིའུ་ཐུང་དུ་སྤྲུལ་ནས་ལྷ་མིན་སྟོབས་ལྡན་མཆོད་སྦྱིན་པ་ལ་གོམ་གསུམ་གྱི་ས་བསླངས་པས་བསླུས་ཏེ་ས་འོག་ཏུ་བཅུག་པ་དང༌། དྲང་(༡༧༣ན)སྲོང་ཛ་མཱ་ཨགྣིའི་བུ་རཱ་མར་སྤྲུལ་ནས་རྒྱལ་བུ་སྲིད་སྒྲུབ་སོགས་བསད་དེ་རྒྱལ་རིགས་མེད་པར་བྱས་པ་དང༌། རྒྱལ་པོ་ཤིང་རྟ་བཅུ་པའི་བུ་རཱ་མ་ཎར་སྤྲུལ་ནས་རང་གི་ཆུང་མ་སྲིན་པོ་ལངྐ་མགྲིན་བཅུས་ཕྲོགས་པ་སྤྲེའུ་ཧ་ནུ་མནྠ་ལ་སྲོག་བཅོལ་ཏེ་སྲིན་པོ་བཏུལ་བ་དང༌། ནག་པོར་སྤྲུལ་ཏེ་རྩོད་དུས་སུ་སེམས་ཅན་གྱི་དོན་བྱས་པ་དང༌། སངས་རྒྱས་ཤཱཀྱ་ཐུབ་ཏུ་སྤྲུལ་ནས་སྔོན་རྒྱལ་རིགས་བསད་པའི་སྡིག་པ་སྦྱོང་བའི་ཕྱིར་སེམས་ཅན་བསྐྱབ་པ་དང༌། རིགས་ལྡན་བྲམ་ཟེའི་བུ་ཀརྐི་ཙེ་ཞེས་པ་མ་འོངས་པ་ན་འབྱུང་བྱས་སེམས་ཅན་མང་པོ་བཏུལ་བའི་མཐར་དུས་བཟློག་པར་འགྱུར་རོ་ཞེས་འབྱུང་བ་ལྟར་དང༌། བསྐལ་པ་འཇིག་པའི་ཚེ་དྲང་སྲོང་རྣམས་ནི་འདིའི་ལྟོ་བ་ན་གནས་པར་འདོད་དོ། ། འདིའི་གྲུབ་མཐའ་སེམས་ཉིད་རྟག་པ་སྐྱེ་འཇིག་དང་བྲལ་བ་དངོས་དང་དངོས་མེད་གཉིས་ཀ་མ་ཡིན་པ་བདག་དམ་པ་ནོར་ལྷའི་བུ་ཞེས་བྱ་བར་འདོད་པས་རྟག་པར་སྨྲ་བ་དང༌། ཁྱབ་འཇུག་གིས་འཐབ་ཀ་རླག་པར་བྱེད་པའི་ཚེ་མེད་པར་ལྟ་བའི་ཚིགས་བཅད་མང་དུ་སྨྲས་པ་དང༌། དབུ་མ་རྒྱན་ལས་ཁྱབ་འཇུག་གི་ལྟ་བ་དབུ་མ་དང་ཆ་མཐུན་པར་བཤད་པ་ལྟ་བུ་ཆད་པར་སྨྲ་བའང་ཡོད་ལ། སྒོམ་པ་ནི་ཡན་ལག་དྲུག་གི་རྣལ་འབྱོར་སོགས་སོ། ། གཞན་ཡང་། འཛིན་པ་པོ། དཔྱོད་པ་པོ། རིག་བྱེད་པ། བརྡ་སྤྲོད་པ། ཙ་ར་ཀ་པ། གསང་བ་པ་སོགས་ཀྱང་ཁྱབ་འཇུག་པའི་དབྱེ་བའོ། ། དྲུག་པ་རིག་བྱེད་ཚངས་པས། དྲན་པ་ཡིན་གྱིས་མ་བྱས་པའི་ཕྱིར་རྟག་པ་དང་ཚད་མར་ཁས་ལེན་པ་ཚངས་པ་པ་སྟེ། གཡུལ་ངོར་ཤི་བ་མཐོ་རིས་སུ་སྐྱེ་བ་དང༌། གངྒཱ་སོགས་ལ་ཁྲུས་བྱས་པས་སྡིག་པ་འཛད་པ་དང༌། ཚངས་པས་སྣོད་བཅུད་ཐམས་ཅད་སྐྱེད་པར་འདོད་པ་དང༌། དྲང་སྲོང་དང་བྲམ་ཟེ་རྣམས་ཀྱང་ཚངས་པའི་བུ་ཡིན་ཅེས་སྨྲའོ། ། བདུན་པ་ནི། ས་འོག་མུན་པའི་དཀྱིལ་འཁོར་གྱི་འོག་ཏུ་འཆི་མེད་བདུད་རྩིའི་སྐྱེས་བུ་ཞེས་རྟག་བདག་རྣམ་ཤེས་དམ་པ་ནམ་མཁའ་དང་འདྲ་བར་(༡༧༣བ)ངོ་བོ་གཅིག་ཏུ་འདུས་པ་ཞིག་ཡོད་པ་དེའི་རྣམ་འགྱུར་ལས་སྣོད་ཀྱི་འཇིག་རྟེན་དང་འགྲོ་བ་བྱུང་བར་འདོད་པ་ནི་རིག་བྱེད་མཐའི་གསང་བ་པ་སྟེ། རིག་བྱེད་མཐར་ཕྱིན་པ་ན་ཆོས་ཐམས་ཅད་སྒྱུ་མ་ལྟ་བུར་མཐོང༌། དེའི་ཚེ་བྱེད་པ་པོའི་སྐྱེས་བུ་ལ་ལྟ་བ་གོམས་པས་མུན་པ་སངས་ཏེ་གསེར་གྱི་མདོག་ཅན་དུ་མཐོང་ནས་རོ་གཅིག་ཏུ་སོང་བ་སོགས་ཀྱིས་གྲོལ་བར་འདོད། བརྒྱད་པ་ནི། མངོན་རྗེས་ཚད་མ་སྣང་ཡང་མ་ངེས། རིག་པ་ཀུན་གྱི་གཞི་མ་ནི་སྒྲའི་བསྟན་བཅོས་ཡིན་ཅིང་རིག་བྱེད་རྣམས་ནི་དོན་གྱི་ཚད་མ། དངོས་ཀུན་སྒྲའི་བདག་ཉིད། སྒྲ་དོན་ཀུན་གྱི་མཐར་ཐུག་ཡི་གེ་ཨོཾ་སྐྱེ་འཇིག་གནས་བྲལ་ཕྱོགས་ཆ་མེད་པ་སྒྲའི་ཚངས་པ་སྟེ། དེ་ཉིད་རྟག་ཅིང་མི་འགྱུར་ཡང་མ་རིག་པས་རྙོགས་པས་གཟུགས་སྣང་ལ། སྣང་ཆ་བཟློག་ན་སྣང་མེད་སྒྲའི་ཚངས་པ་བདུད་རྩི་རྟོགས་པར་འདོད་པ་ནི་བརྡ་སྤྲོད་པ་སྟེ་བ་ཏྲཱི་ཧ་རི་སོགས་སོ། ། མཚན་ཉིད་བཅུ་གཉིས་སོགས་འདོད་རྒྱལ་དཔོགས་པ། ། ཚད་མ་བརྒྱད་འདོད་ཙ་ར་ཀ་པ་སྟེ། ། ཤེས་བྱ་བཅུ་སོགས་སྨྲ་བ་གཅེར་བུ་པ། ། དེ་དག་མངོན་མཐོའི་ལམ་ཙམ་ཡོད་མོད་ཀྱི། ། བདག་ལྟས་ཐར་པ་སྒྲིབ་ཕྱིར་དོར་བར་བྱ། ། དགུ་པ་ནི། ཚད་མ་སྤྱི་བྱེ་བྲག་དགོས་པ་གོ་རིམ་གནས་གཞི་སྤྱི་ངེས་བསྟན་དང་བྱེ་བྲག་ངེས་བསྟན་གླེང་བ་རྩོད་པ་རང་རྒྱུད་དང་ཐལ་འགྱུར་ཏེ་བཅུ་གཉིས་དང༌། ཚད་མ་ལའང་། མངོན་རྗེས་སྒྲ་བྱུང་ཉེར་འཇལ་དོན་གྱིས་གོ་བ་དངོས་མེད་དང་དྲུག་ཏུ་འདོད་ཅིང༌། བདག་གིས་ཕུང་པོའི་རྒྱུ་བྱེད་པས་རྟག་པ་ཤེད་ལས་སྐྱེས། དྲི་མ་སེམས་ཀྱི་རང་བཞིན། དེ་ཟད་པས་གྲོལ་བར་སྨྲ་བ་རྒྱལ་དཔོགས་པ། བཅུ་པ་ནི། ཚད་མ་གོང་སྨོས་ལྟར་ལ། རྗེས་དཔག་ལ་འདས་མ་འོངས་ད་ལྟར་དཔོགས་པ་གསུམ་དུ་དབྱེ་བའི་བརྒྱད་ཀྱིས་གཞལ་བྱ་སོགས་ཕལ་ཆེར་དཔྱོད་པ་པ་དང་འདྲ་བ་ཙ་ར་ཀ་པ། བཅུ་གཅིག་པ་ནི། ཤེས་བྱ་ཚིག་གི་དོན་དགུ་བདག་དང་བཅུ། སོགས་ཁོངས་ནས་ཤེས་བྱེད་མངོན་རྗེས་ལུང་གི་ཚད་མ་གསུམ། སྲོག་ལྡན་དགུར་འདོད་(༡༧༤ན)ཅིང༌། ས་སོགས་སྲོག་ལྡན་ཡིན་པས་ཀུན་དགའ་ར་བ་སོགས་བརྩིགས་པ་སྡིག་པའི་རྒྱུར་སྨྲ་བ་གཅེར་བུ་པ་སྟེ། དེའང་དྲང་སྲོང་རྒྱལ་བ་དམ་པ་ལྷར་འཛིན་ཅིང་ཁྱུ་མཆོག་དང་སྣོད་ཀྱི་རྗེ་སོགས་ཟད་བྱེད་པའི་སྟོན་པ་ཉི་ཤུ་རྩ་ལྔའི་རྗེས་སུ་འབྲངས་ཏེ། ལུས་དཀའ་ཐུབ་ཀྱིས་གདུང་བས་སེམས་ཀྱི་མདུད་པ་འཇིག་པར་འདོད་ཅིང་དེ་ལའང་དབྱུ་གུ་གསུམ་པ། ལོ་མ་ཅན་སོགས་ལོག་པའི་བརྟུལ་ཞུགས་སུམ་བརྒྱ་རེ་གསུམ་ཙམ་ཡོད་པར་གྲགས་ལ། ཚད་མ་གསུམ་གྱིས་གཞལ་བྱ་དུས་གསུམ་དང་རྫས་དྲུག་དང་ཚིག་གི་དོན་དགུ་དང་སྲོག་ལྡན་དགུ་སོགས་ནི་གཞི་ལམ་འབྲས་གསུམ་གྱི་གཞིའོ། །དེ་ལ་དུས་གསུམ་ནི་འདས་པ་སོགས་སོ། ། རྫས་དྲུག་ནི། སྲོག་དང་གང་ཟག་དང་དུས་དང་ནམ་མཁའ་དང་བསོད་ནམས་དང་སྡིག་པ་རྣམས་སོ། ། ཁྱད་པར་ཚིག་གི་དོན་དགུ་དང་སྲོག་ལྡན་དགུ་ནི། དྲང་སྲོང་རྒྱལ་བས། སྲོག་དང་ཟག་པ་སྡོམ་པ་དང༌། ། ངེས་པར་དགའ་དང་འཆིང་དང་ལས། ། སྡིག་དང་བསོད་ནམས་ཐར་པ་སྟེ། ། འདི་རྣམས་ཚིག་གི་དོན་དགུར་འདོད། ། སྲོག་ནི་སྲོག་ཅན་སྡེ་ཚན་དགུ། ། ས་ཆུ་ཤིང་དང་མེ་དང་རླུང༌། ། སྲིན་བུ་གྲོག་མ་བུང་བ་མི། ། དབང་པོ་གཅིག་ནས་ལྔ་དང་ལྡན། ། ཞེས་བཤད་པ་ལྟར་རོ། ། སྡོམ་པ་དང་བརྟུལ་ཞུགས་དང་ཡེ་ཤེས་རྣམས་ལྔ་ལྔ་དང་སྤྱོད་པ་བཅུ་གསུམ་དང་ལས་ཟད་པར་བྱེད་པའི་དཀའ་ཐུབ་ཀྱི་ཐབས་སྣ་ཚོགས་པ་ནི་ལམ་མོ། ། ལས་ཟད་པས་འཇིག་རྟེན་གསུམ་གྱི་སྟེང་ན་འདུག་པའི་གནས་འཇིག་རྟེན་འདུས་པ་ཞེས་བྱ་བ་སྲོག་ཡོད་པས་དངོས་པོ་དང་འཁོར་བ་ལས་ཐར་བས་དངོས་མེད་ཀྱང་ཡིན་པའི་ཐར་པ་གདུགས་བཀན་པ་ལྟ་བུ་དཀར་ཞིང་དྲི་ཞིམ་ལ་ཡིད་དུ་འོང་བ་དཔག་ཚད་འབུམ་ཕྲག་ཞེ་ལྔའི་ཚད་ཅན་དུ་འགྲོ་བར་འགྱུར་བ་ནི་འབྲས་བུ་ཡིན་ཟེར་རོ། ། འདི་དག་སོ་སོ་ལ་རང་རང་ལུགས་ཀྱི་གཞི་ལམ་འབྲས་བུའི་རྣམ་གཞག །གཞལ་བྱ་འཇལ་བྱེད་ཀྱི་རིགས་པ། ཐམས་ཅད་མཁྱེན་པ་མི་འདོད་པ་(༡༧༤བ)སོགས་ནང་པ་འགོག་པའི་ལུང༌། ལྟ་བ་དང་སྤྱོད་པའི་ཚུལ་དུ་མ་མཆིས་ཀྱང༌། ཚད་མ་རྣམ་འགྲེལ་ལས། རིག་བྱེད་ཚད་མ་དང་ནི་འགལ་བྱེད་སྨྲ། ། ལུས་ལ་ཆོས་འདོད་དང་ནི་རིགས་སྨྲས་དྲེགས། ། སྡིག་པ་གཞོམ་ཕྱིར་གདུང་བ་བཅོམ་ཞེས་པ། ། བླུན་པོ་ཤེས་རབ་འཆལ་བའི་རྟགས་ལྔ་ཡིན། ། ཅེས་གསུངས་པ་དང༌། དེ་དག་ལས་འཇིག་རྟེན་ཕྱི་མ་ཡོད་པར་ལྟ་ཞིང་དགེ་སྡིག་གི་བླང་དོར་བྱེད་པ་རྣམས་ལ་མངོན་མཐོའི་ལམ་ཙམ་ཡོད་མོད་ཀྱི། ཀུན་ཀྱང་བདག་ཏུ་ལྟ་བ་མཚུངས་པར་འཛིན་པས་ཐར་པའི་ལམ་སྒྲིབ་པ་ལ་ཁྱད་པར་མེད་པའི་ཕྱིར་ནང་པའི་སྒོར་ཞུགས་པ་རྣམས་ཀྱིས་རྒྱང་རིང་དུ་དོར་བར་བྱའོ། ། ཐ༣ གསུམ་པ་ཞར་བྱུང་ཀླ་ཀློ་སོགས་ཁྱད་པར་སྤང་བྱ་གཞན་བསྟན་པ་ནི། འཚེ་བ་ཆོས་སུ་སྨྲ་བའི་ཀླ་ཀློ་དང༌། ། བོད་དང་རྒྱ་ནག་སོགས་སུ་གསུང་རབ་ལས། ། ཕྱི་རོལ་གྱུར་པ་ཀུན་ཀྱང་རིང་དུ་སྤང༌། ། གཞན་ཡང་མཆོག་གསུམ་ལ་ལོག་པར་ལྟ་བ་སོགས་མུ་སྟེགས་པ་དང་ཆ་མཐུན་པ་ཙམ་ལས་ཕྱི་ནང་གཉིས་ཀར་མི་གཏོགས་ཤིང་མུ་སྟེགས་པ་ལས་ཀྱང་ཐ་ཆད་པ་འཚེ་བ་ཆོས་སུ་སྨྲ་བ་པོ། རྒྱ་གར་ནུབ་ཕྱོགས་མཁའི་ཡུལ་གྱི་ལྷ་རཧྨ་ཎའི་རྗེས་འབྲང་སོག་པོའམ་ཀླ་ཀློ་སྟག་གཟིག་པ་ཞེས་གྲགས་པ། བི་ཥི་མལླཱའི་སྔགས་ཀྱིས་བཏབ་པའི་གྲི་གུག་གིས་ཕྱུགས་ཀྱི་མགྲིན་པ་བཅད་པའི་ཤ་ཟ་བར་བྱེད་ཅིང་རང་གི་ལས་ཀྱིས་ཤི་བའི་ཤ་མི་ཟ་བ་དང༌། བྱ་གག་གི་སྒོ་ངའི་བཏུང་བ་འབའ་ཞིག་འཐུང་བ་སོགས་ཀྱི་བརྟུལ་ཞུགས་འཛིན་པ་སྟེ། དེང་སང་འཕགས་ཡུལ་དུའང་ལུགས་འདི་ཁོ་ན་དར་བ་དང༌། འཁོར་བ་གྲོལ་བར་བྱེད་པའི་གྲུབ་མཐའ་ཞེས་བྱ་བ་ལས་ནི་མཐའ་འཁོབ་ཏུ་སྲོག་ཆགས་དུ་མ་གསོད་པ་ཐར་པའི་ཐབས་སུ་འདོད་པ་དང༌། ནམ་མཁའི་ལྷས་བསྟན་པ་ཞེས་པའི་གྲུབ་མཐའ་ལས་ནི་གསེར་གྱི་སྣོད་དུ་གྲོག་མ་རྣམས་གསེར་གྱི་ཁབ་ཀྱིས་ཕུག་ནས་བསད་ན་འཁོར་བ་ལས་གྲོལ་བར་འདོད་པ་དང༌། འཇིག་རྟེན་པ་ཁ་ཅིག་སྐྱ་བསེང་གི་བུ་ལྔའི་མིང་བརྗོད་ན་བསོད་ནམས་(༡༧༥ན)ཆེན་པོ་འབྱུང་བར་འདོད་པ་དང༌། བོད་ཡུལ་དུའང་དཀོན་མཆོག་གསུམ་ལ་སྐྱབས་སུ་མི་འཛིན་པ་བོན་པོ་དང༌། དེ་ལས་ཁྱད་པར་སྔོན་གྱི་དུས་དང་དེང་སང་ཡང་ཡུལ་ཁ་ཅིག་ལ་དར་བའི་རྒྱུའི་བོན་འཚེ་བ་ཆོས་སུ་སྨྲ་བ་རྣམས་དང༌། རྒྱ་ནག་ཏུ་སྲིད་པ་ཐམས་ཅད་མ་ཧཱ་གསེར་གྱི་རུས་སྦལ་ལས་བྱུང་ཟེར་བའི་གྱིམ་ཤང་གི་ལུགས་དང༌། གྲངས་ཅན་པ་དང་ཆ་མཐུན་པ་ཁཱོང་སྦུ་ཙེའི་ལྟ་གྲུབ་འཛིན་པ་རྣམས་དང༌། སོགས་ཁོངས་ནས་རྟག་ཆད་དང་འཚེ་བ་ཆོས་སུ་སྨྲ་བས་སངས་རྒྱས་ཀྱི་གསུང་རབ་ལས་ཕྱི་རོལ་ཏུ་གྱུར་པ་ཀུན་ཀྱང་ཐར་པ་འདོད་པ་རྣམས་ཀྱིས་བག་ཡོད་པར་བྱས་ཏེ་རིང་དུ་སྤང་དགོས་སོ། ། སྤྱིར་གཞུང་ལུགས་རྣམ་པར་དག་མ་དག་ནི། ཐབས་སྙིང་རྗེ་ཆེན་པོ་དང་ཤེས་རབ་གནས་ལུགས་ཀྱི་དོན་ལ་ཞུགས་པའི་རིག་ཤེས་ཁྱད་པར་ཅན་གཙོ་བོར་སྟོན་མི་སྟོན་གྱིས་དབྱེ་བ་ཡིན་པའང་ཤེས་པར་བྱའོ། ། ཉ༢ གཉིས་པ་མངོན་མཐོའི་ཐེག་པ་རྒྱས་པར་བཤད་པ་ལ་གསུམ། ཏ༡ མདོར་བསྟན། ཏ༢ རྒྱས་བཤད། ཏ༣ དོན་བསྡུ་བའོ། ། ཏ༡ དང་པོ་ནི། མངོན་མཐོའི་ཐེག་པ་ལྷ་དང་ཚངས་པ་གཉིས། ། དེ་ལ་སྤྱིར་བློ་དང་ལྡན་པ་རྣམས་ཀྱིས་བསྒྲུབ་པར་བྱ་བ་ནི་མངོན་མཐོ་དང་ངེས་ལེགས་ཀྱི་གོ་འཕང་སྟེ། དེ་དག་གི་མཚན་ཉིད་རིམ་བཞིན། ངན་སོང་གི་སྡུག་བསྔལ་ལས་འཕྲལ་དུ་ཐར་པ་ལྷ་མིའི་བདེ་བ་རྣམ་སྨིན་རྒྱུ་མཐུན་གྱིས་བསྡུས་པ་དང༌། འཁོར་བ་སྤྱིའི་སྡུག་བསྔལ་ལས་གཏན་དུ་གྲོལ་བ་ཐར་པ་མྱ་ངན་ལས་འདས་པ་ཡིན་ལ། དེ་དག་ཀྱང་ཐོག་མར་མངོན་མཐོའི་ཐེག་པ་ལ་གནས་ནས་ཕྱིས་ངེས་ལེགས་ཀྱི་ལམ་མཐར་ཕྱིན་པར་བསྒྲུབ་དགོས་ཏེ། རིན་ཆེན་ཕྲེང་བ་ལས། དང་པོར་མངོན་པར་མཐོ་བའི་ཆོས། ། ཕྱིས་ནི་ངེས་པར་ལེགས་འབྱུང་བ། ། གང་ཕྱིར་མངོན་པར་མཐོ་ཐོབ་ནས། ། རིམ་གྱིས་ངེས་པར་ལེགས་པའོ། ། དེ་ལ་མངོན་མཐོ་བདེ་བ་སྟེ། ། ངེས་པར་ལེགས་པ་ཐར་པར་འདོད། ། ཅེས་གསུངས་སོ། ། དེ་ལས་ཐོག་མར་བསྒྲུབ་བྱའི་མངོན་པར་མཐོ་བའི་ཐེག་པ་དེ་ལའང་། ལྷ་མིའི་ཐེག་(༡༧༥བ)པ་དང༌། ཚངས་པའི་ཐེག་པ་གཉིས་སུ་ཡོད་དོ། ། ཏ༢ གཉིས་པ་རྒྱས་བཤད་ལ་གསུམ། ཐ༡ ཐུན་མོང་གི་སྔོན་འགྲོ་བཤད་པ། ཐ༢ ལྷ་དང༌། ཐ༣ ཚངས་པའི་ཐེག་པ་སོ་སོར་བཤད་པའོ། ། ཐ༡ དང་པོ་ནི། ཀུན་གྱི་སྔོན་འགྲོ་དད་པ་རྣམ་གསུམ་ལས། ། གཙོ་བོར་ལས་སོགས་ཡིད་ཆེས་འགྲོ་བ་བཞིས། ། འདིར་དངོས་སུ་མངོན་མཐོའི་ཐེག་པའི་སྔོན་དུ་འགྲོ་བ་བསྟན་ཀྱང༌། ཞར་བྱུང་འགྲེལ་པས་ཁ་སྐོང་ན། རིན་ཆེན་ཕྲེང་བ་ལས། དེ་ཡི་སྒྲུབ་པ་མདོར་བསྡུ་ན། ། མདོར་ན་དད་དང་ཤེས་རབ་བོ། ། དད་ཅན་ཉིད་ཕྱིར་ཆོས་ལ་བསྟེན། ། ཤེས་རབ་ལྡན་ཕྱིར་ཡང་དག་རིག ། འདི་གཉིས་གཙོ་བོ་ཤེས་རབ་སྟེ། ། སྔོན་དུ་འགྲོ་བ་དད་པ་ཡིན། ། ཞེས་གསུངས་པ་ལྟར། མངོན་མཐོ་དང་ངེས་ལེགས་གཉིས་ཀ་སྒྲུབ་པའི་ཐབས་ཀྱི་གཙོ་བོ་ནི་དད་པ་དང་ཤེས་རབ་སྟེ། དད་པ་ལ་གསུམ་ལས། གཙོ་བོར་ལས་འབྲས་ལ་ཡིད་ཆེས་པའི་དད་པས་ཀུན་ནས་བསླངས་ཏེ་དགེ་སྡིག་གི་བླང་དོར་བྱེད་པའི་ཕྱིར་དང༌། འཁོར་གསུམ་མི་རྟོག་པའི་ཤེས་རབ་ཀྱིས་འཁོར་བའི་རྩ་བ་གཅོད་པར་བྱེད་པའི་ཕྱིར་རོ། ། དེས་ན་དེ་གཉིས་ཀྱི་མཚན་ཉིད་ནི་རིམ་བཞིན། རྒྱུ་མཚན་ཁྱད་པར་ཅན་མེད་པར་རང་ཕྱོགས་ལ་འདུན་པ་དང༌། གཞན་ཕྱོགས་ལ་ཞེ་སྡང་བ་དང༌། བླང་དོར་ལ་གཏི་མུག་པ་དང༌། རྗེ་དཔོན་སོགས་ལ་འཇིགས་པས་འགྲོ་བ་སྟེ། ལོག་པར་འགྲོ་བ་བཞི་ལས་ལྡོག་སྟེ་ཡང་དག་པར་འགྲོ་བ་བཞིས་བླང་དོར་གྱིས་ཆོས་ལས་མི་འདའ་བ་དང༌། གཞན་དོན་གཙོ་བོར་བྱེད་པའི་སྙིང་རྗེ་ཆེན་པོ་དང་མི་ལྡན་པའམ་ལྡན་ཡང་རུང་སྟེ། སྒོ་གསུམ་སྤྱོད་པ་འཁོར་གསུམ་མི་རྟོག་པའོ། ། དེ་སྐད་དུའང་དེ་ཉིད་ལས། འདུན་དང་ཞེ་སྡང་འཇིགས་པ་དང༌། ། རྨོངས་པས་གང་ཞིག་ཆོས་མི་འདའ། ། དེ་ཉིད་དད་པ་ཅན་ཞེས་བྱ། ། ལེགས་པ་ཡི་ནི་སྣོད་མཆོག་ཡིན། ། གང་ཞིག་ལུས་ངག་ཡིད་ཀྱི་ལས། ། རྣམ་པ་གསུམ་དུ་མི་རྟོག་པར། ། བདག་དང་གཞན་ལ་ཕན་ཤེས་ནས། ། རྟག་ཏུ་བྱེད་པ་དེ་ཤེས་རབ། ། ཅེས་སོ། ། དེས་(༡༧༦ན)ན། དད་པས་ཀུན་ནས་མ་བསླང་ན་དགེ་བ་ཙམ་དུའང་མི་འགྲོ་བ་དང༌། བདག་མེད་རྟོགས་ཤིང་འཁོར་གསུམ་མི་རྟོག་པའི་ཤེས་རབ་ཀྱིས་མ་ཟིན་ན་ཐར་ལམ་དུ་གཏན་མི་འགྲོ་བར་གསུངས་པ་དེ་ཉིད་སྤྱིར་ཤེས་པར་བྱའོ། ། དེས་ན་ལམ་གྱི་ཐེག་པར་ཞུགས་པ་ཀུན་གྱི་སྔོན་དུ་འགྲོ་བ་ནི་དད་པ་རྣམ་པ་གསུམ་ཡིན་ལ། དེ་ལས་ཀྱང་གཙོ་བོར་ལས་འབྲས་སོགས་ལ་ཡིད་ཆེས་པའི་དད་པས་ཀུན་ནས་བསླངས་ཏེ་ཡང་དག་པར་འགྲོ་བ་བཞིས་དགེ་བ་སྒྲུབ་པ་ནི་མངོན་མཐོའི་ཐེག་པའི་སྔོན་འགྲོ་ཡིན་ནོ། ། ཐ༢ གཉིས་པ་[ལྷ་མིའི་ཐེག་པ་]ནི། མི་དགེ་བཅུ་སྤོང་དགེ་བཅུ་འཁོར་བཅས་བསྒྲུབ། ། བླང་དོར་ཁྲིམས་གནས་འདྲེས་དང་མི་མཐུན་སྤང༌། ། ལས་ལམ་རྫོགས་དང་སྡོམ་པས་མཐོ་རིས་སུ། ། རྣམ་སྨིན་རྒྱུ་མཐུན་བདག་པོའི་འབྲས་བཟང་ཐོབ། ། དེ་ལ་འཇིག་རྟེན་ལྷ་མིའི་ཐེག་པ་ནི། ངན་སོང་ལ་འཇིགས་ནས་མཐོ་རིས་ཀྱི་བདེ་འབྲས་དོན་དུ་གཉེར་བས་མངོན་པར་མཐོ་བའི་རྟེན་སྒྲུབ་པར་བྱེད་ཅིང༌། འཇིགས་སྐྱོབ་དང་ལེགས་སྨོན་ཙམ་ལ་བསྟེན་པ་སྐྱེས་བུ་ཆུང་ངུའི་ལམ་སྟེ། ཉམས་ལེན་དངོས་གཞི་བསམ་གཏན་གྱིས་ཡོངས་སུ་མ་བཟུང་བའི་དགེ་བ་བཅུའི་ལས་ཀྱི་ལམ་ཡིན་ལ། དེ་ཉིད་མི་སྤྱོད་པའི་ཐེག་པ་ནི་མེད་པས། ཐེག་པ་ཀུན་གྱི་གཞིར་གྱུར་པ་དང་སྔོན་དུ་འགྲོ་བའང་ཡིན་ཏེ། ཀྱེ་རྡོ་རྗེ་ལས། དགེ་བ་བཅུ་ལས་བརྩམས་ནས་ནི། ། དེ་ཡི་ཆོས་ནི་རབ་ཏུ་དབྱེ། ། ཞེས་གསུངས་པ་ལྟར་རོ། ། འདི་ལ་ལང་གཤེགས་སུ་ལྷའི་ཐེག་པ་ཞེས་པ་བགྲོད་བྱའི་གཙོ་བོའི་དབང་དུ་བྱས་ནས་བརྗོད་ཀྱི། འཁོར་དང་བཅས་པའི་དབང་དུ་ན་འདོད་པའི་བདེ་འགྲོའི་ལམ་ཐམས་ཅད་འདུའོ། ། འདི་ནི་ལྟ་བ་རྣམ་པར་དག་པ་འཇིག་རྟེན་ཕ་རོལ་དང་ལས་རྒྱུ་འབྲས་ལ་ཡིད་ཆེས་པ་དང༌། སྤྱོད་པ་མི་དགེ་བ་བཅུ་སྤོང་ཞིང་དགེ་བ་བཅུའི་ལམ་འཁོར་དང་བཅས་པ་སྒྲུབ་པ་དང་བར་མ་ཆད་པར་གོམས་པར་བྱས་པ་ལས། འབྲས་བུ་གླིང་བཞིའི་མི་དང་འདོད་ལྷ་རིས་(༡༧༦བ)དྲུག་གི་བདེ་བའི་མཐར་ཐུག་པ་གཞན་འཕྲུལ་དབང་བྱེད་ཀྱི་བདག་པོའི་བར་དུ་བགྲོད་པའོ། ། དེ་དག་ཀྱང་ལས་འབྲས་