Tibetan
གསར་དུ་བཞག་པ་ལྟ་བུ་སྔོན་མེད་གསར་དུ་སྐྱེད་པས་འཇོག་པ་གཉིས་ཀ་ཡོད་པ་སློབ་དཔོན་ཆོས་སྐྱོང་སོགས་བཞེད་དོ། ། ཕ༢ གཉིས་པ་ཉོན་ཡིད་བཤད་པ་ལ་བཞི། བ༡ མཚན་ཉིད། བ༢ མཚན་གཞི། བ༣ བྱེད་ལས། བ༤ འཇུག་ལྡོག་གོ། ། བ༡ དང་པོ་ནི། ངར་འཛིན་བདག་ཉིད་བསྒྲིབས་ལ་ལུང་མ་བསྟན། ། ཀུན་གཞིའི་དོན་ཙམ་རིག་ཅིང་རབ་ཏུ་མ་ཞི་བ་ཡིད་བྱེད་ཀྱི་བདག་རྐྱེན་བྱེད་ནུས་ཀྱི་གཙོ་བོ་རྣམ་ཤེས་གང་ཞིག །འཕགས་ལམ་མ་ཐོབ་ཀྱི་བར་དུ་ཀུན་གཞིའི་རྣམ་ཤེས་ལ་དམིགས་ནས་རྟག་ཏུ་ངར་འཛིན་པའི་བདག་ཉིད་ཡིད་ཀྱི་སའི་ཉོན་མོངས་པས་བསྒྲིབས་ལ་ལུང་དུ་མ་བསྟན་པའོ། ། བ༢ གཉིས་པ་[མཚན་གཞི་]ནི། ཉོན་མོངས་བཞི་སོགས་མཚུངས་པར་ལྡན་པའི་ཡིད། ། བདག་ཏུ་རྨོངས་པ་དང༌། བདག་ཏུ་ལྟ་བ་དང༌། བདག་ལ་ཆགས་པ་དང༌། བདག་ཏུ་ང་རྒྱལ་བ་སྟེ། ཉོན་མོངས་པ་བཞི་དང༌། སོགས་ཁོང་ནས། ཀུན་འགྲོ་ལྔ། བདག་ལྟ། ང་རྒྱལ། མ་རིག །ཐེ་ཚོམ་དགུ་དང་མཚུངས་པར་ལྡན་པའི་ངར་འཛིན་གྱི་ཡིད་གང་ཡིན་པའོ། ། བ༣ གསུམ་པ་[བྱེད་ལས་]ནི། ཟག་པས་འཆིང་ཞིང་ས་བོན་འདེབས་པར་བྱེད། ། ཡིད་ཤེས་ཀྱི་བདག་རྐྱེན་བྱེད་ཅིང་(༡༩༨ན)ཚོགས་དྲུག་མཚན་མ་ལ་འཆིང་བའི་གནས་བྱས་ནས་ཟག་བཅས་ལ་འཆིང་བ་དང་ཀུན་གཞི་ལ་ས་བོན་འདེབས་པར་བྱེད་དོ། ། བ༤ བཞི་པ་[འཇུག་ལྡོག་]ནི། ཀུན་གཞིར་དམིགས་ནས་རྟག་འཇུག་འཕགས་ལ་ལྡོག ། ཉོན་ཡིད་མངོན་གྱུར་པ་འཁོར་བཅས་དེའང་དགྲ་བཅོམ་འཕགས་པའི་མཉམ་གཞག་དང༌། འགོག་པའི་སྙོམས་འཇུག་ལ་ཞུགས་པ། མི་སློབ་པའི་ས་རྣམས་སུ་མི་འབྱུང་ཞིང་སློབ་པ་དང་འགོག་སྙོམས་ཀྱི་རྗེས་ཐོབ་ཏུ་འབྱུང༌། གནས་སྐབས་དེ་དག་མ་གཏོགས་དགེ་མི་དགེ་ལུང་མ་བསྟན་གྱི་གནས་སྐབས་ཐམས་ཅད་དུ་ཀུན་གཞི་ལ་དམིགས་ནས་རྒྱུན་ལྡན་དུ་འཇུག་ཅིང་འཕགས་ས་ཐོབ་པ་ལ་ལྡོག་ཏེ། དེའང་དེའི་ཀུན་བརྟགས་ཀྱི་ཆ་དེ་ཐེག་ཆེན་མཐོང་ལམ་ས་དང་པོ་ནས་ལྡོག་ཅིང༌། དེའི་བག་ཆགས་སམ་ལྷན་སྐྱེས་ཀྱི་ཆ་དེ་ཐེག་ཆེན་སྒོམ་ལམ་ས་བརྒྱད་པར་གནས་གྱུར་པས་ལྡོག །དེའི་བག་ལ་ཉལ་ཕྲ་ཞིང་ཕྲ་བ་དེ་ཀུན་གཞི་ལྡོག་པ་དང་དུས་མཚུངས་ཏེ་ས་བཅུ་རྒྱུན་མཐའ་ལའོ། ། སངས་རྒྱས་ས་ན་གནས་གྱུར་མཐར་ཐུག་པ་མཉམ་པ་ཉིད་ཀྱི་ཡེ་ཤེས་སུ་འགྱུར་རོ། ། འདིའི་སྒྲུབ་བྱེད་ལུང་མང་ཞིང་ཐེག་བསྡུས་ལས་རིགས་པའི་རྣམ་གྲངས་དྲུག་གསུངས་སོ། ། འདི་ལས་འཕྲོས་པའི་ཞར་བྱུང་ནི། ཇི་སྐད་དུ། དྲུག་པོ་འདས་མ་ཐག་པ་ཡི། ། རྣམ་ཤེས་གང་ཡིན་དེ་ཡིད་དོ། ། ཞེས་པ་ལྟར། རྣམ་ཤེས་ཚོགས་དྲུག་པོ་འགག་མ་ཐག་པའི་ཡིད་ལ་རྗེ་རང་བྱུང་བས་དྲུག་པའི་ཡིད་ཅེས་ཐ་སྙད་མཛད་ཅིང༌། དེ་ནི་ཉོན་ཡིད་མིན་ཀྱང་ཡིད་ཅེས་རྣམ་གྲངས་སུ་གྲགས་ལ། ཁ་ཅིག་གིས། ཉོན་མོངས་ཅན་གྱི་ཡིད་ཀྱི་ཆོས་ཅན་དུ་གྱུར་པའི་ཡིད་ཅེས་ཀྱང་ཟེར། འཕགས་རྒྱུད་ཀྱི་ཟག་པ་མེད་པའི་ཡེ་ཤེས་དེའི་བདག་རྐྱེན་ཀྱང་དྲུག་པོ་འགགས་མ་ཐག་པའི་ཡིད་དེས་བྱེད་དགོས་པར་བཤད་དོ། ། ཡང་སྐབས་འདིར་ཁ་ཅིག་གིས། སེམས་ཀྱི་གཙོ་བོ་ཀུན་གཞི། ཡིད་ལ་དོན་དམ་པའི་ཡིད་དང༌། གནས་སྐབས་པའི་(༡༩༨བ)ཡིད་གཉིས། སྔ་མ་ནི་ཉོན་ཡིད་དང༌། ཕྱི་མ་ནི་འཇུག་ཤེས་དྲུག །འགག་མ་ཐག་པའི་རྣམ་པར་ཤེས་པ་ཞེས་པའི་ཐ་སྙད་ཀྱང་བྱེད་དོ། ། ཕ༣ གསུམ་པ་རྣམ་ཤེས་དྲུག་བཤད་པ་ལ་བཞི། བ༡ ངོ་བོ། བ༢ མཚན་ཉིད། བ༣ གནས་ཡུལ་གྲོགས་གསུམ། བ༤ བྱེད་ལས་འབྱུང་ཚུལ་དང་བཅས་པའོ། ། བ༡ དང་པོ་ནི། འཇུག་པའི་ངོ་བོ་སྣང་ཡུལ་སྣ་ཚོགས་ལ། ། དམིགས་པའི་རྣམ་ཤེས་རྐྱེན་བཞི་ལྡན་པར་སྐྱེ། ། འཇུག་པའི་རྣམ་ཤེས་ཀྱི་ངོ་བོ་ནི། སྤྱིར་ཡུལ་མི་འདྲ་བར་ཤེས་པའི་དོན་གྱིས་ན་རྣམ་ཤེས་སུ་བཞག་མོད། དེ་ཡང་སྣ་ཚོགས་སུ་སྣང་བའི་ཡུལ་སོ་སོ་ལ་དམིགས་ནས་རྣམ་པ་གསལ་པོ་ཡང་ཡང་འབྱུང་བས་འཇུག་པ་དང་ཡུལ་གྱི་ངོ་བོ་ལ་ཉེ་བར་དམིགས་པས་རྣམ་པར་ཤེས་པ་ཞེས་བྱ། དེ་ལ་མིག་གི་རྣམ་ཤེས་ནས་ཡིད་ཀྱི་རྣམ་ཤེས་བར་དྲུག ། དེ་རེ་རེའང་རྐྱེན་བཞི་བཞི་ལ་བརྟེན་ནས་སྐྱེ་བ་ལས། མིག་གི་རྣམ་པར་ཤེས་པའི་དམིགས་པའི་རྐྱེན་རང་ལས་ཕྱི་རོལ་ལྟ་བུར་སྣང་བའི་གཟུགས། བདག་རྐྱེན་མིག་གི་དབང་པོ། དེ་མ་ཐག་རྐྱེན་དེའི་སྔ་ལོགས་ཀྱི་ཡིད་བར་མ་ཆད། རྒྱུའི་རྐྱེན་ཀུན་གཞི་རྣམས་ལ་བརྟེན་ནས་གཟུགས་སོ་སོར་རྣམ་པར་རིག་པའི་མཚན་ཉིད་ཅན་གྱི་ཤེས་པ་སྐྱེ། དེ་བཞིན་དུ། རྣ་བ། སྣ། ལྕེ། ལུས་བཞི་ལའང་རྐྱེན་བཞི་སོ་སོར་སྦྱར་བ་དང༌། ཡིད་ཀྱི་རྣམ་ཤེས་ཀྱི་དམིགས་རྐྱེན་རང་ལས་ཐ་དད་ལྟ་བུར་སྣང་བའི་ཤེས་བྱའི་ཆོས། བདག་རྐྱེན་དམིགས་བསལ་མ་གཏོགས་ཉོན་ཡིད། དེ་མ་ཐག་རྐྱེན་དེའི་སྔ་ལོགས་ཀྱི་ཡིད་བྱེད། རྒྱུའི་རྐྱེན་ཀུན་གཞི་རྣམས་ལ་བརྟེན་ནས་ཆོས་སོ་སོར་རྣམ་པར་རིག་པའི་མཚན་ཉིད་ཅན་གྱི་ཡིད་ཤེས་སྐྱེ། དམིགས་བསལ་ནི། འཕགས་རྒྱུད་ཀྱི་ཟག་པ་མེད་པའི་ཡེ་ཤེས་དེའི་བདག་རྐྱེན་དྲུག་པ་འགག་མ་ཐག་པའི་ཡིད་དེས་བྱེད་དགོས་སོ། ། དེ་རྣམས་རང་རང་གི་ངོ་བོ་ལུང་མ་བསྟན་ཡིན་ཡང་། གྲོགས་ཀྱི་དབང་གིས་དགེ་མི་དགེ་ལུང་མ་བསྟན་གསུམ་གར་སྐྱེར་རུང་བའོ། ། བ༢ གཉིས་པ་[མཚན་ཉིད་]ནི། མཚན་ཉིད་(༡༩༩ན)བདག་རྐྱེན་ལ་བརྟེན་སྐྱེ་མཆེད་སྣང༌། ། དྲུག་པོ་དེ་དག་གི་མཚན་ཉིད་ཀྱང་བདག་རྐྱེན་མིག་དབང་ལ་བརྟེན་ནས་གཟུགས་ཀྱི་སྐྱེ་མཆེད་ཀྱི་རྣམ་པར་སྣང་བའི་དབང་ཤེས་ནི་མིག་ཤེས་ཀྱི་མཚན་ཉིད་ཡིན་པ་སོགས་དང༌། རང་གི་བདག་རྐྱེན་ཡིད་དབང་ལ་བརྟེན་ནས་རང་ཡུལ་ཆོས་ཀྱི་སྐྱེ་མཆེད་རིག་པའི་གཙོ་བོ་རྣམ་ཤེས་གང་ཞིག་ཉོན་ཡིད་ལས་རྫས་གཞན་པའོ་ཞེས་པ་དྲུག་པ་ཡིད་ཀྱི་རྣམ་ཤེས་ཀྱི་མཚན་ཉིད་དོ། ། བ༣ གསུམ་པ་[གནས་ཡུལ་གྲོགས་གསུམ་]ནི། དབང་པོའི་གནས་ལས་ཡུལ་དམིགས་གྲོགས་དང་ལྡན། ། གནས་ནི་སྤྱིར་ཐམས་ཅད་ཀྱིའང་ས་བོན་གྱི་གནས་ཀུན་གཞིའི་རྣམ་ཤེས། དེ་མ་ཐག་པའི་གནས་འགགས་མ་ཐག་པའི་ཡིད། ཡིད་ཤེས་ཀྱི་ལྷན་ཅིག་འབྱུང་བའི་གནས་ཉོན་ཡིད། ཚོགས་དྲུག་དགེ་མི་དགེར་བྱེད་པའི་གནས་འཁོར་སེམས་བྱུང་རྣམས། ཐམས་ཅད་ཟག་བཅས་སུ་བྱེད་པས་མཚན་མ་ལ་འཆིང་བའི་གནས་ཉོན་ཡིད་རྣམས་སོ། ། བྱེ་བྲག་སྒོ་ལྔའི་ལྷན་ཅིག་འབྱུང་བའི་གནས་མིག་སོགས་རང་རང་གི་དབང་པོ་ལས། ཡུལ་གཟུགས་སྒྲ་དྲི་རོ་རེག་བྱ་ཆོས་ཏེ་དྲུག་ལ་དམིགས་ཤིང༌། གྲོགས་ཀུན་འགྲོ་ལྔ་སོགས་སེམས་སེམས་འབྱུང་རྣམས་དང་ལྡན་པའོ།། བ༤ བཞི་པ་[བྱེད་ལས་འབྱུང་ཚུལ་དང་བཅས་པ་]ནི། བྱེད་ལས་དམིགས་པར་རྟོག་དང་ཉེར་སེམས་སོགས། ། ཆུ་ལས་རླབས་བཞིན་རྐྱེན་དང་མཚམས་པར་འབྱུང༌། ། ཁྱད་པར་ཡིད་ཤེས་སེམས་མེད་པ་ཡི་སྐབས། ། ལྔ་པོར་མ་གཏོགས་རྒྱུན་མི་འཆད་པ་སྟེ། ། དེ་དག་གི་བྱེད་ལས་ནི། རང་རང་གི་ཡུལ་འཛིན་པར་བྱེད་ལ། སྒོ་ལྔས་དགེ་བ་དང་ཉོན་མོངས་པ་ཅན་དང་ལས་ཀུན་ནས་སློང་བ་དང་སྡུག་མི་སྡུག་རྣམས་ཀྱི་རྗེས་སུ་འཇུག་པར་བྱེད་དོ། ། ཡིད་ཤེས་ཀྱིས་དགེ་མི་དགེའི་ཆོས་དང་ལས་ལ་འཇུག་པར་བྱེད་ཅིང༌། རྣམ་ཤེས་གཞན་གྱིས་སྡུག་མི་སྡུག་གི་འབྲས་བུ་ཡོངས་སུ་འཛིན་པར་བྱེད་པ་ལ། ཁྱད་པར་ཡིད་ཀྱི་ས་ལས་འབྱུང་བའི་དོན། སྡོམ་ནི། དམིགས་པའི་རྣམ་རྟོག་(༡༩༩བ)དམིགས་པར་ཉེ་བར་སེམས། ། ར་རོ་སྨྱོ་དང་གཉིད་ལོག་སད་པར་བྱེད། ། བརྒྱལ་དང་དེ་ལྡང་ལུས་ངག་ལས་ལ་འཇུག ། ཆགས་བྲལ་དེ་ལས་ཉམས་བྱེད་དགེ་རྩ་རྣམས། ། ཆད་དང་མཚམས་སྦྱོར་འཆི་འཕོ་སྐྱེ་བ་འོ། ། ཞེས་པ་སོགས་བྱེད་དོ། ། འབྱུང་ཚུལ་ནི། མདོ་སྡེ་པ་སོགས་དེ་མ་ཐག་རྐྱེན་མང་པོ་མེད་ཅིང་ཤེས་པ་གཅིག་གིས་མང་པོའི་དེ་མ་ཐག་རྐྱེན་བྱེད་མི་ནུས་པས་ཤེས་པ་རེ་རེ་ཁོ་ན་སྐྱེ་བར་འདོད་མོད། འདིར་ནི་ཤེས་པའི་དམིགས་རྐྱེན་སོ་སོར་ངེས་པ་ལྟར། དེ་མ་ཐག་རྐྱེན་སོ་སོར་ངེས་མི་དགོས་ཀྱི་དེ་མ་ཐག་རྐྱེན་གཅིག་ལས་ཀྱང་ཤེས་པ་དུ་མ་འབྱུང་བས། ཀུན་གཞི་དང་ལྷན་གཅིག་ཆུ་ལ་རླབས་བཞིན་དུ་རྐྱེན་ཇི་ལྟ་བར་རྣམ་ཤེས་གཅིག་ནས་མང་པོའི་བར་དུ་འབྱུང་བ་སུམ་ཅུ་པ་ལས་བཤད་པ་ལྟར་རོ། ། ཁྱད་པར་ཡིད་ཤེས་ནི། འདུ་ཤེས་མེད་པའི་ལྷ་དང༌། སྙོམས་འཇུག་གཉིས། གཉིད་དང་བརྒྱལ་བ་སྟེ། སེམས་མེད་པའི་གནས་སྐབས་ལྔ་པོར་མ་གཏོགས་ཐམས་ཅད་དུ་རྒྱུན་མི་འཆད་པར་འབྱུང་བ་དང༌། དབང་ཤེས་ལྔ་ལའང་ལྟ་འདོད་མེད་པར་གཟུགས་མཐོང་བ་ལྟ་བུ་རྐྱེན་ཉེར་གནས་དང༌། ལྟ་འདོད་ནས་མཐོང་བ་ལྟ་བུ་ཡིད་སྔོན་སོང་གི་དབང་ཤེས་གཉིས་ཡོད་པར་མངོན་པ་བ་དག་འཆད་དོ། ། ཐ༣ གསུམ་པ་མང་ཉུང་ལྡན་ཚུལ་མདོར་བསྡུ་བ་ནི། འདོད་ན་གཟུགས་ཕུང་ལ་སོགས་ཐམས་ཅད་ལྡན། ། གོང་མའི་ཁམས་ན་རིམ་གྱིས་ཉུང་བའོ། ། འདོད་ཁམས་ན་གཟུགས་ཕུང་དང༌། སོགས་ཁོངས་ནས། ཚོར་འདུ་རྣམ་ཤེས་ཐམས་ཅད་ལྡན་ཅིང༌། གཟུགས་དང་གཟུགས་མེད་དེ་གོང་མའི་ཁམས་དང་ཐེག་དམན་འཕགས་པ་སོགས་གོང་ནས་གོང་དུ་རིམ་གྱིས་ཉུང་བ་ནི་རགས་པ་སྤྱི་ཙམ་དུ་སྨོས་པ་ཡིན་ལ། མང་ལྡན་ཉུང་ལྡན་སོགས་འདི་དག་ལ་རྣམ་དབྱེ་ཞིབ་མོ་དུ་མ་ནི་འདིར་གོ་དཀའ་བ་དང་ཡི་གེས་འཇིགས་པས་ཆོས་མངོན་པའི་གཞུང་ལས་ཤེས་པར་བྱའོ། ། ཏ༢ གཉིས་པ་ཁམས་ཀྱི་རྣམ་པར་གཞག་པ་ལ་(༢༠༠ན)གཉིས། ཐ༡ ངོ་བོ་ངོས་བཟུང༌། ཐ༢ ཕྱེ་བའི་རྣམ་གཞག་གོ། ། ཐ༡ དང་པོ་ནི། ས་བོན་རང་མཚན་འཛིན་པའི་ཁམས་བཅོ་བརྒྱད། ། ནང་དང་ཕྱི་རོལ་རྣམ་ཤེས་ཁམས་དྲུག་དྲུག ། དྷཱ་ཏུའི་སྒྲ་ལས་ས་བོན་འཛིན་པའམ་རང་གི་མཚན་ཉིད་འཛིན་པའི་དོན་གྱིས་ཁམས་ཞེས་བྱ་ལ། དེའི་ངོ་བོ་ནི། མིག་སོགས་ནང་གི་ཁམས་དྲུག །གཟུགས་སོགས་ཕྱིའི་ཁམས་དྲུག །མིག་གི་རྣམ་པར་ཤེས་པ་སོགས་རྣམ་པར་ཤེས་པའི་ཁམས་དྲུག་སྟེ་བཅོ་བརྒྱད་དོ། ། མཛོད་འགྲེལ་ལས། དྷཱ་ཏུའི་ཁམས་ཀྱི་སྒྲ་ནི་གོཏྲ་ཞེས་རིགས་ཀྱི་དོན་དུ་འགྱུར་ཏེ། དཔེར་ན། ས་ཕྱོགས་འགའ་ཞིག་ལ་གསེར་དངུལ་ཟངས་ལྕགས་སོགས་ཀྱི་རིགས་མང་པོ་ཡོད་པ་ལ་དེ་དང་དེའི་ཁམས་སམ་འབྱུང་ཁུངས་ཞེས་བརྗོད་པ་བཞིན་དུ། རྟེན་ལུས་དང་རྒྱུད་སེམས་སེམས་བྱུང་གི་རྒྱུན་གཅིག་ལ་རིགས་སམ་ཁམས་བཅོ་བརྒྱད་ཡོད་པས་ཁམས་བཅོ་བརྒྱད་ཅེས་བྱའོ། །ཞེས་བཤད་དོ། ། དེ་དག་ཀྱང་ཡུལ་སོ་སོ་ལ་སྤྱོད་པ་ན་བྱེད་པ་མེད་ལ་རང་གི་མཚན་ཉིད་འཛིན་པའམ་ཉེར་སྤྱོད་འཛིན་པའམ་ས་བོན་འཛིན་པས་མིག་སོགས་ནང་གི་ཁམས། ཡུལ་སོ་སོའི་མཚན་ཉིད་འཛིན་པས་གཟུགས་སོགས་ཕྱིའི་ཁམས། དབང་པོ་ལ་བརྟེན་ནས་ཡུལ་གྱི་ངོ་བོ་རྣམ་པར་རིག་པའི་རང་མཚན་འཛིན་པས་རྣམ་པར་ཤེས་པའི་ཁམས་ཏེ། སོ་སོའི་མཚན་ཉིད་སའི་དངོས་གཞི་ལས་རྒྱས་པར་བཤད་དོ། ། ཐ༢ གཉིས་པ་ཕྱེ་བའི་རྣམ་གཞག་ལ་གཉིས། ད༡ མདོར་བསྟན། ད༢ རྒྱས་བཤད་དོ། ། ད༡ དང་པོ་ནི། ཕུང་པོས་བསྡུས་དང་མ་བསྡུས་ཆོས་ཁམས་སོ། ། ཁམས་ཐམས་ཅད་མདོར་སྡུ་ན། ཕུང་པོས་བསྡུས་པའི་ཁམས་དང༌། དེས་མ་བསྡུས་པའི་ཁམས། ཁྱད་པར་ཆོས་ཁམས་ཏེ་གསུམ་མོ། ། ད༢ གཉིས་པ་[རྒྱས་བཤད་]ལ་གསུམ། ན༡ བསྡུས། ན༢ མ་བསྡུས། ན༣ ཆོས་ཁམས་སོ། ། ན༡ དང་པོ་ནི། གཟུགས་ཕུང་དབང་ཡུལ་གཟུགས་ཅན་ཁམས་བཅུ་དང༌། ། ཆོས་སྐྱེའི་ཕྱོགས་གཅིག་དང་བཅས་(༢༠༠བ)གཟུགས་ཀྱིས་བསྡུས། ། ཚོར་འདུ་བྱེད་གསུམ་ཡིད་ཀྱི་ཡུལ་ཡིན་ཕྱིར། ། ཆོས་སྐྱེའི་ཁམས་ཀྱི་ཕྱོགས་གཅིག་ཆོས་ཀྱིས་བསྡུས། ། རྣམ་ཤེས་ཕུང་པོ་ཚོགས་དྲུག་ཉོན་ཡིད་བཅས། ། རྣམ་ཤེས་ཁམས་བདུན་ཞེས་བྱ་སེམས་ཀྱིས་བསྡུས། ། ཕུང་པོའི་སྐབས་སུ་གཟུགས་ཀྱི་ཕུང་པོ་ཞེས་གཅིག་ཏུ་བསྟན་པ་དེ་ནི་ཁམས་ཀྱི་སྐབས་སུ་གཟུགས་ཅན་གྱི་ཁམས་བཅུ་ཞེས་བྱ་སྟེ། མིག་སོགས་དབང་པོ་གཟུགས་ཅན་ལྔའི་ཁམས་དང་གཟུགས་སོགས་ཡུལ་གཟུགས་ཅན་ལྔའི་ཁམས་ཏེ་བཅུ། ཆོས་ཀྱི་སྐྱེ་མཆེད་པའི་གཟུགས་བསྡུས་པ་ལས་གྱུར་པའི་གཟུགས་སོགས་ལྔ་ལས་ཁམས་ཀྱི་ཕྱོགས་གཅིག་སྟེ་ཕྱེད་དང་བཅུ་གཅིག་པོ་གཟུགས་ཀྱིས་བསྡུས་པའོ། ། ཕུང་པོའི་སྐབས་སུ། ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་ཞེས་གསུམ་དུ་བསྟན་པ་གང་ཡིན་པ་དེ་དག་ཁམས་ཀྱི་སྐབས་སུ། ཡིད་ཁོ་ནའི་ཡུལ་ཡིན་པའི་ཕྱིར་ཆོས་ཀྱི་སྐྱེ་མཆེད་པའི་ཁམས་ཀྱི་ཕྱོགས་གཅིག་ཏུ་འཇོག་པ་ཆོས་ཀྱིས་བསྡུས་པའོ། ། ཕུང་པོའི་སྐབས་སུ། རྣམ་པར་ཤེས་པའི་ཕུང་པོ་ཞེས་གཅིག་ཏུ་བསྟན་པ་གང་ཡིན་པ་དེ་ནི་ཁམས་ཀྱི་སྐབས་སུ། མིག་ཤེས་ནས་ཡིད་ཤེས་ཀྱི་ཁམས་ཀྱི་བར་ཚོགས་དྲུག་དང་ཉོན་ཡིད་ཀྱི་ཁམས་བཅས་རྣམ་པར་ཤེས་པའི་ཁམས་བདུན་ཅེས་བྱ་སྟེ། དེའང་ཉན་ཐོས་པའི་ལུགས་ཀྱི་དྲུག་པོ་འགག་མ་ཐག་པ་ནི་ཚོགས་དྲུག་ལས་གུད་ན་མེད་ཀྱང་ཡིད་ཤེས་ཀྱི་གནས་བསྟན་པའི་ཕྱིར་ཡིད་ཀྱི་ཁམས་སུ་བཞག་ཅིང༌། ཐེག་ཆེན་པའི་ལུགས་ཀྱིས་ཡིད་ཀྱི་ཁམས་ནི་ཉོན་ཡིད་ཡིན་ལ། ཀུན་གཞིའང་བདུན་ཀའི་ས་བོན་ཡིན་པས་དེ་རྣམས་ཀྱི་ཤུགས་ལ་བསྟན་པ་སྟེ་སེམས་ཀྱིས་བསྡུས་པའོ། ། ན༢ གཉིས་པ་[ཕུང་པོ་ལྔས་མ་བསྡུས་པའི་ཁམས་]ནི། རྒྱུ་རྐྱེན་ཚོགས་མིན་ཕུང་པོས་མ་བསྡུས་པ། ། ཆོས་ཁམས་ཕྱོགས་གཅིག་འདུས་མ་བྱས་པའི་ཁམས། ། དེ་བཞིན་ཉིད་གསུམ་ནམ་མཁའ་འགོག་པ་གཉིས། ། མི་གཡོ་བ་དང་ཚོར་འདུ་(༢༠༡ན)བཀག་པ་བརྒྱད། ། ཕུང་པོ་ལྔས་མ་བསྡུས་པའི་ཁམས་ཡོད་དམ་ཞེ་ན། ཡོད་དེ། ཆོས་གང་ཞིག །རྒྱུ་རྐྱེན་གྱིས་མ་བསྐྱེད་ཅིང་འདས་པ་ལ་སོགས་པ་གཅིག་ཏུ་ཚོགས་ནས་སྤུངས་པའི་དོན་ཅན་མ་ཡིན་པའི་ཕྱིར། ཕུང་པོ་ལྔ་ཡིས་མ་བསྡུས་པ་ཆོས་ཁམས་ཀྱི་ཕྱོགས་གཅིག་ཏུ་གཏོགས་པའི་འདུས་མ་བྱས་ཀྱི་ཁམས་ཞེས་བྱ་བ་རྣམས་ཏེ། དེའང་ཕུང་པོ་ལྔ་པར་འདུས་མ་བྱས་བཞིར་བཤད་པ་སོགས་བཞེད་ཚུལ་ཐ་དད་པ་ཡོད་ཀྱང༌། ལུགས་འདིར་བརྒྱད་དུ་གསུངས་ཏེ། དེ་བཞིན་ཉིད་གསུམ། ནམ་མཁའ། སོ་སོར་བརྟགས་མིན་གྱི་འགོག་པ། སོ་སོར་བརྟགས་འགོག །མི་གཡོ་བ། འདུ་ཤེས་དང་ཚོར་བ་འགོག་པ་རྣམས་སོ། ། དེ་ལ་དང་པོ་གསུམ་ནི། ཆོས་ཉིད་ལ་ཁྱད་པར་མེད་ཀྱང་ཆོས་ཅན་རྟེན་ཐ་དད་པའི་སྒོ་ནས་གསུམ་དུ་བཞག་པ་སྟེ། འདི་ལྟར་ཆོས་དགེ་བ་རྣམས་ཀྱི་དེ་བཞིན་ཉིད། ཆོས་མི་དགེ་བ་རྣམས་ཀྱི་དེ་བཞིན་ཉིད། ལུང་མ་བསྟན་རྣམས་ཀྱི་དེ་བཞིན་ཉིད་དེ་གསུམ་མོ། ། དེ་དག་གི་ངོ་བོ་ནི། དགེ་མི་དགེ་ལུང་མ་བསྟན་རང་རང་ལ་ཡོད་པའི་ཆོས་ཉིད་དེ། རྟག་གཅིག་རང་དབང་ཅན་ལ་སོགས་པའི་བདག་གོ་ཞེས་གཟུང་བ་གང་ཟག་གི་བདག་དང༌། གཟུང་བ་དང་འཛིན་པའི་ཆོས་སུ་བརྟགས་པ་ཆོས་ཀྱི་བདག་གཉིས་ཀས་སྟོང་པས་བདག་མེད་པ་གཉིས་ཀྱི་ངོ་བོར་གྱུར་པའོ། ། དེ་བཞིན་ཉིད་དེའི་མིང་གི་རྣམ་གྲངས་ཀྱང་། སྟོང་པ་ཉིད་དང༌། མཚན་མེད་པ་དང༌། ཡང་དག་པའི་མཐའ་དང༌། དོན་དམ་པ་དང༌། ཆོས་ཀྱི་དབྱིངས་ཞེས་པ་ལ་སོགས་རྣམ་གྲངས་དུ་མ་འབྱུང་ངོ༌། ། བཞི་པ་ནམ་མཁའ་ནི། གཟུགས་ཁོ་ན་ལས་བཟློག་པས་གཟུགས་ཀྱི་དངོས་པོ་མེད་པའི་མཚན་ཉིད་ཅན་གྱི་ཆོས་གང་ཞིག །ཡིད་ཀྱི་རྣམ་པར་ཤེས་པའི་ཡུལ་དུ་གྱུར་པ། ཐོགས་བཅས་ཀྱི་གཟུགས་སྐྱེ་འཇིགས་སོགས་ཀྱི་གོ་འབྱེད་པ་སྟེ། དེའང་འགྲོ་འོང་གི་སྒོ་ནས་གོ་འབྱེད་པ་ནི་མིན་གྱི། ཐོགས་བཅས་ཀྱི་གཟུགས་(༢༠༡བ)འབྱུང་བའི་གོ་མ་བཀག་ཙམ་ལ་དེ་སྐད་ཅེས་བྱའོ། ། ལྔ་པ་སོ་སོར་བརྟགས་མིན་གྱི་འགོག་པ་ནི། གང་རྒྱུ་དང་རྐྱེན་མ་ཚང་བའི་སྒོ་ནས་དགག་བྱ་དེ་རེ་ཞིག་ལ་དེའི་ས་བོན་ནམ་བག་ལ་ཉལ་མ་བཅོམ་ཞིང༌། སྤངས་པ་སླར་མི་ལྡོག་པར་མ་བྱས་པས