Tibetan
འགྱུར་ཡིན་པ་བཞིན་དུ་སེམས་ཀྱི་རྣམ་འགྱུར་ཡིན་པས་ན་སེམས་བྱུང་ཞེས་ཀྱང་བྱ་སྟེ། འདི་ནི་དུང་གི་སྒྲ་དང་མེ་ལྕེ་བཞིན་འཕྲལ་འཕྲལ་འབྱུང་བས་རིགས་འདྲ་ལས་འབྱུང་བའང་མི་དགོས་སོ། ། ཚ༢ གཉིས་པ་དབྱེ་བ་ལ། ལྔ་བཅུ་རྩ་གཅིག་པོ་སྡེ་ཚན་དུ་བསྡུས་ཏེ་དྲུག་གོ། ། ཛ༡ སྡེ་ཚན་དང་པོ་ནི། དབྱེ་བ་ཀུན་འགྲོ། ཞེས་པ་སྟེ། སུམ་ཅུ་པ་ལས། ཚོར་འདུ་སེམས་རེག་ཡིད་བྱེད་དེ། ། ཀུན་ཏུ་འགྲོ་བ་རྣམ་པ་ལྔ། ། ཞེས་བཤད་པའི་ཚོར་འདུ་གཉིས་ནི། སྤྱི་དང་བྱེ་བྲག་གི་ཁྱད་པར་མ་གཏོགས་ཕུང་པོར་བཞག་པ་དང་ངོ་བོ་མཚུངས་ལ། དེ་གཉིས་སེམས་བྱུང་ཡང་ཡིན་ལ། ལོགས་སུ་བཞག་དགོས་པའི་རྒྱུ་མཚན་ནི། ཁྱིམ་པ་རྣམས་ཚོར་བ་བདེ་སྡུག་ལ་རྩོད་པའི་དབང་གིས་ཚོར་བ་དང༌། རབ་བྱུང་རྣམས་ལྟ་བ་ཐ་དད་ལས་རྩོད་པའི་དབང་གིས་འདུ་ཤེས་ཏེ། དེ་གཉིས་རྩོད་པའི་རྩ་བ་འཁོར་བའི་རྒྱུའི་གཙོ་བོར་གྱུར་པའི་ཕྱིར་རོ། ། སེམས་པ་ནི། སེམས་ཡུལ་ལ་གཡོ་བའི་གནས་སྐབས་ཀྱི་ཡིད་ཀྱི་རྣམ་འགྱུར། རེག་པ་ནི། ཡུལ་དབང་ཡིད་བྱེད་གསུམ་འདུས་པ་ལས་ཚོར་བ་བདེ་སྡུག་དང་མཐུན་པར་དབང་པོའི་འགྱུར་བ་ཡོངས་སུ་གཅོད་པར་བྱེད་པ། ཡིད་བྱེད་ནི། སེམས་ཡུལ་གྱི་དམིགས་པ་ལ་ཡང་དང་ཡང་དུ་གཏོད་པའི་བྱེ་བྲག་ཏུ་འཛིན་པའོ། ། ལྔ་པོ་དེ་ལས་གང་རུང་(༡༨༩བ)གཅིག་མེད་ནའང་སེམས་ཡུལ་ལ་གཏོད་པའི་བྱ་བ་མི་རྫོགས་པས། ཁམས་གསུམ་གྱིས་བསྡུས་པའི་སེམས་གཙོ་བོ་རྣམ་ཤེས་ཀུན་གྱི་རྗེས་སུ་འགྲོ་བའི་ཕྱིར་དེ་སྐད་ཅེས་བྱའོ། ། ཛ༢ སྡེ་ཚན་གཉིས་པ་ནི། ཡུལ་ངེས་ལྔ། ། ཞེས་པ་སྟེ། དེ་ཉིད་ལས། འདུན་མོས་དྲན་ཏིང་ཤེས་རབ་སྟེ། ། ཡུལ་ངེས་སྐྱེ་བ་རྣམ་པ་ལྔ། ། ཞེས་པའི་འདུན་པ་ནི། བསམ་བྱའི་དངོས་པོ་དོན་དུ་གཉེར་བ། མོས་པ་ནི། ངེས་པ་ཐོབ་པའི་དོན་ལ་དེ་ཁོ་ནར་འཛིན་པ། དྲན་པ་ནི། འདྲིས་པའི་དངོས་པོ་མི་བརྗེད་པ། ཏིང་ངེ་འཛིན་ནི། ཞི་རགས་དང་བདེན་བཞི་སོགས་བརྟགས་བྱའི་དངོས་པོ་ལ་སེམས་རྩེ་གཅིག་པ། ཤེས་རབ་ནི། རང་དང་སྤྱིའི་མཚན་ཉིད་རྣམ་པར་འབྱེད་པའོ། ། དེ་དག་ཀྱང་། བསམ་པ་དང་། ངེས་པ་དང་། འདྲིས་པ་དང་། བརྟག་པའི་དངོས་པོ་འདི་དག་ལས་སེམས་གཞན་དུ་མི་འཛིན་པར་ཡུལ་འདི་དག་ཏུ་ངེས་པས་དེ་སྐད་ཅེས་བྱའོ། ། ཛ༣ སྡེ་ཚན་གསུམ་པ་ནི། དགེ་བ་བཅུ་གཅིག ། ཅེས་པ་སྟེ། དད་དང་ངོ་ཚ་ཤེས་ཁྲེལ་ཡོད། ། མ་ཆགས་ཞེ་སྡང་གཏི་མུག་མེད། ། བརྩོན་འགྲུས་ཤིན་སྦྱང་བག་ཡོད་དང༌། ། བཏང་སྙོམས་རྣམ་པར་མི་འཚེ་བ། ། བཅུ་གཅིག་པོ་ནི་དགེ་བ་ཡིན། ། ཞེས་པའི། དད་པ་ནི། ཡིད་ཆེས་པ་དང༌། དང་བ་དང༌། འདོད་པ་གསུམ། ངོ་ཚ་ཤེས་པ་ནི། རང་ལ་ལྟོས་ནས་ཁ་ན་མ་ཐོ་བ་ལ་འཛེམ་པ། ཁྲེལ་ཡོད་པ་ནི། གཞན་ལ་ལྟོས་ནས་དེ་འཛེམ་པ། མ་ཆགས་པ་ནི། ཉེར་ལེན་གྱི་ཕུང་པོ་ལྔ་དང་སྲིད་པའི་ལོངས་སྤྱོད་ལ་མངོན་པར་མི་ཞེན་པ། ཞེ་སྡང་མེད་པ་ནི། སྡང་བའི་ཡུལ་ལ་མནར་སེམས་མེད་པ། གཏི་མུག་མེད་པ་ནི། བླང་དོར་ལ་མ་རྨོངས་པ། བརྩོན་འགྲུས་ནི། དགེ་བ་ལ་སྤྲོ་བ་མི་ལྷོད་པ། ཤིན་སྦྱངས་ནི། ལུས་སེམས་ལས་སུ་རུང་བས་སེམས་དམིགས་པ་ལ་བཀོལ་དུ་བཏུབ་པ། བག་ཡོད་ནི། ཟག་བཅས་ཀྱི་ཆོས་རྣམས་ལས་སེམས་སྲུང་ཞིང་དགེ་བའི་ཆོས་སྒོམ་པ། བཏང་སྙོམས་ནི། མཉམ་པར་གཞག་པའི་ཚེ་བྱིང་རྒོད་སོགས་(༡༩༠ན)ཀྱིས་མི་ཉམས་པར་རྩོལ་མེད་མཉམ་ཉིད་དུ་འཇུག་པ། མི་འཚེ་བ་ནི། སེམས་སྙིང་རྗེའི་རྣམ་པས་གཞན་ལ་ཐོ་མི་བཙམས་པའོ། ། འདི་དག་ལ་ཚུལ་བཞིན་དུ་སྤྱོད་པས་རྣམ་སྨིན་ཡིད་དུ་འོང་བ་འབྱིན་པར་བྱེད་པའི་ཕྱིར། དགེ་བའི་ཆོས་སུ་བཞག་སྟེ། རྒྱུ་ལ་འབྲས་བུའི་མིང་གིས་བཏགས་པའོ། ། ཛ༤ སྡེ་ཚན་བཞི་པ་ལ་གཉིས། ཝ༡ རྩ་ཉོན་སྤྱིར་བཤད་པ། ཝ༢ ལྟ་བ་ཁྱད་པར་དུ་དབྱེ་བའོ། ། ཝ༡ དང་པོ་ནི། རྩ་བའི་ཉོན་མོངས་དྲུག ། ཅེས་པ་སྟེ། དེའང༌། འདོད་ཆགས་ཁོང་ཁྲོ་ང་རྒྱལ་དང༌། ། མ་རིག་ཐེ་ཚོམ་ལྟ་བ་སྟེ། ། རྩ་བའི་ཉོན་མོངས་རྣམ་པ་དྲུག ། ཅེས་པའི། འདོད་ཆགས་ནི། ཁམས་གསུམ་གྱི་གནས་ལུས་ལོངས་སྤྱོད་ལ་ཞེན་པ། ཁོང་ཁྲོ་ནི། གནོད་བྱེད་སེམས་ཅན་དང་གནོད་པ་སྡུག་བསྔལ་དང་གནོད་པའི་རྐྱེན་དུག་མཚོན་སོགས་ལ་དམིགས་ཏེ་ཀུན་ནས་མནར་སེམས་པ། ང་རྒྱལ་ནི། འཇིག་ཚོགས་ལ་ལྟ་བ་ལ་བརྟེན་ནས་ཁེངས་པའི་རྣམ་པ་ཅན་གྱི་སེམས་གཟེངས་མཐོ་བ། མ་རིག་པ་ནི། དེ་ཁོ་ན་ཉིད་ལ་རྨོངས་པ་དང་བདེན་བཞིའི་དོན་ལ་རྨོངས་པ་གཉིས་སུ་ཡོད་པ་ལས་འདིར་ཕྱི་མའི་དོན། ཐེ་ཚོམ་ནི། རྣམ་བཞག་མང་ཡང་འདིར་བདེན་པ་དང་ལས་འབྲས་ལ་ཡིད་གཉིས་ཟ་བ། ང་རྒྱལ་ལའང་ནང་གསེས་སུ་བདུན་ཏེ། རང་དང་ཡོན་ཏན་མཚུངས་པ་ལ་མཚུངས་སོ་སྙམ་དུ་སེམས་ཁེངས་པ་ང་རྒྱལ། མཚུངས་པ་ལས་བདག་ལྷག་གོ་སྙམ་པ་ཆེ་བའི་ང་རྒྱལ། བདག་བས་ལྷག་པ་ལས་ཀྱང་བདག་ལྷག་གོ་སྙམ་པ་ང་རྒྱལ་ལས་ཀྱང་ང་རྒྱལ། ཕུང་པོ་ལ་བདག་ཏུ་ལྟ་བ་ངའོ་སྙམ་པའི་ང་རྒྱལ། ཡོན་ཏན་མ་ཐོབ་པ་ལ་ཐོབ་བོ་སྙམ་པ་མངོན་པའི་ང་རྒྱལ། ཡོན་ཏན་མ་ཡིན་པ་ལ་ཡོན་ཏན་དུ་འཛིན་པ་ལོག་པའི་ང་རྒྱལ། ཆེས་ཁྱད་པར་དུ་འཕགས་པ་ལས་བདག་ཅུང་ཟད་དམན་ནོ་སྙམ་པ་ཅུང་ཟད་སྙམ་པའི་ང་རྒྱལ་རྣམས་སོ།། ཝ༢ གཉིས་པ་[ལྟ་བ་ཁྱད་པར་དུ་དབྱེ་བ་]ལ་གཉིས། ཞ༡ ངོ་བོ། ཞ༢ དབྱེ་བའོ། ། ཞ༡ དང་པོ་ནི། དེ་ལས་ལྟ་བ་ཤེས་རབ་(༡༩༠བ)ཉོན་མོངས་ཅན། ། རྩ་བའི་ཉོན་མོངས་པ་དེ་དག་ལས་བྱེ་བྲག་ལྟ་བ་ཞེས་པའི་ངོ་བོ་ནི། ཤེས་རབ་ཉོན་མོངས་པ་ཅན་ནོ། ། ཉོན་མོངས་ནི། སེམས་ཀྱི་རྒྱུའམ་བྱེད་པ་མ་ཞི་བའོ། ། ཞ༢ གཉིས་པ་ལ་གཉིས། ཟ༡ ངོ་བོའི་སྒོ་ནས་དང་། ཟ༢ ཆར་གཏོགས་པའི་སྒོ་ནས་དབྱེ་བའོ། ། ཟ༡ དང་པོ་ནི། ངོ་བོ་འཇིག་དང་མཐར་ལྟ་ལ་སོགས་ལྔ། ། ལྟ་ངན་གྱི་ངོ་བོ། འཇིག་ལྟ། མཐར་ལྟ། སོགས་ཁོངས་ནས། ལྟ་བ་མཆོག་འཛིན། ཚུལ་ཁྲིམས་དང་བརྟུལ་ཞུགས་མཆོག་འཛིན། ལོག་པར་ལྟ་བ་སྟེ་ལྔ་ལས། དང་པོ་ནི། འཇིག་ཅིང་མི་རྟག་པ་དུ་མ་འདུས་པའི་ཉེར་ལེན་གྱི་ཕུང་པོ་ལྔ་ལ་བདག་དང་བདག་གི་བར་ལྟ་བ། དེ་ལའང་། ལྷན་སྐྱེས། ཀུན་བརྟགས་གཉིས་ཀྱི། དང་པོ་ནི། སེམས་ཅན་ཀུན་ལ་གནས་སྐབས་ཐམས་ཅད་དུ་ངའོ་སྙམ་པ་འབྱུང་བ། གཉིས་པ་ནི། བཤེས་གཉེན་ངན་པ་ལ་བརྟེན་ནས་ཕུང་པོ་ལས་དོན་གཞན་པའི་བདག་རྟག་པར་ལྟ་བ་མུ་སྟེགས