Tibetan
ཐ༡ ངོ་བོ་ངོས་བཟུང༌། ཐ༢ བསྡུས་ཚུལ་གྱི་དབྱེ་བའོ། ། ཐ༡ དང་པོ་ནི། རྣམ་ཤེས་སྐྱེ་བའི་སྒོ་ལས་ཡུལ་གཞན་ལ། ། མཆེད་པའི་མིག་གཟུགས་ལ་སོགས་བཅུ་གཉིས་ཏེ། ། རྟེན་དང་དེ་མ་ཐག་རྐྱེན་ནང་དང་ནི། ། དམིགས་རྐྱེན་ཕྱི་རོལ་སྐྱེ་ཞིང་མཆེད་པའི་སྒོ། ། ཉེར་སྤྱོད་རྣམ་པར་ཤེས་པ་སྐྱེ་བའི་སྒོ་ལས་ཡུལ་གཞན་ལ་མཆེད་པར་བྱེད་པའི་དོན་གྱིས་ན་སྐྱེ་མཆེད་ཅེས་བྱ་ལ། དེའང་མིག་སོགས་ནང་གི་སྐྱེ་མཆེད་དྲུག །གཟུགས་སོགས་ཕྱིའི་སྐྱེ་མཆེད་དྲུག་སྟེ་བཅུ་གཉིས་སོ། ། མཛོད་འགྲེལ་ལས། ཨཱ་ཡཏ་ན་ཞེས་པ་སྐྱེ་མཆེད་ཀྱི་སྒྲ་ནི། ཨཱ་ཡ་དྭ་ཞེས་སྐྱེ་བའི་སྒོའི་དོན་ཏེ། གང་ལ་བརྟེན་ནས་སེམས་དང་སེམས་བྱུང་རྣམས་སྐྱེ་ཞིང་མཆེད་པ་སྟེ། རྒྱས་པའི་སྒོར་འགྱུར་བའི་ཕྱིར་སྐྱེ་མཆེད་ཅེས་བྱའོ། །ཞེས་སོ། ། དེའང་སོ་སོར་ཞིབ་མོར་སྦྱར་ན། རྟེན་གྱི་ཆ་ནས་མིག་ཤེས་སྐྱེ་བའི་སྒོ་བྱེད་པའི་མིག་གི་སྐྱེ་མཆེད་དང༌། དམིགས་པའི་ཆ་ནས་མིག་ཤེས་སྐྱེ་བའི་སྒོ་བྱེད་པ་གཟུགས་ཀྱི་སྐྱེ་མཆེད། དེ་བཞིན་དུ། རྟེན་དང་དམིགས་པའི་ཆ་ནས་རང་རང་གི་རྣམ་ཤེས་སྐྱེ་བའི་སྒོ་བྱེད་པས་ལྷག་མ་ཀུན་ལའང་སྦྱར་ཞིང༌། ཁྱད་པར་མཚུངས་པ་དེ་མ་ཐག་རྐྱེན་གྱི་ཆ་ནས་ཡིད་ཤེས་སྐྱེ་བའི་སྒོ་བྱེད་པ་ཡིད་ཀྱི་སྐྱེ་མཆེད་དང༌། དམིགས་རྐྱེན་གྱི་ཆ་ནས་ཡིད་ཤེས་སྐྱེ་བའི་སྒོ་བྱེད་པས་ཆོས་ཀྱི་སྐྱེ་མཆེད་རྣམས་སུ་ཤེས་པར་བྱ་སྟེ། མདོར་ན། རྟེན་དང་། དེ་མ་ཐག་རྐྱེན་ནང་དང༌། དམིགས་རྐྱེན་(༢༠༢བ)གྱི་ཆ་ནས་ཕྱི་རོལ་དུ་རྣམ་ཤེས་སྐྱེ་ཞིང་མཆེད་པའི་སྒོར་གྱུར་པའོ། ། འདིར་དང་པོ་བཅུ་ཀ་གཟུགས་ཡིན་ཀྱང་མིག་གི་ཡུལ་ཁོ་ན་ལ་གཟུགས་ཞེས་པ་དང༌། བཅུ་གཉིས་པོ་ཐམས་ཅད་ཆོས་ཡིན་ཀྱང་ཡིད་ཡུལ་ཁོ་ན་ལ་ཆོས་སུ་བརྗོད་པ་ཅི་ཞེ་ན། གཞན་རྣམས་ལ་མིང་སོ་སོར་བཏགས་པས་བྱེ་བྲག་གཅིག་ལ་གོ་བའི་དོན་དང༌། བསྟན་དུ་ཡོད་ཅིང་ཐོགས་པ་དང་བཅས་པས་གཟུགས་ཀྱི་གཙོ་བོ་ཡིན་པའི་ཕྱིར་མིག་གི་ཡུལ་ཁོ་ན་ལ་གཟུགས་ཞེས་བྱ་ཞིང༌། སྔ་མ་ལྟར་བྱེ་བྲག་གི་དོན་དང༌། ཚོར་བ་སོགས་ཆོས་མང་པོ་འདུས་པ་དང༌། ཆོས་ཀྱི་མཆོག་མྱ་ངན་འདས་པའང་བསྡུས་པའི་ཕྱིར་ཡིད་ཀྱི་ཡུལ་ཁོ་ན་ལ་ཆོས་ཞེས་བརྗོད་པ་ཡིན་ནོ། ། ཐ༢ གཉིས་པ་བསྡུས་ཚུལ་གྱི་དབྱེ་བ་ལ་གསུམ། ད༡ གཟུགས་ཀྱིས་བསྡུས་པ། ད༢ སེམས་ཀྱིས་བསྡུས་པ། ད༣ ཆོས་ཀྱིས་བསྡུས་པའོ། ། ད༡ དང་པོ་ནི། གཟུགས་ཅན་སྐྱེ་མཆེད་བཅུ་ནི་ཁམས་དང་འདྲ། ། གཟུགས་ཅན་སྐྱེ་མཆེད་བཅུ་ནི་གོང་སྨོས་ཁམས་ཀྱི་མིང་སྨོས་པ་ཙམ་ལས་དོན་མཚུངས་པས་དེ་དང་བསྡུ་ཚུལ་འདྲ་སྟེ། དེའང་ཁམས་ཀྱི་སྐབས་སུ། དབང་པོ་ལྔ་དང་ཡུལ་ལྔ་སྟེ་གཟུགས་ཅན་གི་ཁམས་བཅུ་པོ་བསྟན་པ་གང་ཡིན་པ་དེ་དག་ཉིད་ལ་སྐྱེ་མཆེད་ཀྱི་སྐབས་སུའང་། གཟུགས་ཅན་གྱི་སྐྱེ་མཆེད་བཅུ་ཞེས་བྱའོ། ། ད༣ གཉིས་པ་[སེམས་ཀྱིས་བསྡུས་པ་]ནི། རྣམ་ཤེས་ཁམས་བདུན་ཡིད་ཀྱི་སྐྱེ་མཆེད་དེ། ། ཁམས་ཀྱི་སྐབས་སུ། རྣམ་པར་ཤེས་པའི་ཁམས་བདུན་དུ་ཕྱེ་ནས་བསྟན་པ་གང་ཡིན་པ་དེ་ནི་སྐྱེ་མཆེད་ཀྱི་སྐབས་སུ། ཡིད་ཀྱི་སྐྱེ་མཆེད་ཅེས་བྱ་བ་གཅིག་ཏུ་འདུས་པ་ཉིད་དོ། ། ད༣ གསུམ་པ་[ཆོས་ཀྱིས་བསྡུས་པ་]ནི། ཆོས་ཁམས་བཅུ་དྲུག་ཆོས་ཀྱི་སྐྱེ་མཆེད་དོ། ། ཁམས་ཀྱི་སྐབས་སུ། ཆོས་ཀྱི་ཁམས་ལ་རྣམ་པ་བཅུ་དྲུག་ཏུ་བསྟན་པ་གང་ཡིན་པ་དེ་ནི་སྐྱེ་མཆེད་ཀྱི་སྐབས་སུ། ཆོས་ཀྱི་སྐྱེ་མཆེད་ཅེས་གཅིག་ཏུ་བསྟན་པའོ། ། ཉ༢ གཉིས་པ་དེ་དག་གི་དོན་བསྡུ་མངོན་པ་འོག་མའི་ལུགས་ལྟར་བཤད་པ་ལ་གསུམ། ཐ༡ དོན་སྡུད་པ་དང་འབྲེལ་བའི་མདོར་(༢༠༣ན)བསྟན། ཐ༢ དེའི་རྒྱས་བཤད། ཐ༣ དེ་དག་གི་དོན་བསྡུའོ། ། ཐ༡ དང་པོ་ནི། སྣང་བ་གཟུགས་དང་གཙོ་སེམས་འཁོར་སེམས་བྱུང༌། ། ལྡན་མིན་འདུ་བྱེད་འདུས་མ་བྱས་པ་སྟེ། ། ཉན་ཐོས་པ་རྣམས་ཤེས་བྱ་གཞི་ལྔར་བསྡུས། ། ཕུང་ཁམས་སྐྱེ་མཆེད་ཀྱི་ཆར་ཕྱེ་བའི་ཆོས་འདི་དག་ཐམས་ཅད་གཙོ་བོ་རིགས་བསྡུས་པའི་དབང་དུ་བྱས་ན་ཤེས་བྱ་གཞི་ལྔར་བསྡུ་བར་ཆོས་མངོན་པ་ནས་གསུངས་ཏེ། ལྔ་གང་ཞེ་ན། སྣང་བ་གཟུགས་ཀྱི་གཞི། གཙོ་བོ་སེམས་ཀྱི་གཞི། འཁོར་སེམས་བྱུང་གི་གཞི། གནས་སྐབས་ལྡན་པ་མ་ཡིན་པའི་འདུ་བྱེད་ཀྱི་གཞི། དགག་པ་འདུས་མ་བྱས་ཀྱི་གཞི་སྟེ། ཉན་ཐོས་པ་རྣམས་ནི་ཤེས་བྱ་ཐམས་ཅད་གཞི་ལྔ་པོ་འདིར་བསྡུ་བར་འདོད་དོ། ། བྲི་ལུང་པཎ་ཆེན་གྱིས། གཞི་ལྔ་བྱེ་བྲག་སྨྲ་བ་ཁོ་ནའི་ལུགས་སུ་བཞག་པ་མི་འཐད་དེ། མངོན་པ་ཀུན་བཏུས་ལས་གསལ་བར་བཤད་པའི་ཕྱིར། ཞེས་གསུངས་སོ། ། ཐ༢ གཉིས་པ་[དེའི་རྒྱས་བཤད་]ནི། དབང་པོ་དོན་ལྔ་རྣམ་རིག་བྱེད་མིན་གཟུགས། ། ཚོགས་དྲུག་སེམས་དང་དགེ་བའི་ས་མང་བཅུ། ། ཉོན་མོངས་ས་དྲུག་མི་དགེའི་ས་པ་གཉིས། ། ཆུང་ངུའི་ས་བཅུ་མ་ངེས་ས་པ་བརྒྱད། ། བསྡམས་པས་སེམས་བྱུང་བཞི་བཅུ་རྩ་དྲུག་སྟེ། ། ལྡན་མིན་འདུ་བྱེད་བཅུ་བཞི་ཆ་དང་བཅས། ། ནམ་མཁའ་འགོག་གཉིས་འདུས་མ་བྱས་པའོ། ། འདི་དག་གི་དོན་གོང་དུ་རྒྱས་པར་སྨོས་ཟིན་ཀྱང་མངོན་པ་གོང་འོག་རྣམ་གཞག་མི་མཚུངས་ལ། མཛོད་ཀྱི་ལུགས་ནི། ཉན་ཐོས་ལུགས་ཇི་བཞིན་པ་ཡིན་པས་དེའི་ཚུལ་ཕྱོགས་མཚོན་ཙམ་ཡང་ཞར་བྱུང་དུ་རྟོགས་པར་འདོད་ནས། འདིར་ཅུང་ཟད་སྨོས་པ་སྟེ། དེ་ལ་དང་པོ་སྣང་བ་གཟུགས་ཀྱི་གཞི་ནི། དབང་པོ་ལྔ། དོན་ལྔ། རྣམ་པར་རིག་བྱེད་མ་ཡིན་པའི་གཟུགས་ཏེ་རྫས་བཅུ་གཅིག ། དབང་པོ་ལྔ་ནི་སྔར་དང་འདྲ། དོན་ལྔ་ལས། མིག་གི་ཡུལ་གཟུགས་ཀྱི་སྐྱེ་མཆེད་ལ། ཁ་དོག་དང་། དབྱིབས་ཀྱི་གཟུགས་གཉིས། དེ་ལས་དབྱེ་ན་ཉི་ཤུ་སྟེ། (༢༠༣བ) སྔོ་སེར་དཀར་དམར་སྣང་མུན་སྤྲིན། ། དུ་བ་རྡུལ་དང་ཁུག་རྣ་ཉི། ། གྲིབ་མ་རིང་ཐུང་ལྷམ་པ་ཟླུམ། ། མཐོ་དམའ་ཕྱ་ལེ་ཕྱ་ལེ་མིན། ། དང་པོ་བཅུ་གཉིས་ཁ་དོག་ཡིན། ། བཞི་ནི་རྩ་བ་བརྒྱད་བྱེ་བྲག ། ཐ་མ་བརྒྱད་ནི་དབྱིབས་ཀྱི་གཟུགས། ། ཞེས་སོ། ། སྒྲ་ལ། ཟིན། མ་ཟིན་གྱི་སྒྲ་གཉིས། དེ་རེ་རེ་ལ། དོན་རྗོད་པར་བྱེད་པ་དང་། དེ་ལས་བཟློག་པ་རེ་རེ་སྟེ་བཞི། དེ་རེ་རེ་ལ། ཡིད་དུ་འོང་བ་དང་། མི་འོང་བ་རེ་རེ་སྟེ་བརྒྱད། དྲི་ལ། ཞིམ་པ་དང་། ང་བ་གཉིས། རེ་རེའང་། མཉམ་པ་དང་། མི་མཉམ་པ་གཉིས་སུ་ཕྱེ་བས་བཞི། རོ་ལ། མངར། སྐྱུར། ལན་ཚྭ། ཁ། ཚ། བསྐ་བ་སྟེ་ངོ་བོ་དྲུག ། རེག་བྱ་ལ། རྒྱུའི་རེག་བྱ་ལ། འབྱུང་བཞི་དང་། འབྲས་བུའི་རེག་བྱ་ལ། འཇམ། རྩུབ། ལྕི། ཡང་། བཀྲེས། སྐོམ། གྲང་བ་སྟེ་བཅུ་གཅིག ། རིག་མིན་གྱི་གཟུགས་ནི། ཆོས་ཀྱི་སྐྱེ་མཆེད་པའི་གཟུགས་གང་ཞིག །རྣམ་པར་རིག་བྱེད་དང་ཏིང་ངེ་འཛིན་གང་རུང་ལས་སྐྱེས་ཤིང་། དགེ་མི་དགེ་གང་རུང་ཡིན་པ་ནི་རིག་མིན་སྤྱིའི་མཚན་ཉིད། དེ་ལ་དབྱེ་ན། རྣམ་རིག་ལས་བྱུང་བ་དང༌། ཏིང་ངེ་འཛིན་ལས་བྱུང་བ་གཉིས། སྔ་མ་ལ། སྡོམ། སྡོམ་མིན། བར་མ་གསུམ། ཕྱི་མ་ལ། བསམ་གཏན་དང་། ཟག་མེད་ཀྱི་སྡོམ་པ་གཉིས་ཏེ། དེའང་སྡོམ་པ་ནི། དགེ་བ་དང༌། སྡོམ་མིན་ནི། མི་དགེ་བ། བར་མ་ནི། དགེ་མི་དགེ་གང་རུང་ངོ༌། ། དེ་དག་གི་རྒྱུ་འབྱུང་བ་ཆེན་པོ་བཞི་ནི་གོང་དང་འདྲའོ། ། གཉིས་པ་གཙོ་བོ་སེམས་ཀྱི་གཞི་ནི། མིག་ཤེས་ནས་ཡིད་ཤེས་ཀྱི་བར་ཚོགས་དྲུག་པོ་དེ་ཉིད་དོ། ། གསུམ་པ་འཁོར་སེམས་འབྱུང་གི་གཞི་ནི། སྡེ་ཚན་རྣམ་པ་ལྔར་ཡོད་དེ། སེམས་ཀྱི་ས་མང་པོ་པ་བཅུ་ནི། ཚོར་དང་སེམས་པ་འདུ་ཤེས་དང༌། ། འདུན་དང་རེག་པ་བློ་གྲོས་དྲན། ། ཡིད་བྱེད་མོས་དང་ཏིང་འཛིན་ནོ། ། དགེ་བའི་ས་མང་བཅུ་ནི། (༢༠༤ན) དད་དང་བག་ཡོད་ཤིན་ཏུ་སྦྱངས། ། བཏང་སྙོམས་ངོ་ཚ་ཤེས་ཁྲེལ་ཡོད། ། ཆགས་སྡང་མེད་པའི་དགེ་རྩ་གཉིས། ། མི་འཚེ་བ་དང་བརྩོན་འགྲུས་སོ། ། ཉོན་མོངས་ཅན་གྱི་ས་མང་དྲུག་ནི། རྨོངས་དང་བག་མེད་ལེ་ལོ་དང༌། ། མ་དད་རྨུགས་དང་རྒོད་པའོ། ། མི་དགེ་བའི་ས་པ་ཆེན་པོ་གཉིས་ནི། ངོ་ཚ་མེད་པ་དང་ཁྲེལ་མེད་པའོ། ། ཉོན་མོངས་ཆུང་ངུའི་ས་པ་བཅུ་ནི། ཁྲོ་དང་འཁོན་འཛིན་གཡོ་ཕྲག་དོག ། འཚིག་དང་འཆབ་དང་སེར་སྣ་དང༌། ། སྒྱུ་དང་རྒྱགས་དང་རྣམ་འཚེའོ། ། དེ་ལྟར་སུམ་ཅུ་རྩ་བརྒྱད་པོ་མཛོད་ལས་དངོས་སུ་བསྟན་པ་ཡིན་ལ། དབྱིག་བཤེས་ཀྱིས་འགྲེལ་པར། ཁ་བསྐངས་པ་མ་ངེས་པའི་ས་པ་བརྒྱད་ནི། རྟོག་དཔྱོད་འགྱོད་གཉིད་ཁོང་ཁྲོ་བ། ། ཆགས་དང་ང་རྒྱལ་ཐེ་ཚོམ་མོ། ། དེ་དག་ཐམས་ཅད་བསྡམས་པས་སེམས་བྱུང་བཞི་བཅུ་རྩ་དྲུག་གོ། ། བཞི་པ་ལྡན་མིན་འདུ་བྱེད་ཀྱི་གཞི་ནི། བསྡུ་ན་བརྒྱད་དེ། ཐོབ་དང་མ་ཐོབ་སྐལ་མཉམ་དང༌། ། འདུ་ཤེས་མེད་དང་སྙོམས་འཇུག་དང༌། ། སྲོག་དང་མཚན་ཉིད་རྣམ་དང་ནི། ། མིང་གི་ཚོགས་ལ་སོགས་པ་ཡང༌། ། ཞེས་སོ། ། དེ་ལ་རྣམ་པར་ཕྱེ་ན་བཅུ་བཞི་སྟེ། སྙོམས་འཇུག་ལ། འགོག་པ་དང་། འདུ་ཤེས་མེད་པའི་སྙོམས་འཇུག་གཉིས། འདུས་བྱས་ཀྱི་མཚན་ཉིད་སྐྱེ་བ། རྒ་བ། གནས་པ། མི་རྟག་པ་བཞི། མིང་ཚིག་ཡི་གེ་སྟེ་ཚོགས་གསུམ་རྣམས་སོ། ། དེ་ལས་ཀྱང་ཆར་དབྱེ་ན་མང་སྟེ། ཐོབ་པ་ལ་མཚོན་ན། རྙེད། ཐོབ། ལྡན་གསུམ། སྔ་མ་ལས་ཐོབ་པ་ལའང་། མ་ཐོབ་པ་ལས་ཐོབ་པ་དང༌། ཉམས་ནས་ཐོབ་པ་དང༌། འདུས་བྱས་དང་འདུས་མ་བྱས་པའི་ཐོབ་པ་སོགས་རྒྱ་ཆེར་བཤད་དོ། ། ལྔ་པ་འདུས་མ་བྱས་ཀྱི་གཞི་ནི་གསུམ་སྟེ། ནམ་མཁའ་དང༌། སོ་སོར་བརྟགས་འགོག །སོ་སོར་བརྟགས་མིན་འགོག་པ་རྣམས་འདུས་མ་བྱས་སུ་བཤད་དོ། ། ཐ༣ གསུམ་པ་དེ་དག་གི་དོན་བསྡུ་བ་ནི། གཟུགས་ཕུང་ཆོས་ཁམས་ཡིད་ཀྱི་སྐྱེ་མཆེད་ཀྱིས། ། ཀུན་རྫོབ་ཀུན་བསྡུས་དེ་དག་རྫས་བཏགས་ཀྱི། ། དངོས་པོ་དངོས་པོ་མེད་པ་(༢༠༤བ)གསུམ་དུ་འགྱུར། ། དེ་ལྟར་བཤད་པ་དེ་དག་ཀྱང༌། ཕུང་པོ་ལས་ཁམས་དང་། ཁམས་ལས་སྐྱེ་མཆེད་དམིགས་ཀྱི་བཏོན་ནས་འཇོག་པ་དེ་ཉིད་ཀྱི་ཕྱིར། ཕུང་ཁམས་སྐྱེ་མཆེད་རྣམས་ནི་མདོར་བསྡུ་ན་དོན་རྣམ་པ་གསུམ་དུ་འདུ་སྟེ། མཛོད་ལས། གཟུགས་ནི་དབང་པོ་ལྔ་དང་དོན། ། ལྔ་དང་རྣམ་རིག་བྱེད་མིན་ཉིད། ། དབང་དོན་དེ་དག་ཁོ་ན་ལ། ། སྐྱེ་མཆེད་དང་ནི་ཁམས་བཅུར་འདོད། ། ཅེས་སོགས་བཤད་པའི་གཟུགས་ཅན་གྱི་ཁམས་དང་སྐྱེ་མཆེད་བཅུ་དང་ཡིད་ཡུལ་གྱི་གཟུགས་རྣམས་སྡུད་པ་གཟུགས་ཀྱི་ཕུང་པོ་དང༌། ཚོར་བ་འདུ་ཤེས་འདུ་བྱེད་ཀྱི་ཕུང་པོ་གསུམ་དང་གཟུགས་ཀྱི་ཕྱོགས་གཅིག་དང་ཆོས་ཀྱི་སྐྱེ་མཆེད་སྡུད་པ་ཆོས་ཀྱི་ཁམས་དང༌། རྣམ་ཤེས་ཕུང་པོ་དང་ཁམས་བདུན་སྡུད་པ་ཡིད་ཀྱི་སྐྱེ་མཆེད་དེ། མཛོད་ལས། ཕུང་པོ་དང་ནི་སྐྱེ་མཆེད་དང༌། ། ཁམས་གཅིག་གིས་ནི་ཐམས་ཅད་བསྡུས། ། ཞེས་གསུངས་པ་ལྟར། ཀུན་རྫོབ་ཀྱི་ཤེས་བྱ་ཐམས་ཅད་དེ་གསུམ་གྱིས་བསྡུས་སོ། ། དེ་དག་རྣམས་ནི་གཞན་ཡང༌། རྫས་ཡོད་ཀྱི་དངོས་པོ་དང༌། བཏགས་ཡོད་ཀྱི་དངོས་པོ་དང་དངོས་པོ་མེད་པ་ཞེས་བྱ་བ་གསུམ་དུའང་འགྱུར་ཏེ། དེ་ལ་རྫས་ཀྱི་དངོས་པོ་ནི། འབྱུང་བའི་རྡུལ་ལ་སོགས་པ་རྣམས་ལ་བེམ་པོའི་རྫས་དང༌། ཡུལ་གྱི་རྣམ་པར་ཤེས་པ་ལ་འཆར་ཞིང་རྣམ་པར་རིག་པ་ལ་ནི་ཤེས་པའི་རྫས་ཞེས་འཇོག་གོ། ། བཏགས་པའི་དངོས་པོ་ནི། སྤྱིར་མ་བརྟགས་མ་དཔྱད་པའི་ངོ་བོར་བུམ་པ་ཞེས་བྱ་བ་རྫས་སུ་ཡོད་ཀྱང༌། བུམ་པ་སྐྱེ་བ་དང་འགག་པ་སོགས་ནི་བློས་བཏགས་པའི་ཕྱིར་བཏགས་ཡོད་དོ། ། དངོས་པོ་མེད་པ་ནི། ནམ་མཁའ་ལ་སོགས་པ་རྣམས་སོ། ། གཞན་ཡང་། རྫས་དངོས། བཏགས་དངོས། ཀུན་རྫོབ་ཀྱི་དངོས་པོ། དོན་དམ་གྱི་དངོས་པོ་རྣམས་སུ་བསྡུ་བའང་བཤད་དོ། ། ཇ༢ གཉིས་པ་ཐུན་མོང་མ་ཡིན་པ་འཁོར་ལོ་ཐ་མའི་ཤེས་བྱའི་རྣམ་གཞག་བཤད་པ་ལ་གསུམ། ཉ༡ ཤེས་བྱའི་གཞི་སྲིད་པ་ཉི་ཤུ་རྩ་ལྔ། ཉ༢ མཚན་(༢༠༥ན)ཉིད་གང་ལ་འཇུག་པའི་གཞི་ཆོས་ལྔ། ཉ༣ དེ་ལ་འཇུག་པའི་མཚན་ཉིད་གསུམ་བཤད་པའོ། ། ཉ༡ དང་པོ་ལ་གསུམ། ཏ༡ གཞི། ཏ༢ ལམ། ཏ༣ ཆོས་ཀྱི་དབྱིངས་སོ། ། ཏ༡ དང་པོ་ནི། ཕུང་ཁམས་སྐྱེ་མཆེད་གཅིག་བསྡུས་རེ་རེར་ཡང༌། ། འབྱུང་ཁམས་སྣོད་བཅུད་སེམས་ཡིད་རྣམ་པར་ཤེས། ། མཚན་གཞི་མཚན་ཉིད་དངོས་མེད་གསུམ་གསུམ་དབྱེ། ། མཚན་གཞི་ཚོར་བ་འདུ་ཤེས་འདུ་བྱེད་གསུམ། ། མཚན་ཉིད་ཡུལ་དུས་དངོས་པོར་བཏགས་པ་གསུམ། ། གཞན་འགྱུར་དངོས་བརྟེན་མི་སྲིད་དངོས་མེད་བཅས། ། གཞི་ཆོས་ཉེར་གཅིག ། ཅེས་པ་སྟེ། སྔར་སྨོས་པ་ལྟར། ཕུང་པོ་ལྔ། ཁམས་བཅོ་བརྒྱད། སྐྱེ་མཆེད་བཅུ་གཉིས་རྣམས་གཟུགས་ཕུང་དང་ཆོས་ཁམས་དང་ཡིད་སྐྱེ་གསུམ་ལ་གཅིག་ཏུ་བསྡུ། དེ་རེ་རེར་ཡང་གསུམ་གསུམ་དུ་དབྱེ་སྟེ། གཟུགས་ཕུང་ལ་འབྱུང་བའི་ཁམས་དང༌། སྣོད་ཀྱི་འཇིག་རྟེན་དང༌། བཅུད་ཀྱི་སེམས་ཅན་དང་གསུམ། ཆོས་ཀྱི་སྐྱེ་མཆེད་ལ་ཡང་། སེམས་དང་། ཡིད་དང་། རྣམ་པར་ཤེས་པ་གསུམ། ཆོས་ཁམས་ལའང༌། མཚན་གཞིའི་ཆོས་དང༌། མཚན་ཉིད་ཀྱི་ཆོས་དང༌། དངོས་མེད་ཀྱི་ཆོས་དང་གསུམ་གསུམ་དུ་དབྱེ། མཚན་གཞི་ལའང་། ཚོར་ཕུང་དང༌། འདུ་ཤེས་དང་། འདུ་བྱེད་དང་གསུམ། མཚན་ཉིད་ལའང་། ཡུལ་ལ་བཏགས་པ་དང་། དུས་ལ་བཏགས་པ་དང་། དངོས་ལ་བཏགས་པ་དང་གསུམ། དངོས་མེད་ལའང་། དངོས་པོ་གཞན་འགྱུར་གྱི་དངོས་མེད་དང༌། དངོས་པོ་ལ་བརྟེན་པའི་དངོས་མེད་དང༌། མི་སྲིད་པའི་དངོས་མེད་བཅས་པར་དབྱེ་བས། དེ་ལྟར་ན། ཉེར་གཅིག་པོ་དེ་ལ་གཞིའི་ཆོས་ཞེས་བྱ་བར་འཇོག་གོ། ། དེ་དག་ཕལ་ཆེར་གྱི་དོན་གོང་དུ་སོང་ཞིང༌། མཚན་ཉིད་ནི། ཁྱད་པར་གྱི་ཆོས་ཀུན་ཏུ་བཏགས་པ་རྣམས་ལ་བྱ་སྟེ། དེའང་། རྒྱུ་འབྲས། ཆེ་ཆུང་། སྣང་མུན། དཔེ་དཔེ་ཅན་ལ་སོགས་པ་ལྟོས་ནས་བཞག་པ་ཐམས་ཅད་ཡུལ་ལ་བཏགས་པ། འདས་མ་འོངས་ཀྱི་ཆར་དབྱེ་(༢༠༥བ)བ་དུས་ལ་བཏགས་པ། བུམ་པ། ཀ་བ་ལྟ་བུ་དངོས་ལ་བཏགས་པའོ། ། སོ་སོར་བརྟགས་འགོག་ལྟ་བུ་སྔར་དངོས་པོ་ཡོད་པ་ཕྱིས་ཞིག་ནས་མེད་པ་ནི། གཞན་འགྱུར་གྱི་དངོས་མེད། བུམ་པ་དང་ཀ་བའི་སྤྱི་ལྟ་བུ་དངོས་པོའི་དོན་སྤྱི་རྣམས་ནི་དངོས་པོ་ལ་བརྟེན་པའི་དངོས་མེད། རི་བོང་གི་རྭ་སོགས་སམ། བུམ་པ་མེད་པའི་སྤྱི་ལྟ་བུ་མི་སྲིད་པའི་དངོས་མེད་དོ། ། ཏ༢ གཉིས་པ་[ལམ་]ནི། ཐུན་མོང་ཐུན་མོང་མིན། ། རྒྱལ་བའི་གནས་སུ་བགྲོད་བྱེད་ལམ་རྣམ་གསུམ། ། ཐུན་མོང་གི་ལམ་ལྷ་དང་ཚངས་པའི་ཐེག་པ། ཐུན་མོང་མ་ཡིན་པའི་ལམ་ཉན་རང་གི་ཐེག་པ། རྒྱལ་བ་སྟོན་པ་སངས་རྒྱས་ཀྱི་གནས་སམ་དེའི་གོ་འཕང་དུ་བགྲོད་པར་བྱེད་པའི་ལམ་ཐེག་པ་ཆེན་པོ་སྟེ། ལམ་རྣམ་པ་གསུམ་མོ། ། ཏ༣ གསུམ་པ་[ཆོས་ཀྱི་དབྱིངས་]ནི། ཆོས་དབྱིངས་དོན་དམ་འདུས་མ་བྱས་གཅིག་པུ། ། ཤེས་བྱར་སྲིད་པ་ཉི་ཤུ་རྩ་ལྔ་ཞེས། ། ཕྱིར་མི་ལྡོག་པའི་འཁོར་ལོའི་རྣམ་གཞག་གོ། ། ཉན་ཐོས་པས་འདུས་མ་བྱས་གསུམ་དུ་བཤད་པ་ལྟ་བུ་ནི་རྣམ་གྲངས་སམ་བཏགས་པའི་འདུས་མ་བྱས་ཡིན་ལ། འདིར་ཆོས་ཀྱི་དབྱིངས་དོན་ངེས་པའི་བདེན་པ་ནི་འདུས་མ་བྱས་གཅིག་པུའམ་ཁོ་ན་སྟེ། དེ་ལྟར་ཤེས་བྱ་ལ་སྲིད་པའི་ཆོས་མཐའ་དག་བསྡུས་པ་ཉི་ཤུ་རྩ་ལྔ་པོ་དེ་རྣམས་ནི་གཞི་དང་ལམ་གྱི་ཆོས་ཞེས། མྱ་ངན་ལས་འདས་པ་ཆེན་པོ་དང་རྔ་བོ་ཆེ་སོགས་ཕྱིར་མི་ལྡོག་པའི་ཆོས་ཀྱི་འཁོར་ལོར་གྲགས་པ་རྣམས་ཀྱི་རྣམ་གཞག་གོ། ། ཉ༢ གཉིས་པ་[མཚན་ཉིད་གང་ལ་འཇུག་པའི་གཞི་ཆོས་ལྔ་]ལ་གཉིས། ཏ༡ ཆོས་ལྔ་སོགས་མདོར་བསྟན། ཏ༢ གཉིས་རྒྱས་པར་བཤད་པའོ། ། ཏ༡ དང་པོ་ནི། གཞན་ཡང་མཚན་ཉིད་འཇུག་གཞི་ཆོས་ལྔ་དང༌། ། འཇུག་པའི་མཚན་ཉིད་གསུམ་ལས་འཕྲོས་པ་ཡི། ། རྟེན་འབྲེལ་ལ་སོགས་ཐེག་ཆེན་བསྡུས་པ་སྟེ། ། འཁོར་ལོ་ཐ་མའི་མདོ་སྡེ་རྣམས་སུ་ཤེས་བྱ་བསྡུ་བའི་གཞི་གཞན་ཡང་གསུངས་ཏེ། མཚན་ཉིད་གང་ལ་འཇུག་པའི་གཞི་རྒྱུ་མཚན་སོགས་ཆོས་ལྔ་དང༌། དེ་ལ་འཇུག་པའི་མཚན་ཉིད་ཀུན་བརྟགས་སོགས་རང་བཞིན་གསུམ་དང་(༢༠༦ན)དེའི་སྔ་མ་གཉིས་ལས་འཕྲོས་པའི་རྟེན་འབྲེལ་དང༌། སོགས་ཁོངས་ནས། བདག་མེད་གཉིས་ལ་སོགས་པ་ནི་ཐེག་པ་ཆེན་པོའི་ཤེས་བྱའི་དོན་བསྡུས་པ་སྟེ་རིམ་པར་འཆད་དོ་ཞེས་སོ། ། ཏ༢ གཉིས་པ་[གཉིས་རྒྱས་པར་བཤད་པ་]ལ་གཉིས། ཐ༡ ཆོས་ལྔ། ཐ༢ རང་བཞིན་གསུམ་བཤད་པའོ། ། ཐ༡ དང་པོ་ལ་ལྔ། ད༡ རྒྱུ་མཚན། ད༢ མིང༌། ད༣ རྣམ་པར་རྟོག་པ། ད༤ དེ་བཞིན་ཉིད། ད༥ ཡང་དག་པའི་ཡེ་ཤེས་སོ། ། ད༡ དང་པོ་ནི། གནས་སམ་ཡུལ་གྱི་སྤྱི་ནི་རྒྱུ་མཚན་ལ། ། བག་ཆགས་ལྷན་སྐྱེས་བློར་སྣང་རང་བཞིན་དང༌། ། བཏགས་བདག་གཟུགས་བརྙན་ལ་སོགས་དབྱེ་སྒོ་མང༌། ། སྒྲ་དང་ཡིད་ཀྱི་གཡོ་བ་རྣམ་རྟོག་གིས་བརྗོད་པའི་གནས་སམ་ཡུལ་གྱི་སྤྱི་ནི་རྒྱུ་མཚན་ཡིན་ལ། དེ་ཡང་དཔེར་ན། བུམ་པའོ་སྙམ་པའི་རྣམ་རྟོག་འཛིན་སྟངས་ཀྱིས་གཟུང་བྱ་བློ་ལ་ཤར་བའི་སྤྱི་དེའོ། ། དེ་ལ་ནང་གསེས་སུ། བག་ཆགས་སྣང་བརྙན་སྣ་ཚོགས་པའི་མཚན་མ་འཁོར་བར་ལྷན་སྐྱེས་ཀྱི་བློར་སྣང་བ་རྣམས་རང་བཞིན་གྱི་རྒྱུ་མཚན། གྲུབ་མཐའ་ལོག་པས་བཏགས་པའི་བདག་ཏུ་འཛིན་པ་ལྟ་བུ་གཟུགས་བརྙན་གྱི་རྒྱུ་མཚན། ཡང་ན། རྟོགས་མ་རྟོགས། གསལ་མི་གསལ། མཚན་བཅས་མཚན་མེད་ཀྱི་རྒྱུ་མཚན་གཉིས་གཉིས་སོགས་དབྱེ་སྒོ་མང་ཞིང༌། གཞན་རྒྱུ་མཚན་ཁོ་ན་ལ་ཆོས་ལྔའི་དབྱེ་བའང་འཇུག་སྟེ། རྒྱུ་མཚན་གྱི་རྒྱུ་མཚན་ནི། བུམ་པའོ་སྙམ་དུ་འཛིན་པའི་འཛིན་སྟངས་ཀྱིས་