Tibetan
རྣམ་པར་གཞག་པའི་སྐབས་སོ། ། ཐུན་མོང་རིག་པའི་གནས་རྣམས་དང་འཇིག་རྟེན་པའི་ལམ་རྣམ་པར་གཞག་པ་སྐབས་དང་པོའི་འགྲེལ་པའོ།། །། གཉིས་པ། ཐེག་པ་ཆེ་ཆུང་ཤེས་བྱ་སྤྱིའི་གནས་རྣམ་པར་གཞག་པའི་སྐབས། ང༢ སྐབས་གཉིས་པ་ཐེག་པ་ཆེ་ཆུང་ཤེས་བྱ་སྤྱིའི་གནས་རྣམ་པར་གཞག་པ་ལ་གསུམ། ཅ༡ ཕྱི་ནང་གྲུབ་མཐའི་ཁྱད་པར་བསྟན། ཅ༢ནང་པའི་རིང་ལུགས་ཀྱི་དབྱེ་བསྡུ་སྤྲོ། ཅ༣ ཤེས་བྱའི་རྣམ་གཞག་དངོས་བཤད་པའོ།། ཅ༡ དང་པོ་ནི། ཕྱག་རྒྱ་བཞི་ལྡན་སྲིད་རྩེའི་གཉེན་པོར་འགྲོ། ། མཐའ་གཉིས་སྤངས་ནས་འགོག་བདེན་སྒྲུབ་པ་ཡིས། ། ཕྱི་པ་ལས་འཕགས་ངེས་ལེགས་རྒྱལ་བའི་བསྟན། ། རང་གཞན་ནམ་ཕྱི་ནང་གྲུབ་མཐའི་ཁྱད་པར་འབྱེད་ཆོས་མཁས་པ་རྣམས་ཀྱི་བཞེད་སྲོལ་ཐ་དད་མང་ཡང་ལྟ་སྒོམ་སྤྱོད་འབྲས་ཕྱོགས་རེ་ཇི་བཞིན་འབྱེད་མི་ནུས་པས། གྲུབ་མཐའ་ལ་ཞུགས་པ་གང་ཞིག །ལྟ་བ་བཀའ་རྟགས་ཀྱི་ཕྱག་རྒྱ་བཞི་ཁས་ལེན་མི་ལེན། སྒོམ་པ་སྲིད་རྩེའི་གཉེན་པོར་འགྲོ་མི་འགྲོ། སྤྱོད་པ་(༡༨༡ན)ངལ་དུབ་ཀྱི་མཐའ་དང་འདོད་པ་བསོད་ཉམས་ཀྱི་མཐའ་གཉིས་སྤོང་མི་སྤོང༌། འབྲས་བུའི་ཐར་པ་སྤང་བྱ་ཟད་པའི་བྲལ་བ་ཁྱད་པར་ཅན་འགོག་བདེན་འདོད་མི་འདོད་རྣམས་ཀྱིས་འབྱེད་པ་ཡིན་ཏེ། འདུལ་བ་འོད་ལྡན་ལས། བསླབ་པ་གསུམ་ནི་རབ་སྟོན་ཅིང༌། ། ཕྱག་རྒྱ་བཞི་དང་ཡང་དག་ལྡན། ། ཐོག་མ་བར་དང་མཐར་དགེ་བ། ། སངས་རྒྱས་གསུང་དུ་མཁས་པས་རྟོགས། ། ཞེས་གསུངས་པ་ལྟར་རོ། ། ཕྱག་རྒྱ་བཞི་ནི་ཆོས་ཀྱི་སྡོམ་བཞི་སྟེ། གསང་བ་བསམ་གྱིས་མི་ཁྱབ་པ་ལས། དེ་བཞིན་གཤེགས་པས་ཆོས་ཐམས་ཅད་མདོ་བཞིར་འདུས་པར་བྱས་ཏེ། འདུས་བྱས་ཐམས་ཅད་ནི་མི་རྟག་པའོ། །ཟག་པ་དང་བཅས་པ་ནི་སྡུག་བསྔལ་བའོ། །ཆོས་ཐམས་ཅད་ནི་བདག་མེད་པའོ། མྱ་ངན་ལས་འདས་པ་ནི་ཞི་བའོ། །ཞེས་གསུངས་པ་ལྟར་རོ། ། འོ་ན་རང་སྡེ་གནས་མ་བུ་པ་ཡང་བདག་འདོད་ཅིང་སྐད་ཅིག་གིས་མི་འཇིག་པའི་འདུས་བྱས་ཁས་ལེན་པས་གནོད་དོ་ཞེ་ན། སྐྱོན་མེད་དེ། དེ་ནི་ཕུང་པོ་ལས་དོན་གཞན་དང་རྟག་པར་མི་འདོད་ཅིང་གཏན་འཇིག་མི་སྲིད་པའི་རྟག་དངོས་སུ་ཁས་མི་ལེན་པས་མུ་སྟེགས་དང་ཁྱད་པར་ཆེ་བས་སོ། ། སྲིད་རྩེའི་གཉེན་པོ་ནི། མུ་སྟེགས་ལ་མེད་དེ། བདག་མེད་བདེན་པའི་རྣམ་པ་ཅན་གྱི་ལམ་ལས་རྒྱབ་ཀྱིས་ཕྱོགས་ཤིང༌། གོང་ན་ས་གཞན་མེད་པས་ཞི་རགས་ཀྱི་རྣམ་པ་ཡང་མེད་པའི་ཕྱིར་ཏེ། སློབ་དཔོན་དཔའ་བོས། ཁྱོད་ཀྱི་བསྟན་ལ་མི་ཕྱོགས་པའི། ། སྐྱེ་བོ་གཏི་མུག་གིས་ལྡོངས་པ། ། སྲིད་རྩེའི་བར་དུ་སོང་ནས་ཀྱང༌། ། སྡུག་བསྔལ་ཡང་འབྱུང་སྲིད་པ་སྒྲུབ། ། ཁྱོད་ཀྱི་བསྟན་པའི་རྗེས་འགྲོ་བ། ། བསམ་གཏན་དངོས་གཞི་མ་ཐོབ་ཀྱང༌། ། བདུད་ཀྱི་མིག་རས་བཙའ་བཞིན་དུ། ། སྲིད་པ་དག་ནི་ཟློག་པར་བྱེད། ། ཅེས་གསུངས་པ་ལྟར་རོ། ། སྤྱོད་པའི་སྐྱོན་ནི། མཐའ་གཉིས་སུ་ལྟུང་བ་སྟེ། རྙེད་བཀུར་ལ་ཆགས་པས་ངན་པ་དང་ཉུང་ངུས་མི་ཆོག་པར་བཟང་པོ་དང་མང་པོ་(༡༨༡བ)འདོད་པ་དང༌། རང་ཚུལ་ཁྲིམས་དག་ཅིང་བདག་མེད་ཀྱི་ལྟ་བས་དངོས་འཛིན་རགས་པ་ཁྲོལ་བ་ཞིག་གིས་སྒྲུབ་ཚེ་ཚེགས་ཆུང་ལ་སྤྱོད་ཚེ་ཆགས་ཞེན་དྲག་པོ་མི་སྐྱེ་ན་བཟང་ཞིང་མང་བ་ལ་སྤྱོད་ཀྱང་སྐྱོན་མེད་རུང༌། དེ་ལྟར་མི་བྱེད་པས་ལུས་སེམས་གདུང་བ་གཉིས་ནི་རིམ་བཞིན་རྒྱང་འཕེན་དང་གཅེར་བུ་པ་ལ་གཙོ་བོར་ཡོད་ལ། བཅོམ་ལྡན་འདས་ཀྱིས་ནི་གོས་ཟས་གནས་མལ་སྨན་ཏེ་གནས་བཞི་པོ་མཐའ་གཉིས་སུ་མ་ལྷུང་བ་ལ་བསླབ་པར་ནན་གྱིས་གསུངས་པས་སོ། ། འབྲས་བུ་ཐར་པ་ཡང༌། བཤེས་སྤྲིང་དུ། ས་ཆུ་མེ་རླུང་ཉི་ཟླ་བྲལ་ཐོབ་མཛོད། ། ཅེས་གསུངས་པ་ལྟར། རྒྱང་འཕེན་ནི་འབྱུང་བཞི་སེམས་བཅས་དང་དེ་དང་བྲལ་བ་གཉིས་འཁོར་འདས་སུ་འདོད་པས་ཐར་པ་དང་འབྱུང་བཞི་གཞི་མཐུན་འདོད་ལ། ཁྱད་པར་འཕགས་བསྟོད་ལས། ནེ་ཙོས་ཉི་མ་བརྟོལ་ནས་ནི། ། ཐར་པར་མཆིས་པ་བཤད་ཅེས་གྲགས། ། ཅེས་སོགས་ཉི་ཟླ་ཐར་པར་འདོད་པ་དང༌། གཅེར་བུ་པས་ནམ་མཁའི་དབྱིངས་ན་ཐར་པ་གདུགས་བཀན་པ་ལྟ་བུར་འདོད་པ་སོགས་ཀྱིས་ཐོབ་བྱའི་ཐར་པ་ལ་རྨོངས་པས་འཐོབ་བྱེད་ལམ་ལའང་རྨོངས་ལ། རྒྱལ་བའི་བསྟན་པ་ནི། ཐར་པའམ་མྱ་ངན་ལས་འདས་པ་འགོག་པའི་བདེན་པར་བཞེད་ཅིང་། དེ་ཉིད་སྒྲུབ་པར་བྱེད་པ་རྣམས་ཀྱིས་ཕྱི་པའི་ལུགས་ལས་ཁྱད་པར་དུ་འཕགས་པ་གནས་སྐབས་དང་མཐར་ཐུག་གི་ཕན་བདེ་མ་ལུས་པའི་འབྱུང་གནས་ཡིན་པའི་ཕྱིར། ངེས་པར་ལེགས་པ་ནི་རྒྱལ་བའི་བསྟན་པ་འབའ་ཞིག་ཡིན་ནོ། ། ཅ༢ གཉིས་པ་[ནང་པའི་རིང་ལུགས་ཀྱི་དབྱེ་བསྡུ་སྤྲོ་བ་]ནི། དབྱེ་བསྡུ་མང་ཡང་ཡོངས་གྲགས་ཐེག་པ་གསུམ། ། གྲུབ་མཐའ་བཞིར་གྲགས་ཀུན་ཀྱང་འཁོར་བའི་རྒྱུ། ། བདག་འཛིན་སྤངས་ནས་མྱང་འདས་སྒྲུབ་པར་མཐུན། ། སངས་རྒྱས་ཀྱི་བསྟན་པ་ལུང་གི་ཆོས་ཀྱི་དབང་དུ་བྱས་ནས་རབ་ཏུ་དབྱེ་བ་དང་བསྡུ་བའི་ཚུལ་བཀའ་དང་བསྟན་བཅོས་ནས་མང་དུ་གསུངས་ཏེ། ཨཱརྱ་དེ་བས་སྙིང་པོ་ཀུན་བཏུས་ལས། (༡༨༢ན) སངས་རྒྱས་ཆོས་ནི་རྣམ་པ་བཞིར། ། ཡིད་འདོད་རྣམས་ཀྱིས་མངོན་མཐོང་སྟེ། ། བྱེ་བྲག་སྨྲ་ལ་སོགས་པའི་ལམ། ། བཤད་པས་དེ་ཉིད་སྒྲུབ་པའོ། ། ཞེས་གསུངས་པ་ལྟར། སངས་རྒྱས་ཀྱི་བསྟན་པ་དམ་པའི་ཆོས་མཐའ་དག་བྱེ་བྲག་ཏུ་སྨྲ་བ་དང་། མདོ་སྡེ་པ་དང་། རྣལ་འབྱོར་སྤྱོད་པ་དང་། དབུ་མ་པ་སྟེ། གྲུབ་པའི་མཐའ་སྨྲ་བ་བཞིར་ངེས་ཤིང༌། དེའང་ཕྱི་དོན་དུ་སྨྲ་བ་དང་སེམས་ཙམ་པ་དང་ངོ་བོ་ཉིད་མེད་པར་སྨྲ་བའི་དབུ་མ་པ་གསུམ་དུ་འདུ་སྟེ། བྱེ་མདོ་གཉིས་ཀ་དོན་སྨྲར་འདུས་པས་སོ། ། ཡང་དང་པོ་གཉིས་ཐེག་དམན་པ་དང་། ཕྱི་མ་གཉིས་ཐེག་ཆེན་པར་ངེས་པས་ཐེག་པ་གཉིས་སུའང་འདུའོ། ། ཡང་མདོ་སྡེ་ལངྐར་གཤེགས་པ་ལས་ནི། བསྟན་པ་མཐའ་དག་ཐེག་པ་ལྔར་བསྡུས་པར་བཤད་དེ། ཇི་སྐད་དུ། ལྷ་ཡི་ཐེག་དང་ཚངས་ཐེག་དང༌། ། ཉན་ཐོས་ཀྱི་ཡང་དེ་བཞིན་དུ། ། རང་རྒྱལ་སངས་རྒྱས་ཐེག་པ་སྟེ། ། ཐེག་པ་དེ་དག་ངས་བཤད་དོ། ། ཞེས་སོ། ། དེ་ཡང་བསྡུ་ན། སྔ་མ་གཉིས་མངོན་མཐོ་དང༌། ཕྱི་མ་གསུམ་ངེས་ལེགས་ཏེ། ཐེག་པ་གཉིས་སུ་འདུ་བར་རིན་ཆེན་ཕྲེང་བ་ལས་གསུངས་ཤིང༌། དེ་བཞིན་དུ། ཤེར་ཕྱིན་གྱི་མན་ངག་དང་སྦྱར་ན། སྔ་མ་གཉིས་སྐྱེས་བུ་ཆུང་ངུ་དང༌། བར་པ་གཉིས་འབྲིང་དང༌། ཐ་མ་སྐྱེས་བུ་ཆེན་པོའི་ལམ་སྟེ། སྐྱེས་བུ་གསུམ་གྱི་ལམ་དུའང་འདུའོ།། འོ་ན་ཐེག་པ་ལྔར་འདོད་ན། རྡོ་རྗེ་སྙིང་འགྲེལ་ལས། སངས་རྒྱས་པ་ལ་བཞི་པ་དང༌། ། ལྔ་པ་ཐུབ་པའི་དགོངས་པ་མིན། ། ཞེས་ཐེག་པ་བཞི་པ། གྲུབ་མཐའ་སྨྲ་བ་ལྔ་པ་མེད་པར་གསུངས་པ་དང་མི་འགལ་ལམ་ཞེ་ན། དམ་ཆོས་པད་དཀར་ལས། དྲང་སྲོང་ཆེན་པོས་ཐེག་པ་གསུམ་བསྟན་པ། ། རྣམ་འདྲེན་རྣམས་ཀྱི་ཐབས་ལ་མཁས་པ་སྟེ། ། ཞེས་གསུངས་པ་ལྟར། རྣམ་པར་གྲོལ་བའི་ལམ་ལ་ཐེག་པ་བཞི་པ་མེད་པ་ལ་དགོངས་ནས་གསུངས་པ་ཡིན་གྱི། འདི་དང་འཆད་གཞི་ཐ་དད་པས་འགལ་བ་ཅུང་ཟད་ཀྱང་མེད་དོ། ། ཡང་སྤྱོད་བསྡུས་སྒྲོན་མ་ལས་ནི། གདུལ་བྱའི་མོས་པ་གསུམ་གྱི་དབང་དུ་བྱས་(༡༨༢བ)ནས་སྤྱོད་པ་གསུམ་དུ་བསྡུས་ཏེ། དམན་པ་ལ་མོས་པ་ལ་ཆགས་བྲལ་གྱི་སྤྱོད་པ་དང༌། རྒྱ་ཆེན་པོ་ལ་མོས་པ་ལ་ས་དང་ཕ་རོལ་ཏུ་ཕྱིན་པའི་སྤྱོད་པ་དང༌། ཟབ་མོ་ལ་ལྷག་པར་མོས་པ་ལ་འདོད་ཆགས་ཀྱི་སྤྱོད་པ་བསྟན་པའོ། ། ཡང་སློབ་དཔོན་ཏྲི་པི་ཊ་ཀའི་ཚུལ་གསུམ་སྒྲོན་མ་ལས། བདེན་པའི་དེ་ཉིད་ཚུལ་སྟོན་གང༌། ། ཕ་རོལ་ཕྱིན་ཚུལ་དོན་གང་ཡང༌། ། གསང་སྔགས་ཆེན་པོའི་ཚུལ་དོན་ཡང༌། ། བསྡུས་ནས་འདིར་ནི་བསྟན་པ་ཡིན། ། ཞེས་བདེན་པ་བཞིའི་རྣལ་འབྱོར་པའི་ཚུལ། ཕ་རོལ་ཏུ་ཕྱིན་པའི་རྣལ་འབྱོར་པའི་ཚུལ། གསང་སྔགས་ཆེན་པོའི་རྣལ་འབྱོར་པའི་ཚུལ་ཏེ་ཚུལ་གསུམ་དུ་བསྡུས་ཤིང༌། སློབ་དཔོན་ཡེ་ཤེས་གྲགས་པས་ཀྱང་བཀའ་མ་ལུས་པ་མདོར་བསྡུས་ཏེ་བཤད་པའི་རབ་ཏུ་བྱེད་པ་ལས་དེ་ལྟར་དུ་བསྡུས་སོ། ། མདོ་སྡེ་རྒྱན་ལས། སྡེ་སྣོད་དག་ནི་གསུམ་མམ་གཉིས་ཀྱང་རུང༌། ། ཞེས་མཆོག་དམན་གྱི་སྡེ་སྣོད་དམ་ཐེག་པ་གཉིས་སུ་བསྡུས་པ་དང༌། ཕལ་ཆེ་བ་ལས་ཉན་ཐོས་དང་རང་རྒྱལ་དང་བྱང་ཆུབ་སེམས་དཔའི་ཐེག་པ་སྟེ་གསུམ་དུ་བསྡུས་པ་སོགས་མང་པོ་ཞིག་འབྱུང་ཡང༌། ཡོངས་སུ་གྲགས་པ་ནི། ཐེག་པ་གསུམ་དང༌། གྲུབ་མཐའ་བཞིར་གྲགས་པ་སྟེ། དེ་དག་ཀུན་ཀྱང་འཁོར་བའི་རྒྱུ་བདག་ཏུ་འཛིན་པ་སྤངས་ནས་ཐར་པ་མྱང་འདས་ཀྱི་གོ་འཕང་བསྒྲུབ་པར་མཐུན་ནོ། ། དེ་རྣམས་ཀྱང་སྔ་མ་སྔ་མ་ལ་མ་བརྟེན་པར་ཕྱི་མ་ཕྱི་མ་