་ཅན་རྣམས་ཀྱི་གཙོ་བོ་ལྟ་བུའོ། ། གཉིས་པ་མཐར་ལྟ་ནི། འཇིག་ལྟས་བཟུང་བའི་བདག་དེ་ཉིད་རྟག་པའམ་ཆད་པར་ལྟ་བ། གསུམ་པ་[ལྟ་བ་མཆོག་འཛིན་]ནི། འཇིག་མཐའ་གཉིས་ལོག་ལྟ་བཅས་གསུམ་དང་ལྟ་བ་དེའི་གནས་ཕུང་པོ་ལ་མཆོག་དང་དམ་པར་ཞེན་པ། བཞི་པ་[ཚུལ་ཁྲིམས་དང་བརྟུལ་ཞུགས་མཆོག་འཛིན་]ནི། དམན་པ་ལྟ་བ་ངན་པའི་རྗེས་སུ་འབྲང་བའི་ཚུལ་ཁྲིམས་དང་བརྟུལ་ཞུགས་ངན་པས་བདག་གྲོལ་དུ་ལྟ་བ། ལྔ་པ་[ལོག་པར་ལྟ་བ་]ནི། རྒྱུ་འབྲས་དང་བདེན་པ་དང་དཀོན་མཆོག་སོགས་མེད་པར་ལྟ་བ་སྟེ། སྔ་མ་བཞི་སྒྲོ་འདོགས་དང༌། ཕྱི་མ་ཕལ་ཆེར་སྐུར་འདེབས་ཀྱི་ལྟ་བའོ། ། ཟ༢ གཉིས་པ་ཆར་གཏོགས་ཀྱི་སྒོ་ནས་དབྱེ་བ་ནི། ཆར་གཏོགས་གསུམ་ལ་ནང་གསེས་དབྱེ་བ་བཅས། ། དེ་དག་གི་ཆར་གཏོགས་པའི་ལྟ་བ་ནི་སྡེ་ཚན་གསུམ། སོ་སོ་ལ་ནང་གསེས་ཀྱི་དབྱེ་བ་དང་བཅས་པ་ཡོད་དེ། འཇིག་ཚོགས་ལ་ལྟ་བ་ཉི་ཤུ་ནི། གཟུགས་བདག་ཡིན་པར་ལྟ་བ་དང༌། གཟུགས་བདག་དང་ལྡན་པར་ལྟ་བ་དང༌། གཟུགས་བདག་གི་ཡིན་པར་ལྟ་བ་དང༌། (༡༩༡ན)གཟུགས་ལ་བདག་གནས་པར་ལྟ་བ་སྟེ། དེ་བཞིན་དུ། ཚོར་བ་དང་། དུ་ཤེས་དང་། འདུ་བྱེད་དང་། རྣམ་ཤེས་བཞི་ལ་བཞི་བཞིར་སྦྱར་བའི་ཉི་ཤུ་ནི་འཇིག་ལྟའི་ཆར་གཏོགས་སོ། ། མཐར་ལྟ་བ་དྲུག་ཅུ་རྩ་གཉིས་ལས། སྔོན་གྱི་མཐར་གཏོགས་པ་བཅོ་བརྒྱད་ནི། རྟག་བཞི་ཁ་ཅིག་རྟག་སྨྲ་བཞི། ། རྒྱུ་མེད་གཉིས་དང་མཐའ་ལྡན་བཞི། ། མཐའ་མི་སྤོང་བཞི་དང་བཅོ་བརྒྱད། ། ཅེས་སོ། ། ཕྱི་མཐར་གཏོགས་པ་བཞི་བཅུ་རྩ་གཉིས་ནི། འདུ་ཤེས་ཡོད་སྨྲའི་བཅུ་དྲུག་དང༌། ། མེད་སྨྲའི་བརྒྱད་དང་གཉིས་མིན་བརྒྱད། ། ཆད་པར་སྨྲ་བ་རྣམས་ཀྱི་བདུན། ། ཚེ་འདི་ཉིད་ལ་གྲོལ་ལྟའི་ལྔ། ། ཞེས་པ་ལྟར་རོ། ། འདི་དག་ནི་མཐར་ལྟ་དང་ལོག་ལྟ་གཉིས་ཀྱི་ཆར་གཏོགས་སོ། ། ཡང་ན། སྡུད་པ་ལས། འཇིག་ཚོགས་ལྟ་བར་ལྟ་བ་དྲུག་ཅུ་གཉིས་འདུས་ལྟར། ། ཞེས་གསུངས་པ་ལྟར། ཐམས་ཅད་འཇིག་ལྟར་གཏོགས་སོ། ། ལུང་མ་བསྟན་གྱི་ལྟ་བ་བཅུ་བཞི་ནི། དེ་བཞིན་གཤེགས་པ་འདས་ཕན་ཆད་འབྱུང་བ་ཞེས་པ་འདི་ནི་བདེན་གྱི་གཞན་ནི་གཏི་མུག་གོ་ཞེས་ལྟ་བ་དང༌། དེ་བཞིན་དུ་སྦྱར་ཏེ། མི་འབྱུང་བ་དང༌། གཉིས་ཀ་དང༌། གཉིས་ཀ་མ་ཡིན་པར་ལྟ་བ་མྱ་ངན་ལས་འདས་པ་ལ་བརྟེན་པ་བཞི་དང༌། བདག་དང་འཇིག་རྟེན་མཐའ་ལྡན་པ་དང༌། མི་ལྡན་པ་དང༌། གཉིས་ཀ་དང༌། གཉིས་ཀ་མིན་པར་ལྟ་བ་ཕྱི་མའི་མཐའ་ལ་བརྟེན་པ་བཞི་དང༌། བདག་དང་འཇིག་རྟེན་རྟག་པ་དང༌། མི་རྟག་པ་དང༌། གཉིས་ཀ་དང༌། གཉིས་ཀ་མིན་པར་ལྟ་བ་སྔོན་གྱི་མཐའ་ལ་བརྟེན་པ་བཞི་སྟེ། བཞི་ཚན་སོ་སོའི་དང་པོ་རྣམས་གྲངས་ཅན་པའི་རྟག་པར་ལྟ་བ་དང༌། གཉིས་པ་རྣམས་རྒྱང་འཕེན་པའི་ཆད་པར་ལྟ་བ་དང༌། གསུམ་པ་རྣམས་གཅེར་བུ་པའི་རང་བཞིན་རྟག་ལ་གནས་སྐབས་མི་རྟག་པར་ལྟ་བ་དང༌། བཞི་པ་གནས་མ་བུ་པའི་རྟག་མི་རྟག་གང་དུ་ཡང་བརྗོད་དུ་མེད་པར་ལྟ་བའོ། ། (༡༩༡བ)ལུས་གང་ཡིན་པ་སྲོག་ཀྱང་དེའོ་ཞེས་ལྟ་བ་དང༌། ལུས་ཀྱང་གཞན་ལ་སྲོག་ཀྱང་གཞན་ནོ་ཞེས་ལྟ་བ་གཉིས་ནི་ལུས་དང་སྲོག་ལ་བརྟེན་པ་སྟེ། སྔ་མ་རིག་པ་ཅན་པ་དང་ཕྱི་མ་གྲངས་ཅན་པའི་ལྟ་བའོ། ། དེ་ལྟར་བཅུ་བཞི་བཅོམ་ལྡན་འདས་ལ་དྲིས་པ་ནི། གང་ཟག་གི་བདག་ལས་བརྩམས་ནས་འདྲི་བར་མཁྱེན་ཅིང་དེ་མ་གྲུབ་པས་ཁྱད་པར་དཔྱོད་པ་མི་འཐད་ལ། མེད་དོ་ཞེས་གསུངས་ནའང་དོན་དུ་མི་འགྱུར་བར་དགོངས་ནས་ལུང་དུ་མ་བསྟན་པའི་ཕྱིར་དེ་སྐད་དུ་གྲགས་སོ། ། ཛ༥ སྡེ་ཚན་ལྔ་པ་ནི། ཉེ་ཉོན་ཉི་ཤུ། ཞེས་པ་སྟེ། སུམ་ཅུ་པ་ལས། ཁྲོ་དང་འཁོན་དུ་འཛིན་པ་དང༌། ། འཆབ་དང་འཚིག་དང་ཕྲག་དོག་དང༌། ། སེར་སྣ་དང་ནི་སྒྱུ་བཅས་དང༌། ། གཡོ་རྒྱགས་རྣམ་འཚེ་ངོ་ཚ་མེད། ། ཁྲེལ་མེད་རྨུགས་དང་རྒོད་པ་དང༌། ། མ་དད་པ་དང་ལེ་ལོ་དང༌། ། བག་མེད་པ་དང་བརྗེད་ངས་དང༌། ། རྣམ་འཚེ་ཤེས་བཞིན་མ་ཡིན་དང༌། ། འགྱོད་དང་གཉིད་ཀྱང་དེ་བཞིན་ཏེ། ། རྟོག་པ་དང་ནི་དཔྱོད་པ་རྣམས། ། ཉེ་བའི་ཉོན་མོངས་གཉིས་རྣམ་གཉིས། ། ཞེས་པ་སྟེ། ཤེས་བཞིན་མིན་པ་ཡན་ཆད་ཉི་ཤུ་ནི་མཐའ་གཅིག་ཏུ་ཉེ་ཉོན་ཡིན་ལ། འགྱོད་གཉིད་རྟོག་དཔྱོད་བཞི་ལ་ཉོན་མོངས་ཅན་ཡིན་མིན་གཉིས་གཉིས་སུ་ཡོད་པའི་ཡིན་པ་རྣམས་ཉེ་ཉོན་ནོ། ། དེ་ལ་མཐའ་གཅིག་ཏུ་ཉེ་ཉོན་ཡིན་པ་ཉི་ཤུའི། དང་པོ་ཁྲོ་བ་ནི། གནོད་པ་ལ་མི་བཟོད་པ། འཁོན་འཛིན་ནི། གནོད་པ་ཞེ་ལ་བཞག་པ། འཆབ་པ་ནི། རང་གི་ཁ་ན་མ་ཐོ་བ་གསང་ཞིང་སྦེད་པ། འཚིག་པ་ནི། ཁྲོ་འཁོན་སྔོན་དུ་སོང་བས་ཚིག་རྩུབ་མོ་སྨྲ་བར་འདོད་པ། ཕྲག་དོག་ནི། གཞན་གྱི་ཕུན་ཚོགས་ལ་མི་བཟོད་པ། སེར་སྣ་ནི། རང་གི་ཡོ་བྱད་བཏང་མི་ནུས་པ། སྒྱུ་ནི། གཞན་བསླུ་བའི་སེམས་ཀྱིས་རང་གི་ལུས་ངག་ཚུལ་ལྟར་འཆོས་པ། གཡོ་ནི། རང་གི་ཉེས་པ་མཐོང་ཐོས་སུ་གྱུར་པ་གཞན་ལ་སྒྱུར་བ། རྒྱགས་པ་ནི། ལང་ཚོ་དར་བ་སོགས་རང་གི་དཔལ་འབྱོར་གྱིས་སེམས་གང་བ། འདི་ནི་རང་གི་ཡོན་ཏན་ལ་(༡༩༢ན)ཆགས་པ་དང༌། ང་རྒྱལ་ནི། གཞན་གྱི་ཡོན་ཏན་ལ་ལྟོས་ནས་ཁེངས་པ་ཡིན་པས་ཐ་དད་དོ། ། རྣམ་པར་འཚེ་བ་ནི། གཞན་གསོད་པ་དང་རྡེག་པ་སོགས་རང་ཉིད་དམ་གཞན་ལ་བྱེད་དུ་སྩལ་བའོ། ། ངོ་ཚ་མེད་པ་ནི། རང་ལ་ལྟོས་ནས་ཉེས་སྤྱོད་མི་འཛེམ་པ་དང༌། ཁྲེལ་མེད་པ་ནི། གཞན་ལ་ལྟོས་ནས་སོ། ། རྨུགས་པ་ནི། དམིགས་རྣམ་ལ་སེམས་ལས་སུ་མི་རུང་བ། རྒོད་པ་ནི། སྔོན་གྱི་བྱས་པའི་ཡུལ་ལ་སླར་འཕྲོ་བ། མ་དད་པ་ནི། དགེ་བའི་ཆོས་ལ་ཡིད་མི་ཆེས་པས་འདོད་པ་མེད་པ། ལེ་ལོ་ནི། བྱ་བ་ངན་པ་ལ་ཞེན་ནས་དགེ་ཆོས་ལ་མི་སྤྲོ་བ། བག་མེད་པ་ནི། སེམས་མི་སྲུང་ཞིང་བག་ཡངས་སུ་གཏོང་བ། བརྗེད་ངས་པ་ནི། དགེ་བའི་དམིགས་པ་མི་གསལ་བ་ཡང་དང་ཡང་དུ་བརྗེད་པ། རྣམ་གཡེང་ནི། དུག་གསུམ་གང་རུང་གི་ཡུལ་ལ་སེམས་རྣམ་པར་འཕྲོ་བ་སྟེ། འདི་ལའང་དྲུག །སྒོ་ལྔའི་ཤེས་པ་ལྟ་བུ་ངོ་བོ་ཉིད་ཀྱི་གཡེང་བ། དེ་ཉིད་ཡུལ་ལ་འཇུག་པ་ཕྱི་རོལ་དུ་གཡེང་བ། ཏིང་ངེ་འཛིན་གྱི་རོ་མྱང་ཞིང་བྱིང་རྒོད་ཀྱི་དབང་དུ་སོང་བ་ནང་གི་གཡེང་བ། ཆོས་བརྒྱད་ཀྱི་སྒོ་ནས་ཆོས་སྤྱོད་པ་མཚན་མའི་གཡེང་བ། ཤིན་སྦྱངས་ཀྱི་བདེ་བ་ལ་སྲེད་པ་གནས་ངན་ལེན་གྱི་གཡེང་བ། ཡུལ་གྱི་དམིགས་པ་གཅིག་མ་རྫོགས་པར་གཅིག་ལ་འཇུག་པ་ཡིད་ལ་བྱེད་པའི་གཡེང་བ་རྣམས་སོ། ། ཤེས་བཞིན་མ་ཡིན་པ་ནི། བླང་དོར་གྱི་གནས་ལ་ཚུལ་བཞིན་མ་ཡིན་པར་དཔྱོད་པའི་ཤེས་རབ་ཉོན་མོངས་པ་ཅན་གྱི་སེམས་པ་རྣམས་ཏེ། ཐམས་ཅད་ཀྱང་རྩ་བའི་ཉོན་མོངས་པ་དང་ཉེ་བས་སམ། ཉོན་མོངས་པ་ཆུང་བ་ཡིན་པས་དེར་བཞག་པའོ། ། ཛ༦ སྡེ་ཚན་དྲུག་པ་ནི། གཞན་འགྱུར་བཞི་རྣམས་སོ། ། ཞེས་གོང་དུ་སུམ་ཅུ་པའི་ལུང་དྲངས་པའི་འཇུག་ཏུ་བྱུང་བ་ལྟར་བཞི་སྟེ། འགྱོད་པ་ནི། སྔར་བྱས་ཟིན་པ་ལ་བྱས་ནས་འགྱོད་པའི་སེམས་པའོ། ། གཉིད་ནི། འཇུག་པའི་སེམས་དྲུག་ནང་དུ་བསྡུས་པའོ། ། རྟོག་པ་ནི། འདུ་བྱེད་ཀྱི་(༡༩༢བ)ཆོས་རྣམས་ལ་རྩིངས་པོར་འཇུག་པ། དཔྱོད་པ་ནི། ཞིབ་མོར་འཇུག་པའི་སེམས་པ་སྟེ། དེ་བཞི་དགེ་མི་དགེ་ལུང་མ་བསྟན་ཕྱོགས་གཅིག་ཏུ་ཆད་པ་མེད་པར་གནས་སྐབས་ཀྱིས་གཞན་དུ་སྒྱུར་བས་གཞན་འགྱུར་བཞི་ཞེས་བྱ་སྟེ། དཔེར་ན། དགེ་བ་ལ་འགྱོད་ན་སྡིག་པ། སྡིག་པ་ལ་འགྱོད་ན་དགེ་བ། དགེ་བའི་འཕྲོར་གཉིད་ན་སྡིག་པ། སྡིག་པའི་འཕྲོར་གཉིད་ན་དགེ་བར་འགྱུར་བས་མཚོན་ནོ། ། མ༢ གཉིས་པ་ལྡན་པ་མ་ཡིན་པའི་འདུ་བྱེད་བཤད་པ་ལ་གཉིས། ཙ༡ ངོ་བོ་དང༌། ཙ༢ དབྱེ་བའོ། ། ཙ༡ དང་པོ་ནི། མཚུངས་པར་མི་ལྡན་འདུ་བྱེད། ཅེས་པ་སྟེ། སྡོམ་བྱུང་ལྟར། སེམས་དང་ལྷན་ཅིག་མཚུངས་པ་ལྔས་དམིགས་པ་ལ་འཇུག་པ་དང་མི་ལྡན་པས་མི་ལྡན་པ་དང་འདུས་བྱས་ཀྱི་གནས་སྐབས་ཡིན་པས་འདུ་བྱེད་ཅེས་བྱའོ། ། འདིའང་དབུས་པ་བློ་གསལ་སོགས་ནི་གཟུགས་དང་སེམས་དང་སེམས་ལས་བྱུང་བ་གསུམ་ལས་གཞན་པའི་གནས་སྐབས་སུ་འདོད། སྔ་མ་ཕལ་ཆེར་ནི། ཀརྨ་ཕྲིན་ལས་པས། གཟུགས་དང་སེམས་དང་སེམས་ལས་བྱུང་བ་གསུམ་ལས་གཞན་མེད་ཀྱི་གནས་སྐབས་ཀྱི་ཆ་ལ་མིང་དུ་བཏགས་པ་གང་ཞིག །གཟུགས་སོགས་གསུམ་ལས་དེ་ཉིད་དང་གཞན་དུ་བརྗོད་དུ་མེད་པ་སྟེ། གདགས་གཞི་གཟུགས་སོགས་གསུམ་ལས་གུད་ན་རྫས་གཞན་དུ་གྲུབ་པའང་མ་ཡིན་ཞིང་། ངོ་བོ་གཟུགས་སོགས་གསུམ་གྱི་ལྡོག་པ་དེ་ཉིད་ཀྱང་མ་ཡིན་པའོ། །དཔེར་ན། ཁུ་ཚུར་སོར་མོ་ལས་དེ་ཉིད་དང་གཞན་དུ་བརྗོད་དུ་མེད་པ་ལྟ་བུའོ་ཞེས་གསུང་ངོ༌ཞེས་སོ། ། ཙ༢ གཉིས་པ་[དབྱེ་བ་]ལ་གཉིས། ཚ༡ ཉི་ཤུ་རྩ་གསུམ་དུ་དབྱེ་བ། ཚ༢ སྡེ་ཚན་བརྒྱད་དུ་བསྡུ་བའོ། ། ཚ༡ དང་པོ་ནི། ཉི་ཤུ་གསུམ། ། ཞེས་པ་སྟེ། འདི་ལ་གནས་བཅུ་བསྟན་པའི་མདོར་། མི་ལྡན་པའི་འདུ་བྱེད་བདུན་བརྒྱ་བཀའ་སྩལ་པ་དང༌། ཕུང་པོ་ལྔ་པར་གཞན་དུ་བསྟན་པ་སོགས་གྲངས་དང་གོ་རིམ་སྣ་ཚོགས་སུ་མཆིས་པ་ལས། མངོན་པ་གོང་མར་གཙོ་བོར་བསྡུས་པ་ལྟར་ན། དང་པོ་ཐོབ་པ་ནི། དགེ་བ་དང་མི་དགེ་བ་སོགས་འདུ་བྱེད་(༡༩༣ན)ཀྱི་ཆོས་རྣམས་ཀྱི་གནས་སྐབས་ཀྱི་ཆ་ལ་བཏགས་ཡོད་དེ། བྱེ་བྲག་སྨྲ་བ་རྫས་ཡོད་དུ་འདོད། གཉིས་པ་འདུ་ཤེས་མེད་པའི་སྙོམས་འཇུག་ནི། བསམ་གཏན་བཞི་པའི་དངོས་གཞིའི་སེམས་ལ་བརྟེན་ནས་སེམས་སེམས་བྱུང་རྒྱུན་གཏན་པ་མ་ཡིན་པ་རྣམ་ཤེས་ཚོགས་དྲུག་འགོག་པའི་མཚན་ཉིད་ཅན། གསུམ་པ་འགོག་པའི་སྙོམས་འཇུག་ནི། ཞི་གནས་སྲིད་རྩེའི་སེམས་དང་ལྷག་མཐོང་ཐེག་དམན་འཕགས་པའི་རྒྱུད་ཀྱི་ཟག་མེད་ཀྱི་ཤེས་རབ་གང་ཡང་རུང་བ་ལ་བརྟེན་ནས་སེམས་སེམས་བྱུང་རྒྱུན་གཏན་པ་མ་ཡིན་པ་རྣམ་ཤེས་ཚོགས་དྲུག་དང༌། རྒྱུན་གཏན་པ་ཉོན་ཡིད་འགོག་པའི་མཚན་ཉིད་ཅན། བཞི་པ་འདུ་ཤེས་མེད་པ་ནི། བསམ་གཏན་བཞི་པའི་གནས་གཞན་འབྲས་བུ་ཆེ་བའི་བྱེ་བྲག་བསམ་གཏན་བཞི་པའི་སེམས་ལས་ཚོར་འདུ་མངོན་གྱུར་བ་སྐྱེས་ཐོབ་ཀྱིས་འགོག་པའི་མཚན་ཉིད་ཅན། འདི་ནི་འདུ་ཤེས་སྐྱེས་ན་འཆི་འཕོ་སྟེ། འཆི་ཁར་ཐར་པ་ལ་སྐུར་འདེབས་ཀྱི་ལོག་ལྟ་སྐྱེ་བས་ལྷ་ཚེ་རིང་པོ་ཞེས་མི་ཁོམ་པའི་གནས་སོ། ། ལྔ་པ་སྲོག་གི་དབང་པོ་ནི། སྐྱེ་བ་སྔ་མ་ལ་བྱས་པའི་ལས་གསུམ་གྱིས་འཕང་བའི་ལོ་བརྒྱའམ་སྟོང་ངམ་བསྐལ་པ་འདི་ཙམ་ཞེས་གནས་པའི་དུས་ངེས་པ་ཅན་ཏེ་འདུ་བྱེད་ཀུན་གཞི་ཉིད་འགྲོ་བ་རིས་མཐུན་གཅིག་ཏུ་གནས་པའི་དུས་ངེས་པ་ལ་འཚོ་བར་བྱེད་པ། དྲུག་པ་རིས་མཐུན་པ་ནི། ཁམས་གསུམ་པའི་སེམས་ཅན་དེ་དང་དེ་དག་གིས་གང་ལ་བདག་གི་དངོས་པོར་འཛིན་པ་ནི་ཕུང་པོ་ཡིན་ཞིང་དེ་ཉིད་འདོད་གཟུགས་སུ་