་གཏན་དུ་བྲལ་བ་མིན་པ་སྟེ། དཔེར་ན། མིག་ཤེས་གཟུགས་ལ་ཡེངས་པ་ན་རྣམ་པར་ཤེས་པ་གཞན་མ་སྐྱེས་པ་ལྟ་བུའོ། ། དྲུག་པ་སོ་སོར་བརྟགས་པའི་འགོག་པ་ནི། གང་གཉེན་པོ་ཟག་མེད་ཀྱི་ལམ་རྒྱུད་ལ་སྐྱེས་པ་ན་རང་རང་གི་སྤང་བྱ་མ་ལུས་པ་འགོག་ལ། དེ་ནི་གཉེན་པོ་གང་དང་གང་བྱུང་བས་ཉོན་མོངས་པ་དང་དེ་ཡི་ས་བོན་བག་ལ་ཉལ་ལེགས་པར་བཅོམ་ཞིང་སྤངས་པས་སླར་མི་ལྡོག་པར་བྱས་པས་སྤང་བྱ་དང་གཏན་དུ་བྲལ་བའོ། ། བདུན་པ་མི་གཡོ་བ་ནི། འཇིག་རྟེན་པའི་བསམ་གཏན་གསུམ་པ་མན་ཆད་ཀྱི་འདོད་ཆགས་དང་བྲལ་ལ་ཚོར་བ་བདེ་སྡུག་མ་ལུས་པ་འགོག་པས། སྐྱོན་བརྒྱད་ཀྱིས་མི་གཡོ་ཞིང་ཁྱད་པར་འགྱུར་བྱེད་བདེ་སྡུག་གི་མི་གཡོ་བས་ན་མི་གཡོ་བ་ཞེས་བྱ་སྟེ། རྟོག་དཔྱོད་གཉིས། དབུགས་དབྱུང་རྔུབ་གཉིས། བདེ་སྡུག་གཉིས། ཡིད་བདེ་ཡིད་མི་བདེ་གཉིས་ཏེ་བརྒྱད་དོ། ། བརྒྱད་པ་འདུ་ཤེས་དང་ཚོར་བ་འགོག་པ་ནི། ཅི་ཡང་མེད་པའི་སྐྱེ་མཆེད་མན་ཆད་ཀྱི་འདོད་ཆགས་དང་བྲལ་ལ། སྲིད་རྩེ་ལས་ཀྱང་སྤང་བྱ་ཅི་རིགས་པ་སྤངས་ནས་གྱེན་དུ་བསྐྱོད་པའི་འདུ་ཤེས་དང་ཚོར་བ་བཏང་སྙོམས་ཀྱང་ཞི་བར་གནས་པ་ཐོབ་པར་བྱའོ་སྙམ་པའི་འདུ་ཤེས་སྔོན་དུ་བཏང་བས་ཚོགས་དྲུག་དང་ཉོན་ཡིད་འགོག་པའོ། ། དེ་རྣམས་ཀྱི་མེད་དགག་གི་ཆ་ནི་འདུས་མ་བྱས་དང༌། ཐོབ་པ་གང་ཡིན་པ་ཡིད་ཀྱི་ཆོས་སུ་སོང་བས་ཆོས་ཀྱི་སྐྱེ་མཆེད་པའི་ཁམས་ཞེས་བྱའོ། ། ན༣ གསུམ་པ་ཁྱད་པར་ཆོས་ཁམས་ནི། འདུས་བྱས་འདུས་མ་བྱས་དངོས་བརྒྱད་གཉིས་དག ། བསྡམས་པ་ཡིད་ཤེས་ཁོ་ནའི་སྤྱོད་ཡུལ་ཕྱིར། ། ཁྱད་པར་ཆོས་ཁམས་ཞེས་སུ་རྣམ་པར་(༢༠༢ན)གཞག ། སྔར་བཤད་ཟིན་པའི་བསྡུས་པ་ལས་གྱུར་པའི་གཟུགས་སོགས་རྣམ་པ་ལྔ་གང་ཡིན་པ་དང༌། ཚོར་བ་དང་འདུ་ཤེས་དང་འདུ་བྱེད་ཀྱི་ཕུང་པོ་གསུམ་སྟེ་འདུས་བྱས་བརྒྱད་དང༌། འདུས་མ་བྱས་ཀྱི་དངོས་པོ་བརྒྱད་དེ། གཉིས་པོ་གཅིག་ཏུ་བསྡམས་པ་རྣམ་པ་བཅུ་དྲུག་གི་བདག་ཉིད་ནི་ཡིད་ཤེས་ཁོ་ནའི་སྤྱོད་ཡུལ་ཡིན་པའི་ཕྱིར། ཁྱད་པར་ཆོས་ཁམས་ཞེས་ལོགས་སུ་རྣམ་པར་གཞག་གོ། ། ཏ༣ གསུམ་པ་སྐྱེ་མཆེད་ཀྱི་རྣམ་གཞག་ལ་གཉིས།