མི་འབྱུང་སྟེ། སའི་སྙིང་པོ་འཁོར་ལོ་བཅུ་པའི་མདོ་ལས། གང་ལ་མཐོ་རིས་ཐེག་པ་ཡོད་མིན། ། དེ་ལ་ཉན་ཐོས་ཐེག་པ་མེད་དེ། ། གང་ལ་ཉན་ཐོས་ཐེག་པ་ཡོད་མིན། ། དེ་ལ་རང་རྒྱལ་ཐེག་པ་མེད་དེ། ། གང་ལ་རང་རྒྱལ་ཐེག་པ་ཡོད་མིན། ། དེ་ལ་ཐེག་པ་ཆེན་པོ་མེད་དེ། ། ཞེས་གསུངས་པས་མཚོན་ནོ། ། ཅ༣ གསུམ་པ་ཤེས་བྱའི་རྣམ་གཞག་དངོས་བཤད་པ་ལ་གསུམ། ཆ༡ གཏན་ལ་འབེབས་བྱེད་དང་དབབ་བྱ་ངོས་བཟུང༌། ཆ༢ དེ་དག་གི་དགོས་པ་མདོར་སྨོས། ཆ༣ རྣམ་གཞག་དངོས་རྒྱས་པར་བཤད་པའོ། ། ཆ༡ དང་པོ་ནི། (༡༨༣ན) དེ་རྒྱུ་ཆོས་རབ་རྣམ་འབྱེད་ཤེས་རབ་སྟེ། ། གཏན་ལ་དབབ་བྱ་ཕུང་ཁམས་སྐྱེ་མཆེད་དང༌། ། རྟེན་འབྲེལ་སོགས་ལ་ཐེག་པ་ཆེ་ཆུང་གི། ། དབྱེ་བསྡུ་མང་ཡང་དེ་དག་སྤྱི་ཡི་ལུགས། ། དེའང་མཛོད་ལས། ཆོས་རྣམས་རབ་ཏུ་རྣམ་འབྱེད་མེད་པར་ཉོན་མོངས་རྣམས། ། གང་ཕྱིར་ཉེ་བར་ཞི་བར་བྱ་བའི་ཐབས་མེད་ལ། ། ཉོན་མོངས་པས་ཀྱང་འཇིག་རྟེན་སྲིད་མཚོ་འདིར་འཁྱམས་ཏེ། ། དེ་བས་དེ་ཕྱིར་འདི་ནི་སྟོན་པས་གསུངས་སོ་ལོ། ། ཞེས་པ་ལྟར། འཁོར་བའི་རྒྱུ་ཉོན་མོངས་པ་སྤངས་ནས་ཐར་པ་འཐོབ་པར་བྱེད་པ་ལ་ནི་ཆོས་རབ་ཏུ་རྣམ་པར་འབྱེད་པའི་ཤེས་རབ་ཀྱིས་ཤེས་བྱ་སྤྱིའི་མཚན་ཉིད་གཏན་ལ་ཕབ་པ་ཞིག་དགོས་ལ། དེ་ནི་ཕུང་པོ་ལྔ་དང་། ཁམས་བཅོ་བརྒྱད་དང་། སྐྱེ་མཆེད་བཅུ་གཉིས་དང་། རྟེན་ཅིང་འབྲེལ་བར་འབྱུང་བའི་མཚན་ཉིད་ཇི་ལྟ་བ་བཞིན་གཏན་ལ་འབེབས་པའི་སྒོ་ནས་ཡིན་པའི་ཕྱིར་ན། དེ་དག་ལ་མཁས་པར་བྱ་དགོས་སོ། ། མདོ་ལས་ཀྱང༌། ཕུང་པོ་ལ་མཁས་པར་བྱའོ། །ཁམས་ལ་མཁས་པར་བྱའོ། །སྐྱེ་མཆེད་ལ་མཁས་པར་བྱའོ། །རྟེན་ཅིང་འབྲེལ་བར་འབྱུང་བ་དང་གནས་དང་གནས་མ་ཡིན་པ་རྣམས་ལ་མཁས་པར་བྱའོ། །ཞེས་གསུངས་པ་ལྟར་རོ། ། དེ་དག་ལའང་ཐེག་པ་ཆེ་ཆུང་གི་དབྱེ་བསྡུ་དང་མཚན་ཉིད་འཇོག་ཚུལ་མང་ཡང་། དེ་དག་སྤྱི་ལ་ཁྱབ་ཆེ་བའི་ལུགས་སུ་འདིར་མདོ་ཙམ་བརྗོད་པར་བྱའོ། ། ཆ༢ གཉིས་པ་[དེ་དག་གི་དགོས་པ་མདོར་བསྨོས་པ་]ནི། རིལ་པོར་འཛིན་དང་དབང་པོ་མོས་པ་གསུམ། ། བདག་ལྟ་རྨོངས་པའི་གཉེན་པོར་དེ་དག་རྣམས། ། རིམ་པ་བཞིན་གསུངས། ཞེས་པ་སྟེ། བཅོམ་ལྡན་འདས་ཀྱིས་ཕུང་སྐྱེ་ཁམས་གསུམ་གྱི་ཆོས་སྟོན་པས་ཤེས་བྱ་གཏན་ལ་དབབ་པར་མཛད་པ་དེ་དག་གི་དགོས་པ་ནི། རྨོངས་པ་གསུམ་གྱིས་རིལ་པོར་འཛིན་པ་རྣམས་ཀྱི་གཉེན་པོ་དང༌། གདུལ་བྱའི་དབང་པོ་གསུམ་དང༌། མོས་པ་གསུམ་ལ་དགོངས་པ་བྱེ་སྨྲ་བ་རྣམས་འདོད་དེ། དེ་ལ་རྨོངས་པ་གསུམ་ནི། སེམས་བྱུང་དང༌། (༡༨༣བ)གཟུགས་དང༌། གཟུགས་སེམས་གཉིས་ཀས་རིལ་པོའི་བདག་ཉིད་དུ་འཛིན་པས་རྨོངས་པའོ། ། དབང་པོ་གསུམ་ནི། དབང་པོ་རྣོན་པོ་དང༌། འབྲིང་དང༌། རྟུལ་པོའོ། ། མོས་པའམ་འདོད་པ་གསུམ་ནི། ཚིག་བསྡུས་པ་དང༌། འབྲིང་དང༌། རྒྱས་པ་འདོད་པའོ། ། རྟེན་འབྲེལ་གྱི་ཆོས་ནི། ཁ་ཅིག་བདག་ཡོད་པ་ལས་ཐམས་ཅད་བྱུང་བར་ལྟ་བ་དང༌། ཁ་ཅིག་རྒྱུ་མེད་པ་ལས་བྱུང་བར་འདོད་པ་ཆད་པར་ལྟ་བས་རྟེན་ཅིང་འབྲེལ་བར་འབྱུང་བའི་གནས་ལ་རྨོངས་པ་བསལ་བའི་སླད་དུ་སྟེ། མདོར་ན། ཤེས་བྱའི་གནས་ལུགས་ལ་རྨོངས་པའི་གཉེན་པོ་དེ་དག་རྣམས་རིམ་པ་བཞིན་དུ་གསུངས་སོ། ། ཆ༣ གསུམ་པ་རྣམ་བཞག་དངོས་རྒྱས་པར་བཤད་པ་ལ་གསུམ། ཇ༡ ཐེག་པ་ཐུན་མོང་བའི་ལུགས་ཕུང་ཁམས་སྐྱེ་མཆེད་ཀྱི་རྣམ་བཞག ། ཇ༢ ཐུན་མོང་མ་ཡིན་པ་འཁོར་ལོ་ཐ་མའི་ལུགས་སྲིད་པ་ཉེར་ལྔ་ལ་སོགས་པའི་རྣམ་གཞག ། ཇ༣ ཐེག་པ་ཆེ་ཆུང་ཕྱོགས་བསྡུས་རྟེན་འབྲེལ་གྱི་རྣམ་བཞག་བཤད་པའོ། ། ཇ༡ དང་པོ་ལ་གཉིས། ཉ༡ སོ་སོའི་དབྱེ་བ་མངོན་པ་གོང་མའི་ལུགས་གཙོ་བོར་བཤད་པ། ཉ༢ དེ་དག་གི་དོན་བསྡུ་མངོན་པ་འོག་མ་ལྟར་བཤད་པའོ། ། ཉ༡ དང་པོ་ལ་གསུམ། ཏ༡ ཕུང་པོ། ཏ༢ ཁམས། ཏ༣ སྐྱེ་མཆེད་ཀྱི་རྣམ་པར་གཞག་པའོ། ། དེའང་ཐེག་ཆེན་ཐུན་མོང་མ་ཡིན་པའི་མངོན་པ་ཀུན་ལས་བཏུས་པར་མིང་གི་རྣམ་གྲངས་མང་ཞིང་བརྗོད་བྱ་རྒྱ་ཆེ་བས་དེའི་ལུགས་ལྟར་བཤད་པ་ལ། ཏ༡ དང་པོ་ཕུང་པོའི་རྣམ་གཞག་ལའང་གསུམ། ཐ༡ ངོ་བོ་དང༌། ཐ༢ དབྱེ་བ། ཐ༣ ལྡན་ཚུལ་བཤད་པའོ། ། ཐ༡ དང་པོ་ནི། ཕུང་པོ་འདུས་པ་སྟེ། ། ཞེས་ཕུང་པོའི་སྒྲ་དོན་ནི། ལེགས་སྦྱར་ལ་སྐནྡྷ་སྟེ། ཕུང་པོའི་སྒྲ་ནི། རཱ་ཤི་སྟེ་ཚོགས་པའམ་སྤུངས་པའི་དོན་ལ་འཇུག་པས། རིགས་མཐུན་གྱི་ཆོས་དུ་མ་སྤུངས་པ་ལས་སམ། དེ་ཉིད་ཀྱི་ཁྱད་པར་ཐམས་ཅད་འདུས་པས་ན་ཕུང་པོ་ཞེས་བྱའོ། ། ཐ༢ གཉིས་པ་དབྱེ་བ་ལ་གཉིས། ད༡ མདོར་བསྟན། ད༢ རྒྱས་བཤད་དོ། ། ད༡ དང་པོ་ནི། གཟུགས་ཚོར་འདུ་ཤེས་འདུ་བྱེད་རྣམ་ཤེས་ལྔ། ། ཞེས་སོ། །(༡༨༤ན) ད༢ གཉིས་པ་རྒྱས་བཤད་ལ་ལྔ། ན༡ གཟུགས། ན༢ ཚོར་བ། ན༣ འདུ་ཤེས། ན༤ འདུ་བྱེད། ན༥ རྣམ་པར་ཤེས་པའི་ཕུང་པོའོ། ། ན༡ དང་པོ་གཟུགས་ལ་གཉིས། པ༡ ངོ་བོ། པ༢ དབྱེ་བའོ། ། པ༡ དང་པོ་ནི། གཟུགས་སུ་རུང་བ། ཞེས་པ་སྟེ། མདོ་ལས། དགེ་སློང་དག །གཟུགས་སུ་ཡོད་ཅིང་གཟུགས་སུ་རུང་བས། དེའི་ཕྱིར་གཟུགས་ཉེ་བར་ལེན་པའི་ཕུང་པོ་ཞེས་བྱའོ། །ཅི་གཟུགས་སུ་རུང་ཞེ་ན། ལག་པའི་འདུས་ཏེ་རེག་པས་རེག་ན་གཟུགས་སུ་རུང་བ་དང༌། ཞེས་གསུངས་པ་ལྟར་རོ། ། ཀུན་བཏུས་ལས། རེག་པས་གཟུགས་སུ་ཡོད་པ་དང༌། ཡུལ་སྤྱད་པས་གཟུགས་སུ་ཡོད་པ། ཞེས་གསུངས་ཏེ། གཟུགས་ཅན་ཕྲད་པས་སྔར་དང་མི་འདྲ་བར་འགྱུར་བ་ལག་པས་མེ་ཏོག་ལ་རེག་པས་དེའི་ཆོས་ཉམས་པ་ལྟ་བུ་དང༌། ཡིད་ཡུལ་དུ་གཟུགས་ཀྱི་རྣམ་པ་འཆར་བའོ། ། པ༢ གཉིས་པ་དེའི་དབྱེ་བ་ལ་གསུམ་སྟེ། ཕ༡ རྒྱུའི་གཟུགས་འབྱུང་བ་ཆེན་པོ་བཞི། ཕ༢ འབྲས་བུའི་གཟུགས་དེ་རྒྱུར་གྱུར་པ། ཕ༣ ཆོས་ཀྱི་སྐྱེ་མཆེད་པའི་གཟུགས་སོ། ། ཕ༡ དང་པོ་ནི། རྒྱུ་གཟུགས་འབྱུང་བ་བཞི། ། སྲ་གཤེར་དྲོད་གཡོ། ཞེས་པ་སྟེ། རྒྱུའི་གཟུགས་ནི། འབྱུང་བ་ས་ཆུ་མེ་རླུང་བཞི་ཡིན་ལ། དེ་དག་ཇི་ལྟ་བུ་ཞེ་ན། འཇིག་རྟེན་གྱི་ཐ་སྙད་ལ། ཁ་དོག་དབྱིབས་ལ་ས་སོགས་གྲགས་མོད་ཀྱང༌། བསྟན་བཅོས་ཤེས་པ་རྣམས་དོན་གྱི་དབང་དུ་བྱས་ན། སྲ་ཞིང་འཐས་ལ་འཛིན་པར་བྱེད་པའི་ལས་ཅན་ནི་ས། བརླན་ཞིང་གཤེར་ལ་སྡུད་པར་བྱེད་པ་ནི་ཆུ། ཚ་ཞིང་སྲེག་ལ་སྨིན་པར་བྱེད་པ་ནི་མེ། ཡང་ཞིང་གཡོ་ལ་བསྐྱོད་པར་བྱེད་པ་ནི་རླུང་ངོ༌། ། ཕ༢ གཉིས་པ་འབྲས་བུའི་གཟུགས་ནི་གཉིས། བ༡ དབང་པོ་ལྔ་དང་། བ༢ དོན་ལྔའོ། ། བ༡ དང་པོ་ནི། རྒྱུར་བྱས་འབྲས་བུའི་གཟུགས། ། རྣམ་ཤེས་རྟེན་གྱུར་མིག་སོགས་དབང་པོ་ལྔ། ། འབྲས་བུའི་གཟུགས་ནི། འབྱུང་བ་ཆེན་པོ་བཞི་དག་རྒྱུར་བྱས་པ་ལས་བྱུང་བ་གང་ཞིག །དེའི་ཁྱད་པར་མིག་གི་རྣམ་པར་ཤེས་པའི་རྟེན་ནམ་བདག་རྐྱེན་དུ་གྱུར་པའི་ནང་གི་གཟུགས་(༡༨༤བ)དང་བའོ། ། དེ་བཞིན་དུ་སྦྱར་ཏེ། རྣ་བ་སྣ་ལྕེ་ལུས་ཀྱི་རྣམ་པར་ཤེས་པའི་རྟེན་ནམ་བདག་རྐྱེན་དུ་གྱུར་པའི་ནང་གི་གཟུགས་དང་བ་སྟེ། མིག་སོགས་ཀྱི་དབང་པོ་ལྔ་གའང་ཀུན་གཞིའི་སྟེང་གི་རང་གི་ས་བོན་གྱི་ཆ་ལས་སྐྱེས་པའོ།། དང་བའི་དོན་ནི། མེ་ལོང་དང་བ་དང༌། གཟུགས་ལ་བརྟེན་ནས་གཟུགས་བརྙན་འཆར་བ་ལྟར། དབང་པོ་དང་བ་གཟུགས་སྒྲ་ལ་སོགས་པ་བརྟེན་ནས་དེ་དག་ཏུ་སྣང་བའི་རྣམ་པར་རིག་པ་འཆར་བའོ། ། བ༢ གཉིས་པ་[དོན་ལྔ་]ནི། དེ་ཡི་གཟུང་བྱ་གཟུགས་སོགས་ཕྱི་དོན་ལྔ། ། ཡུལ་གཟུགས་ཉེར་ལྔ་སྡེ་ཚན་དྲུག་གམ་བཞི། ། འབྱུང་བ་ཆེན་པོ་བཞི་དག་རྒྱུར་བྱས་པ་ལས་འབྱུང་བ་འབྲས་བུའི་གཟུགས་གང་ཞིག །དེའི་ཁྱད་པར་མིག་སོགས་དབང་པོས་གཟུང་བར་བྱ་བ་གཟུགས་སོགས་ཕྱི་རོལ་གྱི་དོན་ལྔ་སྟེ། ཐོག་མར་མིག་གི་ཡུལ་དུ་གྱུར་པ་གཟུགས་ལ་རེ་རེར་སྨོས་པ་ཉེར་ལྔ་སྟེ། སྔོ་སེར་དམར་དཀར་རིང་ཐུང་ལྷམ་པ་ཟླུམ། ། ཕྲ་རགས་ཕྱ་ལེ་ཡིན་མིན་མཐོ་དམའ་འགྲིབ། ། ཉི་སྣང་མུན་སྤྲིན་དུ་བ་རྡུལ་ཁུག་སྣ། ། མངོན་པར་སྐབས་ཡོད་རྣམ་པར་རིག་བྱེད་དང༌། ། ནམ་མཁའ་ཁ་དོག་གཅིག་པ་བཅས་རྣམས་སོ། ། ཞེས་སོ། ། མཚན་ཉིད་ཀྱིས་ཕྱེ་བ་སྡེ་ཚན་དྲུག་ཏུའང་བཤད་ལ། བསྡུ་ན། ཁ་དོག་གིས་ཕྱེ་བ་སྔོ་དམར་སོགས་སོ། ། དབྱིབས་ཀྱིས་ཕྱེ་བ་ལྷམ་པ་དང་ཟླུམ་པོ་སོགས་སོ། ། སྣང་ཚུལ་གྱིས་ཕྱེ་བ་ནམ་མཁའ་ལམ་མེར་སྣང་བ་ལྟ་བུ་སྟེ། མངོན་པར་སྐབས་ཡོད་པའི་གཟུགས་ཟེར་རོ། ། གནས་སྐབས་ཀྱིས་ཕྱེ་བ་ལུས་ཀྱི་གཡོ་འགུལ་འདེགས་འཇོག་དང༌། ཕྱག་སོགས་བྱེད་པ་ན་དེའི་སྔ་ལོགས་ཀྱི་ཀུན་སློང་གཞན་གྱིས་རིག་པར་བྱར་ཡོད་པ་སྟེ་རྣམ་པར་རིག་བྱེད་ཀྱི་གཟུགས་ཟེར། འདི་